رواية تائهة بين دوائر الانتقام الجزء الثانى الفصل الأول 1 - بقلم Emy Abo-Elghait

في بيت ابراهيم .. دخلت سارة المطبخ وكانت سهير واقفة بتحضر الغدا ..
سارة : صباح الخير يا ماما سهير ..
سهير : صباح النور يا قلب ماما .. ما بلاش ماما سهير هي ماما بس .. وبعدين صباح الخير ايه هو عشان احنا يوم اجازة تصحي لي العصر .. اه ما هو خالد مسافر يتفسح مع اصحابه وسايبك وروقتي ..
سارة: عيوني ماما بس.. وباست سارة سهير في راسها .. يوم اجازة حقي اصحي بدري .. وبعدين علي اد الواد خالد ما وحشني علي اد مانا مرتاحة كده .. مفيش حد يقف فوق راسي من الساعه 6 الصبح وبصوت تخين ( وبتقلد خالد ) ويقولي قومي يابت حضرلي الفطار ..
سهير بضحك: يخرب عقلك يا سارة .. بس بذمتك تقدري تفطري من غيره ..
سارة : للاسف لا .. خلاص اتعودت علي اننا نفطر سوا .. هو صحيح راجع امتي ؟
سهير : هو ياختي اخوكي ده حد عارفه له حاجة .. مبيقولش وانا نسيت اساله ..
سارة : ما هو واطي يطلع شرم ومن غيري لازم ينساني .. بس ليه يوم معايا ..
خالد : هو مين ده اللي واطي ؟؟
سارة وسهير بفزع : بسم الله الرحمن الرحيم ..
سهير : انت جيت امتي يابني ؟
خالد : لسه حالا وسمعت ناس بيقولوا عليا واطي .. وساب شنطته علي الارض وبيشمر اكمامه ورايح ناحية سارة ...
سارة وقامت من علي الكرسي اللي في المطبخ : مش انا .. قصدي مش انت ده حد تاني ,,, يا ليدو ده انت حبيبي ..وبتجري منه
خالد بغضب : انتي عارفه انا ممكن اقبل منك واطي دي ولا اقبل ليدو .. قلت لك مليون مرة بلاش الدلع الرخم اللي زيك ده .. بس عارفة.. انتي اللي جبتيه لنفسك وقعد يجري وراها في المطبخ وسهير في النص وماسكة في ايديها طبق شوربة كبير ,, سارة ماسكه في سهير وبتتحامى فيها وبتستخبي من خالد اللي عمال يحاول يضربها وفجاة وقع طبق الشوربة من سهير واتكسر ..
سهير بغضب : بقي كده ,, طيب والله لاوريكم انتوا الاثنين ,, وقلعت شبشبها وبتجري ورا خالد وسارة ..اتزحلقت سارة في الشوربة اللي في الارض ووقعت جامد ,, خالد واتكعبل في رجلها ووقع هو كمان ..
سارة : اااااااااه ذراعي,, اااااااااه مش قادرة الحقوني ..
خالد بيحاول يقوم وكل ما يقوم يقع من كتر الزيت اللي كان في الشوربة : الحقيها بقي انتي يا ماما انا مش قادر اقوم خلاص ..
سهير : تستاهلوا انتوا الاثنين علي الهبل اللي بتعملوه ده انا لو عندي اطفال مش هيعملوا كده ..ومدت سهير ايديها لسارة عشان تقوم ,, مسكت سارة في ايد سهير وبتقوم بألم وبعياط : ماما ذراعي بجد واجعني اوي مش قادرة ..
خالد وقام : هقوم اغير هدومي واطلعك عند كريم يشوفهالك ,, انتي خلاص بقيتي قدره .. يكونشي شغال عندك ..
سهير : يكونشي ؟؟ انتوا بتجيبوا الكلام ده منين ؟؟ حركي ايدك كده يا سارة .. وسارة حركتها بس بتتالم ,, هي شكلها اتجذعت بس .. قومي تعالي غيري هدومك عشان اتبهدلت وبعدين ابقي اطلعي لكريم يشوفهالك ..
قامت سارة تغير هدومها وهي بتعيط وبتتألم ... سهير بدات تنضف الارض ,, وخالد غير هدومه وخبط علي باب اوضة سارة : ادخل ؟
سارة : ده علي اساس انك في الشارع من انت جوه الاوضة ..
خالد : متعورة وبردو لسانك طويل .. ما تقولي اتفضل وخلاص ,,
سارة : وعادي كده اكلمك باحترام .. ده ليه ان شاء الله ؟ّ!!
خالد : عشام مهزأكيش يا مهزأة .. قومي ياختي نطلع لكريم
سبقت سارة خالد علي السلم وطالعة لكريم واللي ساكن في الشقة اللي قصاده حسام ووالدته ...قابلت حسام علي السلم ,,
حسام : سوسو ازيك يا روحي ؟
سارة بخجل : الحمدلله ..
حسام :انتي كنتي بتعيطي ؟؟ مالك ؟ وماسكة ذراعك كده ليه ؟!!
سارة : كنت بجري,,,,
قاطعها خالد باستفزاز : كنت بهزر انا وهي وجريت مني واتزحلقت وقعت جامد علي ذراعها وطالع انا وهي لكريم نطمن علي ايديها ,,,
سارة وبتبص للاثنين خالد المستفز وحسام اللي وشه علامات الغيرة والغضب ..
حسام بضيق : طيب ,, الف سلامة ,, هبقي اكلمك اطمن عليكي ,, سلام ,, وسابهم ونزل ...
سارة بضيق : ليه الرخامة ؟؟ انت بتتعمد تستفزه ؟؟
خالد بضيق : خايفة اوي كده علي مشاعره ياختي ؟
سارة باستفزاز : ايوة مش خطيبي ,,
خالد بضيق شديد : عليكي وعلي خطيبك ,, اطلعي بدل ما اكسرلك ايدك بجد,, امشي ...
طلعت سارة وخالد وفتحت لهم عمتهم شكرية اللي كل ما تشوف سارة تتعامل معاها باسلوب جاف وطبعا لان سارة طيبة مش فاهمة ان شكرية متضايقة منها ...
خالد وسارة : ازيك يا عمتو ..
شكرية : يا اهلا وسهلا .. اتفضلوا ..
خالد : عمتو هو كريم هنا ؟؟
شكرية : اه قاعد هو وياسمين جوه ,, كانوا بيكلموا يوسف من شوية ,, اتفضلوا ..
( كريم زي ما قلنا عنده اخوات ياسمين وولدين امجد ومسافر بره علطول ويوسف اللي خلص كليته وسافر عند امجد يشتغل بعد تخرجه علطول )
خالد : سارة بس وقعت علي ذراعها جامد وبيوجعها وكنا بس عايزين نطمن عليها .
شكرية وبضيق : امممممممم ,, الف سلامه عليكي ,, اتفضلوا كريم جوه ..
دخلوا سارة وخالد لكريم وخبطوا علي باب الاوضة اللي اول ما فتحها كريم وشاف خالد خرج له عشان ياسمين بشعرها وبلبس البيت ,, وقامت ياسمين لبست اسدالها بعد ما سمعت صوت خالد وخرجت لهم هي كمان وقعدوا كلهم في الصالة ..
كريم : سوسو مصايب ,, يا بت هو انتي كل يومين جيالي باصابة شكل هههههههههه ..
سارة بضحك : بجيبلك شغل يا ابية ,, بدل ما تقعد عاطل ..
كريم بضحك وضربها علي كتفها ضربة خفيفة : عاطل مين يا حمارة انتي ,, الشغل كتير بس انا طموحي عالي ومش لاقيه ,,
سارة : احب اطمنك انك مش هتلاقيه ..
شكرية بضيق : انا ابني من الاوائل وان شاء الله هيلاقي احسن وظيفة ومش عاطل ياختي ولا حاجة
سارة بخوف : انا اسفة يا عمتو مش قصدي انا بهزر بس ..
شكرية وبتلوي شفتها : لا يا حبيبتي ابقي احسبي كلامك كويس معدتيش صغيرة ,,, الا قوليلي صحيح هي لسه المكالمات اللي فيها واحد بيكلمك وبيهددك لسه بتجيلك ؟؟
سارة بألم بعد ما كريم ضغط عليها وهو بيربطها : اااااااه حاسب يا أبيه وجعتني .. سارة وبصت لشكرية وقالت بكذب وبتوتر : لا ,,
شكرية : اممممم ,, ماشي .. هقوم اخلص الغدا عشان ابوكم اللي جاي وبصت لكريم وياسمين ..
ياسمين بحب : الف سلامه عليكي يا سوسو ,, ابقي خلي بالك .
كريم : معلش جت بسيطة بس مجرد جذع بسيط ,, خسي شويه تقل جسمك لما وقعتي علي ذراعك كان كتير ,,
سارة : اخس عليك يا ابيه .. ده انت حتي مابكلش ..
خالد بضحك : يابنتي انتي مخلصة علي الاخضر واليابس في البيت ,,
سارة بضيق : انت بتعد عليا اللقمة يا استاذ ؟؟
كريم : بس بقي بطلوا خناق ,, ياربي .. يلا ياستي خلصت خلي بالك من نفسك وابوس ايدك كفاية حوادث ..
سارة بألم : بس هي بتوجعني ,
كريم : لازم توجعك معلش هديكي مسكن وهتبقي كويسة .. ياسمين هاتي لي كوباية ميه وعلبة المسكن اللي في الدرج عندي ,,
جابت ياسمين الدوا واخدته سارة,, ودخلوا البنات اوضة ياسمين وقعدوا الشباب بره في الصالة ..
,,,,,,,,,,,,,,,,,,,,,,,,,,,,,,,,,,,
في اوضة ياسمين ,,
ياسمين :ما هو مش هسيبك غير لما تحكي لي اللي حصل بالتفصيل ,, مالحقتش اسمع منك المرة اللي فاتت ..
سارة : معلش ماهو اسلام بقي دخل علينا وانا مش هحكيلك قدامه .. وغمزتلها سارة وضحكت .
ياسمين : بس بقي يا رخمة .. انا بقولك اهو ابعدي اخوكي ده عني ها ,, عشان انا ,,,,
قاطعتها سارة : بتحبيه وبتموتي فيه ..
ياسمين بخجل : والله العظيم انتي رخمة ,,, طيب وانتي بتحبي حسام ؟
سارة وبتتنهد : مش عارفة .
ياسمين : يعني ايه مش عارفة ماهو ياما اه ياما لا ؟
سارة : بعد اللي حصلي مع ماجد والفترة اللي قضيتها في الحزن عليه والهجوم اللي لاقيته من الكل واولهم سيف مكنش ينفع احكم قلبي في حاجة ,, كان لازم احكم عقلي ,, وعقلي كان بيقولي لازم اوافق علي حسام , بالرغم من اعتراض محمد وخالد الشديد ووقوف عمو ابراهيم ليهم الا اني بردو صممت علي رايي , مش عارفة بقي لاني متاكده اني مش هلاقي حد هيقبل بظروفي ولا عشان كنت غيرانة من محمد وشهد ومن حبهم ونفسي حد يحبني انا كمان بس ميأذنيش,, وحسيت ان الحب هو اللي هيعوضني عن اللي حصلي ..
ياسمين : ولاقيتي الحب اللي هيعوضك ؟!!
سارة بحزن : للاسف لا يا ياسمين .. صدقيني مش قادرة احس اي حاجة من ناحية حسام بالرغم من انه كويس معايا اوي وبيتعمد انه يظهرلي حبه .. ماعدا بس اللي حصل من يومين ضايقني منه ..
ياسمين : ايوة بقي ايه اللي حصل ؟
سارة : انتي مش هتسيبيني غير لما تعرفي انا عارفة .. بصي يا ستي لما كنت طالعة اسقي الورد بتاعي اللي علي السطوح قابلته علي السلم ,,

فلاش باااك***

حسام : ايه ده القمر بيطلع بالنهار ,, صباح الفل والورد والياسمين يا احلي وردة في حياتي ...
كلام تتمني اي بنت تسمعه ,, ولكن ..
ردت سارة بكل جمود وخجل : صباح الخير..
حسام : روحي عاملة ايه النهاردة ؟؟ ورايحة فين عالصبح كده ؟
سارة : طالعة اسقي الورد بتاعي ,, خايفة يكون مات بقالي يومين ماسقيتهوش ..
حسام : وكل الزرع بيتسقي .. والحب زي الورد لازم يتسقي .. وانا بموت قدامك وانتي رافضة تديني المية ..
سارة : يعني ايه مش فاهمة ؟؟
حسام : يعني مش عايزة تحسسيني بحبك علطول جافة معايا ,,عايزك تحسسيني بحبك ,, وبيقرب حسام منها ببطئ ..
سارة بخوف : مش فاهمة ؟! عايزني اعمل ايه يثبت لك اني بحبك ؟!!
قرب حسام منها اوي وسارة بدات تترعب وافتكرت قرب ماجد منها وبدأ جسمها يتنفض ,, وقرب حسام من وشها وحاول يبوسها ,, وفي نفس اللحظة كان كريم خارج من شقته وشاف المنظر ..
كريم بزعيق : انتوا بتعملوا ايه ؟
سارة بتجري ناحية كريم وقالت بتوتر : ولا حاجة يا ابية ..
بص كريم لسارة بغضب ..
حسام : ولا حاجة واحد وخطيبته واقفين وبيتكلموا ايه الغريب في كده .. انتوا عالم غريبة ,, يلا يا سوسو انا ماشي نبقي كلامنا بعدين سلام يا روحي ,, وسابهم ونزل ,,
وشكل وش كريم مع غضبه خلى سارة مرعوبة ..
لف كريم وادى ظهره لسارة وفتح باب شقته تاني وفجاة سحب سارة من شعرها جوه شقته ..
سارة بألم : ااااه .. يا أبية والله ما عملت حاجة ..
كريم وضربها علي وشها ولسه ماسكها من شعرها : لا والله امال اللي انا شفته ده ايه ؟؟ .. وضربها بالقلم تاني ,, ولو سيادتك ماعملتيش حاجة سمحتيله يقرب منك كده ليه وقعد يضرب فيها وسارة مقدرتش تتكلم ...
خرجت شكرية وجوزها وياسمين علي صوت سارة
ياسمين وبتسحب سارة من ايد كريم : في ايه يا ابية ؟؟ خلاص ابوس ايدك خلاص .. ايه اللي حصل ؟؟
كريم بزعيق : الكلبة دي تفضل هنا لحد ما ارجع ,, والله لو لمحتك بره انتي حرة ,, وابقي شوفي اخواتك هيعملوا فيكي ايه لما اقولهم ..
سارة بعياط : والله ما عملت حاجة .. والله ما عملت حاجة,, ابوس ايدك بلاش تقول لحد ,, وخاصة خالد ومحمد ,, والله انا ماكنتش متوقعة انه هيعمل كده ابوس ايدك ماتقولش لحد ..
ضربها كريم تاني وقال بزعيق : كونك انك سكتي حتي لو رافضة تبقي غلطانة اكتر منه ,, وطالما انتي خايفة كده يبقي عارفة ان اللي عملتيه كان غلط ,, بس لا هقولهم وهم يتصرفوا معاكي ,, وسابها كريم ومشي ..
قعدت سارة تعيط وتقول : والله ما عملت حاجة ...

باااااك **

سارة : بس يا ستي ده كل اللي حصل ..
الصدمة علي وش ياسمين من اللي قالته سارة وبعد صمت لحظات ...
ياسمين بقلق : سارة خلي بالك حسام جرئ اوي بدليل انه قدام ابية كريم حتي ماخافش انه شافكم كده,,
ثانيا بقي انتي غلطانه انك سمحتيله انه يقرب منه كده ,,
سارة بضيق : خفت يا ياسمين مقدرتش اتحرك ,, حسيت جسمي كله فجأة بقي تلج ومش حاسه بأي حاجة ومعرفتش اتصرف ,, وافتكرت ماجد والي كان بيعمله ..
ياسمين بحب : سارة حبيبتي خلي بالك علي نفسك ,, حسام تصرفاته متهورة والعيلة كلها عارفة مش عارفة اصلا ازاي خالو ابراهيم وافق عليه ,, واشمعني انتي دون عن البنات اللي حسام اختارك ..
سارة : اخس عليكي وانا وحشة ولا ايه ؟!
ياسمين بضحك : لا يا قلبي والله ما اقصد .. بس انا احساسي ان حسام ده ارتباطه بيكي وراه هدف ويارب يطلع احساسي غلط ,,
ساره بقلق : ابوس ايدك ماتخوفنيش ,, انا مش ناقصة ,,
فجأة خبط باب اوضة ياسمين ,,
ياسمين : مين ؟
كريم : انا يا سمسمة ,,
ياسمين : اتفضل يا ابية ,,
كريم : سارة خالد عمال يقولك يلا ومش عايز يتغدى معانا,, خليكوا اتغدوا معانا وبعدين انزلوا ..
سارة : لا انا جايه انا بحب اتغدى مع بابا .. معلش وقت تاني ..
ياسمين : بطلي رخامة وخليكي ملحقناش نقعد ,,
سارة : مش مشكلة ابقي اطلع لك او تنزلي لي ,, مع انك مبتعملهاش كتير ,,
كريم : سارة حبيبتي .. هي مش بتنزل عشان انا مش بوافق ,, انتي تحت عندك شباب كتير داخلين خارجين لكن هنا انتوا براحتكم وانا اغلب الوقت في الشغل مش موجود ... وبعدين تعالي هنا انتي عمرك طلعتي هنا غير مع حد من اخواتك مش بتطلعي لوحدك يعني لما بتعرفي ان انا هنا ..
سارة : خلاص يا ابية ,, بس انا بطلع بحد من اخواتي بتحامى فيه بعد اللي شفته منك ,, علي اد طيبتك وهدوئك الا انك عصبي وبتضرب بغباء ..
كريم وبيرفع حاجبه وبحدة : انتي عايزة تنكدي علي نفسك ليه ؟؟ ما تخليني ناسي وساكت احسنلك ..
سارة بخوف : يخربيت اللي يزعلك يا اخي ,, يلا سلام ونزلت هي وخالد ..
,,,,,,,,,,,,,,,,,,,,
اول ما نزلت لقت سيف موجود جريت عليه وحضنته ...
سارة وبفرحة شديدة : ابية سيف ,, والله زعلانة منك ,, كده يومين لا بتيجي ولا بتسال وكمان قافل تليفونك .. لا بجد زعلانة ..
سيف وسحبها من ايديها وقعدها جنبه : كنت في مأمورية وغصب عني والله .. وبعدين يا هانم هو انتي مراتي عشان تحاسبيني ,,
سارة بضحك : مراتك هههههه لا بعد الشر عليا ,, دي ربنا يكون في عونها اللي هتتجوزها ,, وغمزتله سارة وضحكت ..
سيف وقرب من ودنها وهمس : قريب اوي هتدعيلها اللي هتتجوزني ....