رواية طفوله ملوثه بالواقع الفصل العشرون 20 - بقلم d3do3a

الفصـــل الخامس والعشـــرون ...

عندمـآ يصبح الألم ياأخد الحيز الكبير من قلوبــهم
فطفلــي سامي ينـآم من القهر والألم
ولمـى بين صرآع بين الحب او الضميـر
ترف ابتسامه أمل تعلو على وجهها
ودموع الخوف من الغد مازآل هاجس يلاحقها
هديـل تختبئ كالطفله ف حضن والدتها
لكن لاتستطيع ان تشعر بالأمان
تريد ان تتمسك بالحلم وحتى لو أنه وهـم
روآن على تلـك الدرجـآت تنظر لشخص مجهول
وتطلب منـه ان يبقى بجانبها
كيـف لتلك القوه ان تتبخر وتصبح بذالك الضعف
بشـآر بين القضبـآن يحاول ان يكبت
الف صرخه ومازال الجنون متملك من قلبه ...

نزلت رآسها بكل انكسآر بكل ضعف على فخذها وشهقاتها سبقتها
قلبها يوجعها وخايفه تجلس لوحدها
خايفه من الحياه
خايفه من بكرا
خايفه من نفسها
ومن كل شي
قويــه
حاسه انها قويـه لأنها متمسكه بدي الحياه بدي اللحظه
جاسم كسرها
كسرها لما وقف قبالها بكل عين قويـه ومافي بعينه اي ندم لأنه حرمها من حنانه
وجاه يهددها بدا العمر باأمها اللي ماحتطلع اكيد احسن منو
هيا ولاشي بدي الدنيا دا اللي عرفتو
ليش متمسكه بدي الحياه مو عارفه
طيب ليش دا كلو بيسرلها برضو مو عارفه
ليش من بين ملايين الأطفـآل هيا عاشت دي الحياه
محد عارف ايش شافت بالشوارع
محد عارف ككم مرا انضربت كم مرا اترمت من اصحاب المحلات لما تقرب منهم
وبعد دا كلو يجي يقولها انا نقصت عليكي بشي ..؟
سئلها بكل عين قويــه
اصلا نظرتو لوحدها وصوتو دمرها
واقف قبـآلها ويسمع صوت بكاها ويطالع حولينه الشوارع فااضيه بدا الوقت
رجال بس كآن شايل اكيآس العشا لأطفاله طالع فيهم ودخل العمآره اللي قبالهم
لأول مرا مايعرف ايش يسـوي
قال بكل تردد : ايش بك
قالها بصوت راخي
بصوت واحد حزنآآن بس مو قادر يتحرك مو قادر يسوي اي شي
الف حاجه مانعته
ماعلقت ماتكلمت كآنت تبكي وبس
تبكي وعارف انو اللي بتمر فيه شي مو بسيط
بكاها مو طبيعي
رفعت راسها مسحت دموعها ومازالت تنزل
وجهها محمر وطالعت فيه وهوا مرا اتوتر : ابا اسئلك سـ سؤال واحد
تاخد شهقاتها وترجع تتكلم : لو لو عندك بنتيـن حتقدر تفرق فيهم .؟
تامر قلبــه يدق بسـرعه واشر براسه بلا
رجعت اتكلمت : طيب لو وحده فيهم مو طيبه والتانيه مرا طيبه حتقدر تفرق بينهم .؟
تامر يجاوب وعينه مانزلت من عليها : لا
رفعت يدها وتمسح دموعها : طيب لو انها مرا مو طيبه مرا لدرجه مو عارف تربيها ايش حتسوي فيها
بلع ريقه وسار مو عارف يجاوبها
متذكر كلامها
وكأنه يتعاد جوت رآسه
هيا بنته التانيه اللي هانها اللي عيشها في الشارع
تسرق وتشحت
وديك عايشه باأحسن مكآن داا اللي فهمو ..
ابوهـآ اللي عيشها دي الحياه
يبا يجاوب على سؤالها بجمله طبيعيه وهوا انو مستحيل يفرط بطفلـته ولو كآنت اكتر انسانه سيئه بالحياه بس مو قادر يقولها
روآن : جاااوبني
تامر طلع اول درجتين وجلس على نفس الدرجه اللي هيا جالستها
بس بينهم مساافه مو بسيطـه بزبط جلس في طرف الدرج
حزنـآن عليها يبا يقولها شي يريحها شي يهديها : لاتحطي الموضوع عليكي
دارت راسها وهيا تطالع فيه وتتكلم : اجل احطو ف ميـن ؟
تامر نفسها تنزل عينها وهيا تكلمو كدا نظرتها كاسرته مخليته بمية احساس وقبل لايتكلم
ميلت جسمها كلو وهيا ترجع شعرها ورا اذنها وترفع يدها تمسح دموعها بسرعه وتتكلم : انتا ماتعرفني صح ؟
حركااااااتها توتره : ايوا ماعرفك
تامر : طيب شوفت تصرفاتي شوفت حركاتي تقدر تحكم عليا صح ؟
تامر مو عارف لإيش تبا توصل
وروان وصلت لمرحله تبا تعرف ايش العيب للي فيها
العيب اللي يخلي حور احسن منها
تامر : يعني
روان : قولي ايش العيوب اللي فيا
تامر كل العيوب اللي قالها لترف فجأه اتبخرت من راسـه : نظرتي ليكي مو زي نظرة ابوكي
روان : لا انا ابا اعرف حتى لو غريب هوا عاملني زي الغريبه ابا اعرف منك
بتشتكي لواحد ماتعرفو
بتشتكي لشخص غريب عشان تعرف ابوها ليش رمآها
دي المرحله اللي وصلها هيا جآسم
ايش يقولها مو عارف
مستحيل يغلط ولا يقول شي عنها
وبنفس الوقت كيف يمدحها
ايش المفروض يقول مو عارف
عيونها عيونها مانزلت
تدور اجابه
عدسه عينها بس على عينه مخليتو مو على بعضه
بيحاول يعللق يبا يجبر قلب بنت مالها احد
يحس المفروض مايكسرها
يتغزل .؟..!؟
لا لا مايعرف يتغزل مرا
سلمى بالقوه يتغزل فيها لأنو حافظ الكلام
حافظو مو يعبــر عن حاجه شايفها بعينه
حاليا هوا بموقف المفروض يعبر
قال بكل توتر وهوا بجد بيعبر عن الشي الحلو اللي شافـه فيها : كل اللي اعرفو عنك .. انك خليتي اختي ماتفكر انها تنتحر .. _ يطالع بعينها وبدأ يتكلم بثقه وهوا بجد ماينسى كلامها _ شوفت فيكي انسانه عاقله رغم انك قلتي عشتي في الشوارع .. ومية بنت غيرك فأول لحظه تنهار فيها تفكر بدا الشي انتي اعقل من إنو اب يقارنك بوحده تانيه
سكت شويا وبعدها رجع اتكلم : لما ربي يديكي ناس مايشوفو قيمتك لاتبدأي تدوري ايش العيب اللي فيكي قولي هما ايش اللي ربي عاميهم عشان مو قادرين يشوفو الشي الطيب .. شكي في الناس بس لا تخلي لحظه تجيكي وتشكي بنفسك
مافي اي رده فعل غير انها تطالع فيه
تفكر باين انها بتفكر بكلامه
قلها انها مميزه عن بقيه البنات
قلها انو فيكي شي حلو
قلها الغلط من ابوها بس مستحيل يكون منها
ابتسامه اترسمت بسيطه ودموع تنزل
واختفت ابتسامتها على طول لما رفعت يدها ومسحت دموعها
وجعته الابتسامه لأنه حس انو فرحها
عدلت جلستها وطالعت قدآم ورجع شتت نظره
بسيطــه
انسانه ضعيفه ودا اللي يدل على ضعفها لما الغريب قلها كلام
خلاها تبتسم
وكأنه صب على قلبها المحرووق شي باااارد
يطفي حرقه قلبها ولو دقايــق
تلعب باأظافير يدها وكلامه يتردد براسها
وماتبى جاسم يجي في راسها ولو ثواني
رجعت دارت جسمها تاني طالعت فيه وهوا دار راسه
لما ماهرجت رفع حاجبه وقال : ايش بك
روان ابتسمت بين كل اللي فيها ورفعت كتفها وكأنه تقوله مدري
ابتسم لاشعوريا على ابتسامتها
شتت نظره لما حس انها ابتسامتها كدا جذبته
رجال في النهايه طبيعي يبدأ ينجذب للأشياء الجميله الي فيها
: كيف راسك
رجع طالع فيها وماستوعب : راسي !
: الضربه اللي
قاطعها لما استوعب : اها لا تمام
سكتت للحظات وبعدها سئل بتردد : مين داك ؟
روآن رجعت رفعت كتفها
وهوا ابتسم لاشعوريا شكلها كيوت كل ماترفع كتفها
مع انو الموضوع ماينفع انو يبتسم فاأختفت ابتسامته على طول : كيف ماتعرفي
بيدخل بتفاصيل مو طبعه يسئل ويستفسر
بس بجد الفضول قاتله على دي البنت
روآن مو عارفه ايش تقوله مو عشان ماتبى تقول
لا
عشان مستصعبه تقول بابا : ارسلو داك كآن يباني
تامر : مين داك
روان : نفسو اللي قلتلك عليه
تامر بااستغراب : ابوكي !!
روان كشرت وعرف الجواب من نظرتها
وهنــآآآ حاس
وبيسئل نفسه
ايش يبا منها
كيف يرسل واحد همجي لبنته كدا!
اسئله مرا كتيــر !!!!
وقطعت تفكيره لما وقفت ...رفع راسـه
روآن : انا حدخل انام
وقـف وسار فرق الطول بينهم واضح
مع انها مو قصيره روآن
: طيب تصبحي على خير
استنتو يمشي وهوا استناها تدخل
: يللا
تامر ماستوعب : ادخلي انتي
روآن مع التعب ماتناحلت معاه بعباطتها المعتاده : طيب
دوبها ادته ظهرها ورجعت دارت عليه وابتسمتلو
ابتسامه كدا وحده باين انها مو مبسوطه بس حاليا شويا شويا مرتاحه
جات قباله بزبط وعينها بعينه هرجت بهدوووء : شكرا دي تاني مرا تفرحني
قالتها بااسلوب خلتو يرتبـك من نظرتها
يرتبك من وقفتها كدا قدامه
يرتبك من نبرة صوتها
بالقوه نطق الكلـمه : عـ عفوا
وقدم خطوه وكأنو داخل معاها العماره ورجع دار وخرج باارتباك لما استوعب انو المفروض يخرج
ولما مشي استوعب كمان انو اصلا كان مستنيها تدخل بس خلاااص مشي من ردة فعلو البلهههه
اما هيا شاافتو حاااس حولين نفســه وفجأه اختتفى
ضحكت بفجعه بجد يستحححي ... ووجهه حمرر !!!!!
مشيت في السيب وضحكت تاني بهدووء
عمرها ماشاافت واحد كدا
اما هوآ وصــل لسيارته ركب ومشششي على طووول
استوعب ردة فعلو المتوتره
ايش البلاهه دي مو عااارف

روآن فكت الباب وبتحاول تتذكر كلامه عشان ماتبكي
عشان تعرف انو هيا مميزه والعيب ف جاسم مو فيها
دخلت الغرفه جلست شويا وبعدها انسدحت ضحكت تاني لما اتذكرت انو دخل العماره : اهبل
ومآكانت عشره دقايق الا اختفت الضحكه والابتسامه ورجعت تتذكر يومها
بس مافكرت كتير واستستلمت للنوم ... بدون لحاف على جسمها بدون شي تحت جسمها
على ارض صلبـه ومكآن فاااضي ...

صبـآح يوم جديد ...

السرير مريــح ... لكن مو حاسس باأي راحه جوته
دموعه بللت مخدتـه
كره انو يكون عندو اب
كره وجوده
كره اليـوم اللي وقف قدامه
كره اللحظه اللي خرج فيها من عند امـه وسابها لوحدها
ضربه بس عشان ساب الناس ودخل لغرفته
ساب الجو اللي مستحيل حيستمتع فيه بيوم
وماتكلم ولا كلمـه
انضرب بدون مايبرر
بدون مايعلق
مو عشان شي عشـآن تامر قلو خليــك دي الفتره كويس معاه
كيف دي اليومين حتمر مو عارف بس حيحاول يثق ف خـالو وبس

بشــآر ساند جسمه على الجدار الرمآدي حولينه رجال
من اعمار مختلفه من اجناس مختلفه
كل واحد بهمــه وكل واحد محبوس لسبب
قلبه يدق بتعب من كتر مو مرهق
كل مايبى يغفى يرجع يفتح عينه
مو حاسس باأي ندم على اللي سوآه ...

تـآمر لبس ثوبه الاسود بدأت الأجواء تبرد وكالعاده مايلبس دا اللون
الا في الشتآ ...
وقف عند شاحن الجوال ومسك جواله لقى رسايل من سلمى
وكشــر
كرهها حاليا اضعاف اضعاف اول
فصل الجوال ودخلو جيبو من غير مايفتح محادثتها ..
كل شي محفور براسه
ترف ونظرتها اللي واثقه فيه
قاســم وجرأته وكيف عرفه على سامي بكل حقاره
سامي وكيف مكسوور
وكدا فجأه جات من بين افكاره
روآن ...!
فتح بـآب غرفته
وابتسم لما اتذكر كلامها " شكرا دي تاني مرا تفرحني "
يحرك سويتش السياره بيده ومبتسم وماشي بااتجاه باب الشقه
: الشمممممس من فين ططططالعه

رفعت جسمها من على السرير بس اليوم مبتسمــه
سحبت جوالها واتصلت على طــول على براء
حطت السماعات باأذنها وراحت للمطبـخ صبتلها عصيــر
واتوجهت لغرفه ســآمي
تبا تنظف الغرفه
تبا تجهزها
مع انو ماتباه ينام بغرفته تباه ف حضنها
بس برضو حتزبطها وحتى لو لسى باقي يومين
: هلا ياقلبي
مبتسمه وتتامل غرفه سامي وبيدها العصيـر قالت بسرحان وبدون ماتحس: ايوا حبيبي
ووسعت عينها لما استوعبت انها بتكلم براء

مسدوح في الغرفه الظلام وكالعاده عدي مايحب اي نووور فيـها
رافع جواله ولدحين مانام وهوا يتكلم مع علا
كتبلها " حسبيه الله ونعم الوكيل بجد الحب مايخلي الواحد عندو كرامه "
علا " ههههههههههه ظهرك وجعك ؟ "
لؤي " انا مو حاسس بظهري ياريت يوجعني عشان اطمن "
علا " ههههههههههههه حياتتي "
لؤي " والله اخوكي دا واحد وسخ سار الكل يدعي مايتضارب مع مرته عشان لايلعن ابو شكلنا "
علا " بجددد مرا ماتوقعته كدا حيكون كنت خايفه على البنت سرت خايفه عليه من كتر مو متعلق فيها "
لؤي " شكلها بنت حلال وعدي دا اللي يباه عشان كدا متخرفن "
علا " ايش قصدك "
لؤي " اوووه بدأنا نفسنه "
علا " هههههههه شوف حطيتلك شي تحت الباب "
لؤي بعد الجوال وحطو بااتجاه الباب لقى شي مرمي في الارض
قام على طول اخدو ورجع انسدح حاتط اضائه الجوال وماقدر يمسك الورقه والجوال فانسدح على بطنه شغل فلاش الجوال وثبته بالارض ومسك الورقه وفتحها ..
وجلس يقرا وكل شويـه تزيد ابتسامته وبعدها اختفت ابتسامتـه
" طول اليوم نفسي اقولك دا الكلام مدري ليش ماسرت اقدر اتكلم زي اول او اعبر
لؤي انا مرا احبك مو احبك انتا عارف اني اموت فيك والله بس الفكره تخليني ا بكي
خايفه تسيبني مرا تانيه خايفه اتعامل منك نفس معامله اول انتا ماتدري قد ايش نفسيتي تعبت
وعارف اني ماحب ابين لاأحد.. في غرفتي كنت ابكي كل يوم واخرج اقعد مع الكل وكأنو مافي شي انا ضعت دي الفتره من دونك .. تصويري والمقاطع اللي كنت ارسلها عمرها ماعبرت عن اللي جوتي ابتسامتي عمرها ماكانت من قلبي ,,كل شي انكسر لما انتا روحت وكل مااوقف قدامك ابا ارجع اقولك احبك ولا ارد عليك لما تقولي وحشتيني فيه شي يوقفني خايفه انطق دي الحاجات خايفه ارجع لحياتنا الاولى ويسير شي مو عارفه اكون طبيعيه لأني خايفه ومو قادره ابعد عنك لأني ماقدر اعيش بدونك قولي ايش اسوي ؟ "
قعد يتأمل الكلام كدا مرا يعشــقها
وفكره انو يسيبها دا شي مستحيل يســويه
كيف يقدر يرجع تثق فيه زي اول .؟
للحظه سار بيحاول يفكر
اما فوقــه وعلى السرير نام بدون مايحس
عليه اختبـآر وماذاكر على اساس حياخد غفوه ويقوم ومع القهر من لمى نام وماحس
مد يدو للجوال وهوا شبه نايم يبا يشوف ردت عليه
فاتح عين ومقفل عين واول ماشاف الوقت فتح عينه بسرعه الاتنين
رممى اللحاف نسسسي انو فيه احد نايم بالارض ونط ديك النطه ودعس وجه لؤي
وطاااح في الارض
لللؤي من وضعيه اللي مسدوح على بطنه ورافع شويا راسه لوضعيه راسه والبلاط واحد
دمممر ابو وجهه ...

عكــس تماما عدي مستحيل تنآم ف مكآن ظلام لازم اضائه بالغرفه متجهزه للجامعه
وجالسه بطرف سريرها
عدي امس كآن اسلوبه مرا هجومي معاها
ماقدرت تنآم وهيا تتذكر صوت امل .. رفعت يدها ومسحت دمعتها لما حست ولأول مرا عدي مو بصفها
مرا مخليها دا الشعور ضعيفــه
قفل منها معصب وجلست ماسكه جوالها تستناه يتصل ماتصـل
: لممممى يلاا
رجعت مسحت دموعها ووقفـت

جالسه وضامـه رجولها بالغرفه الفاضيـه
ميته جووع ودايخه
نفسها تروح لهديـل
نفسها تشوف بشار
بس مو عارفه كيف توصـلهم
تبا تطلع تتصل من جوال ترف على بشآر
بس مافيها حيل تطلع الدرج
رجعت انسدحت وغفت مرا تانيه

مسدوحـه على السرير ومفتحه عينها تطالع في امها
وهيا جالسه على الكرسي اللي قبال التسريحه
وتحط كريم في يدها
مسـرحه ودموعها اتجمعت بعينها
ليش حتى لما وصلـت لحلمها
طلع الحلم يوجع
ليش لما قالت اخييرا
ماقدرت تكملها لأنو دموع الصدمـه تلحقها
ليش بيسرلها كدا
تحس انها تبا امها وتبا تشرد منها
تبا حضنها وكاارهه حضنها
ريحتها اشتاقتلها بس حاليا سارت مو حابتها
قعدت ترسم لدا اليييوم سنين
وطلع ابششششع بكتير من جاسم
ابشع بمليون مرا من الف حاجه شافتها بدي ال 14 سنــه ...

انفتـحت الزنزآنـه بس الشرطي نادى بصوت راخي
مو زي دايما لما ينادي بصوت جهور ..بيناديه وهوا مستحي منو : بشار
رفع عدسـه عينه عليه وبعدها وقف خرج وانقفلت الزنزانه جاي يمسكو
الا بشار طالع فيه بنظرة واحد بيتمشكل وكأنه ماكفاه اللي سواه : عاارف طريقي
ومشي والشرطي ورااه
عارف انو عمو اللي مستنيـه
عارف انو سابو بالعنيـه ومارضي يخرجو للصباح
بااتصال من جميـل اصلا كان باامكانه ماينحبس
بس حبسـه عشان يهجـد
لكن
مافرقت معاه بشار ..
دوبو الشرطي بيدق الباب الا بشار فتحو ودخــل جميل طالع ف صاحب بشار واشرلو يخرج ..
وبشار راح اتوجه للكنبـه ورمى جسمه عليــها : اخيرا شي مريح
جميل واقف ورا الكنبه اللي قبال بشار سند اياديه الاتنين عليها : عاجبك اللي سار امس
بشار : ايش سار ؟!
جميل أتنرفز وبشار ماسوا شي لدحين قال بعصبيه: بشار مو انا اللي يتصلو عليا اخرر الليل
ويقولولو ولد اخوك مسجون
بشار : انا ماطلبت من احد يتصل
جميل : على اساس محد يعرفك هنا احمد ربك الولد اتنازل جلست للصباح معاهم في المستشفى _ بعد يده من على الكنبه _ قوولي بلله ايش سوالك ايش سوالك عشان تضربه كدا
مايتذكر
فعلا مو متذكر ايش سواله
بس يحس انو يستاهل الضرب ليش مايدري كدا فجأه حريقه حسها جوت قلبه وهوا يطالع بالولد
جميل : ااايش سوالك
بشار بتشتت : انا راجع البيت تعبب
جميل قاطعه وهوا يتكي على كلامه : بشااار اهجججد اهجد وفكر قبل لاتسوي شي مجنون
جلس قبـآله : انتا مستوعب انك كنت حتقتل ابوك ..بشااار ايش ماكان دا ابووك كيف تفكر
بشارهنا ينتهي كل الكلام عنده قال بصوت يادوب يطلع : قفل الموضوع
اذا عمو مو قادر يستوعب لدحين المنظر اللي شافه
فابشار لدحين يحس اللي سار يمر قدام عينه
جميل سحب جسمه لطرف الكنبه وهوا يهرج بسرعه : ياااولدي ياولدي مايسير اللي بتسويه تعال دي الفتره اقعد عندي
بشار وقــف شاف مفاتيحه وجواله على مكتب جميل سحبهم
واتوجه للباب
جميل ناداه ولا كأنه سامعه فتح الباب وخرج
جميل مو عارف ايش يسوي
لما اتصلو عليه اخر الليل قام زي المفجوع
ماستوعب بزبط مين اللي بالمستشفى
حاليا مو عارف يتعامل مع بشار
هوا مرا حنون مع بنـآته وطول عمره حنون مع بشار
بس سار بشتت بين يستخدم الشده والولد بيمر بحاله صدمـه لسى
ولا يحاول يداري عليه ماسار عارف

امــآ بشآر

ميت نوم ميت جووع ميت قهـــر
صاحي له 24 ساعه
اكل برضو اخر مرا هوا وروان امس الصباح
مقهور من نظرات الناااس وهوا ماشي حاليا
خرج على طول ويطالع يمين ويسار واستوعب انو سيارته مو هنآ
كانه فيه حيـل للمشاوير
وقفلو تاكسي وودآه لبيتــه اول مادخل غرفته
اخد ريموت المكيف شغله وهوا يفسخ الجزمه
جلس على السرير رمى الشراب وانسدح على طوول
نآم ف اقل من دقايق

* الشمـس من فين طالعه
دار مفجــوع وشاف تميم خارج من الحمام وبينشف شعره ومبتسم
تميم دايما يصحى رايــق عكس تامر اللي يكون مكشــر
ومايحب احد يتكلم معاه لين مايشرب قهوته ويفوق ..
تميم : مين اللي مزبط جو اخوويا
تامر كشـر واداه نظره بس خلى تميم يضحك : اسئلك بلله ايش مخليك تبتسم
تامر واقف عند باب الشقه ويدخل رجلو في جزمتـه : تميم وربي مني فايق لروقانك دا
تميم : ههههههههههههه عندي فضول ماحقدر اكمل يومي
تامر ولا كأنه تميم يهرج فتح باب الشقـه وخرج ...
تميم على نفس الوضعيـه يضحكك
شي غريب مرا غريب عندهم انو يشوفو داك الكائن مبتسم في الصباح
تميم دخل لغرفتـه اخد السكراب ولبسـه وجلس على سريره
اتصل على رشآ اربعه مرات
وبعدها ارسلها على الواتس
" ردي بلا هبل "
ورجع اتصل مرتين لين ماردت
وباين صوتها انها دوبها صاحيه : ايوا تميمم
تميم : لسى زعلانه
رشا بتعب : نايمه انا نااايمه
تميم : طيب قومي ابا اتكلم معاكي
رشا : من جدك
تميم : طيب خلاص نامي انا حودي لمى الجامعه واخد امي على مطعم عشان اتكلم معاها واقولها تكلم امك العصر
رشا كآنت عيونها مقفله وفتحتها بسرعه قالت بصدمه : تكلمها في ايش
تميم : نامي مو انتي تعبانه
رشا جلست بتناحه وتعدل شعرها وتهرج بفجعه : تميم ايش بتقول
تميم : هههههههههه امزح ياشيخه والله اباها بس تنبسط شويا فاقلت اروح امشيها
رشا حركت عدسه عينها بتشتت
انقهرت
مرا انقهرت قالت بصوت راخي بس وراه وحده حتنكد : ايش قلت !
خلى منظرها بايخ
وكأنها مو مصدقه تستنى دي اللحظه ماتبى تكون الخفيفه
يكفي هوا ساحب طول دي الفتره
تميم هرج بنفس هدوئها :بخرج امي تنفه شويا عن نفسها
رشا سكتت ترمش
ترمش كدا مرا
تسبو ؟!
تعصب ؟؟!
مو عارفه ايش ردة الفعل المناسبه
تميم : الو
رشا : ابا انام لما اصحى يسير خير
تميم : تبيني ؟
رشا رفعت حاجبها : ايش ؟!
تميم : زعلتي عشان تبيني ؟
رشا خلاص وصللت معاها من اسلوووبه الهادي
اكتر انسان شافته بااارد وهيا مولعه من جوا : تميم ترا وربي اسلوبك ساير لايطاق
تميم : ههههههههههههههههههه اسمعي اسمعي امي كلمت امك امس اخر الليل اتصلت عليكي
رشا مستحيل تصدقه بعد المزحه الاولى تبا تحافظ على كرامتها : تميم انتا مصحيني عشان تجلس تضحك عليا
تميم : والله مابضحك عليكي ..اتصلي على امك
رشا كدا بين صمتها ودوبها تستوعب انو فيه مكالمتين من امها
قلبها بدأ يزيد دقاته واترخى صوتها : من جد تهرج !
: تميييييم
تميم طالع في بااتجاه الباب وهوا سامع امه تقرب : حبيبي امي تباني بس اخلص منهم وارجع اكلمك
طيب .؟
رشا بتناحه : طيب
تميم : احبك
رشا ابتسمت : وانا كمان
تميم الابتسامه من امس مرسومه على وجهه
قفل ووقف على طول
سحب الاب كوت ومفاتحيه وخرج من الغرفه
وصل لمـى ومو عارف ايش بها مابتهرج حاول يكلمها بس قالتلو مافيا شــي ...

امـآ تامر اول ماخلص كوب قهوته في السياره نزل ودخل للشركه
يكره سار بدايه يومه بسبب سلمى ..
وكالعاده دوبو عند المصعد وهوا سامع صوت خطوآتها ..
بس دي المرا هوا اللي ابتسملها
دي المرا هوا اللي سبقها بكلمه صباح الخيـر
سبقها بعيونه اللي تتأمل كل ملامحها وكأنه بجد هيمان فيها
سلمى ابتسمت بخجل : صباح النور
دخلو المصعد : كيفك بعد سهره امس
سلمى : تمام مرا انبسطت لأنك جيت
تامر : مع انك كنتي مشغوله عني
سلمى ابتسمت : ايش اسوي ماقدرت اجلس طول اليوم معاك عشان قاسم لايركز
تامر بصوته اللي يوترها : وايش فيها لو ركز ؟
سلمى رجعت شعرها ورا اذنها وقلبها يدق بسرعه : اخاف يفهم غلط و
تامر قاطعها لما قال بااستنكار : يفهم غلط ؟!!
انفتح باب المصعد وخرجت مع التوتر وهوا فضل واقف يطالع فيها دارت راسها
شافتو يطالع فيها وبعدها خرج
زعلته دا اللي فهمتو
مشي متوجه للمكتب وهيا جات جمبه وتهرج : ايش تباه بعدين يقول عننا
تامر يقفل الموضوع : مو مشكله ياسلمى انا عندي شغل دحين بس افضى نرجع نتكلم
مد يدو لباب مكتبه الخاص وهيا لساتها تلحقه وتبرر : انا بجد مو فاهمتك يعني دايما ماتحب احد يتكلم عنك
تامر طالع فيها ومقعد حواجبه : ايش دخل دا ف اللي سار امس
سلمى تحرك يدها بتوتر وتتكلم : ممكن الناس يقولو عننا انو احنا مرا بعض وتعرف كيف الكلام حيطلع
تامر مانزل عينه من عليها سكت سكت كدا بس يوترها
زي ماكانت روان امس موترته بدي النظره وبعدها هرج : وانتي ماتبي احد يهرج عننا ؟
سلمى قلبها حيوقف قالت باارتباك وبكل خفــه : انتا تبا .؟
مستنيه ردو
وتنفسها واضح قد ايش مرتبكه
رفع حاجبه وقال بحزم كعادتـه وبشخصيته اللي تعجبها : تتوقعي انا واحد العب على بنات الناس ؟
صدرها يطلع وينزل مع التوتر اشرت براسها بلا بدون ماطلع اي صوت
تامر فتح باب المكتب : اجل فكري بكلامك قبل لاتقوليـه
ودخل المكتب وهوا مسوي زعلان
واول ماقفل الباب هيا رفعت يدها على قلبها
ماتدري تبتسم على كلامه ولا تزعل لانو زعلان منها
ماتبى تدخل دحين تبا تجري لصحبتها تبا تقولها
خايفه تدخل عندو وتضحك ويزعل منها تاني
ومشيت بخطوات رايقه عكس اللي جوتها
مميله فمها وهيا تتذكر كلامه وكاتمه ضحكتها وفرحتها

امـآ هوآ اتوقعها تدخل واستغرب لأنها ماجات
مادى للموضوع اهميه كتير
بدأ يشتغل على الكمبيوتر .. يتأكد من الاوراق
يرتبها بالطريـقه الصح
مو اليوم بس مرا مو اليوم
اليوم يباها تحاول تراضيه يبا يزعل يبا يوريها انه هوا مو حق استهبال
يطالع بالاوراق وهيا مرتبه بالطريقه اللي حيتكلم فيها
عارف ايش بيسوي
وبدأ يطبع ...
تخرج ورقه ورا التآنيه
15 ورقــه
جمعهم ..
رتبهم للمرا العاشره وهوا مايبى اي غلط بالموضوع
اخد الدبـآسه ودبس الورقه في بعض اخد ملف حطها فيه ودخلو بالدرج ...
سند جسمو على الكرسي

ومامرت نــص ساعه الا دقت الباب ورجعت دخلت
مكشر مرا مكشر وقفت قدام مكتبه و هوا رمى الورق وطالع فيها : نعم
سلمى بلعت ريقها : ايش بك
تامر : ولاشي بشتغل
سلمى : طيب ماينفع اجلس ؟ _ بدلع ميلت جسمها _ ماحزعجك

سبحان الله وبحمده سبحان الله العظيـــم ..

كآنت واقفه عند باب غرفـه سامي حتى هوا ماستوعب الكلمه
وساد الصمت فجأه على المكالمه
الكلمه تجنن من فمها
الكلمه خلت كل ملامحه ترتخي يبا يسمعها
تاني وتالت يبا يسمعها طول الوقت
مايبى اسم براااء يجي على لسانها
يبا حبيبي
: قوليها تاني
حاست في الصاله وهيا تمشي باارتباك : قصد ..كـ كـ كنت ا
براء : هههههههههههه قوليلي حبيبي
ترف جلست ورجعت وقفت ووجهها محمممر مو عارفه ايش تعلق
غيرت الموضوع بتلكلك : قلتلك .امـ س ايش سـآر مع تميم وتامر
براء يهرج وهوا يبا يضحك : مابى اعرف قوليلي حبيبي
ترف بعدت الجوال عن اذنها وتحرك يدها بالهوى ووجهها محممر رجعت قربت الجوال وعشان تقفل الموضوع قالت : برااء
براء : هلا ياعمري
ترف ابتسمت :وحشني سـآمي
براء سمع وحشني وابتسم من قلبه لما قالت سامي اختفت ابتسامته
ايش الشطحه بالمواضيع دي مو عارف
براء : ان شاءللله كلها يومين ويجيكي
ترف جلست وفجأه نسيت براء وبتفكر بولدها
بولدها وبــس : ان شاءالله
يحس انو بدأ يغار من سامي بس بيحاول مايكرز كتير بدا الشعور
قفلت كل انواع الحوارات بردها دا
باين انها ف عاللم تاني
وكلها يومين وقاعد يصبــر نفسه عشان يقدر يتقدملها

طـــآح عدي في الارض ولؤي انخبط وجهه في الارض
مايدري اسنانه انكسرت ولا خشمه ولا عيونه اللي لصقت في الارض وهيا مفتوحه
وفي النهايه عدي اللي قاعد يتألم وقف وهوا يحاول يدور على اللمبه
وسامع صوت احد يتألم
واول مافتح اللمبه وماسك كوعه باألم الا انفجع من شكل لؤي وهوا جالس
وماسك خشمه ويده التانيه يمررها على اسنانه
مو باينه اسنانه مو باينه شفايفه من الدم : اااايش بككك
لؤي فاتح فمه ويتفقد اسنانه كامله ولا لا
ويهرج وفمه مفتوح : فيييه ثن مو فيه
عيونه كلها دموع مو عارف ايش يوجعه خشمه ولا اسنانه

عدي نسي الاختبار ضحك من قلبــــه على فيه ثن مو فيه : هههههههههههههههههه
ولا كأنه الادمي ينزف ولا كأنه دعس وجهه
مد يدو على الجدار وهوا ثاني جسمه وميت ضحكك : ههههههههههه اااااه يااابطني
لللؤي سحب مناديل وصرخ على عدي : ااااللله يااخدكك كسرتلي خشممي
عدي ولا كأنه زادت ضحكككته
ولؤي يحط كومه المناديل على خشمه
غير إنو مرعوب من هرجه سنه اللي مو لاقيه : آآآه
عددي : ههههههههههههههههههههههه اشوف اشووف
جا يقرب الا لؤي صرخ عليه : ااااقلب وجهههك يااوسخ
عدي : ههههههههههههههههههههه بلله سنك مو فييه
لؤي بعد المناديل وعدي نزل جسمه لمستواه
لؤي فتح فمو وعدي من كتر ماضحك صوتو انقطع نفسسه مو قادر ياااخده
يقول بصوت متقطع : هههههههههههههههههههههه وربي هههههههه وربي سنك مو فيه هههههههههههههه
لؤي بقهر رجع حط المناديل ودف عدي برجلو : يااا"""" اننننقلع
عدي جلس ولسى مستمر يضحكك
ولؤي مازال يغير المناديل وهوا يبا الدم يوقف عشان يشوف هرجه سنه
دقت باب الغرفـه وعدي قال : ادخخخل
كآن يحسب عزام واول مافتحت علا شهقت ببصصصوتها : اااايش بككك
قدمت بخطوات سريعه بااتجاههم وعدي رجع يضحك : انكككسر سنووو ههههههههههههههههه
لؤي بعد المنناديل ومرا معصب من عدي صرخخ : اخخخرج يااعدي لا
وقبل لايكمل علا طالعت بفمو وهوا يصرخ
حطت يدها على فمها وشقهت بكل صوتها وقالت : فيننن سنك
عدي ضحكته من غير صوت ويضرب بيده الارض : هههههههههههههههه
سنه اللي بالمقدمه انخلع بكبره
كميه الالم اللي حاسس فيها مو طبيعيه
وعدي بس يضحك
وعلا مفجوووعه بمعنى مفجووعه
اما هوا اتنرفز مرا سند يدو على الارض ورفع جسمه
عدي مد يدو يبا يقلو فين راايح بس مو قااادر : ههههههههههه لـؤ ههههههههههههههه
انتبه للسن في الارض وخلاص حس انو حيموت بمعنى حيموت من كتر مايضحك
قلبه يوجعه يبا يقولو سنك هنننا بس مو قااادر
دموعه تنزززل ويأشر على لؤي وبعدها على السن ويضحككك
اما لللؤي اتوجه للحمام الخـآرجي وعلا وسعت عينها بعصبيه لعدي : اههههبل انتا
عدي ياأشرلها على السن ومازال يضحك
علا طالعت في السن وضحكت بصوت راخي : ياااحيوان اسكت
اما هيا قامت وراحت تلحق لؤي لما شافت مافي امل عدي يستوعب ويتحرك
وقفت عند باب الحمام : لؤي كيفك
لؤي مرجع راسه على ورا وقال بنرفزه : بدأ يخف الدم
حاتط المناديل على خشمه ومغطيه دمو
واصلهم صوت ضحكه عددي ولؤي مرا متنرفز
علا : ايش سار
لؤي : الحيوووان اخوكي دعس على وجهههي
علا وسعت عينها وكتمت ضحكتها : كيف كيف
لؤي حسها تبا تضحك شال المنناددديل واشرلها : علا رووحي منمن هنا لو حتستهبلي زي اخوكي
غصبا عنها انفلتت الضحكه زي الاطفال دول اللي دوبهم ينخلعلهم اول سن : هههههههههههههه _ لما شافت تعابير وجهه قالت بخوف _ انا اسفه _ ورجعت تضحكك اول ماتذكرت
لؤي جا لعند الباب وقفل الباب بوجهها بعصبيه
وهيا سارت تدق بخفيف : للؤي انا اسفه لؤي والله مو قصدي
عدي خرج من غرفته ويأشرلها وعلا تضحك بدون صوت وتهمس لعدي : والله مسكككين
عدي : هههههههههههههههههه
علا تأشرلو يسكت وهيا كاتمه ضحكتها
عدي مسح دموعه : ورايا دوآم وماذاكرت بقوم اتجهز _ رفع صوته _ طمننني عليك يالؤي
عدي : هههههههههه
عدي مافي اي ضميـر يتجهز ويضحك نزل وهوا يضحك
ركب السياره وهوا يضحكك
غير انو صور سن لؤي وارسلو لكل العيله وكتب " لؤي حبيبي كبر وخلع اول سن "
اما لؤي خرج من الحمام بعد ماغسل وجهه خسمه مرا محمر
وعلا ل ساتها مستنيـه
طالع فيها ودخل غرفه عدي اخد مفاتيحه ونزل
وعلا تلحق وراه : فين راايح
كانت وراه عشان كدا هرجت : بروح لعياده الاسنان
علا :بدري لسسى
لؤي : حستنى هنآك
نزلو لتحت ونانا تنظــف وهيا حستو زعلان وعدي مرا زودها معاه اول ماخرج الحوش مسكت يدو
طالعت فيه وتتكلم بدلع عشان يسامحها : لاتزعل مني
اشر براسه ويبا يمشي الا سابت يده ومازالت تدلع : احبك
رفع حوآجبه الاتنين وشوف متى قالتلو حط يدو على فمو : امشي من هنا
علا : هههههههههههههه بقولك احبك ايش الاسلوب دا
لؤي حط يدو على ظهرها ويدخلها : ادخلي ياعلا
علا : هههههههههههههههه بعترفلك فحبي
لؤي : مني طااايق عيلتكم كلها ادخلي دحين
علا : هههههههههه_ طلعت اول الدرجات وارسلتلو بووسه _ والله الكلام اللي في الورقه اعتبرو ماكتبتو كدا حسيت من جوتي راح الشي اللي كآن مخوفني
لؤي مو قادر يعلق وهيا تطالع فيه ومتنرفز من وقت الفضفضه
والدلــع حقتها اللي مجننو
علا : حتروح
وجات فكت الباب نانا وتقولها : بابا بابا صحححي
علا انجلطططت دخلت جري على طول
معلمينها من قبل خطوبتهم هيا اللي تنتبه لأوضاع البيت

امــآ عدي وصـل الجماعه باقي ساعه على الاختبار وهوا مو مذااكر ولا حـآجه ...
جلس في مكانه المعتاد هوا ولمى
ماتصل عليها ولا سئلها فينك . .
لين ماشافها جايه باإتجاهه
اول مايشوفها لازم دي المغزه اللي تجي ف قلبـه
وقـف حط يدو على وسطها وباسها بخدها
قال بصوت مو زي دايما : صباح الخير
وجلس
عادتا يبوس يدها كمان
عادتا يقولها كلمه حلوه بعد صباح الخيـر
عينه على كتابه وبيذاكر لمى جلست جمبه بهدوء وماردت عليه
عدي بدون مايطالع فيها : راحت عليا نومه وماذاكرت
لمى : طيب دحين باقيلك كتير
عدي : دوبني في البدايه
لمى : كان قلتلي اصحيك
عدي طالع فيها بنظره ورجع ذاكر
مرا اتوترت
انقهرت
تبا تبكي
التزمت الصمت ورجع اتكلم : ايش قررتي
لمى ماتبى تتكلم حاليا بالموضوع : خلص مذاكره
عدي مرر اسنانه على شفايفه السفليه وهوا عرف جوابها
وفجاه قفل كتابه الكبير بقوه وطالع فيها
فزت بفجعه : تستهبلي انتي تبي تجننيني صح
عيونه تطاير منها الشرر
امس قالتلو ماحتاخدني من بيت اهلي من غير فرح
يعني االموضوع يبالو مع ترتيبات امها وامه شهرر
تطالع فيه بكل خوف يكره نظرتها دي بس مو قادر يتحممل
عدي : لممى اهجدي واقفلي اوم الموضوووع دا
لمى بصوت يرجف : خلاص ذاكر
عدي : فححححريقه الدراسه لاتسيبي مجال لمرته تلعب ف راسك
لمى : محد بيلعب براسي
عدي : اجل ايش افهم من كلامك
لمى : انا حزنانه على بزوره اخويا ومرته مو حزنانه عليه
عدي بقهر يسئلها: مو خايفه ! كآن عاجبك منظرك اخر مرررا !!!! انتي مجنونه صح
يتكلم معاها بااسلوب مرا حرقها
اتجمعت دموعها ووقفت
مشيت بقهههر وهوا يطالع فيـها مو قادر يروحلها
فتح كتابه وبيحاول يذاكر بس ماذاكر يقلب بالصفحات وعقله مو معاه معاهااا
اتوجهت للحمآمآت
وسارت تبكي
بيطلب شي منها مو قادره تسويه مستحيل اهلها يرضو فيه
ماتبى تزعل اهلها ماتبى تدخل بمشاكل
وماتبى اامل تتعذب
عدي بيفكر بس فيها
بس هما اهــل يفكرو ف بعض ... مو هاين عليها بزوره ليث يبكو ولا يجي في بالهم ف يوم انو خالتهم اللي سوت ف ابوهم كدا
اللي حرمتهم من ابوهم

فتحت عينها على الظهـر ...
جسمها تقيــل
دااايخه ومرا تعبـآنه ...جلست وسندت جسمها على الجدار
اخدت جوالها ..مو عارفه ليش بشار وهديل لدحين محد كلمها
بشار فين اختفى فجأه !
عقدت حوآجبها ودوبها استوعبت انها رجعت ومالقته
نفسـها تقوم وتطلع تتصل من عند ترف بس دايخه حطت راسها على ركبتها

امـآ تـآمر دوبو بيطلب أكل لترف وطلب لروآن معاها
طول مايمشي وسلمى تكتبلو بالواتس واول ماوقف سيارته عند العماره كتبلها" انا مع امي شويا اكلمك "
يصرفها دايما بدي الهرجه

نزل من السياره دخل الجوال بجيبه شال الاكيـآس
واتوجه لشقـه روان حس بتوتر من قبل لايدق الجرس
دا الاحساس لوحدو غريب
سلمى ولا تهزه بشي مع انها جميــــله

يحط الكيس قبال الباب ويمشي ولا يستناها تفتح
وفجأه سار عيب يحط الكيس ويمشي ولازم يستناها
فتحت عينها وقامت على طول دي المرا جا ف بالها بشار
مو حاسه بنفسها وهيا بس بتفكر فيـه زي مابتفكر ف هديل
فتحت الباب من غير ماتسئل
بنفس ملابسها وشكلها كلو نوم وشعرها مشعتر
ف حياااتو كلها ماشاف وحده صاحيه من النوم كدا
لمى لما تصحى ترتب نفسها وبعدين تخرجلهم
عدلت شعرها اول ماشافتو
تامر : معليش صحيتك
روان تمرر يدها على عينها : لا عادي اصلا كنت بقوم
تامر مد الكيس : اشتريت لترف غدى وجبتلك مرا وحده
روان ابتسمت واخدت الكيس ماتعرف ماترمي هرجه تربك اهلو فيها : كويس يعني مو ترف قالتلك جبلي
طالعت فيه
وهوا اتذكر موقف امس : حتمسكيها عليا
روان : هههههه ايوا عشان مرا تانيه لا تكذب
ماحس بنفسو الا لما علق وسار ياخد ويدي : يعني انتي امس ماكذبتي عليا
رفعت حاجبها : لا انا ماحب الكذب
قالتها بااسلوب باين انها كذابه فيه
تامر ضحكك وهيا ابتسمت لاشعوريا : معليش مرا تانيه على الازعاج
روان : لا _ رفعت الكيس _ شككرا
تامر : بالعافيه
دار جسمو بيطلع الا قالت مرا وحده تطلع تتصل حطت الكيس جوا خدت جوالها ولبست الفلات بسرعه وقفلت الباب : دقيقه دقيقه
وطلعت اول سبعه درجات لين ماوصلتلو : بطلع معاك عند ترف
طالعه معاه !
قدام ترف !
قال بتردد: طيب
بس خلصت التلات الدرجات وبياخدو اللفه يطلعو الدرج الجـآي الا وقفت
وحطت يدها على عيونها ...كل شي سود للحظـه
منزله راسها ومستنيه بس يفك منها دا الاحسـآس
متعودين من صغرهم على الجوع وعلى الدوخه دي
لما يمنعهم جاسم عن الاكل ومضطرين يشتغلو
طول اليوم
طالع فيها وقرب خطوه لعندها: ايش بك
اشرت براسها وبولاشي من غير ماترفعه
وبعدها رفعتو
بس وجهها متغير لونـه : انا نازله
تامر : لساتك تعبانه ؟
روان : لا بس مافيا حيل اطلع الدرج اصلا كنت ابا بس اتصل من جوال ترف بس بعدين اطلعلها
تامر دخل يدو بجيبو وخرج جواله : اتصلي بجوالي
روان : لا خلاص مالو داعي ب
تامر قاطعها وهوا يتكلم ويفتح الباسورد : مافيها شي _ مد جواله _ خدي
روآن طالعت بجواله : ماعرف حديك انا الرقم
تامر كدا تنح شويا لما قالت ماعرف وبعدها اتكلم : هاتي طيب
روان جلست على الدرج وهوا وقف قبالها وتدور رقم بشار وبعدها ادتو
دخلها الارقام واداها الجوال
جلست تسمعو يدق يدق لين مافصل ورفعت عينها عليه ومدت الجوال : اتصل تاني
اخد واتصل وبرضو اداها
وهيا تستنى تستنى وهوا يطالع فيها وبحركه يدها على الجينز ومسرحه
ولما فصل رجعت مدت يدها : خد خلاص مايرد ..تقدر ترسلو رساله
بتتكلم عن واحد
قالها طيب كان بيديها الجوال قالتلو انتا اكتب
فتح الرسايل وطالع فيها
وهيا تهرج : اكتبلو انا روان لمـ_ وغيرت كلامها _ لا لا اكتب انا سميه لما تصحى كلمني على رقمي
هوا اللي فاهمه انو البنت ماعندها اهل
دا اللي واصله يعني دا الشخص
علاقته معاها اكيـد غريبه
لا وكمان عندها اسميــن
لحسسسسسسسست مخووووو
اترخى صوتـه : خلاص ؟
روان : ايوا
ارسلها ورجع دخل الجوال بجيبه
روان مدت يدها وهوا طالع بيدها وبعدها بوجهها
مايدري ليش الرساله حسها فوقتـه على انو بدأ ياخد راحته بالهرج معاها
روآن اتذكرت لما مدت يدها داك اليوم وماساعدها ورجعت نزلت يدها ووقفت :دوبها بتهرج الا هوا قال : يلا انا طالع
وطلع من غير مايستنى رد اصلا مشي وهيا لسى واقفه
عاملها زي البنات اللي في الشركـه
مايستنى رد منهم يقول كلامه ويمشي ..
مرا استغربت
نزلــت على طول واول مادخلت الشقـه اخدت كيس الاكل
جيعانه بشكل مجنووون
اكلت بضمممير
وبعدها جلست تستنى بشـآر ساعه ساعتيـن
تلاته
وخلاص بدأ القلق يزيـد فيها فتحت باب الشقه وخرجت
واول ماوصلت لنهايه الحاره وشافت سياره بشار
حست قلبها طاح
خلاص مصيبه سارت
دقات قلبها زادت وكل شي مجنون بدأ يجي براسها
شافتو كيف كآن بيقتل جاسم
شافتو لما عصب وكسر كل شي
تطالع في السياره ودموعها متجمعه بعينها
ليش خايفه ماتدري
ليش مرعوبه ماتدري
اخوهـآ ..ّ!
ايوا خايفه يسرلو شي
بدأت تحب وجوده بيومها
عارفه نفسها من اول مابدأ يهتم ويدافع عنها
انها حتتعلق بسرعه
زي اخواتها اللي كانت تتعلق فيهم
دخلت يدها بجيبها للمره التانيه وهيا تتاكد اذا عندها فلوس
مشيت بدون عقــل وهيا راجعه للبيت
" ممكن اخدلو تاكسي ورجع "
" وليش يسويها وسيارته هنا "
" طيب ليش ماتصل على جوالي لدحين "
فكت باب الشقـه جلست شويا وماقدرت تتحمل
طلعت لفوق ودقت الباب على تـرف

ترف فتحت : هلا
روان ابتسمتلها : كيفك
ترف : كويسا الحمدالله وانتي كيفك
روان : تمام والله مرا مرا معليش كل ماجيكي بطلب منك حاجه
ترف : مابيننا ياقلبي
روان : تامر فيه
ترف اتفاجئت بس قالت يممكن ماتبى تدخل وهوا فيه : ايوا بس عـ
روان قاطعتها : طيب ابا اكلمو بلله
عينننني عينك
داقه تبا اخوها
ترف تنحت شويا وبعدها اشرت بيدها : ادخـ لي
دخلو الاتنين وترف ماشيه قبلها وروان وراها ..
وتامر عينه على جوالو وبيهرج على الواتس مع سلمى : تامر
رفع عدسه عينه على ترف وبعدها على روان لما استوعب انها هنا : ايوا
ترف اشرت على روان وضمت يدها تحت صدرها وتبا تشوف نهايتهم
روان : تامر فاضي ؟
تامر اشر براسه وبعدها قال بدون استيعاب : ايوا خير فيه شي ؟
روان : معليش والله بتعبك معايا بس تقدر توصلني
تامر طالع بترف ورجع ف روان
اكيد ماحيقدر يقول لا بس كيف يقول ايوا كدا يبا رد عدل : مو مشكله اختي اقدر اوصلك فين تبيني اوديكي
روان دمرت اوم الاحترام : اخر مكان وصلتني هوا لا لا المرا اللي قبلها اللي على طـ
تامر قاطعها وهوا يباها تسكت بس : خلاص مو مشكله بس بصلي العصر واجيكي
روان : طيب _ دارت جسمها على ترف _ حشوفك ان شالله مرا تانيه
ترف ابتسمتلها : ان شالله
روان على طول مشيت وقفلت الباب وراها
وتامر اول ماطالعت فيه تـرف الا هوا قفل جواله واتوجه للحمآم
اتوضـى وصلى : تبي شي
ترف : هههههه لا سلامتك
ماتدري ليش انفلتت منها الضحكه
تامر رفع حاجبـه : ايش بك
ترف اشرت براسها : لا ولاشي
تامر خرج جايبتلو الكلام روان ببلاهتها .. اصلا اول ماحسها من البنت اللعابات قال ماحيديها وجه
بس مع ارتباكه وترف تطالع فيـه وروان تطالع ماعرف ايش يرد
دق البـآب ولا دقيقتين الا هيا فتحتو شايله شنطتها الصغيره السودا : يلا ؟
روان : ايواا
خرجو وكآن ماشي قبلها بخطوتيـن وساكت ولا اتكلم معاها ولا قال
متوجه للسياره اللي موقفها ف بدايه الحاره بسبب زحمه الظهر
وقبل لايروح دخل البقاله

وهيا واقفه عند الباب
اخدلو قاروره مويا ووقف عند الحساب بيحاسب
مكآن الكاشير ناحية الباب اول مافتح الدرج روان طالعت وشتت نظرها
ورجعت وسعت عينها وقربت : دقيقه دقيقه
الرجال وتامر طالعو فيها
اشرت على الدرج : المحفظه اللي عندك بالدرج دي حق مين
الرجال ادا لتامر الباقي وعينه على روان ويهرج :لقوها في الحاره مرميه وجابولي هيا البقاله.. اي احد حيدور حيجي هنـآ
متأكده متأكده انها حق بشــآر طول عمرها تطالع في محافظ الرجال
لما تبا تسرق من صغرها ...ومحفظه بشار مميزه شكلها غريب : انا اعرف صاحب المحفظه
الرجال : طيب قوليلو انو هنا المحفظه وييجي بنفسو يستلمها
روان بنرفزه : بقولك انا اعرفو حكدب يعني
تامر طالع فيها : خلاص قوليلو يجي وانتهينا
روان رجعت تطالع في الرجال : طيب تعرف فين لقوها
صاحب البقاله : امس سارت مضاربه في نهياه الحاره وهناك لقوها
روان اتأكدت انو هوا
خرجت من البقاله ودموعها بعينها تطالع في سيارتو
ومحفظتو هنا ولا اتصل عليها اكيد مصيبه سايره
تامر خرج وطالع فيها وهيا تاكل اظافرها وباين انها بعالم تاني
يسئل يطنش
طالع في السياره اللي عينها متعلقه فيها
مو عارف ساير الموضوع فيه شباب ودا اللي قاعد يلاحظه كل شويا
مشي وماعلق وهيا اول مالمحته مشيت وراه
ركبو السياره
تحرك رجلها بتوتر
ماتبى تفكر بشي
ماتبى يجي في راسها اي حاجه
طالعت في تامر : تقدر تتصلي على الرقم تاني
تامر : طيب
خرج جواله واتصـل واداها وبرضو مافي احد رد
يطالع فيها كل شويا وحاسس انها تبا تبـكي
بس بيكابر ويطنش بيحاول يسوي خير زي اخر مرا ويوصلها ومايتدخل بحياتها
ولا خمسه دقايق الا قال : صاحب المحفظه هوا نفسه اللي بتتصلي عليه ؟
روان : ايوا
تامر : طيب ايش بك خايفه
رون طالعت فيه : من امس مختفي حتى سيارتو سابها هنا
تامر بتردد وعينه على الطريق : مين دا
روان سكتت
طول شويا سكوتها
وبعدها سندت جسمها على الكرسي وقالت بصوت راخي : اخويا
بدأ يتلحس مخووو
السياره حق اخوها السياره واااضح انها مرا فخمـه !!!!
لها اسميــن روان وسميـه .!!!
مو قادر يربط المواضيع في بعض
طالع فيها : انتي اسمك سميه ولا روان ؟
روان : جاسم سماني سميه وانا سميت نفسي روان
تامر : مين جاسم
روان : ابو بشار
تامر عقد حواجبه : مين بشار
روان : اخويا
تامر طالع فيها ورجحع طالع في الطريق : انتو من اب واحد دحين صح !!
روان : ايوا
تامر : طيب قولي ابوكي وانتهينا
روان رفعت حاجبها : انا ماعندي اب _ وشمقت بوجهه _
ورجـع بينهم الصمت تاني
تامر الف سؤال براسه بس مو حابب يدخـل
يحس انو تجيه لحظه يكون فيها جريئ ويسئل وشويا مايقدر
وكأنه هيا اللي تشيل الحاجز اللي بينهم وهيا اللي ترجعه
وروان تطالع في الطـآقه ومو عارفه لو وصلت حيكون اصلا بالبيت
ولا رايحه على الفاضي واول ماوصلـو طالعت في تامر : تقدر تستناني بس اتأكد هوا فيه ولا لا
تامر : طيب
نزل من السياره ودخلت
ضغطت على زر المصعد وبدأ اتوتر يزيـد فيها
دخلت المصعد وخرجت وهيا على نفس التفكير
مشيت في الممر
وهيا برضو خايفه انها توصل وتبا توصل
فكت لاشنطه لدحين عندها البطاقه خرجتها كانت حتفك الباب بس قالت
تدق اول
دقت مرتين تلاته ولما مافتح
فتحت الباب بنفسها
كل شي مرتب وكأنو ماسار اي شي في الصاله دخلت بتردد ويدأت تحس انو مو فيه بالبيت
اتوجهت للغرفه فتحت الاضائه وشافتو نـآيم
دموعها نزلت على طول
مسحت دموعها سحبت شنطتها من على كتفها ورمتهاا بووجهه وصرخت : بشاااااار
كآن نااايم
نايم بضميـر
وجلس على طووول مفجووع طالع فيها : ايش فييييه
مو مستوعب كيف دخلت
ليش جات اصلا
وليش معصبه
طالعت بوجهه وهوا مجروح ف خده : وبعدددين معاك
ياخد انفاسه ورا بعض عينه لسسى مو مفتحها مزبوط من اضائه الغرفه : ايش فييه ايش ساار
روان واقفه قبال السرير ومعصببببه : عرفت انك اتضاربت صح ؟
عقد حوآجبه ولسى مو مستوعب انها مسويه الهجوم دا عشان دا الموضوع : سار شي !!!
روان : اتضاااربت ولا لا
بشار سند جسمو على المخدات ولساتو يطالع فيها : دحين انتي مصحيتني عش
روان قاطعتو بعصبيه : جاوووبني
بشار : ايوا ايش تبي دحين
روان رفعت صباعها بتحذير : مرا تانيه تخصرني طول دا الوقت حجيك واقتلك ولو فكرت تتضارب مرا تانيه ناديني معاك فاهم ولا لا
بشار يطالع فيها بتناحه
ويبا يستوعب الجمله اللي سمعها نزل رجلو من على السرير ووقف
مرر يدو على ذقنه وبعدها قال : مني فاهم لدحين انتي ليش معصبه
روان : لأنو طول اليوم بحاول اكلمك ومحد يرد ولقيت سيارتك واقفه وروحت البقاله شوفت محفظتك هناك مو وقتك تتمشكل وتموت دحين
بشار : الله واكبر عليكي لو حموت كنت حموت من فجعتك _ طالع في شنطتها اللي على السرير _ دحين انتي من جدك راميتني بالشنطه متخلفه انتي يااابت
رووان : عشان مرا تانيه تفكر قبل لاتتمشكل مع خلق الله
بشار يطالع فيها وضايع الكلام معاها
هجمت على شقته وهوا نايم
صرخت ورمتو بالشنطه وصحتو بفجعه
وكمان عينها قويـه
روان : دحينن جيتك
نزلت لتـآمر واول ماشافها جيه فتح الطـآقه جات لعنده : خلاص طلع نايم
تامر : طيب كويس
بعدت جسمها عن السياره الا هوا اشرلها براسي : تعالي
كانت على الرصيف ومرت جسمها كدا بسرعه على الطاااقه :" هاا
تامر :بشوويش
كآنت لسى تبا تحش اتذكرت لؤي كيف كان يخاف على سيارته
الا هوا كمــل : لاتتعوري
تنحت كدا للحظـآت
ضحكت ببلاهه : لا عادي
ماعرفت ايش تقول
متعوده على العفاشه
اول مرا ماتعرف ترد
اول مرا تنكسف من تعليق تقولو وتحسو انو مو فمكانه
ايش لا عادي !!!
تامر عقد حوآجبه : نسيت ايش كنت بقولك
روان : اتذكر
تامر : والله مرا ناسي يلا مو مشكله مع سلامه
روان بعدت ورفعت يدها وقالتلو باي
مشيت وبعدها عقدت حوآجبها : عداني بالبلاهه

طلعت لبشـآر ولقتـو جالس في الصاله اول مادخلت طالع فيها : فين روحتي
روان بكل برود تهرج بعد ماقفلت الباب : كنت بقول للي وصلني يروح
بشار على بالو سواق : سنه عشان تقوليلو
روان جلست على الكنبه : ماطولت قلتلو بس انك نايم ومشي بعدها
بشار دوبو بيمسك جوالو الا طالع فيها : ايش قلتيلو !!
روان : انك نايم !
بشار سكت شويا وبعدها قال : انتي جيتي مع مين
روان : اخو جارتنا
بشار رفع حوآجبه الاتنين ميل جسمو بااهتمام وهوا بيتفرج عليها : ايوا ؟
روان : بس ؟!
بشار : دا نفسو اللي اداكي ايجار الشقه
روان ضحكت : هههههه لا داااك عبيط راح ف حاله
بشار ضحك معاها كدا نص ضحكه بس مرا الموضوع ماضحكه : هوا انتي ماشالله ماتعرفي غير رجال
روان : والله انهم احسن من الحريم ياخي يفزعولك فزعات تبيض الوجه
بشار يطالع فيها بس ساكت
مرر لسانه على اسنانه وهوا لسى ساكت
ورجع سند جسمو على الكنبه ورفع رجلو على الطاوله
ماعلق مرا ماعلق
ولا دقيقتين الا طالع فيها : انتي متخلفه
فجعها : ايش فيه !!
بشار : يعني رجال اكيد حيفزعلك تستهبلي
روان : انتا ليش بتسب دحين
بشار نزل رجلو في الارض : من مخك المتخلف شي واحد حطيه في راسك لما الرجال يفزعلك هنا المفروض تخافي
روان تتذكر لؤي حبوب وتامر كدا ف حاله ويستحي : مو كلهم زي بعض انا اطيح على ناس محترمه والله
بشار مو عارف دي بعقلها وبجد تهرج
يعني حتى لو مو حاسه انو دا الادمي اخوها
مو مستحيه وهيا تتكلم كدا!!!
قال بحده : قفلي الموضوع
دق الباب
وقام على طول يجيب الاكــل متنرفز منها وحمد ربـه انو اندق الباب

مارضي يسئلها ايش سار معاكي مع هديـل
يبا يسئل ويعرف ليش كانت تبككي
وبنفس الوقت مو قادر

بعد ساعه من جلستهم وبشار رجع نسدح بعد الاكل
وحاسس بخمول الا جات رساله على جوال روان
واول ماسمع الرنه غمض عينه : يالللليل جوووالك دا وربي لاحرقلك هوا
روان : خليك في نفسك لو سمحت
خرجت جوالها من الشنطه وشافت كلام كتيــر مرسول من جوآل ام هديل
طبعا مافهمت شي مدت يدها : بشااار اقرا
لساتو مسدوح اخد الجوال وقرا بصوت عالي " روان مرا احبك لاتزعلي مني ومن كلامي اخر مرا عارفه انك حتدي الجوال لأحد يقرألك واتمنى انو يكون بشار _ اختفى صوته وجلس وسار يقرا ويقرا ويقرا _
وباين انو مو عاجبه الكلام
انفاسه بتزيــد
وقف على طول
وروان مو عارفه ايش الهرجه : بشاار ايش فييه !
دق على الرقم وجالو مافي رصيييد
سار يدور جواله ولا رد على روان ونقل الرقم على جواله
روان وقفت : وترتني ايش سااير ايش كتبت
من اول رنه هديــل ردت
عارفه انو رقم بشار جالو صوتها وهيا تبــكي
قال باارتباك : عهود فينك

امــآ هديــل
قبل ماترسل بسآعات
امها استحمت واتجهزت ومرا بتتزبط وهديل تتفرج عليها ومو عارفه
ليش دا كلو
مو مصدقه اصلا انها بتتفرج على امها بس مو مبتسمه او حاسه بسعاده
كدا بدون اي احساس
مميله راسها وتتفرج عليها
تحاول تقنع نفسها انو كلها كم يوم وامها حتخرج من دا المكان اللي حتشتغل فيه
وقتها يمكن تسير مبسوطه
: قومي اتجهزي
هديل: انا جاهزه
: ليش ماجبتي ملابس معاكي
هديل رمشت بهدوء وقالت : ماعندي
: دحين اجبلك من عند البنات
وخرجت على طـول راحت جابتلها ملابس
وكانت زي ملابس هديل المعتاده تيشيرت وجينز
غيرت ملابسها لفت شعرها كالعاده على فوق
وجلست بتعب
امها : ايش بك ؟
هديل : حاسه اني تعبانه
امها قربت منها ومسكت خدها : مافيكي شي لاتدلعي
هديل اشرت براسها من غير ماتهرج وامها اختفت ابتسامتها
وجلست جمبها تتكلم بااسلوبها الحنون : ايش بك ياقلبي
هديل : مددري مو مرتاحه ومخنوقه
امها حضنتها : انتي عارفه انها مسأله وقت ساعديني الله يخليكي
غمضت عينها بتعب وهيا تحس مافي امـل تخرج من اللي هيا فيه
ماتبى تسيب امها
حتساعدها ..
جلسو يستنو السياره
وهديل بدأت تحس جسمها بااارد مع انو كل شي مطفـى
سارت مو عارفه هيا تعبانه ولا مع الخوف بتحس بدا التعب
مشيت ورا امها اول ماجات السياره ركبت
وامها ماسكه يدها وباستها بخدها
بتدلعها
بتديها الشي اللي هديل طول عمرها تتمنـآه
وفجأه وقفت السياره قبـآل الفله
نزلت من السياره دقو الجــرس ودخلو البيــت ...
استقبلهم بنفسه سعيـد
استقبلهم وابتسامه على وجهه ..
ابتسامه فاجعه هديل
ماتدري ليش حست زي يوم ماشافت جاسم
وكأنه الكل يضحك عليها وتبدأ حياتها مع شخص تاني
ماسكه نفسها لاتبكي
سعيد مد يدو لها : كيفك اليوم
طالعت بيدو وضمت يدها تحت صدره : ايش حشتغل
سعيد ضحك ونزل يدو بشويش طالع في امها وبعدين في هديل : امك حتفهمك ملابسك فوق روحي اللبسي وانزليلي
ومشي من قدآمها ...
البيت مرتب اثاثه مايل للفخامه بس لدحين مو شايفه احد غير سعيـد
طالعت في امها : ملابس ايش
امها مسكت يدها : تعالي
مسكتها وطلعتها زي ماطلعت قبلها عشرات البنـآت
عارفه اي غرفـه بزبط تدخلها ..
هديل تمشي ودقات قلبها ورا بعض
لين مافتحت باب الغرفـه
كآن فيه سرير ودولاب بسسس
امها اتوجهت للسرير ورفعت الشورت البلوزه القصيره لنص البطن : اللبسي دا على بال انا حروح اشوف ال
وقاطعتها هديل بردة فعل سريعه: ايييش ! _ اشرتلها _ تبيني الللبس دا!!!!
امها قربت منها وف يدها الملابس وتهرج : سعيد مسوي حفله تحت كل البنات اللي يشتغلو لابسين دا اللبس
هديل ضحكت بفجعه : يشتغلو بدا اللبس ..؟؟!!! ماما انا قصدي انظظف البيت قصدددي اغسلو الحمامات لو يبا بس مااالبس دا اللبس
امها رمت الللبس بتعب ": ايش تتتتبي ياهددديل قلتي ماتبي تشتغلي بداك المكان وسكت وهنا حتى جايه تتشرطي
هديل .دموعها اتجمعت بعينها اول ماامها صرخت : ماما مابى احد يطالع فيا وانا لابسه دي الملابس هما اساسا ايش يبوني اسوي قلتلك اني حجي عشان انظفلو مو عشان يتفرجو علياااا
امها : محد حيلمسك ليش تحسبيني جااايه ابيعك هنا وامشي
هديل نزلت دموعها واشرت على الملابس : اجل تبي تنزليني قدام واحد بدا اللبس وايش حيكون مقصدك
امها : عشان تشتغلي
هديل : اااشتغل ايششش فهميني ااايش من امس وانا بقولك انظظف وانتي ساااكته
امها : حتقدمي المشروبات حتجيبلهم الاكل بس دي شغلتك
هديل : طيب اقدر اسوي دي الحاجات من غير ماغير
امها قربت منها ومسكتها من يدها : هددديل لاتعصبيني ترا كلها على بعضها شورت لاتسويلي من الحبه قبببه
هديل سحبت يدها : ماما لاتتكلمي بدا الاسلوب دا شووورت يعني كأني مو لابسه شي ايش بك انتي
امها : ايش يعني تبي تسوي ؟
هديل بحده : مني لابسـه
امها في عينها الشر اخدت نفسها : خلاص براحتك بس حنادي سعيد وبعدها نمشي
ماتوقعت دي ردة الفعل
بس بدأت تخف دقات قلب هديل
ابتسمت بين دموعها : طيب
دوبها امها حتخرج الا سعيد دق الباب ودخل .. : انتي لسى مالبستي
ام هديل طالعت فيه : احنا ماشين
سعيد عقد حوآجبه : على فين
: هديل ماتبى تشتغل هنا ولا تبا تلبس دي الملابس خلاااص ماحضغط عليها
واقفه ورا امها بدأت تحس شويا براحه
مع انه تفكير امها ككل مو عاجبها بس اقلها بدافع عنها واحترمتها ..
سعيـد يطالع في امها وكدا للحظـه سار بيحاول يستوعب ليش سوت كدا
قدم بخطوآت هاديــه لين ماوصل لأم هديـل
بلع ريقه مابين يسوي الحركه ومابين لا مايبى يهينها بدي الطريـقه
بس من وقفتها عارف انها تبا يسوي اي شي مجنون
وفجأه مسك ام هديـل من شعرها وسحبببها
هددديل صرخت بكل صوتها : ممممااااماااا
ام هددديل : ااه
هديل تحاول تمسسك يده اللي ماسكه شعره امها وهوا يطالع في هدديل : تححححسبي انا استهبل لما اقوولك حتشتغلي هننا
هديل بخوف : سيبيها سيبها الله يخليك

سعيــد وكأنه ماسك لعببه يحركها وامها تتصرخ : لاتخليني اقووم اضربها قدام عينك عشان اوريكي اللي تكسر كلامي ايش يسرلها
هديل هوا يتكلم وهيا تمسك في يده ودموعها تنزل : سيبها والله حسوي اللي تباه بس سيبهااا
دف ام هديل على الااارض : ااااه
هديل دارت جسمها بتروحلها الا مسكها من ذراعها وجابها قدامه : لو ماقومتي تلبسي دحين وتنزلي والله لاأخلي امك مشوهه قدام عينك فهمتتتي
هديل جسمها يتنافض تطالع في امها اللي تتألم من جسمها وبعدها فيه : ابوس يدك لاتلمسها والله حسوي اللي تباه والله العظظظيم
دف هديل : بسرعههه اجل اللبسي
ومشي بخطوات سريعه وقفل الباب بكل قوته وراه
وهديل جريت لأمها ونزلت لمستواها حضنتها وبكيت
انك تشوفي امك تنضرب وهيا بدا العمر شي حرقلها قلبها : انا اسفه
امها ماتكلمت وهديل تزيد تحضنها : ماما لاتزعلي مني والله اسفه والله ماجا ف بالي انو يضربك
: خلاص عادي
هديل بعدت عنها : لا مو عادي _ مسحت دموعها _ قوليلي كلها كم يوم وماحتشوف وجهنا كم يوم وحتخرجي من دا العالم الوسسخ كلووو
امها قربت وحضنتها بس قلبها وجعها ولأول مرا
تبا تشرد من كلا بنتها
تبا تشرد من دموع بنتها
حاولت توقف مع انو جسمها بجد يوجعها : بروح اتفاهم معاه
هديل : لا لا تروحيله
ام هديل : لاتخافي انتي اتجهزي على بال
وقفت بالقوه واتوجهت للباب وقفلتـه
هديل جالسه بالارض وتطالع في الشورت ودموعها تنزل
شالتو من الارض واتوجهت للباب قفلتو بالمفتـآح
ونزلت الجينز اللي على جسمها لبست الشورت
رفعت التيشيرت من على جسمها ولبست البلوزه القصيره اتوجهت للدولاب وطالعت بنفسها بالمرايه
ودموعها تنزل ورا بعض
جسمها بدأ يتنافض بس من الفكره انها حتخرج واحد حيطالع في جسمها كدا
اتوجهت للسرير وجلست وبكككيت بصوتها
كارهه نفسسها كارهه شكلها
حاسه انها كانت تعايب على هدى واليوم هيا مكآنها
انتبهت لشنطه امها على السرير
اتذكرت روان وبشـآر
اكتر اتنين ماحيرضو يشوفها ولا تتمنى يشوفوها بدا المنظر
تحبــهم
فتحت الشنطه وخرجت الجوال
ماتبى تشوف روان دي الفتره
ماتبى تشوفها لين ماتتعدل حياتها وحياة امها
كتبتلها رسـآله " روان مرا احبك لاتزعلي مني ومن كلامي اخر مرا عارفه انك حتدي الجوال لأحد يقرألك واتمنى انو يكون بشار ..ابا اقولك انا اسفه على كل شي سويتلك هوا اسفه لأني جرحتك بس والله احبك ..قول لروان اني مسافره كم يوم مع ماما ولما ارجع حشوفها "

في الجهه التانيه بشار يقرا الكلام وعارف انها مستحيل تقدر تسافر
تبا تختفي لسبب
اتصل بدون عقل
اتصل وهوا عارف انو جيتها اممس ونظرتها ليه وكأنو فيها الف شي بس مارضيت تقوله

اول ماشافت رقمو ردت بدون وعي بدون ماتفكر وحشها : بشار
: عهوود فينك
بشار طالع في رووان بعد الجوال عن اذنه : بكلمها واجيكي
وماساب مجال لروان ودخل غرفه نومه وقفل عليه الباب ..
وروان واقفه بنص الصاله مو فاهمه ايش الهرجه
هديل بس سمعت اسم عهود كدا انكسرت زياده مو راضي يستوعب انو دا مو اسمها
قالت بكل ضعف : لاتقولي عهود
غمض عينه وهوا ضاغط على فكه.. ورجع حاول يتكلم وهوا رايح جاي قبال سريره : فينكك
قالت بضعف : بشاار
بشار : نعم
هديل تبكي وتهرج : انا اسفه
بشار : مو وقته دا الكلام قوليلي فينك ابا اتفاهم معاكي
هديل مسحت دموعها : كلمني هنا
بشار ضاغط على قبضه يده : مابى هنا اباا اشوفك ابا اشوفك قدامي
هديل : ماقدر اليوم
بشار مو مرتاح لصوتها لكل شي مو عاجبه : انتي فين
هديل ولا كأنه سئلها : بشار عارف لما وقفت قدام سيارتك
بشار قاطعها : مو وقته دا الكلام بعدين نهرج انتي فين
هديل ببكى : ابا اكلمك خليني اقول اللي بنفسي
بشار بضعف اتكلم : حبيبي بعدين نتكلم طيب قوليلي انتي فين
كل ماتشرد من السؤال كل مايتوتر زيـآده
اول ماقلها حبيبي نزلت دموعها : ممكن احكيك كل شي
بشار حاسس نفسه ضعيف قدام صوتها مو عارف بيتوهمله
ولا هيا بجد فيها حاجه
يبا يطمن
لما ماجاها رد كملت : يوم ماوقفت قدام سيارتك كنت راضيه اني اموت عشان اعرف بس مين اللي خرج من بيت جاسم كنت احسبك حتووقف السياره وقلت لو ماوقفت انا اللي حيسرلي شي وينتهي كل شي قبل لايبدأ _ صوتها رجف _ بس ماسار شي من اللي كنت اباه فجأه سيارتك راحت لمكآن تاني
بشار قال بضعف : عمري بعدين نتكلم
هديل تبكي وتكمل : لو انا بطاله يابشار كآن مشيت وسبتك لو انا بطاله كآن لما اتصلت على الاسعاف روحت وخليتك لو انا بطاله ماكان جلستت ادور على انتا عايش ولا ميت وابا اطمن انا بلهه عارفه اني بلهه
بشار خلل يده بشعره : عهود ل
هديل قاطعته : لاتقوولي عهود لاتتتقولي
بشار مو قادر ينطق هديل
هديل : انا ماضحكت عليك الا بشي واحد اني عندي ام واب كل المواقف اللي كنت احكيك هيا ابوك سوالي هيا
غمض عينه وسار رايح جاي
هديل : مو انتا الغبي انا الغبيه لأني حبيتك وانا عارفه انك ولدو ابوك حرمني من كل شي وانتا كنت تعوضني ابوك عيشني اسوء حياه وانتا اديتني احلى ايام حياتي ابوك ضربني وهانني وانتا حضنتني واهتميت فيا كل واحد فيكم عيشني حاجه عمري ماحنساها قولي لو مكاني ايش تسوي وقفت بنص الطريق مو عارفه اسيبك ولا قادره اكمل معاك حاولت اجرحه بس انا اللي انجرحت حاولت احرق قلب ابوك بس انا اللي انحرق قلبي يابشار انا غبيه وعمري ماسويت شي عدل بحياتي
قد ايش يكره لما يسمع ابوه ايش سوا فيـهم ..: خلاص اعتبريه موضوع وانتهى
هديل : لا ماانتهى دام مو مسامحني
بشار مايدري مسامحها ولا لا بس يباها : انا مسامحك
هديل : تحسبني ماعرفك
بشار جلس على السرير ونزلت دموعه : وربي احبك والله تعبان من دونك مو عارف مسامحك ولا لا بس ابا اشوفك
هديل بس قال كدا سارت تبـكي
بشار مسح دموعه : فينك ابا اشوفك
هديل بضعف هرجت : بعد كم يوم حرجع وحجيك طيب ؟
بشار : انتي ماروحتي مكان مني سميه تضحكي عليا
هديل رجعت شعرها ورا اذنها : بشاار لما عرفت ابوك ايش يشتغل زمان ليش مابلغت عنو ..؟
بشار قال بعدم استيعاب : لانو ابويا
هديل : اجل انتا حاسس فيا انتا كنت حتوقف جمبو لو ماسار اخر موقف كنت حتساعدو لو قلك ف يوم احميني يابشار
بشار سكت وبعدها وقف وهرج باارتباك : لا لا لا لاتقارني موضوعي بموضوعك امك امك ايش تبا منك
دقت بااب الغرفه : هددددديل
هديل طالعت في الباب :قول لروان بس اني سافرت امانه انتبه عليها دي اليومين
بشار اتجننننن يمشي بالغرفه وشويا يكسر اي شي قدامه :لاتقفلللي وتجننيني
امها دقت بقوت: هدددددديل
هديل بتوتر هرجت بعد ما بللت شفايفها بلسانها : والله حكلمك بس مرا تانيه اول ماحقدر حتصل
نزلت الجوال لما امها دقت للمرا التالته ..
مسحت دموعها
طفت جوال امها
طفتــه لأنه عارفه بشار حيحاول يوصلها من الرقم ورمته في الشنطه

اتوجهت لللباب وفكتـو وامها طالعت فيها
حاولت ماتبتسم
حاولت تخفي ابتسامتها
مستنيه بس سعيد والبقيه يشوفو بنتها ومفتخره بدا الشي
قربت من بنتها وفكتلها ربطة شعرها ونزل شعرها لنهايه ظهرها
امها تحرك شعر بنتها وتجيبو على وجهها وهديل دموعها بعينها
تطالع في امها وتحس فيه شي مو قادره تستوعبه
فيه شي وسط امها كدا مو مريحها
بس في نص الافكار دي حضنت امها وبكيت
كرهت امها لأنها فكتلها شعرها الحركه حرقتها
بس حضنتها عشانها خايفه
هشانها تعبانه
عشانها ضعيفه
مو عارفه ايش بتحس
امها بعتها وهيا واقفه اليوم بتسوي شي عشان تساعدها
بس امها ياعالم دا شي صح ولا غلــط .!!!!
سارت مو عارفه بس عندها امل بعد دا الشي امها تحبها
مشيت مع امها
تمشي وهيا تبا تستوعب ايش قاعده تسوي
ليش امها ماتحاول تخرجها
ليش امها جايبتها بعد دا العمر عشان تخليها زيها
وقفت مشي كارهه نفسها
ماتبى احد يشوفها كدا
جسمها كلو يتنافض بس من الفكره
قالت بكل ضعف : ماما خرجيني من هنا
امها دارت عليها واخر شي اتوقعته تسمعه : هديل ايش بك
سحبت يدها من امها : ماما انا اسفه والله اسفه مابى احد يشوفني كدا خرجيني لو احد فكر يضربك والله انا ماحخليه
ام هديـل : اخرجك من فيين الرجال تحت و
هديل قاطعتها : رجال ! _ رجعت خطوى لورى _ والله مابى مابى الله يخليكي
ام هديل مسكت يدها : تعااالي ولاتستفزززيني كل شويا بكلمه
هديل سحبت يدها : ماااحنزل مابى انزل
بتتجنن منها ومن اسلوبها كل شويا لها راايي
بس دي شخصيتها تحاول تتناززل وبعدها تحاول تستوعب وتقوي نفسها
وترجع تضعف وترجع تقوي نفسها : انا اعرف واحد شرطي والله لو روحتي واشتكيتي حيوقف معانا _ مسحت دموعها _ ولد جاسم لو قلتلو بس الموضوع اكيد حيساعدنا
امها تطالع فيها مفجوعه قربت منها : لاتستهبلي وتفتحي فمك لاأحد
هديل بدأت تحس انو دا بجد حل : ماما ليش ماتبي تسمعي اي حل والله حيساعدنا انا عارفه اديني جوالك اكلمو وحيجي على طول
امها قلبها يدق بسرعه حفله زي كدا توديهم في ستين دهيه : ليش ماتبي تسوي اللي اطلبه وبس
هديل : وانتي ليش ماتبي تسمعيني ليش مصره انو مايكون فيه حل غير اني اكون نسختك ليش مو راضيه تستوعبي انو في الف حل عشان نخرج من الموضوع دا بدون ماتخليني اعيش دي الوساخه انا حروح اكلمو
وقبل لاتهرج امها مسكتها من يدها وقربتها بعصبيه : لاتخرجيني عن طوووري ياهديل وسوي اللي بقولك عليه
هديل انفجعت عينها بعين امها قالت بشك وهيا شايفه انو امها بترفض كل فكره ممكن تخرجهم من دي المواضيع : ماما انتي تبيني اشتغل هنا صح ؟!
ام هديل باانفعال : لو قلتلك ايوا .؟ لو قلتلك انو دا مو شي عيب وانا ابا بنتي تسوي اللي انا عشت طول عمري عليه انا احببك انا ماحخليكي تسوي شي ممكن ياأذيكي ليش مو راااضيه تفهمي
هديل ولابعدت عن امها قالت بنفس الهددوء وبنفس الصدمه : رجعتيني عشان اشتغل ولا عشان تبيني معاكي .؟
ام هديل : اكيد عشان اباكي انتي بنتي
هديل : طيب دام بنتك طلبي الوحيد انك تخرجيني من هنا مابى اسير زيك
ام هديل دفتها قدامها بااتجاه الدرج : تتععععالي
طاحت هديل على اول درجه مسكت بالدربزان ورجعت وقفت
ماتبى تنزل
امها جات تمسكها وتسحبها لتحت الا هديل سحبت يدها بكل قوتها
وفجأه امها طآحت لأخرر درجــه
وهديــل قلبها طاح معاها ماتحركت
شافت امها اترمت على الارض ولا قدرت تنزل عينها متعلقه عليها وبس
استنتها تتحرك بس ماتحركت
شافت دم يخرج من راسها وبرضو ماتحركت
فجأه طالعت في البنت اللي لابسه نفس لبسها وصرخت بكل صوووتها
نزلت بجسمها للأم هديل وتناااادي الكل
سمعت اصوات رجججال كتتير جايين
رجعت بخطواتها على ورى
قلبها حيوقف وهيا تبا تطمن على امها وخايفه تطمن
خايفه من الرجال وخايفه من المكان اللي هيا فيييه
ماتبى احد يشوفها وتبا امها وماتباها
الف حاجه جوتها بس جريت على طوول على الغرف دخلت الغرفه اللي خرجت منها وقفلت على نفسها بالمفتاح جلست ورا الباب بدون اي ردة فعل غيرانو جسمها بيتنافض
وثواني
وخرج صوت تنفسها المسموع وقالت بعدم استيعاب ودموعها تنزل : مامااا !
ولا دقيقتين الا دق الباب باأقوى ماعندو
سحبت جسمها بعيد عن الباب وصوت بكاها علي في المكان
تطالع في الباب ووخايفه يفتحو
ولما دق مرا تانيه وصرخ
قاما بسرعه واتوجهت للشنطه
شالت الشنطه وكبت كل شي فيها على السرير
تدورالجوال ومن الموقف اللي فيها قدامها بس ماشافتو على طول
واول مااخدتو شغلتو تــآني
ترفع عينها على الباب كل مايدق
وتبكي
وتبكككي
ممو عارفه خايفه منو ولا خايفه على امها ولا على نفسها
: فكككي يابننننت الككككلب
صوته راعبها اكتر من الرعب اللي شافتو
تحس الباب ينهزززز شوويا ويتكسر
واول ماشتغل الجوال دقت على طول وبدون تفكير على رقم بشـآر
وبنفس اللحظه جالها صوتــو : ااييوا عهود
مصمم انها عهود لسانه متعود مو قادرر
صوت حسسها بالأمان
تبا تكلمو مو قادره
تبا تقولو
صوت تنفسها وبكاها مخلي الكلام ضايع
: ب بشـآر
اليوم بزبـط تبا تطير عققلوو تبا ماتخلي فيه شي صاحي
صوته ارتخى على انو كآن معصب ومستنيها تتصل
اول بكاها غير ودحين غييير
دحيين يفجع
وفجأه سمع صوت احد يدق الباب علييها
رجال اللي بيصرخ مو سامع شي بس عارف انو بيصرخ
يسئلها ايش بــك
يسئلها فييينك
بس للحظه حست انها مو خايفه على نفسها اكتر من انها خايفه على امها
جلست على الارض وبكيت بصوتها وكل اللي تقولو آه ياماما

في غرفتــه وبعد اول مكالمه خلصها منها ..
مايدري يكســر الجوال ..مو عارف يخرج من الغرفه وهوا بدي الحاله
حيقول لروان
اصلا من شكلو حتعرف انو فيه مصيبــه
يمشي بالغرفه رايح جاي وهوا شادد على كل جسسسمه
وجهه محممر بطريـقه تفجع
عروق يده رقبته وجهه كلها بااارزه وماسك نفسه لايكسر شي عشان رووان بس
بيكبت بيكبتتت ومو طبعه يكبت عصبيته
مسك جواله تاني وارسل الرقم لصاحبـه
واول مارد عليه واتس قلو طلعلي الموقع
روان دقت الباب وهوا ولا رد
يجلس يوقف يمشي
يرجع يجلس
واحد بيحاول يضبط عصبيته ومو قادر
بيحاول يجلس عشره دقايق قبل لايخرج
بس مامرت عشره دقايق والا جواله يــدق
بس سمع صوتها اتجننن الف مرا
بس سمع صوت الخبط على الباب عرف انها ف مصييبــه
يكلمها بس كأنو بيكلم نفسها
يناديها بس يحسها بعالم تاني
يحسها مصدومه منهاره وتبا تتكلم الكلام مو راضي يطلع
وفجأه حسها مو معاه صوتها بعد عن الجوال رمتو ولا ايش سوت مو داري
بس عارف انها مو معاه
يبا سويتش السياره واتذكر انو ماعندو
لقى مفاتيح الدباب ووقف لوهله
لوهله بين انو كاره الدباب بسبب اخر مرا ركبـو ووفاة حور
مايدري ايش دخل
بس كدا كره اوم الدباب
ومآكآنت اللحظه طويله لما سحب المفاتيـح
وراح فتح ددولاب ملابسـه
اخد مسدسـه ودخلو في الجينز وعدل البلوزه وفتح باب الغرفـه
وروان على طول جاته وقالت بخووف : فييينك انتاا

مشي وسابها مشي بااتجاه الباب وهيا لحقت وراه ومسكتو وبعصبيه قالت : بكلللمك اناا هديل ايش تبا
ايش يقولها ايش يقولها دي
شكلو فاجعها عارفه انو فيــه شي
قال بالقوه : بجللس ششويا لوحدي
وخرج من البيت
دخلت اخدت شنطتها ولحقت وراه وةقف المصعد ودخلت : ايش ساار طيب فهممني
بشار صرخ عليها: اووووه اتضاااربت معاها ارتتتحتي ايش تبي دحين
روان انفجعت : طيب اهدى ليش كدا معصب
بشار : سميه سميه هججديني شووويا
مو قادر يعلق مو قادر يتككلم
كابت عصب الموضوع فيه اصوات رجججال
الموضوع فيه رجال
وبيحاول مايبين لروآن
قالت بتردد : هديل فيها شي
بشار : مافيها شي ماااافيها شي بقولك اتضاربت انا وهيا على موضوع يخصناا
انفتح باب المصعــد وخرجو للوبـي
وبعدها للمواقـف ودوبو بيركب دبابه الا جات مسكته : فين حتتتروح لوحدك
ولا رد عليها سحب يدو وبيركب الا مسكتـه تاااني
روآن بلهه
زي ماسوت لهدى حتسويلو
خايفه عليه
ماتباه يجلس لوحدو : لاتروح خلاص اجلس لين ماتهددى
جننتــه سحب يده بس دي المرا رجعت لورى وكآنت حتطيـح
قال بكل صووته : انتتتتي ايش لللك فيااا هااا
فجعهـآ
اشرلها على اللوبي : روووحي قوليلهم يوقفولك تاكسي وارجعي للبيت ولا اطلعي اقعدي فووق
وخصـرها ومشــي
مشي الدباب من قدامها بكل ســرعه
وهبا واقفـه
انقهرت
تحس انه صرخته فوقتها وهيا زي البلهه طول اليوم بتدور عليه
وتبا تطمن
هديــل في حياته شي وهيا شي ...
للمرآ التانيه لما يسير بينهم موقف يسيبوها كدا لوحدها
هيا حساسه دي الفتره ولا الموضوع عادي ماتدري
ماتبى تطلع
ماتبى شي منـو
تبا ترجع بيتها
ماعندها فلوس
غصب عنها منحوجه تطلب سياره على حسـآبه
دي لوحدها خلتها تبكي
دي لوحدها حستها اهانــه
اصلا اليوم لما كآنت حتطلع تتصل من عند ترف دا لوحدو كآن حارقها
لما قالت لتامر يوصلها دا شي قهرها انها بتطلب

مو شي سهـل انها بس تطلب
بس منحوجه تسوي دي الحاجات وتكون مبتسمه وكأنو شي عادي
بس مو شي عادي
مرا مو شي عادي
شي يبكيـها ويخليها تحس انها محتاجه
من اليوم حتدور شغل من اليوم ماتبى بشار ولا احد يساعدها
ايش هديـل تبا ماتدري بس اكيد اعتذرتلها والكلام الباقي زي مو واضح لبشار
وزي مو شايفه انو بشار كل همه جاسم ومين قتـل حور وهديل اللي تلخبط كل شي فيه اول مايعرف شي عنها
هيا مجرد صفر على الشمـآل
شي انضاف لحياته بس مالو دآعي
خلا سجنو جاسم
خلاض خلص اللي بينهم هنآ ...
دخلت طلبتلها سيـآره واول ماجاتها ركبت
المكـآن مرا بعيـد
بدأ غروب الشمــس
بدأ يمــشي السواق في الطريـق الطويل االلي مافيه اي مخلق
يمينـه ويساره عباره عن اراضي فاااضيه
ويها بعـآلم تاني
ماتبى تبكـي لين ماتكون لوحدها
وفحأه السواااق يفحــط وشهقت بفجعــه
مسكت بالكنبه اللي قبـآله وطالعت تبا تشووف ايش فييع لقت سياره واقفه قبالهم : ااايش فيـه
فجأه نزلو رجــآلين بااتجاههم مدت يدها بسرعه للباب وقفلتو
والسواق يطالع مفجوع مو داري ايش الهرجه هما اللي دخلو عليه وقفلو الطريق
روان بخوف قالتلو : لاتتفـ
ومالحقت تخلص كلامها الا هوا فتح الباب ونزل بيتفاهم
دخلت يدها بشنطتها وبتدور سكينتها الصغيره
متعوده على الضـرب والرجال اللي يبو مشاكل
من صغرها لو ضاعت سكينه تشتري غيرها يدها تتنافض وهيا شاده على السكين ووماخرجت يدها من الشنطه
وفجاه مسكو الرجال ورموه على الكبوت والتاااني جايها
فتح الباب لقااه مقفــل وجا فتح الباب اللي قدامها ودخل جسمو
اتررررعبت
ماتت خووووف
دوبو بيمـد يده ويسحبها الا خرجت يدها من الشنطه
وقالت بصوت متقطع : والله لو مسكتننني يااويلك
اول ماشاف السكين ضحك وبدال مايسحبها
خرج من السياره
حسبت انو سابها وفجاااه كسر القززاز اللي بناحيتها ودخل يدو يفك الباب
رجى فعلل ماكان فييه مع انو عادتا ردات فعلها سريـعه
بس مع صوت القزاز انفجعت ومسكت راااسهااا بخوووف
باأقل من ثانيه فتح الباب
باأقل من ثانيه سحبها وهيا تصرخ بكل صوتها
باأقل من ثانيه ثبتها على السيـآره ..

جالسه قدام المرآيه وتتمكيـج وحاطه السمآعات .
تحس بجد فيه حاجه جوتها اتغيرت من بعد ماسنو اتكسر ليش ماتدري
بس الموضوع مضحكها وبس بتدلع وتدلعه : حبيبي انتتا صورلي شكلك طيب
لؤي في السياره وراخي الكنبه ومسدوح : خلاص ترا ماحيفرق عن اول
علا : هههههههههه للون السن زي بقيه الاسنان .؟
لؤي بنرفزه : ايوا ياعلا
علا : هههههههههه ايش بك
لؤي : يااخي عيله مستفزه انتو الواحد في مصيبته وانتو تضحكه احترمو المصيبه اللي انا فيها
علا : ههههههههههههههههه والله والله كلو من عدي
لؤي : الله ينكد عليه زي ماانكد عليا
علا قفلت الايلاينر : حرااام عليك ترا وربي جاه اخلاقو مقفلـه وعزام كلمو اتضارب معاه بدون سبب وطلع لغرفته من الظهر لدحين نايم تعرفو انتا لما ينام كتير يعني خلاص اخلاقو مقفله
لؤي : يستاهل الوسخ
علا حزنانه عليه : والله احزن عليه
لؤي بنرفزه : طبعا احزني على اخوكي وانا
علا قبل لايكمل وهيا ماتت ضحكك : هههههههههههههه حبيبي وربي وربي اني خوفت عليك بس عدي والله طريقته بالضحك بجد ماقدرت امسك نفسي
لؤي مسوي لساته زعلان : لاتحاولي بجد انقهرت منك اكتر من عدي
علا قامت من على الكرسي وعلى وجهها ابتسامه شريره
تعرف تخليه مايزعل قالت بدلع : تقدر تزعل من روحك ؟
لؤي ابتسم : ايوا
علا وتكتم ضحكتها وتتكلم وهيا مشتاااقه لكلامهم وهبلهم دا : كيف تباني اعوضك
لؤي زادت ابتسامته : انتي تعرفيني مايحتاج اقولك كيف
علا : لا إنتا قول عشان انا فيه حاجات كتير براسي
لؤي ارتخى صوته : زي ايش
علا : زي اني اروح اقول لماما دحين اني موافقه او اخرج اتعشى معاك او اقولك قد ايش انا مشتاقتلك
لؤي : اباهم كلهم
علا : ههههههه ليش الطمع دا اختار واحد
لؤي : انا طمااع فيكي لو فيه خيارات اكتر كملي وبرضو حختارهم
علا جلست على السررير ووجهها محمر : لايكفيك كدا ههههههه
لؤي : طيب ياعمري يلا قومي عوضيني وابدأي باأول حاجه
علا : من عيوني
لؤي : اجلطيني قبل لاتكلميهم بااسلوبك دا طيب
علا : ههههههههههههههههه

وبـس قفلت منـه راحت لأمها وهيا منحرجه وكأنها ماكان خطيبها في يوم
وكأنو ماكانو يجرو بدا البيت وصريخ ومضاربات الاتنين
قالتلها انا موآفقـه وستها قلبت البيـت احتفـآل
امـآ امها شويا كدا وطلعت لعـدي
فكت الباب وفتحت اللمبـه
ولقتو صاحي وماسك جواله طالع فيها وهيا اتكلمت : ايش بك
عدي : دوبي صحيت
امه دخلت وقفلت الباب
سحبت الكرسي المتحرك وجابتو قبال السرير وجلست : ايش سار بينكم
عدي بعد اللحاف وجلس وصوتو كلو نوم : ولاشي
امـه : تكذب على مين البيت كلو عارف انك مضارب مع لمى
عدي ماقال لأهله على الضرب اللي سرلها
ماقال انو شافها بمنظر فجعـه
مو حابب يتكلم عن اهلها احتراما ليها
يحبـــها
يحبها ويبا الكل يحترمها هنآ
مايبا في يوم تتحسس من هرجه تنقال وحتى لو على نياتهم
او انها ماتاخد راحتها بالكلام عن اخوانها لأنه كلهم حيسيرو زيو وحيشوفهم همج
وحايفرقو مين الطيب ومين الوسـخ
خلاص موقف الصوره يكفي
مع انو اهله طيبين بس برضو خلى الموضوع له وانتهينا ..
قال بتردد : حروح بكرا اتكلم مع اخوانها حقولهم الفرح بعد شهر
امه : عدي انتا لساتك مصمم
عدي محرووق نفسه ياخدها وانتهينا شهر دي اتنازل فيها عن مية شي : مو مشكله حأثث لو غرفه النوم وغرفه المعيشه والباقي مع الايام نسويه ماحأخر زواجي عشان بيت
امه : ايش تبا الناس يقو
عدي بحده : امممممي لاتجيبلي سيره الناس اللي مو عايشين معانا يكفي اني مسوي فرح عشان الناس
امه بتحاول تكون هاديه : انتا ايش بك دي الفتره انا ماسرت عارفه حابب البنت ولا كارهه ايش الجنان اللي بتسويه
عدي : انا مو مرتاح دام هيا بعيده عني ابا نتزوج عشان ارتاح
امه : من ايش مو مرتاح فيه شي بيسرلها ..؟
عدي حرك رجولو بتوتر مابين يهرج ولا مايهرج
بلع ريقــه وطالع بجواله
ولا كلمته من بعد الجامعه
قال بتردد : خليتها تسجن اخوها ودحين تبا تخرجه
شهقت بكل صوتها وضربت صدرها : اااايش
مايعرف يهرج يجيب الهرجه دايما من النـــص
عدي حكاها كل شي
واول ماسار يوصـف كيف شافها صوته رجف
كيف كآن وجهها كلو دم حست ولدها يبا يبكـي
حستو ماسك نفسه بالقوه
: ماحقدر اجلس مرتاح وهيا هنآك وانا مو دداري اخوها المجنون ايش يفكر
امه جالسه قباله وباين انها مصدومه
مصدومه لأنه عدي يحكيهم كل شي وطلع ساكت وهما شايفينو اوفر وبيتريقو عليه
وعلى خوفـه عليها
ومصدومه وهيا بس بتتخيل شكل البنت مضروبه
دي مرت ولدها في النهايه ..
قلبها وجعها عليه لأنه تحسها طيبه وعلى نياتها

قالت : سوي اللي تشوفه ياولدي
عدي : يعني اقولهم اسبوعين
امه : مع نفسسسك شهر كويس
عدي : دوبك كنتي متأثره
ماتدري تضحك ولا تسبه ولا ايش يستغل الموقف على طول : شهر ياادوب عشان نجهز بس انتا اهم شي افرد وجهك
عدي : ان شالله _ بتردد _ لاتقولي لأحد ياأمي
امه اشرتلو براسها : ان شالله بس ياولدي لاتدخل بينها وبين اخوها الا الأخوان مالك صلاح فيهم
عدي : سمعتيني وانا اقولك كيف شوفتها !
امه : طيب انتا عليك بمرتك ماقلتلك لاتخاف عليها بس الوحده اللي تتنازل عشان اهلها دي تشيلها فوق راسك
عدي بنرفزه : دا غباااء
امه : دوول بزوره اخوانها يعني شي منها كيف تباها تحرق قلب اطفال على ابوهم .. وامها ايش وضعها
عدي
: ماتدري عن شي قالولها مسافر
امه : طيب المهم لاتضغط على البنت دا قرارها ودول اهلها

اتكلمت معاه حستو مو قادر يقتنع
وفكره خوفـه على لمى طاغيه على الف حاجه تانيه
بس بيحاول مايفتح الموضوع
مسك جواله اتصل عليها مرتين ولا ردت عليه كلمها واتس وبرضو ماردت
دخلت المحادثه وخرجت وهنــآ نرفزززته

امـآ هيا جالسه على سريرها وتبـكي
كلامه قهرها
" كآن عاجبك منظرك اخر مرررا !!!! انتي مجنونه صح "
مسكت جوالها وصمتته لما شافت اتصالاته
فتحت الواتس ولقتو كآتب
" بتصل ليش ماتردي "
حتى مابيعتذر على اسلوبه رمت جوالها بقهر واخدت الدبدوب رمته بالارض
ليش ماتدري بس كدا مقهوره منو فاتطلع حرتها بالاشياء اللي جابها ...
رجع اتصـل ولا ردت

انسدحت على سريرها ومــرت سآعه وبعدها دق الجـرس
ربع ساعه وامها دخلت عليها الغرفه
ضمت يدها تحت صدرها : الاخ عدي هنـآ
تحت اللحاف بس وسعت عينها مع الفجعه

قاعد يتحاشى الكل طول اليوم ماخرج من غرفته الا لطاوله الطعام ويـرجع
مايبى يتجمع مع بناته
مع مرتاته
مع عمتـه
ولا مع ابـوه
مسكـه ابوه من شعره وجلس يهدد يهدد بااسلوبه القذر
بااسلوب كلو فيـه لاتخليني اقهرك باأمك
لاتخليني احرق قلبك باأمك
ورماه بالارض
كأنو بسجن وقرب انو ينفرج عنه
بيحاول مايحتك مع احد بيحاول مايتكلم مع احد
بيحاول مايتمشكل وخلاص ..
بيثق في خاله وبس ..

ترف في غرفه سـآمي والمكنسه والنظفات كلها حولينها وقاعده تنظف الغرفه
حتى الدولاب مسحته من جوا الستاير نزلتها وغسلتها
بتسوي كل شي وهيا مبتسمه ..مبتسمه من قلبها

هديل دخلت في حاله صدمه وهستيرية بكـآ
وهيا تسمع سبات بتنقـآل لها
" والله ماحرحمك "
" اصبرري بس عليا يااابت الكلب "
غمضت عيونها وغطت على ااذانيها وتبكي بكل صوتها
شكل امها في راســها
وكل شي سواه فيها جاسم قاعد يتعاد فيها
نفس الموقف
نفس الموقف وهيا في بيت جلال وعمرها 14 سنـه
نفس اللحظه لما شردت منهم ودخلت بغرفه وقفلت على نفسها
وجا جاسم يضرب على الباب بعصبيــه ويقولها
" يابت الكلب "
ماتدري انو داك اسمو جلال
ماتدري انو دا عم بشـآر
كآنت صغيره
صغغيره وجلال يبا يأدبها ... لأنه جاسم مو قادر عليها

بشـار بس عرف فين العنوآآن
مسـرع بطريقه جنونيـه
بطريقه تفجع
يمر من بين السيارات زي الهوآآ
واللي يسب
واللي يقول ناااس طايشه
واللي يدعي
ليـــن ماوصل لوجهتــه نزل وهوا ياخد انفاسه ورا بعض

روآن ماستسلمت على طول حاولت تشــرد بس مسكها ورماها بكل وحشيه على الرصيف : اههههجدي
وهيا ترجع تقوم وتحاول تفلت ويمسكها ويسحبها لين السياره ويخبط جسمها يبا يثبتها وهيا
تدف تدف
ودموعها بعينها
صوت انفاسها ورا بعض
محد داري عنها
محد حاسس بالخوف اللي جوتها
والسواق راخي راسه ومو قادر يساعدها خايف
بالقوه ثبت وجهها بيده وقال : اسمعي كلامي مزبووط

في دآك المطعـم الرآقي جلست بكل انآقـه
جمالها جذااب
بس مايجذبه
عيونها ملفته
بس ماتلفته
ببساطه مو داخله مزآجه بالمره ...
انسان تعامله كله مع البنات متعوده ياخد ويدي بحدود العمـل
عمره ماتعدى دا الشي الا مع روآن
هوا الفضول وحكايتها تخلي الواحد يبا يعرف ايش هرجتها
ولا لأنه هيا جاذبته
ولا لأنه يكره جرئتها
سلمى تتكلم وهوا يفكر بديك البنت الغريبه اللي قصتها اكيد مليون واحد غيره يبا يعرفها
بس دا السبب اللي يخليه يتكلم معاها ولا دا مبرر عشان يكلمها
: تاامر
استوعب سرحانه قرب للطاوله : عيوني

رشا تدور بغرفتها ومستنيـه الطرف التاني يرد ..واول ماردت صرخت : علاااا
علا : بسممم الله ايششش فيه
رشا : عندي خبر ليكي قلبي حيووقف
علا : هههههههه حتى انا بقولك شي حللو
رشا : انا لللي متصله اسمعيني اول
علا : ههههههههه انا اكبر منك واحكم منكك المهم تخيلي
رشا : ياااااحيوووانه اسمعيني
علا : اخبااارك غبيه قولي ها ايش عندك
رشا : تميم اتقدملي
علا صرخت بكل صوتها : تمزززززززززززحيييي
رشا ضحكت : والله قلبي حيوقف من اول بيتصل ومكسوفه ارد
علا :هههههههههههه خلاص كلم اهلك ؟!
رشا : ايوا ماما اتصلت كلمتني وقالتلي حكلم ابوكي يستقبل الولد واخوه بدي اليومين
علا : لاااااا ابااا اجيكي اباا اشووفك
رشا : تعاااليلي انا مو عارفه ايش اسوي ميسا لما عرفت شمقت بوجهي تقولي مسكينه اخيرا جا واحد عبرك
علا بحقد : الكلبببه وربي دي البنت انا اللي حقتلها بيوم
رشا : ههههههههه اخصريكي منها المهم انو باين اني مبسوطه ومو عارفه ايش اقولهم
علا : قوليلهم علا ولؤي رجعو لبعض عشان كدا مبسوطه
رشا : لما تنخطبو و
علا قاطعتها : خلاص انتشر الموضوع في العيله دوبو بس باقي نرجع نملك مدري كيف الاجرائات دحين عشان الطلاق الاول
رشا : وااااااااااا يااقلبي انا وانتي مع بعض
علا : ههههههههه اطلقت لعيونك يااشيخه عشان نرجع نملك بنفس اليوم
رشا : هههههههههههه اسري ياهبله

نهايه الفصل