الفصل السابع والعشرون ..
بدأت اميـل لتلك الفتآة ام اصابني الفضول لقصتها لاأعلم ولا أهتم
لكني احببت التنآقض
بين قوتها ودموعها
حزنها وضحكاتها
احباطها واملها
تلك الفتاة صاحبة النظرة الجريئـه
آه كم تقتلني تلك النظره ..
صبـآح جميـــل فتح عينه واتذكر امس وابتسم ..
ابتسم وهوا لساته مسدوح ... جلس واتمطع وهوا برضو مبتسم ..
ملامحها محفوره براسه
شكلها وهيا لابسه الجآكيت وواقفه عند باب شقتها وهوا قبالها
عن الف احساس
نظراااتها مجنونه
فتح باب غرفته واول ماشاف تميم بالصاله اختفت ابتسامته
اما تميم عكسه زادت ابتسامته على طول : صباااح الخير
تتامر هرج بدون نفس : يااخي انتا متى تنام ومتى تصحى
تميم : ههههههههه صاحي لعيونك في كل الاوقات
تامر شمق بوجهه ودخل الحمام وتميم ضحك من قلبه
حالف يمين مايسيبو ف حالو اليوم ...
وومسوي الشخصيه عليهم وطلع جايب العيد
تميم لابس ملابس العياده وساند جسمو على الكنبه
نومه مرا قليل ويصحى رااااايق ومحد قدو
طبيعي مرا طبيعي ينام بس اربع ساعات ولا خمسه ساعات في اليوم
خرج تـآمر وتميم ابتسم ديك الابتسامه المستفزه ورفعلو حوآجبه الاتنين كأنو يسلم !!
تامر كآن داخل غرفته الا وقف مفجوع من نظراته : خير !!
تميم : جبتلك عروسه
تامر مو قادر يستوعب انو دا الادمي صاحي من النوم حتى صوته لسى كلو نوم : تتعاطى انتا ؟
تميم : هههههههههه _ هرج بجديه _ تعال تعال
تامر ولا أتحرك : بروح الدوآم
تميم وقف : طيب مو مشكله انتا اللبس وانا اكلمك بالموضوع
تامر اتننرفز : موضووع ايش انتا اهبل
تميم حط يدو حولين كتف تامر ويمشي : انتا اللبس وانا حتكلم لاتشيل هم مجرد اقتراح
تامر دف يدوو وقال بنرفزه : تميم ماحب احد يلمسني كم مرررا اقولك
تميم : هههههههههههه يااخي لازم تتعود
تامر مرا عصب : ااايش باأهلللك انتا اليوم
تميم : ههههههههههههههه _ مد يدو فك باب غرفه تامر _ تعال تعال جوا واقولك ايش بي
تامر طالع فيه بنص عين واشر على خشمه : تميم ترا اخلاقي في خشمي
تميم سحبو : الموضوع حيهديك تعال بس
دخل الغرفه وقفل تميم الباب وراح جلس على السرير وتامر لسى واقف عند الباب ويطالع فيه
تميم : اسمع اسمع لقيتلك دكتوره نفس مواصفاتك محترررررررمه يااخي اول ماشوفتها حسيتها تنفعلك
تامر يطالع فيه وتميم يبا يموت ضحك على شكله بس لساته مسوي جدي مرا
تامر : احد قلك اني ابا اتزوج
تميم بتعاطف : مو هاين عليا اخطب قبلك انتا اخويا الكبير و
تامر قاطعه : تميم اطلع برا
تميم : هههههههههههههه ايش بك خلي امي تشوف البنت و
تميم لساته يقاطعه : وليش حتزوج وحده انتا اخترتلي هيا خير ايش باااهلك انتا من صباااااح ربنا
تميم : ههههههههههههههه ليش متنرفز والله حسيتها مواصفاتك ومن امس بكلمك بس رجعت مالقيتك _ رفع حاجبه _ ايوا صح انتا امس مشيت قبلي من عند ترف فين روحت ؟
تامر ولا كأنه مسوي شي : عندي شغل شايفني واحد فاااضي يعني
تميم لو ماشافو بعينه كآن صدقو وهوا يتكلم بدا الاسلوب : عارف انك مرا مشغول
تامر : خلصت ..؟
تميم : لا ...مو مشكله _ ياأشرلو _ اتجهز اتجهز وانا بتكلم
تامر جا لعندو وياأشرلو بيدو : انتا تستهبل على رااسي !
تميم : هههههههههههه ايش بك
تامر : شايفني واحد لما يصحى يححب يطقطق مع احدد !!!!
تميم : ماقلتلك اتكلم انتا اسمع بس شووف البنت اخلاق انتا ايش خسرااان
تامر : ياااخي مابى اتزوووج
تميم : باقيلك سنه ولا سنتين وتدخل التلاتين يعني لين متى
تامر بقله صبر : تميم اطططلع براا
تميم اشرلو : شايف وصلت لمرحله سن اليأس
تامر بكل وعيد : وربي لو ماخرجت
تميم وقف وقاطعه : اهو خارجين براحتك _ يمشي ويتكلم _ انتا الخسران
وفتح الباب وخـرج
تامر يطالع فيه مفجووع !! وراح غيـر ملابسـه واتجهز وخرج من البيت
وكالعاده يمر يشتريلو قهوه ويكيف في السياره وبعدين يروح للدوآم ...
اليـوم يومه مع سلمـى ولو زبـط اللي في راسه بكرا حيرجع سآمي ..
مسدوحـه على سريرها بين الصحيان والنوم ماتوقعت تحس بكل دا الفراغ
بعد سآمي ..
يمكن لأنو ماسار لها نفس تسوي شي التلفزيون مطفي الاب توب مطفي
دوآم مابتروح
كدا تقعد طول اليوم ياتكلم براء ياتتفرج على صور سامي ياتستنى تامر
دا يومها ..
تغصب نفسها على النوم ... مسكت جوآلها لما احد كلمها واتس
ابتسمت لما شافت اسم " تميم "
فكت المحادثه وهوا راسلها مقطع صوتـي
شغلـتو وسارت تضحك بصوتها
مسجلها كل اللي سار بينه وبين تامر ...
" هههههههههههههه طبعا مشغول مو فاضي "
تميم " شايفه كيف عينو قويه "
ترف انسدحت على ظهرها ورافعه الجوال وتكتب " لو انتا مكانه كان قلتلو ؟ "
تميم " والله انا ماليا بالحركات دي بس ممكن كآن لمحتلو مو لدرجه اسوي اني كنت اشتغل "
ترف " ههههههههههههه بريئ ...شايف الجرح اللي براسه "
تميم : ايوا ؟ "
ترف " انضرب بسببها "
تميم " هههههههههههههه تمزززحي "
ترف تضحك وتكتب " والله "
تميم " ليش ؟ "
ترف " مدري كل ماجاب سيرتها اصلا يقول انها مو عاجبته وادخل في جدال معاه عشان كدا مصدومه "
تميم " دا تمويه عشان لاتشكي "
براء " تكلمي مين "
ترف زادت ابتسامتها وجلست " تميم ...صح النوم "
براء اتصل عليها
حطت الجوال على اذنها
براء يتكلم وصوته كلو نوم وبكل حب : حلمت اليوم فيكي
ترف تمرر يدها على اللحاف : ايش حلمت
براء : والله الحلم مرا طووويل بس اهم شي كنتي مرتي
ترف وجهها حمر وتلعب باللحاف : ينفع اشوفك اليوم
براء كآن مسدوح ويهرج بكل نوم وفجأه فاق اول مرا تطلب هيا اللي تشوف : طبببعا
ترف : هههههههههه ايش الحماس دا
براء : اخخخيرا حسيت انك اشتقتيلي
ترف وجهها محمر وتتكلم وكالعاده لازم سامي في الموضوع : عشان سامي بكرا جاي وحنشغل اليومين الجيه احتمال حتى ماقدر اكلمك
براء : اجل ابا طول اليوم اكون معاكي
ترف : ماحقدر تعرف تامر يجيني لازم ارجع بدري
براء : اها طيب بس شوفي متى تفضي وكلميني ..._ بتردد _ ترف
ترف : ايوا ؟
براء : ايش سار معاكي على الموضوع اللي اتكلمنا فيه
ترف عرفت على طول ايش يقصد بس من يوم ماتامر قلها سامي جي ماطلعت السطوح : لين دحين ماشربت وامرا
براء ابتسم : كويس فيه سؤال براسي
ترف : ايش هوا ؟
براء : انتي من فين تجيبيه ؟
ترف سندت جسمها على المخدات ومكسوفه ترد
براء : ترف !
ترف : معاك
براء : من فين تجيبيه
ترف بلعت ريقها : خلاص قلتلك حبطلو
براء باين من وجهه انو مو عاجبه الموضوع وإلا يبا يعرف : طيب ابا اعرف
ترف سكتت وقالت بتردد : وحده تجي لبيتي
براء سكت سكت يبا يحاول يستوعب وبعدين قال بصدمه وبصوت راخي : لبيتك ياترف !
ترف تحرك يدها بتوتر على الجينز : خلاص قلتلك بطلت
براء : بطلتي عشان سامي راجع عشان ماعندك مشكله
ترف لأول مرا احد يحاسبها مكسوفه ومقهوره مشاعر ملخبطه
بس تبا تبكي
براء : اوعديني انك ماتتصلي عليها بعد كدا
ترف بصوت هادي : طيب
براء : اوعديني
ترف وجهها محمر ومستحيه من نفسها : وعد
تطـآلع فيـه وهوا بيركب الدبـآب بيحاول يشغله ويده تتنـآفض
اتوجهت للتآكسي : خليك هنآ
ماتقدر تسيب هديـل
بدي الحآله محد يثق فيها ..
راحت بخطوآت سريعه للمصعد وتضغط بصـربعه وعلى طول انفتحلها
دخلت وطلع للدور اللي اختارته
بخطوات سـريعه دخلت لعند هديل : هددديل بسسرعه تعالي
هديل كآنت مسرحه طالعت فيها وقالت بهدوء : ايش فيه
روان : بقولككك بسرعه
هديل قامت مفجوعه ولحقتها قفلو الباب وراهم ومسكت يد هديل وتسحبها بسرعه
وهديل مفجوعه : ايش بكك
روان : دحين دحين اقولك بس بسرعه امشي
ومن المصعد على التآكسي وقالتلو يممشي
الطريـق حاليا مساار واحد تطالع وتدعي انو تلقاه بالطــريق
هديل : روان ايش بك
روان جالسه في النص وتطالع قدآم : ولاشي بشار يباني اجي معاه
هديل : فين ؟
روان : مدري دحين بشوف قلي تعالي وبس _ وجهت كلامها للسواق _ لو سمحت ممكن تسرع الخط فااضي
زاد شويه سرعتـه لين ماشافت بشـآر
ماكان مسـرع بالقوه بيشوف طريـقه : خليك وراه
سندت جسمها على الكنبه وهيا عينها عليـه
وهديل دارت راسها تطالع في الطآقه وراحت بععاااالم تاني وهيا تفكر
في بيت جميـل ...
جالو اتصآل وهوا بيفطر مع مرتـه
رد : وعليكم السلام ... طيب اديني العنوآن .. انا قلتلك ارسلو لبشار .!؟!! _ بعد كرسيه واتكلم بعصبيه _ انا قلتلكم بشااار مالو صلاح في اي موضوع يخص دي القضيه .. تستهههبل كلامي ولا كلامه اللي حيمشي يعني ... متى ارسلتلو ؟ ...طيب قوولي فين العنوان
مشي بااتجاه غرفتـه يغير ملابسه
ومرته تلحق وراه : ايش بك يااجميل
جميل هرج بعصبيه : دا الوووولد حيجنني
رمى جواله على السرير وفتح دولاب الملابس
مرته : ايش سااير كمان
خرج ثوبـه : يعني بالعقل انا حقولهم ادوه عنوان اللي قتل ا ختك
مرته : لاحول ولاقوه الا بلله
لبس ثووبه وخرج بصربـعه مستحيل يخرج بدون شمآغ لكن مع الفجعه اللي فيه خرج
سمعة العيله قاعده تندمر
من جابر لجلال لجآسم كآن شايف الوحيد اللي طالع عاقل بشـآر
واهو اتجنن منهم التلاته ..
اذا ابوه حاول يقتله ايش حيسوي للي قتـل حور ..
اول شي جا ف باله جميـل المسدس حقت بشار كآن المفروض يسحبه من يوم ماوقفه عن العمل .. طول الطريـق زي المجنون يفكر يمشي بكل سـرعه
بعكس بشـآر اللي مو قادر يمشي من كتر الطريـق مابيغبش بعينه
بيحاول يركز
بيحاول يشتت تفكيره عن الموضوع
يبا يووصل
يبا ياخد حق اختـو
الرساله اللي ارسلها الولد لدحين ححارقته
وهوا يوصف كيف كآنت تصرخ
كيف كآنت تنادي بابا
دي لوحدها مخليتو طول الوقت يتخيل صوتها
دي الدلوعه دي اللي عمرها ماأذت احد
عمرها ماجرحت احد
كآن بيحاول يشتتت من راسه الموضوع بس ماقدر ..
البيت بعيـــد
بس حيوصــل حيبرد قلبه
ووًـل وقف دبابه ويطالع في الواتس يقرا الوصف تآني
دخل لأحد الشووارع ووقف التـآكسي جات هديل تفك الباب الا روان قالتلها : خليكي دحين جيه
هديل : حجي معاكي
روان فكت الباب : اصبببري بقولك
ونزلت وقفلت الباب ..جلست هديل بكل استسلام مو عارفه ايش هرجتهم .. بس فجأه اختفت روان
دخل للعمـآره وروان مشيت بخطوآت سـريعه بتحاول توصـل
طلع الدرج واول ماوصل للشقـه سااارد يدددق بيددده بككل قوووه
يدق ووورا بععض بصوت مرررا مزعــج
بس مسك كلون الباب ونزله الا انفتح !
انفتح بكل سهـوله
مشي لنص الصـآله وانفاسه ورا بعض وعقد حوآجبه لما شم ريحه كتمتـه من قوتها
دوبه بيدخل الغرفـه الا وقف عند الباب
يطـــآلع مفجووع
ودار راسه لما نادته : بشاار ايش تسوي
حطت يدها عند خشمها : ايش الريحه دي
رجع دار راسـه لللمكآن اللي يطـآلع فيـه
كل شي هادي فيه
دقات قلبه صوت تنفسـه كل شي سار طبيعي
ايش جاب روان اخر همـه حاليا دا السؤال
روان قدمت لعنده تبا تشوف في ايش يطالع فاجعتها نظرته
وصرخت بصوتها ورفعت يدها على عينها لما شاافت المنظظظر :ياألللله
كل جسسسمها يتنـآفض واحد شانـق نفسـه بالمروحه
وجهه متغير لونه
الذبان حولينـه
الكرسي الخشبي مرمي في الارض
جا يدخل الا روان مسكتو من بلوزته ودارت جسمها قالت بخوف : بشااار امشي نطلـع
حط يدو على يدها وودف يدها بدون اي تعليــق دخل وعينه على مكآن واحد
اما روان دارت تطالـع واول ماجات عينها على الولد
رجعت خرجت بسرعه لباب الشقه وهيا تبـكي
مو قادره مو قادره تطــآلع مو عارفه ايش تسسسوي
مو عارفه مين دا ولا ليش بشششار داخل
رفعت يدها اللي تتنافض على قلبها ودموعها تنزل قالت بخوف : ياااربي
تبا احد يطللع تنزل تنادي اي رجال ولا كيف تتتصرف !!!!!
امـآ جوت الغرفـه عدى من جمب الولد
نزل على ركبتـه للفرشه اللي محطوطه على الارض واللحاف مطبق بطريقه منظمه والمخده فوقها وبعده جوال حور
جوالها الوردي
اللي نازل منـو عروستها الفرو الصغيره
مد يدو اللي تتنفض واخد الجوال
طلع صوت جرس اول مارفعو من اللعروسه
نزلت دموعه
دا الصوت كآن يسمعو كل ماتمشي وهيا تكتب ومبتسمه بالجوال
انتبه للورقه اللي محطوطه اخدها
كتب فآرس اخر كلام عنده
مو انسان سيئ الحيآه خلتو متوحــش
حقده على جاسم عمآه وماخلاه يفكر
وماتوقع انها حتموت
يعرفها له فتره طويله عمرها ماقالتلو انها مريضـه
يقرأ بينه وبين نفسـه كلمه كلمه
والورقه تنهز بيده وبيده التانيه ضاغط على جوالها
" عارف انك حتجيبني ياجاسم عارف انك حتنتقم لبنتك
لما ارسلتلك الرساله كتبتها وانا ابكي ومفجوع
انا عندي ضمير احسن منك انا كنت بريئ في دي الدنيا وانتا اللي شوهت كل شي فيا
كنت ابا اقهرك ف بنتك ... كآنت طيبه مرا ماتشبهك ماستوعبت انها دي بنتك
بس كل مرا اتذكر انتا ايش سويت فينا احاول ماتعاطف معاها
في كل مرا ابدأ احزن عليها اطالع في جسمي المحروق واتذكر كل لحظه عذبتني فيها
ماكنت اتوقع انها حتموت عشت دي الايام زي المجنون خليتني بدون عقــل
وماحقدر اكممل وانا مو قادر اخرج صوتها من راسي
ابا اخرج كل شي من رااسي ودا الحل .. زي ماعذبتنا بنتك اتعذبت لين مـاماتت
الجممله الاخيره دمرتوو جلس ودار جسمه وهوا يطـآلع في الانسـآن اللي معلق بدون اي روح
يطـآلع فيه ودموعه تنزل
دا اللي قتل اختـه
موت نفسه من كتر ضميره ماأنبه !!
ليش كيف اتألمت كيف طلعت روحها
كيف اتعذبت
بشار شكلو واحد بدون عقــل خلاص
يطالع في انسـآن ميت ومو قادر ينزل عينه من عليـه
شعره نآزل عل ى جبينه من كتر وجهه مو معرق ..
ياخد تنفسـه بشووويش بس بصوت مسموع
مميل راسه وقاعد يتخيـل صوتها
يحس انو سامعها تصررخ
روآن واقفه برا مو عارفه ايش تسوي ماتبى ماتبى تدخل تشوف المنظر تاني
نزلت لنص الدرج ورجعت طلعت وقفت عند الباب حاولت تدخل
بس خطوتين دخلتها ورجعت خرجت بخووف
رفعت يدها على شفايفها وتحاول تفكر بحاجه
مافي براسها شي
نزلت الدرج وخرجت برا العماره وتطالع في الرايح والجاي
تنادي اي احد ...؟!
خايفه تدخلو بمشكله
تسيبو ينزل لوحدو .؟
الادمي ميت كدا ولا كدا
طيب مين دا ؟!!!
ماتدري عشره دقايق ولا ربع ساااعه وهيا تستتنى بشـآر
بس وسعت عينها اول ماشافت جميــل
لأول مرا تنبسسط لما تشوفو
جاها بخطوات سريـعه وقبل لاتهرج اتكلم : فيين بشار
اشرت بيدها : فووق
على طول مشي من شكل روان عرف انو فيه مصيبـه
طلع جررري الدرج وروان مشيت وراه لين ماوصل لللشقه وملامحه كشرت من الريحه
بس ووصل للغرفه وقف للحظه يطـآلع مفجوع
وروان في الصـآله ماقدرت تقرب اكتـر ولا تبا تشوف ايش وسط الغرفه تاني
نقل عدسه عينه لبشار واتوجهله بخطوآت سـريعه : بشاار
جميل نزل بجسمو وحاول يتكلم معاه : قووم خلينا نخرج
بشار طالع فجميل وقال بترجي : لاتخليني اشوف ابويا
جميل اشر براسه وقلبه محروق : طيب ياولدي ... قوم من هنآ
بشار رجع يطالع في فارس وياخد نفسـه بشويش بس بصوت عآلي
جميل شد على يده وهوا مفجوع : بقولك قووم
بشار بككي واتكلم باانهيار: حور ايش ذنبها وربي ماتستاههل ياعمي والله ماتستاهل
جميل قاطعه : استغفر ربككك ياابشار _ شد على يده مرا تانيه ووقفـه بالقوه _
بشار كل شي سود بعينه اول ماوقــف
واول ماشاف طريقه سحب يده من عمـو ومشي
بس خرج للصآله
روان انفجعت من شكلو
عدى من جمبـها وبيده الورقه وجوال حور
خرج من البيت بعكس الجنان اللي كآن داخل فيـه
جميل وروان وراه ينزل بشوويشش
وحاسس قلبه يوجعه من القهر
بنتك اتعذبت لين مـاماتت
بنتك اتعذبت لين مـاماتت
بنتك اتعذبت لين مـاماتت
وفجأه اترخى جسمو وجلس في الدرج وبكككي
محروووق محرووق على الطريقه اللي مآتت فيها اختتو
خررجت كلمــه آآآه منو آه الوجــع
آه الغبنه والقهر
على الـف شي رآح ويتمنآه يرجع
اتذكر لما شافها تهرج بالجوال
وكآن يبا يسحبو منها وبيشوف مين تكلم
بس قال مايبى يزعلها
ندمان لأنو ماسحبو يمكن كآن شاف محادثتها معاه
يمكن كآن اتضارب معاه وقطعت علاقتها معاه
سار يحط اللوم على نفسـه
يحس الايام اللي فاتتت قاعد يتناسى انها ماتت خلاص
وكأنها مع امـه وهوا بعيــد
الرساله كآنت زي الصفعه رجعتلو كل شي
خلتو يفكر بشي مايبى يفكر فيه
إنها صرخت صرخت صرخخخخت لين ماروحها طلعت
دا الوجـع لوحده مدمره
دا الشي قاتله قاااتله وبقووه
جسسمه يتنــآفض عمو نزل الدرجتين على طول ونزل لمستواه
دموعه بعينه ويتكلم جميل بضعف : الله يرضى عليك خلينا نمشي
يبا يمشي قبل الرجال لايجو مايى احد يشوف بشاار
خلاص الكلام ياكتره اللي قاعد يطلـع
روآن واقفه وراهم وتبكي معاه صوته وهوا يبكي قشعرلها جسمها
قااال بكل قهر : كلللو مني مانتبهتلهاا كنت ابا اقهر ابووويا وسبتلهم البيت
جميل مو عارف يتكلم معاه وكأنه دوبو وصلو خبر وفاتها تاني : حرام تتكلم زي كدا ادعيلها إنتا مالك صلااح
بشار ولارد عليه بكككي وعمو يحاول يكلمو يحاول يقومو ولا كأنه
روان ماتحركت كدا مصنمه ف مكآنها
في التآكسي دار راسه عليها : ياأختي معليش انا لازم امشي
هديل مو عارفه ايش بهم اتأخرو : طيب _ نزلت يدها على جيبها فاكره انو عندها فلوس وخرجتهم _ خد فتحت باب السياره ونزلت وهوا مشي ..
واقفه على الرصيـف وتستنـآهم وبعدها طالعت في السيارات المسـرعه ...
راح بالها لبعيـــد
اللحظآت اللي وقفت فيها قبال جآسم وكآنت مصره انو امها طيبه
طول دي السنين كآنت حاقده على جآسم
جاسم ماسوالها شي
اذا امها مارحمتها حيجي الغريب يرحمها
اذا امها رمتها حيجي الغريب تباه يهتم فيها
جاسم سار مو اخد حيز بتفكيرها زي زمان
كل اللي كاسرها حاليا امها وبــس
احساس انو باعتها شي وآجعها ...
باعتها عشان واحد .!
تكذب على مين انها ممكن تعيش بدا الألم
وهنآك بشآر مو قادر يتحمل الم عذاب اختو
مو قادر يتحمل الفكـره
انها صرخت
انها مغتصبه
انها اتعذبت لين روحها ماطلعت
قدمت خطوتيـن لطرف الرصيـف
وبشـآر اختفى صوت بكـآه
نزلت رجلها عن الرصيـف
وهوآ رفــع يده على صدره
تطـآلع في السيارات المسرعه
وبدأ ياخد انفاسـه بصوت مسموع
تسمــع اصوات السيارات والناس حولينها
اسمو اللي قاعد يسمعوو من جميل
غمضت عينها ودموعها نزلت
وهوا دموعه بعينه ويفتح فمو يحاول ياخد انفآسه
تبـآ تموت وتــرتاح
خـآيف من الموت وشايفه بعينه
ماهمـها شي حـآليا
مو قادر يحس باأي هوى حوليه
شدت على عينها وكآنت حترمي نفسها قدآم السياااره
رفع جميـل جوال بشار قدامه وبيدق ومكتوب " امي "
شعرها اتحررك من قوة السياره اللي عدت قدآمها
جميـل : كلم امــك
رجعت بخوف على ورى وطلعت الرصيــف
بشار يحرك وجهه يبا يقلو ماقدر
جا في بالها روآن جا ف باآلها بشار دموعها تنزل وتبا تكون قوويـه
بس مو قادره
يطـآلع بالجوال شعره نازل على وجهه عيونه سهتـآنه ومو قادر يتنفس
عمو : الا تقدر
روان تطالع في جميل ومو عارفه ايش قااعد يسوي
عمو بيدير الجوال عشان يرد الا بشار رفع يده اللي تتنافض ومسك يد عمو
وصوت تنفسـه هوا اللي طاغي على المكآن
يبا يتكلم
يبا ينطق بشي
مو قادر مو قادر يخرج من فمو غير الهوى اللي ياخدو بالقوه
عمو بيحاول يخليه يفكر : امك تباك جمبها فكر فيها
شــآيف الموت بعينه
الشعور دا يقتله يخووفـه لما مايقدر يتنفـس
لما يشوف كل اللي حوليه طبيعين الا هوى مايقدر ياخد نفسـه
وكأننه بعالم تآني
كل اللي يفكر فيه انو حيموت حيموت دي الفكره اللي المفروض مايخلوه يفكر فيها
: امك ماعندها غيرك اوقف جمبها وعوضها
سار يفكر في امو
امس مارحلها
اليوم المفروض يشوفها
هيا مستنيته
مايباها تزعل
جميل : اضغط على نفسك يااولدي اضغط على نفسك عشان امك
بشار بدأت تخف انفاسه قال بصعوبه وبكل ضعف : انا تعبان
جميل مرر يدو على ذراع بشار وحاسس انو حيبكي : قوم الله يرضى عليك
مدو يدو بشار للجدار ووقف بصعوبـه
رفع يدو التآنيه على صدرو
جميل كآن بيمسكو الا بشار اتكلم : خلاص
جميل نزل يدو وبشار ينزل درجه درجه وهوا يمسك الجدار كل شويـآ
لدحين مكتوم لدحين حاسس انو بالقوه بيتنفس
بس احسن من اول قادر يضغط على نفسه
جميل طالع في روان
قطعتلو قلبها بنظرتها
تطالع في بشار مفجوعه
طلع درجه وحوط يده حولين كتفها وسار ينزل وهيا تنزل معاه بدون ماتحس
اتكلم بصوت راخي : لاتخافي يابنتي انا معاكم
منكمشه على نفسها وعينها على البشار وبتسمع لجميـل
تطمن مو عارفه .؟!
اسللوب جميل وترها مسكته ليها بدي الطريقه وترتها اكتر
قالت وهيا بتحاول تشتت نفسها قالت : ايش بو
جميل : مافيه شي ليش خايفه دحين
روان اشرت براسها : مو خايفه
جميل سلم على راسـها وهوا مكمل مشي
امـآ هيا الحركه خلتها تتصلب
تمشي وجسمها كلو مشدود
صوته فيه حنيـه مو طبيعيه
اسلوبه نظرتو ليها ولبشار
نفسها تسحب نفسها منو بس مو قادره
وقفو مشي لما بشار وقف
يكره احساس الضعف دا اللي يجيـه
يحاول مايحتاج لأحد بس نفسه يسند جسمه على اي شي
بيمشي بصعوبـه
وقبل جميل لايهرج بشار كمل طريقـه
اول ماخرجه من العمآره جميل اشر لبشار : سيارتي هنـآك
عارف انو ماحيقدر يركب دبابه ماحيجادل
جميل بعد عن روآن والتلاته سارو ماشين بنفس الاتجاه
واول ماخرجو لقت هديل واقفـه
هديل واقفـه تستناهم مسحت دموعها وبتفكر بس
بكلام روآن وبشار ..
هما اللي يخافو عليها
وطـآح قلبها اول ماشافت بشـآر
كآنت حتروحله بس ماتحركت لما جميل قرب منو وحط يدو على كتفو
قلبها يدق ورا بععععض بطريقه مجنووونه
وفزت بفجعه لما روان كلمتها : هديل
طالعت فيها : ايش بوو
روان مو عارفه مين داك ولا ايش اللي بزبط سار رفعت كتفها : مدري
جميل ضغط على سويتش السياره وبشار فتح الباب وماصدق يجلس
كآن حيروح يركب الا انتبه لروان بعدت : سممميه
روان طالعت فيه وبعدها سابت هديل وجاته : نعم
جميل يحسبها جيه مع بشار : يلا امشي
روان ماعرفت ايش ترد اشرت على هديـل : صحبتي معايا
جميل : ناديها طيب تركب
اكيد ماحيسيب بنت اخوه تركب تاكسي قدامه ويمشي ..
يكفي انو لدحين مو قادر يعرف هيا فين عايشه ولا ايش بتسوي
وسايب دا الموضوع شويا عشان يخرج من المليون موضوع اللي بيعيشو
روان راحت لهديـل اللي تطالع في بشاار ودموعها بعينها
مسكت يد هديـل وسحبتها : تعاالي
هديل تمشي بعد استيعااب ونسيت فجأه موضوع امها
فتحتلها الباب روان : ادخلي
دخلت بتردد وبتسوي كل شي روان تطلبه ومابتفكر
مين دا
ايش الهرجه كل شي محصور في بشااار وبس ..
وروان دخلت بعدها واضطرت هديـل تسير جالسه ورا جميـل
وعينها على بشـآر
بشار اللي اول مادخل رجع شويا المقعده على ورا وفك الطـآقه
وغمض عينه
مقهوره انها مو قادره تمسكو مو قادره تسويلو اي شي ...
اما روان برضو جلست في النص
جميل طالع في بشار شايفـه اهدى دحيـن
عارف يتصـرف معاه مو اول مرا يشوفو بدي الحآله
دام هدأ شويـه كل شي يهون بعـده
طالع في المرآيه على هديل وبعدها على سميـه
: كيفك يابنتي
هديل ماستوعبت انو بيكلمها الا لما شافتو بيطالع فيها بالمرايه ويرجع يطالع في الطريق
: تمآم
جميل طبعا سؤاله مو مباشر بس عشان يعرف انها من بنات جاسم ولا لا : ماشالله من متى انتي وسميه صحبات
هديل : من زمآن
سككـت جاسم وروان وهديـل على نياتهم
بشار سامع كلامهم بس مافيلو حيل يههرج عرف عمو ايش كان يبا من السؤال
لين ماوصلـو لأقرب عيـآده ..
وقف السياره : بشار ...بشار
بشار فتح عينه : ها
جميل : يلا انزل
بشار طالع في العيـآده ماعارضه
يبا يرتآح شويا
جميل : حخليلكم السياره مفتوحه
روان طالعت في هديل وهيا عينها تلحق بشار عارفتها تبا تروح معاه : لا مايحتاج حنجي معاكم
جميل : خليكم مرتاحين هنا
روان فكت الباب : مو مشكله
هديل على طول نزلت معاهآ
تبا تتكلم مع بشار تبا توقف جمبو مو قادره مستحيه من جميل .. ت
تطآلع فيه هوا بعالللم مرا مو بعالمهم كدا لوحدو
دخل الغرفه ادتو السستر الكمآمه وجلس على طرف السرير
عمو جميل واقف يطـآلع فيه وبعدها خرج لروان وهديل اللي جالسين برا في كراسي الانتظار
هديل همستلها : ايش ساار عندكم .؟
روان تهرج بنفس نبرة صوت هديل : لقيتو في شقه واحد شانق نفسه
هديل وسعت عينها : ايشش !
روان جسمها اتقشعر وغمضت عينها : اتذككرت شكلو استغفرالله
هديل : مين دا !
روان : مدري مو عارفه والله ولاشي
هديل دموعها اتجمعت بعينها : روان ابا ادخل عندو
روان : طيب عادي ادخلي
هديل : مستحيه منن الرجال اللي معانا
روان وقفت : تعالي
وجميل طالع فيهم لما دخلو الغرفه ورجع جلس واتصـل يبا يشوف ايش سار ف موضوع فآرس
اما هديل اول مادخلت وشافتو اتوجهت لعنده وقفت قباله : حبيبي ايش بك
اشر براسه بالنفي ومارد
مررت يدها على خدو وهيا تتامل ملامحه عارفه ومتأكده انو فيه مصيبه
شافت وجهه دا يوم وفاة حوور
بس تباه يرتاح : طيب انسدح عشان ترتاح
عارض ..؟
لا للمرا التالته
انسدح وهديـل تمرر يدها على شعره لين ماغمض عينه
انتبهت للجوال والورقه اللي بيده
سحبتها بشويش من يده وفتحت الورقه وانفجععت من الكلام ..
قلبها سار يدق بسـرعه وتبببا تبـــكي
ايش حرقه القلب دي اللي قراها
دارت جسمها وسحبت روان وخرجتها من الغرفه : داك اللي قتل حور اللي جاسم كآن مربيه
روان وسعت عينها : تمزززحي !
هديل رفعت الورقه : شووفي دا هوآ كاتبه _ نزلت دموعها وماعرفت ايش تقول _ استغفررالله ياااربي
روان : ايش مكتوب فيها
هديـل قالتلها كل شي خلتها مصدومه زيها دحين قدرت تستوعب ردة فعلو ديـك
روان : هاتي طيب الورقه اديها لعمو
هديل ادتها : خدي دا كمان مدري حق مين
روان اخدت الجوال والورقـه واتوجهت لجميل اللي جالس وبيتكلم بالجوال ومكشر
اشر لروان بيده انو ثواني واول ماقفل ادتو الورقــه
اول ماقرا الكلام قال بقهر : لأاحول ولاقوة الا بلله لاحول ولاقوة الا بلله
التلاته سارو واقفيـن في الممر
وجميل ماسك جوال بشار وحور ..
وام بشار بس بتتصل على ولدها
ماعندها غيرو وحاسه انو فيه شي
يطالع بالجوال ايش يقولها مو عارف ..
يبا بشار يقوم عشان يكلمها ويطمنها ... لو رد وصرفها حتعرف انو فيـه شي
ومضطر يصمت الجوال كل ماتتصل ...
بشار من كتر التعب غفـى لين ماعمو نـآدآه
ايش يفكر محد عآرف
كدا هاااادي
اخد جواله وماتصل على امه مو قادر يكلمها حاليا ..
هديل بتتجنن عشان يوصـلو
روان نسيت نفسها وجلال ومشكلتها كالعاده
واول ماوصلـو نزلو التلاته وجميل مو عارف ايش وضع دي البنت معاهم
مو معقول حتطلع البيت !!!
بس هديـل بعدت شايفه نظراته
حاسه بشي غريـب
دول اهل وهيا حاشره نفسها بينهم
بدأت تسير حساسه
اللي قاعده تسويه غلط
بس ماعندها حسيب ورقيب خلاص
جميل فتح الطـآقه ونادى : سمممميه
سميه دوبها كآنت داخله الا رجعــت انتبهت لهديل واقفه بعيد
مو مستوعبه شي بس راحت لجميـل : اييوا
مدلها بطاقته : خدي دا رقمي اي شي تحتاجيه كلميني طيب ..وقوليلو يكلم امو لاينسى
: ان شالله
بس مشي هديل دخلت بسـرعه
وراحت للمصعد تضغط ورا بعــض اول مادخلت جات روان تجري : هيييي دقيقه
ودخلت بسرعه قبل لايقفل
وكآنت اقل من دقيقه ووقف المصعد في الدور اللي اختاروه ..
وبخطوات سـريعه دخلو بعد مالقو الباب مفتوح
بس هوا مو في الصاله
هديل اتوجهت لغرفه النوم ودوبها بتدق الباب سمعت صوت بكآه ونزلت يدها
في الشـركـه جالس ورا مكتبه مستغرب ماشافها لدحيـن ..
معقول ماحتجي
كل شي مرتبـه ومزبـطه
لو بس ركزت ممكن تكشف كل كذبه
ووقتها حينهدم كل شي
رجع خرج الاوراق ويفتحها ورقه ورقه ..
ترف معتمده عليه
دي اليومين مبسوطه
دي اليومين مبتسمه
وبتآكل
وبتتكلم
كسرتو لما شافها منظفه غرفه سامي
لو تدري بس انو قآسم ماحيتنازل عنو الا لو لوى ذراعه ..
وواحد زي قآسم مجنون ومتأكد انو ماحيسكت عن حقه
غمض عينه وسند جسمه على الكرسي
زفر بضيـق
ايش الجنآن اللي حيحط نفسـه فيه
مايبى يفكر
همآ ظلموها وهما يستاهلو اي شي يسرلهم
زي ماحرموها من سعادتها طول دي السنين
هما ملزومين يرجعولها هيا لو على حسآب نفسهم ..
موضوع ليـث اللي في السجن
موضوع امه وكيف حتتقببل ترف
موضوع لمى وترف
موضوع سامي وقاسم وسلمى
وموضوع روآن
يحاول مايفكر في هرجه تجيه هرجه تـآنيه
امس بالقوه نآم
مايدري كيف حيعدي اليوم
بس نفسه يشوف روآن هيا اللي تخليه يشوف الدنيآ كدا ماتستاهل
وكل شي حيعدي وكل شي حيمر
بساااااااااااااطه
دا اللي يحسو لما يكون معاها
جلس بااعتدال دخل الاوراق وطلبلو قهوه للمره التانيه
وبدأ يشتغـل ...
لين مادقت الباب غمض عينه لما حس انو حيبدأ يدخل بالدوآمه الجديده
وفتحها اول مافتحت الباب ..
دخلت راسها وقالت بدلعها المعتاد : صبااح الخيـر
ابتسم ديك الابتسامه اللي تحبها
ساب اللي بيده وكأنه ماصدق يشوفها
سند جسمو على الكرسي : صبااح النور
سلمى دخلت وقفلت الباب : اتاخرت عليك
تامر :قلت بعد ماجننتيني امس جيتي تسحبي عليا تاني يوم
وقفت مشي صدمها بالجمله
مرا صدمها
بعدها ابتسمت بخجل
حاولت تكمل طريقها وتوصل للكرسي اللي جمبو وماتغير مكآنه
جلست وهوا دار كرسيه بااتجاهها
عارف انها جآيه عشان تختملو الاوراق
بس ماسابلها مجال يهرج
بيتكلم معاهآ بيتغزل فيها بطريقه مو مباشره
وجآت قوهتـه ومارضي يشربها
وكأنه جوه زبط لما هيا جآت ومو محتاج شي تآني
كل ماتبا تفتح السيره يقاطعها بموضوع عن نفسه
لأول مرا يقول أنا
جآت اللحظه اللي تطلب منو الاورآق ..
زعل
طبعا زعل
وقلها اقفـلي الموضوع
اترجتو بااسلوبها المعتآد
بدأ يكشـر خصـرها ورجع يشتغل
ورجعت تحآول
وهوآ بملامحه الجديه اللي مخليتها خايفه وبنفس الوقت
مستحيل تخليه بهمو
دار كرسيه وقال بكل جديه : انا ابا اخوكي يقرا كل كلمه في العقد عشان لايجي في يوم ويق
قاطعته على طول : ماحيقول شي انا واثقه فيك وكل اللي بتطلبو مننا شي بسيط دي الشركه كبرت بسبب امانتك والكل يشهد بللي سويتو وجا الوقت اللي تبدأ مشروعك الخاص واحنا اقل شي حنسويه انو نوقف معاك _ طالع فيها بصمت وهيا ابتسمت _ ماحخرج من هنآ الا وانا موقعتلك على كل حآجه
وخرج الورق خلاها تقرا اول ورقتيـن وبعدين بسبب اسلوبه
وانها تبى تحسسه سارت ماتقرأ
وجات لأخر ورقتين وقلها يباها تبصم مايبى توقيـع قاسم
وقرات اول ورقه وتـآني ورقه ماقرأتها ..
وقفلت كل شي وطالعت فيـه ..سند جسمه بعد مابعد الاوراق من قدامها
ايتسملها وكدا اول هم انزآح منو
سامي راجع راجع
لا لا
ماحيهددم باأملاكهم بس
لا في راااسه شي حقيــر
ماحيستخدم اسلوب السن بالسن
وزي ماسوا قاسم حيسوي هوا
اخلاقه ماتسمحلو
ماتسمحلو انو يوصل نفسه لدي الدنآئه
بس اخلاقه تسمحلو انو يسوي حاجه تآنيه
حآجه تانيه حتجنن قآسم ...
حآجه تانيه حترد اعتبار اخته
ودق جوآالـه واول ماشاف " جنتي " : دقيقه
رد عليها : هلا ياأمي
امـو : كيفك
تامر : تمام الحمدالله
امو : متى حتجي ؟
تامر : العصر فيه شي ؟
امو : حاول تجي قبل عدي جاي اليوم على الغدى
تامر : طيب ان شالله شوفي لو تبي شي اجيبو بطريقي اكتبيلي على الواتس
امو : طيب
تامر : مع سلامه
حط جواله على المكتب وقلبو احتياط لاتتصل ترف ولاتتكلم بالواتس وتشوف سلمى
سلمى : ايش فيه
تامر : ولاشي بتقولي لاتتأخر
سلمى وقفت : اجل انا لازم امشي كمان دحين عندي كدا مشوار بسـويه حشوفك في الليل ؟
تامر طبعا ماحيستحمل يجلس معاها اكتر من بعد مااخد اللي يباه ة: بيننا كلام
كآنت خارجه الا قلها : انتبهي على نفسك ...
دي اخر كلمه عدله حيقولها هيا بوجهها ...؟
لا باقي شي بسيط ...بسيط مرا
امـآ عـدي مسدوح على الكنبه في نص الصاله
ويضحك بصوت راخي باين انو بيسوي مصيبـه
امـه جلست في الكنبه اللي قبالة : ايش بتسوي
دار راسه وطالع فيها وهوا مبتسم : ولاشي _ ورجع طالع في الشاشه ويكتب _
خلاص عارفه ولدها مليون بالميه قاعد يسوي حاجه
وفجأه ييضحككك بكل صووته ويجلس ويرجع يكتب بحمااس
امه : عدددي ااايش بتتسوي مصيبه
عدي طالع فيها وبنفس الابتسامه : بجنن حماتي
ورجع يكتب
امه مع الصدمه ماستوعبت
يبا يجن مرته هوا حر
يبا يجنن اخوانها رجال وف بعض برضو حر
بس وصل الموضوع لحمآآآآته !!!
لسى امس بتقول ولدي كبببر اليوم اثبتلها انو مازال مجنون
بالقوه قدرت تتكلم : ياولد انتا اهبل
عدي طالع فيها : ههههههههههههه والله طلعت عسل مدري ليش محد فاهمها
ماستوعبت ايش الهرجه : انتا ايش بتسوي
عدي : بتواصل مع حمآتي طفشت من بنتها وقلت اشبك الأم دامها ارمله وعندها ورث و
كآن بيكمل الا صرخت : عدددددددددددي
عدي : هههههههههههههه ياامي ايش بسسوي يعني بكلم حمآتي
امه : بقله صبر : ضحكتك واحد وراه مصيبه
عدي : لا والله جالس ارسلها نكت وفجأه ارسلتلي نكته سرت مو عارف اضحك على النكته ولا اني بتخيل شكلها وهيا راسلتلي النكته
امه ماضحكت بس فسخت نظارتها الطبيه وطالعت فيه وهوا مات ضحك : والله الموضوع مضحكني _ رفع يدو _ دقيقه
قرب الجوال من عند فمو وهوا يسجل : ذكريتيني بفلم عادل امآم لما قال _ هرج بالمصري _ امشو زي الجززم في الدننيا ههههههه
امه : هههههههههههه عدي !!
عدي يبرر : راسلتلي نكته عن الجزم واتذكرت الفلم _ بتملل _ ياأمي ايش بك سيبيني افلها مع الحرمه
امه : طيب خليك محترم
عدي : اولادها محترمين ماينفع كلنا محترمين
امه : انتا ايش تبا منها
عدي طالع في الشاشه لما كتبتلو ورجع سجل : افااا عليكي اليوم نسهر على فلم لعادل امام انتي بس غديني وانا ازبطلك بعدها الجو
نزل جواله وطالع في امو اللي لسى مانزلت عينها من عليه
ضحك وغمزلها : تغاري ؟
طالعت حولينها بفجعه وشالت الركزه ورمتها بوجهه : امممشي يااامتخلف
عدي : هههههههههههههه _ جلس بااهتمام _ اقولك ايش ابا منها بعد ماكلمتيني جلست افكر بيني وبين نفسي ماحستحمل انها تقعد عند اهلها شهر وامها كدا تفصل عليها اخوها لو خرج من السجن في بيتو يعني اقدر اطمن كل شويا اما دي امها طول وقتها معاها _ رفع صباعه على راسه وغمز _ وهنا عدي الذكي بدأت تجيه الافكار
امه لسى ماستوعب ايش يبا يسوي : ايوا ؟
عدي : اول شي حخليها تعتبرني واحد من اولادها حخليها تستشريني بكل حاجه والله لااخليها تسحب على اولادها
امه : ههههههههههه عدددي من جدك
عدي : هههههههه بس بحاجه طيبه يععني انا اقولك ليش
امه : ايوا ليش ؟
عدي رجع عاد الحركه وحط صباعه على راسه وغمز : وهنا عددي الذكي بدأت تجيه الافكار
امه بتملل : خلصنننني يااللذكي انتا
عدي : ههههههههههه قلت حسير اشتكيلها من بنتها
امه وسعت عينها وهوا على طول اتكلم: لا بشي طيب يعني لمى تخاف انو امها تعرف اني اقابلها بالجامعه انا مو عاجبني دا الحال او انها تخرج معايا واخوانها يصرفو الموضوع لأمهم انها مع واحد فيهم شغل الحراميه مايعجبني انا بدخل بعين الكل انها لمى المسكينه وماترضى تسوي شي وانا انخنق وانتي اتفاهمي مع بنتك لأنها ماعندها غيرك ..حتى على موضوع الضرب بس حبه حبه دام طلعت فله وتضحك يعني جوي عارفتني
رفعت حوآجبها الاتنين وتبا تقول كلمه ماعرفت ايش تقول لولدها
سندت جسمها على الكنبه وابتسمتلو : الله يديك على قد نيتك ياولدي
عدي وقف : والله احس اني ابا ارقص فيا طاقه للرقص فينو لؤي ماصدق قالتلو موافقه وماسرنا نشوفه هنا
امه : هههه واختك حابسه نفسها وعلى الجوال
عدي : زوجو عزآم وحده مننا وفينا ولا حينجلط زيي
امه : انتا المجنون اللي تبا كل شي بسرعه
عدي : اخويا انا حفهمو زوجيه بنت اخوكي _ قال بقرف _ يعني حيكونو مملين بس كدا نفتك منهم الاتنين حتيمشكلو لين ماينعزلو عن العالم ونتخلص منهم
امه : اللله واكبر عليك يااشيخ سيب اخوك في حالو
عدي : بجد ياأمي ماقد فكرتي انو هوا عايش كدا لوحدو وغامض والله لو يوم عشت مكانه حموت من الطفش كدا تلقوني في الحمام مرمي وميت ليش واحد طفشان من حياه عزآم
امه :ههههههههه بقوولك سيب اخوك في حالو
عدي : ماليا صلاح انا نبهتكم _ دوبو صاحي عزام ونازل في الدرج ووعدي ضحك واشر عليه _ هيا المحروسه صحيت
اضطـر تامر يخرج قبل موعده الأساسي عشان يروح لترف يتطمن عليها
وبعدها يرجع لأمه وقبل لايتطمن على ترف لازم يمـر على اللي اكله مخو طول اليوم
دخـل للعماره اتوجه للبابها ايش حيقول مو عارف
بس لأول مرا مايكون منحرج عادي ايش فيها لو قلها كيفك
مايدري ساير جريئ بعد اللي سواه مع سلمى والكلام اللي قالو
ولا بعد جلستهم في السطوح
بيمد يدو ويدق الباب انتبه انو الباب مردود
بس قال ممكن تكون جوآ
فادق الجرس واستنى
ورجع دق مرا تآنيه واستنى
خرج للشارع والسياره اللي وصفتلو هيا امس مو فيه !
اتوووووووتر
شاف بنات داخلين العمماره صغار مايتعدو ال 12 سنـه
طلب منهم بس يطالعو في احد وسط دي الشقه
وقالولو الشقه فاضيه
فضل وآقف في مكآنه مفجوع بمعنى مفجوع
وكل شي سيئ قاعد يمر قدآم عينه
مايستهون بحكاويها
اللي بتمر فيه مو بسيط مرا مو بسيط
طلع الدرج وعقله مو معآه
ايش ممكن سار
هيا كويسا
ليش حتسيب الباب مفتوح
يحلل يحلل وماحس متى وصل لترف ومتى دق الجرس الا لما نادته للمرا التانيه : تامر !!!
طالع فيها وابتسم بتشت : ايوا
ترف فكتلو الباب : ايش بك كدا
تامر حرك راسه : لا ولاشي
ودخـلو للصآله وهوا شايل كالعاده غدى لها ..
ترف : جيت بدري اليوم
تامر : ايوا عشان شويا ماشي
ترف جلست : ليش
تامر : خطيب لمى جاي يتغدى
حركت راسها من غير ماتعلق
ندم انو قلها
رايحه العيله تتلم وهيا جالسه لوحدها حتى ولدها مو معاها
ابتسم تامر وجلس جمبها : بكرا زي دا الوقت ان شالله سامي يكون جمبك
دي الجمله كفيله انها تمحي اي شي جوووتها
ابتسامه مو من القلب
لا ابتسامه من اعماق اعماق قلبها
الابتسامه ديك اللي تجي فجأه وبدموع في عينها : بجد
وجعتتتتتتو نبرة صوتها
حرك راسه : ان شاللله
كدا سكتت شويا ومو قادره تصدق نزلت دموعها ورفعت يدها اليسار وغطت عيونها
ماتدري مبسوطه ولا خايفه من بكرا
مسحت دموعها وحركت راسها :ولاشي
جلس جمبها : ليش بتبكي
ترف : فيه شي جوتي كدا مو مخليني استوعب انو قاسم حيسبلي سامي بدون شروط وفيه شي تاني مخليني مابى افكر خلاص اهم شي يرجع وبعدها يهون كل حاجه
تامر : قاسم حيسبلك هوا بدون مايفتح فمو بكلمه وانا عند وعدي
طالعت فيه وقلبها يدق بسرعه ودموعها بعينها : تامر ايش سار
تامر : ماسار شي ولدك حيرجع نقطه نهايه السطر
ترف : حيرجع من غير اي مشكله ؟
تامر : من غير اي حاجه
ترف بعدم استعياب : كككيف !
تامر سكت سكت وبعدها ابتسم : فاكره لما مرا جبتيلي كيس حلاوه وقلتيلي اباك تجبلي نفس دي الحلاوه
ترف كشرت وهيا مو متذكره : لا
تامر : طيب المهم اخدت الكيس وخرجت ساعتين اشـ
ترف ضحكت بين دموعها قبل لاتخلص وهوا زادت ابتسامته : ساعتين الف من مكآن لمكآن ورجعت وامي صرخت عليا عشان اتأخرت وجيتك واقولك مالقيتها وانتي تضحكي _ ضحك _ والله لدحين مانسى جلستك قاعده تاكلي فصفص وحاطه رجل على رجل وتقوليلي هيا اشترتها لما سافرت لندن لااا ياااشيخه
ترف : ههههههههههههههههه
تامر : ههههههه كنتي شي صغير وقصير وشرير المهم انو تاني يوم جبتلك الحلاوه
ترف بين ضحكها : ايوا من فين جبتها
تامر : على انك قهرتيني بس جبتلك هيا ولما سئلتيني من فين جبتلك هيا ايش كآن ردي
ترف عقدت حوآجبها وتحاول تتذكر ضيقت على عينها وتحس الجمله في راسها بس مو عارفه كيف انقالت ودوبو بيهرج الا قالت : لما تبي شي لاتقوليلي كيف جبتو
تامر : خلاص وصلت المعلومه ولا لسى ؟
ترف : هههههههه لا لسى ابا اعرف
تامر : اجل استني لبكرا وحقولك حاليا ماحتكلم
ترف سكتت واختفت ابتسامتها واتكلمت : كنت احسب انو بس انا اللي متذكره كل شي سويناه واحنا صغار ووانتو نسيتوني
تامر : انتي كنتي بلهه
لأول مرا واحد فيهم يسبها
تامر كمل :مسويه جو في البيت وجايبه المشاكل يوم تلعبي معانا ويوم تشتكي علينا ويوم تسوي طيبه وتحبينا مالك صاحب مرا
ترف : هههههههههههه كنت حبوبه
تامر بهدوء :كنتي شي حلو ولما روحتي راح كل شي معاه خلي دي الجمله دايما براسك احنا اللي ضعنا ربي عوضك بولدك يسوى الف رجال
ترف حاليا نفسها تقولو انا احبك نفسها تعبرله قد ايش هوا مخليها مبسوطه دي الفتره
حاسه انو عندها اخ بجد
وقبل لاتهرج : ابا اتكلم معاكي بموضوع
مو ضامن ايش يسير معاه بكـرا فاليوم يبا يفاتحها بالموضوع ..
ترف كآنت مبتسمه على كلامه الاخير : اتكلم
تامر : بعد مايرجع سامي طبعا حيكون دا الموضوع لكن حابب افتحو من دحين انتي عندك مشكله مع لمى .؟
ترف ماتدري اذا عندها مشكله ولا لا بس اشرت براسها بلا وخلاص
تامر : هيا عندها مشكله معاكي
ترف كآنت حتتكلم
الا تامر وقفها : اسمعيني للنهايه انا مقدر وضعك بس احنا ياترف وصلتيلنا شي عنك غلط او بالاصح ابويا الله يرحمه _ انقلب وجهها اول ماقال ابويا _ اعرف انك تكرهيه بس دا ابويا حاحطلو الف مبرر على اللي سواه ابويا كآن عمرو كبير ياترف كآن ضعيف دول رجال كبار في البلد لو ذراعه ماتدري ولا احنا ندري ايش اللي سار معاه راح وراح سره معاه لقبره بس انا اعرفو وتربيتو لينا وليكي انتي ولمى تثبت انو مو واحد حيبيع بنته بسهوله المهم حقفل موضوع ابويا بس حبيت اقولك وجهة نظري _ اتنهد _ نرجع لموضوع لمى .. لمى مو تكرهك لمى تخاف منك يعني انا خايف من اللحظه اللي انتي توقفي قدامها لأني مو عارف ايش ردة فعلها ولا اقول نتكلم معاها قبل لاتشوفكط بس انا عارف انها اول ماحتسمع اسمك حتبدأ تبكي زي اخر مرا
رفعت ترف حوآجبها الاتنين وكأنه ماستوعبت
تامر : طلبي ليكي انو لو هيا مارضيت تسمعلنا اباكي تعتبريها زي زمان اختك الصغيره اللي ممكن تسوي اي شي عشان تسمع كلامك مابطلب دا الشي منك دحين بعد ماتجلسي مع سامي بعد ماتفوقي وقتها فكري بلمى والله هيا طيبه وعلى نياتها بس امي وليث رعبوها فيكي
ترف قالت بهدء : ان شالله
ماتدري لوقتها يسير خيــر .. وسكت وبعدها جات في باله روآن ..
ترف عندها رقمها
كيف ممكن ياخدو .. ؟
خرج جواله وبيشتت نفسه باأي حاجه وبيحاول يفكر كيف ممكن يصيغ الجمله .
لو قلها شوفتي روان ... ممكن يكون جوابها ايوا وحيطمن وبنفس الوقت ممكن يكون لا
وماحيقدر بعدها ياخد رقمها
يجيبها من النهايه ويطلب الرقم
طيب ليش ؟
عادي انو هيا طلبت منو موضوع انو تبا تنقل بيتها وسئلتو عن شقق !
لا لا مو حلوه كدا حيطلع بعينها واحد اخد وادى معاها لدرجه انو وصلت معاها تطلب منو شي زي كدا
لازم يحافظ على صورتو ...لا مو مرتين وصلها هيا جريئه ممكن تطلب شي زي كدا
مارفع عينه من على الشاشه : ترف
يتككككلم بكل جديـه
طالعت فيه : اديني رقم روان
مادى مبرر
المبرر من البدايه دليل على الكذب
ترف تنحت كدا جابها من النهايه سحبت جوالها من على الطاوله وقالت بهدوء وهيا بتدور الرقم : ليش ؟
تامر ولا كأنه بنفس النبره وبنفس التكشيره اللي جات على وجهه وهوا مندمج بحاجه بجواله : برسلها رقم واحد تبا تنقل من هنا
شي مو واضح مو مبرر طويـل
ترف ولساتها تدور على الرقم وهوا قدام عينها : متى اخر مرا شوفتها
تامر طالع فيها : يوم ماجات هنآ وقالتلي اوصلها
ترف تبا تضحك يعني حتى لو حاولت تخلي الموضوع بريئ مع انو مايجي بعد ردو دا محى كل
النيات الحسنه اللي ممكن تجي ببالها : طيب خد
اخد الرقم وسجلو وشويا وصـرف نفسه وخرج على طول ..
اول مانزل اتصل مرتيـن ولا ردد وهنــآ بدأ يفصـل ...
امـآ سـآمي ..
جالس في الحديقـه اللي عشبها الاخضر على امتداد بصره
اطول يومين مر عليـه
بكرا خلاص بكرا اليوم اللي يستناه
ماسار بينه وبين قآسم اي موقف غير نظرات قاسم اللي تحسس سامي انو ولاشي
حتى لما بيسوي اللي يطلبو ماسار عاجبـه
طلع كدا مرا لفوق وشافو خارج من ديك الغرفه وهوا مو على بعضه
لازم اخر الليل يشـرب
وامس ضرب وحده من حريمـه كف قدام الكل لما قالت ماحتعرفنا على امو ..
مالهم حق يسئلو..مالهم حق يتكلمو
دا ولد وحده كآن متزوجها من زمان قبل لايتزوجهم
ايش هرجتو مالكم صلاح
فين امو مالكم صلاح
مابيتكلم مع احد غير الخدم لما يجوه لغرفته
او لما يمشو من جمبـه
هما الوحيدين اللي يشوفهم طبيعين
ممع انو اول مايدخل اي مكان حتى لو يتكلمو ويضحكو يسكتو ويتشعترو
لكن لما يكلم احد فيهم يحس الابتسامه طبيعيه
يحس نفوسهم صافيه
نفسو يجلس معاهم
طالع في الحرس مو عارف ليش دول الحرس كلهم
هما كدا كل اللي بمستوى قاسم ولا قاسم لوحدو مسوي كدا
مايعرف عن دا العالم شي وفجأه طاح عليهم
ومو قادر يتقبـله ...
اكتر من كدا مافي شي بيومــه الهدوء هوا اللي يعبر عن يومه ..
ووجبات الفطور والغدى والعشـآ هيا اكتر لحظآت ترعبـه ..
ابتسم لما جات في باله امـه
يبا البساطه راحة البال
البلاهه والمضاربه
ضحك لما اتذكر هرجه انفآل اخر موقف يتذكره بينهم ..
كميـه القهر اللي يحسها مو طبيعيه
كميـه الألم
كميه الضعف
الغبنه حرقه القلب كل شي ملموم
كل شي انقلب عليـه
من صغره مايقدر ياخد حقـه
شخصيته هيئـته وظيفته دايما تدل على هيبته بس مو دا اللي يحسه
او بالتحديد مع اهله مو دا اللي يحسـه
انك تروح بكل حقدد بكل قههرك تبا تخرج شوويا من اللي بنفسك وفجأه توقف
وتشوف الانسـآن ميت بديك الطريقـه
بسبب مين ابـوك
ايش اللي خلاه ينتحر بسبب اختك اللي ماتت بيده
الولد قتل نفسـه لأنو اختك اتعذبت بطريقه مو قادر يتحملها
الولد قتل نفسـه لأنو هيا طيبه وهوا عارف بس يبا ينتقم من ابوك
وترجع كل عصبيتك لنفسك كل قهرك لنفسك برضو
ويرجع كل شي ينكبت زي مانكبت جوتـه الف شي
زي جآبر لما شافه يقتل غاليـه وهوا يتفرج
زي جلال لما هدده باإنو يسكت ومايتكلم
زي جآسم لمآ رماه بين اخوانه وهوا عارف وساختهم ...
زي لما اخوان غاليه عرفو انو الشاهد على الخيانه ومسكوه وضربوه
ايوا خلاه جآسم وجلال يشهد على انو يشوف واحد بس لابس كآب دايما ومايشوف هيئته
بس يسمع صوته
زي بزبط مابيسوي جلال حاليا بسميـه
من صغره اللي يشوفه ياقتل ياتهديد ياضـرب
وكل مايبى يعبر كآن مايقدر لأنو المفروض مايهرج
لأنه بيتهدد
حتى لما انضرب من اخوآن غاليه ابوه وداه عند جلال عشان امو لاتعرف
واللي يسمعو لاتتتتهرج لأمك
لما جآبر مسكوو وصرخ عليه
جاسسم اول شي قالو لاتتهرج لأمك
ولما جآه اليوم اللي يسجنو
النآس سارت تطالع فيه بالولد العآق
حتى عمو جميل اللي يعرف كل شي طلعو مجنون لأنه ضرب ابوه
مايعرف هوآ بجد مجنون ؟! في دي اللحظه سار يفكر بدا الشي
جالس على سريره وماسك راسه باأياديه الللي تتنافض ويبـــكي بصوتته
سار يدخل كل المواضيع في بعـــض
اختــه
فارس
ابوه
جابر جلال
جاسم
يحس كلهم السبب في موت اخته
وهوا كدا يتفرج بصمــت
شكل الولد مو راضي يخرج من راسـه وكأنه كآن يعبر عن كل طفل ابوه ربآه
يعبر عن هديـل لما شافها تصرخ بداك الجنان
يعبر عن روآن لما مسكتو وكآنت تقنعو انو يسجن جآسم
ابوه وصلهم لللجنـآن
والضحيـه حور ...
هوآ ولد داك المجرم
راضي انو يكون ولد داك المجرم بس اختو عآيشه
اختو اللي سآبها واهملها ومآكآن يسئل عنها
دا الشي يقهررررر
لما تبدأ تتذكر تفاصيل التفاصيل عن كل لحظه كآنت تناديك فيها
وانتا تخصرها
وتقول بكرا ولا بعدو
ويجي الموت ياخد دا الشخص ولما تتذكر الفتره الاخيره انتا ماديت
دا الانسان شي حللو
يبا كلمه حلوه يقولها
يبا لحظه يجلسها معاها
يبا الوقت يرجع
يرجــع شويا
دا التشتت انك منتا عارف بتبكي لأنك قصرت بحقها ولا من طريقه موتها ولا من حياتك اللي مافيها شي عدل ولا من ابووك المجرم اللي الكل حيهرج عنو ..
غمض عينه بكككل قوته ودموعه تنزل مايبى يفككر خلااااص
امآ برا هديل رايحه وجايه قبال الغرفه ودموعها تنزل
صوته واجعها
بكآه حارقها
وروآن جالسه على الكنبه ودموعها بعينها بس مابكيت
تفكر في حالها وحال هديل وبشـآر
ايش الحيآه دي !
شي طبيعي اللي بيعيششوه !
ليش كل شي ورا بعض من يوم ماماتت حور وهما مو شايفيبن يوم عدل
يوم طبيعي
تبا تنام يوم واحد مرتاحه البال وتصحى
بس يوم وآحد
طالعت في هديـل اللي بتدق الباب على بشار وتبكي : بشاار فك البآب
روان : سيبيه
هديل جات لعندها : له ساااعه
روان على نفس الهدوء : سيبيه طيب
هديل خصرتها وراحت لعند الباب
روان بتتعامل معاه بجد كاأخ وبتحترم انو مايبى احد
وهديـل لا بتتعامل كإنسان تحبـه وتبا تكون جمبـه
تدق الباب وتتكلم بكل ترجي : ياعمري الله يخليك فك الباب ...لاتقعد لوحدك لو ماتبى تتكلم لاتتكلم بس خليني جمبك
روآن تطـآلع فيها وهيا مازالت تحاول فيـه
ماتوقعت انو يفتح البآب
واول ماسمعت صوت المفتاح وهديل رفعت يدها تمسح دموعها
وانفتح الباب بس ماخرج هديل اللي دخلت وحضنته
ورجع صوته يبكــي
هنـآ سميه بكيت
بس ماتدري ليش بكيت على نفسها
ماتدري ليش وقفـت وفكت الباب وخرجت
حست بجد انو دول الاتنين بيوقفو جمب بعض وهيا ماعندها احد
مو حاقده عليهم او غيرانه
بس شي يخليها تحزن على نفسـها
انو في شي يهون عليهم وهيا مو لاقيـه دا الشي
خـرجت من المكآن بكبـره واول ماشافت السياره اللي فيها الرجال موقفه في الشارع التاني
جلست على الكراسي اللي برا ومو فارق معاها شايفينها ولا لا
جلال ماتصل عشان عارف انو فيه احد حوليها ..
تبا تبكي وترتاح شوويا قبل لاتطلـع
خرجت جوالها وهيا تشوف نفس الرقم يتصـل مو عارفه مين دا ردت بعصبيه : نعم
جآ من دوآمه واول مافتح الباب وشم ريحه الغدى : اللللله
اتوجه للصاله وشاف امه معاها الجوال وتضحك سلم على راسها : تكلمي مين
رمى جسمه بتعب على الكنبه
وامه ردت : عدي
كآن دوبو بيمسك جيبه ويخرج محفظته وجواله الا طالع فيها بااستغراب : عدي عدي ؟
امه بتطالع في الصوره اللي ارسلها عدي : هههههههههههههه _ وبعدها طالعت في تميم _ يعني كم عندنا بالعيله عدي
تميم وقف بدوون تعليق واتوجه للمطبـخ واول ماشاف لمى حآيسه وتسوي الاكل : ايش بها امك ماشالله
لمى طالعت فيه واخلاقها بخشمها : مدري رووح اسئلها
تميم : هههههه ليش معصبه
لمى : المكيف انخرب اللي هنا وحر وقررف وماما مطنشتني
تميم : مو فاضيه بتكلم العرييس
لمى : عارفه سامعتها تضحك من اول
تميم : هههههه ايش يبا بزبط
لمى تقطع الخضـآر وتتكلم : مدري والله لها ساعه تتكلم معاه
تميم جا عندها وياكل الخيـآر وهيا تقطع : هههههه الغيره قاتلتك
لمى استحت : مابغار مستغربه يعني
تميم مازال ياكل ويتكلم : عشان نكون صريحين انا ماطيقه
لممى : عارفه
تميم : كويس
لمى : حتى هوا مايطيقك
مرررررررررا مافي اسلووووب
المفروض تخلي العلاقات تتحسن بس مع النرفزه اللي فيها
رمتها بوجه تميم
تميم وبرضو ياكل : انتي ايش تقوليلو لما يقولك انا ماطيق اخوكي
رفع حآجبه وهوا يطالع ومستنيها ترد
لمى : اقلو اها
تميم انخنق كآن مستنيها تدافع سار يضرب على صدره وبعدها طالع فيها : تستهبلي
لمى : ههههههه ايش بك
تميم : بلله تقوليلو اها
لمى طبعا تحقد على عدي بس ماتبى تهرج : اجل ايش تباني اقلو
تميم مصدوم : والله لو رشا تتكلم عنك ولا عن ترف بكلمه
وانكتتتم وبعدها سار يحاول يعدل الموضوع : قصدي لو هرجت عنك بكلمه
سار مو قادر يكمل الجمله من وجه لمى اللي تطالع فيه
عارفه اخوانها وراهم هرجه
دايمما كآنو يجو اول مايخلصو دوآمهم
بذات تامر حاليا دا مختتفي اغلب يومه
لساتها تطالع فيه : كمل ؟
تميم : بروح اغير ملابسي
لمى : انتا بتشوفها ؟
تميم طالع فيها للحظـآت وبعدها خرج من غير مايرد عليها
قهررهااا
كملت تقطيع ودموعها بعينها
" لا لا مستحيل يشوفوها "
" يمكن حكاها عنها ومايحبها تفتح الموضوع تاني "
" طيب ليش طنشني ؟ "
" طيب فين تامر اغلب يومه "
" يمكن مع اصحابه "
خرجت الموضوع من راسها قبل لايجننها واول ماخلصت من السلطه
راحت استحمت واتجهزت .. شايله هم اليوم دا
اخوانها وامها وعدي تحس بتوتر وماحتكون بطبيعتها ..
استشورت شعرها واتمكيجت ولبست جينز وتيشيـرت وردي وكل تفكيرها
محصور على ترف اتعطرت وخرجت من الغرفـه
وشافتهم جالسين في الصاله حتى تامر جآه
سارت تهتم بنفسها دي الفتره لأول مرا يشوفوها كدآ
بس مابيعلقو اما تامر بعالم تآني وكل شويا يجي تحليل براسو
سولها شي
تكون اتكلمت وعرف
اكيد عمها ورا الهرجه خرج جواله واتصـل ماكتملت الرنات وقفل
خايف يكون مافي شي حيحس منظرو غبـي
لا مو غبي
اليبنت صارحته بكل شي
طبيعي يعني حيفكر بدي الافكار بعد ماشاف شقتها مفتوحه ومافي احد
وآحد وسط راسه يقلو اثقــــل
وواحد يقلوو البنت في مصيبـه
: تااامر !
تامر طالع في امو : هلا
امه : ها ايش رايك
تامر : في ايش !
تميم سحب نفسه بهدووء وابتسامه على وجهه اول ماكتبتلو رشا " اتصل "
راح للمجالس وقفل الباب : هلااا بعيون ريري
رشا : هههههههههه
تميم : ايش ساار معاكي
رشا تمشي بغرفتها وتتكلم : احتمالبعد بكرا ماما تتصل
تميم : اوووف وليش مو اليوم
رشا : مدري
تميم !!: انا على اعصابي وانتي تقوليلي مدري
رشا جلست وبااحراج هرجت : يقولو مايسير نرد بسرعه وكأنه ماصدقنا يجيكي عريس
تميم : لااا بللهي
رشا : هههههههههه ايش اسوي ماقدر افتح فمي
تميم : افتحي فمك ياعمري في دي المواضيع قولي رايك اقترحي
رشا : لا والله استحي
تميم : تستحي من ااايش قوليلهم انا استخرت وحاسه انو دا فاارس احلامي
رشا : ههههههههههه الله واكككبر
تميم : هههههههههه والله بجد يومين كتتير
رشا : دا بعد التخفيض كآنت حتردلكم بعد اسبوع بس بابا مشغول
تميم : عرفت ليش ابوكي طلقها
رشا وسعت عينها وتميم استوعب : معليش والله مآكان قصدي
رشا مفجوعه بين الصدمه والضحكه !!
تميم انحرج وحب يغير الموضوع خلاص راضي لو بعد اسبوع يردو ماحيعلق بعد كلامه الاهبل : وحشتيني
رشا ترمش بهدوء
ايش تسوي مو عارفه
امها ايش ماكان امها الكلمه ماعجبتها : تميم
قاطعها قبل لاتهرج من نبرة صوتها عرف انها حتعلق : اسف والله ماكان قصدي بجد بجد اسف
رشا بهدوء : اووك
تميم كآن مبسووط وحاليا مو عارف يتكلم
رشا : المهم حبيت بس اقولك انو عمي وولدو كمان حيجو يومتها
تميم حافظ الاسم من كتر مايكرهه : براء صح
رشا : ايوا
تميم : يلا اخيرا حنشوفو
رشا كآنت بتقول والله حبوب بس خلاص سارت عارفه انو دي الجمله تنرفزه : ان شالله تتفقو
تميم ولا علق على الجمله : المهم حقدر اشوفك يومتها ؟
رشا : ههههههههههه لا بس حتتعرفو
تميم : ايش الملل داا ومتى حنوصل للشوفه
رشا : لما مامتك تشوفني وبابتي يشوفك وي ليش محسسني انو لمى مامرت بدا كلو
تميم : ياخي فرق بيني وبينهاا انا شوفتك وقلت لأمي انك عاجبتني
رشا : ههههههههه طيب وانا ؟ وبابا ؟ مالنا رأيي
تميم : افرضي ماعجبت ابوكي لأيي سبب كآن ايش حتسوي
رشا : خيره
تميم وسع عينه :نعم !!
رشا بعدت الجوال عن اذنها وهيا تضحك ورجعت تتكلم بهدوء : ايش حسوي يعني
تميم بصدمه : تحاولي فيه
رشا شهقت : كيف احاول فيه والله بابا يديني كفف وقتها
تميم : مو مشكله حجبيبي استحملي كف وبعدين يرضى
رشا : هههههههههههههههه لا بلله
تميم : والله وترتيني دحين
رشا : هههههههه ايوا الموضوع عليك مو عليا لو قلي لاا انتهى الموضوع لو جا خيرني حتكلم وقتها
تميم رافع حوآجبه الاتنين : حسبيه الله ونعم الوكيل
رشا : هههههههههههههههههه
تميم :ترا انا انسان افكر كتير دحين ايش ينومني
رشا : هههههههههه اتفائل
تميم : ماعرف اتفائل _ كست وبعدها قال بجديه _ بلله لو قلك لا خلاص انتهى كل شي
رشا فجعتو مضحكتها : ههههههههههههه خلاص ان شالله مايقول شي
تميم بااسلوب واحد لساته مفجوع : ترا انتي مرا بارده
رشا : مو بارده ا نا حاسه براحه الحمدالله وخلاص
دق جرس البيت : عدي شكلو جآ بعدين نتفآهم
رشا لدحين ماتستوعب كل مايقول عدي .. كبرت هيا وياه وطاحو على نفس العيله : طيب
والاتنين بسبب علا .. عدي لو ماشافها في المعهد مآكان راح كلمها في الجامعه ورمتلو الجوال
ورشا لو ماراحت لعلا ماكان سار موقفها مع تميم
لمى رآحت تفك البـآب واول ماشافها اترسمت على وجهه ديك الابتسامه
االلي واحد شايف انسانه يعشقها قدآمه قرب وسلم عليها واداها الاكيآس : وحشتيني
لمى ا بتسمتلووكآنت حتهرج الا بعدت لما تآمر جآ
استقبلوه في المجلـس
وبعددها دخل تميم ولمى .. وكالعاده لمى لصقه عند تميم
لمى تهمس لتميم : ماجاوبتني اول
تميم ددار راسه عليها : ايش تبي تعرفي
لمى : ليش ماجاوبتني كلامي صح
تميم : انتي شايفه انو دا وقت تفتحي الموضوع ؟
لمى : ابا اعرف
تميم : بكرا يسير خير
لمى : تميمم
تميم : خلاص بس يخرج عدي نتفاهم
لمى : انتا قلت لماما انك حتخرج بعد الغدى
تميم : ايش حروح اجاهد ماحرجع يعني في الليل نتكلم
لمى ضمت يدها تحت صدرها بنرفزه وطالعت في عدي اللي كآن بيطالع فيها كل شويا
وبعدها يتكلم مع امها وتآمر .. مايطيق تميم
ولا تميم يطيقه
عدي بكل صوته هرج للمى واشرلها : تعالي هنآ
اشرلها جمبـو
ودي بدآيتها عارفه اساسا انو عدي حيستهبل كتيـر
بالقوه قآمت وامها تطالع فيها وتامر شتت نظره
وتميم ساند جسمه ويطالع في عدي ولا نزل عينه
ماعليه من احد عددي
اول ماجلست جمبو رجع طالع في امها : شووفي ياعمتي باخد رايك في حآجه انا اليوم حبدأ أأثث لبيتي بقول للمى اباكي تختاري كل شي على زوقك تقولي انتا اشتري اللي تباه بلله انا رجال انزل لوحدي واختار اثاث بيت !
امها : لا روح مع امك او اختك
عدي : هما اللي حيعيشو فيه ولا هيآ !
امها : لا بس اكيد يفهمو في الزوق ي
عدي قاطعها : برضو اباها هيا اللي تختار ممكن تقوليلها اليوم تجي معايا بس نختار غرفه النوم وارجعلك هيا
تامر وتميم يطالعووو فيه
عارفين امهم ماحتتترضى
لمى تحرك رجولها بتوتر ونفسها تقتله ..
ام تامر : ماشوف له داعي صورلها وهيا تختار
عدي : دي الجمله والله تقهرني لاتكوني انتي وبنتك عليا
ام تامر : ههههههههه دام فيه حلول تانيه ليش لازم تخرج
عدي : وايش فيها لو خرجت انا انسان غريب وماتستئمنوني
ام تامر : لا وي محشوم
عدي : خلاص اكسري خشمها وقوليلها تجي
لمى وسعت عينها
عدي طالع في لمى وبعدها بعمتو :هههههه بللله قوليلها تجي
ام لمى اتورطت شايفتو يضحك ومتحمس قالت بااستسلام : طيب بس لاتطولو
اوووووووووووووووووووووه
تامر وتمييييييم طالعو في بعض
لمى وجهها حمـر وقآمت تجهز الغدى
وعدي جلس جمب امها ويتكلم ويضحك هوا ويآها
وتامر وتميم مرا مصدومين منها
امهم ماتحب تداخل مع الاغراب
تفسر كل شي غلط
لوهله سار يفكر تآمر انو لو ماقدر على موضوع ترف مافي غير عدي يقنع لمى
وسار عدي يهررج مع امو وتامر
خلاااااص حسسس بجد داا الحل الوحيـد
الولد كدا ولا كدا عارف هرجتهم كلها
حيمسكو ويفهمو وخلاص
متى يفهمو اليوم .؟
لا يحاول اول مع لمى ..؟
لسى دوبو بنص تفكيره الا تميم جلس جمبه : ترا انا شويا ماشي يادوبك بتغدى
تامر : طيب
تميم همسلو : لمى جننتني على موضوع ترف فتحت سيرتها بالغلط وسارت تسئلني اذا بشوفها ولا لا
تاممممر جات لعنده : خلاص مو مشكله سيب الموضوع عليا وبعدين حقولك ايش الهرجه
تميم : طيب يااخي ترف عايشه لوحدها من غير ولدها
تامر : بكرا حيجي
تميم كشر : والله مرا مو عاجبني الوضع
تامر دوبو بيهرج الا عدي كلمو واخدهم الهـرج لين مالمى دخلت ونادتهم على الغدى اتغدو
وهنآ تميم مشي بعدها على طول .. جلسو في الصآله
جلسسه عفويـه
تآمر يشوف كيف عدي يتعامل مع لمى
مبسووط
حاسين براحه انو الحمدالله طلع انسان طيب
صح لسى ماعاشو مع بعض
بس يقدرو يقولو انو محتـرم ويتمنو يفضل كدا
من بعد الغدى شغلو فلـم
وكلهم بتفرجو ويضحكو .. الا تآمر اللي جات في باله روآن
يتصل مايتصل
لو اتصل تالت مرا حيبآن واحد قلقان عليها
حيوضح شي هوا مايباه يوضح
وبين الصراع دا كلو بعدها سحب نفسه لغرفتـه واتصـل ...
ومادرت
جلس على سريره ونفس الموضوع اتعاد على راسه جلال ورجاله
وبعد ربـع ساعه اتصل وهوا متوتر واول ماسمع صوتها
معصبه ولا تبكي مو عارف : رووان !
سكتت شويا وبعدها قالت : مين ؟
تامر : انا تامر
مسحت دموعها ومفجوووووعه من اتصاله : ايش فييه !
تامر وترته نبرة صوتها باين انها بتبكي : ايش بك
ماتدري من فين يطلعلها كل ماتبكي : ولاشي
تامر : روان فيكي شي ؟
ترمش بعينها بهدوء سؤاله نبرة صوته كل شي مخليها متنحه : مافيا شي
تامر سكت وهوا عارف انها كذابه وبعدها قال بجديه : روان باب شقتك طول وقته مفتوح وانتي مو فيه لو سرلك شي قوليلي
ليش تقوله دا اول سؤال جا ببالها
تاني سؤال ليش مهتم !
زي لؤي وفجأه يختفي
هيا عارفه انها بدون اهل محد حيطالع فيها باأكتر من نظره وحده مسكينه
او زي لؤي وحده كآنت تضحكه تغيرلو جوو وبنفس الوقت وقف معاها لأنو طيب
ليش تفتح لنفسها مجال تنحط مرا تانيه بدا الموقف
تخلي الناس يجرحوها ويمشو وكأنو ماسو شي :
لما طول سكوتاتها ناداها بااستغراب : روان ؟
روان : نعم
تامر بهدوء : ايش بك ؟
روان : انا مافيا شي انتا اللي ايش بك
وترته بالسؤال مافهمها بس اسلوبها وهيا تسئل وتره : مافهمتك !
رجعت شعرها ورا اذنها : خلاص
تامر : انتي كويسا ؟
ماتباااه يسئل ماتبا تجااوب
ولاردت
تامر : روان !!!!!!
روان بهجوميـه وبصوت وحده تبا تبكي : مابى اجاوبك
على بالها كدا جرحتو ولا قهرتو
حزززززززن عليها وهيا متنرفزه
بنفس الاسلوب الهادي : ليش
روان تقدر تقفل لو معصبه بس ماتبى تقفل تقدر تكون عندها ردة فعل اقوى بس اختارت
انها تتكلم : بس انا حره
تامر : مو قلتيلي كل مازعلتي تبي تكلميني عشان امدحك
روان جالسه على الكرسي وماحست بنفسها وهيا تحرك رجلها على الارض وتتكلم بقهر : ايوا عشان اسير دايما اكلمك وبعدين فجأه تختفي زي البقيه لييييش _ اتكلمت بااسلوب وحده بتشردح _ عشششان انا ماعندي اهل عادي الواحد يستهبل على رااسي
تامر ضحك : مين مزعلك
روان اتنرفت : مابقول شي يضحك
تامر : مابضحك على كلامك
روان : اجل !
تامر : اسلوبك بالكلام وانتي معصبه حلو
انكتتتتتتتتتتتمت
طبعا بالجوال ياخد راحتو ماحيشوف نظراتها اللي توتره
حركاتها اللي تربكه
وجهها مع انها تبا تبـكي بس اتلخبطت مشاعر تانيه
بلعت ريقها وقالت باارتباك : لاتستهبل عليا
تامر بنفس هدوئـه: مابستهبل
روان قلبها سار يدق بسرعه
خافت من دا الشعور
ايوا ماتبى تحسو
ماتبى تكون ضعيفه بيوم
خاففففت بشكل مو طبيعي : ليش بتتصل عليا
تامر : قلقتيني
نزلت دموعها مع الكلمـه
فجأه اتحولت الطفله اللي تبا احد يهتم فيها
رفعت يدها التانيه كعادتها وتمررها على شفايفها
وصلته صوت شهقاتها الهاديه
بنفس الهدوء قلها : روان ايش بك
روان : لاتعاملني زي كدا
تامر مافهم : كيف بعاملك
روان تبكي وتتكلم : انك بتسئل عني وتهتم
تاممر سكتتتت ماعرف ايش يجاوب ومافهم ايش مقصدها
صوت بكاها بس هوا اللي سامعه قال بعد صمت : ليش ؟
روآن بجرئتها وبصوتها اللي يبكي: بعدين حتعود عليك وحتحرقلي قلبي لو ماسرت تسئل
بتتكلم بشكل عآم
البنات اللي كآنت تحبهم وشردو
وبعدها البنات اللي اتمسكو
جآسم اللي كآن سيئ معاهم مآكنت تبا تسيبو بسهوله لين ماهديل سحبتها
دا طبعها وماتتحمل احد تآني يقهرها ..
اما هوآ موقفــــه ضعيف
بين انو يرد
وبين انو يسكت
مايبى يلعب عليها
مو حاسس انو بيلعب عليها بس دا تامر
دا العاقل
دي البنت في ايش مرت بحياتها
مايعرف شي عنها !
اوك معجب ومتجنن عليها
عارف انو متجنننننننن واكله مخو
بس برضوو هوا مو حق حب وبلاهات
هوا لو اهتم بيفكر بحاجه تآنيه
لو ادى كلمه دحين يخاف انو مايقدر يرجع لورى
وبنفس الوقت صوتها لساتها بتبـكي
قاعد لوحدو بالغرفه وحاتط الجوال بااذنو ويسمعلها تبكي
والف تحليل في ثووواني يجي براااسه
الف رد الف تعليق
ايش ايش يقووول مو عارف
لين ماتكلمت هيا : خلاص لاعاد تتصل مـ
قاطعها : اصبري
قلببببه يدق بطريقه مجنونه ..مرر لسانه على شفايفه ...وقف وهوا مايبى ينطقها
ماااايبى
بس حزنآآآن عليها
مو قادر مايقولها
مايبى يفكر ببكرا :..غمض عينه وقال بكل تردد : ومين قال اني ماحسير اسئل
مغمض عينه لسى ومايبى يفككر مايبى خلاص اي فكره تجي بااله
مايبى عقله يوديه لأي مكآن
عارف انو حيخليه يروح لطريق بعيد عنها
بس قلبه قااااعد يسحبببو ليها وبقووه
بدأ يخف صوت بكاها فتح عينه وجلس على السرير
تهدى بسرعه
كيف مايتجنن عليها
قالت بعد لحظه صمت : ليش اتصلت
تامر فوضى جوته حاليا : باب شقتك وانتي مو فيه وبتصل مابتردي
روان رجعت سكتت
تامر : فينك
روان مو عارفه ليش متوتره تمسح دموعها اللي بطرف عينها وتهرج : عند بشار
تامر : سامع صوت سياررات
روان : ايوا خرجت شويا امشي وراجعتلو
تامر :طيب مين مزعلك
ابتسمت تحب دي الجمله منو تحس نفسها تخليه يلطش اللي يزعلوها : محد زعلني
تامر ضحك : حنرجع لموال اول
روان تحرك رجلها بااحراج ووجهها محمر : هههههه ايوا
تامربجديه : شوفي انا ساحب على خطيب اختي برا بسببك
روان زادت ابتسامتها كدا انبسطت من الجمله مع انو وجهها كلو اثار البكى : ترف انخطبت ؟
تامر عقد حواجبه : لا اختي التانيه
روان : ماكنت ادري انو
تامر قاطعها : لاتغيري الموضوع وقوليلي ايش بك
روان : ولاشي موضوع تافه بس قهرني
تامر : اللي هوا ؟
روان : اني سرت مبسوطه انو عندي اخ واحسه مو مهتم مدري ولا مع مشاكله ولا انا سرت حساسه يعني اكيد ماحيهتم وحيعاملني زي اختو التانيه ..انا اصلا بلهه ومابطل الطبع دا
تامر : طبع ايش ؟
روان : اني اتعلق باأي احد
تامر : عشانك طيبه
روان : عممرها ماكانت الطيبه بلاهه
تامر : لو بلهه ماكان كلمتك لدحين
روان : هههههههه مدري والله استحي ولا ايش اسوي
تامر : ههههههههه _ دوبو بيهرج الا تميم فتح الباب وتامر عقد حوآجبه _ ايش جابك !
روان ماستوعبت : ها !
تميم جا لعندو : بطاقتي حق الصرافه فيها مشكله ابا بطاقتك
تامر : طيب جيب محفظتي
روان ساكتـه
تميم راح لمكتبه وتااامر ساكت
عرف تميم انو بيكلمها
ولا ماحيسكت ويستناه يخرج
جاب المحفظه وادالو هيا : مين بتكلم
تامر ماسك الجوال بكتفو ويفك محفظتو : أنور
تميم وسع عينه : ههاااتو يااشيخ اباه ف هرررجه
تامر رفع عدسه عينه : بعددين مو وقتك
تميم : دقيقه بس
تامر حط المحفظه على السرير ومد البطاقه : خددد بقولك بعددين
تميم خلاص عرف انو مو انور اخد البطاقه وضحك : سلملي بس عليه
وخررج وتامر رافع حوآجبه وماقدر يعلق عشان روان : ايوا هلا
روان : ههههههههه ايوا ياكذاب
تامر ابتسم : ايش تبي
روان : ليش ماتقلو الصراحه
تامر بااستغراب : اقلو اني بكلم وحده ؟
روان : ايش فيها !
تامر : هههههههه والله مو عارف ارد بس خلينا نتناقش بدا الموضوع بوقت تاني لأنو اهلي برا مجتمعين
روان : طيب
تامر : اهم شي انتي دحين لاتزعلي نفسك طيب ؟
روان ابتسمت وحركت راسـها وكأنه شايفها : طيب
تامر : انتبهي على نفسك
روان بنفس التناحه والرد : طيب
تامر : مع سلامه
قفـلأت منو كآنت منهاااره
كآنت مخنوووقه
بس كدا تحس فيه شي ريحها شويه
في شي يخليها دحين تقدر تطـلع
آمآ فووق مخليتو يبـكي وبعدها بعدت جسمها عنو رفعت اياديها وتمررها على وجهه و تمسح دموعه
: كل شي حيعدي كل شي ياعمري
تقولها وهيا بجد محتاجه دي الجملـه
التلاته ضايعين التلاته كل وآحد بوجـع
مسكت يدو وخرجتو للصاله وجلسه على الكنبه سند جسمو وراسه على الكنبه وغمض عينه
يحس بصددداع مو طبيعي
اما هديل تمرر يدو على شعره وساكتـه
مافي كلام ينقآل
لين مادق جواله قامت وراحت اخدتو وجات جمبه : حبيبي مامتك من الصباح بتتصل
شد على عينه وزفر بضيـق اخر حاجه يبا يسويها انو يكلم امه
اكتر حآجه تخليه ضعيف عدل جلستـه واخد الجوال منها
رد وهوا بيحاول يعدل صوته : هلا ياأمي
على طول صوتها اللي وحده على وشك الجنان : انتا فينننك من الصبااح
بشار : نسيت جوالي في البيت وروحت عند عمي
: حراام عليك والله العظيم جننتني
سكت وقال بالقوه : معليش
جلست وجسمها يتنآفض : ماحتجي
بشار : الا شويا جاي
: فيك شي
بشار نزلت دموعه كلمتين ماقدر يقاومها بصوت امه : لا ياقلبي
بخوف : بشار فيك شي ؟
بشار بعد الجوال وبكي وهديل مررت يدها على ذراعه رجع الجوال : لا ياأمي انا في المكتب شويا جيك
ماصدق قفل وهديل اخدت الجوال منو : كيف حتروحلها وانتا كدا
بشار مرر يدو على عينه : لو ماروحت حتعرف انو فيه شي _ وقف _ حروح استحمى واتجهز _
ومشي على طول وهيا جالسه مكآنها
ماتباه يروح لوحدو
هوآ دخل غرفته وقفل الباب للمرا التآنيه وروان دخلت اتووجهت لهديل : فينو
هديل :دخل يلبس رايح لأمه
روان : دحين !!!
هديل رفعت كتفها : ايش حقلو
روان جلست : والاتنين سكتو
واول ماجا شكل الولد في بال روان اتقشعر جسمها وغمضت عينها تباه يخرج من راسها
هديل : ايش بك
روان : اتذكرت شكل الولد
دخل استحمــى وقف تحت المويآ الدآفيييه لفتتتره وغمض عينه
يبا يرتاح شويا يبا يروح لأمه ويطمنها مو يخليها تقلق زياده ..
للبس بلوزه بنيـه وجينز وخرج وهما يطالعو فيـه جا لعندهم : سميه
: نعم
جلس وكآنت هيا في النص وبعدها هديل : بكرا محاكمه ابويآ
مايدري ليش رجع يناديه ابويا بس خلاص مو بعقلو يفصل الاسم دحين
روان مافهمت : ايش يعني
بشار : يعني حنروح الصباح خليكي هنا اليوم
روان مرا انفجعت لسانها تقيل ماعرفت تنطق ومن بين صدمتها فجأه بشار مسك يدها : ايش داا
طالعت بتناحه بيدها المجروحه وبعدين فيه وماعرفت تتكلم
كل اللي في راسها كلام جلال
بكرا حتقولو !!!!
بشار بصوت فوقها وهوا ماسك يدها : سممميه
: ها
: انتي اتضاربتي مع احد !!!
روان تطالع في يدها واشرت براسها : ايوا
هديل :روان كم مرا اقولك لاتتضاربي مع احد
كل واحد بيناديها باإسم
الاتنين بيهزأوها عشان خايفين عليها
روان سحبت يدها : خلاص موضوع وسار
بشااار ولع طالع فيها ماعرف ايش يتكلم وقف ومــشي لنص الصاله رجع مرا تانيه وقف قدامها ورفع صباعه بتهديد : والله لو عرفت انك اتمشكلتي مع احددد بعد كد ياووويلك
روان تمرر يدها على الاجراح ونزلت راسها قالت بصوت يادوب طلع : مالك صلاح
مرر لسانه على اسنانه حررركته لما يتننرفز وكأنه نااقصها
مرا مقهور من شكل يدها
هديل قربت منها وبهدوء تهرج : توجعك يدك
روان اشرت براسها : لا
هديل : ايش سار
روان : اتضارب مع واحد
بشار كان مااشي بس كلمه واحد جننته زيااده : اايش !! _ اشر على يدها _ رجال اللي سوا فيكي كدا
هديل تباه يخرج خلاص ماتباه يسمع شي تاني
روان طالعت فيه : خلاص انتا مالك صلااح
هديل مفجوعه من رد روان
بشار بنرفززه وبالقوه خرجت الكلمات منو : مين دا
روان : مالك صلاااح
بشااار كآن حيمسكها من يدها ويقومها ويخليها تتكلم بالقوه
الا هديل قامت مفجوعه ووقفت بينهم :بشاااار ايش بكك
بشار : عهووود بعددي
هديل رفعت اياديها : خلاص ياعمري روح لمامتك _ همستلو _ انا اتفاهم معاها
روآن وقفت وبعدت ضمت يدها تحت صدرها وماقدرت ماتتكلم : مسوي دحين فيها الاخ اللي بتدافع مو امس وانتا خارج بلحقك زي الهبله وانتا صرخت عليا وقلتلي انتتي ايش لك فياا
هديل تطالع فيها وشايفه انو مو وقت الجدااال
بس محد عارف روان ايش بتمر ...
بشار : اهاا تبيني اقولك يعني _ اشر على هدديل _ اتصلت عليا تبكي واخوفك معايا _ اشر على يدها _ لما ارجع حتفاهم معاكي
وسححب مفاتيح سيارته وجواله وخــرج قفل الباب باأقوى ماعندو ..
قدآمه مشااااوير يروح يجيب سيارته من اخر الدنيا ويرجع يروح لأمه
وحيروح يشتري للبس لروان لأنو ملاحظ انها مابتلبس غير اللي عليها
بكرة محاكمه ابوه
دي لوحدها الجمله راعبتـه
روان مو مستوعبه ايش مستنيها هنآك
روآن مو داريه انو الخبر دا حينكتب عنو بكل مكآن
بـرآء .. ×
جآلس مع اهله اللي بيتكلمو عن العريس اللي جآي لرشآ
واخر همه الموضوع
قام وخرج جلس في مكآنه المعتآد قبال المسبـح وخرج بكت الدخآن
امه وابوه مايخلوه يدحن وسط البييت
او هوآ بالاصح كمان ينكسف يدخن قدآمهم فايضطر يخرج
ومابين استكنآنه بسجارته اتصلت عليـه : ايش بتسوي
براء : بدخن وافكر فيكي
ترف : هههههه طيب بلاشي تفكر وتعال نتقابل
براء طفى سجارته : يسعدلي جوك ياشيخه
ترف : هههههههههههه آخواني اليوم مو فاضين فاقولي فين تبانا نتقابل وحجي
براء : انا اجي اخدك
ترف بردة فعل سريعه : لا مالو داعي انا حجيك قولي فين
براء : طيب ..
واتجهزت ولأول مرا تلبس زي كدا من يوم سامي ماراح واتمكيجت
وشالت شنطتها وخرجت
اخدتلها سياره واتوجهت للمكآن
مايبى يجلس في مكآن يبى يمشي وهيا جمبـه
اشترت قهوتها وهوا اخدلو عصيـر ومشيـو جمب بعض ..
براء طالع فيها : احسك كأنك بنتي
ترف : هههههههههه المرا التانيه حلبس كعب
براء :احبك كدا صصغيره
ترف وجهها حمر : عشان برستيجي بس
براء : ههههههه همك نظرة الناس وماهمتك نظرتي
ترف تقرب المصاص لفمها وتشرب وهيا تطال قدامها وهوا داير راسه ويطالع فيها : لاتردي
ترف بعدت المصاص وضحكت
براء : والله وحشتني ضحكتك وغمازاتك
ترف وججها محمر مو عارفه ايش بو جااي فااصل
من كتر ماسحبت عليه ويستنا مكالماتها وهيا بعالم تاني
بس خلاص مع ميسا اتعلم الصبر يمكن دا الشي اللي خرجو بفايده من علاقتها معاه
ترف : ان شالله يومين وحرجع للدوآم
براء يقلد نفس نبرتها : ان شالله يومين وتديني رقم تامر وترحمي اهل ابو ابو جد اممممي
قالها بااسلوب واحد وصلــتت معاه للنهايه
ترف : هههههههههههههههه
براء : اضحكي اضحكي والله خلاص نفسيتي ماتستحمل اكتر
ترف مو قادره تعلق من الموضوع
براء اختفت ابتسامتـه : ترف
طالعت فيه من غير ماترد
براء : انتي عارفه انو فيه موضوع مستنيه منك
ترف حركت راسها ورفعت المصاص لفمها تخفي توترها ..
براء : مو قصدي تفتحيه دحين بس انا كمان عندي موضوع اكلمك فيه
طالعت فيه ترف وهوا هنا شتت نظره : انا اخترت مكآن نمشي فيه عشان مابا اطالع فيكي وانا اهرج
مرا اتوترت اتوقعت موضوع يخصها
براء : اليوم اللي تتصلي عليا فيه وتقوليلي ايش سار معاكي انا وقتها حعرف انك تبيني وراضيه فيا
كدا الموضوع مايخصها !!!
قلبها يدق مرا بسرعه : ايش فيه
براء : انتي في النهآيـه حتتمني انو يكون طفـل وانا ماقدر احرمك من دا الاحساس
ترف شدت على حبل شنطتها وطالعت قدآمها وهوا كمل : اذا رضيتي فيا سامي حيكون ولدك الوحيـد
ماععععرف يجيب الجمله بطريقه تآنيه
اصلا انو يقول موضوع زي كدآ شي تقييييييييييل على قلبه
تقيــل لدرجه انو تهيــن رجولته
لكن مايقدر يضحك عليها مايقدر بعد ماترضى فيـه يقولها المرض اللي عندهـ
لحظــه صمــت ...
طفوله ملوثه بالواقع
اتحجبت عند باب الشقـه وعدي باس راس امها وهيا سلمت على يد امها وخرجت
واول مانزلت الدرج وسعت عينها : قللللللللللللللبي
عدي : هههههههههههههههه شوفتي امك بنفسها خرجتك
لمى شاده على يده : والله قلبي كآن حيخرج احسها حتسحبني من طرحتي باأي لحظه
عدي بس اتخيل شكلها مات ضحك : هبله انتي هههههههههههه
لمى قربت منو اكتر وهيا تمشي : مدري كدا حسيت المهم من فين حنروح نشتري
عدي رفع حوآجبه : رايحين لأهلي
لمى وقفت مشي : ايش !
عدي : اهلي يبو يشوفوكي
لمى رجعت لورا وتبا تطالع البيت وهوا مسكها : فيننن
لمى : مع نفسك مو رايحه
عدي : ههههههههه مو على كيفك ياعمري
لمى وسعت عينها : عددي والله عيب
عدي سحبها من يدها : اممشي
لمى تسحب يدها : ماااحرووح
عدي : طططيب انا اوريكي _ شااالها وهيا تبا تصرخ وخايفه الجيران يخرجو سارت تهممس بعصبيه _ عدددي نزلني
عدي : ههههههه مو انا اللي تقوليلي لا
لمى حطت راسها على كتفهه : امااانه عدي لحد يشووفني
عد : مافي احد _ حاتط يده اليمين تحت رجولها والتانيه تحت ظهرها _ يسعدها الريشه حقتي
لمى : ههههههههههه
بس وصلو لباب العماره نزلها وطالع فيها : حتمشي للسياره ولا كيف
لمى تعدل طرحتها: طيب حمشي
عدي : ماتجي الا بالعين الحمرا
لمى : والله مستحيه
عدي فتحلها باب السياره : والله اهلي كيوت حتحبيهم
بشـآر وصل لأمه بيحاول يكون طبيعي قد مايقدر
سئلتو الف مرا ايش بــك وكل اللي يقوله تعبان ومضغوط في العمل
وهوا اساسآ ولايشتغل ...جلست معاه وبعدها بكيـت
سارت تشتكيلو من الناس ومن كلام الناس ومن الكلام اللي بيترسل على جاسم وعلى بنتها
بس مو حارقها الكلام الي على جاسم حاااقده عليـه وكارهته
بس بنتهااا
يسمعلها ونفسه هوا اللي يشتكيلها نفسه هوا اللي يبكي وتحضنه
بس حضنها وباس راسها وبكيــت زي كل مرا يجلس فيها معاها
يسمعلها يسمعلها يسمعلها ويخرررج من عندها
جلس ساعتين على قد مايبى امه على قد ماكان يشرد من نظراتها
ومن كلامها
خلي الوقـــت يوقف لهنآ ونممممشي بســـرعه لبعد 12 ســآعه ...
وتآآمر بتوبـه الابيـض داخل اسوآر القصــر ...وسلمى تستقبـله وقف سيارته ونزل ..
وجات بلبسها الصبـآحي الرايق : صباح الخير
: صباح النور
سلمى اشرتلو : قاسم يستنـآك
مشي معــآهآ ليـن ماوصـل لقآسم ماستقبلو جوت البيت
في الجلسـآت الخارجيه المظلله .. اول ماشافو قـآسم ابتسم
وتـآمر طالع في الرجال اللي ورا قـآسم وطبـعا كآن مسلح ..
بس دا اللي كآن متوقع يشوفـه
وقف قبال قـآسم نفسه يضـربه بس مد يدو وسلم
: هلااا كيفكك
تامر ماسك يد قـآسم : تمام
كآن بيسحب يده بس تامر شد عليها
وهنآ قاسم عقد حوآجبه
خرجت كلمــآت من فم تــآمر خلت قـآسم وسلمى مايستوعبـه للحظه ايش بيقول
: حط في راســك ابويا ساب ورا ترف رجال ياخذو بحقها ..
جالسـه في المحكمـه الاصوآت داخله في بعض لسى ماستوعبت
كل اللي شافته فجأه هجوم من الصحافه وهيا خارجه من السياره وبشار يمشي ويغطيها
انفجععععت اسئله تسمعها غررريبه
دموعها بعينها وكل اللي كآنت تسويه انها غمضت عينها وماسكه في بشااار
ودحيـن هيا جآلسه وحتقول الكلام اللي المفروض جلال حفظها هوآ
عشان هديل وتامر ..
وقبـل لايدخلو جآسم هنآ بشار كآن بيخرج بس طلب انو يكلم روآن
اتوجهلها وقرب راسه من راسها وهوا يمهسلها باأذنها : جلال ماحيقدر يسويلك شي اتكلمي انا معاكي
بعد عنها وهيا تطالع فيه ودموعها بعينها صدرها يطلــع وينززل اشرلها براسـه
دقيـــقه
قبلـــها ب 10 سـآعات بشار ركب سيارته واخد محفظته اخيرا من البقاله
دوبـه بيفك المحفظه انتبه لورقه غريبه خارجه منها خرج الورقـه
وفكها وقرأ اول سطر
" عمك بيهدد اختك "
نهـــآيه الفصل
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!