رواية طفولتي المشتتة الفصل الخامس عشر 15 - بقلم ضاقت أنفاسي

الجد مو عاجبه الكلام : انا حلفت يمين ما تطلع من بيتي الا لبيت زوجها
نايف ما لقى غير هذا الحل حتى يثني أبوه عن قراره ..نطق بقهر من تدخل ابوه : بالطلاق من ام سيف ما تعيش ريم غير عندي حتى تتزوج
وقف الجد بعصبية : انتم ما عندكم غير بالطلاق بالطلاق
ابو سليمان  اقترب من ابوه: يبه لا تعصب كل شيء بالتفاهم ...خلاص انت يبه كفر عن يمينك واترك البنت تعيش عند ابوها
الجد بعصبية وحزم : ما علي منه يطلق... يتزوج ما لي دخل ريم ترجع هنا الحين !!
وبصراخ تابع كلامه :بسرعة تيجي الحين
فيصل وقف بضجر : يا جماعة الخير صلوا على النبي عليه الصلاة والسلام...وما يصير الا الخير
واشر للبنات يطلعون من المجلس
ردد الموجودين بصوت هامس « اللهم صل على سيدنا محمد »
الجد خفف من عصبيته وبإصرار على قراره نطق: انا قلت ترجع ريم الحين
نايف وهو يكتم عصبيته : يبه الله يخليك البنت عندي خلاص ما له داعي تعمل مشاكل
الجد بصراخ : تقصد اني انا صاحب المشاكل؟!
ختم كلامه وهو يؤشر على نفسه
تقدم نايف من ابوه وقبله على راسه : محشوم يبه
ابعد الجد نايف عنه بقهر وبأمر : روح جيبها الحين
الجده وهي جالسه وتناظرهم بخوف : بس نايف نقل كل اغراضها لبيته
التفت الجد بعصبية : انا هنا بالبيت كرسي والا طاوله ما ادري عن شيء وما أحد يستشيرني بشيء ؟!
وبحده اشر على نايف :من سمح لك تأخذها ؟!!
اقترب خالد من جده : يا جدي لا تتعب نفسك صحتك اهم من الكل وكل شيء ينحل بالتفاهم
ابعد الجد خالد عنه بهدوء وطلع جواله وفتحه وضغط على احد الاسماء
الكل كان يراقب ومو عارفين يتصل بمين بس تفاجئ انه الجوال مغلق
ناظر نايف والشرار يتطاير من عيونه : ساحب منها الجوال ؟؟
نايف بهدوء : اظن انها صغيره على الجوال ومو ضروري يكون معها
قاطعه الجد بصراخ : انكتم مو انت تقرر ضروري والا مو ضروري
تفاجئ نايف من كلام ابوه وانقهر كيف يهينه قدام الجميع
ناظر الجد فيصل وبأمر :الحين تيجيني ريم ومعها كل اغراضها
فيصل باعتراض : يبه والطلاق ؟؟؟
الجد بلامبالاه : بحريقه هو وطلاقه علشان ثاني مره يحلف بالطلاق!
وبأمر والتعب ظاهر بصوته كرر كلامه: بسرعة رجعوها هنا
تقدمت ساميا ببكاء من الجد : تكفى يا عمي تكفى خليها عنا لوقت زواجها تكفى يا عمي لا يطلقني تكفى
نايف بعصبيه : ساميا
خالد ببرود : متى زواج البنت ؟؟؟
فيصل وهو يتنهد : بعد ما تخلص الثانوية
خالد رفع حاجب : يعني كم بقى حتى تكمل الثانويه ؟؟
الجده بتعب وهي تشوف زوجها وابنها حالهم كذا : بعد سنتين وحطت يدها على صدرها حسبي الله على ساره وبنتها ما وصلنا من خلفهم غير وجع الراس
خالد ببرود : طيب الحل خلي زواجها قريب وتنتهي المشكله
صقر بعصبية : سكت دهرا ونطق كفرا البنت صغيره وبعدين كيف نتصل فيهم تعالوا تزوجوا البنت وحنا شرطنا عليهم الزواج بعد سنتين
الحين رح يقولون اكيد فيها بلاء علشان قربوا موعد الزواج
خالد ببرود وبابتسامه بارده : احترمني تراني اكبر منك
اعطاه صقر نظره هم على اعصابهم وهو ببرود يتكلم
مسك الجد الجوال مره ثانية واتصل برقم بعد دقايق جاه الرد
السلام عليكم .........كيفك ............الحمد لله كلنا بخير ...........لا والله كنت ودي افتح معك موضوع ...............ما في غير كل خير ان شاء الله ............كنت ودي اجلس معك بس ما عندي وقت واليوم راجع من السفر .............الله يسلمك ...........ما يأمر عليك ظالم ابغى العرس يكون بعد اسبوعين .........ادري إنه الموضوع مفاجئ.............اعتبر كل التجهيزات على حسابي والحجوزات ................ادري انك ما تقصر بس انا ودي اخليها هديه البنت للعرس .............لا لا بعد شهر كثير مثل ما قلت لك اسبوعين وانا ادبر الحجوزات بنفسي .............خلاص اتفقنا .........مشكور يا زياد ..........مع السلامه
ناظر الجميع الجد بوجه مبهوت وانصعقوا
ناظر ابو سليمان الهادي ابوه بقهر : يبه انت وش عملت يبه ودك يقول اكيد البنت فيها بلاء والا ما رماها كذا علينا وضرب على جبهته بقهر وجلس وكل الهموم فوق راسه
سليمان بعصبية : يخسى يتزوجها والله على جثتي ما يتزوجها
الجد ببرود جلس مكانه : اعلى ما بخيلك اركب
طلع سليمان من المجلس وهو يتوعد وبعدها لحقه نواف وقبل ما يطلع ناظر جده : اذا ودك تفقدنا ويتنفذ حكم القصاص علينا زوجها لزياد
جلس خالد ببرود : انت عقلك يا نواف والغبي للي قبلك من ايش ؟؟ وش دخلك زياد زوجها وبأي وقت له حق يأخذها انتم ما لكم علاقه
نواف ناظر اخوه الكبير وطلع بدون ما يرد عليه
فيصل بقهر من ابوه جلس بدون كلمه لانه ما يضمن يضبط اعصابه
نايف كان واقف ويناظر للبعيد الافكار متضاربه بعقله مو مستوعب انه ابوه عمل كذا
ناظر ابوه بقهر وبوعيد : وقسم بالله لاحرق قلبك عليها
وطلع من المجلس مستعجل
وقف الجد وبخوف : ام سيف وين ريم ؟؟؟
ام سيف تمسح دموعها بخفه: بغرفه مقفل عليها الباب
طلع الجد بسرعه خلف نايف وهو قلبه قارصه خايف من عصبية نايف لانه اذا عصب ما يعرف للي قدامه
كان يمشي بسرعه وهو يردد اللهم اني اسألك رد القضاء
.......
**
**
*
**
***
***
**
الجده وقفت بتعب وقلبها يتراقص من الخوف و من بين دموعها بعد ما خرجوا الرجال : ابني واعرفه اذا عصب ما يعرف ابوه من اخوه
حطت يدها على صدرها :الله لا يوفقك يا ساره انت وابنتك الي بسببها رح يقضي ابني حياته بالسجن
يا رب لطفك يا رب هالمجنون ما ادري وش رح يعمل بالبنت يا رب لطفك يا رب
جلست على الارض رجلينها مو قادره تشيلها من الخوف خايفه على ضناها يرتكب جريمه
تعرف نايف اكثر واحد باولادها عصبي وعند كلمته
ساميا وهي تشاهق : انا ال غ بي ه ل يه نا دي ته ا
وعضت على شفايفها بندم
ام خالد تهدي الوضع وهي تفرك يدينها : يا خالتي اهدي ان شاء ما يصير الا الخير
الجده وهي جالسه وتناظر ام خالد وتهز راسها : اي خير وبنت الحيه بيننا اي خييييييير
ام سليمان رايحه جايه متوتره وخايفه
دخلوا البنات لما سمعوا السالفه ....
بعد مرور وقت وسديم ترن على اخوها نواف بس ما يرد
امها بخوف : شوفي عمك صقر تأخروا
رنت سديم ويدينها ترجف من الخوف رن حتى فصل ما احد يرد
ناظرت امها وهي تعاود الاتصال واشرت بحواجبها
انه ما رد
فجأة دخل مصعب ومعاه احمد وهم يركضون
احمد : يمه يمه ريم
دفه مصعب : انا رح اقول
احمد يمسك مصعب من كتفه : لا انا رح اقول
صرخت الجده واعصابها تالفه : بس بس لا بارك الله فيكم قطعتوا قلبي وش صار
دخلت نوف وهي متحمسه ومعاها الاخبار : يمه يمه
ريم ما لقوها بغرفتها وعمي نايف ما لحقوه طلع بسيارته مسرع
وجدي كان يصرخ ويقول رنوا على نايف بس كانوا يقولون مغلق جواله
الجده بانهيار : خلاص اسكتي اسكتي لا بارك الله فيك
وبنحيب خلاص ابني راح ابني راح يا ويلي عليه بعز شبابه يقضي عمره بالسجن حسبي الله عليك يا ساره حسبي الله عليها
ساميا لما سمعت بالخبر صارت تبكي بصوت عالي:
يا ليته طلقني ولا قتلها يا ليته طلقني ولا قتلها خلاص يا خالتي نايف طار
جلست ام خالد وام سليمان يهدوا الوضع
وسلمى ولينا دموعهم تنزل بصمت... والخوف دب بقلوب الموجودين الا وحده جالسه تناظرهم باستغراب ومو فاهمه شي عليهم الا بكاء وصراخ

**
**
**
**
**
**
**
دخلوا الرجال المجلس ووجههم ما يبشر بالخير
جلس الجد وتنهد بتعب ونفسه ضاق : لا حول ولا قوة الا بالله
ابو سليمان يخفف على  ابوه :يبه توكل على الله ... وان شاء الله ما يصير الا الخير... والحين بإذن الله نلاقيه
الجد حط راسه بين يدينه من الهم والضيق: الشباب لهم ساعه يبحثوا عنه بدون فائدة ...وين راح بالبنت وين ؟!
وعض على شفته من القهر!!!
فيصل رايح جاي بالمجلس وقلبه قارصه من تهور نايف....يهمس بخفوت ربنا يرجع نايف بالسلامه... يكفي انهم فقدوا عماد ما يبغى يفقدوا نايف!!!
دخل صقر المجلس ورد السلام بصوت خالي من الحياه
وقف الجد بلهفه : بشر يا صقر ؟؟
هز صقر راسه بالنفي وجلس وعقله مشوش اخذ نفس وغمض عيونه بألم
ناظرهم خالد ببرود : ما ادري ليه مكبرين السالفه ابو وابنته وين المشكلة ؟!ما رح يضرها مهما كان معصب ...تراها تبقى ضناه و..
قاطعه صقر بصراخ : اقول لك انت اسكت حنا على اعصابنا وانت يا برودك
تقول هذا الكلام لانك ما تعرف نايف روح شوف جسم البنت للحين علامات الضرب والتعذيب بجسدها من عمك الزفته للي ما في بقلبه ذره رحمه... هذاك الوقت كانت طفله كيف الحين رح يسوي فيها؟!
انصعق خالد معقول عمه نايف كذا ليه يفرق بالمعامله بين بنت ساره وبين سلمى ولينا غريب كل هذا حقد ناظر صقر ببرود : مهما كان رح تبقى ابنته ويخاف عليها اكثر منك ومن الكل لانها ابنته من لحمه ودمه
صقر من بين اسنانه : وقسم بالله اذا ما قفلت على فلسفتك ذي ليصير شي مو طيب
خالد ببروده المعتاد ابتسم : حاضر عمي مع اني اكبر منك بس يالله نمشيها للحلوين وغمز له بابتسامة
ناظره صقر بقهر وسكت الوقت مو وقت شجار والا كان كسره تكسير على بروده ........

**
**
**
**
**
**
**
**
**
جالس مع امه وخبرها انه قدم موعد الزواج
ام زياد بقهر : والله يمه ما يمدانا نخلص تجهيزات
زياد ببرود : معكم اسبوعين
سوسن باعتراض : يعني مو مناسب ابد
نوفه : وعندنا دوام بالمدرسه كيف نجهز ما في وقت ابد ما في وقت ولوت بوزها
وقف زياد بهدوء : انا اعطيتكم خبر وجهزوا اموركم وابوي اتصلت فيه وخبرته وما عنده اعتراض بالعكس انبسط كثير
تركهم زياد وهم يتحلطمون وطلع للحديقه وجلس على كرسي منزوي وناظر السماء وهو يفكر وش سبب تقريب موعد الزواج ؟؟ قرار مفاجئ
غمض عيونه وهو يتذكر صوت ابو سلمان كان متعب معقول صارت مشكلات على زواجي منها
يمكن احفادهم اعترضوا وقرر يقدم موعد الزواج حتى تنتهي المشكله
قاطعه رنين الجوال استغرب رقم غريب
رد بهدوء الو
رد المتصل بتهديد : كلمتين اسمعهم وتنفذهم بالحرف الواحد ... طلق ريم غصب عنك
زياد بهدوء وعرف انه توقعاته صح : من الادب ترد السلام وبعدين تعرف بنفسك ا...
قاطعه المتصل : لما تحترم نفسك وتطلق بنت عمي وقتها افكر ارد عليك السلام
تكلم شخص آخر : وقسم بالله يا زياد اذا ما طلقت البنت غير يوم زواجك يزفونك جنازه فاهم
زياد ببرود : اعلى ما بخيلك اركب وقفل الجوال بوجه المتصل
وشد على الجوال بقهر وقف وهو يفكر وشاد قبضة يده على الجوال
**
**
**
**
**
**
**
بالمجلس جالسين على اعصابهم رن جوال الجد
كل الموجودين ناظروا بخوف
شاف الجد رقم المتصل ارتاح شوي
ورد بهدوء : الو ..............الله يسلمك ............ الجد تحولت نظراته لغضب مين منهم ..........
الموجودين ناظروا بخوف
ما قال اسمه ............صحيح كلامك ولك الحق تزعل ..........لا تهتم انا أتصرف .............ادري لو تبلغ يعتبر تهديد وينسجن عليها ادري ........بارك الله فيك ..........خلاص اعتبر السالفه انتهت .......ان شاء الله خير .........مع السلامه
قفل الجوال وناظر جهة الشباب اربعه مو موجودين
الجد ناظر عبود بعصبيه : قول للكلاب للي برا يجوني الحين وبصراخ بسرعه ........
فيصل وعلى راسه علامات استفهام : وش فيه يبه خرعتنا مين للي اتصل
طنشه الجد وهو يناظر للبعيد وشاد على اسنانه بقهر **
**
**
**
**
**
**
**
**
سليمان بقهر : قسم بالله ليندم
بدر : يمكن يخاف من تهديدنا
عمر بتفكير : ما اظن يخاف بس يمكن اختصار للمشاكل يطلق
نواف بتفكير : احس يا شباب تسرعنا لازم فكرنا بعقلانيه بدون طيش لانه اكيد رح يخبر جدي عنا
سليمان بلامبالاه : ما ظنيت لانه جبان
قاطعه عبود : شباب جدي يبيكم بسرعه تعالوا له
بدر : عمي نايف اتصل
ابتسم عبود نص ابتسامه : لا ما اتصل انتم تعالوا وتعرفون السالفة
تركهم وراح وطول الطريق الشباب يفكرون
دخلوا المجلس وقف الجد بعصبية : انتم اغبياء مجانين تتصلون بزياد تهددونه بالقتل
ناظروا للي بالمجلس الشباب باندهاش
الجد بعصبيه : مين الحيوان للي اتصل فيكم ؟؟
انتم ما تدرون انه المكالمه مسجله ويقدر يقدم عليكم شكوى تهديد بالقتل
تفاجئ الشباب ما توقعوا كذا كانوا معصبين وتصرفوا بدون وعي
وقف فيصل بعصبيه : لا بارك الله فيكم انتم ودكم تنزلون راسنا بالارض
ما عندي علم انه مربين في بيتنا مجرمين سفاحين
نواف : ءءء يبه
قاطعه ابوه بعصبية : انكتم وانا اقول نواف الهادي الفهمان بينهم... ويطلع منك هذا الكلام تهدد بالقتل وانت واولاد عمك
ما الومك انت وسليمان طول ما انتم تتمشون مع هذا الجوز واشر على بدر وعمر فاشلين دراسيا وبكل شي
ابو سليمان بقهر : يصير خير بس خليها تنتهي سالفه نايف وبعدها يصير خير
الجد ناظرهم بتهديد : قسم بالله لو اسمع انكم تتعرضون لزياد لو بنظره وقسم بالله ما يصير خير لكم
صقر مسك ابوه من عضده وبهدوء : يبه ريح نفسك صحتك اهم شي والبزران ذولا حسابهم بعدين
سليمان يناظر جده : وقسم بالله بس مجرد تخويف له ما قصدنا شي
الجد يهز راسه بتعب واعصابه خلاص ما عاد يتحمل
غمض عيونه بتعب
رن جوال صقر استغرب وبصوت هامس المستشفى
ناظر الجد صقر وفتح عيونه على وسعهم واشر له حط على الخارجي
وقف صقر ورد بهدوء عكس قلبه للي يدق بخوف وحط الجوال على الخارجي : الو
المتصل:وينك يا صقر
رد صقر بهدوء وقلبه يدق طبول :بالبيت
المتصل:تعال للمستشفى ضروري
صقر بخوف : ليه
المتصل:حاله طارئه
صقر وهو يبلع ريقه : يعني حادث
المتصل:لا جريمه قتل والضحيه بنت ...بحاله حرجه تحتاج لعمليه ضروري بسرعة لا تتأخر!!
وقف الجد بخوف وخلاص اخر امل عنده تبخر
عض على شفته بقهر وهو يردد انا لله وانا اليه راجعون
وجلس على الارض وخلاص ما عنده قوه يتحمل اكثر
قفل صقر الجوال وهو منصعق مو قادر يستوعب خلاص اكيد المجنون عملها
غمض عيونه بألم مو قادر يتحمل طفلة بريئه لازم يساعدها
فتح عيونه وناظر الموجودين ملامحهم شاحبه خلاص كل شي انتهى وعم المكان الصمت
طفلة بعمر الزهور انتهت حياتها ناظر امه للي تبكي بصمت والحريم بحاله لا يرثى لها
وفيصل ملامحه جامده ساكت وكأنه تمثال
رفع راسه للسقف وغمض عيونه بألم ما يقدر يشوفها مقتوله بين الحياه والموت ما يقدر
وابشع قاتل يكون اخوه ما يقدر
وبداخله يردد يا رب رحمتك
طلع جواله من جيبه ويدينه ترجف ودموعه بعيونه رن على المستشفى واعتذر عن الحضور وطلب منهم يتصلون بالدكتور عثمان
قفل الخط وهو يناظر حوله وكأنه الزمن توقف كل شي حوله ساكن الا من صوت بكاء خفيف
مسح بعض قطرات العرق عن جبينه حاول ياخذ اكسجين مو قادر حاس الاكسجين بالغرفه انتهى
اخذ نفس بصعوبه بالغه وتفاجئ من دخول هذا الشخص
حس بالدم يفور بداخله ناظره بنظرات ناريه جاي بقوه عين شد على قبضه يده بقوه .......

**
**
**
**
**
**
دخل المجلس بتعب ناظر الحاضرين و ملامحهم باهته حزينه
جلس بجهة اليسار بهدوء ومسح على وجهه بتعب رفع راسه وشاف نظرات الجميع
كانت نظراتهم الشرار يتطاير منها
وقف الجد بقهر وكره وهو يناظر نايف : خلص هانت عليك ابنتك
يا خساره تربيتي فيك وهز راسه بأسف يا خساره
نايف ببرود : مو هذا للي ودك اياه هذا انا نفذته
صقر وجن جنونه من بروده وفقد اعصابه وهجم على نايف بدون وعي وهو يصرخ : ذبحتها قتلتها يا مجرم وصار يضرب فيه بدون وعي!!
وقسم بالله لأسلمك للشرطه بنفسي!!
الجده وقفت بهلع : تكفى يا صقر اترك ضناي اكيد ندم يمه اكيد ما كان قصده اتركه يمه لا تقتلني بعده
فيصل واقف عاجز ما يدري مو مستوعب شي كأنه بحلم مو قادر يصحى منه بس اهم شي ما يفقد اخوه ما يفقد اخوه
ناظر صقر بانكسار : اتركه يا صقر اتركه وناظر نايف بقهر ليه يا نايف عملت كذا ليه ؟؟
وبصراخ ليييييييييييييييه ؟؟
الضنى غالي يا اخوي ليه عملت كذا ليه ؟؟؟؟
ذي طفله طول الاسبوع الماضي اكتشفت انها طفله تفكيرها طفولي.....طفلة بريئه بعمر الزهور ليه تقتل احلامها وتذبحها بتسرعك!!
جلس على الارض خلاص ما يقدر  يتكلم اكثر او يلوم اكثر ما يقدر
الجد بقهر : حسبي الله عليك حسبي الله عليك
وبحزم ناظر صقر : اتصل بالشرطة وبلغهم
قاطعته الجده وهي تمسك يده ومقطعه نفسها بكى : تكفى يا ابو سلمان تكفى لا تحرمني من ابني الثاني
ابو سليمان بقهر ابعد امه بلطف : يمه نايف غلط ولازم يتحمل عواقب اغلاطه
كانوا الشباب يناظرون بملامح باهته مو مستوعبين الاحداث كأنهم بحلم وينتظرون بأي لحظه يصحون منه
ما توقعوا نايف يقتل ابنته وبدون سبب كل ذنبها انها غلطه !!!
ما توقعوا يزفها بالكفن الابيض بدل الفستان الابيض المقرر بعد اسبوعين !!!،
الجده من بين دموعها : ليه يمه عملت كذا ؟؟ ليه قتلت فرحتها ليه ؟؟ مهما وصل بغضها عندك ما توصل لكذا ما توصل ؟؟
كانت راسمه احلام ليوم عرسها ناظرته الجده بحزن
كانت تنتظرك تزفها لعريسها مو تزفها لقبرها !!!
ليه قتلتها ودمرت حالك ؟؟ بعدك بعز شبابك ليه تحكم على نفسك بالسجن وبهستيريه ليه يمه ليه
انا من بعدك يمه اضيع
خفت نبره صوتها وهي تمسح دموعها المنهمره كيف انام وانا مو مطمئنه عليك يمه بعيد عني !!!
كيف انام وما اشوفك كل يوم بعيني !!!
وبصراخ
كيف وكيف وكيف كله من ساره حسبي الله عليها للي خلفت وتركت هالبنت شوكه بحلوقنا بسببها خلاص ضاع ابني وبصراخ اشد ضاع ضاع ضاع
وقف نايف بصراخ : انتم وبعدين معكم ؟؟ وش فيكم علي ؟؟؟
اخذتها اربيها عندي واعترضتم ولما رجعتها لكم قلبتوها علي وبعصبيه وش المطلوب مني ؟؟؟
خالد ببرود وقف وبصوت عالي : يا جماعة الخير اتوقع في خلل في الموضوع وفي سوء تفاهم
صقر بعصبيه ويناظر نايف باحتقار : اي سوء تفاهم
والبنت بالمستشفى بين الحياه والموت
نايف وخلاص قفلت معه وبعصبيه : اي بنت بالمستشفى تتكلم عنها ؟؟
صقر يناظره باحتقار : لا تحاول تهرب وتخلص نفسك من الجريمه تراها لابسيتك
قتلك لريم ورميك لها ما رح يمر بسلام البنت بالمستشفى الحين واكيد الشرطه تحوم بالمكان لانها جريمه قتل واعطى نايف نظره حاده
نايف اقترب من صقر والشرار يتطاير من عيونه : انا الحين رح ارتكب فيك جريمه وبقهر انتم وش تخبصون مين قتل مين ؟؟
خالد ببرود : يا عمي ابنتك وين ؟؟
نايف اخذ نفس يخفف من عصبيته : اي وحده ؟؟
خالد بهدوء : بنت ساره ما ادري وش اسمها ديما او ريما
نايف وهو يكتم غضبه ما يطيق حد يسأل عن بناته :
بغرفتها هنا فوق
الكل ناظروه وكأنهم انصعقوا
صقر وهو مو مصدق : والبنت للي بالمستشفى ؟؟؟
نايف جلس بقهر : تراكم طفشتوني اي بنت ؟؟
فيصل وهو يحاول يفهم الموضوع : طيب ما شفناها هنا لما دخلت
نايف يناظرهم وهو رافع حاجب : دخلت من الباب الخلفي انا طلبت منها وبعدها ناظر ابوه ترى اغراضها رجعتهم على غرفتها من الباب الخلفي
خالد : والطلاق؟؟
نايف ببرود : بعد بكره امر المحكمه واستفتيهم ان شاء الله
الجد وهو مو مصدق : ريم فوق بغرفتها ؟؟
هز نايف راسه بتأكيد خرج الجد متوجه لغرفة ريم وهو يردد الحمد لله الحمد لله
لحقه صقر للي كان متشوق يشوف ريم ويتأكد انها بخير
توقع خلاص ما رح يشوفها مره ثانية وتذكر لما قبل ما يسافر لما ضربها نايف بالشارع تمنى انه ما يسافر ويدافع عنها
خلاص الحين استقر هنا مستحيل يقبل حد يهينها
مين ما كان
رح يساندها ويشجعها بكل شي ويرجع لها الامل
مستحيل يفرط فيها
غمض عيونه بألم لما تذكر لما كان يهين ريم بوجود نايف
كان يحاول يهينها ويسمعها كلام جارح كله علشان يخلي نايف يصحى على نفسه ويوقف مع ريم
كان يتعمد يهين ريم قدام نايف حتى يثير غيرته ويخليه يوقف بوجه الجميع ويقول
ذي ابنتي ما اسمح لك يا صقر
كان كل مبتغاه يسمع من نايف حدك ريم ما اسمح لك
هذا سبب التناقض للي كان يدور حول صقر كان بوجود نايف فقط يهينها ويضايقها
اما بغير وجود نايف كان يضحك ويمزح معها وعلاقته مع ريم عادي
بس بمجرد حضور نايف يقلب على ريم ويصير ضدها
بس بدون فايده لانه نايف طول الفتره الماضيه يناظر بصمت ما اعترض ولا وقف ولو بكلمه مع ريم
علشان كذا قرر صقر خلاص يكنسل ذي الخطه ويرجع مع ريم عادي
يكفيها للي جاها
من اليوم
رح يعتبرها مثل ابنته
وصل غرفة ريم وهو يردد ذي ابنتي ابنتي ابنتي
&&
&&
&&
&&
الجده جالسه على الارض ومو مستوعبه الموقف
ناظر نايف امه ووقف وتقدم وجلس على الارض ومسك يدها وبحنان : علامك يمه ؟؟
حضنته امه وهي تبكي وتشاهق وتقول كلام مو مفهوم الا كم كلمه ( خفت افقدك مثل عماد )
اوجعته بكلامه لانه تذكر رفيق روحه عماد وزاد الكره لعيله ابو سعد وكل احفاده حتى ريم من ضمنهم
مع انه ما لها ذنب الا انها تحمل دمهم

**
**
**
**
**
**
فتح الباب بدون ما يطرق الباب ودخل الغرفه مندفع وهو وده يريح قلبه بشوفتها
شافها جالسه على السرير
حمد الله بصوت هامس
وتقدم بهدوء عكس قلبه للي يتراقص من الفرح
رفعت ريم وناظرته باستغراب وبعدها ناظرت صقر للي واقف عند الباب
كانوا يناظرونها ومو مصدقين كأنهم بحلم
اقترب الجد منها وحضنها وبصوت متعب : وينك يا ابنتي ما جيتي تسلمين علي والا نسيتيني
ابتعدت ريم عن حضنه وباسته على راسه : والله ما نسيتك بس
قاطعها جدها بتحقيق : وين كنت قلقت عليك ؟؟
ريم بهدوء : اخذني معه شوف يا يا ابو سلوم اشترى لي هدية العرس واشرت على الهديه فوق التسريحه
وبحالميه وهي شابكه يدينها ببعض ورافعيتهم ومغمضه عيونها
ياه مو مصدقه اني بعد اسبوعين البس الفستان الابيض واجلس على الكوشه وانزف وا ...
قاطعها الجد بضربه خفيفه على راسها : بنت استحي ابتسمت ريم : وش هدية زواجي ؟؟؟
تنهد الجد براحه وبعدها وقف وهو يبتسم براحه : مفاجأة
تعلقت ريم برقبته وهو طالع من الغرفه : بالله بالله وش هديتي ؟؟
نزلها الجد بهدوء وهي تتحلطم : اثقلي يا بنت لا تخليني اكنسله
ضحكت ريم ببراءه وهي تقلد الاطفال : توبه توبه والله ما اعيدها بس لا تكنسله
ابتسم لها الجد ونزل
ناظرها صقر وهو يحمد الله انه مجرد سوء فهم
اقترب منها وباسها على راسها وبصوت كله حنيه ومحبه : الحمد لله على سلامتك يا قمر
وبعدها نزل ودموعه بعيونه
ناظرتهم ريم وهي مستعربه تصرفاتهم

**
**
**
**
**
**
**
**
دخل الجد المجلس براحه وبعدها دخل صقر بعد ما مسح دموعه خارج المجلس
ناظر نايف الموجودين وبعدها تكتف ورفع حاجب : ممكن اعرف مين مؤلف فيلم الاكشن للي عملتوه ؟؟؟؟
ناظروا ببعض واشروا على صقر
فتح صقر عيونه على وسعهم وهو واقف وسط المجلس : انا
هز اغلب الموجودين راسهم
جلس صقر بابتسامة صفراء : انت السبب واشر على نايف قبل ماا تطلع تتوعد تحرق قلب ابوي
ولما طلعنا وراك حركت سيارتك وطلعت وريم مو بغرفتها ونتصل عليك وجوالك مقفل وتاخر الوقت وحضرتك ما رجعت وبعدها يتصل المستشفى ويخبرنا انه في جريمه قتل والبنت بين الحياه والموت
حك راسه باحراج
تعرف ربطنا الاحداث ببعض وتوصلنا لنتيجه انك القاتل
وابتسم صقر بعباطه
نايف بتريقه : لا يا كونان انت حرام مواهبك تروح على الفاضي لازم درست بمجال التحقيق
وبحده وقسم بالله الضربات لاردها لك انا اخوك الكبير وتمد يدك علي يصير خير وناظره بتوعد
فيصل بابتسامة : خلاص امسحها بوجهي وسامحه
نايف : متهمني بجريمه قتل وضاربني ووده يسلمني للشرطه وودك اسامحه !!!
صقر بابتسامة : يا اخي قهرتني ببرودك
خالد بابتسامه : يعني لما جيت عملتوا فيلم الاكشن هذا وغمز لعمه نايف وابتسم
تصدق يا عمي وانا اقول لهم عمي نايف ما يعملها وادافع عنك وما حد صدقني
صقر ناظره وهو يقرص عيونه : تدري كنت اثبت نفسي ما اهجم عليك
ناظرت الجده خالد بابتسامه وهي تناظر لحيته الخفيفه وعلامات الصلاح على وجهه : باحلامك تضرب اغلى احفادي
صقر بنغزه : وش هذا التمييز ليه انت وابوي تفضلون خالد عن باقي الاحفاد هذا ظلم
ونظر لامه بتشكيك لا تقولين بكره لما اتزوج تحبين هذا واشر على خالد بتكبر اكثر من عيالي
فيصل : انت تزوج وبعدها يحلها ربك ولا تقارن نفسك تعرف اولادي فيهم ميزه ينحبون بسرعه وحرك حواجبه
صقر بقهر : مالت على اولادك وبالاخص خالد
خالد بابتسامة تقهر صقر : احترمني تراني اكبر منك وعندي اولاد
صقر لوى بوزه : مالت عليك انت واولادك وخاصة هالطيف خدودها كانها كيس مغذي
ضحك اغلب الموجودين
انقهر خالد بس مستحيل يظهر ابتسم ببرود : يصح لك تجيك بنت بحلاتها
الجد يناظر الموجودين : بما انه سالفه نايف وانحلت والحمد لله
وخلوكم من سالفه مين اغلى لانه فيه سالفه اهم
سالفه المجرمين السفاحين الثانيين
ابتسم نايف : يعني مو لوحدي قاتل مين مجرم مثلي ؟؟؟
اشر فيصل على الاربعه بحواجبه : ما شاء الله ذولي متصلين بزياد يهددونه بالقتل
الجد بحزم وقف واشر للاربعه يتبعونه للمكتب .....
وقف سليمان بقهر بعد ما طلع الجد : قلنا له بس مجرد تهديد بس
نايف بعصبية : وانت وش عليك ابنتي وزوجتها وش لك علاقه حتى تطلقها واعطاه نظره قويه
فيصل ناظرهم بقهر : قدامي على المكتب نشوف وش اخرتها
طلع ابوسليمان بعد ما سحب الاربعه معه
تنهد نايف بقهر وطلع ومعه فيصل وصقر
وقف خالد واقترب من زوجته وبالانجليزي : انتظري هنا لن اتاخر
هزت راسها بهدوء
الجده تناظر خالد : يمه ما لقيت تتزوج غير ذي لو تشتمنا ما ندري عنها ولا اكيد رح نضحك بوجهها نفكرها تمدح فينا
خالد بابتسامة : جايز هههههههه
الجده بقهر : عاجبك ومبسوط انها تشتمنا
وقفت سديم وجلست قريب من الحريم : ما ادري وش معجبك بذي البلوى
خالد رفع حاجب وببرود يقهر : انا عاجبيتني وما طلبت رايك اوكي
وبعدها طلع للمكتب
وقفت الجده بهدوء وناظرت سديم : قولي لمقصوفة الرقبه ذي تلحقنا على غرفه الحريم خلينا نشوفها
طلعت الجده والحريم لغرفة الحريم بالداخل ......

***
***
*****
***
****

بالمكتب جلس الحاضرين وبعدها بدقائق دخل خالد المكتب وكان الهدوء سيد الموقف
جلس خالد بهدوء جنب ابوه فيصل وناظر جده للي كان يناظر الورق للي قدامه
تنهد الجد وبعدها
رفع راسه بهدوء ووزع نظره بين الحاظرين وتكلم بهدوء وهو يحدد نظره على الاربعه : ممكن اعرف سبب ذي السخافه للي عملتوها مع الرجال
بدر بنرفزه : لو انه رجال كان طلق ريم ومو يشتكي لك مثل الحريم كان واجهنا
قاطعه الجد بعصبية : انت اسكت ولما اسمح لك تتكلم وقتها تكلم وبحزم من متى ذي المرجله صدق انه تفكيرك تفكير بزر
ناظره نايف بقهر كيف يلفظ اسم ابنته بالسهوله ذي وقدامه ...كتم غيضه وناظر ابوه يشوف وش اخر ذي المهزله
الجد بحده ناظر نواف : ممكن تتكلم وتقول سبب ذي السخافه
نواف ناظر اعمامه وبعدها ناظر جده بعد ما اخذ نفس وهو يرتب الكلام : الصراحه انا اعترف بغلطنا يوم هددنا زياد المفروض فكرنا بطريقة ثانيه انه يطلق
قاطعه نايف بقهر وعيونه يتطاير منها الشرار : وانت وش عليك حتى تطلقها وش دخلك بالبنت وبحزم انا ساكت احترام لابوي وقسم بالله اذا دخلتم نفسكم بريم لتندمون واعطاه نظره قويه
سليمان وقف بعصبيه : وقسم بالله ما يتزوجها وعلى جثتي
وقف نايف وهو ثائر : انت ما لك دخل فاهم ورفع اصبعه بتهديد
وقف صقر وفرق بينهم جلس نايف وهو يعطي الشباب نظرات ناريه
الجد بعصبية ناظر الشباب : اعتقد اني قبل ما املك عليها
سألتكم وشاورتكم اذا حد منكم وده يملك عليها
وبقهر
كلكم رفضتم
وبصراخ
والحين لما ملكت البنت ودكم تطلقونها
خفف الجد عصبيته وبحزم
اعطوني سبب واحد لسخافتكم ذي
سليمان ببرود : بنت عمنا ما تطلع غريبه اولاد عمي اولى بها
عمر بجديه : طلقها من زياد وانا مستعد املك عليها
ناظره بدر بتحدي : تخسى تملك عليها لانها من نصيبي فاهم
وقف عمر بعصبيه واعطى بدر بوكس على وجهه
حط بدر يده مكان الضربه وتحسس دم خفيف من انفه وجن جنونه وهجم على عمر وهو يصرخ : والله ما تتزوجها
أبعدوهم عن بعض وجلس كل واحد بجهه وكل واحد يناظر الثاني نظرات كره
ناظرهم ابو سليمان وكأنه عرف سبب المشكلة بينهم ناظرهم باحتقار : تتضاربون بسبب بنت من شهرين ما تكلمون بعض علشان بنت وهز راسه ومو عاجبه حالهم
فيصل بقهر : انتم الاثنين ما تحشمون أحد
واشر على نايف
على الاقل احشموا ابوها قاعدين تتقاتلون علشان ابنته
قاطعه صقر بعصبية : انتم دمكم من وش تتقاتلون على بنت متزوجه ورفع حاجب باستنكار وهو يردد
متزوجه متزوجه متزوجه وبصراخ تفهم وش يعني متزوجه
الجد بهدوء : على كل حال خلها حلقه بإذنك انتم الاثنين حريمتكم تتزوجون ريم وبعصبيه وقسم بالله طول ما انا على قيد الحياه والله ما يتزوجها واحد منكم للي رفضتم ريم والحين تبغونها
وبحزم
يالله قدامي انتم الاربعه على بيت زياد وتعتذرون منه
وقفوا الاربعه وبصوت واحد وعصبيه : يخسى
وقف الجد بعصبية : من متى كلمتي تصير اثنتين ؟؟
والا كبرتم وصار شوركم براسكم
ارخى ملامحه شوي : خلاص اكسروا كلمتي يا عيال
نواف بقهر : جدي لا تفسر الكلام على كيفك حنا مو قصدنا نكسر كلمتك بس صعبه نروح نعتذر له
الجد ناظره وعافس ملامحه : ما شاء الله الحين دريت اني ما افهم الكلام وافسره على كيفي بس اعذرنا يا حضرة الدكتور انت والدكتور للي معك
سليمان ما يهون عليه زعل جده : جدي مو قصدنا كذا
الجد وقف بحزم : الحين انا طالع واعتبروني اذا وصلت السياره وانتم الاربعة ما جيتم اعتبروا هذا البيت محرم عليكم تدخلونه وانت يا سليمان اعتبر خطبتك من سديم ملغيه وانت يا نواف انسى تتم ملكتك على سميه
وانتم الاثنين اشر على بدر وعمر
ممنوع تدخلون البيت ولا حتى بيت واحد من عيالي وحتى مصروف لو ريال واحد ما تشوفون
وطلع بدون ما يسمع رد فعلهم
ضرب سليمان بوكس بكف يده من القهر
ابو سليمان : يا عيال انتم غلطتم وتحملوا نتائج طيشكم ترى ابوي جاد لا تضيعون مستقبلكم
نواف بقهر : عاجبك يا عم جدي وده يذلنا قدام زياد ما ادري وش يعجبه فيه
خالد بعجله : ترى مو وقت كرامه بسرعة لحقوا جدي قبل ما يوصل السياره بسرعه
فيصل ناظرهم بقهر وطلع من المكتب ولحقه نايف بعد ما اعطى الشباب نظره ناريه
صقر ناظرهم بهدوء : تستاهلون ما جاكم و..
قاطعه سليمان بعصبية : حط لسانك بحلقك واشر للشباب الحقوني قبل ما يوصل جدي سيارته
طلعوا الشباب وهم يتحلطمون
اطلق صقر ضحكه عاليه على اشكال الشباب
خالد بابتسامة : وش رايك نروح معهم ونصور الشباب فيديو وهم يعتذرون
نط صقر بخبث : والله انك داهيه يالله قدامي
طلع خالد وصقر وهم يتهامسون ويضحكون
&&
&&
&&
&&
&&
&&
&&
&&
جالسه على الارض وسانده راسها على الجدار وهي تتذكر لما تغدت اليوم في بيت ابوها غمضت عيونها وهي تتذكر الاحداث ... . . ..
بعد ما طلب مني ابوي الحقه وقفت لثواني وبعدها قررت اشوف وش يبغى
صعد الدرج وتبعته بهدوء وصلنا لوحده من الغرف
دخل وطلب مني ادخل خلفه
دخلت بهدوء والقيت نظره على الغرفه وانا اتأملها
غرفه بناتيه وحلو ومرتبه
قاطع تأملي نايف : اجلسي يا ريم
جلست مكان ما اشر على طرف السرير
وجلس هو مقابلني على كرسي سكت لثواني وبعدها طالعني : اسمعي يا ريم لا تقولين عاجبتك حياتك ذي
ناظرته وانا ساكته
كمل كلامه : اسمعي من الحين رح تعيشين هنا عندي مع اخوانك وحاولي تتأقلمي معهم
وما ابغى اسمع اعتراض
ناظرته ببرود : وجدي وافق ؟؟
ناظرني وهو يكتم غيضه : ما حد له دخل
وقف وناظرني
من اليوم روحه لبيت ابوي ممنوع الا بإذني
وجوال ما في
ومدرسه ما رح احرمك من الدراسه رح تدرسين بالبيت وانا مستعد اجيب لك مدرسات للبيت لوقت ما تتشافين وتتغطين
اما طول ما انت تكشفين وجهك حتى حديقة البيت ما اسمح لك تطلعين لها الا بحضوري
مفهوم!!
كنت ودي اتكلم بس اشر لي بحزم
بعدين نتفاهم بالموضوع وطلع من الغرفه وقفل الباب بالمفتاح
ناظرت باب الغرفه وانا مو مصدقه رجعت للسجن برجليني
معقول خطه من ساميا ونايف حتى يحتجزوني هنا وارجع اعيش نفس سجن الطفوله
تذكرت الغرفه للي عشت فيها سنيين من طفولتي اشتقت لها
اذكر وانا صغيرة طلبت مني ساميا تنقلني لغرفه ثانيه اكبر بس وقتها عاندت ورفضت
ناظرت الغرفه لون جدرانها نهدي وستائرها مدموجه بالموف والابيض
وفيها كبت مقارب للون الغرفه وفيها حمام... السرير حجمه وسط غرفتي في بيت جدي احلى واكبر من ذي....
مر وقت وانا جالسه ومليت ما ادري وانا صغيرة كيف كنت امضي الوقت لوحدي بدون العاب ولا تلفاز ولا شي يسليني
قررت اخذ قيلوله وبعدها اشوف وش اقدر اعمل
رميت نفسي على السرير وانا افكر بكلام نايف
كلامه منطقي المفروض اعيش هنا بس بدون سجن
ودخلت عالم الاحلام خلال دقايق ..........
&&
&&
&&
&&
&&
&&
ما ادري كم نمت من الوقت بس صحيت على ازعاج بالغرفه
فتحت عيوني بشويش وانا افرك فيهم وبعدها ناظرت بالغرفه
شفت نايف ناقل كل اغراضي هنا
تنهدت يعني ما في مفر من السجن ناظرت الاغراض
وسألته بهدوء : وين اللاب توب
ناظرني بحزم: انسي شيء اسمه لاب مفهوم
انقهرت كل شي ممنوع وتاففت بصوت عالي افففف
ناظرني بتهديد : لا تتأففين مثلك مثل اخواتك فاهمه
قهرني بس في شي مقيدني ما اقل ادبي الابله الاسبوع الماضي خبرتنا بقصص عن عقوق الوالدين مع انه امي وابوي ما اعطوني حقوقي حتى ابرهم
بس مهما كان رضاهم من رضى رب العالمين
ناظرته بهدوء وما حبيت اجادله اخاف افقد اعصابي
واصير عاقه ففضلت السكوت
ناظرني وملامحه جامده يحاول يخفي شعوره بها : يالله رتبي الاغراض ورح ارجع لك بعدين نكمل تفاهم
طلع بدون ما يسمع مني كلمه واحده وقفل الباب بالمفتاح .........
تكاسلت ارتب الغرفه ورميت نفسي على السرير
وبدون ما احس غفيت
بعد مرور وقت صحيت على صراخ نايف ومسك يدي
بسرعه البسي عباتك
ناظرته بغباء مو فاهمه شي وقفني وناولني عباتي وبعجله : بسرعة البسي بسرعة
توترت وبسرعه لبست وحطيت الشيله على راسي وانا مو فاهمه شي والنعاس بعده بعيوني
مسكني من يدي وسحبني برا الغرفه وهو شبه يركض وانا مثل الهبله منظري يضحك من سحبته حتى ما اقع اركض معه
دخلني السياره وحركها بسرعه جنونيه كنت اناظر وانا خايفه وعلى راسي علامات استفهام ؟؟؟؟؟؟
بعد ما ابعدنا عن البيت خفف السرعه
سألته بهدوء وانا من داخلي خايفه : وش فيه ؟؟!!
طنشني وبعدها وقف على جنب الطريق ونزل وابتعد شوي عن السياره
كنت اشوفه واقف والظاهر انه يفكر وبعد ربع ساعه رجع وحرك السياره وطول الطريق كنت ساكته وهو ما تكلم ...ملامحه جامدة
واخيرا وقف عند احد المولات وبهدوء : انزلي يا ريم
نزلت وانا مستغربه
دخلنا المول وبعدها توجهنا للمطاعم واختار طاوله وجلسنا بهدوء
تم ساكت لعدة دقايق بعدها ناظرني نظرات عجزت افسر معناها : عاجبك وضعك تطلعين بدون تغطايه
ما رديت
طلب لنا عصير بعد ما سألني وش اشرب
بعد ما وصل العصير شرب منه شوي وناظرني : تدرين ابوي حلف يمين ما تعيشين غير عنده ورفض انك تعيشين عندي
ما رديت
ناظرني بقهر : اكيد مبسوطة لانك رح تفتكين مني وساميا تتطلق
رفعت حاجب مستغربه وبهدوء : ليه انت طلقتها ؟ وش علاقتها بالموضوع ؟؟!!!!
رد علي بدون نفس : سالفه طويله
تدرين كنت ودي ارجعك تعيشين عندي واربيك من اول وجديد
ناظرته بقهر بس رديت بهدوء : ليه تربيني ؟؟ شايفني هايته من سوق لسوق ؟؟
ضحك باستهزاء : تعتبر حالك متربيه وانتي عايشه عند غاده وساره وأشكالهم ولوى بوزه باشمئزاز
قهرني رديت : دام مو عاجبينك ليه ترميني عندهم ؟؟؟
ناظرني بنظرات مو مفهومه : شي ما تدري عنه لا تسألي عليه فاهمه
المهم نرجع لموضوعنا تدرين يا ريم كنت بلحظات قبل شوي ودي اذبحك واقهر ابوي عليك
تفاجأت بكلامه ما توقعت لذي الدرجه حقده ابتسمت عكس الجروح للي بقلبي : يا ليت عملتها وريحتني من هالحياه تدري وقتها رح اكون شاكره لك ومستعده اكتب وصيه اني انا قتلت نفسي حتى ما تدخل السجن بس اهم شي اتخلص من الحياه
ناظرته بحماس وانا ابتسم من الالم للي بداخلي : وش رايك الحين اكتب لك الوصيه وانت تنفذ
ناظرني بملامح جامده : لذي الدرجه تكرهين حياتك ؟؟؟
جاوبته بألم : اكثر مما تتصور اكره حياتي
رد بهدوء : مهما تعرضتي لضغوط المفروض تكونين اقوى من كذا
سكت لثواني وبعدها سألني بتردد : تكرهيني اكثر واحد على وجه الارض صح ؟؟
ناظرته وابتسمت : اممممم تقدر تقول انت وساره اكثر شخصين اكرهم على وجه الارض
تفاجئ بكلامي : تكرهين امك ؟؟؟
اعترضت : لو سمحت انا ما لي ام اسمها ساره
رفع حاجب مستغرب : كنت دايما تبكين تبغين امك والحين صارت اكره شخص على قلبك غريبه انت يا ريم
ابتسمت : ليه تستغرب ؟؟ ذي الحقيقه
رد بهدوء : مستحيل توهمي نفسك بالكره لساره بس بالحقيقه تحسين نفسك تحنين لها وودك تشوفينها مع اني ما ادري سبب كرهك لها
كلامه صحيح على الرغم اني اكره ساره الا انه احيانا اشتاق لها
ناظرته بهدوء : حرمتوني من كل شي بدون ذنب ودكم إياني الاقيكم بالاحضان
ضحكت باستهزاء : لو فيه مشاعر اكبر من الكره كان وصفتكم فيها انت وساره
كان ساكت وهو يشرب العصير بعدها ناظرني : لا تغتري مشاعر متبادله لا تظنين الحين اموت عليك
وما اقدر اعيش دونك
ناظرته : طيب انا اكرهكم لاسباب كثيره واهمها حرمتوني اعيش مثل اي طفله بالدنيا
انت ليه تكرهني ؟؟؟
ناظرني : لانك نقطه سوداء بحياتي وتذكريني بأحقر وانجس ناس على وجه الارض وما اضمن انك تحملين دمهم وصفاتهم الخبيثه
ابتسمت رغم الالم : تدري ساره تكرهني لنفس السبب وابتسمت بألم سبحان الله كيف تكرهوني لنفس السبب وبدون ذنب
مع اني ما ادري وش سبب الخلاف بين العايلتين ولا ادري سبب الطلاق وبالرغم من اختلافكم ومشاكلكم الا انكم اتفقتم على شي واحد انكم كلكم تكرهوني
سكت وما رد علي وهو سارح بعدها ناظرني وابتسم : صح ما خبرتك زواجك بعد اسبوعين
ناظرته بدون اهتمام : قصدك بعد سنتين !!
ضحك بهدوء : يا خبله اقول لك بعد اسبوعين ابوي اليوم اتصل بزيادووووو وخبره الزواج بعد اسبوعين
ناظرته وانا مو مصدقه
ناظرني بجديه : ريم صدقيني بعدك صغيره فكري كويس واذا غيرتي رايك انا مستعد اخلي العرس يتاجل بعد سنتين
مسكت يده بلهفة : دخيلك لا خليه بعد اسبوعين احسن
تنهد : اسمعيني خلاص الحين لما نرجع اخذ اغراضك وارجعها لبيت ابوي مع اني كنت ودي تعيشين عندي
بس خلاص انسي وحتى انسي انه عندك اب
ضحكت بتريقه : متى كان عندي ابو علشان انساه ؟؟!!
احتدت ملامحه وشد على اسنانه : ريم
ابتسمت وما علقت
وقف وبأمر : يالله قومي
ناظرته وانا جالسه وبعدها وقفت مسك يدي واتجه لمحلات الذهب
ناظرته باستغراب
جاوبني بدون ما اسأل : رح اشتري لك هدية الزواج وبعدها ابتسم على ملامح وجهي المتفاجئه
بعد ما اختار لي الهدية وطلعنا من المحل توجهنا للسياره
ركبت السياره ناظرته بهدوء : لا تفكر بهديتك رح تمحي الكره للي بقلبي لك
ناظرني ورفع حاجب : ومين قال لك اني اعطيتك الهديه علشان تحبيني
ضحك باستهزاء : عمرك ما همتيني الا انه اسمك بإسمي فقط
رديت بإبتسامه : اعرف وبعدها لفيت وجهي للشباك اناظر وانا ابلع غصاتي ........
قطع افكاري دخول طيف وهي تزاعق
ناظرتها بعد ما نقزت وقفت واتجهت لطيف وبهدوء : طيف ابو سلوم وين ؟؟
تخصرت طيف وناظرتني : والله لاقول لجدي انك تقولين عنه كذا
مسكتها من اذنها وشديتها انقلعي من وجهي
وسكرت باب الغرفه بالمفتاح حتى ما تدخل مرة ثانية وتزعجني
كنت اسمعها تتوعد بي بس طنشت وجلست على السرير وفتحت اللاب وجلست اتصفح بعض مواقع الازياء ........
&&
&&
&&
&&
&&
&&
&&
&&
وصل الشباب عند الجد للي كان جالس على كرسي بالحديقه لما شافهم وقف : يالله قدامي
نواف برجى : تكفى يا جدي لا تذلنا قدامه تكفى مستعدين نعمل اي شي بس الا الإعتذار
ناظر الجد الشباب للي هزوا راسهم بالموافقه
حك لحيته وبجديه : مستعدين تنفذون اي شي اطلبه منكم
ردوا الشباب بصوت واحد : موافقين
الجد بحزم : ومو تتراجعون ابغى كلمة رجال
سليمان : جدي حنا رجال وعند كلمتنا وما رح نتراجع
ابتسم الجد بانتصار : للي ودي اياه ما ابغى تتعرضون لزياد ولو بكلمه وحده انتم بحالكم وهو بحاله واعطاهم نظره تحدي
انقهروا الشباب وتكلم سليمان بقهر : لك ما طلبت
وبعدها انسحبوا الاربعه بقهر خارج البيت
تنفس الجد براحه انه انهى مشكله زياد والشباب
بعدها توجه والباقي للداخل
خالد وهو يضحك : هههههههه مناظرهم تكسر الخاطر هههه
صقر وهو يحط يده على كتف خالد : عاد كان ودي ابوي يصمم على رايه ويروحون يعتذرون واصورهم ههههه
خالد : تدري ...
قاطعته عند باب الصاله بنته طيف وهي تركض و تبكي
انجن جنونه تقرب منها : وش فيك تبكين ؟؟
اشرت على اذنها
صقر لما شاف اذنها عرف انها ريم وبسرعة شال طيف وهو يبتسم : خلاص انا رح اذبحه احمد لانه ذبحك هالحيوان
طيف وهي تبكي وتدلع : لا مو
قاطعها صقر : رح اخذك معي اشتري لك حلاوه
وحملها وطلع قبل ما تقول طيف انه ريم ضربتها ما حب تصير مشكله بين ريم واخوه فيصل لانه اكثر من مره فيصل نبه على ريم ما تضرب طيف
توجه خالد لاخوه احمد وضربه ليه يضرب بنته واحمد يبكي ويحلف انه ما ضربها
فيصل عصب على خالد ليه يضرب اخوه الصغير
انقهر خالد وطلع من البيت معصب ......
&&
&&
&&.
&&
&&.
&&
&&
&&
&&
&&
كملت تصفح على النت وقررت تروح لجدها بجناحه طلعت من غرفتها وتوجهت لجناح جدها طقت الباب بهدوء
وبعد دقايق فتح لها الجد واستغرب وجودها وبهدوء : بغيتي شي ريم
ريم باحراج : اممم ابغى اكلمك بموضوع
جدي وهو يتثاوب بعد ما ناظر ساعته : الوقت تأخر وش رايك بكره تخبريني فيه
ابتسمت ريم : ما رح اخذ وقت بس خمس دقايق
فتح الباب الجد واشر لها بالدخول
دخلت ريم بهدوء وجلست بالصاله : ام سلوم وين ؟؟ جلس جدي مقابلني : ما تجوزي عن حركاتك يا ريم
وناظرني بجديه المهم وش الموضوع الخطير للي ما يتأجل ؟؟
ناظرته ريم بابتسامة : قول تم
ابتسم الجد : حسب الطلب
ناظرته برجى : تكفى قول تم
تثاوب جدي : طيب تم
ابتسمت ريم : ابغى اروح عند بنات خالي اجلس الاسبوعين عندهم قبل الزواج
احتدت ملامح الجد : لا مستحيل
ناظرته برجى : انت قلت تم
سكت دقايق : امممم طيب اسبوعين كثير
ردت ريم : طيب اسبوع وسبلت عيونها
الجد بهدوء : خلاص تجلسين عندهم يومين
قاطعته ريم : لا جدي قليل ابغى اسبوع
الجد بحزم : ثلاثه ايام او اكنسل الروحه كلها
لوت ريم بوزها بقهر : طيب خلاص موافقة 3 ايام بكره الصبح اروح 8:..
الجد : خلاص بكره اوصلك بنفسي بس لا تخبرين احد وخاصه فيصل ونايف تعرفين عصبيتهم
هزت ريم راسها واستأذنت وطلعت من الجناح تجهز اغراضها .........
&&
&&
&&
&&
&&
بالصاله الداخليه كانت الجده وام خالد وسديم وروان جالسات مع زوجة خالد
ونازلات حش فيها وهي مو فاهمه عليهم
الجده : تدرين يا ام خالد صحيح انها هالمخلوقه بيضاء بس ما في شي يجذب فيها
ام خالد ناظرت زوجه خالد : صادقه يا خالتي ما ادري هالخالد وش عاجبه فيها!
سديم بقهر تكلم زوجه خالد
: لماذا لا تذهبين للنوم ؟؟
ناظرتها زوجة خالد بغرور : اذا كنت متضايقه من وجودي فغادري انت
الجده تناظر سديم : هالزفته وش تقول ؟؟
سديم لوت بوزها : اقول لها انقلعي على غرفتك تقول لي اذا متضايقه مني انقلعي من هنا
شفتي يا جده تطردني بقوه عين
ناظرتهم بغرور وحقد وهي مو فاهمه عليهم
فجأة دخلت ريم المجلس بعد ما جهزت ملابسها
وبصوت عالي وهي تكرر حرف الراء : مرررررررحبا
لوت الجده بوزها : انت ما نمتي للحين
اقتربت ريم من جدتها وباستها باسلوب ينرفز : امواااح ما اقدر انام بدون ما اشوفك يا ام سلوم
مسحت الجده خدها وهي منقرفه
ناظرت ريم واشرت على زوجه خالد : مين ذي ؟؟
ام خالد بدون نفس : زوجة خالد ابني
ابتسمت ريم وهي تهز راسها : ام طيف ولؤي ؟؟
الجده : ايوه
اقتربت ريم منها وهي تبتسم : اخبارك يا حلوه ؟؟
روان بغرور : مو عربيه ذي اجنبيه ما رح تفهم عليك وش عرفك بلغتهم
قاطعتها ريم : طيب روحي انخمدي احسن لك واعطتها نظرة اشمئزاز
وبعدها ناظرت زوجه خالد وابتسمت ومدت يدها وسلمت وهي تنطق بتساؤل: مو مسلمه ؟!
ام خالد ببرود : صار لنا 8 سنوات نقنع فيها ومن دون فايده وناظرت زوجه خالد باشمئزاز!
ناظرت ريم زوجه خالد وهي تشعر بالحزن مو قادره تستوعب انها مو مسلمه..بس ما تلومها دام انها تعاملت مع اهل ابوها ..اكيد كرهت الدين لأجلهم!!
مستحيل تفرط بذي الفرصه وتضيعها منها لازم تحاول معها وتجذبها بكلامها وتكسب فيها اجر!!
ابتسمت لزوجة خالد وجلست بجانبها وسألتها بالانجليزي : كيف حالك
قاطعتها سديم وروان بضحكة استهزاء : هههه حافظه هالجمله بالمدرسه وجايه تسمعينها هنا
ناظرتهم ريم بغرور وبعدها التفتت على زوجه خالد وابتسمت و بالانجليزي : سخيفات اليس كذلك ؟؟
روان بقهر : ما حد سخيف غيرك
طنشتها ريم ومسكت يد زوجه خالد وهي تبتسم : ما رايك ان تاتين معي لغرفتي نجلس براحتنا بعيداً عن الازعاج
ابتسمت زوجه خالد لريم : حسنا
الجده بقهر : شوفي هالزفته  من لما جت وهي ماده البوز والحين تبتسم مع هالقرده
ردت ريم وهي تتدلع وتسبل عيونها : ام سلوم كل ذي الحلاه وتقولين قرده
روان بقهر : يقطع حلاتك انت والشيفه للي جنبك لايقات على بعض لانكم سخيفات
طنشتها ريم وهي تبتسم وتحرك حواجبها
وطلعت من الصاله وتوجهت لغرفتها فتحت ريم الباب وناظرت زوجه خالد بابتسامة : مرحبا بك في غرفتي...
جلست معها بغرفتها ...ودخلت ريم معها جو بالضحك والمزاح ....وتعرفت على حياتها بالخارج...
من خلال كلامها معها ...عرفت انه علاقتها باهل خالد سيئه وانه اطفالها مو متعلقين فيها لانه دوم اهل خالد يبعدونهم عنها لانها مو مسلمه ويخافون على الاولاد منها فهي عناد بهم رفضت دخول الاسلام من تعاملهم الجاف معها
تعاطفت ريم معها وحست بالقهر من بيت عمها كيف نفروها من الاسلام بسبب تصرفاتهم المغروره
واستغلت ريم ذي الثغره ودخلت منها وبدت تخبرها انه بيت عمها ما يمثلون الاسلام وكل الناس تخطئ  .....وبعد نقاش طويل
وبكاء ريم خايفه على كاترين تموت وهي ما اسلمت
تأثرت كاترين بكلامها وخاصه انها مقتنعه بس عناد باهل خالد رفضت الاسلام
ريم من بين دموعها : اخاف ان يقبض الله روحك قبل ان تدخلين الاسلام
مسحت كاترين دموع ريم وعيونها مليانه دموع : لم اعلم ان هناك مسلمون رائعون مثلك يا ريم
لا انكر اني مقتنعه بالدخول لكن عنادي وترددي هما السبب في عدم دخولي
بالرغم من محاولات خالد في اقناعي لكنك استطعتي ان تقنعيني شكرا لك
ريم بابتسامة وحماس : هيا لنردد الشهاده معا
هزت كاترين راسها بابتسامه وسعاده
ريم : اشهد
كاترين : اشهد
ريم : ان
كاترين : ان
ريم : لا
كاترين : لا
ريم : إله الا الله
كاترين : إله إلا الله
ريم : وان محمدا
كاترين :وان محمدا
ريم : رسول الله
كاترين : رسول الله
حضنت ريم كاترين وهي تبكي : الحمد لله الحمد لله
وقفت كاترين بفرحه : سأذهب اخبر خالد بهذا الخبر لقد انتظر ذي اللحظه لمده طويله
ابتسمت ريم وهي تمسح دموعها
غادرت كاترين الغرفه وهي بقمه سعادتها
قفلت ريم الباب بالمفتاح وهي تردد الحمد لله انه ربي قدرني اقدم شي لديني...الحمد لله
نزلت كاترين للصاله الداخليه وهي تبتسم شافت خالد جالس وقفت بابتسامة : خالد لدي خبر سيفرحك
خالد ببرود : ما هو ؟؟
الجده تناظرهم نظرات تضحك : هاذي وش تقول اخاف قاعده تشتم فينا وانت ساكت لها !!
كاترين ما اهتمت لكلام الجده لانها ما تفهمه ناظرت خالد : لقد اسلمت
خالد وهو مو مصدق : قولي قسم
كاترين معتاده على ذي الكلمه من خالد ضحكت : قسم
وقف خالد بابتسامة : الحمد لله الحمد لله ضربها على راسها بالخفيف : ما الذي غير رايك ؟؟
ردت بابتسامة : فتاه هنا اسمها ريم اقنعتني ورددت الشهاده خلفها
ام خالد بابتسامة : الحمد طلع من هالريم فايده
الجده : تراني ماني فاهمه شي !!
ام خالد : هاذي زوجة خالد اسلمت والقرده للي فوق هي للي اقنعتها
الجده بابتسامة : الحمد لله على نعمة الإسلام بس هالقرده ريم ما جلست معها ساعتين اقنعتها
خالد يناظر امه : ذي البنت طلبها بلسانها مكافأة لها على هذا الانجاز والله تستاهل مو مثل اخواتي نفروها من الدين
الجده : لا تغتر تراها هالملسونه
قاطعها دخول فيصل وخبروه بالخبر وفرح وحمد الله انها اسلمت
وتعجب من هالريم : الحمد لله على الاقل طلع منها هالملسونه شي مفيد
الجده : صادق يا ابو خالد ..تثاوبت الجده تاخر الوقت اروح انام
ام خالد وقفت : صحيح تاخر الوقت الساعه 2.30
وين نواف
فيصل وهو يطلع من الصاله : بالملحق مع الشباب ودهم ينامون هناك
هزت راسها ام خالد وطلع الجميع كل واحد على جناحه .........

&&
&&
&&
&&
&&
&&
جالس نواف وسليمان وصقر جنب بعض
صقر وهو يناظر بدر وعمر : شوفوا اتوقع انهم انهبلوا
كان بدر وعمر يتهامسون ويضحكون
نواف : الحمد لله انهم رجعوا مثل اول وانتهى خلافهم بعد ما قطعوا الامل من جدي
سليمان وهو يسند راسه على الجدار : قلت لك رح يرجعون مثل قبل
نواف ناظر سليمان : مقهور مو قادر استوعب لو جدي صمم انروح نعتذر كيف رح يكون منظرنا
سليمان بعصبية : تدري يمكن وقتها ارتكب جريمه بزيادوووو
ابتسم صقر وبنفسه لو يدرون انه ابوي اتصل بزياد علشان يعتذرون بس رفض زياد انهم يعتذرون وحلف يمين
علشان كذا ابوي كنسل روحتهم
..............

&&
&&
&&
&&
&&
صحيت ريم الصبح وهي تثاوب تذكرت وقفت بسرعة
ومسكت الجوال وضربت على جدها بعد لحظات فتح خط
ريم بحماس : وينك ؟؟ متى نروح ؟؟
الجد بهدوء : اسمع الحين مو مناسب بعد ربع او نص ساعه اتصل عليك وتكون جاهز
عرفت ريم انه واحد من اعمامها موجود علشان كذا يتكلم معها بصيغة المذكر فاضطرت توافق : اوكي انتظرك
توجهت للحمام حتى تجهز نفسها للطلعه
&&
&&
&&
&&
&&
&&
&&
استأذن فيصل علشان يطلع يشوف عياله بالملحق ويصحيهم لصلاة الجمعه
انتهز الجد الفرصة واتصل على ريم بعد ما طلعت الجده للمطبخ
توجه لسيارته بهدوء وجلس ينتظر ريم وبعد دقايق كانت جالسه بالسياره وهي تلهث من التعب
وبعدها ناظرت جدها وابتسمت
رد الجد لها الابتسامه وحرك السياره
ريم بهدوء : امممم افكر اجهز للعرس مع بنات خالي
ناظرها الجد بهدوء : ريم نصيحتي لك ابعدي عن بنات خالك لا تظنين اني الحين ودي اتحكم فيك وافرض شخصيتي عليك
لا بالعكس انا ابغى مصلحتك
ريم بهدوء : بس هم طيبات معي
الجد بدون ما يناظرها : انا حذرتك ولا تنسي انهم مو من ثوبنا
وزياد لو يدري انك رايح لهم ما ظنيت يقبل لانه عيله ابو سعد معروفه كل شي فري عندهم
ناظرت ريم جدها : لا تخبر زياد لانها رح تكون اخر مره رد جدها : اصلا وافقت لانها رح تكون اخر مره وما حبيت ارفض طلب لك يا عروسه وابتسم
ريم بابتسامة : مشكور
مسك الجد يدها بجديه : ريم انا واثق فيك انتبهي
قاطعته ريم بابتسامة : ان شاء الله امممم حد يدري عن طلعتنا ؟؟
الجد بهدوء : لا ما حد يدري لما توصلين واطمئن عليك وقتها اخبرهم
تعرفين نايف وفيصل ما حبيت اكدر خاطرك قبل ما تطلعين
لما ارجع أخبرهم وقتها ما يقدرون يعملون شي
ناظرت ريم جدها بامتنان : مشكور
&
&
&
&
&
&
&
&
الجده بالصاله الخارجيه جالسه لوحدها دخل فيصل
ناظر الصاله وجلس : ابوي وينه ؟؟
الجده بهدوء : والله ما ادري رجعت ما لقيته وسألت الخدم يقولون طلع انت ما شفته ؟؟
فيصل مسك الجوال : لا ما شفته الحين اتصل فيه
اتصل فيصل على الجد وبعد عده رنات فتح خط
فيصل بهدوء : الو ......وينك يبه ........طيب مع السلامه
ناظرته الجده وبيدها فنجان القهوة : وينه ؟؟
فيصل وهو يعدل جلسته : يقول قريب الحين يوصل
دخل خالد وبعده نايف وجلسوا معهم
وبعد عدة دقائق دخل الجد رد السلام وجلس بهدوء
فيصل : وين رحت يبه ؟؟
الجد بدون مبالاة : وصلت ريم لبيت جدها
فيصل وملامحه احتدت : نعم كأني سمعت غلط وين وديتها ؟؟
الجد وهو يشرب القهوة : صاير ما تسمع يا فيصل اقول لك ارسلت ريم لبيت جدها تجلس هناك 3 ايام قبل عرسها
فيصل بقهر : يبه
قاطعه الجد بحزم : ولا كلمه اسمع البنت عندي وارسلها واجيبها ما حد له دخل وللي عنده كلام يحطه بحلقه وناظر نايف وفيصل بحزم
نايف للي احمر وجهه من العصبيه بس كتمها ناظر الحاضرين بقهر وطلع من المجلس زعلان
الجده تناظر نايف لما طلع من الصاله : عجبك هذا نايف طلع زعلان
الجد بلامبالاه : للي يزعل بيرضى وناظر خالد اليوم اي ساعه طيارتك ؟؟
خالد بهدوء : بعد العصر ان شاء الله
الجده : متى تستقر هنا متى ؟؟
فيصل بقهر : خله عند الشقر احسن من شوفتنا عنده
ابتسم خالد : انتم اغلى من الدنيا كلها عندي
الجده بقهر : وملكة اخوك ما رح تحضرها؟!
وبعدها تذكرت شيء ناظرت الجد:طيب انت ارسلت ريم عند بيت جدها وبملكة نواف مين رح يجهزني ؟؟؟
الجد ببرود : اعتقد اني قلت 3 ايام رح تجلس و خطبه نواف يوم الخميس والاثنين ريم رح تكون هنا بإذن الله
خالد : طيب ليه ما تروحين على الصالون احسن لك ؟!!
دخلت ام خالد وبيدها صينيه حلا : اسكت ذي البنت فنانه مكياج والله لو تشوف جدتك ما تعرفها تقول وحده بالثلاثين
الجده اعطتها نظره : ام خالد
ضحك الجميع على شكل الجده الا فيصل للي كان شاد على قبضه يده من القهر .....
ناظر خالد جده وبفرح : ما قلت لك يا جدي انها كاترين اسلمت وبدأ يخبره والجد مبسوط على الاخير وهو يحمد الله على هذا الخبر

&
&
&
&
&

دخلت ريم بيت جدها وكان البيت هادي دخلت الصاله وهي منحرجه شوي
وكان جدها وجدتها جالسين يتقهون سلمت عليهم وهي منحرجه
وطنشت نظرات الاستغراب واستأذنت منهم تطلع تكمل نومها فوق
صعدت لغرفة البنات وفتحتها بشويش وشافت البنات الكل يغط بالنوم!!
ابتسمت بشوق للبنات من زمان ما جلست معهم واستانست
رمت العبايه والشيله على الارض ورمت نفسها على سريرها القديم
ودخلت بعالم الاحلام ..........
بعد مرور ساعات صحيت ريم مفزوعه من المويه للي على وجهها
ناظرت حولها والبنات واقفات يناظرونها
ريم بصراخ : وقسم بالله لتندموا يا حيوانات ومسحت المويه عن وجهها
ضحكوا البنات وهجموا عليها يسلمون واصواتهم العاليه تضج بالمكان
قطعت عليهم الشغاله : يالله غداء جاهز
وقفوا البنات ومسكت ريم العبايه ولبستها وحطت الشيله على راسها
شروق : ليه لبستي العبابه ؟؟
ريم بدون اهتمام : اكيد اولاد خالي تحت
منار : ليه وسيعه كذا مو حلوه ولوت بوزها
ريم بابتسامة : انا عاجبيتني كذا
شوق بنغزه : عاجبيتك والا غصب عنك لبستيها ؟؟
تضايقت ريم من كلامها وخاصة انه صحيح
طنشت : يالله ننزل
سكتوا البنات ونزلوا تحت
دخلوا صاله الاكل وكان الجميع موجود سلمت عليهم ريم بهدوء
تفاجئ اغلبهم بوجودها بس ما حد علق
بعد الغداء انتقلوا وجلسوا بالمجلس الداخلي
دخلت ساره وتفاجأت بوجود ريم
ناظرتها ريم وتذكرت عقوق الوالدين وقفت وسلمت على ساره ببرود
ورجعت مكانها تتكلم مع البنات وتضحك قاطعها سؤال غاده : غريبه انك زرتينا كيف وافقوا انك تيجي ؟؟
ردت ريم بابتسامة : طلبت من جدي ازوركم واجلس عندكم كم يوم قبل العرس
جدتي بهدوء : عرس مين ؟؟
ريم بابتسامة : عرسي زواجي بعد اسبوعين
كل بالمجلس ناظروني باستغراب
ساره بقهر ابنتها تتزوج وهي اخر من يعلم : انت من كل عقلك وافقتي تتزوجين اكيد ابوك زوجك حتى يرتاح منك
شوق بغيره : طيب من اولاد عمك ؟؟
ريم بهدوء : لا ابن صديق جدي اسمه زياد
وقف خالي محمد وهو مدهوش : زياد
وناظرني باستصغار وطلع
جدتي بغيره : الحين زياد خاطبك بس ما سمعت انه خطب واعطت ريم نظرة تشكيك
ردت ريم بهدوء : ملكنا من شهرين تقريبا
ساره بقهر : من شهرين وحنا اخر من يعلم
غادة وهي رافعه حاجب : يمكن خايفه حد يخطفه منها وما خبرت حد
ريم بهدوء وهي مطنشه نظراتهم : لا مو كذا بس ارقامكم مو عندي وانتم ما تسألون عني
وبعدها ناظرت ريم البنات وطلبت منهم يطلعون للغرفه
طلعوا البنات للغرفه
ساره بقهر : شفتي هالحقير مزوج البنت بدون علمي نفسي اقهره هالحقير
غاده بخبث : عندي خطه تخليه يولع ويموت قهر
ساره : لا تقولين نقنع ريم تكنسل الزواج
قاطعتها غاده : لا يا غبيه حتى لو ريم طلبت تكنسله
ما رح يسمعون لها
انتي ما عليك انا رح ارسم خطه تقهر نايف قهر
الجده وقفت : اتركي افكارك الخبيثه يا غاده وش عليك من الناس
&&
&&
&&
&&
&&
&&
&&
&&
شروق : وش رايك يا ريم اليوم نطلع للسوق وتشترين اغراض للزواج
ابتسمت ريم بهدوء : اوكي ما عندي مانع
وجلسوا البنات كالعاده ضحك ولعب ووناسه بعد المغرب تجهزوا البنات للطلعه
شوق رفعت حاجب : ريم وش هذا اللبس ؟؟ ودك تفشلينا بالسوق؟؟
منار : صحيح انا اعترض للي يشوفك يظنك الشغاله بذي العبايه حتى مكياج ما حطيتي !!
ريم بهدوء : خطيبي يزعل اذا لبست عبايه ضيقه او حطيت مكياج كذا احسن
جلست شروق : انا ما رح اطلع يعني يا ريم ودك تفشلينا شوفي عباتك سوداء بدون اي زخرفه
كانت ريم بصراع داخلي جلسوا البنات يقنعونها بكلامهم حست نفسها لانت
بس تذكرت كلام جدها وهو يوصيها على لباسها مستحيل تخذله وهو اكيد زعل اولاده علشانها
ناظرت البنات وجلست على السرير بهدوء : خلاص دام شكلي يفشل ما رح اطلع
ورمت الشيله على الارض
حاولوا البنات يقنعوها لكنها عاندت... اضطروا البنات يسايروها...وطلعوا على السوق معها... كانت تشتري وهي مبسوطه وبنات خالها منشغلات بالترقيم وبنفس الوقت يختاروا معها بعض القطع ......
كانت تقضي ريم وقتها مع بنات خالها بالضحك وما داومت بالمدرسه ولا حتى شافت ساره ولما تكون ساره موجوده ما تنزل بما انه امها ما تبغى تشوفها
خلاص ما في داعي للاحراج
اليوم الاثنين وابو سلمان ما مر يوخذها ....تحسفت ريم  انها ما اخذت الجوال معها
من السرعه نسيته في غرفتها مو عارفه كيف رح تتواصل مع جدها
وهي مو حافظه رقم حد من اهل ابوها
وقفت على الشباك وشافت امها وسألت نفسها عن سبب الطلاق بين امها وابوها مع انه امها جميله حيل واحلى من ساميا !!
ليه ابوها طلق امها ؟؟؟
وش الخلاف للي يخلي العائلتين تحمل حقد على بعضها مثل كذا !!
كان نفسها تعيش بين ام واب متفاهمين !!
وش الماضي الاسود للي يقول عنه ابوها ؟؟!!
كيف تعرف ابوها على امها وتزوجوا ؟؟
اذا كانت جدتها تكره ساره طيب هي وش دخلها ؟؟
ليه يحطونها بوسط الخلاف ويحملونها هالغلطه ؟؟
ليه ليه كانت ريم تسأل نفسها ويرجع صدى
سؤالها على نفسها ما في اجابه عندها اااااااااا
مرت الايام وريم مو مرتاحه صحيح تضحك ومبسوطه مع البنات وكل يوم تطلع للسوق
بس في امور مكدره خاطرها
تدخل البنات بلبسها يخنقها واكثر من مره طلبت منهم ما يتدخلون
ومع ذلك كل ما يطلعون على السوق يفتحون نفس الاسطوانه
نظرات اهل جدها لها وكانهم يسألونها بنظراتهم متى ترجعين
الجفوه للي بينها وبين امها صارت اكبر والحواجز اقوى
جلست ريم على السرير وهي متضايقه
اخذت نفس وهي تقول بنفسها
اليوم السبت وجدها ما اخذها ولا حتى سأل عنها
غريبه وش صار عليهم ؟؟؟؟
والمدرسه ولا يوم داومت لو داومت كان سألت بنات عمها
محتاره وبنفس الوقت خايفه
وينهم لا حس ولا خبر ؟؟؟؟؟؟؟؟؟