رواية طفولتي المشتتة الفصل الثالث عشر 13 - بقلم ضاقت أنفاسي

*
*
*
الجده : اخخخ يالقهر وإلا هذي المنتفه تأخذ زياد.... أنا استبعدت توقعاتك ....انصدمت مو قادرة أصدق ......... أحس بالقهر المفروض خطبوا روان والا رغد أحسن من أم السعف والليف ..............حسبي الله عليها ............يصير خير ..........تعالي العصر علشان نتفق على ترتيبات الملكه ......... إن شاء الله .....مع السلامه
قفلت الجوال وناظرت أم خالد : أحس رأسي مصدع من لما عرفت إنه زياد خطب ريم اخخخخ يالقهر
ام خالد مطت شفتها : بس يا خالتي المفروض يكون نظره شرعيه حرام يظلمون الرجال بكره بعد الزواج ينصدم من شكلها وبعدين يطلق وش يسكت الناس ...ويقنعهم إنه مو عاجبه شكلها
دخل فيصل وهو يناظر زوجته : ما رح يطلقها علشان شكلها...
دخل الجد خلفه وجلس بصدر الغرفه وكمل عن فيصل :ريم ما ينقصها شي ويحمد ربه إنا اعطيناه والكلام الناقص هذا ما ودي أسمعه مرة ثانيه!
وأعطى نظره حاده لأم خالد وللجده
فيصل يناظر أمه : لو الأمر بيدي ما زوجتها لزياد حاولت أقنع نواف بها بس الغبي رفض
شهقت أم خالد وحطت يدها على صدرها وهي تناظره : ودك تبلي ابنك فيها
رفع فيصل حاجب وناظر زوجته باستنكار : وش ينقصها ريم حتى تقولين كذا ؟؟
ام خالد بغرور : ينقصها كثير أهم نقطه الجمال وين نواف وين هي نواف تلزمه ملكة جمال علشان تناسب جماله
رد عليها الجد باستهزاء : متى تعينتي بشركه المعايير والمقاييس حتى تعرفين من تناسبه
وناظر الجده :متى الغداء إن شاء الله
الجده بدون نفس : جاهز
الجد بحرص : لا تنسون ترسلون لريم اكل بغرفتها
ام خالد بقهر : إن شاء الله
*
*
*
*
*
*
*
بعد الغداء توجه الجد للمكتب هو وفيصل يتناقشون ببعض المشاريع
قاطعهم دخول صقر بعد ما رد السلام
جلس على الكنبه بهدوء وهو يسأل : سألت ريم عن موضوع الصبح؟؟؟
تنهد الجد وبعدها ناظر صقر : ذي البنت رح تجلطني قليله الحياء وخبره بالموقف
صقر وهو يشد على أسنانه : وسكتت لها اخخخخ يالقهر لو كنت موجود كان دفنتها بمكانها كله بسبب نايف ما رباها وتركها وأهملها
ذي البنت ضحية هذا الطلاق هو عايش حياته وامها عايشه حياتها والبنت تحطمت ولا تستبعد تعمل كل هذا علشان تنتقم منا وتقهرنا
الجد مسك القلم وأخذ نفس : يعني بنظرك يا صقر وش الحل معها نرخي لها الحبل وتعيش على كيفها
فيصل : يبه هذاا الجيل يحتاج لحزم وقد ما تقدر اضغط عليها
صقر وهو يناظر أبوه : أنا مع فيصل لازم نشدد عليها ونكون حازمين بس ما يتعدى الضرب لاني ضده هددها بالضرب أما إنك تمد يدك عليها أنا أعترض
الجد هز رأسه  بتفهم: أنا طلبت من أعمامها كلهم ونايف... ممنوع يضربونها إذا عملت غلط يخبروني وأنا أتصرف معها..
فيصل وهو يعض شفته بقهر : اخخخخ يبه لو تعطيني الإشاره الخضراء وأعطيها كم طراق يسنعها
صقر عقد حواجبه وهو يناظر فيصل : انت ما عندك إلا الضرب وبعدين البنت اكلت ضرب من صغرها حتى شبعت نايف ما قصر معها والله إنها تكسر الخاطر وحتى أبوي ما قصر فيها
الجد يناظره وهو يقرص عينه : مسكينه جالسه وأنا تبليت عليها وضربتها مو كأنه لسانها مترين
فيصل وهو يتكتف : ذي البنت مثل المسمار تبغى دق علشان تتسنع
صقر وهو يوقف وهو يناظر الجد : على كل حال أنا حبيت اخبرك بكلامها حتى تتأكد لازم ننتبه لها البنت صغيره وأخاف يلعب بعقلها زياد
الجد وهو يناظر الورق للي قدامه : يصير خير
وبعدها استأذن صقر وطلع .......

*
ك
صحيت وانا افرك رقبتي توجعني من النومه تثاوبت وبعدها وقفت وصرت امشي وانا مثل السكران وصلت للحمام وغسلت وجهي وبعدها طلعت وناظرت الساعه بعدها عصر مطول المغرب بدلت ملابسي و طلعت برا الغرفه وكنت لابسه شباح كابوي وتحتيه بلوزه زهر حفر وشعري ربطته قرون برباط لونه زهر
يمكن تضحكوا علي وتقولوا كبيره وتقلد الاطفال بس ما اعرف السبب احب ألبس مثل الأطفال يمكن لاني انحرمت اعيش طفولتي والحين قاعده احاول اعيش ايام الطفوله الي انحرمتها
المهم وقفت باب الغرفه وتفاجأت بوجود بزران بالصاله يلعبون بلايستيشن اول مره انتبه لوجوده تقدمت منهم وهم مندمجين باللعب وسحبت السلك من الكهرباء..
ناظروني بقهر وصرخت وحده منهم : ليه تفتيه يا دبه
ناظرتها باستهزاء : اول تعلمي تتكلمين زين وبعدين تعالي ...
ناظرتهم وحبيت استقوي عليهم وبصراخ: مين سمح لكم تجلسون هنا
وقفت وحده تردح لي : هذا بيتنا انتي انقلعي برا
تقدمت منها ومسكتها من اذنها : هذا الطابق كله لي جدي البارحه قال كذا فاهمه
يالله الحين انقلعوا من هنا قبل ما أنادي جدي لكم و أعطيتهم نظره تخوف وأنا بداخلي أضحك على أشكالهم...
تقدم واحد من الأولاد وابتسم : انا اثمي احمد انت اثمك ثو
تكلمت وحده من البنات : أنا اثمي طيف ليه ما تثجلي معنا بنفث المدرثه انت بثف نوف
ناظرت البنت للي تأشر عليها وطار عقلي
نوف ببراءه : أنا بالصف الرابع تعالي سجلي بصفي
خلاص الوضع زاد عن حده الشاطر يتمسخر علي حتى البزران يتمسخرون علي
وخلعت النعال وأنا اناظرهم بحقد وبتهديد : وقسم بالله لتندمون وتوجهت لهم وأنا رافعه النعال حتى اضربهم بس هربوا وصرت أركض خلفهم بالصاله وأنا الهث وصوت صراخ البزران بكل مكان
فجأة شفت صقر واقف عند آخر الدرج ودوبه داخل الصاله
لما شافوه البزران ركضوا بسرعة عنده..
تقدمت وأنا أصرخ : تعالوا هنا وحاولت امسكهم من خلف صقر
بس صقر منعني ورفع حاجبه : ليه ودك تضربيهم ؟؟
ناظرته وأنا أردح : اسألهم قليلين الحيا وحطيت يدي على خصري
التف على البزران وبابتسامه : ليه ودها تضربكم ؟؟؟
طيف ببراءة : والله يا عمو ما عملنا اثي بث دلتلها انتي بثف نوف
صرخت عليها وانا معصبه : انكتمي يا حيوانه وصرت اتريق عليها بثف نوف
رد صقر وهو يضحك :  ريم ترى رضاعتك بالمطبخ جهزتها الخدامه..
والتفت على البزران لا تردوا عليها ذي مخبوله وتدرس بالروضه بعدها ما دخلت المدرسه..ختم كلامه بضحكه ساخره..
بعدها ناظر البزران: انزلوا تحت بسرعه
ركضت حتى امسكهم بس أبو طويله منعني اخخخخ يالقهر وبعد ما نزلوا البزران دفني على الخفيف
وأعطاني نظره ما فهمتها وبعدها نزل
قهرني توجهت للبلايستيشن وشغلته وجلست على الارض وتربعت وبدات العب
وبعد 15 دقيقة تقريبا لمحت ظل صغير خلفي بس طنشت وقعدت العب
جلس جنبي بهدوء وبطفوله : العب معك عادي
ناظرته وسألته عن اسمه كان اسمه لؤي وافقت يلعب معي... وبدأنا نلعب مع بعض بس هالحيوان ما هو قليل بلحظه كان رح يفوز علي بس الحمد لله سبقته وفزت عليه ووقفت أقفز من الفرحه
شفت البزران واقفين ويطالعوني بتردد وتشجعت نوف وتكلمت : هذا جهازنا وحنا كمان ودنا نلعب
ناظرتهم بغرور : امممم طيب بما إنه هذا بيتي رح اسمح لكم تلعبون بإذني بس
يالله تعالوا عالدور تلعبون وقعدنا نلعب وطول الوقت أنا ألعب فزت خسرت ما لي دخل أظل ألعب وهم على الدور يلعبون معي
انبسطت وسمعت صوت الاذان وتذكرت رح اطلع  للسوق...
قمت وفصلت السلك وناظرتهم : يالله خلص اللعب
حاولوا علشان يلعبون بس طردتهم واخذت وصله الكهرباء علشان ما يلعبون نذاله
دخلت غرفتي وجهزت نفسي وفكيت شعري وربطته ذيل حصان ولبست الشيله وعدلت اللثمه ناظرت نفسي برضى وبعدها نزلت وأنا اتزحلق على الدرابزين وبعدها نزلت بهدوء علشان الكعب للي لابسه
شفت ميرفت سألتها عن صقر خبرتني انه صقر ينتظر برا
طلعت شفته واقف مع واحد من الشباب ما عرفته
ترك صقر الشاب وجاء ناحييتي ومعصب عالأخير
لما وصل عندي وقفت ..تكلم وهو يشد على أسنانه : ليه حاطه لثمه وأعطاني نظره قويه
رديت ببرود : طالعه عالسوق وما أقدر اتغطى كامل عندي ضيق بالنفس
صقر وهو يكتم عصبيته .. لأنه باختصار عيونها كانت فتنه: يا بنت الحلال لا تعصبيني نزلي الشيله على وجهك
سمعت صوت من خلف صقر : ردي على عمك وغطي وجهك كله بلا كثره حكي
قررت لأول مرة ما أعاند بما إنه الأمر فيه مصلحتي ونزلت الشيله على وجهي بهدوء
حضروا بنات عمي ومن صوتهم مبسوطات
صقر وهو يناظرهم : الكل جاهز سلمى ولينا
سلمى بصوت ناعم : انا هنا يا عمي
صقر يبتسم معها : فديتك تعبني نايف حتى يقتنع علشان تروحين انت ولينا والحمد لله وافق بالاخير
جدي يناظر صقر : انتبه للبنات يا صقر
صقر بابتسامة : إن شاء الله
وبعدها توجهنا للسياره وركضت سديم وفتحت الباب الامامي وجلست
كنت امشي خلف البنات وحاسه بداخلي نار تكويني أخذت نفس وقفت عند الباب ناظرت للداخل اشر لي صقر اجلس بالخلف
سكتت وجلست بالخلف... وجلست جنبي لينا كانوا البنات يضحكون ويتكلمون مع صقر ومبسوط صقر عالاخير معهم بعدها بدقائق وقف عند البقاله وناظر البنات : وش رأيكم اشتري لكم عصير الجو حار اليوم....
وافقوا البنات ونزل يشتري...بعد دقائق دخل صقر ووزع على البنات العصير وانا مطنشيني ولا كأني معهم
بعد ما تحرك صقر نادت لينا صقر : عمي عمي ريم ما اخذت عصير
وقف السياره وبعدها ناظر للخلف بلوم : سوري ريم نسيتك اذا تبغين الحين انزل واشتري لك
ناظرته من المرايه ولفيت وجهي لجهة الشباك وانا مخنوقه
رد صقر بعصبية : بكيفك عمرك ما رديتي ان شاء الله
كنت اناظر من الشباك وحاسه العبره خانقيتني كلهم ناسييني ...دائما على الهامش ما أحد يعتني فيني
و يهتم لي...
وش يفرقوا بنات عمي عني حتى يضحك صقر معهم وانا بس يعصب علي
كلهم لابسات نقاب وعيونهم برا ليه أنا ممنوع
كرهت حياتي وكرهت كل الناس أكرههم كلهم تسلسلت دمعه من عيني مسحتها بسرعة اخذت نفس وأنا حاسه حالي مخنوقه
استغفرت ربي وبعدها بدقائق سمعت صوت صقر يطلب منا ننزل
ما كنت ودي انزل خلص ودي ارجع البيت كرهت السوق والطلعه
بس ما في فائده نزلوا البنات وكنت اخر وحده ولما كنت أبغى أنزل مسك يدي صقر وناظرني : والله يا ريم اني نسيتك مو قصدي شي وبابتسامه إذا ودك الحين اشتري لك حليب
نفضت يدي منه بقوه ونزلت وأنا مقهوره منه يتمسخر علي
دخلنا المول ووقف معنا صقر وتكلم بهدوء : انا عندي مشوار مستعجل ما رح اتاخر عنكم لا تبعدون عن بعض وبينا اتصال اوكي
سديم : خلص عمي احنا رح نتسوق من هنا ولما تكمل اتصل علينا
صقر : ان شاء الله ما رح أتأخر دقائق بس
واستأذن وبعدها غادر
كنت واقفه مع البنات وقرروا يدخلوا احد المحلات
تكلمت بهدوء : لحظه خلينا نروح على محلات العبايات
تكلمت وحده منهم بتكبر وهي تؤشر علي بإصبعها : يا حلوه ما معنا وقت نروح محلات الاطفال وضحكت بصوت منخفض
ردت الثانيه : لو سمحتي لا تيجين معنا ما نحب نشتري ومعنا احد غريب
رديت ببرود عكس القهر للي بداخلي : يقال انا للي ميته امشي معك
لينا وهي تكلم البنات : طنشوها طنشوها لا نضيع وقتنا عليها
ناظرتها سبحان الله ذي اختي المفروض توقف معي وعضيت على شفايفي بقهر
وغادروا البنات وتركوني
حسيت بالغربه نفسي أهج على مكان ما أعرف أحد فيه وين اروح غمضت عيوني بألم وأنا حاسه حالي مخنوقه التفتت حولي وشفت زاويه بعيده عن الناس
توجهت لها وجلست وأنا متكوره على نفسي ريال واحد ما معي لو معي فلوس كان اشتريت مو بحاجة احد... عضيت شفايفي من القهر والعجز
مر الوقت صقر ما رجع قال دقائق ويرجع اشوفه ما رجع
بعد مرور وقت رفعت رأسي شفت رجال كبير بالسن يكلمني بهدوء وحنان : يا ابنتي محتاجه شيء
اه نبره الحنان بصوته ذبحتني كنت ودي ارد عليه بس قاطعنا شاب من خلفه : يالله يبه تأخرنا
الرجال الكبير : انتظر شوي يمكن البنت محتاجه مساعده
تافف الشاب : يا يبه هذول نصابات ودهم فلوس خلاص أعطيها كم ريال وخلصنا وناظر ساعته مستعجل
الرجال الكبير طلع بوكه من جيبته وكلمني : كم محتاجه يا ابنتي
الشاب بسخريه : كمان تسألها كم تبي ذي النصابه لو تعطيها كل فلوسك ما قالت لا وضحك بسخريه
كان يتكلم ويستهزئ فيني كلهم يسخرون مني كلهم ينبذوني أكره الناس كلها ... تكلمت بصراخ : انت انكتم وحط الزفت بحلقك فاهم
وأخذت نفس وأنا أحس حالي مخنوقة مقهوره من العالم
رد الشاب : هي هي احترمي نفسك واعرفي تكلمي مع الأكبر منك زين فاهمه
انقهرت كلهم يرددون نفس الكلمه فاهمه فاهمه فاهمه فاهمه وبصراخ وبدون وعي : لا مو فاهمه وانقلع من هنا وبصراخ أعلى تفهم
ونزلت رأسي على ركبي وأنا أبكي خلاص مو قادرة اتحمل أكثر قرفت حياتي... ووقفت ومشيت من جنبهم بسرعة وتعديتهم كم خطوة سمعت الشاب يقول لأبوه : شكلها بزر
لفيت عليه وبتهديد : انكتم
وابتعدت عنهم ودموعي تنزل مو عارفه السبب مخنوقه يا ناس
كنت امشي وعيوني بالارض مو عارفه وين اروح بس فجأة وقفني صوت صقر : ريم
التفتت للصوت تقدم مني صقر لما تأكد إني ريم وبقهر تكلم وهو يمسك يدي : وين انقلعتي
حاولت افلت يدي منه بس شد على قبضة يدي : تكلمت بهدوء وحاولت يكون صوتي طبيعي : لفيت على المحلات اشحد منهم فلوس علشان اشتري عبايه وبعصبيه ما تحركت من مكاني ....مكان ما تركتنا رفضوا البنات اروح معهم... وما معي ريال واحد اشتري شيء
صقر بهدوء : طيب ليه رفضوا يعني ما طولتي لسانك عليهم ؟؟؟
بصراحه قهرني ليه دائما يحطون مني الغلط يا قمة الغباء الي فيني.... يعني حفيداتهم اكيد رح يصدقونهم  وأنا بحريقه ما أحد سأل عني... صاارت دموعي تنزل وما رديت عليه لأني لو رديت بكلمه رح انفجر بالبكاء
صقر بهدوء : مع اني متاكد من لسانك الطويل بس هذا مو سبب يخليهم يتركونك هنا لوحدك.... الحين تعالي معي اشتري لك.... والبنات حسابهم بعدين وسحبني معه
ودموعي ما وقفت ..دخلنا أحد المحلات ...وتكلم عمي مع صاحب المحل وخلال دقايق صار يعرض لنا اشكال والوان
ما كان لي نفس اشتري او حتى أناظر أي شيء وخاصة مع الغشوه مو شايفه شيء
كان صقر يناظر بالعبايات ويختار ولا كأني موجوده يأخذ رأيي
أخذت نفس وأنا أحس نفسي مخنوقه كلما طال الوقت يضيق النفس عندي خلاص مو قادره اتحمل اكثر مخنوقة.... صرت أخذ النفس بصعوبه..وأنا حاسه روحي رح تطلع ...صار التنفس عندي سريع
بعد دقائق سمعت صقر يقول يالله ....مشيت خلفه وانا مو قادرة خلاص انخنقت
وبصعوبه وصلت السياره كانوا البنات ينتظرونا فيها ودخلت من الخلف وأنا  أحس نفسي انتهيت....
روحي احسها قربت تطلع غمضت عيوني بألم خلاص رح ارحل عن ذي الدنيا وما في أحد رح يفقدني ويحزن علي
مالي ام تفقدني وتبكي علي مالي اب يحضني وأنا بالكفن ويقولي رح أفقدك يا ابنتي ما لي أخ ما لي اخت تفقدني
كلهم رح ينبسطون ويرتاحون ويمكن يعملون حفله إنهم ارتاحوا مني وخاصه جدتي الي تكرهني من طفولتي وتحاسبني بذنب انا ما اعرفه اخذت نفس كلهم رح يفرحون وأخذت نفس ثاني مو قادره خلاص انخنقت مين رح يبكي علي ويرثيني ااااااااه .... تذكرت زياد معقول يفقدني وهو ما يعرفني كلهم مثل بعض كلهم يكرهوني حطيت يدي على صدري وانا اتنفس بسرعه خلاص ذي أنفاسي الأخيرة
كانوا يتكلمون ويضحكون بس ما سمعت شي من كلامهم اوجاعي كانت اقوى.... تذكرت صلاتي وتندمت على تركها كيف الاقي ربي وأنا كل حياتي معاصي أخذت نفس وصرت اتنفس بسرعه أكبر وقفت السيارة ونزلوا البنات... نزلت بشويش وانا حاطه يدي على صدري احاول استنشق الهواء بصعوبه
خلاص ما أقدر أمشي اكثر انخنقت وصارت الدنيا حولي ظلام وسقطت على الارض
*
*

*
*
*
*
نزلوا البنات إلا ريم متاخره عنهم وتمشي ببطئ قفلت السياره وناظرت البنات صاروا قريب الحديقه وريم بعدها خطوتين كنت ودي أقول لها تستعجل بس تفاجأت لما شفتها وقعت على الارض
ركضت بسرعة بخوف ورفعت الغطاء عن وجهها كان وجهها ازرق ما في حياه حطيت يدي على نبضها كان ضعيف جدا وبسرعه حملتها وبسرعة حركت وتوجهت للمستشفى باقصى سرعة .......

*
*
*
*
*
دخلوا البنات بيت الجد وكان الجميع مجتمع بالمجلس دخلوا البنات بعد ما ردوا السلام وجلسوا بمكانهم المخصص
الجده بابتسامة : كملتوا اغراضكم
روان بفرح : ايوه الحمد لله كملنا
التفت الجد للبنات : وين صقر وريم ما اشوفهم ؟؟؟
لينا : عمي صقر كان خلفنا وريم كمان خلفنا الحين يدخلون
بعد مرور خمس دقايق وقف الجد وهو يؤشر لعبود : روح شوف عمك صقر بالخارج
قام عبود وبعد دقائق،رجع وناظر جده وكان صوته غليظ : ما في احد بالخارج حتى سيارته مو موجودة
عقد الجد حواجبه : طيب ريم وين وطلع الجوال من مخبأه ورن على صقر بس ما في رد عقد حواجبه  وناظر اولاده صقر ما يرد
نواف يناظر جده : الحين ارن عليه
ورن نواف بس صقر ما يرد
استغرب وصاروا الشباب يرنون على صقر بس ما فيه رد
وللي زاد استغرابهم وخوفهم على صقر اختفاء ريم .........
وصل صقر المستشفى وبسرعة حملها على الطوارئ بعد ما دخلوها العنايه المركزه دخل صقر عليها كان وجهها ازرق وشاحب وكمامه الاكسجين على فمها والابر مغروزه بيدها تنهد وطلع لمكتب الدكتور وجلس معه وبعد ما سأله صقر عن حالتها
رد الدكتور بهدوء : البنت متعرضه للاختناق بس ما في علامات تدل انه احد خنقها او حاول انه يخنقها
تذكر صقر الغشاوه وإنها عندها ضيق بالتنفس وشد على يده بقهر وهو يلوم نفسه إنه السبب
وبعدها ناظر الدكتور :تتوقع يصير عندها اضرار
الدكتور وهو يعدل نظارته : شوف يا دكتور صقر للحين ما عرفنا درجه الضرر وان شاء الله ما يكون فيها إلا العافيه
وقف صقر : إن شاء الله واستأذن من الدكتور وطلع تذكر جواله فتحه وجد 50 مكالمه من إخوانه وأبوه والشباب تنهد واخذ نفس ورن على ابوه ........

*
*
*
*
الكل جالس ومحتار وخايف وخاصة الجده ما خلت فال شين الا حطته وهي تدعي ربنا يرجع لها صقر
فجأة رن جوال الجد للي فوق الطاوله وبسرعة تناوله وناظر الاسم
وبعصبيه وصراخ : انت وينك ؟؟؟ ...........ليه بالمستشفى .........
الكل ناظر وعلامات الخوف على وجههم
وش فيها ريم ؟؟؟..........
الكل تنهد براحه انه صقر بخير
طيب ليه ما خبرتنا ............لو بسيطه ما يحطونها بالعنايه المركزه .......
الكل استغرب العناية المركزه
طيب الحين أنا جاي ........طيب خلصنا .......مع السلامه
قفل الجد الخط بعصبيه ووقف
ابو سليمان بهدوء : خير يبه وش فيه صقر ؟؟
الجد وهو يمسح على وجهه : والله ما ادري بالضبط يتكلم وصوته يرتجف يا دوب فهمت عليه كم كلمه يقول ريم بالمستشفى حاطينها بالعنايه المركزه الله يستر
وقف ابو سليمان : يالله عالمستشفى وأشر لفيصل للي ما كان وده يقوم ونايف للي كان وده يعترض بس أعطاه ابو سليمان نظره خلته يقوم بالغصب
طلع الجد واولاده كان نواف وسليمان يبغون يروحون بس الجد ما خلاهم ......
بعد ما طلعوا التفتت الجده على البنات : علامها ريم صار شي بالطريق ؟؟
البنات ناظروا بعض وبعدها تكلمت روان،: ما صار شي يا جده يمكن دلع
الجده وهي تهز راسها : وانا اقول كذا اكيد دلع
وكملوا سهرتهم البنات يحشون بريم وساعة يتكلمون عن الملكه والتجهيزات

*
*
*
بعد ما خرج الجد من غرفة ريم شد على قبضة يده بقوه وهو يحس انه السبب لو صار شي لها ما رح يسامح نفسه لأنها
خبرته بضيق النفس عندها بس ظنها إنها تمزح معه وحجه منها حتى ما تتغطى
واصر عليها تلبس خوف عليها لأنه بنظره فتاه صغيره وبهذا الجمال ما يحميها من الذئاب الا الحجاب
حتى انه رفض تلبس نقاب لجمال عيونها فما وجد طريقه لحمايتها الا تغطي وجهها كامل بس
ما توقع يصير كذا مع ريم حمد الله بقلبه على سلامتها بعد ما تطمئن من الدكتور عن وضعها
وحمد الله انه صقر ما تأخر بعد ما فقدت وعيها والا كان صار عندها مضاعفات
واكمل طريقة بالممر وهو يحمد الله وتوجه خارج المستشفى
كان نايف وصقر وفيصل وابو سليمان ينتظرونه عند السياره بعد ما تطمنوا على ريم خرجوا واصر الجد يجلس عندها لوحده وينتظرونه بالخارج
وصل الجد عندهم بعد ما رد السلام
ناظرهم بهدوء وناظر نايف وهو يتأمله سبحان الله من كان يتوقع نايف العصبي المغرور يبكي وعلى مين على ريم
لمح الجد نايف وهو يبكي بغرفة ريم
بس مستحيل نايف المغرور يظهر ضعفه لازم يلبس قناع عدم المبالاه... يطقطق بالجوال ويظهر عدم المبالاه للي حوله...
ابو سليمان بهدوء : توكلنا على الله يبه
هز الجد راسه بالموافقه وتوجهوا للسياره
كلهم بسياره فيصل والصمت سيد الموقف
الا صقر رجع بسيارته لوحده ........

*
*
*
*
دخلوا المجلس وكان ما فيه غير الحريم والبنات وبعض البزران
جلس الجد بمكانه المعتاد وتنهد بتعب وبعد دقايق دخلوا الشباب
الجده بكره وهي تسأل الجد : عساها ماتت ان شاء الله ؟؟؟
ناظرها الجد نظره ناريه : اسم الله عليها ربي يحفظها من كل سوء وأعطى الجده نظره وعيد
سليمان بهدوء يناظر جده واعمامه : ليه دخلوها المستشفى ؟؟
كانت سديم جالسه وحاسه بنار الغيره ليه يسأل سليمان عن ريم
الجد بهدوء : البنت عندها ضيق بالنفس من زمان وخبرتنا بس ما اهتمينا للموضوع
ولما تغطت بالسوق لمده طويله اثر عليها وأصابها اختناق
الجده وهي ترفع حاجبها بتشكيك : يمكن عملت ذي التمثيليه علشان ما تتغطى
وقف الجد بعصبية وهو يناظر زوجته: وبعدين معك لازم اخذتك يا دكتوره علشان تقيمين حالتها اذا صادقه او لا
بعدها زفر بقهر وهو يعد على اصابعه: الدكتور محمد اخصائي وابنك نايف شافها وابنك صقر شافها والدكتوره نسرين شافتها وكلهم يقولون حالتها سيئه الا انت مو مقتنعه؟!!
عمرك ما اقتنعتي ما علي منك!!!
ويكون بعلم الجميع ريم ما رح تغطي وجهها لا هنا ولا بالسوق ولا بالمدرسه وخلي واحد منكم يعترض والا يسمعها كلمه ويضايقها وقسم بالله ليندم وطلع من المجلس بعصبية ......
الجده بقهر وهي تناظر اولادها : اعوذ بالله حريقه ابوكم.... تقول إنها بنت ساره سحرته... حسبي الله عليها
الجده بقهر ناظرت نايف : وانت ما لك كلمة على ابنتك كيف تقبل تطلع كذا ....والا بس تنفذ كلامك على سلمى ولينا والفرعون ريم ما تقدر عليها
اخذ نفس نايف وهو يحاول يضبط أعصابه وما يزعل امه : اتوغقع إني تبريت منها فلا توجهي الكلام لي عندك اعتراض قدميه لأبوي وبعدها وقف والتفت لساميا : يالله يا ام سيف
وبعدها طلع هو وبناته وأولاده من المجلس ........
ناظرت الجده ابو سليمان بقهر : يالله قوم اطلع انت الثاني علشان ريموووووو حسبي الله عليها
وقف ابو سليمان وناظر امه بهدوء : الحين رح اطلع مو علشان ريم وبابتسامه علشان أنام تأخر الوقت وأشر لأم سليمان .........

*
*
*
*
الساعة 7.00 ص تحسن وضع ريم ونقلوها لغرفه ثانيه
فتحت عيوني بتعب وحاسه جسمي مكسر غمضت عيوني اتذكر وش للي صار أخذت نفس وفتحت عيوني بعد ما تذكرت
مع اني توقعت إنها النهايه قطع علي دخول جدي بعد ما طرق الباب
توجه لناحيتني قبلني على رأسي وبابتسامه : الحمد لله على سلامتك
ناظرته دايما جدي متقلب احيانا يكون طيب معي وأحياناً يكون معصب ابتسمت ابتسامه باهته كلها تعب
مسح على شعري وهو جالس على الكرسي بجانب السرير : كذا خوفتيني عليك يا لعابه
رديت بصوت متعب : من متى أهمك حتى تخاف علي غريبه تنكت على الصبح يالشايب
ضحك جدي بصوت عالي واستغربت الظاهر إنه مروق عالأخير وبعدها ناظرني وما زالت البسمه في ثغره : رح أسامحك هاذي المره علشان إنك تعبانه المره الجايه اذانك اقطعهم إذا قلت عني شايب
ناظرته وأنا أقرص عيوني : الظاهر إنك مروق يالشايب
اقترب مني وشد اذني اليمين عالخفيف : لا تخليني اقطعها وبعدها ابتسم وهو يمد  الهديه للي احضرها لي
تكلم بفرح : جبت لك هديه ان شاء الله تعجبك
رديت بهدوء : مشكور وسكتت لثواني وسألت متى رح اطلع من هنا
الجد باهتمام : ان شاء الله اليوم بس اي ساعة ما أدري بالضبط يمكن الظهر
سألت جدي بتردد : ءءءءء اممممم وبعدها ناظرته خبرت خطيبي ييجي يزورني وابتسمت باحراج بس
نقزت على صوت مستحيل أنساه: أنا اليوم رح ادفنك هنا وأحطك بثلاجه الموتى يا قليله الحياء
التفت جدي خلفه وبابتسامه : هدي أعصابك يا فيصل ذي البنت وجهها مغسول بمرقه ما تستحي وبعدها ناظرني بس يالله نمشيها لك لأنك مريضه وش رأيك يا أبو خالد
فيصل وهو يقرص بعيونه ويناظرني بوعيد : بس لأنك مريضه رح اطنش ولا كأني سمعت بس مره ثانية رح أدفنك بمكانك وبأسلوب أمر اثقلي وخليك راكزه
هزيت رأسي بهدوء وحاسه بالعبره خانقتني ما أحد زارني إلا جدي وعمي فيصل المفروض ابوي يكون فوق رأسي وأمي مرافقه عندي بس وش أقول
ناظر عمي فيصل الساعه وبعدها ناظر لجدي : يالله يبه تأخرنا على الشركه ...
رد جدي وهو يوقف : الله يسامحك سمعتني الأسطوانة ذي قبل ما ندخل والله أعرف إنك مستعجل
فيصل وهو عند الباب : قلت لك أجل الزيارة بعد الظهر بس ما سمعت كلامي
وقف جدي بابتسامة : يالله الظهر إن شاء الله أمر عليك
وبعدها توجه لعند الباب وهو يكلم عمي فيصل : قلت لك لا ترتبط بي كان سبقتني للشركه....
وبعدها غابت أصواتهم عن أذني اخذت نفس وغمضت عيوني بقوه لعل وعسى أدخل عالم الأحلام

*
*
*
*
*
*
كان جالس بمكتبه دخل عليه صقر بعد ما رد السلام
وجلس على الكنب مقابل المكتب ومد يده على الكنبه وهو يناظر نايف وبعدها تكلم بهدوء : زرت ريم ؟؟
نايف يرفع حاجب وهو عافس ملامحه : اذا ودك تفتح محاضرات تراه الباب يوسع جمل وأشر على الباب
وبعدها حط يده على رأسه :تراه رأسي مصدع مو رايق لمحاضراتك
ومسك ورقه من على الطاوله وصار يقرأ فيها
تنهد صقر وهو يناظر الارض وبتساؤل : نفسي اعرف وش تفرق ريم عن أولادك ؟؟ ليه تعاملها كذا ؟؟ وبقهر رفع رأسه وناظر نايف: بالله عليك لو سلمى أو لينا أو سيف بالمستشفى ما تزورهم ؟؟
ورفع يده:  لا تجاوب واشر على نفسه : أنا أجاوب عنك لو سلمى تدخل المستشفى رح تنام وتصبحى عندها وما تفارقها
رفع نايف نظره عن الورقه وببرود : جاوبت بنفسك
صقر بعصبية : طيب ليه وش تفرق عنهم ؟؟
رفع نايف حاجبه وببرود يقهر صقر وببطئ تكلم : الفرق إنه سلمى ولينا وسيف ومحمد أولادي اما ريم بنت ساره
هذا الفرق بس وشد على حرف السين
وقف صقر بعصبية : انت حرام تكون اب
نايف ببرود :،لا تفتي على كيفك واعطاه نظره حاده
وبعدين لا تنسى إنك كنت سبب رئيسي بمرض ريم رب العالمين لطف وإلا كانت بعداد الموتى وبحده ناظر صقر والسبب انت
صقر وهو يناظره ويحط يده على صدره : انت قد الكلام هذا للي تتهمني فيه ؟؟
نايف يمسك ورقه ثانيه : لو ما كنت قده كان ما قلته
طلع صقر من المكتب وهو عازم ينفذ للي بباله
طنش نايف صقر ورجع للأوراق الي قدامه
*
*
*
*
بعد الظهر على الساعة 2.00
لبست الشيله وكنت على وشك احط الشيله على وجهي
بس مسك يدي جدي وبهدوء : خلاص ما له داعي
صحتك اهم بس اهم شي عباتك ذي ما تلبسينها
ناظرته بغباء : يعني بس هنا وبالبيت وبالمدرسه اتغطى ؟؟؟
تنهد جدي وبعدها ناظرني : يا بنت الحلال خلص غطاء ما في الا لما يتحسن وضعك والدكتور يسمح لك فهمتي الحين
هزيت راسي بالموافقة وابتسمت ومسك جدي يدي
وتوجهنا خارج الغرفه نزلنا بالمصعد وبعدها وقفنا عند الريسبشن ما ادري ليه
بعدها بدقايق شفت صقر ومعه نايف ابوي وصلوا عندنا تكلموا مع جدي بس بصراحه جرحوني ولا واحد منهم قال لي الحمد لله على السلامة
طنشت تجاهلهم لي وبعد دقيقة تقدم منهم سليمان
سلم على الموجودين وبعدها ناظرني بدهشه نغزه صقر بكتفه بعدها نزل نظره وسأل جدي وهو يحك ذقنه : ما اذكر يا جدي عندك بزران ؟؟ وغمز لجدي
ابتسم جدي : اخر هالعمر ربي رزقني بأحلى بزر تملي علي حياتي ولف لجهتي وابتسم صح يا ريم
سليمان رفع حاجب بتشكيك : قول انك متزوج يا جدي ودك تقنعني انها ذي ريم... ذي بزر صغيره
رد جدي وهو يحط يده على كتفي ويقربني منه استحيت واحس خدودي طماطم: واحلى بزر
فكيت يده عن كتفي بقهر : ماني بزر انا مخطوبه يعني كبيره
ناظرني سليمان بتهديد : باحلامك تتم الخطوبه انا اقول يا جدي بكره تطلب الطلاق من زياد هذا الناقص نزوج بزران والناس تتكلم علينا وبعدين ليه تزوجها غريبه واولاد عمها وش كثرهم
جدي بحزم وهو يمسك يدي وهو يناظر سليمان : هذا الموضوع منتهي البنت عقدت ما حد له دخل بالموضوع لو كلامك صحيح ما تركتوها تروح للغريب وانت فاهم قصدي
وبعدها استأذن جدي وهو ماسك يدي بقوه
وتوجهنا خارج المستشفى وانا احس بالقهر وش دخلهم حتى يلغون الخطبه ذي حياتي وانا راضيه وعضيت على شفايفي بقهر من ابوي لانه وجوده وعدمه واحد
*
*
*
*
*
بالكفتيريا وهو يعض على اصابعه بقهر : كيف جدي يزوجها بعدها ذي صغيرة
صقر وهو يقرص عيونه : صغيره
سليمان بلعثمه : هاه لا
حك راسه بتوتر وبعدها استدرك الوضع وكمل اقول لك صغيره بزر الله يصلحك انت وتفكيرك وبعدين اولاد عمي اولى بها من الغريب
صقر بجديه : وش للي مضايقك البنت راحت بنصيبها لا تتدخل بامور ما تعنيك
سليمان بعصبية : كيف ما تعنيني ذي بنت عمي
صقر وهو يشرب العصير ببرود : الحين اكتشفت انها بنت عمك وينك عنها صار لها اسبوع مخطوبه الحين بس تذكرتها والا علشانها
وسكت صقر
سليمان يرفع حاجب : وش تقصد كمل كلامك
صقر بلامبالاه : خلص انسى واتمنى انك ما تتدخل بموضوع ريم اختصار للمشاكل
ناظره سليمان وهو يتوعد بداخله اذا ما خرب الموضوع ما يكون سليمان .........

*
*
*
*
*
اول ما دخلنا البيت كان هادي توجهت لغرفتي بسرعه
ما لي خلق لمشاكل مع جدتي دخلت الغرفه وقفلت الباب بالمفتاح وبدلت العبايه ورميتها على الارض ورميت بنفسي على السرير حاسه جسمي مكسر
ودخلت بعالم الاحلام حتى اهرب من الواقع .......
بعد مرور وقت من النوم فتحت عيوني وسمعت اذان العصر
جلست على السرير بتعب وتذكرت البارحه الاختناق لو ما كنت اصلي كيف الاقي ربنا نويت اقوم اصلي بس
عفست ملامحي ما اذكر كيف الصلاه
وحكيت راسي بندم لو اروح اسأل حد بالبيت اكيد رح يتمسخرون علي
خلص من الاسبوع الجاي رح اصير اصلي واسال معلمه التربيه الاسلاميه عن الصلاه واقنعت نفسي
بهذا العذر ....
"وقفه"
قال الغزالي : إن التسويف يسبب أربعة أشياء :
1- ترك الطاعة والكسل فيها
2- وترك التوبة وتأخيرها .
3- والحرص على الدنيا والاشتغال بها .
4- وقسوة القلب ونسيان الآخرة .
وقال الحسن :إياك والتسويف ، فإنك بيومك ولست بغدك،
فإن يكن غداً لك فكن في غد كما كنت في اليوم ،
وإن لم يكن لك غد لم تندم على ما فرطت في اليوم .
فكم اضعنا صلاتنا وصيامنا وارتكبنا المحارم وعذرنا نقول باكر نتوب
غدا سوف اصلي
غدا سوف ابر بوالدي
غدا سوف اترك المعاصي وكل المحرمات
غدا سوف اصوم
غدا سأرتدي الحجاب
غدا غدا غدا غدا غدا غدا غدا غدا غدا غدا غدا غدا غدا غدا غدا غدا غدا غدا غدا هل يا ترى هل تضمن ان تعيش ليوم الغد ..........
في اليوم الثاني ما داومت بالمدرسة وتحسنت صحتي كثير ومع الادويه ناظرت وجهي كانت خدودي لونها زهر وناظرت عيوني سبحان الله كل البنات بالمدرسة يقولون لي عيونك ملونه مع انه عيوني لونهم عسلي مثل جدتي ام محمد عيونها مثلي لوزيات
كان الوقت العصر فقررت اطلع من غرفتي اغير جو
وقبل ما اطلع
غيرت ملابسي ولبست شورت كابوي لنصف الساق لونه اسود ولبست بلوزه بيضاء حفر عليها بعض الرسومات الكرتونيه وتركت شعري سايح على طوله وحطيت طوق لونه ابيض وعليه ورده لونها اسود
وطلعت من غرفتي وتوجهت للبلايستيشن بعد ما اخذت الوصله وبيدي اليمنى عصير سن توب وتربعت على السراميك كان لونه اسود حطيت علبه العصير على الارض
وبدأت العب حتى انسى تعبي
سمعت صوت من خلفي : قال مريضه يالكذوب ضحكتي على جدك وعملتي هالتمثيليه والمسكين
صدق كذبك
وقفت اللعبه والتفتت عليها وغمزت لها بابتسامة : كيف براعتي بالتمثيل وسبلت عيوني بدلع
اقتربت جدتي مني ومسكت شعري وشدته : ليه لابسه ذي البروكه ؟؟
حاولت ابعدها عن شعري بس كانت تشد بقوه وبعدها تركت شعري وعلامات القهر بوجهها
وبعدها نزلت بقهر .....
رتبت شعري حسبي الله وجعتني كله غيره من شعري قال ليه حاطه باروكه
وبعدها رجعت اكمل اللعب وبعد نص ساعة حسيت بحركه بالصاله
التفتت شفت زول صغير دخل غرفتي وبسرعة وقفت وتوجهت لغرفتي ولما دخلت
شفت طيف كانت لابسه فستان زهر خيط ساده ورابطه شعرها ذيل حصان
ناظرتها وهي مو منتبه لي : وش عندك هنا يا طيف ؟؟
لما سمعت صوتي نقزت وبسرعة تناولت علبه العصير للي على الطاوله وهربت
انا جن جنوني عند عصيري المفضل ما اسمح لأحد يشربه او يلمسه
واركض خلفها مثل المجنونه وانزل الدرج درجتين درجتين بس الدبه لفت من خلف الدرج ولحقتها بس طلعت لبرا وانا نسيت نفسي ولحقتها بدون وعي دخلت المجلس
وما انتبهت للموجودين وبصراخ وانا اركض وراها : يا حيوانه هاتي العصير
ركضت طيف عند عمي فيصل وجلست بحضنه
انقهرت منها مسكت شعرها وشديته...ما انتبهت لنظرات عمي كان كل همي اخذ العصير
لما شديت شعرها ارخت يدها وبسرعة سحبت العصير وابتعدت عنها وبابتسامه نصر : علشان ثاني مره تسرقين مني العصير
سكتت لثواني وانا اشوف نظرات عمي النارية استغربت وناظرت جهة اليمين شفت زوجات اعمامي وجدتي للي تناظرني بقوه وفاتحه فمها
استغربت ليه يناظروني كذا ناظرت جهة اليسار وكانت الصدمه
كل الشباب موجودين
بصراحه صدمه وكرده فعل حطيت يدي على فمي وشهقت وخلال ثواني نطيت خارج المجلس وبسرعه
ركضت على غرفتي وقفلتها بالمفتاح
يا ويلي من عمي فيصل لا بالله اليوم رح يصلون علي الجنازه
وبعد دقيقتين طق الباب بقوه وبسرعة بعدت عن الباب ونقزت وانا قلبي طبول
وللي زاده صراخ عمي فيصل : افتحي يا قليله الحيا
وبصراخ وهو يضرب على الباب بقوه افتحي
اذا ما دفنتك اليوم ما اكون فيصل
تركته يصرخ ويضرب على الباب وما حبيت اتكلم لانه اذا قلت كلمه زياده اتوقع رح يكسر الباب ويدفني
بعد عشر دقايق الظاهر انه مل وراح وهو يتوعد بي
اخذت نفس براحه بعد ما راح
وحمدت ربي انه جدي وعمي صقر مو موجودين ولا ابوي اففففف الحمد لله

*
*
*
بعد ما ركضت ريم برا المجلس وقف فيصل والتفت للشباب بنظرات ناريه
وطلع من المجلس وعيونه حمراء من العصبيه
الجده بحقد : حسبي الله عليها داخله لا حيا ولا خجل
سامي : جده مين ذي البنت
الجده بكره : مين غيرها بنت ساره حسبي الله عليها
ام خالد تكلم الشباب : الله يرضى عليكم اطلعوا قبل ما يرجع فيصل ويقلبها نكد
وقف عمر ولوى بوزه : واحنا وش دخلنا يعني حنا قلنا لها اطلعي كذا
ضربه نواف على كتفه: اقول امشي قدامي
وطلعوا الشباب من المجلس بهدوء
ساميا وهي رافعه حاجبها وملامح الاستغراب على وجهها : ذي ريم ؟؟
الجده بدون نفس : ايه ريم
ساميا : ما شاء الله عليها ربي يحفظها من العين
خزتها ام سليمان بقوه : تلاقينها حاطه 10كيلو مكياج ومركبه باروكه
الجده بكره تتكلم عن ريم وهي تناظر ام سليمان : ما هي باروكه انا شديت شعرها بيدي اليوم شعرها طبيعي حتى شفتها من قريب ما هي حاطه مكياج
ام خالد بكره : طيب كيف اول يوم جت فيه كان وجهها اسود
الجده : خبرني ابو سلمان انه ريم كانت حاطه على وجهها كريم ما ادري وش هو مسمره نفسها حتى اخذ منها العلبه ومنعها تحط منه
ساميا باستغراب : طيب ليه عملت كذا ؟؟
الجده بضيق : وجعتوا لي راسي بكثره اسئلتكم روحي عليها هالمقروده واسألوها
وبعدها دخل فيصل ومولع على الاخير توجه للكنبه وجلس عليها وهو يهدد ويتوعد بريم

*
*
*
*
كان الشباب متوجهين لمقرهم بالحديقه بدر وهو يصفق يده : مو مصدق انها ريم ...ذي صغيرة
نواف بدون نفس : بلاه تصدق
جلسوا على الارض وتكلم سليمان بقهر : عاجبكم بنت عمكم تطلع للغريب وانتم ولا على بالكم
عمر : وش ودك ايانا نعمل البنت ملكت وانتهى الموضوع
سليمان بقهر وهو يناظر للبعيد : مين قالك انه الموضوع انتهى وبعدها التفت للشباب لازم ريم تتطلق منه وواحد منكم يخطبها
عبود بحماس : انا اخطبها
طقه سليمان على راسه بالخفيف :،انت بعدك صغير ابغى واحد من الاربعه
نواف او بدر او عمر او سامر واحد منكم لازم يخطبها
رد بدر وعمر بنفس الوقت : انا اخطبها
ناظرهم سليمان : واحد منكم تنازلوا
بدر بحده : انا قبلك تكلمت
عمر بجديه : لا انا قبلك تكلمت
وناظروا بعض بقوه
سليمان يهدي الوضع : حنا جينا ننتفاهم مو نتشاجر
وبعدها ناظر نواف وسامر : وش رايكم ؟؟
سامر بابتسامة : فكره مو شينه البنت بحياتي ما شفت بجمالها ونعومتها بس المشكله مع امي ما رح توافق
سليمان : ما عليك من امك وبعدها التفت على
نواف : وش رايك ؟؟
نواف بهدوء : البنت صغيره واحسها ما تناسبني ابد وبعدين قريب افكر اتزوج وريم بعدها صغيرة ما تناسبني لو كانت كبيره والله ما احد يحلم فيها منكم
بس حظكم البنت صغيره.....
سليمان وهو يكش عليه : يا رجال البنت اخرها تكبر
نواف باعتراض : وافرض انها ما كبرت وظلت قصيره
لا لا ما ابغى
سليمان : بكيفك يعني الحين صرتم ثلاثة واحد منكم
يتنازل لثاني علشان لما نخبر جدي نحدد واحد مو الثلاثه
طبعا الشباب كل واحد راكب راسه ومو راضي يتنازل
عمر بقهر لبدر : مو كنت ودك تخطب سلمى ليه هونت الحين
بدر يحط اصبعه على راسه : بكيفي ما ابغى سلمى ودي اخطب ريم
احتدت ملامح عمر ونزلوا الاثنين ببعض شتم
سكتهم سليمان ونواف : الحين من وانتم صغار صحبه والحين تتشاجرون على بنت
بدر بقهر وقف : ما اتشرف بصحبته
وقف عمر وبعصبيه : انا للي ودي اموت علشان اصاحبك يا فاشل يا اناني كل شي تاخذه مني واسكت لك بس ذي المره حامض على بوزك تفهم
عصب بدر وضرب عمر بوكس على بطنه ويرجع عمر ويضربه بكس على وجهه ويهجمون على بعض
وبعد تدخل ابو سليمان للي كان مار بالصدفه وشافهم
فرق بينهم وبقهر : انتم الاثنين تتشاجرون انتم اولاد عم وطول عمركم صحبه ومثل الاخوان
علموني وش المشكله ؟؟
نواف يستدرك الموضوع ويغطي عليه : موضوع تافه كل واحد يقول انه الصادق والثاني كذاب وكذا من ذي السوالف حتى تشابكوا مع بعضهم
ناظر بدر الموجودين وبعدها ترك المكان بزعل
ناظرهم ابو سليمان بهدوء : الله يصلحكم ثاني مره يا ويلكم اذا تكررت ذي الحركه
وبعدها ترك المكان
وبعد دقايق ناظر سليمان عمر : عجبك كذا ؟؟
عمر بقهر : بدر اناني مستحيل احط عيني على شي الا ياخذه مني ودايما اطنش واسكت بس ذي المره يحلم انه اسكت له

*
*
*
بعد الموقف جلست بغرفتي يومين مقفله الباب
حتى المدرسه معطيتها طاف واليوم الخميس عطله قررت اطلع من الغرفه
لبست عبايه من للي اشتراها صقر وكانت كبيره خلعتها والقيتها على الارض بتأفف
بحثت بالعبايات للي اشتراها صقر وجدت عبايه مفتوحه من الامام و لها كباسات وحجمها مناسب
لبستها بسرعة ولفيت الطرحه على راسي وطلعت
خارج الغرفه
وتوجهت للدرابزين ونزلت اتزحلق عليه
وبعدها توجهت للصاله الداخليه دخلت ما كان في الا جدتي
دخلت وبابتسامه : حيالله عجوز النار
ناظرتني جدتي بحده : عجوز بعينك يا قليله الحيا
تقدمت وجلست جنبها وبستها على خدها : امواح
ابعدتني وصارت تمسح وجهها وهي منقرفه
ابتسمت : لا لا تمسحي الوان الطيف الحين تروح وضحكت ههههههه الله يسامحك عجوز وبعدك
تلونين وجهك
وبعدها وقفت وخلعت العباية والشيله وحطيتهم على الكنبه
كنت مسرح شعري جدوله ولابسه بنطال برمودا لونه
نهدي غامق وبلوزه اكمامها قصيره...
جلست بابتسامه : اقول انت وش اسم ابنك الكبير
ناظرتني وهي تقرص عيونها : سلمان
.ابتسمت : حلو خلص رح اناديك بدل عجوز النار ام سلوم كيف حلو صح
ناظرتني جدتي ولوت بوزها وما ردت
كلمتها : ما علينا يا ام سلوم المهم تدرين انك حلوه بس تخربين نفسك بالالوان للي حاطيتها على وجهك
عصبت جدتي : يالي ما تستحين
قاطعتها : ليه عصبتي وانا صادقه بكره هالشايب يروح يتزوج عليك لما يشوف ذي الالوان مو كذا ينحط المكياج
جدتي بسخريه : للي يسمعك يقول فاتحه صالون تجميل وباسلوب نهر فارقي عن وجهي فارقي
دخلت ام خالد : سمعتي وش قالت لك فارقي قبل ما انادي عمك فيصل تراه متحلف فيك
رديت ببرود : عادي ناديه شفته لما طلع قبل شوي وحركت حواجبي
وبعدها التفتت على جدتي : هاه وش قلتي يا ام سلوم وش رايك احط لك مكياج وخالتي ام خالد الحكم
الجده بعصبية : قلت لك فارقي تراك رفعتي لي ضغطي افففففف
ام خالد بسخريه : هذا للي ناقص بزران يحطون لك مكياج
وقفت بتحدي : لا تستهينوا بقدراتي واتحداكم
وناظرتهم بحماس الحين احط لجدتي مكياج اذا عجبكم والكل مدح المكياج اصير صديقتكم وما تطردوني
واذا الكل ما عجبه لكم شرطين وانا انفذهم
كانت جدتي ودها ترفض بس قاطعتها ام خالد : خالتي اكيد ريم خسرانه ليه ما نكسب من وراها شروط ونطلعهم من عيونها
جدتي بتفكير : اممم خلص موافقه
قفزت بحماس يالله يا ام سلوم على غرفتي
*
*
*
توجهنا لغرفتي وفتحت الباب ودخلت جدتي وام خالد شهقت : ليه غرفتك كذا ؟؟
ناظرت الغرفه كانت معفوسه حكيت راسي باحراج : بعدين ارتبها
قفلت الباب وطلبت من جدتي تغسل وجهها وتحط مزيل المكياج
وطلبت من خالتي ام خالد تجلس على السرير وما تناظرنا
وطبعا اول شي بديت بشعر جدتي سحبته وبعدين سرحته بطريقه تناسب عمرها
وبلشت اطرش وجهها وانا ابتسم وجدتي تتوعد في اذا عجبت عليها
وبعد مرور من الوقت كملت وعملت اللمسات الاخيره على شعرها
وابتسمت: كملت يا ام سلوم
كانت جدتي ودها تناظر نفسها بالمرايه بس ما خليتها ولبست عبايتي والشيله
وطلبت من ام خالد تشوف جدتي فتحت فمها وهي مندهشه
جدتي تسأل ام خالد : قولي لي كيف وجهي اخاف عجبت علي قليله الحيا
ام خالد باندهاش : يا مقروده وين تعلمتي كل هذا
ابتسمت وغمزت لها : سر المهنه
ام خالد : تدرين خالتي خلص ما رح اقول لك تعالي ننزل تحت ونشوف ردت فعل الجميع الحين تلاقينهم بالمجلس
كانت جدتي ودها تعترض بس مسكتها ام خالد من يدها وسحبتها خارج الغرفه
طبعا وبسرعة لحقتهم

*
*
*
*

دخلنا المجلس واول ما دخلنا كانت النظرات على جدتي والكل مستغرب شكلها
دخلت بابتسامة وناظرت جدي : كيف العروس واشرت على جدتي
ناظر جدي جدتي بمرح : والله بالبدايه ما عرفتها ما كنت ادري انه المكياج يصغر
بدأت كلمات المدح تنهل على جدتي والكل يمدحها
وبعدها اقتربت منها وهمست بإذنها : خليك قد كلمتك انتي وخالتي ومن يوم ورايح انا صديقتكم وما تطردوني اوكي
لوت بوزها جدتي : ان شاء الله
وبعدها توجهت عند جدي وقبلته على راسه وبابتسامه : اخبارك يالشايب
جلسني جنبه وبابتسامه مد يده وقرصني بخدي : كم مره قلت لك لا تقولينها
ضحكت : خلص خلص اتركني يالشايب صدقني ما اعيدها
ترك خدي : ملسونه
وبعدها همس بإذني : زياد اليوم اتصل فيني
ناظرته بدهشه وبصوت عالي : احلف
ضربني على راسي : يعني اكذب عليك
وبلهفه سالت : ما قال متى ييجي يزورني
الجد بهدوء : طلب زيارة بس انا رفضت
بصراحه عصبت وبصوت عالي : ليه رفضت ؟؟؟
دخل عمي فيصل : وصمخ ان شاء الله ورفع يده بتهديد هذا صوتك امحيه عن الوجود اذا ظل يبربر
طنشته وسالت جدي بزعل : ليه رفضت ؟؟
جدي بهدوء قربني له : خلص اسكتي بعدين نتناقش في هذا الموضوع
هزيت راسي باستسلام
عمي فيصل يناظرني وهو رافع حاجب ومتكي على يد الكنبه : علامك مبوزه وزعلانه ؟؟؟؟
رديت بدون نفس : ابد يالغالي ماني زعلانه بس بتعرف اذا ما شفت بعض ناس وجلست معهم اتنكد
عصب عمي فيصل واعتدل بجلسته : حامض على بوزك ظلك احلمي يا بابا وبعد سنتين راجعينا
رديت ببرود : عادي الله يعيني على هالسنتين استحملهم
نواف يهمس للشباب : ما ظنيت تقبل ريم بالطلاق
سليمان بحده وصوت هامس : غصب عنها مو بكيفها
دخل لؤي وهو يركض ومسك يدي وكان خلفه احمد
دف لؤي عمه احمد للخلف وبصراخ : والله ما تأخدها اندلع
مسكه احمد من بلوزته وشده : انت اندلع
وقف عمي فيصل وبعدهم عن بعض وناظر احمد ولؤي : وش فيكم يا بابا تتشاجرون ؟؟
مسك لؤي يدي ويشدها واحمد يحاول يسحب يدي منه!
لؤي يبغى يبكي : انا دلت ازوز ليم بث هدا يدول هو يزوزها
ضرب احمد مصعب على راسه : اخلس ليم علوستي اندلع من هنا
كل بالمجلس يضحكون انا بصراحه وجهي صار احمر من الفشيله
فلتت يدي منهم وبعصبيه : لا انت ولا هو وبدلع انا مخطوبه لزيادو
لؤي بعصبيه : والله لاضلبه زيادو
فيصل بعصبية : احمد ولؤي وش ذا الكلام البايخ عيب وبحزم يالله انقلعوا برا اشوف واذا سمعت هذا الكلام مره ثانية ما يحصلكم طيب
وبعدها التفت علي وهو يشد على اسنانه : الكل يدري انك مخطوبه ما له داعي تتفلسفين
لويت بوزي وسكتت يالله هالعم طالع لي نشبه مثل الشوك بالبلعوم

*
*
*
*
نغز سليمان بدر وعمر وبابتسامه : لكم منافسين هههههههه
ناظر بدر عمر بتكبر ولف وجهه
عصب عمر وبصراخ : قسم بالله اتوطى ببطنك الحين واعرفك مين عمر للي تتكبر عليه
وقف بدر بعصبية : لا يمامي خوفتني اقول روح تلايط
صرخ الجد بعصبية : وكمان قدامي ما في احترام تتشاجرون بالمجلس ما احترمتم حريم اعمامكم ولا بنات اععمامكم
ونزل جدي بهدله فيهم وحاول يعرف سبب المشكلة
بس ما حد خبره وقالوا مشكله بالجامعه
وبعدها صعدت لغرفتي ارتاح شوي ....
*
*
*
توجهوا الحريم للصاله الداخليه ومعهم البنات
رغد باستغراب : والله مو مصدقه بدر وعمر يتشاجرون وش للي غيرهم
مي : صحيح 24 ساعة مع بعض وضحك وش للي غيرهم
روان بقهر : الاهم شفتوا الكلبه ريم اخخخ احس بالقهر جالسه مع جدي وتضحك معه وتقول له الشايب يا حسره علينا لو حنا للي قلنا له شايب زمان دفنا
سديم بكره : يا ثقل دمها تتدلع وحالتها حاله مالت عليها
سلمى ببراءه : يمكن يدللها جدي لانها حلوه كثير
روان بقهر : يقطع حلاتها وين جمالها ما ادري وبغيره عاديه واقل من عادي انا احلى منها
سديم بغيره : احنا احلى منها يكفي انها قزم
مي : اتركونا منها لا تنسون بكره الحفله
سديم وهي تخبط على راسه بالخفيف : تدرين اني ناسيه
وجلسوا البنات يخططون للحفله .......
ام سليمان بانبهار وهي تناظر الجده: والله ما توقعتها هالملسونه تعرف للمكياج طالعه قمر يا خالتي
انبسطت الجده على المديح وخاصة بعد ما شافت نفسها بالمرايه : انا اقول وش رايك تخلين ريم تجهز سديم للحفله
ام سليمان باعتراض : لا لا يا خالتي اخاف تعجب عليها من الغيره ذي بنت ساره لا لا انسي
ام خالد : انا بكره مكياجي على ريم غصب عنها تعدلني
الجده ناظرت ام خالد : انا قبلك تجهزني
ام خالد باعتراض : يا خالتي انا ام العروس ولازم اتجهز بالاول علشان المعازيم
الجده عفست ملامحها : انا الجده ولازم اكون جاهزه علشان المعازيم واعطتها نظره
ام خالد بدون نفس : ان شاء الله
ام سليمان بتفكير : وانا كمان افكر انها تجهزني
ام خالد تناظر ام سليمان : انا قبلك حجزت
ام سليمان بعبوس: طيب طيب انت قبلي