رواية تجبر أحفاد الــ دليم الفصل الحادي وثلاثون 31 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين          
المُلْتَقَى _37 _

- واثـاري الحيل هم ينباك وعـزاز اليبوڪونة .

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
<><><><><><><><><>
گازو...

فراس : ول الداعشيه ماعندي حچي وياچ هساع
صرتي قديمة نجي ؏ جديد يگولون عدكم رقاصة
تعرفوني احب هل سوالف جبت عمامكم واجيت
كــانـــون اخذ حريمنا بغرفة وسد البوب وغير إنارة البيت
جهز مشروبات طيبة ؏ مقبلات وعشاء فخم
وانتِ يولو تَـــمــوز شغل أغنية ونادي
؏ كرزات ترگص نريد نتونس وياهه بهل ليلة شوية شويتين .

<فـــلاش بــــاك >

كرز : ابوس هل وجه گازو ماريد نطلع من هذا البيت
والله نرجع نتبهذل بس افتهمي عمي وراح بعد وزوجته
انسي آمرها وين نروح بعد .

گازو : انتِ عليچ الصافي اني ارتب وضعنا .

كرز : بس اذا ترجعين الشغل سمسمة اتبرى منچ .

ضربتها راشدي بدون قصد فريت وجهه بقت مصدومة
تباوع بعيوني اول مرة تنرفع ايدي واضرب وحده منهن
گازو : تستاهلين هل كف حتى ما تجاسرين اشتغلت
وتعذبت علمودچ انتِ واخواتچ وطلباتكم اني لو علية
اكُل خبز يابس وماي بالحلال الحمدلله .

گامت مني راحت گعدت بصف گمر اختي الصغيرة
گازو : الضغط علية يهد جبال لا تزيدين همي
اني وين اروح انتِ وگمر ويايَّ غير هل كلام
ما اريد اسمع وممنوع تعارضيني .

اندگ الباب قبل جوابها مشيت فتحته بالمفتاح
صارت ام تَـــمــوز مقابيلي ببتسامتهه المعتادة
رضية: بس لا اجيت بوكت مو مناسب نايمات
لو عدچن موضوع مهم .

گازو : لا ابد هلا بيچ بكل وكت انتِ ام البيت
احنا مجرد ضيوف يمكم .

رضية: لا يمه انتِ حرمتو التموز عزيز گلبي
اخليچ بعيوني يمه حبيبتي فدوة لهل وجهه السمح .

ابتسمت ؏ كلامها تغير كل تفكيري بمجرد
اسمع منها ملت راسي وهمست : تعجز الأحرف بالتعبير عنچ .

رضية: عندي طلب يمچ وياريت ماترديني .

گازو: من عيوني اذا اگدر .

رضية: تَـــمــوز صار يومين يريد يجي يحچي وياچ
بس اني براسو ادري بعدچ حزينة واختچ كسرتچ
بس مو عيب تگعدين انتِ وزلمتچ تتفاهمون مو بنتي .

گازو : خالة بس اني والله تعبانة وسوالف الآخذ والعطاء صعبة علية .

تَـــمــوز : غير عنادها يطخ بكوكب زحل وقميص
يوزر سيف ماتقبل هاي اذا مو مداهمة مايفيد وياهه .

دفع الباب تعداني بقيت اباوع بطرف عيني ودخل ابتسم بوجهه البنات
وبصوت حنون ناقشهن : امكم رضية شلون مسوية جدر
كبة ماينشبع منها اقترح عليچن تسون هجوم ؏ مطبخ
ورضية خانم راح ترجعكم الام راس محجر دب وباندا .

رضية: يلة يلة ركض قبل لاتغير رأيها .

بس طلعن البنات سد الباب واني رحت أتمشى
واسولف : أصلًا استغربت من اجت امك گلت شنو هل احترامات
الزايدة عن الزوم عند تَـــمــوز الحار المغوار قابل مبدل
اعرفك صلف وزايح شي اسمة خجل .

تَـــمــوز : وين اكو زلمة يخجل الخجل عند النسوان بوية .

گازو : شرايد غرد .

تَـــمــوز: شلونچ .

گازو : بـ أسوء حالاتي .

تَـــمــوز : مشتاقلچ .

گازو : انتهى كُلشي تَـــمــوز .

تَـــمــوز : هساع بدت قصتنا گازو .

گازو : وبساعتها تنتهي .

تَـــمــوز : متمسك بيچ الأخر نفس بيَّ .

گازو : حذرتك تبتعد رفضت واقتربت
واول ماخطيت اول خطوة وعقدت اختي
راحت ضحية عرفت ثمن هل قصة موت .

تَـــمــوز : يمكن أنـه غلطت من البداية
مو صريح وياچ بس خفت اخسرچ .

مشيت استندت ؏ حايط واني واگفه صار مقابيلي
لزم ايدي رفعها وطبع بوسة سريعة وهو يهمس
تَـــمــوز: مستعدة تسمعيني .

گازو : لا تَـــمــوز الله يخليك ماريد تقنعني ابتعد .

تَـــمــوز : اول يوم دحگت عيونچ بيَّ واصريت
ألتقي بيچ أتذكر كلمتچ ( أنـه اعرف ادافع ؏ نفسي )
نظراتچ الثاقبة ، وحركاتچ الشرسة
اول فكرة عگلي درسها هي هاي تنفع تكون حرمتك
اني عايش بين انذل كائنات والله تعودت بس مرات
ارجع انصدم بيهم وارجع انكسر .

گازو : حياتك صعبة واني عندي أخوات .

تَـــمــوز : انتِ تحتاجيني گازو وانه أحتاج وجودچ ويايَّ
دورت جثير ؏ نفس اطباعي وصفاتي شخص يساعد نفسو
مثلي يحب اهلو مثلي يحتاج يحتمي تحت بيت نظيف وبي أمان .

ركز بعيوني وأبتعد وهو يسترسل بالكلام
تَـــمــوز : عشت طفولتي ومراهقتي انام بهياكل
برد وحر لان دومي مطرود ، وكل طردة أذكرها
بالتفصيل بس المشكلة ماكو سبب ، السبب الوحيد
دائمًا لازم اصير زلمة وانسى امي واعتمد ؏ نفسي .

تحمحم وهو يرفع ايدو حسيتو اختنگ
گازو : كمل ..

تَـــمــوز : الى ان كبرت وصرت مراهق اريد احد ينصحني
يقودني للطريق الصحيح بس ماكو شربت جكاير بعمر 12
سنة وبس دخلت 15 جربت الكحول تعبت من نفسي جنت
ما اهتم حرام مو حرام اهم شي أنسى عذاب اليوم بطولو
بقيت اشرب واگعد الصبح للمدرسة ادرس واشرب
الى ان طلعت من المدرسة ناجح رغم ماكو مراقبة
ويوم بالبيت وعشرة بالشارع  .

مسحت دموعي وهمست : وشصار بعدين .

تَـــمــوز : تمرضت ورجعت الحضن امي
وانصدمت من وعيت وعرفت اخو ابوية
فراس متزوج امي انهاريت ومن دكتور الدكتور
هل فكرة جانت صعب اتقبلها بديت اتعارك
وتجاسر بكلامي وكلهم يصيحون مو مريض يمثل يريد امو .

گازو : جنت صدگ مريض لو فعلًا تمثيل .

تَـــمــوز : تدرين لليوم مادري اذا جنت مريض بحق
لو جنت امثل حتى اتگرب من أمي وأنام بحضنها وتنصحني
وتعلمني شلون اترك الجكاير والشرب والشارع
ايام بس ايام بقيت بالبيت قريب من امي عدلتني
خلتني اصلي واصوم رجعتني للطريق الصحيح
بس ماجنت اطول يمها وانكفخ ؏ وجهي وانطرد
وارجع للشارع وهو الشارع شبي غير العربده
الى إن دخلت جامعة تدرين ناسي شلون تخرجت
بعدين ولد عمي سحبهم ابوهم عسكرية وبـأصرار
من امي سحبني وياهم ودخلت عسكرية بس لليوم
ما مرتاح الجانب الوحيد الحلو من هاي القصة ولد
عمي أحفاد الدليم من كبرت همَّ صبروني ؏ أذية
فراس وتجبرو وطغيانو .

گازو : دائمًا هيچ وياك .

تَـــمــوز : تعودت من أفرح واضحك وراهه اتعاقب
وتنسلب فرحتي وضحكتي سوية ، واخر ضربة 
حاربني بيچ بس مستحيل أتخلى عنچ گازو مستحيل .

گازو : لو ماعندي خوات ومسؤولية استمر وياك
بس اني روحـي بـ اخواتي وفقدت وحدة منهن
والله يا تَـــمــوز اذا تتأذه بعد وحدة من اخواتي اموت
كل يوم وكل جرة نفس انهدم ؏ شباب اختي الضاع
شنو شافت من حياتها وتقتل .

تَـــمــوز : منو گال نعيش وياهم اريد اخذچ انتِ
واخواتچ وامي ونعيش بعيد عنهم كلهم أحتاج
عائلة وانتِ تحتاجيني وتحتاجين بيت يحميچ انتِ
واخواتچ .

گازو : وين نروح ؟

تَـــمــوز : رجعت حقي وحق امي من فراس
بس اكمل هل واجب ارجع ابحث ؏ بيت
ونطلع .

گازو : يا وأجب ؟

تَـــمــوز : عندي مهمة ضروري اطلع بيها أنـه
ولد عمي نخلصها ونرجع اسبوعين زمان وكلشي
يستقر ويصير مثل ما نحلم .

اخذ ايدي بين ايده رفع خصلات شعري
وتگرب أكثر تلمس وجهي بكل هدوء
وهو يهمس بصوت موزون : غزالتي اشتريچ بروحي بس لاتروحين
لاتحرميني من حلمي اريد ابدي صفحة جديدة من حياتي وياچ
انتي گلبي حب الأول مرة لاتكسري وتصيرين مثلهم تهدمين بيَّ .

سحب أوراق من جيب البنطلون وأسترسل
بكلامه وهو يركز بعيوني : اقري هل أوراق رجعت أملاك
أبوية بـ اسمي ، وأملاك امي صار بـ اسمي يعني حقي بالكامل
استرجعتو وبعد ما اريد منهم شي ابالي الاستقرار بعد وبس .

استدار للباب من سمع صوت عالي برة
تركني وطلع من الغرفة مستعجل طلعت
اريد اشوف شصار دخلوا عمامهم اشرت
للبنات يدخلن للغرفة دخلت عمتي تقرأ آيات
قرآنية من الخوف تفرك بيدها .

اسمع بكلامهم ودخلت ذهب واعصابهه
ونتر كــانـــون واعصاب تَـــمــوز التالفة
وصدمني ردت انجلط من طلب أدخل ارگص
ضربني مغص ببطني ام تَـــمــوز لزمت ايدي
ومسحت عليها دفعت ايدها ماتحملت اسكت
ودخلت عليهم : شكبرك بعد تصير انتَ وكومة الخرفان ألي وياك
رگصت صح بس عيب عليكم بعد تفتحون هل موضوع لان وغصبًا
ما عليكم واحد واحد صرت عرضكم .

كــانـــون : اطلععععععععععع لا تسوي مشاكل ومحمد
اذا يموتكم تَـــمــوز اصير وياه لان باطلين وانعل ابو
كل واحد يدافع عنكمممم شنوووو انتووووااااا .

تَـــمــوز: اعصابك ابن العم اعصابك هل مرة اريد العب
؏ اثگل من الثگيل الصوت العالي والضرب بعد مايفيد وياهم .

الفت آشر بيده اتقرب رحت قريب منه
صار بمستواي وهمس : حبيبي الأوراق من الغرفة بسرعة .

گازو : لا تَـــمــوز لا التوقيت غلط .

تَـــمــوز : مثل ما اگول نفذي .

مشيت للغرفة الكل دخل بدوامة الهدوء مركزين
بتحركات تَـــمــوز وهو گعد ؏ تخم رجل ؏ رجل
يطحل بروحه من القهر من الداخل بس الخارج قوي
وصلب ما ينهز ، رجعت بيدي الأوراق ضحك تَـــمــوز
وبصوت مسموح نطق : گازو سلمي الأوراق العمي فراس ملاهي .

فراس : مو اكسر راسككككك .

تَـــمــوز : أقرأ ماكو غيرك يتكسر راسو اليوم .

سحب الأوراق بكل حقد وگعد يقرآ لحظة بعد لحظة
تتغير ملامحه ويباوع ؏ تَـــمــوز بحقد رفع راسه
ولزم گلبه : محال يصير هل شي مزور توقيعي .

تَـــمــوز : والبصمة همات تتزور ؟

فراس : شوكت وقعت عليهن أنـه ما موقع وماكووو شهووود .

تَـــمــوز : الشهود موجودين دوهــان ومأمون .

فراس : تموووووووزززززز لا تلعب هل لعبة القذرة ويايَّ .

تَـــمــوز : من شنو مقهور حقي وحق امي رجع ومن اليوم
بعد ماعندي شي وياك فكيت عقدة الحقد واعلن السلام
تعبت ومليت من المشاكل بس اخلص مهمة المداهمة انقل
شغلي عنكم ونويت ابيع البيوت واشتري غيرهن واخذ حرمتي
وامي ونبتعد عنكم لان عائلة فارس غير مرغوب بيهم بيناتكم .

فراس : فارس جدامي سبق وحذرتك ماتفكر وتتصرف وتقرر بكيفك .

تَـــمــوز : لا اجيت وكلكم موجودين وبلغتكم .

فراس : بالوقت الضايع اجيت بعد ما خليتني أوقع وأبصم
بدون علمي تحت تأثير مخدرات انتَ مشربني منهن واخذت بيوت
بدون رضاتي ، وناوي تبيع وتاخذ امك ومرتك كلهن مفكر بيهن
وتريد اخليك ؏ ساهل تنفذ ههههههههه ما بلحيف ياتموز يا ابن فارس .

تَـــمــوز : ما تگدر تمنعني فراس حقي رجع موقفك ضعيف .

فراس : هذا عقلك يفكر واني مايعجبني تفكيرو
راح امحي تَـــمــوز عقلك هذا ادمررروووو
واخليك مهبول والله اخليك مهبول يالعااااار .

ترك البيت وطلع وتموز ؏ گعدتو عفتهم ودخلت للغرفة
گعدت اني والبنات خايفات من اصواتهم بقيت جامدة
لا اخذ ولا انطي بالكلام افكر بتهديدو گلبي ما مطمئن
حسيت صادق بكل حرف نطق بي خفت ؏ تَـــمــوز منه .

ثاني يوم اندگ باب الغرفة فتحت الباب
وابتسمت : هلو .

تَـــمــوز : شلونها الحلوة .

گازو : زينة .

مال راسو ورفع أيده: والحلوات شلونهن  .

گمر : هلو عمو كل يومية اريد اسلم عليك بس گازو ماتقبل .

دار نظراته علية وابتسم بتلاعب
وهو رافع حاجبه جاوبها: هاي السوالف قديمة بالأيام الجاية تقبل مو ؟

درت وجهي خجلت من تركيزه وقربه مني
رجعت ايدي ؏ رگبتي وهمست : صحيح بعد عادي تسلمين ؏ هل املح .

تَـــمــوز : كرز ماكو صوتها ؟!

گازو : زعلانة مني .

تَـــمــوز : افااااااااا كرز تزعل .

گازو : زعل اخوات فد شوية نتصالح .

تَـــمــوز : اني طالع للواجب قبل لا اروح گمر سجلي
بورقة حلوات تحبيهن انتِ وكرز .

گازو : لا عفية تَـــمــوز .

تَـــمــوز : اششش ولا حرف ازعل تراني زعلي ثگيل .

ركضت گمر تسجل وكرز تغشش بيها
متحمسات ابتسمت گمر وهي تنطي الورقة
_ ماسجلت شنو تحب گازو لانروح تمنعك تشتري إلي والكرز .

تَـــمــوز : گازو هي حلويات ماتحتاج .

گازو : تمووووزززززز .

تَـــمــوز : بنوات چذبت بشي ؟

گمر : لااا ههههههههههه .

اخذ الورقة وطلع واني رحت گعدت بالمطبخ
لگيت ذهب مبدلة تريد تروح للدكتورة هي وكانون
گازو : شعجب كــانـــون مايروح وياهم .

ذهب : دوهــان غير موعد الخطبة وراح يروح وهو وتموز
وعگب باجر يلحگهم كــانـــون .

دخل تَـــمــوز بيدو اشكال وجميع أصناف الحلويات والعصاير
خجلت من ذَهــب وخالتي رضية وفكرت راح تعاتبه من صار
؏ اخواتي وسلمهن العلاليك بس خلتني بصدمة من گالت
- عفية عليك امي هاي گازو سوت بهل مظلومات جفاف
لا اچل زين ولا حلويات وجوهن صفر سودة علية .

تَـــمــوز : ادري بيها ، خليتي إنزل المسواك من السيارة .

راح للسيارة نزل أشكال والألوان من المخضر والفواكة
والحلويات كراتين واخر كارتون نزلها بحضن ذَهــب
_ زلمتچ وصاني اشتري كارتون اندومي اشبعي وشبعي الطفل
مو اطلعي خلصانه روحو مثل امووو نريدو منشنش مدبدب .

ذَهــب: المنفوخ يطالب ابو مايطلب مثلك انتَ ودوهان
واحد يريدو لعبة والثاني يريدو مدبدب ومنشنس .

تَـــمــوز : أنـه غلطان اطلب منچ هساع كلها كم شهر
ويترصد ابني بطن هل غزال هذا جدامچ ويطلع فول
جمال فول مواصفات كون بنية وانتوا ولد اذا ما اخليها
تلعب ابنكم ؏ حبلين ويصيح الغوث .

كــانـــون : شاد حيلك ؏ ابني يالمنفوخ .

تَـــمــوز : أنـه أتوكل أحسن .

كــانـــون : كفيني شرك صار ساعة تسولف راسي صدع
الله يساعد هل مسكينة عليك .

تَـــمــوز : هاي تحچي اكثر مني وحق محمد
لا تخاف عليهه خافوا منها .

كــانـــون : توووووووووكل .

تَـــمــوز : توكلت شبلاااااكككككك يمعود .

هو طلع وخالتي رضية ذبت وراهم ماي
وفاتت تبچي حضنتها ذَهــب وگعدت
تسولف وياها الى ان سكتت آني أخجل
منها بعدني ما متعودة عليهم ، بس شافتها
صارت زينة طلعت هي وكانون للدكتورة
گازو : قُــسَـم وين .

رضية: بعدها ؏ نفس الدمعة من البارحة لليوم
ودوهان بليل خابرتو حجيت وياه شوية وقرر
يأجل الخطبة كم يوم يفكر بيهن .

گازو : زين ماسويتي من البارحة افكر بيها مبين
عليهه فقيرة وفطيرة ماتستاهل تنكسر .

رضية: القلب وما يهوى لقلب قُــسَـم ذكرى لا تموت.

بقيت وياهه جهزت الغداء وهي تسولف عن ايامهم
وشلون جانت عايشة وتعرفت ؏ ابو تَـــمــوز
وشلون ولدت تَـــمــوز الفجر وصلت الموت بيومها
حاولت تلطف الجو بس حتى تسمع قصتي بس اني
صعب اثق بشخص بسرعة هاي طبيعتي التزمت الصمت
هي افتهمت علية ، والأول مرة من دخلت هل بيت لليوم
اجتمع وياهم ؏ صينية : صيحي ؏ اخواتچ واني اروح
ازكح ؏ قُــسَـم تجي تاچل ويانه .

ما عاندت هل مرة بعد كلام تَـــمــوز نكسر حاجز
العيب ومايصير يصرفون علينة وتقربت منهم
ناديت ؏ بنوات وخالة رضية صاحت قُــسَـم الي
گعدت وگامت بدون ما تنطق بحرف ولا اكلت
غير خاشوگتين من التمن وراحت غسلت ورجعت
بغرفة خالة رضية رفضت تصعد غرفتها .

شلت المواعين غسلتهن اني والبنات ومسحت البيت
بالكامل وخلصتها اني وخالة رضية يوم كامل
صار اليل ورجعت ذهب وكانون گعدت ويانه
وكانون يخابر برة : طمنيني امي شلونو الطفل .

ذَهــب: الحمدلله وضعو زين ومستقر وسمعت دگات گلبو
وبچيت شكثر حلوات يا عمة لو تسمعيهن .

رضية: بعد روحـي يا امي الله يتممها عليكم ونفرح
بهل طفل من بعد هل مطبات الصارت ويانه
ان شا الله ياخد بـ ايدچ وايد ابو للخير وتستقرون بعد التعب .

ذَهــب: ان شاء الله ادعيلنا عمة دائمًا حبابة .

رضية: بدون توصية بنتي .

گازو : ربي يتمم ؏ خير .

ذهب : حبيبتي الحلوة يارب تنملي بطنچ بطفل
حلو مثلچ مو مثل المنفوخ الغضبان .

رضية: يااااا ما اقبل ؏ ابني هذا تَـــمــوز وينو اكو بجمالو .

ذهب : بربچ منو أحلى گازو لو تَـــمــوز ؟

رضية : گازو بنت وذاك زلمة شابع ضيم من الشموس .

ذَهــب: الحلو حلو لو يتغمس بالشمس .

من دخل كــانـــون استأذنت ورجعت الغرفتي
گعدت بيها وهيچ فاتن بس يومين ؏ غياب
تَـــمــوز بالثالث من الصبح سمعت صوت
مألوف بالمطبخ وهوسة خليت شال ؏ راسي
وطلعت افرك بعيوني .

كــانـــون : يولوووو احجي عدل وفهمني شبي ذاك اليوم راح
صاحي مايشكي لا من بطنو ولا من راسو .

دوهــان: من البارحة الصبح شلمت عندو راسو يوجعو
ولليل بطنو وصار يذب من راسو وتأزم وضعو اكثر واكثر .

اسمع صوت خالة رضية تبچي طلعت ؏ صوتها
وسعت عيوني ؏ منظر تَـــمــوز واگع بالگاع ويدب من
راسو مادة سوداء وعاصر بطنه متأذي .

تَـــمــوز : اخخخخخخ يمممممه بطني تشگگت .

صار يضرب براسه بالحايط تقرب منه كــانـــون
حط ايده ؏ حايط حتى من يرجع راسه ماينضرب
قوي : شبلاك يول الله فهمني اكلت شي شارب ي مو زين .

رجع يذب من راسو ويصرخ بصوت مبحوح
_ يول كــانـــون روحـي راح تطلععععععع .

كــانـــون : يمهه رضية انتِ ودوهان خلي يغسل
وانه صاعد ابدل لازم يروح للدكتور وضعو مو طبيعي .

تقربت منو نزلت المستوى لزمت أيده
رفع راسه عيونه ماكو بياض عبارة عن
لون احمر حتى البؤبؤ الأسود صاير احمر
گازو : عزا العزاني كــانـــون عفية استعجل تَـــمــوز موزين .

ركض صعد فوك ودوهان فتح الصوندة يغسل
بوجهه تَـــمــوز وأيده طلعت قُــسَـم تركض
جابت تيشيرت بسرعة غير ملابسه ونزل
كــانـــون : گابلني يولو خلي نشيلو للسيارة بساااااعك .

رضية: يممممممممه كــانـــون هنا يممممههههه تَـــمــوز راح من ايدي .

كــانـــون : اذكري الله يمه مابي شي متسمم .

رضية: لا هذا مو تسمم تَـــمــوز مو طبيعي .

صعدوا بالسيارة بدون مايجاوب لان الوضع طلع
عن السيطرة وهذا تَـــمــوز المهيب بضخامته
صار عاجز بيدهم ، لبست خالة رضية عبايتها
وتحركت سيارتهم دخلت ايدي ؏ شفايفي افتر بالبيت
گازو : ماصار تلاث ايام من راح كُلشي مابي شصار رجع منتهي .

قُــسَـم : جسمي كلو يرجف من دحگت بعيونو يخوف اسم الله .

ذَهــب: كانون يگول تلگي ماكل شي وصخ ومتسمم .

قُــسَـم : اي اتذكر مرة كــانـــون خطية همات رجع يذب
من راسو وبطنو توجعو طلع متسمم ماكو بس راح للمستشفى
اخذ مغذيات صار زين .

بقيت بس اباوع عليهن تهت أفكاري تشتت
خفت اخسر اخر سند يسندني خفت أرجع
أضيع ، تذكرت كل كلامه قبل أيام طفولته
والضياع العايش بي .

بالساعتين ننتظرهم اخر شي طگت روحـي طلعت
للگراج اني وقسم ننتظر بس ذَهــب بقت گاعدة
بالاستقبال مددت رجلهه وفتحت الشباك تباوع
علينة ، انفتح الباب عبالك رجعت روحـي دخل
يمشي طبيعي مابي شي من شافني أبتسم : الله ردت أفوت قبلهم
حتى ادحگ نظرات الخوف بعيونچ وتگولين ما أحبك يبربوگ .

رضية: غير يسكت ويفوت يرتاح .

كــانـــون : المتسمم كفيني شرك وفوت نام صاير خيخه ؏ كلشي
تنسحن روحو وراجع نايم بالبيت تعويد جديد هذا لا مواجهات
ولا مداهمات نگعد بالبيت بعد .

تَـــمــوز : ههههههه شنو رأيك اترك العسكرية وافتح
محل غذائية اطلعو من البيت وابيع مشروع حلو وبنفس
الوكت گاعد وساكت بالبيت.

كــانـــون : اي واسمو البركة .

دوهــان : وبالأخير بخط صغير يكتب هذا من فضل ربي .

رضية: يولو كافي خلي يفوت للبيت .

تَـــمــوز : اريد أسبح قبل لا أنام .

دخل للحمام وخالة رضية جهزت ملابسو
وركضت للمطبخ ؏ سريع تريد تسوي شوربة
هو طلع مبدل يمسح براسو بالمنشفة ويضحك
كــانـــون : دحگ دحگ شلون يضحك متونس عايف الواجب .

تَـــمــوز : تسممت من الحر غير تمووووت غادي
دخلت مداهمة ام خمس ساعات البارحة جنت لابس
عسكري كامل من كملت وصعدت بالسيارة لگيت
روحـي بطرگ الفانيلة .

رضية: الله يساعدكم يمه احنا بالبيت والتبريد مشتغل
ونشتكي من الحر واذا الكهرباء طفت ساعة نصير أعصاب .

تَـــمــوز : گضبت داعشي من الحر غيرت خريطة وجهو
استلمتو بوكسات خليت السلاح للضرورة القسوة .

كــانـــون : والنتيجة .

تَـــمــوز : أنـه اخوك حررت المنطقة أنـه وجماعتنا
واكو من غير فصيل ويانه ساعدونا چثير .

كــانـــون : ما عليك زود كفو منكم .

تَـــمــوز : أرتاح ساعة وباجر نطلع سوية للدوام .

كــانـــون : هل يومين لا ترجع أرتاح وبعدين من تحس نفسك
رجعت زين وبطنك نظيفة ماكو وجع حدر للدوام .

تَـــمــوز : مابيَّ شي يولو باجر نرجع عفت الشباب وحدهم خطية .

كــانـــون : براحتك .

دحك علية غمز وعافني ودخل للغرفة
نام واني رجعت اكمل نومتي ، للظهر
الوضع طبيعي طلعت وياهم تغديت
وأخواتي ويايَّ ، للعصر وتموز نايم
گعدت اني والبنات بالگراج نشرب چاي
وكانون يجهز بالجنطة فوك الى ان صار
المغرب گامت خالة رضية تتوضأ وطفت الكهرباء
بلحظتها رجلي بالمعنى الحرفي انشلت والدم جمد بيهم
من صرخت تَـــمــوز ، بهتت اباوع عليهم
كلهم مصدومين ركضت خالة رضية من سمعت
صوته يصرخ : اجووووووني روحوووووا مني روحوووووا
ماروح وياكمممممممم لااااااااااااا عوفوني لا تتگرب .

وگفت رجلي خيوط وگعت ؏ ركباتي
بقيت ازحف الى آن رجعت وكفت
اشتغلت الكهرباء وكانون مزل يركض من
فوك دفر باب الغرفة وركضت وياهم كلهم دخلوا
أشر ؏ مرايا بالغرفة وهو گاضب ايد كــانـــون
_ يريدوني كــانـــون خلي يرووووحححح طردوووووو
راح يجيني يموووووتني كانوووووون .

صار وجهه كــانـــون اصفر كلنا نباوع ؏ مرايا
ماكو شي بس وجهه تَـــمــوز شاحب وكأن روحه
تنسحب منه ومن الخوف من المنظر نهبط
كــانـــون : منووو يولوووو منو ماكو احد تَـــمــوز
بس اني وياك بالغرفة لاتخاف اني يمك .

تَـــمــوز : لا ترررروح يخاف منك مايجيني لاترووووحح
يريد يضربني وجهه كــانـــون وجهه مرعب ساعدني طلعوا .

دحگ كــانـــون ؏ خالة رضية ورفع حاجبه
_ شنو هاي يمه ؟

لطمت ؏ وجهه وصاحت : سويتها يا فراسسسسسسس
خبلت ابني الله لااااااا يوفقك تهدد وتنفد گتلك ولك يمه
كــانـــون تَـــمــوز مو طبيعي والله مو طبيعي .

غلق تَـــمــوز عيونه بكل قوة وكأنه يحارب حتى
ما يدحك ؏ مناظر الصارت مقابيله رجع نام ؏ مخدة
واول ما ابتعد كــانـــون رجع تَـــمــوز يصيح يعلو صوتو
_ اجوووووني يريدون ياخذووووني وياااااهممممممم
يخووووفووووون راححححح يجوني ادحگ كــانـــون
ادحگ شلون يدحگ علينة ويضحككككككككك .

كــانـــون : منوووو هووو منوووو وينووو ؟

تَـــمــوز : هذا الجني الأسود ابو النار
طالع بالمرايا وياه الأقزام يريد يطلعهم
يضربوني ويضربوكم .

گضبو كــانـــون بكل ماعنده من قوة
وصار يقرآ بعلو صوته ؏ راس تَـــمــوز : اعوذ بالله من الشيطان الرجيم بسم الله الرحمن الرحيم قل اعوذ برب الناس ملك الناس اله الناس من شر الوسواس الخناس الذي يوسوس في صدور الناس من الجنه والناس .

كررها مرتين بالثالثة دفع تَـــمــوز كــانـــون بدفرة وگع بالگاع
موسع عيونو ما مصدگ وما اشوف غير گام ؏ حيله
وصاح بصوت خشن غليظ : لا تقرأ هل كلااااااممممممم براسي
يا حقيييييييير اششششششش وجعت راسيييييي اششششششش .

كــانـــون : " قل هو الله أحد الله الصمد
لم يلد ولم يولد ولم يكن له كفوا أحد "

ورجع يكرر بصوت عالي مسموع واضح
متمكن : " قل هو الله أحد الله الصمد لم يلد
ولم يولد ولم يكن له كفوا أحد "

وگف ؏ طوله من هجم تَـــمــوز عليه
بس سرعان ما سيطر كــانـــون
ودفعه ؏ فراش وگف فوك راسه كمل : " قل هو الله أحد الله
الصمد لم يلد ولم يولد ولم يكن له كفوا أحد "

ثار تَـــمــوز وظل يضرب ؏ راسه
وخالتي رضية تخبلت من شافت حال ابنها
رضية: كافي لا تقرأ شي يمه كــانـــون لا يأذي نفسو .

من سكت كــانـــون وبكثر ما ضرب ؏ راسو
رجع راسه ؏ فراش مغطي بالبطانية مايريد
يشوف شي ، بس طلع كــانـــون من الغرفة
إتصل : آلو تُــمــيم شلونك .

_ بالواجب أنـه بيك شي صوتك مو طبيعي .

كــانـــون : فراس وينو ؟

_ مادري صار كذا يوم ماكو .

كــانـــون : ماشي آخذ راحتك وخلي بالك من نفسك زين .

_ شكو خليتني بقلق .

كــانـــون : لا يول كلشي ماكو بس اسئل ؏ ابوية .

غلق المكالمة ورجع يتصل اكثر من مرة كررها
بعدين صاح : دوهــان انتَ وين حدر بساع اريدك .

ثواني ودخل دوهــان يدحگ بالوجوه
مقلص حاجبه والقلق واضح ؏ ملامح
وجهه : يا ستار شبلاكم وجوهكم مخطوف لونها .

وهو يستفسر رجع تَـــمــوز يصرخ ويستنجد
وصوتو يتغير بعد كل صرخة يصير غريب
_لااااااا تحچون براسي كاااااافي شتريد مني
لااااا تحچي عوفني اريد انااااااام تعبت عووووفوني .

ملامح الصدمة اعتلت وجهه دفع الباب ودخل
تَـــمــوز: يولوووووو دوهــان حدر حدر
أجرني يريدون يضربوني لاااااااا يابوووووويه لحگوني .

رد فعل دوهــان جانت عبارة عن خوف يدحگ
بالمرايا ويصيح : وينهممممممم يولووووو ؟

تَـــمــوز : بالمراياااااااا يريدوني كاااااااانوووووون .

ركض دوهــان للمرايا شالها وطلعها من الغرفة
ذبها بالممر ورجعله : ختولي المرايا راحت بخوي راحت
هدي شوية هدي بعد ماكو شي .

تموز : بس لا تروحون لا تعوفوني يحچون براسي .

دوهان : هاي كلنا يمك حواليك ايدي بيدك يولو شلون نعوفك عيوني .

كــانـــون هج طلع من الغرفة للكراج يضرب بالبيبان
ويعض بإصبعه طلعت خالة رضية وراه والبنات مشيت
وياهن اريد اسمع كلامه : فهمني يمه الله يخليك شبي ابني شبي .

كــانـــون : مصدوم يايمه والله مصدوم بحالو هذا تَـــمــوز
القوي هيچ صار حالو هذا السبع مالتنا ينهد هيچ وسفه .

رضية: دايس ؏ شي نگس ومو زين لو ابوك مسوي شي
خايفة علية ساعدة لا تعوفون ابني هذا اخيك ماعندو غيرك .

كــانـــون : صدگ تحجين يمه هذا عضيدي حالو من حال دركْان
وتموز اقرب ألي من اخوي ، هساع نشوف حل الموضوع
ما ينسكت علية خايف علية ومحمد .

بعدهم يحجون وماشوف غير الردم والضرب والركض
التفتت وتموز يدفر بالبيبان ويركض ودوهان
يصيح: كــانـــون اگضبوووووو لا يطلعععع .

تَـــمــوز : اجاني دخلوا علينة ولككمممممم .

صار كــانـــون جدامو يعارض طريقة
صاح بصوت موزون ثابت : شبلاك .

تَـــمــوز : كــانـــون يريدون يحرگون الغرفة ويقفلون الباب
لازم نطلع اسمع مني الله يخليك طلعني من هين .

كــانـــون : محد موجود بالبيت بس اني وامك وعوائلنا .

تَـــمــوز : اريددددددد اطلععععععع طلعوني بعد ما اگدر اتنفس
ضاق صدري بس طلعني شبلااااااااااااااك .

اخذ ايدو وسحب كرسي وگعدو : اگعد أتنفس بالگراج هين
واني ودوهان يمك وهاك اشرب جكارة خلي نسولف .

دار علينة اشر بيدو وحرك راسو
_ ادخلوا جوة نريد چاي نشرب احنا وتموز .

هو يسولف بس تَـــمــوز يتلفت مو طبيعي ابد مو طبيعي
خايف لدرجة لازم ايد دوهــان وهو گاعد ويرجف
واني والبنات نرعش خايفات نتلفت ؏ اقل صوت
كــانـــون يمثل الثبات بس عيونه تسولف هز راسه
وگعد وياه دخلتنا خالة رضية وراحت تجهز بالچاي
بقيت اني والبنات نتابع الوضوع من الشباك
كــانـــون : الله بالخير تَـــمــوز .

رفع راسه للسماء وجر نفس هلكان
مسح وجهه : تعبان راسي يوجعني خبلوني بس يحچون براسي .

كــانـــون : شنو يريدون منك .

تَـــمــوز : اموتكم .

كــانـــون : يريدون تموت عائلتك ؟

تَـــمــوز : واحرگ روحـي .

كــانـــون : دحگت أشكالهم ؟

تَـــمــوز : اي ضباب اسود بشرة محروگة داير ما دايرهم نار
محاوطين الجن العملاق جيش من الأقزام يريدون يضربوني .

اثناء الكلام الجوامع القريبة علت الأصوات بالأذان
ولكل بصوت واحد ينادون : الله اكبر الله اكبر .

كــانـــون : نصلي اني وياك .

طلعت خالة رضية بيدها الچاي اخذ كــانـــون استكان
وبصوت واضح نبهه : تَـــمــوز چاي .

اخذه منه ورگع الگلاص بالحايط ورجع ؏ صينية
گزاز بيد أمة سحبها هي والگلاصات شمرها
؏ جسم خالة رضية الصراخ صار يرج بالبيت
دوهــان دفعه ؏ حايط بس يريد يسيطر ؏ حركته
وهو تهستر عيونه حمرة دممممم يصرخ
_ تمووووت مووووتي اريد اموتهههههههه .
دفر دوهــان وهجم ؏ خالة رضية لزمها من
ملابسها رجعها ؏ باب ورفع ايده يريد يضربها بوكسات ..

يتبع ...

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وعلى آل محمد