رواية تجبر أحفاد الــ دليم الفصل الخامس عشر 15 - بقلم اسـاور حسين 🦢✨

تَــجــبـر أحفاد الــ دلــيـم🦅
بقلمي : أساور حسين          
المُلْتَقَى _20_

لگيت الدنيا ما تنحب
حزن ودروب ما تنطب
درب مكتوب بي نبچي
ودرب مكتوب بي نتعب .
<><><><><><><><><><><><><><>
تَـــمــوز ...

_ كــانـــون شد حيلك قصتنا مو بسهولة تنتهي .

صكت اسنانو وايدو متمسكة بيد ذَهــب
نگلبت عيونو وفقد الوعي ، دخلت
امو وعماتي يتراكضن .

دوهان: أرفعووو دمو راح يخلص لا تظل مصدوووم
يوووول تَـــمــوز مو احجي وياك صحصح .

تَـــمــوز : يولوووو اليوم رجعناك من الموت
وداعش ما تمكن منو ، شنو رد حتى ينغدر من ابووووووو .

دوهان: يول الله مو وگت حچي لا يروح بيهه استعجل .

وكفت روحـي فرفحت من منظر كــانـــون 
ماعندي علم شنو سبب الضربة ، بس استرجعت 
أيام محفورة بذاكرتي ماتنمحي للموت .

فقدت هجمت ؏ فراس گضبت قميصو
وصرخت بعلو صوتي : كلامي حلقات ركبهن بأذنك
هذا الإسراف بالظلم انهي من جذورو وما تطفىء
نار گلبي اذا ما ادحك ادموعك مبللة خدك
وما انحسبت ؏ زلم اذا ما أكسر كبريائك
واخلي رتبتك هي والگاع .

دفعني وطلع من البيت
ركب سيارتو حتى ما فكر يساعد ابنو
التفتت كــانـــون رافعي دوهان وتُــمــيم من الأرض
وشغلوا السيارة ركبت بصف كــانـــون أرتعش
من الخوف ومن الغضب ، رفعت راسي ؏ دوهان
يضرب بالستيرن ويصرخ: عاجبكم الوضع تخردلت
أحوالنا بسبب ارهابية .

ضربتو بطرف اصابيعي ؏
راسو وعطت : انتَ عليش ماتنجعم وتسد اثمك
ما فاهم وتريد تصير معلم ، بابا لاتسمح الفراس
يغسل دماغك هذا انسان جذاب ومخادع .

دوهان: تَـــمــوز انتَ افتح عيونك من يوم دخلت ؏
بيتنا نهجم هجممممممم ، قُــسـم بالمستشفى حالتها بالويل
وهساع كــانـــون فاقد ومانعرف اذا ينجو لو يروح بيها .

تَـــمــوز : والبنية شكووووووو يولووو حرام عليكم
گلبكم مابيَّ رحمة هاي لا حول ولا قوة داعش
استخدموها ضد كــانـــون وخاطفين إخوانها
خلي نفسك بمكانها اخوانك مخطوفين
بيد ناس ما ترحم انتَ شلون تكون رد
فعلك معقولة تكتف ايدك وما تساعدهم ؟

دوهان: اساعدهم بس مو ؏ حساب قتل ناس بريئة .

تَـــمــوز : وذهب ما قتلت بالعكس هي تعذبت
دخلتها تحقيق صاحت الويل منووو
تحملت معاملتنا وهجوم وخدمة عائلة الدليم
وداعش والضغط النفسي ، وأخوانها المعذبين
ساعدتنا بمعلومات مهمة تخص داعش
وتخلت كل هل فترة عن إخوانها الخاطر كــانـــون .

نزل من السيارة قبل لا يجاوب صاح ؏
دكاترة طلعوا اثنين يركضون ، صعدنا كــانـــون
؏ سرير المستشفى وركضوا ركض بي لداخل
المستشفى فات طوارئ منعوني أدخل بقيت آني وياهم
خارج غرفة الطوارئ ، لحظات ودخل جدي وعمامي
ابو دوهان وابو تُــمــيم يستفسرون عن وضع كــانـــون
عفتهم ومشيت بعيد ما أريد أسمع أصواتهم كلهم باطل .

دخل دكتور وممرضين اثنين أعصابي تلفت من الانتظار
الف فكرة براسي ، أريد أعرف هل مستگحـ*** عليش
ضربو راح اتخبل منو حتى ابنوووو من دموو ولحمو
ما خلص من شرووو .

فكيت باكيت الجكاير تذكرت أنـه بالمستشفى
رجعتو ورفعت راسي طلع الدكتور رحت
بتجاهو جدي سألوا: بشرني دكتور حفيدي شلونو .

الدكتور: ضرور يتحول ؏ الجملة العصبية الضربة
خطرة جدًا سيطرنا ؏ نزيف وفتح الجرح عميق
14 خياطات حتى نغلق الجرح تمامًا الى ألان فاقد الوعي .

تَـــمــوز : بس أحتاج إسعاف نحولو المستشفى الرازي الأهلية .

الدكتور: الأفضل ينتقل بسبب الأوضاع أغلب الدكاتره سافروا .

هزيت راسي كتب ورقة تشرح حالتو وجهزنا إسعاف
طلعوا كــانـــون مغمض عيونو فاقد الوعي تمامًا
انتبهت ؏ جدي من دحك كــانـــون رفع تلفونو وأتصل
وبعلو صوته الخشن صاح : انعل ابوك لابو تربيتك
يووولوووو ابنك وصلتوووو للموت وينككككك هااااا
وينك حدر غطي مصيبتك لا يصحى وهو محمل عليك
يعترف منو ضربو وينهي حياتك بكلمة منووووو .

تركتو يصيح وصعدت اني ودوهان وتميم بسيارة وجدي
وعمامي بسيارة ثانية ، وقبل لا توصل الإسعاف دخلت
؏ مستشفى واتفقنا وبلغتهم حالتو ، دخلوا كــانـــون الغرفة
خاصة بالجملة العصبية كل انواع الفحوصات تمت خلال
ساعات قليلة بس كملوا دخلوا الغرفة خاصة يرتاح بيها
فتت اني وعمامي وجهه كانون اصفر مثل الميت
نقبض كلبي ولعت النار بروحي .

تَـــمــوز: شوكت يفتحون تحقيق اريد أدون اقوالي .

ابو فراس : انجعم يولوو ومحمد انعل هيد هيداك بس
تفتح اثمك ، تريد تحبس عمك ؟

تَـــمــوز : الله يطيح حظ هيج عم ساقـ*** منحط ، خبيث
وانتَ مو تصيح كانون عزيزي عجل ماتتصرف وتبين محبتك
لو بس تبيع كلام براسي ، شاطرين بالكلام فاشلين بالأفعال
وهذا اكبر فرق بيناتنا أحفادك عدهم دهاء الأفعال .

دفعني ابو دوهان وصاح : يمعثور ومحمد السانك اقلعوووو
من مكانوووو بس تسب عمك ، ماينلام فراس بيك
من يعذبك كلب وتظل طول عمرك كلب .

تَـــمــوز : يول ومحمد لآن عمي وابو دوهان أنـه ساكت
وأحاول ابلعها بس قضية فراس ما اعبرها
وياخذ جزاتو مربعععع .

ابو تُــمــيم : لا تنسى تريد تلعب انتَ وفراس
تعرف فراس بتوقيع واحد يخليك تعبر المريخ
استر ؏ نفسك عمو استر ؏ نفسك ابني .

تُــمــيم : يعني إنتوا راضين ؏ عمي فراس
مقتنعين بالصار بكانون ؟

ابو تُــمــيم : ابني اب وابنو إنتوا لا تدخلون بيناتهم
يتعاركون ويتصالحون وتطلعون بالوجه الأسود .

تَـــمــوز: الله يصخم وجوهكم اذا صدك تحچون
والله خزززي انتوووو عاااار عااااار .

ابو فراس : انتَ تريد تجاطني اطلععععع برة مو ولد مصيبة
وگعت على راسي يولووو شتريد من عدنا عدو ومربي بنص
بيتي ، يول أدور الزله على عايلتي .

قطع المشاحنات دوهــان من تقرب
على كــانـــون وضحك : گعد الدلوع
شبلاك يولووو هو طبر ماتتحمل طبر لو سيف شسوي .

بحث بعيونو داير ما داير الغرفة
رجف صوتو ونطق بصعوبة : ذ ذ ذَهــب ويـ وين ؟

دوهان : بالبيت ارتاح انتَ وصير زين حتى ترجع
تنور بيتك وعمي بعد ماناخذ ذهب منك طلعت واگع
على وجهك جفي .

كــانـــون : طلعوني للبيت ، دوهــان تموز طلعوني .

ابو فراس : لا جدو بيت شنو تحتاج مراقبة وضعك
ما مستقر شد حيلك وطيب  بسرعة وتطلع البيت ما يطير .

كــانـــون : تَـــمــوز وينك حدر بسدي .

گضب ايدي بس متأذي الى درجة
الكلمة ماتنفهم منو أله إقترب: گلبي ما مطمئن
عليش عفتوها وحدهه انتَ ماتفكر غبي انتَ أبوية ياخذهه
لو يأذيهه .

تَـــمــوز : واتركك وحدك تصارع الموت يولو أنـه من دحكت
دمك فقدت تركيزي ولو بيدي اطير بيك للمستشفى
صاير ولا استقر شوية والله يحولني غراب ؏ هل افيال .

صفن بوجهي رفعت ايدي ؏ وجهي وهمست
_ مو بيدي هاي مشاعري تفصل تفگس ام الحزن
المهم صعب اخليك وحدك .

كــانـــون : اطلع الخاطري ذَهــب أمانتك الى آن أطلع
وانه أعرف أتصرف وياهم بطريقتي .

تَـــمــوز : تأمر يجرالك ، تُــمــيم عينك ؏ كــانـــون
دوهان أرجع للمستشفى قُــسَـم تحتاجك ، أنـه راجع للبيت .

طلعت أنـه ودوهان وصلني للبيت
مشيت البيت كــانـــون دگيت الباب
ماكو رد رجعت على جرس وهم ماكو
صوت فكيت البوب ودخلت الدم ؏ حالو
بالأرض ، والطبر مشمور كلو دم
دفعت باب الاستقبال مفتوح
ما دخلت وكفت وعليت صوتي : ذَهــب .

كررت اسمهه اكثر من مرة ماكو ، تشوش عقلي وقلقت
دخلت بالحذاء للبيت وبقيت اكرر اسمهه ، وصلت للغرفة
فكيت الباب ماكو ذهب ، ضعت وضعف موقفي
ركضت صعدت الدرج دورت الغرف الباقية وماكو اثر
عضيت إصبعي ونزلت قفلت كلشي وطلعت اركض
دخلت بيت العائلة وصحت بصوت مسموع
بكل ركن البيت : وينكممممممم
يمممممممممهههههههه ووووووينج .

طلعت امي تركض رفعت ايدهه مصدومة
رضية : خيرك يمه اسم الله الرحمن عليك
خييير بس لا كــانـــون صار علية شي ؟

تَـــمــوز : يممممه ذهب وين ؟

ضربت ؏ وجهه وصاحت : وانه شعرفني يمه فدوة
اروحلك بس يواش افتهم منك ذهب مو بيتك  ؟

تَـــمــوز : ماكوووو بالبيت ، من اخذت كــانـــون
انتِ ونسوان عمامي موجودات اكيد تعرفون وين .

طلعت جدتي ضربت الگاع ثلاث ضربات بالعوجيه
وبكلمات باردة وأنفه صاحت : يالمعثور حسك لا تعلي
بنص بيتي ، وأنتَ وذاك النام بالمستشفى طلعوهه
بت داعش من راسكم لآن آخذت جنطتهه وشمرتكم
وراهه وراحت الجهنم .

تَـــمــوز : وهاي جنهم وين صايرة بالضبط
دليني مكانهه جهنم فراس ؟ لو جهنم داعش .

رفعت راسهه وبشموخ استرسلت بالكلام: لا دوخ راسي بيهه
وبشرني ابن عمك شلونوو .

أقتربت منهه اكثر وصحت
وشعور الذنب تمكن مني : جدة اذا كــانـــون عرف بذهب
ماكو مايحصل خير ومحمد يهجم البيت فوك روسكم .

ضربتني بالعوجيه بكل حيلهه وصرخت : تخسسسسي
انتَ وهووو تالي عمري احفادي يهجمون بيتي
رضية طلعي ابنچ لا وحق من خلق السموات والارض
ارجعكم الأيام الضيم .

تَـــمــوز : ايــــــــــام مرررررت بعد ماتعود
جنت صغير وهساع أنـه بفضل تجبركم بنيت
گلبي من فولاذ وعقل يعبر عقلكم بالطغيان
ترمون امي بمي ارميكم بنااااار احذرج مني
اني زايح العيب وبايع الاخلاق بمبالغ عالية .

تركتهه وطلعت عاطت بعلو صوتهه
- متندمة لان حاربت فراس بيوم
راد يموووووتك يا عااااار رجعك ميت
هههههه تتذكر المااااضي لو أذكرك .

استمريت امشي والذكريات داهمت عقلي
كالكابوس أرتعد گلبي صعدت بالسيارة
جسمي تصلب غمضت عيوني خاضع
للماضي ورجعت بيَ الذاكرة العمر 8 سنوات .

رفعت أكمام قميصي آثار الحروق
بكل مكان وصوتي يتردد بأذني: عمو عوفني أبوس أيدك
بعد ما اعيدها والغرفة ما أدخل بيهه ابد والله .

بيدو الجكارة وملامح وجهو مرعبة
اقترب وشراين عيونو حمرة بارزة: تعيدهه قبل حلفت
ماتدخل الغرفة وماتاخذ فلوس بدون علمي ورجعت كررت
سوالفك التعبانه تريد تسوي مشاكل وبلبله .

بكل تحكم كضب ايدي والجكارة طفاهه يـ معصمي
وسعت عيوني وبقيت اكمز من الوجع
طفل بلا أحساس اكبر امان عندي ابوية
أول شخص يذكرو لساني هو :بوية ساعدني
يابهههههه ، الله يخليك عمووو بعد ما اعيدها
والله يوجع الحرق ومحمد يوجع ابوس
رجلك بس روح منا بعد ما اخليك  تدحك وجهي
ولا تسمع صوتي .

رجع شغل الجكارة ورجع كرر الحروق
بمكانين من أيدي وشمرني اناشغ روحـي
أنسحبت مني ورجعت كضبت ايدي احرك
بيهه وارافس بالگاع .

فراس : من احجي بعد وياك تحترم
وتوگف مقابيلي كالصنم تسمع وتنفذ
حتى اذا انطيك آمر تموت نفسك تموتهه
وممنوع منعًا باتًا توصل الباب غرفتي بليل
وتبچي وتصيح امك من تدحك عمك بالغرفة
لا تمر من ممر الغرفة تفتهم لو أفهمك .

من الوجع جسمي يرعششش وجهي
غرگ بدموعي : بس هساع اريد امي ايدي
توجعني عمي بس والله بس يختفي الوجع
أروح منهه مو اخاف الوجع يموتني  .

ضاق صدري عصرت أيدي
ونزلت من السيارة أنفض أفكاري دخلت للبيت
قبضت أيدي المحروگة ورگعتهه
بالحايط بوكسات متكررة الى ان
رجع الوجع بيهه : توسلت بفراسسسس بسببج
كل يوم تذكريني بعذابيييييي لو اگدر اقلعچ من جسمي
ما اريد ادحك الحررروق ما اريددددد اتذكررررر
تعبتتتتتت من الماضي تعبت هلكت .

شلت التلفزيون إضرب بالحايط
الى ان صار فتات تناثر بالأرض
مثل ما تناثرت روحـي بأيام الماضي
- شوكت أنسى ، إلى متى أظل انتكس من يذكروني
شوكت اخذ بثاري منك يا فراسسسسسس يايوم
اضربك بعزيز گلبك وانهي كل مستقبلك بيدي هاي .

دنجت ادحك ايدي ورجعت استند ؏ حايط
إضرب براسي خفيف أطيع أفكاري
مرجع نفسي الى طريق الانتقام من جديد
شجعت نفسي مثل كل مرة وانه اتخيل فراس سقط إمامي
طلعت للكراج رفعت راسي صارت الكاميرات مقابيلي
رجعت صعدت فوك فكيت الابتوب موجود بالغرفة
رجعت التسجيلات وطبعتهن أقراص 8 نسخ
بقيت اركز بذهب بالتصوير بس صعد كــانـــون بالسيارة
اخذت الجنطة وركضت وهي تمسح بدموعهه
ضربت ؏ رجلي وصحت: اي وين رحتي ياااا غضب وين
شحجي الكانون وشلون يقتنع انتِ بخييييير .

قفلت البيت وطلعت بالشارع وينچ  ذَهــب وينچ
منين أبدي أبحث عليچ ، صعدت بالسيارة وحركت
توجهت للدوام وبراسي غاية ، نزلت اشرت للمفوض
اجه يركض : آهلًا وسهلا سيدي أمرني .

تَـــمــوز: أركن سيارتي لحظات وطالع ما أتأخر.

_ تأمرني امر سيدي بالخدمة .

تركتو ودخلت للمديرية قاصد مكتبو
بدون استأذن دخلت أضحك: ابنك بالمستشفى وانتَ هين
عايش دور لواء شريف عفيف مثابر مجتهد .

فراس : اطلع برة لا اخليهم يسحلوك انتَ والرتبة يشمروك
برة المديرية وأخلي سمعتك تحت الحضيض .

تَـــمــوز : آني انزلك بالحضيض وروح أبوية
ألي ما اخذت بثأرو لليوووووم .

فراس : تخسي يالهِتر انتَ تنزلني ما بالحيف .

تَـــمــوز : يخسي شاربك ، والحيف هذا يفيدك
بعد شوية ، اريد اخذ هذا القرص وبسررررعة
بأمر مني شغلو وتدحك الفلم بعيونك .

فراس : تطلع برة لا ومحمد ازين شاربك .

تَـــمــوز : نصيحة مني شغل القرص قبل لا اطلع
وأسلم النسخ العندي للوزير ، او للوكيل اي واحد يصير مقابيلي
انه عايش حتى انتقم منك .

ضعط ؏ اسنانو اعصابو تشنجت
ضحكت وبصوت واضح تشمتت : يولوووو بعدك ما دحكت
القرص وجهك انخطف لونو ، وأعصابك تحولت من الحالة
السائلة الى الحالة الصلبة اذا تدحك تنجلط لو تموت .

شغل الفديو رفع عيونو صايرة حمرة دم
نقبض گلبي وتذكرت عيونو بذاك اليوم
ببتسامة جانبية رديت بنفس نبرة صوتو
المستفزة: اباااااااااه وگعت بيدي يا فراس .

فراس : هذا خرط ابني كــانـــون يتنازل ويسقط التصوير  .

تَـــمــوز : ماتهمني القضية والسجن اعرفك تطلع منهو
الأهم عندي الفضيحة وسمعت فراس الصارت بالحضيض
بعد ما انشر الفديو بكل مكان .

هجم علية بلحظة ضربني بوكس
رگبتي طگت عدلت نفسي وبصوت
وأضح استرسلت بنتر : نسولف بالمفيد شنو رأيك ؟

فراس : احجي بسرعة لا ومحمد ادير
عليك نفط واحرك الخلفوك .

تَـــمــوز : لا تذكر اهلي يول هذولي أسيادك يا فاشل .

گعد ؏ تخم مخلي للضيوف يلهث
بالنفس ، وايدو يضغط برجلو يصبر
نفسو ؏ فضيحة: شنو تريد خلصنييييي .

توجهت للمكتب گعدت وطبگت رجل ؏ رجل
شغلت جكارتي وبصوت ثار اعصابو
كملت : لالا اريدك تحچي بكل أحترام
وكرر ورايَّ ، نقيب تَـــمــوز بشنو تأمرني .

دفر الطبلة وصراخ بصوت
رج المديرية : يوووولوووو لا تلعبببببببب وياااايييييييي
اندمك ومحمددددد .

وكفت بكل برود اخذت باكيت الجكاير
واحجي وانه أعدل بالبنطلون: براحتك ما أجبرك
أحسن حل الأكبر مني يتصرفون وياك .

مشيت وانه اضحك واتبختر
وصلت للباب اول ما أنفتح نتر : نقيب تَـــمــوز بشنو تأمرني .

رجعت سديت الباب ورديت بتكبر : اممممم لا مع الآسف
ماعجبتني أريدها بطريقة أجمل .

وگع ؏ تخم ستهضم هو بتجبرو يتوسل
وينزل راسو الأخر شخص يفكر ينزل
من نفسو ويتوسل بي : عيب عليك أنـه بمقام ابوك
عليش تسوي بيّ هيج تعاملك ويايَّ ما يرضى الله  .

تَـــمــوز : اياك تقارن نفسك بـ ابوية ، يول ابوية تاج
؏ راسك ، والعيب عليك من تعذبني وتحرمني الطفولة
تعرف كلش زين أنـه عليش اتعامل وياك بهل طريقة
لا تغشم نفسك .

بتوسل كرر كلامي وهو منزل راسو
فراس : نقيب تَـــمــوز بشنو تأمرني .

تَـــمــوز : اطلك امي .

سحبني من ملابسي وشمرني ؏ تخم
وگع عليَّ بضغط ؏ رگبتي بـ أثنين
اديناتو : بعيده ؏ شواربك عشرة عمر بيني وبين امك
تجي ؏ جاهز تريد اطلك مهبول انتَ روح بابا شنو ؏ بالك
تسوي سووووي طلاك ما اطلك .

گطع النفس مني ما قاومت بس استمريت ؏
نفس أسلوب الجمود وعدم الاكتراث : متابع چثير أفلام
اكشن من يحاول الشرير يچتل البطل يستفزو من يبلغو
اذا تموتني اني تركت النسخ الباقية عند شخص
خلال يومين اذا ماتواصلت وياه يوزع الفديوات .
وأحب ابشرك النسخ بيد بنية ماتهتم للحياة
يعني سُمعت فراس بخطر لطمي يا جدة وگع بيهه ابنچ .

شمرني ونهض ضرب التلفون بالحايط
وصاح بضعف: مهما كان أنـه عمك فضيحتي من فضيحتك
والمصيبة من تصيبني تصيبك ، مع ذلك اني مستعد أنفذ
كلشي تأمرني بي ، بس مو بسبب تهديدك لا اكيد أنـه
ما اتهدد بس لان أعتبرك ابني واني غلطت بحقك بالماضي .

تَـــمــوز : اطلك امي غصبًا ما عليك
صار چثير امي ؏ ذمة خبيث خسيس
وما مقدر النعمة وما صاين العشرة
انتَ تعرف مقصد كلامي بـ ما صاين العشرة .

فراس : خربطت چثير تَـــمــوز لا تخليني افقد عليك .

تَـــمــوز : اقصد النسوان الي عندك علاقة بيهن
زواج المتعة ، وملاهي بغداد ، امي تستحق
شخص نظيف طاهر مثل شخصيتهه الطيبة .

غلق إذنو وگعد ؏ ميز ارتداع عن السمع
وأمتنع عن الكلام كملت طلبي بكل سلاسة
تَـــمــوز : يومين مهلتك غيرهه أنفذ وانت بعد براحتك
وأزيدك علم بس اخلص من موضوع امي الأهم نرجع
للمهم وهذا الطلب تنفذو ورجلك فوك راسك افتههههههمت ؟

هز راسو بالقبول ورد بصوت غليظ
فراس : خليني بحالي تَـــمــوز تريد تجلطني تعبت ابني
أنـه بس افكر يومين ويجرالك .

تَـــمــوز : هو غصبًا ماعليك وعلى شواربك
تنفذ وانت الممنون ، ومرة الثاني اذا تگول ابني
اعتبر التهديد تنفذ .

ماكو أنسان ياخذ مكان الاب
الشخص اذا مات ابو لا يتوقع يلتمس حنانو عند بشر ثاني
الاب خيمة ومن توگع ما تنرفع
من يموت الأب أنسى احد يطبطب على ظهرك
وصوتو تبيع عمرك وتسمعو 
والصور تصير عزيزة
ينتهي الامان ويبقى ذكرياتو اجمل حلم بحياتك
وأكبر امنية تتمناهه تلتقي بي بحلم
وحتى هاي تصير صعبة وما يزورك 
تريد انتَ تنطقها وما تعنيهه وما تعرف
شنو معنى كلمة اب ، اوووف اذا يرجع واشكيلو
افعالكم بيَّ منين ابدي وين انتهي 
للموت ما أنسى تابوت ابوية من دخل للبيت للموت .

طلعت منهار اخذت السيارة جنت اتمنى تنزل ادموعي
وأخلص من ضيق صدري وما صارت ، حتى عيوني
تحاربني بأبسط حقوقي ، بقيت أفتر بالمناطق حتى
ما اعرف وين متوجه اريد ادور بكل مكان بس
أبتعد من عيون كــانـــون .

رجعت للبيت بوقت متأخر بقيت بالشارع
من هوسة أفكاري ما اعرف بشنو افكر بالضبط
جريت نفس اخذت جكارة وشغلت سيارتي
مشيت ومشيت الى ان وكفت مقابيل بيتهم
ابتسمت بتعب وهمست : ادحك بوجهچ وتبرد جروحي
يمچ اهمل وسواس أفكاري وتستقر .

إتصلت بدون أنتظار بقيت اخابر بس رد ماكو
ظليت مركز بالبيت نزلت جسمي بمجرد
ما أتذكر عيونهه الحادة وتقاسيم جسمهه
افصل عن ألعالم والابتسامة ماتفارگ وجهي .

عدلت گعدتي ؏ طرقات هادئة ابتسمت
وفكيت ألباب اناظر جمالهه : ومحمد الله تعبان بشفايفچ .

ضحكت بصوت عذب
ذوب كل ذرة بجسمي : قابل مثلك كورك وشمرك ؏ اهلك .

تَـــمــوز : زلمة ماينعاب بس انتِ الضيمممم
واحد ياخذچ كلشي ما يسوي يكتفي يخليچ بمعرض
ويصفن بوجهچ وشعرچ السرح جعلني خصلة
تلعب ؏ خدچ وشفايفچ .

كازو : تحترم نفسك وكافي غزل لا
والنبي إنزل وبعد تحلم تشوف وجهي بعمرك كله
اوووييييييي شكد صلف .

تَـــمــوز : ومحمد اللهجة البغدادية عتتني عت
بوية انتِ عذاب يمعثورة عذاب .

كازو : اني عذاب ؟

تَـــمــوز : ربي كل يوم عذبني هيچ عذاب
أنـه قابل وراضي بس عذبني .

تحمحمت وهمست بصوت خافت
يجذب إنتباهي: شلونك اشوف وجهك تعبان .

بلعت ريگي ورديت وانه أشغل جكارة
واخذ نفس طويل منهه : عندي مشاكل .

كازو : اگدر أساعدك ؟

رجعت شعري بيدي وتقربت عليهه
اركز بعيونهه وعيوني ذبلت من دحكت عيونهه
تَـــمــوز : الصراحة احتاج مساعدة منچ .

كازو : انتَ صاحب فضل عليَّ
احچي شنو تريد اذا اگدر ما اقصر وياك .

مسحت وجهي بيدي وصفنت بشفايفهه
أشرت بيدي تقترب أقتربت اكثر
طلبت بصوت يرعش من الضعف: تسمحيلي ادحك وجهج
كل يوم وانه بعدها لو تريدين روحـي انطيچ .

كازو : أعتذر آني عندي دوام الصبح وبليل شغل
ماعندي وگت السوالف المواعدة .

تَـــمــوز : شغل سمسمة مووو؟

كازو : اي صح  شغل سمسمة .

تَـــمــوز : مايحتاج أنـه ادورلچ شغل مناسب العمرچ
وبعد لا تروحين البيت سمسمة ، هناك بس الـساقـ ***.

رفعت حاجبهه وابتسمت بخبث : أعتقد انتَ جنت تروح
هناك يعني انتَ واحد من الساقـ**** .

تَـــمــوز : كازو اگضبي السانچ من تحچين ويايَّ
لا ومحمد افقد اعصابي عليچ و...

رفعت ايدها وصاحت بصوت
عالي بس يوصل الأذني عذب : وو شنووو هاااا و شنووو
تهدد حضرتك ، ما مجبور تتحمل الساني انتَ اجيت
الباب بيتي مو اني يا نقيب تَـــمــوز .

تَـــمــوز : يول الله راح تخبليني
عليش ماتقبلين تبطلين من سمسمة
يا بنت الناس مكانچ هناك غلط وخطر
عليچ وعلى عمرچ أنـه احجي من خوفي عليچ .

كازو : أحتاج مبالغ سمسمة وماكو شغل ينطيني نفس المبلغ
اني باليوم اخذ 250 ومرات أكثر .

تَـــمــوز : تحتاجيهن ؟

كازو : أجمع فلوس أريد أشتري بيت او شقة صغيرة
نعيش إني واخواتي ونخلص من الذل ،  والضرب ؏ أتفه
الأسباب ، والإهانة إلي ماتخلص والتحرش اليومي
والابتزاز المستمر ، انتَ حقك تلومني
؏ شغل سمسمة بس بالنسبة إلي ارحم من هذا البيت .

تَـــمــوز : اذا تكملين بهذا الشغل تخسرين نفسچ
يولو هناك عصابات وأشكال ألوان موجودين
تروحين بيها .

كازو : لعد شلون أعيش هااا من ام البيت تريد فلوس
مني واني ماعندي شنو تبريري احسن أنام بالشارع
أني واخواتي .

تَـــمــوز: اذا توفر سكن انتِ وياهن تتركين سمسمة ؟

كازو : طبعًا ، اني ما فرحانة بهذا الشغل بس مضطرة
ولا تگول اكو هواي شغل اعرف اكو چثير بس مو مثل
مبالغ سمسمة .

تَـــمــوز : أحتاج مهلة كم يوم ارتب وضع البيت
ونتفاهم أنـه وياج .

كازو : بس بعدني ما جمعت غير ربع مبلغ البيوت.

تَـــمــوز : لا البيت بيتي مايحتاج تدفعين.

كازو : وشنو تستفاد ، وين تريد توصل تَـــمــوز
اذا تفكر من تشتري بيت لو تساعدني أسلمك نفسي
تحلم الف مرة عدتها عليك اني مو طعم سهل .

جسمي كلو نحل ، فقدت الشعور بالكون
وركزت بكل تفاصيلها خدر عقلي قبل
جسمي رديت بصعوبة : تقبلين تتزوجيني كازو أنـه
مستعد نتزوج ونعيش أنـه وياج بيت واحد ؟

تجمعت الدموع بعيونها رفعت أيدها ضغطت
؏ شفايفها وصاحت بوجي وأيدها الثانية
تريد تفتح الباب : وتآخذ حاجتك مني وغايتك توصلها
وتمل مني وتشمرني بالشارع أني واخواتي هذا تفكيرك
وأضح وضوح الشمس ، غايتك ويايَّ شهوة عيونك تحچي
وتصرفاتك ، انتَ لو نيتك شريفة ماتصرف بهل طريقة
وياي ؏ اقل احترمني واحجي عدل مو ، أستغفر الله .

نزلت من السيارة فكيت الباب وركضت
سحبتها من ايدها دفعتني عطت بيها: بس نتفاهم
لاتروحين عصبية وروح ابوية نيتي شريفة وياچ
يا بنت الناس اريدج ؏ سنة الله ورسوله
واجي اخطبچ رسميًا شرعًا وقانونًا .

كازو : طلبك مرفوض ، ما اتزوج شخص يعرف
الماضي مالتي وعلى اقل مشكلة يعيرني بشغلي
أنسى كازو تَـــمــوز طلعني مو راسك .

سحبت أيدها مني وراحت تقدمت اكثر
ورديت بصوت مسموع واضح : اسمعيني زين انتِ
يا آما تصيرين ألي لو تنتهين .

رجعت علية ضربتني ؏ صدري
وصاحت بصوت خافت بس
ملامحها عصبية: لا تهددد لا اموتك لا تهدد
لو تموت ما اصير آلك اعناد بيك .

تَـــمــوز : كازو ثقي بالله ما أفرط بيچ لو ؏ موتي .

كازو : توكل وبعد اياك تشوفني وجهك .

دخلت للبيت بقيت لحظات فاقد التركيز بالكون
رجعت للسيارة اخذت بطل مي غسلت وجهي
بالبرد وبقيت اخذ شهيق وزفير حبست انفاسي
بنت الأوادم ، شغلت السيارة وطلعت اتذكر كلامي
وياهه ومصدوم من نفسي معقولة صدك أريد
اتزوج كازو ؟؟

أستنكر كل مشاعري أخاف كلامهه صحيح
انه أحتاج كازو بس ما متأكد من مشاعري إتجاهه
أحتاج تفكير هذا الموضوع غلط اتخذوا بلحظات
ضعف مني .

دخلت للبيت صعدت والوقت متأخر الكل نايمين
اخذت حمام سريع ونمت فاقد من التعب رجعت
من الواجب للمصايب حتى راحة ماكو .

بس صار الصبح بدلت وطلعت بدون اكل
للمستشفى فكيت باب غرفة كــانـــون
كاعد متأذي من راسو ، تُــمــيم نايم
دخلت وسديت الباب : صباح الخير ابو سمرة .

كــانـــون : صباح النور بشرني ذهب شلونها ؟

تَـــمــوز : ادري شبلاك مفطوم ؏ ذهب
بعدنا يا الله توني دخلت خليني أطمئن عليك.

كــانـــون : يا تطمئن يمعود گلبي نار تركتها وحدها
يولو هاي أمانة والله أستحي من عزيز.

تقلصت ملامحو واضح الوجع قوي
خفت لا يتعرض الصدمة بقيت ساكت
عن الموضوع وغيرتو : بشرني انتَ شلون صرت ؟

كــانـــون : بعدني راسي يريد ينفجر
والخياطات ماتخليني اخذ راحتي .

تَـــمــوز : انتَ مطلوب ذاك اليوم أنفتح راسك بالمداهمة
والبارحة طبروك من بداية رگبتك للنهاية شسالفة .

كــانـــون : الحمد لله على كل حال المهم
أريد اطلع اليوم ضروري إطلع من المستشفى .

ارتبكت والخوف وأضح على وجهي والله
اذا يعرف ذهب من البارحة ماكو يقوم قيامتي
حاولت أستفيد من الوقت قبل لا يطلع أبحث
مكان ذَهــب وعندي امل ترجع قبل لا يطلع
كانون ويكشف الموضوع : تدلل بس أرتاح بين ما أروح
ادحك الدكتور وينو ، أتأكد من وضعك زين وتطلع .

غمض عيونو تعبان الى درجة
رحت للاستعلامات سألت عن
الدكتور أجت وياي ممرضة
اخذتني للغرفة دكيت الباب
ودخلت : يا أهلًا بحماة الوطن .

_ آهلًا بيك دكتور شلون الأحوال .

_ والله ؏ هل أوضاع مو زينين ، المستشفى قل كادرهم
وحتى احنا كم واحد راح نطلع من الانبار .

_ حقكم بس ان شاء الله فترة ونسيطر على أوضاع
دكتور أريدك اطمني ؏ وضع الرائد كــانـــون .

_ الرائد كــانـــون سيطرنا ؏ جروحو
وماعندو اي مشاكل حاليًا بس الراحة
ضرورية وحتى نتابع حالتو يبقى هل يومين
بالمستشفى الى ان يلتئم مكان الخياطة شوية.

كمل كلامو ورجع تذكر موقف
فواصل الحديث مستعجل .
_ وقبل لا أنسى البارحة اثنين ضباط
دخلوا ؏ رائد كــانـــون بخصوص
الحادث وبلغهم تعرض الاغتيال من
قبل عناصر تنظيم داعش .

ردت أنفجر مقابيل الدكتور هذا
كــانـــون يريد يخبلني رسمي
يعني حاول يموتك تغطي مصايب
ابوك العار عليش !!

تَـــمــوز : اشكرك دكتور وتعبتك ويايَّ ممنون منك .

تصافحنا ورجعت الكانون تُــمــيم كاعد
يسولف بالتلفون عدل كــانـــون نفسو
وصاحني : حدر بشرني ؟

بديت أشرح كلام الدكتور رفض
بس اصريت يسمع مني ويرتاح
دخل جدي وعمامي واستلموا
كــانـــون ، استعجلت واستأذنت
بوجهي اخذت السيارة وبقيت ادور
بكل مكان يخطر ؏ بالي مستشفيات
ماكو مغلقه ، تلفون ماعدهه ، ولا اعرف
أقاربهم بقيت بالشارع حاير بزماني
نهار كامل وأنه أبحث رغم الأوضاع
يتعدى الخطر بس استمريت بالبرد
ادور ؏ اثر منها وكأن ذهب فص
ملح وذاب ، لليل هلكت توجهت
للدوام أكلت ونمت بسرير المديرية
ثاني يوم نفس الحالة ، أيست ومليت .

الموضوع بكبرى غامض ، زاد دهشتي ومثل
ما اعرف ذهب ما عدها احد تروحلو غير اهلهه
كلفت مفوض يراقب بيت ابوها وأمها عن بعد واخذت
أغراض من الدوام ورجعت للبيت صعدت
امي دفعتني وصاحت : وين جنت أريد افتهمك
يول ماعندك ام تخاف عليك .

تَـــمــوز : تعبان اريد انام بعدين نسولف.

رضية : شوكت ما اريدك تعبان آلى متى
تَـــمــوز تظل مبهذل وتسربت بالشوارع  .

تَـــمــوز : من نستقر أنـه وياج بيت وحدنا
بعيد عن فراس واهلوووو ابطل تسربت  .

رضية: عمامك راحوا يطلعون كــانـــون
من زمان وهساع ؏ وصول كلهم يسألوني عليك
وحتى كــانـــون خابر يسألني وينك  .

تَـــمــوز : متأكدة كــانـــون واح يطلع.

رضية: يول قابل اضحك وياك.

نزلت بسرعة اول ما طلعت نزلوا من السيارات
كــانـــون : انتَ وينك حيوان مو اخابر عليك ؟

تَـــمــوز : عندي شغل .

كــانـــون : البيت عليش مقفول حدر أفتح اريد افوت.

تَـــمــوز : انتَ هساع ارتاح بيت العائلة ونسولف
شوية اني وياك والشباب بعدين ارجع للبيت.

كــانـــون : بليل اجي يمكم هساع اريد انام راسي
ثگيل وأحتاج راحة من الطريق .

ابتسم جدي وصاح بصوت شامت : حدر أفتح البيت
الزلمة تعبان يريد يدحك حرمتو .

مشيت بخطوات بطيئة متردد
من الموقف ، أنفتح باب الكراج
دخل بعد الطبر ؏ حالو والدم بكل مكان
ألتفت دحك علية مصدوم دخل للاستقبال
التلفزيون منثور بكل مكان : شصاير هين ؟

إلتزمت الصمت كمل طريقو جوة يدور
وماكو صعد فوك ورجع نزل ترك الكل
وتقرب بتجاهي ضاغط ؏ مخارج الحروف
_ تَـــمــوز ذَهــب وين ؟

ابو فراس : اخذت جنطتها وشردت اول ما دخلت مستشفى
وصار كذا يوم يدور عليهه وماكو .

كــانـــون : لا تخبلوني يعني شنو ماكوووووو
يالمعثور ذَهــب وين ؟

دوهــان: ذَهــب أختارت تروح وأضح الوضعية
ماعجبتها اول ما صارت فرصة هربت .

كــانـــون : انتوا ولا صوت كلامي وياك
تَـــمــوز جاوبني من احجي .

تَـــمــوز : ومحمد بحثت بكل مكان بس ...

بعدني ماخلصت كلامي أفتر وجهي بوكس
إختل توازني وگعت ؏ أرض رفعني
ونهار : كل هل ايام وذهب مختفية واني اخر من يعلم
يعني بس غمضت عيوني راحت بالرجلين
يولوووووو انتوا شنوووو مجرمين انتوا داعش
البنية مريضة ، هساع تخلقونها ألي وترجعونها  .

ابو فراس: ما صدگت نخلص منها بكل بساطة تطلب ترجع
شنو مهبول انتَ يولووو هل بنية بعد ماتدخل بيتنا
ما نستقبل ارهاب .

كــانـــون : ترجع وتدخل البيت غصبًا عنكم كلكم
ومتأكد ذهب عدكم ، وينو ابوية هااااا وينوووو .

رفع تلفونو وأتصل برقم فراس تحديدًا
لحظات ورد بصوت بارد : نعم .

كــانـــون : ذَهــب وين ؟

فراس : بـ أحضان جلاد ..

يتبع ...

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وعلى آل محمد ..