تجبر أحفاد الــ دليم الفصل الخامس وخمسون 55 - بقلم اساور حسين

تَــجــبـر أحفاد الــ دلــيـم🦅
بقلمي : أساور حسين
المُلْتَقَى _52 _

فقدت السيطرَة وبالگوة جاي أصبُر
وأول مَرة أحس بنفسي ضگت المُر
صُفنت لنفسي..
هذا التَعب يخلص ويّن؟
شوگت أتعَب وأحس هذا التَعب
مثمُر!

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
<><><><><><><><><>
ذَهــب ..

ربط لساني ، عقلي يستصعب يتخيل الموقف مو يشوفو
دنج المستوى وجهي صفگ وهو يضحك : هههههههههه
اباه مات قبل لا يخلص رضاعة خطية مات جوعان وخايف .

حرارة الدم تغلغلت بروحي أريد أصرخ
أتمنى انهض اضربو اموتو اشرب من دمو
بس جسمي تعوق تشنج رافض الحركة
كمل كلامو وهو يسحب أقسام : الحلو بالموضوع العزيز الأول
ماعندو قبر تزوري بس عزيز كــانـــون قررت تاخذي وبيدچ
تسلمي الأبو أكيد ينتظركم وگلبو نار عليكم تريدين ترجعين
الحب حياتچ فارس احلامچ مووو ، ارجعي مكسورة سلمي
ابنو وبلغي إنتهى الثار ردت راسو خاف ؏ نفسو وراح ابنو ضحية ..

قويت قبضتي ؏ ابني وهو يرفعني صرت اتعثر
رجلي ما تعيني اوگف ؏ حيلي اي ردت فعل
ما بدرت مني ماكووو كلشي ماكووووو
ملشني من شعري وركض بيَّ للسيارة وعلى طول
ما امشي ابني يجري دم صعدني وهو يدز الفديو
وقبل لا تتحرك السيارة أتصل ؏ كــانـــون
وبلغو : مسافة الطريق وبنت عمي وابنك عندك تتهنى بيهم ابو العزيز
اشغل نفسك بالفديو بين ماتوصل .

سد الباب رفع ايدو بعلامة السلام ؏
گد ما اگدر ظليت رافعة راسي رفضت
فكرة موت ابني واخوية بنفس الأيام صعبة عليَّ العزيزين يموتون ..

طريق البيت دمرني ريحة دم ابني تغلغل بـ انفي
من قوة الصدمة وكتم صوتي عيوني زغللت
وما اگدر المح الطريق زين ، وصلني المنطقة
قريبة ؏ بيت بقيت امشي بالطريق حافية القدمين
لا تأذيني ارض ولا تأذيني نظرات العالم
وصلت للباب صدت عيوني ؏ كــانـــون
من شايف الفديو وگع بالگاع يدگ ؏ راسو وكلماتو
حفرها بعقلي : بوية عزيز ابني مات بوية .

ركضت رضية علية بالشارع تريد تاخذو
عبرتها ومشيت منهم كلهم عفتهم
ودخلت للبيت شبه مجنونه ..

><><><><><><><><><
هَــيـلانـة ..
الفديو الفديو الفديو
كلهم يحجون بي بس رافضين ادحگ شنو محتواه
غريبة بوسط عائلة ماعرفها شنو هي وبس ذَهــب
موجودة وراحت وعافتني ، دركْان وگع اخو جدامو
يصرخ : ابني مااااااات .

عرفت جلاد العار نفذ التهديد
بقيت انتظر بالباب ودموعي مانشفت
الكل ينظر اتجاهي نظرات تعجب واستغراب
للحظات تخيلت نفسي بلا ملابس من عمق تركيزهم
بكل حيرة وكسرة وخذلان إستقبلت أختي إلي شايله
أبنها ومازالت تمشي وهي رافعة الراس عبرتني
ودخلت رجلي بعد ما حملتني وگعت الطم وادگ
؏ راسي دركان ولد عمو تَـــمــوز ودوهان
گاضبيني كــانـــون وهو قابض ايدو اثنينهن
يدگ بيها ؏ گلبوو وبكل ما تعني الكلمة من
دمار يشهگ : طلقتك بنص گلبي يا عزيز يا بوية .

سحبتني عمتهم رضية من ايدي تحت انظار الكل
ودخلتني وهي تحچي وتحاول تفهمني : اختچ مو بعقلها تخبلت
امشي بساعج اوكفي يمها خليها تعرف بعد عدها اخت واحنا
الهه اهل يولووو صيري سباعية لاتروح ذهب من ايدج وتخسريها
تحملتي داعش ماتتحملين هل منظر ..

بخطوات ثقيلة مهلكة صعدت فوك الباب مفتوح مال غرفتها
ابنها ؏ سرير عاري بلا ملابس وهي بصف الكنتور طلعت
ملابس نظيفة واخذتو بدون ماتدحگ علينة دخلت للحمام
هَــيـلانـة: ذَهــب الله يخليج لاتسوين هيج انطيني عزيز ابو ياخذو .

فتحت الماي علية ودموعها تنزل شكيت بيها حتى ماتشوف زين
دفعت الباب قُــسَـم ودخلت وياها : ذهب عوفيييييي شدسوين
انطيني عوووفي انطيني عزيز ..

ذَهــب : اغسل ابني واجهزو عوفي كلو دم .

لفلفتو بالمنشفة ورجعت بي للغرفة نشفتو
وبكل رجفة تبدل بي اجمل ملابسو واحلها
وهو جميل حتى من انخطف لونو وصار ازرگ
بعدو حلو وسمين بس وجهو من الضرب مورم
دخل دركْان عليهه دنج المستوى الطفل وبكل هدوء
يريد ياخذو سحبتو بقت تبوس بوجهو عيونو
شفايفو انهاريت دمرتني اختي دمرتني
شنو احساسچ بلحظتها يا ذَهــب ؟!

اخذو منها بقت تدحگ ؏ خطوات دركان وهو يبعد ابنها
ومانزلت راسها الى ان سمعت صوت كــانـــون
وهو يخلي ابنو ؏ صدرو : عزززززززيز يانظر عيني انعمت عيني
ومادحگ عليك ميت بيدي ، مو گلت اريد اصير ضابط مثلك ولك
بوية اگعد حاجيني بعد لازم اروح أنـه وياك للدوام اريد افتخر
بيكككككك ول عززززيزز حاجيني بابا .

درت وجهي أريد آخذ ذَهــب بحضني وعلى
صريخ رضية دحكت ذهب بيدها سچين
زحفت ؏ سرير بس أريد اوصل
اخذ منها السجين گضبتها رضية وانه بكل
قوتنا : تريدين تعوفيني ذَهــب بعد ماعندي غيرچ
عوفي السجين ذَهــب لو تموتيني قبل لاتموتين نفسج .

زادت وهي تضغط بالسجن ؏ رگبتها دخل تَـــمــوز
؏ صراخ رضية گضب ايدها وهزها هز بحركة وحدة
سيطر ؏ كل حركتها هي ماگدرت تقاوم من التعب والصدمة
تَـــمــوز : ذَهــب انتِ قوية لا تكسرين كــانـــون اكثر
اصحي تسمعيني ذَهــب تشوفيني ادحگي عليَّ تشوفيني .

رفعت عيونها بتجاهو وبثواني ايدها افترت وگعت
كل جثة جامدة وجسمها قطعة من الثلج
من العوج صار بيدها عرف تَـــمــوز وهو يشيلها
صاح : ضربتها جلطة يمممممممهه .

اخذها وهو يركض نزل الدرج رجلي ما تساعدني أنزل
سريع گضبتني قُــسَـم ونزلتني وهي تهمس : لا تروحين وياهم
رجلج متأذيه ابقي لايصير بيچ شي .

وكفت بالباب وياريت مانزلت ولا صرت جدام
منظر كــانـــون ابنو بحضنو ويدگ ؏ راسو
دافعو ؏ صدرو مايقبل ينطي ودركان جدامو
يبچي على حالو اخو وابنو : كــانـــون ومحمد اخذ بثارك وثار ابنك
شد حيلك ياخوي مو قسمت ظهري اوگف حرام ينترك هيچ
ادفنو ياخوي .

وسع كــانـــون عيونو وهو يشگ بقميصو
_ متعلم عزيز ينام بحضني لو بحضن امووووو
تريد انوم ابني بحضن التراب بظلمه وحدووووو
افاااااا افاااااا عزيزي يروح مني يا نار گلبي .

گعد ابوهم وياه بالأرض يمسح بدموع
كــانـــون ويشهگ ؏ حالو : تظل هيچ وتموت وماتاخذ ثار ابنك
تعوف دم ابنك يروح هدر يولووو أنهض والله اخلي جلاد
يبوس برجلكك بس گومم ول گوم .

كــانـــون : ادفني وياه محلفك بالله ومحمد تدفنوني وياه
خابر الدفان يحفر گبر ؏ طولي والعزيز ينام ويايَّ ..

ملامح أخوي بهل لحظة كلهه صارت جدامي
والزمن رجع گعدت بالأرض اصرخ وابجي
؏ حالنا العزيزين بنفس الأيام حتى جادر
عزيز بعدو منصوب يا مصيبتنا..

دوهــان: شلعت گلبي كــانـــون حرام عليك
لازم ناخذو خوية بقي بيدك بس امشي .

گام بس يريد يمشي مايگدر يبچي ويمسح
بدموعو ويرجع يصرخ ام كــانـــون راحت
هي وتموز للمستشفى ويه ذَهــب بالتواسيل
رحت وياهم من اخذوا العزيز بس خلصوا الاجراءات
توجهوا المقبرة وادي السلام لآن مايگدرون يدفنون
بالأنبار ، دخلوا للمغيسل وكانون شال روحو ورگعها
( اريد ابني ) يصرخ توجهنا للمقبرة محفور قبر صغير
؏ گد العزيز شالو كــانـــون وهو بالكفن رفع راسو
؏ ابو الي انتهى ؏ حال ابنو : تاخذون عزيزي بهل حفرة
يخاف والله يخاف بوية أنـه وياه اذا إنزل مايخاف
بداعتي عندك اذا أنـه عزيز عندك وتحبني حس بيَّ
ادفني ول دركْان اضربني وادفني ينام ابني بحضني .

سحبو ابو سحب من حضنو ؏ الصراخ والطم مالتنا
دوهــان ايدو ؏ راسو ويصرخ ؏ صراخ كــانـــون
تعاونوا دوكان هو ودوهان گضبو كــانـــون بكل ماعدهم
من قوة ؏ ما ينزل بالقبر وهو يدفع بيهم يريد يوگع نفسو
انخسف حيلي ، انعمت عيوني ، گلبي راد يوكف
رفعت راسي وصرخت بعلو صوتي : عزيز خوية گوم
استقبل ابن اختك ذَهــب واخذ بيدو لا تعوفو وحدووووو .

سد دركْان عينو ورفع راسو عاط بوجع : كسرتونا يلعزيزين
روح عمو استودعتك الله .

نزل التراب ؏ العزيز وكانون بالتراب تبحرث
يدگ ؏ صدرو بـ اثنين اديناتو دركان افتر
وحضنو من ضهرو وگاضب ايدو بس خلص
يريدون يروحون ضرب ؏ راسو متخبل
يصيح : اعوف ابني وحدو بليلة الوحشة حشى ومحمد اموت نفسي
عوفوني عندووووو عوفوني اگلكممممممم روحوووووا .

فراس : يابه راح يوگف كلبك مو هدمت حيلي
تريد تفجعني بيك مثل ما انفجعت بـ ابنك .

فر راسو وهو ينوح رد : اخخخخخخخ بوية عساني
يوگف گلبي عساني .
نام ؏ تراب يمسح بي ويردد : بابا عزيز أنـه يمك ماروح حبيبي
يمك لا تخاف نظر عيني يا حلوووو يا ابو ضحكة حلوة
يا فرحتي ماتت وياك فرحتي بابا ماتت روحـي بموتك .

فراس : اتركوا عند ابنو لا ناخذو ويصير بي شي
خلي ينام عندو ، دركْان تظل عندو باجر ترجعون
لازم نرجع احنا للبيت ورانا فاتحة وخطة نوصل بيها الراس جلاد .

كــانـــون : اريدو عايش مووووو ميت .

هز راسو بقبول وأخذنا وانه اتلفت صعدت بالسيارة
ورجعونا البغداد رجلي تگرمت دخلت للبيت منتهية .

رضية: وينها ذهب مارجعت .

قُــسَـم : يانار گلب كــانـــون من يعرف ابنو مات
وذهب صارت عدها جلطة وأيدها انشلت ونعمت
وماتحچي يا يممممههههه بعد ما تريد تحچي .

لطمت ؏ وجهه وصدرها بكل قوتها
_ يااااا يمهههههه ذهب يمههههههه سودة بوجهي يمه
لا من ابنچ ولا من اخوچ ولا من صحتچ .

ام دوهــان : سودة بوجهه العدو من صدمتها
انعمت عينها وخرست الله يساعد گلبهه شكثر صدمتها عظيمة ..

رضية: اخذوني الهه اخذوني راح اموت يمهههههه
ولدي وبناتي ضاعووووو يبوووو عليَّ يبوووووو
سودة بوجهي يمممهههههه كــانـــون يمه ذهب شصار بحالكم .

هَــيـلانـة: امانة اروح وياكم ادحگ حال اختي .

رضية: حدري حتى دكتور يكشف ؏ رجلج انوب لا تتعوق .

مثل مادخلنا طلعنا للمستشفى بوجهنا
من ألباب استقبلنا تَـــمــوز وصلنا
ودخلنا الغرفة نايمة بيها ذَهــب
اخذت ايدها معوجة: سودة عليَّ ياروحي اختچ ما تحملتي
الصدمتين العزيزين كسروچ وانعمت عيونچ ياذهب
انتِ القوية اگول عليچ اختي قوية تهد جبال وماتنهد
بس العزيزين هدمو حيلچ هدمممممم .

وفوك كل هذا عدها نوبات المتلازمة كلهه مجتمعات عليهه
بحيث الدكاتره من عرفوا الصار بيها وشنو السبب وصلهه
الهل مرحلة الدكتورات والممرضات يبچون ؏ حالهه
بقيت اناشغ يمهه وروحي تلوب عليهه اخذتني الدكتورة
كشفت ؏ وجلي ملتهبة عقمت الجرح ولفلفتو
ونبهتني لازم وضروري ما اتحرك چثير
غصبًا عني رجعوني للبيت وبقت رضية
وتموز عند ذهب تحت المراقبة ، دخلت للبيت ضايعة
ماعرف احد بيهم ، بقيت محبوسة بالغرفة احتار ابچي
؏ العزيز اخوية لو العزيز ابن اختي ، لو ؏ حال ذَهــب
وصحتها ألي تناثرت بموتت العزيزين ، لو ؏ حال كــانـــون ومصابو
الوضع دامي بكل ماتعني الكلمة ، عقلي بديت افقد عقلي واسولف
ويه نفسي ، ساعة ابچي وساعة اتذكر ايامنا واضحك
تأنيب الضمير دمرني هلكني هلاك ، ولووو لووو ما طلعت
لوو ماتحركت ، لو بقيت عند العزيز ، لو رجعت ودحگت شصار بي
كلهن عذبني كلهن ، الملتقى بدون العزيز مميت وبلا طعم فارغ ..

من التعب دخلت عليَّ ام كــانـــون عيونها صايرة دمم من البچي
فرشت فراس وبيدها دشداشة : امشي يمه فوتي غسلي تراب المقبرة
مايصلح ثجيل عليچ ، وتعالي اكلي ونامي ساعة بعد ورانا فاتحة .

اخذتني من ايدي دخلتني للحمام بس شدت وجاي بكيس
سبحت واني اتعذب ، شلون تمر ايامي بدون اخواني ؟
طلعت هلكانه شعري من التعذيب مال داعش ومن القهر باقي
خصلتين واصير صلعه ، لگيتها مجهزه صينية اكل توسلت رادت بس
اچل لگمه رفضت وكآن اكلت طلي بس مسمم بطني ومعدتي موتني تموت
نومتني ؏ فراش اشهگ يتراوالي اخوية صاير بين عيوني
نمت والكوابيس ما عافتني الثاني يوم گعدت ؏ هوسة
رجع كــانـــون شبه فاقد عقلو ودركان منتهي ؏ اخو
گعد بالاستقبال نام ؏ رجل امو وصاح : راح ابني اول مرة
ادخل البيت ما يستقبلني وينتظر علاگة الحلويات بعد وياخذها
من ايدي يتعارك عليهه هو وميار وبعدين ينقهر وينطي كل
حلوياتوووووو ابو گلب الحنين عفتووو وحدووو جوة التراب يمهههه .

ام كــانـــون : سودة بوجهي حبيبي كــانـــون يمههه انتَ قوي
ابنك طير من طيور الجنة يمهههه دحك علية ذهب حبيبتك
بالمستشفى بين الحياة والموت تريد تعرفها وحدها ؟

ظل جامد بوجهه لدقايق ونزل راسو
_ اخذ حيلي ابني ماعاف حيل ..

تركتهم ومشيت الرضية : عفية ذَهــب شوكت ترجع ؟

رضية: بعد يمه مخليها تحت المراقبة يخافون تنضرب جلطة ثانية
الجلطة الأولى ضربت عيونها الثانية اخاف تنشل ..

رجعت للغرفة اعرج من رجلي ، گعدت احجي ويه روحـي
بقيت بغربة ، جنت بغربة ، وصرت بغربة شوكت احس
بالأمان ربي ، اخخخخخخ ياعزيز اخخخخخ لا اهلي
لا اخواني هلكني الصبر ، اعتزلت وحدي خلصت
ايام الفاتحة ابچي انهار وحدي .

بعد ماخلصت الفاتحة طلعت اختنگت اريد اجر النفس
مشيت للگراج لمحت من الشباك كــانـــون من التعب
مستند ؏ صدر دركْان وداير ما دايرو اهلو
امو تبچي على صوتو ولد عمو كلهم موجودين يصبرون علية بكل قهر
نعى ابنو بس ماعندو حيل : هااااا يالتابوت شايل بحضنك عزيز وغالي
ها يالتابوت بابك المطبوگ عذب حالي
ها يالتابوت الشلته كون تشيله هم من بالي
ها يالتابوت حتى لا يلچم يظل للتالي ..

من التعب فقد ونام على طول ايام الفاتحة لا نايم ولا ماكل
تركوا وعلى نومتو ولد عمو وأخو ناموا ، طلعت امو شافتني
واجت بتجاهي: محتاجه شي بنتي .

هَــيـلانـة: لا اشكرچ بس ماتعرفين شوكت ترجع ذَهــب .

_ خابر تَـــمــوز اليوم ترجع بليل حبيبتي .

دخلت وانه بقيت دقايق وفتت انتظر اليل
دقيقة دقيقة ، الكل تعبان بس من صار
الوقت وگفت سيارة ذهب كلهم منتظرين
نسوانهم وفراس طلع يستقبلها بس كــانـــون
گاعد يراقب من بعيد ، قبل لا تفوت دخلت
رضية وبتحذير صاحت : لا تصرخون بوجهه لا ترجع وتنضرب الثانية
حالتهه مو مستقرة ، من تشوفون حالهه اسكتوا.

دخلت ذَهــب وياريت متت ولا دحكت وضع اختي
أيدها متكورة ، عيونها مسدودة ماتشوف بيهن
مستندة ؏ رضية وتمشي شهگت بعلو صوتي
سحبني دركْان بكل قوتو شمرني ؏ حايط
ورفع اصبعو ؏ شفايفو تحت انظار الكل : اشششششش ولا صوت .

اشرت ؏ ذهب هز راسو وهمس : لا تزيدين مصيبتها
لا تحسسيها كافي عليهه هل مصيبة كافي .

دار وجهو ؏ ذَهــب من كل عقلي التفتت ؏ كــانـــون
اريد ادحگ رد فعلو دنج راسو من شافها ورفع
ايدو ما مصدگ ، دخلوها للبيت تركت الكل وفتت
صرت قريبة منها گعدت جدامها تلمست وجهه
وهمست : ذَهــب .

سحبتني من ايدي وبضعف تمسكت بيها مالت راسهه
؏ صدري حضنتها بكل قوتي وانه اشهگ ؏ حالنا
رفعت روحها ماتشوفني تلمست وجهي وضربت
؏ رگبتها بمعنى ( اريد اصرخ ما اگدر)
لا بارك الله بالكتمان ، تريد تصرخ تحچي وضعها
ما تگدر تجمع مصيبتها وحالتهه عليهه .

رفعت راسي ؏ رضية مصدومة يعني حتى ماتگدر تحچي
الجلطة بلسانها شظل بـ اختي شلووون تعيش شلووون
اشرت بـ إصبعها اسكتي سحبتني من ايدي شمرتني
؏ دركْان اخذني من ايدي وطلعني بالاستقبال : لا تبينين يمها
واسيهااااا يولوووو ساعديها صيري قوية .

طلع كــانـــون اخذ باكيت الجكاير وگف بالباب
بقيت بس أنـه وياه واگفين رفعت ايدي سديت
عيوني ورفعت راسي : تلفت ذهب تلفت انتهت
شنوووو اتحمل كوابيس موت اخوية ألي راح دمووو هدر
وشبابو ضاع بسببي ، لو ابن اختي طفل بعدو راح لان
ماسلمنا نفسنا نخاف ؏ روحنا وذهب خسرت العزيزين عليهه
راحت صحتها وصوتها وعيونها وبعد شنو ننتظر شنو اتحمل .

دركْان: لا تحملين نفسچ المسؤولية قبل اسبوع من هروبچ
اتفقنا أنـه والعزيز ؏ هل خطه يا اما هو يهربچ وانه افجر
المكان يا اما هو يفجر المكان هو لازم هل معسكر يخرب
لان المهمة انتهت وجلاد كشف الحقيقة .

هَــيـلانـة: شنووو ذنبو عزيز بعز شبابو يموت ؟

دركْان: يومو هذا يومو لا أعتراض ؏ اخر الله سبحانه
اذكري وگولي الله يرحمو العزيز عايش بگلبي وگلبچ
وگلب الناس ألي تحبو وحتى العالم الغريبة تحبو وتترحم عليَّ .

هَــيـلانـة: وابن ذَهــب ؟

دركْان: ثارو راح يرجععع انعل ابو الرتب اذا ماتاخذ بثار ابن اخوية
واخلي جلاد مربط اليد والرجل متلوع نهار وليل ؏ هل عذاب العايشين
بي اني واهلي بسببوووو .

جر نفس وكمل وهو يقترب وبصوت هامس
ضعيف يحاول يطمني : لا تبچين تغربلين حالي ومحمد ياريت اگدر
اخذچ بحضني واطبطب عليچ واواسيچ .

رجع ايدو خلف ظهرو يمنع نفسو يقترب اكثر
دار ؏ الباب رضية واگفه وامو وقسم بالمطبخ
يراقبون من بعيد صاح ؏ رضية : يمه حضني هيل بمكاني ..

نطقها وطلع من كلمتو تقدمت حضنتني
ورفعت راسي : شنو بينچ أنتِ ودركان ؟

بقيت ساكتة لثواني عرفتني ماريد اجاوب
عفتها ودخلت امو من فوگ ليجوه تباوع عليَّ
رجعت الذهب تَـــمــوز يحجي وياهه
_ ذَهــب خوية احنا كل المعلومات عدنا اذا انتِ متقصده ماتحچين
حتى ما تشرحين الصار مانريد ومحمد صوت وصورة شايفين كلشي .

نهضت وكآن تذكرت سدت اذنها وبقت تون بعلو صوتها
حضنتها ورديت عليَّ : كافي رجاءً ممكن تعرفها لا تضغط عليهه .

دخلت بنية جميلة صغيرة بالعمر علينة
من شافهه تَـــمــوز اغتاظ نهض يريد
يحچي وامو صارت بوجهو وهي تگضبها
ودخلهه : ذَهــب يمه هاي گازو صديقتچ اجتي .

تعجبت ؏ ذَهــب رفعت راسها وهي مغلقه العينين
رفعت أيدها وكأن تريدها اجت ركض گضبت ايدها
وحضنتها وانفجرت البنية تبچي وذهب تون
تحاول تحچي : توني سمعت ماصدگت والله حسبي الله ونعم الوكيل .

أشرت ذَهــب ودموعها ؏ خدها تنزل بدون توقف
طبگت ايدها وخلتها ؏ گلبهه تريد تگول الهه ابني
حضنتها ونزلت ايدها ورضية تأشر الهه تسكت
حتى ما تنتكس اكثر بچت گازو بچي هزت گلوبنا هز
ودحگت علية همست : انتِ اختها هَــيـلانـة مو ؟

أومأت براسي أقتربت بوستني
_ الف الحمدلله ؏ سلامتچ شكثر تحچي بيچ وتنتظر تشوفچ
اقتربت من اذني وهمست : البقية بحياتچ .

هَــيـلانـة: حياتچ الباقية .

نومت ذَهــب بحضنها وتسولف وياهه
بصوت ناصي ما مسموع وذهب هادئة
بس تهز راسهه بقت لليل واخذتها رضية
ترجعهه البيتهم ، تاخر الوقت دخلت للحمام
جسمي صاير قطعة حمرة وكلو يحرگ بيَّ
ماعرف شلون خلصت اليل اتگلب بمكاني
لا عندي علاقة بـ احد واستحي اطلب من شخص
منهم شي لو اشرح شصاير بيَّ ومن الصبح
هم يسون ريوك وصايرين هوسة كلهم مجتمعين
ما صدگت سمعت دركْان يسولف وياهم
فكيت الباب وبقيت بمكاني .

دركْان : كلشي ماريد بس جهزي الكانون
فوك اخذها اجبرو ياكل .

هَــيـلانـة : الــســفــاح .

دار وجهو يدحگ بتجاهي ومتت بدمي من نظراتهم
عبارة عن تعجب رجع يدحگ ؏ امو ويفهمها : لقبي عند داعش
بعدها متعودة ؏ ذاك النمط .

تركها واجه بتجاهي بقيت اركز بيهم كلهم وجوهم
انقلبت لان تقرب مني حتى ارتبكت بعد ما اگدر احجي
_ ها هَــيـلانـة محتاجة شي ؟

رفعت ايدي اريد ينتبه عليهه صرت امتمت
من عيونهم بعد الساني ثگل : شسمه هاي مادري شبيه
صار هيچ وانتشر .

دركْان: هو شنو ؟

هَــيـلانـة: حساسية شبلاك ؟

دركْان: وين انتشرت احجي عدل فهميني .

نصيت صوتي ودخلت اكثر بالغرفة وهمست
_ بكل جسمي .

دركْان: شنووو ؟

دخل راسو بس يريد يسمعني
دحگت بحزن وخجل : حساسية انتشرت بجسمي .

رفع حاجبو ورجع يركز بيدي
_ تأذي لو عادية ؟

هَــيـلانـة: تحرگ كل شوية ادخل للحمام اسبح وبعدها .

دركْان: ها ..

بقيت ساكتة بس ادحگ بوجهو
ابتعد وهو يعلي صوتو : هيري نفسچ انتظرچ بره بسرعة .

سديت الباب بس ابتعد وراح ماريد احجي وياهم
جريب عباية ذهب وعدلت شعري ذبيت الشال
بدون لف أصلًا مو محجبة بس لان حزينة
طلعت منهن ماگدرت امو تسكت صاحت بيَّ : وين رايحين ؟

هَــيـلانـة: هاا هساع نجي بساع .

طلعت أركض اسمعها تحچي وياهن
ولا تگول عيب تسمعني : بالله هاي منين اجت علينة بلوه جديدة
صدگ لو گالت ام دوهــان بس لا يحبها .

ام دوهــان : ما تسوفين يتلزگ بيهه تلزگ وصافن عليهه
كل ماتمر منو يحفظها حفظ بعيونو ..

مشيت من الاستقبال وطلعت لگيتو
واگف يسولف هو ودوهان من دحگ
عليَّ موجودة فتح الباب وصاح ؏ السيارة
الثانية : يلة يولووو امشي .

تحركت سيارتنا والسيارة الثانية بيها
حماية اثنين وصل الشارع بغداد
عبارة عن دكاترة نزل عدل ملابسو
لمحت المسدس بخصرو بعدني ما
متعودة ؏ شكلو الجديد بس شوارب
من اول يوم عرفتو هو صاحب لحية
طويلة ، رجع فتح الباب نزلت بسرعة
دخلني ؏ دكتورة بعد الفحص عرفت
هاي شوطه من القهر والمصايب تطلع
بالجسم وجسمي كلو تحسس كتبت علاج
طلعت انطيتو الورقة رجعني للسيارة
وراح يشتري العلاج ورجع صعد وهو
يستفسر : شلونج هَــيـلانـة..

هَــيـلانـة: شنو تشوف ؟

دركْان: باجر راجعين للأنبار مطوقين
منطقة بيها جلاد أبوية حدد موقعو .

هَــيـلانـة: شنو راح يصير اذا صار بيدكم ؟

دركْان: كــانـــون يقرر .

هَــيـلانـة: منو گازو ؟

دركْان : طليقتو التموز ابن عمي
ليش عل سؤال مافهمت .

هَــيـلانـة: الصراحة فكرت هي نفسها بنت
عمك صاحبة القراصة والحلقة ..

خنزر بوجهي تراجعت للخلف
صدر اوامرو بتحذير : اياچ هل موضوع ينفتح هَــيـلانـة
هل بنية تزوجت وعايشة حياتها وبعيدة وسعيدة
وانه من زمان نسيت أمرها .

هَــيـلانـة: عجل عليش بعدك محتفظ بالحلقة والقراصة ؟

دركْان: تحققين ويااااايَّ انتِ شنووووووو ؟

هَــيـلانـة: لا تعلي صوتك بكل أحترام استفسرت وخلص .

نزلت من السيارة دخلت للبيت ونسيت حتى العلاج
وكلهم عبالك مسوية جريمة يدحگون بتسأل
فتت للغرفة ذَهــب شاربه منوم ومهدئات نايمة
رجع الباب يندگ رحت فتحتو صار جدامي
يتفحص بملامحي يريد يعرف شنو موقفي
مابدر مني اي رد فعل أنـه مو بحال هل سوالف
بس ضنيت گازو هي نفسها البنية .

دركْان: نسيتي العلاج .

اخذتو من ايدو أريد أدخل دفع الباب بيدو
دخلت بملابسي من الخجل : اسف صرخت بوجهچ مو قصدي
بس اعصابي تعبانة.

هَــيـلانـة: ماصار شي عادي .

سديت الباب وبعدو واگف شوية وسمعت
خطواتو وامو تسأل: شنو وين رحتوا .

دركان : شنو ما أسمع ؟

كمل وطلع بدون ماينطي لا حق ولا باطل
عافهن بس اسمع صوت توشوش بيناتهن
الى ان رضية صاحت بيهن : كافي نميمة ؏ بنت مكسورة
ويتيمة وتوها طلعت من الموت وبيدو علاج مبين مريضة
وتستحي تحچي ويانه.

اخذت علاج وهل علاج ينوم بقيت نايمة ومن الصبح
طلعوا كــانـــون ولد عمو كلهم للأنبار وياهم فراس
بقيت أنـه عيون ذَهــب بيدي ادخلها انطيها اكل شرب
حمام ما خليتها تحتاج احد ثاني ماريد اختي تنذل اعرفها
صاحبة عزت نفس وماتقبل ؏ نفسها أحد يشوفها بهل حال .

مر أسبوع وخلال هل اسبوع رجعت گازو واخواتها عدنا
ماتركت ذَهــب لحظة وحده تسولف وياهه تقويهه بس ذَهــب
بغير عالم حتى مانعرف بشنو تفكر لو شنو تريد
باليوم الثامن رجعوا اول ما دخل كــانـــون ؏ ذَهــب
جنت توني اشربها الماي گعد يمها مد ايدو بدون ما يحچي
بس ادموعو تسولف هي حست بوجودو ولمساتو
نزلت واسها وشهگت ماتگدر تحچي بس تون تون بعلو صوتها
تريد تصرخ صعبة عليهه حضنها وهو منهار
؏ منظرها : خجلت أدخل عليچ لأن هجست روحـي ضعيف
جدامچ وجدام نفسي ، ابني راح وماگدرت اساعدكم
بس حلفت اخذ بثارچ وثارو أتمنى تگدرين تشوفين الصار
انتقمت ذَهــب انتقمت للعزيزين .

ضغطت ؏ راسها بـ اثنين اديناتها
اخذ ايدها يبوس بيها : ردت الكلب يجي هين وانتِ بيدچ
تموتي بس ماريد يشوفچ ضعيفة وخفت ايدچ تتوسخ بدمو القذر .

بقت تون بقوة تريد تعرف الصار
كمل وهو يشرح ويبچي بحرگة گلب
: ذَهــب سمعتو بالفديو يگلج اعوفچ
ما تموتين تتلوعين وتتذكريني بكلشي يصير بحياتچ
وانه نفذت تهديدو علية ، كسرت اعظام رجلوو مثل ما كسر عظام
اضلوعي وانه الطم ؏ ابني ، وايدو ألي ضربت ابني
كسرتها عظم عظم اصبع اصبع الى ان خلعتها بالكامل
وتركتو مكسر القدمين وايدو مكسرها بنص صحراء الأنبار
يتلوع طعم للكلاب مثل ما چان يعذب العالم البريئة ويخلي
جثثهم بالصحراء والحيوانات تاكل بيهم تركتو عايش
بس ايدو ورجلو مربطه مثل ماتركني مربط ادحگ ؏ عائلتي تتعذب
وابني يمووووت نهيتووووو مثل مانهى ؏ فرحتنا ..

الكل منهار هو گاضب ذَهــب الي هلكت من البچي
ولطم مسح ؏ راسها وطمنها: أنـه وياچ ذهب
سجلت كلشي ، وراح اخذچ تتعالجين عند
احسن الدكاترة والمستشفيات الموجودة بالعالم
وترجع عيونچ وتشوفين الصار ماترتاحين ولا نار گلبچ تسكن
العزيزين راح يبقون لقلوبنا ذكرى لا تموت
بس أخذنا بثارهم ماضاع دمهم اخذت ثارهم .

انهدمت فرحت البيت شكثر يحاولون ترجع الروح بي
بس ماتتم ، بقيت ؏ نفس الوضع الزلم بالدوام
وانه روحـي بـ ذهب ، بعد اربع اشهر والكل ذبل
بس كــانـــون رجع وقرر يراجع بذهب وبيوم نزولو
اخذني وياهم وراحنا للدكتور ، ورضية لمحتها مجهزة
كراتين اكل ، ؏ مواعين اخذتهن البيت گازو وراحت هي
وميار متعلق بيها يجي عدنا للعصر تجي امو لو ابو ياخذو

><><><><><><><><><><
قُــسَـم..

الكلمة المعتادة الي دائمًا أسمعها
( لا تهجمين بيتچ )
ترسخت هل كلمة براسي ومشيت عليهه
وبقيت اتجنب اروح البيت كــانـــون
واذا اروح ما اتأخر حتى المواقف ما تاكل بروحي
كل معتاد ميار لازم وضروري عندو يروح عند رضية
بهل يوم المشؤوم قررت أروح اجيب ميار
فكيت الباب وصحت : وينكم يولوووو شنوو ولا صوت .

دخلت للبيت فارغ تعجبت فكيت باب الغرفة
ماكو لا ذهب ولا اختها ولا رضية اليوم بالبيت
رجعت ؏ مطبخ فارغ مشيت للاستقبال فتحت الباب
ماكو احد اريد اطلع وسمعت صوت صار ورايَّ
دركْان: كلهم طالعين محتاجه شي بنت عمي ؟

التفتت هجست اطرافي كلها جمدت
وريگي بس وعيوني تطلع منها نار : وحتى لو احتاج ما اطلب منككك .

عفتو وطلعت صاح بصوت واضح مسموع
_ لحظة قُــسَـم لحظة .

رفعت اصبعي وبتحذير رديت : اياك تنطق اسمي ؏ السانك .

تركتو وطلعت ارجف ماعرف شلون وصلت للبيت
وسديت الباب دموعي تتسابق وحالي حال
رفعت راسي اجر النفس صارت الكاميرات
جدامي دخلت ركض مسحت هل وقت وسديت الكاميرات
دخلت اخذت اخر ماتبقى منو وطلعت امشي واتعثر
فكيت الباب بعدو ؏ نفس وگفتو يشرب جكاير
رفعت الحلقة مالتو عندي بعدها وصحت : اخر ماتبقى ماريدووو
واتنازل عنو وماتت الوعود بيناتنا انتَ اختاريت وانه اختاريت .

دركْان: احجي عن نفسچ اختاريتي من زمان والدليل
ابنچ ماشاء الله .

قُــسَـم : وانت ماشاء الله عليك انتَ وهيلانة شكثر لايقين ؏ بعض .

دركْان :تسلمين خوية ، وانتِ وابو ميار مشكلين ثنائي جميل
ربي يسعدكم اتمنالكم كل خير

قُــسَـم : وربي يسعدك انتَ وهيلانة .

دركْان: تسلمين اطلعي برة يلة بسرعة يلة ..

قُــسَـم : لحظة اخذ هل زبالة .

حجيتها وشمرت الحلقة عليَّ بقل قوتي
وتركتو وطلعت اركض وما ادحگ غير ام دوهــان دخلت البيت
كانون شافت دركان واگف ياخذ الحلقة من الأرض ..

فتحت باب البيت وفتت الهث من التعب كوه اجر النفس
گلبـي يدك بسرعة رهيييبه ، خايفة من كلشي
هسة بالله هاي وكتها تشوفني متأكدة راح تكله
وماراح تمر بسلام .

بقيت افتر وافتر اكل بروحي
بالأخير تذكرت الكاميرات شغلتهن
ودخلت بسرعة سبحت من الركض والخوف والقلق
عسى ولعل يرتاح جسمي من التشنج ، طلعت
بعد مده من الزمن انشف بشعري وامشي
بالممر دخلت للغرفه

وسرعان ما جمدت بمكاني واني اشوفه
كاعد بكل هدوء يرمقني بنظراتوا حادة
بلعت ريكي واني اتابع حركة ايده
مخليها ؏ حديدات الهيتر ويمشيها بكل
دقة ، بحيث يصدرن صوت يجلب اقلق
والخوف ، هوواييي اكره وامقت هل صووت
يضعفني ويخليني اعيش العذاب ..

الـ هل سبب يتقصد يعذبني
ويكرر الصوت حتى اضعف
اكثر واعيش التوتر بكل معاني .

-الله يساعدك ..

اجاني صوته الخشن وهو يضغط ؏ مخارج الحروف
دوهان : الساعة 3:43 الكامرات ليش طفت..

حبست انفاسي واحس بكلبي بدا يدك بكل سرعتو
ويضرب جدار صدري ، فتحت شعري وسحبت
المشط واني ارد برتباك واضح :- خلص الشحن .

خليت الزيت ؏ شعري وبديت اسرح بي
واني انتضر جواب منه ، باوعتله بالمراية
ساكت بس نظراتو تحجي اخترقتني تهربت
من نظراتو واني اهمس :- راح اصب غده
سويت الاكل بي بهارات حارة ماادري راح تجي
عبالي خفر وتبقى بالواجب ..

دوهــان: الساعة 4:56 الكامرات
شغلن نفسهن ، شغلن نفسهن بدون شحن .

شفتي ضلت ترجف بعدت عيوني ورديت :- لا اني ربطتهم ؏ كهرباء..

ردت اطلع بحجت اصب ستوقفني
وهو يوكف ويجي بتجاهي:- الجواب الج انتِ احكمي ، جوابج منطقي ..

ڪُـل مايقترب دكات گلبـي تزيد
اجمع الدمع بعيوني وأني أقرأ بعيونه العذاب :- اي منطقي ..

اقترب اكثر مد ايده بكل هدوء وحذر وره ضهري
وسحب راسي بكل خفه للخلف ، نزل راسه بركبتي
طبع بوسه خفيفه وهمس:- شتشوفين الكدامج غبي .

مكدرت اكمل شهكت بالبجي ،شال راسو رفع راسي
بطرف اصبعو ركز بعيني وهو صاك ؏ اسنانه
-ليش سبحتي چان بقيتي عطره ؏ جسمج
لو ماردتي تبقين يمي وتحسين بـ لمساته ..

حسيت الساني نشل ضليت ابجي واهز براسي
-لا مو هيج والله مو مثل مافكرت ..

كعد ؏ كرسي حط ايده ؏ راسه ماكدر يكمل
-تستغفليني واني اكره الـ استغفال .

-بعمري ما ستغفلتك دائمًا صريحة وياك
وحتى تعرفني اكثر من اهلي ذات نفسهم ..

-اذا هيج الحجي تعاي تكحزي (ادني) كدامي واني اسمع .

شهكت بخوف:- هاييي المره ما اريد احجي بس هل مره مااريد احجي .

صك ؏ اسنانه حسيت بأي دقيقة راح ينفجر كدامي :-ليش لان ڪُـل مره
من تحجيلي ماغلطانه ، هل مره رافضه تكعدين كدامي وتحجين لان
غلطتييي مو .

هزيت راسي بـ اي

وسع عيونه:- شنو .

- غلطططت لان رحت ..

لحضات صار اشبه بـ إعصار صوتو زرف طبلت اذني
وكفت بزاوية الغرفة وايدي سادة اذني بكل قوه

خارت قواي وكعت من طولي واني اشوف عمي دفر الباب
ودخل علينا ، ضليت ارتعش من الخوف واعرف كلش زين
شلون راح يستغل فترة غضبًا ويأذيني بيها .

فراس : شسويتي يملطمه وخليتي عصبي .

رد علية كــانـــون وهو يسحبه
من ايده :- يابا رجال وحرمتوو احنه شعلينا بيهم .

-اكل وحل كانون هاي تريد تموتنا ، احد دافعها علينا هجمت بيوتناا.

رفعت ايدي احتمي بيها من شفتو صار فوك راسي ويريد يضربني
صرخت بخوف ؏ صوتي اجه هو وكف كدامو يمنعو ولزم ايده
دوهــان :- مو هِـيِّ ما بسببها انا عصبي بسبب الشغل .

فراس : انا ادري بسببها وكلنا نعرف لك يول يامصكوع ليش ادافعلها ..

دوهــان : بصلاة محمد عليك خلينا نطلع
نسولف بره مابيه احجي ول يالله ..

من عصبيتو صاح بصوت عالي ؏ كــانـــون
يول انتَ جنك ابو صابر الصافن دحك عليه طلع ابوك وياي .

بعدنا ما مكملين المشكلة الأولى ودخلت ساس البلاء
ام دوهان تمشي وتعدد بالغلط ، ردت اوكف اشك اهدومي واهج
وشحدو الـ يمنعني ..

اخذها وطلع وكلهم طلعوا من البيت ساعة ساعتين مر اليوم كلو
گلبي نغزني ؏ ميار مو معقولة لهل ساعة ماطلب يشوفني مايتحمل
باوعت من الكاميرات ماكو سيارة دوهــان بس كــانـــون ودركان
يتعاركون بالشارع ورضية تطلم ؏ وجهه لبست عباتي
گلبي لعب ، طلعت وصلت يمهم اتجنب ادحگ بوجهه دركْان
بس لمحتو وانصدمت وجهو صاير خريطة من الضرب
درت وجهي ؏ رضية وهمست : وينو ميار .

رضية: شسويتي يولووو يا قُــسَـم دوهــان اخذ ابنو
وام دوهــان وطلع بي للشمال يگول بعد تحلم تلمح ابني
وراح يدز ورقة طلاگچ ..

يتبع ..

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد

( بعد مرور سنوات من الآلم من استلمت الرواية طلبت من كــانـــون
يرجع يقرا النعي حتى اشاركة وياكم يعني الفديو تسجيل جديد
، بس كل الموجودين يبچون ماگدرت اشارك الفديو بالكامل لان اصواتهم مسموعة اكتفيت بهل مقطع راح ينزل بحسابي
انستا وقناة التلي الساعة بـ 8 )