تجبر أحفاد الــ دليم الفصل الثالث وستون 63 - بقلم اساور حسين

تَــجــبـر أحفاد الــ دلــيـم🦅
بقلمي : أساور حسين
المُلْتَقَى _60 _

يمه تعبان يدگ بضلوع صدري يمته يغفى ويستراح
يمه بس عينج عليه مدري شنهي بگلبي طاح

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
<><><><><><><><><>
قُــسَـم ...

ألتفت بتجاهي أنـه من الخوف رجلي صارت خيوط
تراجعت للخلف من رفع المسدس : لووووو براسچ ؟

تذكرت يوم الحريق نرعد گلبي ودگاتو صارت سريعة
بقيت ادحگ بعيوني بس جسمي يرعش ودموعي
خانتني ونزلت ؏ خدي : رجعت تهددني بالقتل والله وعفية عليك .

دوهــان: انتوا تجبروني مو بس اهدد وارتكب جريمة بعد
يولووووو سمعتي كلامهم بكيفهم يزوجون ويطلگون .

تُــمــيم : احنا ناس اصحاب حظ وبخت ما نسعى للطلاگ
بنفسك اختاريت الطلاك هاي اهم نقطة ركزلي بيها
اما الثانية زواجها لا انتَ ولا اي واحد من ولد عمها يگدر يفرض
رأيو بالموضوع لان اولياء امرها موجودين الي هو أنـه وابوي .

كــانـــون : نزل المسدس ورجعوووو المكانو نريد نتفاهم.

دوهــان : اسمع انتَ وياه هل زواج ؏ موتي وهم مايتم
والسبب واضح ، تريدون تستفزوني استفزكم اكثر
تتصرفون بدون علمي اصدمكم بـ تصرفاتي وافعالي .

هجمت ذَهــب كالبوة من دحگت المسدس بيدو
_ خليني احجيها وياك طگ بطگ خاف ولد عمك
مايريدون تنجرح بس يولو انتَ انسان ثقتك بنفسك
مهزوزة ، وماتگدرون بس ؏ هل مسكينة بيك
قوة مقهور ؏ ابنك ربي لو تروح تحاسب الناس
الي انطيت اذنك الهم وهدموووو بيتك .

گضبها كــانـــون وسحبها وصاح بوجهه
_لاااااااااا تدخلين .

ذَهــب : ادخل ادحگ البنية كل فترة يدخلها برعب
يوم شارب وصياح وطيش ويوم مخدرات ويحرگ
البيت عليهه ، وهساع رافع عليهه المسدس وانتوا
تدحگون علية بكل سهولة مو امددو وامووووتوو هين .

ضرب دوهــان الكاونتر صار تفلش تفلش بيدو
_ احترامًا الكانون ما اتجاوز عليچ بس اذا ما تحترمين نفسچ
لوووو يسكتچ أنـه اتصرف وياچ .

ذَهــب: ماتحب شخص يواجهك بحقيقتك
والله ما اتحرك اذا ما احجي الحق والكلام الي
كلهمممم دحكت هذولي كلهم ما يحجون بي
المظلوم الوحيد هين بـ الدليم قُــسَـم كلكم عشتووو
حياتكم بس هي انكسرت بزواج غلط
وانكسرت اكثر بطفل محد يفكر بيهااا
طلعوك سفروك مع العلم هي إلي تستحق
السفر ؏ معاناة والظلم والدمار الصار بيها .

دفعها كــانـــون ؏ درج گضبت بالدرج من رادت توگع
نزلت هَــيـلانـة من فوك صارت بوجهو وذهب وراها
_ لا تمد ايدك عليهه ذَهــب مريضة مابيها حيلك .

كــانـــون : عجل اخذيها واصعدي فووووووك .

هَــيـلانـة: شكو بيها اذا تحچي الحقيقة ادحگ ؏ بنت
عمك انتَ مو تصلي وتصوم وتخاف الله ماتعرف
بنت عمكم دمرتوهاااااا .

ادحگ عليهم من جهه كــانـــون والبنات
ومن جهه ثانية تُــمــيم ودوهان صاروا امالخ
ورضية تصيح بالتلفون وميار يبچي من صفحة
وهو مريض ، نهضت اخذتو ماعندي قوة اسحل
برجلي سحل ، ؏ هل هوسة ودخل دركْان فتح
ايدو وصار يضرب ؏ باب ويزگح بصوت خشن
_ صووووووووت صوووووووت صووووووت .

رضية: يول تعبنا من المشاكل والله مصايح اربع وعشرين
ساعة يتضاربون مثل العدوان .

اشر ؏ باب الخارجي وهو موسع عيونو
دركْان: طلعوا كلكم برة يلة كلكم .

دوهــان: انتَ سمعت بخرابيط اخوك وابن عمك .

تُــمــيم : يا خرابيط ساقـ**** غير قسمة واجت لأختي شعليك .

دركْان: تطلعون لو أنـه اطلعكم بطريقتي .

آخذت هَــيـلانـة ذَهــب وصعدت وكانون دفعهم
برة اخذ دركْان بطل ماي وطلع وهو يشرب
_شكبرها عليكم تتعاركون جدام النسوان طيح الله حظكم .

كــانـــون : هذا صاير فرد مرة عار .

دركْان: وانه اگول عليك عاقل ..

حجه تُــمــيم الصار كلو بالتفصيل دوهــان گعد ؏ كرسي
وفتح دگم القميص كلو ويهز برجلو اشر دركان بعيونو
لكانون يريدو ينتبه ؏ حالة دوهــان : بيك شي ؟

تُــمــيم : بالغلط ضربتو ؏ كلبو يمكن ضاق نفسو منها .

دوهــان : بربكم يعني اذا اطلگون نسوانكم وعدكم طفل منها
عادي عدكم تروح تزوج ، زين بهل حال تقبلون احضر وياكم
واشد گرون واحتمال اني اسلمها بيدي .

كــانـــون : يا اخي لو نفس وضعكم اي اقبل .

دوهــان: ياااااااا وضع يعني تتزوج وتعوف ابنها علمود زلمة !!

كــانـــون : عجل تدفن روحها اول تالي تتزوج .

جر نفس متقطع ورد ؏ كــانـــون وهو ينهض
يريد يطلع : من الأخير ؏ موتي تصير أنـه موجود
اريد گ**** يدخل نيتو خطبة لهل بيت .

تُــمــيم : يلة لا تزعل ندخلو ؏ بيت الثاني .

دركْان: نعاااااااااااال تُــمــيم سد اثمك .

عفتهم يحچون ودخلت للغرفة اطبطب ؏ ميار وهو بعدو
يشهگ ؏ ابو دمرني هلكني هلاك اخر شي اخذتو رضية
تسولف وياه الى ان نام ، ومن الهبطة أنـه هم خليت راسي ونمت
ماعرف شكثر مر وكت بس فزيت ؏ صوت من سمعتو
وجع گلبي وجسمي قشعر من الخوف
فكيت عيوني ادحگ شصاير دوهــان
يريد يشيلني نهضت دفعتو بخفه
_ شكووو اسم الله شبيكم ؟

دوهــان : دم شنوووو هذا الدم .

دحگت ؏ مخدتي مليانة دم بقيت لا اخذ ولا انطي لدقايق
ودوهان من الفزع گعد ؏ مجر يلتقط انفاسو
رضية: ومحمد گلت شنوو انتحرت ؏ هل دم .

قُــسَـم : انتحر ؏ شنو ومنو يستاهل ، وصلاتي شنو موقعها .

گازو : يمكن ضغطها ارتفع .

رضية: امشي هساع نروح للمضمد يقيس ضغطچ .

قُــسَـم : مايحتاج بس اغسل اريد وارجع أنام نعسانة .

طلع دوهــان وهو يگلب بالتلفون اثاري مخابر ؏ كــانـــون
ماكو بين ما غسلت لگيتو يمي يدحگ
كــانـــون : بدلي بسرعة نروح نجيك وضعچ .

اريد اعترض ما انطاني مجال دخلت لبست عباتي
ورحت صعدت بسيرتو هو من طلع السيارة دحكت
دوهــان يشرب جكاير بالباب رحت بس اني وكانون
للمضمد قاس ضغطي شرح كــانـــون حالتي
_ ربنا يحبچ ونزف خشمچ الحمدلله لو مانزفت
اسم الله كان راحت بيها الظاهر صاير وياهه موقف او مشاكل قوية .

اكد كانون على كلامو وتشكر منو وطلعني فر السيارة مو بطريق البيت
وگفني جدام منتزه بي اطفال وحديقة حلوة : ننزل نسولف بموضوع
مهم يخص حياتچ بعيد عن البيت .

بدون تفكير نزلت گعدنا ؏ مقاعد موجودة بالمنتزه
شغل جكارتو وبصوت هامس فهمني : قُــسَـم موضوع الخطبة
حقيقي مو كذب فعلًا اكو شخص مؤدب وخلوق تقدم لخطبتچ
وصدگ اني وتميم رحنا تعرفنا ؏ الزلمة وسألت عليَّ چثير .

قُــسَـم : كــانـــون لا تكمل مستحيل اغلط مرتين .

كــانـــون : بس هل مرة محد يجبرچ ؏ زواج
حالچ حال البنات تدخلين رأيه شرعية تتعرفين ؏ هل شخص
تشوفي مناسب او غير مناسب والج كامل الحق بالموافقة والرفض .

قُــسَـم : فكرة الزواج شايلتها من راسي وكرست حياتي
لميار ابني انظلم بين ام واب مبهذلين تريد اكمل علية
واتركو وهو بهل عمر بـ امس الحاجة آليه .

كــانـــون : ابد ما اضغط عليچ يكون بعلمچ أنـه وياچ
موضدچ ، سألت گلت انطيچ علم بالموضوع قبل لا اقرر
من كيفي وارفض مو من حقي ارفض قبلچ .

قُــسَـم : ارفض كــانـــون اي خطبة تجي ترفضها فدوة
مرتاحة بحياتي بدون زواج أصلًا الارتباط ما يناسبني .

نهض مشيت وياه وگف جدام ابو العصير اخذ اثنين
بقيت امشي وهو يمشي بس بدون كلام وتلفونو يرن
ادحگ اسم المتصل دوهــان يغلق المكالمة وما يجاوب
الى ان رجعني للبيت بعدو دوهــان بالباب من شاف
السيارة دخل للبيت الثاني عود عشتو ما مهتم
بوجهي رحت للغرفة لگيت رضية مغيرة الشراشف
اخذت تلفونها واتصلت ؏ تُــمــيم بعد ماعرفت
ميار اخذو دوهان : تگدر تجي عفية ؟

تُــمــيم: عيوني دقايق ويمچ .

بقييت اتلمس مكان ميار وفكرة ادور براسي
ماعرف اذا صح او غلط بس ماعندي حل
ثاني ، مد تُــمــيم راسو وهمس : شبيها الحلوة مالتي .

عدلت گعدتي ورجعت شعري وطبطبت ؏ سرير يمي
اجه گعد وهو مستغرب : اريد اطلب منك طلب
بس ماريد كائن من يكن يعرف واذا انتَ صدگ اخوية
وينشد بيك الضهر لا ترفض ولا تعارض .

تُــمــيم : يا ستار استر يولوو احجي شكوو ؟

قُــسَـم : اريد تاخذني البيت خالة امل طلعني من هين
فدوة اروحلك تعبت بس اريد ارتاح افكر بدون ضغط .

تُــمــيم : أنـه هل فترة موجود منو بعد يحچي وياچ اشگ اثمو .

قُــسَـم : لهل سبب اريد اروح عرك ماريد تُــمــيم ماريد
كون ابتعد لا ضغط لا تفكير فترة بس فترة فدوة .

تُــمــيم : بعيدة حيل بعيدة خالة امل .

قُــسَـم : لان بعيد بيتها اريدها وادري بيها
من النوع اذا اطلب منها ماتحچي أنـه يمها
تسكت هي كلها فترة وأستعيد نفسي وارجع .

تُــمــيم : وميار ؟

قُــسَـم : من المشاكل اعصابي تعبانة ودائمًا عصبية عليَّ
ماريد يكرهني راح اعوفو عند رضية هي امو الثانية
وذهب موجودة يعني گلبي بارد ؏ ميار .

تُــمــيم : عجل هيري نفسچ الفجر نطلع .

قُــسَـم : امانة ماريد شخص يعرف حتى كــانـــون .

تُــمــيم : بالخدمة خوية بالخدمة .

هو طلع وانه لملمت كم غرض اخاف احتاج
ذبيتهن جوة السرير ، بيومها ظل ميار عند ابو
لان مريضة مايريدون ادوخ بي ، وگازو والبنات
بغرفة تَـــمــوز القديمة ، بس أنـه ورضية نايمين بالغرفة
قبل الصلاة بنص ساعة لبست واخذت جنطة الملابس
وطلعت ؏ اطراف اصابيعي مريت من باب المطبخ مارحت
؏ استقبال لان دركان وتموز نايمين غادي ، فكيت الباب الخارجي
وسديتو لگيت تُــمــيم مشغل السيارة صعدت وانه ادحگلى باب
روحـي بقت عند ابني بس ضروري ابتعد ماريد يشوف آمو ضعيفة.

طلعنا بغداد واكثر من محافظة وياهه الى ان وصلت الظهر
البيتهم نزل تُــمــيم قبلي طلع ابنها سلم عليَّ واشر حتى انزل
_ السلام عليكم .

_ وعليكم السلام تفضلوا أهلًا وسهلا بيكم .

طلعت خالتي من شافتني ماصدگت
_ يولووو هلا هلا بتميم والقسم عيني شلونكم .

بوستها وتميم سلم عليهه دخلتني طلعت بتها بعمري صديقتي
سلمت وگعدت اني وخالتي ؏ صفحة سولفت كل الصار ويايَّ
بقت تبچي وتشهگ ابنها بس يريد يعرف شبيها وبتها تغسل
بوجهه بست راسها. وهمست : كافي يا گلبي كافي لا تبچين .

ام عز : يول اختي هيچ كلبها صار مع الآسف عليهه يكسرون بيچ
وهي ساكته شني تخاف منهم أنـه اخليهم بلغبون بحياة بنتي
واسكت يممممه انا غلام ابوي .

قُــسَـم : اجيت اريد اظل يمچ هل فترة اذا تقبلين بس ماريد احد
يعرف مكاني يكفي بس تُــمــيم يباغهم هو اخذني واني بمكان امن .

ام عز : بعيوني اخليچ يمه والله جسمي قشعر ؏ قصتچ .

رنا : ابقي يمي أصلًا اني هل فترة ملل من الوحدة صاير عندي .

ام عز : رنا تريد اخت ابقي بعد عيوني وانت يم تُــمــيم اذا تريد
تطل افرش عيوني الكم مو بس بيتي .

تُــمــيم : ماتقصرين والله ادحگ بيچ حنان امي المفقود ويانه .

ام عز : الدليم غسلو عقلها وسفه عليهه .

تُــمــيم دقايق وسلم وراح وانه بقيت عدهم
صعدتني رنا لغرفتها عرفتها عدها مركز تجميل
ومحل فساتين مناسبات تستغل بالمركز واخوها ؏ محل
مرت اول يومين ما اسوي شي بالثالث من يطلعون
للشغل انزل انظف البيت كلو أنـه وخالتي اساعدها
ونگعد العصر نتابع مسلسلات ومرات تجي عدهم جوارينهم
نظل كاعدين نسولف ونضحك سوية وبين فترة وفترة
يخابر تُــمــيم يطمني ؏ حال ميار ..

><><><><><><><><><><
تَـــمــوز ..

رضية : اخوها وصلها ومن العصر يفهم بيكم هي بمكان امن
بعد هل تهديدات والصياح شكووووو .

كــانـــون : البارحة أنـه احجي وياهه غير المفروض تبلغني .

تُــمــيم : لا مو مفروض أنـه اخوها موجود مالكم حق .

گعدت ؏ تخم اخلص جكارتي واتفرج عليهم
تَـــمــوز: بوية شوكت اشتري بيت والله يخلصني منكم ومن شركم .

تُــمــيم عافهم وطلع ودوهان اخذ ابنو وهو يصيح
؏ امي وهي تفهم بي : بدم بارد عافت الطفل وراحت
وتدري بي مريض .

رضية: تأمن تدري مانقصر وياه يمه .

رجع التفت عليهه ويحچي وهو يرجف
محروگ كلبو : شافت الطفل يقربها مني ويطالب بوجودنا
گالت هل وضع مايصرف سنيوريتا قُــسَـم ماتتحمل
عيني كبرياء شلون اكو خط وصل بينها وبين دوهــان .

رضية: ياا يول دوهــان بس اوگف نحجي دقيقة ول دويهن .

رجعت امي تفر بيدها وتحچي ويايَّ
_ مايبطل رجفتو هل ولد .

تَـــمــوز : دويهن ابو رعشة .

بقيت بمكاني العب بالتلفون ونمت للصبح
گعدت قبل لا اكل اخذت منشفة ودخلت للحمام
كلهن دقايق والبابا تفلش عليَّ : شكوووووووو يا صخام هل بيت .

گازو : افتح الباب افتح .

تَـــمــوز : يولوووو افتح الباب شنوووو غير اسبح
يعني ربي كما خلقني شني مستعجلة منا العالم شهرتي روحچ .

رجعت تضرب بكل قوتها هجست شوية وتدخل عليَّ مداهمة
_ غيرررر تحچي ام رعصه شبيهااااااا .

ضربت الباب بعد ضربة وهي تهمس بعصبية
_ رعصه ترعصك ابووووو النسووووان ابو الملاهي
ابوووو الدكتورات انوووب حولت ؏ دكاترة مصيبة ؏ راسك .

وسعت عيوني والشامبو ؏ راسي اريد اجاوب بعد
نعقد الساني دهر الدهرهه تخوف المفلوكه
گازو : موووو احجي وياك جاوبني ولكككك جاوبني .

تَـــمــوز : ولك شنو ولك ياااا بنت ضبي السانچ لا اگضبو واگصو .

گازو : اطلع ونشوف منو يگص منو اليوم لو أنـه لو انتَ .

غسلت شعري ركض ونشفت ؏ سريع بدلت الداخليات
وطلعت هي ايدها ؏ خصرها وتهز من العصبية
_ تنفسي صرتي حمرة لا تموتين .

دخلت الغرفة امي هي اجت ورايَّ
_ منين هاي حور ؟

تَـــمــوز : حور منو حور ؟

ضربت رجلها بالأرض وصاحت : دكتورة حووور تَـــمــوز منووو هي ؟

تَـــمــوز : بعمري وحياتي ما مر عليَّ هيچ اسم .

قلصت عيونها وتقربت مني فرت الفانيلة بيدها
وبتحذير صاحت : تَـــمــوز اذا ماعرف منو دكتورة حور
تعرف شيصير بيك لو ماتعرف ؟

تَـــمــوز : الصراحة ماعرف شيصير بالله .

رضية: البنية تنتظرك صار نص ساعة امشي .

تَـــمــوز : حور هين !!!

گازو : موووو ما مر عليك هيچ اسم ؟

تَـــمــوز : يول اقصد هاي اووووو دخت
اقصد الي تحجين بيها حور هين ؟

گازو : تمووووووووز .

تَـــمــوز : عيونووو .

گازو : افگسسسس عيونكككك ؟

تَـــمــوز : بس اعصابچ نفتهم السالفة بالبداية .

گازو : يلة كملت امشي نطلع نتعرف عليهه .

تَـــمــوز : ابددددددد ماعندنا نسوان تطلع للخطار
مكانچ هين أنـه اروح أستكشف شني الوضع واسولفلچ .

گضبتني من ايدي واخذتني وهي تفقد اعصابها
سحبت ايدي منها وانه اضحك بنفس الوقت
خايف من رد فعلها ماريد تنقهر من الموضوع
وهي مريضة: عيب شني رائد مسحول انتظري .

عدلت نفسي ودخلت أنـه وياهه ، حور من شافتني
ضحكت وگفت ردت اسلم من بعيد بس هي متعودة تصافحني
مدت ايدها وهي تضحك : عيني السلام عليكم .

صافحتها وانه ابتسم : نورتينا دكتورة حور الوردة .

هجست بگرصه بضهري يگول گرصت عگربة
رجت ايدي امسح ؏ مكان الوجع حور بقت تدحگ
؏ گازو بكثر ما واضح ؏ وجهه الانزعاج
گضبت ايدها ورفعتها افتخر بيها مو بس جدام حور
جدام الكون بكبرو : حور اعرفچ خطيبتي گازو الگزازه
الحكومة ألدولة الأولى والوحيدة .

فهت حور وهي تدحگ بصدمة بس تذكرت كلامي ودارت الموقف
_ تذكرت اووووي نفسها إلي سولفتلي عنها
طليقتك مو ؟

رجعت هجست بگرص بحيث ابتعدت ورحت ؏ تخم
واشرت الحور تگعد عبالي گازو تگعد بصف امي
بس خلتني حاير بزماني اجت گعدت ؏ مسند التخم
بصفي وتبتسم بوجهه حور وتهمس بصوت خافت بس انه
اسمعها منهم : هاي وانت ما مر عليك اسم
حور وهيچ سويت لو يمر شسوي تاخذها بحضنك .

تَـــمــوز : اخذها بحضني أستغفر الله انسان صايم مصلي
استحرم أنـه استحرم لا عبالچ .

حور : صار فترة كم يوم ارن عليك ماكو جواب ظل بالي يمك
واجيت اريد اسلمك العلاج إلي وصيتني عليَّ الماما رضية.

رضية: ياااا حبيبتي فدوة اروحلچ تعبتي نفسچ .

حور : بالخدمة وشوكت مايخلص بس خابرني تَـــمــوز
تلگي عندك ثاني يوم عندي اصدقاء يوفرون علاج من الخارج .

تَـــمــوز : حور الوردة ماتقصرين ، بس شگد لحساب ؟

حور : مو ازعل عليك والله مابيننا هل امور صديق عزيز انتَ .

ترخصت وطلعت وصلتها أنـه وگازو للباب
طلعتها للسيارة صرنا بعيد على گازو
همست : ما بلغتني ناوي ترجعها ؟

تَـــمــوز : جنت ادور عليهه بس لگيت
عنوانها حچيت وياهه ورجعنا .

حور : صدمتني ..

غافلت نفسي ورديت بكل برود : عليش ؟

حور : هيچ ماكو شي ربي يتمم ؏ خير أشوفك بـ أفضل حال .

تَـــمــوز : عليش احس تريدين تبچين .

حور : فرحتلك ، فرصة سعيدة تعرفت عليك تَـــمــوز .

تَـــمــوز : شنو هذا وداع .

حور : ؏ مشاعر ألي احسها وانت رجل متزوج
حاليًا فـ الأفضل وداع حتى ما اسبب الكم مشاكل
گازو مبين عليهه تحبك .

ركبت السيارة بدون زيادة كلام بقيت افكر بكلامها
والموقف الصار ، بس وصلت للمطبخ ودخلت للغرفة عود اريد احجي
ويه امي وكفت بالباب ماكو التفتت وادحگ ؏ گازو دخلت
وامي سلمتها مس ( چفچير ) مال اكل وهي تضحك
رضية : ؏ هل موقف ايدچ الچ يولو .

تَـــمــوز : هاااا هااا سالمين ذكري الله يا بنت الناس ام رعصه .

سدت الباب ورفعتو بوجهي : تكذب عليَّ تَـــمــوز
منووو هاي منووووو حبيتها مووو هي نفسها
من گلت عليهه غيرت مزاجي وستايلي تبدل جنت تقصدها ؟

تَـــمــوز : ابددد .

ضربتني ؏ ايدي تعجبت هجمت عليهه وبـ أيد وحدة
شلتها وشمرتها ؏ سرير وسيطرت ؏ مس
تَـــمــوز : الصلفه تضربين زلمتچ مو عيب .

صرت فوكاها هي بقت ترفس تريد بس افتح ايدهه
وعيونها تجمعت بيها الدموع من الغيرة: يولوووو شبلاچ .

گازو : اني اعرف بالنسوان احلف مستعدة احلف حور تحبك .

تَـــمــوز : بس أنـه ماطلبت تحبني مكتفي بيچ وحدچ .

گازو : لااااااا تكذب وتبيع كلام عليَّ .

سحبتها بحضني أقتربت اخذت شفايفها
بين شفايفي بدون سابق اندار لدقايق
أنـه ضايع بيها وهي ضاعت بيَّ گعدتها
بين رجلي سندت ضهرها علية وهمست : قهرتني والنبي
احجي الصراحة بداعتي تحجي الصراحة .

تَـــمــوز : اي سؤال بالج احجي وانه وعد اجاوب
بشرط بدون زعل .

أومأت براسهه وهمست بتشويش
_ تحبها شنو تعني الك هل بنت ؟

لامست اصابعها وصعدت بخط مستقيم من ايدها
الى ان وصلت رگبتها : بداية تعارفنا عجبتني شخصيتها المرحة
يعني تشبهني تحب تضحك تطلع تتونس صريحة بكلامها
ماتحب لف ودوران وتحب تبادر بالعلاقة .

رفعت ايدها ضربتني راشدي بخفة
وعضتني من ايدي طوقت وجهه
ورجعت سحبت شفايفها ذبلت بيدي
بس بعدها مصممة تعرف كلشي : كم مرة ملتقي بيها ؟

بست راسهه وهمست وانه استنشق عطرها
_ خمس مرات ، الأولى بعيد ميلادها ، الثانية والثالثة أنـه
بادرت بيهن واتصلت بيها طلعنا بمطاعم ، الرابعة للمول
وبيومها سولفت عنچ چثير وهي تعرفت عليچ اكثر
بالخامسة قبل لا ترجعين بكم يوم هي إتصلت وطلعنا
للزوراء وجربنا الألعاب كلها سوية .

رجعت ضربتني راشدي رجعت الراشدي بس بخفة
_ فكرت تتزوجها مو ؟

تَـــمــوز : بصراحة اي وگلت اتعرف عليها اكثر واخطبها
البنية مثقفة أهلها واصلين وابوها زلمة محترم وامها كذالك .

خطفت نفسها من بين ايدي تريد تطلع
اعترضت طريقها واخذت وجهه امسح
بدموعها وترجع تزيد ماتقل : يولووو بس اكمل لحظة .

گازو : ؏ هذا كلامك أنـه وگفت بطريقكم روح ارجع
تزوجهه واني رجعني منين ما جبتني .

تَـــمــوز : قبل لا ترجعين وبـ اخر مقابلة بيني وبينها
حجيت وياهه بخصوص حريتهم الزايدة هي واهلها
لا نفس عاداتنا ولا نفس تقاليدنا يعني عدهم كلشي مختلط
وعادي بناتهم يطلعن ويه اي صديق ، هوووواييي امور ماگدر
اشرحهن كلهن تختلف عني بيهن ، وهي جان ردها أني هيچ
حبني مثل ما اني يا اما لا تحبني لان ما اتغير علمود ارضي شخص .

تَـــمــوز : طبعي صعب مايهمني ماضي حرمتي بس اهم شي
حاضرها ويايَّ تلتزم حجاب ، تلتزم صلاة ، تلتزم بعاداتنا
ماكو اختلاط زلم ونساء غرب ، كلمتي تحترم عند زوجتي .

عدلت شعرها بيدي وتلمست وجهه يواش
غلقت عيونها طبعت بوسة ؏ خدها وكملت
_ وهذا الكلام مو بس ؏ شريكة حياتي لااااا
أنـه انسان ضايع گازو خربطت بحياتي چثير
دخلت ملاهي شربت كلشي يخطر ؏ بالچ سويت
من اتزوج مو زواج وخلص شلح وعبر ماعندي هيچ
اريد ابدي بداية جديدة وياچ انتِ بالذات نلتزم بحترام بعض شوية
نتقرب من رب العالمين ونلتزم صلاة وصوم وعبادة سوية
اقدس زواجنا واطلب المثل مثلچ تگدرين ؟

گازو : وهذا إلي احتاجه تَـــمــوز اخذ ايدي
ونرجع أنـه وياك ؏ طريق الصحيح .

تَـــمــوز : باجر عدنا واجب أنـه والولد بس
اكمل وارجع ندور ؏ بيت هين ونسوي عرس
مطنطن يليق بجمالچ .

تقربت طبعت بوسة بطرف شفتي
وطوقتني بيدها وهي تهمس بحنان : أحبك يا تعبي وعوضي من ربي .

دخلت امي علينة اخذتها من ايدي وصاحت بوجهي
_ هاااا تريد تصير مثل ذاك ابو ختله امشي عوف البنت يلة .

عفتهن وطلعت اشتري اغراض محتاجيها للدوام
رجعت بليل البيت هادئ ودركان عاقل ونايم
غسلت واجيت ؏ فراشي قريب منو : شني الوضع ماكو ختلات .

دركْان: من عينك الطايح حظها تففف .

تَـــمــوز : اشكـ ..

دركْان: كملها وشلون اخليك تتعشى بسنونك يالمسحور .

تَـــمــوز : بس گلي عليش تكره هل كلمة .

دركْان : كلمة جلاد وابو لهب تذكرني بيهم الله لا يرحمهم .

دار ؏ جهه الثانية ونام ومن الفجر كــانـــون
يلقي محاظرات ؏ راسنا : شكبركم تصيرون انهض صلي
حتى نطلععععغ يلة واحدكم ثور شكبرو .

دركْان: ثور ينطحك ويشگك شگ .

رضية: تريد ينطحو لان گاطع عليك الماي والكهرباء .

دركْان: هساع ازوجج بيدي رضية انتظري الحلقة الحاسمة .

راح للحمام غسل وگف يصلي بس كملنا
بدلنا وشربنا جاي من ايد رضية خانم
وصعدت بالسيارة كملت نومتي ، دوهــان
بيدو ميار نايم دخلوا البيت وطلع صعد يمي
تعبان بسرعة نام ، تُــمــيم صعد بالأخير فرش
واخذ مقعدين نام بيهن ، دركْان يسوق
كــانـــون بصفو ، الطريق كلو خلصنا نايمين
الى ان وصلنا نزلت امط بجسمي ماحس غير
ضربني دركان ؏ بطني : استعد وعدل ضهرك وامشي
برزانه مو واكفين ياخذون تحية يالغبي .

ادحگ عليَّ يمشي جدامنا هو وكانون بكل ثبات
بكامل القيافة ، الكل اخذوا تحية ودخلوا لغرفهم
مشيت أنـه كل واحد يسوي تحية اطبطب ؏ صدري
واهز واسي اخر شي قبل لا ادخل للغرفة صار مأمون
جدامي ضربتو ؏ ضهرو وصحت : هاااا يول يالعار .

هو أنـه هيچ حجيت واجتني خزره من دركْان
بحيث منها وماشفت بعد مأمون يوم كامل
لملمت شغلي اخذ نظرة عليَّ ودخل منتسب
بيدو ورقة: سيدي وقع عليهه فدوة .

اخذتها قريتها بتمعن ورجع ادحگ عليَّ
_ هاي ؏ كــانـــون ودركان مايصير اوقع ؏ شغلهم .

_ سيدي المقدم كــانـــون طلع يشوف الوضع برة
بس المقدم دركْان موجود وعصبي هساع يلزمني رزايل .

طلعت جكارتي شربت ورجعت ادحگ بالورقة
_ اذا اوقع عليهه أنـه اترزل بدالك وهساع اول كلمة يگولها
عليش تعديتني ويعاقبك استر ؏ نفسك وروح يوقعها الك .

_ سيدي حدر وياي فدوة اروحلك .

مشيت جدامو دخلت دگيت الباب ودخلت
گاعد جدام المكتب منزل راسو اديناتو اثنينهن
بيهن اوراق رفع راسو ورجع يدحك بالورق
يشتغل بيهن ، اخذ المنتسب تحية وصار ورايَّ
تَـــمــوز : سيدي اريدك توقع ؏ هل ورقة بلازحمة عليك .

دركْان: شنو هاي ؟

اخذها مني قراها بـ اسم المنتسب
رفع راسو وقدم الورقة : الطلب مرفوض ، من تصير كفو وتقدم
اوراقك بيدك لمديرك بدون ضعف من عيوني اوقع .

اخذها مني وظل يتلعثم بالكلام : سيدي لان ..

دركْان: انتَ جديد هين ؟

_ نعم سيدي جديد ..

دركْان: شنو اسمك ؟

_ عبدالرحمن سيدي .

دركان : عبد الرحمن الضعيف ينوكل صير شجاع
لا مكان للضعفاء بيننا .

_ سيدي .

دركْان: انصرف عبد الرحمن .

اخذ تحية وراح بس انسد الباب
گعدت : خطية يولوو عليش تقسي عليهم جنك فراس .

دركْان: أنـه بالدوام ماعندي خطية
ماحب انسان مهزوز يشتغل ويايَّ .

نهض من مكانو عدل البيريه وهو يكمل
_ امشي نطلع ندحگ ؏ الفصيل حتى نتوكل باجر من الصبح .

طلعنا المكان التدريب كــانـــون ودوهان قايمين بالواجب
الكل داخلين تحت التدريب ، وتميم يسلسل بيهم
تَـــمــوز : يا ابطال انتوا جاهزين للتصفية .

_ جاهزين سيدي .

تَـــمــوز : جاهزين .

_ جاهزين سيدي .

طلع غيث نبهنا ؏ خطة بحذر وبس نزلت الشمس
كلها دخلت للمنام ، نمنا ومن الفجر تجهزت السيارات
العسكرية ، صعدنا بالسيارة وبقت تمشي وتمشي
ناخذ تنظيف ؏ مناطق بعد مارجعت العوائل لبيوتهم
الكل بالشارع من شافونا اطفال يقفزون ويصيحون
نحبكم ، وكبار يدعون النا الشعور تغلغل لگلوبنا
وبلحظتها انزاح كل التعب والضغط الي مرينا بي
الخاطر هل عوائل والناس .

دركْان: توجه المنطقة **** .

كــانـــون : شعندك غادي ؟

دركْان: اكو مكان لازم اروح ادحگ عليَّ .

مشت اكثر سيارتنا الى ان نزلنا بالمكان المحدد
لبس دركْان السلاح وصار يمشي سريع
الى ان وگف بساحة فارغة بيها إنقاذ انفجار
غلق عيونو وكآن يمر عليَّ شريط ذكرى لا تموت
دنج للأرض تلمس الأرضية وهمس بصوت ضعيف
_ هين بهل مكان بالضبط مات بطل من ابطال العراق .

اخذ تُــمــيم الكاميرا صور المكان بالتفصيل
طبطب كــانـــون ؏ كتفو وهمس : شهيد العزيز شهيد .

بعد مرور نص ساعة تحرك دركْان من مكانو صار يمشي
الى ان وگف جدام معسكر رفع السلاح ودخل يعرف كل شبر بي
يمشي وهو يحرك السلاح الى ان صار بوسط البيت دحگ
؏ مطبخ وابتسم : تُــمــيم سجل يمك اريد تبحث ؏
عطاء ******* ماتت لو عايشة أريد معلومات .

كــانـــون : هذا المعسكر مالتكم .

أومأ براسو وصار يشرح شنو يصير وصار
بهل معسكر والكل يدحگ بتركيز متعجبين
؏ قصتو والمناطر إلي صبر وعاشها .

رجعنا للسيارات وبدت تغرب وصلنا هلكانين
وزعوا وجبات اكلنا بس كملنا نمنا من التعب
ويوم بعد يوم يتكرر تنظيف ومراقبة الشوارع .

><><><><><><><><><><
هَــيـلانـة ..

_ ذَهــب قابل اني زعطوطه ماريد زهورات ماحب .

_ عجل شلون تريدين تصيرين زينة.

رضية: عوفيها هاي دلع مخطوبات تلگيها تمرضت
لان راح للدوام زعلان متصالح وياهه .

هَــيـلانـة: هههههه بعدچ ماتعرفيني هو غير اخر همي .

رضية: لا تحلفين ابد اصدگچ بدون حلفان .

هَــيـلانـة: اريد انام من صدگ عوفيني ذَهــب بس ساعة .

ذَهــب: اي شي تحتاجين تصيحين عليَّ ماشي .

هزيت راسي وتلفلفت بالبطانية ومثلت النوم
بس طلعت هي ورضية ، گعدت ضربت البطانية
بتذمر وهمست : بعد اريد ادحگ روحـي من تشوفو
تروح تحچي وياه إله اشنقها بسيطة دركْان سهلة تدلل .

رجعت راسي ؏ سرير وهمست : هو حتى ماكو
سبب يستاهل كل هل زعل هو لو يحبني مايروح بدون مايسلم عليَّ .

رجعت افكر بيوم الرجع من البصرة لبست الدشداشة الجديدة
توها رضية اشترتها ألي وتشوقت يشوفها عدلت نفسي ونزلت
اسلم مايسلم ، راسو نازل بالأرض الى ان اخذت الصينية
طقطق اصبع وصاح بتموز : الو الشباب عيوني تحرك
اچل انتَ وحرمتك وخليني أتعشى أنـه وحرمتي .

هو لملم نفسو وراح متت من الخجل بلحظتها
دنگت راسي وهو دنج يدحگ بالتلفون لا هو ماكل
ولا هو مسولف ويايَّ : دركْان ..

_ همممم .

هَــيـلانـة: هممم شنو هاي جديدة .

رفع حاجبو ورجع يدحك بالتلفون
سحبت التلفون من ايدو وغلقتو
هو بحلق عيونو وسعها عليَّ : شنوووو هذا التصرف ؟

هَــيـلانـة : انتَ تصرفك مو حلو گاعدة جدامك ولا عبالك
موجودة تگلب طبيعي هو هذا تصرف حلو .

دركْان: هَــيـلانـة .

هَــيـلانـة: هاااا هااااا يعني غلطت قابل من البداية
ماتريد وجودي عليش طلعت تَـــمــوز .

دركْان: فوكاها لسانها طويل .

هَــيـلانـة: الظاهر ما طايق وجودي اروح احسن .

دركْان : اثبتي بمكانچ وجاوبيني تقبلين ابدل واكشخ
وادخل ؏ حريم بكامل اناقتي .

هَــيـلانـة: عليش بالله اقبل شنو عدنا عرض ازياء .

دركْان: عجل أنـه شنو موقفي من نزلتي ويه دخلتنا
الشعر ضفاير ونازل على ضهرچ والملابس بيض وانتِ بيضة
والشفايف وردية شني معناها دخيل ربچ .

هَــيـلانـة : بس دشداشتي عريضة وجهي ولا قطرة مكياج
بس حمرة سحرية وردية ، ومحد موجود بس ولد عمك
شنو جديدة موديل الغيرة ؟

دركْان: من تعرفت عليچ بوسط داعش جنتي غصبًا عنچ
تلبسين زي اسلامي كامل ، وشواربچ عريف شلتاغ بزمانو
هساع وردية وتفترين علينة شني بوية مهبول واقبل .

هَــيـلانـة: وضعي معجبك ؟

دركْان: ابد ..

گمت اعصابي شاطت منو ومن طريقة كلامو
المستفزة لأبعد الحدود : عجل ما مجبور عليَّ بعدنا بالبداية .

سحبني بقوة من ايدي وگعني بحضنو
ضربت صدرو من قوة الآلم وصاحت : هاي شبلاك فصلت .

دركْان: بعدني مخلصت كلامي ، واجب عليچ
تبقين تسمعين الحد ما اكمل .

هَــيـلانـة: عجل اسمع قبل لا أنـه اسمع
شخصيتك الجديدة ما عاجبتني الصراحة .

دركْان: ايباه ايباه .

هَــيـلانـة: اي عجل شنو بس انتَ تتفزگن براسي .

دركْان: استفگن براسچ !! استفگن شنو ؟

هَــيـلانـة : يعني تتمضيگ .

دركْان: انوب اتمضيگ !! بالله شلون اتمضيگ .

هَــيـلانـة: هين المشكلة ماعندي مزاج أشرح .

دركْان: حدري انطيچ مزاج معدل يلوگ لهل وجهه .
طبگ اديناتي ودفعني ؏ حايط وگام من مكانو
تأذيت من الدفعة انيت بوجع ذبلت عيونو
وهو ينزل راسو برگبتي يبوس بكل رغبة
دار وجهي بتجاهو وگضب وجهي من حنكي
وعض شفتي وابتعد بسرعة : من احجي كلمة تنفذيها .

هَــيـلانـة: دركْان وجعتني .

غلغل ايدو داخل شعري واخذ شفايفي
يعض بيهن ويطبع بوساتو فصل بوستو
وهو يتلمس ضفيرتي همس : گلبي يشتغل نار عليچ هيل .

طبع بوسة وهمس : الخاطري تعودي ؏ شال
هساع يوم بعد يوم تتعودين .

هَــيـلانـة: هساع يوم بعد يوم تتعود انتَ أنـه مو محجبة
وتتقبل الموضوع مو لان أنـه الحرمة لازم اتنازل وارضخ .

جر نفس وصبرو بدا ينفذ گعدني ؏ تخم
وهو بصفي اخذ ايدي وكمل : الحجاب فريضة عليچ هيل
قال تعالى ﴿وَلاََ يُبْدِينَ زِينَتَهُنَّ﴾ لو ما احبچ ما انقهر
ولا اضوچ اگول طز بيها بس انتِ تهميني .

نزلت راسي وهمست بقهر : لا تحچي مثل داعش
يجي يوم واتحجب بس هساع بعدني ما مقتنعة ابد .

دركْان: هيل يعني اذا انصحچ بالحجاب تشبهيني بداعش ؟

هَــيـلانـة: يعني تريد تجبرني كافي
الفترة إلي عشتها عند داعش .

دركْان: ابد ما اجبرچ بس فكري بكلامي أنـه استصعبها
العالم تدحگ ؏ شعر مرتي ورگبتها كلها طالعة
سكتت اليوم لان ولد عمي واعرفهم شنو بس اذا بيوم
من الأيام صارت جدام الغريب ما اضمن تصرفي بلحظتها .

عافني وراح ؏ فراشو كتف ايدو على
صدرو وسد عيونو من القهر ضربتو
؏ ايدو شعرضها وركضت فوك ..

فزيت من حبل افكاري من دخل ميار بيدو التلفون
مال رضية يصيح : دكا دكا هون ( دركْان بالتلفون )

بقيت ادحگ بوجهه الولد واشر بيدي حتى ياخذو
وهو يصيح : هدي هدي ول هدي ( خذي )

سحبتو من ايدو وهمست بـ اذنو : گول يا هَــيـلانـة نايمة .

رفع التلفون ؏ اذنو وصاح : ممو هن دول نام
( عمو هَــيـلانـة تگول نايمة)

ماسمع غير صرخة خلتني اگعد وزن
_ انطيهااااااااا التلفووووووووووون .

طلعت ميار واخذت التلفون اسمع صوت
طقطقة عندو اريد احجي وماريد احجي
_ همممممم .

دركْان: همممم موووو هممممم ، النواصه نايمة مووو ؟

_ هممممم .

دركْان: احجي يول احجي واستري ؏ نفسچ .

هَــيـلانـة: شنو تريد ماتعرف بنية نايمة مايصير اگعد بكيفك .

دركْان: هَــيـلانـة اذا ما امشيچ بكيفي كلشي ما افتهم بسيطة .

هَــيـلانـة: احلام العصر .

دركْان: وتتحديني بعد ، لا تستهزئين بعددددد .

هَــيـلانـة: اني اتصلت لو انتَ ؟

دركْان: كــانـــون اتصل ؏ النارية ذهيبة وگالت مريضة
عبالي آدمية اجيت اطمئن عليچ .

عدلت صوتي وتعمدت ارد بدلع : يعني هيل مو آدمية ؟

دركْان: عندي شغل والواضح كلشي مابيچ .

هَــيـلانـة: أصلًا صار يومين مريضة نايمة بالفراش
ما اشتهي اكل شي وراسي يوجعني تعبانة اوووييي
بس ماكو واحد يحس بيَّ .

دركْان: واحد .

هَــيـلانـة: اي واحد شريف يحس بيَّ .

دركْان: گولي اريد رجل واضحة تريدين صگارچ .

هَــيـلانـة: ما عاش ليصير صگاري ، أنـه اريد خيال .

كملت كلامي هو سد المكالمة بوجهي بقيت مصدومة
ادحگ بالتلفون بعدم تصديق اخذت الجهاز ونزلت
رضية گعدة تدحك ؏ مسلسل وذهب وياهه ذبيت
التلفون وصحت : هذا ابو السبايااااااااااااا ماعاف بنية عند داعش
ما دخل عليهه ، بعد من يتصل ممنوع تجيون التلفون ومن يرجع
بعد ماريدوووووووو ما امشي بزاجوووو من هساع اگولهه
يگلي اريد اصير صگارچ .

ذَهــب: هو يگول اريد اصير صگارچ .

هَــيـلانـة: لا هو گال تريدين صگارچ .

طبطبت رضية ؏ ارضية بصفها وهمست : حدري يمي .

گعدت بنصهن هيَّ وذهب گازو ادرس بخواتها بالاستقبال
اجت وكفت بالباب من سمعت صوتي مسحت رضية
؏ راسي وهمست : انتوا ؏ شنو متعاركين .

هَــيـلانـة: ؏ الحجاب موتني بالحجاب يعني هو يدري أنـه
مو محجبة شكوووو خطبني يعني لازم اغير من نفسي حتى يرضى.

ذَهــب: غلط بس احنا النساء نتنازل ونتغاضى ونتغافل
ونسامح ونمشي ونلبس ؏ مرامهم ألي يحب يحب محبوبو
ويتعود ؏ اطباعو مو شرط يغير منو .

رضية: يمه هيل انتِ بعدچ صغيرة وتحتاجين النصيحة
الزلمة من البداية يا اما تعودي ؏ طبعچ انتِ يا اما
هو يفوز ويعلمچ ؏ طبعوا انتِ لازم تسمعين كلامو بس بحدود .

هَــيـلانـة: شلون يعني ؟

رضية: من البداية الزلمة تعويد على شنو تعودي هو يستمر للتالي
مثلًا اذا ما تعودي انتِ تحبين الطلعة تبقين طول عمرچ بالبيت
اذا ترضخين ومن يجبرچ تلبسين الشال وتقبلين بعدين راح
يتعمق اكثر واكثر ويطلب منچ امور انتِ مات بيها ويزعل
وهو يدري راح تخضعين وتقبلين بالأخير .

هَــيـلانـة: افتهمت عليچ أنـه اعرف شلون اخلي يتأقلم .

ذَهــب: شلون ؟

رضية: تبطل تتختل هي وياه .

هَــيـلانـة: هههههههه هاي شعرفچ .

رضية: عرفتي بعد نقطة ضعفو جدامچ .

رجعت للغرفة من الدوخة وگازو كل شوية
تفتح الباب تگلي : هاي عين عليچ .

وتروح نمت بيومها صرت اتهرب بالنوم حتى ما اكثر كلام
الثاني يوم هجست بـ اصبع يلاعب رموشي ومد ايدو رفعني
من السريع صرت بحضنو : يمههههههه .

دركْان: عليچ امر القاء قبض .

هَــيـلانـة: دركْان .

دركْان: ها يلي اخذتي عگل دركْان .

هَــيـلانـة: اكبر جذاب فيكِ يا دنيا .

دنج بدون تفاهم عض شفتي السفلية طفرت من حضنو
وگعت بكل حيلي ؏ آرض وهو رفع راسو وبعلو صوتو يضحك
_ بوية ظهرت محاسنچ كلهن .

گضبت ايدو ودرت ؏ ظهرو ادفع بي ولا يتحرك
_ اطلع برة اطلع ماريد ادحگ شكلك .

وصلتو للباب هو استدار ودفعني قبض ؏ ايدي ورفعها
فوك ونزل يبوس برگبتي : شگد ما تستحي عوفني دركْان .

دركْان: عوفني دركْان العيارة وهي تثير بيَّ
بحركاتها ودلعها ، عوفني دركْان تموع بين ايدي الخوثه .

نزلت ايدي ودفعتو بخفة من صدرو
_اطلع ..

مال راسو وهمس برغبة ويغمز بعيونو : متأكدة ؟

_ بعد فلا أحبك .

_ ما تحبيني ؟

_ ابد بعد فلا أحبك .

ذَهــب: كــانـــون يااااااااا كــانـــون .

ابتعد وهو يصيح بيها : يول الله دخلتي إنزال جوي علينة.

ذَهــب: تعوف اختي لا ومحمد العب لعب .

دركْان: يولووو هاي حرمتي ، مهرتي .

ذَهــب: يمتى هاي شني سويتوا عرس وما عزمتوني
بعدك بس خطيبها بس شنوووو خطيبها .

دركْان: ذهيبة الله يساعد أخوي عليچ شني من بشر انتِ .

دركْان: كــانـــون وينك .

دركْان: رايح ارتاح وابدل فد ساعة بين ماتكمل اختچ
حتى نروح نكمل تجهيز ماريد العرس يطول اتزوجها
واخذها منچ شحدچ تفكين اثمچ بعد .

ذَهــب: بعدها تتريك بالبداية وبعدين تبدل وتروحون .

دركْان: تريگت بيَّ مايحتاج .

كملها وطلع وانه وجهي انصبغ من الخجل
وينو انطي روحـي بهل مصيبة وذهب مدري
تضحك مدري تخزر بيَّ قبل لا تطلع تقلد ؏
كلامي مال بارحة : افتهمت عليچ أنـه اعرف شلون اخلي يتأقلم .

هَــيـلانـة: هو فات شعرفني أنـه راح يرجععععع
وبعدين طردتو أصلًا .

ذَهــب: واضح من شفايفچ المنفوخة .

يا گاع انشگي وبلعيني بلععععععع
رحت على مرايا شمسوي بيَّ سينما
هاي شوكت وشلوون يا ابو السبايا
؏ هل سالفة رحت غسلت ونزلت
شربت بس گلاص حليب وچاي
وشوية بسكت وصعدت لبست فستان
لون وردي سادة وحذاء لون ابيض
وشعري سرحتو وخليت طوق لون ابيض
ورشيت عطر ونزلت لإن ذهب صاحتني
اول ما نزلت اسمع دركْان يسولف وياهم .

كــانـــون : يعني بالبداية بس تشترون .

دركْان: أصبغ الغرفة قبل كلشي ، وبعدين ادخل اثاث .

ذَهــب: جهاز العرس نروح أنـه وياها وعمتي رضية
لا تعب نفسك انتِ بس كمل غرفتكم .

تَـــمــوز : أنـه هم طالع ادور بيت بين ما اجهزو
حتى اتزوج واعوفكم واخلص منكم .

كــانـــون : مسوي منيه علينة عوووددد هو موجود ويانه
مايدري معقولة مايدري يووووووم عيد .

خطيت اول خطوة جدامهم صفگ دركْان ايد بيد
وصاح : الوووووضع مصخم وملطمممم يا قووووووم .

هَــيـلانـة: شكوووو ؟

دركْان: تريدين تخبليني ؟

هَــيـلانـة: لا .

دركْان: تريدين تجلطيني .

هَــيـلانـة: لا .

دركْان: هل برأيچ أنـه ديوث ؟

هَــيـلانـة: هاي شنوو .

دركْان: هل أنـه صاحب القرنين ؟

هَــيـلانـة: منو هذا ؟

دركْان: ضربني صداع نصفي اخوان .

كــانـــون : بسسس افتهم لحظة .

دركْان: بس لا انجلط قبل لا اتزوج .

تَـــمــوز : خوية هَــيـلانـة اذا تطلعين هيچ
العالم عبالهم شاردة من فلم اجنبي روسي .

هَــيـلانـة: ذَهــب ..

رضية: اعصابكم داخت لبنية وهي مريضة .

دركْان: أنـه تمرضت ومحمد دخت دخت .

رضية: ابو ختله اخذ نفس فهم البنت يواش .

دركْان: فهموها أنـه زلمة عراقي ودليمي صاحب غيرة
ومحمد موووو ديوث اطلعهااااا استعراض بالشارع هيچ .

هَــيـلانـة: تره الفستان محتشم بس كف ايدي طالع
ورجلي كلهه ماكو وشعري لميتو بعد شنو اتنقب ؟

دركْان: نووووصت النوووواصة اخر كلمتين ما فهمتهن
يولوووو بس فهميني كل عگلچ اطلعچ هيچ .

هَــيـلانـة: من كل عقلي عادي ومحمد شكو بيها .

وگف ؏ حيلو اجه بتجاهي وصاح بوجهي
_ لاااااا هَــيـلانـة مو عادي ابد مو عادي
؏ موتي تطلعين هيچ ؏ موتي .

تركتو وصعدت وانه اجاوب عليَّ : عجل احنا ما متفاهمين
نفركش كلشي من البداية احسن .

دركْان: شنووووووو ؟

هَــيـلانـة: سمعتني زين ماكو داعي اعيد .

دركْان: يعني عادي تعوفيني علمود هيچ سبب ؟

هَــيـلانـة: يعني عادي تسوي مشاكل ويايَّ ؏ هل سبب .

دركْان: اوكفي مووووو احجي وين رايحة ؟

هَــيـلانـة: أنـه مو محجبة افتهم هل نقطة دركْان .

دخلت للغرفة گلبي يرعد رعد من الخوف
جريت نفس وگعدت خايفة حيل خايفة
صعدت ذَهــب اجت يمي تلمست شعري
وهمست : دركْان يحبچ ..

هَــيـلانـة: أنـه بعد احبو بس تصرفاتو تغيرت .

ذَهــب: هو من غيرتو عليچ مايعرف صار يتصرف
ومن حقو أنـه من دحكت عليچ من نزلتي بقيت
متعجبة ، ماشاء الله انتِ صرتي جبيرة مو مثل قبل
هَــيـلانـة مفاتنچ واضحة ، لا تتحجبين بس احترمي
انتِ ؏ ذمة رجل شرقي يغار بس خلي شال ؏ شالچ
شلون مكان الى ان تتعودين مثلي .

هَــيـلانـة : عليش اتنازل ليش مو هو يتقبلني .

ذَهــب: المسألة مو شغلت تقبل بس لبسچ بارزچ كُلششش .

ذبيت الفستان وشلت شعري وتلفلفت بالسرير
وهمست : عوفيني ذَهــب اريد انام .

ذَهــب: لا تخسرين دركْان قليل مثلوو تدرين الغيرة
حلوة ، الرجال إلي مايغار على حرمتو ابد هل شعور مو حلوو
ومعناها مايحبها ولا يشوفها حلوة .

جريت نفس وكل كلمة تنطق بيها اعرف صحيحة
بس گلبي مقبوض ، مرت ساعة وانفتح الباب
سمعت صوتو يهمس : تأخرنا وينچ ؟

رفعت لحافي وهمست : هممممم .

طبگ حاجبو وعيونو صارت براسو
تقدم رفعني يدحك ؏ ملابس : هاااي صدگ تحچين غيرتي
ملابسچ غيرررررر نروح شنوووو هذا لعب الزعاطيط .

هَــيـلانـة: اكيد نسيت نفسك دركْان ايدي اذيتي .

ابتعد مني ظل يفتر بالغرفة ورجع بتجاهي
سحبني من رجلي گعدتي ؏ طرف السرير
وهو گعد قريب مني جر نفس وهمس : هيل لا تعذبيني .

هَــيـلانـة: بس ...

رفع ايدي طبع بوسة عليهه ورفع ايدو
يتلمس بوجهي : ماريد يرتفع صوتي عليچ ومحمد انقهر
وبنفس الوكت ما اتقبلها تطلعين ورگبتچ طالعة تلالي من الفستان .

راح ؏ كنتور اكو شال مال ذهب موجود عندي
سحب ايدي وگفني جدام المرايا بكل هدوء
لبسني الشال وصفحة من الصفحات شمرها ؏ كتفي
وهمس : اجمل نساء الكون هي من تزين نفسها بالحجاب .

صار خلفي رفع راسي من حنكي وكمل ؏ كلامو
_ هيل انتِ قطعة ثمينة لازم تتغلفين كالالماس
والكرستال انتِ كزاز اذا ما تتغلفين تنكسرين .

حضن صار وجهي ؏ صدرو وكمل : عوفي هيچ ونطلع
قابل والله مو شرط حجاب كامل بس رگبتچ ما تلالي
اريد بس نكمل البيت فدوة لا تعذبيني .

من دحگ ماكو رد عافني وابتعد وقبل لا ينزل همس
_ راح اظل منتظرچ بالسيارة وماعرف اذا تجين لو لا
بس باقي انتظرچ طول عمري انتظرچ مو أنـه افركش بهل سهولة .

بقيت جدام المرايا اكثر من ربع ساعة وبدلت بس بعدني متردده
عدلت الشال ؏ راسي بس خليتو عدل وصفحة منو ؏ كتفي
ونزلت من شافتني ذَهــب ابتسمت : آلي يحب يتساهل .

هَــيـلانـة: ماراح اتحجب صدكيني بس اجرب الموضوع .

طلعت هو يشرب جكاير من شافني تقدم جدام كــانـــون
وتموز باس راسي وفتح الباب : يولو انتِ ؏ راسي ومحمد .

كــانـــون : الله يوفقكم .

تَـــمــوز : موفقهم بدقايق فر راس البنت فر .

اخذني وطلعنا وگفني جدام محل اثاث
اختاريت حجره لون ابيض لوني المفضل
ونص تخم ، ولوحات ؏ شكل لبوة واسد
وزرع سنادين اصطناعي بلون اخضر
ماتركت بردات استاندات مكياج
حجزناهن برقم وعنوان ونص مبلغ وطلعنا
؏ ابو الصبغ اختاريت ابيض وهو اشترى
باب للغرفة جديد ، الثاني يوم طلعنا كملنا
كل احتياجات الغرفة ، ارتاحيت بس يوم والبعدو
طلعت أنـه وذهب ورضية استريت ملابس ؏ مكياج
جهاز عروس كامل مكمل ، واجرت البدلة بس مال عرس
وحجزت بمركز تجميل صاير بشارع فلسيطين معروف
وحددنا يوم زواجنا يوم خميس ..

بدا العد التنازلي ، خوف ، توتر ، قلق ، رهبة
كلهن بيَّ ، گاعدة جدام المرايا بالمركز البنية
تسرح بشعري ومنها رحت سويت دزاين حلو
بـ اظافري اتصل دركْان وانه اشتغل : حبيبي هيل سمعت المركز
بي شباب يسون تسريحات بداعتي لا تخلين زلمة يشتغل شعرچ .

هَــيـلانـة: هااا .

دركْان: هيل عمري انتِ نواصتي بس اجي اخذچ احلفچ
اذا زلمة مسوي شعرچ لو مگرب منچ اخرب الأول والتالي .

هَــيـلانـة: بعدد بعدد هدد اطلع ؏ حقيقتك .

دركْان: اذا تحبيني هيل احترمي كلامي .

هَــيـلانـة: ماشي صار وعد .

دركْان: احبچ نواصتي .

للعصر رفعت راسي دحگت بالمرايا وابتسمت
ذَهــب نزلت لبستني الحذاء وصعدت تقرأ ايات بوجهي
وتنفخ : النسوان كلهه تدحگ عليچ خفت والنبي .

هَــيـلانـة: ههههه كل العرايس ماشاء الله جميلات .

اتصل دركْان حاوبت عليَّ بلغها هو بالباب
لملمت اغراضنا وطلعنا هو دهل جوة باس راسي
وحدة من الكبار هلهلت والعرايس گاعدات
نريد نطلع ودنج جدامي : بروح العزيز هذولي النثايه كون تگربو منچ .

هَــيـلانـة: والقران اختاريت قسم المحجبات وداعتك .

طلعني للسيارة وهو يضحك لابس رسمي اول مرة
اشوفو بالرسمي ياخذ العقل هو جسمو متناسق
وطويل وضخم زايد الرسمي جمال شغل
اغنية واخذ ايدي ويرگص بقيت حرك ايدي
الثانية بيها باقة العرس وارگص وياه
وذهب تضحك توجهنا للمصور أخذنا
لقطات لا تعد ولا تحصى والمصورة
كل شوية تگول كملت وبعدين توچع تگول : العروس
تسوي واهس للتصوير .

طلعنا منها تعبانين ، وباردة لكحت الفروة البيضة
؏ اكتافي وصعدت بالسيارة توجهت للقاعة
ذَهــب لابسه رسمي اخذها كــانـــون اول ما نزلت
وانه انتظرت بغرفة الانتظار دقايق ودخل كــانـــون
همس : الف مبروك بوية هَــيـلانـة .

من الخجل لساني ثگل طلعنا جدام الباب حتى نسوي دخولية
ومتفقين كــانـــون هو يقدمني الدركان ، انفتح الستار ؏ أغنية
طلي بالأبيض يا زهرة نيسان ، ذَهــب من دحگت عليهه تبچي
اني همات لزمتني العبرة وبچيت اخذني دركان من ايدو
كــانـــون : انتَ بعد جدام عيوني اذا تزعلها اقوم وياك بالواجب .

دركْان: بعد عيني جيبها اريدها .

باسني بكل قوتو وبلهفة من خدي والكل يصفگ ويصوفرون
متت بدمي ، اول ما گعدنا دحگت ؏ باب دخلت قُــسَـم
وتميم ركض ميار بتجاهه اخذتو تبوس بي وراحت
الرضية والذهب تسلم عليهن .

دوهــان گاعد من دخلت وگف ؏ حيلو استعدادا
هي لابسة فستان گاعد مخصر ؏ جسمها
وجهه صافي مكياج خفيف والشال ملفوف
بطريقة مرتبة ويه الفستان ركض ميار ؏ ابو
آخذت ذهب أيدها واجت بتجاهي وكانون
اجه همس بـ اذن دركْان ، نهض دركْان
سلم ؏ قُــسَـم وأشر لدوهان من بعيد
اجه دوهــان شايل ميار اخذو دركْان
منو وطلع من جيبو القراصة والحلقة
وسلمهن لميار : ادحگ يولو راح اخلف الك بنية
اله باربي من الجمال من تكبر تنطيها هذني افتهمت .

بهتت قُــسَـم بلحظتها ودوهان صفن بوجهه دركْان
كــانـــون نرعب من دوهــان قبض ايدو وذهب
گضبتني اندهشت من تصرفو ودموعي تجمعت بعيوني
تقدم يريد ياخذ ايدي سحبتها منو دار وجهو أنشده .

يتبع ..

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد