تجبر أحفاد الــ دليم الفصل الثاني وستون 62 - بقلم اساور حسين

تَــجــبـر أحفاد الــ دلــيـم🦅
بقلمي : أساور حسين
المُلْتَقَى _59 _

وعبالك مسوي فضل لو مره يسئل عني
استاهل اتخلى حلم تتعبلي وتحصلني...

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
<><><><><><><><><>
تَـــمــوز ..

كل عادة ومثل كل يوم تعودت اگعد اغسل
واروح ؏ بيت الثاني تتلگاني ام كــانـــون : منتظرتك تأخرت اليوم .

تَـــمــوز : اخذتني النومة البارحة تعبنا ونمنا بوقت متأخر.

ام كــانـــون : انتَ ودركان بدل ما تنامون بالاستقبال
وصاير البيت هوسة تعالوا هين غرفتين فارغات فوگ .

تَـــمــوز : لااا شكرًا مرتاحين غادي لو انام بالحمام
ما ارجع وياهم بيت واحد واصبح بعركة وانام بعركة .

طفيت جكارتي واشرت ؏ باب الغرفة: نايم لو گاعد .

ام كــانـــون : صار ساعتين ينتظرك ما ادري شني يريد .

دخلت عليَّ متمدد ويتسمع ؏ كلامنا أخذت
جهاز الضغط وگعدت بصفو رفعت ردن
الدشداشة وانه أستفسر: شلونك اليوم ؟

فراس : شوكت يجوني مو حلف تقنعهم .

تَـــمــوز : زين ضغطك مستقر تريگت ؟

فراس : يعني حاربت الدنيا كلها الخاطرهم
وفرت الهم كل سبل الراحة بطفولتهم هاي جزاتي ؟

تَـــمــوز : عمه اچل شرب علاجو ؟

ام كــانـــون : مايقبل يمه مو تدري .

حنيت روحـي وسحبت رجلو اخذت الكرسي المتحرك
وشلتو گعدتو عليَّ واخذتو للحمام دخلتوا سبحتو
بيدي وطلعتو نومتو بفراشو وام كــانـــون دخلت
الريوگ : يلة اچل شوية حتى تاخذ علاجك ورايَّ شغل ؟

فراس : عليش تجيني وتسوي كل هذا تريد تعذبني
تگلي أنـه عدوك اداريك ؟

تَـــمــوز : ربيت نفسي ما احقد ؏ انسان عاجر مهما أذاني
بس انت سويت زين ويايَّ بحياتك ضغطت عليَّ وخليتني
صاحب رتبة وبكثر ما جنت تأذيني بس ما تقلل مني جدام احد بالدوام .

فراس : سمعتي من سمعتكم وسمعتكم من سمعتي
أنـه قيادتكم وانتوا كذالك ماجنت اتساهل وياكم
حتى تصيرون زلم ينشد بيكم الظهر وما تعتمدون ؏ بشر .

تَـــمــوز : انتَ هديت حيل كل واحد بـ احفاد الدليم
انتَ دمرتنا اكثر من ما تفيدنا احلفك بشدتك ما مقهور ؏
حالهم دوهــان تايهه وقسم خايفة دركْان كبر عمرو
وهو لليوم ما مستقر بحياتو بسببك ، وكانون لو
منطي امر من زمان وماخايف ؏ نفسك من جلاد
كان من زمان مات وهساع عزيز بحضن ابو .

فراس : وانتَ ؟

تَـــمــوز : عايش .

فراس : اكثر واحد اذيتو بينهم تَـــمــوز جنت مخاطر شرس
حاربت بقوة جنت اخاف من ردات فعلك لان عقلك يتغلب
؏ كل احتياطاتي حتى اتغلب ؏ افعالك .

تَـــمــوز : امي جانت تگول انتَ ماتگدر ؏ فراس
هذا مثل النار وانت حطبها كل ما تنطي فرع
من فروعك يحرگك اكثر ، بس ربك يهدو طلع كلامها صحيح .

دار وجهو مني وشهگ مخنوگ ردت اعوفو واطلع
گضب ايدي وهمس بتعب : ماعرف شلون تسامحني
بس ردت اساعدك بـ احد اهم أحلامك الي سعيت وهدمتو .

لوهلة ترددت وقلقت منو لليوم يشكل خطر عليَّ
هذا إحساسي كمل كلامو صدمني : هاي ورقة بيها عنوان
طليقتك واول حب بحياتك گازو .

تَـــمــوز : ومنووووو گال اريد عنوانهااااااا ؟

فراس : ادري بيك صار فترة تبحث عنها
وادري بيك سافرت للشمال علمودها
ورجعت من الشمال لديالى وماكو
ومن النجف للعمارة وماكو
گازو بالبصرة تَـــمــوز هي واخواتها .

تَـــمــوز : شيل ايدك من حياتي بعد اذا تغلط ولو غلط واحد
واحد وروح ابوية بفراشك اموووت .

فراس : قبل لا تروح اريدك تعرف گازو بريئة توسلت
بيَّ وبيوم اخذت السحر مني حتى ايدي نزلت تبوس بيها
حتى ما تأذيك هددتها تهديدات أنـه زلمة اذا اتهدد بهل طريقة
أرضخ واخاف واستسلم وأنفذ .

سحبت الورقة من ايدو وقبل لا إطلع همست
_ ما أحتاج تفهمني أنـه اعرف منوو وشنوو حب گلبي .

طلعت متلهف للبيت دخلت عليهم الكون بكبرو
ما يكفيني ضحكت وانه ادحگ عليهم : يووولووو حددت
موقع گازو وهل مرة مضبوووط .

رضية: احلف يمهههههه احاف اخاف مثل مل مرة
تگول هل مرة مضبوط ويطلع غلط .

تَـــمــوز : فراس انطاني العنوان .

دركْان: عشتوووووو اي والله عشتوووو .

كــانـــون : السالفة صايرة كلش فيطي .

قُــسَـم : حلم علم يولوووو الجلطة اثرت تأثيرات بيهن العجب
فراس يساعد تَـــمــوز العدو نمبر وان .

رضية: لعب گلبي مو خالي هل فراس
مايسوي شي لله هو بيدو هجم حياتك هجم يساعدك شلون .

تَـــمــوز : ما اخسر شي اروح واكتشف كلامو صحيح لو كذب .

كــانـــون : اجي وياك ماتروح وحدك .

تَـــمــوز : وانت دركْان تگدر تجي ويايَّ .

دركْان: بالخدمة بدون ما تگول شلون اعوفك وحدك .

تَـــمــوز : نطلع هساع ؟

دركْان: مفعول الدودة قوي .

تَـــمــوز : مو اقوى من دودتك يالدودكي .

اخذت امي جهزت كم حاجة تحسبًا نتأخر او احتاجهن
اخذتهن وطلعت لگيت دركان يسولف هو وهيلانة
بالكراج : رايح متختخ متسرسح راح يتحول من الصلب للسائل .

هَــيـلانـة: توصلون بالسلامة .

دركْان : ومحمد انتِ السلامة .

سحبتو من ايدو وصعدتو هو خرب من الضحك
_ يولوووو قبل لا تسافر واول ما رجعتوا تستحي تدحك عليهه
شبلاك انفجعت ؏ بنت جنك وحش نايم ؏ خوانيگهه لا تفطس بيدك .

دركْان: من أتزوج يتعالج هل فقر إلحاد جدًا .

تَـــمــوز : الله يساعد گلبي .

صعدت اسوق وهو بالصدر وكانون وگف
رافع حاجبو الوضع كلو ما عاجبو : أنـه موجود وانت الدايح تسوق
وانوب طريق البصرة ومحمد نسوي دقلات هوائية ثقيلة .

تَـــمــوز : ماعندك ثقة بيَّ .

كــانـــون : اثق بالچلب اخلي يسوق طريق البصرة وانت لا .

تَـــمــوز : أشكرك .

ما هجست غير ايدي نلوت صحت بوجع
وانه ابحلق عيوني : يول ايدي دركْان ابن الكلب عوفني
اشتعلوووووووا اهلكككككك .

دركْان: كم مرة حذرتك ماتگول أشكرك .

تَـــمــوز : نسيت يولوووووو نسيت ومحمد .

دركْان: بعد لا تعيدها حيوان لا تعيدهاااااا .

تَـــمــوز : بداعت هَــيـلانـة عوفني .

ذب ايدي ويعدل بملابسو رجع ظهرو
؏ كرسي وانه عبرت ؏ خلفيات
والمطبور صعد يسوق : حتى ما بيكم دعوة گوه تلملمون بروحكم
الله شاهركم ومن مصيبة لمصيبة ، شلون سفله اجتمعو عليَّ .

دركْان: صوووووتك هوووووشششش .

تَـــمــوز : هوووش بطيبة كلبكككككك .

دار ضربني عاط كــانـــون : أنزل والله انزل لاااا دوخوني
بعدني حتى ما مطلع السيارة .

رضية: وتالي وياكم زعاطيط شني .

دركْان: انتِ طلعتي نسخة من ابنچ ما احجي وياچ .

رضية: ها ابو ختله گلبت عليَّ .

كــانـــون : هههههههههههه قوية ومحمد قوية.

دركْان: انتَ ولااااا نفس بعدني غاضب عليك
امسح بيك طريق البصرة ذهابًا وإيابًا ومحمد .

تَـــمــوز : يمهههههه هذولي شلون اخلص وياهم الطريق .

رضية: اجي وياكم ومحمد اريد ادحگ واحد يتنفس .

كــانـــون : وين سالمين يمههههههه بس لحظة .

فاتت جابت العباية وصعدت ويانه وعافت التلفون
مالتهه بالبيت وكانون اتصل ؏ تُــمــيم يجي يبات يمهن
قبل لا نحرك تُــمــيم سلم وقفل البوب وفات يمهن
حركنا السيارة من بغداد للبصرة وصلنا المغرب
اجر دركْان فندق اخذنا غرفتين تعشينا بالغرفة
وبس خلصنا راح كــانـــون ودركان للغرفة الثانية
ينامون للصبح نزلنا جوة أكلنا وطلعنا للعنوان
المحدد بالورقة وگفت السيارة جدام بيت قديم
بس كبير گلبي خردني بلحظتها بين اتقدم وبين
افكر بردت فعلها أعرف بـ گازو انجرحت وانسحبت
گضبتني امي من ايدي وهمست : توكل ؏ الله ودگ الباب يمه .

جريت نفس وتوكلت ؏ ربي وخطيت ودگيت بابهم
ثواني وطلع زلمة متوسط العمر من شافنا كلنا
واگفين تعجب .

صافح دركْان لان مبين هو اكبر واحد بيناتنا
وهو ماقصر قام بالواجب : السلام عليكم خوية .

_ وعليكم السلام ورحمة الله تفضل اخي .

دركْان: خوية هو الموضوع شوية مخربط بس
بلازحمة هو سؤال اتمنى ما تنزعج منو .

_ اي گول .

دركْان: عدكم بنوات بـ اسماء گازو وكرز وگمر ؟

رفع حاجبو مستغرب وفر راسو : انتوا منو وشنو تريدون منهن ؟

كــانـــون : خوية البنات موجودات حتى نگدر نفهمك .

_ موجودات احجي .

تَـــمــوز : أنـه طليق گازو الرائد تَـــمــوز .

سمعت صوت اجاني من داخل البيت بس دحگت
ابتسمت ؏ گمر اجت تركض بتجاهي : بابا تموووووز اجه اجه .

حضنتني بقوة گرصت خدها وهمست : يولوو مشتاقلچ
يالخاينه شلون تعوفيني وتروحين هااا .

اشرت ؏ بيت وبرطمت شفايفها
وردت بـ انزعاج : هاي گازو موتتني بالعناد والعصبية.

رضية: اذا ماتصير زحمة يمه اريد احجي أنـه وگازو ؟

فتح الباب بعد ماعرف بـ گمر تعرفني
دخلنا للبيت بدايتو حديقة گعدنا بالاستقبال
هو راح دخل للبيت واخذ گمر من رجع
بدون احم تكلمت : شنو تصير الهن ؟

_ خال البنات .

مال دركْان بتجاهي خافي ضحكتو : عبالك تزوجت هذا .

تَـــمــوز : يخوي بعد مابيَّ حيل صدمات
گلت إذا متزوجها اعرس عليهم هساع واطلع .

كــانـــون : تخيلوا يندگ باب بيتنا ويعددون اسماء نسوانه .

دركْان: ماريد أتخيل اربطو بالباب ومحمد .

تَـــمــوز: شلالات الشرف انتوا منو ابوكم .

رضية: يمه وينها گازو ؟

_ بالبداية مو المفروض اعرف سبب وجودكم .

دركْان: صار سوء فهم ومشاكل وصلتهم
للطلاق جيناكم حتى نجتمع بالبنت ونحجي
وياهه نفتهم منها وتفتهم منه .

_ البنية ماتريد تطلع ومن طلعت منكم
طلعتها بدون رجعه .

تَـــمــوز : بلغتها بوجودنا ؟

_ اي وماتريد تطلع .

فار دمي ماعرف شلون سيطرت ؏ اعصابي
رضية: زين يمه أنـه ادخل جوة احجي وياهه .

_ كل الهلا بيچ يمه تفضلي ويايَّ .

كــانـــون : ما أستغرب اذا ماتريدك ؏ الضرب الضربتو إلها.

دركْان: ضربتهاااا؟

كــانـــون : نفس المجرمين إلي يحقق وياهم قبل بالضبط .

دركْان: وبعين صلفة اجيت ترجعها ؟

تَـــمــوز : كلو من ابوكم يولووو هي غير سحرتني .

رجع الرجال قدم چاي واني بقت جوة تحچي وياهه
طلع الرجال متزوج وعندو جهال يلعبون حوالينا
تَـــمــوز : من شوكت البنات عندك .

_ تقريبًا ثمانية او تسع اشهر ما أتذكر الصراحة .

بقينا نسولف وياه ؏ اوضاع ؏ سيارات ؏ طرق
الى ان دخلت امشي وگازو وراها منزله راسهه
_ السلام عليكم .

ردينا السلام بقيت امرر نظراتي عليهه هي ابد
مارفعت راسها گعدت ؏ تخم بصف امي
رضية: الخاطري طلعت ماتريد تشوفك .

كــانـــون : شلونچ بوية گازو ، أمانة الله ظل بالي يمچ .

گازو : الحمدلله عايشة ابو كرم .

تَـــمــوز : عليش رحتي بهل طريقة طلعتي بدون
كلام ، زين عندچ بيت وضيفة ما محتاجه تروحين
تعيشين عند احد ولا صغرًا بخالچ .

ماسمعت صوتها حضنتها امي رجعت
سألتها: جاوبيني صار اشهر وانه ادور عليچ
يعني هذا التصرف حلوو منطقي !!

گازو : حاولت احجي وياك وبكل مرة تهين بيَّ اكثر من قبل
أنـه من قبلت البيت والشغل گلت يحبني ويريد يعاقبني
وفصلني عنو فترة ونرجع ، بس مرت اشهر طويلة انتَ
لا فكرت تسمعني ولا فكرت تشوفني .

تَـــمــوز : بس مو معناها تعوفين البيت وتطلعين .

گازو : ماقبلها زلمة غريب يصرف عليَّ وعلى أخواتي
وانت تعرف كلش زين نفسيتي متتقبل هيچ امور .

تَـــمــوز : بس تتقبليهااااا من تطلعين انتَ وبنوات صغار
وتعبرين محافظات وحدچ شلوووووون تطلعين بدون علمي
شلوووووون مووووو عيب .

رد خالهه علية متنرفز من عصبيتي
_ بدون علمك ، انتَ مو ولي امرها اخي لا انتَ اب ولا اخ ولا زوج .

تَـــمــوز : بس جنت مخليها بحمايتي وبمسؤولي
بيت معززة مكرمة هي والبنات ميصير تجاوزني وتطلع .

دركْان: ياجماعة الخير مجتمعين ؏ حب الله حتى نتفهم
مو نتعارك ، خوية ولو ضغطنا عليك اليوم بس نگدر
نعوفهم يتفاهمون وحدهم ، اذا نظل يمهم هي ماتقبل
تتعاتب جدام الكل وهو مايقبل تعاتبو وترفع صوتها
جدامنا عيبه تنحسب عدنا الحرمة ترفع صوتها ؏ زلمة بمجلس .

_ شلون نعوفهم وحدهم عرف ولف ابن عم ابن خال .

كــانـــون : خوية ابو منو ؟

_ ابو منير .

كــانـــون : خوية ابو منين گازو بقت عندنا
اشهر وايام وهاي جدامك لاشافت تصرف مهين
ولا كلمة موحلوة ولا نظره مشبوهة الله شاهد حالها حال أخواتنا .

رضية: يمه اذا يتفقون ناخذها ويانه هاي بنيتنا ما نستغني عنها .

_ تفضلوا بالحديقة .

طلع كــانـــون ودركان ينتظرون وقبل لا تطلع امي
گضبت ايدي : بروح ابوك الكسر ظهرك بطل عصبية.

سحبت جگارة وجريت منها نفس بقيت گاعد وهي
مابدر منها رد فعل رفعت راسي اتفحص حالهه
شكلها تعبان وگازو القديمة ذابلة تقابلت نظراتنا
بقيت صافن بعيونها لدقايق همست : مشتاقلچ .

گازو : فد كسرتني تَـــمــوز .

وهي تحچي وتشهگ تمسح بدموعها وتنزل اكثر
عصرت دشداشتها بيدها من قهرها وكملت
_ كلماتك ترن بـ اذني كل يووووم تگلي الماي يروب والگحـ***
ماتوب يابويه شكثر حسيت روحـي بيومها رخيصة .

تَـــمــوز : عبالي صدگ الملابس عندچ ، انقهرت لان رخصتي نفسچ
انتِ بعيوني جبيرة ماريد تنزلين من عيني وتخربين صورتچ .

گازو : تتخيل اني انزل نفسي بهل طريقة وارگص حتى ترضى عليَّ
اريدك بس تدخل احجي وياك افهمك موقفي تهديدات عمك هدتني .

تَـــمــوز : فرأس إعترف بكلشي .

گازو : كل مغربيه انشغ لله ينزل هل مجرم اسفل السافلين
آني يتيمة وماعندي احد غير ربي فـاما اليتيم فلا تقهر
مووو ربنا هيچ يگول ماتخافون الله انتَ وعمك واحد
موت اختي ويهدد تهديدات لو ينطيها لجبال تنهد الجبال
وانت گدرت عليَّ گلت هاي يتيمة ادگ عليها وتظل وهي
الممنونه شوكت ماريدها اگدر أوصل الها سهلة ماعدها غيري .

ظليت بس رافع راسي ادحگ عليهه أيدها ملفوفه بشاش
_ سكتت كلامي صحيح هذا تفكيرك ، تَـــمــوز قبل لا اطلع
لازم تفتهم اني بعمري ما جنت رخيصة انجبرت اشغل شغل
قذر الخاطر أخواتي وبعلم زوجة عمي امها جانت تجبرني
اذا ما أشتغل هل شغل ننشمر بالشارع ونصير طعم سهل
للكلاب ، وانجبرت اخليك تتأذى حتى ما اخسر اخواتي
الي ماعندي غيرهن .

تَـــمــوز : هو سبب واحد مايخليني اسامحچ
من دحكتي عليَّ إضرب امي عزيزتي ، وصلت للموت كملتي .

وگفت بـ انكسار وضعف تنزل دموعها
بوهن وقلة حيلة: فراس گالها انتوا كلكم أذكياء
وكلهم وياك يسندون ضهرك وراح يكشفون الموضوع
بـ اقرب وكت ومن المستحيل توصل للموت كلهمممم كلهمممم
وياك بس أنـه منو عندي بس اخواتي اذا أرفض اخسرهن
واذا اوافق اخسرك واخسر نفسي وسندي الوحيد بس احافظ
؏ ما تبقى من عائلتي .

مشت تريد تطلع وبعحز كملت : اخذت بثارك تَـــمــوز اطمئن
انتَ تشافيت وعمك إعترف معناها أنتهى ، بس أني الخسرانة
الوحيدة يوم بعد يوم دم ابچي واخسر نفسي وصحتي صارت بالعدم .

اخذت ايدهه سحبتها مني صرت قريب منها
ورجعت رفعتها : شبيها ايدچ ؟

گازو : يهمك ؟

تَـــمــوز : محاولة تنتحرين ؟

گازو : مرتين وفشلت حتى بهاي فشلت متخيل .

گعدتها بمكاني وگعدت قريب منها تلمست مكان الجرح
وهمست : عليش تأذين نفسچ گازو مو گتلچ أنـه يمچ .

گازو : انتَ مو يمي المسؤلية اكبر من عمري
هلكت والله هلكت تَـــمــوز أخواتي يوم بعد يوم
تزيد متطلباتهن ومشاكلهن بعد ماعندي حيل
احس كبرت قبل أواني لا عشت طفولة ولا شبابي
خلصتها تعب بتعب واي شخص يدخل بحياتي يدوس عليَّ
ويهددني بيهن اموت أنـي قبلهن احسن ما اگدر اخسر وحدة بعد .

تَـــمــوز : تتذكرين من گتلچ اني وياچ نتساعد انتِ امهن واني ابوهن .

گازو : وتتذكر من گتلك اني ما اصدگ بأي بشر
والكلام سهل بس الأفعال صعبة وماتصير وفعلًا ماتصير
صح ؏ مدار ما عايشين بذاك البيت ما احتاجيت شي اني
وياهن بس الى متى همات يجي يوم وتشوف حياتك
وتزوج ؏ اي اساس تحميني اني وياهن .

تَـــمــوز : جربت احب غيرچ طلعت ودخلت وعشت
وضحكت وحچيت بس طلع الحب الأول مايتغير ولا يتبدل
ثابت راسخ للممات مهما تغاضيت عنچ بس گلبي يريدچ وحدچ .

اخذت ايدها بست مكان الجرح ومن بين دموعها
همست : أحبك تَـــمــوز من كل گلبي بعمري ماعرفت شنو
معنى كلمة حب بس من ابتعدت گلبي تعبني بحبك
اشتاقلك بكل يوم اشتاقلك من انام ومن اگعد من اطلع
من اكل من احزن وافرح بكلشي انتَ
ويايَّ ماتصورت بيوم الحب يدگ باب كلبي شگد سمعت
عن الحب وجنت استهزأ بصديقاتي من يبچون على حب حياتي
ومرات اتعجب بس من جربت عرفت يقصدون .

ضحكت وانه اخلي راسي ؏ راسهه
_ يعني تمكنت منچ .

گازو : المستهتر فرحان بعذابي ، ابو النسوان ابو الملاهي .

تَـــمــوز : يابويه شكثر مشتاقلچ بس انتِ تگدرين تقصفيني .

نزلت راسها بتعب تفرك بيدها رسمت دوائر
بـ باطن ايدها وهميت بقهر : قسيت عليچ چثير وانه
أدري الخصم شرس صعب نتغلب عليَّ حبيتچ
لان قوية گلت هاي مايگدر عليهه فراس
هدمچ اكثر من عدنا هو من لحمو ودمو مايرحم بحالو
اريدو يرحم الغريب ، الله اكبر منو يگدر عليَّ
فراس طريح الفراش دعواتچ استجابت
نگدر انعيش ونبدي صفحة جديدة بس أنـه وياچ واخواتچ وامي .

گازو : أخاف أرجع .

تَـــمــوز : مانرجع وياهم وعيونچ راح اشتري بيت
نعيش ونبني حياتنا من جديد بدون تدخلات
أنـه احتاج تكمليني وانتِ تحتاجين اكملچ
احتاج عائلة وانتِ مثلي گازو أنـه وياچ نكمل بعض
وهساع انتِ تحبيني وانه احبچ مستحيل اكو قوة
بهل كون تفرقنا لا ترفضين گازو .

گازو : واذا ترجع تضربني وتأذيني .

تَـــمــوز : اكسر ايدي قبل لا ارفعها عليچ
ياعيوني الحلوة مالتي تقبلين ترجعين زوجتي .

حضنتني وبقت تبچي بحضني بادلتها
وانه امسح ؏ راسها : ياااااا گلبي انتِ كافي فطرتي گلبي ومحمد .

جسمها ينهز بصورة مخيفة ابتعدت
عني نزلت بمستواها مسحت دموعها
_ شبي جسمچ يرجف ؟

گازو : عندي تلف بالأعصاب .

تَـــمــوز : ما عاجبني حالچ گازو شصاير بيچ .

گازو : مهدود حيلي والله .

تَـــمــوز : اصير ألج حيل ياعيوني اروح اصيح
عليهم حتى نرجع ما تظلين هين بعد .

رحت فكيت الباب كلهم اجرني دخلوا يدحگون
بعيونهم ابتسمت وهمست: خوية اريد أرجعها ؏ ذمتي .

دركْان: الله حيوووووووو .

كــانـــون : والله انك كفوووو .

ابو منير : اذا تريدها ما اوگف بوجهكم
بس ارجع اعقد عليهه والله يوفقكم .

تَـــمــوز : تعرف مكان شيخ يعقد هين ؟

دركْان: فوول مستعجل عندو فقر صبر .

ابو منير : صديقي ابن عمو شيخ يعقد اتصل علية ؟

رضية: بارك الله بيك سهل امرهم .

اتصل علية وبقيت احجي ويه خالها واتشكر منو
الى ان وصل الشيخ گعدنا عادي وبدقايق
نطقها : الف مبروك عليكم .

رضية: اعذرني يمه كــانـــون اريد اهلهل .
وصارت الهلاهل تجي من امي ومن زوجة خالها
طلعت گرز تبچي :عمو يعني راح نرجع وياك .

تَـــمــوز : اي اي هيري ملابسكم بسرعة .

دركْان: نعوفهم يجهزون نفسهم بين مانلم ملابسنا
ونحاسب الفندق ونرجع ناخذهم .

گمر : بابا تموز عليك الله مو تروح وبعد ماترجع .

رضية: وين يعوفچ يولو مگطوع گلبو عليچن
يالفصعون شكثر اشتاقيت لسوالفچ .

طلعوا الولد وانه وياهم وامي اخر شي طلعت
رجعنا للفندق ركض ركض نلملم بالغراض
ساعة ورجعنا الجنط بالگراج مزلت صعدتهن
بالصندوگ سيارتنا تاهو بيها مقاعد خلفية
صعدت كرز وگمر ، رجعت سلمت ؏ خالها
واخذتها من أيدها صعدت بصف امي واني يمها
اول ماتحركت السيارة صاح كــانـــون : استقريت .

تَـــمــوز : رجعت متزوج ههههههه متزوج ومطلگ بالاسم .

دركْان: حياتك عوجه طالعة عليك .

تَـــمــوز : قابل أنـه دركان أبو ختله اعرف ادبر نفسي ي.

كلها ضحكت مفتهمين كلمتي بس گازو ماتعرف شنو الوضع
رجعت لطريق بغداد بس هل مرة أيدي بيدها الطريق كلو ..

><><><><><><><><><
قُــسَـم ..

تسع اشهر من حياتي عشتها بدون مشاكل
ولا توتر ولا خوف والتفكير الي جنت أعيش
بي راح وانتهى ، اكتفيت بنفسي وابني
المصروف مستمر كل شهر يوصلني
من دوهــان بيد تَـــمــوز ، ميار يوم بعد
يوم يكبر جدامي ، اهلي عفتهم لا اريدهم
ولا همَّ يريدوني ، رضية صارت كُل اهلي
تُــمــيم كُل فترة ينزل من الدوام ويطلعني
اني وميار نغير جو العاب مولات سوگ
مايخلي شي بنفسي مايسوي .

تَـــمــوز ملتهي بين عمي وبين الدوام وبحثو ؏ گازو
ودركان يدخل للبيت بس ياكل وينام ويطلع مايگعد ابد
بقيت بين المسلسلات واتعلم طبخات من قنوات الطبخ
واگعد بالمطبخ اتفنن بالحلويات وبليل نگعد اني وميار
نتابع افلام كارتون وناكل للصبح .

دوهــان بين فترة وفترة يطلب صورة لميار وتموز
مايقصر الإخبار توصل أول بـ اول وين طلعنا وين دخلنا
بعد عجوز عرب مايرتاح اذا ما يسرد الأول والتالي .

مندمجة واحجي بتلفون ودخل تُــمــيم
_ اي وهساع انتوا بالطريق ؟

رضية: اي اي راجعين وگازو ويانه .

قُــسَـم : عجل منتظرينكم توصلون بالسلامة.

سديت المكالمة وصحت بقلق : شبلاك شبلاك مو احچي .

تُــمــيم: هذا يريد ابنو هيري حتى ياخذو المدينة الألعاب .

دحگت داير ما داير الغرفة ادور ؏ فصعون
_ هذا وينو هساع جان يلعب هين .

صحت بصوت عالي اني من يمي اذني وجعتني
_ مياااااااااااار .

تُــمــيم : وثووول يالبرنوووووو اذني .

دخل دوهــان مفزوع يمشي سريع يدحگ
علينة: شكوووو شصاير شبي ميار .

عفتهم من الفشله ودخلت اركض جوة
فكيت باب حجره تَـــمــوز بس هَــيـلانـة
وبعدها نايمة ، رحت الغرفة ذَهــب لگيتها
مطلعه الحلويات وهو گاعد ياكل منسم
_ اريد اقلل الحلويات منو ذَهــب فاتحة محل حلويات على سرير .

ذَهــب: عوفي شتريدين منو خلي ياكل لا اگوم اضربچ .

هي تحچي هو خربان من الضحك ويرجع بحضنها اكثر
قُــسَـم: هاا تريد تظل هين ابوك يريد
ياخذك للألعاب مبين ماتريد تروح .

هو سمع بـ ابو تخبل بعد ظل يرافس بس يريد ينزل
من السرير طلع يركض ويصيح : بابا هليبي (حبيبي )

قُــسَـم : اوگف بدل بالبداية يولوو حدر .

صار يگمز بالگوه نزلتو الغرفة رضية فكيت
الكنتور بدلت ألو بسرعة بس رشيت عطر وانطلق
من وره الباب بقيت ادحگ عليهم دوهــان شالو
يبوس بي بكل لهفة ويضحك وانه ؏ ضحكتهم اضحك
يريدون يطلعون وميار صاح : بابا هداء ( حذاء )

ضربت ؏ خدي وفريت حلگي والله مصيبة انوب الحذاء
بالجزامه بالكراج ، وهذا دوهــان مايفتهم عليَّ وميار
يبچي مايخلي يطلع الباب ابد : يولوو بس فهمني شتريد .

ميار : هداء .

دوهــان : تريد هدية .

كفخو ميار براشدي فر وجهو فر سديت
حلگي بيدي وخربت من الضحك وبعدو
يضرب ويدفر بي : يول سويفل لا تضرب .

رجع يضرب بي ويصيح : هداء هداء هداء .

لميت كفشتي وطلعت بثبات امشي بدون ما ادحگ عليهم
ودوهان دار وجهو للصفحة الثانية عود مايريد يشوفني
اخذت الحذاء وهمست : حدر البس الهداء .

ميار : مااا مااا تسم تتي ( ما قُــسَـم تجي )
لا ويأشر بأصبعو النتفه بودي اگضبو واعضو من هل اصبع .

قُــسَـم : حدر يولوو حتى تلحگ اتروح تخور بالشوارع .

ميار : تسم تتي .

هو شايلو وهذا مايقبل ينزل وبقيت محتاره
قُــسَـم : اكو بنوات حلوات بالألعاب اركض البس هداء
وروح العب وياهن يلة يا بطل يلة .

ميار : لوح نون هداء ( اروح بدون حذاء )

افتهم دوهــان ماريد اقترب حاول ينزلو بالأرض
وهذا المشهور هرج البيت هرج هستر ابو
بدون مايدحگ رجع شالو وهمس : حدري لبسي تأخرت .

قُــسَـم : غير ينزل حتى يلبس .

خزرني وهو عاگد حاجبو وصاح : لبسي هو بيدي خلصيني .

تقربت وهو دار مني لبستو الحذاء الأولى
واخوزر بميار اريد بس ينزل ولا عبالك الخايس
بس لبسها فتت ركض ايدي شهرتني بس ارجف
مدري شبلاني جريت نفس وهو اخذ حذائو يلبس
بيها عبالو دخلت يضحك ويحجي وياه .
دوهــان : الخايس طلعت هداء يعني حذاء تضرب
ابوك علمود حذائك بس ماتتعاتب منو امك .

ذَهــب: بعد امو البرنو .

قُــسَـم : شلون لعب عليَّ هذا الخايس .

ذَهــب: مايعرف بيكم متعود ؏ نمط قبل
ما حاولتي تتواصلون انتِ ودوهان الفترة الفاتت ؟

قُــسَـم : وليش نتواصل كلشي انتهى بعد ماريد يتذكر
اهم شي هو بعيد ومرتاح ، والصراحة بدون مانطلب
يوفر احتياجاتنا مامقصر خطية .

ذَهــب: الله يسعدكم ويكتب إلي بي خير الكم .

قُــسَـم : انتِ وكانون شلونكم بعدكم بعاد .

ذَهــب: نسولف طبيعي بس ما عايشين كزوجين
نفسي ماتتقبل هل أمور نهائيًا .

قُــسَـم : وكانون يعني طبيعي عندو الموضوع .

ذَهــب: مايحب يضغط عليَّ بس اعصابو متشنجة
من يحچي ويايَّ وانه انجنب اگعد اسولف وياه وحدنا .

قُــسَـم : بس تدرين حرام هل هجر ذَهــب سنة كاملة !!

ذَهــب: دخيلچ اذا اني اخلي يومي بالبچي يحي ليلي
منتهية بعد وينو اگدر ادحگ جدامي .

انفتح الباب الخارجي ودخلوا السيارة رجعوا وأخيرًا
طلعت وانه اضحك سد تموز الباب نزلت گازو وحضنتها
وهمست بـ اذنها : ول يالبربوك هيچ تروحين .

طلعت ذهب ضربتها ؏ ايدها
هي تعجبت من ذَهــب لان رجعت تشوف
حضنتها وبقت تبچي تعجبت ؏ گازو شكثر ذبلانة
والمرض مغير ملامحها اخذتها ذهب وراحت وانه نزلت
البنات ودخلنا جوة نسولف وياهن كــانـــون صعد فوك
ودركان يشرب جكاير هو وتموز بالكراج .

قُــسَـم : اكيد جوعانين .

رضية: يااا الأكل عايفي بالسيارة يولووووو تَـــمــوز
مشيت أنـه طلعت الآكل ودخلت وهمَّ يمشون ورايَّ
يسولفون ؏ حادث صاير جدامهم بالطريق
أثناء دخولنا نزلت هَــيـلانـة هي شعرها اشقر
بس ؏ كستنائي هيچ بي خيوط ذهب ملموم ضفيرة
وحمره سحرية وردية فاتح ودشداشة لون ابيض
وبيها سبع عيون وهي صاحبة بشرة بيضاء على وردي
عبالك طفل من ادحگ عليهه بودي اخليها واتغزل .

هَــيـلانـة: الحمدلله ؏ سلامتكم .

رضية: الله يسلمچ امي .

راحت ؏ گازو بوستها وگعدت بصف ذَهــب
اخذت ذهب ضفيرتهه تعدل بيها نزلتها ؏
اكتافها صارت بالمقدمة رفعت عيونها تدحگ
؏ دركْان هو منزل راسو ويشرب جكارة بكل
هدوء ، أخذت ذهب ودخلت للمطبخ نفرغ بالغراض
وهي اجت ويانه اسمع دركْان يحجي هو ورضية
_ اخذيهن للغرفة اريد انام دايخ .

رضية: الله يساعدك هاي دوخة مال ولهان .

اجت هي وگازو بالغرفة گعدت وصاحتني
تسألني ؏ ميار وبقيت اسولف ؏ صار واضحك
دركْان: قُــسَـم ..

رحت عندو مديت راسي وهمست : ها صحتني .

دركْان: عجل تُــمــيم وينو ؟

قُــسَـم : اندري خلصها مكالمات هو تالي من اجه دوهــان طلع .

دركْان: تَـــمــوز راقب هل مستهتر وين يولي وضعو مايعجبني .

هز تَـــمــوز راسو وتمدد بتعب ؏ تخم
رجعت ؏ مطبخ حضرت صواني اثنين
وحدة اخذتها الغرفة رضية والثاني
هَــيـلانـة دخلتها ؏ تَـــمــوز ودركان
گعدت وياهن وذهب اخذت لفات اثنين
وقواطي ببسي وصعدت الكانون ، بعدني اريد اكل
ودخل تَـــمــوز تربع بصف گازو
رضية: يولووو غادي اكلكم .

تَـــمــوز : طردني ابو السبايا يريد يتعشى هو ونواصتو عشتوو .

كازو : شنو مفهمت شي والله الغاز كلام مشفر هذا .

تَـــمــوز : هو غير اول البارحة عقد دركْان وهيلانة .

دارت وجهه عليَّ وسعت عيونها بصدمة
ولا إراديًا ضربت ؏ صدرها ضحكت
اريد الطف الجو وهمست: تمنيت جنتي موجودة صار العقد يخبل .

گازو : نسيت اغسل ايدي ما اتأخر بس لحظات .

راحت وماكو ثواني وصاحت بـ اسمي جريت
نفسي ودخلت عليهه : ها گلبي .

سحبتني من ايدي الداخل الحمام وهمست
_ قُــسَـم انتِ شلونچ .

رديت بكل برود : الحمدلله قابل شكو .

گازو : اني من يمي انقهرت انتِ شلون ؟

قُــسَـم : وراس ابني گلبي بارد ماحس بشي اتجاه اي بشر
بالكون كلو غير ابني ، ميار هو فرحتي الوحيدة .

گازو : هَــيـلانـة شلون تقبلت تعقد من دركْان
اكيد ذَهــب حجت عن حبكم .

قُــسَـم : دركْان وهيلانة رجعوا يحبون بعض
يعني الماضي لايقدم ولا يأخر عدهم
وانه الماضي مايهمني اهم شي عندي ابني .

اخذتها ورجعت حتى ماتكمل كلام بس بقت
بين فترة والثانية تدحگ عليَّ بعدين
انشغلت بتموز يسوي لفات كباب
ويوكل بيها: أكلي راح تخلصين يولو .

گمر : هي أصلًا گطعت الاكل وبعد ماتسولف ويانه صار اشهر .

تَـــمــوز : هذا الحب بوية هو هيچ يسوي .

گازو : لااا وأثق من نفسو وفرحان .

كملنا اكل لملمت المطبخ طلعت رضية
وهمست : يمههههه لو تدري ذَهــب بهل مفلوك خاتل بالبت .

قُــسَـم : خطية يمه عينكم عليهم عوفوهم .

بعدني احچي وفاتت عليهم مداهمة من يمي جفلت
ورجعت ليوره من الفشله بقت جامدة هيَّ بمكانها
بلعت ريگي وبصوت ناصي همست: يا ستار شبلاچ .

رضية: دهر دهركم كون اي والله .

اني ابد مو فضولية تگربت من الباب
الصينية ؏ حالها ودركان نايم بسابع نومه
رضية: وين راحت البت تعشى بيها .

قُــسَـم : ههههههه بغرفتها يمكن ، هذا تَـــمــوز شگد جذاب .

رجعت ارتب بالمطبخ ودخل دوهــان وقبل لا يفوت
تحمحم ميار نايم بيدو بقيت ؏ وگفتي ورضية
استقبلتهم : هلاااا هلاا بيهم حدر نومو ؏ سريري .

دخل نومو وطلع توسلت بي بس يظل ولا قبل
طلع وكآن مخنوگ ثواني وصاحني تَـــمــوز
_ يولوووو حدري ادحگي ابنچ الساقـ*** .
رحت اركض اخذت التلفون صورة الأولى
ميار بيدو بطة والثانية واگف هو وبنية
بعمرو بس شنو الجمال حكاية ، وبعدين
شغل فديو بي ميار والطفلة يركضون
بس صوت دوهــان وبنية تحچي وياه
بس كلامهم مواضح ، صور الهم بالمسبح
واخر شي صورهم بالمطعم ميار شايف
نفسو ونافش ريشاتو والبنية نفسها گاعدة
قريب منو تلعب هي وياه ، رجعت التلفون
ورجعت للمطبخ كملت وتموز طلع نام
واني رحت فرشت للكل ونمت وياهم
بقيت العب بخصلات ميار الى ان غفيت .

للفجر فزيت ميار يون تلمست حرارتو عالية
عبالك تنور مشتغل ، وكلهم نايمين بعدهم
اخذتو ورحت للحمام غسلت اطراف وجلو
وايدو غيرت ملابسو ما يگدر حتى يفتح عيونو
انهز گلبي عفت كلشي وركضت ؏ تَـــمــوز
هزيتو وصحت مرعوبة اول ما فتح عيونو : ميار مريض تَـــمــوز
ماعرف شبي رجعت حرارتو ترتفع .

فز دركْان ؏ صوتي يدحگ ؏ ميار بيدي
تقرب تلمسو سحبو من ايدي وصاح بتموز
_ إتصل ؏ ابووو بسرعة راح اشغل السيارة اركض .

فتت ماعرف شلون لكحت العباية ؏ راسي وطلعت
اخذتو من ايدو وصعدت ليوره بالباب ودحگت ؏
دوهــان طلع يركض ويلبس تيشيرت: دركْان وينووو ميار .

دركْان: اصعد هساع اصعد .

صعد بالصدر ودار علينة دحگ عليَّ
مثل الضايع : شبي البارحة يلعب طبيعي .

نزلت راسي افحص حرارتو يعني شنو اجاوب شعرفني
ماصدگت وصلنا للمستشفى دنج اخذو من ايدي وراح يهرول
بلحظتها تحول طوارئ شارب من ماي المسبح عندو تسمم حاد .

صك جسمي بعد گعدت بالأرض اناشغ
_كلشي ولااااا ميااااار يمممهههههههه ابني يممهههههه .

فاتت رضية اجت هي وتموز
صاحت : يا عيون امچ اجيت عيوني انتِ اجيت .

رفعت ايدي وصحت : اخذو عندو تسمم يمهههه
لو بيَّ ولا بي سودة علية سودة بوجهي .

دوهــان داخ يخابر ؏ صديقو مسؤول بهل مستشفى
وما كذب خبر دخل يركض ؏ دكاترة هو صغير
واثنين دكاترة وممرضين فوك واسو واحت روحـي
بقيت ادگ والطم ودموعي تنزل عشرة عشرة .

تَـــمــوز : قُــسَـم بوية اعصابچ بس گولي يا الله
مابيَّ شي هساع مغذيات ؏ علاج يرجع عال العال .

فتح صديق دوهــان الباب : ابو ميار تعال عيوني .

اخذو وسد الباب اشرت عليهم وصحت بتموز
_ يولو غير أنـه ادخل وياهم اموو أنـه اموو .

تَـــمــوز : صايرين تشريب جوة انتظري .

ربع ساعة وقبلوا ندخل مزرفين ايدو تزرف
بالمغذيات يناشغ مناشغ من الخوف والوجع
ابتعد دوهــان وانه گعدت عندو گضبت ايدو
ابوس بيها ، ومغذي وره مغذي وتحت المراقبة
للمغرب اجاني دركْان: قُــسَـم هساع عادي نطلع
بس الإبرة تظل بيدو باجر الصبح لازم مغذي وعلاج .

نهضت اعدل عباتي حتى اخذوا ماحس غير
دوهــان حضنو وطلع طلعنا وياهم رضية
تمسح بضهري رجعنا للبيت بس غسلت
دخل للمطبخ اسوي شوربة لان ممنوع ياكل
غيرها وبس ماي مسموع يشرب وبكثرة
دوهــان والباقين كلهم بالغرفة يضحكون
ويلعبون بميار ، بس خلصت آخذت اكلو
ودخلت هو نايم بحضن ابو دحگت ؏ رضية
بمعنى احجي ينزلو من حضنو افتهمت هي
_ يلة بيبي ميار روح ماما توكلك عمعم .

هز راسو يرفض وفتح حلگو عود وكليني هين
دوهــان مسوي درب التغليس منزل راسو ولا يمو
يسولف هو وتموز وكانون ، أدخلت ذَهــب واجت عندو
_ ميار يا ذو القدرة الخارقة هيا بنا نأكل ونصبح اقوياء .

دحگ عليهه بطرف عيونو وكتف ايدو الخايس
مايقبل انطيت الصينية الذهب هي گعدت اچل منها شوية
ورجعوها ظل يغفي بحضن ابو نهض كــانـــون ونبهو
_ نام هذا نزلوا ؏ الفراس خطية .

نام دوهــان وميار ؏ ايدو ؏ سرير
راح تَـــمــوز برة بقت بس رضية
اريد اطلع أنـه وياها ورجع يبچي
ويمد ايدو : ها حبيبي شنو تريد ؟

صار قريب من ابو ويضرب ؏ ايد دوهــان
عود حدري نامي هين ، ميار بعدو ؏ تحديث
القديم عبالو مثل قبل عادي من دوهــان يفرش
ايدو وهو ينام بالنص واني بصفهم : گلبي عندي شغل نام انتَ
بس اكمل شغلي واجي انام .

الطفل ومايعرف يدلع وهو مريض بحيث هستوني
بالبچي عفتهم وطلعت وهذا تخبل تخبل بالبچي
دخلت عليهم رضية صاحت بدوهان : شبي الولد .

دوهــان: نادي ؏ امو تجي تنومو وانه اطلع .

رضية: قُــسَـم يمهههه ركضي الولد فرفح .

جريت نفس ودخلت يريد ابو يروح مايقبل اله
انام ؏ ايد ابو عطت بي تعبني : راح اضربك براشدي اشغل عقلك بي .

قوس دوهــان حاجبو ما عاجبو كلامي ورحع اخذو بحضنو
وهو يأشر تگربت نمت بعيد يسحبني من دشداشتي
رفع دوهــان ايدو مايقبل انام عليهه أصلًا
عفتهم وطلعت يعني شنو هل تصرفات
تجاهلت صوتو وطلعت للكراج دخل
عليهم تَـــمــوز يحجي وياه قافل ابن دويهن قافل
كــانـــون يقنع بي ورضية وذهب وهو ولا عبالك
كلهم وياه يقنعون وما ادحگ غير دوهــان جدامي
عاط بعلو صوتو : حدري نومي حدري .

قُــسَـم : مايقبل يعني شلووون .

دوهــان : الطفل مريض نسوي إلي يريدو هو شمفهمو
جدامي أدخلي خلصيني .

قُــسَـم : لااااااا تصيح بوجهي .

دوهــان :اوي بلازحمة عليچ سنيوريتا شرفينا بحضورچ .

رفعت راسي ودخلت للبيت النص الطريق
صاح : نزلي راسچ خشمچ طخ بالسگف .

اخذو من رضية كلهم طلعوا هو ؏ نومتو
رجع الرائد دوهــان اخذو بحضنو ومد ايدو
لميت شعري وگعدت وبكل تردد نزلت ونمت
؏ ايدو وهذا ميار ظل يصفگ من الفرح
سد دوهــان عيونو وانفاسو تخربطت
بقيت جامدة احس بيدو تصلبت تحت راسي
بلعت ريگي طبطبت ؏ ميار غفيت ومادري
بيهم نايمين بعدي ، مرت ساعات التعب
أخذنا وبقينا نايمين الى ان رن تلفونو
هجست يسحب بـ ايدو وضرب ؏ رجلو
رد وهو مرتبك : اعتذر ومحمد صار عندي مشكلة و ..

سكت لحظات اسمع صوت انثوي
ضحك تسليك ورد : حقچ صح فد ساعة وتدللين .

طلع وهو مستمر يحچي وراح لذاك البيت
گعد ميار تجاهلت البچي مالتو وبقيت ابدل
بي وهو يلح يلح اريد بابا سويت نفسي ما اسمع
تركتو بحضن كــانـــون يلاعب بي مايريد احد
رتبت الغرفة ودخلت سبحت وهو ؏ نفس الحال
سويت چاي گعدت أشرب عاطت بيَّ رضية: يولوووو ابنچ
يبچي تحركي لا يوگف گلبووووو .

قُــسَـم: شسويلوووو تخبل من البارحة لليوم
اندري شمسويلوووو ابوووو ، هساع ادخل املخووو تملخ ومحمد .

بس كملت كلامي اندفر الباب وصوت كــانـــون
صاح بعلو صوتو : دوهــان لحظة يولوووو بس لحظة .

وگف جدامي ورفع اصبعو بوجهي
وكانون يمنعو صاح بتحذير : اتحداچ تمدين ايدچ عليَّ
نفس الضربة ترجعععع إضعافها احترمي نفسچ .

قُــسَـم وتعرف تسكت ؏ تهديد
وگفت وياه اريد ادحگ شيسوي
وصحت بنفس نبرة صوتو : لااااا تگعد تسوي روحك الووواوو
اذا انتَ لهل درجة خايف عليَّ شكووو كاشخ روح سكتووو روح .

دوهــان: لاااا تدخلين هيووووو
وغصبًا عنچ اسكتوووو عليش ما اسكتووووو
بس انتِ هذا البرنوووووو النايم بحلگج تخربي لا اخربوو بيدي .

عبرتهم وانه ادخل الغرفة وادردم بعالي صوتي
_ عشتوووووو يخربو هووووو حتى .

دوهــان : حتى شنووووووووو حدري هين لو بيچ
خيررر وعلميني بالله حتى شنووووو .

كــانـــون : اذكر الله ياخوي هي كلها شهر شهرين
وقسم تزوج وابنك اخذو الك .

دوهــان : لاا تخربط كــانـــون .

كــانـــون : ومحمد ما اخربط قُــسَـم جايين خطابة عليهه .

دوهــان: منووووو هذا ؟

كــانـــون : واحد يشتغل بمول **** ومراقبهم هي وتميم
من راجعين عارف البيت وسأل علينة ومتعرف ؏ تُــمــيم
وهو معرفو على ابوها وحاجي وياه وطالبها منهم .

رضية: ياااا ياااا ولا نعرف غير يبلغون البنت يمكن ماتقبل .

كــانـــون : الصراحة سألت ؏ زلمة اني وتميم
ردت أعرف اخلاقو شلونو لونو قبل لا ابلغها
وماشاء الله كلها تحمد بي وبـ اخلاقو .

رضية: وشوكت ناوين تحچون للبنت .

دخل تُــمــيم كمل وآكد ؏ كلام كــانـــون
_ بنهاية الأسبوع يجي هو واهلو يخطب رسمي وتعرف .

دوهــان : متقصد تستفزني موو ؟

تُــمــيم : والقران صحيح وحتى كــانـــون يعرفو وتواصل وياه
وطلع وياه هو الولد دره مال الله كُلش شخصية محترمة
واخلاق وفارض هيبتو عجبني الصراحة .

دوهــان: عجبك ؟

تُــمــيم : اي عجبني اختي من حگها تشوف حياتها
وتزوج قُــسَـم تعذبت چثير الى متى .

دوهــان : وابنها ؟

تُــمــيم : تريدها تخلص عمرها تربي بـ ابنك ؟
ابنك اخذو اكيد ماتتقبل فكرة زلمة غريب يربي ابنك
بس اختي تعبت وضروري تشوف حياتها وهل أنسان جدًا مناسب
بعيد عن الدليم واحفاد الدليم ألي ما شافت منهم غير الضيم .

دوهــان: تحب أفرغ المسدس براسك لو براسو ؟

ألتفت بتجاهي أنـه من الخوف رجلي صارت خيوط
تراجعت للخلف من رفع المسدس : لووووو براسچ ؟

يتبع ..

- الرساله ؛ ‏ثقل ميزانك بذكر اللّٰـه:

- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد