رواية ثأر مهري منهاا الفصل العشرون 20 - بقلم اسماء ديمير

《《البارت ال١٩》》

#ثأر_مهري_منها

بقلمي : أسماء ديمير

كوه سنده جاسم ويحجي عليه شلون هيج يضغط على رجله ويمشي هالكد ..

ياسر" ماجان حركت روحك ورحت ويه اختك قدمت الها وفضيتها من يمك

جاسم " ياهل تقديم الاكشر ادري على شنو مستعجل متكلي كتلك اخلص الي بيدي واني اروح وياهه افض سالفه واقدملها

ياسر ضحك بستهزاء اكص ايدي اذا ما اكلك منا تروح تقنعها تترك دوام منا

ضلو يتراددون لمن طلعو من بيت وامي وراهم سدت باب ودمعه بعينها ، باوعتلي كتلها مابي شي ماما لايضل بالج عليه ..

"الله يسمع منج انشالله"

دخلت وراه انتظرنه لل١١ يله رجعو منطي مسكن وكايليله تعال باجر تسوي فحوصات الها على حسابك حتى اذا تحتاج عمليه نسويها والا تضل تصل عليك ..

ثاني يوم وصلني جاسم للكليه وكلي بس هاليومين واشوفلج خط ، توه انزل حاجاني محتاجه شي بعد اخوج ..

التفتت عليه مدمعه . متفاجئه بي ، جاسم ماعرفت طينته شنو لحد هاي لحظه ، خبل عصبي اناني حنين كلبه رهيف ، ماعرفت ، بس كل الي اعرفه ،  عمامي الهم تأثر قوي عليه ، لان حس اكو ناس تشبهه ونفس عقليته ودائما تأيده ،وابد ماتخلف وياهم بفكره .. ولا همه حبو حيل وقربو منهم  لكو بي الي مالكو بابويا .

حاجيته مستغربه :- . لا حبيبي سلامتك

كالي عجل توكلي يله دكتورتنه ..

ابتسمت ونزلت .. كليه جانت نحسه بمعنى كلمه او يمكن اني نحسه ونصدمت بدراسه جان عبالي سادس معضله ..

طلع سادس مو صعب بس سادس حرب نفسيه ، صيدله مو هينه دراسه كلها انكليزي ولازم تحفظ فوكاهه ، بحيث اول اسبوع دستت ملازم تكومت هلى ستيج هذني ترجمه وحفظ يوم بيومه .. شفت بيها صعوبه تخليك تبجي دم ..

يمكن اني مو مثل قبل احب ادرس والي واهس ، يوميه لازم اترجم ملزمه بال٥ ساعات اكعد اترجم كلمه كلمه نصحوني اترجمهن على حسابي بفلوس بس كالو غلط هيج مراح تحفظ شي طلاب مراحل قبلنه جانو ينصحون ..

سجى تجيني كل فتره شوي وتروح ، بس حتى علاقتي بيها مو مثل قبل حتى مانحجي هواي ، ولا سالت على اخوها ، جاسم مره نتر بيه جدامها وسمعها كلام على اخوها من يومها كطعت بجيت ونقهرت حيل ، بس ماكدر اجادل لو اتعارك وياه ، خاصه ياسر رجله مووتته توصل بي حاله يريد يضربها لرجله بالحايط من الالم....

مره من مرات جنت واكفه ويه طلاب مرحله ثانيه اسالهم عن ملازم ، لمحت رشيد من بعيد باين يدور عليه ، التفتت وانطيته ظهري مشافني، كلت خلي يتبهذل بالكت يمل ومايلكاني ..

بس وين خمس دقايق هو فوك راسي ،سلم بصوته الخشن التفتت عليه وجهي ممتفاجئ بجيته اصلا جنت متوقعه ينط عليه اول يوم دوام ..

ردو طلاب وباوعو عليه ينتظرو يحجي كلي ماخلصتي داوصلج اخوانج مو بالبيت وامج هم ..

عقدت حاجبي كتله ليش شبيهم ليش مو بالبيت ..

كال ماكو شي سلامتج بس جدج عازمهم مسوي ثواب لابوج ، ترخصت من طلاب ومشيت وياه ..

بس ابتعدنه كال منو هذول باوعلي

"طلاب وياي بالكليه "

ادري طلاب قابل ماعرف طلاب بس ليش واكفه يمهم

ترى هاي كليه طلاب توكف مختلط عادي لاعيب ولاحرام وكلنه جاي ندرس محد جاي يتونس لو يكظي وقت

باين كلش جايين تدرسون من ملابسكم وتسريحات شعر واحدكم عبالك لعرس كرايبه ..

سكتت وماردت اتناقش وياه لان ادري راح نتعارك ..

رجعنه للبيت ونفس سكوت بس هو ينافخ وكل شوي يباوعلي يريد يتعارك ..

كلي ماناويه على حجاب حظرتج لو الا احنه نكول ننغط ونتعارك ..

سكتت مارديت ولا التفتت عليه

مو جاي احجي وياج لاتغلسين لا اجيبج براشدي بالله كريم ..

التفتت عليه كوه متحمله صار ايام كاره نفسي انفجرت بوجه .. خير رشيد خير تريد تتعارك مالي خلك روحي والله مالي خلك نفس هذا الي داخذه اشر بيدي عصبيه

، روحي طالعه من دنيا كله شتريد مني ، فوك همي وضيمي فوك مصيبتي ، نوب الله مسلطك عليه عساني كون لا صرت ، ولا نولدت عساني بموت اي الله ، عطت بي ارتاحيت كمت ابجي ترتاح من تشوفني كارهه روحي  ،

شتريد مني حطني جوه سيارتك وامردني وخلصني من هالعيشه ..

التفتت عنه للجامه منهاره ابجي .. هو سكت ماطلع حسه هو كل شوي يندار عليه وصلت للبيت مانتظرته يحجي نزلت كبل ..

دخلت للبيت ماكو احد رايحين بيت جدي .. دخلت للغرفه الم ملابسي حتى اولي يمهم .. بدلت ملابس كليه بفسات اسود طويل  وطلعت طفيت الكهرباء وسديت البوب لكيته واكف باب مطبخ تعديته وجههي احمر من بجي .. صعدت بسياره انتظره ..

اجه يمشي صعد ساكت ..

طلعنه من بغداد وحرف مانطقنه .. قريب نوصل لمنطقتهم وكف سياره .. التفت عليه حاجني بهدوء ..

:- هناء .. ياعيون رشيد

:- غمضت عيوني بقله صبر ،  مارديت التفتت على جامه

مد ايده لزم حنكي فرني عليه .. وجهه هادء والحزن باين عليه .. عيوني دمعت مقهوره منه ومن دنيا ومن بابا العافني من كلشي مخنوكه ..

كال اعرف انتي تعبانه ، ونفسيتج مو تمام ، بس الصار قضاء الله وقدره ، لا اني الي يد ولا انتي ..

انا فقدت ابوي وانا اصغر منج ، جاهل وجابو تابوت ابويا،  ماعرف شنو يعني اب ، ولاحسيت يعني شنو يصير عندك ابو ..

كلها عدها الا انا جنت اتفرج ، امي مره فقيره ومن يومها مريضه ، واخواتي صغار ، يعني ماجان عندي الي استند عليه لو اعوض مكان ابوي وياه ..

عمامي هم كلمن لاهي بروحه ، واولاده ، صح ماقصرو ويانه بمصرف ولا باكل ولا بشرب ، بس محد راعه نفسيتنه ولا قربوني منهم بصفه اب  ..

التفتت وتقربت من جدي عسى اعوض مجان ابوي .. بس هم مايعوض .. وشما اسوي مااعوض مكان ابوج .. بس بالله لو ردتي روحي الا انزعها من جسمي وانطيها الج ولا اشوف هالزعل بعيونج ..

احسبيني ابوج حبيني مثل ماتحبين ابوج ..بلعت ريكي  دنجت امسح بدموعي  .. ماحجيت ليش هو مكان بابا منو يعوضه ..

خليت راسي على جامه ساكته هو هم حرك سياره . وصلت بيت جدي هوسه وراسي يوجعني .. دخلت كبل لغرفي بيبي ونمت بيها ..

للمغرب يله كعدت على هوسه جهال دخلو للغرفه .. كعدت اتمطى .. طلعت للحولي شفت بيبي كاعده ويمها امي وعمتي نشام . ابتسمت من شفتها ..

هاا حبوبه كعدتي نوم العوافي امج كالت لحد يكعدها لان طريق ومناك هيه جانت بالدوام هالخليناج هالكثر نايمه ..

رحت حظنتها بوسها وبوست عمتي .

اي والله تعبانه بيبي كلش ..التفتت على دخله هند شايله ابنها ..ابنها كبران صاير يمشي وبعدها شايلته على خصرها تمشي كوه وتعدل بالعبا على راسها مخربطه .. ابنها صلاوات جبير وسمين من دلال امه ..

ذبته بالكاع سلمت علينه تلهث بوستها امي كالتها من صبح اني هنا ليش مااجيتي ..

:- ردت والله جان عندي شغل وملتهيه ..

:-'ياهل الشغل الي مايخلص ، كل ماعاتبتج كلتي شغل،  ادري بس انتي مره  بذاك البيت وشغل مايعرف بس اديج ...

سكتت ماحجت باوعت عليه .. شلون صرتي بعده صدرج يتنك .

ابتسمت بوجها :- لا يعمري اشتريت جهاز جديد مال بخار احسن من الي قبله يريح ..

بيبي سالتها :- عجل عمتج ليش مااجت مو تعرف عندنا ثواب للمرحوم ..

:- جاي تصلي اني مانتظرتها كلت سيف وديني ... من صبح حاجيته بس كال خلي امي تاخذج ، وعمتي بطت ، تالي بس اجه سيف جلبت بي هالجابني وياه..

:- عجلن دكومن يمه وعوفي الجاهل هنا يم امج وامشن للطبخ حظرن العشا حتى يوزعو ولد عمجن ..

همينه كلنه للمطبخ .. دزت بيبي على ام رشيد وبناتها وعمتي جايات من صبح مركبات وبيت عمي سلامه وحميد كلها بره يصبون ..

اجت مرت عمي حميد تنافخ ، هيه وبناتها اخر ناس بس الوجهه مكلوب ،  وكل شوي نترت بهند .. ابنج غبره بالكاع ..

فاهيه عميه ، مابيج نفع ،  اني من يمي كرهت نفسي .. ضلت كل شوي ترزل بيها ، صاحت بيها ابنج شيلي شنو شامرته بالكاع ، شكو مخلفه اذا مابيج خير للخلفه ،

مادبريها لو بس تعرفين اربعه وعشرين ساعه مسدحه ، ومجلبه بالرجال طول اليوم ، الله يعينه جنه نحصد والجاهل مربوط بظهرنه .. ضلت تلغي وتذم بهاي رعنه اختي ساكته وتحمد بنفسها وبناتها مزوجات ،

اني من يمي فرت اباوع لهند والوجهه انطعن احمر دم .. ودمعه تلالي بعينها ..

لحد مانترت بيها ام رشيد هاي شبيج ام سيف شجاج ويه البت .. ادري هو صغير تشيله صلاوات شكبره مو يمشي شكو شايلته كاسره ظهر البنت بي ..

عوجت حلكها :- خلفله على عماته ، يغلسن ويبدلن خيه ، قابل هيه ربته وكبرته هالفاهيه ،  لو ماعماته جان لكيتي بوصخه والذبان ماكله ،  هيه تلكيها حايره بسيف شكال سيف شحجه سيف ..

:- دسكتي يمعوده ، دشوفي عين بارد ، يلج لج عماته شنو ؟! رقيه تغسل وتبدله ،  لو اختها لاخره شو وحدتهن يادوب شايله نفسها .. هذا نظافه بنت البغداديه عين الله عليهن ..

:- افااا ام رشيد شبيهن بناتي .. يابه والله وانتي ممحلفتني مالها غرض بي ، بناتي شايلتها هيه وابنها ، هيه انطيها الرجال اي فالحه بهل سالفه ..مثلنه خيه عبالك كلشي ماشفنه من دنيا ..

ضحكت ام رشيد ونطيتها بالكصه كالتها :- دسمعي هاي يسعده اكو حجيه هم مثلج كاتلتها غيره من جنتها تسمع بجنتها و تكول:اربع زلم ربيت بس مو الية من شافو النسوان كلبو عليه؟
شوفو رد جنتهه
ياعمه لتلحين كافي لواته جا عمي مو خذتي من أمه وخواته
من خذتي عمي بيوم شو ماحجيتي بس هسه عز عليج زوجي وبجيتي ماخذته منج ‏لاهو الخذاني امي وابويه اهواي فقدو مكاني
عشتي بحضن رجال وخذتي زمانج
خل غيرج يعيشون ولزمي لسانج
-هم عندج بنيات هم زوجيتي
من خذتي هالنسبان شو ما حجيتي

جنه واحد هفها ضربه على راسها خنست وعماتي ونسوان عمي لزمها تكهكه عليها خلتها كلها تسولف بعمايلها هيه وعمي بالبستان فضحنها وهيه خاله الفوطه على وجهه وتضحك تصيح ياااع غير هو افيسد وجان يحصرني ..

طلعت هم مو راحه هالسعيده ام دوده .. كاتلته هند وسيف شلون متصافين عمه اي والله شهل عيشه .. باوعت لهند تضحك وياهن ولا جنها توه ماكله رزاله غسل ولبس الثوله ،

والله لو منها الا اروح اكول لاامي واخليها ليله مصخمه عليها .. اروح اكوللها اني والله ولا اسكت ..

عفتهن بالمطبخ وكعدت بصف امي اسولفلها المقتل كله .. امي ضلت تفرك بيدها وتهز براسها ..كالت خما بجت اخيتج ..

كتلها لاا شبيها الفطيره عفتها تضحك يمهن ولا جنها ماكله طن رزايل واهانات كبال نسوان ..

قاطعتني مره من الكاعدات تحاجي بيبي :-  هااي منهو ام حميد منيلكم هالبت هاي ..

اندارت بيبي علينه  تشوف عليمن تقصد :- بنت حسن الصغيره هذي واخيت مرت سيف خيه ..

:- اهااا وانا اكولن هالدم مو دم بنواتكم الي هناا ، صلاوات عين الكمر بس اخيتها جبيره احلى ، عبن هالعرض يمه هاي معصعصه شبيها ..

رفعت حواجبي يمااا هسه طلعت هند احلى مني لان وزنها صاعد بسبب الاكل دسم والحباله ..

التفتت عليه وتحجي بصوت عالي :-  يمه كون شحمه وحطيها بخبزه ،  وياه شوي كرفسات وراس بصل ، ويوميه الف هالفه واكل الا تصير هالعرض وتسوي بديها هيج هالعرض تخبلييين تصير تخبلييين .. 

يييع هو اني عايزه لعبان نفس ..لعبت روحي وجهي كشر ..

:- يااا خيه شنهو لعبت نفسج ،  عجل اتضلين هيج محد يااخذج تبورين يمه زلم ادور لحمه ..

ضحكت بيبي كالتها :-  عوفيها يخاجيه شجاج ولد عمها يريدها محجوزه يعني عدها رجل مينخاف عليهاا ..

:- اهاا وانا توه ردت اكول ليج  ، اريدنها لابن عماد ، عبن ادوره مره ، تالي طلعت محجوزه جني ماعدي قسمه يمكم ..

:- لاع وانا اخيتج ماعدج قسمه بيها ،  تخيري من بنواتنه وتدللي وين اكو مثل عماد وخلفته ، والله انهم ذهب صافي ..

:- فدوه لعينج يخيه ولدج همه بعد ، اجيبن امه للولد ونجيج فد يوم ، على حرمه حتى ناسبكم .. صاحت عمتي تعالن على العشه انمد بالكاع

خلينه ثواب بصواني وزعو الولد على المنطقه . اجن نسوان هم يم بببي كرايب تعشن يمهم ..

احنه عزلنه نفسنه بعيد عنهم .. بغرفه عماتي كعدنه ناكل ..

ل١٢ كلها تطشرت بعد ماغلسنه مواعين اني والبنات ماتت ادينه .. رقيه ماشفتها زين ضلت تشتغل وكتلت نفسها هيه واخواتها ميسم تراقب من شباك حبيب الكلب .. مسويه نفسها ملتهيه بفهد وكل شوي فتحت البرده .. اسمع اصواتهم بره وصوت الجداري يغسلون بيها ..

ثاني يوم جدي كللهم روحو للبستان حوشو الفواكهه الناضجه وزعوها بصناديك ثواب .. التمو كلهم بسيارات الحمل وراحو ..

البنات هم تحزمن ونسوان عمي وياهم .. اني وبببي وامي ضلينه مارحنه .. للضهر ويله رجعو سيارات الحمل مترسه ونسوان صاعدات ليوره يم صناديك ..

نزلوهن بالحديقه صلاوات الرمان والبرتقال وخوخ اشكال .. جدي كللهم كبل العصر كون موزعه .. والله وصدك صرروهن بصناديك صغار وبلشو توزيع ..

اني وبنات كاعدات نقسم ونصفط بالفواكه ، هو يوزعون ، اغسل بالخوخ واخلي بالصندوك كاعده بصفي رقيه تنطيني ، رفعت عيني اجت على ابو فهد واكف كبالي ، واكف بصف جاسم يسولف ..

يفر بسبحته من شافني باوعتله اشر الي ، عقدت حاجبي مافهمت ، اشر على  رجليه باوعت ليجوه على جسمي رافعه شوي دشداشه حتى ماتتاوث بالماي ،

نزلتها درت وجهي عنه ، رقيه كالت هااا بده حكم فرعون ..

ماحاجيتها التهيت اشتغل والهي نفسي ماريد مغثه تكفي مغثه امها اليوم لهند ، اغسل بحركه واخلي بالصناديك بعصبيه ، سمعت صوته ، :- مو هيج يابه ينمرد حرامات  ..

رفعت عيني عليه ، ابتسم بوجهي :- شبلاج مطنركه من صبح ، حتى للبستان مااجيتي ، جنت ناوي اشوفج البستان والزرع بالكت ترد روحج ونشوف ضحكه ..

رقيه كالت شايفته هيه قبل اخذناها مره احنه  ، وماحبت تضل بي ، تضلت تشكي من تعب وتالي ردينه ، هيه متحب ولا هاويه الزرع وريف ابن عمي ..

:- هاذا لان ماعرفتو تشوفوه بستان عدل ، مره الاخرى انا اخذها اشوفها الها عدل ، يحجي ويحك بلحيته ،

ركزي بعيوني :- الزرع والبستان مو كاع تراب وطريق ترابي و عاكون بنت عمي ، زرع وبستان نفس نظيف ، وارض طيبه ، وحياه صافيه وبسيطه ، مابيها تعب بال ،

حجه بهدوء وحاط تك ايد بجيب دشداشه مترهي  ، اذا الله مكني اشوفج حياتنه على اصولها اشوفها الج بعيني مو بعينج ...

دنجت من نظراته ، اربكتني نبره صوته وعيونه ،  نوب رقيه يمنه وكل شوي ناطه تحجي وياه ، هو يرد عليها وعينه عليه ، ردت احجي وانطي وياه بس رقيه ماخلت مجال  ، شكلو حلو من يحجي بهدوء ، بس من تجي الحاله اكره واكره امه وعشيرته هم ، ايده تكوم تصعد وتنزل عليه ..

راح وتركنه نشتغل ، ركب سيارته عيني عليه ، حاجتني رقيه على اساس ماتردي وماتحبي وتحبين غيره شبيج تباوعيله هيج ..

انداريت عليها مصدومه :- شنوو ؟!

اكلج شبيج اكلتي بعيونج

:- عمه العماج ، اكلته شنوو ، حتى حجي ماحجيت وياه ،

:- مو يكولون من سكوتو موتو

:- هاي شبيج خيه ، شجاج متخبله عليه تضربين بسامير لو تسمعيني ، شايفتني مطلعه دلعه ونص صدري واغري ، لو ضحكه واصله للبيت عمامي ..

:- يااع شبيج عصبتي اتقشمر وياج ، مو يكلك الحبك لاشاك ..

:- هو انتي كضيها عليه يكولون ويكولون ، باوعت على ملابسها وكتلها  بنتره :- وبعدين تعاي هاي مودشداشتي الي لابستها ، منو كلج اخذيها صخم الله وجهج نوب مكصرتها وماخذه منها مسويتها على كدج مثحربتها يالرعنه ..

باوعت على دشداشه وضحكت :- يااا نسيت اكلج هاي بالفاتحه اخذتها كلت شسوين بيها بعد ، وانتي حزنانه وضلت بنفسي وكلت والله الا اخذها ، وانتي مالج خلك كلت حتى لو اكللها ماتعزها عليه نفسها طيبه هالاخذيتها بدون مااخذ شورج ..

:- لا والله لو كايلتلي ولا انطيها الج ، خالتي جابتها الي من سليمانيه هديه وتعز عليه ، من شفتها عليج كلت خاف مشبها بيها لو تشبها ، بس من ركزت بيها لا والله عرفتها الي ...

:- هسه شتردين اصلخ و انزعها وانطيها الج لاخلفله عليج ، ام نفس'ضيكه عابت الج والله ، ياما نطيتج ملابسي ..

:- سوده بكصتج اذا صدك ، منين مطيتني مره وحده هيه استعاريت دشداشه منج ،  من اجينه قبل كم سنه ولبستها يوم واحد ورجعتها ، وانتي صارلج سنين سارحه بكنتوري ، خيه بالعافيه عليج ، مايعزن عليج بس اخذي رأي ،  اكو شغلات عزيزه جايتني هديه ماتنطي ...

:- يابه بالقرعان الا اتصلخ وانزعها ، ولا منيتج هاي ...

:- عزاا ولج شتنزعين هناا  .. تحجي وترفع بالدشداشه تريد تنزعها من كل عقلها زعلت ..

ضحكت من كلبي واني لازمه اديها وانزل بدشداشه :- ولج راح يطلع ط*** عليهم ، ويكولون هالط*** الاسمر المنو ههههههه نوب مربرب ..

دفعتني عنها :- بالقرعان نوب اذا حجيتي الا اتصلخ  واكللهم عايرتني بالدشداشه ..

:- هو انتي تكيفين بسالفه اذا بيها نزع خيه مااعرفج ..

غمتني وكملت شغل ادردم عليه ، تالي دفعتني معصبه ودخلت للمطبخ ، فوكاه بنت سعيده الخبله هيه منو امها و ابوها  ..

من اجينه نرجع ، خلولنه حصه فوكاه ومشكله .. بسياره كبل لانطلع العصر لبيتنه .. ياسر تعب حيل وهذا غلط ضل ينكل ويشتعل ولاعبالك رجله بيها تمزق والاعصاب مدمره .. بس اخذه واهس ..

بس رجعنه ويه ياسر .. طول طريق يكول رجلي تصل عليه ودمرتني من الالم .. ضل طول طريق يلوب لحد ماوصلنه هو ساحت روحه سوده عليه ..

كبل اخذ مسكن حبايتين من هذا قوي ونجطل  نام .. امي ضلت تلوب عليه كالت بس لاتصير بيها كنكرينه ليش مجاي تهود عليه .. دكت على خالي الي باربيل كالتله شوفلي دكتور زين لياسر رجله موتته بعد اختك مجاي ينام ليل والي هنا يركعون بي مسكنات ويكلوله الا عمليه  ..

كالها باجر ادولج بس كون يجي هنا دانشوفله حل .. من كعد من نوم كبل امي حاجته وكالته على سالفه دكتور وخالي هو سكت كاللها اني هم ماعايف سالفه داراجع دكتور بس هم اروح لاربيل وتاكد منها ..

يومين وراح هو وصاحبه لاربيل وجاسم اجه وجاب عائلته يباتون يمنه ...لحد مايرجع ياسر .. طول ويله رجع غاب سبوع بس من رجع وجهه ميتفسر وضايج من سالنا كال العصب تالف برجلي .. واذا فتحوها وسوو عمليه لازم يقطعون جزء تالف وهنا اني اكوم اعرج ..واذا اضل هيج الالم مايخف نوب يزيد ..

امي كامت تبجي .. شحظج ياحسنه متكول شنو حظج .. ادري شحمل كلبي بعد .. هو صافن بالكاع ومقهور وامي منا تون على راسه ..

حاجيته اهون عليه :- كلبي انته مو معقوله ماكو علاج بره .. هسه عالم جاي تتعالج بتركيا وايران هو احنه اطبائنه هم اطباء .. لا تاخذ بحجيهم ليش ماتطلع برا تشوف الها علاج

رد هو .. صديقي هم كالي هيج ..اخو يشتغل معاون طبي بتركيا كال ادزله فحوصاتك واشوف اذا الها علاج اسافر اسويها . بس انتظر الله كريم شوف شوكت يرد علينه ..

كام من يمنه ضايج كوه يمشي يعرج وامي على كعدتها تبجي .. رادتها حجه دتلكه شي حتى تنحوح عليه كلبها مورم ..

جاسم من سمع ياسر اجه ماوصل ، امن اكو واحد بالبيت يمنه خابرته امي تسولفله  ، على حظ ياسر ورجله وتدهك وتبجي .. اني من يمي كلبي انمرد وروحي شاغت .. عفتها تسولف وياه وتون تهون على نفسها شوي من تبجي ...

.. وره فتره اجاهم خبر على فحوصات وكالو لازم يجي لتركيا ونسويلج فحوصات جديده .. ياسر كال لازم احظر فلوس وشقه وارتب اموري ويله اروح .. مابيه حيل بهذله واني تك رجل ..

جاسم كله رتب امورك هالكم اسبوع واني هم خلصت بيت اريد انتقل لديالى .. امي تفاجئت شبسرعه خلصه وشلون راح يعوفنا .. ليش يمه على بختك لا انته لاابوك وهسه اخيك يريد يسافر .

. متكلولي انا المن ضلتي بعد بهل دنيا عسا ربي ياخذ اماتني وداخلص ليش يمه وين تعبي وحك رباي تريد تعوفني ..

:- يما لخاطر الله وين عايفج .. اني ماروح اذا ماياسر يرجع من سفره بخير وسلامه ، وانتو اولكم وتاليكم هم تجون لديالى .. وهناء بس تطلع سنه ابوي ياخذها رشيد وانتي عليش ضاله بعد هنا تجين وياي ،  وياسر اذا يريد يجي هم هلا بي بيت اخو يعني بيته  ..

امي شهكت :- يمااا هناء شنو ياخذها رشيد ، مو سدينه على سالفه يمه .. شهل حجي ابوك بحياته مارضه تريد بموته تكسر باختك وتطيها ...

كام واكف على حيله وضايج :- هااا هم رجعنه يمه على سالفه .. ولا ماننطي للعمامك ،  يمه جدي كلي من زمان بس انه ساكت وماجل ،  والا جدي يرد خطبه وعقد وره سنه تتزوج كبل ..

امي تخبلت :- لا على بخت اي والله يابن بطني ،  واخيتك يمه ماتحجين شو خرسيتي ،  اني خانسه اباوع لجاسم وعيوني مدمعات .. مصدومه ليش مو يدري رافضه ليش ديلح ..

بجيت كتله :- جاسم والله ماكدر اعيش يمهم .. اني احبهم اي عمامي هذول .. بس يااخوي ودراستي وتعبي وحلم بابا انو اكمل دراسه واصير دكتوره ..

هذول كلهم ماكدر اسويهم يم عمامي وانته تدري وتعرف طبعهم كلش زين .. ليش تكسر بيه لخاطرهم .. ليش تكسر باخاطري واني اختك ..

تقرب عليه فزيت كمت وكفت كبل ..حظني حيل .. ياول انتي اخيتي صغيره وزعلج من زعلي ماارضه .. جدي من كلي رفضت الله يشهد لخاطرج اريد تخلصين هالسنه هنا .. والباقي تكملي هناك يمهم وجدام عيني وامي هم اخذها وياي ..

باوعت لاامي ..التفتت عليه جاسم اني ماريد ازوج .. رشيد ماعرف اتعامل وياه .. مافهمه ولايفهمني ..

:- عجل على منو تفهمين دفعني من حظنه .. حرت وياج انتي مارايده عمامي وعيشتهم لو رايده دراستج لو مارايده رشيد رسيني على بر ترى حرت وياج ..

:- على شنو مستعجل على زواجي .. خلي اخلص دراسه والله كريم ..

:- لا يابه جدي شيسكته .. جدي مستعجل على زواجكم بس اني رافض كلت خلي تخلص هالسنه ويله .. قاطعه ياسر جدي شنو مستعجل ليش هو العريس سد سالفه جاسم وهناء متزوج اذا متخلص دراسه ..

زمخ بي :- احترم نفسك شنو هالحجي شوكت تتعلم تحجي ولك ..

:- لاا تعال علمني .. بعده تراب ابوك اخضر وكمت تزوج وتنطي بكيفك ،  مو تدري هيه مو راضيه ،  وابوي نفسه  هم جان مراضي ، بعد ليش تلح بهل سالفه جدي شعلي هم ويلح ..

عاط بي :- ياول اكل خ.... وتأدب شنو ملحه ، مو بعينك انا مو اخوها جبير ، ولي امرها من بعد ابوها ، واشوف من مصلحتها تاخذ ابن عمها ، جدي طلبها كم مره منه ورفضنا هل مره ماارفضه انا ..

ياسر وكف على حيله معصب :- انته عود لاترفضه بس لاهناء راضيه ولا اني وهذا كافي ..زواج ميتم وهيه مراضيه بيا شرع بيا قانون انتو تشتغلون ..

تخبل جاسم شلون يكله هيج هذا كام يكمز ويكله غصب عنك وعنها تريد تكسر كلمتي ويه جدي ويكول ماكدر لاخته .. والله زواجهم وره سنه ابوي غصب عنكم وهسه تشوف ..

ياسر هم ماسكت امي تهدي بي وذاك جاسم يتهدد .. اني بالنص ابجي اباوعلهم .. ياسر عاط بي :- صدك يجاسم ماتصير هالزواجه وانته واني موجود ..

:- وين موجود متكلي لك جحش ، عبالك مادري تريد تطفر لتركيا ، صارلك فتره تنبش وتحوص،  وتسال على الجوء .. ساكتلك بمزاجي وعايفك اكول رجله اسكطت خلي يحير بيها ...

امي شهكت وطبت على صدرها .. يااايمه ياسر صدك .. ماجاوبها ياسر .. نتر بجاسم لا والله وانشالله تريد تربطني مثل نسوان يمك وهم تزوجني بكيفك خليها بالك جاسم اخوي جبير اي بس كلمتك متمشي عليه افتهمت ..

:- طبك مرض عساك رحت ومارديت ،  ولي وين ماجان بس هناء وامي مالك خص بيهم،  اني مسؤل عنهم ..

ضلت كلمه منا وكلمه منا لحد ماجاسم فقد وكسر تحفيات .. بعد ماعرف ياسر عارض المحل للبيع ..

:- ومنين اجيب فلوس علاج وسفر اذا مابعت محل ليش تهوس من يمك ..

:- تداين لو انا انطيك شنو تبيع المحل تريد يجي غريب يشاركني ..

شنو تنطيني انته وشكد تكدر اصلا هو انته مديون على بيتك وبيتك الي هنا مايجيب نص سعر الي صرفته على بناء يادوب يسد الدين الي عليك ..

:- هاي المن تريد تبيعه عود ..

:- لصديقي راد ياخذه ويسوي محل موبايلات ..

:- وليش تبيعه لغريب لا تبيعه اني اشوفلك شراي كرايب هم عوزه اشارك غريب ويكسر عليه ..

اتفقو هيج حصه ياسر بالمحل تنباع وياخذها يادوب اصلا تكفي علاج ... وبيت جاسم الي معروض للبيع هم يادوب يسدد ديون الي عليه مال بناء وهم ياثث بيته ..

امي بيومها ماتت من قهرها ، سكر وضغط صعدن عدها ، ضل جسمها يرجف ، نمت يمها بليل خفت لاتتخربط وماندري بيها ،

جاسم رجع لبيته ، وياسر يفتر بالبيت ظميره يأنبه ، وكل شوي يدخل يبوسها ويتوسل بيها لاضوج ..

هيه ساكته ماتحجي ، تحس نفسها ، خسرتهم وماتكدرلهم بعد ، ومحد ياخذ شورها ولا يحسبلها حساب ، نوب تنكلب على جهه ثاني تنوح على بابا وايامه ...

كلشي يصير بالبيت ، تربطه بوفاه بابا ، تكول هو موجود مو هذا حالي وياكم .. 

مشت ايامي هيج كليه وبيت .. وبيت وكليه .. وعرك بين جاسم وياسر الي طلع بسالفه الجوء بره وماناوي يعوف سالفه .. بس يراد فلوس هو علاجه كوه دبر فلوسه

فد يوم واني راجعه بالخط شفت اسحاق  واكف باب بيت اهله .. لمحني باوعلي لحد ماوكف خط باب بيتنه هو واكف ..

نزلت التفتت عليه دكات كلبي زادت شكد مشتاقه الشوفته صار شكد مشايفته ولاسامعه صوته .. باوعتله بحزن ..

وجهه زعلان ..
اسحاق  ماشفته ولا سمعت صوته من يوم وفاه ابويه وعزاني بي بعد مالفه ولا سمعت عنه سجى اصلا كطعت وياي ..حتى مادري ياكليه طلعت الها ..

دخلت لبيتنه خايفه لااحد يشوفني واكفه بالباب .. وعفته وراي دومي اني عايفته وراي ضايج ..

لحد مايوم توه طالعه من القاعه اتجهت للسنتر اكل شي روحه شاغت من جوع ..

لمحت واحد جنه اسحاق .. بس عبالك مو هو ضعفاان ولابس اسود يمكن مو هو .. من تقرب عليه عرفته هو .. كمت بسرعه منهزمه لااحد يشوفنا لو لايجفت علينه رشيد ..

مشيت بسرعه وره كليه اكو حديقه صاير بزاويه كعدت على مسطبه .. حطيت ملازمي بحظني اكلب بيهم خايفه ومتوتره التهي بيهن .. شفت خيال حجب شمس عني رفعت راسي باوعتله عيونه ذبلانه بتعب  ..

خجلانه منه وخايفه هم .. حاجاني بزعل " شلونج ياتعب عيني وجع كلبي ؟؟؟!!

#يتبع

البارت طويل ترى يستاهل نجمه 💜