رواية ثأر مهري منهاا الفصل الثامن وأربعون 48 - بقلم اسماء ديمير

《《البارت 44》》

#ثار_مهري_منها

بقلمي "أسماء ديمير "

بس الاصوات علت واسمع صوت ركض ..

شمرت الوصله وطلعت لباب المطبخ اشوف سيف يركض لبيت جاسم يااا هاي شكوو ..

هند تمشي بسرعه وراه خفت لازم اكو شي يماا ..

ترددت امشي بس هذا بيت  اخوي خاف جاسم بي شي ، طلعت اركض وراهم لبيت جاسم .. دخلت للحديقه بس اسمع صوت صياح وعياط رواء وتغلط وتفشر على منو مادري ..

ياا هاي مو عود بيت اهلها شو هنا..

الكل موجود والصوت عالي كلشي مافتهمت ، لمن دخلت للبيت يله شفت رواء لازمه رقيه من شعرها وتسحل بيها ..

وسيف متلازم ويه جاسم .. هند واكعه بالكاع لازمه بطنها تبجي .. ركضت عليها اشوف شبيها ..

ولج شكو شنو صار ..

ماتحجي بس تبجي وتون من بطنها .. بيبي وعماتي لزمن رواء يردن يخلص رقيه ومافكتها ابد ، تصيح وتغلط تكللها ولج دخلتج بيتي ، وامنت بيج تطلعين خاله عينج على رجلي ،  يالبايره مالكيتي غير جاسم تصاحبي رجال مزوج شنو من نفس انتي ..

وذيج تعيط وتبجي والله هو هو دز علي وكلي رواء تريدج تعاي واني اجيت هو ضحك عليه مو اني هو تحرش بيه ..

شهكت ياااا عزز العزززاج اي والله .. سيف نوب تخبل ، وجاسم دفعه عنه كله بالقرعان ، جذابه ولج بنت الكلب اناا داز عليج ؟ لو انتي جفتي علي للغرفه وتتوسلين بيه اخذج فوك رواء ..

هيه تبجي ماتحجي وتكول هو دز عليه ، ورواء تصرخ تكللها بغرفتي تخوني بغرفتي ياجاسم هاي تاليها .، وانتي عنستي وردتي بس زواج ومالكيتي غير جااسم  ..

دخل رشيد يفك جاسم وسيف الي تمالخو ومحد.كدرت من نسوان تفكهم ..

كوه فاككوهم ورواء جثيثه خالتي سعاد ماكدرتلها يردن يخلص رقيه ماكوو ملختها تملخ ، نص شعرها وكعته بيدها ، وذيج تصرخ هو صاحلي هو جرني للغرفه هو جبرني ...

نوب جهال تتباجه ..

هند بالكاع تبجي من خوف مدري من بطنها ، شلتها شيل وعفتهم وراي متمالخين، كلها التمت يردون يشوفون شكو  ..

طلعت بره بالحديقه اغسل لهند ، ركضت على جهال جاسم تخبلو من البجي طلعتهم خليتهم بره البيت ،

طلع سيف يسحل برقيه من شعرها وذيج تصرخ ، وتكوله والله هو دز علي اساعد رواء ، تالي اخذني للغرفه جبر وياه ..

وامه تكله يمه هو ابن عمك النذل ضاحك عليها يمه لاتصدكهم اخيتك هاااي ..

هند اجت تكوم وراه ، عااط بيها انتي ابقي يم اخوج ماعندي مره بعد بالقران الشريف ،  مااتشرف بنسبكم كلكم خرااا .. ماشفت من اهلج خير ابد بس الفضايح وهجمان البيوت ..

اخذ اخته سحل وامه تتوسل بي .. طلعت رواء شايله عباتها وجاسم مجلب بيها يصيح ، شبيج تخبلتي شلون تصدكين بيها ولج ، هاي ناويه تهجم بيتي ليش تخليها تنول الي تريده ..

ولك اسكت ماكافي متحملتك سنين ، نوب بيتي يااجاسم بيتي ، ومنوو رقيه البايره الوصخه العانس الي محد كلبها ، اجيت انته حطيت عينك عليهاا ، هاااي هااي تفضلها علي خلي تفيدك والله مالي عيشه يمك بعد ..

بيبي حاجتها :- استهدي بالرحمن ياامره لاتهجمين بيتج بيدج  ...

يااابيت عيني ياابيت خليت البيت الكم الله لايوفقكم انشالله هجمتن البيت انتن بعد افرحن بي ..

لزمت عباتها ومشت وجاسم يعيط بيها بس تطلعين مالج رجعه يارواء ..

طبك مرض انته وبيتك اني بعد مااريدك.. جرت بنتها الصغيره من ايدي حيل وطلعت تلهث من العصبيه شكد انقهرت عليهاا .. الله لايوفقج ياارقيه ..

عاط بيها جاسم الجهال مالهم روحه وياج تردين ولي وحدج ..

نوب تمالخو على جهال بيبي تحجي وياها ، تهدي وذيج تحلف تكول مااضل بعد ، وجاسم يصيح يكللها مالج طلعه واذا طلعتي اطلعي بطرك روحج .

تالي اخذت بس صغيره وعافت الولد وراها يبجون .. رشيد كال اناا اوصلها عيب مره تروح لبغداد بحدها ..

طلعت وجاسم دخل للبيت يغلط ويكسر كلشي مافتهمنه . دخلت وراه هند تعتب ، تكله سيف يكلي ضلي يم اخوج بيتي راح ينهجم من وراكم اني شذنبي ..

لعد انااا شكول هاي بت الكلب ، جانت مثل الجلب جوه رجلي تتوسل وتتخضع بيه ، تالي شمرت بلاها عليه وجفتت بغرفه نومي ، وتتهمني نوب اناا داز عليها الجلبه ..

شلون دخلت لغرفتك رواء وين شلون ماشافتها ، انته شلون ماحسيت عليها بيتك ...

رواء بيت اهلها توه اجت ، وانا جنت مطمور ادري شنوو اشم ايدي ، بس دخلت تمددت عفت باب مفتوح لرواء خافت تجي واناا نايم .  عبالي الباب انفكت بسبب جهال ورواء ، تالي طلعت هالسكط جافته علي ..

هساع حلها خويه فدوه سيف مايريدني والله شسوي ..

هو بكيفه شنو لعب جهال ، خلي يربي اخته بالاول ويعلمها الاصول وبعدين يرجع عليج ..

ضلو متمالخين هو وهند ، وبيبي ترزل بي ، وبعدين ترجع تغلط وتسب على رقيه .. نسوان عمي فضحنها فضيحه ، شلون مايحجن بيها اذا هو سيف شحطها من يمنه وهيه بطرك دشداشه ،  ربع ردن ودلعه نوب رواء مكطعتها تكطع مصلختها الا شوي ..

والله عفيه رقيه كل هالعرامه وماكدرت على رواء ، ملختها وماكدرت تدفعها شوي ، حقها عمي لرواء هجمت بيتها النذله نوب رجال مزوج  حقنه شعجبج بي ...

اخذت هند لبيت جدي ويانه جهال تتباجه خفت عليهم ، من هوسه ومن عصبيه جاسم ، الي كسر نص غراض بيت ...

عفتهم وراي دنياا مكلوبه ، نوب عمامي اباوعلهم نزلو من سيارات واتجهو على بيت جاسم  ، نسوان واكفات يتفرجن وتلكنهم يحجن سالفه .. ياستار سترك راح ننفضح والله باينها راح تكبر يماا .. نوب جاسم وكع بيها ..

والله من صدك خفت عليه ، مهما يكون يبقى اخويه ، راح يلتمون علي شيفكه منهم سوده عليه ، كلت اتصل باامي و ياسر يتلاحكون عليه .. نبقى اخوه احنه ، اعرفهم همه ونسوانهم من يتكاتفون على واحد  ..

وصلت للبيت وركضت للموبايل ، كبل اتصلت بياسر فزز خطيه من سمع بالسالفه ، سولفتله مختصر ، كتلها الحك ترى عمامك يمه هسه راح ياكلو اكل ويمكن يتهمو ، ويصدكوها ...كال ساعه زمن  وانا يمكم بس مسافه طريق..

مشيت لهند لكيتها كاعده والوجهه اصفر ، سوده عليها  انهبطت رحت للثلاجه طلعت عصير وصبيت الها وللجهال ، بالكت شوي يهدون ..

هاج بللي ريكج يمعوده شجاج وجهج اصفر كركم ، عبالك احد ميت ...

كبل بجت ، شفتي'شصار الله لايوفقها نذله .. فوك ماذتج وشوفتني المرر بيت عيالي ، نوب هسه رجعت على جاسم هجمت بيته ..

سكتت .. كتلها الله الي يستر من جااي  .

ونعمه بالله بس اخوج راح بالرجلين ولج شيفكه من عمامج بعد...

على شنو شعلي هوو ، خراا عليها هيه نذله ، شوداها لبيته رجال مزوج شلون تدخل بيته ..

ولج لكوها وياه بالغرفه بطرك دشداشه النوم ، شيفكه بعد جاي تحجين مو تعرفين عمامي ..

ولج موو كال هيه جفتت علي ..

منو يصدك ، يصدكوها هيه ، لو يصدكون اخوج ..بس تحلف يصدكوها وهاي مستعده تحط ايدها على قران وتحلف جذب ..

عزاا العزاها والله ، الجهال راح توكع بيها والله ،   بس اني شفتها قبل فتره والله بس منو يصدك اذا حجيت ..

كامت لحيلها اشفتي ولج ...

هاي قبل فتره ، طلعت للمطبخ وشفتها هيه واحد بالحديقه .  حاظنته وهو يدفع بيها وعصبي بس ماشفت منو دنيا ضلمه جانت ..

عزااا العزااج ياهناء غير  تحجين غير تكولين ..

شكول خيه كبل يجذبوني ، قابل يصدكوني ويتهموها ،

سكتت .. هم صدك منو ياخذ بحجينه ، احنه ولد عمي شما يكولون يصدكوهم ، عبن ولدهم احنه بيش الكيلو ولد حسن ..

انسولف لبيبي ..

ولا راح تصدكج والله ، كبل يكولن اتهمن البنيه ديخلصن اخوهن ..

معقوله هو داز عليهاا ..

شووف هااي ، ولج جاسم شماا جان عصبي وعنده سوالف عوج ، بس مو نذل ويخلي عينه على عرضه ، ويدز عليها لغرفته ، شبيج تخبلتني انتي الاخرة هاي عود انتي اخته ..

سكتت ،  كتلها حسبت يعني ..

لاتحسبين ولا شي ، ليش هيه رقيه هينه ، نذله الله لايوفقها حتى اني لاحني طشار من مصيبتها ..

انفضحت بعد هيه تعال شلم الفضيحه بعد ، نوب سيف طلعها بطرك دشداشه شبه مصلخه ..

الله بالمرصاد ، الله ياخذ حقنها منها ..

درت وجهي شايله هم اخوي ، وكع بيها هو وهند نوب ، يماا منج يارقيه ومن فواينج ...

دخلت بيبي فحطانه والوجهه احمر ضايجه ، مرت عمي وراها تكول يااا بس لا اخذها للبت غير يتصخم وجهه حميد ..

بيبي نترت بيها صخم الله وجهج ، لاضلين تشمرين تهايم ام حسين ، انتي هم عدج ولايه خافي الله ..

ياا عمه قابل اناا جايبه الحجي مني ، مو شفتيها شلون حاله هيه وياه ، ورواء كاضبتهم  كضب يد ..

بيبي كالتها سدي سالفه ولا ضلين تلوكين بيها وهيه تلم ..

سكتت ودخلت للغرفه تحجي ماعاجبها .. اني وهند  خانسات .. ننتظر الفرج ، بالكت يجي جدي يحلها ...

وره ساعه ونص دخل ياسر و امي وجوهم صفر ، كعد يم بيبي يسالوها تكللهم علمي علمكم اناا هم مافتهمت شني سالفه ..

ذيج تحلف وتبجي وتتشكى ، وابنكم ينكر ماعرفنه صدكهم من جذبهم ، بس الي شفته ثنينهم بغرفه نوم و بطرك ملابس البيت هذا شفته ..

راح ياسر لعند جاسم يفتهم منه ، وهم نفس الحجي كلشي مااخذ منه لاحق ولا باطل ...

جاسم حجايته وحده ، جفتت علي وانا عايف لباب لرواء حتى لا اغفل ونام ، ودك ومااسمعها ماحسيت الا ذيج داخله للغرفه ، تتوسل بيه وتكلي راضيه اصير ثانيه ، اناا شلي لازم اذا هيه بلا تربيه وعرمه ..

رجع ياسر مسطور ، يكلي اخوج ميسويها ، بعمره مازاغت عينه ، مو عاد هسه يحط عينه على بت عمه ولااا نوب يجيبها لبيته ، وهو يدري بمرته على جيه من اهلها مو معقوله قابل ناوي يفضح نفسه ، يدز عليها وهو يدري مرته جايه ...

اني حلفت وايقنت هااي سوالفها وخاصه اني شفت بعيني ، بالحديقه من مجلبه وهو يدفع بيها ، حتى لو حجيت محد يصدك ، يكولون اخوها وتريد تبري ، مثل مااسيف قفل على اخته ضحيه واخوي ضاحك عليها ..

خابرتنه خالتي تسال ، تكول احنه بدهوك وخابر عمج علي يكول لحميد .. الحك بنتك فضحتك وطينت وجهك لكوها هيه وابن عمها بغرفه نوم ..

نوب عمامي بدل مايهدون الوضع ، ذبو بانزين على نار ، حجو الي شافته نسوانهم ، ماشافو بعيونهم وحكمو ، لاا نسوانهم كالت رقيه بطرك دشداشه يم جاسم بغرفه نوم ، ومرت جاسم لاكيتهم وفاضحتهم ، وضاله تصيح وتعيط واحنه اجينه وشفناهم صدك سوه ..

وسالفه طشت طشه ، ماطاشها نور الزين كبل ،،

عمي بس مخابري ومسولفين اله ،  لام جوالاته وجاي بنص اليل ، خابر على جدي يحجي ويصيح ، ويكله اصلخ واذبح الا عرضي ، نوب دك على عمي بفهم سالفه كلوله تعال والله كريم
..

ليل واحنه ننطر ، جدي اجه وسيف اجه هداد يشكي لجدي على سالفه ، وشلون جاسم فضح اخته ، كله ابوك يجي ونكعد نتفاهم .. كلها التمت وعمي بعده بالدرب لل١١ بليل ويله دخل هو وخالتي الوجوه صفر من تعب والخوف الماكلي من مخابرات ..

خالتي اجت يمنه بسرعه ، عمي دخل خطف بسرعه للديوان ، بس دخل كبت العيطه ..

هند ماتت من الالم ، و من خوف صارت عدها تقلصات ، رحت حميت الها مااي حار وخليته الها بجيس ونطيته لبيبي تخلي جوه ضهرها لو تفرك بي بطنها ...

امي'شابعه قهر على جاسم ، وعلى جهاله الحال الظيم حالهم نايمين على الارض ، كامت غطتهم تأفف ..

صوت عمي حميد يكله بالقران نفس مانفضحت من وراح تعقد عليها وتاخذها ..

وجاسم يحلف ماياخذها ، ماتلوي ذراعي ، شنو جاي تضحكون علي .. بتكم جايه لبيتي بطرك ملابس البيت بعين كويه ، نوب تشمروها علي شايفيني زوج ياولوو ..

مانسمع غير ربد بالمضيف وصياح الولد .. انفتحت باب على حيلها واخوان رقيه متكامشين ويه جاسم وياسر متمالخ وياهم ورشيد بالنص يفزع لجاسم  ويدفعهم عنه ..

جدي ضل يغلط ويرزل بيهم ، طردهم كلهم بره خله بس جاسم وعمي حميد وياه وسد الباب بوجهه الكل ..

صوتهم طالع وجدي يكله  بت عمك عيب انفضحت يابه تعقد عليها وتسكت ..

وذاك يحلف مايعقد ، هيه جاي تشمر بلاها عليه ،وخلي يربون بنتهم بالاول ..

مافضت سالفه ناس تجر وناس تعر ، جاسم قافل وعاند البنت جاي تتهمني وتتبلى عليه و مو اني اصير لعبه بيد مره تمشيني بكيفها ..

واخوانها وابوها يكولون بنته انفضحت كله بسببك ..

طلع من يمهم وراه ياسر وهم زعلانيين ، انقهرت على اخواني ماشافو يوم حلو ابد ، ايامنه كلها مره ..

بيومها امي باتت يمنه وهند هم ، ثاني يوم صبح امي اخذت جهال جاسم وراحت يمه كالت مارتاح هنا على الاقل ذاك بيت ابني ..

اخذت جهال وهند وطلعت ، ضلت سالفه معلكه ايام ، والنار كابه بين عمامي وجاسم جنها جبهه حرب ،

خالتي تجي تسولف عن عمي حميد ، شلون مجنزها لرقيه تجنيز دمايته بطولها تكول ، كاسر جف رجلها حتى بعد توب تعتب باب البيت ، حتى للمستشفى مماخذيها ، ضاله تون ومصخنه..

اجت امها تبجي وتسولف لبيبي حالها ، تكللها راح تموت والله من كتل ياهو داخل يضربها وطالع يضربها ، نوب رجلها مورمه ، وفوكاها مصخنه لا طبيب ولا مضمد ، احجي ويه ابوها خلي اوديها لاتموت عيوني عمه ..

خالتي كالتها راح احجي ويه ابوها بالكت يفك ، اندارت ام سيف عليها فدوه حاجي لاتموت والله عفتها جنازه حتى حس مالها..

لا يمه بيش طالبتها .. بس يجي احاجي لو هو مايتحاجه صار ايام حتى علي يصيح ومعصب ..

سكتت ضايجه عشت الي عاشته هيه ويمكن اكثر ، الموقف الي انحطيت بي ماااتمنى لعدوي ابد ، حتى لو رقيه لذلك انقهرت من سمعت موتيها من ضرب .. حسيت بالمها واني كاعده ،

دمعت عيوني عليها .. كمت من مكاني ماريد اسمع اكثر ، يمكن غير يتشفى ويفرح ويكول حيل ، هاي جزاتها ، بس والله انقهرت حتى جسمي كام يوجعني ،

ضلت سالفتها تجرجر ، وبعدهم متمالخين ، اني عزلت نفسي وماحجيت ولا دافعت شعلي ، حرت بجهازي ..

وره كم يوم خالتي جابتلي جنطه ، كالت هاي جهزتلج من ادهوك ، ملابس ماعندي وقت اجيبهم الج من بغداد اذا رحت عود اجيبلج الباقي  ..

جريت جنطه وكعدت افردش بيها ، اشكال جايبه خطيه ماخاله شي ناقص ، ملابس بيت وطلعه وملابس نوم اشكال تجنن ..

التهيت اسفط بيهن وارتب وهيه تكلي شوفي هذا وهذاا ..

اسمع بيبي بره تحجي تكله جوه هيه وخالتها يمه دش محد اكو غريب ..

اندكت باب ودخل رشيد ..

خالتي من شافته كالت اني هم امشي حميد على جيه..

عافتني وكامت اني لميت الي بالكاع وبديت اخلي بالجنطه اردهن لمكانهن ..

هو واكف فوك راسي كال شلونج ..

الحمدلله ..

كعد على جربايه يباوعلي واني اسفط .. كال شلونج بهل هوسه ..

جنت اسفط من سمعته كال هيج رفعت راسي عليه ..

همست :- تذكرت سالفتي قبل ..

- الله مايضرب بعصا يابه .  مو تكولين جانت سبب بالي صار والها ايد ..

- هيه والله ماريد اتشمت بيها ..

- هز راسه ساكت اصيله بت عمي ..

- ابتسمت ، شعجب هناا ..

- جنت بالمعمل كلت امر .. وهم اكلج على سالفه كليه ماصارت ..

بهت وجهي :- هااا ليش ؟؟؟!

- يابه نهايه سنه ، وامتحانات نص سنه بعدلها سبوع ، خليها على سنه تجي ، حاولت اسويلها رفض العميد شسوي بعد ..

- سكتت ضايجه وجهه غندب ..

- وعد سنه جايه بيدي اسويها ، اناا وياج اخذج ونروح لبغداد نكملها . ..

ضليت اسفط وساكته انقهرت هاي كم سنه راحت علي ..

كال هناء  ..

رفعت نظري ..

مو جاي اوعدج ياابه مامصدكه ..

لاحشه هاهيه ..

هيه كم شهر وتخلص هالسنه دراسه مابقه شي ..

هزيت راسي مقتنعه .. اباوع عينه على ملابس الي بالكاع .. ابتسم كال حلوات ..

اي ذوق خالتي ...

ممم عينه تباوع وراي ، عرفت على شنو يباوع ، اصلا خليتهن هناك حتى لايشوفهن ، مدري'شلون لمحهن .. جريتهن من وراي داخليهن بالجنطه عيب ..

عيونه ويه ايدي يباوعلي من جريتهن ، همس تعودي علي يابه لان مااضل شي ..

هااا

باوع بعيوني ابتسم راح تعبيني موو..

دنجت راسي ، بلعت ريك كتله ، انته هم ..

كام لحيله كالي ، بالعافيه تردين شي بعد ..

سلامتك ..

الغرفه راح اوصي عليها مصريه لو تردين غير شي ..

بكيفك ..

عاجبتني مصريه فخمه ..

ماعرف بهل سوالف بكيفك ..

عجل اكوم اناا اكمل الي وراي ..

اجه يطلع صحت وره رشيد ..

عيونه ..

سكتت خجلانه ..

كولي ياابه ..

جاسم شراح يسوي خطيه ..

راح احاول اقنعه ياخذها للبت ..

عقدت حواجبي ضايجه :- ممجبور يعقد عليها ترى شمرت بلاها عليه ..

يابه بنت انفضحت لازم تلم السالفه على الاقل لو بس يعقد عليها ويعوفها .

سكتت .. هو طلع راح لشغله .. وراها بيوم امي وجاسم رايحين لبغداد يرجعون رواء مو راضيه ترجع مجلبه زعلانه ، وتكول مالي كعده هناك بعد ، نسوانهم مثل العكارب ،

وجاسم هايج عليها يريد يرجعه غصب نوب متكامش ويه اخوانها ومتضاربين .. كوه فاكين سالفه ومهدين الوضع .

نوب امي ضاله بين حانه ومانه لاتكدر ترجع لبغداد ولاتكدر تعوف جاسم وجهاله صغار ..

ياسر رجع ، وامي وهند بيت جاسم ، جدي دز على سيف بعد مابيبي كالتله على سوايه سيف وشلون طارد هند ،  رزله رزاله غسل ولبس كله هسه تاخذ امك وبيبيتك وترد مرتك وترضيها ..

البنت مريضه وحامل شلون تطردها شلها لازم ، هاي فوك عمله اختك الطايحه الحظ نوب ترجع على بت حسن الفقيره مالها حس نوب حبله ..

صدك اخذ بيبي وهيه درب كله غسلته غسل بالرزايل هو ساكت ، امه مو راضيه تدخل بيت جاسم ، ورفضت تروح وياه .. تالي بس بيبي هو وراحو عليهم يردون هند ..

بالبدايه جاسم مو راضي ، وضال يحجي على سيف يطلع حركته ، بس امي مسكته وكالتها امشي ويه رجلج ، انتي وياه مالكم لازم بمشاكل غيركم ..

لاتهجمين بيتج ، هنه من زمان ميحبنج عاد هسه يكيفن يخلالهن البيت ، فوك ماهجمن بيت جاسم يردن على بيتج . ماخذها وراجع لبيتهم ..

اني ورشيد بعدها بلشنه نرتب لزواجنه ، هو جاب الاخشاب مصريه ، ورجع اثث ورتب الكعده مال الحديقه وسوو  بيت خشب .. رتبه كلش حلوو ..

حتى فراش بيتهم غيره بردات والزوالي والتخم ، رتبه كلشي على ذوقه اني بس اسمع الاخبار من علا وهند ..

رحت فد يوم الظهر يم علا ، كالو جاي تنظف بحدها روحيلها هم تساعديها وهم تشوفين الغرفه .. تمشيت لوحدي ..

لكيتها خطيه كاعده تنظف بغرفه امها من شافتني كيفت ، كالت مالج شغل اني انظف اكعدي دنسولف ضايجه بحدي طول اليوم .

ليش مو جانت سلوى تجيج لو بطلت ..

اوو من زمان كطعت رجلها من يوم خطبتكم .. ورقيه ذاك اليوم من صارت سالفه بعد مااشفتها ..

سمعت عمي حابسها ..

خيه لو كل الحبس هم مايفيد مو تعرفيهن بنات عمج ماينجرعن .. عمج يطلع مناا هيه تفك باب وتطلع مناا ..

كله صوج امها ، مايدتها على الغلط ..

صدكتي لاحافظت على عمي ولا ربت بنتها زين ..

الله يهديهن ..

احسها حوبتج طلعت والله ..

نوبات اكول هيج بس استغفر الله ..فضيحتي جانت الها ايد بيها وتالي ربج وكعها بشر افعالها هم فضحت نفسها ..

اي والله و الي فضحنها حبايبها جانت تثرد بدمج يمهن ..

دنسوالف واسمع صوت طبات كتلها شنو هاي ، كالت رشيد ديشتغل بالحديقه جوه بالبستان ..

شيسوي ..

الكعده شبيج ديغير بيها ، سواها من خشب كال خاف باجر عكبه مطر ماتتأثر ..

اكو عصير بالمجمده بارد  واخذيله كليجه هم بالثلاجه بماعون هسه ساح كلبه من جوع ، من صبح يدك خطيه ...

كمت اوديهن وعفتها تكمل شغلها .. خليتهن بسله مو مال صينيه يوكعن ، تمشيت للبستان هو من بعيد امبين جاي يدك بجاكوك جبير ..

تقربت عليه من حس اكو احد رفع راسه ، من شافني ابتسم يااهلا والله ..

هلا بيك ، تقربت عليه خليت سله على قنفه ..

باوعت عليها حلوه والدوشمه مالتها اسفنج كلش مرتبه ، مو صغيره يطلع طولها بالمترتين و عرضها متره ، باوعت عليه كتله توصى موو ..

اي يابه وصيت عليها توصى دحجي هان ..

شنوو .. جر القنفه من جوه ، طلعت مسطره عريضه صارت بدل قنفه جربايه .. ضحكت يااا شكد حلوو ..

مو باله تصميم مالتها تركي ..

هاي منين تجيب هالافكار ،

ابتسم ساكت عجبتج ..

حلوه شي غريب وتصميم حديث  ...

سكت يشتغل ويكمل الي بيده .. صبيت اله العصير ، اخذ ياكل ويشتغل .. باوعت داير مدايري ، ترتيب من صدك حلوو ..

تحسه انسان مثقف ونازك وهذا كله ذووقه .. تنصدم من تعرف هو انسان بلا شهاده ، او الاصح عده متوسطه ، وكاضيها يامعمل يابستان ، وعنده هيج ذوق وهيج عقل  ...

ابن مدينه بعقله وبذوقه ، وابن ريف بغيرته وعصبيته . تركيبته غريبه ، بديت اميل اله ومااجذب كل ماتقربت عليه كل مااكتشف بي نواحي جنت اجهلها بي ..

ماجنت اعرف يتفاهم شفت شلون يكعد ويتفاهم وياي ويقنعني فوكاها ..
ماجنت ادري بي طيب .. من حجيت وياه وشفته وياه اخواته عرفت من صدك طيب وحنين على الي يحبهم  .

وقاسي ولئيم ونحس على الي يقهرو ويضوجو ، شفت شلون تصرف ويه عمامي ، من باكه حسين طردهم كلهم ، من معمل بدون استثناء ، شكد توسلو بي يرجع ولد عمي لان تهذلو وشغل ماكو ، هو  قفل ابد ...

كطع صفنتي بكلامه ..

وين صافنه هنوو..

ابتسمت .. بس بابا جان يكلي هيج ..

اعتبريني ابوج ..

سكتت ..

كال بالبيت القديم جوه اكو سنادين صغار جيبيهم الي مو ثكال ترى ..

وين يابيت ..

اشرلي بيده هنااك يابه ، باوعت وراي بيت القديم مالتهم ، بلعت ريك متوتره .. كال بالمخزن بس ادشين على ايدج اليمنه اكو مخزن تلكيهن بالكاع صغار اربعه ..

كمت لحيلي اجيبهم .. تمشيت للبيت بس دخلت للمطبخ راسي صدع من خوف ، اباوعله كله تراب ، نفس الكاونتر ، نفس البوري مال مااي ، وكفت بمكاني متصنمه ..

جفلت من دخل وراي شبيج ياابه امشي ..

هاا ..

استغفرالله شكد فاهيه انتي ..

ابتسمت من جذب .. تجاوزني ودخل قبلي للبيت لحكته كبل اني ..

امشي وراه وافرك بيدي ..

هو دخل للمخزن واني عيوني راحت للغرفه جنت بيها ..

عيوني دمعن ، باب جانت مردوده شوي ، دفعتها بيدي على كيف ، انفتحت على حيلها ، باوعت بيها ، كلشي بعده نفس ماهوو ماتغير شي ..

المكان جنت نايمه عليه ، لو الكرسي ،تذكر الالم الي جان بيه وعضامي شلون صلت عليه من الوجع .. كزبر جسمي من الذكره هاي ..

عقدت حواجبي ضايجه من التفتت لكيته واكف يراقب بيه ..

حاولت اداري عيوني واتهرب منه ..

جر نفس كال تذكرين شي موو ..

#يتبع

بنات يعمري تنزيل يومي ، ومن اتاخر معناها عدي ظرف فقدرو شوي هاي شغله  ،  شغله ثانيه ترى اني ام وعدي اطفال وفوكاها عندي دراسه تخيلو الضغط ..فقدرو التمسو الي اعذار من اتاخر فدوه💜

اما قصه جديد سألو ليش ما تبلشين بيها برمضان ، ماكدر والله كلش صعب ماعدي وقت .. والي ماشاف المقتطف منها يروح يشوف نزلته بارحه غلاف 😘