رواية ثأر مهري منهاا الفصل السابع وأربعون 47 - بقلم اسماء ديمير

《《البارت ال43》》

#ثأر_مهري_منها

بقلمي " أسماء ديمير "

باوعت عليه كاشخ بدشداشه البيضه تلج ، وريحه العطر واصله ليمي ، صاح يله تعاي يابه اكعدي بالصدر يمي .. عقدت حاجبي كتله وين ..

ابتسم امشي يابه استعجلي يله ..

بيبي طلعت تمشي وتعدل بعباتها دفعتني اصعد بالسياره يله بالعجل يالغمه شبيج ..

ضحكت شكوو بيبي شعدج ممرتاحه الج والله ..

صعدتني بصفه وهيه ورانه .. انداريت عليه اشرتله وين ..

ابتسم حرك سياره ومشه ، شال جهازه ماعرف دك على منو اسمع يكله طالعين قبلك احنه استعجل يابه لاتتاخرر..

اني بس احوص وين ماخذيني ..

كال : خما ضوجتج الحجيه البارحه ..

بيبي كالته هااا يمه جنك طبت وياها علي شبساع بعت رويشد ..

ضحك هو ،  انتي الاصل حجيه ..

كتله ، ترى دمغتني والله ، بس دخلت للغرفه ، حتى راسي كام يأذيتي ..

افاااا ليش هيج حجيه ..

اسكت يمه لاتحجيني ، اخاف عليها بالقرعان منك ..

هاااا اندار عليهاا يضحك ول ياابه شمسوي ..

- لوت بوزها ودارت وجها على جامه دردم خلينه ساكتين يمه وخلي تكضي شغيلتك على خيرر...

- باوعتله ، وين رايحين ماكلت ..

- اندار علي مبتسم للمحكمه نعقد ..

- رفعت حواجبي  هااا ..

- اي يابه .. عدج اشكال لو شروط لو شي ثاني ..  بيبي نطت لا يمه قابل شتريد غير ستر والعافيه ..

- كتله كليتي مو اتفقنه .. واروح لاامي شوكت ماريد ..

- هذني منتهين منهن يابه .  على اتفاقنه شرايده بعد ..

- هاهيه ..

- مقدم والموخر ..

- بكيفك ..

- بيبي نطت خلي يمه ٥ب٥ ..

- انداريت عليهاا خير بيبي بايعه هايشه ومادري  ..

- عجل شتردين بت حسنه ولج جنج طمعتي بالولد ..

- اي مو اني راعيه فليس ومادري بروحي .. ٥ شنو حجيه لاضوجيني ..

- ضحك هاا راح تتمالخن ..

- متشوف بيبيتك ، والله بدها تخليني بعبا ، وتكلك اخذهاا ماعدها ابد حنيه عليه ..

- عاب حلكج ،  بطنج لو الها حس ، جان حجت وتشكرتني على افضالي بس انتي نذله وتنكرين ..

- هاي مشربتني تشريب ابو شحم ، ومخيسه بطني بي ، ومنيتيني شحال لو مركبه الي الاكل الي احبه ..

هو ضل بس يضحك ، واني وياها تمالخنه بالسياره .. وصلنه للمحكمه نزل هو بيبي ، واني وراهم ..

افر بيدي شفت عمي سلامه و جاسم من بعيد نزلو من سياراتهم ..

خاف جانت عايزه عليج هناء ، وبيبيتج مامسحت بيج كاع زين ، اخوج ماراح يقصر ..

دخلنه ليجوه ، سالفه عقد متعبه حيل فره وتحليل دم ومحكمه وره ثلاث ساعات فضت سالفه وعقدنه ، عمي سلامه بوسنى وبارك النه ، وبيبي ترست محكنه جليت وهلاهل ناس عبالهم ابنها الوحيد ..

حاضنه رشيد وتبوس بي ودموعها تجري ياااا شبيههاا ...

طشت جكليت على راسه وتهلهل واني بالجذب ماشمرتلي وحده ..

تقرب عليه نطاني العقد مبتسم ، هذا الج وهذا الي ، هزيت راسي ، وهااي هم مدلي ايده ..

شنوو ..

فتحتها جكليته ام الككو ..

ابتسمت اخذتها منه شكرا اصلا جوعانه ..

خسه جوع هساع نطلع نتريك بمطعم ..

صاح عليهم عازمكم على ريوك يابه ..

جاسم كله عدي شغل اعذرني يابه ، اروح اني اخذو راحتكم انتو ..

تقرب عليه وباسني من راسي ، باوعتله ضايجه ، كلي مبروك ياعين اخوج ،  هزيت راسي بدون مااحجي ، مقهوره منه حيل ، كال شفتي افتريتي افتريتي وتاليتج لهل زلمه اشر على رشيد ..

رشيد بصفي ، كله قسمتها هااي واناا قسمتها ونصيبهاا ..

كله ونعم منك ابن عمي احلى نسب والله ..

باوسله وكله اشوفك بعدين رفع ايده وراح ..

بيبي كالته اخذ حرمتك يمه واطلعو تريكو ، انا رجليه غدن خيوط تعبت ، بعد مابيه حيل مشي فدوه لعينك ..

صاح عمي سلامه كله والله اناا بعد وراي'شغل راح اخذ الحجيه وامشي وانته خذ مرته واطلعو شوي ..

اخذني من ايدي وطلعنه ، كعدت بسياره اقره بالعقد .. جريت نفس شكد انخطبت بس هذا اول واخر عقد الي ..

تفاجئت من قريت المهر بيت ..

انداريت عليه يسوق .. شنوو بيت مكتوب المؤخر  بيت عقار  شنو هذاا ..

سكت مااحجه ..

رشيد ..

عيونه ..

ابتسمت ..

مكتوب بيت بالمؤخر  ..

اي هاي هيج يابه مالج لازم بي ..

شنو يعني ..

كلمه وانكتبت يابه شلج لازم هساع شتاكلين شردين تتريكين ..

طبت الورقه كتله بكيفك ..

نزلنه بمطعم طلب جاي و بيتزا وبورك ..

اكلت شوي وكتله كليتي ..

يااهل الكليه الي متوكع من السانج ..

انته ردت نعقد بسرعه .. واني اريد سالفه كليه تمشي بسرعه  .

الله كريم بالي ماناسيها والله اخلص الي بيدي ، واروح بنفسي اخلصها الج بغداد ..

هزيت راسي راضيه .. حاسه بامل وطمأنينه صح خايفه من جاي بس عدي امل لان طبعه زين وياي ماغدر ولا عصب واكف بصفي ، وفه بكلمته لحد هسه ..

رجعنه وبالدرب كال زواجنه وره سنويه امي ..

سنويه امك بعدلها اقل الاسبوع رشيد صدك تحجي ..

عليش نتاخر يابه ..

امي بعدني ما كايله الها ولا حتى ياسر ..

نطيتهم خبر البارحه وكلت لياسر راح اخطب هناء ..

شنو كال ..

مالج لازم شنو كال المهم نطيتهم خبر انتي مو راضيه مالهم لازم بعد ..

سكتت .. بعدين كتله امي هسه تضوج لان ماكتلها ..

عود رضيهاا ..

خوش ، بس سالفه زواج اجلها شوي ..

اندار علي'ضايج .. عليش يابه ..

خلي ارتب اموري وانته كمل سالفه كليه ..

شكد يعني انتظر ..

شهرين لو ثلاثه ..

حيييل لابه لاااا اني اكدر سالفه كليه افضها بيومين ثلاثه بالزايد ..

اني سالفه تجهيز يرادلها بالشهر والله مالحك عفيه خلي ناجله شهرين  ..

شنو يابه عرسيش هذا ماتلحكين تجهزين اله سبوع ...

يااا والله مالحك ،  اكو هوواي تفاصيل ، لازم تصير ماريد اخربطها علي ، ماكافي الخطبه صارت بسرعه والمهر هم .. خلي اتهنه بالتجهيزات على الاقل ...

سكت ضايج ويسوق ..

كلت احاول وياه بسياسه .. كتله  رشيد باوعلي ..

اندر عليه ..

حباب مالحك والله تصير فوضى علي ..

جر نفس وهدء دار وجهه يسوق ، شهر ونص ،  بس هناء مو اكثر ماشي ..

هاهيه ابتسمت ..

شكد تردين ..

شنوو..

فلوس ..

مادري خليها بعدين...

سكت لمن وصلنه للبيت ، طبك سياره نزلت هو كلي بليل عود امر هزيت راسي .. هو توه يحرك اني اسمع صوت هوسه بيت جدي ..

انداريت عليه اشرله ...

هو نزل هاا شكو يابه ..

تسمع لو لاا ..

شنوو عقد حاجبه هو يسمع صوت وياي ، عياط وصياح نسوان وصوت بيبي طالع ..

يااا  وصوت امي هذاا هم ... يماا ..

مشيت بسرعه ادخل هو وراي ..

بس دفعت باب مطبخ ودخلت لكيت بيت هوسه دنياا مكلوبه بداخل البيت .. نسوان عمي وبناتهم ونغم و عمي سلامه لازم مرته وهيه تتمالخ ويه امي واصيح وتغلط عليها . وخالتي ترد عليها وتغلط ..

صاحت مرت عمي علي شرفت ست الحسن هاااج استلمي نوب خلته يعقد عليهاا بواكات زلم ..

يااا انداريت عليهاا خير عمه خيرر..

اجت مرت عمي سلامه تصيح وتريد تمالخني .  لاشافج الخير كون يالنذله خليتي يطلك سلوى وياخذج مووو ..

جرتني من حجابي ونزعته كمت اعيط وادفع بيها ..

جرني رشيد  منها ودفعها ، عاط بوجها :- ايدج  يااامره ، لاتخليني اهطرج بجف  بالقرعان ، حدج لهناا عمي سلامه اكضب مرته ...

عمي سلامه جرها وهيه مفرفحه تغلط وتسبه بيه وتدفع بي تريد تلوحني ، جرني رشيد وخلاني وراه  .

- طلكتها ياارشيد طلكت بتي لخاطر هااي ام زلم الي شردت وعافتك ..

تحب الي يذلك موو الله لايوفقج انشالله لادنيا ولااخره هوو انتي منو امج وخالتج مو الي لكفن زلم طول بعرض..

- عمي سلامه يصم بحلكها وهيه مفرفحه ..

خالتي من بعيد تاشرلي بعلامه نصر ، باله اني بياا حال ، عزاا العزاهن التمن علي . والله اباوع عليهن راح يمرعدني ، لا امي تكدر تخلصني ولا خالتي منهن ...

نسوان عمي هم ماسكتن ، نوب يكولن لعمي سلامه ،  شلون رضيت يطلك بتك ، مو عيب شيكولون عالم عليها ، شنو شاف عليها وطلكها واخذ بت عمه ثاانيه ..

سلوى واكفه على صفحه تبجي ، ورقيه بصفها مزنبره وتهز رجلها وخزر بيه ..

نغم واكفه وتبجي تقربت على رشيد ..

ليش ليش اخذتها ، هااا ماكافي سوته بينه ، مو طشرتنه هيه ، مو خلت دخلتنه لعمامي حسره ، من وره سواد وجها ، ليش عقدت عليها وراح تخليها تشيل اسمك ..

باوعتلي مااكافي الي سويتي مااشفه غليلج منه .. مسلمتج بيد الله ..

رشيد كللها مو هيج نغم ، اناا ردتها واني اخذتها وعقدت عليهاا ، لاتنسين انا رايدها ،لاتخلين حجي نسوان عمي براسج ، اناا اخوه لادخليهم بينه ..

- عجل انته مو دخلت هااي بينه ..

- هااي اناا هاويه خيتي لاتكسرين بيه ..

- عجل تكسر بينه احنه خواتك موو ، ماكول غير مشكور ياخوي والله يسعدك .. مشكور عبن فضلتها علينه ..

جرت عباتها ومشت تبجي  ..

اباوع علي وجهه انطعن احمر ، ومرت عمي سلامه،  بعدها تبجي وتدعي عليه ، عبالك كاتله رجلها تلاسنت هيه وبيبي نوب ..

امي كاعده بصفحه ومزنبره معصبه تاوعلي مو راضيه .. خالتي واكفه بصفها ، وتحجي وياها وهيه تهز راسها معصبه ..

دفعني رشيد للغرفه امشي اناا اتفاهم وياهم امشي داخل ولاطلعين ..

مشيت ودخلت امي كبل لحكتني بس دخلنه جرتني من ملابسي ..

- صخام صخمج اي والله شسويتي انتي ..

- شسويت قابل يمه اخخ وربي موتني انتن شبيجن وياي ..

- ولج راح تموتيني انتي موتي على ايدج والله ..

- شسووويت ..

- شنو الي مااسويتي .. طلك بنت عمه من وراج وخليتي يعقد عليج .

- حرررام اذا الي شغل والله كله هوو ..

- جبرج شنوو ...

لا يمه برضاتي ، بس هو راد يطلكها ، وعمي سلامه راضه وموافق ، والله هو كال بساع بساع اريد سالفه تفض ..

- يعني انتي راضيه هاي شوكت وافقتي واقتنعتي ..

سكتت ..

احجي ولج فتتي فادي ، عفت ياسر متمالخ ويه جاسم ، كلت هساع الكاج مكتوله وعاقدين عليج غصب ،  الكاج مبدله وكاشخه ، وداخله انتي وياه ثنينكم نوب عاقدين ..

سكتت خجلانه ..

- احجي يمه ..

- اخذت شور هند وبيبي وخالتي يمه شسوي .. مانطتني بيبي موبايل اخابرج واشورج ..

- هنااا الحجي سالفه شور خالتج مووو .. هنا الحجي يمه هاهيه مادام خالتي بيها معناها اكو مره تبجي ومره تضحك ..

كعدت بالكاع ساكته  ،

- كتلها سلوى صغيره يمه مو مال زواج حتى عمي ، كال بتي مابالغه وجنت ماراضي ازوجها بس استحيت من ابوي وسكتت بوكتها ..

- هاهيه يمه مادام الشور شور عقلج تحملي الي يجرالج ، و ابوها كال جدامهم انا راضي ،  شلي دخل همه ادره بمصلحتها ..

رجعت كالت ، بس انتي شوداج على رشيد ليش شمرتي نفسج هيج ..

- ماعندي مصير غيره يمه .. كعدت بصفها ، شلون ماافرها الكه درب الي اريد امشي بي نهايته رشيد ..

لاعمامي لا اخوي راح يعوفني بحالي ، حلها رشيد يمه يخليهم يحلون عني ، شفتي بره شلون نتر بيهن ودافعلي حتى اخته زعلت وماهمه .. ضل واكف بظهري يدافعلي ..

متامله بي خير ، لحد هاي الحظه ماضوجني والي اطلبه كال عليه تم .. حتى كليه وعدني اخلصها ..

سكتت متخوفه ، شريد يمه غير سعادتجن والله بس خايفه عليج لاتندمين ..

- متوكله على الله اني ..

- ونعمه بالله .. دخلت هند لازم بطنها خطيه ميته تعب ، وراها خالتي بسمه شاكه الحلك ، جنخا متشفيه بيهن سعاده ..

هند كالت ياااا يمه معركه بره شنو قصتها اصواتكم واصله لبيتي ..

امي سكتت ..

خالتي كالتها ولج موو عقدو ، وهنه تخبلن البره اجن هدادات ..

كالت ولج صدك عقد عليج رشيد ..

ضحكت اي ولج ..

طلعتي مو هينه هنووو...

جوزو مني شبيكم ، والله مالي شغل ، هو بكيفه هو مخطط للسالفه ، عباله اشرد مره ثانيه ههههه ، البارحه خطبني بليل ، واليوم صبح عقد عليه ، وليل كله ناطر باب الغرفه خاف اشرد شبيكم ..

خبلتي للزلمه صخام بوجهج ، مرت عمي سلامه ناصبه مناحه بره عبالك ابنها لو رجلها مات ..

على شنو هالبجي والله ماعرف لو مابتها صغيره خطيه ..

خالتي كالت ، امداج ماعرفتي لعد على شنو هالون والطم.. غير خسرت خير يطمسها هيه وعشيرتها .. احسن قسمه بناتها هيه قسمه سلوى ..

شو بيت وحده ولا بابا ولا ماما وبس عده علاا ، وهسه على وجه زواج .. ويضل البيت البتها وحلال رشيد كله بعبها  ..

هسه كله بح طاار وطير احلامها ، شلون ماترديها تتخبل وهيه تفشلت جدام نسوان وجدام اخواتها وهيه تتباها برشيد وبنسبه ..

- قحط شنو ، كبر تتباها بخير غيرها ..

- تفكر ليجدام شبيج ،

هند بس كالت والله حقها ، غير انصدمت خطيه ، بيوم وليله تلده بتها مطلكه ..

كتلها خما هيج اجت تمرعدني ، عبالك بايكه رجلها  .

خالتي كالت مو صوجها ، صوج الزنانات الي زنن براسها وخبلنها ، مو شفتيهن جايات وياها يهدن .. همزين ماحطنه وطبننه والله .. ضلت تضحك تكول حميدوو يفزعلي اني شحدهن يطخن بيه ..

امي لوت حلكها ، هو لعد على شنو هالهوسه ، التمت كلها من وراج انتي وخالتج ، وكلها مغتاضه منجن .. هذا عايف مرته ويطارد وره خالتج وهذت رشيد مطلك سلوى ..

اسمع اصواتهم بره خفت وجن العاصفه هدأت .. فتحت باب اشوف ، لكيت بس بيبي و مرت عمي علي بره يحجن ..

دخل ياسر مغندب من شافني باالباب اجه بتجاهي معصب ..

وخرت عن دربه دخل للغرفه . تعااي شنو قصه ، شسوالج جاسم  .

- ترى فحم كلبي ، اخوج يجذب ، وصلت بي يحلف انتي موافقه النذل ..

- كول يالله اني صدك موافقه وبرضاتي ترى والله ..

انصدم ، بهت وجهه شنووو ولج شنو برضاتي ..

- اي والله ..

- لاتخافين يابه ، قابل راح اكتله خلاص ، احجي شلون عقدتوو جبروج موو ...

- لا لا تعال اكعد يمعود وجهك دم لا يرتفع ضغط .

- كعد بالكاع ضايج بصف امي .. احجي ..

بكيفي والله اني وافقت ، نطيت شروطي وهو وافق وهاهيه تفاهمنه ..

- ولج شنو تفاهمنه ،  هذا رشيد تعرفين رشيد منوو لو لاا اذكرج لو لااا ..

- ماناسيه خويه والله ، بس الولد ماعال وياي ولبه طلباتي حتى كليتي موافق عليها ..

سكتت محتار يباوعلي بريبه  ، بداعت ابوي محد جابرج ..

- لا والله ..

- راح تندمين يااخوي ..

- هند قطعته كوول الله شبيك يمعود ، هاي مو اني عايشه وياهم والله حسن عيشه ، بعد ماعزلت مرتاحه حتى روح ردت بيه ..

كيف ماهيه رشيد يباوع لحلكها ، وماعده احد ، بيته فارغ عدا علا ، وهاي حتى خرسه الها حس وهيه لاا .  اختك بيتها وحد وكليتها وافق عليها بعد شنوو .. ويريد بس رضاها .. كول الله ودعي الله يوفقها ..

سكت ضايج وخايف علي .. كال ليش ماحجيتي من الاول من فكرتي بالموضوع ..

بيبي مارضت والله اخذت جهاز مني خافت تكول لاتتفركش سالفه واخوتج يتكاتلون .

- بيبيتج راس البلا تدرين لو لاا .

سكتت ماحجيت بعد ..

هو وامي مو كارهي لرشيد بكد ماخايفين من جااي .. احسهم ممطمنين ابد ، بس ماكدرو يحجون بعد الكل مقتنع وراضي ، بس اشوف ، نظرات ريبه بعيونهم ..

بالاخص ياسر ، يحس بالمسؤليه اتجاهنا لان يعرف من بعده احنه نضيع ومالنه احد وجاسم مابي نفع .

الصبح اخذ امي وطلع كال عدي شغل ومستعجل ، عمامي حسو بي ضايج وبالاخص بيبي بس كالت من يشوفج مرتاحه يطمن ويهجع ..

امي حاجتها لبيبي كالتها رجعيلها جهاز ماله داعي بعد ماخذته منها ،  مو خليتوها توافق على رشيد بعد عليش حابسيها ،

هاي مو حاله بنت شكبرها ماخذه الجهاز منها ،  شنو هي مراهقه ..

بيبي ماعجبها الوضع بس سكتت كالتها توكلي الله كريم يله وراج درب طويل ..

طلعت وهيه ضايجه .. بيبي ندارت علي هاا يالجلبه شكيتي كبل الامج علي ..

هاااك استلم بعد ماتصدكين تلكين فرصه دتهينيني احد مسلطج علي انتي حجيه ..

عاب حلكج ، امشي ولي جيبي وصله وماي واشطفي البيت ..

عفتها ومشيت للمخزن اجيب غراض تنظيف ، البيت زباله اصلا عبالك مفجوره بي عبوه ..

من هوسه البارحه باين مرت عمي متعمده ماتنظف ، حتى تكسر ظهري بي .. بس ماكلت لاا تجفيت شر اصلا هسه معتبراتني اني عايله بيهن ..

مشت الايام هيج ،  اجه رشيد ونطاني فلوس الجهاز وكلي بلشي جهزي ، سلمت الفلوس لخالتي سعاد تجهز الي من بغداد ، والباقي كتلها تنطي لاامي ،  حتى جهزلي مفروشات للغرفه ..

لان اعرف الطلعه عليه ممنوعه ، وروحه لبغداد مو بالسهل ، هند حملها ثكل خطيه ماتكدر بعد تضغط على روحه وتجي وتساعدني ، وراها سوه عزيمه رشيد على سنويه امه وعزم الكل ...

بيبي اخذتني وراحت ، جنت خجلانه وخايفه هم ، بس رحت لان واجب اعتبر مرته ، بس مستحيه من نغم خاف تكون رده فعلها قاسيه ..

مشيت ولابسه اسود واتعثر بخطواتي .. دخلت لبيتهم من بعد سنين تقريبا سنتين مداخله الهم .. من حياه بابا ..

البيت هوسه وكلها موجوده ، الاكل مشتري جاهز لان شفت المعلبات وصواني مغلفه خاليهن على الميز ، حتى سطوله البن مشتريهن بس يصبن .. اجت علاا عيونها حمر دم من بجي ..

عقدت حاجبي ضايجه دفنت نفسي يم بيبي الي كعدت بالصاله يم مسجل القران ، لازمه سبحه وتسبح ، دنجت اني وفتحت قران التهي بي واسوي شغله زينه على الاقل ثواب الها ..

اسمع بس اصواتهن مهامسهن ، رفعت عيوني مره ثاني علاا دموعها تجري ، شكد انقهرت اني اعرف كلش زين شنو يعني يموت عزيز عليك وتخسره ..

ماتجرأت اتقدم لو اواسيها ، نسوان عمي يحجن عليه بوجهي ، تكللها تكتل الكتيل وتنمشي بجنازته ام عين الكويه .

منو امها فرخ البط عوام خيه عبالج مثلي ومثلج ..

حظهن مو يكول حظ الكح**  كاعد ..

تسممت ماكدرت اكعد اكثر واكابلهن .. كمت لحيلي صاحت بيبي وين ولج ..

للحمام بيبي حرام ..

دمشي روحي ...

وخرت من يمهم ضايجه ، مشيت اطلع ، تلكتني بالممر نغم ،  من شافتني خزرتني ودفعتني ودخلت ليمهن ...

انداريت عليها الى متى انضل هيج ، لحد شوكت تضل كارهتني ، هاي بعد كم يوم اكابلها واكعد خما تكطع رجلها من بيت اهلها مثلا ماتجي بسببي  لان كارهتني ...

دخلت للحمام غسلت وجهي وطلعت ، جهال تارسين بيت صياح وعياط ، بيت اصلا هوسه من حجيهن وصياح الجهال ، وصوت القران .. بس بعد كلمن ونفسيته ..

اكو من يحجي ويلغي ويشيل خطيه العالم ، ومعتبر هيج مناسبه مكان دسم لنميمه وحش بالعالم وطعن بيهم ، واكو من صافن ويذكر احبابه الي راحو ، وهو مر يوم من الايام بهيج موقف ويلكاها فرصه لفرغ دموعه وحزنه بحجه الموته ..

والي يكعد يقره قرأن وايمانه قوي لو يسبح ويهدي للموته ، البشر اشكال والنفسيات مختلفه ، هنيال الي راضي ضميره وربه من بينهم ..

توه وصلت الدرج سمعت صوت فوك بالطابق ثاني  تعاي جااي ..

رفعت راسي اشوف منو لان رشيد ..

باوعتله اني ..

هز راسه اي اشرلي اصعد  .. وكفت بمكاني ماتحركت ..

هزيت راسي لاا ، بيبي هسه تصيحني  ..

نزل بخفه وثكل تعبان ، مد ايده الي ، استحيت ضليت اتلفت بس جهال موجدين يلعبون ..

مديت ايدي بتردد لزمها حيل وجرني وراه لفوك ..

بلعت ريك واني اصعد .. دخل للغرفه جارني وراه ماهدني ..

كتله بيبي هسه تسأل عليه ودورني .. سد الباب ومارد جرني عليه حظني حيل ..

استغربت حركه حتى ماتحركت جسمي كله كزبر مستغرب ..

مامتعوده عليه ابد ، رفع راسه ورفع حنجي يشوف رده فعلي .. شافني عافسه وجهي ..

ضجتي ..

لاا ..

عجل ..

مستغربه شوي ..

تتعودين ..

سكتت ودنجت استحيت وجه قريب عليه حيل ..

رجع رفع وجهي مقابيله ، لزم فكي بيده ، مثبت وجهي عليه .. عيونه تعبانه ، احس بيهن فارغات ومتألمات حيل ، شفت الوحده بيهن ، حقه يحس نفسه وحيد ، شو لا اب والاخ يسنده ...

همست :- كتله شلونك ..

ابتسم ابتسامه خفيفه  ..

وجهك تعبان ..

حاجني بحه صوت تعبان :- اول مره واحد يسألني شلونك من كلبه لان حس بيه ، مو لان كلمه واجب ...

جريت نفس ، احس بيك ، اني هم فقدت بابا ...

انا ابوج ..

ابتسمت ، الله يسمع منك وتصير مثل ابوياا ..

وانتي صيري امي هناء .. صيري واذا ماصرتي حااولي ..

انشالله ..

ماناويه تفلين شال لو على حظي التزمتي ..

ترى اكلت طن كتل من وراه .. تذكر ..

سكت ، لحد هسه بالج ..

درت وجهي العالم جوه ترى عيب ..

تعرفين العيب ..

رفعت حاجبي هااا ..

هز راسه جايتني بجبه سوده ضيكه وتكولين عيب ..

يااضيكه ترى عريضه ..

بالنسبه الج انا فوك وشفت شنو لابسه جوها ...

هاي شنوو ..

دروحي يابه امشي اطلعي مانريد نستعجل وهم عيب من الله وامي ماريد اجفص بيها امشي اطلعي ..

وخرت من حظنه كووه لازمتي حيل كوه فكني ..

دفعته كوه وخرت مذيت للباب افتحها انداريت عليه عيونه عليه يلمعن .. ماعرفت شنو هاي النظره .. الا بعد سنين .. 

كملنه الثواب بالشافعات وطلعنه من يمهم ، بعد ماسوتلي مرت عمي سلامه حفله ، من الاتهامات وانو اني سرقت نسيبها المنتظر ، نوب لمحتني رقيه نازله من فوك ، بس بقت ماتهمتني اني حبله منه ...

مشه اليوم ، واني بداخل المخزن اضحك من تذكرت البارحه منظرهن ، ومرت عمي سلامه شلون تلطم وتبجي ، عبالك عدها ميت .. اختفت ابتسامتي واني اتذكر دموع سلوى .. خطيه والله ابد موقصدي اقهرها ..

اني مالي نيه اذيها ، اصلا احبها ، بس'صغيره والله طفله كلش ، هيه مو باله وجان ناوي اصلا يطلكها لان مو مناسبه اله وابوها هذا هم رأيه ..

بس اووف من جهل امها الرعنه ، الي زرعت رشيد براسها للمسكينه ،لو رقيه الحقيره ، عسى القهر بكلبها ام كلب الاسود ...

بلشت بالصاله تنظيف مسح وجلف ، تعلمت نداره بعد عناء وبعد فهاوه طولت سنين ، بحيث ماترك المكان اذا مااشوفه يلج ويلمع ،

وبيبي متقصر ، تمشي وتاشر وهاي وهااي بعد اجلفي ذيج ، شيلي من جوه التخم ونظفي ..

تخلي اديه يخدرن من الالم يله تتركني .. واكفه اعصر بالوصله وبيبي طلعت للمطبخ اسمع صوت مرت عمي علي تلكللها حجيه اسمعي صوت بره شنو هذاا .. 

بيبي طلعت تمشي بسرعه مستغربه صوت عالي بس ممفهوم ..

لحكتها مرت عمي تركض .. اني بمكاني اخر همي قابل شكوو حتى لو اكو شي منو يقبل اطلع والله يالله  ،،

صوت قريب جنه ، ترددت اطلع بالاول ، بس من شفت بيبي ومرت عمي ركضن ، ..

خفت اضل وحدي ونوب صوت عالي ، مشيت بسرعه وكفت باب المطبخ اشوف سيف يركض لبيت جاسم وراه امه ..

ياادخيلك ربي شبي بيت اخوي ....

#يتبع

توقعاتكم بنات 💜

ملاحظه .. اكو قصه جديده راح ابلش بيها وره مااختم هاي قصه ،  وانشالله ابدي بيها وره رمضان .. نزلت الغلاف مالتها ومقتطفات منها روحو شوفوها وصوتو عليها فدوه ...