رواية ثأر مهري منهاا الفصل الثالث عشر 13 - بقلم اسماء ديمير

《《البارت 12 》》

#ثأر_مهري_منها

بقلمي "أسماء ديمير"

- بيش تفيد عصبيتك اذا صارلها شي ..

- جده يرحم اهلج انا كتلها لاتلبسي ليش الكلبه تعاند .. حقيره مو بعينج انااا مو رجال بعينج وتاخذين كلمتي ..

امه تصيح :- كتلها والله بس ماتاخذ الكلام حيل بيها ..بو زايد ، انداريت على امها وانتي خيه ماحاجيتي بتج هاي'شوفي بعينج زلمتها متاخذ بحجايته وتحترمه ترديها تحترمنه احنه ..

وامها :- تصيح وجع كافي تبجين شلون تسوين هيج وتعاندين ، تردين ابوج ياكل وجهي على ماعرفت اربي ، وبنتج تعاند رجلها ، انا مااعاند ابوج هالكبرني يكومني بعيطه ويكعدني بعيطه ، بعدجن بكد القندره تعاندن وتكسر كلام الكبار ..

بكلبي كتلها .. انتي عاجبج الذله ..
هيه ماتحجي خاتله يم بيبي وتبجي ، كالته بيبي :- ول ياله هيثم يمه وانااا اكول عليك العاكل الزين .. هو منو غريب هان و هيج فرت على البت ..وسفه عليك ترزلها على لبس وهيه بيت جدها .. غير سترها احنه .. وهيه فرحانه ويه البنوات .. ام ولدك هاي يمه هله هله بيهه ، ولا تاخذ حجي امك من نوزك ، بس جدامك تتراجف يم ابوك الا هيه بالقرعات تصعد فوكاه جوه بحجرتهم ..

مرت عمي سلامه شهكت  طبت على صدرها :- اناااا افااا يعمه هاي من شوكت صاعده على سلامه يمه غير يكطعني تكطع ومافك حلكي ، وبالله اذا صاح بالبيت اكوم اتراجف ترجف منه ..

بيبي هزت بوزها مو عاجبها وممصدكه :- ممم هجم بيتج كون يالجذابه تتراجف عودينه ..

هيثم عافنه وكف يم الباب ياشرلها يله .. كامت لبست عباتها وراحت وياهه تبجي .. طلعلها الفرحه سم وزهر عمه بعينك ...

تغدينه وطلعنه للبغداد .. عفنه هند ورانه تبجي .. رادت زواج وهسه تبجي .. استغرب عليهن ميفكرن بهل الحظه وبهل الاحساس من يوافقن على زواج ويكتل نفسهن .. غرررريب صراحه ..

السبعه من صارت اجرنه كوستر ورحنه كلنه حتى خالاتي .. ميس وياسر واحد كاعد يم ثاني عادي بلا مستحه .. من يمي ضجت .. انقهرت على علا لاتشوفهم وتشبع قهر ..

كاعده وراهم .. واشوفه مد ايده على ايدها يلزمنها .. ضليت احوص .. بس ماسويت شي راقبتهم .. اشوفها تقبل لو لا .. لزم ايدها .. صدت عليه ابتسمت .. وشبكت اصابعها بصابعه!!!!!

لاوالله البنت قليله ادب .. هاي ادب سزز مو اني .. من وره مواعده وحده وشفته حتى اكله ننخطب ..انركع راسي بالجام و اجتني نوبه اختناك لو مالله ستر جان رحت بيها ، ونكتبت قطعتي مرحومه بنت حسن ام المواعده ..

وهاي تتمضحك وهيه تثبت ايدها بيده محد فك حلكه وياهه .. هيه شبيها دنيا عوجه هيج وياي .. خوالي فري وعمام غضب اسود .. تعااي يهيثم شوف .. تحاسب مرتك على بنطرووون يحظييييييي ..!!!!

مرت سبعه مرور بطئي عمامي معاجبهم خالاتي الي اجن شعر اصفر ومنثور وهيج من جذب ذابات شالات .. ولابسات مناظر شمسيه ومكياج صارخ .. وبناطيرهن و فساتيهن القصيره ..

عدا عمي حميد اباوع عليه فهه على خالتي سعوده وطاير وراهه ، صفنت عليه خير ياطير وين هيبه الشوارب والشيب ، لو يم سعوده نسيت حتى جدي مو بس شيباتك

خالتي بطبعها اسبورتيه .. وتضحك للهوه صوت ضحكه يجيب تايهه ..

شافت عمي كل شوي يرفع عينه عليها ويدنج ،  ويفر بالسبحه لو يبرم بطرف شواربه الي نازلات على حلكه،  معلن عن اعجابه بيها .. والاخت امبين افتهمت ..

كالت واني اكول نسيب حسنه حلو طلع ابو مقاصر اسم الله عليك ،  عيني بارده كون  ..
شو هذا حط اديه بجيوبه والبسمه وصلت لاذانه واخذها روحه ورده يفتر بطوله الريان جدامها  ،  وياخذ ويطي وياها .. ومصدك نفسه ..

ويكللها منا وجاي مرولنه شوفت عينج الجو عدنه يرد الروح شلكم بغداد وخنكتها وازدحاماتها ..

ضحكت وادري بخجلها :- لا والله صدوك الطبيعه ترد الروح هنا ، مره لخ اجيب البنات ونجي على صيف ..

:- ميت هلا وميت مرحبا بيكم اذا ماشيلكم بيوتنه تشيلكم عيونه ..

منطلق كلش وياه وصاير اجتماعي ، ابو الفواين ، صح همه طوال وضخام وحلوين بس مر عليهم الوكت وغبار الزمن علم عليهم .. يعني كبار .. على شنو هالزحف عمييييييي عيب  !!!

طبينه جوه وهذول بعدهم يسولفون .. عيني عليهم ..صدك عود ..!!! اريد اصيح ميس تصيح بامها ماكو اختفت .. وميساء هم ماكو ..خرب ..

امهن جاي تراهق الحكوو بس ماكو  احد انتبه .. طبيت وراهم .. محضرات حفله ..

نزلت هند بدله جويتي ولابسه ذهبها طالع لون حلو هو والذهب يخبل .. دك غنا وركص واجت ناس غريبه هم تبارك نسوان ، عمتي نشام تغني والبنات يطبان على طبله والباقي يرددن وراهن ورقيه بوسطتنه تركص وتتمايل ، ناثره شعر اسود ليل وهيه متروسه طالعه حلوه  ..

بنات عمي ينكلن بالهدايه الي ترسن الغرفه ، مرت عمي حميد  كالت ودنهن بغرفتي اني عود اقسمهن بينه مو تودنهن لغرفتها ..اني الي اوصل ناس مو هيه ، هنه حقنه بس بعدها عروس ماريد اخرب فرحتها ...

هيج جمله وتفصيل كالتها بوجهنه .. خالتي سعوده سألت عليها .. كتلها هاي مرت عمي حميد .. فرت ايده كالت .. ويييع محلوه ، وحتى اسلوب ماعدها ،  لج عيوني هو يخبل هااي شنو جنها عجوز مبهذله وتخوف اووي ..

:- لا خاله ترى هيه اصغر منه بخمس سنوات  بس متعوبه من الخلفه .. والخدمه مالتها الهم . وشغل البستان . وجده هاي لاتنسين مخلفه كومه وعدها احفاد .

:- واذا ياعيوني احووط كوحله حمره .. البس ملابس مرتبه ، فستان قفطان صخام عزاا  خما لابسه دشداشه كشمير وجايه وملغمطه حنه ..اديها ورجليها اووي  .

:- سكتت شاجاوب صح همه هيج بس ماحبيت احجي عليهم .. يبقون عمامي .. مااحب احد ينتقدهم ..

:- كتلها هاي الماتعجبج ..عدها ست كيلوات ذهب .. من عد الي وزعتهن على بناتها بالثلث كيلوات ..

- يااا صدوك هااي عدها هيج ، منين جابتهم هااي ..

- والله خاله شبيج .. ابوها عده خير وعمي هم ..ومايشترن ملابس ولايرحن صالونات يكولن خلاكين .. يشترن ذهب يفيدهن للوكت ..وهل تشوفها  بس وزنها ذهب ..

- صدوك دشوفي صدرها مغطى بالباون .. ووبتوت والحجول ..

- اي هنه يتباهن بالذهب مو بالبس ..

- الله يطي جوز لاماعده سنون .. رجال يخبل ومكنه وهيه وجهه وجهه جعب جدور  ..

- والله ياخالتوو لو اوديها للصالون الي ترحيله كل سبوعين ، تطلع احلى منج ،  بس هنه ماعدهن هوس بالهل شغلات ..

- يااا ولج منو هااي تطلع احلى مني ، هاي وجهه الفنجوس عووع ، دمغتني براسي صخام ولج السانج اكوصه ونبي . تجر الحجايه جرر  ..حتى غفيت ماخفت والله هههههه ...

للمغرب يله رجعنه .. نزلنه يم بيتنه و هنه وزعهم ابو الكوستر لبيوتهم ، لمن نزلنه شفت اسحاق واكف باب بيتهم ، بأين فاتح الجبس مال ايده ضاله بس رجله ، ابتسمت الي من بعيد دخلت كبل خاف احد يلكطني  ..

وره سبوع اندكت الباب العصر ،جان يوم جمعه ، بابا بالمحل وياسر عند دكتور .. تفاجئت بام اسحاق و سجى و مره جبيره وياهم .. معدتي عصرتني من شفتهم ..

استقبلتهم امي وفتحت صاله دخلتهن ليجوه،  دخلت للمطبخ واسمع اصواتهم وسوالفهم ويه امي .. عرفت اسحاق ماكدر ينتظر بعد .. بس سجى شلون بيها والله خجلانه منها ..

اجت امي كالت ولج حظري الضيافه .. شبيج صافنه ..يحظي ماعتمد عليج انتي .. جانت هند شايلتني اثاري...

رجعت عليهم .. وخلتني بصفنتي وخوفي من رده فعل اهلي .. حظرت العصير والكيك واكو كطع محشى هم خليته  الاصلا جاهز بالثلاجه خلفله على بابا مشتري قبل بيومين للبيت ، جهزته واستحيت افوت وادخل وتتوجه الانضار اليه .. لان معنيه اني بهل زياره .. وخاف امي تعرف لو تشك ،

تشجعت و دخلت منزله راسي ، سلمت بصوت كوه طلع ، حطيت ظيافه على الطبله ، اسمع المره تكللها لام اسحاق هيه هاي ،  هناء .. صلاوات اكول الولد خبصنه من صبح لي هسه امشن وامشن اخطبن ..

فزيت من حجايتها رفعت راسي اباوعت لاامي ،  امي وجهه جامد ومامبيتسمه اصلا ،  عرفت اول انباء الحرب بينت .. نطتني نظره كل بنت تعرفها نظره البسيطه اصبريلي ، اني شفتها هيج ورجليه صارن خيوط والساني انكعد ..

تركتهم وطلعت بسرعه اهفي على وجهي ، دخيلك ربي ، سهلها من يمك ، امي عزاا امي اليوم تفترسني  ..

. اجت وراي سجى .. مجتفه ايدها وتهز برجلها .. كالت ..تبرررير يله بسرعه سمعيني ..

كتلها :- والله استحيت اكلج وداعت صداقتنه .. شأكلج يعني احب اخوج ..

:- لا عيني لاتكولين اصلا اعرف بيكم .. مفضوحين فضيحه الا اله الا الله .. هو يفز بسماع اسمع وانتي من اجيب اسمه تتصفنين .. بس عايفتكم بمزاجي ..

:- هاااا

ابتسمت  :- اي والله

- ههههه يالنذله  تلعبين علينه ..

:- لا والله بس ردت واحد بيكم يحسسني باهميتي بينكم ويكلي واحد يعبرني ماكووو صفكت ايد بايد انذااال  .. لو على الاقل اصير مرسال حب .. بس ماكو حتى بهاي اني محد يفكر بيه ..

:- هههه ولا يهمج منا وجاي اتصيرين .. طاح المستحه بعد ..

:- اي مو مصلحجيه .. مو جديده عليج ..

:- ههه ليش دزكم اسحاق ليش مكلي ..

:- ولج من اسبوع هو ينك على اهلي .. وابويا يكله اجمع جم فلس واتزوج .. هذا جلب اخطبها واكعد الم عود .. وره ماتتخرج من سادس يله نتزوج ..

:- حبيبي .. رحته فدوه مستعجل ...

:- حبايه بعينج ولج ، شو ماعندج مستحه انتي مو اني واكفه ..

:- هسه منو انتي والله يالله ،  دسولفي الله عليج كملي ..

:- شأكمل .. تالي امي كالته ادز على خالتك يوم جمعه ونروحلهم عود ..

كعدت تقصلي سالفه كلها واني صافنه ، سرحانه بكلماتها بدي اكللها اخذيني وياج لبيتكم لو ما العيب والله ، بس مجرد مااذكر بس يطلعون تستلمني امي تنسد نفسي من دنيا مو بس من اسحاق ، تذكرت بابا لو جاسم يمااا ..

راحو همه العصر ماخذين كلمه من امي يجي ابوها وهو يقرر ، جنت طايره بس خايفه ، حاولت ابين عاديه ، بس امي تراقب بيه ، مبينه حست عليه ..

بس طبت باوعتلي تدرين موو ولج بعدج بكد الفصمه شالت السراحيه على سنك تريد تهبدني بيها ..

طفرت للحوالي اعيط :-  لاااا والقران ماعرف وداعت بابا ماعرف صخام ماااعرف شبيج يمه ..

ولج جايات بحيل صدر عبالك متحظرات نكللهم كبعن واخذن والولد حاجي بيج يمهن ..

- يااا واني شعليه وداعتج مالي ايد بالي صار ، والله هاي شنو ،  ياهو الي يجي يخطبني منا وهيج تسوين وياي هيج وتهدين عليه تضربيني ، لو عندي علم اكلج قابل اخليج على عمه عينج ،  جان اني كشخت ولبست وتعطرت مو شافوني بالتراك البيت جني خبله لابسه ملابس من كونيه طحين ..

هيه شوي هدأت وسكتت ولي من وجهي يجي ابوج واشوفه كثرن خطاطيبجن بنات حسن بكد نعال ولي منا تريد تلبس وتتعطر ..

من رجع بابا العصر من محل اني طفرت لغرفتي ، خفت واستحيت منه هم ، بس بالكت يسالني واني مااعارض ويفتهم قسمتي هاي حتى لو اضل مخطوبه سنتين ثلاثه شنو يعني  ..

بس تفاجئت بابا ماحجه ولا سالني ولا شي  من طلع من غرفه ، ماما وراه هم ساكته ..كاعدين على العشه وهم عادي .. اني اصلا مارفعت راسي ، كلت هسه يحجي هسه يكول ..

محد عبرني سكتت وخنست ، وراهه سكنت الحولي وصاله اريد يصيحني لو يحجي كلشي ماكو ، قدمت جاي و كعك اله ، تعللنا ضحكت تشاقيت ويه ياسر يمهم اريد ينتبهون ، عبالك مايشوفوني ، استحيت من نفسي اكوم انخمد احسن عفتهم وصعدت ..

ثاني يوم عادي اهلي ولا اي شي .. عبالك محد انخطب .. هاي شبيهم ..

لحد مادكت عليه سجى العصر ، كالت امج داكه على امي وكالتها ابوها مراضي .. يكول البنت بعدها صغيره واريدها تكمل .. قبل كم يوم تزوجت اختها .. نوب انطي ثانيه .. لا ماانطيها ..

سديتها منها .. برغم اعرف بيهم مسبقا ميرضه بس .. شبعت قهر .. كعدت بغرفتي للمغرب يله طلعت . ضايجه وميته قهر ..

نزلت لكيت امي بالمطبخ كاعده على الميز تلكط تمن  .. هاي شلون احجي وياهه .. شاكللها يعني مثلا ليش رفضتو واني اريده .. والله لحتى تكفخني بطاوه ..

ضليت احوص يمها .. اروح منا واجي منا .. واكلب بالثلاجه والكاونترات واباوع عليها ..اريد اسالها وارجع واسكت .. تالي تجرأت وحجيت ..

اكول يمه على سالفه ام اسحاق شكال بابا ..

رفعت طرف عينها عليه .. سكتت مردت .. هو اني عايزه تغليس يعني ..

رديت حجيت :- هاا يمه ماكلتي شكال بابا ..

امي :- اكول هنو يمه انتي مو خاليه .. بس اني ساكته اكو صغيره ومتعرف صح وغلط .. بس الي تسوي غلط ياامي .. بعدج صغيره ودنيا جدامج .. لاتخلين هيج شغلات براسج .. لا اخلي جاسم يطلعها بطريقته لو اعرف اخلي يحفر هالراس بسمار  .. اشرت على راسي ..

بلعت ريك .. كتلها ليش هو شكو  .. قابل شكلت اني ، بس تردين حجه عليه ، ناس خطبت ، وردت اعرف شصار ..وانتو شنو كلتو للجماعه ..

- يعني ماتعرفين ، تردين تقنعيني ماتعرفين شنو ردينه على جماعه ، والتلفونات تركع عدج بالغرفه .

- سكتت امبين خلقتي صدك فاضحتني ، وتليفوناتي الي فد يوم تسبب بقتلي ، حلفت بعد سالفه موبايل اخلص منها لو اقلل شكد ماكدر

حجيت برتباك :-  زين ليش رفض بابا ...  هو شنو ناقصه الولد .. شو جوارينه و خريج وخوش ناس ..

:- اي صدك وانتي صغيره وبعدج جاهل .. وماتعرفين تسوين ريوك لنفسج .. شعدج بالزواج ولج غبره . لاتخليني اكوم افتح راسج بالصينيه .. بعدج بكد الفصه وتردين زواج واني اعتب على هند الي ازوجت توها كليه ..

ضلت ترزله بيه وتحجي معصبه .. سكتت وانطميت على حلكي .. بعدني صدك فصمه واريد زواج .. بس خما انضل هيج بالختله والله ماتراد .. انخطب وزواج اناجله .. احسن ما نلزم فد يوم ونصير احنه اهل الغلط ..

راسلت اسحاق بليل .. مو احسن مني .. بس كال مالج شغل .. اني ادز عالم وزلم خيره على ابوج والله كريم ..

:- مايقبل اني اعرف بابا ..

:- على شنو ميقبل هو بكيفه ، والله لو اعرف اسكن شارع وباب بيتكم ،  واذا تطلب اعرف انهبج من بيتكم ..

:- ههه مو هيه تايهه الك لو وكاله بدون بواب يمه .. اني ماقبل تسوي هيج .. هذا بابا حبيبي .. ماقبل عليه ...

:- اسكتي لج .. محد حبيبيج غيري فهمتي .. اذا ماخلوي حل اسوي هيج ..

:- هاا ، هاي صدك تحجي اسحاق .. عود انته دارس ومثقف .. تخطف بنات العالم ..

:- ولج من حركه كلبي انشالله ماوصل لهل مواصيل .. انتي اوكفي وياي ولاتنطين بيه .. واكيد ماراح يرفض من يعرف بيج رايدتني ..

سديته منه .. وخابرت هند بليل وحجيتلها .. من صوتها مو زينه امبين باجيه .. بس سألتها ماحجت .. شكيتلها وكالت يحبج يحاول مره وثنين وثلاثه .. بعدج باول الطريق ..

سديته منه متأمله خير بالجاي ... وصدك وره كم يوم.. خابر ابو اسحاق ابويا .. جنه كاعدين بالحولي كلنه وجاسم جاي يمنه يتغده ..من سمعت هلا ابو اسحاق .. كلبي مردني .. جيت انهزم .. بس كلت بس اكوم كله عبالهم اني عدي علم ..

اسمع يكله هلا بيكم .. ميت هلا شوكت مايجبكم تفضلو .. اني مدنجه وجهي احسه نار .. امي رفعت راسها عليه و لوت حلكها ..

سدت منهم وسكت .. ماحجه .. سأله جاسم عن سبب الاتصال وشيريد .. كله يربد يجينه خطار ودز خبر ..

جاسم :- كله ماتعرف ليش يريد يجي .. خما اكو شي .. شعجب ..

كله اي يمكن يريدون اختك لابنهم ..

هذا فزز .. منننو شنوو يرودن منو المن ..

كله بابا .. مادري بس احتمال لان قبل فتره دز نسوان ورفضنه وهسه ابوهم كال انريد نجي .. جوز على هاي سالفه .. اني كمت كبل .. خفت لاتكب العيطه واني وجهي فاضحني ..

كاله يابه صدك جذب ليش ماعرف اني شنو طرطور .. العالم تجي تمشي علينه واني مادري ..

كله بابا .. هسه هيه جيه نسوان ونسدت بساعتها .. وجيه زلم هاي مامتاكد منها .. يجون و نفهم منهم .. على شنو  ..

صاح .. حتى لو يجون سد سالفه يابه ..كللهم ماعدنا بنيه للزواج .. عمامها رايدها وخلص مننطي للغرب ..

#يتبع

نجمه 🥰