رواية ثأر مهري منهاا الفصل الرابع عشر 14 - بقلم اسماء ديمير

《《 البارت 13》》

#ثأر_مهري_منها

بقلمي " أسماء ديمير "

غثني كلام جاسم .. بابا يحجي بهدوء وجاسم هاج علينه جنه اعصار ،  حجه وياه يمعود بله عليك ممتاكدين من جيتهم على شنو .. وهو جاسم  لاااا جاين يخطبون ماطول صارت بيها زلم .. ماطول ابو دك معناه ناوين يمشون ..

ماما حجت :- وياه احنه مموافقين شبيك تصيح وتنتر .. بعدها صغيره وخلص فضت راحت .. هالصياح على شنو بعد ياامي ..

ياسر :- كله يجون ونتفاهم وياهم ..ان جان خطابه .. نكللهم صغيره ونريد تكمل دراسه .. والا والله همه خوش ناس ميرفضون وسمعتهم طيبه والولد خريج ويشتغل .. بس بعد اجو بوكت غلط .. وهيه هناء صغيره ..

جاسم سمعه لو كب للستار ..شنو خوش ناس من كل عقلك .. خوش ناس على نفسهم .. هناء عمامي رايدها .. واجلنه الموضوع احنه حتى تخلص دراستها .. الي مالها اي فايده  .. شنو بعد خوش ناس .. اي خطابه نرفض ونكول رايديها عمامها ..

بابا كله :-  سد الموضوع هسه يجون والله كريم .. وسالفه عمامها رايديها تنساها اختك مراضيه بيهم .. فسالفه عمامك تسدها ماتحجي بيها جدام احد .. مو تمشي وتحجي اختي رايدها .. افتهمت ..

امي :-  هاي خوش شغله نوب .. اي خطابه تجي تمشي عليها والله عمامها رايديها .. وتكسر قسمه البنيه هسه وبعدين .. وتضل البنيه معلكه ومسجله بسم عمامك.. ليش باله ..

بابا صاح بيهم كااافي .. العالم تجي على سالفه خطوبه نرفض وخلص .. البنيه صغيره .. وسالفه عمامها يردوها تنساها واطلعها من راسك جاسم ..اختك مراضيه .. شنو تجبرها يعني ..

جاسم :- لا اجبرها ولا شي يابه .. وين تلكه احسن منهم هيه .. تزوج منهم و تعرف بعدين احنه نريد مصلحتها وحجينه صح .. مو هاي هند .. شكت حجت لو هاي .. عايشه احسن عيشه ورجلها خوش رجال ..

امي .:-كالته منين ..صارلها سبوع مداكه علينه ولا حاجيه ويانه .. كل مانحجي تكول اشتغل لو مشغوله  .. وفوكاهه شغل البيت كله عليها وهيه مريضه مالها خلك .. لاتحجي بكيفك وتوزع بخواتك عبالك ثكيله عليك لكمتها ..

جاسم :- وشمدريج بهذا كله وهيه مداكه عليج ولا مخابرتج .. لاتعلميها تشكي على رجلها وعيالها .. رادت تزوج وختارته هيه محد جبرها .. وشغل البيت كل نسوان تشتغل بيت العيال .. شنو بس بنتنه بزر نستله لازم متشتغل .. لاتعلميها وتأيديها على الغلط وتالي ينهجم بيتها وتكعد يمج
..

ردته امي معصبه :- والله لو كل نساوين تشتغل بيت عيالها جان مرتك حركت نفسها .. و تحملت عيشتنه وضلت بيت العيال وشتغلت .. مو اخذتك وطلعت وره شهر من زواجكم .. خليني ساكته لاتحجيني جاااسم ، ترى فاض صبر منك ومنها ..

صااح بابا بيهم :-  كاافي سدو الموضوع نطيتو اكبر من حجمه ..

واكفه يم درج واسمع .. ماحسيت غير جاسم طلع معصب صار بوجهي مباشرتأ  ..

اني فزيت رجعت ليوره كبل خايفه منه ..

عاط .. ولج شسوين هين رعننننه .. كاعده تصنتين علينه مو ..

كتله :- لا ووااالله هذا ...

:- وجععع .. دفعني من جتفي .. امشي ولي لغرفتج ..

طفرت ركض ليفوك .. اسمع بابا وراي يكله .. كم مره كتلك ممنوع تتجاوز على اختك .. ليش ماتحترم انته .. شنو مو بعينك اني واكف وتكول لاختك وجع ..

جاسم :- ماشفتها يابه كاعده تتخنس وحاطه اذنها يمنه .. بعدها بكد الحمصه وتصنت على كلام الكبار ..

ياسر  :-.. شتريد تسوي يعني .. واحنه كاعدين نحجي بموضوعها ومستقبلها .. وماسألنها ولا نطيناها خبر .. مو حياتها هاي لو غلطان اني ..

جاسم :- حياتها اي بس احنه افهم منها بهل شغلات  .. عوزه اسالها وتقبل والله .. حتى املص راسها والله ..

:- شو هند ماملصت راسها من كالت اريد ابن عمي لو انتي تتصرف بالي يعجبج ..

ضلو يحجون ويتناقشون .. بس جاسم من كلامه وصياحه منفعل حيل .. وامبين مراح يسكت ..

مانزلت من غرفتي بعد .. هاي كل هوسه اني انهزم للغرفه .. لان اصير مكفخه هذا بزر الكعده يصر مدلل وهم مكفخه للاكبر منه بنفس الوقت ..

شلت موبايلي اكلب بي .. اسحاق دازلي رساله ..(( جاااين باجر مشايه للحلوين ))

ابتسمت .. فدوه روحك ..

:- رديته الله يستر ..

دزلي بسرعه وكأنو مكابل النت .. لاتخافين وبظهرج اسحاق ، احطج بعيوني والله ..

رديتله .. ونعم منك .. بس خاف يرفضون .. مو خايفه متاكده هم ماراح يقبلون .. شنسوي بذاك الوكت ..

:- باجر اجيب عمامي وخوالي واجي .. عمي الجبير رجال  ملسن واخلي هو يستلمهم .. كتله رايدها عمي .. كال الك انشالله .. ونشوف عود .. هو يفهم بالكعدات ونقاشات .. وانشالله يكدر يقنعهم ..

:-واذا ماقتنعو .. على صغيره .. حجتهم صغيره اني ..

:-اي يااحبيبي انته حجيهم هم صدك .. انته صغنون يروحي.. شنسوي اكل حتى تكبر بسرعه هههههه..

:- لاتسوي هيج اسحاق اضوج والله .. جاي احجي صدك ..

:- ههههه الله كريم لاشيلين هم .. حتى لو رفضو .. هم نحاول .. واذا رفضو نعرف سبب .. واذا عرفناهه معناهه محلوله انشالله .. بس انتي ضلي وياي حياتي  واصبري  ..

:- وياك كلبي .. بس انته لاتمل حباب وضل وياي .. حتى لو يرفضون حاول .. ولاتهتم لجاسم .. لان امبين حاد سنونه عليك .. اليوم كلب دنيا علينه ...

:- وعد للموت نضل سوه وواصر عليج .. لو انتي لو ماريد .. وكلام اخوج مالي شغل بي .. حتى لو حجه نتحمل ونصبر الي يريد الحلو يصبر على مره .. احاول اتجنبه .. و اعرف ابوج انسان عاقل و مثقف ونتفاهم وياهه هو انشالله ..

:- هاهيه شيجيب باجر ..

غنالي يضحك :- شيجيب باجر واصبر اني شلون لهيثم يوسف ..  واني اضحك متونسه على صوته ،

  يبو الحب شكد حلو ويدوخ يخليك تتخبل وتسوي شغلات مايرضه بيها العقل ، بس الحكم هسه بيد الكلب هو الامر وناهي

وياويلاه من يصير الحكم بيد الكلب ، نوبات يوكعنه بكوارث واذيه ، بس منحس الا واحنه غركانيين بيها للهامه  بذاك الوكت لاينفع ندم ولا كلمه لووو لو ياريت ..

حاجيته كاافي ابو الحب ههههه ، باجر جاسم يعلمنه الحب شلون يصير..

:- شبيج هنو مأيسه ترى غثيتيني شجاج ، ماعدج ثقه بيه شنو ، يعني شايفتني مو كدها وماكدر اقنع اهلج ..

:- لا والله مو قصدي لاتزعل  ، عدي ثقه بيك من بعد ثقتي بربي ، بس خايفه مو اكثر الي كاتبه الله يصير هاهيه ..

سديته منه مبتسمه .. مسحت المحادثه مثل كل مره .. تعز عليه امسحها بس اخاف واحتياط ..

ثاني يوم اجو الجماعه وره ظهر ... توتر اكلني اكل .. حتى اكل مااشتهي .. ادك على هند بالكت تخفف عني .. ماكو من يوم الي ازوجت قلت اتصالاتها بحجه مالحك جاي اشتغل .. وهيه بعدها يالله عروس .. بس عدهم العروس تخلص دلالها وره سبعه مباشرتا يبدي الكرف ..

فتحت باب الحولي واباوع الزلم الي دخلو .. صاح ياسر حظرو الجاي .. جاسم جاي ومتحظرلهم من صبح بالصاله .. امي خلصت كلشي ودته الهم بيد ياسر ..

امي حاسه عليه بس ساكته ، بس عيونها تفتر وراي تريدني احجي لو اجفص بيها ، بالاخر كالت .. اوووف يبنات حسنه .. مثل امجن تحبن .. وتالي حبجن بس شلاع كلب ..

باوعتلها متفاجئه ، مديت بوزي ليش شبي بابا شو حتى اهله عافهم لخاطرج .. عفيه نسوان ناكرات معروف ..

الي يسمعج مايكول انتي من نسوان هاي .. بس هسه تعرفين شنو يعني تحبين شخص وناس الداير مدايركم مراضيه .. تعشين بضيم يمه والله ضيم حياتكم تنفس نفس ..

:- الله يبشرج بخير يمه على هالسالفه .. خاف اني عايزه .. جملتيها عود ..

:- والله علمودج احجي .. بس انشالله خير .. الي يحب ينتظر سنين والولد مابي عيبه .. بس يراد تكبرين شوي وابوج ينطيج .. هيه هند وكوه نطاهه عاد انتي ..

رفعت اديه ليفوك .. اميييين  ..

:- والله حتى اختج هند مو مثلج يالعرمه .. ولي لغرفتج لايشوفج جاسم .. يسويج فراش يدوس عليه ،  كدامي عينك عينك تصيح اميين ، لاخجل ولاخوف  ..

عفتها ومشيت اعصابي اصلا منهاره ، رحت كعدت على درج .. بالكت اسمع شي .. اصواتهم مطالعه .. اسمع حديث بس ماكو صياح وعياط .. معناهه جاسم كاعد اليف وهذا مو طبعه ابد .. ضلو بالثلاث ساعات .. وسمعت باب صاله الخارجي انفتح ..

معناهه طلعو .. اسمع بابا والولد طبو للحولي امي استلمتهم هاا وشنو وشيريدون ..

كالولها على سالفه الخطبه .. جايب عمامه وخواله .. ويردوها .. وعمهم السان ماينكدر ..

:- كنالهم صغيره كالو ننتظر بس خطوبه .. ونحجز البنيه .. وهاي تبين انو نيت الولد شريفه وجايكم من الباب .. ماحب يتفرج عن عرضكم وهيه ممكتوبه باسمه ولا عدكم خبر هو رايدها ورايد نسبكم .

:- كنالهم تريد تكمل دراسه وممفكرين نزوجها ..

كالو نتعهد جدام الوادم تكمل البنت .. ونوديه بيدنا ونجيبه هم .. واحس كليات تدخل هم .. حالها حال بناتنه .. نحب البنت متعلمه ودليل جاينه كلهن خريجات ..

بعد شعدنه حجه جدام العالم .. وهمه سدوها من كل جهه ..

امي كالتهم وهسه تالي ..

بابا كللها .. ردينه نسال البنت والله كريم ..

جاسم كال .. اي نكول ماوافقت وانتهت فضت هاهيه .. عبالهم من جايب عمه ابو السان ..عود ننجبر نوافق او يخجلنه ..

ياسر كله يابه نسال هناء ونشوف شتكول .. هاي قسمتها هيه .. احنه اهلها علينه نوجهه وبس .. الولد مايتعيب .. جاي من الباب لو غيره يدور علاقات حاله حال بقيه شباب .. بس اجه علينه وطلبها وجايب ناسه واحنه نعرفهم جوارين العمر وماعليهم زله ..

جاسم كله .. غرريب بابا شبيك غررريب ماننطي للغريب ..

ياسر :- كله منو كال ماننطي .. اذا الغريب احسن من الكرايب ليش ماتنطي .. هيه مطيق عمامك على شنو بعد ننطيها .. هذا احسن من غيره .. مثقف وخريج .. وفوكاهه جوارينه يعني قريبه علينه .. التفت على بابا كله .. يابه بنتك شمره عصى يمك ..  انته الوالد تعرفه وتعرف اهله .. وسمعتهم نضيفه وفقره حيل .. نسوانهم هيه مشيتهم .. مالهم برايح وجاي .. وينطون حريه للمره ..

صد على جاسم ..خما مثل عمامي يعاملون نسوانهم بهايم مو نسوان عبالك .. لاتزعل يابه اهلك انته اعرف بيهم ..

لاتضلمون البنيه اسالوها وهيه تقرر ..لاتكول صغيره .. لا عمرها 17 سنه ، يعني تعرف تكول اي لو لاا .. وكالو ننتظر .. عادي سنه وسنتين مو مشكله .. وهيه هالسنه سادس انشالله
.

جبيره واعيه .. افتحو الموضوع واسالوها وهيه تقرر ..

جاسم :- عاط بي .. مابقه علينه بس انته .. تعرفنه شنو نقرر وشنو نسوي .. هذا القسمه متصير والله افتهمت لو لاااا .. ماتصير وماننطيها وخلص .. مو يابه ليش ساكت انته  ..

بابا ماله حس .. كاله .. نسألها ونشوف غير هل حجي ماكو  .. هذا حياه وزواج مو احنه الي نقرر .. حياتهن حالهن حالكم هنه يقررن .. ماعدي قريب وغريب ..

اني سمعت هيج طلعت ااركض على طوارف اصابعي للغرفه ، كلت هسه هم يطلع بوجهي جاسم . قلقه حيل .. وخايفه من جاسم يخربها .. اذا سالوني اكللهم بكيفكم ومالي كلمه من بعدكم ..

واذا اصرو  اباوع على ياسر وانطي اشاره موافقه واخلي هو يحجي نفس ماسوت هند بخطوبتها .. وماادخل نفسي بصراعات ولانقاشات .. واذا اصرو يسمعون رأي امدح باهله وسمعتهم مو بي خاف يعرفون عدي شي وياهه .. اكتفي بهيج ..

بعد شيردون اكثر من هيج حتى يعرفون موافقه .. خما اصيح احببببببه واررريده .. والله لجاسم يسويني طماطه تكلاه بالحم ..

ضليت بغرفتي افكر واهمس بيني وبين نفسي شنو احجي وشاكللهم واوزن بالكلام حتى لااجفص وانفضح .. بس اسمع صياح جاسم طالع وينتر ..

امي تحجي وياهه وتهدي وهذا محترك .. بابا ملازم الصمت وساكت ..

ياسر طلع وركع الباب وراهه ..

اجاني مسج من اسحاق .. فتحته .. كاتب ان الله معنا

ضحكت ، حسيت نفسي بحرب ، والله شلون مااشوف الله تبره من عدنا من يوم واعدتك .. دزيتله " انشالله "

:- خما احد حجه وياج او ضايقج ..

- لا بس جاسم كالب دنيا علينه وخايفه منه ..

- لا تخافين .. خليج قويهومن يسالوج جاوبيهم بثقه ..

- سكتت .. كتله جاسم مراح يسكت ..

-انتي كوليلهم موافقه وعوفي الباقي عليهم ..

- الله كريم ..

- شبيج جنج من هسه خفتي وبديتي تتراجعين ..

- لا والله بس خايفه ..

- من شنو ...

- ولاشي بس اخاف من رده فعل الي حواليه ..

- ابوج انسان مو مؤذي وعنده انصاف البناته .. مراح ياذيج .. وجاسم حاولي تتجنبينه .. بس تنكتبين باسمي مااخلي بشر يطخج .. ماشي حبيبي ..

- ماشي ..

- يله هسه اني طالع بليل ادك عليج ..

- ماشي .. سديته منه وفكرت بكلامه وبالي راح يصير بعدين ،عمامي وابو فهد شراح  يسون ، يااا جاسم خاف يكللهم عزاا ..

.. للمغرب جعت ونزلت .. البيت هدوء  .. مستحيه من ابويا حيل .. طبيت للمطبخ ماكو احد .. ياسر ماكو على الاغلب بالمحل .. توه ادخل للحولي طلع بابا من غرفته خال الخاولي على راسه .. ابتسمت بوجهه من رفع راسه بوجهي ..

- كال ها بابا شلونج ..

ابتسمت بوجه باريحيه : - زينه يكلبي  ..

- وين جنتي ماشفتج اليوم ..

- ابتسمت فوك جنت اقره ..

- شتقرين ومدرسه عطله ..

- ههه كتاب عادي ..

- هااا بس لا بنتي الصغيره من سمعت  انخطبت وكامت تستحي ..

دنجت راسي والابتسامه خفيتها .. كلت هسه يكول فرحانه ومستهتره ..

كال تعاي سويلي استكان جاي راسي يوجعني .. وهم خلينه نحجي .. مشيت وراهه واني ارتب الكلام براسي ، ديربالج تجفصين ديربالج ، اول مره اكله بكيفك وبعدين من يصر عليه اكله هم خوش ناس واهل صديقتي .. ضليت هيج افكر بيني وبين نفسي وشاحجي وشأجاوب .. غسلت القوري وهو كعد على الميز ... مدنج راسه ..

حطيت الجاي وحظرت الكلاصات .. وكفت يم الكاونتر .. رفع راسه عليه ضل يباوعلي .. مهموم .. كلي تعاي اكعدي كبالي بابا ..

كعدت كباله ساكته انتظره يحجي ..

حط اديه على الميز .. ابتسم كال امبين كبرتن وصار وكت اطيرن من عشي لعشجن الخاص ..اني عيوني دمعت ..

كتله بابا اذا انته مموافق على زواج .. اني مموافقه .. انته عندي بالدنيا والله .. ولاتزعل نفسك ..

كال اولها وتاليها وراج زواج .. وراح تعوفيني ..

لا بابا شاسوي بالزواج .. اذا انته مموافق ..

ضحك كال ليش موافقه انتي على زواج ..

بلعت ريك :- هاا لا .. هذا والله اني رأي من رأيك .. اصلا مموافقه ..

ضحك وهز راسه مركز عليه نظره :- ملعونات بنات حسن  .. كبرتن وصرتن تردن زواج ..

ارتبكت :- هههه لا والله بابا .. ماكلت هيج ..

:- يعني انتي مموافقه .. ومامفكره بالزواج نهائيا  .. هيج افتهمت منج .. رفع حواجبه ثنينهم يسأل يباوعلي ينتظر الاجابه

بهت لوني .. خرب بحظي .. ابتسامتي اختفت ..

هااا بابا شو سكتي ، نظره مركز وياي ماوخر عيونه عني ، . مموافقه مو حتى اني كلت .. هناء متريد زواج .. هيه مو مثل هند متسرعه .. وتزوج من وكت وتهمل دراستها ..

هناء عقلانيه وفاهمه دنيا صح ومالها بهل سوالف مال زواج وارتباط .. تريد تخلص دراسه وتصير انسانه ناجحه .. بس اني كلت اسمع منج ..

كمل كلامه واني وجهي باهت :- حتى لااكول اني تجاوزتها و قررت عنها .. سالتها وهيه سباعيه تعرف مصلحتها و رفضت .. لان هالسوالف مو بالها .. عدها مستقبلها اهم شي  ..

ضليت مبحلكه بوجهه .. ابويا مموافق وعرف شلون يفرها عليه ويلعبها صح وكعني بفخه .. لو اني الرعنه وماعرفت اتصرف ..!!؟

ضليت اباوع بعيونه واريد ابجي .. كال ها باباتي اندزلهم خبر مموافقه البنيه .. حتى تتفرغين لدراستج وراج سادس ومرحله مهمه بحياتج .. تقرر انتو تكونين ام بيت وزوجه وام اطفال ومشايفه من حياه شي .. وكاضيتها ركض بركض حتى ترضين رجلج وعيالج وممحصله الرضا  ..

لو انسانه دارسه مثقفه واعيه ويمكن الله كاتبلج تصيرين دكتوره والفرص زواج جدامها تصنعين مستقبل يامن الج حياه كريمه ولاطفالج ماتعتمدين على زوج بمصروفج ولا بحيانج ..

سكتت ودنجت .. بلعت ريك .. رفعت راسي عليه رافع حواجبه ثنين ينتظر الرد ..

بلعت ريك .. تقصد يعني ادزلهم خبر بالرفض لاسحاق ..

قصدج اهل اسحاق .. اي بابا .. ليش عدج رأي ثاني لو شنو فهميني رسيني على بر  ..

سكتت .. ماعرف ليش هيج كلت .. بس الي اعرفه بابا ذكي ..

كتله ...

#يتبع

💜ونجمه لاتنسوها  💜