رواية ثأر مهري منهاا الفصل الثاني وخمسون 52 - بقلم اسماء ديمير

《《 البارت ال48》》

ثأر_مهري_منها

بقلمي "أسماء ديمير"

استغربت شجابنه هناا ، ضليت صافنه هو نزل يفتح باب الكراج ورجع صعد للسياره ؟!!!

هاي شنوو حاجيته رشيد ؟؟!

مارد عليه حرك سياره ودخلها ، رجع نوب سد باب الخارجي واتجهه باب صاله يفتحها ويدخل  ..

اني نزلت وراه شفت حديقتنه هيه هيه بس الثيل كثران والاشجار ثخنانه محد مرتبها ولا مقلمها كبل بجيت ، صحت رشيد شجابنه هناا شجاب المفاتيح عدك ..

ماحجه دخل وخلاني بره افتر دخلت وراه ..

بيتنه نفس ماهو فارغ بس صاله بيها فراش استغربت ..

شنو هاي احاجيك ..

اندار عليه ..

مفاتيح بيت شلون عندك شلون دخلنه هناا ..

.بيبتي هذا يابه ..

شلون بيتك احنه بعناه باعه ياسر واستلم فلوسه ..

ادري وانا اشتريته ...

بهتت هااا .. ليش اخذته شسوي بي ..

سكت مارد عليه كلي دخل اسبحي ارتاحي ونامي هناا حتى باجر نطلع من وكت على براد ..

عافتني وطلع للحديقه يشرب جكاير ..

افتريت بالبيت فارغ بس امبين واحد مستخدمه هاي شوكت اخذه شوكت اشتراه ليش ماحجه ..

معقوله جاسم يدري وماحجه ، ماتوقع يدري جان كال لاامي على الاقل، زين ياسر هم مايدري اصلا محد يعرف لو اي شخص عده خبر جان حجو وطشور الخبر ..

دخلت للحمام متضايقه من ملابسي خنكني من الظهر بيهن  ، نزعتهن وسبحت بس تعال شلبس بعد ، ضليت احوص لااكدر ارجع عليهن ولا اكدر اطلع هيج ،

صحت رشيد ماكو ، دكيت باب حمام صحت مره ثانيه سمعت خطواته صاح هاا يابه ..

اريد شي البسه عفيه ماكدر البس هذني ختنكت ..

عافني مشه ،شوي ورجع ، شايل بيده فالينه مال التراك مالته ..

هااج يابه البسي هاي ، اخذتها منه لزم ايدي ، كال ماكو عزيمه لاا ..

نترت ايده وسديت باب ماله جاره هالرجال ابد ..

لبستها وطلعت ، فوك ركبتي بشوي ، هو من يلبسها عليه فالينه نص ردان،  بس من اني لبستها صارت دشداشه قصيره نص ردان ..

طلهت اتفحص بيها ، لكيته كاعد على فراش مدد ، بطرك بجامه ، والفالينه لابستها اني ...

تقربت منه يباوع للفالينه ولرجلبه طالعه ، دار وجهه ..

تمددت بصفه جسمي تعبان بس اريد انام ، اخذت جرجف غطيت نفسي بي هو يراقبني بطرف عينه مو راضي مزعوج ..

سألته شوكت اخذت البيت ..

ماحجه ضايج ..

على شنو ضايج ..

باوعلي .. مزاجيه انتي وفوكاها ماتعرفين الواجبات الي عليج تدرين لو لااا ..

هاي على توه لان ماخليتك تدخل حمام ..

دار وجهه ، ماطالب منج شي صعب هناء لا شغل بيت ولا خدمتي بلبس ولا باكل ولا شي كل الي ردت ماتنفريني وانتي حتى بعد ماحبلتي كمتي ماتكعدين كبالي ..

لخاطرج وحتى ماتتعب نفسج كمت اكظي وكتي بالشغل ومت ارجع بليل تعبان اتوقع الكاج تمتظريني ،

تالي  الكاج بالغرفه مزنبره وضايجه وماتريدين قربي ، وفوكاها تنامين وماتهتمين بالبشر الوراج نام كعد جوعان شبعان ..

وانا استغل الفرص بس حتى اتقرب منج وانتي نافرتني ..

سكتت خجلانه منه ، تقربت عليه حيل خليت راسي على صدره لاضوج مااقصد والله ..

باوعت لوجهه ترى اني مانافرتك الك والله ، نافره عطرك الي تخلي ليش من تسبح ماتلعب نفسي ، اني حتى نافره الاكل والشرب مو تشوف بعينك ..

ترة كل نسوان هيج ، بس كلمن نفسيتها ، اكو وحامهن سهل ، واكو وحامهن صعب مثلي واكو من تتوحم على رجلها تخيل ..

ضحكت تضل لازكه برجلها وتشمشم بي ..

عجل شبيج انتي الله هاطرج بالاعوج ..

ضحكت خلفه عليك ..بسته من صدره لاتزعل ..

جرني حيل من خصري وحظني ، سألته البيت شوكت اخذته .. ليش ماحجيت وكلت ..

من زمان اخذته من باعه ياسر ، وماحجيت لان ماله داعي احجي ...

ليش اخذته ليش انته بحاجته ..

ججج مو بحاجته بحاجتج انتي ، شفت دموعج يوك الي كالو راح نبيعه مانطاني كلبي اشوف بيت ابوج ينباع واني عندي فلوس اشتري ومااخذه الج ..

اخذته علمودي عليك الله ..

اي بالقرعان ترى هو مسجل بسمج هم ..

هاا كمت لحيلي ابتعدت عن حظنه بااسمي ؟؟؟!!

هز راسه بهدوء اي يابه من زمان بسمج ، البيت الي كتبته بالمؤخر هو هذا نفسه ..

رفعت حواجبي ، ماعرف شحجي تنفست بهدوء ، بيتنه بيت بابا باسمي دمعت عيوني بيت بابا ماراح لغريب ..

ليش ماكتلي ليش ضميت ..

ماضميت على احد بس ماله داعي احجي شي خاص بيه حاله حال اي شغله اشتريها ..

زين ليش  سجلته باسمي ..

عجل اناا مو وعدتج اعوضج عن ورثج هاهيه فكيت الوعد ..

هذا بدل ورثي يعني هذا اضعاف ورثي رشيد شبيك ..

هذا مؤخرج ياابه نو بس تعويض ورثج شبيج ..

رجعت خليت راسي على صدره وسكتت ، كلبي يرجف ممصدكه ، سالته فراش هذا شنو جنت تنام هنا شنوو..

اي يابه عدي معمل هناا بابو غريب فتحته قبل كم شهر ،  ويرادله مراجعه كل فتره واشرف علي ، فاجي ابات هنا بدل فندق اخذ راحتي ..

شو ماكلت ..

بطلت اجي من تزوجت لان لازم ابات وماكدر اعوفج بحدج انتي وعلا ، فادز سجاد يشوفه ..

سجاد خطيب علا ..

اي يابه ..

شو نادري ماكلت  ..

انته كل شوي وكلتي شو ماكلت مامتعود احجي الي اسوي لااحد جنت مفكر من ازوج  راح اكعد واسولفلج كلشي بس انتي نفرتيني بحبالتج ..

غير انته حبلتني قابل بكيفي ..

الحمدلله ياابه نعمه من الله ..

سكتت وغفيت بحظه ، هو ضل كل شوي يتكلب ، ماهجم بس يحوص ، نوب كل شوي يجرر نفس ضايج ،

عرفت ماراح ينام ولا راح يخليني انام زين ، رفعت جسمي عليه ، باوعت بوجهه ..

صفن بوجهي :- هاا  كاعده ؟؟!

ماحجيت بس بسته وحظنته ، ابتسم حظني حيل ..

صبح طلعنه للبيت ، حسيت روحي طلعت بالدرب حلفت بعد ماوصل لبغداد ولا اطلع مسافات طويله لحد مااجيب كمت اموت ، لمن وصلت طلعت عيوني ، يومين نايمه بالفراش ماتحركت من تعب ، حملي مزعج ويموت بعدني بالشهر الرابع وبين حملي وبطني بدت تكبر ..

رشيد يجيب وينكل بهل هدوم ماخلاني البس ضيك ابد لو شوي على كدري كون كله راهي وجبير يخاف بطني تنحصر ،  علا بدت تجهز لعرسها وكملت كلشي ويوم الاثنين عرسها  .

جانت شايله البيت كله عني ، هسه بس تروخ ابتلش بالطبخ والتنظيف ، بس ماكدرت احجي لان خطيه صار هواي تاجل قابل تضل تخدم بيه طول عمرها ..

ياسر اشتره بيت بغداد واستقر يم خوالي امي ضلت يم جاسم بسبب رواء لحد هسه بالخمس مرات راحو يردوها ومارجعت ..

راح يصيرلها ست اشهر وهم مارجعت ، عود تسويلعا لوي ذراع حتى ترجعه لبغداد بس جاسم ومادراك مااجاسم من يقفل ..

حلف بعد مايوصلها ولا يدز احد عليها ، كال الها مهله كم شهر اذا مارجعت بالقران الا اتزوج عليها واكسرها ، بس بجي جهاله عليها مسكته ومصبره وامي ماراضيه عليه بهل سالفه ..

وراها صار عرس علا ، صح مالزمت شي ولا اشتغلت ، الشغل استلمته نغم وبنات خالتها ، بس الهوسه والفوضى الي بالبيت وخطار طاب طالع موتني ..

لو لعبان نفس الي رافقني لحد شهر السابع الي اعرفه بس اربعه اشهر مو للسابع ..

دومي امشي وعلاكه وياي لو سله زبل تكرمون بصفي ،  بطني ثكلت وبديت ادوخ من فقر دم ، صح الربو ماهاج عليه ، بس فقر دم اذاني امسي وادوخ دائما مسطوره ،،

علا بيوم عرسها راحت بيبي وياها بعد مارشيد سلمها بيده لسجاد ..

وهدده اذا يضوجها والله اجيك هداده بالبرنو مو عبالك صاحبي واغفرلك ..

وذاك يضحك يعرف خبالات رشيد .. انزفت علا واشوفلك رشيد مزنبر ويتهنتر ونغم تبجي عبالك ماخذين مدري شنو منهم .

بيومها لا نغم تتحاجه ولا رشيد مزنبرين والوجوه مكلوبه ، اني هم مافكيت حلكي حسيت بيهم ، بابا من زوج هند هيج صار بي ونفس الحاله ..

عفتهم يصفون راسهم وصعدت ارتاح ..

ثاني يوم راحو الها عماتي ونغم اني ماطلعت ، روحي بخشمي خفت لا اتخربط عد العالم هم عيب ..

وراها بالسبعه يله رحت اني ورشيد بليل شوي .. سبحان الله من يكول على نيتاكم ترزقون ، رجال ولا احسن منه ، من اول اسبوع بينت سعاده بوجهاا ، الخدود متفخه والضحكه شاكه الوجهه ،

لمن دخلنه الهم اني ورشيد نباركلهم ، عيالها ونعمه ناس شالونه شيل بالترحيب والفرحه ..

حمواتها ماخلنها تمشي منا لهناا هنه قامن بالواجب ، صعدت لغرفتها وياها ، مو اقل من غرفتي ابد ، باين العزز والكرم عليهم من عدا الهدايه تارسه الغرفه والارض ..

اشكال الهدايه لو هو تكول مايجي يوم وايده فارغه ابد والله .. عبالك حنيه رشيد علي ولا عبالك رجلي ..

جاي نحجي هو صعد يغني ياحلوو منين الله جابك جمر كلبي .. من شافني تصنم ودنج فشلان ..

مايدري بيه هناا ، خجلت منهم ترخصت ونزلت .. عفتهم وراي يضحكون ..

كعدت بصف رشيد لليل كلش ورجعنه للبيت مشت ايامنه هيج ،

من دخلت بشهر الثامن بلشت اجهز للطفل ، ماعرفت جنسه ولا سالت ، رشيد يكول كلشي من الله نعمه ، اغلب جهاز امي اشترته لون اخضر فاتح ..

رشيد يجيب وينكل اول طفل واول فرحه متخبل علي ، سواله زاويه بالغرفه اله ..

بعده مااجه وهو حظر اله الكاروك الهزاز والكنتور والملابس لحد عمر سنه من عدا الالعاب ، اني فرحانه لفرحه اشوفه يشتري ويسوي بواهس ..

امي خطيه تولت الملابس والفراشات والاغطيه والسله الصغيره ، اني حايره بروحي يدرون بيه حمل نفسي ماشايلته مو عاد اطلع واتسوك واشتري وافتر ..

  امي لو هند يجن يرتبن ويسفطن يساعدني ، امي اجت صبح وياها جهال جاسم ، صح جهال جاسم مو مثل قبل طول اليوم يمي ...

بس امي تجيلهم الظهر للعصر وتروح يوميه ، رشيد موصيها لان بوحدي يخاف اتخربط ومحد يمي ،

طلعتلهم بره بالحديقه كعدنه وجهال يلعبون ، امي ساكته  الوجهه مكلوب وروحها طالعه ..

صبيتلها عصير وكعك وكعدت كبالها اسالها شبيها .. تسوالف اخوج ناوي يهجم بيته من صدك . ومرته استرعنت هواي الثوله ..

ليش شبي ..

اسكتي غير موتني البارحه قهر ، نمت مغثوثه ..

على شنو ياامي ..

خابر ابو رواء يكله بتك حدها منا للجمعه والله اذا مااجت ورجعت لبيتها الا اخذ عليهاة ..

عشتوو ابنج بطران يمه ..

حجيت وياه ميفيد راكب راسه هو هم مل ياامي صار بالسنه مرته ماكوو يارجال يقبل هيج تبهذل الرجال هو وجهال ..

هاي منو تقبل بي هو عده جهال ..

ليش بنت عمج حفت عليه رقيه ، وجدج ذاك اليوم هم كايله عليه جنه ناوي ياخذهاا ..

صخام اي والله اذا صدك ..

اي والله الحجي ميفيد وياه اخوج ..

احجي لياسر خلي يحاجي ، هو رواء ماكدرلها عاد نوب رقيه ام البلاوي ..

يبوو شكد حجيت وكلت ليش انتو ياهو بيكم ياخذ بكلامي ،نوب ذيج احاجيها تكول شحده والله ارفع عليه قضيه راكبه راسها .. ..

سكتت ضايجه ، هاي شلون شغله يااربي نوب رقيه مثل الحيه ، مجاي نخلص منها .. وين ماينذكر اسمها بسالفه لازم بيها خراب .. عزه بعينها حتى امها مو هيج ..

للعصر اجه جاسم اخذها هيه وجهال ، شلتلهم صندوك فواكه صغير من مخزن ونطيته الهم اخذه جاسم من ايدي ..

حاجاني تعبناج ياابه ..

هزيت راسي ماحجي ..

اندار عليه شنو  حالفه السانج ميطخ الساني ..

سكتت باوعت لاامي مقهوره منه ..

ترى اخوج جبير ديحجي وياج عيب كالبه وجهج ..

باوعت عليه العفو خويه ماقصد اقلل منك ..

سكت يباوع بوجهي .. بعدين كال ترى مرت سنتين هناء مانسيتي ...

صفنت بوجهه ، مادري ليش طول هالسنتين ماعاتبته ولا لمته ، كل الي سويته ابتعدت عنه ..

يمكن الكل واجهتهم وطلعت الي بكلبي ، الا هو ، جان العتب جبير عليه ، لان اخوي...

رفعت بدايه شعري كتله كل ماباوع للمرايه اذكر ، حتى لو بالي نسه ، وجهي وجسمي بعده يذكرني بكل مره اشوف اثر ضرباتك  .. باوعتله بعتب عيوني انترسن دموع .. مااعتبت على الغريب عتبت على ابن امي .. بابا ماربانه ناس تاكل ناس ..

ولا ربانه نقسى واحد على ثاني .  اذكر مره كتلي وجع لحد هسه بالي ، بابا ضل يحجي عليك ، وكلك دير بالك تكررها ، هيه الله باليها بوجع تجي انته تدعي عليها ...

الي سويتي مو قليل ، نزلتي راسي ياول وين مااولي ناس تعايرني ، وان ناعيرتني اشوف شماته بعيونهم .. من عدا رشيد الي كطع صحبي وياه بسببج ..

كل هذا وبعدج تعتبين ، عبالي الوكت يمر وتعرفين خطأج وتنسين الي صار ، بس باين مانسيتي وبعد اكو حقد بكلبج ..

لو عدي حقد مافتح بيتي الكم ، ولا ادخل اصلا لبيوتكم ..

عجل كلشي صار ماضي لاتخلين بالج ..

سكتت وطال'سكوت ، سألته ردت اكسر التوتر الي بينه ، سمعت تريد تزوج  ..

رفع حواجبه ياهوو كلج منين سمعتي ..

انداريت على امي ..

ابتسم ، حسنه مااظم حجايه ابد ، من بارحه كالبه عليه ..

تريد مصلحتك ماتريد بيتك ينهجم ..

ماينهجم انشالله .. يله نتوكل ، صاح لجهاله اخذ امي وطلع ..

فد يوم وانا بدايه شهري رتبت البيت ونظفته لان بدايه شتا ويراد تغير للفراش ، طلعت ماخليت لاملابس لا فراش ...

مدري شلون جريت السجاد الصغار من فوك الكنتور وكعت صفطه اوراق وتطشرت فوكي ، شلتهم بيدي ..

كعدت الم بيهم واحجي عزاا العزاج اليوم رشيد يطين عيشتي مال شغله نوب ..

اسفط بيهن واشوف خما فد شي مهم ، انصدمت من شفت عقد زواج ؟!!

عقدت حواجبي مستغربه عقد زواج شنوو ، لزمته زين اقراه نصدمت من شفت اسم رشيد واسم سمر ؟!!!

سمرر مو غريب عليه هالاسم ...

ضليت مصدومه اريد اكوم مااكدر بجيت بمكاني هاي شوكت، مزوج عليه شوو مادري شو مااحسيت بي  ، انصدمت صدمه ، رجليه كامت ترجف  ردت اكوم مااكدر ، كعدت بمكاني ماتحركت بالساعه ابجي  ..

بطني نوب اذتني حيل لزمتي مغص قوي ..

كمت كوه اريد استند نفسي ماكدرت رجعت كعدت بالارض ..

سمعت صووه يصيح علي .. مارديت خليت اديه على وجهي ابجي لا يااربي ليش هيج رقيه لمحت بس مااصدكتها لا ياارب لاتشمتهم بيه  ..

دخل تفاجئ من شافني ابجي وبالكاع ..

اجه يركض عليه شبيج ياابه شبلاج ..

لزمني ديكومني ضربت ايده وصرخت بوجهه وخررر وخرر واحد جذاب الله ياخذج .

شبيج  شجاج ..

شجاني كول شنو الي مااجاني بسببك مزوج موو مزوج علي ..

بهت وجهه مزوج شنو منيلج هالحجي ..

شلت الورقه من الكاع وشمرتها عليه ..

هااك استلم كتلت نفسك عليه وحفيت ويله قبلت بيك مجرد ماتزوجتني تزوحت عليه نوب عقد شيخ حتى مااعرف ..

.لزم الورقه قراها لاضليت تهذرين ولج مطلكها من زمان هاي من زمان اخذتها ..

كمت لحيلي اجه يساعدني دفعته لاتلزمني شاايفني جاهل وتضحك عليهمن شوكت مزوجها من شوكت ماخذها شوكت طلكتها اصلا ..

كافي لاصيحين فضحتينه مالج غرض بهل سالفه ياابه ، تزوجتها قبل لا اخذج وطلكتها وره شهر واحد هاي سالفه مالج حق بيها ..

ماسكتت ولا رضيت ضليت ابجي واحجي مادري شنو كلت ولا شنو حجيت ،

بس ماخليت شغله ماعيرته بيها ، يمكن خربطه الحمل ومنا هاي سالفه ، خلتني ماهتم لمشاعره ولا اهتم اذا نقهر او ضاج ..

فرغت الي بكلبي ، واجت كلمات بالساني ، ماجنت اتمنى اكولها ، بس بحاله عصبيه ،

هو عااط بيه عيطه خنسني كتلج طلكتهااا طلكتهاا من زمان قبل حتى لا الكاج من انهزمتي ..وانقطعت علاقتي بيها من سنين ،

اجه يضربني رفع ايده اني دنجت راسي وحميت وجهي بأديه .

هف الباب دفره وتراجع ماكدر يضربني ، من شافني متحاميه باديه وضامه راسي ..

طلع وركع باب وراه بجيت بجي من قهري ، حتى ايدي عضيتها ، يمه نار الغيره والخذلان تجوي جوي ..

سمر اسمها اي سمر الاسم مو غريب جن سامعته ، ماتذكرت ولا جنت مركزه من صدمه والبجي الي سوه عدي نحول ، لو بطني الي ثكلت علي واذتني ، اجت بالي ذيج النذله الي جانت تراسلني وتحرضني على اسحاق  ..

كالت اسمها سمرمر معقوله اسمها سمر هيه نفسهاا ..

شفت نظراته الها من هو اجانه ولكها يمنه ، حتى ماسأل منو هاي ، ولا استغرب ، وهيه اكلته اكل بنظراتها ،

خاف اني متوهمه ، معقوله تشابهه اسماء ، لااا زين شلون اندلت بيتنه ، انسطرت سطر ، متت بيومها من الالم مال بطني ومن قهري ..

ضليت احوم بمكاني ، المن احجي واكول ياهو يعرف اصلا ، اذا رحت لبيبي اشكيلها ماتصدكني ، واذا صدكت كبل تكلي مو كالج طلكتها بعد عليش ..

هو اذا عرف طالعه وحاجيه الاحد يكلب دنيا علي ، خفت منه وخفت هم لايطلع شكي بمحله ، والله صدك اصير مضحكه ، ويضلن يتشمتن بيه سنين ..

لليل هو ماكو نوب متت بدمي ، بس عقد شيخ موجود زين شوكت طلكها ، معقوله نفسها هاي لكال لبيبي طلكتها وماكو هيج سالفه ....

اعتقد هيج ، تمدتت بفراشي والم بطني موتني ، بليل سمعت صوت باب عرفته اجه ، غمضت عيني حيل ، هو فتح باب مدري شاخد وطلع ، توقعت يجي يحاجيني لو يبرر ..

بس ماسواها ، غفيت بمكاني وشهكه بصدري ، قهرني مااجه فهمني ولا رضاني ..

صبح كعدت نزلت لكيته ماكو باين طالع ..

رجعت للغرفه شلت الغراض كلهن بس العقد ضميته عدي..ضليت افتر مثل المزهوره دموعي تجري ، معقوله يجذب علي ، لا هو يحبني احس بي يحبني والله يموت علي ..

ليش قابل يزوج ، شوكت يروحلها اصلا ، معقوله مل مني ومن اهمالي اله بسبب الحمل .. لاياربي لا تسطرني ..

رجعت طلعت العقد  وقريته مره ثانيه ، شفت تاريخ زواج ، متزوجها من جنت مهزومه معناها هيه الي حجت بيها بيبي وياه ..

راسي صدع نوب بلا ريوك ومنا بطني توجعني من البارحه .. هو لادك ولا سال ولا اهتم بيه اصلا ،

بجيت بمكاني من القهر ليش هيج سوه ،وتعامل وياي اني مصدومه، حق يجي يفهمني مو يعوفني هيج ..

تمدتت بالارض على بروده الكاشي اشهك وابجي ولا توقعت هيج انقهر وانصدم ، طول عمري عدي برود وفهاوه بتصرفاتي و بردات فعلي ، الا هاي سالفه انفجرت بي ..

الالم زاد عليه ردت اكوم ماكدرت بجيت بمكاني كمت كوه استندت على حايط حسيت عبالك عدي ولاده ..

يارب المن اروح مالكيت غير بيبي اروح عليها واشكيلها ، اريد اطلع من باب الغرفه وامشي ماكدر ..

وكفت كبال درج شراح ينزلني ياربي ، كل بابه انزلها اموت من الالم لمن خلصت الدرج روحي طلعت احس طفل راح يطلع ..

تمشيت لبيت جدي همه اقرب شي الي .. دفعت باب المطبخ وطبيت تلكتني مرت عمي بجيت كتلها الحكيني عمه راح اموت الطفل احسه راح يطلع فدوه ودوني للمستشفه ..

شنوو عدج ولاده ...

اي بطني موتتني ..

اجت وكفت كبالي توج بدايه شهرج هاي تشاليع كلشي ماعليج ..

لج عمه داااموت لخاطر الله وديني .

لا وين اوديج ، بس ترحين للمستشفه يموتنج ابقي هنا من توصل حدها عود ..

بيبي وين خرب بيبي وين خلي هيه توديني .

بيبنج طالعه عدها واجب ..

كعدت بالكاع اعيط واتوسل بيها لج عمه بطني كطعتني فدوه لحكيلي ..

بطلي عياره ولج لزمي نفسج هنه تشاليع ..

متت من الالم كعدت بالارض من دوخه والالم نوب حتى وكفه مابيه .. متت بجي نوب حتى لبيت جاسم مابيه امشي ...

بالنص ساعه واني روحي ساحت ، ولزمتني دوخه ،  لحد ماحسيت شي رطب جواي شفته دم ،

عطت ولج عيني عمه راح اموت الحكيلي ، سمعت صوت سياره طبت عطت عبالي بيبي  اجت ردت واحد يتلاحكني جن طفل مات يااربي دخيلك ...

#يتبع

نزلت اليوم بارتين ، بارت بعد سحور وهسه بارت بعد فطور .. داحس نفسي دوه 🙂 ..

وانشالله البارت الاخير باجر بليل ، ونودع تعليقاتكم الجميله 💜.

تفاعلكم وتوقعاتكم للجاي 💜