رواية ثأر مهري منهاا الفصل الحادي وخمسون 51 - بقلم اسماء ديمير

《《البارت ال47》》

#ثأر_مهري_منها

بقلمي :أسماء ديمير

عقدت حاجبي اباوعلها بضوجه .. هيه ولا يمها ، استغربت منظرها مدري شعجب خاله  مكياج والحمره حمره استخفت البنت فرد نوب والله ..

انداريت على بيبي ، سالتها بيبي شعجب مرت عمي حميد وبنتها اجن ..

عجل ماترديهن يجن زعلانه على زعل اخوج شنهي ..

لا بيبي شعلي اني بس استغربت اني اعرف ابوها مانعها من طلعه ..

لا ياجده خطيه نوب اخوج الجلب مايرضه ياخذها ويستر على الموضوع ..

تتبله عليه بيبي بيش طالبته يعقد عليها ..

عجل هو بكيفه غصب عنه والله عبالج اعوفه الا واخليها ياخذها ..

ليش هيج بيبي عنده مره لاتهجمين بيته ..

اناا اهجم بيته ولج لو اريد مصلحت بت عمج ..

يا اعرفج اني من تخلين ثنين براسج ، ومصلحه اخوي وين ..

البت انفضحت يااجده بالقرعان الكل يحجي عليها حتى اجوها مشايه من طرف امها من سمعو فركشو الشغله . 

من ايدها ..

لاتتشمتين بت حسنه انتي هم اخرا منها ..

خلفه الله عليج ..

نسيتي لو اذكرج ..

رجعنه حجيه رجعنه اكوم اصيح رشيد هو يتفاهم وياج والله الا اخليج بعد توبين تعيرين ..

شهكت يااالنذله بلا تربيه .. توه تهبدني طفرت من يمها اضحك ..

تلكتني نغم ، شايله ابنها ، وكفت متصنمه بمكاني همست شلونج نغم ..

باوعت عليه ضايجه بس ردت ،  الحمدلله بخير .. عافتني ودخلت ليجوه تبوسهن ..

الهدايه نقلتهن علا لغرفه امها ، دخلت للمطبخ اساعدها ، كالت عوفيهن ودخلي ليجوه لاتجين هنا وتتلفين ملابسج ..

لا يمعوده قحط .. استغربت خالتي ماكوو ، جان هيه تولت المطبخ خطيه ابد متقصر ..

شلت العصير حتى اضيفهن ، الصينيه بيها بال١٥ كلاص ..نوب شثكلها ، هيه وراي شايله الكيك ..

كوه شلتهن اديه ترجف ، توه اطلع باب المطبخ ، وماحسيت غير واحد اجه يركض ربدني بطني ، من اثر الضربه رجعت ليوره وكعت على ظهري  فوكي صينيه العصير ..

كلها طلعت تركض تصيح الله الله ، اسم الله

علا رجعت ذبت صينيه كيك بالمطبخ ورجعت تركض عليه : يااا اسم الله شببج ..

فهد شجابك هنااا ليش تركض ..

احس عظامي تكرسن ، طلعت امي وبيبي يركضن علي شالني من الكاع .. صرت وصله مسح ماسحين بيها كاع ، لوني برتقالي نوب الثوب انعدم وشعري راح ..

وراهن رقيه مبتسمه ، كالت شكد فاهيه صينيه عصير ماحملتيها عجل شلون حامله رشيد ..

مارديت عليها ، احس نفسي تفلشت ، حتى ظهري طك اثر الوكعه ، ضليت عافسه وجهي ضايجه ..

علا تنظف بيه وتعدل ، وبيبي تسم بالرحمن شجاج يمه شوكعج عين الماصلت على نبي ..

امي ونغم لمن الكزاز والكلاصات الي ترست الارض ..

اجه رشيد بسرعه كح وصاح يالله .

بيبي كالته دش يمه تعال ..

اجه شافني صفن وملامح وجهه تغيرت ، حسيته كاتم الضحكه كوه ..

ضحكت كتله اضحك لاتكتمها لايوكف كلبك ..

ضحك بهدوء شبلاج ياابه سابحه بالعصير شنوو ..

ابن اخوك ردمني فلشني اني والصينيه ..

باوع على فهد واكف على صفحه يضحك ..

يله ياابه دشي بدلي ملابسج عين وضربج يابه لاتخلين بالج

عفتهم وصعدت ، ملابسي تقطر عصير ، خرب اي والله مابيه بعد لا البس ولا امكيج ولا اسبح ..

دخلت للحمام سبحت بسرعه ولفيت البرنص وطلعت ..

دخلت للغرفه سديت باب ، انداريت جفلت من شفتها بغرفتي ..

اعوذو بالله شنو انتي ..

ماحجت مبتسمه تباوع للغرفه  .

شدخلج هناا لو انتي متعوده تجفتين لغرف العالم بدون اذن ..

ماحجت ولا ردت تفتر بالغرفه وتباوع لتفاصيلها ..والله وكت ، جنتي مداس جوه رجلين لمرت عمي وصرت ام لبيت تحلمين بي ومرت رشيد هم ..

اندارت علي مدمعه ، صدك من يكولون حظ الكح**..

الزمي السانج رقيه ، مو اني دخلت لرجال لغرفته وتبليه عليه وردت اهجم بيته .. مو اني الي غدرت بوحده جانت تنزع الثوب مالتها وتنطي الي ، مو اني الحلفت جذب بس حتى اخذ رجال من مرته  ، ثمني كلامج واعرفي منو بينه الطالعه عن طريق ..

سكتت ماردت ، بعدين حجت بغل ، هو هذا احقر شي بيج شايفه نفسج ؛ الثوب الي جنتي تنطي الي مو حبا بيه بس حتى تحسسيني انتي احسن مني وابوج مهتم بيج اكثر من ابويا ..

من جنتي مصاحبتي مو حبا بيه بس حتى تحسسيني اني اصغر منج وجاهله بلا علم ولادراسه ودليل جنتي دائما تضحكين على عيشتنه ولبسنه ..

بطلي حقد ، ابد مافد يوم فكرت هيج وداعت بابا ، بس انتي  مريضه عبالج كل ناس مثلج ..

والله مااعوفج مرتاحه ابد الا ادمر حياتج ..

تخسين والله عبالج هناء الي جانت تامن بيج وتنطيج ضهرها ، هالمره اذا تقربتي مني اكو من يوكفج عد حدج
.

قصدج رشيد ضحكت ، يجي يوم وتعرفين رشيد شنوو الا تعضين اصابعج ندم انو اخذتي ..

شفتج متي عليه وردتي بس يعبرج ..

اني مو مثلج اني اتحمل الغدر والخيانه .. بس انتي اذا عرفتي رشيد يخونج تتحملين ..

سكتت .. هاي الاوهام الي براسج متأثر علي ، سوالفج القديمه متعبر علي بعد ، يله بره غرفتي راجأءا وراي لبس ومكياج عروس بعد تعرفين ورجلي بره ينتظرني ..

ضحكت  :- يالله ننتظر شعدنه قابل نتسلى من نشوفج بيت اخوج وتطلبين طلاك ..

طلعت وعافتني بصفنه ، دوختني النذله الله لايوفقج، مثل الشيطان من تزن براس الواحد ..

طلعت ملابس وجهي مغندب لبست وكعدا اشسور بشعري  .. خلصت مكياج ونزلت ، تلكتني علا سالتها شعجب خليتي رقيه تصعد لغرفتي ..

ياا شوكت صعدت .

من طلعت من حمام لكيتها بالغرفه ..

مادري بيها والله غافلتني ..خما جانت تسوي شي ..

لا بس تتفرج لكيتها ..

خلصت السبعه وجهي مكلوب كرهت اليوم كله غثتني ، مااجذب عرفت شلون تخرب علي ، هيه تعرف عقلي وتفكيري ، صحبتي وياها مو قليله اربع سنوات ، حفظتني حفظ وتعرف الي يغثني شنوو ..

وراها بايام  اخذت اذن رشيد حتى اروح لهند ، نطاني فلوس كال خليهن جوه طفله ، اخذتهن منه ولبست جبه ، طلعت اني وعلا ، من تزوجت لي هسه ماطالعه بس من بيبي عزمتنه على العشه وره سبعه .. بعد ماطلعت لاي مكان ،

دخلت لبيتها ، صحت عليها ، طلعت من غرفتها تمشي كوه خطيه شافتني ابتسمه رحت بوستها وسلمت عليها وراي علا ، دخلت للغرفه اشوف طفله ، يمه اسم الله ايه من جمال ورديه تجنن ..

خليت الفلوس جواها كتلها رشيد دزهن مو مني .. هديتها بعدين اني اجيبها الها ..

كيفت علينه تكول محصوره بالبيت ميته وحدي ،

امي ماتمر عليج ..

لا وين يمعوده حايره بجهال جاسم موتيها بيها حيل هيه بعد تركض وره جهال خطيه..

الله يعينها هسه اني ادز عليهم بالنهار يمي احير بيهم ..

علوه خطيه والله تلهث مابيها ..

خالتي شلونها ماشفتها حتى بالسبعه ..

ياا ماعرفتي ..

شنوو ..

غير خالتج حبله ..

عليج الله ..

والله العظيم وعمج حاصرها بالبيت مايخليها تطلع باب البيت يخاف على ابنه عبالك ممخلف كبل ..

علا ضحكت كالت راح يرجع صغير عمي . ضلينه يمها شوي سوينالها كيك ونظفنه الها البيت وطلعنه ، علا انقهرت عليها كالت بالجذب مااجني حمواتها ساعدنها شوي ويدرن بيها توه جاايبه ..

مانريد شغلهن يمعوده بس يكفن اذيه عنها ..

كالت نمر على بيبي ..

لا دخيلج ..

تحبج والله ليش هيج ..

اني هم احبها بس تموتني بكلامها تغثني هسه كبل تسألني مااشلتي لعد ...

رجعت للبيت ومن يومها كمت ادز على ولد جاسم جون يمي ، رشيد يشوفهم بس مايحجي ، صح فقره همه ومايكسرون لاغراض لا يتلفون شي ، بس جاهل هم لازم يطلع صوت ويلعب ويهوس .

تالي فد يوم نايم الظهر ونزل عيونه براسه  سألني راح يضلون يجون يمنه يوميه ..

جنت اغسل مواعين التفتت على صوته فزيت ، هاا ، ليش مضوجيك ..

سكت ..

احجي ترى فقره همه مابيهم اذيه  ..

مو هيج بس اناا ماجنت اجيب فهد ، ولا ادز عليه لخاطرج حتى لايتعبج بالركض وراه ، بس اذا الج خلج وحيل للجهال ، خلي ادز على فهد ليش نغم مبتلشه بي . 

اي عادي جيبه خلي يلتهي ويه جهال شكو بيها ..

خوش عجل ..

وراها بيوم جابلي فهد يااايمه ومااادراك ماافهد .. والله عليه وكااحه ماشفتها بطفل ، ماينجرع ، صح كلبه طيب ومايضرب ولا يغلط لان هو اصلا مريض لاحس ولا سمع ..

بس مايكعد بااهش لو كهرباء لو مطور مال ماي لو جام لو سياره مال رشيد  ينبش بيها .. مره لكاه جوه سياره مدري شيبحوش بيها تخبل رشيد جان داسه ومايدري بي ..

ضل يصيح شلون لاهيات عنه جان مردته ..

ضجت بومها شلون عاط بيه والله تعبني مركضني طول اليوم وراه ، موتني نوبات اكعد ابجي ، لان اجفت عليه الكاع خال راسه بالمبرده لو اصبعه بنقطه مال الماطور ..

علا وراه وراه مثلي ، بس هم تغفل عنه ، لو اطب للحمام لو للتواليت، ماينعاف خمس دقايق ابد ..

بيوم علا كالت ادخل للحمام لاتغفلين عنه عفيه ، والله كعدت كباله مباشرتا اراقبه ، شوف هيج خلك عدي ،كثر مااعرف شكد باهش ،  عيني على ولد جاسم بالحديقه ، خفت من حسيت مالهم حس وخنسو ، نوب صوت سياره رشيد اجت..

كلت لايدوس واحد ومايدري ..

طلعت اشوفهم ورجع ، لكيتهم يلعبون بالطين وملتهين بعيد عن الكراج ...

ماطولت خمس دقايق رجعت هدرت جوه الاكل لا يحترك ، اباوع من جامه رشيد طبك سيارته ونزل ، رجعت بسرعه لفهد اشوفه ، لكيته خال الخاشوكه مال الجاي رفيعه بالنقطه ..

عطت بي كبل ولك يااا خرب ..

ركضت داشلعها من النقطه ..هو واكف ويضحك خبلني ، لزمتها داشلعها هو كوم وشغل النقطه ، نوب اني حركتها .

والله  شلون واحد وشالني و لزكني بالكاع عطت عيطه ..

ماحسيت غير مدده بالكاع اريد اشيل جسمي مااكدر لشتي ترجف ، علا طلعت بطرك الخاولي لافته ولج عزاا شبيج ..

رشيد ماحسيت غير فوكي اشتعلو عشيرتك اي والله سألوني .. شبيج .. عبالهم ضربني ...

اني ماحجي بس مدده بالكاع كوه اتنفس اريد ابجي ، حتى الخنكه تفكني ماكو ..

رشيد حظني يرجف شبيج يكلبي شبيج احجي هناء شبيك يبه .. كعدني لحيلي يهز بيه شهكت وكمت ابجي نوب لزمتني رجفه اشرتلهم على نقطه ايدي ترجف ..

ثنينهم باوعو على فهد هو واكف بص النقطه ، خانس ميت خوف خطيه ..

اشتعلو اهلك ولك شنو انته من جاهل .. كعدني على تخم وخره من نقطه نتر بي ، اكعد هناا كون اشوفك تتحرك ياافهد بالقرعان اربطك امالك حل انته ابد ، ركد ولك ..

اني اباوعلهم واديه وجسمي يختض ، علا تاشرله اكعد عمه صارت اووى ...

راح جاب بلايس وشلع الخاشوكه ، اني تمددت على تخم ، علا راحت لبست ورجعت علي تركض شبيج وجهج دعه كركم شبيج ..

ماحجيت بس دايخه وبطني اذتني حيل ، صار عندي مغص كطعني ، غمضت عيني ابجي بهدوء من خوفه ومن الالم ..

رشيد كعد كبالي شبلاج ياول لاتخلين بالي شبيج ، احجي ..

مابيه شوي بطني اذتني هسه اكوم .

شنو مغص لو من خوفه انهبطتي ..

ماحجيت ساكته لزمت بطني زاد الالم عدي ..

شبيج هناء احجي ، كومي يابه كومي داخذج للمضمد هاي مو حاله ..

كومني كوه وعطت من بطني ، نحنيت لازمتها ابجي

شبيج ياابه احجي ..

بطني مووتني ..

صاح علا جيبي عبا يابه ، رفعني من الكاع يوديني للسياره ، هو بس شالني كال هاي شنوو هناء ..

شنوو ..

فك عيونه على وسعهن ، وجهه اباوعله اصفرر..

شكو باوعت ابايده دم ...

شهكت باوعت لنفسي بيه دم شهكت ابجي يمااا هاي شنوو ..

اااش يابه اشش مابيج شي لاتخافين .. عاط ولج علاا وين وليتي عباا بساع ..

اخذني ركض للسياره .. خلاني علا اجت جايبه العبا ، كللها دكي على الحجيه تتحظر داخذها ويانه بين ماوصل لبييت ..

ركب ركض للسياره وحركها ، اني مدده وره ولازمه بطني ذبحتني ، يباوعلي من جامه حاجاني ..

هناء عيون رشيد شبيج شتحسين ..

ماحاجيته لان الالم زاد عدي بس اون ..

احترك لشتك رشيد اي والله وكف  كبال بيت جدي وصوت الهورن مالت سيارته طرشني طرش يدك ويرجع ليوره ..

اجت بيبي تركض .. شبيك شبلاك ولك ماتطي مجال البس شحاطتي ولا الفوطه .

استعجلي حجيه هناء مو زينه ..

شجاها البارحه مثل الورد .

فتحت الباب الوره من شافتني شهكت يااايجده شبيج ..

شسويتلها ولك ..

ماحجه هو شخط سياره ومشه ، واني بس ابجي بهدوء تسال تريد ارد ماكوو ماطلع حرف مني حايره بروحي ..

مو احجي وياك رويشد شسويت للبت شبلاها تون يااجده شجاك وياها بيج طالبها ..

ممسوي شي خجيه تكهربت ..

ياايمه منين اجتها الكهرباء ..

سدي سالفه حجيه مو وكتهاا ..

نزلني يم المستشفه ، ركض قبلنه جاب الكرسي واجه ..

كوه كومني شايلني'شيل مثل الطفل خالني يم كلبه ، شايلني ويحجي يروح رشيد شبيج لاتخنسين احجي وياي ... كعدني على كرسي اني بعدني احوص من الالم ..

دخلتني بيبي للنسائيه هو عينه علينه اباوعله وجهه دم ، ويفتر ورانه ،

دكتوره من شافت دم كالت كبل للسونر ..

بس اخذت سونر كالت تدرين بنفسج حامل لاا ..

بهت وجهي حامل شنوو دكتوره بعدني عروس ..

شكد صارلج ..

تقريبا شهر ..

اي حبيبتي حامل بالاسبوع الثالث هذا هياته كيس مال الحمل بعده ممتكون طفل ولا بي نبض بس مهدده بالاسقاط ..

بيبي صاحت يااايمه صلاوات على محمد ..

غمضت عيوني يااحمل يااربي والله مو وكتها ولا جان بالي شبسرعه ..

رجعت راسي على سديه دموعي تجري ابد مافرحت ، بيبي تخبلت نوب تصلي على محمد نوب تبجي نوب تبوس بالدكتوره ..

شدتلي مغذي كالت راح اضربج ابر مثبت وره مطلعين ممنوع تعرفين شنو ممنوع الحركه عدا  الحمام ، لان بعده حمل باوله ونوب مهدد ديربالج ..

طلعت واني جن شلت حمل جبال ، كبل غمضت عيوني مهمومه ، بيبي حاجتني تبوس بيه مارديت خفت اخرب فرحتهم ويتفاجئون برده فعلي البارده ..

دخل رشيد اسمعها تبشره هو يضحك ويحمد ربه ونوب يسالها عليه احسه مايعرف شيحجي ، اجه تقرب عليه هنوو عيون رشيد نايمه .

فتحت عيوني على كيف ..

ابتسم بوجهي  راح يصير عدنا طفل ياوول راح اصير اب وانتي امه ..

ابتسمت بتعب ..

فرحانه مووو ..

سكتت خايفه ..

عليش ياابه والله مااهدج وياج وياج اناا ..

هزيت راسي سااكته ابد ماجان بالي طفل ولا محظره اله نفسيا .. رجعت غمضت عيوني ارتاح .. اسمعه يحجي ويه دكتوره ويسال شبيها ليش هيج خامله ..

كالته طبيعي جدا حامل واحنه هم نطيناها مسكنات فهذا شي طبيعي  خمول تقيى عصبيه اي رده فعل طبيعيه لان الحمل يخربط الهرمونات ...

بيومها طلعت لكيت الامه مكلوبه بيتنه كلها موجوده ، بس دخلت للمطبخ شفت نغم وعلا مركبات للعالم ، برغم رشيد وصه من بره وعزم عمامي ، بس هم سون الواجب وركبن ، شفتهن حاظناته ويبجن اخواته وهو الوجهه احمر دم .. باقي شوي ويبجي بس يستحي ..

شايلني شيل ، مااخله لاامي ولا بيبي يسندني هو تكفل بيه ، بس دخلني للغرفه وخلاني بفراشي وغطاني ..

نوب يعدل مخده وراي نوب يسألني مرتاحه متوجعه ، تحسين بشي ، ظهرج يوجع ، احس بي مايعرف شيكول .. واني مسطوره من مسكنات ،  غمضت عيوني ، هو كعد كباله خال اديه منا ومنا ..

ماحجيت ولا تحركت حاولت اتهرب ..

حاجاني هنوو ..

فتحت عيوني على كيف باوعت بوجهه مبتسم وعيونه مدمعه ..

راح اصير اب ولج ، عض شفته ، راح يجي طفل يصيحلي يابه ..

راح يشيل اسمي ، يصير سند الي ويورثني .. جانت بنت او ولد نعمه من الله .. المهم ابني من ظهري ، تعبي وسهري وشغلي ميروح للغريب يروح اله ..

نوب اجه منج ياافرحتي والله بجه دموعه نزلن ، راح يصير عدي سند بهل دنيا ويشيلني بكبرتي .. بعد مااعتبر نفسي وحيد راح تصير عدي عايله ..

بداعت ابوج خلفي هوواي .. دموعه
كامت تكت اول مره اشوفه يبجي ، تأثرت حيل واني اكتشف هالبشر يبجي طلع يبجي  ..

خلفي هوواي هناء اريد عزوه الي ، اريد ولدي كون يسدون عين شمس ، كون من اوكع يتلاكفوني ، كون من يصير عليه شي مااشيل هم الحريم الي وراي ،

واريد احجيلهم شلون حبيتج وردتج شلون حاربت بهل دنيا وعشت بيها وصرت ...

بجيت وياه جريت عليه وحظنته .. خال راسه بركبتي سااكت بس احس بدموعه دافيه على ركبتي ..

انقهرت عليه حيل ، حسيته وحيد وهسه راح يجي السند الي جان يدور عليه ، على كولته عزوه الي ..

بالنص ساعه هو بحظني سااكت رفع نفسه وجهه احمر ، ادري بيج خايفه وشايله هم وممستعده للطفل ، بس وداعت امي اناا وياج مااخليج ابد ..

فهد راح ارجعه يم نغم لان بس هيه تسيطر علي ، ورواء راح ادز الحجيه وامج ونحاول نرجعها لخاطر تلم جهالها ولايضل بالج يمهم ..

هزيت راسي مبتسمه ..

باسني بوسه طويله كطع نفسي وخر من يمي يضحك .. عافني وطلع فرحان طاير ..

لزمت بطني شجابك ياامي شلون راح اخلفك واربيك هو اني نفسي ممدبرتها ...

حملي ماجان هين ابد ، خاصه لان مهدد بالاسقاط شهر واني مجطوله على ظهري ، عدا الحمام رشيد ماتقرب ولا وصلني ، مداريني مثل جاهل ، يخاف علي لايوكع ويتاذه ..

  الاكل تصعده الي علاا خطيه ابد ماتذمرت او شكت البيت كله عليها نوب تجيبلي الاكل ليمي ، نوب زواجها قرب اجلته شهر لخاطري تكول منو يضل يمج  ..

رشيد هو يسبحني وينشف شعري ويمشطلي .. لحد مامر شهرين نوب بلش لعبان نفس ..

حتى الماي اتقيئ منه ومااتحمله ، خاب ريحه الاكل امووت منها .. انطيني ليمون لو طرشي بس هذني والباقي اتخبل منهن ..

رشيد او عطور رشيد اي شي يخصه نفرته ، نوب مو اشوفهن لو اشم ريحتهن اكعد اتقيى سطله الزباله بصفي وين مااروح ..

روحي طلعت فتره التنسى موتتني ، يابخاخ بيدي امااصدري يااما سطله زباله اتقيئ بيها ..

عرس ياسر قرب حيل وبلش يحظر بي ، ضلت بنفسي اريد اروح ورشيد تخبل وين تروحين وانتي حملج متعب ونوب تمشين وتتقيئين ..

بيوم الحنه بجيت بجي ماخلاني اروح ..

امي وخالتي وهند راحن واني ضليت ، نفسيتي صفر كلش .. منا حمل ومنا لعبان نفس دوخه ونوب عرس اخوي ومااحظر كلش تأذيت وتخبلت ..

رشيد مو اقل مني صار شهرين نافرته .. وحتى للغرفه ماريده يدخل ، من يتقرب كبل اصيح ابعد .. نفسي لعبت هو يدري روحي ماتتحمل ، لان يشوف بعينه بخاخ بيدي وسله بصفي ..

بيوم الحنه قفلت باب ماخليت احد يدخل .. حرت بروحي وبالكابه الي صابتني .. كرهت الحمل وكرهت الي يفكر بالحمل .. اني هيج فاهيه وماتحمل على كوله بيبي لو هو الحمل متعب بشكل ..

بليل دك الباب حاجاني مارديت عليه ولا نفهت اله كارهته حيل ..

دك دك لحد ماتعب وراح ...

تمددت على فراش ونمت .. ماحسيت على ريحه عطر اكرهه ..

كما لحيلي وجهه نعفس رشيد كاعد كبالي كبل نترت بي خررب وخررر عني ..

شجابك هناا اطلع يمعود دفعته وسديت خشمي وخرر رشيد لعبت نفسي ..

شنو سالفه هنااء هاي مو حاله بس انتي حبله ..

وخرر يمعود ..

اجه حظني مشتااقلج يول بس حظن واولي ليش نافرتني

دمعت عيوني خرب بليسك والله روحي راح تطلع وخرر راح اتقيئ ..

حظني حيل نوب باسني كطع نفسي ..

دفعته وصرخت وخرر انعل يومك ..

توه تركض للحمام اتقي عثرت وكعت على ركبي وضلت اتقيئ بالكاع ..

لزمت بطني ابجي وارجع ارد على راسي ..

ركض عليه ااوف يالله شبيج .

نترت بي .  لا لا تجي يرحم امك وخرر عني وخرر  ...

كمت وكفت اريد امشي متت معتي احسها محتركه ، نوب دخت ضليت اشهكت  كعدت بالارض ..

اباوع عليه  نزع ملابسه واجه عليه راحت الريحه .. العطر بملابسي ياابه مو بيه اذا تردين اغسل واجي ..

سكتت ابجي مأيسه من وضعي .. شالني من مكاني ودخلني للحمام ، فتح المي عليه وعلى ملابسي كال خلي جسمج يبرد شوي ، بين مااجي ..

اسمع صوت سطله المسح تكركع وخلاها على الارض ،

كمت على حيلي نزعت ملابسي شمرتهم على صفحه لعبت نفسي منهم كعدت بالارض بالحمام كورت نفسي دايخه ..

دخل هو شافني نازعه باوع عليه تردد يتقدم ؛ يباوع بوجهي ، مديت ايدي تعبانه اريد واحد يساعدني اجه تقرب ..

حظني بلع ريك يااول تعبان اناا هم عينيني لاتسوين هيج بالقرعان حيلي ينهد...

بجيت اني هم نفستي تدمرت كلش  .

شتردين ياابه ..

اخذني لبغداد ..

بهل حاله ياابه تردين ترحين شكواتج والله ..

ابتسمت عليك الله متت رشيد نفسيتي صفرر ..

سكت خير انشالله دغسلج هسه وروحي نامي بالاول ارتاحي ..

لا انزل جوه شوي اختنكت من غرفه ..

جر الغسول وغف اليفه كعد يليف الي .. كل شوي عيني تطرف عليه ، وجهه نكلب احمر ..

اني اراقب بي مبتسمه ..

شوف شوف اثاري الضنه شكد غالي ، والله لو مااحامل مايفكني منه .. لو يوكع صاروخ بصف البيت .. بس عبن حامل  .. رابط نفسه ربط بس اشوفه يبلعم ..

ضحكت ..

صاح وجعع حقيره لو مره حوك .. جان عرفتي ادارين رجلج .. حتى لو حامل .. نسوان حوامل والضاربهم الضيم وتشوفيها تلعب لعب ..

عمي اني مو مره حوك ، شجابرك انته كاعد وتسبح بيه وتبلعم ..

اكول ياابه هناء جري عدل واحجي وياي زين .. لا بالقرعان لو مو تتقيئين .. لو اعرف تسويها على روحج مااهدج ..

والله صدك خنست خنسه مافكيت حلكي لان اعرفه ..

راح جاب ملابس الي ويدردم ، طاح حظك رشيد هو انته هم عندك حظ ، بدل ماتصير زلمه و تتهنى بمره صرت داده الها وتربي وتسبح وتوكل وتشيل وتخلي ..

لبسني ملابسي بنتر خفت لايملخني نوب ، حاجيته رشيد يكلبي ..

رفع حواجبه متفاجئ .. هااا

خلي اروح للعرس هو يوم واحد ونجي عفيه عليك الله ..

دار وجهه ساكت ..

بداعت امك متت اختنكت والله ..

طريق طويل هناء مو زين والله ..

سكتت ضايجه ، هو يوم وهم راح تحرمني منه ..

خايف عليج ...

عرس اخوي حرام عليك ..

اخذني للغرفه تنزلين لو تبقين هنا .

انزل شكو ضاله هنا مو كاافي صار شهرين محبوسه ماطالعه .

نزلت وياه على كيف الوجهه مكلوب ماتحاجه مزنبره ..

هو ماحجه ولا نطاني مجال ولا رد عليه .. شافتني علاا كالت توه نور البيت ولج والله شتاقيت الج ولسوالفج تبتسمت من جذب ضايجه .

هيه خنست من شافتنه مكلوب وجهنه .. هو راح يبدل ويغير ملابسه ..

كعدت يمها بالصاله سالتها شحظرت على زواجها كالت والله امه للولد ونغم هنه الي حظرن اني كلشي ماعرف بهل سوالف ..

كعدت تشوفني بجهازها نغم اطكلها صور ودزهن  الها تختار .. لو الولد من يدك عليها بليل ، تكول حباب هو يشبه رشيد بطبعه بس ذاك يضحك وسبورتي مو عصبي..

كتلها اخوج مايقبل اروح لعرس ياسر ..

يخاف عليج والله لو تشوفي من يسمعج تردين على راسج شيصير بي يكوم يحوم يم الغرفه ..

مليت من كعده راح اموت والله طكت روحي ..

الله كريم يمعوده عود شوفي صور ..

درت وجهي ميته قهر نزل هو وجهه مكلوب ، ماحجيت ولا باوعت بوجهه .. وكف كبالي اذا رحنه ياهناء يوم واحد على كد العرس ونرجع غير هيج ماكووو..

باوعت بوجهه مبتسمه جن منتصره بحرب ..  هاهيه ماشي ..

مشه وراد يطلع ، رجع اندار عليه شوو كومي باله ..

هاا

كومي ياابه دشوف ..

كمت لحيلي ..

ابتسم سمنانه يول ..

وين ترى بس شوي كرشت ..

ضحك صاح لعلا لاتسوين عشى راح اجيب وياي ...

صدك لل٨ دخل وياه كوم علاليك ، جايب عشى مشاوي فرشتهن علا وجابت الببسي وكعدنه ناكل ..

شوي وخرت كتلهم بعد مابيه بطني ماتتحمل اكل زايد ..

تمددت على تخم بالصاله همه كملو اكل وشالتهن علا ، هو اندار يحاجيني ، مفكره شتلبسين بعرس اخوج موو ..

اي عدي فستان مال عرسي مالابسته .. .

من كل عقلج حامل وعدج بطن تلبسين من فساتين عرسج ..

ترى بس شوي كرشت حتى وزني مازاد ..

لا ياابه تردين تخنكين بطنج بهل فساتين .

بهت وجهي شنو رشيد شبيك جنك غيرت رايك ..

لا يابه ماكو هيج شي دكومي يله نصعد فوك كومي ..

كومني كوه سحل ، وياه صعدنه فوك ، تمددت على الفراش اكمل نومتي هو ضل واكف فوك راسي ، غلست عليه ولا عبرته سمعته يتافف ويطكطك بالغرفه تالي طلع وركع باب حيل وراه ...

مابيه حيل وحمل متعبني هو مزنبر عليه ، حق يعذرني شنو هاي .. كملت نومي صحيت الصبح ساعه بال٩ الصبح ، توقعت يكعدني من فجر نروح على براد الوكت ..

كمت فازه هذا بس لاصدك مايخليني اروح والله اكلب دنيا ، نزلت بهمه مزنبره ، طلعت بوجهي علا ، كتلها اخوج وين .

كالت طلع شبيج خما اكو شي ...

كبل كعدت على درج وبجيت اخوج ناوي يموتني من صدك ليش هيج يسوي  .

ليش شكوو ..

كلي عود اوديج لعرس اخوج وهاي شوفي طلع وخلاني ..

لا ولج هسه يجي .. كال عدي شغل شوي واجي ..دكومي دكي عليه شوفي خاف المعمل دزو عليه ..

كمت كبل دكيت عليه رد عليه مترهي ، خيرر شكوو ..

شلونك ..

شتكولين ..

حجيت بترجي وياه :- رشيد مو وعدتني وينك  ..

جر نفس ضايج :- جاي بالدرب يابه حظري روحج ربع ساعه يمج ..

ماجذبت خبر طلعت ركض ليفوك دخلت للحمام اسبح ، بعدني بالحمام وسمعت صوت طبه الباب الغرفه ، عرفته اجه ،

طلعت لافه نفسي بالبرنص ، شفته كبالي وجهه مغندب ، ابتسمت الله يساعدك ..

ويساعدج ..

انداريت داطلع ملابس شفت فستان معلك بالباب عقدت حاجبي اندايت عليه ..

هذا شنو ..

ابتسم عجل انتي وبطنج تردين تلبسين ملابس ضيجه وتمردين ابني ..

ضحكت هاي خايف على ابنك وطالع من صبح تجيبه مو ..

عجل شلون ..

جريته اشوفه لونه بنفسجي فااتح ، وكلوش كدرت عليه ، والله فت حتى طوله ، نوب شكله نازك وراقي ..

اجه تقرب عليه عجبج ..

اي حلوو ..

اطلع شو داجربه  ..

شنو اطلع ..

داجربه رشيد شبيك ..

املاحظه نفسج هناء لااا صار شهرين ..

سكتت حامل وتعبانه ..

هاي ياهي تحبل اطلك رجلها شنهي ..

نفسي متتحمل والله ..

جرني عليه عجل تحملي'شووي ..

حاولت وياه اوخره ماقبل نتر بيه وضل يحجي وانتي صايره فرد نوب مهمله ، تالي خنست ،

وخرت منه ضايجه رجعت للحمام اسبح مره ثانيه وروحي طافره ، هو مو اقل مني فوكها يعني اخذ الي يريده وهم كالب وجهه ، اسمع يدردم بالغرفه ، انعل ابو الي يحبلج بعد ، مو نومه طلعت سم ، بس تتنعوص عبالك مو ماخذ مره ماخذ جاهل ..

طلعت ضايجه ، هو دخل للحمام وراي وركع باب ، هذا شبي'صدك يحجي ، لبست ومكيجت هو بعده بالحمام ، طلع منه والوجه مكلوب ..

كعدت الف بشال هو بدل وماباوع بوجهي ، توه نطلع من الغرفه ، باوع عليه ديشوف لبسي كلي شوو افتري بالله ..

درت وشوفه كال عبالي ضيج ..

نوب رفع راسه لوجهي بهت وجهه ..

جر نفس ضايج مكياجج طوخ هناء مو حاله هاي ..

ترى عرس اخوي رشيد خلي اتهنى يرحم امك ..

سكت ومشه جدامي مزنبر ... شلت جنطه وطلعت وراه ، طلعنه  من بيت تقريب ساعه بال١ ظهر ..  درب كله هو روحه بخشمه نوب اني درب كله اتقيئ ، كل شوي انزل واغسل وارجع .. لا ضل مكياج لا كشخه تبهذلت بهذله ماصايره ، متت يله وصلنه صار درب عليه مضاعف ، لان كل شوي ننزل ربع ساعه ونرجع نصعد ...

وصلنه للقاعه ساعه بال٤ كعدت بالسياره اغسل واعدل مكياجي وارتب ..

هاي موتني نفسج على جيه موو هااج يله حلوه بهذله هااي تعجبج ..

مارديت بس ارد نتعارك هو اصلا يريد حجه والله كبل يفر سياره ونرجع ..

دخلت للقاعه كلها موجوده خوالي وخالاتي وبناتهم ولدهم .. يابه صار شكد مشايفتهم ..

نوب شفت حبيب كلبي عريس كبل بجيت هرمونات الحمل كلبت نفسيتي كلاب ، باركته اله وبوست ميس، رشيد مادريت عنه التهيب بالعرس وبالناس .. وبخوالي ولدهم الي جايين من اربيل ماشايفتهم صار بالسنه ..

امي وهند وخالتي ملتهيات بالناس يعزبن شافني تفاجئو شلون رشيد وافق وجابني ، خالتي سعاد بطنها لخشمها خطيه كوه تتحرك ضحكت والله يالله بتها عروس وهيه حامل وتفتر  .
عمامي مو كلها اجت اغلبهم ماحظرو بحجه بعيده ومانكدر وقاعه وناس منفتحين واحنه مانقبل عيب ونستحي  ..

كعدت بصف بنت خالي اسالها على كليتها وهيه سالتني على زواجي واحواله .. اجه ابن خالي رامي طالب كليه قانون اخر سنه اله ويتخرج من جامعه اربيل ..

ذكرني بالايام الي جنت بيه يمهم ، وشلون جانت حالتي من اجيتهم مهزومه ..

ضحكت لاذكرني يمعود ساعه سوده طلعت بيها ..

لويش ياابه جنج تندمي ماتزوجتي من وكت ..

لا مو هيج بس جان قرار غلط وتأذيت من وراه هواي حتى اهلي ..

تنذكر وماتنعاد ..

جاي نسولف ونضحك وجفت علينه رشيد .. ماسلم كبل حا
اجاني معصب صار ساعه ادور عليج ..

كمت وكفت لحيلي عرفتهم عليه سلمو عليه وجهم باهت لان شافو ضايج ..

هز راسه هو وكال يله ياابه ورانه درب هم يله بعدني محاجيه جرني من ايدي حيل ومردها ..

تمشيت وياه متوجعه ..

اشرت لاامي باي راح اروح ..

ماخلاني افتهم شي سحلني سحل  .

شبيك اااي تأذيت يمعود ..

طايحه الحظ عايفه رجال طول بعرض وراج ورايحه تتمشين وتسلمين وتتمضحكين شنوو ..

مو بعينج ولج ولا تنطين عين انتي . عايفتني بنص ناس غرب واني وياهم مو على صلح ، ورايحه تتمخترين بطوله ويه الولد خوالج ...

ماحجيت ولا نطقت حرف خفت لايضربني سكتت بس ضليت ابجي ..

صعدني بالسياره وشمرني بيها ، درب كله اشهك ، يحجي ويرزل ومانطقت تالي سكت ، عبالي نرجع لديالى بس انتبهت لاا بعدنه بغداد ، نوب دخلنه للمنطقه مالتنه قديمه جنه بيها ،  هذا شارع مال بيتنه قديم ..

سكتت عن بجي ومسحت دموعي وين جايبني هذاا .. شارع صح اضلم دنيا ليل تقريبا ساعه ب٨ بس عرفته شلون مااعرفه واني كظيت اجمل ايام عمري هناا ...

اوووف يااحنين الماضي ، درت وجهي على بيت اسحاق متغير والباب مالتهم متغير لونها ، وكف كبال بيتنه .. بهت وجهي وجسمي رجف ..

انداريت عليه امسح بدموعي ليش جايبتي هنااا ..

#يتبع ..

باارت اكثر من  ٤الاف كلمه .. شكد جاي احاول اختمها بس باين الها بعد بارتين 😑

تفاعلكم الجميل جدا يسعدني 💜