رواية ثأر مهري منهاا الفصل الخامس وأربعون 45 - بقلم اسماء ديمير

《《البارت ال41》》

#ثأر_مهري_منها

بقلمي "أسماء ديمير "

ضليت واكفه بعيد اباوعله ، هو لو مو هو ، لا هو ياهناء شجاج معرفتي وانتي سنين تعرفي وهاويته ، اااخ يااسحاق شلون صاير ..

والله ماعرفته من التعب الي بوجهه واكف بصف مكينه الكردد كارد يسحب فلوس وبصفه علاكه بااكاع ..

عقدت حواجبي بحزن عليه وعلى شكله و وضعه ، شصار بيك شعملت دنيا وياك ، وين الكشخه ، وين بياض الوجهه ، والشعر الي جان يلمع لمع ، ورتابه تلفت النظر كله ماكوو ،

ضعفاان فوكاها ظهره منحني من تعب ، جان يحسب بالفلوس خلص وخلاهن بالعلاكه ، شالها واندار يطلع ،

من رفع وجهه انصدم من شافني واكفه كباله ..

اباوع لعيونه حتى مارمشن ، دمعت عيوني خجلانه منه ومن الوضع كله ، بلع ريك وجهه باهت مابي حياه ، وكف صافن ،  تقدم عليه يمشي على كيف ..

اني على وكفتي حسيت رجليه انشلن ، التفتت يمنه يسرى خاف احد بشوفني ، رجعت باوعت عليه مقهوره ..

وكف كبالى ، عيونه تحجي بس ساكت ، جوه عيونه سواد ، باين سهر اليل عليه ، دنجت راسي ..

همس شلونج ..

رفعت نظري عليه ، هزيت راسي زينه وانته ..

رمش بهدوء وابتسم تك خد رفع اديه بتعب هذا حالي شلوني باله شتشوفين ..

دمعت عيوني ، سكتت ماعرف شحجي سألت ابوك شلونه ..

جاي يمووت ابويه ..

دموعي نزلت ، جان اكو مقاعد.خاليهن بصف حايط ، رجليه ماتت من الهم الي شفته بعيونه ..

كعدت عليهن بتعب ، الله يعينك ويفرج عنك ..

شوكت تفرج عليج انتي ..

بيد الله كلشي بيد الله ..

بعدج يم عمامج ..

هزيت راسي اي ...

وجهه يفتر ماثابت علي احسه متوتر :- شصار ذاك اليوم يهناء من خابرتيني وكتلج تعاي وياي ..

همست :- ماصار ،، الحجي مايفيد اسحاق ، الله ماكاتب النه قسمه ..

دار وجهه :- اني هم مالي بعد حيل ، ابوي هد حيلي ، ابوي موات يهناء ماعندي ذاك الخلك ولا ذاك حيل .. تغيرت كلش ..

رفعت نظري علي :- ادري بيك تغيرت حسيت بيك من يوم خطبتنه ومهرنا ..

- ترى تركتج مجبور اخوج تشرط عليه شروط تكسر الظهر جنه يكول ماانطي اختي بس بطريقتهم .. عمامج ظلام مايخافون الله وابن عمج ساس البلا .

- انته هم الك ايد اسحاق اكو بنت جانت ادك عليه ودزلي صورك وانته بيت غريب وماخذ راحتك حتى بلبسك ..

- ياا بنت خبصتيني بيها ..

- والله شبيك مااكذب ، حتى اجتني لبيت جدي وكعدت تسولف عنك وتكول يكول عليج متسوين نعال فوكاها شوفتني صورتك ، بطرك البرموده وفالينه تعلاكه ..

- استغرب اشر على روحه .. هاا اني  ..

- اي والله شبيك ..

- هاي شلون شكلها للمره ، شنو جنت لابس اني كتيلي ..

- تطلع بالثلاثين عمرها سالتها على اسمها تكول اسمي سمرمر مدري شنوو عدها وشم باصبعها هم مكتوب اس بالانكليزي ..

صفن بوجهي ، عقد حواجبه :-  عدها وشم باصبعها صغير وفوكاه تاج موو ...

تفاجئت من عرفها ، رفعت حواجبي تعرفهااا يااسحاق طلعت تعرفهاا ..

- ضرب جف بجف معصب يابنت نعال ياساقطه ، هاي من بعت البيت واشترينه شقه على كدنه ، هيه جوارينه شقتها لزك بشقتنا ، ولج من كعدنا بالشقه جديده هيه لزكت علينه ، ياداخله ياطالعه ،

لو تجي يمنه تساعد امي بشغل البيت ، نوب تجي علينه تتوسل يابوري مال ماي انكسر ،  ياواير ماع ، يافرن انفجر ، وتتوسل لان مره وحدانيه وامي تكلي خطيه مالها احد روح شوفلها بيت وصلح الها ..

والله جنت اروح وياي امي ، ماادخل بيتها الا وياي امي ، جلبت بيه تنتظرني باب شقه من ارجع من شغل ، عبالي ثوله ورعنه مادري بيها هيج شيطان  ، بنت كلب ولا ارتاحيت الها مو راحه ابد بس ماظنيت هيج نذله ، شمسوي الها وهيج تهجم حياتي وتخرب علي ..

دنجت راسي مقهوره ، ابتسمت بحزن باين دنيا متروسه ناس نذله ماعدها مخافه الله ، حتى الي تصادفه شايل نذاله ، مايفيد الحجي بعد كلشي انتهه ...

سكتنه وجن ضاع الحجي ، تالي حجه تعبان ..

راح تنسيني موو راح تروح ايام اسحاق وتنحط على رف قديم بزاويه  قديمه من زوايه كلبج .. باوع بعيوني نضرته تعبانه حيل .. الوجهه ذبلان

دنجت شسويت بي اني هالانسان تعبته واذيته وكسرته .. تقرب مني حيل ، رفعت نظري عليه اراقب بي ، دنج و لزم طرف اصبعي الصغير وجره لجف ايده ..

جريت ايدي بسرعه والتفتت لااحد يشوفني جاي تسوي باوعتله لااحد يشوفنه عفيه ..

ساكت يباوعلي مد يده انطيني ايدج .. مانزل عيونه ..

مقهوره عليه وعلى صارلنه .. مديت ايدي خايفه .. طلع من جيبه محبس شكله فضه مسوده .. خلاها باصبعي الوسط ضيكه .. خلاها نوب باصبعي صغير دخلت .. باوعلي كال هاي حلقتي صغرتها الج ..

يمكن مو نصيبي انتي بالدنيا بس يم الله انتي نصيبي واول شي اطلبه منه انتي .. عيني على حلقه رفعت عيوني بوجهه بجيت نصيبنه هذا اسحاق نصيبي ونصيبك ..

لاابنادم الي عرض وبنادم الي خرب مو بس نصيب ..

تنهد والتفت يخفي دموعه ..شال علاكه من الارض و عافني ومشه بخطوات بطيئه تعبانه جنه رجال خمسيني مريض ..اباوع لظهره المحني المخذول من  ناسه واحبابه .. دنجت ابجي واشهك .

هاي جانت اخر مره اشوفه بيها ماتوقعتها تكون الاخيره .. كمت وكفت بصف دنكه لااحد يشوفني ابجي منهاره لازمه ايدي ، وعيني على كفاه الي بده يختفي بين ناس ويتلاشه .. كلبي وجعني حيل جن حس ولفه راح وماله رجعه .. لزمت كلبي افرك بي والله حب بالكلب ،

مسحت وجهي ورجعت يم بيبي مكتئبه ، احس دنيا طالعه من عيني ، نترت ببه شلون تاخرت كتلها حمام هوسه ، كوه حصلت مكان  .

ماقتنعت ضلت تحجي وترزل  ، انتي مو مال طلعه ولا واحد ينطيج عين خليتيني مشتوله هنا ، لا اندل واكدر اجيج ، ولا اكدر اكوم واعوف مكاني وتجين متلكيني ... اكلت راسي بالرزايا  لحد ماكمت ابجي واشهك ،  تفاجئت بيه عليش البجي ،  شحجيت اني دياله مااكصد شبيج ،  اتقشمر وياج كاافي بجي يمه ..

ردتها حجه من الله رجعنه ودرب كله دموعي تكت ، والله تمنيت الموت ، كلبي شكد اذاني وجعني ،

هيه تتوسل اسكت ،  نوب تزمخ بيه ،  تكول فضحتينه عالم عبالهم شو شبيج  ، كافي عياره هيه رزاله شجاج ..

قريب منوصل للبيت مسحت دموعي ، دخلت كبل دوب سلمت ولفيت راسي ونمت شابعه ظيم ..

هيه كالت ترى باجر نرجع ليش تكولين ، ماحجيت وياها خنست ، صدك ثاني يوم وصلنه ياسر لبيت جدي  ومر على هند شافها ، للعصر ورجع لبغداد ..

صح تعبت نفسيتي ونتكست ، بس عشت ما متت ، اثاري روح البشر شكد كويه كل الالم الي شافته وبعدها تريد تعيش ، اسحاق صفحه وانطوت ، بعد ماسمعت ابو توفه ، بجيت بيومها جن بابا مات توه ..

تذكرت الحظات السيئه الي مرت بحياتي وردت حجه دابجي وافرغ الي بداخلي ، ردت ادفن ذكريات ماضي لان تعبت ، سمحت لنفسي ابجي وابجي ،

وراها لمن سألت عليه كالو امه دزها تسكن يم واحد من اخوانه ، هو ترك بغداد وين راح ماعدهم خبر جوز سافر واحتمال يشتغل بالشمال ، اني هم مالحيت بسؤال ..

ردت انسى وخلص صح كلبي ياذيني ، بس بديت اتعود واتعايش ويه ناس واتقبل وضعي، اكتشفت اني صار بيه هيج لان مشيت عكس تيار وعاندت ، مو كلشي نريده نحصله ولا كلشي يتمنى كلبنه نحصله ..

صار اشهر ماشيه طوع تيار وياه مأذيت ولا نضربت ،
التهيت بالبيت ويه بيبي ونسيت او تناسيت ناسنه ، وتعودت على كعده هنا صح ماحبها بس المهم عايشه ومتعوده ،

فد يوم كاعده يم بيبي الكط تمن عنبر ، فات جدي سلم ، ردينه سلام اني رديت وكمت لحيلي اروح للغرفه صاح وراي ..

تعاي جاي جدي وين كايمه ..

للغرفه جدي ..

ليش شارده مني شبلاج ..

سكتت وماحجيت ، ضليت اباوع لبيبي كالت تعاي هاج  اغسلي تمن ، هو كللخا كومي رايدج بحجايه ..

كامت وراه واني اخذت التمن وكعدت اغسل بي ، من اليوم ذاك واني مااحجي وياهم عمامي ولاجدي ..

حتى عمو سلامه كطعت وياه ، خاب جاسم نادرا مااشوفه ، شكد اشتاقله واحبه ، شكله عينن بابا بس تصرفاته نسخه من عمامي ، اتمنى احظنه واعاتبه بس ادري بي ماراح يحس ابد ..

خلصت غسل تمن وخليته على الميز ، وجدي طلع اسمع طبكه باب ، بيبي اجت كعدت بالكاع على المندر ضايجه والوجهه مكلوب ،

ماسالتها ضليت اشتغل وكل شوي التفت عليها ، وهيه تجر حسرات وتباوعلي ، بعدين كالت تعاي جدي اكعدي يمي طبطبت على المندر ..

هااا ..

وجعااا تعااي جاي اكلج ..

استغربت ياا شبيها الحجيه جن الحجي وازها عليها ، كتلها خير حجيه شنو جدي وزج علي ..

عاب حلكج ليش هو عقله صغيره يوزني عليج طايحه حظ ..

رفعت حواجبي ، مامقتنعه ..كعدت بصفها انتظرها تحجي ..

جرت حسره والله يابيبي انتي بس السان مابيج اذيه ، هالصار اشهر انتي جوه ايدي ، مازغلتي لو سويتي مكسوره ، لو فتنتتي لو نافقتي ، مرت عمج دايسه بطنج ومايوم خبثتي عليها ولا وزيتيني عليها ، والي اكول عليه تسوي ابد ماتعاندين لو تخالفينه ،

ابتسمت بوجها ، فرحانه بمدحها ،  بعدين كالت :-  بس ياجده لازعلين انتي رعنه وعقلج عقل مطي  .

اختفت الابتسامه وبهت وجهي :- خلف الله عليج ..

والله يابيبي ليش زعلين قابل مجذبه اناا ، وعقلج قافل شوفي شسوه بيج ، وشعمل وين جابج وين وداج ، وداعت ابوج احجي صدك ؟؟..

شنو بيبي  ؟؟..

من يوم الي اجيتي هناا ومن يوم كتلج امشي بشوري ومالج لازم تسلمين وترتاحين صار الي حجيت عليه لو لااا ..

سكتت هااا ..

وجعااا داحاجيج احجي ..

والله ياجده الصدك ، انتي ماوعدتيني بشي وخلفتي بي ، وحاميتني من دنيا كلها ، ياسر ماكدر يسوي الي سويتي الي، ومدللتني ..

ضحكت هااا شوفتي ..

اي بس الصدك يابيبي لازعلين كافه نار العالم عني وانتي مجويتني بالسانج ..

شهكت لا يالجلبه انااا ..

جنج ضجتي ياجده توج هبدتيني بحجايه مثل هاي لو حرام عليه وحلال عليج ..

ياول تخلين راسج براسي وحده بوحده بت حسنه ..

لا والله حشه يابيبي بس من عاشر قوم والله صرت نسخه منج ، حتى بكلامي امي تكلي جنج بيبيتج صايره عجوز بسوالفج ..

جنها امج ماعاجبها الوضع .

حجيه هسه امي حمدت بيج ماذمتج شبيج وياها ..

عاب حلكج تيهتي سالفتي ولج ..

اني لو انتي اكلتيني ماخليتني افهم ..

انجبي عاد ..

سكتت وضليت خانسه انتظر تحجي باين ضاجت مني .. كالت يجده الي خاطر عدج لو لاا ..

مادري ليش مغصتي بطني والله ، كتلها احجي بيبي كوليها شنو تردين ..

ول انتي فلا تستحين ..

يابيبي شكيتي بطني صار اشهر يمج اعرف من تردين تكولين شي حفظتج ، عدج حجايه كوليها اسمعج وان بيها فايده اخذها منج والله ..

هيه سمعت هيج وشمرتها من صدك بوجهي :- عليش ماتقبلين برشيد ولج وين تلكين منه دره مال الله  ..

هاا .. رشيد شنو بيبي رجعنه شنو قصه ..

صاحت بيه معصبه :- بالقرعان ياهناء هالمره ، اذا ماخذتي بحجايتي ، وداعت حسن والشهيد ابو عدنان ، فلا الي غرض بيج بعد ، ماجوزين ماتتعضين ياجده اضلين رعنه وبلا عقل ، تاليتج سوده مصخمه اذا ضليتي مثل المطي راكبه راسج وماتاخذين حجي . ضلت تحجي معصبه وتنتر وترفع بديها تهدد . 

عفتي تحجي وتكمل بس وجها انكلب احمر ، اني ضجت بس ماحجيت ، ضليت خانسه ، خفت منها عزاا والله اذا كلبت عليه اكل نعل هناا ، ضلت بس هيه زينه عليه ..

عاطت بيه ولج هنيوه عاجبتج ذله مره عمج ، تكعدج من صبح تغسلين البيت وتمسحي وتعطري ، لو الموعين مكومه من صبح لليل غسل ،  حتى اضافرج راحن ، باوعت لاضافري والله صدك ، ماضلن حتى ادين عندي من التايت والزاهي ،

صايرات خشنات من جلافه ، وغسل الطرمه بمااي بارد  .. سكتت ميته قهر ..

لو الحديقه جانت بالشهر تتنظف مره وحده هيه وطرمه ، وهسه من اجيتي انتي صبح ومسيا تنمسح وتتنظف وتنسكي الزرعات براسج ..

باوعت عليها كله منج مادافعيلي من تشوفيها تصخرني ..

عليش ادافعلج وانتي ماتاخذين بحجيي ..

سكتت ، ضايع الحجي وياها اصلا ماكدر عليها ، درت وجهي مقهوره منها .. جرت راسي وباستني من كصتي ولج بت حسن انتي ، والله من اشوفج اشوف حسن بوجهج ، كامت تبجي خلت فوطه على وجها وكامت تنعى عليه ..

نوب اني هم بجيت ، خليت راسي بحظنها ابجي وياها ، ضلت بالربع ساعه تنعى وتلولي عليهم ، بعدين كالت عليش ماتاخذين براي ياجده ، رايده مصلحتج بالقرعان .

كمت لحيلي وكعدت كبالها ، شتردين جده اقبل برشيد ، ماريده جده .. اجت تحجي قاطعتهاا :- خلي اكمل بيبي انطيني مجال ، نفس ماهو حفيدج اني هم حفيدتج ، لاتفكرين بس بي ، وتكولين خطيه ، ونكتي بي وفشلتي بين عمامه واهله ..

اني هم خطيه ويتيمه والي سويتو بيه مو قليل ، جبتوني هناا وذليتوني واني عزيزه ابويا ، بعدتوني عن امي واخواني ، وخليتونه نتمالخ بيناتنه ،

ودارستي راحلت ، سمعتي وشرفي دستو عليه وشهرتو بيه ، وبعدج تكليلي ليش كاره عيشته وليش ماتخذين بشوري ..

شورج ورايج بس بي مصلحه رشيد ، مابي مصلحه ولا راحه الي ، وين راحتي اذا ضليت طول عمري يمكم ، واني صارلي اشهر شفت نبي عربي ، وين راحتي من دراستي ضاعت وحلم عمري راح .. وين راحتي غير امشي وره راحتي اني ، غير تنطيني راي وحل علمود راحتي .. لو انتي تفكرين براحه عالم على حسابي ، اذا هيج معناها ماتحبيني ..

ياجده عبن اعرف عمامج واخوج وشنو طينتهم ، جاي اصر على رويشد ، عاب كلبي ياجده والله بس هو يفيدج ، ترى رشيد حسن الثاني بس ماشاف حنيه هذا ، ابوج هم جان يجده مثل رشيد وعمامج ، لاعبالج طلع من بطني حنين ويطي حريه للمره ، هم اعصاب وروحه بخشمه ..

بس من اخذ امج بت ولايه ومدينه ، ودارسه وفاهمه وحبها وراد خاطرها ، ماراد يخسرها ، تعدل وصار افندي ، والا ترة هو حاله حال عماج هم يتهنتر ومعصب طول اليوم ..

المره ياجده تعدل الرجال ، مره عاقله الي تسايس وتحنن الكلب ، واطيب الخاطر بجلمه حلوه ، رويشد مو ازكي جدامج لابالقرعان عجل جايزه منج ،

قابل هو مو خوش ادمي واعلكج بركبته ، بس ادري بي طيب وكلبه جبير بس ماضاك لاحنيه ولاكلمه طيبه ..

كلها تحش بي ،  ناس كلها ضده وشلون تردي يصير ، هو جاب عمره كضه وشغل وتعب من ابو المات ، لموت اخوو ، لعمامج الي كسرو ضهره بشغل البستان ، لحد ماخذ مرت اخو نوب اشعلت غاليه ،

تالي وكعت عينه عليج ، شافج مدلله طول اليوم بحظن ابوج ، كلك هاي هم من تصير يمي ادللني مثل ماسوت امها ودللت عمي ، حياتي راح تصير مثل حياه حسن ، هادى وحلوه ودافيه ، ومابيها لانفاق ولا مشاكل ولا مصالح ..

صح رادج بالغصب عبن مايعرف يقنع ويسايس ، شمعرفه هو عاب كلبي وهو كاضي عمره بشغل بستان مايعرف شنو يحجي ويه مره و يقنعها بي ..

سكتت اسمع ، كتلها هو مشه عليه يعني ،

كالت لااا ..

رفعت حواجبي ، صار ساعه تزنين براسي على شنو بيبي  .

هساع انتي كوليلي ، راضيه بي لو لاا ،

سكتت حايره ، ماكارهته والله بس'اضوج منه ومن العيشه هناا ..

كالت عجل خوش انا كتلج بعد مالي لازم بيج ، بعد كل هالحجي وانتي بعدج ماقانعه ، خلي شورج من راسج وتحملي الي يجرالج ..

بيبي'هسه انا ماقانعه بي قابل هيج من الله ، غير شفت ايام سود منه ومن ظيمه ، بحياه ابوي شبعني طن كتل ، والله خله دمايتي تخرر ، لو صرت مرته يمكن يسكطني ومحد يفك حلكه وياه بحجه مرته مالنه شغل ..

عبن تعاندين يايوم سمعتي ضرب اخته لو بنت عم ..

لج بحياته ماضارب بنات عمه ولا اله غرض بيهن لو تصلخن يكول عدهم اهل يحاسبوهن ، والا اخته بحياته مارفع صوته عليهن يداريهن مثل عيونه ، ليييش ؟؟ عبن الكلمته ماتصير ثنين وفقيرات ومايعاندن وشوفيهن شلون عايشات ، دشوفي علاا هساع منو من عمامج يكدر يكللها على عينج حاجب ..

مشو عليها كم مره ومانطاها كال الا هيه توافق ، ولج روحه من دنيا هيه ونغم ، لو نغم شحدهم عيالها يفكون حلكهم وياها والله ليسويهم طشار ، يجده حننييين بالقرعان حنيين وكلبه رهيف بس مايعرف يتصرف ويه الحرمه ..

عاد ايده تشتغل بدل لسانه ، اخذي بالعيني واغاتي شلون خالتج فرت عمج حميد وسوته طلي بيدها فرت بوزها مو راضيه على عمي حميد ..

سوي مثلها وكسبي للرجال وستفيدي منه .

جريت نفس ، هسه هو ممشي عليه يجده تردين مني شنوو ..

عجل اناا ماا كتلج ..

شنوو ..

خليتيني انسى يااا ..

شنو بيبي ..

اخذني الحجي ونسيت شنو كال الحجي ..

غير تحجين ياابيبي شكيتي بطني والله ربيتيلي عله ..

انجبي ، هذاا ابن المضمد الي جنت اخذج اله جاي لجدج وطالبج منه ، وجدج منطيج اله ..

شهكت عزااااا طفرت لحيلي يااااا بيبي عزاا .شعليهم شنوو يطيني شنوو جاهل وبكيفهم يطوني ..

دترت وجها  مبتسمه متشفيه بيبي ..

احجي بيبي موو وياج ياااا ..

دايره وجهااا ولا يمهاا ذبت القنبله وساكته مكيفه خاله ايدها جوه حنجها ودايره الوجهه عني ...

احجي بيبي شنو كتيله عليج الله شنوو جاسم شكال ماقبل موو ..

لا يمه قبلو كلهم كيفوو اصلا .. الولد موظف ويشتغل العصر يم ابوو  وعده بيت وسياره وبديالى شيردون بعد ..

دمعت عيوني عليج الله بيبي لاا ماريد ازوج ..

عجل هو لو رشيد لو هذا ابن مضمد اختاري ..

رشيد ممشي عليه بيبي قابل تردين اني امشي عليه ...

مالج لازم انتي اختاري ومن عين باجر ازوجج اله ..

بيبي بروح بابا لا هذا و لاهذاا ..

عجل خووش حظري روحج للعقد من ابن مضمد جدج كال تنطيها خبر تحظر روحها كامت لحيلها ودفعتني ومشت ...

كعدت بالكاع مهدود حيلي ، يارب اريدها منك تعبت وانته تشووف جاي يصير ..يردون يخلصون مني كوه مروه ..

كلت اخابر ياسر واكله ، بس هم يمالخ ويه جاسم ، جاسم انجلب حيل ماخله خاطر للخوه بهذلنه اني واخواني كلنه بسببه ، لو ورثي الي يريده ..

عمي ماريد شي خلي ياخذه بس يرحمني والله نذليت ، لو رشيد اااخ يرشيد شلع كلبي واذاني ..

دخلت للغرفه اريد موبايل ، مالكيته نبشت الغرفه ماكوو ، عبالك صار عده جناح وطار ، عرفت بيبي ماخذته ، بليل نايمه بفراشي وسمعت الباب انقفلت علي ، لا هذول صدك ناوين عليه ، عبالهم يحبسوني شنوو ، نوب حتى ياسر مانطو خبر ..

ثاني يوم اجت هند يمنه كوه تمشي من الحمل الازمه بطنها تخاف على روحها ، بيبي اخذتها على صفحه تحجي وياها وذيج تهز راسها من اجيت سكتت وكامت من يمنه ،

كعدت كبال هند ، كتلها شنو كالتلج بيبي ..

تكول قنعي اختج وخلي تخلي عقلها براسها وتعرف مصلحتها عدل لا تضيع نفسهاا ..

عرفتي بالسالفه هذا واحد مشي عليه ، يردون يطوني اله دمعت عيوني كامو يشمرون بيه يااهند هنا وهناا ..

ليش ماترضين برشيد ياهناء .

انتي هم لخاطر الله كفوو عني ..

هسه غير نعرف ..

ولج كل هاي الاذيه الي اكلتها منه وجدام عينج وتغشمين نفسج ..

هااي كبل يااعيني هسه انتي طبعج وعقلج مثل قبل سنه ..لااا تغيرتي وعقلتي وفهمتي . لا تحاسبي على شغلات صار الها دهر يااخيه البشر يتعلم و يعقل ..

والكتل الي اكلته منه وذله الي انذليتها منه ..

صار شكد هناا اذاج بحجايه بداعت بابا ضربج ، غلط عليج جبرج على شي احجي ..

سكتت ..

هااا شفتي ، لاتنسين بابا جان يحبه يموت عليه لان يدري بنفسه وبكلبه شنوو لو مايحبج جان جبرج ونطاج لرشيد بس جان يريد انتي من يمج تعرفي وتعرفين طبعه وتحبي نفس ماامي حبت بابا ..

شافج مثل امي تكدرين تغيرين طبعه ، مثل ماامي غيرت طبع بابا ، اقبلي يااكلبي وعود تعودي عليه بفتره خطوبه قابل راح يزوجوج بيومها ، هم لازم تنخطبون فد شهرين اقل شي ..

خايفه والله ، خايفه لااضل مامتقبلته ، نوب اضل طول عمرب ندمانه...

صلي استخاره وامشي بشور بيبي وتوكلي على الله ..

صفنت بالارض مادري ، كالت راح تتصل على خالتج تجي منه هم خطيه وحدها تضوج ، دكت عليه وربع ساعه وتجت هيه وجبتها سوده ضيكه ، تخبل خالتي صايره رغم هيه اربعينيه بس تجنن ،

عدها رشاقه ، وتعتني لنفسها حيل اضافر وشعر والتاتو ، جنها كرديه بنزاكتها ، نوب هند سوالفت الها على رشيد وتكللها هناء مموافقه ..

كالت ياا هو مو مزوج ..

كتلها هااا شوفي هم نسيت هو مو صدك عاقد على بت عمو سلامه ..

ضحكت خالتي كالت تردي لرشيد لو لاا هسه يااخاله فهميني ..

باوعت عليها ، مادري والله ياخاله حايره ..

اقبلي ولج عده فلوس دنياا ..

هو هذا الهامج يااخاله ، ترى يضرب وياذي ويغلط هم ..

حميد هم جان هيج يم مرته الغبره هسه مثل زبد السايح بيدي ، ولج ترى المره تخلي رجال يصير ثور ، رشيد مناقصه شي يااخاله شو فلوس واخلاق و السان حلو وكلها تحبه حتى شكله حلو  والله ..

بس مزوج خاله ..

هسه مافهمت ماتردي لان مزوج ، غمزتلي وتركص بحواجبها ، نشحتها بعد خالتج اذا تردين طكتها ضحكه ..

هند سالتها ، وهاي شلون خاله ..

اندارت عليها خالتج شحتت الاكبر منها واخذته من مرته وجهاله ، عاد مانشحت جاهل حتى دوره ماجياتها  ...

هند هاي منو بعدها مابالغه سلوى ياا خطيه والله شكيت بعدها ، لان كلش صغيره ، بس شمدريج خاله ..

امها حجت ذاك اليوم لمرت عمج ، عود تتباها الغبره ، بنتها بعدها ماتعرف شك من بك ، وتردين تخليها براس رجال اكبر منها ب ٢٠ سنه،  المعيديه ماتكول خطيه بتي ، بيش طالبتها ماتتحمل ، على شنو اكسر ضهرها بعدها طفله ..

هيه هاي عقليتهم بعد فوكاها تتباها ، والله نقهرت عليها بعدها صغيره ..

اندارت علي خالتي هسه شنو كتلي بعد خالتج ، لو رشيد لو هذا صيدلاني شكلتي ..

شور شورج يااخاله رسيني ..

رشيد خاله افضل الج والله رايد رضاج هو ، وابن عمج هم تعرفي'شنو ماشنو بس'يرادله تعديل شوي وهاي سهله اتتي ذكيه تعدلي ماينخاف عليج ..

سكتت خايفه الله يشهد ، هنه راحن وحجيهن هو هو ارضي واسكتي ترى احسن من غيره ، والصيدلاني مايفيدج ، غريب ومانعرفه شنو ماشنو ، هذا تعرفي واكعدي تشرطي محد يفك حلكه .  يحجن بزود هو بعده ممشي عليه اصلا ، هيه علا ذاك يوم تكلي لا لعبت نفسه منج مايريدج ..

وبيبي تحجي بزود تكول غصب عنه يزوجج ، نوب طلعت اني شامره نفسي عليه ويغصبو بيه فوكاها والله وكت ..

اذا كلت ماريده على شنو جاي تجبروني ، يطوني لهذا ماعرفه طينته شنو وشجابه على حظي ، بيبي ايام اخذت ماتحجي وياي ، بس ادز على هند تقره براسي وتزن بي ..

حجيها صدك مو جذب ، صح هو من يوم صار ماندك بيه ولاسمعني كلمه ، حتى صياح ماصاح عليه ، احسه غسل ايده مني ، او الاصح كرهني هو مارايدني ، على كولت علا لعبت نفسه منج ..

لو تجي خالتي ، تكلي ترى يتغير حاله حال حميد ، وانتي سباعيه مثل امج تفري فر ، حتى تكدرين تقنعي بعدين يطلع بيج بره ديالى ، اني مو كاره محافظه ، بس كاره عمامي وعيشتهم ، حتى لو ابقه هناا ، ماعدي اشكال بس المهم بعيد عن عيشه عمامي ونفاقهم ...

جني بديت اقتنع او الاصح قنعت نفسي ، هذا الحل الوحيد ، مال ازوج غير رشيد صعبه ، جوز اطلع مو بنت ورشيد ماخذني هاي هم غلست عليها واكول متوهمه لان بيبي مانطت بي ،وتكول مايسويها بس ضل شك بداخلي ..

هم اذا رضيت بالصيدلاني هم الشك ياكل كلبي ،  واضل شايله هم ، واذا طلع شكي بمحله صدك اتورط  وانفضح منو يستر هسه على بنات العالم ، اذا ابن لحمك ودمك يفضحك عاد اتامل بالغريب  ..

اباوع بيبتي لابسه العبا وراها مرت عمي هم ، جنهن طالعات ، كتلهن هاا ..

كالت مره كرابتنه جنتهم جايبه ورايحات نودي فضل ، انتي امسحي البيت وعطري جدج على جيه ، والجدريه على نار عينج عليها نص ساعه وطفي جواها .. صاحت مرت عمي هاا تعاي امسحي السراميك عود مال الصاله والديوان  ،

عوجت حلكي ناس ديح وناس تخدم مثل مطايه ..

بيبي صاحت موو اطلعين ولج رجلج ماتخطي الحديقه خوووش ..

باوعت عليها بطرف عيني وين اولي يعني مطموه هناا مثل الهايشه بزريبه ..

يااا زريبه ولج يالجلبه هااي منو زريبه ..

مو عليج بييبي جاي اضرب مثل تورطت حجيت ..

احجي عدل لاجفصين لا اجي افرك حلكج ..

كمت لحيلي شبيج بيبي'شاده وياي شسويتلج قابل عبالك عدوتج .

عبن مو خوش ادميه طبج مرض .. جرت مرت عمي الي ضلت تضحك وتكول شفتي عمه هااي بعينج شوفي شلون ترادد حتى انتي ماتحشمج ..

اني بس اغلط والله نزلتهم من جدي السابع لحد هذا جدي ، نبشت ابهاتهم ، غضب الله عليه بيهم ناس لارحمه ولاظمير ..

رحت نزعت دشداشه ولبست وحده خركه مال شغل  ، مسحوته سحت ، باوعت بالمرايه ضحكت عزاا حتى ملابس داخليه امبينه ، كون يجي جدي ويشوفني هيج والله الا يتفل عليه ههههه كبل يكلي جليله الحياا ..

لو مرت عمي كبل تكول متواعده هههه ..

شلت سطل المسح وصله مال اخشاب ودخلت نظفت ديوان ، والله صايره ام بيت ياهناء ، خليته يلمع لمع ، ارهم اصبر خدامه وربت بيت ممتازه ..

نوب انداريت للصاله والهول ، الحديقه ماوصلتها وكلت ماطلع لان خفت احد يجي لو يفوت من يم باب واني ماخذه راحتي ، مدنجه امسح ومشلهه دشداشه لحد صرتي ،

حسيت على صوت وراي ..

عود جاي اكوم فزيت ، كمت اريد اندارت واطربس بالكاع بنص الماي على وجهي  ...

اسم الله رحمن كول يالله يمعود فززتني ..

ماحجه ضل ساكت بلع ريكه ..

كعدت بالكاع لازمه ركبتي ، متالمه ، بيبي مو هناا محد هناا اصلا ..

باوع علي هادئ :- منو كلج جاي علمود بيبيتج اناا.

هاا عليمن لعد ..

اجه تقرب عليه ومد ايده جرني من الكاع ، جاي عليج يابه ..

#يتبع

بارت طوووووويل حيل .  وجاي اختصر للاسف بس لان والله مضطره ورمضان قرب ومابيه اكتب برمضان لازم اختمهاا ..

فراح احاول اختمها واختصر صح مو اختصار بشكل جبير بس هواي احداث راح اختصر شرحها وما تعمق بيها  اتمنى تعذروني   ..