رواية ثأر مهري منهاا الفصل الثاني والعشرون 22 - بقلم اسماء ديمير

《《البارت ال21》》

#ثأر_مهري_منها

بقلمي " أسماء ديمير"

من كثر الهبطه نزلت جبح على وجهي .. ابن جاسم جبير معد واكع من تخم على حلكه وخشمه وحلكه ثنينهم دم .. امي من شافته انهبطت وكعت على صفحتها ، حرت بيها وطفل حارت بي رواء .. طفل خبصنه بالعياط والصراخ ..

اخوانه من شافو هم كلبوها صراخ .. رواء طلعت بي كبل للحمام تغسل اله .. امي كعدتها على تخم واني لحكت هذيج رعنه اركض وشايله خاولي بيدي .. عياطه كلب البيت .. امه تغسل هو دم ينفر من خشمه وحلكه ..

اني من شفته ساحت روحي كلت راح يموت هذا .. اخذت الخاولي من ايدي وخلته على وجهه كالت خابري جاسم بسرعه ... طفرت اركض على جهاز اخابره ..

انهبط من سمع ابنه مدمي كال خمس دقايق يمكم .. اباوع الخاولي انكلب احمر من دم الولد حتى صوته ابنح من العياط .. امي تكللها لاتضغطين على وجهه لايختنك نوب بالخاولي .. اجه جاسم مهبوط .. نوب شافه ضل يغلط ويفشر عليهاا .. 

وهيه بس تبجي ويه ابنهاا .. خلاه بسياره ولحكته رواء تركض شمرت عليها عبا راس مال امي .. جهال خايفين يبجون .. اخذتهم غسلتلهم .. وشغلتلهم تلفزيون كتلهم هسه يجي مابي شي هو هذا الي يصعد فوك الغراض ويكمز يتعور ...

امي كامت للمطبخ اسمعها بس تدعي وتغلط لحكتها كالت تعاي شوفي .. اباوع للمطبخ كله دم الكاونتر .. كالت جان مشلبخ على كاونتر ادري جاهل لو شيطان ..

:-'صوج مو صوجه يمه هو جاهل ..

:- لايمه مو صوجه صوج الرعنه الي اسمها امه ، ماتعلمه هذا غلط وهذا خطر .. مكظيتها بالغرفه ، وياخواتي وياامي ،  من حتركن كون امها واخواتها ممحصلين منها بس الاذيه ..

:-'كون مابي شي خطيه وجهه تفلش يالله جاسم يموت بقهره ..

:- اسم الله سوده عليه يمه ،  وجهه يخر دم ، كعدت وكامت تبجي ، كون بيها ولا بهل جاهل المهمله .. امسحي هالدم يمه لايشوفو جهال نوب يخترعون ...

اخذت وصله مسح مالت بيت ،  امسح بالدم لعبت نفسي ، من زفاره .. جيت اتقيئ درت زاهي وقاصر حتى زفاره تخف نوب زادت وييع خرب ..

كوه غسلته ورجعت عليه مرتين ،  ضل بالي ريحه زفره خرب .. رحت كبل للحمام غسلت وغيرت ملابسي سمعت صورت سياره عرفت رجع جاسم بعدني ابدل وصوته رج البيت رج ..

على سريع لبست ونزلت ..  الجاهل شهكه بعدها بصدره وهاي رواء صوتها شعلوه هو منا خبل جاسم لازمها من شعرها ويهز بيها ..

جهال تبجي شلون شغله هاي .. امي لازمته تكله عوفها يمه رحمه لابوك جهال تخبلت خطيه من خوف ..

وهاي تصرخ بعلو صوتها :-  شنو جاهل واكابله،  هوو ابنك مثل شيطان ،  اكدرلنه اني قابل ابنيه واحصره .. ماتكابلهم انته لعد ..

:- اي .. بنت نعال وابوج يصرف عليج ، وعلى خلفتج موو اني اكعد بالبيت مثل المره  ،  وانتي اطلعي اشتغلي ، يابه انتي رجال مو اني ..

صرخت بوجهه وتلاوي نوب .. ابوي ليش تسبه ترضى اسب ابوك ابوي لاتسبه .. هدني انعل ابو الي تبقه عدك ..

:- تسبين منو بنت السكط ، سبي باله سبي بالقران الا اطلعج مكسحه ..

:- هاي فوك مامتحمله عيشتك ونكدك ،  وعمايلك وياي ، فوك مارجعتني جنه عد امك ،  واختك اخدم بيهم ..

امي عاطت بيها :- خفه حلكج ،  تخدمين منو ، ام الوصخ شو تاكلين وتمسحين اديج بالحايط ،  شنو مركبه منظفه غاسله هدوم شو احنه شايلات البيت ..

اندارت على امي تصف وتعدد :-'هم عوز اخدمجن ،  والله تالي وكت ،  هم عزلت و ماخلصت ،  مو زين مني اجيت كعدت وكابلتجن ،  ليش انتن ينعاش وياجن ..

عاط بيها جاسم :-  كاااافي انعل اهلج كاافي انتي شنوو

:- والله يشرفوك شنو تنعل اهلي .. بعدها ممكمله واجتها ضربه على وجهه خلتها تصرخ .. اني من يمي كلبي وكع بالكاع ، جهال نوب تخبلو على امهم ،  اخذتهم سحل لغرفه امي ابجي ،  وهذا جاسم نام على رواء رفس وهيه نوب متسكت ..

غير تسكت هو يضرب وهيه توكفله يمااا .. امي وكفت حاجوز تتوسل يعوفها .  نوب نطت دفعه لاامي وتلكاها جاسم لزمها لاطيح .. هذا شافها هيج لو روحه طفرت  ..لزمها سحل من الحولي للحديقه وهاي تصرخ لمت عالم علينه جهال تصرخ ..

نوب حرت بجهال وباامي وذيج جنزها جاسم .. امي كالت ولج كوميني راح يموتها عينيني ..

سندتها كوه .. طلعت عليه تعرج كوه تمشي ..  توخر بي عنها .. شلتها من كاع اني واخذتها دفع للغرفه وهيه وشعرها المكفش تهدد وتغلط هذا يكمز يريد يلزمها

وتحلف واخلي اهلي يطيحون حظك والله
والله مااخليك تبات بالبيت سالم تضربني تتكوه عليه اصبرلي ..

كل شوي تجيها هبده منه وهيه واكفه كوه سحلته للغرفه .  نوب نطتني دفعه بره غرفه خلت وجهي ينردم بحافه الباب وسدت باب بوجهي يابربوك على هاي دكه ..

حسيت صفحه من وجهي انشلعت من الالم ..لزمتها ورحت لاامي اشوفها وهذا يصيح ويغلط .. امي شافتني لازمه وجهي كالت يااا ضربتج الرعنه ..

جاسم باوع عليه .. كتلها لا تعورت بالباب ..

امي وخرت ايدي عن وجهي .  ياااا شوف خدج مزرك انعل ابوها لابو ، جنه لو غضب الله .. كتلها اسكتي لايرجع عليها غير يموتها ..

:- ماتت روحها كلشي ماعليها ، اويلي على هذا الي ابتله بيها،  فوك جيفتها ، نوب تتكوه علينه الوصخه  تريد تموته ..

لليل والبيت سكته بس صوت جهال تبجي .. توقعت ادز على اهلها لو تجي امها تاخذها بس ماكو شي ..

رحت للمطبخ اسوي عشه جاسم بالحديقه يطحن جكاير امي كالت كومي سوي عشه للجهال خطيه من الغده لحد هسه بالغرفه ..

خليت معكرونه على نار وبيتنجان شوي على طباخ ..  طلع معد من غرفه يباوع منا ومناا .. باوعت عليه ابتسمت خايف من ابو .. خبلو جهال ولا يراعون نفسيتهم لا ابوهم ولا امهم ..

صحت عليه تعال عمه حبيبي .. اجه يمشي على  كيف .. اووي يعمري وجهه مزرك خشمه وحلكه كتله وين ضربه ..

اشر على لثه مالته مشكوكه مخيطه ثلاث خياطات يمه متت من شفتها رجليه بادت  ..

بلعت ريك توجعك .. هز راسه لاا ..

جوعان موو

اي شويه .

اخوانك وين ..

جوه نايمين ..

بلا عشه سوده عليه امشي كعدهم خلي ياكلون ..

ماكدر اكل اني ..

هسه اسويلك شوربه عدس واخلطها الك بالخلاط اشربها ..

هز راسه وراح جوه يصيح اخوانه .. شو راح و مارجع خلصت العشه وكملته هو بعده .. خلطت الشوربه وصبيتها اله تبرد .. انتظرت ماكوو .. اباوع لجاسم من شباك صافن  ..

رحت لاامي كتلها جهال جوعانيين يمه شو معد دخل يم امه وماطلع بعد خاف ماتخلي يطلع نوب جوعانيين خطيه .

فرت ايدها امي ماراضيه :- نوب هيه زعلانه فوك شينها نوب تريد تنوم جهالنه بلا اكل . كامت عليها ..

مشيت وراهه  :- لاتحاجيها يمه لاتهيج نوب اني اصلا مستغربه شلون اهلها مااجو وامها مااجت هداده ..

:-'هم عوزه تحجي ، خفه حكلها فوك الحكه دكه .. فوك شينها ادز على اهلها .. وهيه فضحتنا بشارع بصياحها ،  ومنا ابنها يخر دم .. لاتراعي جاهل ولاتحترم عمه ، لاتخاف من رجال ادري شنو بلا تربيه  جايه من شارع ..

:- لاتحاجيها يمه عوفيها هسه اني اصيح جهال ..

:-'لا اني اروح هاي عرمه ماتخاف ام عين كويه .. نوب تريد تنومهم جوعانيين شنو ماعدنا اكل لو ابوهم فقير ومايجد عليهم ..

دكت الباب عليهم مافتحو صاحت من وره باب معد جده تعال تعشه .. تعال لو اخلي ابوك يجي يفتح الباب ، رجعت دكت باب حيل سمعت مووو لو ادز ابووك ...

عافتهم ومشت للمطبخ  خمس دقايق وطلع معد ويه اخوانه يفركون بعيونهم ..

كتله تعال عمه هذا عشاكم على ميز .. معد سوده عليه كوه ياكل ،  حطته امي وتوكل بي ..

دخل جاسم من باب باوع عليهم كله ها بابا شلونك هسه ..حلكك خما يوجعك ..

جاهل هز راسه لااا مسد على راسه وعافنه مشه للغرفه .. خفت تكب العيطه مره لخ .. بنص ليل ونوب جهال يخترعون ..

امي فرت ايدها ..

خلصو عشه شلت الاكل وغسلت مواعين امي راحت نامت .. وجهال صعدوا فوك لغرفتهم وياي .. دخلتهم وغطيتهم .. بس صغير نزلته يم امه دكيت باب فتح جاسم

:- ابنك نطيته اله .. رواء مدده بالفراش ومطيه ظهرها .. اخذه مني عفته وصعدت ..

صدك علاقتي بيها مو زينه ،  واصلا ضجت منها من طعنت بيه ،  من تكول لجاسم اختك عدها علاقه ويه اسحاق ،  بس هم نقهرت عليها من ضربها وجهه احمر ..

مهما يكون هيه هم مره مثلي ،  واحس بيها من تكون مستضعفه وتنضرب .. تذكرت ضربه ابو فهد الي لزمت خدي والله عليه ايد ثكيله تفلش الوجهه ..

صعدت فوك ادرس .. افتقدت هند هواي هواي تبطي علينه وماتسأل كلت اراسلها عيب من رجلها ادك عليها بهل ليل .. دزيت الها و ماردت ..

كلت اراسل رقيه .. من موبايل امها .. راسلت هم ماكوو ..
تركته والتهيت ادرس .. لحد.ماتعبت ومددت بفراشي .. ، اجه بالي اسحاق ، من يكلي تعب عيوني وجع كلبي ، جريت نفس مضايقه ،

مشتاقه .. مشتااقه اله هوواي .. بس بعد وفاه ابويا مستحيل اتواصل وياه واعرف حبنه مستحيل ..

ليش اعذب كلبي وياهه .. ليش اتعلق بي زياده واعلم نفسي انو اغفه على صوته ..

الحب يوجع ، بس اذا مامشه نفس مااحنه مخططين يصير نقمه ، ويأذي حيل ،  يخلي لا ليلك ليل ولا نهارك نهار .. غمضت عيني ودمعه بطرف عيني نزلت على خدي  .. باوعت لجهازي ..

ماخليت اله شي بجهازي ، لارسائل ولا محادثات ولا صور كلشي امسحه ،  اخاف لا يوكع بموبايلي بيدهم .. تذكرت رسالته الي نطاها الي بيوم جنت راجعه من مدرسه ..

كمت فتحت الكنتور ودورت بين كتبي القديمه ضامتها بمجله مال "سيدتي"

طلعتها منه بعدها على سفطتها .. فتحتها ابتسمت واني اشوف خطه الحلو وشلون جار الكلمات جرر ..لو بدايه الرساله سلام عليكم ورحمه الله وبركاتوا

ابتسمت نزلت دموعي غصب عني ، واني اتحسر عليه .. ليش حبي مو سهل مثل هند ،  لاحبيت من غير دين ولا من غير طائفه ولا شي على شنو هالالم ..

خايفه ارجع اتواصل ويااه ،  ورشيد يطين عيشتي والله هالمره ، محد يخلصني منه اذا لكفني .. سكتت وكلت اعوفها للوكت ..

رجعتها لمكانها .. ودخلت بفراشي انام .. ضليت فتره ويله غمضت عيني .. هواي افكار تتزاحم براسي من شوقي لياسر و اسحاق ،  لمصيري بعدين لجاسم لبيت جدي لكلشي ..

صبح حسيت على صوت امي تحجي وصوت جهال .. كمت غسلت وجهي ونزلت .. صبحت عليهم امي ردت ورواء ماتحجي ناطيتنا ظهرها تسوي ريوك لجهالها .. جاسم بالشغل ..

سالت امي اذا داكه على هند شو مالها حس .. كالت صار اربعه ايام ماداكه عليهاا .. كالت شو دكي عليهاا .

كعدت بصفها اصب جاي .. كتلها البارحه راسلتها ماكوو .

سكتت وبين القلق عليهاا :- هيه اختج هم خنوسيه وكطعيه ..

:-ملتهيه ياايمه رجال وطفل وعيال شتلحك ..

باوعت على رواء :- ليش يمه نسوان يم العيال اربعه وعشرين ساعه لازمه موبايل من وصلت لاختك ماتلحك..

باوعت علينه رواء بطرف عينها اخذت صينيه ودخلت لغرفتهاا ..

امي فرت بحلكها كالت هااج شوفي هاي جنه واختج الغبره جنه .. البارحه تسب وتتحلف باخوج واليوم طلع من الغرفه يتمضحكون ..

ابتسمت :- الله يهديهم خلينه مجفين شرهم مو شفتي بارحه جهال تتعايط خبلووهم جان موتها ..

:- الله يسعدهم شريد منهم قابل ..دخابري اختج باله شوفيهاا ..

:- اخلص ريوك وادك عليهاا ..

خلصت وكمت دكيت عليها .. هم ماكوو ..كتلها ماكوو يمه ..

عاد هيه كامت لحيلها و دكت على جاسم تكله :-' اختك صار سبوع ندك عليها ماكوو ،  شوفها ميته عدله شبيها مادك ولاتسأل ، وانته هم لاتفكد اختك ولا شي شبيك ..

رد عليها :-  اخلص شغلي وادك على رجلهاا ..

لليل اجه جاسم وجهه مغندب .صااح يمه دكيتي على هند لااا ..  امي كمشت كلبها :-  هااا يمه خيرك شبيها اختك .. كالها هند صاير عدها شوي نزف ، و طارحه . ..

امي كبل عاطت :-  يبوووو .. وماتكول ماتحجي ادري شنو  اني هناا مو امهاا شو محد معتبرني ولاخال الي اعتبار ..

:- اني شمدريني حالي حالج العصر دريت من رجلها كال ماردنه نقلقكم...

:- مايريد يقلقنه ابن سعيده ، ادري مطيتها فصليه الهم ومادري ، شوو مايكولون اهلها لو امهاا ،  لو صاير بيها شي لو ميته هم مايكولون النه ..

:- صلي على محمد يمه ،  باجر بس اخلص شغلي الظهر نطلع الهم كبل ..

عاطت بي متنرفزه :- لاليش باجر خليها على عكبه ،  صدك تحجي ،  شو انته ماعدك ذره حنيه ،  اختك طارحه وصاير عدها نزيف ، وانته تكول باجر ظهر .. شو الا توديني هسه يله اندارت عليه بهمه شو شمريلي عبااا ولج ..

كالها :- هاي شبيج يمه كولي يالله شنو هسه وين بهل ليل نولي صدك تحجين ..

:- لعد تغمض عيني وبنتي مادري عايشه ميته اووويلي عليك يااااحسن تعااال شوف بناتك شلون حالهم .. كعدت بالكاع تبجي وتون ..

هو كابلها ويبوس بيها ، باجر والله كبل لايطر الفجر ، نطلع الهم .. اذكري الله مابيها شي .. حاجاني رجلها كلشي مابيها وجاهل الله يعوضه ادري اول اخر مره تطرح ..

:- ادري شطرحها ، غير هالشغل والمدكه مال عمتها .. شنو رجلها فقير ماعده فلوس  يعزل .. ابنيه مثل الورد ذبلها زواج ليش هيج ، من دون بنات خالاتها هيه متبهذله ، هاي تاليتها دكت رجل الا اخذه ،  هل اخذته شافت منه بس الاذيه ..

:- كولي الله يمه ،  شنو اول بنت اخر بنت تاخذ ابن عمها ، سيف ورده مال الله ، والعيال خما ضاله يمهم طول العمر ،  هم يجي يوم يعزلون .. حظري روحكم باجر من صبح نطلع ..

صدك ثاني يوم حظرنه غراضنه ، من الفجر كلنه طلعنه ،  كوه سياره كفت .. وصلت لديالى منتهيه من حصره سياره ومن ريحه بانزين ،  كل شوي انزل من سياره اريد اتقيئ وماكوو ساحت روحي ..

بس دخلنه سلمت على بيبي وجدو وغسلت ونمت كبل بغرفه بيبتي .. اهس راسي يفتر ..

فتحت عيوني على حس وهوسه سوالف بالحولي .. لميت شعري وكمت بعدني بملابسي الي اجيت بيهم ،  نفنوف نيلي وبي حزام ذهبي ناعم .. طلعت سلمت على عماتي وبناتهم جايات خطار ..

دخلت للمطبخ اغسل اباوع من شباك جدي والولد بره بالحديقه ورجال عماتي هم دخل جدي كال كواج الله جدي ..

رحت بست راسه .. وسلمت كال حطي وصله على راسج يابه،  لو الا نعلمج عيب جدي كبرتي .. منا وهيج كون مالكفج وشعرج طالع مفهووم ..

سكتت ..

:- عجل مو احاجيج ..

همست  خجلانه منه ومتفشله :- اي جدي انشالله .. طلع وعافني يدردم .. جرت نفس كوه مختنكه هاي اولها عود  .. شربت ماي ورجعت يم بيبي ، سألتها على امي وين ،

كالت راحت لااختج هند .. دخلت للغرفه طلعت مشمر من جنطه مال امي اسود خليت على راسي من جذب وطلعت ..

كلت لبيبي لعد اني رايحه الهم ، اخذت عمتي ورحنه بطلعتي،  شفت ابو فهد من بعيد ، يباوع بتجاهنا كلت هسه يجي علينه ،  بس ماسواهه عيونه علينه ويسولف ويه جدي وياشر بيده .. دخلت لبيت عمي حميد ..

عمتي صاحت يااهل دار وينجن خيات شنو ميتات البيت يصفر ..

طلعت رقيه تضحك كالت جوه دنباوع مسلسل تعاي عمه فوتي البيت بيتج ..

بوستني وكرصتني ،  كالت مشتاقتلج والله كوه حقيره ليش هيج بذاته انتي ولاتسالين ولاتجين ..

:- تعبانه والله من درب بس وصلت نمت ..

:- كالت امج نوم العوافي ..

:- امي لعد وين ..

:- راحت من ساعه لبيت عمج ويه ام رشيد عزمتها على عصرونه ..

:-يااا وهند وين ابنها شو ماله حس مشتاقتله .

:- نايمه هند وابنها يم امج اخذته تعاي فوتي ..

:- لا لا حبيبه اروح لاامي ...

:- لا والله ماترحين تعاي دخلي جوه كاعدين نسوالف شنو جيتج بس على اختج احنه مالنه معزه ..

:- لا حبابه خلي اروح

:- وين تولين رشيد ترى بيتهم هم تتكافشون  ..

:- لا بيت جدي رايحه احسن تعاي انتي وياي ،  ماضل هنا عود المغرب امر على هند اشوفهاا ..

كالت اشوف امي واكللها واجي  .. طبت بالنص ساعه وهيه ماكوو .. عمتي كالت روحي هاي امها ماخلتها تجي وياج .. اني هم رجعت للبيت جدي بالدرب تلكتني علا كالت امج دزتني عليج ضليت افتر بالبيوت من وراج ..

:- رايحه لبيت جدي اني ..

مامليتي من كعده البيت ،  دتعاي شوفي الخظار البساتين الفواكهه الزرع يحظي .. جرتني وياهه بتجاه البستان ..
طلعنه اني وعلا نتمشى .. تسالني على ياسر ..

خابرته قبل كم يوم حاير بالعلاج والفحوصات لاتنسين  ضربه قويه ونوب تركها فتره طويله بلا علاج ..

:- سوده عليه ، شفته قبل لايروح اخر مره ، يعرج وكوه يدوس عليها ..

:- اي صار بيها فتك اخر مره .. نوب وحده ماكو احد وياه بس صديقه ،  يشكي يكول الفلوس متكفي اقامه وشقه وعمليه ..

:- ليش مو باع المحل ..

:- شيجيب المحل بربج علا ،  هو بس سفر واجار شقه وعلاجه ، ونوب عمليته بكومه يرادله بنك مفتوح ..

:- هسه شلون ادزوله لو يرجع ..

تنهدت ضايجه :- يم الله بعد هو ، شوف شلون يرتب اموره نوب يرادله مترجم هذا هم مصاريف .. 

دمعت عيونها تمسح بيهم :- الله يكون بعونه ، ويشفي تبهذل من بعد وفاه ابوج ياسر ،  وتاذه حيل مو مثل جاسم كلبه كوي ومشت حياته ..

اباوعليها متأثره حيل ، استغربت هالحب الي عدها ، كتلها :- هو ياسر مثلي عاطفي ومتعلق بابا حيل ..

جرت نفس ضايجه التفتت عليه :- انتو متشايهون سبحان الله . هند وجاسم نفس طينه الا انتي وياسر دمكم ثكيل ...

:- عاب حلكج ام دم ثكيل ، هاي دمنه ثكيل وانتي واخوج طحتو موته علينه ..

دارت وجها تمسح بدموعها :- هاا هاا تعاريني ، والله صوج مو صوجكم صوج الوكت والمحنه الي عدنا ، الي زرعت حبكم بكلوبنه ، والا حبكم انتو مو صحي بس يجيب الاذيه ..

ابتسمت :-خلفه عليج هسه صار حبنه مو صحي ..

تحجي متضايقه :- عجل جلماتج تزرف الفاد زرف ،  شناقصنه اناا واخوي ، وانتو تعنفصون على كلوبنه ..

حظنتها ارضي بيها :- والله انتو الخير والبركه ، بس يااختي الكلب ومايهوى واحنه كلوبنه ماهوت ...

جرت حسره شطولها وسكتت .. يمكن تدري و وصلها الكلام من جدي كال لياسر اخطبها وعوفها وسافر ، مدري ماتدري ، خفت اسالها وتطلع ماتدري وتنصدم ، هيه بس جبنه طاريه بدت تبجي ، عاد اسولفلها شنو كال عليها وشلون رفض ،

خليتها بكلبي وسكتت ، هيه حبابه حيل وفقيره ، وايه من جمال والله ، بس اخوي ماهواها ، كلبه لعب على ميسم ، وذيج ملعبه جرته جر ، خما هاي فاهيه ، تكضيها حسرات ودموع ، حتى حجي متعرف تحجي وياه من الخجل ..

اخذتنه سوالف ودخلنه للبستان مالتهم ،  شكد حلو ريحه نارنج تجنن ، والبرتقال حتى ريحه جو نقيه ،  وبارده لملمت روحي خفت لا حيه شي تلف عليه .. كالت تعاي شوفي بس عليج الله لاتكولين ..

باوعتلها :- شنو شكوو ؟!

جرتني من ايدي حيل :- دمشي حتى نرجع بساع لااحد يفكدنه ..

مشيت وياها بركضه .. وصلنه لنص بستان ،  صفنت على المنظر ، انصدمت من جماله ، اكو جزء من البستان كاصين الاشجار بي ومسويها ارض منبسطه عدله  ،

وزارعي ثيل ، وبي بيت زجاجي متروس ورد ،  وياها كعده قنفات بيض ، وكبالهم مرجوحه واطارها خشب توصى تجنن .. بس بعده جاي يرتب بي ماكامل .. باوعت عليها هاي منو سواهه جدي ..

لا ياجدي منين يعرف هيج سوالف جدج ،   بس رشيد شافها بالنت ،  وعجبته الفكره ، وكال اسويها كعده النه ، واكملها كبل المهر ،  حتى تعقدون هنا ،

ابتسمت وتحجي ،  شكد حلو ولج ،  انتي هنا تاشر على بيت زجاجي ، تكعدين بي وهمه زلم بالخارج  بالحديقه ويسألكم سيد على عقد ..

بلعت ريك كوه .. هااا ..

شببج مو حلوو

بهتت :- لاا حلوو كلش حلو .. باوعتلها بأسف علا صدك عود بعدني داكمل ، سمعت صوت كحه براي ،  التفتت بسرعه رشيد ابتسم من شافني ..

:- نور البستان بت عمي ..

تصنمت بمكاني كتله بتوتر  :- شلونك ..

تقرب يمشي :- الحمدلله دامج طيبه .. ياهوى شمرج علينه ..

:- علا جابتني  ..  التفتت علا وين ؟!!! .. واصله لنهايه بستان عايفتني وماشيه لا ياااا يالنذله  ..

التفتت عليه :-  اجينه نتمشى وصلنه لهنا ..

التفت على الحديقه والكعده الي مسويها كال  :- هاا عجبج ؟؟! باوع ياشر بالسبحه على بيت زجاجي ..

:- اي حلوو

:- تردين اضيف بي شي بعد ..

خنست كتله :- اني'شعليه ماعرف بهل سوالف ..

:- ليش شعليج ،  تقرب يمشي باتجاهي  بهدوء ، خال اديه وره ضهره .. تقرب كلش بينه تقريبا شبرين  .. هذا المكان راح نعقد بي عقد القرانه انشالله .. 

بلعت ريكي عيونه تلمع بفرح من يباوعلي ..وخده الاحمر رغم بشرته سمره مثل بشره اي شخص من ديالى معروف بشرتهم  المميزه لونها على حمار بس لمعه خده برزت من ابتسم ..

جرني من زندي تقرب عليه .. شو ساكته ..

حاولت ابتعد :- اي اي حلو  .. مرتبه .. درت وجهي عنه شوي اريد اتنفس اباوع للحديقه ،  احس بنفسه يطخ بوجهي وحراره نفس الي لسعت خدي ..

حسيت بطبعه شفته على ركبتي وخرت بسرعه ،  بس لزمت ايده القويه وكفتني .. وخرر رشيد .. ضحك شبيج تكهربتي ولج ..

ارتبكت ، ضليت ابلعم :- خلي اروح ..

:- ماكو روحه اليوم جرني لداخل الحديقه .

:- امي هسه ادور عليه خلي ارجع عفيه ..

:- اششش تعااي شبيج خايفه .. دخلني لبيت زجاجي بهدوء كعد وجرني بصفه حط ايده على كتفي تضايقت وزحت عنه .. اريد اروح

حاجاني بعتب .. ليش نافرتني بت حسن  .. بيش مضوجج اناا ..

باوعت عليه سكتت لو بابا عايش مااكعد هاي الكعده واخاف احجي وياه بشي يضوجه .. اااخ ياحسن ..

دنجت وجهي ماحجيت بس باين عليه مغندبه .. رفع حنجي ويمسح بطرف اصبعه جبير عليه ..

:- بالقرعان اناا خوش زلمه ،  جوز ماعندي شهاده الي عندج،  ويمكن مااعرف احجي ،  مثل اهل الولايه واجر البنت لحظني .. يمكن ماعرف اتغزل وارسل غراميات ..

بس اناا زلمه حوك واحافظ واصون المره ، واخاف الله بيها وماقصر عليها .. لا راح يجي يوم ويعوزج شي ، ولايوم ابعدج عن امج واهلج ولايوم انزل دمعتج ظلم ...

سكتت ومانطقت ، تالي نتر بيه :- ليش كل هالجفا يابنت .. عقد حاجبه ضايج خلكه مني .

درت وجهي منه :- ترى ماحجيت شي اني ..

:- ترى انا احس مو الا تتحجين .. ياولوو ليش مستصغرني عبالج انا اثول ..

:- حشاك بلعت ريك ..

:- لزم ايدي وشد عليها ، مابقه شي انشالله هاانت وتجين يمي .. وتتغير نظرتج كلها عليااا..

سكتت والسكوت جان من طرفي مطول هو فقد الامل انوو احجي .. واعرف اذا حجيت راح انضرب لو يعصب وتزيد الامور سوء ..

كال يله امشينه بطينه عليهم .. درب كله يحجي ويأشر على الزرع والاشجار ، وناوي يسوي شارع ،  على كد مترين من بيت للحديقه ، من هذا  القرنص ،   حتى خاف تمطر مانطين من نريد نروح للحديقه ..

كال ازع فوك البيت زجاجي من جهتين تسلق حتى اذا عقدنا وتكعدين جوه ماتبينين لااحد ..

اني بس اهز راسي .. هو متحمس كلش اباوع لطوله يادوب اوصل  فوك بشوي من كتفه ، لابس دشداشه رصاصي والغتره سوده مذهبه ، والسبحه تلعب بجف ايده السمره وساعه ذهبيه ، كل شوي يتلف عليه مبتسم وانيابه امبينه هادئ مدري شعجب صاير اليف  ..

لمن وصلت لبيت جدي اني انسطرت منه ومن كلامه وخططه .. رافقني خوف من جاي كلامه ينذر انو الخايفه منه قريب ،  والوكت جاي يمشي ،  واني كاعده اتفرج عليهم يخططون بكيفهم عني ..

دخلت لبيت جدي تلكتني رقيه تلهث ، ولج جنت ادور عليج ،  وين وليتي ، شافت رشيد وراي دخل حاجته  :- هاا هلا الله يساعدك ابو فهد ، التفتت عليه تسال :- شنو جنتي وياه ..

هو رد عليها:- هلا هلا خويه .. ومشه لغرفه جدي .

كتلها :- شبيج خما امي صاحت الي ..

اي دزتني عليج ، ولج وين وليتي ،  باوعت على رشيد كالت وين جنتو ولج شو جهج احمر ..

:- بالبستان يمعود وين يعني ..

:- عزاا يابستان شسويتو ..

:- شنسوي صخام بعينج ،  جنه نسوالف ،  وجانت علا يمنه شهل عقل ..

هاا دمشي سولفيلي شنو سوالفتوو داحاجيج اني هم ..

:- اميي ولج مو تصيحني ..

:- اي صدك امشي بيتنه احسن ...

وصلت للبيت عمي حميد ،  دخلت لغرفه هند كبل ، حتى ماشفت عمتها ولاسلمت عووذه .. لكيتها مدده سوده عليه الوجه تعبان كوه مفتحه عيونها .. رحت بوستها امي يمها مغندبه وضايجه وهند مدمعه عرفت امي داجه بالحجي وياهه ..

غمزتلها ميخالف .  كتلها ضل بالنه عليج وامي شاطت ،  لان محد كاللها .. ارتاحي ولتشيلين هم شي المهم انتي بخير ،  وجاهل يتعوض ، صلاوات انتي على كولت بيبي حباله ضحكت ، يعني وره الاربعين الكاج هم حبله ..

ضحكت :- عوذه منج لاا راح اجل سالفه خلفه هسه ..

امي  كالت :- هم عوزه تخلفين ، بعد هالطرحه الطرحتيها يابه وداعت ابوج ، الا اغضب عليج لو حبلتي ،  لزمي صخامج شوي ،  وكبري ابنج ، واطلعي من يم سعيده ،  وبعدين فكري تخلفين ..

دشوفي وجهج وجهه ابنيه عمرها عشرينات ،  اني مره بالخميس عمري ،  هم بيه روح اكثر منج ، ميته العيون منكره  ، شبيج ماكله بالدين ، ماضايكه لحمه كبده لو خبزه شبيج يااحظي ..

باوعت لاامي :-  صلي على محمد يمه ، شجاج البنيه غير طارحه ، واكع كومه دم  منهاا شترديها لعد متعافيه ..

:- مو كله من ايدها احد ضربها احد جبرها  ..عمتها ام عين كويه ، تكول شبيها واذا طرحت ، حدها منا ليومين وتكوم على بيت ،  قابل شنو بس بتكم طرحت ..سبحان الله على ذكرها وجفتت سعيده  للغرفه بلا احم ولادكت باب ..

كبل زمخت :- عجل انه اجذب ، شنو بس بتج طرحت خيه ،  احنه مو جدام عينج نولد بزرع ، منا ثاني يوم نطلع للخضره نحوي ...

:- اي خيه صدكتي ، هذاك وكتج ، مو وكت بنتي ،  بنتي مو بنت عرب .. بت اولايه ودلال ونوم الظهاري شجابها على زرع والحوي والظيم  ..

:- تتعلم يعيني تتعلم ، شنو جاهل وماتتعلم .. وراها رجال ويريد مره حوك ، مو مره من اول طرحه نامت بالفراش،  تتونون مبهذله رجلها وياه ،  وخالته يشطف ويحفظ بالجاهل ويكول طارحه مابيها تكوم ..

:- لعد ترديها هيه تشغل ودمها يسفي ، شو انتي فرد نوب بلا رحمه ،  ماتكولين بنت طارحه طفل بشهر ال٤ ،  يعني'شكبره ترديها تطرح منا تكوم على بيت وجاهل منا ، والله لو ترضى ولا اخليها هنا بس اااخ منها الغمه بنت غمه ..

دخلت عماتي يهدن بالوضع لان لاامي تسكت ولا عمت هند ..نوب اندارت عليه ماتسلمين انتي ام خشم العالي على شنو يمه سلامج فد نمونه ماتشمري علينه ..

ضحكت  من جذب اداري الموقف لاينفجر :- هلا عمه شلونج كمت بوستها وهيه بس نطتني خدها من جذب ..

كعدت يم امي كوه متحمله روحي واصله لخشمي  وامي ازود مني عماتي يردن يغيرن جو خاف يتمالخن ..

هند على سوالفنه غفت خطيه .. عمتها كامت عود تصب غده وعماتي جرن امي وياهن .. دخلت رقيه يمي شايله فواكه وسجينه خلتهن كبالي كالت كشري بين مانظف غرفه خطيه اختج مابيها  .. لملت الغرفه ومسحت الاخشاب وهدوم طفل الوصخه خلتهن على صفحه ،  حتى تخليهم وتغسلهم ..

اديها صلاوات شكد خفيفه بشغل وتنظف وتحجي وسريعه هاي لو اني بس تصفيطه الملابس اضل بيها ساعه ، نص ساعه وخلصت وكعدت كبالي تستفسر ..

:- اي ولج سولفيلي شنو حجتي انتي ورشيد بالبستان ..

فريت بيدي :- والله انتي بطرانه كلشي ماحجينه .. شافنه بالبستان وسلم واجيته كبل للبيت ..

:- هاا جانو خطار يم جدي ،  هو مو من عوايده يجي خطار لجدي ومايكون موجود ، عرفته يدور عليج .. ضحكت رجال طول بعرض يفتر وراج والله عمي .. البارحه جدي من سمع جاسم جايبكم وجاي كال لابو فهد حتى نقره الفاتحه ونطلبها رسمي بينه .  بين ماتطلع سنه ابوج ..

شهكت :- عزااا ولج شنووو منيلج هالحجي ..

اي والله وانتي ممحلفتني ابوي كال لاامي بليل سمعته يحجي وياهه ..

:- شو محد كلي اني لا ماكو هيج حجي جاسم مجاب طاري لاا ماكو هيج شي ...

:- جاسم مايدري هذا تخطيط جدي ،  وعمامي مأيدي ورشيد يريدها من الله ،  مو كتلج ذاك اليوم راح يقرون فاتحه وبعدها بشهر زواج ..

:- صفنت شو ماكلي رشيد.. لا هو لمح بالبستان بس جوز اني ثوله ممنتبهه عليه ..

كالت الله يعينج والله جدي حطها باله ،  بعد ماتدرين جوز بنفس اليوم يعقدلكم سيد ..

دمعت عيوني بقله حيله :- شنو تايهه خطوبه وعقد سيد شنو قصه لا والله مارضه ..

:- لا مو هو بكيفج ، جاسم موافق ، وجدي ورشيد متفقين ،  انتي بعد شكوو ،  اقبلي بالكت يقبل تكملين دراسه ،  وهم هنا اختج ماتكيفين تلتمين انتي واختج فردمكان..

دفعتها عني :- فال الله ولافالج ،  هاي'شبيج زواج شنو ،  جيه لهنا شنوو ، اني ماراضيه وابوي الله يرحمه ماجان راضي ،  وجاسم ماله علاقه بيه خلي يرجع ياسر والله كريم ..

:- اذا على سالفه ياسر سالفته طويله ،  وره علاج بالاشهر وجاسم تعرفي عصبي ، مايمشي برأيج وجدي وراه وراه ..

ضليت اتحرمص نوب والوب من كلامها  :- لعد امي وين راحت ،  واني راي وين ،  اسكتي مالي خلك كلتمج سميتي بدني والله ..

:- عجل احجي الحق ،  تردين اضحك عليج ،  ومااحجي الي سمعته ،  انا هم صوجي والله ،  الحجايه الي اسمعها احطها بحلكج ..

:- نوب رديتي عليه فوك ضيمي نوب طنكرتي كبر عقلج ..

:- على شنو ضيم خيه ، غماتني بديها :- انتي بطرانه شو ابو فهد ، خالي متخلي بطرك امه واخته ،  وابن اخو اليتيم .. اذا على ترك دراسه والحجاب الي يريد يفرضهن عليج  شنو فايدتهن اولهن وتالي ماينفعنج ..

هبطت من كالت هيج.. ياحجاب خيه ياترك دراسه شسامعه انتي عليج الله ..كولي ...

:- يااا عجل شتردين تزوجين ابو فهد ، وتتمخترين بطولج بالكليات،  بين زلم الغربه ،  على بالج يرضه هو ،  هسه يريد يبطلج ، بس جاسم اخوج كله بس هاي سنه وسنه لاخرى كعدها ..

هو انتي تجين هنا ، وهو يضل وراج ، حتى لاتحجين ويه ولد عمي ،  ومحد يلمحج ،  عاد نوب مرته و تدخل كليه ..

لاعيوني لااا شعرفج بطباعهم انتي ..  والحجاب غصب عنج تلبسي بس تنخطبون ، هو كال افرضه فرض لان الله كال الحجاب فرض حتى لو مارضت ..

سكتت ودمعت عيني ، هاي شلون مصيبه يااربي ،  شهل ناس شهل عقل .. منين طلعولي هذول ، هسه جاسم شلون يرضى ويأيدهم ، منين اجيبك ياسر من اطلعك الهم .. ياحسرتي عليك يابابا ياكسره ظهري والله وضعفي وضيمي انته ..

طبطبت على رجلي شبيج خيه ، الله شاهد اعزج معزت اخواتي ، لاتتكدرين هو يحبج صدك هو قاسي بس'يحبج ..

مارايد عيشتكم ، ولا طايقتها ، حبه شسوي بي .. اخوج يحب اختي شنفعها حبه هاي ممطوله هنا بالغرفه مريضه وطارحه وبالف ياويل هيه ..

:- يااا ليش شمسويلها احنه ..

:- ممسوين ،  وهند ماشكت من احد ،  بس داشوف بعيني اختي ممرتاحه حب اخوج شنفعها ..

:- اي وانتي صادكه عيشتنه متوالمجن بنات حسنه ، شوفيلج حل مادام ماعاجبتج عيشتنه ،  قبل لاالفاس يوكع بالراس،  ولان اذا تتسجلين مرت فهد بعد كلشي متكدرين تسوين . 

درت وجهي عنها حايره ودمعه تلالي بعيني ،  نوب ماسكتت ماخلت حجايه ماحجتها ،  من ام رشيد لاخواته ،، لاام فهد الي عافت ابنها وانهزمت منهم ، ومن شرهم واذيتهم ،  وحكم رشيد عليها وضربه الها ..

كون من الضرب الي اكلته من عد رشيد ،  كسرلها ايدها وفطر بالجف الرجل ، خلاها شهر ماتكوم من فراش ،  لحد ما اهلها طلكوه منه ، وكلشي مااخذو منه  وايد وره وايد جدام .. بس المهم يخلصون من اذيتهم ..

عافتني واخذت الهدوم وكامت .. تاركه وراها هم ،  عليه حمله جبال ، دمعتي بطرف عيني مسحتها .. يارب رحمتك ولطفك ماريد اوكع بيدهم ولايمهم ..

منو يفزعلي اذا طحت بيدهم الحنينين راحو ناس لفتهم التراب وناس اخذهم سفر ..

رفعت راسي اناشغ بدمعي ، تفاجئت  هند مفتحه عيوني ودمعها يجري وياي ..

كالت وصوتها مبحوح لاتصدكين بكلشي ينكال الج وخاصه من رقيه ،  بس هم لاترضين بابو فهد لان العيشه هنا ماتراد راح تعيشين بجحيم .........

#يتبع

باااارت طووويل فوك ( الاربعه الاف ونص )كلمه يستاهل نجمه 💜