رواية ثأر مهري منهاا الفصل الثاني 2 - بقلم اسماء ديمير

《《البارت الاول 》》

#ثأر_مهري_منها

بقلمي " أسماء ديمير "

شلت جنطتي وداطلع  .. باوعت على نفسي اخر مره بالمرايه .. شكلي حلو ومرتب مابي شي .. اخذت الجنطه ونزلت ..

صار بابا كبالي .. كاعد بالحولي .. منزل راسه ادري بي فرحان .. بس بكد مافرحان  .. متوتر وخايف من رده فعل اهله من يشوفوا .. طلعت من الغرفه امي تعدل بجبتها النيليه ..

ابتسمت من شفتها .. هم امبين عليها توتر وعدم الرضا .. اتوقع رجعت حسنه .. الجنه الفقيره .. وخايفه من حمواتها وعيالهاا ..

رفعت راسها .. شافتني واكفه على درج .. كالت ها خلصتي .. هزيت راسي اي مبتسمه وفرحانه .. بس مبادلتني الابتسامه ضل وجهه جامد .. كالت دواج جبتي لو هم نسيتي ..

لا هياته فتحت جيب جنطه الصغير .. شوفتلها بخاخ و الابر .. هزت راسها .. وندارت على ياسر .. كالته شوكت نروح ..

ردها خلي يجي جاسم ونطلع .. شو تاخر هسه ادك عليه اشوفه وينه  .. امي ماعاجبها روحه لعمامي ..

مشاكل قديمه وهسه المي راح ترجع لمجاريها .. بس امي مو من المؤيدين لهذا صلح .. تكول سعيد وبعيد .. واهل ابوج مامنهم سعاده بس ضيم ومشاكل ونفاق ..

عكس بابا الي يبقون اهله شما صار ... وعمر الدم ماصار مي .. لذلك كلنه متوترين وفرحانين .. نتعرف عليهم... صارلنه سنين مشافيهم .. من جان عمري سبع سنوات كطعنه عنهم..

نزلت هند من فوك .. تفاجئت بيها لابسه فستان طويل وردان .. وشعرها شايلته بقراصه .. وهذا مو من عوايدها .. دومه تلبس كصير .. وناثره شعر .. بس اعتقد تستحي لان رايحين ريف وهذا البس عدهم عيب ..

باوعت عليه كالت هاا شنو كملتي !! .. هزيت راسي .. كالت شنو كملتي ترحين هيج ولج ..

باوعت على لبسي ليش شبي حلوو ..

مو سالفه مو حلو .. بس عيب همه عرب عدهم عيب تلبسبن هيج .. بناتهم ماطلع شعرها .. وانتي هذا لبسج لاا ميصير هيج ..

واني شعليه .. احنه رايحين خطار ونرجع ..

لا عيني عيب ميصير رايحين خطار احنه .. حق نحترم عاداتهم .. تردين ينتقدوج بهذا البس .. وانتي لابسه كصير .. وهذا شعر عيب لمي شنو منثور ..

عقدت حواجبي مراضيه .. باوعت على بابا شفته صافن باله مو يمنه .. كتله بابا هند تكول عيب اطلعين هيج .. صدك ..

باوع عليه عيونه حايره  .. كال بدليهن بابا ولد عرب همه ماريد يسمعوج شي وتنغثين ..

ضليت ساكته .. باوعت على هند .. شالبس ..

دمشي خلي اطلعلج شي ..

صعدت فوك وياهه .. بابا صاح بسرعه بابا خلصن ..جاسم راح يجي .. هم يله نطلع ..

فتحت كنتوري طلعت .. بنطرون جينز وياهه قميص جوه الفخذ .. لونه وردي .. لبستهم وياهه حذاء رياضي  .. شعري ضفرته ضفيره فرنسيه .. كعدت تنزلي خصل منا ومنا على وجهي .. ضحكت ..

ذكرتني من جنت صغيره وجانت ترتبني للحفله مدرسيه .. وترتب شعري ..

صاح بابا علينه نستعجل .. نزلنه ركض .. شلنه جنطنه .. ياسر هو يسوق .. وبابا يمه .. واني وهند وماما وره .. واخوي جاسم ومرته و جهاله بسياره ورانه ..

طلعنه من البيت .. والكل متوتر .. احس بنفس بابا .. وكل شوي يجر حسره .. امي عينها على شباك وصافنه .. الجو متوتر .. باوعت على هند ..

صافنه عسيتها .. باوعتلي .. ابتسمت كتلها اني متحمسه اشوفهم ..

ضحكت بهدوء .. كالت اني هم .. مشتاقه اشوفهم .. تغيرو كبرو .. بنات عمي شصاروو .. متحمسه حيل .. بس خايفه هم ..

دك موبايل بابا .. ثنينه باوعنه اله ... شاله بعد سلام عرفته .. هذا عمو سلامه ابو لؤي  ..

هو الوحيد جان عدنه علاقه بي.. ودائما يخابر بابا ويسال ويتصل .. بس ميجي ابد جدي محلفه ميوصلنه ولايدخل بيتنه ...

اتذكره قبل .. حنين حيل ونسخه من بابا بشكل وطبع .. هو اصغر من بابا .. بس يتشابهون حيل .. بس بقو العله .. بعمي حميد ابو سرمد .. وعمي علي ابو حسين ..

هذول من زمان كلبهم قاسي .. ومن يشوفونه نلعب بشارع .. شكو بيدهم يضربونه بي .. واذا لبسنه بجايم .. ماتعرف راشدي منين يجيك ..

شحال هسه من كبرو .. تذكرت نفسي شلابسه بلعت ريك .. رفعت راسي ل بابا وياسر .. ماطول هذول الاثنين بحياتي ماخاف ولااحسب حساب شي ..

قريت لافته بغداد تودعكم .. ماطولنه ساعه وراهه وصلنه .. بيت جدي بريف عدهم خير من الله بساتين .. من زمان عدهم قطع اراضي وبساتين .. وكلهم راعين حلال وخاصه غنم ..

اتذكر من يفوت من يمنه قطيع الغنم .. وحنه نتولاه بالحجار نضربه .. وهنه خطيه يضلن يكمزن ويتراكضن .. وتالي مانشوف غير الحجار ينشمر علينه من الراعي .. ويبدي شتم وغلط .. ويجي لبيت جدي يشكي منه ..

تالي ننكتل كتله جماعيه .. االا اني اطفر منها بسبب ابويا الي يشاكفلي .. فدوه لكلبه وروحه الطيبه .. من يومه حنين ومايرضه احد يضرب مره او طفل .. يعتبرهم ضعفاء .. مو وجهه منافسه وضرب ..

يمكن هذا جان بسبب من اسباب مقاطعتنه الهم ..طبعه يختلف عنه اهله .. ماتراهم وياهم .. تالي بزع وطلع ..

نزلنه من شارع العام .. لطريق فرعي .. بس بنص مناطق زراعيه .. مو منطقه سكنيه .. عرفت وصلنه لريفهم ..

يسموها .. عرب زبيد .. من جهتين خضار .. والعالم تشتغل بيهاا .. اكثرها حنطه اعتقد مدري شعير .. بس خظار حلوو ..

من بدينه نتقدم من للعرب .. كثرت الاشجار و النخل .. كلشي بيها متغير .. حيل شكد حلوه صايره .. البيت وحده بصف الخ .. ومحاوطتها النخل والاشجار .. اني وهند صافنات ..

نسينه نفسنه وحنه نباوع ومنبهرات .. مسوين مثل السياج داير مداير بيوتهم .. بس بالاشجار مسوي مو بحايطين .. يايمه شكد عقده ههه الي يشوفه يكول حلو و ناس تفتهم وعدهم ذوق .. بس مايعرفون حته بهاي الهم قصد .. وغايه حتى لاحد يباوع عليهم وعلى نسوانهم من تنتقل من بيت لثاني بدون عبي ..

تجاوزنه الاشجار وطبينه يم بيوتهم .. عمي سلامه امبين من بعيد .. واكف بدايه البيت هو ولده ينتظرونه ..

بيوتهم مرتبيه ومكبريها ومحدثيهاا .. جنها فلل .. طبكت سياره ياسر .. اني و هند وحده تباوع لثانيه .. كتلها شفتي ..

اي ولج شفت وراح نشوف هم ..

ضحكت .. باعي بيوتهم ولج ..

تخبلل .. انوب كله واجهات حجريه .. منين جابو هذا بس بتركيا موجود ..

اشرتلها بيدي فلوووس عمي فلوووس ..

ضحكت وكرصتني اسكتي .. امي خزرتنه .. كالت والله الي تضحك بخفه الا الطمها على حلكها جدامهم .. سكتنه ثنينه ...

وكفنه بصف البيت الي واكف كباله عمي سلامه ولدهه .. فتحت الباب ونزلنه .. بابا مشه جدامنه .. لحكه جاسم ... عمي سلامه ركض على بابا .. احنه وراهم نمشي .. عمي سلامه حاظن بابا ويبجي بصوت بابا يبوس بي وحاظنه حيل .. 

ياسر ضحك... كله كول يالله عمي شنو القصه اليشوفك يكول عليه..  اسير راجع من ايران ..

عاف بابا واجه يبوس بجاسم وياسر .. ول ياب هذول ولدك ياحسن جثير كبرانين .. حدرو هين يابه تعالو احبكم ..

ولده واكفين سلمو على بابا وباسو .. عمي سلامه كال لبابا ..

خويه حسن .. وهذا لؤي وهذا معتز .. كله عرفتهم بس كبرانين صارو شباب ..

اي كبرو كبرونه وياهم ..

دش واني اخوك .. لاضل واجف هين .. حدر شوف هلك مشتاقيلك جثير ...

دخل بابا هو وياه وراهم الولد .. نزلو جنطنه ..  دخلنه لحديقه البيت ..  الدرب من باب الاماميه لباب البيت اكثر من خميسين متر ..

دخل هو عمي للبيت كبلنه .. مانسمع غير بس .. كبت العيطه .. وبجي وصياح ..

اسمع عمو سلامه .. يصيح جبتلج الغايب يمه جبته ..  تعاي عايني ..

جسمي كزبر .. اباوع هند تبجي .. وامي وجهه احمر وعيونها مدمعه .. مرت جاسم ورانه هيه وجهالهاا ..

جلبت بياسر .. باوع عليه .. كال شبيج خفتي .. حطيت راسي على جتفه وامشي وياهه...

دخلنه للبيت ..عبالك امه محمد كلها هناا .. مره جبيره حاظنه بابا وتعيط .. نسوان بكد امي حظناته هم .. ويبجن حيل ..

مشايفه دموع بابا ابد . بس هالمره عبالك طفل ضايع منه امه وردو الهاا.. يبوس بديها وراسهاا ..

محد استقبلنه كله واكفه تباوع وتبجي وياهم .. جهال ونسوان ..

هند عبالك شلالات مو دموع عدهاا .. باوعت علينه الحجيه .. كالتله يمه هذول وليداتك .. يمه حسن كبران وصاير جد سمعت .. يايمه ياغالي صاير جد ..  وينهم يمه وينهم .

باوعت علينه .. كالت تكربو يمه احبكم تعالو  ..

تقدم عليهاا .. جاسم باس راسها وايدها هو ياسر ..

اني وهند نستحي ونخاف هم ..

كالته يمه بنواتك يستحن شنو تعالو جده ..

تقدمت عليها هند باستها وحظنتها حيل .. امي سلمت عليها وعلى نسوان .. اني مجلبه بابا ..

كال روحي بوسي جديتج وسلمي عيب بابا ..

رحت كوه .. بست خدها .. جرتني باستني و تشم بيه .. يايمه بزر حسن الغالي يمه ..

ابويا كالها هذا بزر الكعده هناء .. عرفتيها ..

ااي يمه شلون ماعرفها .. هاي صفره بس هيه طالعه على امها .. ولا جهالك كلهم علينه سمر ...

ضحك كالها اي والله ..  تزوجتها حتى تحسن الانتاج مالتي .. تالي اني خربت انتاجها هههه ..

كعد يمها يبوس براسها وديها .. وكل شوي هيه حاظنته وتبجي ..

صاحت بنسوان .. ياولو ضيفوهم ولجن .. على شنو واكفات امشن ركيكات ..

اكو منهم ضلن واكفات .. الي عرفته هذني اخوات بابا عماتي .. سليمه و نشام ..

سألها على جدي كالته .. عده طلابه بالمضيف وهساع على جيه .. هز راسه ..  كالتله يمه كافي اكطع الزعل .. تره العمر كاضي .. وانته ولدك بهل وكت يرادلكم اهل وعززواا .. وابوك ماخذ على خاطرو .. شما كال اسكت يمه لخاطري ..

كط الغثاك وره ضهرك .. اوكع على ايدو وحبو  .. واسمع وكول اي وتم على امرك  ..

هز راسه .. باوعت على امي .. شلونج ولج حسنه .. شو ساكته بس لاخرسيتي ..

امي ابتسمت كالتها .. لاحجيه شخرس بس الحجي ضاع بعد هالعمر  ..

تعاي هين يمي ، حدري ، كعدت امي يمها ، باوعت علينه ، كالت والله بزراتك مزيونات يحسن ، هذني فتنه بين ولد العم ..

ضحك بابا ، اي يمه مزيونات ومزينات بيتي وكلبي هم ، ياسر كالها شبينه احنه حجيه ترى هم حلوين ..

تعال يمه انته يوسر تعال جده احبك زين ، عمو سلامه كال اجه الحجي ، بابا وكف على حيله ، تقرب عمي سلامه من بابا مدري شكله همس و ياشر بيده ل بابا وطبطب على جتفه ..

بابا بس هز راسه ساكت ، دخل رجال جبير من باب صاله ، وراهه زلم ، كلهم مشبهه عليهم بصغري بس ماذكر اي واحد بيهم ، متغيرين حيل ...

الحجي طويل وبي ضخامه .. نفس ضخامه بابا .. رغم شعر وجه وشواربه ابيض واسود ... بس ملامحه حاده حيل .. باوع على بابا عبالك يعرف بجيتنه ممتفاجئ . بس وجهه ابد ميبشر بالخير ..

بابا عيونه حمر من البجي ، عبالك ينتضر اشاره حتى يتحرك ، من خوف بابا عرفته هذا ابوه ، لابس لبس عربي ، دشداشه بيضه وياهه بشت اسود مذهب ..

طلع صوته جهوري " ول جلب ليش ماتجي تسلم على ابوك جليل الحيا "

بابا ابتسم وراح بسرعه عليه حظنه ، بيبي تبجي ، بابا باس ايده وراسه ونزل على رجله ..

مخلاه يبوسها دنج عليه وشاله من الكاع ، ضربه براشدي وحظنه ، احنه نباوع ونبجي وياهم ..

حاجاه معاتبه بزعل سنين ياحسن سبع سنين زعل دهر فات يابه ماحن كلبك على اميمتك وعلى اهلك ، شنهو كلبك يابه ..

عمي حميد حاجاه طول عمره متمرد علينه شنهو جديد ...

عمي سلامه قاطعهم يضحك مو وكت عتاب يابه ماكو عتاب بين الاحباب هل رجع لحظن اهلو ويبجي مثل جاهل عبنو حنين وكلبو رهيف شوف وليداتو يابه شحلاهم باع ولدو زلم صارو بصلات محمد ..

التفت علينه اشر لاخواني تعالو بالعصا مالته المتوجي عليها ، تقرب جاسم حظنه وباس ايده هو وياسر ،  سلمو على بقيه  ، مشالله هواي ، ماعرفت ولا واحد منهم ، ولاتذكر واحد منهم ..

كعدنه كلنه بصاله بعد مابوسنه جدي ، الي امبين كوي رغم كبره بالعمر ، وصوته عالي ، عمامي ثلاثه وبابا رابعهم ، وعمي الخامس شهيد ، تاسر بايران ومات هناك ..

بابا كاعد بنص جدي وجديتي ، عرفنه عليهم بابا وبوسناهم ..

اباوع عبالك جاين من المريخ مكابلينه ويباوعون علينه ، احنه ساعه نبتسم وساعه نصفن هم ، كال جدي نتر بالنسوان  صبو الغده بالحديقه بالعجل شبلاجن سهيتن ياول  ..

تطافرن من يمنه يله ويله وامشن فضنها بساع ، ماطولن نص ساعه ونشوف غير المواعين وصواني تنكل ، امي كامت ، بيبي كالتها اكعدي خطارنه هساع انتي  ، التفتت علينه كالت كومن انتو يبنيات ، كومن عاينن بنات عمجن ..

ابتسمت بدخلي لو تعرف كلاص مي ماعرف اودي اني ، شلون اساعدهن ، امي خزرتنه مو تفشلني عود .

طبينه للمطبخ ، بابتسامه ، مثل الهبلات ، هنه هم نفس وضعنه مستغربات جفتتنه للمطبخ ..

مطبخهم بكد صاله ولحولي مالته يمكن ،  جبير حيل وكفنه على صفحه ، واحنه نشوفهن يصبن ، اجت مره ..

كالت ها خيرجن ..

هند كالتها " بيبي دزتنه نساعدجن ".

ياصلاوت على محمد  ، شتساعدنه هو حنه بحاجه مساعده هاي عايزه ضحكت ، اندارت تباوع على البقيه ، التفتت علينه مره لاخرى ، شسمجن ياعيني ..

ردت هند ، كالت اني هند وهاي هناء ،  تقربت منه ، صلاوات بنات حسنه ، جرت بنطروني كالت شلابسه يمعزايه انتي ، جاره بنطروني بطرف اصابعها ، عبالك شي وصخ لو ملوث ..

هسه يجون ولدنه من صيد ويشوفوج هيج ، صاحت لوحده منهن ..

رقيه امشي انطيهن دشداديش منجن ، هسه يجون الوليدات ، ويشوفوها مزرزره هاي ..

استغربت لهجتها الخشنه ، عقدت حواجبي ، حسن البقيه عليه ..

حجت وحده منهن وتضحك وياه ، " ام حسين عوفي البنيه جايه خطار ، تعاي يمه ، هنا يم البنات انكلي هذني "

شتنكل ام رشيد مدشوفين البت وافخاذها ، بس عتب على امها الي ماكالتها عيب وميصير هيج لبس ، مو عتب عليهاا ..

عيوني دمعت ، هند كالتها ، بابتسامه ، شبي لبسها عمه ترى متعودات نلبس هيج ..

ردت اي هناك ببغداد مو هنا يمه ، عيب هالبس ، ماتعرفن العيب ما تعلمتنه انتن .امجن ما كالت هذا لبس مايصلح هنا ..

ردتها هاي ام رشيد ، فكي من البنت ام حسين تراها صغيره ماتعرف ..

صغيره شنو خيه ، مو هاي رويدا تنينتها .. مخطوبه وعلى وجه زواج ، بس بنات حسنه صغار شهنو ..

ردت عليها عمتي سليمه " شنهو ام حسين جنج شاده الحزم من هسه على حسنه وبناتها يواشج يعيني يواش توهن دخلن "

" ماشوفين ام حمد شلونهن امهن ماحشمت احد ولاكالت رايحه لديره غير ديرتنه و سترتهن لزمت ذراعي بالشقه وكرصته حيل دعايني الحصر عايني بعينج " ..

اذتني بكرصتها حيل نكتت ايدي منها بضوجه خنزرت عليها 

جنت شايله ماعون انكله وياهن ، ذبيته على الميز ، وطلعت من يمهن ، عفت هند وراي ..

عيوني غرغرت بالدمع ، رحت ركض يم بابا كعدت ، استغربو كعدتي بس ماباوعت على احد بيهم ..

بابا همسلي شبيج باباتي ..

عيوني مدمعه بس ماحجيت ، حظنته وسكتت مهضومه ، جدي كله ،  امبين دلالك حسن موخوش شغله ترى هاي يابه ...

كله " هاي بزر الكعده يابه ، اشوف صغري بيها "..

مارفعت راسي ضليت بحظنه ، لحد ماسمعت صوت هوسه بره ، ونبح مال جلاب ..

ام حسين طلعت تمشي بسرعه بتجاه الباب  ، كبر كون تعثر وتنكلب على وجهه ياربي ، تهلي بيهم ، تلكنهم نسوان ، اسمع صوت حجيهم واصواتهم ، دخلو مجموعه شباب ..

شايلين سلاح كسريات ..

جدي صاحلهم .. تعالو ياولو سلمو على عمكم حسن و  ولدو ..

واحد منهم شايفته قبل ، بس مامتاكده منه ، تحاظنو ويه ابويه واخواني ، جانو بالصيد ، وجابين غزلان ، وجلاب وياهم تنبح اشوفها من شباك عوذه كومه  .

انسوان نكلن الصيد للمطبخ ، وصاحو كمل صب الغده يله تفضلو ..

احنه نسوان صبلنه بالصاله ، وزلم بالحديقه ..

الجو جان متوتر ومشحون ، نسوان عمي ابو حسين وابو سرمد عرفتهن ، من كلامهن على الغده ، امي ساكته ..

ام رشيد سياسيه وطيبه حيل وجهه بشوش ، الحجيه  يحجن منا تسكتهن مناا ، حجايتها كبار ، عماتي لزمن صمت ، عمتي نشام شكد حلوه ، ولاعبالك بالاربعين ، ناعمه حيل ..

وحلوه عيونها مكحله من الله ، كلهم نفس الشكل تقريبا ، سمر او حنطاووين و عيون نرجسيه لو صفر وكبار ..

مسوين اكل دسم ، تمن برياني وحاطات اشكال بي ، وتمن وثريد و الحم ونوب مسويات قطع مال شحم ليه ، يايمه ، شاطت روحي ، واني اشوف شحم ابيض مقطع مكعبات  ..

بس اكره ريحه شحم وشكله وووويع ، حطيت زلاطه كدامه وكمت اخوشك بيهاا ، وكلاص لبن يمي ..

هنه ماشالله ، عين البارده عليهن ، اكلن بالخمسه ، عدهن شهيه فضيعه ، حتى طريقه مضغهن للاكل بيها صوت ، خلت عندي رغبه بالتقيئ ..

هند بيها مجال تاكل تمن ومركه ، امي تجامل ، مرت جاسم رواء ، تاكل وتسولف منطلقه كلش وياهن ..

ربع ساعه وكمت من الاكل ، بس استغربن كومتي ، الحجيه صاحت ، وين يمه اكلي وين كايمه ..

الف عافيه حجيه شبعت ..

امي كالتها هذا اكلها هيه  ، متاكل هواي ..

ماتشوفيها جنها عصفور ، اركدي يمه اكلي شوي خلي بيج لحمه ، لو ماعجبج طبخنه ، تره هو يغذي ويشبع ..

استحيت اكللها لا ، كعدت يمها ، وحطت كبالي لحم ،  وياهه شحمه يااايمه ، كالت شو دكليهن جدامي يله ...

فلست الحم جدامي ، كمت اكلب بالتمن ، مالي نفس ، اريد اتقيئ ، حفرت بالتمن خليت شحمه بي وطميتها ، رفعت راسي خما انلكفت .. شفت هاي رقيه ،  تباوع عليه مبتسمه بمكر ، حركت حواجبها على الحجيه ..

يايابه فد فشلت ، باوعت على الحجيه ، خما شافتني ، لويت حلكي بخجل ، حطت ايدها على حلكها تضحك ، ابتسمت خجلانه دنجت ..

خلصنه غده بالف يالله ، شالن المواعين ودخلن للمطبخ ينضفن وياهن هند و رواء اني ماطبيت ، خفت من هاي ام حسين ، بس تخزر بيه وتباوع لرجليه ، والله حسيت نفسي مصلخه من جوه ..

للعصر البنات ، كالن امشن نطلع نتمشى بالزرع ، بس حطن عبي على جتافجن عيب ، وحده منهن صعدت تجيب عبي ، نزلت وبيدها عبي اثنين  ..

هند لبستها كبل ، اني ضليت باهته هزيت راسي لاا ماريد  ...

ابنيه اسمها علا ، بنت ام رشيد ، مثل امها حبابه ، كالت وين طالعات احنه هسه ، قريبات البيت خلي تطلع هيج ..

ضلن صافنات عليه شلون اطلع هيج ، واني واكفه كبالهن انتظر الموافقه ، كالن ديله ، بس كون تمشين ويانه وبصفنه حتى محد يلمحج ..

ضحكت ، اسمع هاي رقيه كالتها حجيه طالعات للبستان نتمشى .. ويه البنات انروح ..

اي يمه اخذيهن ، بس دري بالج عليهن من جلب ،  ترا مايعرفهن لا يعضهن ..

طلعنه احنه ، وعلا و رقيه ، ويانه بنات صغار يطلع عمرهن بالعشر سنوات بس ماعرفتهن . بس كلهن يضحكن ، تريدلك وحده كئيبه  ماكوو ، ضحكتهن حلو وسوالفهن بعد احلى ..

طلعنه من بيت عمي ابو حسين الي هو جبير وجدي وجديتي ساكنين يمه ،  البيوت حلوه حيل ونضيفه كلش ، الحدايق مرتبه ، تريد شي غلط لو مخربط ماكوو .. كلشي مرتب ويخبل ..

التفتت لناحيه حديقه بيت عمي شفت شخص لابس سلاح ويلاشي بالجلب ، يضحك عليه يخلي يعض الجف وبعدين يسحبه منه وجلب يشمر نفسه عليه يتلاكفه ، عود جلب من يوكف بطوله هذا شلون ميخاف منه يملخه ..

نوب يدفره برجله يضحك وذاك يرجع يركض عليه ماحسيت غير عثرت وانجبحت على وجهي صخت ااخ وهنه صاحن اسم الله شبيج ..

عود تلاحكت على نفسي باديه شو تزلغت كلش كمت لحيلي وهنه يسمن عليه انداريت خما شافني لكيته واكف وكاعد حاجبه ومخصر يباوع مستغرب علينه ..

لاتنسون النجمه فدوه😘