رواية ثأر مهري منهاا الفصل الثالث 3 - بقلم اسماء ديمير

صباح الكاردينيا 💜

《《《البارت 2》》》

《《《 ثأر مهري منها 》》》

بقلمي :- أسماء ديمير

كمت على طولي انفض بملابسي اديه تاذت فد خجلت منهن نوب هذا واكف ويباوع علينه جنه ماعاجبه الوضع .. صاحت علا يااا ولجن ابو فهد شافنه عزاا امشن بساع يله ..

رفع ايده واشرلهن وييين ؟؟؟

صاحت علاا نفتر بالبستان الحجيه كالت ...

عقد حاجبه جنه ماراضي هند وكفت جدامي عود تغطي عليه وتنفض بيه .. اشر ونتر بيها " ولن يله بساع مو تبطن "

مشينه وكل شوي التفت ، الكاه على وكفته وجلب بين رجلي يمشي ، نوب شعلوه يوصل لخصره عوذه نكاسه شلون يقترب منه ..

عبرنه من بيت عمي حميد ، البيوت ناس بصف ناس .. بس الي يفصلها الحدايق .. هنه بناتهم هواي .. نص عرفت اسمائهن ونص لا ..

رقيه بنت عمي حميد بس مو مثل امها هيه حبابه وخوش بنيه ، واجتماعيه وتسولف هواي ، وعلا بنت عمي الشهيد امها ام رشيد تصير هم حبابه ، وروان و هيفاء ، وغيرهن هواي بس ماتذكر اسمائهن ..

طلعنه للبستان ، يخبل شكد حلو ، كالن جانو ولدنه توه يصيدون حشاجن خنازير لان دمرن الزرع ..ولغياد صادو الغزلان .. كل فتره يطلعون يصيدون .. الجلاب رابطيهن بالحديقه شفتهن من طلعنه يخوفن ..

الطبيعه حلوه حيل .. بس صعب احنه نعيش بيهاا .. وهمه صعبه عيشتهم بالمدينه .. احنه نحب ضوضاء و الاسواق والشوارع و الازدحام مال ناس بالشوارع ..

عكسهم يحبون الهدوء و الطبيعه والخضار وصفاء الجو .. يحبون الهدوء بالمنطقه ميحبون زخم سكاني مثلنه ..

مايهم مو مثل مينه .. غسلت وجهي حسيته جلح .. حتى مشي بالكاع ماعرف امشي عدل .. امشي واتعثر بالحجار .. طبينه للبستان .. كله رمان و تين و عنب .. اكثره فواكه .. من عدا الورد ..

تمشينه شوي ورجعنه بعد مارجليه راحن من تعب .. رقيه تحجي هواي وتسال هم هواي ماسكتت بس ونستنه حيل بحجيها ..

كل شوي تلتفت عليه وتكلي خيه ماتخجلين من لبسج .. هذا البنطاروون لو عدي البسه جوه دشداشه بشتى ..

ههه لو تشوفين الي بسوك شتكولين ..

ول ليش اكو اضيك من هيج ..

اهوو بهواي .. اكو ستريج واكو المطاط واكو قماش واكو كتان وهواي انواع ..

عجل شلون دش بيج خيه ..

لا يلبس عادي ترى يتمطى هذا .. بس انتي مستغربه منه من تجربي يطلع غير شي ..

كالت علا .. لا شتجرب غير خاله تشككه على مخها ونبي .. تالي لاتجربه هيه ولابنطرونج يسلم ..

ملابسات بناطير ابد انتن ..

كلهن صاحن بصوات واحد .. لاااا

باوعت على هند ضحكت .. خطيه والله .. لعد شتلبسن .. من تطلعن ..

هيفاء كالت .. لبسنه شغلتين بس .. لو نفانيف طوال لو جبب .. بس الاغلب جبب .. لان احنه خشنات .. ماترهمنلنه تنوره لو نفنوف .. بس صدك شفت عدهن خشونه تخبل عدهن خوران وجتاف وطول .. شكد حلو جسمهن ..

هند كالتها وبالمناسبات شنو تلبسن لعد .. لاتكليلي دشداديش ..

ههه لا ياولو مو لهل درجه .. نشتري فساتين بس بلحفلات تلبس ويم نسوان كرايب مو يم الغرب .. اخوانه مايرضون نتشلح جدام الوادم الغرب ..

ضلن يسولفن درب كله .. لحد ماوصلنه للبيت . بابا وخواني وبقيه عمامي .. كاعدين بالحديقه يشربون جاي همه ونسوان .. نسوان ماخذات كتر ..

... رحنه نمشي باتجاهم .. انتبهت على شبابهم من وصلنه يمهم دنجو راسهم ماباوعو علينه .. حسيت نفسي عريانه من سوو هيج لو بينه عيب .. مو لابسات صخام عبي بعد شكوو ..صح ممغطيات روسنه بس حاطاتهن على جتافنه بس هم لابساتهه ..

بابا شافنه .. كال ها بابا وين جنتن .. ابتسمت .. بالبستان نتمشى .. شفنه عدهم اشكال الفواكهه بابا ..
ضحك كال بعدج ماشفتي شي . عدهم حلال هم . هسه تشوفي بعدين ..

وخر ياسر يسويلي مجال اكعد يمه .. كعدت يم بابا وارتاجيت عليه .. كتله عدهم تين و مشمش هم ورد جوري جنابد ..

هز راسه .. وابتسم .. مسد على راسي .. حط ايده وره ضهري وحظني .. جدي كال شكد عمرج ياولوو ..

رفعت راسي عليه .. بابا كله 15 حجي ..

ماهي صغيره ياحسن ..وانته تعاملها مثل جاهل .. دلال للبنوات ماهو زين وانا ابوك ..

ضحك بابا كله .. شعدي حجي غيرهن هنه ثنين اذا دلال مو للبنات المن لعد الله خلقه ..

جدي هز راسه كله خلقه لحرمتك وانا ابوك ..

خله الكل يغص بالضحك .. عرفته يضرب بابا بسمار .. لان يحبنه ويحب امي .. بس بابا ماهتم لان يدري بنفسه ضعيف جدام مرته وبناته ..

كله ادللهن ويدللني .. كل الي اسوي الهن يرجعنه اضعاف الي .. عمي سلامه كله باين هالشي ابو جاسم .. وجهك ابن العشرين ولاتكول انته اكبر مني ..

عمن دلالهن جايب نتيجه وياك و مصغرك .. شو دلال جماعتي زاد ضيمي ماصغرني ..

ابنه لؤي كله . هذا دلال مغشوش مو بغدادي حجي ..

عجل راح اتزوج على امك بغداديه شتكول شاورني باله عليك ..

لا يرحم والديك يابه تورطني ويه امي .. شذنبي عمي مالي لازم انته وياهه تتصافون.. وتالي اطلع اني مو خوش ..

جدي كله شحدك ولك تثني على ام لؤي غير اكسر ضهرك والله .. بنت عمك حزام ضهرك وام وليداتك ..

اشاقه حجي .. غير تتبره مني انته ليش انا ماعرفك .. مكوي بنات عمنه علينه ..

عجل تزوجتك وعمرها 14سنه وهسه دخلت بالاربعين وتريد تثني عليها .. تطلع ناقص بالقرعان ..

ول يابه كلنه نشاقه .. ياجلمه ردي لمجانج ..

اني مبتسمه .. عمو سلامه شقاوجي .. ولده هم .. البنات اشرن النه تعالن للبيت ويانه .. كمت من يم بابا .. شفت الحجيه تاشر ل رقيه .. على جسمها ..

وتاشر علينه .. هزت راسها رقيه وصاحتنه .. مشينه ورانها .. صعدتنه ليفوك... طبينه لغرفه .. فتحت كنتورها وطلعت دشاديش .. كالت بدلن ملابسجن ارتاحن ..

كتلها .. لاجايبات ويانه ملابس .. بس خلي نصعد جنط ..

جايبات دشاديش وياجن ..

هند كالتها .. لا والله ..

لا لا خيه مايصير الحجه وصتني تلبسن دشاديش .. ترى حلوات شوفنهن ذاك اليوم اخذتهن .. مو الا بجايم عيب من ولد عمي ..

هند باوعت عليه . كالت يله نلبسهن نجرب عادي .. يله ..

كالت والله كصيتهن جدد ملابستهن وصارن من قسمتجن .. عليجن بالعافيه .. بس جربهن خاف كصاف لو كبار ..

ضلينه ننتظر تطلع حتى نبدل .. شو هاي كعدت .. كتلها وين الحمام حتى اغير ملابسي ..

كالت هين بدلي خيه ..

لا استحي .. وياهي الي ..

دشاديش ؟؟ هاي اخذي النيليه .. على كدج اني كصيره والخياطه ماكفتها الي كالت كدريها ويله هساع اكيد تجي عليها قالب ..

شلتها ثلث ارباع ردانها .. وخياطها حلو .. نيلي وذهبي بس ماحبيت البسها ..

كتلها اريد ابدل يله ..

ول يابه تخجل ههههه .. يله اطلع .. هند صافنه .. هه

طلعت بدلنه ملابسنه .. دشداشه هند .. لونها حمره حلوه عليها وهيه بيضه .. بيها عرض بس على طولها .. واني ضيك من يم الخصر وصدري شوي . لان مربربه .. وعدي مناطق بيه وزن .. بس طويله عليه لازم اشيلها وامشي ..

طلعنه من الغرفه نزلنه جوه ..تلكتنه يم درج رقيه ..

كالت راح نحظر العشه تعالن ويانه .. التفتت عليه .. كالت طالعه تخبل عليج .. عبالك تخيطت الج ..

الحجيه كالت .. صلاووات يمه شحلاتجن بهل ملابس .. شلجن بذيجنه الخلاكين .. ضحكت من كالت هيج .. صخام ملابسنه خلاكين .. طبينه للمطبخ ..صاير هوسه من النسوان .. نطنه الخضره نلكطها ..

عمه نشام كالت ولج جايبته البنات هين شنو .. بالدهن و ريحه طبخ وزفره .. وديهن للصاله . خطار ويشتغلن ..

كالتها امي دزت عليهن يساعدنه ..

امشن يمه هناك يم الحجيه اكعدن .. التفتت على رقيه .. عجل المطبخ متروس نسوان .. وامج مدزت الا على الخطار يشتغل .. خزرتها ..

كالت اي والله اصلا اخاف على دشاديشي ينترسن ريحه دهن تسون فضل سحبتنه وطلعت ..

كالت تطلعن للحديقه وره بيت .. ردت هند بلا خلي نكعد يم امي ماترضه نضل نفتر .. كالت دمشن هم وكت عشه هو اصلا
... كعدنه يم الحجيه .. صبو عشه وتعشينه هم كلمن وحد .. الحلو بيهم يصبون الاكل بساع و يشيلو بساع وينضفون بساع متحس اصلا ... زلم نسوان تشتغل ركض ركض ..

وره العشه كالو جيبو الجاي .. اجه واحد من ولد عمي .. ياخذه .. كامت هيفاء تركض تودي اله .. رقيه غمزت ل علا .. شوفي ..

كالت بلابل حب .. خما مثلنه جفااف غمت روحها ..

ضلن يضحكن .. كالت علا نصعد فوك نتعلل .. صعدنه فوك .. هند والبقيه لحكنه بعد ماخلصن شغل بالمطبخ ..

اباوع هيفاء حمره .. ورقيه تصنف عليها وعلى وجهه .. طلعت محجوزه اله .. وبعد كم شهر زواجهم ..

هيه اصغر من هند بس يزوجوهن من وكت خطيه .. حتى ممكمله دراسه .. واصله متوسطه ومبطله تكول اني ماحبها ..ورياضيات كرهني بالمدرسه .. وهند سنه اولى كليه .. الي بكد هند مزوجات ومخلفات هم ..

ضلن يسولفن .. والبقيه متقسمات ماشالله .. وكلهن ينتظرن زوج المستقبل يكون نفسه ويرتب اموره ويزوجون ..

زين ماياخذون رأيجن بالزواج ..

رقيه كالت لا .. اهلنه اعرف ويكولون ولد عمجن احسن الجن من الغريب تصير مشاكل شي نحله بينه مو مثل الغريب .. واصلا احنه مانكله احسن منهم شو جمال وشهاده وبيت وشغل وناخذ يم اهلنه مو بعيد وشحده الي يضوجنه الا جدي يكسر ظهره ..

واذا انتن ماردتنه شلون .. وماعجبجن تزوجن ..

ماعدنه هيج شي .. من اول من فتح عيونه على دنيا ..يحجزونه .. وجدي يكول هاي لفلان .. لذلك منلكه احسن منهم .. وهمه متربين جدامنه واحنه هم ..

باوعت على هيفاء كتلها وانتي من كلولج راح تزوجين لؤي شسويتي ..

ضحكت .. كالت فرحت غير .. وين اكو مثل لؤي .. يضحك للهوه وخريج كليه ... ومتربين سوه واعرف اطباعه .. ومارايحه لبعيد .. يعني بيت عمي راح اعيش ..

هند كالت شكد حلو والله .. حتى من تتعاركين تشكين لعمج عليه يبهذل احواله .. وهم تزعلين قريب بيت اهلج ..

رقيه :- اي هو هيج .. حتى جدي يكول هيج .. زواج الاقارب ماكو احسن منه .. بس لو ما مرض الوراثي بينه جان احنه بخير ..

سالتها اني .. مرضيش قصدج ..

كالت هيفاء .. لان ناس تاخذ من ناس ومابينه غرب فدمنه متشابه .. تصير حالات مرضيه .. اخويه حسين عده ابنه بي مرض بالقلب لان مزوج بنت عمي .. ونسو يضربون الابره .. وتزوج عليها .. لان اي خلفه ثانيه يطلع مشوه او معوق ..

علا :-.. اي اخويه عدنان المرحوم هم ابنه فهد سوده عليه هيج مريض ..

سالتها هند .. خطيه هم قلب ..

كالتها لا .. نولد عده.مشكله بالسمع ونطق اخرس يعني ..

هند :- . يااا اسم الله شنو هاي ..

اي والله بعد نصيبه من دنيا ..

هناء :- وهم تزوج على مرته ..

ردت وهيه ضايجه :- لا هيه اصلا طلبت طلاك . تريد تخلف خافت من الوراثه ودم المتشابهه ..

هند :- تزوجت يعني؟؟! ..

علا :- لا خيه مالحكت اخوي بساعتها ب٢٠٠٦ انخطف وانقتل وهيه ضلت ..

هند :- ياااعيني شهل حظ وابنها شلون بي ..

علا :- حاله حال ضيم ذيج الايام خاصه هيه بس طلعت الاربعين رادت ترد لاهلها ماتريد تضل يمنه بحجه رجلي وراح المن ضلتي بعد ..

أنقهرت عليه حيل كتلها :-.. عزه بعينها شهل كلب ليش هيج ..

ردت هيفاء " شايفه انته ياعيني لوعت عمتي ام رشيد تلوع والله خلت دمعها ماتنشف كل الامراض الي بيها بسببها عبالك فرعون مو جنه .. شدت ويه البنات كورها وكور نغم اخت المرحوم لحد ماخلتتها تزوج وتهج من بيت ..

هند:- شصار عليها ليش هيج ..

هيفاء :- اي خيه غيره نسوان وهيه الله يهديها عرمه والسان شلعت كلب المرحوم ماخلته يتهنى بايامه واذا حاجاه بكلمه فضحته بالصياح والعياط ..

هند فكت حلكها ياايمه شنو من بشر هاي ..

ضحكت رقيه :- خيه بس زمن اول تحول من اخذت رشيد والله اكلها ونومها بطك مشاها على سراط خلاها تفز من حسه بالبيت ووتتلبد يم ام رشيد تتوسل تحميها منه وتفزعلها ...

سالت علا متفاجئه ..:- اخذت اخوج ثاني يعني تزوجت حماها ؟؟؟

حجت علا :- اي غير ابوها راد يزوجها وره ست اشهر كال شنو ضلتها يمي وبعدها صغيره .. بس ابنها مات عليها ليله ونهاره يون عليها كبل جان متعلم على نغم .. ونغم تزوجت وعيالها هم حقنه ماريدون جاهل غريب ومريض نوب يهوسلهم البيت .. لحد ماامي وكعت علينه من قهرها .. منا ابنها شهيد ومنا حفيدها مريض وتشتت العايله وحكمت على اخوي الا تاخذها ..

هيفاء :- كالت حظها كاعد والله بس رفست نعمه بيت عمي فقره ويدارون المره مثل الماي وعمتي ام رشيد ماتحجي ويه جنه تخليها براحتها بس ذيج غمه ضلت ترافس مثل الحصان ..

رقيه كالتها والله حشاه الحصان على الاقل اصيل كولي زمال وثول ضاربها وتزاكد هم لوعت فادهم مرضت عمتي من قهرها وكاحتها ..

حجت هند وتالي وين هيه هسه شو ماشفتها ..

ضحكن غير انهزمت من رشيد لبيت اهلها باليله ضلمه زوعها العافيه والله ليش هو شيحمله هم ماينجرع ..

علا هفتهن بالمخده وجع لاتجيبن طاري اخوي كلبات ..

والله عاد هاي حقيقه اخيج ممجذبات مو طلعت بذاك اليل جنها خبله بطرك الثوب والشعر مزين والوجهه ماينشاف من دم ..

شهكنه اني وهند يمااا عززز العزاجن .. كولن والله ..

رقيه خربت من ضحك .. اي بالقران .. خلتنه اشهر نضرب المثل بيها .. جانت سليطه لسان وعرمه شحده الي يحجي وياه متخاف . شو اخذت رشيد منا ومشت على السراط منا والله نفس ماتتنفس تكدر تفك حلكها غير يترسه دم .. بس جانت مدلله لبس وذهب وطلعات وهدايه مايخلي يريد بس يربطها لخاطر ابنها لان متعلم عليها ومريض .

كتلها " مو تكولين يضربها لعد وين دلال بالموضوع"

علا كالت مو هو وره كل كتله يطلعها ومايخلي شي مايجيبه الها يرضيها هيه ام فليس وتحب تتباها وهو هم عرف دواها بس ماكعدت ابد ضلت تفتش بجهازه وتحشر نفسها بشغله ودور وراه تخاف لاياخذ عليها .. كم مره كالها مالي نفس بالزواج من بعد ماشفتج كرهت حتى نسوان بس غمه ماتاخذ الحجي وحطت راسها براسه عبالها المرحوم ويسكت ..

كتلها بس مو هيج يضربها ويزينها ..

علا كالت غير ماتسكت ضلت تحجي براس امي عليه على مصاحب وحده بغداد ويمكن متزوجها بالسر وخبلت امي علينه وخلتها لاليلها ليل ولا نهارها نهار وتجيب وتحلف لاامي متزوج هناك وهو هم صدك عده شغل ويبطي ببغداد وهيه ضلت تحوك عليه تهايم وترجع ليوره يم امي وعمامي ..لحد مالزمها بليله ضلمه وطكها صفرر ...

هيفاء كالت بس هذا الحل جاب نتيجه وياها تجر عدل فتره وترجع مره لخ تتزومل .. من عدا جسارتها على ام رشيد .. هيه كتلتها صارت مجموعه من كلشي جان متحملها لخاطر امه ومتحمل سوالفا ومكسراتها بس من شافها ماتحترم امها شوفها نبي عربي سكطها ..

صخام يمه شنو هاي ..

رقيه كالت لااا بس جنها جفص وياه جفنه جايده وره اربعه اشهر انعلست علسه اخت جذب .. انهزمت لبيت اهلها

سألتها وهيه وين هسه تزوجت لو ماتت بعد الكتل الي اكلته ؟؟؟

ضحكت علا وضربتني على جتفي :- عرج ميطكها خيه طلكها وتزوجت وره سنه . هم كرايب بس من بعيد ..

ضلينه نسولف .. بالساعه .. لحد ليل وكلهن راحن لاهلهن . احنه نمنه بغرفه رقيه .. واهلي حظرولهمم غرفه وحدهم . ثاني يوم صبح طلعنه من يمهم لبغداد كلنه عدنه دوام ..

من هنا بدت علاقتنه تتحسن بيهم والحلو يوميه يجونه .. كل سبوع يعزمونه لو نعزمهم .. عدهم شغله بغداد يمرونه .. ولدهم صارو ربع ويه جاسم .. اصلا همه نفس طينته ... الي يشوف جاسم يكول عايش وياهم من سنين .

هم عصبي ومتشدد ويانه .. يطلع رحلات صيد وياهم .. لو من يحون زرع .. حتى جدي حبه وكل فتره يدز عليه بالديوان .. مو مثل ياسر الي ينهزم منهم .

يكول احسن يطون للموضوع اكبر من حجمه .. ومايعجبهم المثقف .. يردون ويعجبهم بس البغل هههه ..

اني روحاتي قليله .. لان ثالث بكلوريا .. وعدي دراسه .. واكره تسميع الكلام من نسوان عمي ..

عكس هند الي تحب تروحلهم بكثره .. بكل عطله بكل مناسبه .. عزمونه على عرس هيفاء مارحت .. لان قربت امتحانات البكلوريا .. ضلينه اني و ياسر بالبيت ..

راحو همه ثلاث ايام ورجعو .. بس رجعتهم غير .. ناس فرحانه وناس كالبه الخلقه .. هند طايره الاخت .. هيه وجاسم وبابا متوتر .. وماما عافسه الوجهه ..

طلع جدي خاطب هند ال سيف ابن عمي حميد .. وامبين من وجهه هيه موافقه لو عاجبها ..

كعدو بالحولي واصواتهم طلعت .. اني وياسر مامفتهمين شي ..

جاسم يكول هلك لاتهلك شكو بيها . والولد منه وبينه نامن على بنتنه يمه .. هو اخو خيته .. واني اعرفه كلش زين ..

ماما تخبلت كالته ادزها للعرب وينه وين الريف و شلون تتحمل شغل وبيت وعيال .. ترفض احسن ونكللهم تريد تخلص دراسته وهمه راح يسكتون ..

صاح جاسم .. شكو بيها واذا بيت وعيال .. الي يسمعج يكول من تتزوج هنا ماراح يصير عدها بيت وعيال .. هذا مستقبل البنيه زواج وبيت وجهال .. مو دراسه .. شتسوي بشهاده تاخذها .. الولد عده خير من الله .

امي كالته .. انته جاي تحجي .. تعرف شنو تروح للعرب ماما شبيك العيشه يمهم يرادلها وحده عدها كلب هلكبره .. اني ماكدرت اتحمل عيشتهم شلون راح تتحمل هند .. واخواتك مدللات شلو يتحمل ..

اندار على بابا .. يابه شو ساكت انته هم رافض شنو.. ترى امبين هند موافقه .. فلاتعرقل شغله واحنه ماصدكنه علاقتنه بيهم تتحسن .. يبقون عمامنه واذا نطيناهه بعرب شنو يعني .. منطيهه لاخر العالم ليش مصعبين الامور .. وهيه خوش قسمه ..

هند ساكته .. من شكلها راضيه بس ماتحجي ..منتظره جاسم يحجي ويقنعهم .. بس مستغربه منها .. شوداها وشعجبها بريفهم .. حتى لو بيوتهم راقيه و عدهم شغل و فلوس .. بس ناس معقدين وفوكاهه .. ولد عرب مضطهدين نسوانهم .. شلون تقبل تطلع من حريه لسجن ..

حتى عيشه بالريف متراد .. تروح زياره اي بس مو اعيش بيها للابد .. كلشي بعيد عنها .. مستشفى دكتور صيدليه اسواق محلات .. مولات .. سوك كلشي بعيد .. لازم تروح لمركز المدينه .. يعني للولايه بحجيهم ..

واحنه كل يوم للمول و للمنتزه .. شنو العاجبها هناك...

بابا التفت عليها .. كالها شتكولين بابا هند. شنو رأيج .. محد يضغط عليج ..

هيه سكتت وباوعت على جاسم ..

جاسم توله الموضوع عنها .. كله يابه البنيه راضيه وموافقه .. مو يكولون السكوت علامه الرضا ..

امي عاطت بيها ولج احجي .. شو ساكته ..

بابا كالها بهدوء .. اريد اسمع رأيج كولي موافقه عليه .. ترى اكلج من البدايه .. همه عرب ماعدهم مره تطلع من البيت .. حدها دكتور وبس .. واذا رادت تروح للسوك فمره بالسنه .. ماعدهم ونسه وضوجه واطلع واطب .. وحتى دراسه ميخلون البنت تكمل .. وهذا البس مايرضون بي .. انتي طبيتي لبيتهم وشفتي نسوانهم شلون عايشات .. تردين هيج ..يله هسه شنو رأيج ..

سكتت ماحجت ..

كولي بابا ..

بكيفك بابا .. انته شتكول اني موافقه ..

هاي حياتج وانتي الي راح تعيشيها .. بس اني عليه انصحج واوجهج والباقي انتي حره بي .. رايده ابن عمج لو لا ..

كالته .. بابا هو خوش ولد .. وحتى كال اخليج تكملين دراسه .. اني اوديج واجيبج بسيارتي .. يعني البيئه الي راح اعيش بيها متأثر عليه ..

امي كالت اهنااا الحجي .. يعني مقنعيج من الاول وضامنين موافقتج يله تقدمو موو..

جاسم كالها .. همه غرب يمه وتحجين هيج . غير ولد عم .. حق تكيفين بنتج تعرفين المن نطيتيها مو ناس متعرفين طينتهم شنوو..واذا صارت مشاكل احنه اهل ..

كالها بابا .. فكري منا الباجر وانطيني رأيج .. لاتتسرعين بقرارج بابا .. هاي حياه وزواج ومسؤليه .. وزواج مابي دلال ماما وبابا .. بي جهال وعيال وزوج يطالب بحقوقه ..

هزت راسها وكامت .. امي ضلت تحوم .. وكل شوي تكله صدك حسن تحجي .. هاي جاهل شمفهمه بمصلحتها .. شمفهما شراح تعيش وتشوف هناك..

جاسم ردها .. شنو جاهل يمه .. شوفي بنات عمي اصغر منها متزوجات .. وين رايحه هيه .. خليتني اشك رايحه للادغال مو لعمامها .. وسيف خوش سيف شاغول ويخاف الله .. لاعده مكسرات ولا شغلات تعبانه شتريد بعد احسن من هيج ..

امي عافتهم وكامت مراضيه .. بابا ساكت .. ماعرف بشنو يفكر .. جاسم احسه لا مو احسه هو اصلا فرحان .. لان راح نقوي رابط ويه عمامي ..

امي بوقتها ضلت تلح وتقنع بهند تغير رأيها لو تفكر بالموضوع .. بس امبين هند واكعه وكعه تخوف ..

طبيت لغرفتها . لكيتها لازمه الموبايل من شافتتي .. فزت لزمته و سدته ..

لاتبخلون بالنجمه يعمري 💜😘