رواية ثأر مهري منهاا الفصل الحادي عشر 11 - بقلم اسماء ديمير

《《البارت 10》》

#ثأر_مهري_منها

بقلمي "أسماء ديمير"

فتحت الباب صار بوجهي جاسم وراه رشيد ..

من الارتباك كبل سديت الموبايل بخرعه ، باوعت على جاسم ..

- هلا شوكت اجيت .. كوه طلعت مني ..

- كالي شبيج وجهج اصفر ..

هه مابيه بس جنت ادرس وفززتوني .. رفعت عيوني على سيف و ابو فهد .. سيف عينه على المطبخ .. و ابو فهد عينه على موبايلي الي يدك...

ضميته بجيب البجامه .. رفع نضره عليه .. شافني اباوع عليه .. صغر عيونه مركز وياي .. طلع صوتي يرجف ..

شلونك خويه ..

ابو فهد :- هز راسه الحمدلله انتي شلونج ..

بخير .. باوعت على سيف .. شلونك سيف ..

سيف :- هلا هنو هلا شلونج ..

الحمدلله ..

جاسم كال :- موبايلج هرجنه يمعوده ..

اي هسه ارد صديقتي تسال عن درس  .. فتت من يم جاسم داصعد .. كبل طلعت اركض ..  ماباوعت وراي  .

مو معقوله سمعوني .. لو اكو شك انو سمعوني جان كتلي صار عمل شعبي .. بس ابو فهد عبالك ركز بالموبايل وهذا هو طبعه حشري ..

طبيت وسديت الباب .. واسحاق حرك الموبايل حرك .. رديت بخجل .. الووو 

وين رحتي ولج ليش تسوين هيج بيه ياضالمه .

ههه مو جنت بالحولي واريد اصعد وانته مخليتلي مجال افهمك ..

ماعلينه .. كوليها ..

شنو ..

ها بديه بخباثتج ..

ههه احبك والله ..

هههههههه من راحلج اسحاق فدوه اي والله ..

اسم الله عليك ..

طالعه من كلبج احبك هناء ..

اي والله لو ماطالعه مااكولها ..

طولتي يله كلتيها ..

حتى لو بس المهم المعنى .. لو كايلتها كبل جوز ماقصدها بس لخاطرك اكولها .. بس هسه احسها طالعه من كل كلبي وكلمه احبك قليله .. شعوري ونبض كلبي غير وياك ..

- ولج لاتحجين هيج والله فهيت حرام عليج شوي شوي ..

هههه ...

زين لعد فضيها لهل سنه خلي ننخطب .. مخابرات و رسائل ماتسوى ولاتروي عطش .. خلصي هالمتحانات وادز امي .. لاتعارضين ..

هاا ..

والله شبيج ..

بعدني صغيره .. اهلي جوز ميقبلون ..

نحاول والله كريم .. وان ماقبلو احجزج على الاقل ..

ماشي ..

سديته منه ونزلت فرحانه .. احس نفسي طايره ياربي  .. طبيت للمطبخ هند نفس شعوري .. الضحكه تارسه الوجهه وتحظر بالكيك والضيافه .. عرفت ليش مصره على زواجه من سيف وعاندت امي وضلت تلح ..

طلع الحب يخلي صاحبه هيج يسوي .. ويجنن ويضحك هو وروحه هم ..

كعدت احط الكلاصات بالصينيه .. واباوع عليها .. شبيج طايره وفرحانه ..

ضحكت .. سيف جاي يقنع بابا نزوج هسه .. كافي انتضار .. والخطوبه من طول تصير مشاكل ..

هاا اهنا الحجي .. ابتسمت هالكد تحبي هند ..

باوعت عليه وضحكت .. والله اموت عليه ..

الله يسعدج يارب ..ويتمم عرسكم على خير ..

يوم الالج انشالله ..

ابتسمت ..وسكتت ..

كالت عززززا ..

وكع الكلاص مني فزيت  .. شكوو ؟؟ ..

ابتسمتي !!!!؟ ..

شنوو ..

كتلج يوم الالج .. انتي ابتسمتي .. عزاا منو هذا احجي ..

ضحكت كبر اي والله .. وشنو الغريب مو بنيه حالي حالج ..

لا اكو انه بالموضوع والله .. لو انتي طبيعيه جان كلتي دنجبي ويني وين زواج .. بس فرحتي من كلت هيج ..

سكتت .. حطيت بطل العصير حيل على الكاونتر .. شبيج دادا .. عبالج كلها هند تلعب من جوه جوه .. لو عدي شي اكول ماخاف ترى ..

على كيفج شبيج ضجتي .. صبت العصير وتباوع بطرف عينها .. خفت لاتكشفني ..اعرف اختي من تحط شي براسها .. اخذت ضيافه وطلعت .. واني كلبي شوي هدأت دكاته من خوف ...

كعدت على الميز بالمطبخ .. افكر بالي كاله .. بعدني صغيره على زواج وخطوبه .. باله سكوتي وتأيدي لهل فكره صح لو غلط .. جنت انتقد هند لان راح تزوج صغيره ... هسه اني سويت الاسوء ..

بابا اصلا يمكن يتخبل ويطردهم .. لو ياسر يمه .. جاسم مااخلي بفكري لان فكرته وحدها مرعبه .. حسيت على طبه اصبع على الميز ..

جفلت واني اشوف ابو فهد واكف فوك راسي ..

محتاج شي .. وكفت على حيلي ..

اي اريد اخابر على علا .. اطمن على الوالده . و جهازي علك خلص شحن .. انطيني موبايلج ادك منو ..

ضليت مصفنه بوجهه .. هاا .. ااا هذا اجيبلك موبايل جاسم هسه ...

لا يابه لو اريدو اني اطلبو منو .. بس مايصير رقم اختي عندو  ..

سكتت .. موبايلي بجيبي بس متروس رسائل و صور اسحاق .. خفت يشوفهم ..

كتله هسه اجيبه الك .. من فوك .. مشيت من يمه التفتت عليه بعده عينه عليه ..وامبين متضايق .. صعدت فوك وكفت بنص الحولي ..

طلعته من جيبي .. فتحته .. المحادثات بالتطبيقات بيها رمز .. بس كلت هم امسحها .. توه ادخل على التطبيقات امسح رسائل .. انخطف الموبايل من ايدي .. جفلت جفله .. بحيث شهكت و رجعت ليوره ..

هاي شنو .. شلون تسوي هيج فززتني ..

ابو فهد :- على شنو تجفلين يابه .. لو ممسويه شي غلط ماتفزين كل شوي ...

جيت اجر الموبايل منه .. بعد ايده ودفع صدري رجعني ليوره . شبيج خلي نجري مكالمه وحده وارده الج .. شبيج خايفه وجهج مصفر ..

جيبه ابو فهد مايصير هيج .. تستأذن واخذه من عيني بس مو تسحبه سحب مني ..

- لا لا .. وضعج مايطمن ابد .. بيج شي .. شفته فتحه .. تقربت اخذه ..كتله جيبه صور صديقاااتي وو شسمه .. ااا ومحادثاتي وياهن مايصير اتشوفه ..

كلي ليش شبيها .. بيه شي عيب ..

سوالف بنات .. احجي وكوه ضابطه اعصابي لاتخرط وانهار واصيح بي ..  عيب صور بنات وكلامنه مايصير تشوفه ..

شفته راح للسجلات اهنا صدك متت بدمي .. اباوع حواجبه شلون انعكدو ..

ابو فهد :- منو هذا الرقم الغريب داك عليج اكثر من مره ..

ااا هاا ..

وجع شبيج منو هذا رقم الغريب ..

صديقتي ..

رفع الموبايل ودك على رقم اسحاق .. رجليه بذيج الحظه صدك اخرطن وكامن ميشيلني ..

حطه على اذنه  .. شفت شاشه انفتحت معناه الخط انفتح .. عقد حواجبه .. وباوعلي بخزره .. طلع صوتي حتى انقذ الموقف .. كتله بسرعه .. جيبه ابو فهد.عاد
كااافي مالك حق تاخذ موبايلي ..

الخط انسد .. نزل الموبايل .. وجهه جان ميبشر بخير ابد .. جنه واكفين بالحولي والي جوه يشوفونه من درج امبيين .. باوع ليجوه .. ورفع نضره عليه  .. عيونه حمر ..

جرني من زندي حيل .. ولطشني بالحايط  .. رفع اصبعه بوجهي .. وحق هو الله اذا ماتحجين هسه منو هالكو....... الي تحجين وياهه لكصو راسج كص افتهمتي .. هزني حيل احجيييييي ...

حسيت رجفه خضت جسمي خظ .. كمت ابجي .. كتله رقم اخو صديقتي هذا .. وهيه ادك علينه منه .. هذا هو والله ..

اخو صديقتج كتيلي ..

اي هيه صديقتي ادك منه عليه والله العظيم ..جيب الموبايل يله اريد اروح ..انطينياه  .. مديت ايدي اخذه .. دموعي يجرن ..

كلب بالمحادثات شاف بيهن رمز .. باوع عليه وهز راسه متحلف .. كلت لو يكطعني ماااكول الرمز .. غير اروح بالرجلين والله ..

كتله اريد اروح عاد ..

ضربني على وجهي .. انجبي واسكتي .. كلب .. بالمكالمات ..  دنكت راسي لازمه خدي .. وحايره لايشوف شي ..يفضحني هذا .. والله ابويا ميسامحني ابد ..

رفعت نظري عليه .. وجهه ابد ممقتنع .. كف ايده عاصر الموبايل عصر .. كال اني مو ياسر لو ابوج تضحكين عليه افتهمتي .. وسالفه صديقتج ادك عليج متمشي عدي ..

راح اعبرها هالمره .. لان مالي خلكج وراسي مليان طلايب بس خلي افرغلج والله كريم .. وهذا اطلعه من جوه الكاع .. وانه اعرف شغلي وياه .

سكتت.. بس اجادله تكبر سالفه .. ويعاند ويصر عدي شي  .. بس خلي ينطيني الموبايل واطفر بعد مااشوفه وجهي .. شمر الجهاز عليه ونزل عصبي..

اباوعه من نزل عباله هالك العملاق .. هو عصبي .. طبيت للغرفتي ركض .. من خوفي ورهبه سويت للموبايل اعاده ضبط المصنع .. ومسحت كلشي .. كلت لايحجي شي لابويا لو ل جاسم .. والله يذبحني على القبله.. جاسم ..

كعدت على جربايتي .. وجهي امبين بالمرايه احمر .. واثر ضربه امبين .. نزلت دموعي من خوفه ..

نوب من كل عقلي فرحانه راح يخطبني اسحاق .. خرب فرحتي .. ماطلعت من غرفتي لليل خايفه ومترقبه رده فعله .. حتى صدري تنك عليه ..

طلعت البخاخ خلصان بي شوي .. اريد انزل جوه واخذ البخاخ الحتياط من ثلاجه بس خايفه اصادفه ويحجي شي ..

لحد مااجت هند تصيحني على العشه كتلها مجوعانه ..

توه تطلع كتلها بابا وين شو ماسال عليه ..

هند :- بلي سال بس امي .. كالته عدها متحانات وجاي تدرس .. ليش هيج تنفسج شاربه دوه ..

لا ماشربته ...

دكومي انزلي وياي .. تعشي وارجعي اقري خما كلها قرايه .. ترى متركزين هيج ..

مجوعانه .. اكلج ابو فهد وسيف راحو ..

لا وين باجر يرحون .. عدهم شغل هنا ..

ماشي ..

شبيج وجهه مصفصف.

مابيه شبيه يعني بس لان مماكله وجهي تعبان ..

دكومي اكلي لكمه لاتوكعين علينه .. وراج دواج هم تشربي .. شوفي صوت التنفس مالتج شلونه ..

هسه شوي وانزل ،  نزلت هيه واني غيرت تراكي ولفيت شعري كبايه ونزلت وراهه...

اسمع اصواتهم بالحولي .. طبيت سلمت على بابا وبسته .. ماباوعت على جهه ابو فهد ابد .. كعدت يمه .. سالني ليش ماكو .. تعذرت بالدراسه ..

بابا :-كلي ليش هيج صوت صدرج .. مشاربه دواج .

لا مشاربته هسه اكوم اشربه ..

احس بنظرات ابو فهد عليه .. بس مارفعت عيني عليه ماتجرأت .. ضليت مرتبكه من عيونه .. تعللنه شوي وكلمن راح نام .. اشوف هند ضايجه .. ههه امبين هم فرحتها خربت وبابا مارضه بالاستعجال .. شحال وضعي اني ..

انجبيت وكعدت وكلت اخلص الخامس ويله هو مبقاله شي اصلا ...

بابا صاح .. افرشن للولد بغرفه ياسر يابنات ..

ابو فهد كله :- لا عمي مارنريد نزحم غرفه افرشولنه هين اريح النه ..

ماما كالت اصعدن نزلن لهم فراشات من النضيده الفوك .. صعدت هند كبلي ..

صعدت وراهه .. لكيتها مسفطه الدواشك تريد تشيلهم ..

هناء :- لاحبابه شيلي الغطا انتي وانطيني الفراشات ...

لايمه مابيه ثكال ..

لعد اني شلون اشيلهم .. عود اني صغيره حق تخافين عليه  .. بداعتي .. شيليهم انتي ..

شاشيل ولج.. وهو انتي عدالي مرتين مينخاف عليج .. شيليهم ماما يله لا تصيرين فاهيه ..

ابد مو لئييييمه ..

نزلنه الفرش الهم .. اني شايله البطاطين .. وهند الدواشك سفنج .. نوب تلكاهه سيف اخذهن منها ..

كتلها هنيالج اكو من يتلكاج وياخذ الشغل منج .. باوعت عليه .. كالت اكو من يتمنى وينتظر يشيلج انتي والشغل مالتج لو ردتي بس انتي رافسه نعمه برجلج ..

شمرت البطاطين بالكاع .. جيت اشمرها بوجهاا واكللها هو توه طاب البيتنه وهفني براشدي ودخلني برعب خلاني ارجف  ..
عاد اعيش العمر كله وياهه شيسوي بيه .. لويت حلكي وماحجيت .. لان هو كاعد بالحولي اكيد يسمعنه .. وهيه صوتها عالي ..

فرشنه للولد بالحولي .. ابو فهد ماحطيت عيني عليه ابد .. بس اسمعه يكحكح .. خلصنه و صعدت فوك .. فتحت موبايلي دزيت رساله ل اسحاق .. لادك ولاتراسل .. وانتظرني باب بيتكم قبل لااطلع للدوام ..

حضرت ملابس دوامي وكتبي .. وراهه نزلت ..جوه الفلي لفه جوعانه .. دخلت للمطبخ .. ادور شي اكله .. اكو باقي عشه بالفرن بس مالي شهيه اكل دسم .. طلعت جبن كيري وصمونه .. توه اسد ثلاجه ..

تفاجئت ابو فهد وراي .. كال شعدج كاعده .. اشرتله بيدي صمونه وعلبه جبن .. اريد اكل جوعانه ..

ليش ماتعشيتي ويانه ..

بلعت ريك مجوعانه .. وهسه جعت ..

عجل مجوعانه .. لو هو المسوي مكسوره يخاف ومايشتهي  ..وينهزم ..

عقدت حواجبي وضجت حيل .. شايف عليه انته وتحجي هيج .. لازمني ويه واحد لو لازمني اخابر صديقي لو ..

طفر عليه وجرني حيل .. وزمخ عليه ...  وحق هو الله اكسر بيج عظم وماكول خطيه .. عوزه بنتواتنه يصاحبن لو يخابرن ..

ان جنتي كاعده هان بغداد عبالج حريه وبكيفج فغلطانه .. راسج اكسرو ان غلطتي لاابوج يشكفلج ولا اخوج ..

جريت ايدي منه كامشها حيل .. عيوني دمعن من للالم .. هدني جاي توجعني .. تقرب عليه .. اسمعي هناء .. بعدج صغيره ودنيا كدامج .. لا تحطين نفسج بشغلات جبيره..

لاحكه عليها .. واي غلطه تسويها تراها تنحسب على ابوج .. يمكن يكولون عنج جاهل وتتعلم .. بس ابوج محد يرحمه يكولون ماعرف يربي ..

بلعت ريك خايفه ومتوتره :- بس اني ممسويه شي .. كتلك صديقتي وتتصل عليه من رقم اخوها ليش تكبرها ..

:- منو كلج اني احجي عن رقم .. هناء ترى اعرف البشر من وجهه .. كيف ماانتي وجههج وعيونج فاضحاتج وخوفج امبين ..

من اول مادخلت وانتي مو على بعضج .. اعرفج من تسوين شي وتعرفينه مانقبل عليه .. لاتتراوغين وياي .. اني مو ياسر الي يمسد على راسج ..

بعده يحجي وسمعت ضحكه ... جان صوت ضحكه مو غريب .. وصوت همس جاي من المنور .. باب المطبخ مطله على المنور .. ثنينه سكتنه ..

ابتسم ..كال امبين الاخ سيف ماينتظر يعرس ..

هااا .. شنوو ..

نوب ضحكه نعادت .. هاي ضحكه هند الطايحه حظ .. رجعت تتختل مره الثانيه هاي متوب ..

كتله هاي هند عزه شتسوي بره ..

تعاي امشي اصعدي يله ..

لا بس دقيقه .. شو اشوف .. شنو هالصوت .

جرني شتشوفين ياولي تعاي هين ..

لا هند هاي ..شتسوي بره .. فلتت ايدي منه بسرعه .. وباوعت من باب المطبخ .. شو هذا سيف حاظن خصر هند وحاصرها بينه وبين الحايط .. حاط راسه بركبتها .. وهاي الادب سزز حاظنته و تضحك ..

عززااا .. حسيت شخص جرني ..تعااي هان .. عيب استحي شوي لادحكين  ..

عيب اتفرج مو عيب الي يسوو ..

مرتو  يالمعثوره مرتوو .. الله يسامح ابوج السبب الي يأجل بزواجهم .. والعالم حرجه ...

شنو يعني .. بابا شعلي بقله ادبهم .

اكول امشي اندفسي نامي .. امشي .. يدفع بظهري ويمشيني كوه ..

وخرت ايده ودكيت باب المطبخ .. فززتهم ثنينهم .. باوعت علي ابو فهد كتله بنرفزه .. وفوكاهه يتمضحكون .. عبالك شغله عود تضحك ..

فتح عيونه عليه ..وصفك بديه .. :- كال ايااا الخبنه اي بالقرعان

اجت هند وجهه مخطوف .. تمتمت .. هاا شكو .. جنت هذا .. عوجت حلكي .. كتلها " فوتي خيه فوتي "واني اهز بجسمي  .. نطيتها نظره عود شفنه وعرفنه .. 

خطيه طبت تركض وتالي عثرت باب المطبخ وانبطحت بالكاع ،  رجعت كامت تتلفت علينه غميتها بثنين اديه ولا تعرف اطمطم سوالفها ابد العوبه   ..

ضحكت على سيف الي ضل بره .. عود يبعد شبهه ... كلي امشي نامي يله ..

اخذت لفتي وصعدت .. سمعت صوت باب مال مطبخ انفتح .. صوت ابو فهد هو يكول سيف .. دش بويا دش .. مفضوح من يومك .. انتظرت سنين انتظر كم شهر يالمحترك هههه ..

اسمعه يكله .. منو لكفنه ..

بنت ابوها هاي الصفرا ..

كول غيرها يمعود .. خربنه اخلاقها خطيه هههههه ..

ابتسمت هو اني اخرب اخلاقك ومااخرب يالرعن .. هو اكو واحد فهيم يبوس خطيبته بالمنور .. الي البيت كله يشرف عليه ..

خاب ادخل لغرفتها ومحد يحس .. بس ناس بلا عقل ..مصرين يخلون الواحد يشوفهم ويخربون اخلاقه .. واني بريئه من هيج شغلات والعياذو بالله ..

ابو فهد كله :- دش بويا .. انته ماتستحي مستفرد بالبنت اعرف انته رجلها بس مايجوز وانا اخوك .. تبقه مو حرمتك وماداخله بيتك .. ماحاجه انا اعلمك الاصول وانته ابن الاصول  ....

عفتهم يحجون .. وكملت صعودي للغرفه .. من جوه باب غرفه هند امبين ضوه كاعده يعني .. تذكرت منظرها من دخلت للمطبخ ..

حببت اخبث .. فتحت باب غرفتها جفت حبيت افززها .. هيه خطيه كامت الحيلها من خوفه ..

كالت هاااا هناااء شكو  ..

نترت .. شيسموهه هاي سوايتج مو عيب باله ..لو شافج احد من اهلي شتكوليله .. وهاي انتي جبيره العاقله .. على شنو مستعجله باله ..

الله عليج لادكولين لاحد حبابه ..والله عيب .. لاباجر اضلين تصجمين بيه جدامهم .. عفيه ..

ليش مااكول باله .. مو تكولين عيب ليش اتسوين هيج لعد ..

سكتت وضلت تباوعلي بترجي ..

كتلها مااحجي بس بشرط.. ابتسمت بمكر ..

رفعت حاجبها متفاجئه :- كولي من الاخر هيج ..  دحجي ..

دفعتها وكعدت على جربايتها .. ابتسمت كتلها كولي الله عليج شنو حسيتي من باسج ..

شهكت:-  ياا ولج ..

ههه حبابه .. والله مااحجي بس كولييييي ...

هههه والله احساس ولا اروع .. هيج طرت بسماا وعدي جناح يرفرف .. حتى جسمي ماحسيت بي ..

اي شفتج تضحكين لهل درجه حلو  ...

جانت تحجي وصافنه .. اندارت عليه .. اي حلو حيل بس ويه حلالج .. مو ويه غريب ومحرم . . راح تحسين بتأنيب ضمير وقرف اذا سويتي هذا شي ويه شخص محرم عليج ..

سالتها .. شمعنه حلال احلى ..؟؟

..لان هذا غلاج مارخصج .. حبج واجه من الاصعب شي من الباب واجهه اهلج وناسج .. وتقدم وجاهز لطلبات اهلج .. هذا تحبينه وتحبين كلشي منه ..

ومتاكده هو هم يحبج ويريدج حلال واله طول العمر ..  مو نزه ساعه لو يوم لو شهر .. ويتختل بيج .. ويواعد ..لو يكلج ضروف ماكدر اخطبج .. هذا حبيب وزوج وفه بوعده الي .. الاحساس وياهه امان بكد ماهو نشوه ورغبه ..

الللللله .. شكد حلوو ..

حست عليه .. ووجع ولي منااا .. كومي يله كومي ..

هاا هسه صارت وجع ..

اي واحنه اتفقنه اني وياج منحجي .. واني اسولفلج هاهيه فكت .. يله هسه فاركي ..

سكتت غلبتني الحقيره .. عفتها وطلعت وكلامها يرن براسي ..

حبيت كلمه حلال منها وشلون وصفتها بلامان .. ثاني يوم نزلت ليجوه .. كاعدين كلهم على ريوك ... لابسه ملابس مدرسه محتشمه وشعر ضافرته خفت لا اهيج ابو فهد عليه ...

ياسر كال اني واصلجن ..

هناء :- لا اني اروح ويه سجى مشي لان مواعدتها ..

هاهيه بكيفج ..

لمن طلعت ابو فهد وسيف طلعو وراي .. كمت امشي على كيف انتظر يحركون .. حتى اوكف باب بيت اسحاق داحجي وياهه ..

وهذول بعدهم على وكفتهم بالباب .. نوب ركبو سياره وماحركوها .. راح اجتاز الباب وهذول بعدهم ..

رفعت راسي على صوت فتحت الباب بيت اسحاق .. بس مااكو احد .. وكفت كباله ودكيت .. انداريت وراي .. ابو فهد يباوع من مرايه جانبيه مال سياره ..

طلعلي اسحاق .. كبل كال هاا ولج .. شكو البارحه .. بعده ممكمل .. كتله صيحلي سجى بسرعه  ابن عمي ديراقبنه لاتخلينه نروح بالرجلين .. امشي ..

وينه ابن عمج ..

ولك روووح خرب امشي ..لاتوكف تحجي وياي ..

هاهيه يمعوده شبيج ..

شويه وطلعت سجى .. اخذتها وطلعنه .. القلق اكل كلبي .. وره دوام شفت اسحاق واكف باب المدرسه .. اباوعله من بعيد .. الوجهه يلمع لمع نضافه ونزاكه ..اشرلي خلي نحجي .. اشرت براسي ماشي ..

طلعت كلت سجى اروح للمكتبه اشتري لوازم .. انتي روحي اتاخر اني ..

ماكالت لا .. راحت كبل ..

المكتبه كبال المدرسه .. بيها كتب و قرطاسيه وهدايه و لوازم مال موبايلات وحتى مكياج ..

طبيت وطب وراي اسحاق .. نزع نضاراته وبينت طبره حاجبه .. وقميصه الابيض الي يلج .. بس شوفته خلت كلبي يرجف .. كلي هاا ولج شبيج خوفتيني عليج ...

ذبيت القرطاسيه من ايدي .. سولفتله شلون لزمني ابو فهد وشلون شاك بالموضوع .. بس ماعرف ليش ساكت .. كتله .. ترى اسحاق والله اذا عرفو اهلي يذبحوني ..

لاشوفهم مثقفين وهاي .. بس اذا سويت غلط ونلزمت محد يرحمني خاصه جاسم ..

هاهيه يابنت ناس .. خلصي امتحانات وادز اهلي ..اني هم معاجبني هالوضع .. تختل ومخابرات .. بس خايف من الرفض .. لذلك دأجل بالموضوع ..

اني اعرف اهلي مراح يقبلون لان صغيره .. بس هم خما نبقه نلتقي ونتراسل وماكو شي رسمي .. محسوب علينه غلط هذا ..

الله كريم روحي توكلي بالله انتي .. واني احلها انشالله ..

ابتسمت ..

كال حليانه ..

ههه ..

كولي احبك يله ..

لا هاهيه .. دروح بابا روح ..هم يله ارجع للبيت تاخرت ..

دكوليها وروحي .. شراح تكلفج هاي بخيله

ههه احبك يله .. باي ..

ابتسم تعاي اكفي .. كتله شنوو .. جر هديه على شكل بلوره كزاز وبيها مثل الثلج ينزل وبنيه بالنص تركص باليه .. كال هاج هاي اخذيها ..

عيب من ابو المكتبه بباوع علينه...  واكفين بنص المحل نسولف ومناخذ شي .. عرفنه عشاك .. مو حلوه نستخدم محله ومنفيده هذا حرام ..

ههههه فديته  الي مايمشي بالحرام ... باوعت على ابو المحل .. رجال جبير .. صدك يبيع وويباوع بطرف عينه علينه .. خجلت من نفسي شيكول عليه هسه ..

طلعت .. تمشيت عن المكتبه يمكن عشر مترات .. وسمعت شخطت سياره وراي .. وصوت ..

بنت الخراااااا .. اصعدييييي  اليوم انعل والديجججج ...

#يتبع

تفاعل كل قليل محزن هالشي والله 💜