الثأر الثالث
ثارهم وبنت الفقير
بقلمي ترانيم هادي ♥️
نهايه ... شوف يجابر خلنا نكعد ابيت ابوي اشو البيت فارغ ومحد كاعد بيه وانه من زمان كتلك خلنا نكعد بديرتنا احسلنا
جابر... انه هذيج الدير مااخطيها ماكدر اخاطر بولدي وببنيتي تالي عمري
زهره... چا شني ضل مهجول من ورا المايخافون الله
جاير... الله يفرجها
سيرين ...
حرت افسر تصرفاتهم وشنو المضموم علينه ؟
وصدك ورى اسبوعين البيت مالنا انباع نص المبلغ توزع عالفلاليح الي مات حلالهم
والي بقى اشتريتا بيه بيت عكدنا بأطراف الحله غرفتين ومطبخ وصحيات
... كعدنا الصبح لمينى الاغراض البقت واني اودع كل زاويه بهالبيت وكل انش منها
عشت بهالديره طفولتي علما كبرت ،ورايحه واني اتوسل بكل زاويه بهالبيت حتى ذكرانا تضل محفوره بيه
طلعنى لكينى جوارينا شفت صابرين واكفه بعيد علينا ... رحت ركضت عليها وحضنتها واني دموعي ماتوقفت
صابرين... يعني هايهيه راح ترحين
سيرين... عفيه والله مقهوره لاتقهريني بالزايد
صابرين... انتي صديقتي واختي الماجابتها امي وهسه جاي اودع رفيكه عمري من بعد ماجنتي مثل ظلي
سيرين... بهالحضه عجزت اجاوبها بالنص ساعه هيه حاضنتني مراضيه تعوفني
وتحير شتحجي حتى تقنع اهلي يغيرون قرارهم بس ابوي قافل ومتأكده ورى طلعته شي اباله
لان مستحيل يعوف الديره الي كضى نص عمره بيها وكل شخص بيها مثل اهله
... طلعنى نحو المجهول وجانت مجرد ساعات قليله بس احسها سنوات مرت من عمري
كل شخص بينا ودع جزء من روحه وتركها هناك
... وصلنى جانت عباره عن بيت بصف بيت مومثل بيتنا
صح جان بنيانه تعبان وقديم بس الزرع المحاوط بيتنا والاشجار
واصوات الجهال وهمه يلعبون وكعده النسوان من يلتمن كل عصريه وتنور الطين الي دخانه يتناثر بالجو بالنسبة الي افضل من هسه
هناه كلشي مختلف كل شخص ساد بابه وكاعد حسيت النفس بلكوا اجره وخاصه دربونه هيه وضيكه
سيرين... بابا خلينا نرجع
جابر... كلشي جاي اسوي لخاطرج بويه اصبري والله يكون بعونا
سيرين... يابه مجرد اباوع للمكان اختنك مونوب اعيشن دهر بيه
نزل راسه وراح بدون ميجاوبني ... رتبنا البيت والاغراض الجبناها ويانه
غرفه لامي وابوي والغرفه الثانيه انه واخواني
_ ايام مرت علينا وشوي شوي بدينا نتعود بس موكلش
ويوم بعد يوم والفقر ياكل بحالنا ابوي يطلع من الصبح يشتغل عماله وهوه رجال جبير بلكوا يجر بنفسه
وعمتي وبدر كل فتره يجونا وهواي حاولو يقنعون ابوي يرجع بس هوه قافل
ومن اكله ليش منرجع يكلي علمودكم
امي صارت تخبز للعالم واني اسوي روبه وطرشي الاكدر عليه والمتعلمتله
ومرتضى وليال ومُراد اليبيعون وهمه لسان ويحجون بحيث فتره والناس صارت تعرفنا
ابوي من عرف زعل ومارضى نشتغل
جابر... بطلن هالشغل ماريدجن من هسه تكسرن ضهرجن عود من الله ياخذ امانته كدن وشتغلن على روحجن دام انه موجود سلامتجن من تعب الفقر
نهوه... ياعيني وانته ماشوف حالك اول ماتجي تصيح من ضهرك والوجع اليدك بجسمك لحدمن ضل بهالشغل
سيرين ... يابه فدوه لعمرك بطل من هالشغل وشوفلك غيره والي نطلعه احنى ندبر بيه رواحنى
... بلكوا يالله قنعناه نبيع بس لجوارينا
وعلاقتي بدر قلت نوعا ما مومثل قبل هسه هوه ملتهي بشغله ومودائما يجينا
جياته قلت بس كلما يجي اعرفنه من عيونه شلون كلبه موجر والشوك باين بعيونه
ستلمت نتيجتي وطلعت معدل ٩٤ توقعت اطلع اكثر بس الحمد لله
ماكدرت اقدم على جامعه والضروف الاحنى بيها ماتساعدنا واحنى يادوب مدبرين اللكمه الناكلها
صح نقهرت وتمنيت ادخل جامعه وواحصل وضيفه بس ماردت اضغط على ابوي وهوه حالته موزينه
والي شكد مايحاول يلكى شغل ماكو بسبب انو رجال جبير وضهره مايعينه
ويوم بعد يوم حالنا كلماله يصير اسواء بس مابيدنا حيله
غير نصبر على فرج الله وانشالله ناخذ على كد حالنا
بيوم جنت كاعده بالباب على الصبه وصافنه بالفراغ الصاير بحياتي
شوي واجى مُراد ومرتضى بس حالتهم حاله والتراب ماليهم من فوك لجوا
شفتهم ونزيت على حيلي
سيرين... خير ياستار شصاير بيكم
مُراد... سيرينه صوتج لاتطلع امي
سيرين... ولكمم احجو شصاير بحالكم وين جنتو
مرتضى... اذا ماتسكتين مانكلج
احس الهبطه اخذتني رجعت كعدت على الصبه وصافنه على حالهم مُراد لسه عمره صغير بس اليشوفه ميكول عمره هالكد جسمه ضخم وتارس ،صاير الي مثل الظل مرات احسه مثل ابوي مشكلته مايسكت اذا شاف شي غلط لومايعجبه يتخبل ويخبلنا وياه بعصبيته
ومرتضى اصغر من مُراد
عكس اخوه هادى بشكل موطبيعي عكد ماعمره صغير بس مرات حتى احسه افهم من عندي وحريص كلش علينه
... اجى مُراد كعد بصفي والتعب مبين عليه
طلع مرتضى من جيبه فلوس اجى وحطهن بأيدي
سيرين... شنو هذن ؟
مرتضى... مال شغلنى هنه قليلات بس يكفن مصرف الكم وحتى ابويه مايطلع للشغل ويتعب احنى نشتغل ونكد بمكانه
مُراد... انه ادري اذا ابوي وامي عرفو ماراح يخلونه نطلع مره ثانيه بس لحدمن نضل كاعدين وابونه يكد علينه واحنى بطوله خله يكعد ويرتاح واحنى بمكانه
سيرين... وهذا سبب اختفائكم ومن نسألكم وين ترحون تكولون وي ولد المنطقه من الصبح لليل
مرتضى... چا اذا امي عرفت غير تكلبها مناحه وابوي مستعد يضل طول عمره يشتغل عماله ومايخلينى نتعب ونشتغل واتي تعرفيه يريدنا نحير بدراستنا اكيد ماراح يرضى
سيرين... بس ميصير سوون هيج وبدون علم اهلنا اذا درو تشتغلون وبدون علمهم شحتكولولهم هـاا؟
مُراد... وتردين ابويه يضل يشتغل بالعماله وضهره مكسور وفقراته تهيج عليه من الألم چا احنى ليش سمونا زلم حتى ناكل ونام ونحط رجل على رجل ونعاين على ابونه الشمس تاكل بيه من الحر والحمل
سيرين... ياعيني والله خايفه عليكم حيرو بدراستكم وطلعو شهاداتكم بوكتها راح تجازون كل تعب ابونه
مُراد... وينها امي وليال
سيرين ... امي نايمه من تعب وليال تلعب جوا
سكت شوي وطلع من جيبه لعابتين صغار كلش شعرهن اصفر وملابسهن مثل الاميرات يخبلن
مُراد... هاج وحده الج والثانيه ليال شفتهن بالسوك وجبتهن عبن اعرفجن تفرحن بهيج شغلات
مرتضى... سيرينه انه جبتلج الورديه اعرفنج تحبين هيج الوان
مُراد... اسكت انه كتلك جيبها
سيرين... فدوه اروحلكم يخبلن
للحضه حسدت نفسي عليهم وعلى حنيتهم دعيت ربي يديمهم الي مومستعدة اخسر واحد بيهم
ضلينى شوي كاعدين ووكت الغروب دخلنى جوا دخلو يسبحون ورحت اطلعلهم ملابسهم
وامي نايمه لحد هسه من تعب الوكفه عالتنور بهالحر
خلصت ورحت اسوي عشى واني واكفه اندك الباب
مسحت ايدي حتى افتحه سحبت شالي من على الباب وطلعت بس مُراد سبقني وفتحه
خزرني حتى ادخل عشتو يخزر وكفت ورى الباب
ومبين من الصوت رجال غريب
_ سلام عليكم
مُراد... وعليكم السلام تفضل محتاج شي
_ انـتـهـه ابن جابر مو ؟ صيحلنة جابر وليدي
مُراد... اي صح بس ماعرفتك منو ؟ وابوي موهنا
_ حقك بويه ماتعرفني يله انه حروحن غير مره امرلكم
مُراد... هلا بيك بس منو انـتـهـه؟
الرجال سكت وماجاوب مُراد ... دخل وسد الباب وراه
سيرين ... منو هذا الاجه وشيريد من ابوي
مُراد... مادري والله وماشايفه كبل وي ابوي خله يجي واكله
سيرين ... يله تعال حتى احضرللكم العشى ابوي على جيه
نص ساعه واجى ابوي هوه وبدر سلمت عليهم وحضرت السفره
بنص الحديث وحجى مُراد
مُراد... يابه اليوم اجى رجال يسأل عليك بس ماعرفته منو
جابر... شني وماكلك منو
مُراد... سألته بس ماكلي وعبن اكيد يرد مره ثانيه بس تدري شني عبن الرجال اذا ركزت عليه يشبهك كلش
عاينت لابوي وجهه صوفر وايده رجفت فجأة
جابر: هذا .....
يـــتـــــــبــــــــع....
_ لاتنسون تصوتون وتتفاعلون 😽💓.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!