الثأر الثاني عشر
بقلمي_ترانيم هادي ♥️🕊️.
ضرار ...
الحب وهم يصوّر لك أن امرأة ما تختلف عن الأخريات
_شلونكم حلويني..تصويتاتكم..وتعاليقكم بين
الفقرات لاتنسوها..ومتابعه للحساب ♥️🕊️
taranim_09
واكفه كدام المرايه واخلي بالحمره ونفتح الباب
عاينتله ضرار تصنم بمكانه وصفن عليه
سيرين بكلبي... يمكن ماعرفني اوي وهوه وين شايف بجمالي بس انشالله تصير بيك سكته قلبيه من جمالي
ضرار... شطالعه
سيرين... شنو !
اجى تقرب عليه سحبني من خصري تقرب عليه بحيث انفاسنه اختلطت من قربه جمدت بمكاني واني بحضنه وبهالحاله
تقرب اكثر لزم شعري ويشم بيه وايده تتحرك على معالم وجهي ... همس يم اذني والرجفه سرت بجسمي مثل الكهرباء
ضرار...
يا من أسرْتِ
القلب والعين بسحرك
والعقل أبى التفكير
وتاه في ظلمات
شعرك المسترسل ...
باسني ورى اذني وعاين بعيوني وانفاسه تضرب بوجهي
ضرار... رجيجه رويحتي بدونج
سيرين... ضرار وخر شدسوي
ضرار... اششش ماسويلج شي بس خليني حاضنج
وماحس غير غيد تقتحم الغرفه وهيه تعيط ...وجججج هااا وين نخمدتي
هيه شافتنا وعيونها نطت وجها نكلب اصفر على ازرق من الخجل ... هوه بسرعه وخر مني وراح طلع
وهيه اجت تهز جتف وطك اصبع وتهز براسها
سيرين... شبيج نصرعتي
غيد... والله وكعتي ومحد سمى عليج بوس ومحاضن .... غمزتلي وحجتووبعد شنو سويتو ماسويتو
سيرين... اوي وخررري ماكو شي من البالج ... شمرت شعري وحجيت بغرور ... نسحر بجمالي
غيد... الرجال مكيف من حفيتي شواربج ههههههههههه
حجتها وراحت تركض كبل ركضت وراها واعيط عليها
غيد... يمههههههه تعاي اكلج اشفت
ركضت بسرعه وسديت حلكها
الحجيه... خير انشالله اشفتني
سيرين... ماكو شي بس تخبلت عوفج منها
جريتها سحل للغرفه وسديت الباب
سيرين... انحرج والله
غيد... هههههههههههه يله يبعدي نحريني
صعدت عالجربايه وتكمز ... سوف اموت شهيدا في حبك ياحبيبتي
سيرين... ولي الحجي ميفيد وياج ،طلعت من الغرفه لكيت بس الحجيه بالصاله
سيرين... وينه ضرار
الحجيه... يمه طلع كال بليل يرد خيرج محتاجه شي
سيرين... سلامتج حجيه
رحت كعدت يمها انداريت حتى تضفرلي شعري اريد احس بحنيه امي من تضفرلي شعري وتغنيلي
الحجيه... يمه ليش هالدموع
سيرين... مشتاقه حيل لاهلي
الحجيه... الله يهدي يمه تعالي ليه چا انه هم مثل امج
جريت ايدها وبستها... فدوه لعمرج
كعدت تضفرلي واني ماخذني الواهس واغني
ياهوى الهاب
من الاحباب
جفلت كلبي
غفل بنساهم
ذكرتني بكل حنين
من ايامهم
جفلت كلبي
غفل بنساهم
ذكرتني بكل حنين
من ايامهم
ذكرتني ...
خليت ايدي على وجهي صرت ابجي واشهك اجت غيد كعدت يمي وتهدي بيه
غيد... انتي تكضين حياتج كلها بجي موحتى دموعج خلصت
الحجيه... بنيتي استهدي بالرحمـٰن
سيرين ببجي... ماكدر تعبانه كلش ومجاي اعرف اتصرف وشنو اسوي من جهه حياتي الخسرتها واهلي ومن جهه جحيمي وي ضرار الي تصرفاته شانه حرب جوا عقلي يوم زين وياي ويوم يتصرف بغرابه
الحجيه... الله يهديكم انشالله كافي يمه بجي
مسحت دموعي وكمت غسلت ورجعت كعدت يمهن يسولفن وياي واني بالي مويمهن
شنو نهايتي ياترى ... كمت بسرعه رحت لباب الشقه اريد افتحه قافله
اجت غيد وراي وعابسه وجها
غيد... سيرين لاتأذين روحج بسبب تصرفاتج كتلج وارجع اعيدها مستحيل تتخلصين من قبضه ضرار وبعد شنو من بعد ماصرتي مرته شرعا وقانونا
سيرين بعياط... مااعترف بهالزواج ولايهمني بس بسيطه والخلقج كل الالم الحفره بروحي وكل جرح نهشه بجسمي حخلي حياته مثل السم اخلي كل حياته متندم لان خطه هالخطوه وجبرني اصير مرته
غيد... شكلج ناويه على شر وهالشي مولصالحج بكل الاحوال انتي الي راح تخسرين وفكري بكل خطوه تخطيها
عافتني ومشت واني ضليت بحيرتي الحقد والكراهيه كلمالها تكبر بكلبي تجاه ضرار
كل حياتي ماكرهت شخص ولافكرت بيوم احقد على احد بس ضرار الكره تجاهه عمى على عيوني
رحت للغرفه ارجف اريد دموعي تنزل ديحركن بكلبي
رحت دفنت راسي بالمخده والتفكير ينهش بكل انش بيه
نمت نومه عميقه بعيدا عن الألم والجحيم اي جحيم ضرار
_ماكعدت غير وهوه ينده بيه فتحت عيني لكيته كدامي ركزت بوجها واعاين عليه بتمعن
ليش سويت هيج !؟
وشنو موقعي بحياتك !؟
كل هذا حتى تنتقم من ابوي لو شنو !؟
هواي اسئله تدور بعقلي وماكو غير معذبي يعرف اجوبتهن
للحظه تجمع الكره بكلبي تجاهه بس مستحيل انسى هدفي
والله ادمرك واطلع كلهذا من عينك
ضرار... وين راح بالج ماتحجين
سيرين... ها شكو
ضرار... كافي نوم كومي اتعشي
سيرين... ليش بيش الساعه
ضرار... ب٨
سيرين... حيللل شكد نمت ولاحسيت
ردت اكوم وهوه كدامي صاير مايفصل بينا غير انش توتر من قربه كلش والنفس ضاك عليه
سيرين... شسمه بس وخر شوي
انزاح من مكانه وكمت واني اتثاوب دورت على غيد والحجيه ماكو اكيد رايحات
رحت للمطبخ شفت الاكل فتحته جان جايب دجاجتين شوي وكباب ومقبلات وعصاير
اجى وراي وكف باب المطبخ ومركز نظره عليه
سيرين... المن كل هذا
ضرار... النا وللحجيه عبن ردتها تضل بس خطيه تعبت ويانه اليوم وجبت عشاهن وياي
رتبيهن حتى اوديهن اروحن ابدل وارجع
راح هوه واني رتبت اكلهن بصينيه ... شوي واجى لابس بجامه وفانيله ام التعلاكه
عاينت على جسمه صح ضخم هوه وطويل بس اول مره اشوفنه عضلاته بارزات بشكل بس مرتبات ومومبالغ بيهن والشرايين بارزه
ضرار... شمالج وين صفنتي اطيني الصينيه
سيرين... هاا اي هاي هاك
عاينلي باستغراب وتخطاني اخذ الصينيه وراح
كبل ركضت وراه
سيرين... وجج شهل ثول طفرين وهوه كدامج
رجعت بكرامتي ورحت احضر الاكل
خلصته ورحت رتبتهن عالميز وكعدت انتضره اجى قفل الباب واني اترقب المفتاح يفره بأيده
شافني استغرب تصرفي كل مره مننجمع على سفره وحده ولااطيق اكعد بمكان وهوه بيه
سحب الكرسي وكعد خلاا ايده على خدي وعاينلي بتركيز
ضرار... سيرينه بيج شي
قويت نفسي حتى اتحمله واتحمل قربت رسمت ابتسامه على ثغري وجاوبته
سيرين... لا شبيه يعني يله خل ناكل جوعانه كلش
هز راسه صار يطلع بالاكل ويخلي كدامي
جبرت نفسي حتى اكل لاونوب وي اكثر شخص كارهته
خلص وكام قبلي ،لميت الاكل والباقي ضميته رتبت المطبخ والصاله
رحت للغرفه لكيته مطلع اوراق وتارس الجربايه والابتوب كدامه
عاينلي وحجى
ضرار... سيرينتي بس سويلي جاي
هزيتله راسي ورحت سويتله الجاي تمنيت احطله سم واخلص
صبيتله ورحت وديته اله جان مركز كلش بالابتوب وماعرف شيطلع عفت الجاي عالميز
وكلما افوت كدامه يسترق نظراته
اخذت ملابس ورحت اسبح ، حرت شسوي شبعانه نوم والملل فول
خلصت ورحتله
سيرين... مممم ضرار
ضرار... رفع عينه وباوعلي،هاا
سيرين... ضايجه
ضرار... هسه اشد وصله واركصلج
ضربت رجلي بالكاع ورحت لفيت نفسي ونمت اسمعه يضحك بصوت عالي حتى غص بضحكته هسه ليش يضحك
شوي والغطى نشال مني ... كومي لاضوجين بدلي خل اطلعج
سيرين... ياااي صدك
ضرار... وعيونج
كمت طياره بدلت وخلصت خليت حمره خفيفه واصلا ماعندي غيرها هالحمره بس تضل ثابته ومتوخر
اخذت شالي ورحتله للصاله كاعد ويلعب بمبايله
سيرين... ضرار سويلي شالي
ضرار... تعالي ليه
كام وتقربت منه ترسه دنابيس بس حتى يثبت ويجيبه منا ويخلي منا
لوادري ماكايلتله احسلي
ضرار... يله خلصت امشينى
طكيتها ركضه للغرفه اعاين بالمرايه ، خانكني خنك بيه ومخلي بس دائره وجهي طالعه
مشيت لكيته واكف اباب الشقه قفلها ورحنى
ضرار... اوكفي خل اشوفن الحجيه وغيد خاف محتاجات شي
سيرين... اجي وياك
ضرار... تعالي
رحنى لشقه الحجيه شوي وطلعت غيد شافتنا وعبست وجهى
ضحك ضرار بوجها وحجى... وينها لحجيه
غيد... نايمه ليش
سيرين... خير شبيج معبسه
غيد... مابيه شي محتاجين شي لواروح انام
ضرار... عود كلنه نطلعج ويانه
غيد... ماريد
ضرار... براحتج ضحك وعاينلي اشوفه وجها احمر وكاتم ضحكته
عاينتلها شفتها مبرطمه سحبني من ايدي ومشينى
سيرين... ضرار شصاير
ضرار... هههههههههههه لاشغلين بالج
سيرين... ممم ماشي
طلعنى سوا صعدت قبله وهوه يحجي بالمبايل شوي واجى
اشوفه كلساع يعاينلي ويرجع يسوق اخرها زفر الهوى وشغل اغنيه
انسى العالم كله انساه
من تكون بحضني انساه
فكر بيه شلون تحبني
و بكل قوتك من تحضني
الي يذوب يذوب الحاله
و الي يموت الله وياه
انسى الدنيا و انسى الكون
من ويايه انته تكون
بس بشيفتي و بشيفتك حير
حتى البوسه طيبه تصير
ما اتمنى كنوز الدنيا
انته حبيبي الي اتمناه
انسى العالم كله انساه
من تكون بحضني انساه
فكر بيه شلون تحبني
و بكل قوتك من تحضني
الي يذوب يذوب الحاله
و الي يموت الله وياه
ركزت كلماتها اول مره اسمعها اعاينله مندمج وياها ويدندن بصوت ناصي ... ابتسمت بفهاوه واني اشوفه هيج ولاجن الي يعربد ويكضيها بس عياط
الاغنيه كلما تخلص يرجع يعيدها بحيث احس راسي صار نصين وكلماتها نطبعت ابالي علما طكت روحي وحجيت
سيرين بملل... ضرار هاي صار خمس مرات تعيدها حتى راسي صدع
ضرار... اتي لوتحسين بكلماتها ماجان صدع راسج
سيرين... ممم هيه اغنيه كلماتها حضن وبوس وحب
ضرار... انه وتالي وي لسانج ؟
سيرين... ليش شبيه لساني
ضرار... انزلي نزلي كلشي مابيه بس عام عليج
صف سيارته على جهه ونزلنا اعاين عالمكان الاضويه بكل مكان والعالم اشكال وكلواحد لازم ايد حبيبته مدري زوجته وكاعدين على جهة
سيرين... الله شكد حلو
ضرار... بعدج ماشايفه شي اذا بطلتي تصيرين عرمه ووكاحتج هاي افرج بغداد كلها
سيرين... برطمت وعاينتله،اني شمسويه ها انـتـهـه تكرهني وبس تعيط وتضرب
ضرار... نفخ دخان الجكاره وحجى،اكرهج مو
امشي سيرين بله لغوه
سحب ايدي لزمها وضلينى نتمشى واني فاكه حلكي عالعالم والي كاعده وي حبيبها والي وي اطفالها وزوجها والي كاعدات هنه وصديقاتهن مدري اخوات
ضرار لازم ايدي والجكاره بيده كف ايده مغطي ايدي كلها اشوف البنات يعاينن عليه وجن ماشايفات رجال
سيرين بكلبي... اخذنه وخلصني منه شكو كاتلات رواحجن عليه
جد جان المكان حلو ويغير النفسيه،اخذنا زاويه شوي معزوله عالعالم
كعدني وهوه راح شوي واجى شايل بأيده علبه مال موطه جبيره ومزينيها بشكل مرتب
سيرين... يااااي الي هاي
ضرار... هاج بويه مادري شلون تحبن هالتلعوص
سيرين... تعال اضوكك
ضرار... اكلي اتي بالعافيه انه جكاره كافي عليه
سيرين... شكد تشرب جكاير
ذب حسره وابتسملي ...
عيني وي جمر الجكاره
اثنينهن نفس ... الصنف
هاي حاركها القهر
وذيج حاركها ... الولف
سيرين... مجاي افهمك احاول افسر تصرفاتك بس مجاي اكدر
ضرار... انه تصرفاتي وياج واضحه
سيرين... لا ابد
ضرار... من توخرين الكره الي بكلبج
سيرين... ها
ضرار... اي
سيرين... بس انه ماكرهك
مركز نضره بعيونه ومضيقهم ... سيرين انه اعرفنج اكثر حتى من روحج
أشر باصبعه على عقلي وحجى ... وهالعكل اعرفن الي يدور بيه
غلست عليه ورجعت اكمل حتى بلاعيمي تجرحت من البروده مال موطه واني اتفاده نظراته
ضلينى كاعدين شوي بدون ماننطق اي حرف
سيرين... ماناوي ترجعني لاهلي ؟
ضرار... سيرين هم رجعنى لنفس السالفه
سيرين... اي
ضرار... من بعد ماصرتي مرتي انسي ترجعين
سيرين... والله اشو بكيفك هيه والرب عليه يجي يوم وانت ترجعني بأيدك
ضرار... واذا مارجعتج ؟
سيرين... اندمك
ضرار... انه ماحب الحجي شوفيني افعالج
حجاها وضحك بصوت وخر الجكاره من حلكه وغنى
انسى الدنيا وانسى الكون
من وياي انت تكون
بس بشفتي وشفتك حير
حتى البوسه طيبه تصير
سيرين... وخر منحرف
ضرار... انتي ماشايفه شي من الانحراف خليج مطفيه احسلج
سيرين... انه مومطفيه
ضرار... ابتسملي وحجى ، امشينا
رجع لزمني من ايدي ومقوي قبضته وكأن حطير منه ومتمسك بيه
سيرين... ااي ضرار ايدي وجعتها
ضرار... سيرين دير بالج تعوفين هالايد بيوم
سيرين... شنو قصدك ؟
ماجاوبنى وراح مشيت وراه
وكف يم نفس المحل الي جاب منه موطه شوي واجى جايب علبتين
سيرين... المن هذول
ضرار... الج ولغيد جبتلها
رجعنى وهوه طول الطريق يغني نفس الاغنيه
سيرين... ضراررر كافي عاد
ضرار...من تحضني احضن حيل
خلي كليبي يصيح الويل
سيرين... ضرااار كرهت الاغنيه من وراك
ضحك ورجع يغني ... احرك قلبي جويه بنار
لتخليني ابقى احتار
سيرين... خليت ايدي على اذني وعطت... ضراااار
ضرار... هههههههههههه صاار
سيرين... طنبت عليه وهوه مستمر يضحك
وصلنى نزلت قبله واباوع يمين ويسار الشارع فارغ واضويه البنايه مطفيه نصها
صعدنا لشقه الحجيه بس دكينا طلعت غيد حلكها متروس اكل
غيد... خير
ضرار... بويه كل خير هاج جبتلج من الموطه التحبيها
غيد... عاينتله وهيه مطنبه ... حاخذها منك لان لحيت عليه
ضرار... اي هاج بويه وسدي الباب لاتفتحي لاحد
اخذتها منه وسدت الباب
سيرين... شبيها ؟
ضرار... چا هيه وحد وماطنب عليه زعلانه لان صيحت عليها
عوجت حلكي زهزيت ايدي
سيرين بكلبي... هاي زعلانه لان عيط عليها چا شتكولين عليه كلما يهيج يسحلني سحل مدري شلون لحد هسه عايشه ومابيه شي
رجعنى للشقه طكيتها ركضه للغرفه بدلت وكعدت اكل
وادردم على روحي وحياتي احس الدنيا ضاكت عليه فجأه
سيرين... انه حظي الاغبر ملاحكني ومال اتخلص من هالشويب منتهيه منها لاونوب صرت مرته
غصه بكلبي ودمعه بطرف عيني... ترى شلون حيكون موقف بدر من يدري بيه صرت على ذمه غيره
معقوله يكون نساني ... لا لا مينساني مستحيل اعرفنه يحبني ورايدني
يربببي فدواتك خلصني من الاني بيه وخل ارجع لاهلي وحبيبي اموت والله اموت اذا ضليت يم هالوحش
_كعدت الصبح والنعاس بعيوني كمت غسلت وطلعت للصاله لكيته نايم عالقنفه
سيرين... شيصير هسه لوتموت اترس المقبره مي ورد
غميت نفسي على تفكيري ورحت اسوي ريوك
سيرين... شيموته هوه هذا
سويت الريوك وخلصت رحت للغرفه لبست دشداشه مرتبه وضيكه شوي خليت حمره وطلعت كذلتي
ورحت رتبت الاكل عالميز
شوي وكعد اجى يمي مستغرب وعاكد حواجبه
سيرين... صباح الخير
ضرار... ها
سيرين... صباح الخير
ضرار... صباح النور
سيرين... يله روح غسل وتعال حتى نتريك سوا
ضرار... اي رايح
ضحكت على تصرفاته والله اذا ماسودنتك ماطلع بت ابوي
_كعدنا نتريك سوا بدون كلام خلصنا لميت الاكل وبديت انضف بالشقه
وهوه يشتغل وكلشوي احد مخابره اخر شي جنت بالمطبخ واتصل مبايله
واني كلما احد يتصل اضل اتسمع عليه موعادتي بس لازم اعرف شيسوي
خليت بالي يمه وهوه مستمر يضحك ويسولف بالمبايل
ضرار... لايالغاليه لاشغلين بالج كم يوم وراجع ... خلي بسول ياخذها لايعوفها بهالحاله وانه من ارجع اصرف وياها
سكت ورجع حجى ... يمه شتردين اكعد اتمركص بمكانهن
سلم عليها وسدا ، واني مستمره اتسمع عليه وماحس غير للقلم نشمر عليه
اجى بنص كصتي
ضرار... اكوملج بالعباس اذا عدتيها
سيرين... شمسويه اجيت اكلك تريد جاي اصبلك
ضرار... ستوج شلتي السم
ماجاوبته عفته ومشيت ،خلصت شغلي ورحت للغرفه
عاينت على روحي بالمرايه... اني هسه شكو مطلعه هالشعرات لاونوب مرتبه نفسي
رحت اخذت دشداشه اريح من الابستها احسها حطك عليه ... شيكول عليه تسوي اغرائات همداج سيرين جيبين الحجي لروحج كوا
رحت بدلت ورجعت امشط بشعري وكالبه وجهي مدري ليش بس الوضع لايطاق
نفتح الباب ودخل ضرار تجاهلته ورجعت امشط
اجى تقرب عليه بسرعه لزمني من ظهري وقربني لصدره
سيرين... ضرار شبيك
ضرار... اتي جبتيها لروحج
سيرين... ها ليش شمسويه
ضرار... كاعدتلي من الصبح لابسه دشداشه تريد طك عليج وضاله تفترين كدامي
سيرين... ااا شسمه عجبتني ولبستا مبيها شي
ضرار... مو حتى لبـ*** مبين بيها
سيرين بكلبي... هيج احسلج جان احترمتي روحج
دارني عليه ولزمني من خصري بأيديه ونظراته تتوزع على كل معالم وجهي وانفاسه المختلطه بأنفاسي
قرب وجها يم شفايفي وهمس
ضرار... سيرينه كلبي عليج اليوم لاعب
سيرين... ها
سحب ايدي وهوه يتفحصها باس الشامه البيها وعاينلي
ضرار... هالشامه موجن بارزه اكثر من كبل
سيرين بتوتر... وانت وين شايف هالشامه
ضرار... كل انش بيج وكل شامه مطبوعه بمعالمج حافظ مكانها
سيرين... انـتـهـه شكد منحرف
ضرار... كتلج بعدج ماشايفه شي من الانحراف
ومنها بدت حياتي وي ضرار تتغير ... وجودي يمه طول وفراق اهلي سوا هاجس بكلبي جبير كلش بحيث حقدت على ضرار
الي ردته اشوفه متأذي نفس اذيتي ردته يحس بالحسيت بيه وازيد
بس احيانا بسبب تصرف مامدروس وبتهور نخسر هواي اشياء
وانه بسبب تصرفاتي وتهوري خسرت واولهم حريتي وانو ممكن بيوم ارجع لاهلي
بس مجنت متقبله هالواقع كل البالي جان انو اتخلص من ضرار باي طريقه ممكنه
بس بادت كل الطرق تأدي لطريق واحد وهوه طريقي نحو الضرار
حياتي صعبه جانت وخاصه من بعد مانطيته امل انو ممكن نعيش مثل زوجين طبيعين بالوقت الي مامتقبله حتى وجوده
وغلطي الاكبر وقت خليت أمل انو شي يوم اتخلص من ضرار وانجمع بحب طفولتي من جديد
بس الي ماحسبت حسابه هوه
ضرار شحيسوي لو عرف اني جاي امثل الحب عليه ؟
... بيوم اندك الباب طلعت لكيتـ
( توقعاتكم للبارت الجاي 🌚؟ )
⇠──────⋆⋆⋆─────⇢
/ترى شنو الي راح يصير وياهم ؟
/ تتوقعون تصرف سيرين صح وي ضرار؟
/وشرأيكم بتصرفات ضرار تجاه سيرين ؟
_ ولهنا وينتهي البارت ٢٤٦٦ كلمه
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!