الثأر الحادي عشر
#ثارهم_وبنت_الفقير
بقلمي_ترانيم هادي ♥️🕊️.
⇠──────⋆⋆⋆─────⇢
__شلونكم حلويني..تصويتاتكم..وتعاليقكم بين الفقرات لاتنسوها..ومتابعه للحساب ♥️🕊️,
_ غيد...
جنت واكفه بالمطبخ ارتب بالمواعين وسمعت عيطه عمو ضرار
رحت وكفت شفته لازم شعر سيرين ويعت بيه وامي تفاكك بيهم
شفتها من اخذت المبايل وراحت للغرفه...خفت لايشوفها ويموتها اعرفنه ماتفوته فايته
رحت بسرعه حميت الجاي اله بلكي يهدى ويكعد
انطيته اله وهوه يستغفر وينافخ ، ركضت للغرفه لكيتها ماكو قافله الحمام عليها
ضليت انتضرها واراقب خافن يجي ويلكفها
كعدت عالجربايه وكلساع اكولن هسه يجي ويموتها
صاحتني امي ورحتلها
غيد... هاا يمه
الحجيه... ماشفتي مبايلي خليته هناه
غيد... عاينت على ضرار باوعلي واني ضليت امتمت بالحجي ... يمه اكيد عفتي بشقتنا ماشفتج جبتي
الحجيه... اي اضن
ضرار... وشلون تصلتي عليه قبل لااجي ؟
غيد... عمي اصبلك جاي بعد
كام دفر القنفه وراح للغرفه ضليت ادك والطم ... والله نلكفتي يسيرين عزااا بعينج
راح هوه ورحت وراه لكيت واكف ورى الباب وعاكد حواجبه ويسمعها
خزرني واشرلي اسكت بس نظراته تخوف خفت لاتجيني تايهه منه ويموتني
وماحس غير دفر الباب هيه دفره وهيه كسره وعيطه سيرين رجتنا
هوه كبل دخل شال الباب منها،شفته انخبص بيها وحار شيسوي
اخذت المبايل لكيت الخط بعده مفتوح سديته اشوفها لاتحرك ايد ولارجل
غيد... عموو شيلها
ضرار... ماكدر حيلي راح سكت بغصته ورجع حجى ...حتموت بسببي
اعاينله ايده ترجف ... ركضت جبت مي وجيت بلكي تصحى رجعت لكيته حاضنها ويحجي يم اذنها
ضرار... دخيلك يابو فاضل لاتختبرني تعبت بيها وعليها
حرت شسوي ونخبصت ،اجت امي شافتها بهالحاله لطمت على صدرها
الحجيه... ولك الله واكبر حتموت البت شسويتلها
ماجاوبها كام شالها اخذ المي من ايدي يرش عليها وماتصحى
بعدين راح اخذ عطر ضل يشم بيها صحت شوي وهم رجع اغمى عليها
الحجيه... ليش ماتكعد ؟
ضرار... مابيها شي شوي وتكعد
الحجيه... شني مابيها شي وانته كلساع طاكها ومعورها وتالي تموت بيدك ماترجعها لاهلها
هوه صار عصبي كلش دماراته بينت ،جانت اكو مزهريه بصف الجربايه شالها وركعها بالحايط ختلت ورى امي من الخوف الله يساعد سيرين شلون متحمله عصبيته
ضرار... خرب بالك**** مااارجعها ،عاين عليه وخزرني غيد اخذي الحجيه وروحي
غيد... وسيرين
ضرار... خل تكعد واتصرف وياها
غيد... الله يخليك عوفها ماسوت شي
ضرار بعياط ... غييييد
نزيت من صوته ونهضمت كلش اول مره يعيط عليه والدمعه بطرف عيني صارت ،سحبت امي من ايديها وطلعنى
خليت باب الشقه مفتوح وديت امي لان تعبت كلش وسكرها صعد
رجعت بدون مايحس عليه خافن يسويلها شي
وكفت باب الغرفه ومديت بس راسي جان كاعد يمها ويفرك بأيدها وهوه ظهره صاير عالباب يعني ميشوفني
وماحس غير عيطه منه رأسا نجفيت على وجهي
ضرار... غييييد وبعدين
اندار خزرني وعيونه ناطات
غيد بارتباك... اي هسه رحت هوه حروح
كمت طكيتها ركضه لشقتنا...خرب شلون عرف ماتفوتله داهيه
رحت شفت امي لكيتها تسبح وتقرا قران تسحبت بهدوء وهم رجعت
امشي على اطراف اصابعي من صدك حسيت نفسي بفلم رعب
سيرين....
كعدت هلى ألم راس ابد موطبيعي وجن احد كاعد ويدك براسي
سيرين... اخخخ يمه راسي
فتحت عيني لكيته كدامي من الخوف نزيت بسرعه ونضرب راسي بحافه الميز
لزمت راسي بألم وعيوني غوشتو
سيرين بكلبي... سيرين لاتخافين اهدي، ذبيت حسره بألم ... هففف يمهه حموت من الخوف هالضرار كوا يخليني اخافن منه
اجى تقرب يمي كعد طرف الجربايه سحب ايدي ونطاني كيس مال ثلج
ضرار... متوجعه
سيرين ... هزيتله راسي بدون ماجاوبه ودموعي نزلت ، اريد افسره وافهم تصرفاته
تعبني كلش لااعرف اليريده ولااعرف الباله
ضرار ... انسيهم
سيرين... هزيتله راسي ودموعي تجري انسى روحي وماانساهم
عاط بعلو صوته وكام... غيييييد تعالي ضلي يمها
عاينت لكيت غيد واكفه وجهى اصفر على احمر ليش خاتله جنها حرامي
اجت تمشي بخطوات بطيئه ومنزله راسها هوه طلع
كعدت يمي ومسحت على راسي ،خليت راسي بحظنها واشهك بالبجي
الغصه بلعومي هالدموع احسهم سجاجين وتزرف بكلبي
سيرين بشهكه... يكلي انسيهم شنسى ؟ ابوي الي يضحي بروحه حتى يحميني انسى حنيته عليه انسى التعب التعبه عليه وهوه يشتغل ليل ونهار حتى يلم مصروفي ومايخليني بعازه شي
انسى من يشوفني اضحك بصوت عالي يعاينلي ويضحك على ضحكتي يكلي اضحي بروحي حتى تضل الضحكه مرسوه على حلكج
لومن يسهر وياي للصبح يكعد يقريني ويروح ثاني يوم وياي للامتحان ينتضرني بالحر والشمس علما اطلع
غيد... وجج كطعتي كلبي عليج علكيفج وي روحج
سيرين... يريدني انساهم بس كليلي شنسى انسى امي الي تخاف عليه حتى من روحها
انساها من تبيع تراجيها حتى تجيبلي الملازم الاحتاجهن تكلي بنيتي كلشي يهون لعيونج
تضل تطحن بروحها اذا شافتني مجروحه جرح بسيط
موامي هييه
وصارت الي اخت وصديقه وام بنفس الوقت بينما امي الي شمرتني وحتى شكله ماعرفه لحد هسه وماعرف هيه وين ماوين
انسى حب حياتي الي حرمني منه وماخلاني حتى اتهنى وياه حرمني من ابوي الثاني اي حرمني من ابوي الثاني
ضليت ادك والطم وعياطي يجرح بلعومي.... وجججج شنسى كليلي شنسى
غيد... سيرررين وجج على كيفج كلبج راح يوكف
سيرين... صرت اضرب على صدري واشهك ...خلي يوكف خلي حتى ارتاح من هالدنيا شفت منها وشصار بحالي
غيد...
على دموعها صرت ابجي واشهك وياها
اعرف شعورها والي تمر بيه ... نحرمت من ابوي بعمر صغير وبس امي ضلتلي ضرار صار الي مثل الاب والاخ صار النا سند من بعد مافتحت عيني على هالدنيا وماكو احد بظهرنا حتى يسندنا كلمره اتمنى ابوي يكون بجانبي مجان ضليت اني وامي بهالدنيا وحيدين لاظهر ولاسند ولاجان تحسرت كلما اشوفن وحده وي ابوها
غيد ببجي... سوده عليه الله يجبر بخاطرج والله كلشي ينحل
سيرين... تعبت روحي تعبت شسوي كليلي شسوي بروحي حتى ارتاح
غيد... ضليت اهدي بيها شوي ونامت وحتى وهيه نايمه تشهك
كمت لميت الغرفه ورتبتها طلعت للصاله لكيت عمو ضرار كاعد ويدخل
الميز متروس جكاير والصاله من الدخان صايره تخنك
وريحه الجكاير بكل مكان
شافني طفى الجكاره وحجى... شلون صارت
غيد... شبعت بجي ونامت
ذب حسره حسيتها شكت جوف صدره من الألم
رحت لميت الصاله كملت وكعدت يمه
غيد... يابه ليش ماترجعها لاهلها
دنك راسه وبس يذب حسرات وينفخ
ضرار... ماكدر
غيد... تحبها ؟
حركلي شفته بمعنى لا وكام اخذ اغراضه وطلع بدون ماينطق
سيرين...
كعدت من بعد نومه عميقه كلش وطيف ابوي وهوه يمرلي
دخلت غيد للغرفه ضحكت واجت كعدت يمي
غيد... شبيج ضحكين
سيرين... فرحانه
غيد... ليش ؟
سيرين... مدري
غيد... انتي مثل هذا الي مايعرف راسه من رجليه الله يثبت عقلج
سيرين... منو هذا ؟
غيد... ماعرفه بس يشبهج
سيرين... ضرار طلع مو
غيد... اي
سرين... تنفست بأريحه معقوله ماحجى وياي لاضرب ولاحجى ، هخخخخ واخيرا روحه بله رجعه
كمت اخذت ملابس ورحت اسبح
سبحت وخلصت طلعت نشفت شعري وضفرته
الغرقه مرتبه صرت اهوس بيها وارجع ارتبها نظفت الشقه جلفتها جلف وغيد بس تباوع ومستغربه تصرفاتي
رحت للمطبخ طلعت فواكه رتبتهن ورحت للصاله شوي واجت غيد يمي
غيد... شبيج ؟
سيرين... شبيه يعني
غيد... تصرفاتج ابد موطبيعيه
سيرين... شايفتني املخ بشعري واشكك بملابسي
غيد... لاتعيدين الغلط مرتين صدكي مستحيل تتخلصين من ضرار
سيرين... عاينتلها وبتسمتلي ... ليش ماكدر؟
غيد... مايعوفج ولاتحاولين ... جرت الصحن من ايدي وكعدت تاكل
متربعه عالقنفه والصحن بحظنها
سيرين... ترى سويته حتى اكله موترسين بطنج بيه
غيد... والاكل بحلكها ... سويلج غيره فوك ماواكفتلج على حيلي وكلساع محصلتلي رزاله من عمو ضرار ماتخليني اكل هالفواكه
سيرين... ليش شسوالج ؟
غيد... وجج هوه شنو السواه عود اني الثوله صرت خيره ووكفت اساعدج خافن يسولج شي وهوه كلساع يشوفني وعيط عليه موعيطه عبالك سماعه ويصيح بها
سيرين... هههههههههههه ليش انتي سامعته من يعيط يم اذنج انه العيط مالته تسوي ارتجاج بمخي راسي يصدع من وراه لهالشايب
عافت الصحن وباوعتلي باستغراب،ضرار شايب؟
سيرين... اي شويب ولاتكوليلي لا
غيد... خايبه ماسكتين اتي اكص ايدي اذا مابعد كم يوم تمشين وصيحين عين الحسود بيها دود دخيلك يابو فاضل احفضلي زوجي من بنات الحلال والحرام واجعله بعين غيري ثور
هيه كالت ثور لوماصدكت حتى اضحك طكيتها ضحكه يمكن كل الي بالبنايه سمعوني
سيرين... ههههههههههههه ماصدكتي صدك ثور
كلبت شعرها على جها وعوجت حلكها ... غمتني ورجعت تكمل اكلها
غيد... اكص ايدي اذا هسه ماتحبي يكولون العلاقه التكثر بيها مشاكل يكثر بيها الحب
سيرين.... ايع مستحيل لو اموت
غيد.... يطبج مرض ضلي هيج شواربج نازلات على حلكج
سيرين... تلمست شواربي صدك من جابني ولحد هسه مامسويتهن
غيد... هههههههههههه اذا يريد يعاينلج يعاين لشواربج ويحير مزوج مره لو زلمه
سيرين... كرصتها من زندها ودفعتها كامت ركضت ووجها احمر من الضحك والخدود تارسات وجها
غيد.... خيتي لاضوجين هاي الخيوط ضاله هسه اجيبلج خيط واسوي شواربج ههههههههههه
سيرين... ضحكين عليه يله ولي ماحجي وياج
اجت كعدت يمي وكاتمه ضحكتها
غيد... حجيبن خيط واجي ماشي
كامت ركضت للغرفه جابت العلبه بيها شغلات مال خياطه كفت اردان دشداشتها وخرت الاغراض ودنت الميز على صفحه
سيرين... ليش سويتي هيج
غيد... كعده الكاع احسن يلي زيحي من مكانج وتعالي ليه
كمت وكعدت يمها وبدت تسويلي هيه ايدها خفيفه وتحف باحتراف واني اصبعي حتى دم طلع من العظ بلكوا كاتمه صرختي
سيرين... اخخخ يمهه الله لايوفقك ضرار
دمغتني على راسي وحجت ... يمج بكرباج هوه
سيرين... صدك وينه راح هوه
غيد... اكيد يم امي
سيرين... شيسوي
غيد... عبن اعرفه اذا ضاج لوخلكه تكدر يجي يم امي ويسولف وياها علما يهداء
سيرين... وليش ضايج هوه
غيد... خايبه انتي سوالفج تزرف الكلب ضرار مايسولف البيه لياهو الجان ويضم بكلبه عبن انتي لوردتي اتكربي منه وصدكي حشوفين اطباعه غير عن هسه
سيرين... مايهمني ولااريد اتقرب منه
غيد... دتعالي خل احف الشعر وبيج خير واحجي الرجال مغلس على شواربج وفوكها متمحل جفصاتج ووكاحتج
كرصتها من خدودها حيلل صارن حمر وطبعه الكرص بخدها
غيد... وكسر يالعوبه ولي موصوجج
سيرين... عوفينا من هالازرك وكملي
غيد... كملت بس ليش ماحفن وجهج واعدل حواجبج طاخات وي اذانج
سيرين... عاينتلها بطارف عيني وعوجت حلكية...تضلين تصنفين عليه لو شنو ؟
غيد... هههههههههههه كفيلج الله الشعر معشعش بوجهج
سيرين... ماريد امي ماتقبل
غيد... وليش ماتقبل
سيرين... تكلي لاجيسيهن احسن من تزوجين حفيهن
غيد... وهسه اتي مزوجه يحظي
سيرين... منو قصدج خراعه الخضره
غيد... انتي مايفيد الحجي وياج الايطيح حظج اتكربي خل اخلصج
وصدك بدت تحفلي والوجع موطبيعي كلساع اضربها لواعضها وهيه وجها متروس خدود بحيث من تضحك عيونها ميبينن ووجها ينكلب لونه
خلصت عاينت بالمرايه شكلي تغير كلش وجهي احمر على ابيض
سيرين... الله اني شكد حلوه
غيد... عاشت ايدي
كمت للغرفه حليت شعري هوه اسود وطويل بس بيه كسره من الضفيره ،حليته وطلعت كذلتي على كولت عمتي عطوب
ورحت اخذت حمره جابتها غيد وي الملابس خليت لشفايفي وخدودي شوي
واكفه كدام المرايه واخلي بالحمره ونفتح الباب
عاينتله ضرار تصنم بمكانه وصفن عليه
سيرين بكلبي... يمكن ماعرفني اوي وهوه وين شايف بجمالي بس انشالله تصير بيك سكته قلبيه من جمالي
ضرار... شطالعه
سيرين... شنو !
اجى تقرب عليه سحبني من خصري تقرب عليه بحيث انفاسنه اختلطت من قربه جمدت بمكاني واني بحضنه وبهالحاله
تقرب اكثر لزم شعري ويشم بيه وايده تتحرك على معالم وجهي ... همس يم اذني والرجفه سرت بجسمي مثل الكهرباء
ضرار...
يا من أسرْتِ
القلب والعين بسحرك
والعقل أبى التفكير
وتاه في ظلمات
شعرك المسترسل ...
(توقعاتكم للبارت الجاي 🌚؟)
⇠──────⋆⋆⋆─────⇢
... فقره لمتابعين ثارهم وبنت الفقير ...
1_رأيكم بشخصيه ضرار ؟
2_رأيكم بشخصيه سيرين ؟
😂😂😂😂حبيته هالتعليق
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!