رواية ثارهم وبنت الفقير الفصل الثالث 3 - بقلم الكاتبة ترانيم 🤎

الثأر الأول

بقلمي_ترانيم هادي

_رمضان كريم حبايبي انشالله تكونون بخير بدينا بدايه جديده وياكم من بعد ماعشتو وي ترفـه ورائد وعشتو معاناتها وفقدانها وسدينا بابهم
...................
واليوم ابدي وياكم بقصه جديده ونكتشف ابوابهم وحتعيشون وياهم بنزاعاتهم وثاراتهم
بـ ( ثارهم وبنت الفقير ).

_اني بنت عايشه بوسط اهل ماكو بحنيتهم
ابوي الي اعتبره مثل ضلي ع كد مايخاف عليه حتئ من نفسه
وام الي هيه موامي بالاساس بس ولامرة حسيتها مرت اب تعتبرني مثل بتها واكثر
لحد اليوم الي التقيت بيه وتغيرت حياتي تعالو احجيلكم شلون ...

فارشه فراش بنص الزرع وكاعدة اقره
وامي تخبز بتنور الطين ودخانه ترس الجو ويمها عمتي تطلعلها خبز

امي:سيرين كومي سوي العشئ حيجي ابوج

سيرين: يمه فدوه اروحلج عوفيني بس شوي واخلص

امي:ولج كومي لااشككهن علئ راسج

سيرين: اي كاايمه ماكو غغـيـر سيرين بهالبيت

كمت واني ادردم لميت الكتب وشلت جنطتي ودخلت جوا ... طلعت نواشف حتى اكليهن

دخلت امي للمطبخ بيدها المعجانه وملابسها كلهن طحين ... باوعت عليه ودارت وجها

امي: هاج روحي غسليها ولمي الخبز

سيرين: والاكل

عوفي اني اكمله موعدج قرايه اخلص العشى واصيحج

سيرين: واللّٰـه

امي: ولج روحي فضيهاا

سيرين: ههههههه اي رايحه

رحت طلعت اريد الم الخبز ... واني اكمز مثل الطفله وضفيرتي تمشي وياي ولابسه الشيله مال امي

الجو جان غروب والشمس بدت تغيب شفته جاي باتجاهي وجن كلبي صار يدك طبول

تكرب وكف يمي وعيونه تتفحصني وحجئ

بدر: شلونها راحتي

دنكت راسي وخرت كذلتي ورئ اذني والشيله مغطيه نص شعري الحمدالله وانته

بدر: بشوفتج صرت زييـن

رفعت ععـيني عليه مجتف ايده ... مجرد مايكون كدامي كل الكلام يروح من بالي

بدر: سيرينتي حسي بيه اريدنج بحضني

سيرين: بدر حتئ اني بس

بدر: بس شنو احجي وريحي كلبي

سيرين: ابوي مايرضئ يطيني وانته سمعته شكال

بدر: ماعليج انه اخلي امي تقنعه المهم انتي بكربي ... سكت شوي ورجع حجئ
رفعي عينج عليه ولاتنزليها خليني اشبع شوف منـهها

كل كلمه يكولها احسها كهربا وتنز بجسمي غطيت بهدومي من المستحى ... رفعت راسي عليه وباوعت بعيونه

بدر: وفففف منك عمي حارمني من نعمه الله شكول عليك

سيرين: هههههههه لاتكول هيج بس اني اعرفن ابوي يكول بعدج صغيرة واريدنج تكملين دراستج وعبن ادري بيه يطيني الك بس موهسه

بدر: كليلي شوكت علما ياخذوج من ايديه

سيرين: لاتخاف محد ياخذني غيرك،وخليني اكمل هالسنه وانشالله يصير خير

بدر: انتي بس تعاي يمي وانه اسويلج كلشي بنفسج

سيرين: واللّٰـه

بدر: وعيونج

نزلت راسي خجلانه واسمع صوت امي صيحلي
جفلت من صوتها وخفت تشوفني وي بدر لان ماترضئ اوكف يمه

وحتئ الخبز نسيته عفته ورحت الم بالخبز وهوه دخل جوا

لميته وخلصت ودخلت رحت لامي لكيتها تحضر بالعشئ شافتني وخزرتني

امي: اامـشي دخلي ولاطلعين

سيرين: ليش؟

امي: ولي ولاسألين

سيرين: هم رجعنا نفس الساالفه يمه ترا احنه من طفوله سوا شمعنئ هسه حتئ متخليني اكعدن يمه

امي: ولج لسانج طولان يرادله كص عبن انتي كبرتي وماعدتي طفله وكعدتكم سوا ماحلوة كدام احد وانه جم مرة حذرتج لابوج يشوفج

سيرين: وفففف اي اي ضلوو هيجج

امي: الحجي وياج مايفيد يجي ابوج وانه اعلمنج

سيرين: يمههه صدك تحجين اي صار بعد مااكعدن يمه

سمعت دك الباب اكيد ابوي اجى من الكاع
رحت بسـرععهه افتحه شفته ابوي واخواني ليله ومرتضئ ومراد

سيرين: هلا يابه

جابر: هلا بيج بنيتي، وحضني

ليله:سمه جبتلج من الحلاوة تحبيها

ومرتضئ و مُراد انت شجبتلي

مرتضى: عبن جبتلج بس مراد اكلهن مني

مُراد: لاجذب انه شوكت ماكلهن

ليله:سمه خيولي اكل الحلاوة مالتج

مُراد: ولجج ام نص السان اسكتي لاجيج

طلعتله لسانها واجت ورايه

سيرين: اصبرولي بسيطه

جابر: بويه بسكم مناكر تعالو طبو وينها امج وعمتج

سيرين: بالمطبخ دسوي عشئ

دخل بابا واخواني جوا ورحت اكمل العشئ وي ماما

امي: سيرين خفي ايدج وامشي ودي السفرة

سيرين: اي صار

اخذت السفرة ورحت افرش السفرة عمتي وبابا يسولفو
وبدر مكعد ليله بحضنه واخواني بصفه

اجت ماما جايبه صينيه ألاكل ورتبت السفرة
كعدت بصف عمتي وليله يمي وبدر كدامي واخواني بصفه

كلساع رافع راسه ويأشرلي...خزرته خفت بابا يشوفنه

كملنا اكل وغسلت المواعين وامي سوت جاي

خلصت ورحت كعدت يم امي وعمتي وابويه وبدر كاعدين ويسولفون

عمتي:نهوة بتج كبرت شـﯡﻛـت تطيها

امي:مارايدة اطيها هسه عبن اريدها تكمل وتحصل شهادتها

عمتي:ولج بسج حجي انه من زمان كايلتلج اريدنها لبدر

امي:وشبيدي انه ياعيني انتي ماشفتي ابوها شلونه معاند ومايريد يطيها

هنه يحجن واني مثل الاطرش بالزفه بس استمع الهن

خلصو الجاي وعمتي وبدر راحو لح عليهم بابا يضلون بس ماقبلو

.
.

طلعو ورحت اسد الباب وراهم من جاي يطلعو
اندار وباوعلي مبتسم بدون ميحجي خلى وراح

رحت لغرفتي طلعت كتبي حتئ ادرس وخاصه هاي اخر سنه الي بية وما اشد حيلي

اجئ ابويه وكعد يمي وضل يمسد علئ راسي

جابر: بنيتي شلونها

بسته من خده وحطيت راسي بحضنه

سيرين: يابه انه بخير بوجودك

جابر: محتاجه شي لدراستج

سيرين: لا موجبتلي كلشي احتاجه كلشي مناقصني

جابر: بنيتي ركزي بدراستج ولاشغلين بالج اريدنج ترفعين راسي وتحصلين شهادتج عبن محد يفيدج غيرها

سيرين: يابه انه بوجودك احصل الاريده دامك انـتـهـه يمي ... ابتسملي ماحجى شيء يمسد على شعري

حالنا علئ كدنا بس مع ذلك ابوي ولامرة قصر ويانه بشي حتئ لويبيع الملابس العليه ويشتريلنا النحتاجة
عبن دوم بنوات المدرسه يعيرني ويكللي بت الفلاح لوبت الفقير وبت الفكور ،عبالهم استكنف لواضوج بالعكس افتخر من يصيحلي هيج طاغيات بفلوسهن
بيتنا الي حياطينه مفطره والكاع صبه الي بالصيف تشوينا شوي
والبيت صغير وعكدنا بس نضيف ومرتب ومطبخنا الي حياطينه كلها مفطره وتنز رطوبه منهن وسنك مثبتينه بسمارين ومخلين وصله

بس كل هذا وفرحانه بروحي عبن اكو غيرنا ماكو حتى سكف يلمهم

راح وسد الباب وراه واني كعدت اقرا وماحاسه عالوكت وغفيت واني بمكاني

...لصبح وكعدتني امي وعياطها يرن بأذني

امي: سيرين كومي حتتأخرين علئ مدرستج اوففف منج هاي شلون نايمه

سيرين: صباح الخير

امي: صباح النور بنيتي كومي تريكي وبدلي خل ابوج يوصلج ويا

سيرين: صار

كمت رتبت فراشي ورحت امي مسوية الريوك وكعدنا نتريك ... خلصت وكمت بدلت ورحت لأمي تسويلي الربطة

امي: شوكت تتعلمين تسوي بحدج

سيرين: يمهه ولااعرف البسه احسه يخنكني وكلساع شعري طالع منه ماريدنه ولااريد البسه

امي: ميخالف بنيتي تتعلمين شكبرج تصيرين وبعدج
مامحجبة حتّى حرام عليج .
سيرين: قبل فترة من رحت لصابرين جانت تباوع علئ برنامج تلفزيوني وكالت وحدة منهن انو الحجاب ضد حريه الناس وانو الحجاب يضم جمال المرأة ويقيدها

امي: بنيتي الحجاب معليه بحريه الناس مثل متكول

بابا جان بيده استكان الجاي ويباوعلنا
صاحني ورحت كعدت بصفه

جابر: بنيتي المرآة بالاسلام اثمن من كل ثمين وماوجب الله الحجاب الالحمايتها من الناس الغربه حتئ لاتوكع بين ايديهم والحجاب ميعتبر عائق كدام شغلها او كدام مشاركتها بالمجتمع

امي:ولان انتي غاليه علينا نخاف عليج من الضياع
واذا خلينا ياهو الجان يشوف اشياءنا الغاليه فمايصير هيج لان هوه جاي يعرضها للضياع
بنيتي وانه اخافن عليج عبنج جيبين العين عليج شلون تردين اخليج فرجه وياهو الجان يشوفج

_ حسدت نفسي علئ هيج اهل وشلون متفاهمين وهذا عمري ومحاولو يجبروني البس الحجاب وهسه همه خلوني البسه بقناعه تامه

خلصنا وطلعت اني وبابا يوصلني عالمدرسه
نمشي ولازمه ايده
بهيج وقت هوه لازم يكون بالبستان بس يتأخر علمودي

وصلني ورحت لصديقتي صابرين الوحيدة الامشي وياها
البقيه بس علئ كد السلام ماحب اختلط بأحد

كاعدين ونسولف وهي حايرة شلون تلم المادة

صابرين:وفففف حظي عدنا امتحان واني قريتلي كم صفحه وناسيتهن

سيرين: سهل ميرادله شي

صابرين: اي حقج اذا انتي خاتمه الكتاب وجايتني شلون ميصير سهل وفففف يمهه لحكيلي الله لاينطي الاخترع المدرسه

سيرين: غميت كصتي ولج ... هاي شبيج ولــچ ؟!

دنحجي واجت مجموعه بنات ود وجماعتها
وففف ربي هاي تكرهني ودومها شايفه نفسها بفلوس ابوها قحط اي واللّٰـه رافعه خشمها وكلشي ميعجبها

ود: هـاا بنات الفكور كومن مناا

صابرين: لابالله ليكون كاعدين نشتغل عندج يلهه ولي

ود: هييي احترمي نفسج واعرفي ويامن تحجين

صابرين: اي اعرف ويامن احجي وي ود ام خنينه

هذيج فارت وحسيتها راح طك وصابرين لسان ومتسكت واني ضاله اتفرج

سيرين: صابرين امـشي حنتأخر وعوفيهن يحجن بحدهن

ود: ماباقي علينا بس بت الفقير والفلاح تحجي

عاينت عليها بخزره وحجيت... الفلاح التحجين عليه يشرفج ويشرف امثالج

صابرين: تفي واللّٰـه شلون ناس

مشينا وعفناهن وصابرين دردم عليهن
سيرين: كافي شبيج ميصير تحجين عليهن وتاخذين غيبتهن

صابرين: باع هاي يرربي تريد تموتني بفهاوتها امشي امشيي

خلصت الدروس بين المشاحنات التصير وسوالف صابرين والامتحانات المفاجئه المتخلص بس دائما علامتي امتياز

اريد امي وابوي يرفعون راسهم بيه ويشوفون شهادة تخرجي واجازي تعبهم عليه

طلعت انتضر بابا يجيني لشوي واجئ بدر
وعيونه حمر ويلهث

سيرين: بدر شصاير

بدر: سيرين خالي  .........

يـــتـــــــبــــــــع....

سَاحَفظُ عَهدَكِ وان طَال زَمَانُ بنا
واكتمُ الهَجرَ في القلب واخفيهِ
ولأن روحك في روحي سَاكنَة
ف ليحفظ الله روُحي ومن فيهِ