رواية ثارهم وبنت الفقير الفصل الثالث عشر 13 - بقلم الكاتبة ترانيم 🤎

الثأر العاشر

#ثارهم_وبنت_الفقير

بقلمي_ترانيم هادي ♥️🕊️,

ضرار ...
بإمكان المرء أن يعتاد كل شيء حتى الجحيم

سيرين ...
كما اعتدت جحيمك

⇠──────⋆⋆⋆─────⇢

__شلونكم حلويني..تصويتاتكم..وتعاليقكم لاتنسوها..ومتابعه للحساب ♥️🕊️,

كامت الحجيه ولزمت ايدها عاينتلها بتوسل حتى لاتعوفني بحدي خايفه يأذيني حتى تعبت من كثر الضرب

الحجيه... يمه لاتخافين مايسويلج شي

خذت عوجيتها وراحت اجى تقرب يمي بخطوات بطيئه كل خطوه يخطيها باتجاهي كلبي ينقبض

كتف ايديه لصدره وحجى

ضرار... مراح تستفادين من عنادج غير طياح الحظ

سيرين... وجودك جاي يخنكني اعتقني وخلصني وصلتني للموت شسوي بعد اكثر من هيج هـاا

خلى اصبعه على حلكه بمعنى اسكتي وخزرني

ضرار... اششش باحلامج اعوفنج كتلج اتحملي الجاينه وبالاخر اثنينا راح نحترك

سيرين باستهزاء... هههه وياك مسستحيل

عافني ومشى خلاني بحيرتي والتفكير ياكل بيه
مجاي افهمه ولاافهم تصرفاته

اجت الحجيه بلكوا تمشي وجها اصفر عبالها سوالي شي ... لحت عليه علما اكلت شوي وخذت علاجي

_الحجيه اعتنت بيه كلش وصحتي شوي شوي بدت تتحسن وضرار ماشفته ولا لمحته بس بليل علما تروح الحجيه وبنتها اسمع صوته بالصاله

ونوعا ما ارتاحيت من ماشوفه لان بس شوفته تسببلي احباط ورهبه

شهر ونص صالي يمه لاسمعت اخبار عن اهلي ولاسمعت حسهم وروحي ضاله تلوب عليهم

ولسه مأسرني عنده وماعرف شنو نهايتي وياه لوشنو اليريد ايسوي

_كعدت الصبح الصبح كل مره اكعد الكا الحجيه وغيد يمي هسه ماكو

كمت اخذت شالي لبسته وطلعت ،لكيت ضرار بالصاله مشغل الابتوب وموصل عليه وايرات وماعرف شنو

ردت ارجع وصاحني،سييرين

سيرين... خير

ضرار ... احجي عدل لا افلشج

سيرين... وشباقي بيه حتى تفلشه اشو من فوك ليجوا اثار الضرب مطبوعه بيه لحد هسه

ضرار وهوه مدنك عالابتوب... عوفي هالحجي لااكل تلكي بالمطبخ اكلي وشربي علاجج

سيرين... ماريد انداريت حتى اروح وعاط

ضرار... بالعباس اذا ماجيتي واكلتي اكوم انه اوكلج واشوفن ياهي الترفض

خزرته ومشيت ... شمر عليه القلم وعاط

ضرار... اعميهههن الج

سيرين... الله وهييج اخلص من شوفتك

استغفر بصوت عالي ... الشويب عباله اخاف منه

رحت للمطبخ فتحت الجدور لكيت تبسي وتمن وزلاطه فدوه لكلبها اكيد الحجيه جايبتهن بس ليش اليوم ماجتني

صبيتلي بصينيه وكعدت بالكاع اكل قبل لاواشوفه وينسد نفسي للاكل

شوي ودخلت الحجيه هيه وغيد محمله علاليك صاحتني ورحت خذتهن منها

ضرار... حجيه انه طالع ديربالجن ولاحد تطلع انه شوي وارجع

الحجيه... الله وياك وليدي

هوه راح واني رحت كعدت يمها صارت تفتح بالعلاليك وتعوف بحضني الملابس

سيرين... الله شكد حلوات المن هذن

غيد... الج هذن عمو ضرار اطانى حتى نجيبلج ملابس والتحتاجي

سيرين... شمرت الملابس من ايدي وعبست وجهي ... ماريد منه شي رجعوهن

غيد... چا مكيفه على داشديشي كلوحده شعرضها عليج طالعه جنج عريف شلتاغ

سيرين... اي حتى لو بس ماريد منه شي

الحجيه... يمه غيد ماجيبيلي عوجيتي اكسرها عليها هالبت تبط الكلب

سيرين... اوفففف حتى انتي عليه

صارت طلعلي بالملابس وتحط جايبتلي كم دشداشه للبيت وتراكات وملابس داخليه وعطورات وشامبوات

وصايه وكم شال وياههن اثنين احذيه

سيرين... شدعوه هالكد متسوكين

غيد... چا انتي خايفه على فلوسه لايخلصن هنه هذن وقليلات عود بعدين نجيبلج بعد

سيرين... صدك خايفه على جيبه

كمت اني وغيد شلت الاغراض ورتبتهن والحجيه راحت تحمي الغدا لان اصلا محد ماكل وهيه مسويته قبل لاتروح

_اسبوع بالظبط مر ضرار متجاهلني ويادوب صرت اشوفه اكثر وقتي مكضيته وي الحجيه وغيد احسن من ماكضيه وحدي

لحد مابيوم جنت نايمه كعدت على صوت تكسير الباب مودكه عبالك اعصار

النعاس بعيني وبلكوا صحصحت ... جنت لابسه دشداشه قصير من الجابتهن الي الحجيه

وشعري فاتحته اخذت المفتاح ورحت فتحت الباب طلع ضرار كدامي

عاينلي ضيق عيونه وحك لحيته

سيرين... ها شصاير

ضرار... صباح الخير

سيرين بكلبي ... هوه اني دام شفتك وصبحت بوجهك طار كل الخير ... صباح النور

ضرار... بدلي يله ماضلنا وكت حتى نمشي

سبرين... وين

صرار عاط... يلاااااااا

عاط بصوت عالي ومشى...سم وكرص مليق مخبل الله يخلصني منك

رحت واني بعيوني النعاس سبحت وبدلت... لبست الصايه الجابتها الحجيه تصميمها يخبل وبسيط وطلعت وياها شال كريمي وحذاء بلونه

الشال شمرته شلون ماكان واني اصلا ماعرف اسويه جانت امي تسوي الي لوتجيبلي حجابات

طلعت واني اتثاوب هوه مبدل ومخلص ،شافني واجى يمي

ضرار بترقب... عدلي شالج

سيرين... ماعرفله

عافني وراح للغرفه شوي واجى وكف كدامي يعدلي بالشال غطى شعري وخلاله دنابيس وثبته

ضرار... هيج احسن يله امشي

سيرين... وين

ضرار... مالج شغل

سحبني من ايدي ومشينا ... فرحت من طلعت حيصير شهرين يمكن واني مشايفه ضوه الشمس مكضيتها افتر بين اربع حياطين بالشقه

سيرين... حترجعني لاهلي مو ؟

ضرار ببرود... لا

سلم عالرجال الواكف باب البنايه وصعدنا السياره

سيرين بكلبي... هذا وين ماخذني من الصبح لاونوب بدون عياط ومشاكل خاف نوب يريد يسويلي شي

لاشيسويلي يعني اشهره واخزيه ،ليش هوه اني اكدرله اذا ايده جنها طابوكه

نفخت بضيك واني احجي وي نفسي...الله ياخذك

ضرار... ماياخذني باقي عاله عليج

سيرين... ها شنو

ضرار... موجن ملحكه حتى تخلصين مني

سيرين... اي كلش

ضرار... هسه نشوف شلون تخلصين مني

بالساعه يالله وصلنى وبطني تزقزق من الجوع وممتريكه

صف السياره ونزلنا قريت الافته مكتوب محكمه(.....)

ضرار... اسمي حيسجل بجنسيتج حتى تشوفين شلون تخلصين مني

سيرين بعياط... مسسيتحيل وخرررر ماريد

ضرار... اششش لج عايقه صوتج

سيرين... ضرار فدوه لاسويها عقدت عليه بالاجبار وهسه جاي تربطني بيك كل حياتي ماعترف بهالزواج بااطل

ضرار ببرود... ومنو يكول باطل ؟

سيرين... اني

ضرار... وانتي متهميني بس كل هذا حتى اكسر خشمج اليابس  اريدن اعرف شلون حيكون موقفه من يشوف عقد بته و ...

سيرين... وشنو ؟

ضرار... اذا يشوف المقدم والمعجل ميه الف حتى الك*** اغلى

سيرين... الله ينتقم منك

ضرار... انه وربي نتحاسب يله بلا حجي زايد وامشي

عصر ايدي وسحبني وراه نتضرنا شوي واجى نفس الرجال الي لكاني يم بابهم

هم هناه الحظ لحكني

وكفو شوي يحجون واني مثل الالي يجيبني ويوديني .... نتضرنا شوي ودخلنى

من سلامهم الحار عرفت القاضي يصير صديقهم

والشغله منتهين منها يعني لواحجي واعربد الشغله اول وتالي خلصانه

استغربت من شفت اوراقي وجنسيتي يمه شيسوون ومنين جايبهن

استغليت فرصه ملتهي وكاعد يسولف وياهم واذا طلعت هسه اكيد مراح يحس

ضليت شوي شوي اتسحب وهوه كلشوي يندار عليه ويخزرني

اخرها وصلت للباب ردت اطلع واجاني صوته

ضرار... ويييين ؟

سيرين... ها هوه شسمه ختنكت احس نفسي حيغمى عليه

مازن... خيتي كملو العقد وبعدها خل يغمى عليج

ضرار... اسكت انت تعالي يله وقعي

رحت يمه واتوسله بعيوني بس لاحياه لمن تنادي

وقعت واني دموعي عشره عشره لاونوب يباركولنا ... يباركون على موتي لوتعاستي

طلعنى وهوه لازمني احس راح يغمى عليه من القهر والالم

حاسه بخنكه وغصه بداخلي الوجع بداخلي يزيد والتفكير موتني احس بيه روح بس هالروح ميته

كعدني على الكراسي وراح جابلي مي واجي

ضرار... وجج شبيج اهدي

سيرين بشهكه... شسويتلك حتى تأءذيني هييج ؟

جرني عليه وحضني بقوه...عوووفني اااكرهك حل عني

شهكت بألم وحجيت...مجاي تفهم الوجع الامر بيه صعب كلش صعب
دتقضي عليه وتخنك بيه عالبطيئ جاي تعاقبني على غلط مامسويته
اذا رايد تموتني اكتلني وخلصني ما اتحمل والله ماتحمل

ضرار... اشششش كاافي لاتشلعين كلبي والله موحمل عبالج هينه عليه اعوفج مره ثانيه

غص بكلامه ورجع كمل

سيرين غيابج مثل غربتي

انه ماصدكت حتى ا....

استغربت كلش من كلامه الي كله الغاز وممفهوم
سيرين... كممل ماصدكت شنو ها ! ماصدكت حتى تذلني ماصدكت حتى تكسر ابوي بيه حتى زواجي مومثل العالم حالي حال الفصليه

ضرار... لاتحجين شي من كيفج

سيرين... شحجي ها شحجي ماخذني نزوه لو تتونس بيهه على كولتك حتى الك*** اغلى

لزم شفتي وعصرها ...اششش كااافي تجفصين وتالي وياج يله كومي الوادم تباوع علينه

سيرين... ماريد اروح وياك

ضرار ... ماتخطين خطوه الاوياي

سيرين... ابوي وينه وشسويتله بس كلي وريحني لاتشلع كلبي ...دموعي مثل الشلال واشهك من البجي

ضرار... ابوج بخير لاتخافين ولاينشلع كلبج ماكو غيري المشلوع كلبه

سيرين... شوكت ترجعني

ضرار... مارجعج

كومني من زندي ومشى صعدني بالسياره

انطاني الكلينس واني اطلع عشره عشره وامسح بيهن ترست السياره وهوه بس ينافخ ويستغفر

هسه يكول مشايفه بس خباثه الا اتعبه علما يمل ويرجعني بسيطه

ضرار... خلصتي!

سيرين... لابعدني موجاي ابجي

ضرار... وين دموعج ؟

سيرين... نشفن شسويلهن

ضرار... لمي الخ*** لوتردين انه المهن

سيرين... سيارتك لوسيارتي

ضرار... رببببي صببرررني

حجااها بعياط وحرك السياره...نزلنا كدام مطعم رحت كدامه لان صدك جوعانه ومن العشى مماكله

ضرار.... تعاااالي وين راكضه

سيرين... هااا

ضرار... امشي بصفي جنج جاهل تكمزين

رحت مشيت بصفه حجزلنا طااوه واصريت الا اني اختار

طلبت نص القائمه حتى ماشتهي والنادل مستغرب مني اطلب وارجع ليورى

الاكل ترس الطاوله اكلت شوي وشبعت وكله بقى بمكانه...اني موعلمود بطني لوجوعانه بس حتى اخسره على كولت غيد خايفه على فلوسه

ضرار... يله اكلي كله

سيرين... شبعت

ضرار... وها الاكل المن طلبتي اذا ماتاكلي

سيرين... انسدت شهيتي خلي ناخذه ويانه وهم ناخذ للحجيه ويانه وانت ادفع

ضرار ... اي مودافعه من جيب الخلفوج اشوف وين توصلين بعنادج وسواياتج مال برابيك

سيرين... ليش بالله شمسويه ؟

اني كلت هيج وطكها ضحكه وجهاا صار احمر فهيت على سنونه مرتبات وبيض كلش، هوه اسمر وسنونه بيض بارزات

واصلا ولامره شايفته يضحك هيج عبالي مكسره سنونه ومايضحك

ضرار... وين صفنتي؟

سيرين ... سنونك حلوات بس

ضرار... بس ؟

سيرين... بس انـتـهـه ازرك ما لايكاتلك

حجى بصوت ناصي ممسموع... طفله يربي صبرني عليها

سيرين... ترى سمعتك

ضرار... كومي يله خل نروح

حاسبهم وطلعنى واني مابطلت تفكير حتى اشوفلي طريقه اهرب منه

بس شلون واني لااندل ولاعرف وين جايبني
حفضت الطريق الجابني منه وكل لافته انمر بيها اضل مركزه عليها حتى احفظها

وصلنى صف سيارته واني صعدت قبله دكيت باب شقه الحجيه بنفس الطابق وهوه اجى وراي

الحجيه... هلا بنيتي منور الدار

سيرين... هلا بيج حجيه اشسمه جبنى غدا من برا حتى نتغدا سوا وهم نكضي وقت سوا

الحجيه... لايمهه بالعافيه اخذي راحتج انتي ورجلج

سيرين بكلبي... عا لاقل رجليه ابيض من وجهه هالازرك

عوجت حلكي معاجبني وحجى هوه... حجيه تعالي انتي وغيدا وهم تبقن يم سيرين علما اكضي شغلي ارد

الحجيه... هذا هوه روحو وهسه اجي وراكم

صرار... هلا بيج

مشينا فتح باب الشقه ودخلنى اخذت الاكل منه وديته بالمطبخ ورحت بدلت ورجعت

رتبته بصحون وحضرت السفره

سمعت دك الباب كبل ركضت فتحته وهوه طلع وراي

ضرار... شمالج تناطحين

غيد... شلونك عمو هلاو سيرين

ضرار... هلا يبعد عمج

سيرين بهمس ... شويب بكد ابوي ايع ابوي احسن عالاقل موخبيث

تعمدت حتى اسمعه شفت وجه انحقن احمر ويزفر من العصبيه

غيد بهمس... وجج اسكتي لايهيج علينه خل اخلص الاكل وابدو بمشاكلكم

سيرين... دمشي ام بطن خل ناكل مالج دخل بهالشايب

صبينا الاكل اني وغيد ورتبناه الحجيه كعدت بصفه واني وغيد كدامهم

جنت شبعانه لان اكلت بالمطعم ضليت بس انقش اعاين لغيد حلكها متروس اكل

ضحكت على سوالفها وشلون متربعه وهيه شوي مربربه وخدود عدها حلكها متروس اكل وكصيره بس حلوه وحبابه كلش ومميزه بشكلها وسوالفها

مشكلتها تاكل وماتشبع والحجيه دوم تتعارك وياها تريدها تضعف تكلها صايره مترتين منو يكلبج

عفتها براحتها واني حتى مالي نفس لايشي

قطع الصمت ضرار وهوه يكول... حجيه العصر اخذج انتي والبنات حتى تاخذين سيرين تجهزيها

الحجيه... صار وليدي

سيرين... اني ماروح

عود ردته يتوسل ويلح عليه حتى اروح اشو هز راسه وكال براحتج

رجع يكمل اكله واني اشتشيط من الغضب نترت الخاشوكه وعطت

سيرين ... اشووووو مثل الالي تجيبني وتودييييني مووو لعبه بيدك حتى تمشيني بمزاااجك كلشي مرايده مننننك حل عني كاافي عاد

شمرت الخاشوكه وكمت ركضت للغرفه،ختنكت كلش منه وديقهر بيه محسني وكان لعبه بأيديه ويمشيني بمزاجه

كلشي عنده بالضرب والاهاين ويجبرني على كلشي ماريده ... صرت افتر بالغرفه واهفي احس ختنكت كلش من الحاله الا اني بيها

وين يريد يوصل وشنو الباله ؟

خليت ايدي على قلبي احسه حيطلع من مكانه وهمست بتعب...ربي نار وتسعر بيه اجعل هالنار بردا وسلاما

شوي واجت الحجيه تتمشى على عوجيتها كعدت بطرف الجربايه وسحبتني من ايدي كعدتتني بصفها

الحجيه... شمالج يمه ؟

اني كالتلي هيج لوبس ردتها حجه حتى ابجي صرت اشهك بصوت عالي حتى حسيت صدري تزرف

سيرين... تعبتت مجاي افهم شنو الرايده مني ولوين يريد يوصل بتصرفاته وياي

الحجيه... اهدي يمه چا البجي شيسوي حتى دموعج خلصن

سيرين... خل يعتقني ويرجعني لاهلي موكافي هيج

الحجيه... الله كريم كومي غسلي شصاير بحالج وجهج مصفر

مسحت دموعي رفعت راسي لكيته واكف بالباب ويعاين حواجبه معكودات مثل كل مره

عاينلي وراح احنى كاعدين وماسمعت غير وهوه يطبك باب الشقه بكل قوته

سيرين... شبيه هذا يربي شي يوم يصير بيه سكته قلبيه منورا تصرفاته

الحجيه... عوفي يمه من تشوفينه عصبي وخري منه ولاترادديه عبن لوشافج تعاندين وياه وتراددين حياذيج تجفي شره

سيرين... ليش يريد ياخذنى حتى تجهزيني

الحجيه... چا يمه غير مرته ومن حقج هذا

سيرين... بالميه الف مو هههههههه عن اي حق وهوه ماخلالي حق حتى اوافق لو ارفض

الحجيه... لاتحجين شي اتي ماتعرفين شنهي البراسه لهالضرار

سيرين... زين هوه متزوج واهله وين وشنو شغله بالظبط ؟

الحجيه... اسالي وهوه يجاوبج

سيرين... انا ماتحمل ابقى بالمكان الهوه بيه نوب اكعد اتناقش واسأله

الحجيه... جا خليج هيج

سيرين... لزمت ايدها بتوسل وحجيت... احجيلي كلشي عنه

الحجيه... شوفي يمه اذا تردين تعيشين وي ضرار لاتنبشين وراه

صح تشوفي عصبي ومتسرع بس وداعتج اطباعه غير عن تصرفاته ... انه من استشهد ابو غيد الله يرحمه ماضلي احد اخوان المرحوم ماسالو علينه ولاعرفو شبينه مابينه واخوتي كلمن ملتهي بمرته ونسو اخيتهم

نزلت دموعها ورجعت كملت، ضرار الله ينطي جان يعرفه للمرحوم عبن جان صديج ابوه وهوه كلما يشوفه يوصي علينه يعرف ماكو احد بظهرنا انه وبتي بهالدنيا وانه عدي بس هالوحيده الله رزكني بيها

من استشهد الله يرحمه اشترالنا ضرار هالشقه حتى يكون كريب علينه وكريب على شغله وراتب المرحوم موجود وكل شهر مخصصلنا مصرف ومامخلينه بعازه احد

عاينتلي ومسحت على راسي...بنيتي اطي فرصه وبطلو هالمداهره بيناتكم  ضرار من بعد ماصرتي مرته لو ضلين كل عمرج معلكه مايهدج ولايعوفج

سيرين... وشنو الاسوي اني ماريد ابقى يمه اريد ارجع لاهلي

الحجيه... اتكربي منه واكسبي لوعرفتي تصرفين وياه يصيرلج مثل المحبس بايدج

سيرين... شلون؟

الحجيه... بدلعج اهتمي برويحتج چا هوه الرجال شيريد من مرته غير اداري مثل الماي بالصينه عبن صار رجلج واتي مريته

ضحكت بصوت عالي وهزيت ايدي

سيرين... هههههههههههه لاااا ومستحيل هههههههه انه وضرار ننجمع ونصير مثل المتزوجين هههههههه

ندستني برجلي بعوجيتها واني احجي واضحك كمت وكفت كدامها وهيه تعضلي شفتها وتخزر بيه

سيرين... هالشي مراح يصير ولاممكن انو اعترف بهالزواجج الباطل صار بالاجبار وبدون علم اهلي ولاموافقتي ضرار مثل السيف الي بركبتي صار لااكدر اتحرك ولاكدر اتخلص منه

نفخت بغضب وحجيت،كلمره تصحلي فرصه حتى اتخلص منه مراح اضيعها لواضل كل عمري على هالحاله مابقى وي ضرار

أشرتلي بعيونها بمعنى باوعي وراج نداريت واشوف ضرار وغيد واكفه وراه تباوعلي وتخنك بركبتها ، فسرتها بمعنى موتج قرب

وهوه من العصبيه حتى عروق وجهه مبينه وصاير لون وجها ازرق على احمر وايده مكورها

هوه موراح ليش رجع !

دفر الباب بقوه وراح بله مايحجي كلمه،اجت غيد يمي وتغم بكصتها

غيد... عزاا ولجج ضلي اجفصي علما يطكج ويموتج

سيرين... هوه ليش رجع

غيد... نسى سويج سيارته ورجع ياخذه وانتي حسج عالي اجى ولكاج تغردين عليه

سيرين... حظي الرجعه اووي خيولي يطبه طوب

الحجيه... خلني اشوفه وين راح

كامت الحجيه وراحت للصاله خذت مبايلها وتصلت عليه يرفض وميجاوب

ملت عافت المبايل عالقنفه نتضرتها تكوم لوتوخر بلكي احصل اهلي واتصل عليهم

وهيه حذره كلش بحيث مبايلها متعوفه كدامي

سويت نفسي مشغوله وي غيد وضلينه نضف بالشقه

على حظي الاغبر رجع ضرار ،خرب يروح ويرجع شسالفته هذا

دخل يخزر بيه وعاينلي بطارف عينه ماهتميتله ولادرتله بال بالي كله يم المبايل شلون اخذه

اخذت وصله ورحت حتى امسح الميز اليمهم شافوني سكتو واني مستمره امسح

سويت نفسي تعبت وكعدت بصف الحجيه عالمبايل

وهوه متكئ كدامي مخلي رجل على رجل ومضيق عينه ويباوعلي وجن كاشفني ويعرف الاريده

ضرار... كومي سويلي جاي

سيرين... مسوي لنفسك اشتغل عندك

اني كلت هيج وهوه ثار كام لزمني من شعري وعياطه زرف اذني

ضرار... لجججج وتالي وياج انه ضلين هيييج بوكاحتج

الحجيه... ولك يمه عيفها هسه غيد تسويلك

بعدتي الحجيه منه وتهدي بيه
اخذت الوصله بدون ماينتبهون لفيت المبايل بيها وركضت للغرفه عود زعلت

كبل رحت للحمام وقفلته عليه مبايلها جان مثل مبايل امي ابو الدكم اعرف استخدمه

الخوف سر بجسمي والرجفه عتلتني من التوتر العرك صار يصب

دكيت رقم ابوي تصلت عليه يطلعلي مغلق

رجعت دكيت على رقم امي

سيرين... بعد رررقمين يررربي نسيتهن

اريد بس احصلهم واتصل على لحظه يدخل عليه ويشوفه بيدي

يلهه سيررررين اااذكررري كمت ادك والطم على وجهي بدون حس حتى نفسي كطعته

ضليت اردد بدعاء التقرا امي وابجي

( اللهمّ يا مسهّل الشّديد، ويا مليّن الحديد، ويا منجز الوعيد، ويا من هو كلّ يومٍ في أمرٍ جديد، أخرجني من حلق الضّيق الى أوسع الطّريق، بك أدفع ما لا أطيق، ولا حول ولا قوّة إلّا بالله العليّ العظيم، ربّ لا تحجب دعوتي، ولا تردّ مسألتي، ولا تدعني بحسرتي، ولا تكلني إلى حولي وقوّتي، وارحم عجزي فقد ضاق صدري )

دكيت اخر رقمين بس يرن ومحد يجاوب فصلته ورجعت اتصلت

بالخمس مرات اتصل ومحد يجاوب اخر شي ردت اسده ونفتح الخط

_هلا

اني سمعت صوتها لو كل جروحي نفتحت ضليت ابجي واشهك اريد احجي حسيت لساني نبلع وموكادره احجي كلمه

مثل واحد وعبالك بالع جمره لا اكدر اطلعها ولاكدر ابلعها هالجمره تجوي بكلبي وتخلي روحي تنازع هالروح لاهيه باقيه ولاهيه طالعه من هالجسد

امي... يييمههه سيرررين

سيرين بشهكه وبجي... ماما حبيبتي

امي... ياااروححح امجج جاااابر بنيتناا هاااي ... ضلت تبجي وتشهك بلكوا افهم كلامها

بنيييتي وينج وجج لاليلنا ليل ولانهارنا نهار ندوور عليججج مااكو وين اخذجج بنيتي كلبي ميت عليج كليلي شلونج أذاج ضربج سمعيني حسجج وطيبي كلبي

سيرين... يمممه اااسرني عنده خلا حياتي جحيم وهالجحيم مراح اتخلص منه دام ضرار بحياتنا فدوه اروحلج خلصوني منهه الله يخليج يمهه زوجني وصرت مرتهه ومسجله بأسه

امي... سوووده عليييه حسبي الله عليه

سيرين بشهكه... ااابوي ابوي وينه وشلونه

امي بشهكه... ضال يروح ويرجع للناصريه ولجج يمه لوشوفين حاله مثل الطفل ويدور على امه ماضل واحد ماتوسله حتى يلكوج ويرجعج اله

سيرين... كله بسببي وبسبب هالحقيرر الله عليج سلميلي عليه وكليله ريحانتك تنتظرك يمه بداعتي عليج كليله موبرضاتي ازوجته والله جبررني لايزعل عليهه

ضلينه بس نبجي ونشهك هيه كامت تصيح على ابوي وتشهك بصوتها

امي... جااابر ريحانتك هاي تعال ليهه رجليه ماتعيني حتى اكومن

انطته المبايل اجاني صوته وماحس غير الباب ينكسر بكل قوته

جنت قافله الباب وكاعده وراه من انكسر وكع على راسي حسيت كل عظامي تكسرت بهالظربه

ماشفت شي غير بس الظلام ...

( توقعاتكم للبارت الجاي 🌚؟)

يـــتـــــــبــــــــع....