رواية ثارهم وبنت الفقير الفصل الثامن عشر 18 - بقلم الكاتبة ترانيم 🤎

الثأر الرابع عشر

ثارهم وبنت الفقير

بقلمي_ترانيم هادي ♥️🕊️.

_شلونكم حلويني..تصويتاتكم..وتعاليقكم بين
الفقرات لاتنسوها..ومتابعه للحساب ♥️🕊️,
taranim_09

غيد...
كعدت سيرين بالصدر واني ورى بس كلشوي واشوفن ضرار يعاينلها ومتوتر

وهيه مثل الجماد ساكته وبس صافنه ياتفتح بقفل الباب ياتسده

وجهت نضري الها وماشوف غير هيه وتفتح باب السياره وتشمر نفسها

ضرار بسرعه تلاحكها لزمها من ايدها والباب مفتوح سيارات تمر سريع والهورنات طرشتنا واحنى واكفين بنص الشارع

ضرار بعياط... وججججج شسويتي

سيرين... وخرررر حتى بهاااي دخلت نفسك ععوووووفني

هوه نزل من السياره سحبها واجى كعدها يمي

ضرار... لزميها خلنا نوصل وارجعلها عكلها تسودنت

غيد... يكلي لزميها واني من الهبطه حسيت ضغطي ارتفع

لزمتها واني ايدي ترجف عود اهدي بيها ضلت هيه تمسد على ايدي وتطبط اريد اسيطر على رجفتي ماكدر

ضرار بعياط... سييييرين خرب بالگـ*** وججج شهل خبال لوصايرلج شي

سيرين ببرود... وشبيك تعيط

غيد... يايمهه راح نسوي حادث عزااا انتبه

ضرار... حظي المنـ*** يسويها

هوه عاين بالمرايه وكلساع مسترق نظره عليها حتى الطريق احسه صار طويل

متعصب وينافخ عصبيته تخوف شفت الرصيف صار كدامنا كلش هوه عينه على سيرين حتى مانتبه

غيد بعياط... الرررصيففف يمههه الررصيف عزااا بعيني اليوم منيتي اجيت وياكم

الهبطه احسها صعدت لراسي واني فقدت وماحسيت بشي

سيرين...

حسيت نفسي خسرت كلشي شنو الفائده من حياتي وليش عايشه لحد هسه

احساس صابني حتى أاذي نفسي واتخلص من الاني بيه مالكيت نفسي غير فاتحه باب السياره حتى اشمر نفسي

بس بسرعه تلاحكني ولزمني كضاها يرزل ويفشر وعيونه بكصته من العصبيه

نزل سحبني بقوه من ايدي وصعدني ورى اعاين على غيد حلكها نشف وصار ابيض وترجف

تبلع بريكها وكلساع تعيط خاف نسوي حادث
وبسبب سياقته عبالك بس احنى بالشارع ولاجن سيارات تروح وتجي

الرصيف صار كدامنا والعالم واكفه تريد تعبر وهوه ملتهي يخزر حتى ماشاف الرصيف

بسرعه دارها وغير طريقه اعاين لغيد فاقده ووجها ازرق احرك بيها ماكو

سيرين... غيد شصاارلج ضرااار شوفها شبيها

وكف السياره على جهه وعيونه تطلع نار من العصبيه بحيث شفت دمارات رقبته مبينه

ضرار... شصابها

سيرين... مووكت هالحجي خل ناخذها للمستشفى

ضرار... انه الكـ*** جايبها لروحي اشتعلت عشيرتي

سيرين... مايصيبك شي ولاتشتعل

ضرار بتهديد... بالعباس لاماطيح حظج هينه صبريلي

فر السياره ورجعنا لنفس الطريق وصلنى للمستشفى راح جاب كرسي متحرك واجى

كصينا وصل يالله قبلو ندخل ودخلنا للدكتور فحصها وخلص لكى ضغطها مرتفع

شكللها مغذي وطلعنى برا ننتضر وهوه كلساع طاكله جكاره ويجون عليه وهوه ماخذهم بصوته العالي وعربدته يتعارك وياهم ويرحون

اخرها اجى الامن كلب المستشفى بصياحه عبالك بس هوه بيها تعبو منه عافو وبعد ولا اجو

ضرار... خوات الكـ***

سيرين... ممكن تنصي صوتج ترا والله دخت وصوتك يرج باذني

ضرار... هزلي راسه وحجى ... حسابج بعدين انتي بس خل نرد

عاينتله بطارف عيني ودرت وجهي،اجى كعد بصفي والدخان مال جكاره يشربه وينفخه بخشمي

سيرين... وبعدين حضل هيييج

ضرار... وجع سدي حلكج ترا بلكوا صابر عليج وحك علي

سيرين... ماشي حل عني وعوفني بحالي والله اشتكي عليك يم الأمن

ضرار... انـ*** انتي وياهم بالعباس، اركدري احسلج وروح ابوي اشك حلكج اشوفن شلون تفكي

عجزت شجاوبه وهوه ماخذني بلسانه نقهرت كلش من غلطه وعدم احترامه

درت وجهي عنه ودموعي تجري وهوه مستمر يدخن وينافخ شوي وحجى

ضرار... هسه انه شسويتلج حتى تبجين

سيرين.....

ضرار... موجاي امظـ** وياج جاوبي

سيرين ببجي... شجاوبك هاا وأنت حتى هناه ماخذني بلسانك وغلطك

ضرار... صيري ادميه وانه اصرف وياج عدل بالله لوصايرلج شي شسوي

سيرين... شسوي يعني تخلص مني

ضرار... عايقه والله لو مالوادم جان شلعت هالشفايف اعلمهن شلون يحجن

سيرين ببجي... والله عود تخوفني لا غلطان انـت جرب وشوف

ضرار... حط الجكاره بحلكه وزفر الدخان...اي شعلينه نجرب عود

سيرين... انه اكرهك وماريدك

ضرار... تحبيني ورايدتني واذكرج بهالحجي بعدين

سيرين... هههههههههههههه

كرصني بزندي حسيته شلع ايدي من مكانها

سيرين... اوي خرررب ايدي

ضرار... صوتج مال ك*** نصي

سيرين... خزرته وحجيت ،ترى حتى اني اكدر افشر عليك بس اخلاقي مومثلك

شفته عيونه صارت بكصته والدخان مال جكاره يطلع من خشمه كمت طكيتها ركضه لغرفه غيد وقفلتها

غميت كصتي واعظ باصابعي

سيرين... فلك صابج الله ياخذك ياضرار انتقلت جيناته الي وصرت فالته نفس لسانه

لكيت غيد كاعده تعاين عليه ومستغربه تصرفاتي رحت يمها بستها كعدت بصفها

سيرين... شلون صرتي

غيد... معقوله بعدني عايشه

سيرين... هههههههههههه

غيد... اضحكي اضحكي شرايحلج انتي

سيرين... والله شكلج بس هالشويب حاد سنونه عليه وفوكاها كملتها من جفصت كدامه

غيد... حتى هناه مشاكلكم ماتخلص

سيرين... والله هوه يدور وياي مشاكل كلشي ممسويتله

غيد... كومي مني كووومي والله شي يوم انجلط من وراكم وشوفي

سيرين... لاتخافين ضرار يتلاحكج بسواقته عايش اللحظه ويسوق سريع عبالك الشوارع مسجله باسم حضرته

غيد... غير خايف عليج

سيرين... دسكتي خايف عليه لوخايف عليه جان خلاني انتحر

غيد... هاي وين لاكيتها

سيرين... مبين طريقي طويل وي هالجحيم الله عليج ادعيلي اخلص من الا اني بيه ماكو صدك اقتل روحي واخلص

حجيت اخر كلمه واندفع الباب بقوه دخل وهوه شايط اني كمت بسرعه وركضت للجهه الثانيه

دخلت وراه الممرضه عيونها بكصتها وكملتها من شافت قفل الباب كاسره

ضلت دردم وهيه متخوصره وماعاجبها العجب وهوه ساكتلها

ضرار... لومامره جان عرفت اتصرف وياج

_وشتتصرف اكثر من هيج ترا اكو مرضى ويرادلهم راحه وانت تكسر وتعربد بالمستشفى رجاءا اكو سلوكيات والتزم بيها

سيرين... صدك نرفزتني وبكل صلافه واكفه وتنتر وهوه مكور ايده مدري شلون صبر وماضربها

هاي لواني موجان زكطني وي الحايط

رحت وكفت كدامها وتخوصرت واني ردتها حجه حتى افوخ كلبي

سيرين... والله اشو ماخذتنا بعياطج لاااعيني موشفتينا ساكتيلج معناها تاكلينه وشربينا قسم اذا هسه مارحتي اذبن حركت كلبي مال شويب بيج واشوفج شلون تحجين

هيه خزرتني راحت اسمعها تدردم ،اجى سحبني من ايدي وكعدني عالقنفه راح جابلي مي واجى

ضرار... اهدي على كيفج وي روحج شمالج

سيرين... يالله تعبت كلش حموت

ضرار... عمرج اطول من عمري

سيرين... انـت ماتموت

ضرار... نعم صوته وحجى بصوت مايع...طبعا ماشايفه كمر يموت

بنص الحاله الا اني بيها صدك ضحكت من كلبي على سوالفه

غيد... احمم

عاين عليها وضحك ، يهلااا واخيرا ماعبالي طلعين خوافه وبسرعه تموعين شمالج بويه

غيد... اني كلبي تعب من وراكم صراحه زين ومانجلطت

ضرار... مابيج غير العافيه يله خل نروح خلص المغذي

راح ضرار وخرلها المغذي عدللها عبايتها وهوه يساعدها بمشيتها اشوفه شلون مهتم بيه ومتمسكه بأيده مثل الطفل

الخوف بعيونه مثل خوف الاب لبنته ضرار هيج خوفه على غيد شفته

عاين عليه وحجى ... ماتكومين لوناويه ضلين هناه اليوم

سيرين... ماخلص منك

ضرار... تؤ باحلامج

كمت يمهم سحبني من ايدي صرت اني بجهه وغيد بجهه وهوه بنصنا

طلعنى واحنى متكأين عليه اني احس روحي تعبت من الصبح لحد هسه على فرد وكفه

ضرار... خاف جانت عايزه بويه شمالجن مسوياتني تجايه

غيد... بسببك احنى بهالحاله

ضرار... بسببي انه ؟

سيرين... اني لوماكلامك جان هسه نايمه بالبيت وغيد اجت تروح بيها بسبب تهورك وسياقتك

ضرار... اي عمي اعذرونه انه الغلطان ولاجن العرمه رادت تذب روحها والله فد صلفه انتي

ندزته بزنده... انت ليش لسانك هيجي

ضرار... ينكط عسك

غيد... ههههههه كافي مناكر شبيكم

طلعنى صعدت غيد ورى واجيت اصعد يمها اجى ضرار سحبني من ايدي اخذني وصعدني بالصدر

سيرين... هااااي ليش

ضرار... اششش خزرني وراح

اجى صعد تقرب عليه اخذ احزام الامان وربطه

ضرار... انهيج بالعباس

سيرين... نفخت بضيك ودرت وجهي عنه

ضرار... سربوت ماعاجبه

سيرين... اي ماعاجبني

ضرار... هز راسه وحجى ... ضامهن وحده وحده

هز راسه وحرك السياره .... وهمزين يسوق بهدوء عالسواقه الي شفتها حقها غيد يرتفع ضغطها بس خطيه متستاهل كون بيك ولابيها

وصلنى لكينى الحجيه ومازن منتظرينا

الحجيه... يايمه جا هيج غير تخبرونا

ضرار... اعذريني حجيه

الحجيه... شصار وياكم

وجه نظره الي ولغيد ابتسم وجاوبها

ضرار... مصار شي بس صاير عدها انهيار عصبي

الحجيه... يايمه سوده عليه كله من وراك

ضرار... حجيه خلينه ساكتين من وراي

مازن... يله انه اروحن بغير وكت نمر

ضرار... وين رايح لك ضل عالعشى

مازن... غير وكت خيي ،وغمزله

ضرار... ها يله خل نطلع شوي وارد

الحجيه... وين رايح يمه

ضرار... عدي شغل اخلصنه وارد

مازن... يله اودعناكم وحمدلله عالسلامه خيتي

سيرين... الله يسلمك

ضرار... خلصت يله انصرف لاسون شي اجيبن اكل من برى

اندار عليه غمزلي وراح هوه ومازن

الحجيه... يله يمه بدلن وارتاحن شمالجن خاويات

غيد... هههههههههههه

الحجيه... شمالج ولج

سيرين... من التعب حجيه من التعب يله امشي خل نبدل

رحنى للغرفه انه وغيد سبحنا وبدلنا ورحنى كعدنا يم الحجيه

غيد... سيرين العلاج الجابه ضرار وينه

سيرين... ماجاب اي علاج

غيد... يوم بالله خابري العلاج لازم تشربه بوقته اكيد نسى يجيبه

الحجيه... اطيني مبايلي من يمج

سيرين... كمت اخذت المبايل وكعدت يمها ، حجيه فدوه اروحلج خل اتصل بأهلي

الحجيه... يايمه لوضرار عرف يهجم عليج اتجفي شره

سيرين... تعودت عليه ،والله كلبي طاك عليهم بس اطمن عليهم

الحجيه... وفف يمه خابريهم كبل لايرد

كمت اخذت المبايل ورحت للغرفه دكيت الرقم وتصلت على رقم امي

بسرعه اول مارن جاوبتني

امي... بنيتي سيررين

نزلت دموعي وشهكت بالبجي...طاك كلبي عليج ياروح سيرين

امي... سوده عليه شلونج بنيتي شخبارج شلونه وياج مأذيج يمه سمعيني حسج

سيرين... ضلي احجي خل اشبع من صوتج فدوه لكلبج زينه اني وضرار زين وياي ممأذيني

امي... وجج يمه بتي واعرفنج جا ليش تبجين

سيرين... مشتاقتلكم والله ابوي وينه

امي... ابوج بالناصريه عبن رايح لجدج وانشالله يحلوها وترجعين بس اصبري يروحي والله يفرجها

سيرين... انشالله يوم ،البقيه وينهم

شوي وسمعت صوت يمها ، وجن كلبي صار يدك طبول حسيته راح يطلع من مكانه على لحظه يتوقف النبض بيه

سحب منها المبايل وحجى بلهفه

بدر... سيرين

سيرين ببجي... بدر شلونك

بدر... ذب حسره وحجى،شلوني من بعد ماخذج مني بس ارجعي بالعباس ماعوفنج

سيرين... بدر الله يخليك لاتنسوني وخلصوني منه والله موكادره اتحمل اكثر تعبت

بدر... ريت التعب بيه ولابيج انشالله كلشي ينحل كليلي شلونه وياج ها يضربج يأذيج احجي

سيرين... لا كلشي مامسويلي بس

بدر... بس شنو ؟

سيرين بشهكه... عقدنا واخذني منك فركنا موكتلي انه رايدج واخذج لييش ماخذتني ها ليش ضيعتني من ايدك

بدر... نار واجه بيه والخلقج ماراح يتهنى عبن نفسي ضلت بيج ولاتخافين ترجعين اليه وحتى لوعقد عليج لوضمج باخر الدنيا اعرفنج تحبيني واحد مثله مستحيل يفركنا

سمعت صوت الحجيه تصيحني حجيت وياهم وسديته حذفت الرقم من السجل ودزيته الها

حسيت نفسي ارتاحيت واتطمنت من حجيت وياهم ووجودي يم ضرار اكيد مراح يطول

لليل اجى ضرار جايب وياه اكل واني نفسيتي كلش مرتاحه بحيث تعجب عليه شلون اكل وهوه يجيب ويخلي كدامي

غيد والحجيه تعشن وراحن واني كعدت ارتب بالشقه

ضرار... تعالي سيرين

صاح عليه ورحتله لكيته متربع عالجربايه ومطلع العلاج

ضرار... عوفي الشغل واشربي دواج

سيرين... ممم انطيني

انطانياه شربته ... خلصت رحت سبحت وطلعت لكيته واكف كدام المرايه

يمشط بشعره ولحيته شافني اجى يمي سحب شعري فتحه على طوله

اجى سحبني من خصري دفن راسه برقبتي وايده تتوزع على كل انش بجسمي

سيرين... وخر شدسوي

ضرار... شمسوي ؟

تصرفاته صدمتني وقربه وترني كلش جسمي تشجنج بحضنه واني بهالحاله

طلع مبايه شغل اغنيه وهوه لازمني من خصري بقوه

يمين الله أحبك
حب ماله حدود
وخلق الله ونجم
الليل علي شهود
يمين الله أحبك
حب ماله حدود
وخلق الله ونجم
الليل علي شهود
عدد ما بالسما نجمات
عدد ما في الرياض ورود
يمين الله يمين الله يمين الله
أحبك حب ماله حدود

سيرين... ضرار

ضرار... عيونه

سيرين... شبيك

ضرار... رايدج

سيرين... اني ماريدك

ضرار... ههههههههاااي مايهم المهم انه رايدج

قرب خشمه من خشمي وانفاسنه ختلطت همس بخدر وعيونه تتفحص كل انش بوجهي وايده تتحرك على معالم جسمي

ضرار... سيرين لهفتي عليج مثل لهفه طفل لامه ... شمني من رقبتي ورجع حجى ... افيش ياريحه الجنه

سيرين... ضرار عووفني وترتني كلش

ابتسلمي وغنى وي الاغنيه

يمين الله أحبك
حب ماله حدود
وخلق الله ونجم
الليل علي شهود
يمين الله أحبك
حب ماله حدود
وخلق الله ونجم
الليل علي شهود
يمين الله أحبك
حب ماله حدود
وخلق الله ونجم
الليل علي شهود
عدد ما بالسما نجمات
عدد ما في الرياض ورود
يمين الله يمين الله يمين الله
أحبك حب ماله حدود

الاغنيه خلصت وهوه مستمر يتمايل بجسمي وياها حاولت انسجم وياه واسوي نفسي مندمجه وياه لازم اتقرب منه واعرفن الباله اذا اضل هيج مراح يتغير شي واضل كل عمري اتحسر على شوفه اهلي

ضرار... سمعيني صوتج

سيرين... هاا

قرب شفايفه يم شفايفي وهمس بهدوء

ضرار... سيرين صوتج وحركاتج وكلشي بيج يخليني ذايب بيج ادمنتج بالعباس وججج ادمنتج

حجى اخر كلمه ودفن راسه برقبتي ... بالنص ساعه احنى على هالحاله وهوه مقوي قبضته عليه واني مثل السعفه ارجف بأيده

احسه مقيدني بسلاسل وموراضي يفك هالسلاسل مني

وخر مني وصار كدامي وايده لازالت على خصري حرك خشمه على خشمي وضلت نضراته تتوزع عليه

سيرين... ضرار كافي لاتباوع هيج

صفن بوجهي شوي وعكد حاجبه وحجى

ضرار... نسيت

سيرين... شنو ؟

ضرار... كرصتها من خصرها وقربتها اكثر...نسيت احاسبج

سيرين... شمسويه حتى تحاسبني يمههه عوفني

ضرار... ههههههههههاااي والله ومنو يفكج من ايدي
سكت وحجى بعتب ...
ريحانه تردين تنتحرين هاا وفوكاها لسانج جنه لسان دلاله تمدينه

سيرين... من ضيم كلبي زين ولسه واكفه كدامك

ضرار... وانه شيصير بحالي اذا اتي صابج شي

سيرين... مممم ميصيرلك شي

ضرار... هخخ منك يجابر

سيرين... عقجت حاجبي وعوجت حلكي

ضرار... شبيك لك سربوت

سيرين... ضراااار اني موصديقك وتحجي وياي هيج

ضرار... اي بويه انتي مرتي ... وغمزلي

سيرين... لا مومرتك هم

ضرار... چا شني

سيرين... مممم

ضرار... طفله كليبي

سيرين... انه طفله

ضرار... طفلتي

سيرين... انه موطفله

غمض عيونه بلع ريكه وحجى

ضرار... سيرين روحي نامي عرس الواوي بهالليل

سيرين... شنو ؟

ضرار... اششش نامي يله بله حجي

عافني وراح ينام بالصاله واني هم ماصدكت رحت لفيت راسي ونمت

ثاني يوم كعدت الصبح قبله طلعت للصاله لكيته نايم ومخلي ايده على عيونه ،كل اغراضه عالميز المبايلات والاوراق الابتوب ومفاتيح الشقه

سيرين بكلبي... سيرين اصبري ولاتتهورين اطي مجال اذا هربت هسه اكيد يلكاني ومراح استفاد شي اتصرفي عدل حتى تكدرين تتخلصين من السجن الأنتي بيه

عفته ومشيت رحت حضرت الريوك صبيته خلصت رحت كعدته والنعاس بعيونه مبين جان سهران

كعدنا نتريك شوي واندك الباب راح هوه يفتحه واني ضليت كاعده

اجت غيد والضحكه على وجهى

غيد... يهلا بهيج صباح وماتعزموووني

سيرين... هههههه هلا بيج اتفضلي وينها الحجيه

اجت جرت الكرسي وكعدت

غيد... امي ضلت بالشقه وكلت خل اجي اشوفج واطمن عليج

ضرار... بويه انتي شلون صرتي

غيد... زينه يابه احسن من البارحه

كعدنا نتريك سوا وهيه سوالفها وضحكتها ماليه علينه خلصت شلت اني الاكل

رحت للمطبخ رتبتهن ورجعت بس ستوقفني حديثهم وهمه يحجون

غيد... يعني قصدك حتحاول تنتحر وممكن تأذي نفسها

ضرار... وهذا الخايف منه

غيد... والحل شنو خوما ضل هيج

ضرار... لا بس اعصابها تلفانه وحقها واليصيرلها موقليل بس لازم اندير بالنا عليها هالمره عدت على خير مره ثانيه ماضن تعدي

غيد... انـت هم دير بالك عليها فدوه علكيفك وياها

ضرار... غيييد

غيد... اي اي

ضرار... والله انه احرص عليها حتى من روحها بس ياغيد لسانها وعنادها والصلافه الشايلتها اتخبل من هيج

غيد... هالله هالله وياها وحقها هيه خوما تريدها تجر مثل ميل الساعه وانت جايبها سحل من اهلها

ضرار... انشالله بس خل تعدي السالفه واشوفن حل ماكدر اعوفنها هيج وكعدتها هنا طولت

عفتهم ورجعت للمطبخ واني افكر بكلامهم

سيرين... والله وزين ياضرار بسيطه لا ماطلع السويته بيه من عيونك ادعي الله يصبرني واكدر اتخلص منك وعبالك اعوفن الدنيا الك وانتحر

رجعت الهم سكتو بسرعه ... رحت بتسمتلهم وكعدت بصف ضرار

اعاينلهم تعجبو بس لازم اتقرب منه واحقق الاريده اذا اضل معانده اعرفه هوه حيعاند اكثر وهيج اني الاخسر ومراح استفاد غير طياح الحظ على كولته

شوي وغيد رجعت لشقتهم واني كاعده بصفه احس جاي اخون بدر بتصرفاتي

بس مجبوره موبيدي الا اني بيه ولاريد اكعد هالكعده بقربه اريدن حبيبي الحرمني منه

خلى ايده على كتفي وحجى

ضرار... اخذتي دواج

سيرين... عاينتله وابتسمت ... لابعدني

كام وكف سحبني من ايدي ومشى بيه للغرفه احس اريد اهج من قربه

قربه مثل النار وتجوي بيه لا اكدر اتحملها هالنار ولااكدر اتخلص منها

راح كعدني جابلي الدوى واجى وكف فوك راسي شربته يالله وخر

كمت ردت اطلع سحبني من ايدي وحضني من ظهري

سيرين... ضرار وخر شدسوي

ضرار... ليش جسمج يرجف

سيرين بتوتر... م ماعرف

ذب حسره حسيتها زرفت كلبه انداريت عليه خليت ايدي على قلبه واتحسس نبضه

سيرين... ليش نبضك هيج

ضرار... شبيه

سيرين... دكات قلبك سريعه ومومنتظمه داحسه حيطلع من مكانه

ضرار... تعبان

سيرين... ليش

ضرار... لاشغلين بالج وارتاحي كلشي لاسوين

سيرين... انه كلشي مامسويه

ضرار... حتى لو طفلتي حيري بروحج

باسني من خدي وراح ، غمضت عيني بألم افكاري مشوشه وحايره

ماعرف شسوي وشلون اتصرف وياه اريد افسر تصرفاته لاهيه حب ولاهيه كره

شنو اليريده مني وشنو الناوي عليه

ضرار صرت اتقرب منه شوي شوي وعلاقتي بيه بدت تتحسن اكثر من قبل

وخاصه هوه دومه داير باله عليه ومخلي عينه ورايه بحيث اذا كحيت يضل يفتر فوك راسي يطمن شبيه

صرت اهتم بأكله وبشربه وكلشي يحتاجه بحيث اشوف الفرحه بعيونه من يشوفني اسمعله واهتم بيه

بس دوم اتمنى مايلاكي الفرح وجودي بقربه يخليني اكرهه زايد واحساس الذنب يتراوالي واني اخون بدر

داحس نفسي اسوي غلط بس ماعرف غلطي وين بمشاعري لوبتصرفاتي

ساعه اكول موزين التسوي وساعه اكول يستاهل واكثر

مرات من يطلع تجي الحجيه وغيد يمي وهنه من يشوف تغير شلون اتعامل وي ضرار وتعامله شلون متحسن وياي اكثر من قبل

يكعدن ينصح بيه ويعلمني ويوصني عليه بس انه كلبي مويمه

كلبي غيره يملكه ومحتلني ماكادره اتقبله ولانفسيتي تتقبل غير بدر

ماتخايل اكون لغيره من بعد مابنيت حياتي من طفوله وياه

انه هسه لازم اكون يمه مويم ضرار انه الي لازم اكون زوجته لبدر

سيرين... جنت كاعده بالغرفه ارتب بالملابس وضرار بالصاله يحجي بالمبايل

بس اذني يمه بحيث كل كلمه يكولها احفرها بعقلي وهوه اتصالاته ابد ماتسكت

اندك الباب سمعته وكمت طلعت شفت الحجيه سلمت عليهن ودخلن

ضرار... يله انه طالع شوي وارد

سيرين... موتتأخر وها لاتنسى تجيبلي ككو ابو الحلوك وياك

غيد... واني هم

ضرار... صار بويه حجيه اتي شمحتاجه

الحجيه... سلامتك وليدي دير بالك على روحك

ضرار... انشالله

راح وقفل الباب وراه كعدنا شوي نسولف وطلعت غيد مبايل الحجيه وعافته بأيدي

سيرين... شنو هذا

غيد... اتصلي على اهلج اذا تردين

سيرين... والله

غيد... والله بس لاتتأخرين خاف يرد ضرار

سيرين... اي ماشي

كمت اتصلت عليهم حجيت وياهم واحد واحد والله احس روحي طاكه عليهم

مامتعوده ابعد عنهم هالكد حضن امي وحنان ابوي
واخواني ماتخيلت نفسي بيوم ممكن ابعد عنهم كل هالمده

شهور تمر وانه ماشايفتهم ولاسامعه حسهم صعبه كلش

_من بعدها صارت غيد كلما يطلع ضرار تجيبلي مبايل الحجيه حتى احجي وي اهلي وقبل جيه ضرار تاخذه مني

بس القلقني جيه ابوي من الناصريه طولت وليش لحد هسه ماراد

نفسيتي ارتاحت كلش ونوعا بديت اتحسن لان اكدر احجي واطمن على اهلي

صرت بين يوم ويوم او كل اربع ايام احجي وياهم بس من تجيني غيد لومن يطلع ضرار

بيوم جنى كاعدين بالصاله صحن الفواكه بيدي وهوه مركز بالاوراق العنده اريد افهم شيسوي ماكو

هوه منزل راسه عالاوراق واني احوص اريد اعرف شبيهن دنيت راسي عليه ومستمره اتدنى بحيث وجهي طبك وي الورقه ومانتبهة على روحي والتفاحه بحلكي داحستها

ضرار... شبعتي فضولج لو بعدج

رفعت راسي عليه لكيته خازر عيونه ويباوع ... يافشله نوب لاطشه عيني بنص الاوراق

سيرين... شسمه هوه غير ردت

قبل لا اكمل اندك الباب يبوو واخيرا كمت بسرعه لان اكيد غيد والحجيه

سلمت عليهن كعدنا شوي نسولف وحجى ضرار

ضرار... حجيه اذا مابيج حيل اريدج تاخذين سيرين حتى تجهزيها

سيرين... شجهز

ضرار... منها طلعن تغيرن جو ومنها تشتريلج ملابس والتحتاجي

سيرين... لاميحتاج العندي كافي

ضرار... انه جاي اكلج ماجاي اخذ رأيج

نفخت بضيك ودرت وجهي،عشتو حتى على هاي يجبرني

وصدك شبيه اني قابل خايفه على فلوسه يخلصن والله انت جبتها لروحك

الحجيه... يمهه چا انه وين اكدر امشي من ورى رجليه اخذ سيرين وغيد خل هنه يسوكن

ضرار... چا انعوفج ابحدج

الحجيه... شعليه قابل صغيره

ضرار... هذا هوه كومن يله بدلن حتى نروح

غيد... اي اي يله سيرين كومي

رحنى للغرفه طلعت صايتي ردت البسها وسحبتها مني غيد

سيرين... جيبيها خل ابدل قبل لايخبصنا

غيد... وين رايحه لسوك المخضر اكعدي هسه اجيج طياره

راحت لفت عبايتها وطكتها ركضه ربع ساعه ورجعت جايبه وياها فساتين محجبات كلش حلوات ومرتبات

اختاريت واحد لونه سمائي وبيه تطريز بسيط وحزام
واختاريت شال وحذاء يناسبه ومكياج خفيف هذا كله غيد تجهز بيه

خلصنا وطلعنى لكينى كاعد بالصاله هوه والحجيه

غيد... خلصنه

رفع عينه وباوعلنه صارت عينه بعيني فتح عيونه مثل المصدوم وباوعلي

ضرار... ها ترحن هيج

غيد... اي ليش موحلوين

كام اخذ السويج ومبايله من على الميز تنهد وحجى

ضرار... وين اضمجن اليوم

سيرين... بكلبك

ضرار... ضحكلي وحجى ،صار تدللن

غيد... هههههههه يلا عفيه حنتاخر

ضرار... اصبري خل ابدل ونروح

سيرين... لاا والله حلو مابيك شي

ضرار... ها يلا ماشي

غيد... اي ماطول سيرين كالت حلو هذا هوه

ندستها بأيدها وخزرتها

سيرين... ها يله نمشي

طلعنى رحت طكيتها ركضه لسيارته صعدت ورى وهوه بس يضحك وغيد تغم بكصتها

اجت فتحت الباب وسحبتني من ايدي

غيد... شكو طكيتيها ركضه امشي صعدي يم رجلج

سيرين... اسكتي خاف اجفص بكلمه ونوب نروح نسوي حادث

ضرار... شوكت تكملن

غيد... يابه دخذ مرتك وكعدها يمك شكو جايه يمي والله يالله

ضرار... ههههههههااي يله مريتي صعدي

فتحلي الباب وصعدت ، طول الطريق مشغلين اغاني وهوه وغيد يركصون يطكون اصبع

سيرين... ضرار العالم تباوع علينه عيب

ضرار... والعالم شعليها

سيرين... ضراااار

عاينت لغيد مندمجه وي الاغنيه وتغني ضحكت على سوالفهم ولاجن شكبر الواحد

وصلنى صف السياره بالكراج ودخلنا ، تعجبت عالمكان والناس البيه

سيرين... شكد حلو

غيد... بعدج ماشايفه شي دام ضرار ويانه هسه نخلي يفرنا المول بكبره

سيرين... ههههههه يلا

ضلينى نفتر بالمحلات نباوع ونطلع اخرها رحنى لمحل خاص بملابس البنات انطانا ضرار كلوحده فلوس بيدها

وكف باب المحل ينتظرنا عاينت عالفلوس بيدي من التوتر ماعرفت احسبهن اخذت ورقتين وضميتهن

سيرين... دخيلك ربي سامحني بس محتاجتهن

ضميتهن بدون محد ينتبه والتهيت اختار بالملابس اني وغيد

اخذت دشاديش وتراكات وغيد اختارتلي برمودات بس يخبلن

حاسبناهم وطلعنى راحت غيد يم ضرار همستله وهز راسه

مشى قبلنا واحنى وراه وكفنا كدام محل خاص بس بملابس النساء

سيرين... بس لاكتيله نريد نشتري

غيد... واذا قابل بس احنى نشتري هيج ملابس

سيرين... يربي شكد عيب

هزت ايدها ومشت.... امشي امشي خل نشتري اليكول بس احنى نلبس داخليات

سيرين بهمس... اسكتي لاحد يسمعنا

غيد... موبطيتيني بط امشي ولجج

دخلنا للمحل اشكال والوان وكلهن مشخلات رحت اعاين عليهن وغيد تختارلي وين المكشوف

سيرين... اكلج وهذن شلون يلبسن

غيد... تلبسيهن شنو شلون يلبسن

سيرين... وليش هذن شيضمن حتى البيهن اشو طالع الحاضر والغايب

غيد... باع هاي ترا هذن لاشي بس اعرفج فاهيه جبتج لهذن اسكتي خليني اعرف اختارلج

سيرين... لااتخارين ولاشي لواموت مالبسهن

غيد... اي نشوف مني الماتلبسهن

راحت حجت وي العامله الموجوده وضلن يختارن بكيفهن واني من المستحه اريد اطم نفسي نوب تعاين عليه وتأشر واني بالجذب اوزع ابتسامات

خلصنا ورحنى نحاسبهم تعجبت عالاسعار شكد غاليات

غيد... زينه اسعارهن

سيرين... مالبسهن اني ليش جبتيهن

غيد... كتلج انشوف مني الماتلبسهن

طلعنى لكينى ضرار ينتظرنا وهوه مطول خلك ويانه بحيث نطب من محل لمحل فرينا المول بطوله لاحجى ولااعترض

غيد... يابه ماتعبت

ضرار... طلع النسوان تشلع الكلب بس خوما تمشن بدون ماتخلصن التحتاجنه

غيد... فدوه لكلبك باقي كم شغله ونخلص

ضرار... هديتن حيلي بويه يله امشن

همه يمشون كدامي واني وراهم والله لواطكها ركضه واهرب منه اروح للأمن اشتكي عليه اكلهم خاطفني

خررب لاصيرين ثوله شلون خاطفني وهوه زوجي

وحتى لوهربت يكضني ويسحلني بالمول روحه ورجعه

رحنى لمحل بس مكياجات عاينت عالافته (كوزمتك)

شكد جنت اتمنى اطلع هيج طلعات من اكل لابوي يكلي تدللين اخذج وافرج بغداد فر وهسه جاي وي منو ضرار هففف واني شنو الجاي اسوي

دخلنى واني ماخذني الواهس اشتري وارجع ليورى اشتريت مكياج كوله بوكسات وعلب خاصه الهن

وغيد تحضرلي بحدها وتشتري لنفسها ، اسمعها تكل للعامله اريدج تحضريلي شغلات خاصه للعرائس وتاشر عليه

هزيت ايدي وعاينتلها عشتوو حاسبتني عروس

خزرتني وراحت وي العامله واني اخذ اليعجبني
شوي واجت جايبه الاغراض بيدها محمله

سيرين... شنو هذن

غيد... الج يحظي باع هذا العطر مال اثاره

سيرين... شيسوي هذا عود

غيد... من تخلينه الرجال يضل يناطح وراج مثل الثور
شيسوي يعني ثول

سيرين... هيهي واني اروح اخلي لضرار مال اثاره

غيد... لعد المن تخلي

سيرين... وخري احسلج ومنين ندفع ميكفن

غيد... مالج شغل ضرار موجود ويدفع يله فضيها اتأخرنا

سيرين... اي خلصت

مشت كدامي وكفت

غيد... عزااا نسيت عطر الحوريه

سيرين... ومال اثاره المن جبتي

غيد... ولي هذا غير وهذاك غير اوكفي خل اجيبه

راحت شوي ورجعت بيدها عطر يشبه الحوريه

غيد... يله امشي

سيرين... حاسبناهم وطلعنى اول مارجعنى لكينى الحجيه مشغله قران بالشقه وريحه البخور تخبل

ضرار وصلنى ومشى رحت اني وغيد رتبنى الاغراض الجبتهن الكنتور صار بس الي

وضرار خليت ملابسه بخانتين كافيه عليه دحستهن دحس والمكياج رتبته عالميز صار يخبل

صح شغلات بسيطه بس فرحانه بيهن

خلصت وكمت جبت مبايل الحجيه حتى احجي وي اهلي

دكيت على رقمه اول مانفتح اجاني صوته

بدر... هلا برويحتي

سيرين... مشتاقتلك

بدر... وجج ميت عليج

سيرين... تنهدت وحجيت،حهرب من عنده

يـــتـــــــبــــــــع....

_ تكول سيرين لـ بدر ... ♥️🕊️,

لماذا طريقنا طويل مليء بالأشواك؟ لماذا بين يدي ويديك سرب من الأسلاك؟ لماذا حين أكون أنا هنا تكون أنت هناك؟

لا أشتاق إليك لكن أشتاق للشخص الذي ظنّنتك هو.

صورتك محفورة بين جفوني وهي نور عيوني . . عيناك تنادي لعيناي . . يداك تحتضن يداي . . همساتك تُطرب أُذناي.

اذا لم تجمعنا الأيام جمعتنا الذكريات 🤎🕊️,

_ فقره اسئله لمتابعين ثارهم وبنت الفقير ❤️‍🔥🫂...

_/ برأيكم تصرفات سيرين صح ؟

_/ تشوفون منو المناسب لسيرين بـدر او ضـرار ؟

_/ منو حبيتو اكثر بــدر او ضـرار ؟