رواية ذات العيون الناعسة الفصل الثلاثون 30 - بقلم روان آل عبدالله

وأغار أن يغرم أحد
بعينيك ولا يعلم أنهـا لي .

الكاتبه :روان عبدالله

قبل لا تبدون دوسوو على النجمة + متابعة لحسابي
---------------------------------------------

ابو حسان. يم خالاتها مو هين

شاهين. اكولل بطل كلاوات العيد و جيبها خلي اشوفها ما طول هادي ولعباس ابو فاضل ادخل للبيت و شيصير خله يصير

ابو حسان. فوتت شوفها اذا موجوده لو لا جاي اكولك يم خالاتها

شاهين. شعبالك اني غبي لو شنو انت و اخواتك ما تتحاجون عبالك اني اثولل لو تا تقشمرني بكم كلمه

ابو حسان. روح من هين مريم مو عدنا طردناها

تعصبت حيل و فأر دمي واني اسمعهه يكول هيج

غوشت الدنيه بعيني صحت من كل گلبي

شاهين. عجلل و الفلوسسس كللل شهررر ادزهننن ويننن راحت احجي بسرعهههه

ابو حسان. ما اسولف كل شي

ما نطيت مجال كبل كمشتو (مسكته) من ياخته و ركعت راسه بل باب وكع بل كاع و كمت ادفر بي

شاهين. ابنن ال*** وين وديتهاااا وينهااااا

ابو حسان. ما اكولك ما اندلها وين

طلع البيت على صياحنه اجو الولد و بعدوني منه

شاهين. ولعباس محد يفكك مني زولووو وين وديتوهااا احجوو

حماده. احجي الك كل شي بس عوف ابوي

بتعدت عن هذا المخنث واني اشوفه بل كاع منتهي و وجهه كله دم تفلت عليه و نداريت على هذا الزعطوط ابو الديج لكيته و أكف بطارف الحديقه و يصيح

زولت شعري من عيوني و أشرت باصبعي السبابه عليه بمعنى تعال

اجه و هوا يلعثم بل حجي كمشتو من رقبته و رفعتو من الكاع كام يدافر (يتحرك) شلون السمجه

حجيت واني كوه لازم اعصابي ما اطلع مسدسي و اضرب كل واحد طلقه بس ما اريد الوث ايدي بدم النگسين

شاهين. احجي كل شي

كام يحجي و يبجي يريد اعوفه

حماده. ابوي زوجها لصاحبي من سافرت على إيران

تركت ايدي من رقبتو و كبل وكع بل كاع و كام يرافس ضربته برجلي كبل اغمه علي

شاهين. عفيه زلم اي والله

تجهت لابوه دنكرت لمستواه و جريته طلعت المسدس و خليته براسه همست بفحيح

شاهين. جدامك ثلاث ثواني فقط تختار الحياه لو الموت

ابو حسان. ال... الحياه...

شاهين. عفيه عليك اختيارك جان خاطئ على الاقل لو مختار الموت جان متت شهيد و على ايد منو ايد واحد شريف.. و هسه يل شايب بدال اختاري الحياه فا يا عزيزي الحياه متاعب و مطبات و اني راح اكون كل هذني... راح اسئلك سؤال إذا جاوبت علي خطأ لو ما قبلت تجاوب فا يؤسفني اكول الك تغمض تفتح تلكه واحد واكف فوك راسك يكول الك ماهو ربك ماهو دينك عاد انت شلون متدين، الشرف و العفه يچطن (يطفرن) على الجيران من كثرهن حقهن ما يكفي بيتك

ابو حسان. أي والله اجاوب على كل الي تريده بس عوفي

شاهين. عفيه عليك من البدايه اختصر الكلام و كول هيج تعرفني ما احب اللغوه الزايده... السؤال مريم وين

ابو حسان. يم واحد اسمه عباس *** بحي ***

شاهين. يمته زوجتها

ابو حسان. وره ما سافرت بأسبوع

شاهين. تفف.. هاي التفله تفلتها بوجهك لانك ما عندك غيره فا تستحقها و بشده بس المره الاخر اذا شفتك بعد راح اتفلها بغير مكان

عفته و طلعت واني عصابي منهاره شلون تزوجت شصاير بيها هسه يجوز حامل يجوز نستني و عاشت ويه ذاك

كعده بل سياره دحجت على ايديه يرجفن بشكل مو طبيعي اخذت المي و غسلت خليت راسي على الستيرن اقوي نفسي للمعركه الثانيه اليوم اخذ سمسمه يعني أخذها ما اعرف لا زوج ولا خال من يصير الموضوع يمها كلشي يختلف و الحسابات تتغير

شلت راسي و اني احس خشمي ينزل منه دم عرفت ارتفع عندي الضغط كوه مكابر و واكف على حيلي

سحبت كلنس و خليته على خشمي و نطلقت

ضليت اسئل على الحي اله ما لكيته كمت اسئل اهل المنطقه على اسمه دلوني على البيت

نزلت من السياره و توجهت للباب ضليت ادك بي محد فتح ولا اجاني صوت بقيت مستمر ادك بي

سمعت اجاني صوت من وراي انداريت و جان اشوف شايب كاعد على طابوكه و ضهره محدوب و سنونه واكعه شايل بايده تمر و يمص بيها ما يكدر يأكلها بعز ضيمي و ضحكت على شكله

فركت وجهي بأيدي الي كلها دم، و ستغفرت من يمته اني اتنمر ربي شهل بلوه

شاهين. ها حجي تأمرني بشي

_ يي شتسوي هين

شاهين. والله حجي ادور على صاحب البيت اسمه عباس

_ يوووو

شاهين. ههه شبيك

_ هذا عباس اجت شرطه سحلته من سته أشهر و يكولون انسجن و أمه من يومها محد شافها من ذاك اليوم

غمضت عيني اصبر نفسي حجيت هذني الكلمات و اني ادوس على كلبي

شاهين. يكولون متزوج صح

_ اي مرته كل الحي يسولف بحسنها، بس يكولون شارده ويه واحد يمكن حبيبها يا ستار الله يبعدنه عنهم كلهم ولد حرام محد يخاف الله

شاهين. مشكور حجي

_ تدلل سيدنه بس ليش تسئل

شاهين. والله يا حجي عندي طلابه وياه... طلعت من جيبي فلوس و خليتهم بايده

كبل رحت ما اريد اسمع شي

صعدت بل سياره و خابرت صاحبي

شاهين. حبيبي اكو واحد اسمه عباس *** هوا بل سجون بس ما اعرف اي سجن اريد منك خدمه تدليني على مكان السجن

_ حاظر من عيوني ثواني و اسم السجن يمك

سديت الخط و سقت تايه معرف وين اروح احس روحي ضايعه كمت افتر بشوارع الناصريه عسى و لعل الكه ولو شي بسيط يدليني عليها

حيلي يرجف طبكت على صفحه يمكن اذا بقيت اسوق راح اسوي حادث ما أكدر اسيطر على الرجفه

خليت راسي على الستيرن و همست

شاهين. سمسمه وينج يا بعد معلاكي و راحتي و عذابي و دنيتي يا بعد كلشي حلو بحياتي وين رحتي كله مني عفتج و رحت كله مني انييي

اعرف بيج بريئه وكل هاذني السوالف جذب اعرف بنت روحي شلون مربيه حافظج اكثر من روحي ولج اني اذا ضايجه احس بيج يا بعد حيلي وينج ختفيتي وداعتج من الكيچ اله اتزوجج خلص هاي هيه عبرت حدها ما يهمني كل شي اهم شي يوميه اشوفج كدام عيني و بخير هذا الشي الي جاي اطمح اله حالياً

واني صافن و غارق بنوبه تفكير فزيت على صوت موبايلي يدك رفعته و شفت اسم ابو الأكبر

سديته ما اريد احجي ويه اي شخص رجع مره ثانيه خابر فتحت الخط ناوي ارزله اجاني صوته و هواي يكول

فهد. هااا هم زين رديت ولك دكيت عليك فوك الميت مكالمه كالو مسافر كلت بلجي يرد عندي موضوع وياك كلش ضروري

شاهين. فهد تعبان اجل الموضوع ما بيه حيل احجي فكري مشتت و مشوش

فهد. انتَ رجعت للعراق هسه

شاهين. أي رجعت البارحه

فهد. تعال بسرعه اني بشقتي الي بل ناصريه

شاهين. ما اتحس جاي اكول الك ضايعه روحي عود من الكاها اجي و مسلت شكد ما تريد

فهد. شبيك حبيب سمسمه شسالفه

شاهين. مريم طلعت متزوجه و فوك كل هذا ما اعرف هسه هيه وين

فهد. تعال يمي بل شقه هسه انت شي اكيد بل ناصريه الحل عندي وداعتك

شاهين. ما اعتقد اكو حل صدكني

فهد. كلشي محلول انت بس تعال

شاهين. ما أكدر اسوق خشمي جاي ينزف و ايدي ترجف رجف مو طبيعي

فهد. بس لا تعاركت و طكوك

شاهين. منو يستجري يمد ايده على الصگر

فهد. هيج فراك المحبوب عذاب

شاهين. كلمه عذاب بحقه قليله

فهد. وين انت هسه

شاهين. بشارع **** يم مطعم ***

فهد. جايك

ذبيت الموبايل و رجعت لوضعيتي السابقه طلعت من جيبي القلاده

رفعتها و كبل حيلي باد و نفسي قل واني اتذكر اول ما شفتها بل مخيم جانت تبجي و خايفه و ضايعه و حالتها تكسر الگلب بس ما كسرت گلبي ابد بذاك الوقت اول ما شفتها و عرفت اخوها داعشي ضربتها بدون رحمه و كأن هيه الي دفعت اخوها يدخل بهذا الطريق اتذكر من جريتها و كعت من رقبتها البيضاء قلاده جانت عباره عن سنسله و نازل منها حرف(m)
بل انكليزي اكو شي بداخلي دفعني و خلاني اخذها من الأرض بحركه سريعه و اخليها بجيبي

رفعت راسي و باوعت عليها خليتها على خشمي و ستنشقتها بصوره جنونيه شميت بيها ريحه رقبتها الباعثه منها ريحه فراوله... نجنيت و حسيت روحي محتاجها كلش شلون تزوجت لحد هسه اقنع نفسي خالها يجذب عليه

رجعتها بتردد و رجفه لمحفضتي نزلت و اخذت مي و كعدت اشرب و اباوع على الناس كل ما تمر مرأه من يمي اركز بوجها بلچي هيه بس جانت بعد كل نضره شعور الخيبه يحتلني و يدمر ضلوعي

شفت فهد نزل من تكسي و يلوح بايده و يضحك اني بيا حال و الدفان يغمزلي

كد ما نرفزني ردت اكسر سنونه السود بس تعوذت من الشيطان و هديت نفسي

اجه عليه و حضني و ضل يثرثر تركته و صعدت من چدام رفعت راسي و خليت صفطه كلنس بخشمي اريد يوكف النزيف اذاني حيل

وصلنا لشقه فهد نزلت واني احس الدنيه مغوشه بيه

وكفنا يم الباب صح ابو بكر بصوت عالي

فهد. نسيت المفاتيح

شاهين. تف عله هل جهره ما بيه بعد حيل راح اكع

فهد. لاااا مو صكر الي يهزه الريح

شاهين. خاب ما تنجب ابو النونات

فهد. صارلي فتره كاطع عنهن اكو شخص غير تفكيري و وعاني على هواي أمور بحياتي جنت جاهلها

شاهين. الله اللهم يبارك بيك يا اخي المسلم

فهد. تدلل صوكور

شاهين. وجعع... هسه شلون نضل واكفين

فهد. لا أكف لحظه

كام يدك بل باب ثواني و نفتح

ما شفت منو الي فتحه تقدمت باتجاه الباب و شفت شيهانه واكفه و فاتحه عيونها بصدمه

بدون اي تفكير تقدمت و حضنتها رفعتها لمستواي و حضنتها اكثر هيه بادلتني و كامت تبجي بصوت عالي

زولت عنها ببطئ نزلتها بل كاع رفعت راسها و خليت وجهها بين ايديه

حجيت برجفه و خوف

شاهين. هاا يا بعد عافيتي الي هتو ردت هااا يا بعد راحتي الي ما شفتها من يوم فاركتج هاي يا بعد ناسي و هلي كلهم يرخصون جدام عيونج وداعت هل عيون الحلوات اموت ولا اشوف دموعج كافي يا بعد معلاكي... كافي بجي

تقدمت عليه و كامت تضربني بيديها الصغار و الناعمات على صدري

مريم. ليشش عفتني ليش سافرت بدون ما تكولي عفتني بين وحوش اذوني و ضربوني و ضلموني... شاهين زوجوني لغيرك زوجوني لواحد مريض نفسي طبق عليه جميع انواع التعذيب وانت وينك... وينككك عنييي هاااااا عفتني الهههه خليتهه يعذببب بيهههه ليششش هيججج شنووو ذنبييي ليشش خليتني احبككك و بكلللل بساطهههه تركتنييي و مشيت شنووو ذنبييي ليشش كل ما احب شخص يجازينييي بل خذلان ليششش هيج صگر... ليشش

ترك ايدي و كبل كعد بل كاع خشمه كام ينزف شال ايده الي ترجف و كام يضرب براسه

نهاريت واني اشوفه هيج اول مره اشوفه بهاي الحاله دنكت لمستواه و مسكت ايديه فهد اجه يركض و شاله و خلاه على الكنبه

بقيت واكفه بمكاني و اباوع عليه معرف شلون أتصرف تصنمت احس رجليه ثكلن ما أكدر امشي عليهن

باوع عليه شاهين بنضره معرف شنو تفسيرها و بعدين غمض

وكعت بل كاع و كمت اصيح

مريم. فهددد ماتتتت عاااااا

فهد. وجعع ان شاء الله شنوو ماتتت اغمه علي بس لا تخافين عادي هسه يكعد... روحي جيبي الي كلنس مبلل و مي

مريم. فهد ما أكدر رجليه ما يشيلني

فهد. ربي شهل مصيبه الربع عاشق و يتبطح و فهد يبتلي سأخبر الله بكل شيء

راح واني كعدت أحاول اكوم و ارجع اكعد وابجي من كل كلبي واني اشوف شاهين بهاي الحاله جان منهار و شكله نكلب اصفر و عيونه دخلن لجوه شكله مرعب و خشمه صار ينزف هواي

شجعت نفسي و كمت كعدت يمه مسكت ايده و كمت امسح على وجهه

حجيت برجفه و ندم

مريم. صكري حبيبي اسفه والله مجان قصدي هيج اسوي بيك ما اعرف هيج راح يصير والله من حركت گلبي عاتبتك بس اكعد والله معد افتح الموضوع ابد

اجه فهد اخذت منه الكلنس و كعدت امسح بوجهه النزيف توقف بس كل شوي تنزل نقطه دم

بقيت كاعد يمه واني اشهك وابحي و فهد يضحك عليه

فهد. عجل لو تصيرين بل جيش غير يثخن گلبج وداعتج هناك تشوفين الشخص يموت چدام عينچ ما تهتمين و تروحين تكملن حرب ولا كان شخص يصارع الموت چدامج تعودت اني هاي الحالات صارت عندي زلاطه

مريم. فهد بس هذا مو اي واحد

فهد. ادري يا عيني حتى اني مثلج متفاجئ حيلل اول مره اشوف صكر بهيج حاله گضينه عمرنه سوا و حاربنه سوا انضل ايام ما ناكل ولا مره صار بي هيج... عجل شكد يحبچ هنيالج سمسمه نصيحه حافظي عليه

حجيت بتوتر و رجفه.

مريم. اعرف فهد كله بسببي اني الي وصلته لهيج حاله اني الي خليته ينزف دم كله صوجي لو ساكته

فهد. كافي بجي وداعتج ما يفيد و شاهين اني اعرفه من حركه كلبه عليج هيج صار بي انتِ ما تعرفين ضروفه او الي مره بي فا عاذرج لان كل توقعج انو هوا راح و تركج، هوا متوقع رد فعلج بس ما تحمل عتابج و بجيي و موضوع زواجج اثر عليه حيل واني اشهد من رحت تا اجيبه شفته منتهي

مريم. فهد ضايعه كلش احس كلشي بل دنيه ضدي كل ما اكول حياتي صارت زينه و الدنيه ضحكتلي تنكلب موازيني و ترجع حياتي اسوء من قبل بحياتي ما اذيت شخص بحياتي ما رفعت صوتي على احد بحياتي ما تركت صلاتي ولا قصرت بشي اتجاه اهلي ليش اني من دون البنات صار بيه هيج ليش اني الوحيده الي دمرت و ماتت عائلتي و شفت انواع الضلم و التعذيب...

فهد. الله سبحانه وتعالى اذا احب شخصاً من عباده يبتليه بمصيبه ليختبر مدا تحمله مدا قوته و ارادته مدا صبره ليكتشف معدنه الحقيقي هل هوا راح يخرج عن عباده الله بعد ما ابتلاه من المصيبه.. اكو ناس تصلي و تصوت و تعبد الله على أتم وجه بس من تصير الهم مصيبه يتركون دينهم و يكومون يكفرون و الخ.. برئيج ليش

مريم. معرف

فهد. لان يكولون احنى مطيعين إلى الله و نصلي كل الفروض و نطبق دينه و بل تالي تصير براسنه مصيبه او يموت احد منه لعد صلاتنه وين راحت لعد صومنه و ينه ليش الله ما شفع النه... و بهاي الحاله يكومون يخرجون عن الطريق و يجذبون دين محمد ولو حتى ما يجذبون جدام الناس بس بداخلهم مقتنعين انو الله سبحانه وتعالى ماكو كاذب استغفر الله بس

مريم. بس مو الكل هيج

فهد. شي اكيد مو الكل و اني دا اسولف الج بشكل لا على التعيين دا احجيلج على الأشخاص الي جاي اشوفهم بحياتي..

مريم. زين هذول الأشخاص مو تكول جانو يعبدون الله فا الي يعبد الله يصير بينه و بين الله سبحانه وتعالى ترابط روحي حب عظيم عجب هاي الفئه من الناس ما صار ترابط روحي

فهد. تدرين ليش... لان هذول الأشخاص يعبدون الله لغرض مصلحه تلكين يريد شي من الله ان جان مال أو أي شي يكطع نفسه و يموت نفس من عباده فقط لأن عنده مصلحه، او النوعيه الثانيه يصلي و يصوم فقط لأن الناس المحيطه بي تا ما تحجي عليه يصلي بس تا امه ترضه علي فا من يصير اله شي بسيط كبل يتخذه حجه و يترك دينه و يصير من الكارهي اله و بعضهم لدرجه الشرك يصيرون ملحدين يجذبون بوجود الله

مريم. الحمد لله على نعمه العقل.. اني ما مصادفة هيج ناس بحياتي

فهد. شكد ما تختلطين ويه العالم الخارجي راح تشوفين أشكال و الوان

تا احجي بس فزيت على تفله اجت بكصه فهد طفر فهد واني طفرت وياها

اباوع على شاهين يمسح بحلكه و يفشر على فهد

شاهين. دنعل**** يا ابن **** ابو النونات ما تكول هذا الجحش (حمار) نايم مريض داكين فوك راسي فچ ليششش

من شفت هيج يحجي متت ضحك فهد ما حجه شي كبل دخل الحمام يريد يغسل

بقيت واكفه و ميته ضحك على شكل فهد

شاهين من شافني هيج ابتسم و اشرلي اجي يمه

اجيت كعدت يمه واني كوه كاتمه ضحكتي
مسحت على وجهه و همست

مريم. شلون حبيبي شلون صرت

شاهين. اشو عيديها انوب (بعد)

مريم. شعيد

شاهين. عيدي الجمله

بتسمت و قربت منه و همست يم اذنه

مريم. حبيبي يا عمري و روحي انتَ شلون صرت

شاهين. من شفتج ردت الي روحي و عافيتي و سعادتي ردت اللوان لحياتي المعتمه و الضلمه

خجلت و دنكت و كمت امسح على شواربه همست

مريم. وين جنت طول هاي الفتره

شاهين. رحت على إيران

مريم. ليشش شنو السبب الي خلاك تعوفني و خلاك تسافر بدون ما تكولي او حتى تودعني

شاهين......

---------------------------------------------
اذا عجبكم البارت دوسو على النجمة لطفاً

سؤال: تتوقعون شاهين يحجي لمريم سبب روحته إلى إيران لو لا

اليوم نشرت البارت من وكت متعجبه من نفسي كلش بس طريت انشره بهيج وقت لان بل ليل عندي طلعه ويه صديقاتي + دخلو على حسابي و شوفوه سويت تغييرات بسيطه بل بايو و الصوره نطوني رئيكم roroabd16

احبكم متابعيني العنونين 🧡👑