تحميل رواية «ظلال أمراة» PDF

#ظلال امرأة

همس ليل

البارت الحادي عشر

بقيت ارتب بالبيت اسبوع ...بوقتها جانت عطلة مال نهاية السنة وصيف ....وعمتي جانت فرحانة برجعت الجهال لحظنها....

الي افتهمته البيت باعوا بمبلغ زين..وزينة ومها ومصطفى قبل مايسافر اتنازلوا عن حصتهم بالبيت حتى يسدون الدين واتفقوا الي يبقى يشترون بيت لاولاد حسن...عمتي جانت تحجي ودموعنا تصب سوة جان تكول حنية حسن على اخواته واخوته ماضاعت

اوووف ياحسن شكد حنين يابعد عمري ....

جنت انظف وارتب بالبيت واني فرحانة ....راح ابدي حياة بعيد عن تحكمهم...من نولدت لحد هاي اللحظة الكل تتحكم بية من باب اني مرة...هسة راح ابني حياتي وحياة جهالي بدون تدخل احد....

_عمة من رخصتج...ابو حسين ماكو داعي يسوك لنا بعد...اني عندي راتبي وامشي اموري بيه

_يمة راتبج شيكفي...انتو متعلمين على صرف بحياة رجلج الله يرحمه

_الله يرحمه...لا عمة الوضع تغيير ...وتعلمت امشي اموري على كد راتبي...واحنة ايجار ماعدنا .

_ميخالف خلي شي جوة ايدج ...واحد مايعرف الظروف

_صح ...بس فلوس ماتبقة من بيع الاثاث ابو حسين دزهن ...صح مو مبلغ جبير..بس خليته للزمن..وهم ذهبي موجود...علي عنده جهال وهو تحمل الصغيرة والجبيرة خطية كافي

_براحتج ...ادري بيج عزيزة نفس انتي

عمتي كالت اعلي وضاج من الحجي بس ما حجى وياي ...اصلا غير السلام والسؤال عن الجهال واذا محتاجين شي ...ماكو بينا حجي....يجنب يحجي وياي احسه ...واني هم نوعا ما اخاف منه...يفشل ورده حاد

عمتي ماقصرت جان تقاعدها متحسن ..كل ماتستلم تنطي الجزء الاكبر للبيت وتبقي جزء علمود علاجها..

طبعا عدي كلما يجيب امي..يظل يزن على جية علي وشلون يدخل البيت...رغم الرجل مايبقى فترة طويلة ...

علاقتي بزينة حماتي تحسنت وصارت تتواصل اكثر ويانة وحتى مصطفى دائما يخابر ...

كمل سنتين على وفاة حسن...منها فترة العدة واكثر شوي تقريبا ٥ اشهر يم عيالي وسنة وشهرين يم اهلي...وهاي صارلي ٥ اشهر من كعدت بالمشتمل.

ورجعت لدوامي ...وهم علي كدر يحصلي نقل لمكان قريب قبل ما اكمل الفترة المحددة...جنت اسوي غدة من الليل وانظف واكمل اموري..والجهال يبقون يم عمتي..حتى ينامون يمها بالليل...حتى ماكعدهم الصبح وانزلهم...عمر حسام وهمام صار ٣ سنوات الا شهرين ...حياتي ماشية روتين من المدرسة للبيت وبالعكس وطلعتي الوحيدة للسوك ...

مها حماتي تاخرت بالحمل...هسة يلا صار عدها...ومن صارت على وشك الولادة رادت امها يمها

عمتي ظلت حايرة واني ماقبلت تظل ملزمة بينا

سافرت ...وخلال هاي الفترة ...علي جان يجي ياخذ الجهال من الباب ويرجعهم....

عدي اخوي اشتغل زنه ...شلون انتي كاعدة وحدج وهو يجي

_هو الرجال من الباب ياخذ الجهال...حتة ما يطب بالطرمة

_الناس ماتعرف هالشي...تشوف سيارته بالباب

_هو عم الجهال يعرفونه زين

_واذا عمهم...يحل عليج..الناس ماترحم

_خلي امي تجي تبات يمي...والناس ماتبطل حجي على كلشي

_وهمة شمدريهم امج يمج

_لا تحيرني...اني ما اكول للرجال لاتجي على جهال اخوك ماكدر

سكت...بس حسيت ورة سكوته اكو شي...

يوم جنت راجعة من المدرسة ولاكاني علي...وكفلي

اني ظليت محرجة ...بس كلت اعرف الرجال محترم..

وصلني لبيت اهلي حتى اخذ الجهال لان ابقيهم لحد ماترجع عمتي...كال جيبي الجهال باردة وخلي ارجعكم للبيت...وصلنا وراح

لليل اجى عدي كلب الدنيا على راسي...شلون تخليه يوصلج...شتكول العالم

_شنو السالفة عدي ...قابل متواعدة وياه جنت...احسبه تاكسي وصلني

_هي سيارته ما تاكسي...المنطقة كلها تعرفه وتعرفنا..نسيتي صار سنين هنا كاعدين

_اليحجي يطبه مرض...الناس بس تريد سالفة...قابل نحبس نفسنا حتى الناس ماتحجي

_اليمشي عدل محد يحجي عليه

_شنو قصدك ...شبيها تصرفاتي

تلاغينا...طلع وبلش يزن من جديد عن طريق ابوية هالمرة جبت امي يمي وماخلصت من زنه..لحد يوم تفاجات ابوية اجى يكلي اكو عريس جايج

_صدك يابة تحجي...رجلي صار سنتين بس ...شنو زواج واني عندي اثنين اطفال

_بعدج صغيرة وعندج ولد يعني باجر يريدون رجال فوك راسهم يربيهم...

_ليش شنو ماراح اعرف اربيهم الا رجال وياي...هواي نسوان ربن وكبرن وحدهن

_اي بوية بس الزواج ستر لج

ستر...ستر...الكلمة الي عقدتني حتى من الزواج عبالك بدون رجال اني مامستورة

اهلي شدوا علي وكاموا يضغطون ...ومن شافوني بقيت مصرة...كاموا يخيروني لو ازوج لو ارجع يمهم وانطي جهالي لاهلهم...ظليت حايرة ....شكدر اسوي اعصي اهلي وخالفهم ...منو الي والبشر مو خوش ...ماراح.يعوفوني اذا حسوا مالي احد

كتلهم على الاقل انتظروا ترجع عمتي حتى ما تتفاجا..وارتب اموري وياها...

جانت اصعب لحظات واني احس نفسي عاجزة اسوي حل لنفسي...مجتمع ظالم مايرحم ...

رجعت عمتي وسمعت من امي قبل ما احجي اني...

سالتني ...يمة انتي لج رغبة بالزواج

_عمة اني بعد حسن مالي رغبة باي رجال...وبعدين اصلا الزواج مو ضمن رغباتي...مستحيل افكر بيه

سكتت ...بس بوقتها راحت لبيت علي ودت هداياهم ...ومن رجعها علي بالليل...صاحوني

_يمة احنة نريد ولد حسن يربون بحضنا لذلك حتى نخلص من زن اخوج كلنا لازم تزوجين واحد من الولد

_يا ولد

_علي لو مصطفى

_عمة شدحجين ازوج واحد من اخوان حسن

_مو تكولين مالج رغبة بالزواج ...هذا زواج شكلي حتى نسد حلك اخوج والعالم ...جاوبني علي

جان اسلوبه كالعادة مزعج لبعد الحدود

_يمة صار سنيين هالشي ماشي الحما ياخذ مرت اخوه علمود الجهال...مو شي غريب ولا حرام

_مو غريب مو حرام  اني ماتقبله

_ماعندج حل...اهلج يريدون يزوجوج...واحنة نريد ولدنا بحظنا...

_واذا ما قبلت

_براحتج...ناخذ الولد وانتي واهلج تفاصلي

صفنت بوجه ...ليش ضايج مني مااعرف...خلاني كدام خيارين صعبين .

شلون بية ...ليش مايعوفني لحالي واربي جهالي...ليش مابيدي خيار...كله لان اني مرة

...وتستمر الحكاية

#ظلال امرأة

همس ليل

البارت الثاني عشر

بقت المسالة تداور ابالي ...رحت للدوام واني دايخة 

النوب انطرح موضوع زواج الحما من مرت اخوه...جانت اكو مدرسة زوجها يريد يزوج ارملة اخوه...وجاية شايطة وتحجي وتغلط...ظليت صافنة وماحجيت...شسوي ما اقبل اهلي ماراح يعوفوني ...وراح يظلون يضغطون علي...رغم كلشي ماكدر اخالفهم ويصير ظهري للهوى..مجتمع مايرحم المرة الي وحدها...اكو هواي ارامل بالعراق من الثمانيات ولحد الان...بس اكو من تلكة سند من اهلها وماتزوج...والسند مو الا مادي ...لا على الاقل مايحاولون يزوجوها...

عمتي تلكتني...اثناء الغدة

_ادري بيج دايخة ...بس هذا احسن حل...اول وتالي اهلج مايفكون ياخة الا يزوجوج...وصراحة اولاد حسن مستحيل نخليهم يربون عدة غريب

_عمة اني اصلا ما اريد ازوج....اكو بنات اصغر مني وباقيات على جهالهم

_صح يمة بس ذني اهلهن وياهن وعيالهن....هسة احنة وياج...بس مو مال تخالفين اهلج....ولدي شفتيهم خوش ولد وماعدهم لا زايدة ولا ناقصة..وهم تطمنين يصيرون حنان على ولدج

لليل واني افكر بالموضوع وماعرف اوصل قرار...لحد ماخابرني عدي كال مارجعتي خبر على موضوع صديقه ...كتله باجر انطيك خبر

قررت اوافق على مصطفى...هذا برة واكيد ماراح يكدر يجي دائما ...ومن راح يجي فترة قصيرة ماراح يطالب بحقه....وابقى مستقلة بذاتي ...

اما علي اصلا ماطايقني ...وبعدين كبالي دائما ولازم يجي يوم يطالب بحقه الشرعي كزوج بلحظة ضعف ..لان احنة مو عايشين بافلام او قصص والرجل يتعفف عن مرة حلاله ...بالاضافة علي عصبي ويريد يفرض نفسه واني ماكدر اتعامل وياه .

بلغت عمتي بقراري موافقة على مصطفى بدون ما انطي تبرير...

باالليل سمعت صوت علي صاحني...جان وحده بالصالة بدون عمتي..بعد ما سلمت عليه وكعدت

_ام حسام ...راح باجر احجي وية والدج واخوج ونحدد يوم نعقد مهر بالمحكمة وعند الشيخ خلال يومين

_ليش ابو ايهم اجى ..جنت اقصد مصطفى

_لا ما اجى...اني راح اعقد عليج

_ما فتهمت

_هو شنو الي مافهمتي ...اني راح اعقد عليج

جان يحجي على كيفه بس بحدة ...واني محتارة شلون اساله ليش مو مصطفى

_اني اصور بلغت خالتي ...وافقت على ابو ايهم

_شنو الفرق اذا جنتي تريدين زواج صوري...مو هيج طلبج

_صح لذلك وافقت على ابو ايهم...راح يكون بس عقد وهو يبقى برة

_اذا مصورة انه ممكن اطالبج بشي ...فشيلي هالفكرة من بالج تماما ...اما مصطفى ترة مو باله هيج ..جان اباله يرتب وضعه ٦ اشهر هنا و٦ اشهر برة...وطبعا اني مستحيل اخليج ادمريه مثل حسن

_مافتهمت شقصدك بهذا الحجي ...شلون بلة دمرته لحسن

_انتي اعرف..لا تنسين حسن ماجان اخوية وبس جان اقرب صديق

_انتة شداتحجي...يعني هو حسن كالك اني مأذيته لو شنو ...فهمني

_هاي الامور ماريد اناقشها...المرحوم راح لدار حقه ..وبدون حجي زيادة هذا الموجود

_واذا ماقبلت

_الولد يمنا وانتي شوفي طريقج

_شنو تهددني

_اني ما احتاج اهددج ...لان ماعندي مشكلة...انتي عندج مشكلة وية اهلج وداحلها لج...وابقي جهالج بحظنج

جنت اعرف هو على حق لان ممكن اهلي يزوجوني ...وهو ياخذ ولد اخوه

_محاكم موجودة واكدر اشتكي واخذ ولدي

_بالمحاكم الي تكولين عنها اكدر اخذهم اذا ازوجتي ...اذا مو اليوم فاباجر...خليها ابالج

عافني موجرة نار وطلع...بين نار حجيه عن سببي بدمار حسن ونار تهدديه ياخذ ولدي لو نار اهلي الي واكفيلي سجينة خاصر ..

صعدت بغرفتي واني الوب اريد حل ...شسوي

معقولة حسن جان يحجي علي يمه...من هاي يضوج مني مصور اني جنت مأذية اخوه....

زين هالشي يفيدني يخليه بعيد عني...بس اني ما اريده ...وافقت على مصطفى لان بعيد

علي راح يحاول يمشي كلشي على مرامه ...وارجع تحت التحكم...غير زوجته شراح تسوي...معقولة تقبل ...لو هم ادخل مشاكل وياه...اوووف اشكال الافكار تجيني...مانمت واني افكر بحيث الصبح ماكدرت اروح للدوام...خابرت واخذت اجازة...

عمتي من شافتني تعبانة وعيوني وارمة

_يمة ليش كل هذا مو كتلج ماكو فرق بينهم ...علي كبر حسام وهمام على ايده يعني صاروا مثل حسين ابنه...لاتشوفينه عصبي ومايتحاجه بس رجال كد حجايته...وهاي عينج ماعاف ولد اخوه..وحاول المستحيل حتى يامن لهم بيت ويسد دين اخوه

عمتي تحجي واني ساكتة جنت اسوي جاي وهي كاعدة يمي على ميز الطعام ...كملت وشلت كلاص الجاي بيدي..

_عمة بكيفكم...

هو من بداية حياتي محكومة من الاخرين ويوم ردت اغير واحسن منها...كفختي بضربة على راسي ويتمت جهالي...خلص بس علي يحلم يحكمني لو يتقرب يوم مني ....احجي وية نفسي

ماصار بعده روتيني...حاجى ابوي وعدي وافقوا اكيد المهم على كولتهم انستر...بس اشترطوا يسوي كعدة لان الزواج اشهار ...حتى الناس تعرف

رحنا للمحكمة عقدنا ...وعدا الكلمات الي رددناها يم القاضي ماحجينا سوة...حتى اسود مانزعته

ونهاية الاسبوع كالو نسوي كعدة نعزم اقاربنا والجيران...

بس رد فعل ريام جان طي الكتمان واني الفضول كتلني اعرف ....سالت عمتي

_ هو يعرف يصرف وية مرته

_عمة ما اريد اكون سبب خراب بيته

_علي مو صغير...يعرف شلون يتصرف

هذا كل الي  اخذته من جواب..

اني استمريت اداوم بس ما بلغتهم راح ازوج...الجمعة جانت الكعدة ..قبل يوم عمتي كالت انزعي الاسود عيب كدام الناس...اني مانزعته بس اكتفيت بفستان نيلي طويل ...ومكياج خفيف وشعري فتحته حتى تكمل المظاهر ...عقدنا كدام الناس عقد سيد...وبدون اي اغاني او طربكة افراح

علي بقى كاعد يم الزلم لحد ماخلصنا عقد صاحني واخذنا الاولاد وعمتي ورجعنا للبيت...لان الكعدة جانت ابيت اهلي...بمجرد ما وصلنا ..نزل كال محتاحين شي...وراح

اني رجعت نزعت الفستان ولبست اسود...عمتي من شافتني ماقبلت وكالت فال  موزين...كتلها ماعندي الوان حتى اسد.باب النقاش

الايام الي بعدها شفت علي يوميا يجي وكت الغدة والعشى يمنا ويبقى يلعب وية الجهال ....

هالشي قلقني وخلاني بتساؤل ليش...لحد يوم جنت راجعة من الدوام وعندي مفتاح طبعا...دخلت الظاهر ما سمعوا صوت الباب سمعت علي يحجي بعصبية

_ماتقبل ترجع شسويلها ...خلي اهلها يفيدوها

_لا يمة حاول مرة ثانية ...ام جهالك...هسة اخابر خالك واتفاهم وياه

من فتت وسلمت سكتوا...عرفت ان ريام زعلانة من يوم العقد يم اهلها

مشت الايام من المدرسة للبيت..اجهز غدة ونتغدى سوى يبقى يلعب وية الجهال واصعد انام ...من يريد يطلع يدكلي بالموبايل انزل على الجهال..هاي في حالة عمتي نايمة...ويرجع بالليل يتعشى ويطلع...ملابسه جان يجيبها ينطيها لعمتي...بس اني جنت اغسلها واضربها اوتي...

مرة جنة كاعدين نتعشى ظل حسام يتحرك ويخبث جان اوكح من اخوه..وفجاة جر حجابي من راسي...اني بدون وعي التفت ضربته راشدي هو جفل وطك بجي...ماحسيت الا علي الزم يدي بقوة

_هذا طفل مو مال هيج تضربيه لسبب تافه ..ماجره كدام احد غريب...اياج اضربين احد بيهم هيج مرة ثانية...جان يحجي وهو يضغط على ايدي ...بس مو كدام حسام لان خالتي اخذته وراحت...هد ايدي وكام من مر من يمي جر الحجاب كله من على راسي وطلع

اني بقيت جامدة بمكاني ...وتستمر الحكاية

#ظلال امرأة

همس ليل

البارت الثالث عشر

بعد موقف الحجاب بديت اجنب ابقى وية علي فد مكان بس على كد الغدة والعشى ...وطبعا بعد مالبست الحجاب كدامه ...لان عمتي نصحتني كالت اذا ماتريدين ينزعه عن راسج لا تلبسيه...بس دائما شعري ظافرته طول ورجع لونه الاسود الطبيعي ...

مرت ٦ اشهر على زواجنا وطبعا ريام رجعت لبيتها ...بعد ما قنعوها ان زواجنا فقط صوري

علي هم جان يجنب يكعد وياي على حدى دائما بحظور عمتي...

وطبعا برجعة ريام رجع يتغدة ويتعشى ابيته وقلت جياته على كد مايكعد وية عمتي والجهال...ومرات ياخذهم وياه لان كبروا وصار عمرهم اربع سنوات

بس مادام عنده المفتاح لازم تصادف مواقف ...قبل العقد جان يدك الجرس وينتظر احنة نفتح...يعني الحك ابدل ملابسي وحجابي....

بس هسة يدخل فجأة رغم يكح او يطلع صوت...جان هالشي.يضايقني لان لازم ابقى ملتزمة بدشداشة طولية وردن ...والجو جان صيف واني كاعدة اجازة

بعدين كمت اعرف وقت جياته ...فاخذت راحتي ...بس بقيت البس اسود ....

مرة جنت امسح ولابسة دشداشة قصيرة ونص ردن ومدنكة وية مارفعت راسي داشمر ظفيرتي لورة ورفعت ايدي امسح كصتي بنفس الوقت التفتت ...شفت علي صافن علية...صرت بنص هدومي ماعرف شسوي....والمشكلة جان حجايته

_ماسمعتي صوت الباب من طبكته

ماكدرت اجاوب ...بس راسا صعدت لغرفتي وبعد مانزلت الا من طلع...

يوم رحت اجيب الراتب من طلعت من المدرسة امشي مسافة مو قليلة للبيت بس ماكو كيات تمر ...

سمعت هورن دكلي بس عادي كملت...كلت اكيد واحد يتحارش لحد ما طبكت يمي السيارة واحد صاحلي ام حسام التفت شفته علي...ركبت وياه ديوصلني

_شعجب اليوم مداومة ....مو عطلة

_اليوم الراتب...واحنة هم لنا يوم بالاسبوع نسجل حظور

_بعد اليوم الي اداومين كوليلي اوصلج...هسة صيف ماكو دوام مدارس الظهر يكون فارغ الشارع

التفت عليه ...جان يحجي ويباوع كدامه ابد مايباوع علي حتى لو بالبيت وصلني ومشى

مشتملنا جان بناء حديث ...بي حمامين واحد فوك واحد جوة....اني استخدم الفوك ..لان اطلع بالبرنص وصح ماكو بس عمتي..بس اخذ احتياط خاف علي يجي فجاة او رجل زينة لان مرات يجيبها وينزل يسلم ويطلع....مرة عمتي راحت لبيت زينة ...والله نيمت الجهال ...وجنت منظفة وتعبانة ...دخلت بالحمام الجوة خاف يكعدون الجهال وما اسمعهم....

طلعت بالبرنص  ودانشف شعري رفعت راسي واشوف علي طالع من غرفة عمتي...اسرطنت بمكاني

هو هم ظل يباوع علي وساكت وشفت نظرة عينه نزلت جوة اتبعتها لفتحة صدر البرنص جانت مفتوحة راسا لميته وسديته...هو انتبه

_كم مرة كلت لج نتبهي...لاحد يكون موجود

_ماعرف انت موجود..

_يعني ماسمعتي صوت الباب من طبيته

_جنت بالحمام مثل ماتشوف..وعمتي ماموجودة ..جان تكدر ادك الجرس

هز ايده وطلع ...واني لعنت حظي الي يخليني بهيج مواقف وياه ....بعدين عرفت عمتي مرتفع ضغطها وزينة مخابرته بحكم مايكدرون يدزون رجلهة لان وحدي ...

طبعا بعد هاي الحادثة اذا اسمع صوته اصعد ركض فوك...مر تلاثة او اربع ايام جنت اسوي عشى بالمطبخ واجى هو...طب سلم وراح يم عمتي ..سمعت الولد اتلكوه بس مو مثل كل مرة تجاوب وياهم ...رحت اصيحهم على العشى لكيته متمدد على الجرباية وخال ايده على عيونه...عمتي سحبت الجهال خارج الغرفة

_خيره ابو حسين

_يمة يشكي من راسه وبلاعيمه ملتهبة ...

_بس صيف شلون تلتهب

_هو عنده مزمنة ...وماشلناها من هو صغير...النوب هاي مرته يومية مسويتله مشكلة وزعلانة

_خيرها ...

_يمة نسوان ماتحمد الله وتشكره...وسكتت

اني هم سكتت لان مستني الحجاية...

تعشوا الجهال وعمتي وانطيتها دواها

_عمة وابو حسين مايتعشى

_مايكدر يبلع هسة اسويله شوربة

_لا عمة هسة اني اسويله...اخذت الجهال وراحت واني بقيت اسويله...

من خلصت ...وديته له لغرفة عمتي لكيتها ماخذة الجهال وصاعدة فوك تنام...

_ابو حسين...رفع ايده عن عيونه واباوع علي...اكعد اشرب شوية شوربة

_ما اريد

_اجبر نفسك حتى تفك بلاعيمك وهم تكدر تاخذ علاجك

_كتلج ما اشتهي...جاوبني بنترة

خليت الصينية على الكوميدي الي يم الجرباية

_براحتك...عفته وطلعت للمطبخ...هسة شعلية شايلة همه اذا اكل واذا لا ...بقيت انظف المطبخ واني مقهورة من حجايته...حسيت واحد دخل المطبخ.

_عاشت ايدج ...خوش شوربة...اني ابتسمت بس جان ظهري عليه

_بالعافية ...رحت للصيدلية اخذت كبسول اموكسيل وبرستول وكلاص مي وانطيته...هاي اخذهن تشوف فرق...هوباوع على ايدي المفتوحة وبيها كبسول ورد رفع نظره لوجهي ...بعدين اخذهن وشربهن وطلع

بدون حتة كلمة شكرا...شكد شايف نفسك...كلتها وية نفسي...

خلصت تنظيف ردت اصعد بس اذكرته ...

سويتله كلاص حليب دافي ودكيت باب غرف عمتي...

سمعت صوته مال واحد مغبط ...دخلت

_هذا شوية حليب دافي اشربه بلكت تفتح بلاعيمك

اخذه بدون مايحجي ...بس حسيته حيل متأذي من تاخذ الكلاص منه طخيت ايده..جانت تجوي

عفته وطلعت...وصعدت لغرفتي ردت انام ماكدرت يعني هم ممكن الرجال يسخن مثل الصغير

لعد ليش مو بشر...اسال واجاوب نفسي...بقيت قلقة ماعرف ليش...اخر شي كمت بدلت دشداشتي لان انام بوحدة خفيفة ونزلت اشوفه دكيت الباب ماجاوب...فتحته ودخلت جان تنفسه سريع خليت ايدي على كصته..جانت تجوي

ظليت حايرة شسويله ...ماعرف اتعامل وية جبير...بس كلت هية الحرارة وحدة اكيد تفيد الكمادات...جبت خاولي ومي واول ماخليته على كصته جفل وفتح عيونه ...جانن حمر دم...بس رجع غمض...بقيت اسويلك كمادات وغطيته وطفيت السبلت بقيته على البنكة...بس اني متت حر ...فترة بدة يعرك حيل...وبعد مادري..حسيت واحد يصيحني اريج اريج

.....وتستمر الحكاية

#ظلال امرأة

همس ليل

البارت الرابع عشر

جنت احلم بحسن ...صار ٣ سنوات من توفى مرة اجاني وهاي المرة الثانية ...دائما اسأل وية نفسي ليش مايزورني بالحلم...وزاد هذا الهوس عندي بعد حجي علي من كال انتي دمرتي حسن....

شفت حسن يباوع علية  حاجيته

_حسن ليش ماتجيني ...هو بس يباوع...صدك زعلان مني ...هم ماجاوبني..مشى يريد يطلع ...المكان جان غرفتنا القديمة....حسن اوكف ...بعدها صفحتك توجعك..التف علي وابتسم وعافني وراح...سمعت صوت حسن...اريج...اريج ...فتحت عيني...هاحسن رجعت... ورجعت غمضتهن...بس نبرة الصوت تغيرت ...ام حسام

فزيت ...بالليل جنت كاعدة على كرسي وهسة على نفس كعدتي بس خالة راسي على حافة الفراش ونايمة على ايدي رفعت راسي علي يباوع علية بس جان بنظرته نوع من الغضب ...كمت اميز نظراته ونبرة صوته

_ليش نايمة هنا هيج

_جنت مسخن بالليل انتة ...ماحسيت

_لا ...جنت نايم اصلا...

_يلا ان شاء الله احسن...جاوبت بأرتباك ومنحرجة...كمت شلت المي والخاولي وطلعت ...باوعت الساعة ب٥ ونص...اعرف هو لازم يطلع للشغل بالسبعة بس كلت والله ولا اسويله ريوك

صعدت لغرفتي نمت...باقي اليوم هو ماجى على الغدة  ريام بقت اسبوعين زعلانة وهو خلال هالاسبوعين كضاه بين الشغل وبينا بس يبات ابيته...من يجي ماكو اي حديث متبادل بس احسه يراقب حركاتي من نكعد بالمطبخ نتغدى او نتعشى...والبيت اصغير يعني تحت الانظار اصير ...

عمتي تحجي على زوجته...تكول هية تدفعه بعيد عنها بتصرفاتها ...ذكرت موقفي وية حسن نفس الشي بس الاسلوب يختلف

يوم اندك الباب ...طلعت عمتي لكت اثنين من صديقاتي المدرسات جايات ..كالوا ظل بالنا انتي صار مدة ماتجين تسجلين حظور...وظلينا نسولف واخذنة الوكت حجن وية عمتي وطلعن ....

بعدها بكم يوم وحدة منهن جابت امها واجت كالت اريد اخطب لاخوية ..هو ارمل وعنده بنية وحدة وبعده عمره ٣٢ سنة...طبعا حجت كدام عمتي ...

عمتي تفاجات وظلت تباوع علية واني هم استحيت حيل شراح ابرر ....

جاوبتهن ما افكر بالزواج اريد اربي اولادي.... وام الولد ظلت تنصح على انه بعدج صغيرة والحياة تستمر ...والتفت على عمتي مايصير توكفون بقسمتها خطية

عمتي ظلت ساكتة بس حسيته حيل ضاجت ..

طلعن النسوان  واني رجعت اريد افسر لعمتي...بس هية نفس طبع حسن...ابد ماغثتني بحجاية وماتعصبت ...بس يوم الي انطلقت بالحجي ماقصرت

_ليش عمة ليش...اكو وحدة تستعر من رجلها

_لا عمة شنو هالحجي

_راح يصير لج سنة  مزوجة وماكايلة...مانزعتي الاسود كلنا ميخالف تاخذ وقت ...بس مال اضمين زواجج هاي مامقبولة منج ابد

_عمة احنة كلنا زواج صوري..ماخلتني اكمل

_ زواج صوري لو غيره...كان لازم تحجين..شنو مامالي عينج رجلج اضمين زواجج لو شنو الفلم...ترة اتحملت هواي واني ساكتة

مرمرتي عيشة حسن وماجنت احجي اكول ابني يحبها ما اريد اسوي مشكلة بينهم ونصحتج وماخذتي بالحجي لحد ما راح وليدي بحسرته...

كلت بلكت اتعضت ...وخلي تربي ولدها جوة جناح اخوه...

_ماردتها تكمل الكلام جرحتني حيل وماريد اسمع الباقي وهية جانت حيل عصبية .

عفتها وصعدت...بس الدموع تصب...كعدت على الجرباية ...ولميت رجلي صدري وخليت راسي عليهن

معقولة كلها تشوف اني جنت ماذية حسن...ليش ..مقصرة اي بس مو لدرجة الاذية ...

يمكن من كد مابجيت غفيت على وضعي فزيت على صوت فتحة الباب التفت شفت علي واكف وعيونه تجدح شرار...طفرت من مكاني واكفة وماعرف اوصف شعوري...جان خوف على تحدي بداخلي على توقع شراح يسوي...بس حركت العصبية بسد الباب وراه طرد كلشي وبقى بس الخوف...

_شنو قصدج من هذا تصرفج...جان يتقدم باتجاهي اني رجعت بسرعة لورة ...بحيث ظهري صار للكنتور وكف مقابيلي ولزمني من زندي بقوة

_احجي ليش ماحاجية وكايلة انتي مزوجة..

يحجي بعصبية وحدة

_ماصور الموضوع يستحق كل هالعصبية ...اخ

ضغط حيل على زندي ...مايستحق معتبرتني طرطور هنا....مايستحق متنكرة لرجلج

_اخ عفية ايدي...هو اول وتالي زواج صوري...شدعوة هالتكبير للموضوع...

جان قصدي من كلت هيج انه زاوجنا حتى نحل مشكلة مو حتى انشر واتباهى بالموضوع ..بس حجايتي انفهمت غلط

_ها كولي هيج..تندمتي وافقت على زواج صوري ...وهسة ادورين زواج فعلي...جانت كلتب  واسوي الواجب ...

قبل مااجاوب جرني له وماحسيت الا حلكه على حلكي ...جان مو يبوسني حست يريد يشلع حلكي من مكانه

حاولت ادفعه عني ما كدرت هو اطول واضخم مني ...جانت تلمسات ايده عنيفة نوعا ما...

حاولت اقاومه وجنت ادفع بيه...وهو جان يحاول يفرض سيطرته ...جرني للجرباية ...صحت بيه

_علي لا عفية احنة مو اتفقنا ...

_وانتي الغيت الاتفاق مو اني

وداحاول ابعده عني عضيته من جتفه ...صاح من الالام وية الصيحة شك دشداشتي من فوك الجوة

من كام من يمي...بعد مافرض سيطرته  جان ظهري له ماحاولت اندار عليه وهو ماحاول يحاجيني

نزل وعافني ابجي وكت مايعرف يرحم ...من شغلة لشغلة ينقلني وكتي...

لو بيدي ما انزل بس الجهال ظلو يكمزون يريدون اكل ....نزلت اسوي عشى بس ما حجيت وية عمتي وهية ماطلعت من الغرفة سويت العشى وصعدت ....

ثاني يوم اشتغلت بصمت متبادل بينا ..لعصر ..صاحتني نزلت كالت راح اروح ابات ابيت زينة

هي مريضة وماكو احد يمها...

هاي اول مرة تسويها ...دائما تروح لليل وترجع...بس يجوز فعلا زينة مريضة

علي من البارحة ما اجى للبيت...بعد ما اجى زوج زينة اخذها حسيت البيت فرغ علية وعلى الجهال وهمة ظلوا يبجون ورة بيبتهم جانوا يصحولها يوم

لليل نيمت الجهال فوك ونزلت كملت تنظيف وظليت افتر بالبيت ...تندمت ماحاجيت عمتي...هي حجت بلحظة عصبية حقها ابنها راح بعز شبابه وجان هذا عزيز كلبها...

وعلي من يوم عقدنا مرته مشاكل وكل شوية رايحة زعلانة لبيت اهلها...وهو متبهذل

هسة اني شبيدي بكل هذا...حسيت بحركة.. وعطره سبق صوته واني جنت فاتحة الثلاجة ارجع الاكل بيها

_الحجية ماكو

_راحت لبيت زينة تبات

_شعجب ما كالت رايحة...منو وداها

_ابو محمد اخذها ...

_ها هم دخل للبيت

تفاجات بحجايته والتفت عليه

_وان دخل عمتي هنا

_وين الولد

_نايمين....اسويلك عشى ...ماعرف شخلاني اكول هيج..

_ياريت...كعد على ميز الطعام واني احمي الاكل .احس نظراته تتبعني

_ريام رجعت...سألته

_لا

جانت الكلمة عادية بس عبالك فتحت بوابة ادموعي ..جنت اشتغل وظهري له فمايشوف دمعي

حرت شلون امسح دموعي حتى اخلي الاكل على ميز

حاولت ارفع ايدي بهدوء وامسحهن ماعرفت هو جان يراقبني...

من ندارت وخليت الاكل لزم ايدي

_ليش تبجين...رفعت عيني له..ورجعت عيوني تصب

جرني وكعدني مقابيله...سحب كلينس وانطاني

_امسحي ادموعج ...ما احب اشوف وحدة تبجي...سكت فترة...ماعرف شكول...مرات بالعصبية واحد مايعرف يفقد....الموقف استفزني وحسيت ماحاسبة لي حساب...بس ما جنت ناوي الي صار اعتبريها لحظة ضعف

_ ابو حسين لا تكمل ....زوجتك هم بعيدة عنك...واعرف كل زين انتة اضوج مني ...بس اني هذا الي جنت خايفة منه...حياتك تأذت بسببي ...وللعلم اني ماحجيت لان جان اكو مسبقا انتقاد لزواج الحما من مرت اخوه من المدرسات وياي..

عفت  وصعدت ...

الموضوع ما نفتح بعد وعمتي رجعت ثاني يوم ...وريام هم رجعوها ...حياتنا رجعت طبيعية ...بس اكو اختلف بعلاقتي بعلي ...شي ماملموس بس محسوس ...

جانت بداية الدوام وتفاجات بعلي جاي من الصبح..كال اني اوديج بطريقي

مرة من ديوصلني ...

_تنورتج ضيكة لا تلبسيها بعد

فاجاني بحجايته ...وللعصر اجاني كال امشي وياي ...

_وين نروح

_للسوك نشتري ملابس للجهال شتى جاي

_اني عود اطلع الجمعة اشتريلهم

_كومي بدلي وتعاي راح انتظر

فعلا وداني واشترينا ...وصلنا محل ملابس نسائية...

_ادخلي اشتري ملابس لج..ملابسج بيهة ضيك

_اني اشتري بعدين

لزم ايدي ودخلني للمحل...بس اشتريت اسود ما اعترض ...

بعدها كال خلي نتعشى …دخلنا مطعم وطلبنا اكل اثناء الانتظار

_ممكن اسال سؤال

_كولي

_قبل العقد كلت حجاية ...بقت ابالي ردت اعرف شنو الي خلاك تعتقد او تكولها

_ياحجاية

_كلت انتي دمرتي حسن ...ليش ....المرحوم فد يوم اشتكالك مني

_عوفي هذا الموضوع

_لا ماعوفه...اريد نوضح الامور ...انت عم جهالي وصرتلهم اكثر من اب...مااريد يخلص عمرنا واحنة بكلبنا حقد ..هو ظل ساكت ويباوع من الشباك على الشارع...علي اني موتت حسن فجاة علمتني ماكو شي يستاهل نشيل منه منعرف شوكت ساعتنا..واني اريد اصفي الامور وياك...رجاء علي

_التفت علية ...اكو امور افضل تظل طي الكتمان وتروح وية اصحابها

_بس اني اريد اعرف ....رجاء

_انتي ردتي تعرفين ...لا تلوميني بعدين

_حسن عمره ما حب انتي اول وحدة بحياته...حتى ما جان عنده علاقة ببنية ...هو من النوع العاطفي كلش..من زوجتوا واني حسيته مامرتاح..وانتي هم ما اندمجتي وية عائلتنا..هالشي جان يزعجنا بس كلنا المهم هو يرتاح...والموقف الي صار بينكم قبل الحادثة

_اي موقف

_ المشكلة الي صارت...بليلتها انتي يمكن مادريتي ...امي خابرتني ..حسن جان جاي سكران...اول مرة يسويها بحياته اجيت اخذته للصالة وهو حجى هواي امور...

_يعني شنو حجى هواي امور

_يعني طلع الي بداخله...سكت ورجع باوع للشارع...ورجع باوع علية...

_مثل شنو...كمل انتة بديت

_اغلب صدج له....واهمالج..المشاكل الي جانت تصير .والاهم جان يصور انتي ابد ماحبيتي...فوك هذا جان مقهور لان مد ايده عليج ...وكالج كلام جارح

سكتت ماكدرت اجاوب مامر من الجلسة غلب عليه الصمت..واكل ماكدرت احط غير كم لكمة مجاملة

بطريق الرجعة كلام علي ظل يرن براسي فتحت الشباك الدنيا ليل والهوا جان بارد لان بداية شهر تشرين الثاني ...درت وجهي على الشباك ماجنت اشوف شي لان فكري جان مشغول...حسيت اكو رطوبة نزلت على خدودي شوكت نزلت الدموع ..رجع علي غلق جامة الشباك من يمه...خليت كصتي على الجامة اريد تبرد راسي...من وصلنا ونزلت وصعدت لغرفتي لثاني يوم ...صعدت عمتي الصبح كالت علي اجى ديوصلج...كتلها ماداوم بقيت يومين ماعوف الفراش بس اسوي اي شي للغدة ..حتى جهالي بقوا على عمتي...اني مطفية ضوة الغرفة وسادة البردات وباقية بالفراش...احس ماكدر اتحرك...جسمي مخدر للاخر...ماعرف لو احاسيسي تخدرت ...لحد ثالث يوم....وتستمر الحكاية

#ظلال امرأة

همس ليل

البارت الخامس عشر والاخير

لحد ثالث يوم المغرب انفتح باب الغرفة والضوة راسا جريت البطانية على راسي لان الضوة فاجاني ...حسيت واحد وكف قريب مني

_شكد راح تبقين هيج

سمعت صوت علي ماجاوبت

_كتلج بعض الامورتبقى طي الكتمان احسن

هم ماجاوبته...رفع الغطى عن راسي راسا خليت ايدي على عيوني

_كومي...لاتفكرين بس بنفسج ...فكري بجهالج العايفتهم صار يومين...الشعور بالذنب مايصحح الامور

انداريت عنه على صفحتي بحيث صار ظهري له ولفيت البطانية على جسمي

_تعرف ٣ سنوات زواجي من حسن ماحاول يوم يسال ليش هيج اسوي...جان بس يلوم بية ....بس مافديوم سألني...كل الي يهمكم انتو الزلم وتردوه مرة تسمعكم الحب ودلعكم طول اليوم...بس شنو هية شتحس شتحلم...مو مهم ...تريدون شكل خارجي...لعابة مكيجة ومبتسمة لكم طول اليوم

حسيته كعد يمي على الجرباية ...

_ ليش ماحاولتي تشرحين...شلون واحد يعتكف على نفسه ويريد الطرف الاخر يفهم من الهوا

حجايته جانت بحدية ...بس جانت مفتاح ادموع صار ٣ ايام حابستها ...خليت وجهي على المخدة اخنك شهكاتي ...مد ايده ورفع وجهي

_راح تختنكين...اذا تصورين البجي يريحج ...ابجي واغسلي همج...بس عمره ماراح يرجع الي راح...

تمدد يمي وجرني لحضنه بحيث صار ضهري لصدره ...شبكني صار حنجه على راسي واحتواني بجسمه

_كبرت واني عندي عقدة اني مرة ...كلشي عيب...مو من باب حلال وحرام..لا ...بس مجتمع وتقاليد...جنت اتفاجا بالمدرسة من بنية تكول بابا وصلني...او بابا اشترالي وطلعني...ماكو هيج شي...اصلا استحي اكعد يمه...مبدأهم البنية تزوج وتنستر ...عبالك بس الرجال يسترها ...ماعدنا وحدة تكعد يم زوجها من تاكل يم اهلها...الزلم وحد والنسوان وحد...اصلا عمري ماشفت وحدة من اخواتي كعدت يم زوجها من تجينا...خلصت عمري يم اهلي احلم شوكت اكمل كلية واتعيين واعتمد على نفسي...اريد اثبت لنفسي اني مو عيب مثل مايصورون...حتى حسن نفرض عليه فرض..واجيت لعالم ثاني ...عكس تماما عن تربيتي...ماكدرت اتاقلم بسرعة ...غير جان همي اكمل كليتي واحقق حلمي...بس لكيت نفسي رجعت لازم ابتسم واتمكيج وادلع حتى ارضي رجلي..ماكو تقدير لكل الي اسوي طول اليوم...لحد يوم العركة...من عيرني حسن بأهلي...حسيت شكد ضعيفة لان ماكدر اجاوبه واطلع ...لو عندي راتب مااقبل الاهانة واسكت...حلمي كبر واخذ بعد ثاني....سكتت اول مرة احجي عن داخلي

_اهلج مايمثلون كل المجتمع...صح اكو هواي هيج...بس انتي غلطانة جان تكدرين تشرحيله داخلج...حتى يفهمج ويقدر ويكدر يتعامل وياج...

سكت وماسمع مني اجابة...كمل حجي

_مو عيب لو راد رجلج منج كلمة طيبة ورادج متحضرة له..مو لان مايقدر تعبج طول اليوم....بس الله خلق المرة اكثر قابلية تحمل من الرجال...فالرجال يذب حمله وتعبه يمها ...

هذا الي جان يقصده حسن ويريده...لو بس مفهمته انتي تحبينه جان قدر كل شي

_لا هو فهمني زين وهالشي أذاني اكثر

_شلون يعني

_فهم اني ما حبيته...فعلا الي جمعني بيه حب عشرة مو الحب الي هو راده

صار صمت بس صوت التنفس بارز ...بعدها غفيت ...يمكن لان طلعت كل الي بداخلي ارتاحيت وصار يومين صح ماعفت الفراش بس جان نومي متقطع ومامريح..

من كعدت جنت وحدي وعلى نفس لفة البطانية حولي باوعت للساعة جانت بالثنتين بالليل شكد نمت ماعرف....بس احس نفسيا مرتاحة

كمت وكفت كدام المراية ...اني شسويت البارحة معقولة كل الي حجيته ...خاصة الفقرة الاخيرة جانت خطأ حيل

نزلت للمطبخ حسيت بالجوع فتحت الثلاجة سويت لفة...وجاي وصعدت

ثاني اليوم كعدت نشطة بدلت ونزلت سويت ريوك...طلعت عمتي من غرفتها ..طبعا الجهال يمها ينامون طول فترة الدوام...

_هايمة...صباح الخير

_صباح النور

_راح اداومين

_اي صار يومين مجازة كافي

_مايجيج علي

_ما اعتقد راح اتمشى...مع السلامة

_الله وياج...الله يهديج

طلعت واني اضحك على حجايتها ...مخبلة الله يهديني

مشيت واني احس خفيفة...شعور غريب جان بداخلي

بالمغرب من اجى علي...تصرف كانه ماسمع مني شي

_ليش ماكلتي جان وصلتج الصبح

_تمشيت مو مشكلة متعودة

اجو الجهال يحجون وياه صار عمرهم قريب الخمس سنوات...حسام كاله بابا علي ...هو تفاجأ واني وعمتي... رفع راسه عليه يشوف رد فعلي

_حبيبي.. ابو حسين عمو يصير ...حجيت وية حسام

_مو ماعندي اب واني احبه واريده يكون ابوي

عمتي دمعت عينه وعلي شبكه وكاله اني هم احبك وانتة وهمام اولادي مثل حسين

حسام جان يعبر عن كل مايحسه مثل حسن...بس همام جان مثلي سكوتي مايحجي

كمت للمطبخ واني مقهورة على جهالي تيتموا من صغرهم ...لحكني علي

_اعرف نقهرتي...بس هو طفل مايفهم

_اني ما اريده ينسى ابوه

_هو مايذكر منه شي ...ويبقى حسن ابوه ...بس خليهم يحسون اني ابوهم حتى اعرف شلون اربيهم

اشرت براسي....

علي زادت جياته علينا اكثر من قبل...طبعا ريام ماكو اي اتصال بينا وماتجي ولا احنة نروح لها ..حتى عمتي رغم تصير عمتها اخت ابوها بس من يوم زواجنا هية اخذت موقف منها...علي دائما ياخذ الولد يم جهاله حتى يبقون قريبين من بعض..ويجيبهم يمنا بس قليل لان ريام ماتقبل وتتعارك دائما

مرة جنا كاعدين بالصالة عمتي تتفرج على التلفزيون والولد يلعبون واني امشط شعري

_افكر اروح اكصه لشعري تعبني

_لايمة حرامات حلو

سمعنا صوت سلام علي...دخل كعد وهو يباوع على شعري من امشطه بحيث استحيت ..صعدت لغرفتي

من خلصت ورتبت الغرفة نزلت اريد اخذ الجهال انيمهم...سمعت عمتي تحجي وياه

_وشراح تسوي هسة يمة

_ماعرف والله ...القطعة باسم ريام ماكدر ابيعها.

_كول لها بلكت تفك ضيكتك ...وبعدين تشتريلها وحدة

_يمة ريام من يوم ازوجت نقلبت عبالك مو نفس الشخص

اني رجعت لغرفتي ما اريد اتصنت على الحجي

ثاني يوم من ديوصلني الصبح

_ شلون شغلك...التفت علية...ورجع باوع على طريقه

_ زين..شو تسألين اليوم...ليش

_مجرد سؤال...نقذني وصولنا المدرسة لان قريبة بالسيارة

بيومها قررت احجي وية عمتي..فهمت منها هو جاية طلبية له وهو بنفس الوقت جان عنده شغل...فما عنده مبلغ يبدي بالطلبية الثانية...المبلغ مو جبير وية العربون يكدر يكمل

وتفاجات اول مرة عمتي تحجيها ريام مسجل باسمها قطعة ارض يلا قابلة يعقد علية ..ومع ذلك هم باقية تزعل بين فترة وثانية ...

اني جنت مسوية سلفة من جزء من راتبي...لان بيتي كامل تأثيثه...وماعندي مدارس وية راتب عمتي وعلي كل نهاية اسبوع يجيب مسواك كامل رغم شكد حاولت وياه ....

فراتبي يبقى منه كلت اسوي سلفة تفيد...وثاني يوم العصر اخذت ذهبي وبعته ...هم جان عندي ذهب النيشان بعت منه بوقت ماحتاجيت المحبس والتراجي واضافة له جان عندي هدايا حسن دائما جان يشتريلي ذهب ..ومبلغ ببع الاثاث...كملن ١٠ ملايين

المغرب قبل جية علي انطيتهن لعمتي

_هاي شنو الفلوس

_عمة انطيهن لعلي...بس لاتكولين مني

_لعد مين اكوله...هو يدري اني ماعندي

_كوللي اي شي اداينتيهن

_وانتي مين جيبتيهن

حجيتلها كلشي

_يمة شلون تبعيين ذهبج والفلوس انتي جنتي ضامتهن للظروف

_عمة رحمة لوالديج  هو الي يسد دين بالملايين ويشتري بيت لجهال اخوه...راح يعوفهم اذا احتاجوا شي

بوقتها مانزلت من اجى علي....

ثاني يوم من ديوصلني ...

_شو ماكو البارحة

_جنت تعبانة ومالي خلك

بيومها  على الغدة عمتي حجت وياي

_البارحة انطيت لعلي الفلوس وما اقتنع بحجيي...وماقبل ياخذهن الا يعرف مين...واني وعدتج ما اكول له ..

_قنعيه عمة خلي ياخذهن

بعد ماعشيت الجهال ونظفت خليتهم يم عمتي 

صعدت غسلت وطلعت دامشت شعري وبعدني بالبرنص...ما احس الا الباب انفتح بقوة فزيت

_انتي شلون تسوين هيج

خليت يدي على كلبي من الفزة...خرعتني

اقترب مني بعصبية..شلون ترحين تبيعين ذهبج..

_ذهب ما لابسته مضموم بالكنتور كلت تستفاد

صاح بية...وفلوس ايتام تنطيني...ترة مو لهدرجة وكف شغلي

_صح...بس كلما زاد شغلك هم مشمولين احنة بالخير...لو لان مني

_شتقصدين لان منج

_لان تضوج مني وتشوفها صعبة تاخذهن من اريج..البعبع مال العائلة  ..حجيت بعصبية  ...خليت ايدي على صدره بحركة عفوية اريد ابعده عن طريقي حتى افوت...بس بنفس اللحظة هو جلب بيها على صدره...وظل يباوع بعيني بقيت متبسمرة بمكاني ...ماعرف شنو الاحساس جان ...رفة كلب مثل جنح عصفور ...ضميت شفايفي ابللهن بلساني لان جفن شفت عينه نزلت على الشفايف يتبع حركتهن..

شوكت جرني له وشفايفه نزلت على شفايفي

شوكت انفتح البرنص وجرني للجرباية ...ماحسيت بس برغبتي يضمني له ....

من كعدت جان طالع من الغرفة...ظليت نايمة واني افكر شصار ...ماجان عندي نفس الاحساس وية حسن....ممكن لحظة ضعف ابقى انسان ...بعدت كل الافكار...وجنت شايلة هم شلون راح اواجه باجر .

بعدين اذكرت باجر جمعة ماعندي دوام...من نزلت الصبح ....حسيت نظرة عمتي تختلف ...ماعرف اني اوهس ....

_يمة مو كافي اسود ...صار لج اربع سنوات .

_عمة انتي هم مانزعتيه

_اني ابني وماعندي شي ولا باقي بالعمر شي...انتي بعدج صغيرة..وهم موزين على ولدج ورجلج

حسيت كلمة رجلج مست كلبي....وعرفت هية عرفت بالصار ...اكيد لان علي تاخر يمي فوك

علي التهى بالشغل الجديد ومن يجي اصعد فوك...استحي اواجه...صح ثاني مرة..بس الاولى جانت لحظة عصبية ونوعا ما جانت تثبيت موقف...بس هالمرة كانت مليانة احاسيس خاصة..

الاحد من شفته...ماحجى ولا اني... ردت اسال على شغله بس خفت تتفسر على الفلوس لو تربط وية الي صار

من رجعت مريت على صالون قريب كصيت شعري

علي انشغل الاسبوع كله بالطلبية ومن يجي بالليل واني اكون فوك ...بس اشوفه الصبح من يوصلني ..يسال على الجهال وشسوو

نهاية الاسبوع ...اجى من وكت جان يوم جمعة ...جنت واكفة اغسل مواعين

_هاي شنو

_شنو

_ليش كاصة شعرج

رفعت ايدي تلمست شعري...مامتوقعة منتبه على شعري حجيت وية نفسي

_ضوجني

_حرامات حلو ...تقرب يتلمس شعري

اني ظليت بدون حركة همس

-لونه اسود فاحم اول مرة اشوف هيج سواد وناعم...لا تكصيه بعد

رفعت عيني له وهو يباوعلي ...حاولت اقلع نفسي من مكاني ...ماتحركت شي جمدني

بس صوت الجهال وعمتي صحاه...ابتعد وطلع راسا

_لعد وين علي مو سمعته اجى

_اي عمة ماعرف راح

بعده كمت اتجنب التقي بيه وساعدني هو ملتهي بالشغل...والصبح كمت اطلع من وكت وبلغت عمتي لا يمر علي..جنت اخاف من مشاعري لا تتطور

هو هم مايسال ليش ماكو بالليل من امر...بس من عمتي كالت له لاتمر الصبح عليها اعترض

مرة بالليل كعدت على صوت صياح عمتي نزلت ركض يمكن سويت الدرج بايتين...لكيت همام ينتفض من الحرارة  شلته راسا للحمام وغسلت جسمه مي دافي لان جان شتى...من حطيته فز من كد مامصخن

من طلعته شوية صحى بس جان بعده مصخن ...خليت له تحميلة وبديت اسويله كمادات...وين اوديه بهالليل

عمتي كالت خابرت علي...ماتاخر اجى بالتراكسود اخذناه للمستشفى...تعرفون ماكو بس دكتور خفر ضربوا ابرة خافض حرارة وابقوا للصبح خاف ينشمر

من نزلت حرارته انتبهت على نفسي بس الصاية وجواها دشداشة خفيفة رغم  الغرفة جانت دافية ...بس اني بديت ارجف ماعرف الهبطة هسة بينت..

علي خلص الليل يطب ويطلع لان مايخلوه يبقى يمنا وهي غرفة هواي اطفال...بس صار الصبح كال خلي نطلع لا ياخذ جرثومة النوب نوديه للدكتور

من طلعنا تلكاني هوى بارد كلش رجفت ولفيت حسام زين ...حسيت شي نزل على جتفي التفت شفت علي نازع قمصلته ومخليها على اجتافي وسحب حسام مني هو شاله

خابرنا ابن عمه الدكتور وديناه له طلع عنده حصبة...كال لازم ماتصعد حرارته لان ينشمر...ولا يتقرب اخوه منه لينعدي

من رجعنا صعدته فوك بغرفتهم وعفت حسام يم عمتي

ايام الله لايشوفها لحد حرارته تنزل شوي وترد تصعد وخاصة بالليل...عمتي عليها صار الاكل واني مكابلة همام...وحسام زاد الحمل يريد اخوه لان توم ومتعلمين سوة دائما...علي ماعافنا اثناء النهار يروح للشغل وكل شوي يخابر وبالليل يبات يمنا ...مرات يصعد يكولي روحي نامي...بس اخاف تغمض عيني ...وتصعد حرارته...جنت من انطيه تحميلة وتنزل انام عل الجرباية الثانية ساعة وعلي يبقى يمه

باليوم الرابع...نزلت اخذ اكل لهمام سمعت عمتي بالصالة تحجي وية علي...المطبخ بصف الصالة وهو صغير

_ادري صغيرة يومية زعلانة...هسة ماتكول خطية طفل مريض

قبل ما تكمل صعدت...من صعد علي

_روحي نامي ساعة ...حرارته زينة ماكو

_راح انام على هاي الجرباية ....جانت الجربايتين وحدة قريبة من الثانية بينهم مسافة صغيرة خالين كرسي حتى نسويله كمادات

يعني صارت الجرباية النايمة عليها اني وبعدين كرسي كاعد عليه علي بعده الجرباية مال همام

ظليت اتكلب مايجيني نوم ... صفنت  على علي جان يمسح على راس همام...

كلبي رف عليه وان اتامل ملامحه...اول مرة اتمنى لو امشط شعره باصابيعي غمضت عيني على هاي الأمنية كعدت شفته صافن وضايج...ومتجي بيده على جرباية همام وراسه مخليها على ايديه

_اسفة علي سببتلك هواي مشاكل...

_متعلم على المشاكل...تعرفين ابوية توفى واني سادس اعدادي... محله وكف

.. وماكو احد وكف ويانا رغم جان خيره على الكل حتى عمامي...اني جنت مرات اروح وياه واحب شغله ...بطلت وكلت لامي راح افتح المحل..هية ماقبلت بس اني اصريت...وبديت اشتغل بيدي وياي بس عامل وبالعطلة اطلع حسن ومصطفى ...حيل تعبت يلا وكفت المحل وجبت عمال وخلفة وياي...وماخليته امي لو اخوتي يحتاجون لشي...ابد ماعشت شبابي...خلصته شغل بشغل

جان يحجي ومايباوع علية ....جانت نظراته عل همام احسه بعيد بفكره

_ الله يساعدك ...اني مريت من يم الصالة وسمعت عمتي تكول ريام زعلانة ...اكيد لان عايف بيتك..اني ماريد اهدم بيتك...وهية حقها المرة صعب عليها تنزل عليها ضرة وتغار...النوب مزوجين عن حب

_ريام ازوجتها لان بنت خالي وجانت تحبني...حسستني بالاهتمام وامي هم شجعتني عليها...صح ماقصرت وكفت وياي ...بس من صار شوي فلوس عندي صارت مادية اكثر...مرات اكول حقها تعوض الفات ...بس مرات تتجاوز الحد بطلباتها....سكت

_شنو الحل ..التفت علية

_لاتشيلين همي ...متعود على المشاكل

_علي ابتعد فترة وحتى الصبح لا توصلني..ركز وياها شوي طلعها حاول تهتم بيها

كام وصل للباب....هو لازم ابتعد بس لاسباب اخرى وطلع هاي كان اخر مرة اشوفه لمدة شهر...

كام يجي الصبح اني بالدوام يشوف خالتي والجهال ويروح...

بديت اشتاق له ..من اطلع اذكر شلون جان يوصلني...اذكره بكل مكان بالبيت حتى بغرفتي بعد اسبوعين حيل اشتاقيتله ...بلحظتها بجيت بحركة على حسن...لان حسيت بشعوره ...صعبة تحب شخص وتحسه مايحبك ولا يحس بيك...حسيت شكد ممكن واحد يتالم....

صارت حياتي روتين من المدرسة للبيت ...بالبيت بين الجهال والتنظيف ...اكلي حيل قل وبالليل ماكدر انام اظل اتكلب واني افكر بيه...

صار شهر وشوية بعيد حتى خالتي ماتجيب سيرته ..بس الجهال جان يحجون بيه

رجعت من الدوام...من دخلت سمعت صوته...حسيت كلبي طار لعنده...دخلت سلمت ...رد بدون مايرفع عينه...كلش اذاني وحسيت مثل واحد ضربني على وجهي...

ردت اصعد صاحني

_ام حسام من رخصتج ...رجعت عليه...هاي حقج دينج ...ممنون منج ماقصرتي...مد ايده بعلاكة ..اخذته منه بدون مافتحها

_اشكرك

صعدت لغرفتي خليت العلاكة على الجرباية ..وكعدت اباوع عليها...شكد شعرت بالاهانة من اسلوبه....فتحت العلاكة جان بيها فلوس وياها تخم ذهب ...شكد حقاني..عفتهن بمكانهن....ونزعت ملابسي وفتت للحمام وكفت جوة الدوش...جنت ماعرف هذا مي الدوش لو دمع عيني

اووووف يازمن شكد.بجيتني .....

طلعت وكفت كدام المراية...الالم احسه ينبض وية كلبي اريد شي يخففه ....

اباوع على نفسي...شنو هسة اسويت عشت عمري كله احلم بشي ازوجت  حسن عمري ٢١ سنة كضيت وياه ٣ سنوات وهسة مر على وفاته اربع سنوات ونص ...شكد عمري هسة ٢٨ لو٢٩...شنو الي شفته

هاي خلصت كلية وتعينت هو هذا حلمي...شو ما جبت غير الدمار لنفسي ...شنو شاريد بالضبط...ماعرف

ظليت افكر وقررت خلص ماراح اعيش ضامة نفسي وافكر شيكولون الناس....

خابرت علي...كتله تعال هسة جانت المغرب...وفعلا خلال نص ساعة اجى

_خير ام حسام صار شي

_لا بس اريد احجي وياك

_كولي

_طلكني

_شنو

_مثل ماسمعت

_اكيد تخبلتي

_لا ...عقلت ...ارجع لحياتك واني اريد اكمل حياتي

_نسيتي سبب زواجنا

_لا ردت تحلي مشكلة ...

_شنو الي جد هسة...يرجعون اهلج يزوجوج

_انت هم تبقى حالي المشكلة...بس بشكل ثاني

_شلون

_راح اخذ الجهال وعمتي واطلع لتركيا ....مناك اقدم على اليو ان ومصطفى ممكن يساعدنا

_تعرفين انتي شكد صعبة التقديم

_لا هسة لان اوضاع العراق دينطون لجوء بسهولة

_وانتي متوقعة اعوف الولد هيج بسهولة وهمة البقوا من حسن

_علي ارجع لحياتك ولبيتك ...الولد اول وتالي مرجعهم لكم...وكفت رجاء اذا تحب حسن بصدك ...طلكني ..

عفته وصعدت ...واني كاعدة على الجرباية ..شوية وشفته فوك راسي جرني من ايدي وكفني

_اني لان احب حسن مبتعد ...لان احبه متلوع بنار

_اعرف والله تضوج مني وماطيقني عوفني وخليني اشوف طريقي..جان اثنينة اعصاب

_وج شداتحجين ...اضوج منج شنو...وتشوفين طريقج شنو....تردين يزوجوج

_انت شعليك ازوج لو لا

_والله اخذ الولد وخلي شوفتهم حسرة عليج

_ليش كل هذا ...شسويتلك حتى تكرهني هيج

_ اكرهج ياريت ..جان ماتعذبت ...لزمني من زنودي وقرب وجه مني وهو حيل يضغط على ايدي ..اتمنى اكرهج مثل اول ما توفى حسن ...اتمنى لو ما متقرب منج..

_اخ علي داتأذيني....كافي الله يخليك ..تعبت والله ارحموني اني هم بشر...اتحملت فوق طاقتي...اذا خايف ازوج لا تخاف.ما اسويها والله

_ليش يعني مو زوجتيني ورة حسن

_ازوجتك حتى اخلص من ضغط اهلي بس ما حسبت حساب احبك...

كلتها بدون وعي ...وخليت ايدي عل حلكي وهو تفاجا اكثر مني هد ايدي وكف شوي يباوع علي وعافني ونزل

بعد ماراح بقيت كاعدة بمكاني صافنة شسويت اني...

بقيت يومين اسوي شغلي بشكل الي واصعد احاول انام بدون فائدة ...غفت عيني كعدت شفت علي مقابيلي على الجرباية

_كلت حجيج صح واحسن شي اطلكج وارجع لبيتي ...بس من اتخيل ممكن تكونين لغيري ...نار تشب بصدري...ماعرف شلون صار هيج ولا شوكت ...جنت فعلا اضوج منج...ومن قررت اعقد عليج جنت متاكد مامكن تدنى نفسي عليج...بس بعد المرة الاولى ظليت افكر بيج واراقبج...كلت عادي شي لي وحلالي ...بس مرة الثانية لا عرفت مو هذا السبب...بس بقى حسن واكف بينا ...كلت ماتكرر ...وركزت وية ريام ...

مافاد مجرد ماشوفج ارغبلج وزاد الموضوع عن حده

ابتعدت حتى انسى وابقى تعاملي رسمي وياج...بس لكيت نفسي حيل اشتاقلج....سكت وظل يباوع علي

_ احبج ..مو بيدي من حبيتج ...مثل ماكلتي الشخص مو بيدي يختار الي يحبهم

ماعرف اوصف احساسي من كالها ...عطشان بصحراء ولكة كلاص مي يرويه...طفل ضايع ولكة حضن امه الدافي...كمت من مكاني شبكته وضميت راسه لصدري...

بليلتها نسينا كل ماحولنا ...بقينا بعالم بس اني وياه

خلاص لكيت جنتي وناري ...ماريد اكثر

ريام زوجته من عرفت منه راح يوزع بينا الايام زعلت وطلبت الطلاق...بس هو طبعا ماقبل ....وبعد تدخل ناس رجعت..بس حيل متعبته بطلاباتها...ماتدري شلون تبعده عنها بهالطريقة...

اني اخذت عبرة وصبيت اهتمامي على زوجي وبيتي

وصار عندي ولد من علي هو راد طفل ....

ماكان مابيدي اغلب الاختيارات الصارت...حتى من حبيت علي هم كان مو باختياري...الامور نفرضت علية فرض...

بس على الاقل هسة بيدي اصنع سعادتي وسعادة عائلتي....انتهت الحكاية