رواية ظلمات الغيهب الفصل الخامس عشر 15 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _14_

زهراء تكول ....

لقد هدموا كُل شيء فيني ضحكتي
هدوئي وروحي التي كانت تَحوم حول امي لـ ارضاها فقط
لقد هدموا جَسدي
لقد قتلوني
وقعتُ في حبهُ ونسيت أنهُ  غيهبٍ مَجروح
ولكن خُذلانهُ لا يُعني القضاء علي
استقيضتُ وكُلي رغبةً في الإنتقام
وباتت في مُخيلتي الافكار
لقد قتلني!
عذبني!
ونهش جسدي!
ولكنِ الآن
وضعتُ كُل شيء على رِفوف النسيان
حبهُ الذي دَمر روحي،
َ وذهاب اُمي الذي كُلما حاولت وصفهُ لا أستطيع!
وكأن هذهِ البيت الشعري وصفًا ليّ:《يَتيم وفززوا مَن حِلم بي أهله》

وقررتُ الإنتقام
خلعتُ التعب
كنتُ ناويةً ؏ ألانتقام من قتلي ثلاث مرات
تارةً عند تعذيبي ثلاث ايام واربع ليالي
وتارةً عند موت امي
وتارةً عند قتل طفلي!
فما الذي سوف يصيبك ايهاُ المغرور "الغيهب"؟

-آمنه مُحمد

إيهاب:-صوووووتج ...

رجاء:- بابا .

تحرك اتجاها لزم ايدها وصاح بوجهه :- بابا شنووووو كم مره كلنا هل رعونه نبطلها وصوتج عيب يطلع الحرس بره ، مووو رجاء.

رجاء :- طلعهاا منا وبعد ما تسمع صوتي طووول حياتك .

مال رأسه بـ تجاهي مرر عينه من فوك ليجوه
ورجع عيونه ؏ عمي همس يستفسر:- زهراء.

رحيم:- اي زهراء .

رفع حاجبه بعلامة (شسوي هنا)
رحيم:-هربت من زوجها وأجت عندي .

زهراء:- اذا وجودي يسبب مشاكل اطلع فورًا.

رجاء:- ولي دعمج لوري يا حيييوانه ، هربت كآل طبعًا اذا امج
حتى ما تعرف تركز الـ ياخذ بتها زين مو زين اهم شي شمرتج
نار تحركهاا بحق لا اله الا الله .

زهراء:- ما اسمحلج تدعين عليها ، عيب عليج هذهِ امج مهما يكون.

رجاء:- اسمعووهاا شلون تحرك بكلبي لج اطلعي ماا اريد اشوفج
بررره بيتنا بره .

سيف:- رجاء تخبلتي خطية البنية حامل حرام عليج .

رجاء:- صم حلكك صوت ما اريد اسمع ، ويلاا طلعوها لا طولون حجي .

ايهاب:- اخذها البيبيتي احسن لا نوب تصير قاتل ومقتول .

لبسها عباية وطلع ، كعدت ؏ تخم جسمي ينفض
اخذت كلاص المي من سيف وشربت منه ريكي يبس
بديت احجي وأرد ؏ اسئلة الى ان رجع ايهاب كعد مقابيلي
وهو بدآ يستجوبني :- وين كان من طلعتي .

زهراء:- طالعين اني ويا ومن أبتعد استغليت الفرصة وهربت .

إيهاب:- آثار تعذيب موجوده ؏ جسمج .

زهراء:- آثر نفسية ارهاق جسدي بس اثار واضحة ما عندي .

إيهاب:- تعرفين اسم الدكتورة الـ اتفقت ويا ؟

زهراء:- لا بس اعرف المستشفى ، واكيد اذا اشوف شكلها اعرفها .

إيهاب:- جيد ، أذن عمو أتركه اني اتصرف ويا .

رحيم:- ماكو غيرك كفو أعتمد عليك عمو .

وكف وهو يعدل ملابسه همس:- تشلع عيوني ، هسة اني طالع عندي واجب
انتبه من جدتي ورجاء ما ناويات خير.

رحيم:- وجدك .

إيهاب :- طالع بفصل .

ترخض وطلع ، راح ويا سد الباب بقيت مركزه ويا إيهاب
كان ضخم لكن بتناسق واضح مهتم بنفسه  واضح عنده شعر بس خفيف
فزيت ؏ صوت ابوية همس:- بابا روُحـي فوك بغرفة رجاء ارتاحي هسة
وتركي الموضوع علية وتأكدي ما دامج بـ هل بيت انتِ بـ امان .

سيف:- كومي اوصلج للغرفة .

أبتسمت اجه اخذ أغراضي وصعد كدامي
مشيت وره همست:- انتَ م..

سيف:- اني اخوج سيف ُ ؏ــمري 19 وعدنا اخوان توأم ولد
بس بيت جدي عمرهم تسع سنوات .

ارتاحي ولا تتقيدين البيت بيتج مثل ما هو بيتنا
ورجاء لاتخافين منا هِـيِّ بس صوت كلبها طيب
دائمًا تضربنا وتصيح وره شوية تجي تعتذر وتسوي
الـ نريده فـ لا تهتميلها .

هزيت راسي وكعدت ؏ جرباية
هو عافني وطلع ذبيت عباتي وخليت راسي ؏ مخده
عيون الغيهب ما تفاركني صدمته وهو يوسع عيونه
ما كدرت اتخطاها ڪُـل ما اذكر شلون جمد بمكانه يريد بس
يتحرك ويوصل السيارته انمرد مرد ، بسس يستاهل هو وصلني
الـ هل مره هو علمني اصير ممثلة واتقن الدور الى ان أوصل الغايتي .

تخالطت الأفكار بداخلي ، وتصارعت الحجج والتعب
حتى غلقت عيني وهربت الى عالم الأحلام راجيًا
يكون أجمل من واقع حياتي المظلم والمر ....

..........................
الغيهب ....

لم ينتبه احد لغرقي ، كنت ارتدي ثيابًا جافة دومًا
أخوض حروبًا مع قلبي، كنت امنع نفسي مما اريد
حتى أعيش الندم عليه ، فـ اتضاهر أنني أقوى من ڪُـل شيء
حتى كثرة الخيبات ، قد رأيت الجميع يتجنبون التورط بي
استلقي ؏ الفراش متعبًا ، أتساءل هل فعلا اريد ان اؤذي نفسي
او سعادتها ، اشعر ان داخلي تحطم كليًا، خذلانهم أهلكني
خياناتهم قتلتني ،فـ  هل من ملاك يمد لي يديه للنجاة !

بقلمي اساور حسين

لحضات  اشبه بالموت البطيء ، الناس والسيارات
كل شيء يتحرك توقف في عيني ويبدأ بالتلاشي
كانت هِـيِّ الوحيدة تتحرك بعيناي ، أطرافي تجمدت
اود الحركة الركض الوصول لها لاحتضانها
لـ اهمس لها انني اراها المقص الذي يقص حبل المشنقة
من عنقي ، ارها مرهم لوجع  محروق يود إن يهمد حروق
الخيبات والخذلان ، لكنني ضعيف امام مواجهة طعناتهم
بـ هذهِ الحضات أصبحت زهرتي منهم قد فعلت بي ما فعلوه
استغفلتني كما استغفلوني ، أتقنت دور التمثيل كما فعلو

حبال النجاة تمزقة امام نظراتنا ، حتى أصبت برمي السهام للمرة الألف

ما اتذكر شلون عبرت الشارع وصلت للسيارة صعدت بيها
منهار كليًا عقلي رافض فكرة هربت مني ، عندي أمل هِـيِّ
شافت شيء غلط مني احتمال اكو شي بالسيارة وصلها
الـ مرحلة تنزل وترجع للبيت تشكيني الـ ابوية مثل ڪُـل مره

وصلت للبيت بس جسد أمشي وعيوني أحس بيها نار تاكل بيه
دفعت الباب وفتت دورت ؏ ابوية حتى يقابلني يتعارك وياي
لان ضوجتها ونزلت دموعها ، بس ابوية ماكووو
دخلت اتلفت اباوع بالغرف ، دكيت باب غرفة امي وابوية
ورجلي بعد ما يشيلني هذا اخر مكان أحتمال اشوفها بي

انفتح الباب طلع ابوية باوعت ؏ غرفة هو يباوع
؏ بره  من شاف حالتي عكد حاجبه ونتر :- وين زهراء.

غلقت عيني بـ أحباط ، حسيت بالعجز والفشل
هنا رجعت النقطة الصفر رديت بعجز:- أسند ظهري يابا .

هاي جانت اخر كلمة وكعت بالكاع ابوية لزمني وثبتني ؏ حايط
هزني من جتفي وصاح:- ولك وين زهراء وييين .

رجعت رأسي ؏ حايط ما حاولت اسيط ؏ انفعالي
ولا ثابرة بـ إخفاء تحطيم قلبي الى أجزاء
كافي تعبت من المكابرة:- رجعتني النفس الموقف النفس الوجع
عافتني مثلهم ، مو كلتلكم زهراء تشبهم ، كلت راح تعوفني
بس بس يابا گلبـي ينزف بـعد ما اكدر أتحمل .

ام الغيهب:- غيهب شتحجي انتِ ولك زهراء وين .

صرخت بعلووو صووتييي :- زهراء كعدت كدامي ضحكت وياي
باوعت بنص عيني وراحتتتتت زهراء راحت شردت مني

ليششش كولو ليشش معقولة اني ما انحمل الـ هل درجة
ڪُـل مااا اقرر ابدي حياة جديدة يهزموني ، وكأنهم اتفقوا علية
ويدزولي الناس ومن يشوفوني بديت أتأقلم يسحبون مني كلشش

هشام:- غيهب شبيك .

ابو الغيهب:- استعجلوا ؏ اخوكم راح يروح من أيدنا.

الغيهب:- شسون تحذفون ذاكرتي ، وبطريقكم ترميم الكلبي
لآن هلكت والله هلكت ، بس حقها أني اذيتها هوواي تحملتني هِـيِّ تحملتي
وجنت اشوف الحب بعيونها رغم اذيتي الهاا
بس كدرت تخليني احب قربها ما حبيتها بس ارتاح بوجودها
اكدر اسيطر ؏ افكاري وياها واضبط نفسي حتى لا تحس بيه وتسوي مشكلة

يمه مو مو كتلج اريد ابدي وياها صفحة جديدة
أريد اعوضها ؏ ڪُـل جروحها ، اني ما استاهل هل صدمة
لو تحبني ما تصدمني بس

اختنكت النفس وكف بعد ما اكدر أسحب
واتنفس طبيعي ، رجعتلي نوبات الخفقان
التشنج يمشي بناحية ايدي اليسرى
لزمتها بوجع وغلقت عيوني ريكي نشف بعد ما اكدر انطق

أحتاج انام اريد انام ابوس ايدك يابا اريد انام  .

نزلت دموع ابوية امي نهارت بس ما جنت اهتم الـ احد اريد بس
انام هذا ڪُـل الـ براسي ، كام ابوية اخذ المفاتيح وفتح باب الكنتور طلع علبة صغيرة اخذ منها كبسولة واجه بيده كلاص مي مد ايده اخذتها منه
شربتها وهمست:- هشام اخذني الغرفتي .

سندني هشام وكمت ويا وصلت للغرفة سديت الباب منعت
احد يدخلها طفيت ڪُـل الأضواء ، ذبيت نفسي ؏ جرباية
تغطيت وغلقت عيني اعرف اذا ابقى كاعد أنتهى وبـ هل حالة ما اكدر أفكر

استسلمت للنوم هارب من المر .

كدرت أسيطر ؏ جسمي ونمت اربع ساعات متواصلة
كعدت نص ساعة احاول أسترجع نفسي واكدر افكر
سمعت صوت تلفوني يدك بس رجاج ، كمت اخذته
ورديت :- الو جميل.

جميل:- انتَ وين .

الغيهب:- صاير شي .

جميل:- أتصل علية هشام.

الغيهب:- مااريد احجي .

جميل:- لازم تحجي وتتفاهم لا تبقه تسوي بس البراسك وبعدين تتندم .

الغيهب:- بعدين مو هسة أريد اصحح.

جميل:- سكران .

الغيهب:- لا شربت الحب .

جميل:- غــيــهــب .

الغيهب:- وسم ابوية انطاني جنت محتاج ارتاح .

جميل:- اجيك لو تجيني .

الغيهب:- لا اجيك ولا تجيني طالع ادور عليها .

جميل :- انتَ مو ما تريدها وما تريد الـ ابطنها خلص عوفها بحالها .

الغيهب:- جنت ما اريدها .

جميل:- وهسة شتغير .

الغيهب:- هواي امور تغيرت .

جميل:- لازم نكعد سوه ونحجي الظاهر متندم بس بعد فوات الاوان.

الغيهب:- انجب ما فات روح هسة.

سديته وبدلت ؏ سريع ونزلت الغرفة مالتها تاكل بيه
ما أكدر ابقه بيها ، لكيت اهلي كلهم موجودين

ابو الغيهب:- شلونك .

الغيهب:- زين .

اريد اطلع صاح :- اوكف وين رايح .

الغيهب:- اشوفها وين راحت ، يابا اذا تعرفوها وين بس طمني وعد اعوفها بحالها بس اريد أشوف هِـيِّ بأمان ومستقر وضعها .

ابو الغيهب:- الله شاهد وروح ابوية ما ادري بيها وين
بس ، يا ابني عوفها هِـيِّ الظاهر من زمان تخطط تعوفك

رجعت دخلت وعلامات الـ استغراب تعتلي وجهي:- ما فهمت  .

هشام:- زهراء قبل اسبوع اجت الفرح ووصتها تبيعلها كلادتها الذهب
وفرح من تروح للدوام بايعتها .

ابو الغيهب:- وبعد ايجار البيت يمها يعني مرتبه امورها
حتى المستمسكات ماخذتهن .

عضيت شفايفي السفلية واني اهز براسي :- مخططه وتضحك علينا
ونفذت مأجره البيت وبايعة الذهب واني اخر من يعلم .

ابو الغيهب:- طبعا كلشي ما تعلم لان مو بحال الـبنية مخليها وحدها فوك
تفكر وياكل راسها التفكير ، عانت ، اهانة ، اهمال ، قلة احترام ، ضرب
محاولات قتل ، وسكتت الى ان انفجرت وخططت ونفذت وانتِ ما تدري

ام الغيهب:- ملتهي بالكح.... يأجرلهن بيوت ، ومحتار عد منو يبات
ومخلي بنت الناس تطحل بروحها ، تخابر ترجع سكران ملابسك
تعط عطور نسائية حقهاا ونص والله يلوم الـ يلومها .

كعدت ايدي ؏ راسي همست بضعف :- كلامكم كله صح واريد اصحح اغلاطي اريد حلول ما اكد افكر اني .

أمير:- بعديش يا خوية من شردت البنية .

ابو الغيهب:-متأكد زهراء حاسبتها صح وهسة هِـيِّ بأمان عوف البنية بحالها صح انتَ ابني بس ما تستاهلها.

الغيهب:- وابني .

ابو الغيهب :- هههههههههاااايييييي ابنه اضحككوو وياي ولكم اضحكووو
يكول وابني ولك بطل سوالفك بطلهاااا يا ابن هذذذا نفسه الردت تقتله لو غيره شنو نسيت اذكرك لو لا .

ام الغيهب:- لا تكول ابني كول اريدها .

الغيهب:- ما اريدها باعتني تشبه القبلها فضلت نفسها
وهي تعرف بحالتي وتركتني بدم بارد وراحت  منيييي .

ابو الغيهب:- بعد براسها عقل يريد يخبلها اكثر ويشمرها هذهِ غايته.

الغيهب:- دخيل ربكم بلا هل كلام الـ بيه كافي طالعة روُحـي من الدنيا
تريدون تروحون وياي نشوفها وين لو اروح وحدي .

ابو الغيهب :- لنفترض لكيتها برأيك توافق ترجع وياك .

الغيهب:- طبعًا تجي شنو بكيفها مرتي مكانها بيتي مو غير مكان .

ابو الغيهب:- ما اعتقد راح توافق هِـيِّ من تصرفت بـ هل تصرف واثقة
ما ترجعلك بعد لو مو تغصبها .

الغيهب:- وين تريد توصل.

ابو الغيهب :- عووفها .

الغيهب:- هم راح نرجع والله ما اعوفها وارجعها يعني ارجعهاا .

ابو الغيهب:- لك بابا تعبت البنية حرام عليك .

الغيهب:- من البداية كلت الها اني دمار وهي وافقت وعلقتني بيها
لازم تتحمل ما دام دخلت الحياتي مستحيل اطلعها بسهولة اذا مو برضاتي .

عفتهم وطلعت لحكوني اخوتي ، واخر شي اجه ابوية ويانا
يباوعلي صفح ما راضي ، بقيت امشي بالسيارة تايهه ما اعرف
وين اروح ومنين ابدي تالي صاح بيه ابوية:- دخت هل فرع
خمس مرات دخلت بي نعلعله شيب الخلفك كون .

الغيهب:-يابا روُحـي بخشمي عوفوني .

هشام:- عفية روح من نولدت لليوم عاشت بخشمك .

طلعت باكيت الجكاير ورثة وحده جريت نفس وهمست:- وين ادورها
هِـيِّ حتى ما عدها آحد تروحله.

أمير:- بيت خالها اكيد بيت خالها .

الغيهب:- تندلهم .

امير :- لا وين اندلهم ، هشام تندل .

هشام:- هو زوجها ما يندل بيت خالها تريد اني اندلهم .

ابو الغيهب:- هو لو خوش زلمة وعينة ؏ مرته چان عرف بيت خالها وين
البنية وييين بس هو موخوش كوه قابل .

الغيهب:- كافي يابا كافيييي راح اشمر روُحـي من السيارة راسي
بـ أي دقيقة ينفجر ، اعرف اني غلطط واعرف تعبتها وأذيتها ودمرتها
والف مرة كلت اني دمااار عووفني هو لو اعرف اصحح نفسي
ما اصححها ، اني واكع بنص حفرة ظلمة وما اعرف وين المخرج .
والكل يريد مصلحته ولا بشر مد حبل النجاة.

ابو الغيهب:- بوية انتَ ما تتعاشر هِـيِّ كوه تريد اجذب عليك لو احجي الصدك ما تنبلع احنه اهلك ما نتحملك ، صعب ماخذنا بعصبيتك
هوسة تفوت للبيت انتَ والعاصفة الترابية تتحاربون
ياهو يسبب خسائر اكثر من الثاني ، توكف بالبلعوم مو زين يتحملنك
الأولى اسبوع وشردت ، الثانية شهرين وفلتت ، وغيرها وغيرهم
ختمتها زهراء طولت وياك اشهر هم مو سنة وشردت .

هشام :- ابوية ما يعرف شي اسمة مجاملة.

ابو الغيهب:- أمشي فوت هل فرع وعلى ايدك اليسرى رابع بيت
هو هذا بيت خالها .

فريت السيارة ورحتلهم نزلنا دكيت الباب طلع خالها
من شافنه انخطف لونه عرفت يعرف عنها شي
الغيهب:- زهراء عندك .

- اجت الظهر وكالت شردت ومن كلتلها ارجعج عافتني وشردت
يا ابني ما رضيت ؏ تصرفها هذا خراب هجمان بيووت .

الغيهب:- وما عرفت تبقيها يمك من اجيك نتفاهم شلون كدرت تخلي عرضك
الظهر وبالشارع ماكو أحساس انعددم هاي هيه فردنوب .

دفعني ابوية من شافني فار دمي علية رجعت للسيارة
بقه  بحجي ويا بالعشر دقايق ، واول ما صعد
كال:- عرفت وينها ، راح نروح يا غيهب اذا تسوي مشاكل
اعوفك وحدك تتعارك وأرجع للبيت مشي .

الغيهب:- يابا كافي نفذ صبري كول وينها مو شليت حالي وحق الله.

ابو الغيهب:- بيت ابوها .

ضليت صافن بوجهه ما مستوعب كلامه
دقايق وكدرت اكله:- يا ابوها يابا هِـيِّ حتى العنوان ما تعرفه
شوكت اندلت البيت وشلون تأمن ؏ نفسها وياها ناس غرب
بعدين هاي اختها تكرها .

ابو الغيهب:- هو نروح ونتأكد واذا ما طلعت عدهم مصيبة.

الغيهب:- العنوان .

المنصور شارع الـ .... بالبدايه .

رجعت من بيت خالها للمنصور ، مو بعيد هواي عن بيتنا بس الطريق
ازدحامات وقافل ڪُـل عشر دقايق نمشي شوية ، حتى باكيت الجكاير خلص ، ما صدكت طلعت من الـهوسه وكفت كدام محل اخذت
باكيتين ورجعت كملت الطريق ، الى ان وصلت للعنوان المحدد
اغلب البيوت عليها حراسة ، والواضح اغلبهم بالدولة

أمير:- هذولي هم يهجمون علينا لو حراسهم ، شلون
راح تصير كتلتنا عمل شعبي .

الغيهب:- أكسر أيده الـ يفكر يرفع صوته بوجهي مو يضرب
انيمهم حبوس وما ارحم بحالهم اذا هم مو شوية ،فـ أني الغيهب يعني الظلمة اعيشهم بـ ظلمات الغيهب وما يبرد دميي .

نزل ابوية سأل عرف يا بيت منهم يعود الرحيم
عدلت سيارتي ونزلت .

الغيهب:- السلام عليكم ، عزيزي اريد الواء رحيم .

- منو حضرتك .

-الغيهب .

واحد باوع ؏ الأخر وكفو بوجهي :- ممنوع تتواجد هنا الواء رحيم ميريد يشوف وجهك ارجع منين ما اجيت .

مديت راسي وصحت:- عفوا ما سمعت.

- سمعت امشي منا .

ضحكت بوجهه وبعده ما مستوعب ركعته بوكس
خليته يراجع حساباته ، اجه الثاني يفزع الصاحبه عفته ورحت للباب
دكيته بكل قوتي وصرخت :رحيم اذا انتَ زلمة واجهني اطلع كبالي .

استمريت ادك بالباب بكل ماعندي من قوه ابوية يلزمني
فقدت عليهم دفرت الباب انفتح استاذ رحيم مستند ؏ حايط واكف منتظر افتح الباب .

رحيم:- نعم .

الغيهب:-اريد مرتي .

رحيم:- ما عندك مره يمي .

الغيهب:- هِـيِّ يمك مو جوه .

هز براسه وأبتسم دخلت للكراج وصحت:- زهراء تسمعيني اطلعي كبالي وراح انسى الصار ،  لا تخليني احقد عليج واخليج تندمين .

دخل علينا واحد بعمري تقريبًا صاح بصوت :- تهدد وبين بيوتنا .

الغيهب:- اطلع منها ولا تدخل .

ايهاب:- انتَ اطلع بره البيت ولا تعتب الباب مرة ثانية.

الغيهب:- لا تخليني اهينك سد حلكك ، كلامي وياك رحيم زهراء تطلع يعني تطلع لا تخلوني اتصرف وياكم .

إيهاب:- أعلى ما بخيلك أركبه ، وشنو يجي بيدك سوي جلابي ما تخوفهن

هجمت علية لزمته من قميصة هو قلد حركتي
الغيهب:- هِـيِّ زعطوط ليش أدخل خشمك .

ابوية ورحيم واخوتي واجوي من بيت الكبالهم
عالم كبار ومن ضمنهم رجال جبير كلش
يصيحوا ابونا وأسمه ابو علي .

ابو علي:- خير يا طير شصاير هنا .

إيهاب:- جدي داس بيتنا ويهدد بينًا علني .

الغيهب:- تريد اهددك بالسر .

ابو علي:- كاافي انتو ال اثنين ، منو انتو وشتودون .

ابو الغيهب:- أولآ السلام عليكم .

الكل رد السلام وابوية كمل:- احنه اهل ان شاء الله ، اني والد غيهب
والغيهب زوج بنت رحيم زهراء.

هز براسه وهمس :- تفضلو جوه نسولف عيب يطلع صوتنا.

ردت احجي رجعني ابوية وهو دخلني جوه ، كعدت بالشافعات صبرت نفسي اخذت جكارة اشرب بيها ومتحمل كلامهم ، بعد أخذ وعطى
بين ابوية وبينهم انفتح الموضوع .

رحيم :- ڪُـل ما في الموضوع والصار  ، بنتي زهراء ما مرتاحة وياك
وصلني منها شخصيًا انتَ خاينها ، معنف ، ومحاول تقتل ابنكم
صح كلامي .

الغيهب:- صح ما أنكر الصار بس  كلة سوء فهم وناوي اعدل كلشي
وهي صدمتني بهروبها ، هاي نقطة عليها ، كدام عيني تباوعلي وصعدت بالسيارة وراحت لا خافت ولا حسبتلي احساب .

ايهاب:- لو ما دايس بطنها ما تسويها .

وكمل ابن عمها الثاني اثير :- انتَ شلون اتصلح وجاي تهدد وتركع
وصوتك واصل اخر الشارع .

عطت بي :- مرتي وماكو شتريد اخذ منكم موعد وانتو مشردين  مرتي ومنطين اسمي للحارس حتى يطردني .

آبو علي:- التريده هسة شنو يا ابني .

الغيهب:- اريد زوجتي .

رحيم:- و بنتي ما تريدك ، مثل ما دخلتوا بالمعروف طلكها بدون مشاكل
لا تجبرني اسويلها خلع .

الغيهب:- الكدامكم المحامي غيهب الـ .... ڪُـل قاضي بالمحكمة اعرفهم
واحد واحد بدعوة وحدة اكدر اجيبها بيت طاعة غصبن عنكم كلكم .

ابو علي:- لا محاكم ولا مشاكل ، اني اكعد ويا زوجتك الي هِـيِّ بنيتي
واشوف شنو السالفة لان اني الـ هل يوم ما شايفها وما ادري بيها هنا
وداخله ؏ بيتنا دخيلة احنه بنات العالم يدخلن علينا ما ننطيهن
انوب بتنا تريدون بكل سهولة تاخذوها تعذرونا ، اذا ما نشوف شنو السالفة
ما نخطي خطوه وحده ليكدام .

الغيهب:- شتحجون اكلكم زوجتي يا نقط يا حروف يا كدام .

ابو الغيهب:- كافي غيهب ، كوم هشام امير اخذو اخوكم واطلعوا انتظروني بالسيارة اسلم واجي وراكم .

الغيهب:- ما اطلع اريد اشوفها واحجي وياها بنفسي .

رحيم :- انتَ مسوي بيها خوفة شلون تكدر تواجهك وتحجي وياك طبيعي .

ابو الغيهب:- حقكم وحقها ، نعوفكم تحجون وياها وتردولنا خبر .

الغيهب:- ما اطلع اذا مو هِـيِّ وياي ، لا توصلوني الطريق
مسدود واتصرف وياكم تصرف مو حلو .

ايهاب:- شسوووي يعننييي انتَ ما تحترم جدي مو كاعد كبالك .

الغيهب:- جدك مو جدي افتهمت ، مو من حقكم تضمونها  زوجتي يمكم
لا والمصيبة تريدون كلهم تحجون وياها واني شنو هنا اشدهن استيل .

إيهاب:- شوف هذا مثل ما هِـيِّ عرضك فـ هِـيِّ عرضنا
روح بابا روح شو ما تعرف تحجي .

رديت بصوت خشن :- بعد ما اكدر اجرعك ، اني طالع اذا تعدي
الساعة 12  بليل وزهراء ما ترجع البيتي لا تلوموني ؏ الراح يصير .

ايهاب:- صير كدها ولا بس تهدد صير زلمة كول وفعل .

الغيهب:- لا اعجبك من احجي شي يصير .

عفتهم وطلعت وبراسي مخطط اذا ما تنفذ كلامي تاكلهم ناري .

...............
زهراء...

جنت نايمة كمت مرعوبة ؏ صوت الصراخ الصار خليت شالي ؏
راسي ونزلت أركض اشوف الصار ، بمجرد ما سمعت صوته نسحبت روُحـي مني ضليت ارجف لا إراديًا

زهراء:- الله يخليك لا تسلمني اله .

رحيم :- شلون بنتي انطيج اله لا تخافين ابد لا تخافين وياج اني .

بقيت اكل بروحي الى ان دخلو وصار حجي بيناتهم
وصواتهم شويه تعلو وبعدين يسكتون اله ان سمعت تهديد الغيهب
وطلع وعمي والولد طلعوا وره بشوية.

ما أعرف شصار بعدها فتت للحمام غسلت
وكعدت هناك ، مرعوبة من المجهول شايلة هم الباجر
طلعت لكيت ابوية منتطرني همس:- بابا زهراء تعاي وياي جدج
يريد يشوفج ويسلم عليج .

هزيت براسي وعدلت شالي وذبيت الصايه ؏ ملابسي
ورحت وكفت بالباب وصوتي كوه يطلع مني:- السلام عليكم.

الكل  رد السلام سحبني ابوية من ايدي وكفني مقابيل جدي
رحيم:- هذا جدج .

سلمت علية وابتعدت عرفني ؏ عمي علي الكبير يصير ابو ايهاب
وعمي الثاني ابو اثير وسمير ، ولدهم كلهم متواجدين .

ابو علي:- انتِ من اليوم بحمايتنا ، ما تعرفينه وما نعرفچ بس ما نرد الدخيل
وانتِ بنت ابني مهما يكن ومهما صار تبقين من نفس الدم .

علي:- احجي بابا كلشي احجي بالتفصيل .

بديت اسولف لكن بـ اختصار واجر بالسالفة جر وصوتي
الرجفه واضحة علية ، من سمعوا قصة الغيهب بيهم كالو .

اثير :- الله يساعد كلبة شلون تحمل تره الصار ويا مو سهل وصعبة
وانتِ هم عندج اغلاط يعني لازم تعذري وتكسرين وتجبرين .

سمير:- وخاصة انتِ تعرفين حالته المفروض تساعدي مو تغدري .

ايهاب:- اني اكول انجبو وسدو حلوكم، شنو هو نغدر يجي يطلعها بنات
العالم وعايف المذنبين عايشين حياتهم ، هو لو صدك كلامة وصادق
ما رجع ضم زوجة اخو بيت وحدها الله يعلم شيصير مايصير بي .

ابو علي:- عوفكم من هل كلام هاي خصوصيات العالم ما ندخل بيها
الـ عليكم تعرفون هو ، جدو تريدين زوجج لو لا حتى نعرف نتصرف .

زهراء:- فكرة هواي وحاولت ويا بس ينسى الماضي
بس هو بـ ڪُـل مره يأذيني اكثر من القبلها بعد ما اكدر اتحمل .

علي:- يعني .

زهراء:- اتمنى ينتهي كلشي وتساعدوني حتى اطلك منه والله ما اثكل
عليكم وما بيوم تسمعون صوتي او تجيكم كلمة عني .

رحيم:- بابا التريدي يصير ، وما دام تريدين طلاك اطلكج وهذا بيتج هنا تعبشين مادام ابوج عايش واشم الهوه اخليج دوم مرفوعة الراس .

ابو علي:- لا تنسى أبنه ابطنها وراح يستخدم هل كارت ضغط عليها الى ان ترجع وهي الممنونه .

رحيم:- اطلكها منه والباقي كلة سهل .

الكل وكف وقبل لا يطلع ابو علي كال:- البيوت هنا كلها بيوتنا وكلها مفتوحة الج ، ارتاحي وأمني مستحيل يكدر يدخل البيت واحنه هنا حواليج
افتهمتي جدو .

هزيت براسي هم طلعو بقه ايهاب ضحك وصاح :- اجت جدتي وما ناويه
؏ خير الحك عمي .

وكف ابوية بالباب سمعت صوت :- ولكم ياهي هاي التنزل ادموع الغالية رجاء تايهتلكم ولكم وتبجوها اليوم اسويها دم .

فاتت شافتني وصاحت :- يا يا شوف الفلك رجاء هناك وهنا .

صدمتني وهي تاخذني الحضنها :- يا حبيبة جده يا الحنينه شكد شتاقيتلج بس ما كدرنا نشوفج اله بعد هل سنين الله يرحمها صعبتها كلش .

اكتفيت بالسكوت ولان ما اعرفها اخجل منها
بقت تسألني شلون وين عشت وشلون جانت حياتي
بي ما ذكرت سبب الطلاك وليش امي ما اخدت رجاء وياها
بقه هل اسئلة لغز عندي .

بيومها بقت ويانا ما راحت وهي بيدها حضرت الأكل
اكلت شوية وكمت غسلت المواعين اجت سلمت علية وراحت
زهراء :- محتاج شي راح اروح انام تعبت حيل .

رحيم:- ارتاحي بابا اني هم راح انام .

زهراء:/ اسفة لان سببتلكم مشاكل .

رحيم:- اني اسف لان تركتج ڪُـل هل سنين بس بابا الصار مو بيدي .

زهراء:- ما اريد احجي  بـ هل موضوع هسة منتظره رجاء شوية
يستقر وضعها وتتقبلني وكلنا نكعد ونسولف .

رحيم:- هاي هيه روُحـي ارتاحي عيوني .

تركته ورحت وكلبي عاصرني خايفة وعيني ما اخذت نوم اله بعد
ما مرت الساعة 12 كدرت انام الثاني يوم كعدت ما مرتاحة بالنومه
نزلت جوه لكيت ابوية يخدر جاي :- صباح الخير .

رحيم:- صباح النور باباتي تعاي كعدي تريكي هسة اطك بيض .

زهراء:- أستريح اني اسوي الك جرب اكلي .

أبتسم وكعد ، واني رحت حضرت الـبيض وقطعت الجبن
بعدني ارتب بالمواعين ودخل ايهاب مخطوف لونه 
صاح بعلو صوته :- عمووو الحك سيارات الشرطة بره
يكولون عليك بلاغات بقضايا جبيره....

يتبع ....

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد .

البارت 3500 هدية تفاعلكم الحلو ؏ بارت البارحة اشكركم حبيباتي  ❤️‍🔥