رواية ظلمات الغيهب الفصل السادس عشر 16 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _15_

زهراء تكول ...
‏كان يجب أن أغادر مُنذ انقباضة صدري الأولى، ولم أفعل .

الغيهب يرد ..
أكتشفت آني فرطت بـ أكثر الحضات سعادة
متمسكًا بشيء ظننت انه يستحق.

أبتسم وكعد ، واني رحت حضرت الـبيض وقطعت الجبن
بعدني ارتب بالمواعين ودخل ايهاب مخطوف لونه 
صاح بعلو صوته :- عمووو الحك سيارات الشرطة بره
يكولون عليك بلاغات بقضايا جبيره ....

رحيم :-يا قضايا تخبلت شديصير ايهاب .

ايهاب:- والله ما اعرف نروح وهناك انشوف شصار  .

طلعوا أثنينهم بسرعة ، ولأن ابوية رتبه ما أخذوا بسياراتهم
صعد بسيارتة ويا حماية وراح ، كعدت ؏ امل اسمع خبر
صعدت فوك انتظر الفرج ، مر الوقت وهم ماكو صار اليل
وأني لكمة ما اكدر أدخل الـبطني بسبب الرعب  .

بين فترة وفترة يصير صوت هوسة بالشارع
ومرات اسمع  الباب الخارجي يندفر
الى ان سمعت صوت حركة بالبيت جمدت أطراف رجلي
طلعت من الغرفة الفوك وصوت مشيت حذاء واضحة
جوه ، عصرت أيدي وتقدمت ؏ درج اريد اشوف منو
الدخل البيت وكلبي احس ظل يدك برأسي

تراجعت للخلف مفزوعة من شفت إيهاب طلع من المطبخ
رجعت بسرعة للغرفة أخاف منه مهما يكن ما اعرف شي عنهم
والزاد خوفي كلام رجاء (بكل مرة ابوية يروح بيها خفر يحاولون يعتدون علية واخاف وابات بالحمام حتى احافظ ؏ نفسي منهم ) منو المتهم هنا
أجهل الهوية مجهول معناها كلهم خطر .

قفلت باب الغرفة نص ساعة سمعت باب المدخل ينفتح
يعلن عن رحيله ، كمت من مكاني ونزلت جوه بدون ما أصدر صوت
واتلفت أخاف اكو احد غيري بالبيت  .

توجهت للمطبخ لكيت أكياس ، تقدمت فتحتهم كلهم أكل
وكيس ثاني حلويات وعصاير ، سحبت عصير أريد افتحه
وصلني صوته تراجعت للخلف ونضرب راسي بالكاونتر بقوة .

ايهاب :- السلام عليكم.

من انضربت انصدم وسحبني من ايدي وهمس:- أسم الله اعصابج أغاتي
كولي يا الله .

عطت بي من الخجل :- شنو حرامي وداخل للبيت بدون صوت .

إيهاب:- أعتذر منج بس متعود هيج أدخل ڪُـل مرة .

خزرته ومشيت واني اهمس وافرك براسي:- ماكو احد بالبيت بس اني
ممكن تروح مو حلو وعيب وجودك هنا .

إيهاب:- ما بيناتنا عيب ، البيوت هنا نكدر ندخل بيهم بدون ما نستأذن
المهم حزرت ما تاكلين وجنت بمطعم اكلت وكلت اجيبلج وياي .

ظليت اباوع بوجهه مستغربه أول مرة شخص غير أمي يحسب حسابي
ويفكر بيه اكلت لو ما اكلت ، ويحسب حسابي ويتنغصلي من يآكل.

صحيت ؏ نفسي من التفت يريد يطلع وكال:- أخذي راحتج اني طالع
بره كاعد أي شي تحتاجين دكي الباب .

زهراء:- بس لحضه .

ما تحرك اضطريت اني التفت اله واحجي  :- ابوية وين ليش ما رجع وياك .

إيهاب:- بعد مو هسة يجي هو بالمركز يخلص تحقيق ونتأكد من القضايا
ونشوف حل .

زهراء:- هو صح متورط .

إيهاب:- متورط بغسل أموال عمي وين يعرف بـ هل سوالف ، رشاوي
وابتزازات عمره ما أخذ فلوس من شخص  .

زهراء:- عزا شنو هل مصيبة ، يعني شلون هو ما مسويها وأخذوه.

إيهاب:- لفقوها .

زهراء:- بس لا تكلي الغيهب سواها.

ايهاب:- أكيد هو مو احد ثاني ، بس نشوف وضع عمي الباجر
ونرجع الصاع صاعين .

زهراء:- ما انصحك أبتعد عنه حتى ما يأذيك ، وخليها ابالك الغيهب اذا هدد
ينفذ مثل ما صار البارحة مستعد كلشي يسوي بس ينفذ التهديد .

ايهاب:- انتِ أكلي ونامي ولا تفكرين هواي تمر علية مثل اشكال الغيهب
وأعرف شنو دواهم .

طلع من البيت ، شناوي يا غيهب ، حيرني ليش ما يعوفني بحالي
دخت من التفكير بوقت ما أكون بالبيت وبالغرفة حتى ما يجي يحجي وياي
كلمة بيها حظ ، اذا الـتقينا معناها حرب تصير بيناتنا
هسة من ابتعدت يبحث عني ويخلق المشاكل علمود شنو ارجعله
ليش ارجع أريد افهم ليش أرجع وهو ما يحبني ولايهتم الوجودي
معقولة يريد ينتقم لان هربت منه ، اذا يريد ينتقم معناها مصيبة ، يعني ما راح يرحم بحالي ويسوي  نوائب بيه .

جبرت نفسي وأكلت شوية ، رتبت ڪُـل الأغراض وصعدت للغرفة
ألم راسي فضيع فوك المصايب خليت العالم تحين وياي
كنت وحدي بـ لعنة الغيهب أما هسة الكل بخطر بسببي
جنت غبية واختاريت الشهص الغلط بدون تفكير بس
لان هو يتمتع بنظهر رجولي ووسامة جذابه ، وكعت بفخ الجمال
وما انطيت مجال العقلي يدرس هل شخص حتى اشوف نفسي اكدر
اعيش ويا اولا .

أكتشفت ان الجمال مو كلشي ، ولازم إختار الشخص اني اول حب بـ حياتة ويكون ما مجروح بالماضي ويخليني أدفع الثمن ، أختار شخص يكون مهتم الشخصي يحبني ويكون الحترام متبادل بيناتنا .

يومين حياتي  متخربطه ما اعرف شديصير
تعبت من الانتظار والقلق المستمر وكأن الغيهب متقصد يعيشني هل شعور المميت ، اخاف جنت بيتهم عايشته هنا أضعاف ، والمصيبة وحدي

ما اعرف وفجأة انفتح الباب علية دخلت جدتي ، وصاحت هِـيِّ بالكراج
- زهراء يمه وينج .

طلعت اباوع عليها ضحكت وصاحت:- يخايبه ما مليتي وحيدج
كومي وياي تعاي البيت العائلة.

ابتسمت وهمست بتعب:- هلا بيبي ، ما يحتاج مرتاحة هنا .

- أضن تخجلين تجين ، كلها تريد تشوفج ويتعرفون عليج واليوم جمعة
كلنا نلتم دمشي وياي لا تعاندين .

بقيت اخذ وانطي وياها بالكلام الى ان استسلمت وفعلا طلعت
وياها عدلت نفسي ودخلت البيتهم كلي ؏ بعضي ارجف خجلانة بشكل مو طبيعي ، بللت شفايفي وهم من الباب استقبلوني نسوان اثنين
اجت مره جبيرة بوستني وهمست:- هلا بيج عيوني اني أم إيهاب مرت عمج الجبير .

زهراء:- هلا بيج عمة .

- واني زوجة عمج الثاني ام اثير تفضلي يا گلبـي تفضلي .

الكل خلفتهم شباب ما لكيت بيناتهم بنية صغيرة او بعمري
دخلت بيبيتي جوه لكيت جدي وعمامي كاعدين
ولا كأن ابوية بالسجن ، سلمت عليهم وكعدت
الكل زينين وياي وما ازعجوني بكلمة بالعكس هواي  فرحانين بية .

ابو علي:- يلا ام علي صبولنا  الأكل ورانا شغل .

ام ايهاب:- كلشي كامل عمي بس نفرش .

صارت هوسة الكل يحضر واني التهيت احجي ويا عمي ابو أثير
حيل طيب ويهتم بـ ابسط التفاصيل :- بوية اذا تردين اوديج دكتورة شي بس اطلبي لا تخجلين .

زهراء:- اشكرك بس ما بحتاج اني زينة .

فات سيف وصاح :- هلا بـ أختي التوأم ، عذريني ما اجي هناك رجاء
مسويه حضر ؏ ذاك البيت .

ابو إيهاب:- سد حلكك .

كعد بصف جدي وهو يكول:- شنو جدي تره جوعان اني .

ابو علي:- يخسي الجوع هسة كمل الآكل.

نزلوا التوأم كانوا نسخ عن بعض مثل حالي ويا رجاء
بقوا صافنين بوجهي مصدومين بيه

- شنو رجاء اثنين عدنا مثلي اني واحمد ومحمد .

سيف:- عفية بالضبط نفسك انت ويا ، تعالو كعدو لان رجاء راح تنزل وتعلك .

كملو الاكل كمنا كلنا كعدنا ؏ سفره .

ابو اثير:- زهراء من يمج خبز .

أخذت منا انطيته وسمعت صوت مقابيلي يكول :- الله يساعدهم .

التفتت صار إيهاب مقابيلي بالبدلة العسكرية من شافني أبتسم

ابو ايهاب:- ويساعدك ابوية .

ام ايهاب:- أصعد بدل وتعال اكل ، ما دام الاكل بعده حار .

هز برأسه وقبل لا يصعد كال:- شلونج زهراء .

زهراء:- الحمد لله بخير وانتَ .

رد بضحكة:- صرت زين .

عافنا وصعد فوك يبدل .

اكلت شويه وفزيت على صوتها:- جدوو هاي شسوي هنا يعني وين ما أروح تلحكنيي مو حاله هااي يا ناس ما اريد اشوفهاا .

ابو علي:- جدو ما يصير هاي اختج وعانت مثل ما عانيتي واكثر
شرفي حالها يا حبيبتي تعاي كعدي ولا يصير كلبج اسود .

رجاء:- يحرم علية اكابلها واكعد اني ما اتحمل صوتها و شكلها مو نوب اكابلها واكعد أكل حتى اسممها .

بعدها تريد تكمل كلام ونسحبت من ايدها
ومشت للسفرة رغم عنها جرها بقوة وكعدها
بالكاع وهمس بتحذير
ايهاب:- لا دوخيني اكلي وأسكتي .

انصدمت بيها بعد ما طلعت صوت والتزموا الهدوء بس ما خلت لكمه بحلكها جانت كاعده وجسمها كلة مشنج وكأنها خايفة .

دققت بيها اضطريت أذكر كلامها ، خفت بس لا يطلع ايهاب هو الحاول
يعتدي عليها وهو نفسه عيشها بالرعب .

أفكاري تشتت ، كمت قبل الكل غسلت ورحت ويا ام اثير بالمطبخ ما كدرت اكعد وياهم واظل بس قلقانه ، الى ان خلصوا اكل صبتلهم الجاي ورحت
كعدت لان  كلها كاعدة زحمة ابقى بالمطبخ.

رجاء:- ابويه شوكت يرجع طول هواي .

ابو ايهاب:- منتظرين تكمل اجراءات التحقيق وكشف الأوراق المزورة
ويرجع هو مرتاح لا تخافين علية .

رجاء:- كله بسببها وبسبب زوجها واختيار امها الفاشل .

وكفت بسرعة ما اريد أجادل وياها كدام احد استصعب الموضوع بكبره بس هِـيِّ شالت الخجل :- عادي ترجعوني البيت .

ابو أثير:- اكعدي بابا لا تهتمين الكلامها رجاء بس صوت
هسة تتعاقب وظل تصيح الحكولي وساعدوني مووو عموو رجاء.

رفعت عينها تباوع ؏ ايهاب رمقها بنظرات غاضبة ورجع نزل عيونة
يشرب بالجاي بكل هدوء.

زهراء:- لا عمو عوفوها براحتها مو هِـيِّ السبب بس أريد ارجع .

ايهاب:- اكعدي .

ردت علية بيبيتي :- سوالف بنات بيناتهن .

دار وجهه ؏ جدهم وكال:- تواصلت ويا الضباط المسؤولين لازم وضروري
نخليهم يعترفون كلشي مزور وملفق .

ابو علي: وشلون نكدر نثبت هل تهم باطل.

ايهاب:- اتركوها علية اني اعرف اقلب السحر ؏ ساحر .

ابو ايهاب:- بس بدون دم .

غمز بعينه وهو يطك ركبته:- رضوض بسيطه ، بس الها مفعول .

الكل أبتسم بس اني انقبض گلبـي من كلامهم عبالك عصابات مو
ضباط ، تالي دخلوا بيت عمي الثالث وعدهم بنات اثنين تقريبا بعمري
كعدت اسولف وياهم حيل حبابات ويدخلن القلب بسرعة
مرحات الى درجة كبيرة ما تصورتها ، وهم يحضرون العشاء
كمت وياهم وحدة من البنات كالت .

- رجاء وين .

ام ايهاب:-وصلها ايهاب البيتهم تريد تجيب غراضها ما دام زهراء هنا
هسه طلعوا ، ذكرتيها هاي رجعت .

فاتت علينا عاصفة مو رجاء تركت الكل وصعدت فوك
صار وقت الاكل واني رجعتلي لعبان لنفس وطلبت يرجعوني
هنا ما كدرو يعارضون صاح عمي ؏ سيف:- كوم أخذ أختك وبات اليوم هناك لا تبقوها وحدها الى ان يرجع ابوكم .

ايهاب:- ليش ما تبقين هنا احسن بيناتنا يصير بيج شي توكعين وماكو احد يمج غلط وانتِ حامل .

زهراء:- ما يصير شي ان شاء الله ، اترخص وشكرا ؏ حسن الضيافة.

رجعت للبيت وصعدت للغرفة بحثت ؏ جهازي لكيتة مشمور بالكاع
أخذته مفطورة الجامة كلها احترك گلبـي علية بعده جديد
رغم مفطورة بس مشتغل الجهاز واني خليته مغلق اكيد رجاء ماكو غيرها تريد تخلي يشوفني فتحت جهازي .

رجعت غلقته وذبيته ؏ ميز ، نمت ؏ جرباية بسبب الألم بضهري
تأخر الوقت لل11 بليل اندك باب الغرفة كمت فتحتها بتردد
فتحت الباب لكيته سيف :- اسف اذا نايمة .

زهراء:- لا كاعدة كول تريد شي جوعان .

سيف:- لا بس كلت عادي نسولف ونتابع فلم .

زهراء:- ياريت .

طلعت ويا لكيت محضر الميز كلة حلويات وعصاير وببسي
وحب وكرزات كعدنا انتابع فلم ومندمجين واحيانا نسولف
حتى نتعرف ؏ بعض ، كان طيب القلب محبوب الى ابعد الحدود

خلص الفلم وتأخر الوقت وكفت كتله :شكرا سيوفي ، اروح انام تصبح ؏ خير .

سيف:- وانتِ بالف هير ، اني اروح اشوف رجاء شتريد مني ڪُـل شوية ادزلي رسالة.

زهراء:- براحتك .

رحت للغرفة بدلت ملابسي وبدئت اغفى ، الى ان نمت فزيت
؏ صوت باب المدخل ، كمت من مكاني باوعت الساعة الثانية عشرة
ليلًا ، معقولة سيف هسة رجع ، أخاف واحد من ولدهم سترك ربي

لبست شالي وفتحت الباب ؏ اقل من مهلي
أريد اطلع تصلبت من شفته وكذبت عيوني
الصارمحال تصديقه ، تراجعت للخلف
ورديت بدهشة :- الغيهب .

رد ببتسامة ماكرة:- جاء وحضر ، يا خطر .

تراجعت للخلف ولطمت ؏ وجهي وصرخت بعلو صوتي واني احس بالرهبة والخوف جسمي صار مثل السعف يرتجف من كل جهه.

زهراء:-  لا تمد ايدك غيهب ، شتريددد مني انتَ شتريد عوفني بحالي تعبت منك خلي بكلبك رحمه والله مليت و اتمنى الموت بسبـ.....

بعدني ما أنتهيت من كلمتي جرني بكل قوتة وحضني
بـ إثنين اديناته ، وقفت عن الكلام والحركة ما استوعبت الصار
دفعته من صدره حيل أبتعد بس ما انطاني مجال
حتى اتحرك اخذ شفايفي بين شفايفه وما فصلها الى ان بعد انقطعت انفاسي

بـ هل أثناء واني بعدني بين أحضان الغيهب
اندفر الباب ودخل أثير وبدون سابق انذار سحب
الغيهب مني وضربه بوكس ، لكن سرعان ما رد اله الضربة
الى ان دخل إيهاب وصار هو واثير ؏ غيهب
من الخوف كمزت من الجرباية رحت ؏ جهه الثانية
أصرخ ، كان منظرهم مخيف يتضاربون بكل وحشية ، دخلو عمامي وابوهم يدفعون بيهم بس يريدون يفاككوهم وهم مستمرين .

وكع الغيهب بالكاع وإيهاب كعد ؏ صدره
وأثير مثبتة بقوة ، جدي من شاف المنظر
وكعلهم بوكسات وصرخ بصوت:- ولكم عوووفو وليت غمان حيوووانات

دفعوهم بره و ابو اثير ساعد الغيهب
كعد ؏ جرباية ولزم وجهه متألم

ابوعلي:- شلون دخلت هنا  .

ظل ساكت لدقايق هو مدنك رأسه ، وهدم حيلي وهو يوكف كدامي
وركز بعيوني وهمس بضعف:- شفتي بعينج  ، حتى ما تلوميني من اكلج أكره النسوان ، شوفي حالي نفس الموقف رجع ، رجعت انضرب علمود حواء رجعت ضعيف بسببج ، انتو أذية ما وراكم بس العذاب والهلاك
واليوم وبـ هل لحضة ثبتيلي انتِ حالج من حالهن
القبلج أذني لان يحبن بس نفسهم وانتِ صرتي وحده منهن .

تركني وطلع الكل وكفوا يباوعون علينا وما بدر منهم رد فعل
طلع من البيت ، تقرب ابو ايهاب اخذني البيتهم واني بقمة صدمتي
دموعي تجري بدون توقف ، الكل كاعدين منتظرين نجي

اخذتني بيبي الحضنها اول ما دخلت ، والباقي تحمدولي بالسلامة
رجاء جانت وأكفه ؏ درج ، هنا لحضات ودخل اثير بركان
كمز عليها سحلها من شعرها وركعها بالكاع
تركتني بيبيتي وركضت هِـيِّ وام اثير يسحبن بي ويصرخن
وهو يصرخ :- لج شنو من بشر انتَ ولج شيطان ، لا والله يتعلم منج

كامت بيبي فتحت الشباج وصرخت:- ابهاب الحكلييي راح يموتها .

دخل يركض سحبه من ظهر وعاط:- أثير مو هيج مو ضرب شيل ايدك عوف شعرهاا شيلهااا ولككك كااافي خرب بليسك عوفهاااااا .

دفعه حيل بالكاع وهو وكف كدامها وصرخ:- شوكت تبطلين من سوالفج
كم مره تعاقبتي ليش ما توبين شنو هل أفكار الطايح حظها شلون تخابري وتخلي يدخللها البيت لو موتها وطالع مو كان صار براسنا واتهموا واحد منا ما تفكرين انتِ .

رجاء:- كلتلكم ما اريدها رجعوها لا اتصرف تصرف ما يعجبكم وانتو ما اهتميتولي وهاي النتيجة شفت .

هجم عليها أثير فاير دمه بس إيهاب واكف بوجهه
وفوك اثير دخلولها عمامي بس يريدون يلزموها

ايهاب:- ميصير هيج تتصرفون هِـيِّ زمالة وما تفهم تنزلون عقلكم ويا عقلها غلط يابا والله غلط ، عوفها علية.

ابوإيهاب :- لك هاي ماتاخذ حجي وينطبع براسها اذا ما تنكتل راح تنزل روسنا الله لا يرضى عليج .

ابو علي:- يطلع ابوج واني اعرف شلون أتصرف وياج يا طايحة الحظ
هذا التهور وخيط الخراب وهجمان البيوت اتوبج منه بس صبر .

توسل بيهم ايهاب وكوه طلعهم بره ، وعبالي بعد هل مشاكل
تكعد وتسكت لا المصيبة زادت وكفت من ڪُـل عقلها
تسب :- الساقط...... العاه....... ارتاحيتي هسة من الزلم تتكاتل علمودج
ويضربوني بسببج ، كافي ذكريات امج وما عانيت بسببهاا
وانتِ اخذتج وعشتي وياها مرتاحة وهسة هم كلها ادافعلج لج اكرررهج .

زهراء:- انتَ معقولة عاقلة ، مستحيل عقلج براسج ، يعني خليتيني بنص الخطر وخابرتي ودخلتي للبيت وخليتي الكل يتعارك لان داخل بيت من بيوتهم وتكليلي تعاركوا علية خبلة انتِ شبيج .

وكفت كدامها وأشرت بيدي محروك گلبـي من سوالفها
بعد ما يفيد الخجل وياها :- بعدين يا راحة ويا حنان التحجين عليهن
وتحسديني بيهن ، عانيت ما عانيته من جوع وفقر وحاجة وخوف وقلق
وحر وبرد ويا امي عشناها ايام صعبة ونصعب ؏ عدو وماكو احد ساعدنا
وانتِ كملتي دراستج وصلتي وحتى لو جنتي تنضربين من احد فـ المصلحتج اني هم امي ضربتني لعد شنو ڪُـل العالم تنضرب شنو ؏ راسج ريشة

وتالي ما تالي ازوجت كلت هل انسان حبيتة  واني اختاريته مو امي اني اريده وفكرة راح يعوضني ؏ حرمان والتعب والهم ، وطلع اسوء من ما تتخيلين ، تعنفت تعنيف من المستحيل بعمرج كلة وصلتي ، اوكفي كدامي وباوعي بعيوني وكليلي
هم بيوم نحبستي بحمام مع حيوانات وبـظلام هااااا ، ومن تكعدين ايدج مربوطة ، وفاقدة الكلام ، وما تعرفين انتِ وين ، انتِ مجربة شعور الخيانة
مجربة شخص تحبي وتفدي بروحج هو ما يحبج وما يهتملج وانتَ اخر
اهتماماته ، اكيد لا بس تحجين بس ترجعين تعرضيني للخطر وترجعييي
يوكف كدامي ، انتَ تعرفين شكد اخاف مناا هااا تعرفي جاوبييي احجي .

إيهاب:- أنتِ احجي ، هو حبسج بالحمام ، وقيد ايدج هو سوه ڪُـل هل امور
بيج وساكته عنه .

كان يحجي وياي وعيونه وسعهم وكل شوية يتقرب اكثر
الى ان صار مقابيلي :- وانتِ شلون ما تحجين شنو مو بعينج .

زهراء:- ما اعرفكم ، وما صار كم يوم من التقيت بيكم منين اجيبكم واكول .

صفك اديناته وصاح:- والله دنعل ابو لابو **** ابن ****

عافنه وطلع ركض عمي وابو يصيحون بي :- إيهاب مو احجي وياك
اوكف لا تروح ولك ايهاب .

هو بعد ما أهتم ولا شاف كدامه عاف الكل وطلع بسيارتة
همست بخوف واضح ؏ ملامح وجهي :- هذا شيريد يسوي .

واحد باع ؏ ثاني الى ان اثير كال :- هو مجهز المكان ، والزلم جاهزين
ويريد ينفذ ؏ اساس باجر بس الواضح هسة راح تبلش لعبة إيهاب.

زهراء:- لعبة شنو ومكان شيسوي بي وشيريد ينفذ حاجوني .

ابو ايهاب:- الغيهب اتهم اخونا ولازم يعترف ؏ نفسه حتى نتخلص من ڪُـل القضية .

زهراء:- وتريدون الغيهب يحجيلكم عن خططه مستحيل لا شنو مستحيل وحدة الف مستحيل .

ابو ايهاب:- ايهاب ضابط تحقيق وهذا شغله يعرف كلش زين شلون يخلي يعترف ، وهسة من سمع بي أصر اكثر ؏ موضوعه والله لا يطلع قلب ثاني اله وينسي حليب امه .

ابو علي :- اتصل علية وكله مثل ما اتفقنا ما نريد دم مو يموته .

أدركت صعوبة الموقف گلبـي شوية ويوكف سرت رعشة خوف بـ أنحاء
جسمي واني اصرخ :- من كل عقلكم يا موت يا كتل يا اعترافات  يا دم شتريدون تسون عوووفووو بحالة غيهب ما يستاهل .

ابو اثير:- واخونا شلون يبقى بالحبوس .

فقدت لطمت ؏ وجهي وصحت:- لا والله ما يبقى اني السبب وصلتكم الـ مشاكل واتراجع عنها اطلع من حياتكم وارجع منين ما اجيت ولا تأذوا
بسببي ويصير بي شي والله ما اسامح نفسي .

ابو علي:- كولي يا الله جدو ما يصير بي شي هو بس ياخذه المكان يريد يخلي يعترف ؏ نفسة وويكول ابوج ما اله دخل بكل الصار ، حتى هم يطلع ابوج وبنفس الوقت الغيهب ينسجن وتخلصين منه .

زهراء:- بعد الكلام الصار ايهاب راح يأذي الغيهب ، اني لازم احجي ويا ايهاب ضروري ، اريد تلفون خابر علية امانة .

ابو علي:تخابرين منو ؟

زهراء:- ايهاب اريد اخابر ايهاب .

الكل إتصل علية وهو ما يرد عافني اكل بروحي ، وتندمت لان فتحت حلكي وحجيت بـ هل مصايب ، راح يتأذه الغيهب بسببي وما اكدر اسمح بـ هل شي وابقى ساكته.

أثير:- عوفو يمعودين ما ياكله بس يربي .

زهراء:- يكتله يعني يضرب بي .

ابو ايهاب:هذا شغله يعرف شلون يضغط وين يضرب
الى ان يتم الـ أعتراف.

هزيت راسي وصحت:- لالا الله يخليكم لا ، اني احجي ويا الغيهب ويطلع ابوية ، وايهاب خلي يتوقف عن الراح يسوي .

رجع يتصل بي وما يرد ، كعدت وأيدي مربوطة ما اكدر اسوي شي
غير انتظر هنا عسى ولعل يخابر علينا او يرجع لان ما كدر للغيهب .

................................
الغيهب ...

إقتل مشاعرك في الداخل لا شهود عيان هناك .

دخلت للبيت خشمي ينزف دم ، والضغط إجتاح راسي بالوجع
نزلت رأسي وتسللت ما اريد احد يشوفني بس امي اذا ما تصرخ
بـ عيطتها المشهورة وتفضحني ما ترتاح  :- ياااااااا يمه غيهب شبي وجهك .

وهم صاروا فوك راسيغ ، تقرب ابوية لزم وجهي يباوع ؏ ضربات
ابو الغيهب:- شنو هاي ولك وجهج كله كدمات مو عيب تتعارك شلون تروح للمحكمة وانتِ مزورك ولك عيب والله عيب .

بعدت وجهي ومشيت أريد أصعد صاح بيه :- مكانك غيهب الزم مكانك لاتخليني اني هم أكمل عليك ويا منو متعارك احجي .

الغيهب:- رحت اشوف زهراء ولد عمامها تضاربت وياهم بس
اذا ما أرجعها آلهم واشوفهم شلون يطولون ايدهم علية .

ابو الغيهب:- هم رايح المنطقتهم وفوكاها متعارك وياهم وتحجي وتريد تنتقم لك بابا اسلوب ما عندك عقلك والضرب ما تتعب انتَ ما تمل .

الغيهب:- يابا الناس بعد ما يحبون الفقير ينوكل  اذا ما دوس ؏ راس المقابل تتعب وهم يربحون مثل حالي هسة يعني ازوجتها ومن تعلقت بيها عافتني وراحت تالي ما تالي صارت حالها حال الباقي ونضربت بسببها .

عفتهم وصعدت كافي تعبت من الكلام وبعد لهنا و بس ألم وقهر وذل
صعدت اخذت حباية الضغط وذبيت ملابسي
اريد اخلي راسي ؏ مخده واسمع صوت عالي
ودكت باب اقوى  ، نزلت ركض كلها البنات يباوعون وابوية واخوتي بره
شفت جماعات مسلحين ملثمين وبيدهم اسلحة
طلعت وصاح واحد بيهم :- الغيهب عليك آمر قبض.

الغيهب:- قبض ليش شنو التهمة.

دفر الباب ودخلولي أربعه جتفوني وصعدوني بالسيارة
وابوية يصيح عليهم ، كعدت بصف واحد ملثم من تحركت السيارة
كشف وجهه وضحك ايهاب:- نورتني أغاتي .

هاي اخر كلمة اذكرها بعد ما ضربني ؏ رأسي
ما ميزة شكد مر وقت صحيت مصدع وعيوني
مشدودة اريد أتحرك ما اكدر أيدي ورجلي
محكمين شدهم بالكرسي وبـ حبل .

الغيهب:- منو هناا وين اني .

انفتح الباب بديت أسمع خطوات تتقدم بتجاهي
بطيء ، فتح عيوني وطكها بضحكة

ايهاب:- يا هلا بضيفي شلونك يا غيهب .

الغيهب:- انجب وافتح ايدي لا ادوسك بالقندرة وانعل والدي والديك .

ايهاب:- اه اه تنعل والدي والدين منو ولك اليوم انعل شيب الخلفك بس صبر .

عافني وراح شغل كامرة مثبتيها كدامي
وتقرب :- قبل لا يحصل التشوهات الوجهك أعترف بكلشي صار
قضايا عمي انتَ لفقتها مو ؟

ابتسمت شبه إبتسامه بطرف شفايفي وهمست :- شنو تتبلون عليه زور
إجباري تريدون أخلي قضية عمك بركبتي .

رجع للكاميرا طفاها وعاد بكل سرعته ضربني بوكس ؏ وجهي
ولو ما الكرسي مستند بحايط كان  وكعت بالكاع .

صار كبالي بقيت اني أعدل بنفسي حتى أرجع اكعد عدل .
الغيهب:- صاير رجال براسي وعود تكدر تضرب ههه ولك انتَ زلمة
صدك فك ايدي اكلك بسنوني وحق الله ، لا تشوف روحك وتروح تكول للعالم كتلته وانتَ مربطني لان جبان وخايف لا اموتك هنااا .

دفرني برجله ؏ بطني وصاح:- لا تستفزني تره امووتك استعجل و لا تكثر حجي واعترف ، انتَ لفقتها العمي مووو .

الغيهب:- خرب لك أفتح أيدي  يا كلب يا عار ولك والله اشكك نصين
واخلي رتبتك ب.......... وانعل ابو الشدها الك يا كوا......

ايهاب:- متأذي مو أذيتك مقهور لان أيدك مربطها مثل الحيوانات
وسجنتك بمكان مظلم مهجور بس اني وياك بي واذا اموتك هسة وادفنك من سابع المستحيلات احد يلكاك  تموت ويضيع اثرك ونخلص الناس من شرك لان انتَ ما تستحق الحياة .

الغيهب:- اي مو ما عندي هل الظاهر متعرف اني شنو وابن منو  ، لك تدري انتَ وجماعتك هسة بخطر اسئلني ليش يا غبي يا اثول يا ابن الـ اثول حتى اجاوبك .

وكف وصار يضربني بـ اماكن متفرقة بـ انحاء جسمي
حاولت اكتم صوتي وافك ايدي او رجلي بسبب الوجع
الصار بصدري بس ما كدرت وبديت احس بالتعب
وكلامي صار صعب يطلع .

تحرك بعيد عني وهمس:- هل مواقف ما تذكرك بشي .

رفع ايده وفتحها مثل الـ اجناحات وصاح:- اووو خطية انتَ
بعد من الوجع ماتكدر تذكر او تفكر او حتى تحجي اني اذكرك ادلل لا تتوسل بيه .

تقرب رفع رأسي من شعري بقوة وصرخ:- تذكر شلون تقويت ؏ بنية
بلا اهل ولا سند وربطتها وكعتلها دك كتل ، لا وفوك هذا تحبسها بحمام ويا بزونه وفأر ، ردت تموتها لو تنهي عليها بصدمة.

صفكني براشدي وعاط بعلو صوته:- كووووو..... ما عدنا بنات ينضربن ساق...... انتَ تبيع القوة ؏ بنية من بنات الـ ........ والله لا ازوعك دم .

الغيهب:- ما أنصحك بعد الصار هسة اطلعني عايش ، موتني والله ولا طلعني هاي اني نصحتك لان راح اشوفك ايام سوده ، والله لا اكطع جفوف ايدك واخليك تاكلهن .

رجع ضربني الى ان هو ذات نفسة تعب من الضرب :- راح افتح الكامرة
أريدك تحجي كلشي لان انتهيت ؏ اقل نلحك ؏ كم كلمة قبل لا تموت مثل ما طلبت .

ابدي من تعذيب وتعنيف زهراء ، الى قضية ابوها يلا.

غلقت عيني اتجاهل كلامة بس هو ما مررها ؏ خير
رفع المسدس سحب أقسام ، فتحت عيني ما مستوعب
وجهه بتجاهي وصاح :- اليوم سقطت ورقتك يا الغيهب .

يتبع ...

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد .