رواية ظلمات الغيهب الفصل الثامن وأربعون 48 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _45_والأخيـــــرة

"لنكُـنْ أنـا وأنْـت أبديـّانْ ، لا يهـزمُنا الخِصـَـامْ ولا الوَقْـتْ ، ولا البُـعدْ"
.............................

شلت نور بـ حضني وما اسمع غير صرخت
هشام عاط بعلو صوته:- 97.9  الله اكبرررررررررر .

الغيهب:- ربييييييييييييييي .

سحبني بكل قوته
جنت اصرخ وابجي بنفس الوقت
وهو  من الفرح يبجي ويايه
اصوات الهلاهل والتصفيق
ملت البيت ما وكفت لحظة واني اكمز
والغيهب فرحان اكثر مني بألف مرة
الكل باركولي بس هشام أختفى
جلال يرش علية بخاخ الأعراس
صرت امسح بي رفعت ايدي حتى ما يصير
؏ وجهي صاح بي الغيهب:- ولك كافي لا تخليها
ترفع ايدهااا وتخاااف مو أكسر راسك
رش علية وركض وره عمي يتهرب منه .

دقايق وصوت المزيقة بالشارع رجت
المنطقة رج طلعنا كلنا بالكراج نركص
الغيهب ردح ردح بعرسه ما ردح هيج
وعمي يصفك وياهم وايهاب ذب لحم
دخلت علينا صديقة امي جانت منتظره مني مكالمة
بس انخبصت من سمعت المزيقه
اجت هي وزوجها وبنتها ذبت علية جكليت وتهلهل
فرحانة لان تعرف حلم أمي أكمل دراستي .

من اجمل وأحلى لحظات حياتي
وبعمري ما راح أنساها وكل ما أتعب
اطلع تسجيلها الـ بدون ما ادري جلال مصورنا
أشوفه وترد روحـي .

طبكت سيارة ونزل منها ذبيحة ذبحوها جوه رجلي
هدية من ابوية وتوزعت ؏ منطقة والباقي
الغيهب وايهاب جهزوا مشاوي النا بيهن .

واسبوع كامل الهدايا ما وكفت
وفرحتي ما اختفت ابوية من يومها
تغير بمعاملته للغيهب صار يحبه بس
بدون ما يبين اله يتناكر وياه بس
ما يقبل شخص يحجي علية ابد .

ايام معدودة مرت جنت كاعدة اني وعمي
وحدنا بالبيت الغيهب طالع
ونور يبجي ضايج اشرلي عمي بيده وهمس
بحنانه الـ متعودة عليه :- كومي بدلي ناكل موطه
من هذا المحل ؏ شارع ونروح البيت هشام هذا الغيهب
يتأخر بالمكتب .

اني ما صدكت بدلت وخابرت الغيهب
ادري بي ما يعارض اذا عمي ويايه بس
ما ارتاح اذا ما انطي خبر ، طلعنا بالطريق
نسولف ونضحك ؏ نور شلون يكمز مثل القرد
يسمي غيهب الثاني ، كعدنا ؏ ميز وراح جابلي
واجه ناكل اندمجت اسولف ؏ قضية الـمستلمها ويسسولفلي
عليها الغيهب ، من كملنا طلعنا البيت هشام
دفعت الباب وفتت تلكتني سجى من الباب
هشام ماكو بس سمع بينا ماصدك رجع
يضحك وبيده الكباب الشوي .

ما اكلنا الى ان دخل الغيهب يرعد من الباب :- ولك هشام
بابكم خايسسسسسسس يكلك منين تعرف اهل البيت نظيفين
من عتبة الباب وعتبتكم كاتلها الضيممممممم .

عاط بيه عمي لان فز من دخلته:- مود الكحا...... صاعد اليوم .

طلع هشام وهو يضحك فتح الغيهب المي
يرش وهشام يدفع بالوصخ الى ان صار
الرصيف يلمع لمع ارتاح واستقر دخل غسل
وكعد ياكل بعدني ما شبعت ودك تلفوني .

زهراء :- الو هلو ايهاب .

ايهاب:- زهراء اني مقابيل بيتكم ادك بالباب ماكو انتوا .

زهراء:- يا ستار شبيك ايهاب شصاير اني بيت هشام .

ايهاب:- رجاء عدها ولادة وتريدج وياها
وين صاير بيت هشام .

شمرت التلفون ؏ الغيهب وصحت بفزع :- ضيعت شلون أوصف
الطريق رجاء عدها ولادة دلي ؏ بيت هشام فدوة
رجاء تريدني وياها .

اخذ التلفون ورد بسرعة:- ايهاب إطلع للمستشفى
آني اجيبلكم زهراء أختصر الوقت والطريق بسرعة .

سكت واشرلي أمشي رفعت نور صاح عمي بيه :- وين تاخذي
عوفي هنا بيت عمه لا دخلي مستشفيات.

زهراء:- اي والله مو زين فدوة راح اتعبكم.

هشام:- دروحي لا اخلي العالم تضحك عليج .

ابتسمت بس گلبي يدك بسرعة عفتهم وطلعت
بوجهنا للمستشفى اول ما وصلنا نزلت
لكيت اثير وعمي ابو ايهاب بره واكفين
عفت الغيهب وياهم ودخلت ركض
اول ما شافتني بيبي أجت بتجاهي ترجف
زهراء:- دخلوهااا ؟

ردت عليه خايفة:- اي سودة علية شكد رادت تشوفج .

صدت عيوني ؏ ايهاب كاعد بالكاع وبس شفايفه
تتحرك وأضح يقرا القران ، رحت كعدت
قريب علية وصرت ادعيلها ، صوتها وكف گلبي
من القهر عليها ، تصرخ بعلو صوتها
دخل ابوية مبين جان بالدوام
بقه يفتر بالممر يروح منا ويجي منا الى ان طلعت
الدكتورة وبيدها الطفل ، كمز ايهاب اخذه من ايدها
وهو يبجي ودموعه ما وكفت لحظة
صار يكبر بـ اذنه وهمس بالأخير:- اسميتك (كيان ) كيان ايهاب .

اخذه بابا صار يباوع علية بفخر
همس بصوت مخنوك :- ابن الغالي والغالية .

دخل عمي اجت الدكتورة اخذت الطفل
وطلعوا رجاء نايمة وجهه اصفر
التعب وأضح عليها بشكل بقت ساعة
كاملة وصحت شوية شوية ولادتها طبيعي
بس من التعب نامت ، صرت قريبه عليها
حضنتها وهمست :- الف الحمدلله ؏ سلامتج حبيبتي ام كيان .

لزمت ايدي بقوة والتفتت
نزلت دموعها وهمست:- إيهاب.

اقترب منها باس راسها وايدها وهمس:- يا روح ايهاب
رجعتيلي باباتي .

رجاء:- سميته كيان .

ايهاب:- مثل ما طلبتي عيوني انتِ .

باركلها ابوية وعمي وبيبيتي ما عافتها
اخذتها للحمام غسلتلها وبدلت ملابسها
راح ايهاب جابلها الطفل هي شافته
وصارت تبجي من الفرح وايدها ترعش
الكل طلع وهي حاولت ترضعه ما عرفت بالبداية
والخوف تغلب عليها بس بعدين سيطرة ؏ وضع .

خابرتي الغيهب طلعت بره ورديت :- حبيبي .

الغيهب:- يلااا كلبي نرجع تعبت هواي .

زهراء :- بس أريد ابقه يمها حبيبي ارجع انتَ فدوة اروحلك
ادري تعبتك بس ما اريد اعوف اختي وحدها .

الغيهب:- هاي هي عيوني براحتج اذا تريدين تبقين
أبقي ما عندي شي وحتى نور اعرف اخلي ينام
باجر الصبح أوصله الج .

زهراء:- أحبك غيهب .

الغيهب:- احبج زهرتي .

عافني وراح التهيت برجاء
طلعونا ثاني يوم من المستشفى
الساعة 10 الصبح رجعت بيت ابوية
للظهر اجه الغيهب هو ونور
كعد ساعة وعاف نور وراح .

بقيت يمها اسبوع ما شفت الغيهب نهائيًا
يوم الثامن الساعة بـ 10بليل دزلي رسالة
مكتوب بيها (اخاف باجر الله ما كاتبلي اعيش
چنت بأخر ليلة فد مشتاگلك
خبر موتي من تسمعه لاتضوج
ابقه أذكرني حبيبي أبداخلك)

إتصلت بسرعة واني مصدومة من كلامه
اول ما فتحت خط وصلني صوته وهو يدندن
بصوته الخشن ويغني ( انا أحب غيرك صعب لا تظن محال
أترك الدنيا وإلك أبقالك
يا ضوه عيوني وبدونك ما أشوف
إشكد أحبك انت فد هنيالك  اخاف باجر الله ما كاتبلي اعيش
جنت بأخر ليلة فد مشتاقلك . )

زهراء:- تعال اخذني عمي قبل لا تموت تعال
شيكولون علينا العالم .

ضحك بعلو صوته وهمس بفرحه :- فاهمج اني فاهمج اجيت
حضري نفسج قبل لا اموت واضيع من اديناتج .

انطيت خبر الـ رجاء بوستني وبقت تدعيلي
ضربتها على ايدها وهمست :- اني اختج غبية ما بيناتنه
هل سوالف اليوم اوكفلج باجر توكفيلي ما عندي غيرج
ولا عندج غيري .

عفتها وشلت كيان بوسته وسلمت عليها وطلعت
نزلت سلمت ؏ ابوية وصلني للباب
سلم ؏ غيهب ورجع دخل  صعدت وياه لزم ايدي باسها
وشغل تكملة الأغنية (الهوى المابي اشمك مو هوى
واصعب إحساس احنه مانبقه سوى
ياللي بيك إتعلقت دونك أموت
فدوة بقيني حبيبي ابالك )

يغني وياه وفرحان بينا اول ما وصلت
نام نور واول ما خليته بفراشة
ما شفت النوم بعد للصبح شردت منه
سبحت اباوع ؏ جسمي ما مخلي
مكان ما طابع علامات الملكية علية

دخلت الغرفة نور نمت كم ساعة
وكعدت انظف البيت واطبخ
عمي من شافني أرتاح انطلق
يرش بالحديقة ويرتب الورد
حتى المرجوحة غسلها .

يومين وطلعت القبولات
ولان معدلي عالي أكدر اقدم بـ اي قسم يعجبني
وبعد نقاشات وتفكير طويل اختاريت
اني والغيهب أكون ( تحليلات مرضيه 'مختبر')

الغيهب:- تصيرين المحلله زهراء رحيم .

زهراء:- نثبت .

الغيهب:- انثبت محللتي حللتي قلبي قبل لا تصيرين محلله .

زهراء:- بس كون الدراسة سهله.

الغيهب:- اهم مرحلة السادس والمعدل
ونجحتي بي وحصلتي ؏ معدل يرفع الراس
بجهودي طبعًا وتعبي وجلطاتي لا تنسيهن انوب تصيرين
محلله وترفعين خشمج علية .

زهراء:- انتًَ حلمي الأول الباقي تكملة احلام بسيطة
ما ادري شلون أعبر عن فرحتي خليتني
بكثر ما تندمت لان اختاريتك هسة فرحانة
لان دخلت حياتك وصبرت ، جنت اعرف بيوم من الايام
نوصل الـ هل درجة من الحب
جنت متأكدة تحقق احلامي وتكون ألي سند .

الغيهب:- اريد تعتمدين ؏ نفسج عندي ثقة بيج
واسمحلج تداومين جامعة بس اريد تشدين حيلج
وتكملين هل مراحل بسرعة قبل لا يدخل نور مدرسة.

زهراء:- وعد بعمري ما اخون ثقتك بيه
وأبقى دوم ام نور زوجة المحامي الغيهب
الـ خطف قلبي وعلگني بي ڪُـل هل سنين
ما شفت رجال بعدك ولا راح اشوف .

الغيهب:- أدري بيج أصيلة رافع راسي
بيج تدرين اذا واحد من جماعتي يجي يحجي يمي اريد
اتزوج بس ماكو شريفة ، اتذكرج وارد عليهم
اكووو بس اختاروا صح ، وادعوا ربكم يرزقكم بنعمة
لان الزوجة الـ مثلج نعمة ، شوفي زهرتي
اذا بيوم تجين ما مجاوبة
اعتبرها تقصير منج وتنسحب فرصتج بالدراسة.

هزيت راسي وهمست بخجل :- متفقين حبيبي. 

قدمت ؏ جامعة وبدي اجهز ڪُـل الملابس
والمستلزمات الـ احتاجها خلال السنة
وبديت رحلت الدراسة ؏ أصولها
اول مرحلة واجهت صعوبة من حيث
الجامعة عالم ثاني مو مثل ما تصورتها
المشاكل بيها ما تخلص والذكية ما تكثر
صداقات بيها حتى لا يكثر النفاق والاشاعات
عليها ، ؏ طول الدوام الصديق الوحيد
الـ انتظر الدوام يخلص حتى اشوفه حبيبي
الغيهب يوصلني للدوام وهو يروح للمحكمة
بين ما اخلص محاضرات اخابره اول ما اطلع
يصير مقابيلي بضحكته الحلوة
شكد شباب ويانه بالدوام بس أمانة الله ما شافت
عيوني بجمال الغيهب واناقته وثقل شخصيته.

نطلع اني وياه للمطعم نتغدى ونرجع للبيت
نور بهل وقت نايم يكعد قبل لا اجي بساعتين
عمي وياه ومرات هاجر تاخذه الكل ساعدني
بمشواري الدراسي ايدهم بيدي .

جنت مرتبة جدول نظام يومي
ما قصرت لا ببيتي ولا بدراستي
ولا قصرت ؏ عمي وابني ولا ؏ الغيهب .

عدت السنة الأولى بكل سهولة من دون مشاكل
والعطلة استغليتها بالشكل علاقتي بالكل حلوة
احبهم ويحبوني يجوني واروح الهم ما عده بيت فرح زوجة أمير
لا انشوفها ولا تشوفنا .

بدت مرحلتي الثانية سيطرة اكثر
بس اصعب من الأولى ، جنت أستغل
أبسط الأوقات اقرا بيها حتى التلفون بـ وقت الدراسة
ينترك يبقى ؏ كد المكالمات .

مرحلة بعد مرحلة اعرف الغيهب يراقبني
من بعيد البعيد مو قلة ثقة بيه وانما قلة ثقة
بالناس ، ما يحب يحسسني بغيرته وأحيانًا
توصل للقهر والعصبية والانزعاج
يحاول يتعارك ويايه ويتراجع
يحول العركة موضوع :- اي شلونها دراستج شسويتي اليوم .

رديت بعدم اهتمام :- والله نفس ڪُـل يوم بس تحولنا كروبات
نتساعد سوه ومن هل سوالف تعرفها اكيد .

سحب نفس وهو يصك ؏ أسنانه
يحارب ما يبين كدامي هو يغار :- بس بنات لو وياكم شباب .

رديت بكل صراحة ما ردت اكذب علية
ويعرف بطريقته وتصير مشكلة :- ويانه اثنين شباب .

هز راسه وسكت كام شال نور وهمس :- اروح اشتري النور تريدين شي .

زهراء:- سلامتك حبيبي .

عافني وطلع دمه شايط ، صار ڪُـل يوم يراقب تحركاتي
بس ما خليت ؏ نفسي غلط جنت ارفع اسمه واتباهه بي كدام الكل
وهوه بدوره يبرز نفسه كدامهم يدخل علينا
بدون ما ينطي خبر لو يعزمني كدامهم
المكالمات هاي ما تخلص بس رغم هل موضوع
مقلق بس جنت فرحانة صرت محور تفكيره
محور ڪُـل حياته بحيث يترك ڪُـل الشغل علمود
بس يجي للجامعة يشوفني .

بعد تعب سنه كملتها وصرت مرحلة ثالثة رسميًا.

كبر نوري هنا وصار وأعي متفهم
بس حرك وعصبي مثل الغيهب بالضبط
مرات من أريد اضوج الغيهب
اكله كافي تتصرف مثل نور
ومن نور يتعبني اكله كافي تتصرف مثل بابا

نسخة الغيهب بكلشي وصلت بي يصيحلي :- خبالووو اريد حليب .

شلت روحـي وركعتها :- غيهبببب ليش تحجي كدامه
وتصيحلي خبالووو ارتاحيت تعال اسمع شيكول .

شلته وصعدت للغرفة لكيته مخنوك من الضحك
وصاير أحمر:- شبيج تصيحين اني شكو هو ابنج السان .

ذبيته ؏ جرباية وصحت :- اكعد واحجي وياه
اذا بعد يعيدها اعاقبه ممنوع يكول خبالووو
ما اقبل غير بـ ماما افتهمت انتَ وياه .

الغيهب:- حاضر ماما خبالو  .

نور:- حاضر عيني خبالو خبلتي علينا.

دكيت رجلي بالكاع وصحت:- لك والله اخليك
ترفع رجلك وتوكف ؏ رجل وحده احترم لا اخبلك من صدك .

الغيهب:- عمي بعد ما نحجي اعصابج كولي يا الله
بللي ريكج .

عفتهم ونزلت الـ عمي شكيتله عليهم
صاح عليهم مثل ڪُـل مره يضوجوني
يكعدهم مقابيله ويرزل بيهم وهم يتملصون
من الكلام ويعيدوها أضعاف.

صرت أصيح النور ابو هلهوله الصغير
والغيهب ابو هلهوله الجبير .

وهم يزيدون ويصيحولي الـ إبره خبالو
لآن دائمًا أهدد نور بـ إبره ومرات يشوف
صوري وآني بالمختبر.

داومت المرحلة الثالثة وجنت حيل تعبانة
بس أريد اخلص من الدراسة وأستقر
ذبيت نفسي ؏ دراسة ورجعت اقلل
من التجمعات واكتفيت بصديقة
نكعد سوه وناكل سوه ونمشي سوه
ندرس سوه بكلشي اني وياها .

بس تعبت نفسيتي من وصلت للامتحانات
النهائية أختفت سألت عنها ورحت العنوان
بيتهم انصدمت من كالولي:- ابن عمها تزوجها بيوم وليلة وسافر هو وياها .

بقيت بقلق ونوعًا ما ما صدكت بيهم
تمرضت وما كدرت أمتحن انجبرت
؏ كلشي وهددني الغيهب اذا ما اعديها
اكعد بالبيت ، ما يريد أضيع تعب سنة
كاملة وعدني هو يبحث عنها ويعرف أخبارهم.

اعتمدت علية وصرت أمتحن
الى ان خلصت سألته عليها
همس :- صار هواي من لكيت أخبارها
بس ردت تعدين المرحلة واكلج .

زهراء:- احجي فدوة احجي شبيها .

الغيهب:- ابن عمها خاطبها وهي رفضت
مغتصبها وقاتلها ودافنها .

لطمت وفقدت طفت فرحتي حتى
بنجاحي ورفضت اداوم بعد مرت ايام العطلة
واني بحداد ما أكدر لا اضحك ولا حتى
اجامل ضحكتها وسوالفها تتراوالي .

بصعوبة وبعد ما الكل رزلني داومت المرحلة الرابعة
بس بلا نفس ، حرفيًا اعتزلت عن ڪُـل الصداقات
خفت لا انصدم بـ صديقة ثانية
؏ كد المحاضرات واطلع بره اكعد
وحدي ادرس بحيث ارجع للبيت
مسيطرة ؏ مواد .

وقبل الامتحانات سوينا حفلة التخرج
لبست رسمي والغيهب ونور رسمي
دخلنا للجامعة واني رافعه راسي
أخذنا صورة جماعيه ركصت اني وياه ونور سوه
ايهاب ورجاء ما عافوني
ولا هشام وسجى وهاجر اخر شي وصلوا
بقينا شوية وطلعنا المطعم كعدنا ناكل ونسولف
ونضحك ؏ ايام قبل ومواقفهم .

اخر شي نريد نطلع صاح هشام:- يلااا غيهب ورق فلوسك .

الغيهب:- هاي سوالفكم الطايح حظها بطلوا منها
ڪُـل واحد بيكم يدفع فلوس عائلته.

هشام :- وحق ربك ربع ما ادفع انتَ تدفع .

ايهاب:- ولا اني ادفع حفلة تخرج زوجتك
لازم تخسر لو زهراء ما تستاهل .

صفك بيده وصاح :- لااااااااااا تستاهل شلون ما تستاااااااهل .

وكفت رجاء وصاحت :- بويه هلهل علينا.

هشام:- اشرد ولكم صار يرعد .

طلع الفلوس تحاسب هو واهل المطعم
وطلعنا ، اول ما صعدنا بالسيارة
صاح :- نرجع تنظمين وقتج ودرسين
صرفت هواي ولج لا تضيعيها .

رديت بضحكة :- ان شاء الله سهله حبيبي بس نومها .

الغيهب:- منو ؟

زهراء:- الـ هاي شسمها الـ بداخلك همي يكول عليها .

خزرني خزره درت وجهي واني مخنوكه بضحكتي .

باشرت بالامتحانات يوم بعد يوم
كملتها ؏ خير وبيوم أستلام النتيجة
جانت أكو مفاجئه ثانية تنتظر الغيهب
اخذت الشهادة وبيومها اجت هاجر اخذتني
مثل ما اتفقت وياها .

من وصلت عدلت البيت وسويت ميز
بسيط ، رتبت الكيك
والبقلاوة ؏ حلويات وعصاير
وانتظرت دخول الغيهب .

هاجر:- اني اروح ما دام وصل
انتِ بشري .

هزيت راسي طلعت وهو دخل
نزلت راسي وهمست :- شهادتي .

اقترب مني وهو يباوعلي من فوك
ليجوه اكلني بنظراته الجريئة
سحب الشهادة باوعلها وهمس :- رسميًا تحقق الحلم
وصرتي المحلله زهرء .

زهراء:- وعدتني وجنت كد الوعد
خليتني اوكف ؏ رجلي بعد ما جنت
بـ احلامي ما اتخيل اصير محلله
انتَ بيدك بنيت الي حياة اجمل
من ما اتخيل ، اليوم اني زوجة
الغيهب الـ حلمت بي سنين ، وام الـ ابن الغيهب ومحلله
شكرا ؏ كلشي حبيبي ؏ كلشي .

باس شفايفي وهو يهمس:- اني اشكرج ؏ كلشي
صرتي حياتي عائلتي جنت مدمر ما تخيلت بيوم
تكون عندي زوجة وطفل احبهم ويحبوني
نضحك و نحزن سوه نلعب ونتفق سوه
لج انتِ أعظم نعمة هداها ربي الي .

رفعت نفسي ؏ أطراف اصابيعي
وهمست واني أسحب الظرف
من الميز :- هو عادي تزيد عائلتنا نفر صغيروني بعد .

بقه موسع عيونه ما مستوعب كلامي :- يعني شنو زهراء.

زهراء:- افتح الظرف حبيبي .

اخذه من ايدي وشاف صور السونار كدامه
فتح حلكه مندهش وصرخ :- جذب جذب جذب حامل
صدك زهرتي حامل .

لزمت بطني وهمست :- اي اي حامل ربنا رزقنا
بنعمة جديدة ُ عمري  .

حضني بكل قوته وصار جسمه يهتز
وايده ترتعش:- حبيبي .

الغيهب:- يا روح حبيبج .

زهراء:- لا تبجي ابوس عيونك .

الغيهب:- شسوي واوفيج حقج
ڪُـل يوم تكبرين بعيوني اكثر من القبلة.

زهراء:- أبقى بظهري سندي وحبيبي
وهذا ڪُـل الـ أريده.

الغيهب:- انتِ هذا النفس الـ يصعد وينزل
اذا ابتعد عنج لو تبتعدين اموت سعادتي
وراحتي كلها يمج زهرتي .

حبيبي ونعم الزوج
ونعم الأب
ونعم المحب
ونعم السند
ونعم الداعم الاول
ونعم ما اختاريت
ولو يرجع بيه الزمن ارجع اختارك بكل فخر وحب وبدون تفكير .

الكل فرح ؏ فرحتنا خلصت
وقتي ببيتي بين ابني وبين زوجي
وعمي الـ كأنه نسمة هواء باردة
يجمل بيتنا فعلًا خيمة وعلى راسنا
ما احسب هو بس ابو زوجي
هو بتصرفاته وحبه وكلامه يخليني
اخجل اكول عمي وصرت أنادي بابا
هو اب بكل ما تعني الكلمة واذا يعوفني ويطلع
يوم ما تحمل اكعد اتصل علية الى ان يرجع .

حياتنا بكثر ما كانت مخربطة
وهوسه وعبارة عن مشاكل
صارت هادئه مليانه حب
اقدس ڪُـل أوقاتنا
صلاتنا الجماعيه
لمتنا ؏ ميز الطعام
مشاركتنا تالي اليل وسوالف يومنا .

اول ما دخلت السادس اخذت سونار
عند دكتورتي وبشرتني بـ بنوته
ضحكت وفرحت الغيهب ما تنسي
بعدها بفترة داومت بمستشفى
بـ دوام يومي نور صار عمره ست سنوات
دخلنا مدرسة اهلية صباحي اول ما يخلص دوامي
يمر علية الغيهب ياخذني ونروح نرجعه
من المدرسة ، ومرات ما نلحك جلال يروح
النور يرجعه ، جلال صارت روحه بنور ونور يعشق جلال
الـ هل سبب رجعت علاقة الغيهب بجلال احسن وأقوى من قبل .

رجعت متأخر اني والغيهب لكيناهم نايمين
بين ما بدلت ونزلت طبخت كعد جلال غسل وجهه
وراح يكعد نور ، طلع عمي ونور راح يركض فوك
صاح ؏ الغيهب نزلوا وهم يسولفون عن يومهم

اثناء ما ناكل ذب جلال الخاشوكه وهمس:- عندي موضوع وياك
يابه يخصني ولازم افاتحك بي .

ابو الغيهب:- خير صاير شي .

عدل كعدته وهمس:- اني حجيت الغيهب
قبل يومين وكال فاتح ابوية ، شوف يابا اني كبرت
وناوي استقر بحياتي ، حبيت بنية مؤدبة بنت عالم مثقفة
صار سنتين وياها هي مهندسة ويايه حبيتها وحبتني
وقررت أتزوجها.

سكت عمي للحظات معدوده
لكن سرعان ما رفع راسه وهمس :- اذا تحبها ما أعارض طريقك
اني انطي خبر الـ باقي أخوانك ونروح نخطبها .

الغيهب:- أني سألت عنهم مثل ما طلبت وسمعتهم حلوة .

ابو الغيهب:- خلص أذن نتوكل عكب باجر نروح .

وفعلا يومين والكل جهز نفسه وطلعوا الزلم
البيت البنية السيارات ملت الشارع من الطول للطول
عمي فرحان بجلال بشكل لان هذا اخر العنقود .

خطبوها ولان همه عائلة منفتحة البنية معرفة
جلال ؏ اهلها بسرعة صارت الموافقة
وخطبها تم كلشي ؏ خير وصار جلال يجهز
هو وخطيبته بيت احلامهم .

وبيوم مطر ورعد والدنيا باردة
كاعدة بالمختبر أسحب دم من بنية
بعمر الـ تسع سنوات ، حسيت بتقلصات
صارت ببطني ، تصرفت طبيعي وخليتهم يطلعون
ينتظرون بره ، خلصت ورقتها وطلعت النتيجة
سلمتها وكعدت ؏ كرسي الوجع اخذ حيلي .

دخل علية زميلي شاف وضعي انصدم:- خيرج ام نور بيج شي ؟

همست بتعب واضح وجع بصوتي
صرت أون بدون ما اسيطر ؏ نفسي :- اريد جنطتي عفية
عندي ولادة ضروري اتصل ؏ زوجي .

خطية هو نرعب وراح يركض 
سحب الجنطة طلعت تلفوني
وتصلت علية وزاد الوجع صرت
ابجي وبالكوه احجي:- غيهب عندي ولادة عفية تعال بسرعة
الله يخليك خايفة وحدي.

بدون ما اسمع رد انسد التلفون واقل الربع ساعة
الغيهب عندي الدكتورات فوك راسي
شافوا وضعي حاولت الدكتورة تقنع الغيهب يعوفني
اصر يطلعني مستشفى اهلي .

طلعت وياه بالسيارة ويايه دكتوراه صديقتي
خابر الغيهب ؏ رجاء وهاجر اني بعد من الوجع
فقدت وما اعرف احد صرت املخ بروحي واصرخ
بصوت قوي الى درجة مرعبة.

دخلوني صالة الولادة واني منتهية
روحـي جانت تطلع مني بكل صرخة
تطلع مني دموع الغيهب تصير كدامي
وبـ معجزة كدرت اطلع منها وتنور بنتوتي حياتي
اول ما طلعونا من الغرفة وكدام عيني اخذها الغيهب
كبر بـ اذنها وهو يهمس اسمج(زينة الغيهب )
زينة حياتي وهدية ربي .
عندي نور الغيهب
وصارت هسة زينة الغيهب الحمدلله يارب .

بقيت يوم كامل بسبب حرارتي الـ ما ترضى تنزل
سويت كافة التحاليل ومشيت وبعدها ما نزلت
ادخلت الدكتورة وضربوني ابر ومغذي نزلت
شوية وكدرت اطلع البيت اهلي ، ومثل ما ساعدت
رجاء اول ما ولدت ساعدتني أكثر شكد ما جانت تكرهني
حبتني ونسيت اسمي يمها نهائيًا ما تصيحني بـ اسمي
كله ماما من تكولها تجمع الدموع بعيوني
صارت قوتي واني قوتها ، اني امها وهي امي
اني وياها توأم بالشكل وبالروح .

هديتي جانت اخر حلم بحياتي
سيارة وتحقق بوجود غيهب حياتي
وروحي كل هدية ينطيني ياها
يكبر بعيني أكثر واعرف اختياري
وتعبي وعذابي ما ضاع بي
كدرت اخلي يوصل للنور وهو وصلني للقمة .

اول ما فتح ايدي وسلمني المفتاح همس :- سبق وكلت أريد
تعتمدين ؏ نفسج ، الشهادة وصارت بيدج وأحسن من شهادتي
وهسة السيارة ليش توكفين وتنتظرين بين ما اجي ومرات تضطرين
ترجعين تكسي ، سيارتج خليها عندج تحت تصرفج .

زهراء:- عزا صدك تحجي غيهب والقران ما اصدك سيارة .

الغيهب:- تستاهلين يا نظر عيني .

اول ما بديت أستعيد قوتي
ابوية سجلني بـ دورة سياقة تعلمت شلون
اسوقها بكل سهولة والغيهب ما تركني الى ان ضبطتها .

زينة نسخة مني بالشكل
هادئه كأنها بحر وعيونها
بلون الؤلؤ الأخضر نسخة
عن سحبت عيني ولونها .

بعد ما تحسنت رجعت للبيت تركت الدوام
واخذت اجازة أمومة ، ‏صرت أهتم بنور
أكثر أخذت اله كتب صف ثاني وصرت
أدرس بي ، كبر حبيبي وصار متفهم بشكل
هو المسؤول عن أخته بس يشوفني اغسل الها
ارجع للغرفة يصدمني من أشوفه مجهز
الحفاظات والملابس والمنشفة ، وبيده ياخذ
الملابس القديمة يخليها بالغسالة .

والغيهب علمه يعتمد ؏ نفسه من خلال النصايح
صار وحده يسبح ويبدل ويعدل شعره
واخذ مكان كبير بقلب عمي ، تعلم اوقات
علاج عمي ڪُـل ما تصير بـ 12 يروح
يكله :- يلاا حبيبي جدو اشرب علاجك .

يرد علية عمي وهو يكرص خدوده :- هذا الوجهه من أشوفه
اطيب ولك انتَ علاج .

نجاحاتي لا تقل عن نجاحات الغيهب
أسمة كبر وصار من المحامين المعروفين
بشطارتهم بـ انحاء العراق
ومن الأسماء الـ تنذكر بالقضايا الصعبة
بكل مكان أطلع اله واسمعهم يحجون بـ اسمة
وهمه ما يدون بي زوجي احس بفراشات
وأرجع اسولف اله وهو يفرح ومرات
يفتخر بنفسه كدامي :- حتى تعرفين زوجج مو شوية .

دعواتي ترافقه بكل زمان ومكان
صار كل حياتي ، واني ڪُـل حياته .

مرت الايام والأشهر زينة صار عمرها
خمس أشهر وبدينا نجهز عرس
جلال ، الغيهب ما تركه بطلب من جلال
وين ما يروح جلال وياه الغيهب
اختاروا القاعة والملابس سوه
وزوجته اخواتها موجودات
تتصل بيه ڪُـل فترة تسلم علية وعلى عمي
بس ابد ما احب اطوخ علاقتي بـشخص
؏ كد السلام حتى أكون بعيدة عن المشاكل.

وقبل لا ندوخ أكثر ونتضايق بالوقت
طلعت للسوك اني وهاجر ورجاء وسجى
اختاريت فستان لون ماروني
ورجاء ازرق ، وهاجر أخذت لون ذهبي
وسجى اصفر ، حجزنا عند مركز حتى
ما ندوخ بيوم العرس .

اول ما رجعت للبيت نمت
كعدت أشوف تلفوني وانصدمت
لدقايق بقيت جامدة ما مستوعبه
واني اقرا كلام الناس عني
بحثت وما صدكت وأني أشوف
اساوري نشرت حسابي
والبنات صاروا قريبات مني .

نشرت الهم حبيباتي قريت الرسائل وهمه يردون
علية ايدي ترجف ما مستوعبه
أكدر أتواصل وياهم .

دخل علية الغيهب شافني مخبوصه
عقد حاجبه وهمس:- خير شصاير وياج
ترجفين وضعج مخربط صاير شي بس لا مصيبة ثانية .

خليت ايدي ؏ شفايفي وهمست
واني اضحك :- اساور نشرت حسابي .

صفك بيده وعض إصبعه
وهو يصيح:- لا يا كوبرا لا يا سسسسسسسس
عود كلتلها لا تنشرين حسابها.

زهراء:- هاي انتَ منبهااا واكول هاي البنية شبيها
ڪُـل ما اكللها تكلي اكعدي وسكتي ما بيه حيل مشاكل .

الغيهب:- شسوين بالحساب مو كافي شهرتيني ونشرتي القصة .

زهراء:- أريد اصير قريبه من البنات
والله ما أتخيل تخلص القصة وبعد ما اقرا كلامهم الحلو .

الغيهب:- ما تعديها ؏ خير انتِ والكوبرا ادري بيجن
والله يا زهيرة اني اتابع الحساب اذا تنشرين شي غلط
لو تجاوبين خاص تتعاقبين واتصرف تصرف مو حلو وياج .

زهراء:- هذا شنو الكلام حبيبي تهددني
والله ضيعت فرحتي .

الغيهب:- ما اقصد تضيع فرحتج بس اخاف عليج
وبنفس الوقت ما أريد امنعج من شي انتِ تحبي
وتكولين بعدين حرمني ، تواصلي وياهم بس
بدون مشاكل ولا تذكرين عناوين او تنشرين أشكالنا.

زهراء:- صار حبيبي وعد هذا الـ راح يصير .

وبديت أتواصل اني والبنات وصاروا جزء من يومي
الصبح احجي وياهم ومرات بليل قبل لا انام اختم يومي وياهم .

ضاق وقتنا وبدا العد التنازلي
كعدت بـ اول يوم صباح العيد
نزلت لكيت غيهب طالع هو ونور
دخلت ؏ عمي وهمست:- ڪُـل عام وانت بخير يابه  .

بست راسه وهو عايدني دخل الغيهب بيده
علاليك الكاهي والكيمر باس راسي
وهمس:- ڪُـل عام وانتِ بخير سعادتي .

زهراء:- وانتَ بالف خير حبيبي ، أجهز الريوك.

الغيهب:- يلاااا اني وياج .

عفت الجهال عند عمي
ودخلنا للمطبخ جهزنا الاكل ؏ ميز
طلع عمي شايل زينة ونور يركض كدامه
تريكنا واخذت الجهال سبحتها وسبحت
بدلت الهم وبدلت ملابس العيد
دخل الغيهب صاح علية نور :- عيدية نريد .

طلع محفظته وهمس:- ولك لا تتعلم هاك .

اخذ منه 25 وزينة هم 25 اخذهم نور وضمها
بـ قاصته ، وكفت كدامه رمشت بعيوني وهمست:- واني هم أريد.

الغيهب:- لا انتِ عيديتج خاصة .

رفعت حاجبي وهمست:- ورق هسة من هذني الـ حمر
وبعدين عود انطيني العيدية الخاصة .

ضحك بخشونه وحسب 100 الف
أخذت منه ورحت الكنتوري ضميتهن
ونزلت عمي انطاني عيدية

صارت بـ 11 دخل هشام وعائلته
وهاجر واطفالها ، وامير واطفاله
وجلال اخر واحد اجه عايدتهم وعايدوني
اخذت من ڪُـل واحد منهم عيدية
والغيهب يضحك عليهم وهو هم
فتح المحفظة ونقط من هاجر وسجى.

الثاني يوم رحت ؏ بيت أهلي
دخلنا ايهاب واكف بالباب
شفت ابوية كاعد بالكراج لابس
دشداشة بيضه هستوني كلت :- ڪُـل عام وانتِ بالف خير بابا
ربي يخليك خيمة ؏ راسنا.

عاط الغيهب وصاح :- شدعوة لواء رحيم
الـ يشوفك يكول نفاخه ومنفوخه نفخ لا طك .

ضحك أبوية ورد علية مستهزئ:- ولك أسكت لا اكوم
اخرب العيد علية وازوج بنتي .

الغيهب:- راحت عليها أبنها بطولها.

رحيم:- لا وحق ربك الف واحد يتمناها .

الغيهب:- وهي ما تتمنى من هل الف بس اني
مكفيها للعلم وما تشوف غيري هيج تموت ؏ ربي .

رحيم:- أنسان مشهور مفضوح تلبك لبك وين الحك عليك .

اقترب تباوس وياه وكعد شوية وطلع
للظهر اجت رجاء سلمت عليها وكعدنا سوه
للعصر ابوية طلعنا نفتر بالسيارة وهم
مريت اشتريت عطور .

صورت تصوير بسيط بالسيارة ونشرته للبنات
وشاركت كلامهم الغيهب رد ؏ ستوري :- بالعافيه عليج وعلى ابوج .

صرنا نضحك اني والبنات ؏ كلامه ونتناقش بس
ما اخدر اشاركهم كلشي انتظرت تكمل القصة وأبدي وياهم .

الثاني يوم اجه الغيهب وطلع متفق
هو وايهاب نطلع للوزراء ، بدلنا ؏ سريع
وطلعنا اني ورجاء والغيهب وايهاب
والجهال ويانا .

كعدنا ضحكنا سولفنا ولعبنه لعبة
اونو ايهاب والغيهب ضدي اني ورجاء
فازوا علينا اكثر من اربع مرات
تالي استلمناهم وفزنا عليهم احنه .

قبل لا نطلع اخذ الغيهب نور صعد العاب
ورجعوا نور تعبان بسرعة طلعنا اني رجعت
البيتي وهم البيتهم .

الى ان اجه يوم الأربعاء يوم العرس
كعدنا من الـ 9 الصبح مجرد ما تريكنا
اخذنا الغيهب اني والبنات المركز التجميل وقبل
لا نروح راح ؏ ابو القاعة حتى ينطي
ورقة الأغاني ، صار يسمعنى اغاني ومن ضمنها اغنية
حسام الرسام الف مبروك بس بـ ريمكس ردح منهم
وأثناء الاغنية فتحت تلفوني وصورت وبدون
ما أنتبه ؏ صوت الغيهب يدندن وياه ويغني بصوته .

شاركت الفديو بحسابي الانستا
والبنات نبهوني صوت الغيهب وأضح
نشرته بدون ما أنتبه صرت اضحك
؏ كلامهم وحبهم وتحشيشهم ؏ صوت .

طلعنا من القاعة للمركز سويت تنظيف بشرة
وباشرت مكياج بسيط ونبهت على رسم العين
اهم شي عندي لان عيوني تبرز وجهي
من خلص اباوع علية صار هادئ مثل الـبالي
سرحت شعر وخليته مفتوح ؏ طوله النهاية ظهري
كملت اول وحده والبنات ورايه
طلبنه غده كعدنا ناكل قبل لا نطلع
ساعة واجه الغيهب أخذنا بدلنا سوه
وسبحت الجهال وبدلتلهم
والغيهب لبس وطلع مثل ڪُـل يوم شيخ الشباب بعيوني .

طلعنا سيارة للقاعة ، ڪُـل واحد وعائلته
قبل لا نطلع عمي نبه ؏ امير ما تجي فرح
وفعلا منعها تحضر كعقاب الها .

دخلنا للقاعة وصارت المعازين شي
وره شي يدخلون من أقارب واصدقاء
جلال والموظفين وياه عازم هواي منهم
ومبين هو محبوب عدهم .

اشتغلت الأغاني والحفلة صارت نار
دخلوا اهل العروس بين أصوات الهلاهل
والهوسة ميزة صديقتي واختي من الدنيا
اساور دخلت هي وأهلها عفت الكل ومشيت
بتجاهم وما احس غير انسحبت من ايدي
همست بنزعاج:- ايدي شبيك اريد اروحلها .

الغيهب:- عليمن تركضين هاي لو ما كوبرا ودخلت للقاعة.

زهراء:- تغار وداعت نور دباع باع الأناقة هيبة هيبة.

ضحك وراح يسلم ؏ اهلها وآني استلمتها بوس
مثل ڪُـل مره اشوفها بيها أحس بالأمان
من اشوف ضحكتها .

وكفت أساور بعد ما خلص
الغيهب سلام همست :- الف مبروك عليكم ابو نور .

الغيهب:- الله يبارك بيج يوم شعجب هل ايام ماكو مشاكل .

اساور:- اسم الله يا مشاكل ناس فقراء احنة .

الغيهب:- قريته بالستوري مالتج كاتبة الغيهب
ياكل مشاكل يشرب مشاكل يتنفس مشاكل .

كرصتني وهي ترد علية :- نضحك اني والبنات قابل صدك
تشتري مشاكل وتتنفس مشاكل .

الغيهب:- ليش اكذب عليج مرات اي اشتريها مثلًا
هسة قريت مره كاتبين ؏ هل رجال المحترم
العاقل مسعد وانتِ ما دافعتي عنه وكلتي ليش يكولون مسعد.

والمسعد سمع سالفة يحجي
بيها ويتفقون هو والغيهب علينا رد
بصوت خشن وهو يباوع الـ اساور :- ؏ منو يكولون مسعد علية ؟

تكهرب الجو باوعتلي اساور
وهي ادردم :- ولج هذا الدلالة ابو البورتوقالي ما يسكت .

باوعت عليهم منتظرين الجواب
ردت بصوت خافت :- المسعد يعني انسان سعيد محظوظ
شكو بيها من يكولون المسعد عادي .

ضحك بوجهه والتفت غمز للغيهب
الغيهب:- ادري ادري بس كلت أنبه المسعد
هو المسعد واني ابو البورتوقالي.

اساور:- بـ هاي كول كذب نشرت صورتك لابس روباط
بورتوقالي لا فبركة ولا سحر.

الكل صار يضحك دخلنا كعدنا سوه دقايق
وكمت اركص اني والغيهب
تبدلت الأغاني للردح وصار الركص
بفلس كبار وصغار نركص ونصيح
شغلوا اغنية ما بعرف والكل صار يغني
بصوت واحد صورته ونشرته ؏ حسابي

بعد ما تعبت رجعت كعدت بصف أساور اسولف
أخر الأخبار ،­ رغم الترتيب وجانت تمثل القوة بس
وأضح التعب عليها أكثر من مره
سألتها شبيج ترد :- مابيه شي بس تعبانة ونعسانة ­ .

زهراء :- طبعًا تتعبين كم مره كلت لا تضغطين على نفسج
وتعبين هم تكتبين وهم دوام وووو كومه مسؤولية
اختمي القصة بسرعة وارتاحي كافيييي .

اساور:- هو بعد بارتين كاتبتهم بس اصحح
وأنشر وآخذ أستراحة ادعيلي .

­ ­وكف عمي ابو اساور وصاح :- يلاا بابا نرجع للبيت فارغ .

هزت راسها وكامت بوستني وراحوا سلموا على عمي
وأخوان الغيهب وطلعوا كلهم سوه .

بقيت افتر بين المعازيم اسولف وياهم اني وهاجر
وملاك ، وقبل لا يطلعون العرسان الكل اجتمع
وكفنا جماعيه ناخذ صورة حضني الغيهب من خصري
وهو شايل زينة ونور واكف جوه رجلي مسوي علامة الانتصار .

طلعنا من القاعة وعفناهم يوزعون العشاء
الغيهب يزفهم بسيارته ، أخذنا الجهال
وطول الطريق شغلت اغنية (ملك الفبركة)

الغيهب:- غيريهااااا أكره هل اغنية اموووت منهااااااا .

ضحكت بعلو صوتي واني ارد علية :- اغنية الشهرة.

الغيهب:- الشهيرة والمصايب للصبح ما نمت بيومها
وخسرت فلوس حتى تنحذف وكل شوية تنعاد كدامي
لطمت بالهنديييي بوقتهاا لا تذكريني .

غنيت اني والفنان سوه واني اركص
وارفع حاجبي واعض شفايفي
واطك اصبع :- ­بذمتك ودينك مش كنا مدلعينك
من غيرى لصت وإدي بوست ، وشوفت العز بعينك
أهو بكى واشتكى ملك الفبركة ، كان في الفزلكه أستاذ تكتكه
وقت الرحرحة عينه مفتحة ، وإحنا على قديمه .

سحب التلفون مني وغير الأغنية
ولازم يطلع الاغنية طلع روحـي
بيها من يوم نزلت لليوم يكلي عبالك
المغني غيث صباح غناها الي (جانت حياتي عدم
لحد ما شفت عينك ، ايامي لو تنهدي أهديها لسنينك
ادمنتك وخلصت بعد ، قربتك وكلشي إبتعد
تصور وصلت المرحلة يمي وكلت وينك
صير بحياتي گمر ڪُـل يوم اشوفنك
اصلا حياتي بدت من گتلي احبنك  )

اول ما خلصت الأغنية نزلنا من السيارة
ايدي بيده وجهالي ويايه ، دخلنا جلال وزوجته
وطلعنا ؏ فندق بصف الفندق مالتهم يصير صديق
الغيهب حاجزين عنده ، صعدنا بالمصعد
ونور يكمز اني ادوي الدكمه اني اوصلكم
دخلنا الممر الغرفة فتح الغيهب الباب
ودخلنا كلنا ، نزعت أحذية الجهال
الغيهب طلب آكل وكف ينزع بالسترة

زهراء:- اوكف اوكف صورة أخيرة.

عدل نفسه وراح شال زينة ، ونور وكف بصفي
نباوع ؏ لمراية الطويلة واخذنا الصورة
وضحكتنا ؏ وجهنا .

التفتت أريد أدخل للحمام
سحبني وبيده ورقة:- تعالي قبل لا تروحين .

طبع بوسه ؏ شفايفي ونور يضحك
همس :- أريد بصمة العائلة وبيها تعاهديني
للموت ما تعوفيني ، ما أريد اصحى من هذا الحلم .

حضنت وجهه بيدي وهمست:- هذا مو حلم هذا
الواقع رجعت غيهب ابو قلب طيب وصاحب
شخصية قوية بس ؏ خبيث ، عندك عائلة زوجة
تحبك وتموت عليك ، وعندك أطفال ينادوك بابا
وينتظرون شوفتك اذا تغيب، اليوم اني وانتَ واطفالنا
نجحنا وتغلبنا ؏ كلشي سوه
وثبتنا ماكو قوة بالعالم تكدر تفرقنا
ثبتنا وره الشخص الظالم حكاية
قابله للتغير والتصحيح
بس اذا كان هل شخص طالب المساعدة
مثل ما صار وياك وياية .

الغيهب:- بفضل الله وجودج كدرنا.

سحب ورقة وطلع حمرتي من الجنطة
صبغ أصبعه الـ يبصم بي وطبعه ؏ ورقة
كررها اكثر من مره حتى تصير واضحه
ورسم ؏ أصبعي ولزمه وطبعه بصف أصبعه
نور صار يكمز يريد يبصم ويانه لون أصبعه
وطبعه ؏ ورقة وختمها وهو يروح الـزينة
لون اصبعها الـ صغير وطبعه مثل ما طبع
بصماتنا ، ختمها وهو يكتب يساوي وبصف
اليساوي طبعات اصابعنه الأربعة ؏ شكل
قلب الحب اخذ شفايفي وهمس :- احبج أكثر من ما تتصورين
اني ملكج وحدج وانتِ ملكي وحدي ما انحرم منج
للأبد يا نعمة الرحمن يا سعادتي وراحتي احبج .

زهراء:- حبك كان لعنة بحياتي أصبحت نعمة حياتي
أحبك حبيبي ابو بيتي ونور عيوني وحلمي الأبدي .

تاريخ زواجهم كان

مختصر أخير ..
نور صف ثاني ابتدائي
زينة خمس أشهر
هاجر مستقرة هي واطفالها ببيتها الخاص
هشام مستقر هوه وعائلته بيتهم الخاص
امير مستقر هو وعائلته بعيد عن عائلته الغيهب
ايهاب ورجاء قصة حب أبدية جميلة لا تنتهي وعدهم طفل واحد
سيف يحب بنية منتظرها تتخرج ويتزوجون
وحاليًا هو ملازم اول مع أبو
رحيم مستقر بحياته وبيته بناته قريبات علية
ما مقصر وياهم نهائيًا
ابو الغيهب مستقر مع عائلته الغيهب لليوم
ادعوله بطول العمر لان رجال محترم وطيب وامثاله قليل .

.................................النهاية................................
أنتهت أجمل واقرب قصة لقلبي
قصة صديقتي وحبيبتي الـ شهدت ؏ ڪُـل مواقفها
فرحها وبجيها حزنها وضحكاتها
أتمنى وصلت الكم فائدة القصة مثل ما ردت
وعرفتوا بعد ڪُـل ضعف قوة
وبعد ڪُـل حزن فرح
وكل ما تضيق تفرج
وبالمساعدة نكدر ننقذ بشر بحاجتنا مهما كان سيئ
وبالإصرار نجاح ، وبعد التعب عوض الإلهي
غير متوقع مثل ما صار بزهراء
فتاة اختارتها ولادتها مجبورة
عاشت حياة صعبة عانت من الفقر
عشقت شخص دمرها بـ ظلماته
عانت ما عانت وكنتم شاهدين
لكن بعد الصبر والتضحيات
والتمسك بقوة الله سبحانه
كانت مؤمنة ربها يعوضها
حاليًا زهراء زوجة فارس احلامها وام اطفاله ومحلله
ادعولها بالسعادة وشكرًا ؏ وقتكم وأعتذر عن التقصير
اتركم بحفظ الرحمن والتقي بكم بقصة تجبر احفاد الـ دليم .

إنتهت بتاريخ 17/7/2022

بنص أعماق قلبي دائمًا وأبدًا عُشتارات 🥺😍🧡

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد