رواية ظلمات الغيهب الفصل السابع وأربعون 47 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _44_

لاتقلقي لقد خبئتُكِ بين
عروق دمي والوريد لامفر
لكِ مني ولاهرب  .
..............................
زهراء...

مر وكت طويل واني مستمرة بـ هل حالة المجنونة
الى ان تعبت واختفى صوتي
وكعت بالكاع ما أكدر ارفع راسي
ولا اشيل ايدي ادمرت بكل ما تعني الكلمة .

من التعب يومين نايمة ما أدرك شنو
الصار ويايه وضعي تخربط تمامًا
وجع بطني ما ينوصف  لزمتها وكمت بصعوبة
اتبع صوت نور الـ يناشغ بالبجي
أول ما شافني الغيهب وجهلي نظرات
أستفسار وحيرة تقدم بتجاهي وهو
يتساءل :- شلونج حبيبتي تعالي هنا
كعدي لا توكعين وضعج ما مستقر .

مشيت كعدت ؏ تخم قريب ؏  نور تلمست وجهه  ورجعت
اباوع للغيهب بضياع ، قابلتني نضراته
نزل راسه غلقت عيني وهمست بتعب :- جوعانة.

حجيتها واني متأذيه صوتي ما يطلع
ونهائيًا ما مفهوم شلت نور صرت ارضعه
هو عافني ودخل للمطبخ اسمع اصوات
مواعين نزلت راسي ؏ نور نام وهو يشهك
سودة علية يا روح امك ، من البجي صدره يخرخش
سحبت نفس وكلبي نمرد مرد علية تعذبت وانتَ صغير يا حبيبي .

طلع من المطبخ سحب الطبلة ونزل الصينية
بيها اكل كدامي واخذ نور ينومه بالغرفة
سحبت الاكل والاول مره اكل بهل طريقة
من التعب والصياح صرفت ڪُـل طاقتي
اكلت وهوه طلع كعد كدامي ما نطق بحرف
مجرد ما يباوعلي ، من أتذكر كلامي استحي
حتى ارفع راسي واباوع بوجهه

من كملت اخذ الصينية من كدامي وتقدم وكفني
دخلني للحمام جردني من ملابسي وصار يسبحني
بكل هدوء ، نشف شعري بالحمام وطلعت وحدي
بدلت وكعدت بالغرفة الـ بيها نور
وهوه بدل ملابسه وطلع بدون ما يكثر كلام ويايه .

خليت راسي قريب ؏ نور ودموعي اخذت
طريقها صارت تشرح وضعي بدون ما أنطق
بحرف واحد، ضياع ، ؏ خوف ، ؏ ارتباك
التفكير المفرط متعب الى درجة الجنون .

ساعة ورجع هو بغرفة واني بغرفة
مثل ما أريد ، بس ڪُـل شوية يفتح
الباب يطمئن علية وعلى نور ويرجع يطلع .

اربع أيام ؏ هل حالة الى ان صار موعد الدكتورة
جانت الجلسة مختلفة عن القبلها ، صارت تذكرني
بكل ايجابيات حياتي حُـبي للغيهب وشلون نجحت
وخليته يحب نفسه بعد ما كان شبه ميت فاقد
الأمل بحياته انسان تحول مثل الوحش
يأذي ڪُـل شخص يوكف مقابلة
وبيدي ساعدته حتى يرجع الغيهب الـحنون .

صارت تحجي وتوصف حياتنا مستقبلًا
وخلتني اشاركها الحديث مخططاتي واحلامي
وهي ساعدتني وتشرحلي شلون اكدر اخلي الحلم
براسي وأحقق .

أخذت وقتها وهي توصف نور وتأثيره ؏ حياتنا
اخر شي حجتلي عن الغيهب وحبه الي
والخطط الـ هو شاركها بيهم

سألتها عن علاقتنا قبل لا اطلع
ردت عليه والمترجمة فهمتني :- ساعدتكم بكلشي
اله هل موضوع انتِ وزوجج مسؤولين عنه
بيدج كلشي مثل ما بالتعويد اكتشف هل تصرفات
وصار يتلذذ بيها ، بيدج تخلي يبطل منها بمرور الزمن
بالاحتواء والتذكير انتِ غير عن الكل  يرجت احسن وأفضل من قبل .

تشكرت منها وطلعنا بس صدمني الغيهب
من كال :- بعد عدنا جلسات بس مو هسة.

زهراء:- شوكت يعني ؟

باوعلي بقهر وهمس:- مو هسة كالت هي تخابر وتحدد .

طلعنا بس احس احساس الطفل
ما اكدر حتى افكر راسي مرتاح بشكل
ابتسامتي ما تغيب من وجهي صرت العب واضحك
اني ونور الى ان دخلني مطعم اكلت واني احس بسعادة
وهوه عكسي تمامًا فاقد الضحكة والفرحة
اكتفى بالسكوت وما نطق بحرف واحد
رجعنا للبيت اخذت نور انومه هو سبح
ونام بالغرفة الثانية ، عدلت نفسي بدلت ملابس قصيرة تعطرت
ومشيت للغرفة فتحت الباب ودخلت
كعدت مقابيلة وهمست:- عادي نحجي حبيبي .

همس بتعب :- بعدين .

زهراء:- اني اسفة مو قصدي اجرحك وأذكرك بالماضي.

الغيهب:- ما حجيتي شي غلط ڪُـل كلامج صح .

زهراء:- غيهب الله يخليك لا تحجي هيج الخاطري
كوم نتفاهم باوع بوجهي خليني اشوف عيونك .

فتح عيونه يباوعلي بزعل اقتربت
همست بـ إذنه:- اسفة حبيبي والله أحبك الخاطري لا تزعل
اني مستعده اسوي كلشي في سبيل ترجع تضحك .

كعد وجرني من خصري وهمس
بصوت رجولي خشن :- كلت ما زعلان منج
اني مقهر لان تعذبتي وابني تعذب واني تعذبت
بسبب ناس ما تسوه.

زهراء :- الحياة دروس حبيبي نوكع بمشاكل ونتعب منها
بس المهم نتعلم وما نكرر اخطائنا ، خلص نبدي من جديد
ونرجع سوه احسن من قبل ، حبيبي ايدي بيدك للأبد
ما اعوفك .

الغيهب:- ولا آني اعوفج انتِ ڪُـل اهلي وناسي وعالمي وعائلتي
اصيرلج كلشي صيريلي كلشي .

زهراء:- يدلل الحلو مالتي .

كرص خدي وصاح:- ولج شنو الحلو مالتي .

زهراء:- مكذبه قابل دشوف وجهك يبرق برق
نور الكون بي هيج بي لمعة.

ضحك بعلو صوته ورد وهو
يعض ايدي :- نور من الضيم والتعب ولج ولا تكعدين ام الحلوين .

زهراء:- جمالك وكف بعيوني وبقيت
والله لو انتِ مو حلو وسوالفك العوجة
السويتها بيها فلا ابقى بس الحمدلله حلو .

رجع رأسه ليوره ويضحك وهو حاضني

اقتربت من ركبته عضيتها وهمس واني
اطلع الساني:- اممممم لذيذ .

الغيهب:- اذا جوعانة كدامج ما اكول لا .

صرت اعض بي وهو يضحك
ويرجع بعضني الى ان اقترب مني
واخذني بحضنه ونمنا.

بقينا أسبوع كامل هناك ما بقه مكان
حلو ما رحت بي تركيا عبالك جنه
خضار جبال ما مليت منها بس أضطرينا نرجع
استقبلنا هشام وامير من المطار
سلمت عليهم وصعدنا وبعد ما شفت نور
صار من واحد الواحد طاروا وبي
وهو صاير جبير ينافي ويبوس بيهم
وصلنا واول ما فتحت
الباب استقبلتني هاجر بضحكتها الحلوة
بوستني واخذت نور من هشام
صارت مقابيلي وملاك حضنتني وإني بوستها
دخلنا جوه جلال كاعد يسولف هو وعمي
حضني عمي بست راس وايده
وجلال وكف سلم وكعد
الـ تمينا انسولف
عن السفر وشلون جانت حلوة والدكتورة
وتأثيرها على تغير الصار بينا .

عافونا هاجر وملاك وراحوا للمطبخ
ما مقصرات بالأكل
كعدنا ناكل والشباب ما سكتوا لحظة
واني وهاجر وملاك نسولف سوه
بس خلصنا صعدت فوك صار هوواي
كلش هواي ما شفت غرفتي سبحت وبدلت
ونمت اني ونور من كعدت لكيت الغيهب
نايم ويانا ، عفتهم ونزلت جوه لكيت بس عمي كاعد

- هلا والله هسة نور البيت.

- منور بوجودك عمو حبيبي شلونك .

- وغلاتج يا بابا من شفتكم صرت زين
وردت روحـي اتمنى اشوفكم دائمًا سعيدين بحياتكم .

- حبيبي عمو ان شاء الله اسويلك شي تشرب .

- لا عيوني ما اريد اتعبج .

- ماكو تعب اكيد مشتاق الـكهوتي .

- نشرب من ايدج ليش لا.

كمت حضرتها وكعدنا نسولف حجتله عن
الدكتورة ورحلت العلاج وموعدنا الـ ما تحدد

- والغيهب راح للدكتور علمود گلبه .

- لا والله عمو من كتله كال صرت زين .

ضحك عمي ورد علية وهو يشرب كهوته :- اي والله صاير
زين والدم راجع يمشي بوجهه يضحك ويسولف منطلق.

الغيهب:- اخذو ذنوبي بس تحجون علية.

زهراء:- بالخير .

الغيهب:- عيوني ادري انتِ ما تذكريني بس بالخير
بس أبوية يحجي علية.

ابو الغيهب:- ما تصيرلك حل تبقى اعوج ادبسز طول حياتك ما تنعدل .

الغيهب:- شبيه اعوج وما انعدل تتحارشون بيه .

ابو الغيهب:- ما تخاف ولا تحترم .

الغيهب:- لا والله احترمك ؏ راسي انتَ ،بس الصراحة
ما اخاف بس من الله سبحانة وزهراء.

ابو الغيهب:- كفو ذيبة سحلت راسك اليابس .

زهراء:- اجيبك للدرب كتلك اجيبك متراهن عليك أصبح
حبيبك ، كملها عيوني كملها. 

رفعلي حاجبه ما عاجبه كملت واني
اروح للمطبخ وبيدي الصينية :- لا تتعاند وياي ما تكدرلي يا هواي .

عمي يضحك علينا مرتاح وهو يشوفنا نضحك
من رجعت كال:- بابا غيهب مو كلت تصبغ البيت
وتغير الأثاث الكم .

الغيهب:- اي ان شاء الله بس نرتاح لان تعبان من السفر .

ابو الغيهب:- الأثاث يصير بيد الـزوجة أحلى بابا
روح وياها بس كون هي تختار .

الغيهب:- اسبوع الجاي نغير كلشي .

ابو الغيهب:-بس من تصبغ وديها البيت اهلها احسن
مو زين ؏ نور يشم ريحة الصبغ .

الغيهب:- بطلنا لا صبغ ولا صخام ما تروح الواء رحيم.

زهراء:- لا اروح شلون هو هل يومين اروح اشوفهم .

صار ياخذ وينطي وهم تروحين وهم تعوفيني
الى ان اقتنع وسكت من وحده .
بهل يومين ڪُـل الغراض الـ قديمة انباعت
بس عمي رفض يبيع غرفة نومه غلفناها
وعفناها ملابسنا حولناها بيت هاجر
من خلصنا وصلني البيت أهلي مجبور
خشمه مرفوع وما يسولف ولا يضحك
سلمت علية ونزلت طلع ابوية
من بيت جدي عبر الشارع هو وايهاب
وهو نزل سلم عليهم اني عفتهم ودخلت جوه
لكيت رجاء تنظف .

رجاء:- لككككككك هلااااا بذاتتتتتتت حقيرررررر
لك تعال تعال اليوم اموتك .

سحبت مني نور ودفعتني وكعتله بوس
وكرص وعض وتصرخ :- لك اريد اشفطك .

دخل ابوية وايهاب صاحت بصوت :- عليك الله بابا مو ينوكل.

رحيم:- اي والله اله وحشه حبيب جده .

باوعت ؏ ايهاب وهمست وايدي
؏ خدي :- شوف مرتك الـ ادبسز بالجذب ما باستني .

ضحكت بعلو صوتها وهمست:- لج والله نور اخذ عقلنا
بعد ما نريدج بس نريد نور .

ايهاب:- بعد ما تريدج خلص سمعي الكلام .

دخلت جوه سحبتني وحضنتني
كرصت خدها وكعدنا كلنا
رجاء راحت جابت المي وعصاير
وهمه يسألوني ؏ سفر وآني أجاوب
الى ان راحت تكمل المطبخ ركضت
وراها كرصتها من ايدها وعطت بيها :- شنو هل نظرات
والتغمز والحركات بينج وبين ايهاب ولج احجي .

غطت وجهه بـ اثنين اديناتها وهمست :- اخاف احجيلج
وتضحكين علية .

رديت بضحكة قبل حتى ما تحجي :- لا ولج ما اضحك فجريها  .

رجاء:- كبسلني وصار الصار .

زهراء:- ما فهمت لج احجي عدل .

رجاء:- لج والله اشترالي منوم
اني احسني نعست وسكرت وهو يحجي حلو
ويتلمس ويبوس اختج راحت بيها وما اعرف شلون صارت
بس من يومها بعد ما خفت ونسيت كلشي ويقترب مني عادي
بدون لا خوف ولا رهبة ، وهو جبرني ما اخاف منه لان
حيل حباب ويايه واذا اكله ابتعد يبتعد
ذكرتيني بـ اول يوم ڪُـل شوية اكله روح مني
وابتعد ابتعد وهو يبتعد اخر شي صاح :- نومتيش يا نومة الكشره.

زهراء:- يعني هسة وضعكم تمام زوجته وهاي وتم كلشي .

رجاء:- الف الحمدلله اي تم كلشي اني زوجة النقيب
ايهاب بعد تاج وباج عيوني لا تكلميني.

حضنتها بكل قوتي وهمست :- اخخخ شكد جنت خايفة
عليج بس الف الحمدلله عدت سلامات حتى ردت اكول
الـ ايهاب يسفرج ؏ نفس الدكتورة الـ تعالجت عدها .

رجاء:- ليش ايهاب مقصر بالدكاترة ومن احسن ما يكون
بس بعد هي تعتمد علينا الدكاترة ما يفيدوني بـ هل مواضيع .

زهراء:- ما دام كلشي تم بعد هاي هي
ديري بالج علية وحافظي ؏ بيتج بطلي خبال
وعقلي لا تخلي يمل منج ومن سوالفج .

عافتني وطلعت صاحت بصوت مسموع
وهي تقترب منه:- ايهاب هم عود تمل مني .

باوعلها وهو مقلص عيونه
ما مفتهم الموضوع طلعت
اضحك ؏ خبالها رد عليها
وهي وكفت ؏ راسه :- تفاح انتِ وآمل منج رجاء انتِ مو ياهو الچان. 

كعدت وهي تحضن أيده:- كفووو زلمتي كفووو .

بقيت يوم واحد والغيهب بعد ما تحمل يعوفني
يطلعني من الصبح بحجة الأثاث نفتر ؏ محلات
ما يعجبه شي يمشي ويعيب ؏ غراض
وما يريد لون خشبي لازم كلشي ابيض وذهبي
وبي ما يشتري مرايات خبلني بيهم.

الصباغين بالبيت وعمي وهشام وياهم
واني ويا ؏ اثاث ، بـ أسبوع كامل كمل
كلشي ؏ اتم وجهه واني وسجى وهاجر
نظفنا البيت كله من فوك ليجوه
مسوي تصميم ملكي الجدار كله نقش
والأثاث ابيض فخم هشام وامير يعدلون
وهو يتأمر منا نخلي ومنا نحط وهنا يستقر
صعب حيل صعب ذوقه جان بالتنظيف يلح
؏ شي حتى يتم بـ افضل وجهه ، واذا ؏
ترتيب الأثاث الى ان خلصنا يومين نهد حيلنا
كلنه بحيث اسبوع الثاني ولا واحد وصل بيتنا
يخافون يصخرهم ؏ شي وما يكدرون يكولون لا .

ما استقرينا غير كم شهر دخل علينا
وآني كاعدة اسولف العصر اني وعمي
؏ مرجوحة يأشرلي ؏ ورد ذبلان
دخل الغيهب وصاح :- فوتي جوه بسرعة.

بدون نقاش دخلت فوت اثنين زلم
ياخذون قياسات بالاستقبال
اول ما راحوا رحت ركض صحت :- خير شصاير .

تقرب علية حضني وهو يعض خدي :- اكو ام ما تتذكر
عيد ميلاد أبنها.

وسعت عيوني وعضيت شفايفي:- نسيت من الهوسة.

سحبني من ايدي كعدنا سوه فتحلي كتلوك
وهمس اختاري دزاين يشتغلون عليه باجر .

اختاريت كلشي سمائي وابيض
وشكل النفاخ السنافر وللعصر
وداني الـ ابو الكيك حتى نحجز
عزمنا ڪُـل أخوان الغيهب وهاجر وملاك واهلي كلهم .

الغيهب:- بطريقنا نختار ملابس
لازم عائلتي ندرج بيها لون السمائي والابيض.

زهراء:- من هسة أني سمائي.

الغيهب:- متفقين واني ونور أبيض .

دخلنا ؏ محل اخذت فستان لون سمائي
ملابسهم ابيض وخطوط رفيعة سمائي
رجعت عدلت البيت والثاني يوم رتبوا
الميز والترتيبات كامله ، واني كعدت من
الصبح ما خليت لحم بعجبن دولمة وبورك
وكيكة شغل أيدي ورسمت عليها اسم نور
دخلت هاجر مبدلة بقيتها هي تكمل وصعدت
سبحت وبدلت فستاني ومكياج رسمت عيوني
ركزت عليها اكثر شي ، تعطرت ونزلت
حسيت نفسي صرت عال العال مشيت بكل ثقة
لكيت هشام وزوجته وأطفاله عدنا وامير وأطفاله
بس فرح ممنوع تدخل بيتنا ، ملاك وزوجها
وأطفالها ، أهلي أخر شي دخلوا ابوية وايهاب
ورجاء وسيف والتوأم .

كعدنا انسولف ونضحك بس ماكو أغاني نهائيًا
اخذت تلفوني وكمت إتصلت ؏ غيهب اخذ
نور وطلع بعد ما شفتهم :- حبيبي وينك .

الغيهب:- قريبين من البيت فتحوا الباب.

ركضت الـ هشام كاعد يسولف ويشرب ببسي
اشرت بيدي على شارع وهمست:- هشام غيهب يكول فتحوا الباب .

هشام:- ما ينزل هو يفتح الباب ويفوت .

زهراء:- عود صدك شنو نفتح الباب انزل افتح الباب وحدك .

هلهل علينا بعدنا ما مخلصين:- هو شنووووو غير مبدل
ويايه نور ما أكدر إنزل ويبقى وحده طلعوووا انتوا شنو
تموتون .

هشام:- اعصابك يالمشهور.

الغيهب:- كووووم أفتحوا الباب وصلت كوووووم
تحركون الگلب شلون جنت فرحان .

ابو الغيهب:- فتحوا البوب ؏ حيلها
لا يفلش الدنيا بالسيارة ويشهرنا بالمنطقة.

ركض أمير وشوية وراح وره هشام
ثواني ودخل الغيهب شايل نور وصاح :- السلام عليكم .

سلم ؏ أهلي بقيت صافنه عليهم وبكلبي اقرا المعوذات
جالفين روحهم والحلاقة وهوه مسوي تنظيف بشره
لان وجهه يلمع لمع بهتت وما نطقت بحرف بعد
هو ڪُـل شوية يسرق النظر بتجاهي يشوف رد فعلي
اخر شي إقترب مني وهمس:- شلونها سَمائي الجميلة.

ابتسمت واني اباوع علية من فوك ليجوه:- زينة ومن شفتك
صرت بعد عال العال .

غلق عيونه وضحك من ڪُـل گلبه :- ها ام الحلوين عجبتج .

هزيت ايدي واني أدير عيني منه :- بس عجبتني هو غير
غير جنك كريم شانتي بالفانيليا تنوكل وحق الله .

الغيهب:- يمه ام الحلوين وأصله مرحلة صايرة تزحف
احسج عندج جفاف .

زهراء:- هو انتَ تنطي مجال وتخليني عندي جفاف .

ابو الغيهب:- ولكم زهراء غيهب مو احجي وياكم .

الغيهب:- يابه بنت لواء رحيم تزحف علية.

رحيم:- ولك يا تزحف عليك انتَ وهذا قميصك
جنك واحد يحلب بقر .

الغيهب:- وانتَ وهذا قميصك الأخضر مسوي كمين للطلي .

رحيم :- لا يا طلي مو اكوم اخذ بنتي وأطلع.

الغيهب:- عمي الغالي بنتك تموت بدوني .

دار وجهه ابوية وهو يدردم :- لو ما اخاف زهراء تزعل
هم اباوع بوجهه هل مستهتر الدلالة ما تلحك لسانه.

عفتهم ورحت خليت الكيك اني وهاجر رتبت الميز بالكامل
وكفنه اني ونور والغيهب وره الميز نغني ؏ صوت واحد
ونور يرافس يريد يطفي الشموع ، اول ما خلصنا نزل
نفخ عليهن وطفاها ، الكل قدم هداية سيارة ؏ شحن ودراجة
شحن ، ملابس والعاب ثانية بس عمي وابوية هديتهم فلوس .

اخر شي اندك الباب طلع غيهب دخل جلال بيده ظرف
اخذه الغيهب وفات هوه وياه بقه يحجي ويسولف ويضحك وياهم
كعدنا ناكل كيك التهيت احجي اني والبنات واندمجت
بالسوالف وما اشوف غير غيهب وأكف فوك راسي
باوعتله بستغراب تصاحبه تساءل:- شبيك حُـبي .

مد ايده خليت ايدي بيده وكفت باس ايدي
وهمس بصوت خافت .
الغيهب:- دخت واني أفكر شنو أهدي النور
وهو كلشي متوفر عنده شفت ام نور تستاهل
الهدية مثل ما هديتيلي حياة جديدة تستحقين
الدعم الكامل حتى توصلين الـ حلمج وأكثر .

اخذت الظرف وهمست :- كلشي ما فهمت شنو هذا غيهب .

الغيهب:- افتحي وشوفي .

الظرف كبير بيي شريد أحمر معقود
؏ شكل فيونكه سحبتها وفتحت الأوراق
الكل يباوع بفضول يريدون يعرفون
شنو الـ بيدي بديت اقرأ واندمجت بيها
لدقايق رفعت راسي مصدومة هزيت راسي وهمست :- غيهب شنو هذا .

الغيهب:- لازم يتنفذ وعدي الج هذا تقديم امتحان خارجي
سادس لازم اكون كد كلمتي وتوصلين كلت بس يصير نور
سنة تباشرين بالدراسة.

ابو الغيهب:- كفوو هسة عجبتني .

رحيم:- طلعت خوش تفكر .

زهراء:- بس اني ما مستعده أصلًا ناسيه كلشي .

هاجر:- هو نمونه كلنا مكملين وندرسج لج والنبي
اذا مو معدل بـ 90 كلشي ما افتهم .

زهراء:- بس نور صغير ويريد إهتمام ما أريد أقصر وياه .

هشام:- باجر عكبه من يكبر هم يسأل ليش ما كملتي
خلي يفتح عيونه ؏ دنيا وامه شهادتها ينحجي بيها .

الغيهب:- لا تفكرين وتشيلين هم اني رتبت كلشي
ومخطط للمستقبل انتِ بس شدي حيلج ورفعيلي راسي .

زهراء:- واذا فشلت شلون .

الغيهب:- ما الومها لان عاشرتني تعلمت تفكر
بالسلبي وتعوف الإيجابية ،لج بابا عوفيها علية
وكلشي سهل لا تصعبين الموضوع.

أبتسمت واني حايرة فرحانه بس متردده
سحبني الـ حضنه وهمس :- لا تخافين بداية معرفتي بيج
هم خفت منج هم اتعبيني فكرة بالسلبي بس بعدين صرتي
ڪُـل حياتي وحققتيلي ڪُـل أحلامي وصار وقت احقق ڪُـل احلامج .

زهراء:- جنت انتَ أكبر أحلامي وحققتك
وخليتك تحبني غصب عنك بـ إصراري
وأكدر أصر اكثر وانجح بهل امتحانات واحقق
باقي أحلامي.

قهقه بصوته الخشن وهمس :- واني وياج بكل خطوة
تخطيها وعد أرسم الج حياة وردية وبعمري ما اوكف بوجهه
احلامج ، دائمًا اكون المساند والمشجع بكل امور سعادتج .

الكل شجعني الغيهب كعد بصفي ما تحرك بعد
ايده بيدي يضحك ؏ ضحكتي ونور يلعب
ويانه ، من صار اليل اني والبنات حضرنا الاكل
وكعدنا نتعشى ، اول ما خلصنا شربوا جاي
وقبل لا يطلعون ضحك ايهاب وهمس:- نختمها بخبر
حلو يخصني اني ورجاء.

الغيهب:- أطربنا .

رفع إيهاب صدره ورد بثقه:- راح أصير اب .

زهراء:- أحلف يعني رجاء حامل ؟

رجاء:- زهرتي تصير خالة عيني .

نزلت دموعي عبالك كالولي بنتج حامل
حضنتها بكل قوتي وهمست :- الف الف الف مبروك
يا روح وقلب اختج انتِ .

رجاء:- ربي يبارك بيج امي ام قلب الحنين .

صاروا الكل يبارك الهم وهمه خجلانين
بحيث وخدودهم صارت حمرة
طلعوا من عدنا والكل فرحان
اخر شي هشام آخذ إخوته وطلعوا ڪُـل واحد وعائلته.

رتبت ڪُـل البيت وغسلته اول ما كملت
رحت الحضن محبوبي نعيش بعالمنا الخاص .

يومين والغيهب دخل والكتب بيده
باشرت أدرس امتحانات التمهيدي
تحت جدول نظمه الغيهب حتى
ما يضيع وقتي ، صرت ڪُـل يوم
اكعد بـ 8 الصبح اتريك وأبدي
تنظيف البيت من فوك ليجوه بساعة وحده
اوقت بيها التلفون وأتحدى نفسي اخلص قبل الوقت
بس اخلص اطبخ وأسبح يكعد نور يتريك ويسبح
واخلي يلعب كدام عيوني واني افتح كتبي
وأدرس بس تصير بـ 12 يكعد عمي
أصب الآكل ؏ اتم وجهه اخلي ياكل واني مقابيله
اكمل قرائتي ، الى ان يرجع الغيهب بـ 2 الظهر
بس يسبح وياكل يستلمني امتحانات ركز ؏ كلشي
ما تركني الى آن ضبطت ڪُـل المواد

وبيوم الامتحان صرت أمتحن واني
اكل بروحي اكل شلون ، واخاف
القلق دمرني والتفكير تعبني بشكل فضيع.

الى ان خلصت روحـي خلصت
وكعدت أنتظر القبول منهم
بيومها دخل الغيهب ملامحه
توحي للانزعاج فقدت الأمل
وجنت اعرف ما انجح من اول مره
المواد صعبه علية كلش .

بس انصدمت من اخذت الشهادة
ومن اول ما اجت عيوني ؏ ورقة
اقراها ودموعي تصب ؏ خدي
رفع راسي بيده ونزل خطف شفايفي
وهو يحكم أيده يعصر بيها خصري
بكل تملك همس بخدر :- نجحتي حبيبي نجحتي كلت انتِ كدها .

زهراء:- الدنيا ما واسعتني ما تخيلت بهل سهوله.

الغيهب:- لا حُـبي متوهمة بعد هذا تمهيدي
وراج المهم عندج أربع او خمس أشهر
لازم تضبطين المواد كلها بـ هل امتحانات
تحددين مصيرج وحلمج اريد منج معدل
ترفعين راسي بي ما أريد أقل من 90 .

زهراء:- اذا تبقى ويايه كلشي أكدر أسوي
بس ظل بظهري لا تعوفني ابد .

الغيهب:- وين اعوفج خبله انتِ النفس الـ يصعد وينزل .

زهراء:- كافي غيهب ايدك .

الغيهب:- لازم اخذ هدية النجاح
قابل اقري واتعب بلاش .

رفعني من الكاع وصعد
الدرج وهو يطبع بوساته
؏ ڪُـل ملامح وجهي
نزلني ؏ سرير وصار يتفنن بحركاته الجريئة
صرت غصب عني اتفاعل وياه
الى ان صرت مثل الريشة بين أيده .

مر وقت واني بين أحضان الغيهب
كمت من عنده هو نايم سبحت
ونزلت فرحت عمي لكيته
منوم نور عنده ، خابرت اهلي وهاجر
والكل فرح ؏ فرحتي .

ومن يومها ما تركت شي اسمة كتاب
الغيهب أول أربع اشهر كل ما يرجع
من الدوام بدون راحه يكعد يدرس بيه
الى ان نهلك يعوفني ويروح ينام
من اقترب الامتحانات وظل بس شهرين
ترك ڪُـل القضايا وبعد ما استلم
في سبيل يبقى بالبيت ويخليني اضبطها

نور هاجر تكفلت بي ما اشوفه بس
من يريد ينام ، تعلق بجهالها ويضوج
اذا يبقى وحده بالبيت ، عمي يحب يروح عدها
العصر ياخذه حتى البيت يفرغ ويدرسني الغيهب
ومن تصير بـ 12 يرجع عمي ونور
يعوفني الغيهب بـ وقت الاستراحة
احضر الهم كيك والعصائر والفواكه
ونكعد نباع تلفزيون وناكل و نسولف
واختمها انام والثاني يوم يتكرر الروتين .

وبس دخلنا العد التنازلي
الغيهب صار يرعد :- كاعد اطلگ خايف منج تصدميني .

زهراء:- قصدك اني مو كدها .

الغيهب:- خبالو ادورين مشاكل ويايه .

زهراء:- ما ادور بس تعبت انطيني
استراحة ساعة وحدة هي شنوووو تعذيب .

الغيهب:- مو الصبح اخذتي استراحة
نخلص الوقت ؏ استراحاتج .

باوعتله صفح ونزلت آخذت الاوراق
بيها اسئلة وكعدت أجاوب عليها
جمع اسئلة خمس سنوات شرحها بالتفصيل
وبعدين امتحنت بيها بحيث المادة مو بس تنفهم
لا تنحفظ وتنطبع براسي مثل الرسم .

وبيوم الـ يصادف عنده شغل مهم
جنت اتمنى يعوفني ارتاح بي
بس هيهات ، يخليني ابدل وياخذني
البيت هشام ، هنا المصيبة الكبرى
اسئلة هشام اصعب من الصعب
يخليني اكمز مدري منين يجيبها
ابقى صافنه بس يوم بعد يوم افتهم
ومن خلال هل اسئلة يسهل حتى الكتاب علية
بحيث حتى اذا تجي خارجي اكون جاهزة.

ليلة آول أمتحان اريد بس انام ما اكدر
سحبني الغيهب نومني ؏ رجله
وهوه يلعب بشعري ويهمس بـ أذني
كدرت استسلم وانام ، نمت أربع
ساعات وفزيت ؏ صوت الغيهب
اشرلي ؏ ميز مقابيلي بي ڪُـل الأوراق
وعلية كلاص كهوة ، كمت غسلت وشربت
كهوتي صحصحت وصار يراجعلي
المهمات ، حسيت نفسي خلص ضبطت كلشي
كمت سبحت وصليت وبدلت وطلعنا للامتحان
نور نايم عند عمي ما يفرك عمو لحظة
خلصت الطريق كله أراجع ، قبل لا انزل
لزم ايدي باسها وهمس:- لا تخافين ولا ترتبكين
كلشي سهل صدكي بس اهم شي تركزين
ولا تستعجلين ابد لا تستعجلين ومهما يصير
لا تنفهرين ولا تضوجين زين يا حلوة.

زهراء:- بس ادعيلي.

الغيهب:- شلون لعد توكلي ؏ الله يا نعمة الرحمن.

نزلت وهو نزل ويايه دخلت القاعات الامتحان
وصرت أنتظر وزعوا الدفاتر واخر شي الاسئله
المراقبين متشددين بشكل فضيع بحيث
راسي ممنوع ينرفع .

قريت ايات ودعاء بنية تسهيل أمر
اخذت شهيق وزفير وكعدت احل بكل
راحة ، وقبل لا يخلص الوقت بـ خمس
دخايق نقلت الحل ؏ ورقة الاسئلة
وسلمنا الدفاتر الامتحانية وطلعت.

صار الغيهب كدامي أيده ؏ راسه
خطف الورقة مني وهمس:- يكولون الاسئلة صعبة
نار بس لا تضخمنا.

رديت والرجفة بصوتي خايفة من رد فعله :- ما ادري والله
حليت الـ أكدر علية وطلعت بس ما عفت شي حتى
السؤال الترك .

وكف يباوع ويحسب ويخلي ويجيب منا ووو
بين ما خلص رجلي صارت خيوط :- صدك هيج حليتي
لو هسة من طلعتي كتبتي من الطلاب .

زهراء :- لا حبيبي والله من الدفتر نقلته هنا .

الغيهب:- يارب يطلع كلامج صح لان تقريبًا
كله صح ما عندج غلط .

زهراء:- ان شاء الله صح .

رجعت للبيت من الهبطة بس
نظفت وشفت عمي شنو يحتاج ما يحتاج
من اكل شرب ملابس وكلشي
ونور سبحته واكل وطلع هو وعمي البيت هشام
صعدت فوك لكيت الغيهب سابح ورايح السابع
نومه ، فتحت ايده ونمت عليها سحبني بقوة
وحضني وما يكدر اذا ما يتجرأ صار يبوس
بوجهي وهو يهمس:- خليني اسحب تعب طاقة الامتحان .

نمت بعدها الى ان صار ثاني يوم دراسة
يومين والثالث امتحان ونفس شد الأعصاب
المرينا بي أول أمتحان مريت بي باقي الامتحانات
الى ان ختمت اخر امتحان من التعب وكعت بالفراش
الحرارة لازمتني وهدتني هد رجعت ما اكدر ارفع راسي
من الخوف ، إرهاق الأيام الفاتت كله طلع علية .

أسبوع إني بالفراش غيهب جان والنعم الزوج
منعني أكوم من الفراش ، هو تكفل بالبيت و بنور
وهاجر ورجاء ما تركوني وحدي نهائيًا رغم
رجاء بـ اخر ايام شهر الثامن .

بكل مره يصير الغيهب مقابيلي
اهمس بتعب:- انتِ شدكول انجح اكدر اطلع معدل .

الغيهب:- اذا نفس ما تحلين تنقلين بالورقة
اكيد اطلعين معدل ومو قليل .

زهراء:- زين شوكت يعلنون ؏ معدل مو والله راح اموت .

الغيهب:- هل يومين صيري زينة حتى اسوي الج حفله.

زهراء:- بالبداية خليني انجح .

الغيهب:- بكل الأحوال نعزم الكل بيوم الـ إعلان .

ومر يوم بعد يوم واول ما سمعوا
صار الوقت بدون ما نعزم الكل
اجه البيتي ، ابوية ورجاء
وهشام وامير وهاجر وحتى جلال
الغيهب الضغط عنده علك بالعالي
بحيث يفتر ما يكدر يكعد صارت الدنيا تفتر بي .

جلال وهشام والغيهب بيدهم التلفون
منتظرين يطلع المعدل ، كعدت
واني عبارة عن سعفة ويضرب بيها
الهوه العالي ، رجاء لزمت بطنها من التوتر
وهاجر اكلت اظافرها وتعبت بكد ما تصبر بيه

شلت نور بـ حضني وما اسمع غير صرخت
هشام عاط بعلو صوته:-  زهراء هاييييي شنوووووو ....

يتبع ....

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد

بنص اعماق قلبي 🥺🫂🤍