رواية ظلمات الغيهب الفصل الرابع 4 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _3_

تـكـول زهراء...

آني ( فرصة ) وجاي احبك ،
‏استغلني ،
‏من اديرن ظهري عنك
‏لو هوى الله يصير يمك ما يرِدنِي .

يَـــرد الــغــيــهـب ...

إذا أخبرتكِ عن ظُلمتي هل ستظلين تنظرين إليَّ وكأني شمس ؟

هو كال هيج واني انفجرت ابجي ، دفعه ابو مروان
وهو يصرخ بوجهه :- عيب عليك تتقاوه ؏ حرمه هم مو حرمه
شابه صغيرة وحدها بالبيت مو عيب عليك هِـيِّ هاي شيم الزلم .

اندفع الباب دخلوا زلم اثنين وثالثهم الغيهب ضلت عيني
تجول تتفحص تعابير وجهم وتستنجد بـ شخص ينقذها .

تقرب رجال جبير يشبه الغيهب لزمه من ايده وبقهريدفع بي بالشارع
غيث:- عيب عليك زين شواربك ولك تتعارك ويا بنية
وهي واكعه بمشكله وامها بين الحياة والموت .

تقدم علية الغيهب مد ايده خطفه من ابو
وهي صرخه وهي دفعه :-هذا سافل ما يفيد ويا أخد وعطى.

نزل شاب ثاني جاي ويا امير وكف بيناتهم
وصاح ؏ صاحبه :- امير خوية كافي كول يا الله علمود اكل هيج سويت .

امير:- هذولي ما يعرفون امير منوو ولك مايعرفون اني منووو .

الغيهب :- هذا عقله تنك تروح منا لا انسيك منو امير .

ابو غيهب:- مو هيج الكلام بابا اسكتوا حتى نتفاهم .

من سكتوا والكل اخذ وضع الصامت ، لان طريقة كلامه حيل هادئه
وهو مبين علية انسان مثقف واصل ، التفت ؏ امير ورفع ايده ؏ اكتافه

ابو غيهب:- انتَ كلت اني امير يعني تعرف نفسك واصل والك مكانتك
إهداء وراح تفكر وراح تعرف الـ ديصير عيب وموحلوه
بحقك داخل بيت بنية وحدها لا حول ولا قوة واكعه بشدة وانتَ تزيدها
يا ابني يتيمة (وانا اليتيم فلا تقهر ) حرام ابني حرام راجع نفسك الله يرضًا عليك وخليها بمحل اختك .

اباوعله وجهه صار اسود ودنك راسه
ورجع نتر :- هِـيِّ خلتني افقد اعصابي واتصرف هل تصرف .

ابو غيهب:- تجاوزت عليك ؟

امير :- لا بس ما تحترمني وسدت الجهاز بوجهي .

أبو غيهب:- من تجاوزك غلقته ابني ، والـ نفرض صح كلامك
هم انتَ رجل والصار مو من شيم الرجال عزيزي الكريم

المهم انتَ دافع فلوس ؟

امير :- اي دافعلها 50الف مقدمًا ، وفشلتني ويا ضيوفي .

ابو مروان :- مو بيدها هِـيِّ والدتها ما يقصرون وكل الطالبين منهم
يشهدون ؏ اخلاقهم ونظافتهم ونظامهم وانظباطهم بالوقت
اليوم الضروف عكست وياها ليش نصير احنه والزمن ؏ الـ ايتام .

مد ايده ابو غيهب بجيب بنطرونه طلع خمس وعشرين اثنين
انطاها بيده :- روح اطلب من مطعم بلا فضايح توكل .

دار وجهه ؏ بابنا يباوع بغضب وعافهم وصعد وهو مستمر يباوع
الغيهب:- دير وجهك ؏ طريقك احسن الك ...

رجع يريد ينزل :- شنو تتحداني .

الغيهب:- احترامًا الوالدين والناس الكبار ساكت ، لو ما هم ييووو كان انتَ هسة بخبر كان .

لزمه ابو من ايده ومشى بي للبيت واحد يتوعد بالثاني
بقيت جامده بس دموعي تصب والنقس كوه اجره
والله ما ناقصني مصايب .

اندك الباب فتحته بخجل لكيت ابو غيهب وابو مروان
واكفين تشكرت منهم وطلعت الخمسين

زهراء:- هاك عمو تفضل الفلوس ما اعرف شلون
اشكركم وكفتكم ترفع الراس .

ابو غيهب:- انتِ بمثابت بنتي بابا ، دخلي للبيت ولا تفتحين الباب منا
الباجر من ترجع والدتچ بالسلامه ان شاء الله.

تجاهل ايدي البيها الفلوس وخجلتي
هزيت راسي وفعلا سلمت ودخلت للبيت
من البجي خليت راسي ونمت ما كدرت حتى اخلي
لكمه بحلكي ، الثاني يوم كعدت رتبت بيتنا
وخابرت ؏ خالي اريد مره بحياتي
اتصل علية ويرد علية مثل البشر الطبيعي يدك تلفونه
يفتح خط ماكو اذا ما يشبع گلبـي ،ضليت حايرة اروح وارجع
البيت اظلم بلا امي ما بي طعم ياكل بروحي اكل
لو ما عيب اهج اضعف بلاج يمه اضعف
تعاي يا بعد عيوني الاثنين خليني اشوفج كبالي
وترتاح روُحـي المحتركه بنار غيابج .

كعدت بالكاع بنفس مكانها التكعد بي اناشغ
ودموعي تحرك بخدي ايدي مربوطه ، للعصر ندك باب بيتنا
طلعت ملهوفة واني اسمع صوت خالي يحجي وياها

بهتت كلشي بهت لوني انسحبت روُحـي
نشف الدم بعروكي واني اشوف
امي كبالي ؏ عربانه (كرسي متحرك)
الله وحده يعلم شكد حاولت الزم روُحـي
واتماسك ما انزل دموعي كدامها بس فشلت

حضنتها بكل قوتي وبجييت بجي طفله
مو وحده شابة عمرها 22 حاولت تحجي ما كدرت
من وره التعب الماكل من جمال وجهه ، دخلها خالي جوه نامت بفراشها واحسها هسة ارتاحت .

كعد وياي علمني ؏ دواها وشكله حيل تعبان
من خلص كام سلم وطلع راح البيتا يرتاح
رجعت كعدت بصف امي هِـيِّ نامت وايدها حاضنه ايدي
ما تكدر تبقه كاعده هواي .

كابلتها بعد ما تحركت
من مكاني ، شكد مشتاقتلها وما امل شوفتها
كعدتها بليل علمود الدوه وكلتها شوربة خفيفه بدور ملح
اكلت شويه وشربت العلاج شي وره شي ورجعت نامت
قلق تفكير ارهاق اتهرب منه بالنوم .

للظهر وعيت ؏ نفسي البيت هادئ
بس التلفون يدك فتحت خط ؏ خالي
كال :-فتحيلي الباب خالو صار ساعة ادك .

ركضت فتحته ودخلنا اطمئن ؏ امي وكعد وياها
شاف وضعها وطمني:- ما تبقه هيج ان شاء الله نوديها علاج طبيعي وهي بمرور الوقت ترجع بقوة الله .

زهراء:- خايفة عليها ما عندي غيرها .

-كولي يا الله

زهراء:-يا الله.

-هاي هِـيِّ ، اني رايح من تحتاجين شي خابري .

ويا طلعته فاتوا صديقات امي جوارينا
كعدوا وياها يصبرون عليها ، حضرت جايات واجيت
يمهن لليل اجت مرت خالي هم بقوا يمنا لل١١وراحوا

واستمر الوضع اسبوع كامل جوارينا يزورون امي ويطمنون عليها
اضطريت ارجع للشغل لان بعد ما عدنا ولا فلس ومحد بحالنه
نكسر ضهري بالطلبيات ودمروني العالم البطرانه الي ؏ اقل
شي يسون مشكله واضطر اتودد واراضي بيهم حتى لا يلغون الطلب
ويضيع ڪُـل تعبي هباء منثورًا.

الله سبحانه سخر خالي الـ امي وبقه يراجع بيها بعد ما باع المداليا
وصارت علاج الها الحمدلله كدرت تحرك ايدها وحلكه رجع
وتكدر تمشي بس مو مثل قبل .

حبيبتي رجعت تكابلني وتشرف ؏ كلشي
بعد مرور شهر دخلت ام الغيهب الـ ما تركت امي
ابد وصارت صديقتها الروح بالروح يتشاركن
الاخبار ويتبادلن الاكل والشرب وكل وحده تتنغص للثانية
وين ما تروح ام غيهب تاخذ امي ، وامي كذالك وياهم ام مروان
سميتهم الثلاثي المرح ، من يكعدن اصوات ضحكاتهن تجنن
سوالفهن تخليني ارجع ايام زمان وافرح من ڪُـل اعماق گلبـي .

وبيوم اجتنا ام غيهب سلمت عليه  وجهه اصفر
دخلتها الـ امي ورجعت بالمطبخ عندي طلبيت كيك
لزمت الكيكه ازينها بـ كريمة البيضة شلت كاست
الككو الذوبته حتى ازينها بي لفت انتباهي صوت
بجي جفلت ورجعت الككو المكانه وتقربت من الباب

انمرد گلبـي واني اسمع ام غيهب تبجي
رجعت المكاني ارتب واسمعها تكول

ام غيهب:- راح يروح مني احجي  الـ ابو بعد لا تحجي بخبارها
كدامه انتهى هذا القوي راح من تحجون بيها هو يتخبل شلون بيه شلون فهميني .

ام زهراء:- كولي يا الله بالكي لا يصير بيج شي يمعودة  .

ام غيهب:- هسة هِـيِّ سوت عملتها السودة وطفرت ولك يمه استقر
هِـيِّ مو دورت استقرار وفضلت عليك الما يسوه طولك
ولك ازوج وستقر التفت الحياتك  .

ام زهراء:- شنو رد فعله من تحجين هيج ويا .

ام غيهب:- اخ يا ام زهراء ، يكلي اذا ما اشرب من دمها ما يبرد جرحي
اني ميت اريد اموتها وياي .

ويسويها عبالج ما يسويها ، البراسه براسه هذا اذا ما يحرك گلبـي
ويخليني بحسرة شوفته ما يرتاح . وارجع اكول حقه الصار مو سهل

ام زهراء:-عيني ولا مبين علية هادئ چنه الـ ليل ادري دعوف هل سالفة .

ام غيهب:- ضروري اشوف حل بعد ما اسكت عنه بس فهميني
شبيدي اذا ابو مو وياي ، اكله ساعد ابنك يرد علية هو مو زعطوط .

ادري مو زعطوط بس مجروح جروحه تنزف
ڪُـل يومية يكعد عيونه حمررر دم من القهر
اكله يمه شبيك حاجيني

يكلي كلشي بيه كلشي .

اني سمعت هيج لو موتتني ويا ضليت لا اكدر اخذ ولا انطي
ذبيت كلشي وكعدت اتسائل بيني وبين نفسي
يحب؟
وتزوجت؟
ليش تركو بعض؟
يحبها لليوم ؟
يريد ينتقم ليش ينتقم ؟
شخص ما يريدني اني هم ما اريده ليش يدمر حياته لجلها .

تنهدت بنفاذ صبر وكملت بسرعة حسيت نفسيتي انجعصت
بكد ما الخبر صعقني ، خليت الكيكه بالثلاجة تبرد
واني رحت كعدت وياهم وبيدي ضيافة

ام زهراء:- هسة هو وينه .

سويت نفسي عبالك السالفة كلش مو يمي ولا اسمع

ام غيهب:- سافر هج من العراق بكبره .

ام زهراء:- خلي هو بين ما يخلص عرسهم ليش يسوي
غلط ويندم علية ، هو چبير وفاهم يعرف اذا بقه يغلط .

ام غيهب:- ابو نفس الحجي .

ام زهراء:- وهذا الصح عوفي لا تضغطين علية  .

وره مدة كمت طلعت اني والكيكه سلمتها الـ ابو حسن
ابتسم وهو يكول:- كيك وشايل كيك اليوم .

زهراء:- ولا تجوز من كلامك الحلو يا عمو .

ابوحسن:- بنيتي المؤدبه ربي يحرسج .

نزلت راسي واني اتشكر منه
رجعت اريد افوت طلعت ام غيهب سلمت وراحت

وخلتني روُحـي مَنتفضه كعدت ؏ تخم غمضت عيني
وسرحت بخيالي واني اشوف عيونه
اوف شكد مشتاقه اشوفه صار هوايي احارب نفسي ومبتعده عنه
ما اريد ياخذ نضره مو حلوه علية ،دست ؏ گلبـي حتى ما اخون ثقت
امي بيه ، وما اصير سبب بهدم علاقتها ويا ام غيهب .

بس اشتاقيتله ومو بيدي احس حبه امتلك گلبـي
وماكو مكان فارغ اللهجر يسمحلي اعوفه .

انصدم بنفسي هواي شلون حبيته
بهل سرعة واني بطبعي ابد ما انعحب بشخص
ومو ڪُـل واحد يستهويني ويلفت نظري
ما اعرف اني ما مفكره بهل موضوع
وكدست حياتي بمساعدت امي بس .

ايام وشهور عدت وحبه يوم بعد يوم يكبر بكلبي
ويا ڪُـل ذكر اسمه احساس يحتلني مثل المرض ونتشر بيه

بعد ما هربت للنوم
كعدت الصبح اسمع اصوات عاليه بالخارج
مسحت وجهي ورحت للمطبخ الـ امي

زهراء:- صباحك خيير ماما .

آم زهراء:- هلا يمه كعدي يمي نتريك .

زهراء:- ام الزوز يا محلات الاكل وياج .

أم زهراء:- اي صدكت باجر عكبه تزوجين وترحين ويا وتعوفيني .

زهراء:- لا يخسسسي اعوف امي واروح ويا شنو
ازوج كعيدي يعيش ويانا ويصرف علينا .

أم زهراء:- امداج اذا صدك .

زهراء:- شسوي ماكو غير هل حلين لو اعنس لو ازوج كعيدي
لان ماكو جلب يقبل اخذج وياي متأكده .

ضحكت وهي تصب الجاي

أم زهراء:- من هسة مسميته جلب .

غيرت الموضوع واني اسألها :-شو صوت عالي بره .

ام زهراء:- رجع غيهب ومسوين عزيمة .

جني خبله حلكي انفتح من الضحكه
اريد اسيطر ؏ مشاعري بعد ما اكدر
نزلت راسي من شفت امي خزرتني بستغراب

تهربت منها واكلت كم لكمه وكمت
ضليت انظف واريد بس اطلع بره اشوفه
ما صدكت امي راحت للحمام ركضت
الباب الشارع ضليت اباوع منتظره شوفته
كلها بالباب بس هو ماكو اثر اله

خفت امي تطلع وما تلكاني رجعت
وبكلبي خيبه امل جببرة ، بيه
ما بيه كملت الشغل العندي وكعدت
اباع تلفزيون ، من شفت امي كامت تصلي رجع
طلعت باوعت سيارته مشتغله بس ما موجود
صار عندي امل بشوفته

واني مركزه اباوع اندك الباب دكه قوية صارت بوجهي 
رجعت ليوره هِـيِّ وكعه وهي صرخه
اجتي امي تركض تصيح  :- يمه اسم الله ولج كومي  شبيج.

رديت برتباكً:- اريد افتح الباب وزحلكت .

كمت واني متردده من نظرات امي فتحت الباب
صار ابوالزبل كبالي صاح:- بسررعة زبالتكم .

ضليت اباوعله والله اكره هاي الكلمة كول طلعوا الزباله زبالتكم شنو
فاتت امي جوه واني  اخذت الجيس انطيته اله اريد اسد الباب طلع الغيهب وطلع گلبـي ويا وعيوني وراحوا يمه ، ضليت بمكاني ما تحركت غصب عني اعصابي كلها تموت  واصير حالي حال  حال المخدرين

صعد بالسيارة نزع النظارات ونزل راسه بعلامة تره شفتج
طبكت الباب هو رجع لبسها وطلع .

رجع ضحكتي
رجع راحتي
رجع هدوء افكاري
استقر ڪُـل وضعي بشوفته ما امل من وجهه ما امل .

الساعة بـ 8 ليلا اندك باب بيتنا
طلعت لكيت ام غيهب بالباب
همست ببتسامه:- هلا خاله تفضلي .

فاتت بسرعة اريد اسد الباب
دخلت وراها لكيتها لازمه
ايد امي وتحجي والضحكه
تارسه وجهه :/ غيهب يريد زهراء .

هل كلمة سطرتني ؏ وجهي
امي ما كدرت تفتح حلكها بكلمه
بس عيونها ركزت بعيوني

رجعت كررتها :- الغيهب بريد زهراء والله رادها .

ام زهراء:- كولي يا الله ؏ كيفج شنو يعني يريد زهراء ، بنتي صغيرة
ما انطيها ،وهم نسيتي غيهب طالع من علاقة فاشلة وكارهه حتى نفسة

ام غيهب:- صح بس هو هسة صحه ؏ نفسة ويريد يعيش حياته ويستقر.

آم زهراء:-ما نساها شلون يستقر هو قبل كم يوم يهدد ودمه محروك  .

تغيرت ام غيهب وغابت ضحكتها من معالم وجهه
-شفتهم منج ما تنطيني زهراء.

ضلت امي ما تعرف شتكللها من جهه اني بتها وعزيزتها وحيدتها
ومن جهه ثانية صديقتها كبالها ما تريد تزعلها .

بعد تفكير عميق همست :- خلينا نفكر يومين تلاثه ونردلكم خبر

ايدتها ام غيهب وكعدت وياها تحلفلها :/ وروح امي وابوية احسبها حساب
بنتي اخليها كبال عيوني اذا صارت مرت الغالي ، وهم كبالج مو بعيده ڪُـل يوم الصبح تمر عليج العصر تكعد يمج ، انتِ تجين يمها .

أم زهراء:- يصير خير ان شا الله.

بعد مده راحت امي ابد ما حجت وياي
صاحت عليه فرشتلها وضلت تتكلب بفراشهه
من جهه هم امورهم زينه تدري راح ارتاح من هل ناحية
وهم كلهم عائلة مثقفين ويخافون ربهم

بس لان تعرف غيهب عنده كسره
وبعدة جرحة ما طاب خافت وترددت حييل

والثاني موم هم ما فتحت الموضوع
بيوم الثالث اجت ام غيهب وبتها ملاك
اول مره اشوفها جميلة بجمال الغيهب ، سلمت وكعدت تسولف وياي سوالف
عامه ، ورجعت ام غيهب فتحت الموضوع
وصدمتها امي برفضها ، بس ما ستسلمت وبقت مصره تقنع امي

اخذتني امي ؏ صفحة ما كدرت انطق بكلمة غير
(التشوفي صح وزين الي سوي يمه )

وبنظرها الصح والزين الرفض رفضتهم
وطلعوا مكسور خاطرهم ووجوهم ثكيله .

ام زهراء:-يمه الحب الاول ما ينسي لو بعد سنين
وهو نغدر ونخان ونترك ونجرح
وتعقد  واني جبيرة مو صغيره عندي خبرة بهل حياة واشوف صعبه العيشه تصير ويا انسان مجروح وما يثق بـ احد

رديت بغصه :- صح يمه .

أم زهراء:-هو خوش ولد واصل بس ما راح تعيشين سعيدة
وانتِ بنيتي الوحيدة ما عندي غيرج ما اريد اشوف دموعج الغالية
تنزل بيوم ما اتحمل يا بعد امج .

عارضت قلبي ورديت بعقل :- كلامج هو اليمشي ومابي عيب
وانا كتلج الـ شوفي زين الي سوي وياج اني .

نظرتلي برضا وكامت
گلبـي انتفض وحارب عقلي
واثنينهم اشتغلوا عكس بعض
العقل رافض الغيهب
والقلب يحارب الـ اجل الغيهب .

وبقيت اني بوسط نارهم
رجعت الحياتي وحاولت اتناسى
وحتى الباب لغيت روحتي يمه
اخاف اضعف واشوفه
واعرف امي ما راح توافق علية
واخاف من المجهول ويا ..

هنا الغيهب هو اشتغل نيابتًا عنا كلنا
ومن هنا بدا العب ..

جنت كاعده ادلك رجل امي
بعصارة موف من اندك الباب
امي بسرعة كامت من مكانها تدري
بيه ما اريد اطلع بعد .

فتحت الباب وبعد غياب دخلت صديقتها
ام الغيهب سلمت عليها واني رحت خدرت جاي
بس بالي كله يمهن

هنا سمعت امي تنتفض
ترفض
تقاوم
تستسلم ..

ام غيهب:- الباب يبقه مفتوح وهي شغلت خمس دقايق
بس يحجي وياها .

ام زهراء:-شدكول علية الناس خية كولي غيرها بنيتي ما اقبل تحجي
ويا الغريب  وتبقه ويا وحيدها زهراء خجوله.

ام غيهب:- يا دادا شكو بيها راح ياكلها هنا كلمتين وزهوره واعيه وفاهمه
شنو يبوك نصها ، ما ادري بيج انسانه متفهمه وهو عنده كلمتين بس  .

حد الحوار وشتد اكثر واكثر الى ان اقتنعت امي
واجتني ، ضليت ما اكدر ابلع ريكي نخبصت  خبص
رحت ؏ قوري اريد اخلي جاي خليت شكر بالقوري
وامشي واركع بالغراض .

فاتتلي متردده متحيره همست :- راح يجي غيهب بريد يحجي وياج
وحدكم بس باب الـ استقبال يبقه مفتوح ،ولان عندي ثقه بيج راح اقبل
تدخلين يمه ويحجي العنده ويروح .

رفضت اعترضت اعرف نفسي ضعيفه كدامه
وما راح اكدر انطق حرف
تأثيرة كبير علية وما اعرف اواجهه صعبه حيييل .

بعد حوار طويل كدرت ادوس ؏ نفسي واوافق هل مره
ونشوف شنو المطلوب ؟

بين ما ابدل راحت ام غيهب صاحته
سمعت صوته وتخربطت احوالي
من الخوف ما اعرف اكمز اضحك ابجي
وكعت بالكاع اريد اقوي نفسي ما اكدر والله
مو بيدي احسها صعبه الوكفه مقابيله .

خطوات امي تقترب لازم اكوم وما اخليها تحس عليه
عدلت شالي رشيت اخر ما تبقه من العطر
واخذت شهيق زفيرر وطلعت

امي سبقتني للمطبخ هِـيِّ وام غيهب
واني عصرت ايدي عصر ودخلت
صار كبالي كاعد وهالة الهدوء محاوطته
رفع عيونه التعبانه عليه
رمقني بنظرات ما اعرف خزرات
ضيعني بيها ، تصنمت بمكاني وعظام ايدي احس
تكسرت ما هلكد ضغطت عليها .

طبك حاجبه وحجه بصوته الحاد :-ممكن اعرف سبب رفضج ؟

يتبع ...

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ مُحمـد .