رواية ظلمات الغيهب الفصل الثالث 3 - بقلم اسـاور حسين 🦢✨

رواية ظلمات الغيهب
بقلمي أساور حسين
الحلقة _2_

گالو ما يحبك كلت يايابه !
غير الليله اچودر واكعد ابابه

انفتح وصار كبالي بطوله وبهيبته
ونظراته يمررها ؏ طولي بكل ثقه
بدون ما يحرك راسه ، طال الصمت والارتباك واضح وضوح الشمس علية
وايدي رجفتها فاضحتني بلعت ريكي احس بلعومي يبس
وطلع صوتي مشخوط ما مفهوم :- السلام عليكم.

قلص عين من عيونه وباوعلي بنظره ما عرفت
افسرها مثل واحد ما عاجبه الوضع :- وعليج السلام تفضلي .

قدمت ايدي والصينية والماعون ونخبصت
ذيج الخبصه التمام وكأن اول مره بحياتي
اوكف كدام رجال ضاع الكلام كدام حضرته

زهراء:- هذا ثواب ؏ روح ابوية .

رفع حواجبه بعلامة افتهمت
واخذه من الصينية وهمس بصوت
شبه مسموع وهو ينقل نظراته بيني وبين ايده :- الله يرحمة وشكرًا.

ابتسمت بثقل ونزلت راسي امنع اعيوني من
النظر لعيونه بس عيوني ترجع تعاندني
أطالب بشوف محبوبها :- عفوًا .

رجعت خطوتين للخلف واني أتمنى
الزمن هنا يوكف بس لدقايق
اشبع من وجهه واتمتع بالنظر اله

ستوقفني واني اسمع صوته يعزف
بأذني بصوته الرجولي الحاد :- ما عرفت .

رجعت التفتت انظر بـ ضياع :- شنو ؟

غيهب :- اسم والدچ .

زهراء:- رحيم .

غيهب:-رحيم ما رحم بكلوبنا .

رديت بستغراب :- ليش شمسويلك بابا .

الغيهب :- امچ منتظرتچ بالباب ، وشكرا .

كمل كلامه ودخل مشيت بسرعة عبرت الشارع
فتت للبيت واني ورايه :- شحچه وياج .

زهراء:- منو .

بقت ساكته بس تباوعلي
اشرتلها شكو دارت وجهه
مني ، جريت نفس وهمست :- بس راد يعرف اسم ابوية
علمود يقرون الفاتحة مو اكثر وشكرني .

ام زهراء:- ذبي عباتج وكفي المطبخ .

أومأت براسي ومشيت للممر علكت عباتي وبديت انظف البيت
من أكثر الحضات ارهاق للعقل هِـيِّ فترة التنظيف
اني ساكته بس عقلي يشتغل بصورة مؤذيه
الى ان أنتهي وانتبه النفسي واطرد الأفكار من راسي
وترجع بعد دقايق اطالب بحل فوري

كملت لكيت روُحـي بالحمام غسلته اخر شي وسبحت
صبيت اني وآمي وكعدنا ناكل اندمجت اباوع ؏ مسلسلي
المفضل حتى أتجنب التفكير المفرط المتعب
المؤذي نفسيًا بي ، تأخر الوكت انطيت الـ امي ادويتها
وفرشت فراشي بصف فراشها ونمنا سوه
ويا محلاها من نومه وياريت بقيت ُ ؏ــمري كله
؏ هل روتين ولا صار الراح يصير .

الثاني يوم اجت علينا مرت خالي
الما تدخل علينا دخله اذا ما تسممنا
اول ما ستلمتنا تبجي ماعدنا وحالتنا بالضيم
وترجع تكول اشتريت تلفون الابني ويطلب
ومتعبني وامي سوده علية حنينه ما ينطيها
كلبها تتعاطف وياها .

بس اني ما تعبر عليه سوالفها تشبعت منها
واعرفها من نظراتها شوكت تحجي صح وشوكت
تمثل ،سويت صينية الغده ؏ اتم وجهه
وكعدنا تسولف وناكل احسها سممتني
ماكو خبر سلبي ما ذبته بوجهنا
شوية وابجي من وجع راسي بسبب كلامها
الى ان راحت امي اخذت حبوبها وجسمها كله
يرجف ، ضلت تحرك بكلبها ؏ اخوها وحالته

زهراء:- كافي يمة والله جذابه هاي وهم بخير
ما تعودتي ؏ سوالفها .

ام زهراء:-شنو تستفاد اذا اجذب يا يمه
هم صدك قابل شعدهم ، عندي مداليه ذهب صغيره
ليش ما ابيعها وانطيهم خطيه يمه ماعدهم احد .

زهراء:- لا تخبليني يمه شبيج الخاطر الله
مو هوه نفسه انطاج الفلوس وشوفنا درب الشارع
بالجذب ما سأل علينا وكال خويه اني اشوفلكم بيت .

ام زهراء:- اصير احسن منه يمه شلون انصير مثلهم
لو احسن .

زهراء:- لا احسن ولا موزين ولا نعرفهم ولا نتقربلهم عوفينا بعيدين يمه .

ام زهراء:- لازم نتقرب منهم زهورتي باجر عكبه ربج ياخذ امانتي
عدمن تبقين ، شلون تعيشين وحدج صعبه يا امي صعبه .

زهراء:- عمرج طويل يمه لا تحجين هيج .

آم زهراء:- هاي دنيانا يمه ما جبت هل حجي من جيبي .

زهراء :- اذا الله اخذج مني ادفن روُحـي بصفج اني وياج للموت يمه للموت .

حضنتني من ناشغت وبجيت كدامها
ام زهراء:- ولج ما موت يا خبله كافي لا تبجين تروحلج فدوه امج .

زهراء:- لا تعوفيني يمه ما اتخيل حياتي بدونچ .

ام زهراء:- كومي جيبيلي مي ومسحي دموعج لا تصيرين حساسه
وترخصين دموعج ؏ كلشي يمه وراج دنيا صعبه خليچ قوية
وشدي حزام ضهرج واجهي الكون كله .

هزيت راسي وكمت انطيتها مي ورحت للتلفزيون عفتها تنام ؏ راحتها
من تأخر الوكت نمت لان وراي طلبيه باجر لازم اكعدلها من الصبح .

طبيعي جدًا الملم شتات نفسي المرهقه
وأنام حتى الصبح افتح عيوني
بكل نشاط وحب العملي وتأدية كل واجباتي
بدون اي تقصير او إهمال

لكن الـ مو طبيعي اصيح امي وما تكعد
هنا مو بس عيوني تسود الدنيا بكبرها تضيق
؏ ركبتي وتخنكني حد الموت

بعدني ما مصدكه وما مستوعبه ڪُـل الصار
اني ڪُـل يوم من اكوم منها تفتح عينها اليوم
شبيها دخيلك ربي .

اقتربت عليها وبدت نبرة صوتي تعلو اكثر فـ اكثر
تعلن عن ضعفي ورجفت روُحـي عليها

زهراء:- هاا يمه ما تجاوبيني ليش حبيبتي ماما فتحي عينچ ..

نزلت اشوف نفسها ايي والله اكو نفس امي اجر نفس
لزمتها من جتافاتها وهزيتها بقوة :- ادري بيچ ما تعوفيني وحدي
كومي ولا تغدرين بيه ما عندي احد غيرچ .

بس امي نايمه ما فتحت عينها تهسترت
وبديت افقد اعصابي لطمت ؏ وجهي
وايدي تملخ بشعرري .

صررختتتت وصررختتت اطلب المساعدة
بس محاولاتي فاشلة ، رفعت راسي الساعة
بـ7 الصبح كلها نايمة .

ركضت ؏ تلفون اخابر بخوالي ولا واحد يجاوبني
دكيت ؏ ابو حسن رد علية مرعوب صحت
استنجد بي ودموعي غركت وجهي :-امي عمو امي ما تكعد .

ضل يصيح يحاول يفتهم مني :- عمو زهراء خابرتي اقاربكم

زهراء:- اييي ما يجاوبوني عمو تعال انتَ ابوس ايدك امي راحت مني .

ابو حسن :- اني بـعيد يا عمو بالزيارة ساعتين واوصلج بعد عمج
شدي حيلج ولا تضعفين .

زهراء:- ومنا الساعتين ابقه مكابله امي وكاعده اشوفها كدامي هيج
شلون عموو بيها نفسس امي بيهاا .

ابو حسن:/ طلعي ؏ شارع شوفي جوارينكم بوية ..

ذبيت التلفون مثل المخبله لفيت شالي وعباتي
وطلعت بالشارع ادك بالبيبان ، طلع جوارينا
آبو مروان وابو زهره من شافوا حالتي
ركضوا البيتنا هم ونسوانهم
واني وياهم استنجد بكل واحد بس ساعدوا اني
اريد امي ما عندي غيرها .

من صوت صياحي وصوت الزلم
دخلوا علينا هواي جوارين وهنا عرفت
صدك الغريب احسن من القريب

شالوا امي صعدوها بالسياره وصعدت وياها نومت راسها بحضني
فقدت روُحـي تزوهرت واني اشوفها بعد ڪُـل هل هوسه وشالوها
من مكان المكان وهي رافضه تكعد ، مديت ايدي لزمت ايدها
صارت عوجه وحلكه من جوه نعوج لطمت ؏ وجهييي
بكل قوتي حسيت من قوة الضرب خشمي يذب دم
وما هتميت التفتت علية المره كاعده بالصدر
لزمتني من ايدي وصاحت بيه :- كاافيي يمه كولي يا الله راح نوصل
لاتوكعين ويا امج يا عيوني كاافي حرام عليج ما بيها شي لاتفاولين

زهراء:-ايدها نعوجت خاله امي راح تروح مني
رجعت نزلت راسي اباوع بوجهه الحنين الدافي صحت بضعف واني اذكر كلامها البارحة وينعصر گلبـي اكثر من قبل عليها .

زهراء:- يمه بس فتحي عينج شوفيني شلون ترضين بنيتج تتعذب هيج وما تسكتيها ، لا تعوفيني شعندي غيرج ابوس ايدج فتحي عينج يييمه ..

شخطت السيارة وكفت كدام باب المستشفى
رفعت عيوني اباوع منتظرتهم يجيبون سديه
ينقلوها بيها ، جمدت دموعي من شفت
غيهب هو النزل ودخل ،. باوعت على سيارة اي والله هاي سيارته
مااعرف شحجه وياهم ورجع هو وياهم والسديه

شالوا امي بيها واخذوا روحي وياها
نزلت واحس ثكل الدنيا ؏ ضهري
اجر بخطواتي جر والـمره وياي
تمشي لازمه ايدي وايدها الثانية ؏ ضهري

الغيهب:- هذا كلينكس امسحي وجهج ، فوتوها طوارئ دقايق ويطلع الدكتور يطمنكم .

اخذته من ايده مسحت خشمي
وكعدت ؏ كرسي وايدي ؏ راسي
احس بي يريد ينفجر ودموعي ما وكفن لحضه
وحده ، سمعت صوت الباب انفتح كمت
اني وجوارينا ابو مروان ومرته هم جايين

الدكتورة:- حالتها استقرت ضربتها جلطة اثر ارتفاع ضغطها لل22
بس تعدت مرحلة الخطر حاليا ، هذا دواها اريده بأسرع وقت ممكن
من خارج المستشفى.

اخذته من ايده وشكرته
مشيت بسرعه اريد اطلع من المستشفى
وكفت من تذكرت ما شايله ولا ربع دينار
شلون اشتري ، رجعت امشي دايخه ؏ خجلانه
وصلت للمصعد نسحبت من ايدي وجسمي
كله التفتت بلعت ريكي بصعوبه واني اشوفه
كبالي وجهي اشتعل بنار من شفت وجهه

الغيهب:-انطيني الورقة ورجعي .

زهراء:- لا شكرًا اني اروح .

سحبها من ايدي ورد عليه وهو يضغط ؏ مخارج الحروف
الغيهب:- كلت ارجعي .

بقيت واكفه بمكاني صافنه لا اخذ ولا انطي
للحضات ، هز راسه وهمس :- هم صفنت .

رفعت ايدي اشرت ؏ نفسي وهمست:- اني .

الغيهب:- بطلي صفناتچ .

زهراء:- ما صافنه انتَ بقيت واكف منتظرتك تروح .

الغيهب :- صح .

كالها وعبرني وصعد بالمصعد
رجعت المكاني الخجل ماكلني
من صدك ضليت صافنه بوجهه
شكد عيب بعد ولا اباوع بوجهه وما اريد اشوفه
اني بياحال .

من رجع ما حجيت ابد اقترب هو راح للدكتور انطى الدوه
واجه بتجاهي ضليت ارجف والعرك يصب من كصتي

تفاجئت من همس:- يلا يمه نرجع للبيت .

ام غيهب:- لا يمه شلون نعوف البنية وحدها ، نبقى نطمن عليها
وعلى جارتنا ونرجع حبيبي .

الغيهب:- عندي شغل اريد اروح .

ام غيهب:- خلصت عمرك عندك شغل ، عوفه اليوم وابقه يمي .

تأفأف وراح وهو ما عاجبه كلامها وتلفونه بيده يخابر .
رفعت راسي الها :- خاله روحوا ابو مروان وزوجته موجودين
وأمي صارت احسن .

أم غيهب:- حق الجار ؏ جار بنيتي وانتِ بنية وحدج شلون اعوفج
اذا ما اشوف امج فتحت عيونها فلا اتحرك من مكاني . ً

زهراء:- ما راح انسى وكفتكم وياي ُ ؏ــمري كله اشكركم .

طبطبت ؏ جتافي وردت بحنان :- ما سوينا شي بنيتي .

ساعة وفات خالي ويا ابو حسن
اجه خالو مسح ؏ راسي وراح للدكتور
يحجي ويا من رجع اجه يمي :- شلون صار هيج خالو زهراء.

همست بضعف:- ما اعرف كعدت الصبح اريد اخلص طلبيه
اكعدها ما تكعد تهسترت اخابركم ما تجاوبون ، الحمدالله جوارينا ماقصروا
هم جابوها لهنا ولحكنا عليها .

-ما ادري والله يا خالو ما سمعت صوت التلفون.

بقيت ساكته ما رديت علية
شويه وهمس :- كومي ابوية رجعي للبيت جهزي
الغرفة الجوه الـ امج راح ابات يمها وان شاء الله باجر يطلعوها .

زهراء:- لا تكلي اعوفها ما اكدراريد اشوفها تفتح عينها وتباوعلي
اشتاقيتلها خالو اريد امي .

حضني واني انفجرت ابجي بحضنه
وكلها تواسي بيه وطبطب ؏ ضهري
كلامهم كله بأذني بس اني اريد اسمع
صوت امي اشوف امي احجي ويا امي
ما اريد غيرها مااريد .

بقيت كاعده الى ان الدكتور طمني فتحت عينها دخلت
بس اني كعدت يم ايدها ابجي سوده علية ما تكدر تحجي
وجهه لونه شاحب وصاير بـ لون الأصفر
عسى اني بمكانج يا نظر عيني ما تستاهلين يا حبيبتي .

لزمت ايدي بقوه ودموعها نزلت ؏ عينها واخذت مسارها
مسحتها بيدي وتقربت بست راسها ما اريد تبجي

زهراء:- اخر مره اسامحج تسوين هيج بيه ، يلاا بسرعة صيري
زينه هاا وعوضيني اريد اطبخيلي ڪُـل اكلاتي الـ احبها
شعبالج اطلع ثمن دموعي .

ابتسمت وغمضت عينها من اثر الـ ادوية
دخل الدكتور راح يبقوها بالمستشفى الباجر
طلعت ورجع خالي نبه علية ارجع بعد ما شفتها
وما كدرت اكسر كلمته رغم ما اريد اعوفها نهائيا
بس زحمة اعارضه واخاف يفشلني كدامهم

طلعنا كلنا سوه تشكرت منهم
وتوجهت السيارة عمو ابو حسن رحت ويا
وابو مروان رجع بسيارته
اما الغيهب آخذ والدته وراح
تجنبت اباوعله قدر المستطاع بس حتى ما ينتبه
وياخذ نظره مو حلوه علية زحمه .

دخلت للبيت اول مره بحياتي
اخاف منه موحش ياكل بيه
واحس يعاتبني رجعت وامي مو وياي
كعدت باب المدخل ابجي بعلو صوتي
واعاتب بروحي والوم امي
دعيت ربي من ڪُـل گلبـي يرجعها الي
وما يحرمني منها بيوم بدونها اضيع .

دخلت هلكانه لكيت التلفون محترك اتصالات
وهو بيدي دك رقم الناس الطالبين مني
رديت عليهم واجاني صوت رجال
يرعد رعد :- مو عيب عليكم ليش توعدين وتثبتين وتخلينا نعتمد عليج
اذا انتِ مو كفوا يا ثوله با بت الـ اثول انعل ابو اليطلب منكم
فشلتونه ويا العالم الله يفشلكم سفله والله لو ما اكول نسوان
اشتكي عليكم وانعل ابو اليطلعلكم .

ضليت ارجف بمكاني :- بس افهمك استاذ والله امي انجلطت بالمستشفى
تعال واسأل هاي دخلتي منها اني اسفة واعتذر منك .

حاولت ويا يفتهم موقفي بس فشلت :- شنو امج وشنو ابوج
لج فشلتونا ويا العالم شنطيهم معازيمنا وين اوديهم .

من شفت ما منه فائدة سديته بوجهه
رجع يتصل بيه ما رديت من لح
عليه اكثر انجبرت اجاوب :- الج تلاث ساعات بس اذا ما يجيني كلشي
جاهز احرگ شيب الخلفوچ واطلع العربون من خشمج واشوفچ نقيب امير شيسوي بيج .

صرخت بي بحركت قلب :- شسوي سوي اذا انت ما عندك انسانيه هاي مو مشكلتي صار ساعة اوضحلك بس انت ما عندك احترام
وسبيتني وسبيت اهلي اكدر اشتكي عليك هسة بس راح اعديها .

سديته بوجهه لو بتلبت ، هنا دقايق لا غير
بابنا تفلشش وصوته هز بيتنا والمنطقة
قفلت البوب واني اخابر ؏ خالي استنجد بي
ضل يدك اقوه واقوه
جمعت قوتي وفتحته مو من المعقول يضربني
ويمد ايده ؏ مره ، طلعت للطرمه سمعت جوارينا يحجون ويا
ويفهموا حالت امي بس هو مُصر ؏ طلعتي يريد يتعارك وياي
اخذت بكد العربون الصرفتهم ؏ مسواك اخذت من الجنطه بكدهم
وطلعتله واني ساتره روُحـي كلش زين
وصوت بداخلي يصيح وينج يمه .

فتحت الباب لو جنيت ؏ نفسي اندفر بكل فوته
والرجال ضخم غطاني وهو يصرخ بوجهي ويمشي
واني ارجع ليوره مرعوبه من صوته :- لج هل كدوتج بطول قندرتي وتلعبين عليه اني امير دوله وتاج تجي وحده بكدج تفشلني وتطبك التلفون بوجهي .

رديت بأرتباك وصوتي يرجف :- انتَ مو متفهم جبرتني اسده بوجهك
مو قصدي اقلل من احترامك بس ما خليتلي طريق ثاني .

امير :- طرق ثااااني انعل ابو طريقچ كلبه .

هو كال هيج واني انفجرت ابجي ، دفعه ابو مروان
وهو يصرخ بوجهه :- عيب عليك تتقاوه ؏ حرمه هم مو حرمه
شابه صغيرة وحدها بالبيت مو عيب عليك هِـيِّ هاي شيم الزلم .

اندفع الباب دخلوا زلم اثنين وثالثهم الغيهب ووووو ..

يتبع ...

- البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ مُحمـد .