رواية ظلمات الغيهب الفصل الثاني وخمسون 52 - بقلم اسـاور حسين 🦢✨

حقول من الزهور ..
بنيت تحت سور اضلع الغيهب المهدوم
كُنت غياهب من الظلام ، حتى تلألأت حواء ، فـ أصبحت لدائي دواء
جريئة، صلبة ، متحكمة لقبتُها (نعمة الرحمن )

عقابها بمثابة مذبح ، قوية عندما تغضب تجرح
لكن .. حنانها بديلي وعوضي بعد الوهن المحقق
زهرة وقعت بفخ الفتنة ، عداوة ، جنون ومسيرة من الهموم ..

هل الحب المبني بتعب ينتصر ؟
صنعت بعد كُل أنتصار بذرة حب فهل يستمر ؟
هل الزهور تنمو وتجذر وفي قلب الغيهب تكثر ؟

......................><><><><><.....................
الغيهب ..

الروتين نعمة يعرفه من يفقده
أمارس الروتين ولا اصير بوسط مشكلة
بكثر ماتعبت بحياتي وعشت بيها ، المشاكل والصراعات تحولت
انسان يعشق هدوء الروتين واعيش الدقايق بي بكُل سكينة وسلاسة .

رفعت ايدي اخذت نظرة سريعة ؏ ساعة ايدي بـ 9:00 ؏ وقت
اصوات الناس عالية ، في كُل زاوية قصة ، خبايا مدفونة
خطفت عيني ؏ اسم الغرفة ( غرفة المحامين)
دخلت وبصوت وأضح سلمت ؏ الكُل : السلام عليكم أساتذة .

وآني متوجهه المكاني المعتاد عدلت السترة
وفتحت اول ازرارها واسمع رد سلامهم
بعدني بسم الله اريد اجر النفس دخلت محاميه متدربة
انزال علية: أستاذ غيهب بلازحمة عليك هل بلاغ شنو ناقصة ؟

اخذت الأوراق منها أتمعن بيهن وهي تشرحلي
الحالة مختصر عنها رجعت الأوراق ورديت
؏ أسئلة : نورس عال العال هو بلاغ نفقة
بالأحرى بلاغ تخويف عوفي ياخذ مجراه
بعد البلاغ متأكد تصير مبادرات ومحاولات
صلح انتِ ابقي ؏ متابعة من بعيد لبعيد .

نورس : وأخيرًا أستاذ مافصلت شغلي وأخذته تصنيف .

اخذت گلاص الجاي من ايد ابو محمد
ورديت : اذا شغلچ مدروس ومابي غلط ليش آخذه تصنيف ؟

نورس : العافية بالتداريج مو من البداية هيچ علمتني .

الغيهب: صحيح ماتشوفين تعلمتي اني اخذ اغلاطچ
بالضحك حتى ماتخافين اگدر انتر بوجهچ .

نورس : لا كُلشي ولا النتر حشش براحتك .

ابتسمت من لمحت موكلتي ادور علية بالمكان
رفعت ايدي شافتني اجت بتجاهي : نورس شوفي شغلچ
لاتبقين تبيعين صفنات .

طلعت وهي تضحك تقدمت موكلتي وأمها
بعد السلام گعدت امها مقابيلي : يمه يعني معقولة اليوم
بنتي تخلص من هل مجرم المخبل .

ابتسمت بوجهه ورديت حتى تطمئن: اكيد اذا هاي رغبتها
الأدلة عدهه والقانون وياهه ليش ماتربح القضية وتطلگ ؟

كملت كلامي والتفتت اركز على كلام البنت وهي تفرك بيدهه ومتوترة
سما : خايفة هذا المجرم اعرفه مو بهل سهولة يطلگني .

نهضت من مكاني بيدي أوراق قضيتها بالكامل
مشيت وصحت بكل هدوء : سما تعالي ..

صارت بصفي تمشي واني امشي
بصوت خافت سألتها: سما متأكدة من قرارچ
للمرة الأخير اسئل هل سؤال .

سما : وللمرة الأخير اگول استاذ غيهب والله متأكدة
وتعبت اريد اخلص من هل مجرم بعد ماعندي طاقة
أتحمل تصرفاته المختلة .

باوعت ؏ طابق الثاني ونزلت راسي مبتسم
_ المجرم فوك لو عيونه ترمي نصير بعداد الموتى .

سما: والله لو بيدي ما اشوفه .

الغيهب: اليوم اخر يوم .

سما : بعد ماعرفت كُلشي يخص هل مجرم تگول
اليوم اخر يوم من المستحيل يعديها ؏ خير اني اعرفه .

الغيهب : هو يحبچ مستبعد يأذيچ بس إحتمال يحاول
يحجي ويتفاهم وياچ .

سما : هههههههه هو وين يگدر يسيطر ؏ أعصابه ويتفاهم .

صعدت الدرج وهي ويايَّ أول ماصرت بالطابق الثاني
واكف هو والمحامية مالته بقيت اركز بي وهو
يريد بس يهجم بس فتت قريب منه صاح : اي عفية بالشاطرة
خليني احقد عليچ اكثر كثري ضحك تمضحكي بررررررراحتچ
بسسسسسس اخذ حق رجفة ايدي وحرگ گلبي من عيونچ بعدين
اني ما انطررررررح سمااااااااا .

قبضت ايدها ومن صوته جمدت اشرت حتى تدخل الغرفة
امها موجودة اخذت بطل الماي تشرب وترجف
_ استاذ اذا يلزمني يمووووتني والله .

الغيهب: موقع تعهد اذا يقترب من بابكم يعتقلوا
وين يگدر يوصل ويلزمچ مجرد تخويف
كلبه محروگ صعبة علية يشوفچ تمشين ويايَّ تدرين
هو عنده حب التملك .

ام سما : لا تخافين حبيبتي وياج اني لحد گطع النفس
استاذ غيهب مايعوفچ وين جنتي وين صرتي بقت
الخطوة الأخيرة وتخلصين .

عفتها تاخذ نفس وطلعت هو صاحب كرامة
وكبرياء عالي رحت أكمل كم شغلة وعيني
؏ باب هو يحوم مثل المذبوح رجعت
اريد ادخل ترك كلشي ؏ صفحة وبعد ماعنده
حل ، من فترة لعب بيهم لعب الى ان گدرت
اسيطر علية ومنعته منها حتى كلام بعد
مايگدر يوصل ويحجي وياهه : أستاذ غيهب .

التفتت رفعت حاجبي وابتسمت : نعم .

بلع ريگ تعبان وجهه منتهي يجر النفس بصعوبة
_ عادي احجي وياهه .

الغيهب: ماتريد تلتقي بيك ولا تحجي وياك .

_ هاي اخر محاولة بس اريد احجي وياهه .

الغيهب: تسوي مشاكل مثل المرة الأولى
انتَ ماتگدر تتحكم بـ أعصابك .

_ وحق نار گلبي اتحكم وصوتي ما يعلى
هاي اخر محاولة قبل لا ندخل بس احجي وياهه شوية والقران .

الغيهب: بوجودي .

_ ماشي بس امها ما اريدها موجودة .

أومأت براسي ودخلت للغرفة هو دخل ورايَّ
صارت وره امها ودموعها تجري : يمه لااااااا تعوفيني .

ام سما : طيح الله حظ شواربك وصلت بنية تخاف منك لهل درجة .

نزل راسه متحسف مهدود
الغيهب: ام سما ممكن تطلعين
تشترين بطل ماي دقايق بس دقايق .

ام سما : لاااااااا تحاول لا تنقهر علية هذا مايستاهل
وماعرف بنتي وحدهااااااا وياه .

الغيهب: اني وياهم بمسؤوليتي سما محد يتجرأ ويتعرض لها.

لخصني بنظرة ورجع نزل راسه وگعد ؏ كرسي يفرك براسه
دگيت ؏ صدري بقت تفكر لدقايق وطلعت
وهي تحجي : ماكو داعي يحجي وياهه موضوعهم منتهي
بنتي تكرهه تمووووت منه وماطيق تشوف وجهه .

بقت بالباب طلع الموظف صديقي وهو
يهمس : اروح اشرب جاي اخذوا راحتكم .

الغيهب: كلام امها صحيح ماكو داعي للكلام القضية محسومة .

صار يتفحص بيها بنظراته وهي گعدت
؏ الكرسي تمثل الثبات بس ايدهه فضحتها
بكثر قوة رجفتها : ينطيچ كلبچ تعوفيني وانتِ كلش
زين تعرفين صعب اعيش بدونچ وبلغتج قبل انتِ كُل حياتي .

سما : ماريدك .

تيم : غلطت بحقچ بس مستعد أصحح اغلاطي كلهن
الخاطرچ وحدچ ، انتِ مو بلغتي القاضي اني مريض
نفسي اني جاهز اتعالج بس بشرط تبقين ويايَّ .

سما : تعالج لنفسك اني طلعني من عقلك وحياتك  .

تيم : مو تريدين بيت قريب ؏ امج موافق
نشتري بيت بصف بيتكم .

سما : مايحتاج لا تحاول .

تيم : حتى تكملين دراستچ قابل والقران قابل
وبيدي اوصلج وارجعج .

سما : لو يصبوك ذَهــب لو يخيروني
بينك وبين الموت اختار الموت .

تيم : لا توصليني النقطة ادفنچ بيدي .

الغيهب: لاااااااااااا تهدد تيم لا تهددد احترم نفسك .

سما : ادفني عادي بس مارجع واعيش وياك بيت واحد .

تيم : شتريدين بعدددددددد سمااااااااااا حبيبتي والله
بس امريني واني جاهز لكلشي تريدي بس لا ننفصل
اني اموووت بدونچ والقران اموت .

سما : تتذكر من جنت تضربني واكلك يجي يوم
واخلص منك گتلي بس الموت يخلصج مني لان
روحچ بيدي بس شوف روحك احنا وين بمكان اقوى منك .

تيم : ليش تعذبيني ؟

سما : لان عذبتني هم اهلك إلي المفروض يوگفون
وياك صايرين ويايَّ لان يعرفون اذيتني ومرضتني
وهديت حيلي ، صار الوكت اخذ بثاري .

تيم : تعرفين شلون تاخذين بثارج اني سلمتچ ورقتي
عرفتي انتِ نقطة ضعفي وحاربتيني بيچ .

سما : استاذ غيهب بداعت عزاز كلبك كافي .

الغيهب : استاذ تيم بدون مشاكل اطلع خلص الكلام
مثل ما شفت موكلتي مصممة ؏ قرارها .

تيم : بسببك والله بسببك قويت راسهااااااااااا .

سما : اي كمل كمل گول لااااااا عدها اهل
لا عمام جنت تاذني بكيفكككككك
عبالك أني ضعيفة وابقى تحت رحمتك .

تيم : غلطتي بتصرفاتچ سما .

سما : طلاگ راح اطلگو احاربك بيَّ اي صحيح
وابتعد واعيش حياتي بعيد عنكككككك وانت
كمل حياتك بحالاتك النفسية وحدك .

بقيت ادرس تحركاته تصرفاته لدقايق
وآني اتذكر نفسي قبل مثلي هو مثلي
بنسختي القديمة طلع من دخلت امها
طلعت وياه مسح وجهه يتحرك بعشوائية
ورجع بتجاهي : جانت ماتعرف بسوالف المحاكم بسببك انتَ .

تركت كُل كلامه وبفضول سألت
_ شلون وصلت لهل درجة ، منو وصلك ؟

تيم : منين تعرفت عليك هااااا منين
رفعت علية قضايا بگد شعر راسي
اتهمتني بكل الاتهامات بس يمكن
نسيت تگول ارهابي ، وبسببك وقعت
؏ تعهد يمنعني اقتررررررررررب منهاااااااا .

بقيت امرر عيوني ؏ حركاته العشوائية
بدون تردد حجت : تحبها انتَ تحبها ليش
ماتروح وتحاول تتعالج من الصدمة
اني متأكد انتَ مصدوم ومو بوعيك .

تيم : احترم نفسك شنو قصدك مخبل .

الغيهب: مو مخبل بس اذا ما تلحگ لنفسك تتخبل .

طلعت محفظتي سحبت كارت الدكتورة
مالتي بتركيا وقدمته: هاي الدكتورة شاطره .

تيم : تضحك علية انتَ .

الغيهب: ابد الله شاهد بالعكس اريد اساعدك .

تيم : ليش .

أعرف الآنسان من يوصل مرحلة تيم يكون
عدائي يجمع معلومات ونقاط ضعف المقابل
حتى يبدي يفكر ينتقم لان يصير بنظره
الناس مذنبين وهو الصح الوحيد بينهم : تريد تقبل النصيحة
اقبل ماتريد براحتك سبق ومر علية مثل حالتك .

تيم : احترم نفسك حالتي شنووووووو، انتَ لو تعرف شنو
حب ومعنى الحب ماتوكف وياهه وتصير ويايَّ .

الغيهب : منتظرك تعلمني شنو معنى الحب ..

كملتها ورجعت للمكتب اخذت سما وطلعت
گعدتها هي وامها ودخلت ؏ مكتب حجيت
ويه استعلامات او سكرتير القاضي ودخلت
_ السلام عليكم .

القاضي: وعليكم السلام أستاذ غيهب هاا شعندك اليوم .

الغيهب : موعد قضية طلاق .

رجع يراجع القضية وصاح بـ اسمائهم
طلعت دخلت سما وتيم دخل هو والمحامية
قدمت المحامية كُلشي عدهم واني قدمت
سما رجلها ثگلت لزمت الميز وبقت واكفة
الى ان قرر القاضي وإعلان طلاقهم . 

گعد ؏ تخم تبچي بعدم تصديق وتباوع بوجهي
وتشهگ : يعني صدگ صارت اني هسة مو زوجته
مووو ملك هل مجرم .

رفعت ايدها ؏ شفايفها وبرجفه مختلطة بالدموع
هلهلت ودموعها تجري ؏ خدها وجسمها يرتجف
ألتزم الصمت تيم حتى القاضي يباوع علية متعجب
كملوا الأوراق والتوقيع هو طلع قبلنا بقت سما
رجلهه ما تشيلها تمسح بدموعها وترجع ليوره
القاضي : لا تنصدمين بعد انتَ الغيهب المحامي
مالتچ يعني ماكو مستحيل هههههههههه .

تشكرت منه وطلعت اني وياهه امها هلهلت مقابيل الكل
وتريد تاخذ ايدي تبوسها اخذت راسها بسته وضحكت
_ هذا واجبي امي .

ام سما : من مشى مع مظلوم حتى يثبت له حقه
ثبت الله قدميه ؏ الصراط يوم تزول الأقدام.
بارك الله بيك يمه بارك الله بيك يعجز الساني عن شكرك ابني .

ابتسمت بأسف ونزلت راسي متحسف صارت ام زهراء
گدامي والذكريات القديمة كلهه صارت شريط
ويمر قبضة ؏ ايدي ورديت
الغيهب: بالخدمة امي بالخدمة اي شي تحتاجون
اني ابنچ الثاني وسما أمانة الله اخوچ اني بس يصير وياج
شي لو يتعرض طليقچ الچ بإتصال واحد تلگيني يمكم .

سما: معقولة هسة صار طليقي والله ماصدك .

الغيهب: لا صدگي ماكو قضية تصعب علية .

نزلت وياهن ونتفاهم سلمت اريد اوجع
وراحوا بعدني اريد اگعد وسمعت صوت
ام سما : استاذ غيهب والله خجلانة منك
بس هذا واگف بالباب ونخاف نطلع لا يروح
يسوي مصيبة تگدر أطلعنا .

مديت ايدي اشرت ؏ باب وحجيت بإستعمال : طبعًا آمي تفضلي
گدامي اصعدكم واذا تقبلين اوصلكم اني بخدمتچ .

طلعت صارت سما مقابيلي تآكل بأظافرها
الغيهب: لا تخافين مايكدر يأذيچ موقع تعهد
ويعرف بس يحاول ينسجن .

سما : هذا مايخاف ولا يهمه سجن اني اعرف تفكيره .

الغيهب: امشي ونشوف الوضع .

طلعت وياهم صاعد بالسيارة منتظرهم
يطلعون ابتسمت بوجهه ورفعت ايدي اشرت بعلامة شكو
ومشيت للسيارة : ام سما اصعدوا اني اوصلكم أصلًا
طالع اليوم ماريد اكمل الدوام .

ام سما : والله ماريد اكلف عليك.

الغيهب : شايلكم ؏ ظهري يا امي اصعدوا .

صعدوا بسرعة وهذا ضرب ؏ ستيرن وشخط
السيارة وطلع فقد الآمل يحجي وياهه وصلتهم
ابتسمت ام سما باوعت عليها عرفت ؏ شنو
تلمست الصورة معلگهه ؏ مرايا نازلة بسلسلة
_ اطفالك مو ؟

الغيهب: اي روحـي وكلبي النور وزينة .

سما : أستاذ متزوج ؏ حب ؟

الغيهب: لا بالحب ولا بالتقليد جنت انسان محطم
بوسط خراب اختاريت إنسانة تحبني بوقت گلبي
كان ميت حجر ابعد ماتتخيلين طلبت تساعدني .

سما : ساعدتك .

الغيهب: شنو تشوفين ؟

سما : شلون ؟

الغيهب: الآنسان من يحب ما يتخلى بسهولة
وهي هيج حبتني الى ان رجعت گلبي يدك
بدون ما احس شلون وشوكت ما ادري
بس ما اتخيل حياتي بدونها وصلت المرحلة أبيع الدنيا واشتريها
زهرتي قوية الأبعد الحدود حواء مخلوقة من حنان وقوة .

سما : الله شگد حلو ربي يحفظكم ويحرسكم استاذ .

نزلت ام سما مقابيل الباب وسما فتحت الباب
تريد تنزل ورجعت وهي مرتبكة تكلمت : أستاذ بنظرك
هم كان اكو امل يتعالج ويعيش طبيعي .

الغيهب: تحبي ؟

سما: كارهته بس جنت احبه .

الغيهب: اذا بيوم من الأيام بادر وقرر يتعالج
الخاطرچ رجعي وصيري سند لان بهل مرحلة يحتاج
حب حياته إلي قرر يتعالج علمودها وياه .

سما : جنت تضربها ؟

نزلت راسي ندمان جريت نفس هي افتهمت
سما : عوضتها .

الغيهب: ما اكدر اوفي حقها وكفاتها ويايَّ للموت
بس بعدني احاول ارد جزء بسيط .

نزلت وهي تهمس: الله يهنيكم ويسعدكم .

اومات ببتسامة خفيفة طلعت بدون تفكير
امشي امشي الى ان صفيت مقابيل المختبر
نزلت وغلقت اول ازرار السترة صعدت
بايات الدرج وبثبات وكفت باب المختبر
عيوني ادورها بكل مكان اشرت بيدي
للبنية وياهه حتى ما تحجي طلعت
من الغرفة الصغيرة تنزع بالكفوف
تأملت حركاتها تصرفتها خطواتها
لثواني رفعت رأسهه وضهرت
؏ ملامحها ابتسامة الصدمة : منو منور المختبر اليوم ؟

الغيهب: روحچ .

زهراء: الثقة يبووو الثقة .

الغيهب: عياره تموتين ؏ ربي .

زهراء: بدون نقاش اعشق ربك هههههههههه .

تقربت مني وهي تاخذ كلاص من الثلاجة
مال ماي : اشرب بلل ريگك .

الغيهب: تذكرت هاي الصورة مال حيه
من تشرب ماي ومكتوب بللي ريگج واحجي شلون ظلموچ .

هي والبنية والمرضى المنتظرين كلهم
يضحكون واني عيوني تحفظ بضحكتها
وصلت المرحلة اريدها بس تضحك
حتى اعوضها ؏ ايام البجي والتعب
شربت الماي وهي تقربت اكثر همست : بيك شي ؟

طلت النظر بعيونها متوتر حاير
_ عادي نطلع .

زهراء: صاير وياك شي سامع شي ؟

الغيهب: لا بس احتاج وجودج من الأخير مشتاقلچ .

زهراء: بس اكمل اخر تحليل ونطلع عيوني
انتظرني بالسيارة بس دقايق واجي .

الغيهب: لا لا اريد اگعد هنا اشوف مرتي شلون تشتغل .

دخلت كعدت ؏ مكتب مالتهه وهي تفتر ؏ أجهزة
وتسولف هي والمرضى وتنصحهم بدكاترة بكذا
مكان يفيدونهم ، الى ان كملت لملمت أغراضها
وسلمت المفاتيح للبنية وياهه وطلعنا من المختبر
فتحت السيارة وهي ادردم : غيهب شوكت ترجعني
أسوق السيارة مووو تعودت عليهه .

بقيت واگف لثواني ومشيت بتجاهه
_ امشي اصعدي سوقي زهير مابيَّ
حيل مشاكل مو تفلشين بيت العالم
وتصيحين عدكم ريوك .

زهراء: أصلًا أسوق احسن منك بس مرات ادوخ .

الغيهب : بس مرات الرصيف يدعمچ .

زهراء: عززززا شمدريك ، تقبلها يتحارش بيَّ ابن الذينا .

الغيهب: متوهمة هذا مو الرصيف هذا الغيهب
بس إني يحقلي اتحارش بيچ .

صعدت تسوق واني يمها انطي تعليمات متواصلة
الى ان بقت تباوع بوجهي وابتسمت : شبيك ؟

الغيهب: مابيَّ .

فرت السيارة وكملت الطريق : تضم عليَّ ؟

الغيهب: انتِ سامحتيني من گلب والسان ؟

زهراء: شصاير .

الغيهب: تعبتچ هواي سامحتيني لو

اخذت ايدها بين ايدي وغلقت عيوني
مشاعري ؏ تفكيري كلشي متخربط بيَّ .

زهراء: ليش تخوفني .

الغيهب: تتذكرين سما اليوم ربحت وطلقت زوجهه .

زهراء: عفية عليهه ..

الغيهب: بس هو يحبها .

غيرت الموضوع واشرت ؏ شارع
_ ادخل منا أسهل .

الغيهب: الصخااام يمعودة طسه طسه .

زهراء: يبووووو هي تجي بطريقي .

الغيهب: الغيهب وخري منهااااا .

زهراء: هي تجي بطريقي .

الغيهب: دگيلها هورن حتى تلوف .

زهراء: حضرتك تضحك عليَّ .

رفعت حاجبي وصفگت رجعت اركز وياهه الى ان وصلنا للبيت
الغيهب: شطورة .

اخذت الجنطة ودخلت قبلي فتحت الباب دخلت
السيارة وقفلتها لان ادري نور الظهر ضروري
عنده يصعد ياكل حلويات بالسيارة ويتلف ابو السيارة .

مريت من المطبخ اريد اصعد اسمع زهراء
تتفاهم هي و (مالي ) الشغالة الفلبينيه
صعدت بوجهي فوك بدلت وتمددت بين
ماترتب زهراء الوضع ويرجع النور من المدرسة
توني اغفي وحسيت بزهراء تعدل برموشي: كثري تحرش .

ضحكت وتريد تبتعد لزمت ايدها وسحبتها
قربتها اول ما گعدت خليت راسي ؏ رجلهه
وطوقتها بيدي غمضت عيوني استنشق عطرها
- زهراء .

_ حبيبي بيك شي تريد تحجي ؟

_ لا تعوفيني اني صعب ادري بس لا تعوفيني .

_ انتَ روحـي شلون اعوفك غيهب .

_ انتِ كُل حياتي اذا تروحين مني اموت
ماريد اعيش بدنيا مابيها انتِ .

_ يمك والله يمك ، بس فهمني شصاير .

سولفت كُل الصار من البداية للنهاية
وختمتها: يمكن لو انتِ بمكانها واحد سندچ من البداية
اكيد بهل وقت خاسرج وماكو بحياتي بعدني مريض
وعدواني وتايه ماعرف الصح والغلط وماكو لا النور ولا الزينة .

زهراء : غيهب قبل لا تتعالج ابوية سندني وجنت أكدر
ابتعد بس بكل مرة اختارك مو لان ماعندي كرامة لو ضعيفة
بس الشخص من يحب من كُل كلبه صعب يتخلى عن حب حياته
الحب مو شي سهل ابد مو سهل وانت حلمي وحب حياتي .

اندك الباب صاحت بوضوح : ادخل ..

فات النور يركض گمز ؏ سرير ويصيح
_ اخذت 8 بابا هل ايام مدري شكو .

زهراء: من الركص مالتك انت وابوك .

الغيهب: احنا نركص شكو سالمين عرس .

زهراء: لا خطية اتهام باطل هاي اني اركص من ادرس النور .

درت ؏ نور قلصت عيوني وهو يفر بيده
النور : مو ركص يا حبيبتي هذا ترفيه عن النفس
تعرفين يعني الدراسة مرات ملل ابوية فرفشة يفرفشني .

زهراء: شيسوووووي ابووووووك .

شلت النور وركضت وهو يصيح : يفرفشني فرفشني يا بابا .

زهراء: يرتب الكلام مثل ابو .

الغيهب: قصدچ متكلم مثل ابو .

النور : واهلهل مثل بابا ههههههههه .

الغيهب: اختلف علية ابن ابو السطل .

نزلته مقابيل الحمام هو يغسل واني استمع لمغامراته بالمدرسة
دخل لغرفته زهراء مجهزة الملابس ؏ سرير بدل ونزلنا سوية
دخلت ؏ غرفة ابوية الزينة نايمة : شلونك يابه .

ابو الغيهب: هلا بيك ابني راجعين من وقت .

الغيهب: مخلصين شغل ، شنو الزينة بعدها نايمة .

ابو الغيهب: لا گعدت اكلت ولعبت ونامت .

تقربت منها ابوس بيها عطرها يرد روحـي
بقيت ازعج بيها الى ان فزت شافتني وكمزت
بحضني تبوس وتحضن دخلت زهراء وفتحت
ايدها : وماما ماكو بوسة .

بدون ما تباوع ؏ امها تأشر بعدين اني وابوية نضحك
؏ سوالفها كعدت زهراء تسحب بكتفي : انطيني زوجي
هذا مالتي مو مالتج .

وكفت تباوع بوجهي وطوقت وجهي حتى اباوع
بس عليهه ما ادير وجهي ؏ امها وبرطمت شفايفها
زهراء: بطلي هل حركات بطليها هذا الغيهب مالتي .

راحت ؏ ايد امها وعضتها حتى تشيل ايدها
وتسحب بيدي حتى نطلع من الغرفة : وين نروح اني جوعان زينة .

زهراء: يلة الآكل كمل يلة عمو .

طلعت اني والجهال وزهراء شغلت جهاز الضغط
حتى تشوف ضغط ابوية قبل الأكل كعدنا ؏ ميز
علمود ابوية مايكدر يگعد ؏ آرض ، اول ما كملت
غسلت وصعدت بدلت ملابسي اريد إطلع أستوقفني
سؤالها: هاا يالحبيب وين لا كلام لا سلام. 

الغيهب: لا توقيع لا موافقة ، مسجون اني بسجن .

رفعت طرف شفايفها بمستوى رفعت حاجبها
ودارت وجهه تصب الشاي مشيت بتجاهه
حضنتها: طالع للمكتب عندي شغل مهم
بس اكمل ؏ وقت ارجع تحتاجين شي أجيب ويايَّ.

زهراء: بعدنا ماتخلصين كلامنا .

الغيهب: الكلام مايفيد الأفعال تثبت
اذا أظل اقارن واتذكر اتعب .

تلمست وجهي وتعدل بحاجبي وعلى
محياها ابتسامة هادئة : أنسى الله يخليك والله مسامحتك .

الغيهب: مو تدرين بعدني احاول .

زهراء: وبعدني وياك واساعدك .

بست راسها بسرعة وطلعت سيارتي
عبرت منطقتنا ورفعت الجهاز اتصلت
؏ اكثر بشر اكدر اسولف وياه بدون تفكير
هيج ينطيني منطق الحرية بالتعبير والفضفضة
الغيهب: باشا وينك الگاطع .

حسام : وعليكم السلام ورحمة الله وبركاته .

الغيهب: تطلع ؟

حسام : انتَ وين ؟

الغيهب: رايح للمكتب .

حسام : فد ربع ساعة اني يمك .

سديت المكالمة ونزلت مقابيل المكتب
واني اصعد الدرج لمحت سيارة تيم
من بعيد مراقب تحركاتي مثلت
اني ما أشوفه وكملت طريقي ودخلت
للمكتب شغلت شاشة الكاميرات وبقيت
اراقب بي نزل من السيارة ، دخل بتوتر
بين يطلع وبين يكمل طريقة ويصعد
بنص الدرج طلع مسدس سحب اقسام
ابتسمت واخذت المسدس مالتي من المجر
ونهضت اريد اطلع ودخل حسام تعجب
من المسدس لان بيدي : شكو ؟

رجعت اباوع ؏ كاميرا واشرت : هذا تيم .

حسام : منو تيم ؟

الغيهب: تتذكر موكلتي سما اليوم جانت اخر جلسة
وووو بقيت احجي شنو صار وشنو احساسي اتجاه
الموضوع ، گعد ؏ كرسي وشغل جكارة وبكل هدوء
رد : انتَ لليوم ما مسامح نفسك والدليل
بكل قضية تلزمها تتذكر وتقارن ، شلون تريد زهراء تسامحك ؟

الغيهب: عايشين طبيعي والله بس الذكريات .

حسام : الذكريات عدوة الآنسان
ذكرياتك كفيلة تهدم تعبك بالسنين الفاتت كافي .

جريت نفس وغيرت الموضوع: تريد شاي .

صفك ؏ رجله ونهض : لا اريد ارجع للبيت هاي رجعتي من الدوام .

الغيهب: بليل نتشاوف .

حسام : لاااااااا .

الغيهب: نحيس مو اشتاقلك .

باوعلي نظرات مال واحد يريد يهجم بس مكبر عقله
طلع وهو يهز بيده ، بقيت اشتغل واشتغل الى ان تأخر الوقت
طلعت من المكتب اخذت حلويات للجهال ودخلت للبيت
الأضواء طافية والبيت بين البارد والدافي الجهال نايمين
وباب غرفة ابوية مسدودة ، صعدت الغرفتي فتحت
الباب ابتسمت : كاعدة ، وتلفون وحلويات .
كعدت بصفها اباوع وياها فاتحة حسابها وتنشر وتضحك وتسولف
زهراء: تأخرت ومليت وحدي .

رفعت خصلات شعرها وطبعت بوسة ؏ خدها
الغيهب: مشتاقلج .

اريد اكمل والتلفوني رن اباوع ؏ اسم ام سما
زهراء: شصاير شنو يريدون منك ؟

فتحت خط سحبت التلفون مني بغضب علت الصوت
سمعت صراخ ام سما نهز گلبي وزهراء كمزت من مكانها
عطت بصوت عالي حتى تسمعني : شكووووو امي احجي شكوووو .

ام سما : هجم علينة بهل ليل يريد يحجي وياهه ماتريد ماتقبل
سحلها يريد يطلعها ملخت نفسها تملخ اخذها بالغرفة وقفل
الباب والبنية تصررررخ بنتي راح تمووووت بيده ماعندي احد
ابوس ايدك ماعندي احد .

بدون تفكير ركضت نزلت الدرج واسمع زهراء
تصيح : اساورررر حبابة اساور وين حسام
خلي يطلع للغيهب بالباب بعدين احجي بس خلي يطلع .

طلعت السيارة من بعيد شفت حسام عبر بتجاهي رفع ايده
ضرب ؏ باب فتحت الجام : شبيك .

صرت احجي اختصار وهو يهز براسه
وكل عادة بكل برود واجه الموضوع : انتظرني اجي وياك
بس اجيب مسدسي .

أومأت براسي عدلت السيارة وهو دخل وبسرعة
طلع يخابر بالتلفون ويأخر بيَّ نزلت استفزني
صرخت بي : يمعوووووود .

صعد واني صعدت حركت واني اصرخ : شبيك واكف البنية
لا يسووووي بيها شيييييي .

حسام : اكره غبائك .

الغيهب: حسسسسسسسام .

حسام : بالله الموضوع اتفاق ، بالله اكو خطر عليك
يمكن يطلعون عدها عمام وناس ووووو العالم بيت بله
؏ يا اساس ندخل عليهم واحنا لا عرف ولا ولف .

الغيهب: ونعرفها تمووووت يأذيها.

حسام : طبعًا لا انتَ المحامي مالتها تتصرف ؏ هل اساس
تتصرف تصرفات قانونية تخابر النجدة مثلا وتدخل عليهم
بنظام مو بتهجم وتتضاربون لعب العصابات ماتمشي هنا .

وصلنا وهو يتواصل ويه صديقة بالنجدة
نزلنا وهم ويانا بقيت برا بأمر منهم
وهجموا ؏ بيت وحسام وياهم هي دقايق وسمعت
صوت أطلاق نار اكثر من طلقة اكثر من صرخة
اكثر من صوت يتردد بمسامعي دخلت بصعوبة
وجمدت من شفت المنظر هز كلبي وكل ذرة بجسمي  !!!

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد