رواية ظلمات الغيهب الفصل الثالث وخمسون 53 - بقلم اسـاور حسين 🦢✨

<ظلمات الغيهب >
حلقة _2_ الجزء الثاني ..
بقلمي : اساور حسين .

يرمرم جرحي في ڪل مرة ،
ڪيف للمرء ان يكون دواءً هكذا ؟

......................><><><><><.....................
الغيهب ..

صوت أطلاق نار اكثر من طلقة اكثر من صرخة
اكثر من صوت يتردد بمسامعي دخلت بصعوبة
وجمدت من شفت المنظر هز كلبي وكل ذرة بجسمي !!!

ام سما : سماااا ماما ذبي المسدس ابوس ايدج يمهههه
نزلي من راسج ماعندي غيرج لا تموتيني يمه لا تعوفيني وحدي .

عيوني مركزة ؏ تيم واگع بالأرض والدم تارس ملابسه
وغرگان بي مشيت بتجاهه نزلت اتفحص النبض
واسمع اصواتهم يصيحون ؏ سما وهي تصرخ بهستريا
_ مات ؏ ايدي مات يمهههههههه قتلته بيدي
ماااااااااااااات مااااااات تيم مات بيدي راح مات .

ام سما : انطيني المسدس حبيبتي .

سما : لااا كافي تعبت أريد أرتاح أريد أخلص .

عاط بيها واحد من الشرطة ورفع السلاح
_ نزلي السلاح فورًا .

بقت جامدة عيونها متمركزة على تيم
صوتي من الصدمة خشن صحت : باشا ووووووينك ساعدني .

الباشا : خوية سلميلي السلاح ولا تخافين الصار دفاعًا عن النفس
وكلنا شاهدين وياج مو ضدچ .

الغيهب: لكم ساعدوني لااااااا يمووووووت .

اني واثنين شرطة متگابلين ؏ تيم نقلنا للسيارة
ظل الباشا هو وصديقة بالبيت ماعرف شصار ما صار
بس طلع بيده السلاح وسما وأمها اخذوهم بالسيارة .
الباشا : اخذ تيم للمستشفى وأتصل ؏ اهله بس تحصلهم
تجي للمركز أدافع عن البنية بصفتك المحامي مالتها
وشاهد على كُل الاحداث الصارت واني رايح وياهم .

طبگت عيوني من حسيت بنغزه صارت بكلبي
قلص عيونه وهمس بقلق : شبيك كلبك يوجعك ؟

الغيهب: لاااا ماكو شي روح وياهم روح .

عافني وراح صعد وياهم بالسيارة ورجعوا للمركز
واني طلعت بوجهي للمستشفى ، أخذت جهازة
بس اخذوا مني ودخلوا عمليات بلحظتها
اريد افتح التلفون الشاشة سودة الخلفية
بيها صورة عيون سما بقيت احاول بالرمز
بس اريد اوصل الرقم واحد من اهله
اعرف مواليدهم كتبتها غلط عيد زواجهم غلط
اتصلت ؏ ام سما اخذت منها رقم ابو بنفس
الدقيقة اتصلت : الوو السلام عليكم .
_ وعليكم السلام .

الغيهب: وياك المحامي الغيهب .

_ يااااا ستار يا حافظ شصاير .

الغيهب: حجي منو يمك من ولدك ؟

_ هذا ابني الكبير شكو شصاير ؟

الغيهب: بلازحمة اريد ابنك .

سلم التلفون جاوبني وبصوتهم نبرة خوف
_ اخي ما اريد اصدم الوالد اخاف مريض مايتحمل
اخوك تيم بالعمليات ومحد موجود وياه بمستشفى الـ *****

_ عايششششششش شبي ليش عملية شبي .

الغيهب: تصاوب والصراحة ماعرف وين مكانها
ولا عندي علم بوضعه زين او مو زين .

_ بالطريق احنا بالطريق بس تلفونك اخي
كون من اتصل عليك مفتوح نطمئن بين مانوصل .

الغيهب: بالخدمة .

_ خادم ربك .

طلعت للصيدلية طلبت علاجي لان دواية بالبيت
اخذت حباية حتى تسكن نغزات گلبي گعدت
المنظر يهد بحيلي هد ، مرات احس هل مواقف
وهل أشخاص عمدًا يدخلون الحياتي يذكروني
بـ اسوء جانب مريت بي شعور الخوف
وتأنيب الضمير ، شعور بالذنب ، قصدًا
يتعبني يهلكني ، طلعت الخارج المستشفى
شغلت جكارة سحبت اول نفس ورفعت
راسي الجو بارد التفتت ؏ صوت مو غريب

تميم : ابو النور .

الغيهب: تميم شعندك هنا .

تميم: بيك شي ؟ الباشا خابرني ودزني عليك شبي كلبك .

الغيهب: كلعاده نغزات مرت وراحت .

رن تلفوني اول ما فتحت خط نزلوا زلم اربعة من السيارة
عرفتهم اهم تيم رفعت ايدي واشرت : هناااا ابو تيم .

الرجال الجبير ركض وعيونه حمرة بيها دموع
_ وين ابني منو ضرب تيم ؟؟

تميم : اعصابك حجي منو ضارب ابنك غير هو هاجم ؏ بيت
نسوان يستعرض عضلاته ، ادخلوا بعده بالعمليات ومن يطلع
لكل حادث حديث .

دخلوا مستعجلين ذبيت الجكارة ودخلت وياهم
وتميم يحجي براسي : سويت لعليك الباشا گال بس يوصلون
اهله اطلعوا وتعالوا للمركز ، لا تتعمق حتى لا تكبر .

الغيهب: شبيك تميم نطمئن ؏ زلمة مات عاش ونروح .

دخلنا اهله يتصادمون شي بشي يريدون بس يعرفون
شنو وضع ابنهم ، وشلون وشوكت وين تصاوب
اجاني اخو الجبير وبكل تفهم وتواضع سألني
_ بس فهمني يا خوية شصاير نريد نفتهم فهمونا .

الغيهب: اليوم ابنكم طلگ زوجته تدرون ؟

ابو تيم : ما اخفي عنك صار كذا شهر متعارك وياه
بسبب تصرفاته الأخيرة صارت بلا ملح وطردته .

قبل لا اكمل الصار أخذني فضولي اتعرف
؏ اسباب : شنو الوصلة لهل حالة اليوم
بعد المحكمة وصل للمكتب مالتي وبيده سلاح
يريد يضربني ، شبي بس اريد اعرف شبي ؟

ابو تيم : كلشي بي ابني كلشي بي هو غلط .

الغيهب: تيم اليوم هجم بليل ؏ بيت طليقته
وهي ضربته شلون وليش ما عندي علم
لازم اروح هسة للمركز ونعرف شنو الصار .

ابو تيم : يعني سما بالمركز ؟

الغيهب: اي نعم .

ابو تيم : اجي وياك طلعها متنازلين .

الغيهب: شنوو حجي مايصير .

ابو تيم : اسمعها مني لا عبالك تيم يقبل بس يعرف
سما بمركز يتخبل ويفصل علينة طلعها اروح وياك واتنازل .

اخذت ابوهم وطلعت للمركز ماخذين أقوالها
والباشا مكمل كلشي ومنتظر يسمع خبر
من شافنا داخلين وعرف ابو يريد يتنازل
دخلنا عليهم كملنا وقعنا وطلعنا .

تشكر مني ابوهم واخذ سما وبرضاها
قبلت يرجعها للبيت ، ركبنا السيارة
دايخين شصار من مصايب بمجرد
كم ساعة تعادل رحلة طويلة
اجراءات ، تدخلات ، اشكالات بكل دقيقة
الى ان انتهت استلمت محاظرة ؏ ماشي
الباشا: اسمعني عدل بالك يمي هل رطينه تطلع منها نهائيًا
لا يوگعوك بمصيبة إلها اول ما الها تالي وتخسر هواي .

الغيهب: يمعود مخلصين قضيتهم انتهت بس هو
مايگعد راحة متخبل ؏ اخير  .

الباشا : هو انتَ عطلات وين ماكو عطلات يجي يمك
مالزمت قضية بيها خير كل قضية اصعب من الثانية
ليكول يريد يدخل موسوعة غينيس للارقام القياسية العالمية
بالمصايب والمشاكل والصراعات .

تميم : نسيت نقطة مهمة .

الباشا : شنو .

تميم : موسوعة غينيس للارقام القياسية العالمية بالهلاهل .

الغيهب: مو اضربك بوكس منا انومك شرط شهررررر
ليگدام انتَ وهذا الثاني .

الباشا : شحدك ، مشايف عمري وحياتي
شخص يشتري المشاكل بگد غيهب هلهوله .

شخطت السيارة وصحت بيهم : وصلنا انزلوا خلصوني منكم .

تميم : لا شكرًا ولا سهلًا .

الباشا : هذا واجبنا ما ننتظر شكر من واحد يهلهل .

نزل تميم وظل الباشا يباوع صفح
_ غيهب اسمع كلامي وابتعد منهم والله من خوفي عليك احجي .

الغيهب: ادري بيك واني مو بلغتك بالمكتب خلصت وياهم
والله بس ام سما خابرتني وتصيح تعرفني اني ما اتحمل انقهر .

الباشا : تذكر عدد المرات مشيت بعواطفك وكلبك هذا
كلبك الطيب ونلعب بيك وينهجم بيتك انتوا تبنون والناس تهدم .

الغيهب: ليش مرات احس رب العالمين يعاقبني ويذكرني بالماضي
بحيث انصدم لك حسام عبالك نكفخت ؏ وجهي من شفت حياتهم .

الباشا : تجاوزت الأصعب يمعود عيش مشاعرك
احجي بيها لا تكتمها لا تنكر لا تتهرب انقهر احزن
عبر عبر عبر لا بس تفكر عيش الآلم مثل ما هو
ويجي وقت تخلص منه .

نزلت راسي هو كمل : باجر احجز عند الدكتور نشوف كلبك
وبسسسسس ترفض اخابر هشام يتصرف وياك .

الغيهب: ماشي لا تخابر اروح .

نزل واني دخلت السيارة ودخلت لكيت زهراء بالمطبخ
والشغالة مالي موجودة يمها : غيهب كُل عقلك اتصل
بيك من طلعت لحد قبل شوية وماكو رد .

اخذت كلاص الماي من ايدها شربت
وجاوبتها : خلي نصعد نحجي فوك .

صعدت واسمع صوتها تنبه مالي : فدوة مالي قفلي كُل اضائة
البيت وروحي نامي ارتاحي بعد ماعدنا شي .

ذبيت سترتي وگعدت ؏ تخم راسي مصدع
زهراء افتهمت الوجبة فتحت علبة الإسعافات
وشكو علاج يفيدني انطتني وبقت ساكته ماتحجي
ولا تسأل دخلت للحمام سبحت ؏ سريع وطلعت الغرفة
ظلام ودافية وعطرها يرد الروح نمت الفراش مريح معطر
بعطور هادئة بدون كلام اخذت زهراء بحضني ونمت ..

......................><><><><><.....................
زهراء ..

أصوات قهقهة ، ضربات صغيرة متواصلة
نزلت من الدرج وصوت النور
يغني شافني وناداني بلهفة : ماما بسرعة تعالي شوفي زينة تلعب .

أقتربت منهم حضنته أريد يحس بقربي منه
زهراء: عفية نور اريد من اني ماكو انت ادير بالك من اختك
زينة ماعدها غيرك انتَ أخوها سندها بـهل دنيا .

نفخ روحه بفرح وفخر ورد بشجاعة : تذكرت بابا من يشوف
عمتي هاجر يگلها أني سندچ لا تشيلين هم، إذا اشتم الهواء معناها أنت بخير، وأني مثل بابا سند زينة

أبو الغيهب: عيون جدك ، أنت نور الزينة، مو بـس أخوها راح تصير صديق دربها، ربي يحنن گلبك أكثر وأكثر يا جدو وما أشوف يوم مو حلو بيكم.

زهراء: آمين ، شلون صرت عمو؟

گعد على ميز مقابيل الأطفال بوسط صالة الطعام
ورد بأبتسامة : من الله بخير بنتي، بـس أريد منچ گلاص شاي.

توجهت للمطبخ لمحت مالي تغسل بالكراج خدرت الشاي
واسمع عمي يسألني :أگول بابا زهراء الغيهب شوكت يرجع؟

زهراء: توني فتحت التليفون حضر تجوال توسلت الصبح لا تطلع بـس العناد مسيطر عليه كلمة والثانية وصاح عندي شغل .

أبو الغيهب: إذا ميشل حالي وين يرتاح هشام البارحة نبهني
لا يطلع المحامين من ضمن المستهدفين بوضع العراق المتأزم.

زهراء: أن شاء الله ماكو شيء هسة شوية ويرجع لا تقلق ويرتفع السكر فدوة، تريگت لو أسويلك وياي.

أبو الغيهب: من الصبح الغيهب سلگ بيض وشاي حار وگعدنا أكلنا وطلع.

زهراء: متريگ انتَ وياه وطلع گدامك للشغل وما تحچي بـس من نزلت حچيت عليه توصل رسالاتك برأسي عمي.

ضحك بتلاعب..
-أم السان مثل زوجچ وين أگدر عليكم.

رفعت حاجبي وگعدت مقابيله على الميز، قدمت الشاي وسويت لفة النور يأكل وگاعد يلعب بتليفون عمو.

زهراء: خلص أكل أمي وأدخل للحمام أسبح.

هز رأسه بدون ما يرد
زهراء: النور تعرف إذا بابا يدري تلعب بتلفون جدو
شيسوي بيك وهو مانعك من التلفونات لان عندك دراسة .

النور: تجبروني أتصل على عمو هشام يجي يتعارك وياكم، يعني هم متقبلون أطلع بالشارع وتريدون تمنعوني من التليفون شنو أني بنية.

زهراء: عفية بالشاطر رادد أمك عفية، مو هذا التلفزيون بي يوتيوب وسينمانا، باوع بوقت فراغك ومن تكمل ادرس
وبالعطلع العب بالتلفون لابتوب بعد براحتك
اطلع روح بيت عمامك بلي يعجبك .

النور: مو أخابر عمو جلال أقنعه يجي يأخذني
أعيش يمهم وأعوفكم للأبد.

زهراء: إذا أنت گدها يجي أبوك وأحچي بهل طريقة
وبهذا الكلام گدامه يا ويلي شيسوي بيك يا ويلي.

غلق التلفون بعدم رضا بس افتهم الوضع
ودخل للحمام دقايق وطلع سابح صعد فوگ
بدل وعدل شعره وتعطر ونزل بوجهه للتلفزيون
يباوع بس ما يعجبه الوضع، خلصت وأخذت زينة سبحتها
وگعدت كل شوية أخابر على لعنة حياتي إذا ما يشلع گلبي
ما يرتاح، نزلت صارت هاجر مقابيل تحچي هي وعمي
أبتسمت وأني أفتح أيدي :عيني اليوم ست هاجر منورتنا
وينچ ها وينچ صار يومين ماكو.

هاجر: هههههههه وين يعني لو شغل لو بيت وجهال.

زهراء: علينا سمعنا كلام وصلني من ناس
يگولون بدلتي بعد ما تجين علينا كله بيت جلال.

ضحكت وضربتني على ظهري : سوالف هشام أبو المشاكل
لازم يخلي فتنة أوف من سوالفهم.

أبو الغيهب: بسرعة عرفت منو يعني الكلام صح.

زهراء: طبعا صح عمو قابل أغشكم مصادري موثوقة .

هاجر: بابا لازم توگف وياي أني بنتك، شنو كله بصف زهراء.

الغيهب: شبيكم معرسين.

أبو الغيهب: ماكو واحد يعرس غيرك
ما نعرف وين چنت متبطل سوالفك.

گعد على الكرسي طبگ رجل على رجل
يفر بسويچ السيارة : يا سوالف؟ أگعد بالبيت ما عندي شغل وعمل.

زهراء: لا عيني عندك شغل وعمل، بـس أني ما عندي
شغل وعمل غيرك، شكو داخل بالحذاء عود شوفوني.

الغيهب: شبيها نظيفة تلمع لمع.

زهراء: ليش ما مشيت بها بشارع.

الغيهب: ولچ شو صايرة حلوة.

هاجر: زهراء يضحك عليچ لا تضعفين أنت قوية .

باوع عليها رفع حاجبة وصاح : شنو قصدچ أضحك عليها
يعني زهراء مو حلوة.

زهراء: گوم انزع حذائك لا ..

وگف مقابيلي وهمس -لا انگلب عليك خبالو، حفظناها
غيريها لا أتزوج عليچ.

أبو الغيهب: يجبرها تهلهل عليه.

زهراء: أني ما أهلهل عمو الهلاهل اختصار إبنك.

رد علي وهو يصعد الدرج : ورحومي أختصاص
شنو يدفن فلوس.

زهراء: أبو هلهولة هسة أبويه يمك حواليك، ولله أخابره
أگله الغيهب هيچ وهيچ يحچي عليك.

هز چتافاته وصاح : بويه منو شغل ساجدة، خلتني أهز
من الخوف رحيم راح يعتقلني ويستلمني تعنيف.

ألتفت العمي وصحت متنرفزه : عموووو تسمع شلون
يحچي على أبويه.
عمي صاير أحمر مخنوگ من الضحك وجسمه
كله يهتز وهاجر مغطية وجهه، صحت بيهم وأني
أدگ الگاع برجلي : أنوب انتوا هم تضحكون ؏ سوالف
أبو هلهولة زين ولله.

رفع عمي أيده وفات للغرفة : إني طلعوني من
الموضوع أنت خبالو وهو أبو هلهولة منو يگدر عليكم.

سد ألباب لأخذت گلاص مي بارد شربت وگعدت
على الميز مقابيل هاجر، عدلت گعدتها وفرت
أصبعها بالشال، دخلت كم خصلة متطفلة تحمحمت
وهمست بخجل : أگلچ زهورة هاي شسمه.

باوعتلها بأستغراب وهمست : شنو شبيچ هاجر بيچ شيء
محتاجة شيء حسيتچ مو على بعضچ من أول ما دخلتي
عيونچ كل شوية تباوع على تليفون شصاير أحچي
أخاف محتاجة شيء لا تترددين أحنا خوات.

بلعت ريگها وذبت التليفون، تلعب
بـأصابعها بتوتر : هم خابرتي أبوچ اليوم
أو هو خابرچ؟

فاجئتني بسؤالها رديت واني اقترب منها
متعجبه اول مرة تحجي وياه بهل طريقة
-لا بـس ليش السؤال شبي أبويه سامعه شيء خوفتيني.

أشرت بيدها بعلامة لا : كلشي ماكو شبيچ، بـس هيچ هو
سؤال أجه على بالي.

زهراء: قابل الگدامچ طفلة أحچي شكو هاجر ابوية شبي .

ردت بخجل ولونها تغير من الخوف : أمانة ما أريد الغيهب
يعرف حرف من كلامي هذا.

زهراء: صدگ تحچين هاجر ومن شوكت
أني أحچي للغيهب موضوع دار بيني وبينچ.

هاجر: أدري بيچ ولله بـس يعني للتنبيه
لأن الموضوع حساس بالنسبة إلي.

زهراء: موضوع حساس بي أبويه دخيلك
ربي، شصاير ليكون مضوجچ أو طلع منه تصرف مو حلو.

هاجر: لا تستعجلين زهورة أبوچ إنسان واعي ومثقف مستحيل يتصرف تصرفات محلوة، الموضوع وما بي هو أن أني وأبوچ صار فترة نتواصل وو..

لا إراديا خليت أيدي على شفايفي مصدومة : أنتِ وأبويه شلون وشوكت؟

هاجر: لچ عيني نصي صوتچ لا يسمع أحد
وأروح بيها ولله الغيهب يموتني.

زهراء: تحچين لو انجلط هسة.

هاجر: بيوم زواج جلال طلب رقمي وخجلت
أرفض من يومها كم مرة خابرني وطلب يتزوجني على سنة الله ورسوله.

لزمت رأسي وبقيت افر بيدي ، حرت على خفت صرت
أرجف بمجرد أتخيل الغيهب يسمع بالموضوع : وشنو ردچ بوقتها ؟

هاجر: طلبت أخذ وقتي وأفكر بالموضوع، وبعد مدة قصيرة أتصلت ورفضت الطلب وبلغته يبتعد عني مريت بتجربة فاشلة
ومستحيل أعيد الغلط أني صاحبت أطفال وإذا أخطي
هل خطوة أخسرهم ومستحيل أتخلى عنهم على حساب
حياتي، گال هل موضوع تتركي علي وإذا فكر مجرد
تفكير يأخذهم اهجم حياته والمحكمة كلها تحت أيده
وگال لا تنسين أنت أخت الغيهب يعني يدمر نفسه
إذا يقترب من المحكمة.

أخذت گلاص المي شربت منه وهي تراقب الدرج
تخاف الغيهب موجود ويسمع كلامها : بقيت ُمصرة على
الرفض، وهو أصر علي أكثر وبكل مرة أغلق
هل باب يرجع يفتح الف باب كل يوم صار
يتصل وكل كم يوم يجيني الشغل، طلعت مرتين وياه
بعد إصرار منه حتى يسمع مني وأسمع منه ، وبعد
هل طلعات صرت لا إراديا أنتظر أتصال منه لو رسالة وأفرح
بصوت إشعارات التليفون صار يهتم بـأدق التفاصيل إلى إن أخذ گلبي.

زهراء: أخذ شنووو أخذ گلبچ ولله إذا يسمع الغيهب يأخذ عمركم.

هاجر: هنا المصيبة زهراء اليوم أبوچ يريد يجي يحچي هو
وأبويه يگلي الغيهب مو مهم بكثر ما أبويه موافقته مهمة.

زهراء: وبرأيچ منو الرأي مالته يمشي هنا.

ضربت ؏ رجلها نزلت رأسها
وهمست برجفه : گتله، ولله بلغته أبويه ما يكسر
كلمة الغيهب، بـس أبوچ عنودي شسوي بهل حالة
ولله لا أكل ولا شرب من الخوف.

هزيت رأسي ورديت بضياع : ولله حيرة يعني هو بالچذب
ما مبلغ واحد بينه هو ضامن رد فعل سيف
رجاء التوأم على هذا القرار.

بقت صافنة بوجهي وسرعان ما سألتني -شنو قصدچ زهراء ليش أني بي شي غلط؟ وبعدين أبوچ مو صغير حتى يأخذ إذن
من الكل قبل لا يأخذ قرار يخص حياته هو.

زهراء: فهمتيني غلط ما بيچ كل غلط بالعكس ولله
مستحيل يحصل أبويه وحده مثلچ والله شاهد فرحانة الكم
بـس إخوتي لازم يعرفون لأن متأكدة رجاء تكره هل موضوع، وأحتمال سيف يتحسس والتوأم متخوفين من فكرة دخول زوجة الأب.

هاجر: كلش زين أدري الموضوع مخربط وحساس عند الكل ولله شاهد رفضت حاولت هواي بـس الموضوع طلع من أيدنا.

أريد أجاوب ونزل الغيهب يلعب بتلفونه من شاف زينة گاعده توجهه عليها، رفعها ليفوگ ورجع حضنها ويشم بيها

_ لك افيشششش تنوكل ولله تنوكل أخليها
بالخبز وياها گلاص شاي ما ينشبع منها.

أجه النور من الغرفة يباوع على أبو وأول ما خلص كلامه
حچه والغيرة واضحة وضوح الشمس
-وأني ريحتي طيبة لو لا هم سبحت وصرت حلو.

الغيهب: بلااا تعال أقترب أبوسك وأقرر.

ركض على أبوه نزل الغيهب لمستواه، وزينة بعدها بيده
باس النور بخده وهمس.. -الله هم ترد الروح راح أكلك
أنتَ على غدانا وزينة بليل لأن خفيفة ما بيها لحم هواي.

رجعها بفراشها نور يريد يركض، گمز عليه ورفعه وصار يدغدغ بي بلحيته وهذا هرجنا هرج بالضحك، يرافس بيده وبرجله، أخذه لغرفة عمي دفع الباب وفات وقبل لا يغلق الباب أسمع عمي يصيح عليه
-شكو فايت أنتَ وهوستك شتريد مني تحب تغثني
كلك مغثه حتى سالفة بيها حظ ما عندك.

الغيهب: عبالي أسئلك شتريد تتغده لأن چنتك المعدلة كلشي
ما طابخة، نأكل مرگة هواء.

أبو الغيهب: كلشي أكل وشوكت ما يجهز الأكل
عادي عندي ما استعجل.

طلع من الغرفة يباوع علي صفح ويتقدم
لزمني من خدودي يمرد بيهن ويصيح : وين تشتغلين السحورة يا مكان لصمتنا لصم نتراجف منچ زهراء أم السحورة.

زهراء: ولله لو صدگ أعرف أسوي أول عمل
هذا السانك اليهلهل أقضي عليه من الإساس.

الغيهب: اليوم بنية تريد تنفصل والسبب زوجها بارد لا السان
لا عركة لا صوت ولا حس ولا نفس ما تريده حتى أني
چنت أحچي، گالت ياريت ُمتكلم مثلك يا ريت،
ركزي على ياريت وگولي ألف الحمدلله والشكر عندچ رجال مثلي.

زهراء: وين گالت ألك ياريت مثلك، شنو غويهب
مگابل النسوان وتسولف وتتمضحك وفرحان
تگلك ياريت مثلك، تقبل إذا شخص وياي بالدوام
يگلي ياريت زوجتي مثلچ.

الغيهب: ذول احنا عياله أمه داعية عليه ألعبه مصلخ وحق الله شحدهم.

دفعت ايده بكل خفه من خدي وگرصتها
زهراء: يوووووو شحدهم، يعني متقبل لعد شلون
تقبلها هاي تحچي هيچ وياك وبعين صلفة تنقل كلامها گدامي.

الغيهب: هي تحچي على قضية وصدمتني
وحدها حچتها، شمدريني أني لو أدري چان
لطمتها على حلگها قبل ما تنطق حرف واحد.

زهراء: ديررررر بالك غيهب ديررررررر بالك
ولله ثم ولله ثم ولله بعمرك ما تلمحني إذا تفكر مجرد تفكير بغيري.

فتح عيونه وعض شفايفة يتوعد
الغيهب: خبلة أنتِ أگلها يمين تگول يسار، لچ خبالو
أني شكوو هي گالتهااااا واني مجرد ما أبتسمت وغيرت
كل الموضوع وخلصنا.

لزمت رأسي بـأثنين اديناتي وگفت صرت
أمشي سريع صعدت على درج وأني أتذمر
يا ربي دخيلك شنو هل ورطة تورطت بمحامي.

الغيهب: أتفق وياچ خبالو صعبة، هم محامي لبق بكلامي وفوگاها حلو.

زهراء: ربي شوية من ثقة الغيهب.

الغيهب: تنتقدوني وتتمنون تصيرون مثلي، هل عالم
عايشين بتناقض الله يكمل عقلكم.

زهراء: وين يظل عقل وعايشين وياك.

الغيهب: بنت رحيم ما تعجبچ عيشتي.

أبو الغيهب: ولك غيهب كافي نوم الـ... الـبداخلك ، وأنت خبالو
أمشي فوگ صرعتونا ولكم.

طلع الغيهب وهو يفر بيده وعمي صافن
علي وهو رافع حاجبه وهاجر خربانة ضحك.
الغيهب: أمشي بابا نور نطلع نشتري غدانا على ذوقنا.

أول ما طلع هستوني أريد أبدل صاح علي عمي وگفت
عن الدرج ورديت بصوت خافت يوصل مسامعهم
_ ها عمو.

-عمو خابرني أبوچ هسة يريد يجي وظل بالي
معقولة أنت خابرتي بسبب كلام الغيهب شنو
عمو متعرفين غيهب بـس السان قابل ما متعودة
عليه ترا هو يحب يشوف غيرتچ عليه لا أكثر ولا أقل.

نزلت أكثر صارت هاجر مقابيلي واگفه خلف
عمي وتضرب على خدها، بلعت ريگي بخوف
من يمي صرت أرجف، رديت وصوتي واضح عليَّ الأرتباك
-من شوكت أنقل مشاكلنا الأبويه مستحيل، إحتمال عنده شغله يمكم.

أبو الغيهب: الله أعلم هو على وصول ونعرف شصاير وأن شاء الله خير.

صعدت بسرعة بدلت ونزلت ركض
من سمعت عالي صار جوة، قبل لا أفتح باب الإستقبال
لگيت هاجر بالباب تأكل بأظافرها، عبرتها ودخلت شفت
أبويه واگف يتجادل هو والغيهب بعلو صوتهم صايرين
نار وشرار، صرت بنصهم دفعت غيهب وأني أصيح أريد يسمعني

-گول يا الله، خلي نگعد ونتفاهم ليش هل صراخ.
قلص عيونه ولزمني من أيدي وصاح
- تعرفين بسوالف أبوچ، وأني مقهور واگول
زهراء بـس تعرف تزعل من ابوها المررررراهق .

رحيم: ليش ولك تزعل علي ما سويت
غلط، أجيت دگيت بابكم بكل صفاء نية.

الغيهب: نيتك ما أطلع بيها الباب لشارع، وسوالفك
هاي ما مقبولة افتهمت وأنتَ غلطان من
ساسك لرأسك، على يا أساس تخلي عينك على أختي.

اندفع الباب ودخل هشام يركض
-ها يابه خير شكووو شصايررر.

شاف الغيهب دفعه بعيد عن أبويه وعمي عاط بيهم

-ولك هذا أول ما شاف أبو مرته تخبل من الباب
ما يستحي ويگول عيب رجال خطار بنص بيتي.

هشام: ذكروا الله يا جماعة وفهمونا شبيكم وليش هل مشاكل.

رحيم: كل ما في الموضوع أني أجيت دگيت بابكم طالب
أيد بنتكم هاجر على سنة الله ورسوله، يابه غلطان بشنو فهموني.

ظل عمي وهشام صافنين بوجهه أبويه، وألف فكرة وفكرة أدور برأسهم.

الغيهب: سبق وگعدت أني وياك وفهمتك بكل احترام
ورفضت الموضوع بالكامل ليش تعاندني وترجع
تفتح لا ومقابيل الكل وين تريد توصل؟!

رحيم: مو من حقك ترفض أختك كبيرة واعية
ومثقفة تعرف مصلحتها، وتدرك الصح من الغلط أتركها تقرر.

الغيهب: طلبك مرفوض رحييم لا تعاند، ليش تخليني أتصرف
تصرف مو حلو وياك خليني محترمك الخاطر بنتك .

زهراء: غيهب إحترم أبويه رجاء عيب عليك تحچي
بهل نبرة مقابيله وأجب عليك تحترم أهلي مثل ما أني أحترم أهلك.

تراجع للخلف من شافني أرجف من العصبية منظرهم
وصلني لمرحلة فقدت أعصابي خوف، على قهر، على أرتباك وقلة حيلة.

الغيهب: إذن أحچي أنتِ فهمي يحترم قرار أخوها
وينسى الموضوع كون يشيله من رأسه.

أبو الغيهب: خلصت هاي هي سد حلگك، خليني اتفاهم أني وأبو سيف.

راح عمي على أبويه حط أيده على أكتافه وهمس بخجل
-أستريح ابو سيف نريد نفتهم أخذتونا حاصل فاصل وضحلي الموضوع.

كعد أبويه لزم رأسه ويدردم بعلو صوته
-الله يساعدچ بابا زهراء ولله بطلة ومتحمله
هل غثيث ما يتعاشر ولله رفع ضغطي بدقايق.

أبو الغيهب: ركضي بابا زهراء مي بارد الوالدچ.

عفتهم وأني أباوع الهشام مثبت الغيهب من أيده، أخذت گلاصات المي لزمتني هاجر بقوة وايدها ترعش
-فدوة أحچي انت وي أبوچ خلي ينهي هل موضوع
لا تروح تكبر وأخسر أهلي واطفالي أني مو حمل مصايب.

خليت المي على ميز وسحبتها وأني اتفحص
شكلها صار أشبه بلون اليمون
-أگعدي هنا وخليها على الله هو يسهل أمركم
وإذا بينكم قسمة ونصيب راح تصير لو مو الغيهب
يعارض لو العالم كلها توگف ضدكم، بعدين يا حلو
أنتِ الواضح أبويه مستقتل عليچ غاسلة عقله
وسارقة گلبه، ولواء رحيم مخليچ برأسه يعني من هسة أگول مبروك.
رجعت الضحكة الحلوة على وجهه أخذت المي وگرصت خدها وأني مستعجله ركضت دخلت أنطيت الأبويه شرب ذبيت كلشي
من أيدي وگعدت بصفة أخذت أيده أمسح عليها بخفة
وأني أقترب وأهمس بصوت خافت.
-سالمين لواء رحيم ترجف علمود مرأة.

-ولله يابه أريدها بـس هذا زوجچ حقير.

-يغار عليها، هو يحبها لأن عمتي خلتها أمانة عنده ويخاف
لا تتعب هاجر تعبت والحياة دائما تعكس وياها، بعدها صغيرة ونكسر ظهرها بأطفال أثنين شالت مسؤوليتهم وحدها هي أم
وأب، يابه اذا ما متأكد من نفسك تگدر تسعدها
وتعوضها عن كل جروح گلبها عوفها ولاتهدمها أكثر.

-وغلاتكم عندي اعوضها وأصير الها سند
أب وأخ وزوج مثل ما هي تحتاجني أني أحتاجها.

-يابه هاجر عدها أب خيمة على رأسها وما مقصر
وياها بگد الشعرية ، وعدها أربع إخوان صايرين
حياطين بيت ساندينها ومحافظين عليها من كل صعبه
يبيعون روحهم إذا تحتاجهم ويشمرون نفسهم للموت
إذا تأذت وإذا بيوم صاحت آخ يصيحون أخوتچ هنا ، بابا هاجر
تريدك أب لجهالها تريد تخلص من المسؤولية وتكون
أم دورها أم وبـس، تريد تسمع جهالها يصيحون بابا، تريدك
تعوضها وترمم گلبها المهدوم، تريد تحسسها بقيمتها كأنثى
بعد ما خانها وأختار مرأه غيرها تگدر يابه لو تنسحب من البداية.

-أني أبوچ يا زهراء أني مثلها أريد أكون أب بدور
أب وبـس ، أخوانچ يحتاجون أم قريبة الهم تسمعهم
من يتعبون ويحتاجون يحچون، أحتاج أدخل البيت
وزوجتي تستقبلني أختاريت هاجر أريد أكمل باقي
حياتي وياها شفتها مناسبة ألي وأني مناسب الها واحد يكمل الثاني.

-أن شاء الله تكون من نصيبك وأشوفكم
فرحانين ومثل ما مخططين يصير.
التفتت على عمي أنظر الهم بكل تركيز تراجعت
حتى أفتح المساحة الأبويه يحچي وياهم تحمحم
وهو يضغط على مخارج الحروف.

رحيم : أبو هشام قبل فترة وأني أسف على كلامي
بس تواصلت مع المحروسة بنتكم هاجر ولله شاهد كان
أبالي نتفاهم قبل لا أبادر واتواصل معاك ومع إخوانها، والحمد لله تفاهمنا وبلغتني أتقدم، وهذا الصار بالبداية رحت على زوج بنتي وگلت أكيد يحترمني ويگعد يتفاهم وياي لأني أبو زوجته
ولازم يحسب حساب خاطر زوجته
بـس الواضح نسيبي طايح حظ وبعيد كل البعد عن الاحترام.

صرت بين هدومي من الخجل نزلت رأسي
والقهر يأكل بي أكل صرت امرد بروحي
مرد وأصابعي اطگطگ بيهن حرت شحچي
ولله حرت أسكت يأكلني القهر، أحچي تكبر ما تصغر.

أبو الغيهب: افتهم منك هاجر عدها علم وموافقة ؟

رحيم : تگدر تتكلم معاها وتأخذ الجواب منها والكم كل الوقت.

الغيهب: وأني أخوها الچبير أخذ الجواب مني طلبك مرفوض.

رحيم: لك ليششششش ؟

الغيهب: أولا أن َت عمرك نهاية الأربعين سنة
وأختي نهاية العشرين فرق كبير بيكم ومتأكد
تختلفون بطريقة التفكير وهم راح ترجع أختي
مكسورة بيوم من الأيام لأنها مرت بتجربة
فاشلة وصعب أسمح تعيش التجربة مرتين.

رحيم: منو قشمر عليك وگال أسمح أخليها تعيش
معاناة قبل بكيفك تفتي أبو حلگ مو موتتني وراح
تنفجر مرارتي منك ولك أطلع منها.

الغيهب: وداعتك رحيم ما أطلع وراح تتعب وياي
فـ أنصحك نصيحة اطفر من هسة لا تستلم الصاعقة الكبرى.

رحيم: صاعقة تصقع رأسك كون بحق محمد وآل محمد
شلون يخليني اوگف أطحن ضلوعه.

الغيهب: هم بيك حيل تطحن ضلوعي، لواء رحيم دفنت
نسوان أثنين وبعدك أدور زواج طالب الحياة طلابه
عمي أستقر وروح تقاعد هي مال زواج.

صفگ أبويه بكل قوته وعاط بي -تحچي بعدد الزوجات
وأنتَ نص البنات متزوج ولك ما خليت وحدة يا متزوجها
ويا مطلگ زواج طلاق مستمر.

الغيهب: الحمدلله ثبتت على بنتك أنتَ هم أثبت وربي
أولادك وعوف أختي لأن ما أزوجها.

رحيم: هو أني هم ناوي أثبت وأكمل الباقي من
حياتي أني وأختك، وأن شاء الله أختك موافقة لا توگف
بطريقنا وسد حلگك وعرفني اتفاهم أني والوالد اطلع منها فرد مرة.

أبويه يحچي وما أشوف غير الغيهب تشنج ورفع أيده
متشنجة وترجف صاح بصوت خشن عالي إلى درجة
-زهراء تسكتين أبوچ لو أتصرف.

أبو الغيهب: أنتَ تطلع لو اهينك گدام الكل.

الغيهب: يابه صدگ تحچي لا تخبلني لا تسمح
أله يذكر أختي، ما أقبل أبد ومن سابع المستحيلات
ازوجها ألك شيلهااا الفكرة من رأسك نهائيا.

هشام: صياح لا تصيح أحترم أبويه هو يحچي، ثاني شي
يگول الرجال أختكم موافقة نسألها وإذا فعلا طلعت موافقة
مو من حقك ترفض هي مسؤولة عن قراراتها.

ضرب على طبلة مقابيله ودفعها وطلع وهو بقمة
الغضب بحيث جسمه عبارة عن سعفة ونظراته
لو تقتل كان أبويه حاليا بإعدادات الموتى.

أبو الغيهب: بابا أم النور بلا آمر عليچ صيحي هاجر
أشوف شنو رد فعلها على موضوع حتى نعرف رأسنا من رجلنا.

هزيت رأسي وبسرعة رحت الهاجر لگيتها
حالها أسوء من حال الغيهب مترددة لأبعد الحدود
متوترة إلى درجة ما تعرف تجمع كلمتين، شفتها تنزف
دم بكثر ما ضغطت عليها، لزمتني من أيدي وهمست
-گلبي راح يوگف بداعت نور وجهيني حايرة
من جهة أخوية هذا وكلمته ما أحب أكسرها
الغيهب سند ضهري وگفني على رجلي
وأخذ حقي كامل وأكثر بيوم كسرتي وتحطيمي هو
بناني أجي هسة أوافق على شخص هو رافض
رفض قطعا فكرة زواجنا، ومن جهة ثانية رحيم
أدركت يحبني ويريدني بصفاء قلب أكون زوجته
وعدني يعوضني أني وأطفالي عن كلشي خسرنا، وأولهم
التماسك العائلي والألفة والمحبة والمشاركة بيناتنا.

زهراء: خليت نفسي بموقفچ وأدركت صعبة
الموافقة والرفض قرار أصعب من قرار، أحسن حل
بحالتچ هذه تطلعين مقابيلهم وتطلبين وقت تفكرين
بالموضوع أكثر أخذي مساحتچ الكافية وأدرسي
موضوع الزواج من جميع النواحي، بـس ثبتي هل معلومة
برأسچ ولا تنسين كلامي هاي حياتچ ومحد بينا يدوم
ألچ لازم تستقرين بعدچ صغيرة باچر عگبه أطفالچ
يكبرون ويتزوجون وتبقين وحيدة، وبنفس الوقت
الغيهب شايف حياته وهل حياة كلشي بيها لا تعتمدين
على أحد شوفي مستقبلچ واستقري أستغلي كل الفرص
ولا تضيعيها من أيدچ. سحبت نفس من بعد كلامي
أطمأنت وكلامها تغير وكأنها عرفت الطريق
الصحيح المناسب لحياتها، لزمت أيدها غسلت
وجهه وسحبت كلينكس من طاولة الطعام
نشفت وجهه وعدلت ملابسها، فتحت الباب
ودخلنا أني وياها، تكلمت بصوت موزون
عكس الحروب الداخلية
-السلام عليكم. وگفت أبويه مبتسم وهو يرد عليها
ونظرات عيونه حضنتها بحب

-وعليكم السلام ورحمة.

گعدت مقابيل أبويه وعمي وأني بصفها وهشام قريب
علينا، قاطع الصمت عمي وهو يوجه كلامه الهاجر

-بابا هاجر أكيد عرفتي أبو سيف ليش موجود
اليوم عدنا ، فـ يا بنتي شنو رأيچ بالموضوع أحنا
ما ندخل بقراراتچ مهما كانت.

هاجر: بـس يعني أحتاج كم يوم أفكر بالموضوع
وبنفس الوقت أريد أگعد أحچي أني وأبو نور
حتى افتهم ليش معصب من الموضوع
ورافض وهم ما أريد استعجل بقرار وأندم بعدين.

رحيم: محال بيوم تندمين.

هاجر: أن شاء الله وأتمنى.

رحيم: بيوم تصبحين من نصيبي تنسين كلمة أتمنى لأن طلباتچ أوامر.

تحمحم هشام وقاطع كلامهم
-احممممم أن شاء الله يصير خير وبأقرب وقت
يوصلك الجواب أبو سيف الغالي.

وگف أبويه تشكر منهم وهو يتصافح، طلع هو وياهم
أباوع من الشباك خفت لا يتجادل هو والغيهب
بس الواضح الغيهب طالع لأن حتى سيارته ماكو ، فتح الحماية
الباب صعد أبويه وراح، هاجر بسرعة عدلت شالها
وتحججت بأولادها طلعت ركض في سبين ما تحچي
مع أحد بيهم لأن أفكارها مخربطة، گعد هشام يتحاور
هو وعمي بالموضوع بين الرافضين
الفكرة وبين الموافقين، إلى أن دخل الغيهب
أخذهم بالصياح وشلون تنطونه مجال وليش
توافق ومنو هو ووووو ، أكتفيت بالسكوت ونهائيا
ما حبيت أدخل تحسبا للمستقبل اذا بيوم صارت القسمة
واختلفوا اني ما يوگع عليَّ لوم لان هي بموافقتها ، بعد ما تعب
من الصراخ دفر الباب وفات للمطبخ
شافني گاعدة ألاعب الأطفال، تراجع للخلف مسح
وجهه وأستغفر بقهر، باوعتله بتركيز وهمست بغضب مكتوم
-نعم خير صارت بيها تكسير، وداخل البيت بوضع الهجوم
وتباوعلي بعصبية شكووووووووو تريد تضرررب .

تقرب علي ومن بعد فترة طويلة من الأمان
رجعت حسيت بالخوف، تراجعت للخلف
لزمني من أيدي بهدوء ورفعني وهو يحجي بتحذير
-أني أضربچ ليش أنت خليتي يفكر بيهااا؟
بعدين شنو تريديني أصير مرأة صوتي
ما ينسمع، كل ما أصيح تنرفزين وتصيحين
تريد تضربني گدام الأطفال منوووو يمچ
تدورين مشاكل تريدين تستفزيني غصب.

ضغطت على أسناني وسحبت أيدي بقوة، مشيت من
مقابيله وأني أرد : كافي رجاءً .

أبتسم بوجهه النور وصعد فوگ دقائق معدودة
نزل سريع وبدون صوت طلع من البيت بقيت
أني وعمي واحد يباوع على ثاني،سويت الغداء العمي
خليت الصينية مقابيله وهمست
-عمو أكل وراك علاج لازم تشرب ولا تنقهر
ولا تفكر الكلشي أكو حل، الغيهب يومين وتهدأ
أعصابه ويگعد يفهمنا كلشي يدور برأسه.

أباوع وجه أصفر يخاف ويحسب حساب المستقبل
يخاف من رد فعل الغيهب وبنفس الوقت ما يحب
يعارض قرار هاجر وأدري بي يخاف لا تتندم هاجر
أو زوجها يسحب أطفالها، التهيت بالتنظيف والأطفال
ورجاء خابرتني واضح أبويه بعده ما مبلغهم
بقرار زواجه، بقيت أحچي وياها طبيعي إلى
أن نغلق الجهاز خليته على شحن وگعدت
أباوع فلم على تلفزيون صار الليل وتأخر
الوقت نزلت لعمي وجه ما يتفسر، الضغط صاعد
والسكر ما مستقر ضربته إبرة وخابرت على
غيهب أول مرة ما رد والثانية والثالثة من شافني
ُمصرة على مكالمة فتح الخط صوته تعبان بـس صاح
-نعممممم ست زهراء.

زهراء: أستاذ غيهب عيني أبوك الضغط صعد عنده
والسكر تعال للبيت وبطل من سوالفك.

غلق التلفون بوجهي ظليت گاعدة أحچي أني
وعمي أحاول أخلي يهدأ، أنفتح الباب الخارجي
سمعت النور صاح بصوت

-بابا بابا.

الغيهب: نور عيوني.

نزل يبوس خده عدلت گعدتي دخل
علينا شاف عمي نايم ضحك وهو يشمر جسمه على
الچرباية

-ها شبيك بـس لا تغار وهم تريد تزوج أحچي لا تستحي أدورلك.

أبو الغيهب: زهراء أخذي مني ترا ما بي حيله وهذا
مخبل ما تعرفين يضحك لو عصبي وأني أريد أموت وبالگوه حامل نفسي.

الغيهب: من الأخير أحچيلي المواصفات
شلون تريدها بيضة سمرة طويلة قصيرة.

أبو الغيهب: حيوان عوفني بحالي.

الغيهب: بدون ما تحچي وتتعب أعرف ذوقك بناء
على اختيارك لأمي كشفت أن َت تحب المرأة سمراء ذات عيون كبيرة واسعة وشفايف هيچ حلقوميه وجهه
صافي وجسم متناسق بويه تروح بيها من ليلة العرس.

أبو الغيهب: أنتَ  أثول هاي أنتَ ما تقبل بيك، وين أكو هيچ تفصال.

زهراء: ها سالمين عمو مو عبالك تجاوبت
وبعد شوية تگول شوكت العرس؟

الغيهب: اطلعين منها بنت رحيم لا أتزوج عليچ؟

زهراء: شتسوي ما سمعت ضربة إذني.

الغيهب: طلعي منها شبيچ أريد أشوف أبويه عريس.

زهراء: هاا أي تدلل إذا هيچ وأن شاء الله يوم ألي
وهم أشوف أبويه عريس.

الغيهب: لا تستفزيني.

زهراء: هذا نصيب لا أختياركم ولا أختيارهم والكاتبة
ربنا يصير رغما عن الكل هونها غيهب خليها تهون أنتَ أكثر
أنسان تعرف المعارضات والخيارات الكثيرة شگد متعبة، إذا تحب
هاجر خليها تقرر حياتها ولا تعبها بالتفكير، اليوم خليتها
بنص النار وطلعت، تعزها تخاف عليها روح أگعد
أنتَ وياها فهمها سبب رفضك يمكن أن َت تشوف
شي هي غافله عنه وأحتمال كلنا غافلين، مو لأن هو أبويه
اوگف وياه إذا عندك سبب منطقي كلنا وياك بـس إذا ما عندك خليهم يشوفون حياتهم.

ظل منزل رأسه يضغط أصابع أيده بقوة، بعد
مدة وگف طقطق رگبته وهمس..
-رايح لبيت هاجر وممنوع شخص بيكم يدخل بالموضوع أني وياها نتفاهم، وهي إذا شافت كلامي صح تقرر.

زهراء: ربنا يكتب الخير. نظرلي بضياع وطلع مشيت وراه بسرعة، وصل للباب سحبت أيده ألتفت وقبل لا أنطق بحرف
نزل لمني بحضنه دفن رأسه برگبتي جر نفس وهو يهمس..
-رأسي يريد ينفجر ما عايزين مشاكل شوكت نرتاح.

رفعت نفسي طبعت بوسة على شفايفه وأبتعدت حضنت وجهه بيدي
-نرتاح وداعت عيونك الحلوة ماكو شيء يستاهل تعذب نفسك حياتها هي تختار طريقها أبتعد ةعن المشاكل والصراعات
هذا هشام أخذ الموضوع من منظور آخر غير منظورك
أيقن أن الطلب يخص هاجر وبـس.

الغيهب: زهراء هاي أختي شنو ما يخصني، لا تزعلين
بـس أبوچ أكبر منها بهواي هو بنهاية الأربعين
وهاجر نهاية العشرين ترا كارثة.

زهراء: أحچي وياها وأن شاء الله ما يصير خاطرك
إلا طيب بعد، أسحب نفس شهيق وزفير لا تصيح
تفاهموا لخاطري بداعة نور.

الغيهب: أحاول.

يريد يطلع بعده يفتح الباب ركضت النور

-بابا راح يروح لبيت عمة هاجر أركض بسرعة.

هو ما گال باطل ركض وياه أعرف بالغيهب ما يحب يصير عصبي مقابيل نور حتى لا يتعلم يعلي صوته، أو يخاف منه، طلعوا وعمي
صاحني بقيت گاعدة يمه بـس بعثت رسالة لهاجر بلغتها، ظليت
بقلق والوقت تأخر عمي نام وأني گعدت بالأستقبال ه َم والوحدة
دخلوا بعدني ما فهمت وتلفوني وتليفون الغيهب
يرنون بنفس الوقت بقينا واحد صافن بوجهه الثاني، أباوع
على رقم أبويه والغيهب همس..
-هذا إيهاب.

رديت بأستغراب -هلو بابا.

رحيم: زهراء بابا بسرعة تبدلين أنت وأطفالچ أني قريب
على بيتكم ضروري نطلع من بغداد.

صدت عيوني بعيون الغيهب والرجفة لازمتني
-شصاير يابه شبيكم.

عاط بعلو صوته
_ بدليييييييي بسرعة.

غلق التلفون والغيهب أجه بإتجاهي
-شنو ذولي مخابيل على يا أساس يطلعون من بغداد.

صوت شخطة السيارة تمرد گلبـي لزمت أيد الغيهب وهمست..
-يمه فدوة غيهب خفت ولله.

أندگ الباب راح الغيهب بسرعة فتح الباب
دخل أبويه وإيهاب والحرس توزعوا على
سيارات أباوع رجاء بيدها كيان وترجف
والتوأم واحد حاضن الثاني، يبس حلگي وعيوني
توسعت ألتفتت أركز على صوت أبويه وإيهاب
يفهمون الغيهب، طلع عمي يركض
-خير أبو سيف!

عمي كل يظن الغيهب مسوي شي غلط
وأجه أبويه يتعارك وياه
 -ضروري أخذ بنتي وياي لا تعاندني ولله لمصلحتكم.

الغيهب: ولا بأحلامك زوجتي وأطفالي ما يطلعون
أن َت مهدد هي وأطفالي شكووو شنو هل لعبة
رحيمممممم ترا أني مو غبي.

إيهاب: أبو نور الله شاهد مو لعبة صدگني كلنا مهددين.

الغيهب: أثبت.

سحب إيهاب ظرف طلع ورقة بيها تهديد
بخط اليد (لواء رحيم دمك ودم أولادك الخمسة مهدور نبهناكم أسمائنا ما تطلع وأنتَ خالفت الأوامر اليوم كلكم تحت مرصاد القناص )

سحب صورنا بأماكن متفرقة رفع الغيهب رأسه وصاح
-الله لا يوفقكم مورطين نفسكم وأني وزوجتي وأطفالي نوگع بيها.

سيف : الله وكيلك ما متورطين هذا عملنا قدمنا أسماء
متورطين بالأحزاب وتهددنا حالنا حال الباقين.

الغيهب: يااااا باقين دخيل الله ولكم هاي صوركم
ومراقبين يعني أحتمال أنتم هنا هسة يقتلوكم.

رحيم: صار ساعة أصرخ بسرعة خلصونا ضروري نطلع من بغداد حالا.

الغيهب: وحق الله من شفتك لليوم ما شفت الراحة
ولا الخير ما وراك غير المصايب هجمت حياتي هجم.

رحيم: زهراء تبدلين لو أخذچ بملابسچ هاي.

باوعت على غيهب ضايعة عض شفايفه وصاح بقلة حيلة
  -روحـي زهراء بسرعة لا تبقين ويعرفون مكانچ، أكيد
الواء مجهز مكان أفضل.

صعدت بسرعة أخذت كل احتياجات اطفالي وأخذت
شي بسيط ألي، نزلت ركض أخذ سيف الجنط
وطلع وإيهاب شال نور وركض بكل سرعته
للسيارة ، لزمت أيد الغيهب وهمست ودموعي تمنعني أشوف بوضوح -تعال ويانا الله يخليك.

الغيهب: روحي أنت وأني اصفي الوضع وأجي أخذكم نسافر فترة إلى أن يهدأ الوضع نرجع.

زهراء: تعال أنتَ وعمو وبعدين نسافر.

أبو الغيهب: أني ما أطلع من بيتي توكلوا أبويه.

حضني الغيهب وسحب مبلغ وهمس..
-گلبي يمچ ديري بالچ على گلبي أطفالي أمانة يمكم.
شهگت والعبرة خنكتني تمنعني من الكلام
-غيهبي.

الغيهب: نعمة الرحمن.

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد