رواية ظلمات الغيهب الفصل الخامس وخمسون 55 - بقلم اسـاور حسين 🦢✨

<ظلمات الغيهب >
حلقة _ 4 _ الجزء الثاني ..
بقلمي : اساور حسين .

بوسط انكساراته قال :
المجروح من عائلته لا يُشفى ابدآ 💔.

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
......................><><><><><.....................
زهراء..

زهراء: الو هلو حبيبي .

الغيهب: عيوني فد مشتاقلج .

زهراء: هل ايام انتَ كارثي بالاشتياق شكو بس لا راح اموت .

الغيهب: اسم الله يومي قبل يومج ما اريد حتى الموت يفرقنا.

زهراء: هههههه اخذت زينة من الحضانة وهسة مقابيل
مدرسة النور راح اخذه واروح لبيت اهلي هاجر
خابرتني طابخه علمودي دولمة .

الغيهب: اي خابرتني روحـي بس سوقي
بطيء مو تنفعلين لان الجهال وياج يشتتون تفكيرج
وبليل امر عليكم نطلع نتونس نغير جو .

زهراء: هل ايام شنو الموضوع كله دلال
وطلعات الموضوع يخوف .

الغيهب: اريد نتونس .

زهراء: اوكي دير بالك من نفسك عمري .

غلقت المكالمة وبقيت اضحك والعب ويه الزينة
تكمز بالسيارة ، دقايق وطلع النور من شافني
اجه يركض بتجاهي ويلوح لجماعته ، ابتسمت
بوجهم وهو صعد بوستي ويصيح : فرحت من اجيتي .

زهراء: واني فرحت من شفتك ، اخذ هاي كيكة وعصير
اشرب بين ما نوصل لبيت جدو .

النور : هلا والله يعني سيف يعني الدلال .

زهراء: ولكككك نور لا تحجي هيج خبلتني
هذا سيف ابو لسان يعلم بيك .

بقيت اسوق وهو يسولف عن يومه بالمدرسة
وشلونها دراسته الى أن وصلنا اتصل الغيهب
_ ها خبالو وصلتي ؟

زهراء: هياني مقابيل الباب وصلت .

الغيهب: الحمدلله يلة فوتي گلبي ديري بالج ؏ نفسج .

غلقت المكالمة ودخلت گلبي نقبض ماعرف شنو السبب
بس من هل لحظة ولا ارتاحيت وكأن صار شي لو راح يصير
انطيت الفاتيح للرجال حماية مال ابوية متوسط العمر
وجهه بشوش وطيب اخذ المفاتيح حتى يدخلها واني فتت
تلگتني هاجر من الباب اخذت الزينة تبوس بيها وتحضن بالنور
بوستها ورحت الرجاء تبدل لأبنها ، أخذتنا السوالف بين ما دخل
ابوية يضحك وياه سيف لابسين عسكري عود يسلمون
علينة استغفرلله يتفننون شلون يلعبون هم وأطفالنا واحنا بالأخير .

صعدوا واني والبنات دخلنا للمطبخ نصب بالغداء
ومن بين كلامنا تذكرت هاجر : صبيتها وتذكرت الدولمة
من اكلناها بالجزيرة هسة كون ناخذها وهم نروح ناكلها هناك .

بقيت اعدل بالمواعين ؏ ميز واجاوبها : شلون دولمة يبووو
طلعت من عيني من سالفة عمي .

هاجر : ابوية مصيبته مصيبة وهسة مسوي الطامة الكبرى .

درت وجهي عليهه بفضول ماعرفت شنو قصدها
_ يا طامة ياستار بالبيت عمي نايم ..

باوعت بغرابة وهي تبتسم وتفر بيدها وتاكل جزر
من جدر الدولمة : لا تگولين ما تدرين ، غير قنع الغيهب
ومخلي يشارك بـ 25 مليون ومشترين بيت لست موج
وامها بـ أربيل .

بلحظتها لو اعرف اتحرك اعبر انطق ارتاح
بس بنفس الثانية وهي تحجي ونطقت اسمها
جسمي نمل وبمجرد ما رجع انجمع اسم موج
بالغيهب گلبي رجع وانفتحت جروحه تشنجت
صرت مثل المخبلة بس فاتحه عيوني واباوع
فلشت المواعين بالأرض ومشيت ما اندل دربي
امشي واتعثر بالبوب ، جهالي بعد ماشفتهم
خليت الشال بـ اهمال ؏ راسي وطلعت امشي
بسرعة هاجر ورجاء يصيحون بـ اسمي
فصلت ؏ اخير : امينغ وين المفاااتيح .

طلعت السيارة ولان لابسات ملابس بيت
ما يگدرن يطلعن ورايَّ بس اسمعهم يصيحون
بـ اسماء ( سيف ، رحيم ) طلعت بكل سرعتي
اريد اتأكد اوصل للبيت وأتأكد قبل لا اسوي جريمة
بيهم بس اريد اوصل شيوصلني .

بلاوعي قفلت السيارة مقابيل الباب دخلت للبيت
وعمي گاعد يتغدى بالمطبخ هو وملاك الي ماتدخل
البيت اذا زهراء موجودة لازم اني طالعة ، عبرتهم وصعدت
بوجهي لغرفتي ، بقيت اضرب بالمجر اخذت المفاتيح
من العلبة وفتحت خزنة صغيرة بالكنتور مخلين الفلوس
بمجرد ما انفتحت سمعت صوت عمي : شكو بنتي ؟

وگفت ؏ حيلي وفتحت ايدي رفعت حاجبي وسعت
عيوني بعدم تصديق : بنتك !!! اني بنتك من شوووووكت ؟؟

ابو الغيهب: بابا زهراء شصاير ؟

ضربت فاقدة ؏ صدري ؏ وجهي
واصرخ ودموعي ؏ وجهي تجري : بنتك وهجمت بيتي
ما اسميك غير يابه ، اتأكد من صحتك قبل لا اتأكد من نفس
ومن جهالي ، اشوفك جوعان لو شبعان وما اخلي لگمه بحلگي
اذا ما تاكل احسن وارتب اكل ، اهتم بيك اكثررررر من روحييييي اشوفككككك اكثر من اهلي هيج تغددددددرني هيج تجازيني !!

نزل راسه مفتهم عن شنو احجي
زهراء: وين ابنكككككك هااااا وين ابنك .

عافني ونزل اخر ماتبقى من الفلوس لزمتهن ملختهن تملخخخخ
وكل الملابس خليتهن مداس بالأرض ، وكل لوحة موجودة
بالغرفة ملختهااا فاقدة اصرخ الطم ما اصدددددك ولااا اكدر اصدك .

نارررر بكلبي ناررر صار بيَّ حيل اضرب بالبوب
مال كنتور وما احس بوجع فلشت المرايات وماكو وجع
الم بروحي مايوصل ربع الم وجع اعظام ايدي من اكسر
وبعالي صوتي اصرخ : هجمممممم بيتي وحياتي نهجمت .

صعدت ملاك وعاطت بوجهي واني من فترة طويلة
لا شايفتها ولا شايفتني : شبيج فضحتينا ماتستحين
الغيهب كبررررر راسج .

وكفت بوجهه ورفعت اصبعي وصحت
_ اششششش ولا حرررف ولا نفس لا اطلع ضيم گلبي بيچ .

ابو الغيهب: شو ماتستحين شلون تحجين هيج ؏ بنتي .

ضربت ؏ صدري وبنفس نبرة صوتهم
اذا مو اقوى عطت : اني ماااااا استحي لووووو انتَ وابنك
وبنتك هذا تعبي تنطون تعبي لوحدة بنت شاااااارع اليوم
وحق ربي ادمر كُل واحد تسبب بحالتي هااااي ورجفتي
ارجعها الكم اضعاااف .

سحبني عمي بكل قوته وشمرني برة الغرفة
وهو يصيح : اطلعي برة البيت يلة هسة تطلعين .

ملاك : شفتي نفسج زيادة عن الزوم بسبب الغيهب
والله ومن لاشيء كبرچ وصلچ بعد شتريدين انجبي واسكتي .

وگفت ودفعتها ؏ بآب انضربت وعاطت
_ انتِ تسكتين وتطلعين لا تسمعين كلام مايرضيچ
خليني محترمتچ ولوووو انتوا عائلة حرام بيكم احترام .

دارت ؏ ابوها وتأشر عليه : شووف شلون تطاول يممممه
النماريه يمه الصلافه ، شنوووو ماكو زلم تلمج .

زهراء: محترمة نفسي ما احتاج زلم تلمني قبل لا اشوف وجهج .

رجعت للغرفة أجذب بنفسي اي وصلت مرحلة أجذب بنفسي
شهگت ودموعي عمت عيوني من سمعت صوت ابوية
يصيح بـ اسمي من جوة تقدم عليَّ عمي وجرني من
كُل عقله من شالي وفر وجهي براشدي بهتت انصدمت
ماصدگت معقولة بحلم لو علم هذا يا ناس عمي عمي هذا ابوية
_ تاخذين اهلج وتطلعين من بيتي لج مو عبالج تخربين علاقتي
بـ ابني ، فلوس هو انطاني بكامل رضاه وقناعته .

زهراء: بكامل رضاه ينطي لوحده هجمت حياته هجم .

ابو الغيهب: بنت عمته شنو تريدي يشموها بالشارع
وجانت خطيبته عيب ؏ شواربه اذا ما يحتويها
غلطت وتندمت حلوووووة هاي ماكو بشر يغلط .

والله بلحظتها النفس وگف لطمت ؏ وجهي
ولطمت وصرخت دفعت ايده وعاتبت : ليششششش عمي ليششش
وتعبي ، ومرضي ، وسنين عمري ، بهل سهولة تهجمها عادي
تخرب حياتي عاااااادي عندك عااااادي عمي عادي جاوبني
واطفالي هااا واطفالي .

بحالتي هاي وعلى صوتي وبقمة إنهيار اعصابي
صعد الغيهب يعبر بالدرج بس يريد يوصل وابوية
وراه يصيح : ولككككك شبيهااا عبالي تتعارك وياك
طلعت طالع لعد ويامن تتصايح .

صعد فاتح ايده يباوع بالوجوه تقدم بتجاهي
بكثر ما متفاجئ مايگدر يرمش : منو ضاربج شنو هاي اثار الأصابع .

ضرب عمي ؏ صدره وصاح بي آني ضربتها وارجع اضربها
اذا تظل كاعدة بيتي .

الغيهب: نعممممم !!! شنو تفضلت بلازحمة ؟

زهراء: انتَ اتفضل واحجي بدل ابوك
ضربت ؏ باب الخزنه وعطت : وينهن الفلوووووووس ؟

قوس حاجبه متعجب من طريقة كلامي وياه
_ شبيچ هوووو شكوووو ؟

زهراء : غيهب للمرة الأخيرة اسأل وين الفلوس ؟

الغيهب: عند ابوية احتاج فلوس وساعدته .

زهراء: ساعدته بشنو ؟

الغيهب : يريد يشتري ارض ما ادري بيت هيج شي .

ابو الغيهب : بلغتچ هو سلمني لفلوس .

زهراء: تنطي تعبنا الموج !! موج غيهب موج
رجعت جمعت اسمك بـ اسمها ، موج إلي لليوم نتعالج بسببها
وصارفين فلوسنا ومالنا وتعبنا ؏ دكاااااااااااااااتره نفسانيين
في سبين نتعالج من عقدها الي زرعتها بيك وانت زرعتها بيَّ
بهل سهووووولة غيهب تسامحهااااا  .

الغيهب: اسامحها شنوو والقران ما شايف وجهه
اني انطي فلوس الموج كُل عقلج زهراء .

دار ؏ ابو واني تحركت اريد اطلع من هل تابوت
أريد الهوى لزمني من ايدي واني أشرت لأبويه
الغيهب: لااااا زهراء عليچ بداعت العشرة لاااا والقران
يااااااابه احجي يابه اني ما انطيت لمووووج فلوووس  فهمها .

ابو الغيهب: انتَ مو سلمتني 25 مليون اشتريت بيهن بيت
مو تعرف بهل موضوع .

الغيهب: اي اعرف اشتريت بيت .

زهراء: بابا اخذني راح اموووووت .

هجم سيف اخذني من ايد الغيهب
وابوية سحبني : زهراء لااااا لج لاااااااا البيت
ادري بي بس مووو المووووج .

نزلت واني اشهگ كلشي نهجم بقيت بس
اناشغ واصيح : كسرني للمرة الآلف يكسرررررني .

ظل ابوية يحجي وياه ويتعارك هو وابو الغيهب لان ضربني
سيف صعدني السيارة وحرك حتى ابوية يجي ويصعد
هو صعد والغيهب فتح الباب : صدك تحجين بس احجي وياج
ليش تكبرين المشكلة مايستاهل الموضوع نتفاهم بداعت العشرة
بس نتفاهم وروحي .

تهسترت منه ومن صوته حركاته كرهت كلشي
وخسرت هوووواي كافي لهنا وكافي
تحركت السيارة والطريق كله اني اناشغ وابوية
يحاول ويايَّ بس يريدني احجي : جاوبيني بابا حركتي
گلبي والله خيولووون كافي الى جهنم وبئس المصير.

زهراء: كسرني رجع كسرني وضيع تعبي .

رجعوني للبيت رجاء وهاجر منتظرين بالكراج
اشر لهم سيف يعوفوني ودخلني وابوية ورايَّ
يحجي : حاولتي وياه رجعتي للحياة بس مايستاهل
سويتي كُل لعليج كافي بابا شوفي حياتچ بعيد عنهم .

سيف : يابه عوفها بعدين حالتها حال مو وكت هذا الكلام .

صعدني فوك النور من شافني اندهش
_ ماما شبيها ماما .

گعدني سيف ؏ سرير وثنه ركبته مقابيلي گعد
_ كافي خوية لا تأذين نفسچ اكثر بعدچ
ما مفاهمة الموضوع بالمضبوط انتظري
ارتاحي استفسري وبعدين نهاري .

هزيت راسي بعدم تصديق
_ راح كلشي راح خسرت تعبي خسرت .

باس أيدي وحضني وهو يمسح ؏ راسي
_ لا تبچين هيچ مقابيلي لا تخبليني زهراء
والله اروح اسوي مصايب بيهم ، صيري قوية
مو اني اگول زهراء قوية هي هاي قوتچ .

دخلت رجاء رغم جنت اسمع صوت صراخها وغلطها جوة
بس من فآتت ملامحها كلامها كلها هدوء : سيف بابا يريدك
روح آني باقية يمها .

سحبت الشال بكل سلاسة من راسي وبقت تعدل بشعري
نومتني ؏ رجلهه وهمست بخوف : احجي شي زهراء
لا تخوفيني عليچ .

غمضت عيوني وهربت لا اريد افكر ولا احجي
جبرت نفسي انام ، ماعرف شگد مر وقت بس
من گعدت رجعت وجبرت نفسي انام للفجر بعد ما گدرت انام
بس عقلي مايتحمل يفكر والله بس أفكر انجلط نزلت جوة
بقيت أدور بعلبة الأدوية مخليها بالمطبخ لگيت منوم
ومسكن الآلم من وجع روحـي ما ادري شنو الوجع بس اخذت
مسكنات ومنوم ورجعت للغرفة رجاء نايمة من دخلت فزت
رجعت للفراش حتى ما احجي بقيت مغمضة الى ان اخذ الدواء
مفعوله ورجعت نمت .

لثاني يوم الصبح اني ؏ نفس الحال رفضت احجي
رفضت اكل اشرب ماريد شي بس اريد اظل وحدي
والكل يريد يحجي ويايَّ تعبت من الضغط غلقت تلفوني
وبس اجاني ابوية طلبت منه طلب واحد : بس تعوفوني هل فترة
وحدي ، اريد وحدي افكر ، اعيش صدمتي لا تدخلون عليَّ .

رحيم : خايف عليج والله بابا .

زهراء: ابوس ايدكم عوفوني .

باس راسي وطلع ومن يومها طلب من الكل يبتعدون عني
حتى اطفالي ما ادري شنو وضعهم يداومون او لا ياكلون
ينامون شلونهم بدوني .

بعد سبع ايام بـ ساعاتها ولحظاتها قررت ما انام أواجه
تركت الغرفة وتوجهت السيف گاعد بغرفته يخابر
من شافني فز واخذ ايدي : هلا بهل طله يابه وأخيرًا .

زهراء: عندي طلب .

سيف : تأمريني .

زهراء: تاخذني هسة للنجف اريد ازور امي .

سيف : هسة ؟

اومات براسي بتعب وخمول
_ تروحين تتخربطين من تصيرين زينة اخذج .

زهراء: اذا صعبة عليك عادي اني اندل واكدر اروح وحدي .

سيف : لا يمعودة وحدج شنو وحدج اني اخذج بس جهزي
نفسج بين ما اجهز نفسي .

تركته ورحت للغرفة اخذت ملابس وحمام سريع
بدلت وباوعت ؏ ساعة بـ 3 ونص الفجر
نزلت جوة لگيت سيف يطلع بالسيارة
طلعت ورفت راسي للسما جريت نفس وغمضت
عيوني لدقايق الهوى بارد ينعش الروح المحترگة
صعدت من سمعت سيف صاح بـ اسمي ساق
ولنص الطريق سألني: ولا مشتاقه لأطفالچ .

زهراء: وينهم ؟

سيف : اخذتهم رجاء يمها صار كذا يوم
بس حالتهم حال يريدوج انتِ وابو ...

رفعت ايدي وقفته قبل لا يكمل ورجعت راسي ؏ شباك
سيف : راح تبقين هيج تموتين منو يفيدج لا اكل لا شرب
لا دوام لا شغل لا عمل لا اطفال لا حياة دفنتي نفسج ليش .

زهراء: رجعوني لنقطة الصفر دمروني .

سيف : زهراء انتِ مفتهمه الموضوع غلط
الغيهب كُل .

زهراء: لا تذكر اسمه لا تخليني اتندم صعدت وياك .

سيف : الغيهب تأذه اسمعيني لج ابوية وايهاب لعبوا لعب بي .

زهراء: لاااااا تذكر اسمه كافي كااااافي .

سيف : كُل يوم يجي يتوسل نذل ليش مو هذا ابو اطفالج ؟

زهراء: نزلني .

سيف : لمصلحتچ احجي اسمعي مني واگعدي انتِ وزوجج
وتفاهموا لا تخلون الطرف الثالث يدمر اخر ما تبقى بعلاقتكم المهزوزة .

عيوني من التعب توجعني غمضتها وهربت
من النقاش وهو سكت بس بين فترة وفترة
يتصلون علية وهو يجاوب بـ اختصار ويغلق الخط .

وبمجرد ما طلع الصبح وصلنا للمقبرة
دخلت ؏ طريق القديم امشي حتى ما اضيع
اول ما اقتربت من قبر امي كُل كبد مشاعر
مريت بي تحطمت ، تعبت ، نهلكت هناااا
مقابيل امي نفجرت كُل ذرة صبر مني
صاحت الغوث نريد الحرية رفعت الغطوة
من قبر امي وصرخت بعالي صوتي : وين عفتيني يمممممممه
تعالي اريدچ حبابة ساعديني اني احتاج وجودج كلامج نصيحتج
اخخخخخخ يا يمه ما اخذت النصيحة من البداية وهااااي اني
كُل فترة اوگع اقوى يكفخوني ؏ وجهي يمممممه
ما كسرني انسان بگد ما كسرني اكثر بشر حبيته هدم روحـي .

تلمست اسمها وشهگت بصوت طلع من گلبي
_ هم اگدر اواجه صعبة اواجه منووووووو
منووووووو اني بوسط النار يمه احذي بيدي
لو تاخذيني يمج بعد خلص حيلي خلص .

بالساعة واني ؏ نفس الصراخ والبجي والطم
احس كُل طاقتي نفذت سحبني سيف كعدني
شوية بعيد عنها وغسل القبر قريت قران
بس كلمة اشوفها وبالثانية عيوني تغوش
بعد كملت بسرعة اخذني زرت الأمام
علي ( علية السلام ) بقيت بالضريح اطلب
القوة اطلب العون اطلب المساعدة ماعندي
حيل اريد حيل اريد اواجه اريد اعيش لأطفالي .

رجعت الظهر للبيت الطريق ؏ طوله وسيف يتوسل
ندخل مطعم بس معدتي ما تتقبل ، اول وكف السيارة
معدتي تگلب دخلت ؏ سريع صارت هاجر بوجهي
_ زهراء صار كم يوم اريد احجي وياج بس ابوية رافض .

زهراء: عدكم مصيبة جديدة ؟

هاجر : لازم نسولف الله يخليچ .

زهراء: اني كُل ثانية اموووت ماعندي حيل عوفوني هاجر .

عفتها وصعدت غسلت وبدلت ودورت ؏ تلفوني
فتحت خطي رسائل من الكل وصلتني ، اساور
صديقاتي ، زميلتي بالمختبر وفاقهم عدد بالرسايل
لعنة حياتي الغيهب فتحت الرسائل كاتب
اشكال الوان .

الضعف : لهل درجة رخيص عندج تعوفيني بين الموت والحياة
تعبتيني ليش شنو شويت بس اريد افهم بشنو غلطت
معقولة استاهل !!

ومن ضمن الرسائل رسالة عتب
ابوج يهددني زهراء يگول تريدين نطلك صحيح ؟
مو سهلة
سهلة عندج صعبة عندي
تريدين اعيش شعور الفقدان مرتين
تصرفچ هذا كافي يهدمني اذا اهون عليچ
انتِ اطلقي اني مايهون عليه اوگف مقابيلچ
فقدت امي وهسة تريدين افقدچ اموووووت والله الموت اهون .

بعد ساعة رجع كاتب :
گلبي يگلي تصير وزهراء تعوف الغيهب صعبة
مجرد الفكرة دمار شامل .

ما گدرت اكمل انطيت بلوك لرقمة من كُل مكان ومن كُل حساب
ما اريد يتواصل ويايَّ ولا اتواصل وياه بعد انتهت خلصصص  .

اتصلت ؏ رجاء بسرعة جاوبتني : زهراء هاي انتِ .

زهراء: هلو گلبي ، فدوة اريد الجهال .

رجاء: مو تدللين بس مسافة الطريق أصلًا يبچون يريدوج .

هي راحت واني حاولت اعدل نفسي قدر المستطاع
حتى اطفالي ما يشوفون امهم ضعيفة مهزوزة مهزومة
كلها دقايق وسمعت اصواتهم بعد وحياتهم الهادئة
واستقرارهم صاروا متبهذلين من مكان لمكان
قوية نفسي وفتحت الباب وصحت بصوت
وضحكة كاذبة: يممممه شنو هل اصوات الحلوة
هاي منوو هذا منو النور والزينة فدوة فدوة ماماتي .

ركض نور بتجاهي حضني ويبچي
_ ليش سافرتي وعفتيني ماما اشتاقيتلج انتِ وبابا .

زهراء: رجعت حبيبي انتَ شلونك درت بالك ؏ اختك ؟

مشيت لزينة رفعتها ابوس بيها واشم بعطرها
النور : خبلتني بس تبچي عليكم ، ماما وين بابا شوكت نرجع للبيت .

زهراء: دزيت سيف يجيب ريزو وكنتاكي وحبشكلات اليوم ناكل
ونسهر للصبح شنوو رأيكم ؟

رجاء تباوع بجمود بس تراقب تحركاتي كلامي
وبعيونها نظرات خوف ، وهاجر من المطبخ تباوع
اخذتهم واتصلت ؏ مطعم طلبت الآكل ودزيت الفلوس
للحارس حتى يستلم الطلب ، گعدت وياهم اسولف واضحك
ولأ كأنو النار تحرگ بكلبي .

النور : شوفيني صوركم ماما تابعت حسابكم بس ما نشرتوا
لا انتِ ولا بابا كُل يوم من ارجع من المدرسة اشوف
وكلشي ماكو .

اخذت رجاء الزينة واني سحبت نور گعدته بحضني
عدلت شعره ورفعت ايده ابوس بيها : انتَ ابني الكبير سندي بهل دنيا
ومو صغير صف ثاني أبتدائي من احجي وياك تتفهمني .

صفن بوجهي ينتظر اكمل بلعت ريگي وكملت بغصة
_ اني ما جنت مسافرة بس مريضة وبابا نفس لشيء
موجود بالبيت مو مسافر نور اني اسفة بس اني وبابا
لازم ننفصل عن بعض ، انتَ وزينة تروحون شوكت
ماتريدون وتحبون وشگد ماتريدون تشوفون ابوكم
بس اني وبابا بعد ما نرجع سوية .

النور : ليش ؟

غمضت عيوني من نزلت دموعي وكلبي نقبض
زهراء: صارت مشاكل .

النور : تتذكرين بيتنا من ناكل بابا يسولف
من يلزم قضايا واب وام يريدون ينفصلون
بعدين يگول لا خلص رجعوا .

زهراء : صح .

النور : بابا مو يحبچ وانتِ تحبين بابا ؟

زهراء: نور افهمني فدوة اروحلك .

هاجر : نور سيف يصيح عليك روح فوك  .

نزلت راسي وبقيت حايرة شلون افهم ابني شلون
وكأن يريد يهرب من النقاش بهل موضوع ركض
بكل سرعته وصعد فوك : خطية عوفي بعده صغير ويحبكم سوية .

عفتها اريد اصعد لزمتني من ايدي
وهمست : اسفة لان عرفتي الموضوع من يمي اني وابوج
علاقتنا متوترة بسبب هل مشكلة ، زهراء بس جاوبي ؏
الغيهب هو يفهمچ الموضوع .

زهراء: لا تذكرون اسمة ، وبخصوص ابوية اليوم احجي وياه
ماكو داعي تتوتر علاقتكم شنو ذنبچ بالعكس انتِ فتحتي عيوني
؏ حقيقة ابوچ واخوچ احسن ما اظل مخدوعة بيهم .

هاجر : اسمعيني والله الغيهب نجبر يدفع فلوس .

رجاء: نجبر الغيهب مجبوووور كُل عقلچ هاجر
شنو لازمه عليهم موج تصوير عيب ، لو شنو وضعكم
خايفين منها انتوا ؟ والله موضوعكم مرعب  .

عفتهن ومشيت واسمع هاجر تجاوب رجاء
_ المفروض تخافين ؏ اختچ مو انتِ هنا وايهاب يتعارك
وضارب الغيهب مناك غلططططط تصرفاتكم غلطططططط .

رجاء: مو منو افتعل المشكلة غيرچ هاجر
انتِ هجمتي بيت اخوچ انتِ الغيهب يدري
انتِ سبب المشكلة وانتِ خبلتي زهراء بذاك اليووووم ؟

هاجر : واني شنووو متقصده والله ما اذري هيج يصير والله .

رجاء: الصار صار بعد ماكو فايدة القرار اليوم عند زهراء وبس .

فتت للغرفة زينة نايمة ، خليت راسي بصف راسها
واني ابوس بيدها واني اناشغ وادعي من كُل
گلبي بجيت وبجيت الى ان انتهيت ونمت وبس
غفت عيوني بهل ساعة گعدت إنسانة ثانية
باردة ، لا احساس ، لا مشاعر ، لا رد فعل
لا دموع ، لا حرن هيج من الألم تلاشت مشاعري .

باوعت الساعة بـ 9 الصبح نور والزينة نايمين بصفي
غسلت وبدلت بدون صوت وطلعت لگيت ابوية گاعد يتريگ
من شافني ضحك : يومي خير ما دام طلت عيني بوجه هل زهره .

زهراء: حياتي صباح الخير .

كعدت بصفه وهو يسولف ومتحمس لان شافني
مبدلة: وين تروحين ؟

زهراء: گلت اداوم صار فترة تاركة ميصير حرامات شغلي .

رحيم : اني طالع اوصلچ بطريقي ؟

زهراء: يلة بعد شنو اريد لواء رحيم يوصلني نيالي .

ضحك وطلع اني وراه صعدت وهو بصفي
بقيت اعدل بـ أغراضي بالجنطه وهو ينطي عنوان
المختبر للسايق ، نزلوني مقابيل المختبر الدنيا ادور بيَّ
لان كلشي ما اكل ، سلمت بلا مفس وگعدت ؏ المكتب
ساعة وصاروا المرضى يدخلون علينة وجبة بعد الثانية
واني منا لا اكل لا شرب والمواقف والذكريات والكلام
دوامه براسي تفتر ، ما استقرت الى ان اختل توازني
بقيت لزم بالميز فشله اوگع مقابيل العالم گعدت ونزلت راسي
وحدة من المراجعين عمرها كبير كلش شافتني اجت تركض
وصاحت ؏ زميلتي : ياااا يااا يمه اركضي البت وگعت .

اجت عليَّ علا ترفع براسي : زهراء شبيچ ؟

زهراء: دخت راسي يمكن راح ينغمي عليَّ .

علا : اتصل ؏ ابو النور يجي ياخذج .

عطت بلا وعي رفعت ايدي : لااااااا لاااااااا اياج ديري بالج ممنوع
بس خلي المضمد ابو حسن يجي يشكل مغذي فدوة .

علا : زهراء انتِ من التعب ترجفين جسمج يهتز .

زهراء: مثل ما احجي روحـي علا .

لحظات وصل ابو حسن هو يحجي واني بغير عالم
شكل المغذي انوب المراجعين يدخلون يشوفون
الي تاخذ الهم تحليل مشكله مغذي وبس ؏ علا
صارت هوسة اخذت المغذي واجرت تكسي ورجعت
صعدت فوك علگت البطل ونمت الى ان كمل رفعته
بس التعب بعده بيَّ بسبب سوء التغذية معدتي هلكانه
ما اگدر اكل لگمه وحده .

بعدني اشيل بالمغذي وانفتح الباب دخلت اساور
_ صدك تحجين زهراء وين تلفونج وينه .

زهراء: يا ستار مداهمة ؟

وكفت بوستها گعدت مقابيلي تباوع ؏ مغذي
_ تدرين شگد حاولت اتواصل وياج وابوج اخخخخخ ابوج
مايقبل خبلني هوووو شنوووو غير صديقتي .

زهراء: مشتاقتلج .

اساور : اكبر جذابه لج بالجذب گولي عندي صديقتي
تخاف تصخمممم من كون صخام ؏ عقلج ولو هو مصخم .

زهراء: جري نفس .

اساور : ليش مغذي ؟

زهراء: جنت بالدوام ولود بالشغل وبعدني ما اكلت دخت .

اساور : نطلع ناكل بعد وكت نتريك نتغدى ونرجع ؟

زهراء: ها اساور حرارتج عالية وين يقبل الباشا .

اساور : هو ياخذنا شبيج موجود ينتظرني برا .

زهراء: خلي يروح وابقي يمي اليوم .

اتصلت انطته خبر ومشت طلعت من الغرفة تححي بصوت
ناصي حتى ما اسمع ، رجعت لزمتني من ايدي وهمست
اساور : زهراء شلونچ .

_ كلش زينة .

بقت صافنه بعيوني ونزلت راسها تمسح بدموعها
_ تجذبين عليَّ ؟

زهراء: مو جذب هاي الحقيقة .

اساور : جنت خايفة عليچ ومن شفتچ خفت اكثر
لو بيدي اخليج بكلبي ما اتحمل اشوف اختي بهل حال .

حضنتها امثل القوة اكتم العبرة والخنكه ذبحتني
_ يمعودة مابيَّ شي شدة ومرت وراح تنحل عن قريب
وتنمحي من جذورها .

اساور : بالقران انتِ فاهمة غلط لج زهراء الغيهب مـ ...

زهراء: اذا تحبيني ابقي صديقتي اوكفي ويايَّ لا تذكرين
اسمة اني شفت شي محد شايفه بس انتِ كلشي تعرفين
مو دائمًا تگولين صيري قوية فـ كافي اني لهنا اختار نفسي .

اساور : بكل مرة الغيهب غلطان تختاري وتسامحي
وهل مرة لان هو ما غلط تختارين نفسج صدك !!

زهراء: اذا تحبيني الموضوع ينسد ولا تذكرين هل مشكلة
انتِ صديقتي واختي وزوجج صديقة وبيت اسراره
اذا ما تريدين علاقتنا تخرب عوفوني انتوا واهلي احل
مصيبتي وحدي اني اعرف شلون وشوكت اتصرف .

بقت يمي لليل وهي حالتها حال بعيونها صار حزن الكون
؏ حالتي بس بعدني اني نفس الجمود ، استأذنت وطلعت
بهل دقايق فتحت تلفوني وبعد أنقطاع ردت اغير جو فتحت
حسابي وبقيت احجي وانشر وكالعادة متعودين اول سؤال
شو ماكو هل فترة شلونكم انتِ والغيهب واطفالكم ؟

بلحظة ضعف علنت عن مشكلتنا جانت خطوة خطآ
اخذها واني بقمة انهياري الصامد ، بين مؤيد ونافي
بين ويايَّ وضدي ، بين لاا ميصير ارجعي هذا ابو اطفالج
هو يحبج وصعب يعيش بدونج ، وبين احسن خطوة انتوا
ما ترهمون سوية ولازم من البداية تنفصلون  ، كثر الكلام
وكثرة حالتي مثلت اني بخير جمدت هو مثلت بس اني احس
اني تمام مابيَّ شي بعدني عايشة اتنفس واحجي بمرور
الوقت كلشي يتغير .

شمرت جهازي ولفيت راسي بفراشي اباوع ؏ فراغ
هاجر استلمت دراسة النور ، زينة وين ما اروح
تجي ويايَّ احسها تلتمس الأمان ، بقيت ؏ وضعي
لمدة يومين بالثالث داومت واني انشر طبيعي
الوضع يمي الى ان بنهاية الدوام لزمني وجع
اقل ما أوصفه موت ، ذبيت الإبرة ومشيت بصعوبة
حتى ما اكدر الزم مكان الوجع بقيت امشي واتعثر
الى ان دخلت ؏ دكتور باطنية قريب من غرفة التحليلات
بس فتحت الباب وگعت وعطت بوجع : دكتور بطني راح اموووووت
الوووووجععععععع .

هو والسكرتيرة ساعدوني بس بقيت من الوجع معتكفه اصرخ
گعدني ؏ سرير وزميلاتي والمساعدة مالته وهو كملوا فخص
تحاليل اجراءات كاملة وفحوصات بس خلصوها سلموها
للدكتور باوع عليَّ بقلق وبلغني بـ استعجال : فورًا زهراء
تدخلين غرفة العمليات حالتج فوق الخطرة ..

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد