ظلمات الغيهب الفصل الستون 60 - بقلم اساور حسين

<ظلمات الغيهب >
حلقة _ 7 _ الجزء الثاني ..
بقلمي : اساور حسين .

مــن هاي ايدك چــنتَ طايح الهاي ايدك
بَــس بعد ماريدك شتريد اعيد المضى؟
لو صرت بيت الشعر صدكني ما اعيدك..

ملكات قلبي لطفًا لا تنسون التصويت ؏ بارتات
التعليق بين الفقرات روح روحـي إنتوا +
......................><><><><><.....................
زهراء ..

عيوني ركزت ؏ مسدس وجهه مال عصابات ملثم
وعيونه صايرات دم دم يخوفن وملابس سود
ويخزر ويأشر بيده من الرهبة بدون نقاش
عبرت ؏ كرسي الثاني وهو صعد سد الباب
حرك السيارة وشال المسدس يضغط بي
؏ خاصرتي : تذلين بيَّ موووووو أتعبتني تريدين وتعبتيني
الظاهر انتِ ماينفع وياج الأسلوب الحسن نرجع ؏ تهديدات
والوجه القديم العيني واغاتي ماتفيد ويااااااااااج .

زهراء: بكيفك ترجع ؏ تهد ...
بعدني احجي وضغط ؏ مسدس اكثر وصااح
بصوت زرف طبلة اذني من قوته : صوووووووووووووتچ
صوووووتچ لج لا اطيح حظچ نفس ماريد اسمععع نوصل
واعلمچ الغيهب من تلعبين علية شيسووووي بيچ .

جسمي من الخوف صار يهتز ورجلي
نملت بعد ما احس بيها لا بيَّ احجي
واتنازل واتفاهم وياه ، ولا اكدر بعد
اعلي صوتي بوجهه من الخوف لان
ملامح وجهه حادة لابعد الحدود .

بقيت اباوع ؏ شوارع اريد افتهم وين ماخذني
من التوتر والقلق شفايفي يبسن مسافة ساعة
ودخل السيارة بكراج بمجمع عبارة عن شقق
وقبل لا ينزل رفع المسدس وصار يفر بي
ويحذرني بكل جدية : راح ننزل اذا فكرتي وصوتچ
ينسمع قبل لا ندخل الشقة اخلي رحيم ينام بصف قبر بنته اليوم .

زهراء: وانت وين تنام .

الغيهب: شعليچ شششششششششعليچ .

زهراء: بالحبووووس حبيبي بالحبوووس ابوية يعدمك .

كرصني بيدي حيل صرخت بوجع
وهو يصيح : ولج صايرة فدنووووووووب وكحه
تحتاجين تربية من جد وجديد يا حقيرة .

نزل من السيارة واني يا گاع نشگي وبلعيني
بس من الخوف راد ينغمي عليَّ روحـي
احسها تريد تطلع من عيوني ، فتح الباب من
جهتي وسحبني من ايدي رجلي صارت خيوط : هاااا تخافين
بنت رحيم الصلفه وين التهوبز والعرامه مالتج مال ايام الفاتت
شفتيني حبيتچ صرتي تگمزين كالقرد ادورين زلات مووووو سهلة ..

زهراء: وين ماخذني شترررريد مني .

الغيهب: نعيد ايامنا الآكشن مليت من الرومانسية والدراما .

زهراء: شنووو هو مسلسل .

الغيهب: اششششش ولا نفس والعباس آبو فاضل انطيج طلقة
من اليمنه اطلعها من اليسرى اشششششش .

دخل المسدس بصفحته وشبك ايده بيدي
ويمشي بكل هدوء ولا عبالك جان يصيح
وعصبي هيج فد طبيعي وصاحب شخصيتين
واني امشي وياه وبس اريد اضبط اعصابي
حتى اعرف احجي واتناقش وياه بـ اقل الخسائر
من الخوف بطني لوتني لوووووي لوووي
دفعني بالمصعد وآني لابسه كعب ردت اروح بيها
زروگ جفي ؏ وجهي بـ اخر لحظة لزمت الحديدة
وكفت بس شنووو ودعت العافية عرفته صدك
طالعة روحه ومايهتم اوگع يصير بيَّ شي ولا مهتم .

رفعت ايدي ؏ راسي اباوع علية منزل راسه ويهز برجله
مستند ؏ مصعد : شنو هذا لعب جهال لوو شنو برأيك .

ظل ساكت حتى مارفع راسه كملت : عصابجي حضرتك
محامي الك اسمك والناس تحترمك هذا تعاملك ؟

سند ايده ؏ حديدة وتجاهل كلامي : انتَ شايف اذا ابوية بعد ساعة
وحده ما ارجع شيسوووووووووي ؟

انفتح الباب اخذ ايدي بيده بس ضاغط عليها بقوة
بحيث امشي وأتألم وهو ولا عبالك ساحلني وراه
طلع المفاتيح من جيبه وفتح باب شقة : انوب راجع ؏ شقق
هو ابو طبع مايتغير رجعت كم اسبوع الموج رجعتك
ارهابي يا ماشاءالله .

سحب مني الجنطة ودفعني ؏ تخم بكل قسوة
وطلع من الشقة وقفل الباب عافني لا جنطة
لا مبايل وكلشي مفاهمة منه ومن تصرفاته
المخيفة بالله هسة بيها عليهه ناقصة ضيم .

وكفت امشي الغرفة شبه فارغة
بيها تخم واحد ابو 3 مقاعد
وصورتين ؏ حايط ، والمطبخ بي براد ماء
مشتغل شربت كلاص بارد واني اباوع
على غلاية للشاي ، فتحت باب الحمام
بي مواد تنظيف وشامبو وصابونة ، رحت اخر شي ؏
باب الغرفة موجود سرير ومرايا طويلة
بالحايط وعلى صفحة مجرات صغيرة رحت
فتحتهم بيهن كم قطعة من ملابسه .

طلعت من الغرفة هو دخل طلع المسدس ورفعة
بتجاهي وهو يتقدم بقيت ثابتة بمكاني وهو مستمر يمشي
صار المسدس براسي وعيونه تركز بعيوني : الحبي والحياتي
مابيها نتيجة ، عيني واغاتي مابيها نتيجة نرجع للعين الحمرة .

زهراء: نزل السلاح ..

الغيهب: ليش تخافين ؟

زهراء: برأيك اخاف من تخويفك ؟

الغيهب : لا عيونچ صلفة بس اكسرها .

زهراء: حتى انهيك أستاذ غيهب .

الغيهب: صوتج بعد هذا صوتج ماريد ينسمع .

زهراء: ومنو گال اريد تسمع صوتي اني ابتعدت
انتَ تفتر ورايَّ عوفني بحالي حتى ماتسمع صوتي .

الغيهب: اششششششششششششششش .

سديت اذني من علو صوته وكمزت لغير اتجاه
رجع المسدس بحافة البنطلون وگعد ؏ تخم
يتوعد ويهدد يهز براسه ويصيح : سهلة لج سهلة اطلع الصار
من عيونج والله تريدين تذليني موووو سهلة نشوف منو ينذل
اني لوووو انتِ .

زهراء: لا اذلك ولا ت..
اريد اكمل وضرب الحايط بيده وصاح
_ ممنوع تحجين انتِ .

زهراء: انتَ تحجي اني اجاوب شنو عندك السان واني ماعندي.

صفك بيده ويأشر بتجاهي : شووووف العرامة بنت الـ أستغفر الله
شلون تخليني انزل ؏ ترابي واني الساني طالع عن الطرررريق
سدي حلگج سدددددي .

زهراء: رجعني اكلك رجعني .

الغيهب: موو راح اكوم اخليچ ماتعرفين وين اراضيچ .

زهراء: عمي استقر تايهه فصلية ماعندي اهل غير ..

فتح عيونه وهي كمزه وهي سحبت اقسام المسدس
بحيث گلبي وكف بنفس الثانية اريد اتحرك ماكدر
بس رفعت ايدي ؏ شفايفي بعلامة بعد ما احجي لان
بعد راح ينفجر واني ادري بي من ينفجر تصرفاته
تصير خارج عن السيطرة كليًا ..

الغيهب: صار فترة النوووم طاير مني شارد وافتر
مثل المشردين ادور واراقب شنووو هووو شنووو .

زهراء: متوازي .

ضرب الحيط ورايَّ وصاح : ولج مخبلة لاااااا تحجين
خرررررب لج لا تراددين شلون تخليني ارتكب جريمة .

باوعت ؏ مسدس نزله : رايح اذا تحجين الله يستر مني .

هو راح وهزيت ايدي وصلت للحمام وصحت : شدعوة هل عصبية
وحدة ماتريدك شنو اجباري .

قفلت الباب وهووو الصياح مالته حتى معدتي من الخوف
نهزت منه : من لعنة الله ؏ عشيرتچ من الجبير للصغير
شلوووون تشيط بدمي عبالهاااااا اني مرتاح مثلها بنت مووو اغلطططط .

بقيت بالحمام الى ان سكت ونگطع صوته
طلعت نايم ؏ سرير ومغطي عيونه بـ ايده
رحت وكفت بكل هدوء بس شنو شوية
وانفجر وابجي : رجعني للبيت قبل لاتصير مشاكل
ليش تحب تسوي بلبلة يعني انتَ تگول ماحب
المشاكل اني اشوف العكس يعني عفتك تخطفني
وتجبرني اظل وياك بشقة وين صايرة هاي مافيه حضرتك ؟

الغيهب: من الأخير مبين مشتاقه تنامين بحضني
بلا كلام زايد اريد انام تعالي نامي بصفي .

زهراء: بحلامك بحلااااااااااااااامك بعد ماتصير .

الغيهب : والله ؟

زهراء: والله بحلامك ما انام يمك .

بلمح البصر نهض وسحب المسدس صرت
بين الباب والحايط وهو يدفع بالمسدس
بطني : مثل الشاطرة تمشين وتروحين ؏ سرير تنامين
ونفسسسسس ما اسمعععع اريد اشوف شلون بأحلامي ماتصير .

زهراء: حرام بعد حلفت الله واني وياك مطلقين شرعًا .

الغيهب: بعدج مرتي قانونيًا امشي كدامي للفرررراش يلة .

زهراء: اروح هناك ونفس ماتسمع مني .

الغيهب: وحق الله الي حلفتي اليوم تنامين هنااااااااااا.

سحبني من ايدي وشمرني ؏ فراش ويأشر بيده
حتى اسوي مكان عدلت نفس واني ارجف
جسمي يبس اريد ابجي بعد ما اكدر حتى ابجي
القهر ياكل بيَّ يعني نهيت كلشي بهل سهولة
يجبرني ارجع اتعايش وياه صعبة هل فكرة صعبة .

وهو واضح كوضوع الشمس التعب علية
عيونه حاطتها هالات سودة من قلة النوم والتعب
وخطوط تجاعيد بين حواجبه بكثر ما يخنزر ويصير عصبي
وجهه قبل يضوي الأول مرة اشوف الغيهب وجهه باهت شاحب
درت وجهي منه وهو واضح استقر ونام مرت ساعة والثانية
والثالثة اسمع صوت اذان المغرب بس الصوت بعيد وهو ينقلب
لمحت المسدس جوة المخدة هاي فرصتي الوحيدة راسه يابس
اذا مو تهديد مايعوفني بحالي ويبهذلني بتصرفاته وعصبيته
واني لليوم ما أريد اكرها واحقد علية .

مديت ايدي بكل خفه وبدون مايحس حاولت وصار بيدي
تسحبت من السرير وكفت مقابيله وصحت : غيهههههههههب .

فز يفرك بوجهه فتح عيونه بصعوبة شاف المسدس
بيدي همس بصوت ناعس : عوفي هل سوالف انتِ مو كدها
واحترمي نفسج ونامي يلة لاااا والله زهراء اگوم ابيس بحالج .

زهراء: المسدس تهددني بي بس هسة صار بيدي
يابه والله اذا ما تفز هسة وتفتح الباب افرغ الشاجور عليك
ازرفك تزرف .

الغيهب: تريدين تصيرين ارملة المطلقة ماتصرف عندج ؟

زهراء: البااااااب ينفتح لوووو ارتكب جريمة .

الغيهب: يعني تضربيني طلقة ؟

زهراء: لعد صجم اهووووووو شنوووو حضرتك تحشش .

الغيهب: المفروض اخاف .

زهراء: من وجهة نظري اي ضروري تخاف لان
حاليًا اعصابي تفووووور من العصبية بلحظه غضب
اموتك وابوية يطلعني منها مثل الشعرة من العجينة .

الغيهب: شلون بالله مثل الشعرة من العجينة ؟

زهراء: قضية خطف والقتل صار بدافع الدفاع عن النفس
اني بنية كافية خيري وشري وابتعدت لا عندي مسدس
ولا خطفت وبقيت اهدد ، المسدس مسدسك وانت تهددني بي
واني اخذته منك وراح اضربك .

رفع اثنين اديناته ليفوك وهو نايم ؏ ضهره
صار يهز بيهن بقوة عود يرجف : خايف اني خايف .

انقض ؏ ايدي بقيت من الهبطة مغمضة عيوني واصررخ
بعالي صوتي اصرخ وهو يدفع المسدس بجهة كلبه
ويضغط ؏ ايدي حتى اضغط ؏ الزناد : اضربيني يلة اضربي بالله .

زهراء: ايدي اذيتني .

الغيهب: مو تريدين تضربين وصار ساعة تهددين يلة
انتظرج تضربيني تحررررررررركي اضربي.

زهراء: لااااا لاااا راح تنضرب لا تضغط ؏ زناد غيهب لاااااا .

الغيهب: اريدج تصيرين گد كلمتج مو تريدين البعاد وسويتيها
وحرمتيني منچ ، وخليتيني اتحسر على شوفتج وعطرررررج
ولحيتي ؏ طلاك وصارت ونلتي مرادچ وضحكتي
من فرحتچ ، وهسة تريدين تضربين انتِ گدها يلة اضررررربي .

زهراء: المسدس مو لعبة لا تضغط بعد كافي راح تنضرب
اقل غلطة تنضرب عوووف ايدي عوفها .

دخل اصبعه اكثر بالزناد وهو يباوع بعيوني ضغط ؏
زناد اكثر من مرة يطلع صوت فارغ عادي طق طق
ابتعد وهو مبتسم طلع الشاجور من جيب البنطلون
ورفعه : لازم نسيتي انتِ مقابيل منو ، واحتمال نسيتي الغيهب
بهل مواقف بأي طريقة يفكر موو ؟

من الهبطة وگعت بالارض ايدي ؏ گلبي
هو اختفت ابتسامته يريد يتقدم يشوفني
شبيَّ بس بـ اخر لحظة ابتعد ورجع ؏
سرير يمثل عدم الامبالاة: شبيچ عادي حبيبتي عادي
والله انتِ تشترين الصدمات لنفسج هسة نايمين
ومرتاحين وهدوء تسحبين مسدس بوجه ابو جهالج شبيج .

خفت رجعت أخاف منه جنت اريد اصرخ
لاا ترجع هيج تصرف اكره هل تصرفات
اخاف منك هيج اخاف خفت رجع احتمال رجع
زين اذا يتكرر الغيهب القديم وتعبي زين واطفالنا
اريد اصرخ أصحى ؏ نفسسسسسك كافي
بس لساني نعقد استندت بكل ماتبقى من حيل
ومشيت للحمام اغسل بوجهي ودموعي تجري
طلعت بدون صوت گعدت بالمطبخ هو بالغرفة
ماعرف رجع نام او كاعد بس بعد مادخل ولا حاول
يحجي او يفتح موضوع ويايَّ ..

تأخر الوقت ونعست كاعدة من الصبح ونفسيتي ماتتقبل
اتنازل واطلع انام برة احسها صعبة ولا حتى اكدر اضغط
؏ نفسي واخذ مخدة وارجع لمكاني جنت مرعوبة اذا
اشوفه هم يصير موقف جديد وانصدم بي اكثر ، انصدمت
اي لان من تساعدنا وتعافى يخاف من الهوى اذا يمر ويزعجني
يدور ضحكتي وراحتي بالصغيرة وبالكبيرة يقصر ؏ نفسة
بس المهم مايرفض طلب من طلباتي ، اذا يريد يصيح
يتأكد اني ما اجفل واخاف ويعلي صوته بس هسة شنووو
يتقصد يضغط ؏ ايدي ويخوفني رجع والله رجععععععع
امووووت اذا يضيع تعبي اموووت احسن ولا هل معاناة ترد علينة .

بقيت للصبح بمكاني اغفي وافز مديت راسي بعد معاناة
شفتها بـ9 الصبح صارت اريد ارجع ادخل هو طلع
من غرفة النوم دخل للحمام يغسل واني استغليت الفرصة
اخذت التلفون مالته من الميز اريد اتصل ؏ ابوية طلع مغير الرمز
بهاي يشغل عقله بس من دفع 25 مليون مايفكر.

ذبيت المبايل والأغراض والمحفظة بصف باب الغرفة
وقفلتها عليَّ سحب الغطوة وخليت راسي حاولت انام
عطره تارس الفراش هسة كون اطلع اكله بسنوني
نزعت الجراجف من السرير ورجعت راسي عيوني
تحرك بيَّ وعندي دوخة من النعاس .

سمعت باب الشقة ينفتح مبين طلع قلقني طلعت لكيت
البيت فارغ ، بقيت افتر بالبيت اشوف شباك او شقة اطل
؏ غرفتنا افتح بالباب مقفول ، مشيت للشبابيك مختار
شقة بحيث بيها شباك واحد ؏ حايط بعدني ابحوش
وفات بيده علاگة يسوي نفسه مايشوفني تعداني وراح للمطبخ
شغل الغلايه وجهز المواعين دخلت للحمام بي شباك بس صغير
غسلت وطلعت كعد هو ؏ تخم ونزل الصينية صاب كلاص
واحد شاي والريوك مجهزة لشخص واحد رحت للمطبخ
عبالي باقي شي اكله كُلشي ماكو هو متقصد الآكل لشخص واحد
يعني مايريد اكل معقولة !!

شربت كلاص مي اريد اروح اهج احجي وياه هو ترك الصينية
بمكانها ودخل للحمام يسبح ، كمل وبدل ويدندن ماعرف شنو
يحچي وكفت بصف المرايا وهو يرتب شعرة مقابيلها
_ شنوووووو هل مهزلة فهمني .

الغيهب: مهزلة يا مهزلة ؟

_ رجعني اريد ارتاح اغير ملابسي اخذ حمام
اشوف اطفالي عندي شغل ومواعيد واهلي بالهم يمي اكيد .

الغيهب: هذاك حمام واسبحي اما عن اطفالنا سبق وحرمتيني
منهم وانتِ سافرتي وعفتيهم والله شنو عند اختي يعني عادي
عندج تتحملين فراگهم .

زهراء: واهلي هااا يعني تتعمد تفتعل المشاكل ويه ابوية .

الغيهب: هو منو ابوج وافتعل المشاكل وياه اني حتى ما اشوفه
بعيوني الصغيرة ، اخرررررر همي .

زهراء: احتررررررم نفسك هذا ابووووية واذا اني مهمة عندك
غصبًا عنك تحترمه واجب عليك هذااااااا واجب .

الغيهب: مو يگول انتِ مهمة .

زهراء: زعاطيط احنا هاا فهمني زعاطيط
لووو اني مو مهمة ماجنت مجبورة ابقى وياك هنااااا مبهذله.

الغيهب: مبهذله ليش عايشة بخيمة .

رفعت ايدي ضغطت ؏ عيوني واني ارد علية
_ افهم افهمممم اني البارحة من الصبح كاعدة طلعت الجهال
الزينة للحضانه والنور للمدرسة ، واني طلعت للدوام من التسعة
الصبح آلى الان بعدني مانمت اريد ارجع ابدل من البارحة بهل ملابس
كافي قلقتني وهم جوعانة يعني هاي مو حالة والبيت ماتشوف الشقة
وصخه تحتاج تنظيف مليت اني مليت .

الغيهب: اي رجعي مثل قبل وصيري معدلة وغسلي الشقة
وجهزي اكل واخذي حمام بين ماروح اجيب الج ملابس
واكلي ونامي بشقة نظيفة .

زهراء: اني موووووو خدامتك .

الغيهب: ليش الي تنظف بيت عايشة بي تعتبر خدامة ؟

رفعت اصبعي وصرت احجي ودمي يفور
يريد يعني نعيش طبيعي ولا عبالك صاير شي
_ تجبرني اعيش وياك ، وتريدني اخدمك
وتخطفني بهل طريقة ومبهذلني من البارحة لليوم
وتريدني اتصرف طبيعي ويااااااك وانظف واطبخ
واعي انت واعي احنا مطلقين مطلقين واني ماريدك .

الغيهب: ماتريديني ؟

زهراء: واضح الموضوع ماريدك وانت جابرني عليك
اني نهيت كلشي يخصك مثل ما انتَ خليتني وراك من قررت
قرارك السخيف تنطي فلوس الموج خانم .

الغيهب: بعديش ماتريديني ؟

زهراء: بعديش شنوووو خلصنا غيهب افتهم خلصنا
بعد ماريدك بحياتي هي مووووو غصب مووو اجبار ماريدك .

تقدم وصار يضرب بطرف أصابعه ؏ راسي
_ هذا عقلج رايح زايد تتصورين بهل سهولة
اعوفج هههههههههه لج بابا بس الموت ياخذج مني .

زهراء: ما اريدك غيهب .

رفع حاجبه وبغرور وغطرسة
جاوبني وبعيونه لمحت تحدي : حقج اي حقج .

زهراء: شنو قصدك ؟

مرد ايدي بيده ودفعني ؏ سرير يضغط ؏
حنكي: لجججججج تحملتج هوووواي هل بيت ما تطلعين منه
وطلاك ماكو بعدج بالقانون مرتي عندج اعتراض ضربي راسج بالحايط .

دفعت ايده ودنيت نفسي واني مصدومة بي
اختفى الكبرياء والدموع غدرتني ونزلت
نزلت راسي امسح بعيوني وهو صار يطلع ويدخل
ضرب الباب وصاح : جنت حالف عيونج بعد ما تبجي بسببي
بسسسسسسس انتِ ..

قاطعت كلامة واشرت على عيوني : اي واضح .

الغيهب: انتِ السبب والله .

زهراء: يعني إجباري ماريدك.

عبالي يعوفني بس زاد وانفجر واعصابه
فقدها بهل دقيقة صار يحجي ويتقدم عليَّ
وكل شوية يسحبني من قميصي حتى ادير
وجهي واباوع علية : قبل جنت وحشششششش تحملتيني
وصبرتي ومشاكل يابووو مشاكل صارت وتعدين وطبيعي
بس من بديت اعوض بيج واكول تساهل مرتي تستاهل زهراء
صبرت وساعدتني شووووفي النتيجة.

اشرت ؏ نفسي ورديت ؏ كلامة بكل ثقة : هذا حقي .

الغيهب: موووو بسهولة اعوفج مثل ما انتِ تعبتي ويايَّ
اني تعبت وياج لجججججج خليتج تاخذين الشهادة وشرط
دخلتج افضل الجامعات ببغداد وبس خلصتي المفروض تبقين
دوام مستشفيات ودگيت صدري وقصرت ؏ نفسي
وگلت لاااا مرتي ما داوم مستشفى فتحت الج مختبر احلامج
مثل ماتحبين بمنطقة كُل المحللين يتمنون مكان بيها
لج زهراء اني حتى شغلج كأي زوجة موظفة ترجع تنظف
وتطبخ وتخدم اطفالها وزوجها ما اخلييييج .

دفعني وابتعد اكثر وصار ينفعل اكثر
_ بدل المساعدة اجيب اثنين وما اهتم المهم عندي انتِ مرتاحة
حتى اني مو من الرجال الي يمنعون زوجاتهم يطلعن
بيووووم طلبتي تطلعين بمكان وامنع طلعتج لااااا لاااااا .

لزمت راسي وحنيت ضهري وهو مستمر
_ بشنوووو قصرت وياج فهميني عايشة بيتي ملكة
لججججج اعتبرج ملكة والله وتغيرت صرت احسب حساب
لكل حرف يبدر مني حتى ماتزعلين .

تقرب بتجاهي رفع راسي صار يباوع بعيوني
_ لا تعوفيني وانتِ تعرفين كلش زين اني ما غلطان
وداعت عيونج ما غلطان .

زهراء: ما اريدك كافي اتعب نفسك اني قررت وخلصنا.

الغيهب: اني غلطان احجي وياج وافهم بيج
ابقي راسج يابس وغصبًا ما عليج تبقين هناااا .

زهراء: مو حلوة بحقك غيهب افتهم
لا تقلل من نفسك اكثر وتجبر انسان ما يريدك عليك .

الغيهب: كُل هذا تعبي وعذابي ومحاولاتي
مو بس الخاطرج ولان اني احبج لااااا
الخاطر اطفالي دموع النور بذاك اليوم
من يريد يظل يمي تضرب بكلبي احاول وياج
بدون ملل الى ان احل مشكلتي وياج لعيون اطفالنا
وانتِ مرتي واني ما اريد بيتي ينهجم ومطول بالي
بمزاجي يعني ما اقلل من نفسي بالعكس مكبر عقلي .

عافني وطلع من البيت كله راسي راد ينفجر بلحظتها
بقيت افتر وادور بالبيت اريد انفجررررر اريد اطك
بنفس الوقت خايفة ابوية يأذي ؏ هل حال الى ان رجع
شبه فاقد يمشي ويسب ويغلط اريد افتهم ماكووووو
اخر شي من شافني اتحرك واسأل خاف من نفسه سحبني من ايدي
ودفعني للغرفة وقفلها وهو يصيح: والله انتِ السبب والله
اني واحد مثل رحيم يرفع ايده علية اكسرها والله اكسرها .

عرفت شايف ابوية عرفت هو شايط من العصبية
لهل سبب ، صوت تلفونه يرن جاوب بسرعة وصاح
_ هاااا هااا .

سكت لثواني وجاوب : مايحترممممم اني شكووووو
دخلت للبيت وهوو مثل العصابه مترصدين دخلتي
هجم عليه بالسلاح شكووووو قاتل اهله وما ادري.

رجع سكت يستمع : كافي هشام لا تدخلون ما طالب منكم
اني بيتي انهجم بغلط مني وماكو غيري يصحح الخطأ .

قبل لا يغلق المكالمة سمعته يفهمه : اي عندي كلشي مابيها
معززه مكرمة لا اجي يمها ولا اقترب افتهم هي طليقتي شرعًا
قابل زعطوط اتفاهم وياها وترجع ما اكل بشرررر والله .

بس سد التلفون رجع يتوعد ويتجاوز الى ان تعب
سكت بس مافتح الباب بقيت بالغرفة من الجوع دخت صار عندي
هبوط وعلاجي ماكو يمي وبطني توجعني بقيت اتحمل بالوجع
الى ان صار اليل سمعت صوت قفل ينفتح دفع الباب وراح
رجع كعد ؏ تخم : حابس حيوانه حضرتك ماتفكر مووووو ؟!

ظل ساكت رحت غسلت وشفت جنطة صغيرة بنص الصالة
اعرفها جنطتي نزلت الها لكيت ملابس يعني رايح للبيت
جايب ملابس اليه واضح الموضوع مطول .

دخلت سبحت وبدلت بس اني ما ادقق
اذا هو مطلقني شرعًا بس قانونًا بعدنا عادي يشوف
شعري واني محجبة لو لا ولان ما اعرف وماعندي تلفون
ابحث لبست تراك محتشم ولفيت الشال بـ اهمال بس يضم شعري .

دخلت للمطبخ بعده ؏ هوسة الريوك مالته
طلعت دوخة قوية صارت عندي هو يشتغل
؏ اوراق : عيني استاذ جووووووعانة من البارحة بلا اكل .

باوعلي بطرف عينه ورجع للأوراق
استصعبها ارجع اطلب رجعت للغرفة
سحب الغطوة وحاولت انام من التعب
استسلمت ونمت بسرعة ، كعدت ؏ صوت
أذان الفجر طلعت هو ماكو تجهزت للصلاة
بمجرد ماكملت بعد ماتحملت رجفت جسمي
دخل للمطبخ مليان اكياس مسواك اخذت
خيار وطماطة قطعتهم وخليت ملح وعصرت ليمون
واخذت صمون رتبت لفتي واني افكر ، يعني هذا
تسوك حتى نرجع عادي وطبيعي يريدني اطبخ
هو لو يفكر يحل الموضوع بسرعة يجبرني يتفاهم
ويايَّ وعادي عنده يطلب اكل بس هو يريد نرجع ؏ قديم
بس بحلامك غيهب بحلامك اخذت بس لفتي وعلى قصدني
تعمدت اترك كلشي ؏ خاله وارجع لغرفتي اكلت اكلي
ورجعت كملت نومتي الثاني يوم فزيت ؏ ريحة شعواط
حرگ دخان تارس الشقة فتحت عيوني ونزلت من السرير
رجلي ثگلت اريد افتح الباب ايدي بادت گلت هاي هي احترگنا .

شفت أوراق هواي ؏ ميز ركضت
؏ مطبخ لكيت الغيهب فاتح الشباك
ويهفي بالمنشفة عبالك يطير طيور : شصااااير هناا .

دار وجهه بتجاهي ورجع يهفي
الجدر ؏ طباخ مصخم صاير اسود
وهو لون اخضر محروگ حرگ
زهراء: افتح باب الشقة حتى يتغير
الهوى مو دخت ومعدتي اذتني .

فتح الشبابيك ورجع شال الجدر وفتح علية ماي
_شسويت انتَ يعني ماتعرف تگعد بدون مصايب .

الغيهب: طولان السانها تررررريد اجرحهاااااا بالكلام .

زهراء: دباع حال البيت .

الغيهب: لوو عندي مرة بيها خير مصار الي صار .

زهراء : من كُل عقلك منفصلين احنا تريد اخدمك شلون
بعدين اني انتظر الساعة والدقيقة اطلع بيها منا.

الغيهب: بعيده لا تنتظرين .

زهراء: يعني عادي عندك تجبرني اعيش وياك واني ما اريدك .

الغيهب: لااااااااا موووو عادي اني اجبرج تعيشين ويايَّ
وبالخصوص هل فترة لان اعرف بنفسي ما غلطان .

زهراء: غلطاااااااان انتَ غلطااااان .

الغيهب: ما غلطان وتعرفين بهل شي بس انتِ وأصله
مرحلة من الرعونة لازم اطول بالي واتحملج حتى ما اكرهج .

زهراء: انووووب انتَ تكرهني حلوة هاي تضحك.

الغيهب: دارسج اني ادري بيج اذا تبقين بيت رحيم
كم يوم وتبلشين تتعمدين تسوين شغلات تستفزني
وتخليني احرك بروحي الى ان اكرهج مثل سالفة
السفر مالتج بدون علمي .

زهراء: انتَ ما مسؤول عني افتهمت .

الغيهب: الخاطر حبي الج والعشرة ما اريد اقسي عليج
ولا اهجم العشرة بيناتنا ، بيناتنا اطفال افكر بيهم قبل
لا افكر بينا والمفروض انتِ مثلي مو زهراء ؟

زهراء: ليش الأطفال يموتون اذا انتَ بعيد عنهم ؟

الغيهب: لا تذكرين طاري المووووووت .

زهراء: اريد افتهممممممم ..

الغيهب: لج بلا حيونه اني احبج شلون اعيش بدونچ ؟

زهراء: واني كرهتك .

الغيهب: مصبر نفسي بعد كُل الإهانة من اهلج والضرب
وكل كلمة مو حلوة سمعتها منج وشفتها كاتبتها عني
بس الخاطر اني اعرف انتِ تحبيني وراح يجي يوم
تفتهمين الصار وتعتذرين ؏ تصرفاتچ ويايَّ .

‏زهراء :بحجم حبي لك كرهتك .

الغيهب : ‏أبقي اضحكي ؏ على نفسج استمرررري .

‏زهراء : طلعني لا اهجم البيت تعبت بعد ماكو صبر خلص
ما مليت انتَ ما مليت معقوووولة يعني احسن تكبر الموضوع .

الغيهب : ‏ ‏اسمعيني من الاخير ل بيت ما تطلعين والله
اذا ما تظهر الحقيقة وتعتذرين مني واخليچ تروحين
بوقتها بحال سبيلج وبعد وجهي ما تشوووووفي
انتِ واهلي كلكم اذية اليه بحجم حبي الكم تعبتوني .

تركته ودخلت للحمام شغلت الساحبة ورجعت وكفت ؏ شباك
اريد اتنفس البيت يخنگ ، هو يفتر بين عنده مكالمة والواضح
الشغل متراكم علية ، وبين البيت والهوسة الصارت
وبين وصلت مكالمة ثانية اجه يلملم بالأوراق ويحجي
_ شيسوي خلي يسوي قابل يموتني لو يفجرنا صدك .

سكت لثواني ورجع صاح : خابر هاجر تعوفه وتطلع من بيته
هووو شنووو هذا شاف نفسه يهدد ويتوعد شكووووو .

رجع تكلم بعد ما استمع للطرف الثاني
_ والله هسة لو مو يطلع امر القاء قبض لو القاضي
بذات نفسه يجي ميهمني المهم عندي اني ما غلطان
والأهم اطفالي ما يتبهذلون وبيتي يرجع احسن من قبل .

هزيت ايدي وضحكت بعلامة انت وين
هو شاطت روحه بعدني احجي وشال الكلاص
فلشه تفلش بالحايط خليت ايدي ؏ راسي وصوتي
نكتم فرد مرة سد المكالمة واجه بتجاهي لزمني من
ايدي هزني هز : لاااااااااا تستفزززززيتي لا اطلع ضيمي كله بيچ
لج مو شفتيني ساكت صرتي تزيدين بالرعووووونة احترمي
حتى احترمج خلاف هل كلام البس القناع الثاني اخليج
ليلج من نهارج ماتعرررررررررفي افتهمممممممممتي .

نزلت راسي لازمه ايده ألي ضاغطه
؏ ايدي صار يقويها اكثر ويصيح بوجهي
_ افتهممممممتي لوووو لااااا جاووووووبيني .

عيني صارت تركز بعيونه ودموعي وحدهن نزلن فشلني
صرت اشهك بعالي يصوتي واصرخ : عووووفني لا تصيح بوجهي
اكرررررهك افتهمممم اكرررهك ما اريدك .

الغيهب: موووو بكيفچ ولا بمزاجج .

زهراء: هو انتوا هيج الرجال من بنية تحبكم تستنزفون طاقتها الى ان
تذبل وحتى الوردة الي جانت بقلبها تذبل وتموووت وتبدي
تبتعد حتى ترجع تعيش تصير عزيزة من تشوفوها عاشت حياتها
ومرتاحة بدونكم ماتگدرون تتقبلون الفكرة ترجعووووون تريدون
تكملووووون عليهاااااا .

بعدني احجي وياه والباب مال شقة تفلش تفليش ضرب
قووووي الى درجة گلبي صار يخفق بقوة من الرعب
للحظات سمعت صوت ابوية يصيح : افتح الباب عرفت مكانك
ينفتح لو يتفلش .

اثناء كلامه رن تلفون الغيهب فتح خط وفتح المايك
ايهاب: غيهب بلا مشاكل وفضايح طلع زهراء
عمي ما ناوي ؏ خير والله يخاف ؏ بنته ومستعد كلشي يسوي علموها .

سحبه من عنده وهو صار يصيح
_ والله مستعد اسوي افعال بيك ما تتسولف بس
منتظر والخاطر احفادي الي انتَ ما تستاهلهم
ما اريد يصيرون ايتام احترم نفسك وافتحححح
اذا ينكر هل باب معناها انتَ ميت .

غلق المكالمة وصار يباوع بعيوني اقترب مني
ورفع راسي بعدت وجهي منه رجع ثبته : تعرفيني احبج ..

درت وجهي امسح بدموعي وجسمي من الموقف والخوف
لا يروح واحد بيهم بعد ما يشيلني وگعت بالارض
نزل مقابيلي بس ثاني الركبة وبكل هدوء كمل كلامه
_ واني ما غلطان والقرار عندج زهراء اني رجال تدرين
بيه معروف واليه اسمي ومكانتي الف الحمدلله وبهذا
اسلوبچ الحقير واسلوب اهلچ الهمجي بالنسبة اليه ما اتحمله .

هو يحجي واني كُل كلمة تطلع منه افتهمها
ادري بي بعمره مايسمح هل شي يصير وياه
وادري هو اهم شي عنده إحترامه واسمه
وبالخصوص هل كم سنة الفاتت جانت عبارة
عن هدوء ونجاحات وصل المكان يحلم بي
كُل محامي وموقف اهلي ضعف موقفي أمامه .

الغيهب: اختصرها عليك بـ 3 حالات .
رفع ايده وصار يأشر ويفهمني ؏ نقطة نقطة ..

الغيهب: اول نقطة يا اما اعاند واركب راسي
وافتح الباب واتعارك وياهم وارفض تطلعين وتصير
دم والله دم قاتل ومقتووووول لو اني لووووو اهلچ .

او اكبر عقلي وافتح هل باب واقوي گلبي واخليچ
تروحين وياهم بس استمر اثبت حقيقة الصار
لان انتِ واهلي ملكم متفقين ؏ موتي لازم اخذ
الحقيقة منهم وانتِ تسمعيها وبس تعرفين الحقيقة
اكون اني ما موجود زهراء طالع من حياتكم نهائيًا
وحتى من العراق بالكامل اطلع لان اني هنا الخاطرج انتِ واطفالي .

يا اما واخر حل عندي افتح الباب وبكل هدوء تفهمين ابوج
انتِ هنا حتى نحل مشاكلنا وتبين الحقيقة وتظل ايدي بيدج
ما نسمح الكائن من يكن يخربها علينة وانتِ براحتچ اختراي القرار يمج .

بدون تفكير ولا أخذ وعطى بس جنت ابجي
واناشغ وايدي ؏ وجهي جسمي كله يرجف
وكلبي نقبض ومغص ببطني كلها التمت
ومن جهه كلام ابوية برا والتهديدات
عقلي جمد وبس اريد اخلص صحت : الثاني اختار الثاني طلعني .

يتبع ...

البَـاقيـات الصـالحـات🖤:-..

‏- سُبحـان الله .
‏- الحَمـد لله .
‏- لا إلـه إلا الله .
‏- الله أڪبـر .
‏- أستغفِـرُ الله .
‏- لا حَـول و لا قـوة إلا بالله .
‏- سُبحـان الله و بِحمـده .
‏- سُبحـان الله العَظيـم .
‏- اللهُـمَ صَل عَـلى مُحمـد وآلِ محمد