ثمار العار بالحلال الفصل الثاني وثلاثون 32 - بقلم نهى

ثمار العار بالحلال ج٢
بقلم الكاتبة nuha-d-h
((مساء الخير والمسرات والعافية عليكم. يا احبتي ))

نزلت
انصدمت من صارت بوجهي سجى
وصرنا نتبادل النظرات
لزمت محجر الدرج قوي ورجف جسمي
نظراتها خوفتني
خضعتني الفحص الشامل اباوعلها رفعت حاجبها
واشرت علية باصبعها
سجى: انتي زوجة ثائر الي خبصونا بيها
ليش انتي مو نفسج ذيج المرة الله فكني منج
بعدما كدرت اضغط على ابوهم حتى يبعدج عن طريقه
شرجعج من الله ياخذج

ارتديت للخلف متفاجئة من كلامها
شكد شايفة صلافة ووقاحة مثل هاي ما شفت
: انتي شلون تتجرئين تحجين وياي هشكل
صار جسمي كلة يرجف مدا اكدر اصدك
يعني هي الي جانت ورة تهديد ابوهم وحربه
ضدي وبروده وياي واني اكول شبي
ابوهم متعقد مني اثاري هاي ماكلة راسه
من الله ياخذج شنو من شيطان
من القهرة حسيت الدنيا افترت بيا ولزمت الدرج
سمعت صوت سناء
: خير يا طير شعندج لازمتلها الدرج جنج
جنج جلب حراسة انتي وهاي عطوبج
جانت تحجي وية سجى الي ما لابسة حجاب وملابسة ملفتة للنظر
: تعاي يمة سهوة خلي نتريك وجهج صاير اصفر
سجى: اجي وياكم تريكوني جوعانة
التفتت عليها : نكمل ريوك ونخلص وعودك تعاي اتزوهري لان ابوي الشيخ مزاحم موجود جاي يتريك
لاتنسد نفسه بشوفتج
اني محجيت شي لان سناء الله يحفظها كفت ووفت
مشينا وتركنا سجى وواكفة بمكانها
همست بأذني : خايبة يالفاهية جم دوب اظل اعلم بيج
جا مو كتلج اوهگي بيها دمغ (نزلي عليها بالضرب)
ما افتهمت كلامها: هااا شنو اسوي مفتهمت عليج
سناء تكلب بعيونها : خابية من امداني
ما اعرف انا شلون جنت خايفة منج
تخربين بيت ابوي الشيخ وتسيطرين على الكل
اثاري طلعتي كل خير ما بيج بس مايعة
وتنعوصين
دمشي امشي كدامي
ما اعرف اضحك على كلامها الي نصة ما افتهمت عليه لو اضحك على القدر الي خلة سناء تصبح صديقة مساندة الي
دخلت وشفتهم كلهم كاعدين وانتبهت على ثائر ما رفع
راسه شكله بعدة زعلان مني
بس اني ما راح انطي مجال وراح اخليه ينسى زعله ويرجع لحضني
حياتي وية ثائر علمتني النكد مع الرجال ما راح تجيب
اي نتيجة غير ان تطفشة مني
اما الحنان والتفهم تقوي علاقتهم مع بعض وتقربهم
اما عن التنازل فعمرة ماكان ضعف بحق المراءة لا بالعكس
للتنازل بين الاحباب
لا يعتبر ضعف او هدر للكرامة
وانما تضحية من اجل ابقاء الحبيب والحفاظ عليه
ابتسمت بداخلي على ضوء الامل الجديد
صبحت عليهم واقتربت من الشيخ مزاحم وبست راسه
وسويت نفس الشي وية بيبتهم
ورحت وخذت مكاني بصف ثائر وكان مندمج بالاكل
لمست رجلة برجلي وسويت نفسي مامنتبهة عليه
انتبهت عليه انخبص و وكع اكلاص الماي بالسفرة
الجدة : يالله فدوة الك اتبدة الشر (طرد )
مديت ايدي على الكلاص وحطيت بي ماي وانطيته
لثائر
: هاك اتفضل اخذ
: هااه
مد ايدة واخذة بس قبل لا يسحب ايده لمست اطراف ايديه
انتبهت عليه عكد حواجبه باستغراب ورفع عيونه
واجتي بعيني
ابتسمتلة بخجل
شفت الكل ملتهي ويسولف ويحجون ومحد منتبه علينا
همست بأذنه
: ثائر اليوم مو تتأخر بالليل عفية
حسيت بيً مثل الي داخ
: احم شكو شبيج سهوة
منا اهلي شبيج تخبلتي
: ليش اني شنو سويت والله حبابة
ابتسم بطرف شفتة
: خايبة يا حبابة وانتي نازلة بيه حركات
: عفية ثائر لاتخجلني مجان قصدي اثيرك
كانت نيتي صافية بس انت عقلك مو نظيف
مديت ايدي عالاكل وصرت اغمس كيمر واكل
وهو يمسح بالعرك
كنت اكل على كيف
اباوع عليه شلون يتلفت عالجانبين وكأنه
يراقب خاف واحد يحس علينا
اقترب مني وهمس
: من احتركت عشيرتج سهوة اكلي عدل منا اخوتي
لا اعلمج شلون تاكلين
بدلع: شنووو لعد شلون اكل اي غير مثلكم
: لا انتي اليوم بيج شي مو طبيعية
كام من السفرة
: الحمد الله يالله مع السلامة انا طالع
سهوة تعاي سدي وراي الباب
كمت ورحت وراه اسد الباب
جاي امشي وفجئة لزمني من زندي
: شوفي ولج بطلي هاي المياعة لا اعلمج شلون تصيرين مرة حوك
بدلع : والله يا ريت تعلمني
اخذ نفس : هاي سالفتج اليوم مالها حل الا عصا جدي
ووين اليوجع
لزمت ايدة وحطتها على گلبي: هذا يوجعني
تكدر توصله وتضربه بخيزران جدك(العصا)
................
ودعتة وطلع وهو كل ساعة يباوعلي بأستغراب
ممصدك ان هاي الي واكفة كدامه هي نفسها سهى العنودية الي خبلتة البارحة
وسديت (غلقت )الباب وراه
ورجعت واني ابتسم على شكل ثائر الدايخ
بتصرفاتي وياه بعدك يثائر مشفت مني شي
انت ملكي وحلالي ولايمكن اخلي غيري
تتربع بگلبك لو تاخذ مكاني
جنت راجعة للمطبخ
وصارت بوجهي سجى
يمة دخيلك ربي هاي شتسوي هنا عزة هاي بس لا جانت تراقبنا اني ثائر
اي بس احسن خلي توصللها الرسالة ثائر زوجي
ومالهة حق تباوع عليه
يمة بس عيونه تجدح عبالك وحدة تريد ترتكب جريمة
اقشعر جسمي منها
دخلت للمطبخ وتركتها تباوع علية
كملنا الريوك وشفنا سناء لبست عبايتها
وكالت اليوم عازمين بيت اختي منتهى عالغدة
فراح اتسوك وارجع
والتفتت علية شافتني انظف بالصحون
: سهوة ما اوصيج عالبيت
اباوع عليها تحجي وياي بصوت عالي وتباوع لسجى
اتوقع مثل الي تنطيها انذار ان اني هنا الي دور بهذا البيت وسجى مالهة مكان بينا
صرت اعرف تفكير عمتهم
اجتي تطلع وصحت وراهة وانطيتها ورقة
: عمة لحظة جيبي وياج هاي الشغلات المكتوبة
بالورقة اريد اسوي حلويات اليوم
: اي عفية عليج اتلحلحي صيري سباعية
وصدك ثائر يحب الكيك
ابتسمت بداخلي واتذكرت موقف الكيكة
اوووف عمي اصيرلة كيكة
خلصت شغلي وطلعو الولد وبقة اليوم الجد كاعد بالديوان وصاح لعمو ابو ثائر ومرتة
كتلني الفضول
ليش دز وراهم شعندة وياهم
.......................
طلعت من البيت وانة دايخ بتصرفات سهوة الغريبة
وين تريد توصل بهاي حركاتها معقولة
تريد تتقربلي وتمدلي غصن الزيتون
وصلت لبيت عمتي منتهى حتى اعتذرلهم عالصار البارحة
دكيت الباب وطلعلي حارث
وانا اتعوذت من ابليس اشكد اتخبل منة
ما اعرف ليش سلم علية ودخلني للبيت
ودخلت عمتي علينا وسلمت عليها
بعدها دخل عمي قاسم وناصر وهمة وجهم ثكيل
كمت سلمت على عمي قاسم وردلي السلام
بزعل: هلة بثاير طبعاً انا جاي اجيكم للبيت
والعب بيك طوبة
على سوايتك مالت البارحة والله لو داري بيك جان كسرت راسك
بس الله حابك انت اجيت قبل لا اروحلكم
طلعتك مو حلوة بخاطرنا يعني ضربت بكلمتي
بعرض الحايط وما سويتلي حساب وحشمة لشيباني
: محشوم عمي وماعاش الي يقلل من هيبتك
بس والله ما كدرت يغمضلي جفن وانا احس بروحي مغبون ومظلوم وبتكم ظلمتني ودخلت بخطيتي
منتهى: ايه يقاسم هسة انت ما تعرف بالوحش
ما ينام ليلة ولا يهدالة بال الا ياخذ حقه
قاسم: اي بس احنا نختلف اهل والاصول تكول
السواه غلط بحقي وبحق بنت اخوي وانا ناوي
اليوم اروح واسألها واذا جانت تريد تجي وياي
اخذها عندي ما غصبن على اليرضى والما يرضى
: لاتخاف عمي بنت اخوك تخبل بلد بحالة وماخذة
حقها وزايد وما مقصر وياها بَــأي شي
ولا تستغرب مني اذا انا طلبت منك تاخذني عندكم من ورة سوالفها
ابتسم : يابوي الله يهديكم لبعض انا شرايد منكم غير
بس تدير بالك عليها خطية يتيمة وما شافت شي بحياتها بس التعب
ولا تلومها هي هم مرة وتغار على رجلها والي شافتة مو هين بس اليوم عمتك عالريوك فهمتني بسالفة
البنية وابنها الي جايتكم البارحة
نصيت راسي ومسحت على وجهي : والله ياعمي ما اعرف
وين اودي وجهي من الناس من ورة افعال ابوي
حسيت بيد عمي قاسم لزمت كتفي : لاتاكل هم يابعد عمك ترة الدنيا امتحان وابتلاء والله اختبرك ببأبوك
وانت ما قصرت الله يبارك بيك
التفتت عليه كمت من مكاني وبست راسه : ارجو منك السموحة يالغالي
...................

نظفت الخضرة حطيتها بالسلة
والكل مشغول ومخبوصين خبص لان بيت عمو قاسم على جية
اتصلت على عذراء حتى اطمن على عمو واريد اعرف شنو كال من عرف بية رجعت بدون علمه
: سكتي قبل شوية جان ثائر عندنا بالبيت
واستسمح من ابوي
اسمع كلام عذراء واني متعجبة
ثائر ابد ما تنحزر تصرفاته
: يالله مو تتأخرين لتنتظرين اهلج تعاي قبلهم حتى تساعدينا
: من عيوني راح ابدل واخلي حارث يوصلني
...................
وصلت سناء وساعدتها بتعزيل المسواك
وبدو البنات يجون وزينة التهت باطفالها كملت شغلها وصعدت لغرفتها حتى تسبحهم
واني كلمت وتركت رواء يم سناء بالمطبخ ورحت
صحت لحسن حتى يدخل يسبح وورحت للبنات
فاطمة وسرى شفتهم كاعدات بالغرفة ديجهزون بملابس فاطمة ويبجون (بكاء ) على فراق بعض
باوعت لفاطمة
صدك اتعودنا عليها وعلى شقاوتها ومرحها هي وسرى صداقتهم كلش حلوة
رحت اقتربت منها وحضنتها
: لتبجين انتي بعد صرتي مثل بتنا مو تكطعين بينا
واني راح اخلي ثائر يحجي وية محمد يخليج كل فترة تعدين علينا وتزورينا
خطية عصرتني بحضنها الصغير وهي تبجي
: والله عمة انا هواي حبيتكم واتعودت عليكم
وعشت وياكم ايام حلوة وعاملتوني مثل بتكم
حتى ابوي ممسوي وياي هيج
واتمنيت اسأل ثائر شلون حلها وية اهلها
وان شاء الله بس تصيرلي فرصة اسئلة عنهم
دخل حسن : ماما بدلت حلو ؟؟
التفتت عليه جان لابس دشداشة ولادية بيضة
اتفاجئت : منو اشترالك هاي الملابس!!؟
: عمو ثائر كال هذني تلبسهم من تجي وياي عالديوان
واليوم كلهم راح يجتمعون بالديوان
لمعت عيوني بفخر من شفت حسن شلوو طالع بالملابس العربية
اخذتة لحضني
يارب رحمتك شكد واسعة
وما حرمتني من ابني
شميت ريحتة عطره الرجالية وابتسمت
جانت هاي ريحة ثائر انتبهت لحسن ابني
صاير يحب يقلد ثائر بكلشي ويطيعة طاعة عمياء
ااااه عدت علية سنين شكد حاربت وشكد عانيت لاجل
يبقىً ابني بحضني اوصله لبر الامان
كمت من مكاني ومسحت دمعتي
: يالله بنات جهزو نفسكم ترة بيت عمتي منتهى والبقية وصلو مو تظلون معلكات فوك عيب نزلو سلمو عالكل
والتفتت على سرى
وخصوصاً انتي منتبهة عليج هواي تنعزلين
عن البقية
: عمة والله استحي ادخل اسلم على الخطار همة كومة
: صحيح حبيبتي عاذرتج
وادري بيج تخجلين
انتي تسميه مستحة بس همة راح يعتبرونها تكبر من عندج وقلة احترام متنزلين تسلمين
: لا والله ما اقصد هيج شي
: اعرف حٍٍِْــًبٌٍـــِٓېٍٓ بس انتي حبابة وراح تنزلين وتسلمين
وتخليهم يشوفون بنت الوحش متخاف ولا تخجل من السلام وهي تعرف الاصول مثل اطباع ابوها
: ابتسمت صحيح اني بنت الوحش والكل يخاف
يقتربلي عبالهم اعض
ابتسمت على كلامها
وبگلبي احجي
والله شكلهم حتى الخطابة يشردون من ورة ابوج الوحش هههه
بستها من راسها وطلعت
نزلت جوة للمطبخ بعد ما عدلت نفسي ولبست ثوب مرتب راهم على جسمي ولبست شالي
ورحت يم سناء: هَـا عمة محتاجة شي اسوي بين ما بوصلون
: لا حبية خلصت التفتت علية وباوعتلي وابتسمت
: اي عفية عليج اريدج هيج معدلة كون من يرجع ثاير
ما يعاين على غيرج شغلي بيج
ترة اكو شياطين عالارض الله يكفينا شرهم
كاعديلكم بالمرصاد
ابتسمت وفجاء سمعنا صوت عياط وصياح
جاي من الديوان
شهكت سناء وراحت تركض
: ياستار استر شصاير
.........................
رجعت من الشغل ودخلت بالديوان
وشفت ابوي والشيخ مزاحم وسجى كاعدين وصوت ابوي يصيح دخلت وسلمت عليهم ورحت كعدت وانا احس بنظرات سجى تلحكني بس ما انطيتها نشدة ولا ريحت گلبها

الشيخ مزاحم : شوف بوية فاضل من باجرتاخذ مرتك وترد بيها لبغداد منين ما جبتها وشلون جنت عايش وياها كل السنين بعيد عنا كمل مثلما جنت
انا ما اكدر الفي لبيتي هيج عالم
:ليش بوية شسامع عنا
: لا تسوي روحك غافل خلينا ساكتين احسن
وجودها ببيتنا ينتهك حرمتنا واحنا عندنا بنات وسمعتنا بالدنيا
باوعت لسجى عيونها صارت جمر
والتفتت على ابوي لان متكدر تحجي وية جدي تخاف منة : احجيلك كلمة لتضل ساكت شنو هذا مو بيتك وحلالك ليش تخليهم يتحكمون بيك وبعائلتك
اني وابني النة الحق نعيش هنا حالنا حال البقية
اباوع على ابوي مثل العربانة بيدها
: اي بوية ترة كلامها صحيح ترة انا ابنك العود (الكبير) وانا اولى واحد يسكن هنا
: خايب فاضل شمالك الله غاسل خظك وصرت عجينة
بيد مريتك والمصيبة مو اي مرة هم ياريت تنحسب
عالنسوان
نهضت من مكانها باعتراض: لا لهنا وكافي اني اتحملت اهانة بما فيه الكفاية بهذا البيت
التفتت على ابوي
: شوف اذا اني وابني مالي عيشة هنا من هسة اكلك طلكني
لان ما اتحمل ابقى على ذمة رجال ماعندة حجاية وية اهلة
خلصت كلامها وطلعت
وابوي تسودن ظل يصيح ويهد وكل ساعة يتوعد بشكل
وكضاها علينا كلة وانا وانا
: شوف شيخنا رخصت بية ونزلت من قيمتي جدام حرمتي وهذا الشي ما اقبل عليه
: خايب من الله يسود وجهك لو ميت ولا شايفك
بهاي الشوفة صاير خروف بيد حرمتك
شفت جدي كام من مكانه
وضرب العصا بالكاع
: هذا اخر كلام عندي حرمتك مالهة مكان ببيتي
عجبك الكلام اهلا وسهلا ما عجبك الباب يوسع جمل
وراوينة عرض جتافك
: لا والله ما اطلع وانا وياكم حالي من حالكم الي نصيب بهذا البيت وتعبي وشكى عمري
: شوف فاضل اتقي شري وخليني ساكت ما دام النفس عليك طيبة لا وحق الحق لافصلك من العشيرة واكتب بيك ورقة تبرأ ة واكول هاذ موش ابني
موكافي اولادك صارو بطولك وكاعدين يتحملون
مكاسيرك
دخلت علينا بيبتي تهدي بيهم
: سمو بالرحمان عين الماصلت عالنبي شجاكم
ليش تعاركتو
شفت جدي ما خبرها بالسالفة يدري بيها تنقهر
: يا محفوظة السلامة ابنج يريد ياخذ اهلة ويسافر بيهم وجاي يريد يسلم علينا
وعاين لابوي بنظرة تحذير
وطلع
.......،...............
اجتي عذراء
قبل اهلها وستلمتي تحقيق
وكعدت اسولفلها عالصار بية من بعد ما اخذني ثائر
لبيتهم وهي كعدت توصي بية
جانت تحجي وياي وشفتها تباوع وراي شهكت
وضربت على صدرها
: صخاااام اناا اختك يناصر
ولج مني هاي المرة
التفتت وعرفت مصدر تعجب عذراء
حجيت بصوت ناصي : لج هاي زوجة
عمو ابو ثائر
: لا يا بوي حلفي
: والله شبيج هي هاي سبب زعلتي البارحة
خرب ولج انا سمعت من امي بسالفتها بس بكل عقلي مرة جبيرة ولابسة شيلة بعد بعمر حبوبتي(جدتي)

دخلت علينا سناء مثل العاصفة بس تنفخ بعد ما راحت للاستقبال حتى تشوف
شنو مصدر الصياح الي صار
اباوعلها صايرة نار كبرة والشرار يطلع بعيونها
عبرتنا وراحت لسجى ولزمتها من ثوبها
وجرتها
: شوفي ولج مو جايتنا تهجمين بيت ابوي ووتوكعين بين اخوي وابوي وتشعليها نار بينهم
عدالج اسكتلج والله ادفنج وانتي حية
واسويج سالفة الكل يسولف بيها
ودفعتها ونضرب ظهرها بالحايط
اباوع لسجى شلون بلعت السانها وكعدت تعدل بملابسها
وابتسمت صفح بشماتة وكأنما تستهزأ بسناء
بس الله حابها سناء دايرة عنها وما انتبهت عليها
عذراء : يمة ولج سهيوة هاي شيطان موش مرة
الله يكفينا شرها
التفتت علينا وشكلها سمعت حجي عذراء
اقتربت من يمنا وهمست لعذراء
بصوت مثل فحيح الحية
: انتي خطيبة عدي
عذراء: اي حبيبة عندج مانع
: لا حٍٍِْــًبٌٍـــِٓېٍٓ الف مبروك عليج
بس انصحج كلي لعدي يغير الوشم مال صدره
ويخلي بدال السيف واحد يحط سيفين احلى عليه لان صدره عريض
كمزت عذراء مصدومة من مكانها : شنو قصدج
سجى وتلعب بأظافيرها وتباوع عليهم وكانت حركتها مستفزة من يمي اتمنيت اكلها بسنوني اعرف شنو كانت تقصد بكلامها
لان البارحة ثائر حجالي كلشي عنها وعن عدي الي
رافقها فترة لكن بطل منها رغم اتهامهم لعدي بالباطل
بس تعال جيب اليقنع عذراء اذا درت بهاي المصيبة

التفتت على عذراء: ماعليج منها هاي هجامت بيوت تريد توكع بينج وبين عدي
مشفتي عمة سناء شلون هدت عليها تريد تكتلها
: لا حٍٍِْــًبٌٍـــِٓېٍٓ اني ما اهجم بيوت بس
فعلا اني حبيت عذراء
وردت انبها من زوجها حتى منا ورايح تدير بالهة عليه خاف يروح يلعب بذيله

رادت تطلع من المطبخ
وشفت عذراء ركضت وراها : تعاي تعاي
وين مولية والله اليوم ما اهدج الا تكليلي شنو معنا كلامج هذا ماكو ابلعج السانج واكسر سنونج
: اووي شنو انتو وحوش كضيتوها علية كلة تتوعدونً
وتتحلفون بية اوووف بس على العموم ميحتاج
تحذريني اني راح انطيها الج من الاخير
اني جنت على علاقة بعدي قبل لا اتزوج ابوه
لطمت على خدي من ورة جرائتها وكلامها شكد شايفة
وسامعة بوصخ وقذارة بس مثل هاي مشفت
الله ياخذها
باوعت على عذراء شلون لون وجها انخطف
: يعني شنو
: يعني باختصار اني نمت بحضن عدي وشبعت
بي وشمرتة الج
كمت من مكاني وصرت مقابيل عذراء الي رادت تهجم على سجى
التفتت عليها : شوفي لج اذا هسة ما اتكسحتي منا
والله احاجي ثائر واخليه يطين عيشتج
طلعت واني احجي وكوة لازمة عذراء الي ظلت بس تكمز من القهر
حسيت بيها صارت نار كبرة
خطية والله احس بحركة گلبها
البارحة جنت اتگلب من القهر من ورة هاي العگربة
: عذراء شبيج تخلين وحدة مثل هاي تنصب عليج وتهزج
: سهى رحمة على والديج بعدي عني
................................
وصلو عمامي والتهينا بالعزيمة
ودخلت جوة للبيت حتى انطي خبر لعمتي تصب الغدة
فتت عالمطبخ وشفت سهوة واكفة يم الطباخ وفاتحة الفرن اقتربت منها
: هاي شنو جاي تسوين كيك
نزت من مكانها وحطت ايدها على صدرها من
الهبطة وحجت بدلع : عفو عليك ثائر خوفتني
اباوع عليها شلون سبلت عيونها
وحركاتها الي جنت عطشان الهة من قبل
: ولج سهوة انا موش حمل شلة حال
ترمش بعيونها وتعاين لشفايفي
: شنو شسويت اني والله حبابة
التفتت اعاين يسرة يمنة خاف واحد يعاين علينا
ورحت سحبتها من ايدها
:وخمط شفتها وهي ما كالت جذب
سحبتي لحضنها وجيب الي يفكها مني
سمعنا صوت عمتي سناء يلعلع قريب عالمطبخ وهي بسرعة دفعتني من صدري وبعدتني عنها
لزمت صدري
: من احتركت عشيرتج يسهوة انا من تالي عمري
تخليني اتصرف مثل المراهق
سهى بهمسة: يالله روح لا تجي عمتك وتگلب علينا
عض شفتة
دخلت سناء : ها عمة ثاير شنو شوكت نصب غدة
عدلت شالي وهو يعدل بثوبه حك خشمة برتباك
: احم اي عمة صبو هم يالله
تركنا وراح
انشغلنا بالترتيب والتحضير
وومنتصر دخل اخذ السفرة الجاهزة حتى ياخذها يفرشها بالديوان
وية طلعتة سمعت عذراء سئلتة عن عدي
وجاوبها
عدي ستوة رجع من الشغل وصعد فوك جاي يسبح
باوعتلها : شنو عذراء لايكون ناوية ترحين تصعدين فوك لغرفة عدي
: اي حبيبة انا مو مثلج اروح اشرد واختل ورة ابوي
واكعد ابجي لا عيني
انا اروح اواجه واطالب حقوقي وما اخلي واحد يضحك علية
شاورتني : بس خلي عينج عالدرج لا واحد يصعد
اخذت نفس عميق وصدت فوك
لغرفة عدي دكيت الباب وسمعتة : منو فوت ادخل
فتحت الباب واني مترددة لكن غضبي عاميني
واتغلب على ارتباكي
التفت وعاين علية متفاجيء ابتسم : يا هلا وكل الهلا بالجاي لينا شنو صعدتي
حتى تتحارشين بية عيب ترة انا استحي
شافها ما ابتسمت على كلامه
عكد حاجبه بتسائل مستغرب
:عذراء شنو صاير شي
اتقدمت بتجاهة واني معمية من الغضب
لزمته من قميصة وكعدت افتح بالدكم
يباوع علية ومتفاجئ بحركتي
: عذراء شكاعد تسوين
فتحت القميص عالجانبين وعاينت عالوشم جان مثل
الوصف
بساعتها حسيت مثل الصاعقة الي وكعت على راسي
: ولك عدي من الله ياخذك
وصرت اضرب على صدره من القهر وخرمشت صدره باظافري وردت حتى اخرمش حتى وجهة من القهر
لزمني من ايدي وقيدهن
وصرت اتلاوة وياه
: عذراء بس فهميني شنو الصاير وليش هيج سويتي
خلص حيلي (القوة)
وحجيت بخيبة امل
: عدي اسألك واريدك تجاوبني بدون لف ودوران
شنو بينك بين سجى مرت ابوك
انگلب لونه واتفاجيء
وبلحضتها عرفت عدي عندة علاقة وية سجى
وكلامها جان كلة صح
درت وجهي واتوجهت للباب
وشفتة كطع علية الدرب
: لحظة عذراء متطلعين منا قبل ما تسمعيني
: ابعد عني انا عرفت كلشي
مد ايدة وراد يلزمني
نفضت ايدة دير بالك تلزمني
انا مو حلالك راح اخبر ابوي واكلة يخليك تطلكني
ما اعرف ليش سمعت كلامها وانا الشيطان ركبني
: شنو ولج شكلتي
: الي سمعتة طلكني
ما انطاني مجال اكمل حجايتي
هجم علية وجرني لحضنه وصارمثل الوحش
كعدت ادفع بي : ابعد عني لا والله اصرخ والم البيت عليك
: صيحي شمنتظرة خلهم يجًون
عادي ترة رجال ومرتة ويريد يربيها
دفعتة بكل قوتي وابتعدت عنة
احس بشفايفي تريد تنزف دم من هجوم عدي الشرس
اباوع عليه يتنفس بغضب وقميصة مفتح
وصدره يرتفع ويهبط والوشم بارز
غمضت عيني من اتذكرت كلام الفاسدة
عن الوشم
: شوفي عذراء خليني افتهم منج شنو سامعة
جريت نفس :شوف عدي انا راح انطيك فرصة تبرر
موقفك وراح احجيلك شنو سمعت
وكعدت تحجيلي شنو خبرتها سجى
: اهااا هنا الحجي وحق هذا الله اليوم
الا احرك عشيرتها على هذا كلامها
شفتة نزل وهو يتوعد
حتى خفت من منظره
ركضت وراه
: لحظة عدي اوكف عدنا خطار بالديوان
: لاتخليني اسب حتى الخطار اليوم لو انة لو هي
نزل يهرول الدرج بسرعة
واني لبست شالي ونزلت وراه
وكلبي كلة يرجف شراح يسوي
هسة اني ليش ما بلعت السالفة وسكتت
وافهم منة
بس احسن خلي يتوبها
باوعت عليه فات عالمطبخ
...........
دخل علينا عدي يصيح ويتوعد واتوجه على سجى
وصاح بصوت عالي ولج ساقطة
اتسعت عيوني من الخوف يمة
انتبهت عليه ضربها راشدي
والكل جمد بمكانه
وجرها من ثوبها وسحلها سحل لغرفة جدي
رحت وراهم سمعت صوت ابو ثائر وثائر والشيخ مزاحم
اجو يركضون عالصياح
وصار صياح
وابو ثائر ضرب عدي وظل يغلط ويسب
وبهاي الاثناء والكل مخبوص
سمعنا صرخة رواء : لحكووو بيبتي تخربطت
.............................................

الساعة ١٢ليلاً
: الو هلو ثائر بشرني شلون صارت بيبي
سمعته جرنفس حسيت بي تعبان
: لا الحمدلله طلعت جلطة خفيفة كدرنا نتلاحكلها
: الحمد لله على سلامتها شوكت ترجع للبيت
: هسة جاي جاي بالطريق بس اوصل الشيوخ بطريقي
: يالله انتظرك
: اااوووف سهوة تعبان
: بية ولا بيك اتمنة كون انت يمي واخذك
لحضني وامتص كل تعبك
: ااخ الله سهوة رحمي بحالي
سمعتة سلم على ناس
يالله سهوة انا رايح مع السلامة
..............................

هو صحيح مخبوصين علمود جدتهم وثائر كلش تعبان والشغل كلة فوك راسه بس سعيت ان اخلق عالم خاص بينا اني وياه. حتى يرجعلي بنهاية كل يوم بلهفة
ردت اصعد فوك لغرفتي ومريت من الديوان وسمعت صوته وصل ويمهم زلم كملت صعدت الدرج ورحت لغرفتي كملت ترتيب وعدلت ورحت كعدت على الدرج منتظرتة سمعت صوتة وهو يصعد عالدرج
جان يكلب بالنقال
رفع راسه وكف بمكانه متفاجيء
: سهوة شتسوين هنا كاعدة
جانت كاعدة وحاطة ايدها على خدها
: جنت انتظرك تصعد ما اريد اظل بالغرفة وحدي
اختنك
شفتة ابتسم ومد ايدة الي وكومني
: مخبلة مو عاقلة شخليتي لسرى بتي بهاي حركاتج
دخلنا للغرفة وسحب نفس
كان تعبان ويحتاج الراحة
وحسيت بي بدة يسترخي من دخل
: ادخل اسبح بين ما احضرلك ملابسك
دخل وكعدت اجهز الميز كيكة وشموع
معطرة وكرزات وعصير فواكه
ورة دقايق طلع وهو ينشف شعره بالمنشفة ونزلها على اكتافه ووكف يباوع وعيونة تنتقل بيني وبين الميز
كمت ورحت اقتربت منة وعقدت ايدية حول ركبته
انت مو تحب الكيك
جاوبني وعيونة على شفايفي
عض شفتة : احم هاا اي اموت عالكيك واتمنى كل ساعة اعضهن
: شنو تعض منو
اتخردلت منة حركتة وقربني عليه
ابتعدت حتى اروح اقطع الكيكة
: تعاي شنو وين رايحة انتظري انتي موكلتي مسوية كيكة
قبل لتروحين عوفي الكيك على صفحة عندي حجاية وياج
اقتربت منة بجدية: شنو
ابتسم بمكر ولزمني : ولج دتعاي مو سمطتي عشيرتي
عضني من خدي بخفة واخذني لحضنة وصرت مثل الماي بين اديه
وكضيت احلى ليلة بحضن محبوبي وصارت
افعالنا ابلغ من الكلام وهي الي تحجي عن محبتنا
............................
جنت متمددة على صدره
ايدي على صدره واتلمس بشعر صدره
همست بنعاس: ثائر شنو صار اليوم وية عدي
مفتهمت شي
اخذ نفس من الجيكارة وطرحه
حجالي شصار عن
عدي المظلوم انتفض وما كدر يسكت عالظلم اكثر
وشفتي بعينج شسوة
وجدي طرد ابوي ومرتة من البيت
بس جدتي اتخربط
: وهسة ابوك ومرتة وين
: بعدهم ما مسافرين
...............................
كعدنا يوم ثاني والخطار صارت تتوافد علينا
واني التهيت
خطية اباوع لعمة سناء كسرت خاطري شلون مقهورة
على امها وصرت اواسيها
وسلمتنا اني وزينة زمام الامور بالطبخ والبيت
وكل ساعة ادخل عليها اسألها على شي
لان هي جانت لازمة بيدها
كلشي
: سهوة لا تثبرين راسي شتسوين سوي ادري بيج سنعة
وام بيت ما تفشليني
: لا عمة احنا مالنا غنا عنج انت الكل بالكل
شفتها ابتسمت وعيونها دمعت
حسستها بقيمتها ودورها الكبير بالبيت
جنت احجي وياهة ودخل علينا ابن سجى يركض
: ثوووهى ثوووهى
حسن ابنج جرح ايدة واتعور وطلع منة دم كوومة
ضربت على صدري : يمة حسن
طفرت من مكاني ورحت اركض
.........................
جنا راجعين من المستشفى انا وجدي والربع
اقتربت من السلف وصرنا قريب على المزرعة
واشوف الوادم فازعة وتركض بتجاه بيتنا
الشيخ مزاحم : يا ستار شمالهة الوادم
تروكض
نزلت جامة السيارة وسئلت ولد مار من يمنة
جاي يركض : شنو شصاير
: ووحش الحك بيتكم شابة بيه النار
انخطف لوني ودست سرعة وقطعت الطريق بلحضات
وكفت السيارة ونزلت اركض بتجاه بيتنا
انتبهت عالبوابة مشرعة والناس ملتمة
صرت اركض خايف وحدي وربعي يركضون
وراي
سمعت صرخة رواء : يمة. صخاااام سهوووووووة سهووووة جوة شابة بيها النار

يتبع