ثمار العار بالحلال الفصل الحادي وثلاثون 31 - بقلم نهى

ثمار العار بالحلال ج٢
للكاتبة nuha-d-h

🌷🌷مساء الانوار والمحبة والسرور عليكم يا احبتي🌷🌷

جمدت بمكاني من كالت اسمها
وهذا ابنكم
كعدت عالكرسي من اثر الصدمة
رجلي ما عانتني
هزيت براسي اريد انفض الافكار السودة الي هجمت على راسي
مستحيل لا يمكن ثائر يسوي بية هيج
والله اموت
انتبهت لسناء شهكت ولطمت على وجها
: عزة بعينج انتي منين ليفيتي علينا وجاي تتبلين
على اولادنا
اني بس اباوع بعيوني اخاف احجي وانهار
سجى: عفيا حووبي ناديلي ثائر وهو يفهمكم بموضوعي
:الله ياخذج احجي عدل لا اضربج على بوزج (الشفة)

دخلت رواء وهي تلبس ترجيتها : هاي شنو سهاوي بعدج ما مجهزة نفسج مو را...........
انتبهت عالشخص الغريب الواقف يم باب المطبخ
وسألت سهى وهي تأشر
: منو هاي ؟؟؟؟
فعلاً بقى السؤال مطروح بدون جواب
وجو المطبخ اصبح متكهرب من شدة التوتر والترقب
منو هاي وشتريد وهذا ابن منو
انتبهت على رواء تباوع عليها
من فوك ليجوة
رجعت ادرس شكلها كان ابد مو راحة
هي جميلة صحيح لكن هناك شي يجعل الحذر منها واجب
سناء كالت لسرى روحي صيحي ابوج بسرعة
انتظرت قدوم ثائر
لحظات واجة ووجهة عليه علامة استفهام
لكن من وكعت عينه على البنية الواكفة
شفت عيونه اتسعت من المفاجئة
راح اتقدم بكل غضب بتجاها
لزمها من زندها حيل مثل الي يريد يرزل طالبة
كسلانة
نهضت من مكاني
هذا شلون يلزمها اجيت اموت
ثائر صاك سنونة ويحجي بغضب: ولج انتي شلون تتجرئين وتخطين عتبت بيتنا
انا مو كلت اذا تجين اكسر رجليج

شفتة سحبها وراه لداخل البيت وولا عبالك اني موجودة
التفت على سناء
: عمة بسرعة صيحي جدي
انخطف لوني وصرت اصارع مثل الغركان الي يريد بس ياخذله شمة هوى لحتى يعيش
انتبهت عليها شلون تباوع لثائر بشغف وعيونها اكلتة اكل
جان لازمها من زندها ويسحبها خلفه وهي تهرول
وتحجي بدلع: اوووي ايدي ثائر على كيفك
حسيت نار طلعت من اذني
يعني ليش اني دائماً الطرف الي لازم يكون
يعاني ويحرتك بناره
نهضت من مكاني
وحسيت الدنيا افترت بية دخت
لزمت راسي واستندت عالميز
شفت ايد انمدت الي بكلاص ماي
سناء: هاج حبيبة شربي شوية وجهج انگلب لونه
فاجئتني بحركتها
اخذتة منها واني ارجف
همست بتعب : شكرا
: لا حبيبة على شنو انخطف لونج
دكومي كومي على حيلج وشوفيها شتريد هاي المايصة من رجلج
: ليش مقهورة المفروض انتي اول الفرحانين
من تشوفين ثائر يكسرني
: لا حبيبة انا صحيح الساني متبري مني
بس اعرف مقابيلي شنو وانا اعرف معدنج
شفت عندج مخافت الله وما راح يوم تكيدين الي ولاهلي وتهجمين بيت ابوي الشيخ
شوفي اذا ما تحركتي انا اروح اسحلها من شعرها
واسود عيشتها هاي تصيح لامها وابوها عكربة تكرص

موقفها فاجئني احياناً الناس تظهر معادنهم باوقات الشدة
............
وانتبهت عالطفل كاعد عالكرسي ويباوع بأستغراب
ياترى انت هم ثمرة من ثمار العار الي دتصاقط على راسي ولازم اتحمل اجنيها واتجرع طعمها المر
نهضت من مكاني وطلعت من المطبخ
مستحيل اذل نفسي واروح وراهم
مشيت ونيتي اصعد فوك لغرفتي
سمعت صوتها الحاد جاي من جهة غرفة جدهم وانتبهت لرواء اتجهت عالديوان حتى تصيح جدها
ما حسيت الا على رجلية اخذتني لعندهم
تقدمت بتجاه الغرفة وصرت قريبة عالباب كان شوية مفتوح كان صوت ثائر غاضب
ما افتهمت شنو حجة لكن البنية كانت
تحجي بمياعة ماصخة لعبت نفسي
اقتربت وباوعتلهم كان ثائر واكف وهي حاضنة ركبتة
ومستندة على صدره بتوسل
انصعقت من المنظر
وكلامها لثائر مثل الي وجهلي رفسة لبطني
سجى: لك ثائر اني تركت كلشي وراي ورضيت
بالهوان لاجل اصير قريبة عليك واتنفس هواك
اتركني اعيش هنا حتى لو خدامة اترجاك لتبخل علية
بشوفتك والله مطالبة منك شي

شهكت وحطيت ايدي على حلكي واني اهز راسي برفض من الي شافتة عيوني وسمعتة اذني
التفت ثائر من سمع صوتي ونتر ايد سجى ودفعها عنة
واتجه علية يصيحني
: سهوة !!!!!
ارتديت للخلف وعيوني غوشت وعبرة صعدت للحنجرتي
وركضت صعدت فوك واني عالدرج سمعت صوت جدهم متحملت اسمع اي شي دخلت للغرفة وغلقت الباب وسندت ظهري عليه
واني كلي ارجف حضنت نفسي بضعف
مثل الي يريد يطمن نفسه
.........................
اااااخ بوية هاي المصيبة منين طلعت
هي وابنها
اخذتها لغرفة جدي حتى احجي وياهة بعيد عن الناس والخطار الي بدو يتوافدون عالبيت
لكن فاجئتني بحركتها
يعني بعدها ما تـُــابت مني رغم صدي الها ومعاملتي
القاسية وياهة تبقى تفرض نفسها علية
اتمنيت اخنكها وادفنها بأرضها القذرة
لكن سمعت شهكة وحدة متفاجئة التفتت
شفت سهى واكفة بباب الغرفة وتباوع عليها وهي تحضن بيا
دفعتها وصحت على سهى اريد افهمها
لكن راحت تركض ومكدرت اروح وراها لان
دخل علينا جدي
الشيخ وهو يباوع عليها : هَـا يثاير فاحت ريحة عمايل ابوك
كانت نظرات الشيخ للبنية نظرت احتقار
ثائر بقهر : جدي هاي شنو حلها هسة
: هاي اتركها علية حلها عندي
بس هسة عدنا شيوخ وابوك ملتهي ومعزب اليوم
انتبهت على سجى اتململت من مكانها
تريد تبتعد من نظرات جدي
لان شافت بيهم الوعيد
وهذا الشي اربكها انصدمت من شافت شخصية جدي المتسلطة
عبالهة مثل ابوي
تجيب راسه وتقشمره بحمل كاذب وورطتة بالزواج
بعدما عجزت من محاولتها وياي حتى
توصلني انتقلت لعدي حتى تنتقم مني
بس كعدتلها بالمرصاد وكدرت
اسحب عدي اخوي من براثينها ووصخها
وماجنت حاسب حساب ابوي الي طلعلي صفح
غافلتني وجرت رجله وورطتة بحمل
الي قهرني ان ابوي ذب الصوج كلة براس عدي
وما رفلة جفن ولبس السالفة كلها لعدي
والمصيبة يشوفنا كدام عينة شلون
كمنا انا وجدي على عدي ومسحنا بي الكاع وطردناه
من البيت وحاربنا الولد
جان كل اعتقادنا ان هو الي ورة هالسالفة
وعدي يصيح ويستريح :هاي تتبلى علية
وانا مالي يد بالموضوع
بس محد سمعلة
انا ما استغرب سواية ابوي عادي عندة
يعاشر بنت ليل
بس جانت كل هاي السوالف يسويها
من يسافر للخارج بعيد عن الديرة
بس مال يجيب وصخه هنا للسلف
هاي الي ماجنت حاسب حسابها
انا ادري بسجى كلش زين مو حباً بأبوي ولا علمود فلوسه لا
اعرف بيها سوت هذا كلة علمود توصلني وهاي مكيدة منها
جريت حسرة اعرف ان هاي المصيبة ما راح تعدي على خير
...............................
التفتت عليها : شوفي ولج تبقين هنا انتي وابنج
واياني وياج تعتبين خطوة وحدة بباب الغرفة
: ثائر لتتركني لوحدي هنا يم هذا اخاف
وهي تأشر عالجد بخوف
: ولج شنو هذا احجي عدل اسمة الشيخ مزاحم
تاج راسج وراس الخلفوج
شفتها شلون بلعت ريگها (الريق)
بخوف
تركتها وناديت على عمتي واجتني تركض
: شوفي عمة عينج عليها ولاتخليها تطلع من الغرفة
منا على ما نشوفلها صرفة
لاتسويلنا مصيبة واحنا ما ناقصين

سناء بفضول: صار عمة تأمر امر
بس اكول يمة ثاير منهي هاي
نفخت بضحر مالي خلك اكعد ابرر
: هاي طركاعة وكعت على راس ثائر
شهكت وضربت على صدرها: يمة صخام
لاتكول هاي مريتك الثانية والله سهوة تروح بيها
ضربت بيدي على كصتي (الجبين)
ااااخ الله تعال سهوة شراح يقنعها
صعدت فوك ودخلت لغرفتنا وانا اترقب
عاصفة راح تهجم علية
لكن انصدمت وجمدت بمكاني باوعت عليها
جانت قطعة فنية تنطق بالاغراء مع كل حركة تتحركها
صدمني برودها كلشي جنت متوقع منها الا برودها
شفتها تتحرك بالغرفة مثل الفراشة
جانت تجهز بنفسها ولابسة فستان اسود قصير مبين سيقانها الترفة
وحاضن جسمها وبارز تقاسيمها بفن حسيت على
كصتي عرگت
انتبهت عليها راحت فتحت الكومدي وطلعت حذاء كعب
وكعدت عالسرير تحاول تلبسه
اقتربت منها حسيت بالتوتر ما متعود ابرر تصرفاتي
لاي واحد وما اعرف اقنع واهدي مرية زعلانة
هذا الشي جديد علية

: سهوة
شفتها كامت بعدما كملت لبس حذاءها
صارت توصل لكتفي رفعت راسها وصارت عيونها بعيوني رفعت حاجب وهزت كتفها بعدم اكتراث
وراحت وكفت گدام المرايا تحاول تلبس ترجيتها
: سهوة
ما ردت علية
حسيت بالغضب من اسلوبها
حسستني الترجية اهم مني
: سهوة مو احجي وياج
التفت علية مثل هبت ريح
ورفعت صبعها بتحذير وحجت بنترة : اني اسمي سهى
مو سهوة فاهم
سحبت نفس عميق وغمضت عيوني بصبر
اللهم صبرج ياروح
عرفت بيها هسة هي عبارة عن قنبلة موقوتة ما اعرف بيا لحظة تنفجر بوجهي
: بكيفي باليعجبني مو انتي تعليمني
شلون اصيح باسمج
انتبهت على رجفة ايدها
رغم تصنعها للبرود لكن حركات جسمها تبين غيضها
مني
كتفت ايدها : اتفضل اسمعك
: سهوة اريدج تعرفين ان هاي سجى
رفعت ايدها تسكتني
: ثائر اذا جاي تحجي بموضع يخص سجى فهذا الشي
ما يهمني وما اريد اسمع عنة شي الي شفتة والي سمعتة منها خلاني اعرف كلشي
شفتها اتعدتني واتوجهت للباب تريد تطلع
سحبتها
: لج سهوة مو انتي الي تسكتيني فاهمة
اذا انتي ماتردين تسمعين موقفي من السالفة فهاي مشكلتج
انا حبيت افهمج الموقف لان شفت ان الج الحق تعرفين لكن بما ان انتي مقتنعة خلاص براحتج
انتي قررتي وحكمتي اذن كلامي ما راح يغير اي شي عندج
تركتها واتقدمت عالباب وردت اطلع
: سهوة تلبسين عباية راس ما تطلعين بجبة
تركتها وطلعت
...........................
لبست الجبة بالعناد.
وقررت اروح اليوم لبيت عمو قاسم وبعد ما ارجع
لو تنگلب الدنيا واعلى ما بخيله يركبة
اني ما تايهة لحضرتة جنابه
نزلت جوة وشفت البيت مخبوص خبص وكعدت ادور بعيوني عليها اريد اشوفها
سناء: سهوة تعاي سلمي عالنسوان يسألن عن مرت ثائر الثانية
رحت اتقدمت عليهن وسلمت
: ياماشاء الله حبيبة عين الباردة عليج والله ثاير
محظوظ
سناء: صلي على نبيج لا تحسديهم
اقتربت مني وسألتني بهمس : اكول سهوة ما كدرتي تعرفين هاي المكموعة مني
باوعتلها يمكن احلى شي بالموقف
ان تشوف الد اعدائك يصبح من انصارك
هذا الشعور جداً غريب: لا ما سألتة
: خايبة شمالج فاهية لا تظلين تبيعين ثكل براس ابن اخوي وتدورين كرامة هاي حركات الدلع الله وكيلج ما توكل خبز
صيري نجرة (قوية)
واخذي حگج (حق) بيدج ولاتخلين هاي تنصب عليج وتاخذة منج
ما اعرف يمكن كلامها بي نوع من الصحة
بس مرات كسرة المشاعرة صعبة تجتازيها وتنتقلين للمرحلة الي بعدها
اني هيج حالي بعدني مامستوعبة الصدمة حتى
انهض واكعد احلل واقاوم
بعدة الغضب عاميني
وثائر الي حتى محاول يلح علية حتى اسمعة گبل
انسحب من اول كلمة رفض مني
عبالك ممهتم لقهرتي
: اكول عمة هاي وين راحت
: حبسها ابوي الشيخ بالغرفة هي وابنها
على ما تخلص مشية الزلم ويهديء الوضع وبعدين نفتهم شنو السالفة
ابتسمت عليها شلون تهمس وتحرك بعيونها
عبالك بالاستخبارات خاف احد يسمع السر الكبير
رواء:عمة عدي يكول يالله امشونا الزلم والشيخ راحو على بيت عمي قاسم
كمت من مكاني وشمرت الشال على راسي
بأهمال ورحت وية البنات طلعت جان بيت عمو على بعد كيلومتر مشيت بين النسوان لان السيارات كلها
طابكة بباب بيت عمو قاسم
جنت منزلة راسي واباوع عالكاع وجانت سرى وفاطمة لازمات ايدين بعض ويضحكن
وحسن بدل وراح وية ثائر بطلب من ثائر
والنسوان كلهم لابسات عبي راس حسيت بروحي بارزة بينهم وصلنا قريب على
علهم واشوف مجموعة زلم وواكفين بباب الشارع
عرفت بعضهم لان شايفتهم اولاد عمامهم وربعهم
رفعت راسي واجتي عيني بعين ثائر الي من شاف منظري حسيت بعيونة اجتي تطلع من مكانها
وعض شفتة يتوعد
هزيت كتفي وما اهتميت ورفعت راسي ودخلت
لبيت عمو
وانخبص البيت بالهلال والهوسات
خوات عمة منتهى وبنفس الوقت يصيرن عمات عدي
يعني الاهل من الطرفين
اني رحت كبل على عذراء وسلمت عليها
وجانت طالعة جنها لعابة
والفرحة تنطق بعيونها وسلمت على نور الي
كانت وواكفة يم باب المطبخ يم ناصر وهو يهمس باذنها كان شكلهم مثل العصافير يارب يديمها عليهم
مرت ساعتين وعقد السيد لعدي وعذراء وانخبص الجو بالدك والهلاهل وبدو يوزعون العصاير
والكيك عالمعازيم واني فكري كلة بغير عالم
ونقالي من اول ما دخلت لبيت عمو لحد الان كل ساعة يدك وكان المتصل ثائر عفتة مجاوبتة
اني مقهورة واحس بالنار بعدها تجوي بگلبي
صحيح اني ما عندي قوة اردله الصاع صاعين لان اني مرية ولا اكدر اضربه واخذ حقي واشفي غليلي منه
بس على الاقل هذا الي اكدر عليه اخلي يتگلب بناره
كل ساع
شوية واجتي رواء : سهى ثائر يريدج بالباب يكول صيحي سهى بسرعة
: كليلة سهى ما تكدر تطلع جاي تلبس بعذراء بفساتينها
رواء: سهى عفية اني البسها بمكانج وانتي روحي
شوفي ثائر شنو يريد منج لان شكلة صاير نار كبرة
رفعت حاجبي نار كبرة على نفسه اني شكو
: ما اكدر اعوفها خطية هي طلبت مني هسة شدعوة عليه اخوج خل يصبر شوية روحي كليلة مفارغة تجي
رواء: يبوووو اني راح احاجي عمة سناء هي الي تروح تكلة اني ما علية والله يلعب بية طوبة
شفتها راحت لعمتها
عذراء: شنو سهى صاير شي بينج وبين ثائر
: ليش هو احنا شوكت اتصافينا حتى هسة
يصير شي بينا
ورة فترة دخل عدي والفرحة ما سايعتة
وكعد بصف عذراء وباسها من راسها
وعيونة بيهم حجي وصارو واحد يهمس للثاني

جنت اتمنى اعيش هيج اجواء وهذا الحب
اني جنت اسمع بالحب يكولون عليه حلو ويسعد صاحبه اذا دك باب گلبه
اشو اني من لفاني الحب
ما شفت منة بس اللوعة والحسرة
زين اني اعرف اليحب ما يأذي محبوبه اشو ثائر اتفنن بأذيتي واحتار منين يبدي بالطعنة
خلصت الحفلة وبدت الناس تخف
وعيالي رجعو لبيتهم ورواء وسرى وفاطمة
رجعو للبيت لكن اني كلتلهم راح ابقى هنا اساعد البنات همة خطية لوحدهم واقتنعو بالحجة
رجع نقالي يرن
حولتة صامت وفتت على المطبخ وكعدت
اعدل وياهم منا لحد ما صارت الساعة ١٢ بالليل حسيت على ظهري انكسر من الوكفة
اجاني عمو قاسم وگال
: بوية سهاوي رجلج بالباب اجة عليج
التفتت عليه
: عمو اكدر اطلب منك طلب وما تردني
: كولي يابعد عمج
: عمو خليني ابات عدكم اليوم
عكد حواجبه بستغراب: ليش بوية صاير شي بينج وبين رجلج
: اي عمو صاير
: شنو كولي يابعد عمج
: اليوم اجتي بنية هي وابنها وكالت وين ثائر
: اي شنو وين المشكلة
: عموهاي البنية عندها طفل وشكلها عندها علاقة بثائر
واني شفتهم بعيني واحد بحضن الثاني
بعد شنو انتظر يصير
كرامتي ونداست
: هذا هو بوية يجرالج بس هم لازم نكعد وية ثائر
ونشوف شيكول عن الموضوع مايصير يابعد عمج
نتهم الولد بدون ما نسمعة
: عمو براحتك بس اليوم خليني ابات هنا اريد ارتاح شوية
والله احس بالحركة بعدها بگلبي واخاف اروح واسوي بروحي شي
: براحتج بوية البيت بيتج
تركني وراح كمز گلبي من سمعت صياح ثائر
وبعدين صار عالي
وكمزت من سمعتة يصيح بأسمي
حطيت ايدي على اذاناتي ما اريد اسمع
نور: سهى ليش ما رجعتي وية زوجج هيج احسنلج اتعارك وية عمو والولد وطلع زعلان منهم
لان ما قبلو ترحين اليوم وياه
: نور ترة اني مطلبت شي بس يوم واحد ابتعد عنة اريد اجر نفس ما اريد اشوفة كدامي
عذراء : حقج عاذرتج الشي الصار بيج مو سهل
واني هم لو بمكانج وعدي يسوي هيج يمكن اموتة
بس انتي وثائر حبكم يختلف ووضعكم حساس
هسة عالاقل لو رايحة وياه ومفتهمة منة
: كم مرة اعيد واحجي واكول شفتهم بعيني
ميحتاج افتهم
التهيت بالافكار تجيبني وتوديني
اجيت ابدل ملابسي وصاحتني عذراء
سهاوي عفية تعالي وياي فد لحظة
: شنو وين اروح وياج
:هنا بالمزرعة عدي كال طلعي لي
جايب لج هدية
گتلة ما اكدر اخاف
: گلي جيبي بنت عمج سهى وتعاي بس انطيج الهدية ورجعي
باوعت للساعة شفتها بال ١ ونص
: بكل عقلج تحجين نطلع بهالليل شنو وين جان عن الهدية
: لا گلي الهدية ما تنفع اهديها الج كدام اهلج

: زين بالله شافنة واحد من اخوانج
: لا تخافين كلهم نايمين
: اهاا اوووف منج ومن سوالفج يعذراء
رجعت لبست الجبة ولبست شالي
ورحت طلعت وراها
طلعنا من باب البيت وعبرنا قريب عالبستان
: ولج عذراء خاف يطلعنا الكلب بسرعة اتصلي عليه شوفي وين صار
اتصلت على عدي : يالله عدي وين صرت
شوية واجتي بتجاهنا سيارة عالية كان ضوة اللايت عالي مالت السيارة وعمى عيوني شفت عدي فتح باب السيارة ونزل وتقدم بتجاهنا
حطيت ايدي على عيني حتى ابعد الضوة عني
ما حسيت الا على ايد حوطت خصري ورفعتني من الگاع وايد على حلكي
اني من الهبطة حسيت گلبي وكع بين رجلية وصرت ارافس
سمعت هسمة خشنة يم اذني
: ولج سهوة شورطج وية الوحش
ورجف جسمي كلة من عرفت صاحب هذا الصوت
عزة العزاني هذا ثائر
انفتح باب السيارة وندفعت جوة وانسد علية الباب
باوعت من الجامة شفت عذراء تعيط على عدي وتدفع بي تريد تهد عالسيارة
اذن هذا جان طعم الي وكعت بي
انتبهت على ثائر شغل السيارة وطلع
حسيت بخوف شنو معقولة ثائر راح يسوي بيا شي
: ثثائر عفية
زمخ بصوت عالي: اشششش ما اريد اسمع صوتج لا وحق الحق انزلج هنا وادفنج بارضج
بلعت صوتي وسكتت من الخوف
ركن السيارة يم البيت
ونزل وفتحلي الباب
يالله امشي فوتي كدامي
ظليت ارجف ورجلية جمدت
مد ايدة وسحبني من زندي وجرني وراه
: ثائر اترك ايدي اني مو عبد عندك وهيج تعاملني
: ولج انتي مو عبد انتي مرتي
وملكي وما اختاج الاذن حتى اجي اخذج
وحضرتج كاعدة تتعززين براسي بس شكلج نسيتي انا منو
دخلنا للصالة اتفاجئت شفت الكل كاعد وموجود
دفعني كدامهم
: شوف بوية اريدك هسة انت وهاي اليمك
جان يأشر على سجى
: تحجون كلشي يخص موضوعكم لهاي ام راس
اليابس
والتفت عليه وهمس بصوت مسموع بس الي
: وخلي يكون بعلومج انت بهاي طلعتج مالت اليوم خسرتي ثائر للابد ودفنتي بيدج وهو حي

...........................

معقولة الي سمعتة ان هاي مرت ابوهم بالسر وهي بكد بنتة
زين والمنظر الي شفتهم بي من جانت حاضنة ثائر
صعدت فوك ورة ثائر بعدما اكتفيت من كلامهم
....................
وكفت گبال باب الغرفة
سحبت نفس عنيق وفتحت الباب ودخلت
شفتة گاعد بالكاع وساند ظهرة عالسرير وحاط ايد على ركبته والايد الثانية يدخن بيها جيكارة
همست : ثائر اني صحيح سمعت كلام ابوك
ومرته بس هذا ما يكدر يمحي صورتك انت وياها
وانتو متحاضنين
هذا الشي بحد ذاته ما ينسكت عليه
ضحك بستهزاء: الله ياخذج سهى
لهالدرجة انا بعينج ناقص وعار
وتاليتها وياج اي مو سمطتي ابو ابوي
يعني بس انا الله بلاني بهيج حب اغبر
تدرين لو يرجع بية الزمن والتقي بيج
افكس عيوني ولا اخلي عيني
توكع عليج
واكسر رجلي ولا اخليهم يخطون خطوة وحدة لناحيتج
لان حبج بهذل احوالي
بس انتظري خلي ارضي فضولج هي خربانة خربانة ظلعت على هاي انتي احتاريتي شلون تطعنين عبالك طفلة تردين بس حجة حتى تزعلين راح احجي لج عن سجى ارضاءاً لفضولج
............
جان يحجي واني اسمع وگلبي وية كل كلمة ينعصر
ليش واني الي صار بية من وراك ليش شوية علية
الي مريت بي
...........................
: شوفي سهى
ظهور سجى بحياتنا بدة من فتحنا المحطة ببغداد

ومثل ما تعرفين احنا شباب وجان عندنا
اصدقاء يعزمونا انا وعدي على كعدات
وونسة
تكدرين تكولين جانت مثل طربة عرس وجنا شباب
ونزوة عابرة
اتذكر جنا كاعدين بشلة شباب بالملهى
وهي هناك شافتني واتعرفت عليها وكعدت تتودد لي
بس صارت تلح وياي
جنت ما انطيها نشدة
وما انطيتها مجال
ما انكر انا رجال واعزب وعندي طلباتي لكن هي الوحيدة الي قررت ابتعد عنها لان
جانت مبينة من عيونها
تريد مني اكثر من حضن
عرفت بيها تريد تتوغل بالعظم
وجان واضح من نظرات عيونها هدفها الزواج
واذا اقتضى بيها الامر ان تتبلى علية وتحبل مني وتركب السالفة براسي جنت جداً حذر منها
وبعد ما تعبت مني ومن صدي كامت تحاول بكل الطرق تريد توصل الي
صرت بالنسبة الهة تحدي وبدت تنتقم مني بأخوي عدي
وعرفت هدفها
وصار ابوي يجي على بغداد بحجة يراقب شغلنا
ويخاف علينا
ليش ما مرة من المرات
شفتها ساحبة عدي وراها تريد تاخذة لشقة
غريبة والمطي جان متونس ما يدري شنو
مضمومله
رحت لحكت على اخوي باخر لحضات جانت شقة متروسة عربدة وسكر ومخدرات
جانت تريد تورط عدي بالمخدرات
المهم كدرت اخلص اخوي من براثينها
بعد معانا وانطيتها المقسوم على ايد كم مرية اجرتهم لحتى يسولها كرصة اذن
ما ردت الوث ايدي بيها
ولا ردت يوصل الموضوع للشرطة
لان راح يوصل اسمنا لجدي
وساعتها راح ما اكدر ارفع راسي ومن عهدها بطلنا انا وعدي نعتب هيج اماكن
لكن ما لم يكن بالحسبان ان
سجى كدرت توصل وتجر رجل ابوي
وتورطه بحمل ما اعرف شلون
بس المثلها ما يصعب عليها امر لو تعرف تفوت برجليها بالنار تفوت بس كون تاخذ
الشي التريدة
هاي ما عدها شي تخسرة
: ثائر لا تلومني وتعتب على موقفي وياك
لان انت الي وصلتني لهاي المواصيل
جان بأستطاعتك تجنبنا هذا كلة وتحجيلي عن سجى من اول ما سألتك عنها بس انت فضلت السكوت
يمكن تشوفني شخص هامش مو مهم
ما استحق ان تبررلة موقفك
: سهى ترة هو مو فخر واكعد احجي بي

يعني ترديني اكلج ابوي انسان تعبان وتافه
وعندة سوالف غم
والله صعبة علية اكول عنه هذا ابوي
ومو هين علي اشوف يلعب ويخربط
انتي سامعة بحياتج ابن يروح ورة ابوه ويكعد
ينظف ووصخه ومشاكله
........................
بقيت جامدة بمكاني ما عرفت شنو احجي
اول مرة بحياتي اسمع بهيج شي
شفتة كام من مكانه
ووكف گدامي : مو انا الي تلوي ذراعي
مرة بس انتي سويتي المستحيل
ولويتي ذراعي بيج وخليتيني اعاند عمج واولاده
واخذج منهم بالغصب وهذا الشي مو شوية بحقهم
باوعت عليه نزع قميصه وبقى بس بالحينز
ونام عالسرير وحط ايدة على عيونه
صرت افرك بيدي
واتگلب بين الندم والحيرة
وبعدها رحت بدلت ملابسي وغسلت وجهي
بدون تفكير وعقلي مشدوه
استحيت اروح انام بصفه مالي عين احس هذا مو مكاني
اخذت بطانية ومخدة على كيف وفرشتهم بالكاع
ونمت وصرت اتكلب مثل السمجة
ما اعرف انام بعيد عن حضنه
شوية شوية بديت استسلم وانام
لكن شهكت على حركة مفاجئة وشفت نفسي
مرفوعة بالهوى ونشمرت عالسرير
وبدون ما ينطق حرف
سحبني لحضنه
:اياني وياج تفكرين تعزلين فراشج عن فراشي
ادفنج والله
ورة فترة حسيت بي نام
التفتت عليه واخذتة لحضني ودفنت راسي بصدره
وشميت صدره
وحوطتة من خصره وقربتة علية
حسيت براحة واني بحضنة
محسيت الا واني نايمة على ظهري
اقترب مني
: تاليها وياج يعني الواحد ما يعرف ينام
يعني لازم تخبليني بحركاتج
فتحت حلكي مصدمة من حركتة
ما انطاني مجال استوعب الموقف
خمط شفايفي بين شفايفه
واني مثل الي كنت ادور الملاذ بحضنه
واخذني وياه لمكانة الخاص الي ما بي بس اني وياه وانفاسنا تشهد عليه
.................................
كعدت الصبح ومديت ايدي اتلمس ادور دفو حضن ثائر بس التفتت ما لكيتة بالفراش
كمت من السرير ولفيت نفسي بالشرشف
واني ادور عليه مثل الطفلة الي تدور على ابوها
بس ما شفتة بس غير ملابسه الي نازعهم وحاطهم عالكرسي يشهدون على خروجه من الغرفة
سبحت وبدلت ونزلت جوة
ونصدمت من صارت بوجهي سجى
وصرنا نتبادل النظرات
لزمت محجر الدرج قوي ورجف جسمي
نظراتها خوفتني

يتبع