ثمار العار بالحلال الفصل الثاني عشر 12 - بقلم نهى

ثمار العار بالحلال
بقلم nuha-d-h

مساء الخير احبتي اعتذر جداً جداً عن تخلفي عن موعد تنزيل البارت لكن الظروف حالت بيني وبينكم
احبكم يا احلى قراء 🥀🥀🥀🥀🥀

((اشتد خوف الحب بأوصالي
وخابت بسببهم كل آمالي
هددوني تحت سياط السنتهم فقلت لهم لا ابالي
لكنهم عزموا النية بدفعي عنك بأذلالي
اجبروني بالابتعاد عنك ايها الحبيب الغالي
فعذراً سوف اخرج من حياتك وها أنا اشد الرحالي 🥀🥀🥀🥀

كنت خايفة
من كلام عدي اخو ثائر والله لحد الان يرن بأذني
بيوم الحادث من وصلني ثائر لبيت سارة
وفاتحني بموضوع الخطوبة
بوقتها طرت من الفرحة
لكن الفرحة ما تمت بعد اسبوع عرفت سر عموض سارة صديقتي وترددها وتهربها بالاجابة من اسألتي
انصدمت من گالت سارة
عدي اخو ثائر يريد يحجي وياج بموضوع
وفعلاً اجة عدي اخو ثائر للكلية وية عساف
بيومها اجيت اموت من الخوف والترقب
كومة اسئلة كانت تجول بخاطري
:شنو يريد مني عدي
سارة: الي عرفتة موضوع يخص ثائر يريدج تعرفينة
وبعد لقائي مع عدي
طبعاً كان نسخة مصغرة من ثائر
لكن هذا الطف من ثائر
...........
عدي - انتي سهى
سهى بارتباك-اي نعم
: طبعاً انة اجيت اليوم لحتى اشوفج واحجي وياج
عن موضوع يخص ثائر
: تفضل اخي اسمعك شبي ثائر
:اتمنى الي راح اگولة الج ميوصل لثائر
: اني متربطني اي علاقة مع ثائر او اي تواصل
لحتى احجيلة فاطمأن من هاي الناحية
عدي بأرتباك : انا اسف عن كل الي راح اگولة بس
ثقي بالله انا عبداً مأمور مابيدي شي غير اوصلج رسالة ابوي هو الي دزني عليج
لان ثائر يريد يرتبط بيج بدون رضى اهلي
وراح يترك اهلة وديرتة حتى يتزوجج
وجدي شيخ معروف بالسلف
والناس كلها تهابة وسمعتنا عندة بكنوز الدنيا ما يفرط بيها
وجدي الشيخ مزاحم عرف بسالفتج كلها
واعترض على الزواج هو وابوي وعمامي
رفضو زواجة منج بس ثائر عاندهم وترك البيت وهج
بعدما صارت المشاكل بينة وبين اهلة

سهى
وية كل كلمة تطلع من عدي
احس مثل السهم نابت بروحي
ما استغرب اعتراضهم اصلا هذا الشي جنت متوقعتة
سهى بغصة : خلاص هذا هو لتكمل وصلت الرسالة
وافتهمت قصدك تريد مني ابتعد عن طريق اخوك
حتى هو يرجع لا هلة

:والله ما اعرف شنو اگول
بس كل الي اكدر اگولة ابوي صعب
وكلشي اتوقع منة
وما يتردد ثانية وحدة احتى يأذيج ويبعدج عن حياة ثائر بكل سهولة
مثلما كدر يطلع زوجتة الاولى من حيات ثائر
بدون ميحس على اي شي
سواه ابوي من وراه

والله لو اكول
اتمنيت الموت بلحظتها
ولا هذا الموقف حسيت بوكتها بالذل والعار
والله كانت لحظة ما اتمناهة لعدوي
قبل جنت اعاني من يجي واحد يخطبني وبعدين من يعرف بسالفتي يشرد رفضهم من بعيد
كان هواي ارحم من الرفض بصورة مباشرة وبهاي الطريقة صعبة يجي واحد ويكلج انتي متشرفينا تصيرين زوجة ابنا

جاوبتة ورجفة صوتي خذلتني
- عدي روح طمن ابوك وگلة
مو اني الي ابني سعادتي
على حساب سعادة غيري
ميحتاج يهددني
راح ابتعد عن ابنكم بس خلي ابوك يكف شرة عني

كلام عدي و تهديد ابو ثائر ادخل الرعب لگلبي
لان اعرف بيهم ناس فوق القانون وكلشي عندهم مباح
نزلت دموعي غصب عني ودرت وجهي
ورحت اركض حتى ابتعد عنهم لهنا وكافي مذلة
حسيت على صوت سارة تمشي وراي ساكتة
اي طبعاً تسكت شتحجي الموقف كلة ميساعد على الكلام والله كوة كدرت اطلع كم كلمة حتى ارد على عدي
عيوني غوشت من الدموع كنت امد ايدي
والتقط كل دمعة تنزل من عيوني وكأني التقط ثمار العار الي. دتساقط من شجرة روحي
عار يلحگني وين ما اروح
اي يسهى اجني ثمرة عارج
وذوقي مرارة طعمها وشوفيها شلون مرة
مثل العلقم هذا حالي وية فراق ثائر

(((((((((((()))))))))))

اتخذت القرار
كان لازم واحد بينا يضحي
اني احب ثائر واموت على تراب رجليه
مثل ما هو راح يضحي باهلة وناسه علمودي
اني راح اضحي بروحي لأجله
وابتعد عن حياتهم الغامضة اني مو بگدهم
وموقفي حرج

اذا ابوه كدر يبعد زوجة ابنة وحفيدتة عن حياة ابنة
بدون ما يرفلة جفن
لعد الله العالم شنو يسوي بية اذا اتجرأت وعاندت
بعد الكلام الي سمعتة من عدي عن تهديد ابوه
خفت احجي لثائر لان اعرف كلش زين اذا فتحت حلكي بكلمة
راح افتح على روحي ابواب جهنم

بعدها اتفقت وية عساف وسارة ان يكتمون السر
بعد معارضة من عساف لموقفي
عساف -لج ليش تسوين هيج لتخلين تهديد ابوه يخوفج
ترة ثائر يگدر يحميج منة
سهى-زين وين جان ثائر عن مرتة وبنتة من ابوه
ازاحهم عن طريقة
وانت كلتها بنفسك ثائر الى الان حاقد على مرتة وطلگها وهو يعتقد ان هي السبب بخذلانة
سارة -عساف كلام سهى صحيح ترة مثلما گلت همة ناس ما عندهم شي يردعهم
وكلشي اتوقع يطلع منهم وانت تعرف كلش زين شنو حياة سهى وهي مناقصة مصايب وبلاوي
شلون ما اشوفها احس ان من مصلحتها تبتعد عن
حياة ثائر
................
قويت قلبي ومشيت لعند ثائر وعساف
وكانت سارة تمشي وراي
وصلت لعند البوابة الرئسية للجامعة
كان ثائر وعساف واكفين هناك
ورفعت ايدي وسويت نفسي دا اعدل شالي
كنت بيومها طلبت حلقة تمارة زوجة اخوي
حتى البسها واعلن امامه خطوبتي الوهمية من شخص اخر
حتى يتركني ويبتعد
مجبورة اسوي هيج اعرف
حظي عاثر ومراح اتهنة وية ثائر
راح يظل تهديدهم ولعنتهم تلحگنا وين منروح

............................
من قررت اروح واتظاهر بالخطوبة
مجنت مسوية حساب لردة فعل ثائر بأتجاه الموضوع
كان همي اخلص نفسي من تهديد ابوه
بس من سمع ثائر بالخبر وشاف الحلقة
وهو جن جنونه
وتحول من شخص متحضر الى وحش ثائر
سحبني من زندي وجرني وراه قوي
وطلعني من الكلية صار الموقف امام الطلبة وسارة وعساف يركضون ورانة يردونة
بس يتركني بس هو ماكو ابد مو يمة
كان فاصل من الغضب
اني بوقتها جسمي بس يرجف من الخوف
والله متت من الخوف ياربي هاي وين جانتلي حب الاكشر علية

شفتة فتح باب السيارة وشمرني لداخلها
و سارة فتحت الباب الورة وصعدت بدون متسألة كانت خايفة علية وعساف نفس الحالة فتح باب السيارة وصعد شغل السيارة وشخطها وطلع مثل النار
عساف-ثائر شبيك اتخبلت انتظر لحظة شيوية بس فهمنا شتريد تسوي
ثائر وبصوت حاد
-مراح اسوي شي راح اخذها واعقد عليها عند السيد
واكسر راسهة وراس الخلفوها
مو ثائر ابن مزاحم الي يلنعب وياه
اريد اشوف منو الي تتجراء وتكسر كلمتي
ماعاش و لاجابتة امة
والله لطلع جناني عليج واخليج عبرة لمن لايعتبر

عساف-ثائر العن الشيطان شنو اتخبلت اتگلك البنية انخطبت وعاقدين عليها
شبيك انت ماعندك عقل
كانت اخر كلمة نطقها عساف
مثل الي وجه ضربة على وجه ثائر
محسينا الا ثائر لزم بريك قوي
لدرجة اني انضربت بالجامة الامامية
بس من الخوفة
محسيت بالالم بگد ما خايفة منة
التفت علية وسألني بصوت هامس مخيف
ثائر- جاوبيني صحيح كلام عساف
صدك عاقدين عليج ؟؟؟
هزيت راسي بنعم
.......................................

ومكدرت انطق اي كلمة
ثائر وبكل غضب الدنيا
-عساف وسارة اترجاكم تنزلون من السيارة
عساف بخوف
-بس گلي شراح تسوي
سارة - عفية ثائر لتتهور ترة البنية ماناقصة مشاكل والي بيها كافيها
ثائر وبصوت عالي
-لك عساف اخر مرة اكلك انزل من السيارة واخذ سارة وياك
شفت عساف ارتبك وكأنه يعرف بصاحبة واطباگاته
نزل من السيارة ونزل سارة الي ظلت تسحب بيدها ظلت تقاوم وتصيح على ثائر
وعساف وكوة جرها ونزلها

لكن ثائر ابدد لا اهتز لصياح وغلط سارة عليه
گبل شغل السيارة وطلع
ما اعرف وين بس انتبهت
اخذني على مكان بي شقق سكنية
خفت لا يسوي بية شي
يعني يمكن لو يذبحني ويدفني محد راح يشوفة
ظليت ابلعم من الخوف
نزل من السيارة وسحلني من السيارة
واخذني دفع
اني احس برجلية من الثقل صاور رصاص
كوة امشي وياه
سهى بخوف -ثائر احلفك بغاليك عوفني اروح

وجهي شحب لونة وجسمي ظل كلة ينكت
من خوفي منتبهت اني وين بس سمعت صوت
الباب انفتح واندفعت لداخل شقة
بلحظتها كل خوف العالم اجتمع بگلبي
واتهسترت ظليت اعيط
-ثائر هسة تفتح الباب وتخليني اطلع
لا والله الم عليك العالم
لك انت شنو مخبل ما عندك مخافة الله
بيمن تطلبوني انت واهلك شتريدون مني

والتفت علية بكل غضب
ضربني راشدي على خدي حسيت فر راسي فر
-لج لا انتي ولا عشرة منج الي تلعب علية
لزمني وجرني من شالي
وقرب راسة من راسي
لج مو انتي التكسريني
تعرفين انة شسويت علمودج
ولج اتعاديت وية هلي وعمامي وطلعت عن شورهم
واتحديت الكل بيج وتركتهم وراي واجيتج
حتى تصيرين حلالي
هزني حيل بحيث احس باسناني اسطكت
- شلون تخليني اروح وادوروجهي عنج
وتطعنيني بظهري
حسيت بي انگلب شكلة وصار مثل الوحش
مكدرت اجاوبة اي كلمة حتى اخلي يهدء لان اعرف
اي حجاية راح تطلع مني راح تثير جنونة
صااح بصوت عالي
-لج سهىىىىىىىى ليش هيج سويتي
لج ادري بيج تحبيني
نظرات عيونج تحجي غير شكل هذا الي بعيونج شنو احجي گولي
الله ياخذج لج انتي بلاء
انتي مرض الله بلاني بي
انتي شيطان
العن اليوم الي عرفتج بي
طبعاً هو يحجي ويدفع بية
واني ارجع للخلف
عزززة بعيني مجنت متخيلة ردة فعل ثائر تكون لهدرجة مخيفة كان كل اعتقادي ان بس راح يعرف
بخبر خطوبتي من واحد غيرة راح يزعل ويتركني
بحال سبيلي
بس الي كاعد اشوفة امامي
شي ما ينسكت عليه ولا يستهان بي
اي اني استهانيت بردة فعل ثائر واكتشفت
ان عقاب الابن وابوه صارو بنفس ميزان الخوف عندي واني استهانيت
حسيت بروحي مثل العصفور الي وقع بالفخ وحاير شلون يخلص نفسة
صرت بين نارين
وما اعرف منو اختار نار ثائر لو نار ابوه
الثنين راح يحطمون حياتي وراح اروح بالرجلين
بس اني هسة خلي اخلص نفسي من نار ثائر
سهى بخوف
: ثائر لحظة بس خليني افهمك ترة اني هذا الي سوية
كلة علمود اهلك همة الي

وقطع كلامي

: لج عن يا اهل تحجين
ولج انتي خذلتيني گدام اهلي وطعنتيني وثبتي
كلامهم كلة كان صحيح
لج انتي رخيصة واني كبرتج بيدي عليتج عليّ

كانت كل كلمة تطلع من ثائر احس بخنجر
ينغرز بگلبي : رحمة الله والديك بين معدنك من اول
مشكلة

: لج عار هم الج عين وتحجين
جا بسيطة انا الج
راح اعلمج درس خليه يصيرلج عبرة

شفتة هجم علية وسحب شالي بكل قوة
شهگت بخوف
سهى بصرخة-لالا ااا ثائر اوكف خلي افهمك
ترة اني ممخطوبة ااابووو
ومحسيت الا ثائر طفر علية
ثائر بصوت عالي يرعد رعد
-لج سكتي عاااااار شنو تلعبين علية
اليوم الا اعلمج الله حق
واخليج طول عمرج تمشين وتتلفتين من الخوف
ولج انتي ويامن اندگيتي
ولج انا ثائر ولحمي مر
وجرني وقربني عليه
شگ قميصي وشفت الدكم اتناثرت
وهجم علية
وجر شفايفي بشفايفة وعضهن
اني من الخوف صرت
اضرب بي وادفع اتخيلت نفسي راح اتعرض للمرة الثانية بحياتي للانتهاك ربي دخيلك
حسيت صارت انفاسنة ساخنة
صرت ارجف جوة ايدة مثل الطير المذبوح
خرمشت وجهة باظافري حتى يبتعد عني وظليت اعيط
قيد ادية بين اديه وعضني حيل من رگبتي ولثم شفتي
صرت عبالك جاي انازع وية الروح
- لك لااااااا ثاااااااائر ابتعد عني الله لا يوفقكم انت وابوك دمرتو حياتي
ما اهتم لكلامي
ونزلت انفاسه الحارة على رگبتي
وايدة تعبث بجسمي

بلحظتها حسيت بروحي ضايعة مثل الي تاهت بعالم مجهول ما اعرف شنو نهاية استسلمت وخلصت قوتي وسلمت امري لله
نزلت دموع الانكسار على خدي
وحسيت بثائر فجاءة اتوقف وبعد ايديه عني
شفتة گام وابتعد مني رجع شعرة للخلف
وحجة بصوت خشن
- گومي من گدامي ما اريد اشوف وجهج
ورحت نزلت بسرعة مثل المخبلة من السرير وكعدت الم بشالي وقميصي
البس بيهم وايدية ترجف
وعيوني عليه خاف يرجع علية ويكمل الي ما انتهى
ممصدگة اخلى سبيلي
والله احس انكتبلي عمر جديد
شفتة گاعد على السرير وايدة على راسه
باوعلي ابجي واشهك والخوف ماخذ كل قوتي
نهض من مكانه وشافني رجعت خايفة للخلف وزادت
دموعي وارتفع صوت النحيب
- لتخافين مراح الوث ايدي بوحدة خاينة تافهة مثلج متستاهلين الواحد يرتكب جريمة علمودج لان انتي نكرة
انتي صرتي بالنسبة الي لاشيء
فاااااهمة لاشي ء
كمزت من شفتة كسر مرايا الميز بيدة
خفت من غضبه وظليت بس اتشاهد
- خلي هذا درس الج حتى مرة ثانية
تفكرين الف مرة قبل لا تعلبين وية اي رجال

منطقت ولا حرف بس قبل لا يطلع من الغرفة شفت بعيونة الم وانكسار
-ثائر لحظة اريد اكلك اخر كلمة ترة اني انظلمت وكنت مجبورة غصب عني گلت مخطوبة لان اهلك
هددوني
ثائر وهو يحس النار بعدها بگلبة ماطفت
رجع علية بكل غضب
- يسهوة لا تستفزيني كااااافي ترة كوة لازم روحي عنج وما اذذيج لتخليني اسمع صوتج فاهمة
اهلي مو يمج وين شفتيهم
لج انتي صدك عار
ادعي من الله كون دروبنا ما تلتقي
لان اذا هاي المرة رحمتج المرة الجاية راح اخليج تتمنين الموت وماتحصلينة
بعدها تركني وراح
وكان هذا اليوم اسود واسوء يوم بحياتي
تعرفون شنو معنى واحد يوقع على ورقة موتة بيدة
اي هاي اني وقعت على موتي
ودفنت نفسي بالحياة

((((((((((()))))))))))
ثائر
طلعت من الشقة وكل غضب الدنيا بعيني
ما جنت متخيل ان اخذها بين ايدية بهاي الطريقة
وااذيها
اااااخ الله
اتمنيتها رجال جان مصلت رگبة بدون ما يرفلي جفن
خرب بهيج قسمة الي خلتج بطريقي يسهوة
ربي ليش هي من دونهن اتعلك گلبي بيها
اي مو جنت كافي خيري شري
وعايش وبالي متهني
رحت واتصلت على عساف حتى يجي هو وسارة ياخذوها من شقتي
ما اريد عدي يرجع ويلگاهة هناك
ظليت افتر بالسيارة مثل الهايم على وجهي
واجاني اتصال
-وين هو بيا مكان
هذا هو تٌـٌـمــام انا راح اروح عليه
والله يادنيا شغليني بالمصايب اريد التهي
رحت للمكان الي وصفوه الي
كان عدي اخوي يروح على ملهى ليلي مشبوه
واحنا معروفين ونخاف من التايهة وكافي الي صار
لحد الان خلي نلحك على الباقي
رحت شفت اخوي عدي هناك كاعد
ويشرب
ضحكت بأستهزاء قبل يومين انا
لزمتة وجنزتة وعاقبتة لان وصل خبر لجدي
ان عدي يشرب ومستگعدلة وحدة بشقة
بالمنصور
مو هنا المصيبة
المصيبة الجبيرة ان هاي حامل من عندة واجت لبيت جدي هناك وصارت دخيلة عند جدي لان عدي
مهددها استغفر الله بس
والله عدي يفتهم مونس نفسة وعايش حياتة
بقانون عيش اليوم والباجر
الله كريم يعني طاك الدنيا بعرض الحايط
اتمنيت اكون مثلة لا ابالي اسرب واتونس وية البنات
حتى انسى بس هذا مو ثوبي
عدي يكوم من مكانة مفزوع
:هاي شجابك هنا
ثائر- اجيت حتى اشوف اخر مصايبك بس تدري شنو
اكتشفت انت الصحيح وانا الغلط
عدي گلبي كسرني على ثائر بس الي صار لمصلحتة
عدي : خوية شنو شبيك حالك ما عاجبني
امشينا خل نطلع من هذا المكان لان الجو هنا مو مال
سوالف
ثائر وهو يباوع داير مدايرة
-ليش خلينا هنا بالعكس حلو عوفني اريد انسى
كسرة گلبي
عدي-خوية گلي شيوجعك

التفت على عدي وهو يأشر على گلبه
-خوية هذا هذا ملجوم من حبها انطيتها
گلب عاشگ وانطتني هجر وخيانة

عدي :عفو عليك يالوحش موش انت التهزك مرة
وتخليك تطلع عن طورك

بس رغم كلام عدي كلة
بس حرگة گلبي بعدها تشب نار بصدري
لان ما دام حبها جوة بگلبي راح تظل هاي النار
متنطفي
ضرب بقبضة ايدة على صدره
ااااااااااااااااخ الله اريدها مو كادر ابعدها عن بالي
نهضت من الميز واخذت سويج السيارة ونقالي
وكام عدي وراي
انتبهت على النقال
لكيتة داك عشر مكالمات علي وستة الحجي ابوي
وحدة جدي الشيخ مزاحم
اتفاجئت بجدي متصل
خفت لاصاير بيهم شي لان انا متعارك وية الشيخ مزاحم واعرفة كلش زين
راسة يابس ومو بسهولة يتنازل ويطخ راس
بس مع الاسف انا خذلتهم
وكلامهم طلع كلة صح وانا الغلط
اتصلت على رقم جدي
واجيت اتخبل من سمعت بخبر وفاة امي
حسيت الدنيا افترت بية
لااااااااااااا يالله الاااااااا الوالدة
((((((((((((((()))))))))))))))

سهى
بعدما اتصل ثائر على عساف اجة هو وسارة واخذوني
واني بوضع لا احسد عليه منظري كان مبين اكو شي صار بيني وبين ثائر لكن عساف فضل ان يتغاضاه
وسارة الي نزلت علية بالاسئلة
-لج احجي خو مسوالج شي هالنذل والله اشتكي عليه بالمركز واخليهم يسحلونة
عساف-سارة كافي مو وكتة هذا الحجي بعدين احجي مداتشوفين وضعها رحمي بحالها وسكتي
اني هزيت راسي بضعف ووافقت كلام عساف
فعلاً ما عندي طاقة احجي اي حرف
سارة بسؤال -اذاج ؟؟؟؟؟
هزيت راسي ب لا
ودموعي تنزل
رجعت للبيت واني اداري بجروحي
وخايفة احد يشوف منظري المخيف
ويكعد يسألني
ما اعرف منو الاشد الم جرح گلبي لو ردة فعل ثائر
حمدت الله وشكرتة الف مرة ان الوقت ظهر
والي بالبيت كلهم نايمين وكان حسن نايم عد امي
صعدت فوك على اطراف اصابيعي
وحاطة ايدي على حلگي خاف احد يسمع شهگاتي
دخلت وسديت الباب واتكأت عليه
ونزلت گعدت بالگاع ورجعت راسي للخلف
احس بروحي جاي تنازع من الالم
حطيت ايدي على حلكي وصحت بصوت متكوم
ااااااااااااااااااه ليش ليش ربي اني شنو سويت حتى استاهل الي يصير وياي
((((((((())))))))))

الى هنا يا احبتي يصل نهاية الجزء الاول من ثمار العار بالحلال
ولحكايتي بقية فأنتظروني ارويها لكم
في الجزء الثاني مع بطلتي سهى وثائر
سوف بداء كلا البطلين مشوار جديد من حياتهم
هل يا ترى ستلتقي دروبهم ام للقدر رأيٌ اخر
وشكراً
مع تحيات كاتبكم المخلصة nuha-d-h
يتبع