ثمار العار بالحلال الفصل الحادي عشر 11 - بقلم نهى

ثمار العار بالحلال
للكاتبة nuha-d-h

مسااااااااء الخير والسرور على احبتي 🥀🥀🥀🥀🥀🥀🥀🥀🥀

سهى
استغفر الله
بالله هسة وين حطيت السجل
راح يجي الخط واني بعدني
اللهم انعلك يالشيطان
دنكت جوة السرير وشفتة واكع ليجوة
واخيراً لكيتة
خلي الحك احضر نفسي للدوام
فتحت الكنتور وشفت الجبة الاسلامية معلگة
ضربت بيدي على جبهتي اهووو شلون نسيت لازم ارجعها لثائر اشكد عيب
اخذها واخلي سارة تنطيها لعساف يوصلها لثائر
طبعاً مر شهر على اصابة ثائر
جنت كل يوم اسأل ساره عنه واطمن عليه
كان دائما يرسل لي سلام بيد عساف ويكلة
خلهة تحجي وياي
اريد اسمع صوتها
بس اني ارفض لان كلشي الة حدود

والله لوما ذاك اليوم كنت خايفة عليه
فلا احجي وياه بالنقال
لكن كان تصرفي بلحظة ضعف مني
بس الحمدلله هو شارف على الشفاء
ابتسمت ابتسامة امل
ولحد هذا يومي اتذكر كلامه كلما انام بالليل
كان اعترافة بحبه الي مفاجئة
والله لو ما استحي
اسجل كل كلمة سمعتها
ياربي بوكتها حالي انگلب وذبت دخت بكلامه وبنبرة صوته الخشنة
وكلماتة الجريئة الي داعبت مسامعي
عبالك كان ينطق بتعويذة تنسج حبالهة على گلبي وعقلي كان مفعول كلماته اثر السحر على نفسي
وبلحظتها
وقعت على تنازل بگلبي ومشاعري
كلها لثائر وسويتلة وكالة عامة بجميع مشاعري
الة الحرية المطلقة بالتصرف والعبث بأحاسيسي
وانا اعلن من الان اصبحت مجنونة الثائر
(((((((((()))))))))))
صحيت من حالة السرحان
تمارة مدت النقال : سهاوي هاج اخذي هاي سارة اتصلت عليج
-هلة سارونة
-اهووو ليش مراح تداومين شلون يعني اليوم تركيني لوحدي ااااوف منج
يالله مع السلامة هاي وحدة وياج
دامت من ورة خشمي
وگوة خلصت يومي كان الوقت يمشي جداً بطيء
منى -شبيج حٍٍِْــًبٌٍـــِٓېٍٓ احس بيج تعبانة بالج مشدوه
انتبهت عليج ع طول ما الدكتورة تلقي المحاضرة وانتي بالج مو يمها سرحانة
ليكون بعدج تفكرين بكلام صاحبنا الثائر
: لج اجذب عليج اذا اگول مدافكر بي
لج راح اموت من التفكير اخاف هذا كلة يطلع
بس حجي وكلام معسول
خايفة من ردة فعلة شنو راح تكون اذا عرف بسالفتي وابني

جنت امشي اني ومنى اريد اطلع اروح للسايق
واجاني طالب من قسم الهندسة
جنت منتبهة عليه صارلة يومين بقسمنا
- سهى ممكن لحظة من وقتج
-نعم اتفضل
وباوعت على منى
-اريدج بموضوع خاص بيني وبينج
-عادي اتفضل احجي ترة منى صديقتي واني مراح اكدر اكعد احجي وياك لوحدنا اسفة
-اعرف طبعج من سألت عنج حمدو باخلاقج
بس ردت اتقدملج واطلبج من اهلج لان كلش
انعجبت بيج وبأخلاقج
سهى بارتباك وتوتر
بس كالعادة اتعودت ارفض اي طالب يتقدم الي من الكلية لان شي اكيد من يسأل عني راح يبطل
وميتقدم وراح الكل بالكلية
يعرف بموضوعي لذلك كمت دائما ارفضهم
-اسفة اخي بس اني ممفكرة حالياً بالزواج
اعتذر منك
انطيتة رفضي بصورة مباشرة بدون لف ودوران
لكن لمحت شخص واقف عنة بمسافة ليست بالبعيدة يعني يكدر يسمع كلامنا
هذا ثاااااائر !!!!!گلبي كمز من مكانة
سويت نفسي مشفتة
شوكت اجة اشو منتبهت عليه
حسيت بي صاير بركان ثائر ويفور
بسرعة استأذنت من الولد وسحبت منى ورحت امشي بسرعة
التفتت شفت السايق مالتي منتظرني
الف الحمدلله
ما اريد انتظر و اتواجه وياه ولا اريد احجي وياه اعرف بنفسي
اذا يحجي وياي راح اضعف واخاف اخبص بالكلام
واتصرف تصرف بعيد عن التزامي ومبدأي
بس يمة والله مشتاقتلة ومشتاقة لطولة الحلو يابعد كل هلي وناسي حنيت لنظراتة
عزززة بس شكلة والله عصبي
سلمت على منى وصعدت بالسيارة لوحدي لان سارة ماكو اليوم
انتبهت على سيارة ثائر عبرت من يمي وصارت عيون ثائر بعيوني بلحضتها حسيت مثل المنومة مغناطيسياً ظليت بس ابادلة النظرات كانت عيونة تجدح نار
طبعاً مرات اسمع عبارة
بنظرة وحدة يوگع عشرة
طبعاً هذا الحجي ينطبق على نظرات ثائر
خزرني وشخط السيارة وراح
اريد اعرف هذا الشخص من شفتة وشافني
معصب وغضبان. جنة سنفور غضبان
ادري شوكت يفردها

بس اتوقع ظايج لان معبرتة ومحجيت وياه
اي بس ليتوقع مني
لان اتصلت عليه بذاك اليوم
معناهة توكع الميانة واخذة بالاحضان واكعد ادك سوالف وياه
مستحيل يحلم هي مرة وحدة صارت وكانت لحظة ضعف وخاني التصرف بعد ما اعيدها لان تصير ماصخة وافقد احترامي لنفسي

كان الطريق ازدحام
فجأءة كمزت على ابريك السيارة المفاجيء
بحيث گلبي اجة يوكف من الهبطة
وشفت السايق مالتي ظل يغلط ويسب ونزل من السيارة
انتبهت عليه گعد يتعارك وية صاحب السيارة الثاني الي دعمة وصارت هوسة والناس التمت عليهم
واني جسمي صار كلة يرجف
من ورة الهبطة
يبوووي شفت السايق مالتي ضرب الولد ابو السيارة واني هنا قطرة دم مابية اني كلش اخاف من عركة الزلم وهوستها وصياحهم نزلت من السيارة ونيتي اصيح عليه بلكت يهدء لان الظاهر شكلة
نسى ان وياه بنية ولازم يوصلها لاهلها
بس جاي اتقدم وماحسيت الا على ايد لزمتني من زندي
التفتت انصدمت بثائر
سحبني قوي طلعني من بين الهوسة والصياح
واسمعة يسب ويلعن بغضب
فتحلي باب سيارتة گدام ودفعني لداخلهة
وسد الباب وهو صاير نار كبرة
ودار ركب سيارتة وحسيت بي گوة لازم نفسة
شغل السيارة ومشة
يمة اني فجاءة انتبهت على وضعي وياه
عزة العزاني هذا شنو جاي يسوي
-شنو شنو وين ماخذني بالله شو وكف السيارة هنا ونزلني بسرعة
التفت علية وعيونة حمر من الغضب
ووكف السيارة فجاءة والله اجيت اطلع من الجامة الامامية
حجة وياي بصوت عالي
- ولج انتي شنو من بشر
شوكت ما اجيج الگاج مسوية مصيبة بكبر راسج
اريد اعرف شنو سالفتج

سهى برتباك- اني شلي دخل هو السايق دعم واتعارك
عفية نزلني والله راح تعم علية
ترة ميصير تجرني
وتصعدني بسيارتك كدام الناس شنو وين گاعدين
اشوفك هواي اتعديت حدودك وياي

كور قبضة ايدة وبانت عروگه
- شنو خايفة على سمعتج
لا احد يشوفج راكبة وياي بالسيارة
يعني حضرتج مستصعبة گعدتج وياي
ااااااخ الله
زين اريد اعرف هذا خوفج وين جان من
جنتي واكفة لوحدج بنص الرياجيل والعركة گابة للستار
اشر على راسهة
- وين جان عقلج من نزلتي وتوجهتي على السايق
لاتگولين تردين انتي تفكينهم
عمي حقهم اخوتج من يتشددون عليج
اثاري طلعتي زعطوطة وغير مسؤلة
-شنو قصدك بهذا الكلام ترة ما اسمحلك تتجاوز
عظ ايدة بغضب
- اااااخ بوية كون بالعگال على راسج
ولج على ياتجاوز تحجين
حمدي ربج اني جنت موجود هناك جان هسة انتي لايحج بوكسي ومكسر سنونج من ورة العركة
هلج ما علموج بعركة الزلم
المرة تتكتر على صفحة ومتتدخل
لو بس فالحة وياي
لتحجي وياي لان اهلي ميقبلون احجي وية اي واحد
يحجي ويقلد صوتها
اباوع عليه يهز بيدة
شفتة شغل السيارة

وكمل طريقة شلون ياربي هذا شحجي وياه ابو راس اليابس شلون اقنعة ينزلني
طبعاً شي اكيد مراح يقبل انزل الا يوصلني ويطمأن علية صرت اعرف طبعه اخير شي استسلمت
-ثائر وديني لبيت صديقتي سارة ما اكدر اخليك توصلني لبيت اهلي والله اخوتي يذبحوني اذا شافوني وياك راكبة بالسيارة
التفتت عليها

ثائر
طبعاً اتخذت قرار ان ابتعد عن طريقها واخليها
تعيش حياتها لكن بعد صراع ومعانات ما كدرت
شفت نفسي مشغل سيارتي وجاي لبغداد لعندها ضعفت
صار امري مو بيدي وتصرفاتي بيد گلبي

جريت نفس والتفتت اباوعلهة وگوة لازم نفسي عنها
انتبت عليها وعلى تنفسها السريع
كبل رفعت الجامة وغلقتها حتى ميطلع هذا النفس خارج سيارتي
احس لازم حتى النفس يكون الي لوحدي فقط

سرعة تنفسها لفت انتباهي لصدرها وكان يرتفع وينزل
برجفة
شد ايدة على استيرن ((المقود ))
ما يريد يضعف امامها ويتهور ويتصرف تصرف يخوفها منة
احمد الله واشكرة
محد يكدر يطلع ويشوف الي بالگلب
لان لو تشوف شلون جاي اتخيلها بحضني
واهدىء انفاسهة وامتص خوفها من شفايفها
جان هسة شمرت نفسها من السيارة وبعد متباوع بخلقتي
ضربت المقود بقبضة ايدي بعصبية
حسيت عليها شهگت من الخوف
ههههه اثاري حتى هي جاي تعاني ومتوترة من قربي منها
مو بس انة جاي اعاني لوحدي
سهى بخوف على تردد همست
-دير بالك لتعصب ترة جرحك بعدة ما شفة

نطقت مجرد كلمات خرجت من بين شفايفهة الناعمة كدرت تمتص غضبي
وتبرد النار الي بگلبي
-خايفة علية يسهوة ثائر
سكتت مكدرت احجي شي ما اعرف ليش من اكون مع هذا الشخص يطير الكلام كلة واصير خرسة

ثائر وهو يجلي حنجرتة
-شوفي سهى اليوم اجيت للكلية حتى اشوفج واحجي وياج بموضوع كلش مهم بس حضرتج مثل كل مرة تهربين من تشوفيني
شوفي يبنت الناس انة ما احب اللف والدوران
انة رايدج على سنة الله ورسولة
اريدج تصيرين حلالي
سهى
حسيت گلبي يريد يطلع وية كل كلمة يحجيها
انخبصت ومعرفت شنو شجاوب والله موقف محرج
واني وياه لوحدنا صرت اتلفت خاف واحد يشوفني
وياه صاعدة
كان الموقف كلة جديد علية واول مرة اكون لوحدي وية رجال غريب عني وجريء وماعرف شلون اتعامل وياه
-ثائر اني اسفة ما افكر بالزواج
ثائر- ترة انة عارف شنو سبب رفضج الي ولكل واحد يتقدملج
سهى بمفاجئة-شنو قصدك
- اي يسهى عرفت بموضع خطيبج وابنج
ولا تتوقعين ان هيج سبب راح يمنعني عنج من اتقدم واخطبج
يبنت الناس انة شاريج حبج نبت بالروح
واريدج تفكرين وتردين الجواب وانة انتظر ردج
بوقتها مكدرت انطق بَـــأي حرف
عبالك مثل الحلم خاف احجي واگعد منة
والله اذا حلم ما اريد اكعد اريد اكضي العمر كلة نايمة
كانت هاي اثمن واحلى لحظة بحياتي ممصدگة
يعني ثائر يعرف بسالفتي وبعدة يريدني
كانت كلمات ثائر الي مثل الي وهبني الامل حتى اعيش
اذا كنت احبة
هسة صرت احبة واعشقة بجنون
ووصلني بوقتها لبيت سارة واني اتلفت مثل الحرامية بس الحمدلله جان الوقت ظهر
ومحد شافني بس قبل لا انزل
باوعلي بنظرات تموت بيها هواي وعود
-مو تنسين انتظر منج خبر فاهمة
هزيت راسي بنعم
و مشيت طلقة واني رجل تطك برجل عبالك امشي فوك الغيم من الفرحة
دخلت على بيت سارة وحجيتلها كلشي
-وسارة گعدت تهلهل
وكالت راح اتصل على عساف
اخذ منة جميع المعلومات واگعد اتحقق
على سابع جد الةً
راح اعرفلج كلشي حتى شنو يحب ياكل
ههههههه
سارة تحجي واني الگاع مشايلتني من الفرحة
وبيومها خطية امها لبست عبايتها ووصلتني لاهلي
ورجعت للبيت واني اسعد انسانة
وخلصت يومي بين حسن ونور وتمارة وامجد
بس عقلي ابد مو يمهم
اني بغير عالم
(((((((((()))))))))
ورة اربع ايام في
في الامتحانات النهائية لهذه السنة
ولحد الان مرديت جواب
بس سارة تعرف بموافقتي
بس حسيت اكو شي غلط وية سارة ما اعرفة شنو
وكالت انتظري فد اسبوع
خلي نشوف وين تصفة تاليهة
سهى-مفتهمت قصدج اكو شي صاير واني ما اعرف
سارة بتهرب - هَـا لا ماكو بس عندي كم شغلة اريد
اعرفها واتأكد منها وبعدين اكلج عنها شنو
بدينا الاختبارات وانشغلت بالدراسة
وابني حسن جابو لعندي بهاي الفترة حسيت
براحة نفسية واطمئنان وانفتح واهسي على الدراسة
بس هالمرة ابني صحتة احسن
لان حسب الي افتهمتة من خالتي ام فراس
ان عمة انسجن ومرت عمة طلعت زعلانة
وحسن انتقل لبيت عمة راجح
طلبت منها بوقتها ان تبقي حسن عندي
ووعدتها ان كل فترة اودي الهم بس
رفضت رفض قاطع مقبلت وظلت تبجي
وكالت هذا من ريحت المرحوم
ما اتحملت اسكت بعد
- خالة زين اذا من ريحت المرحوم ليش ابني اجاني بذاك اليوم وجسمة ازرك
وهي بوقتها ظلت بس تحلف دين ويمين ان ماكو هيج شي ومحد ماد ايدة عليه وگالت
هو طفل شلون تصدگين الطفل على حجايتي
ظليت ملحيت بالموضوع لان حسيت بيها بوقتها اتنرفزت وضاجت وصار صوتها ثكيل
وفعلاً كان توقع امي صحيح
وغلسو علية شهرين بحالهم مجابو حسن الي حتى اشوفة مثل كل مرة
وحتى الاتصال صارت
كل خمس مكالمات تجاوب على وحدة واحس بو قتها
اندليت مكان گلبي من القهر
لكن خطية امجد شافني مفرفحة
وبيومها اتصل على عمو قاسم
وفهمة السالفة
والله ورة يومين اجة عمو قاسم وابنة
وجايبين وياهم حسن من بيت عيالي

وبيومها طرت من الفرحة وبست عمي من راسه
احس رجعلي فرحتي
وكلي
بوية سهى بعد لاتسكتين
عن حقج ترة وراج زلم
انتي بس امري واحنا نحرگ عشيرتهم حرك
وناخذلج حقج
وبيومها انتبهت على ابن عمي الناهي على نور
بس صلوات على محمد وال محمد
غير شايل حسن سبحان الي خلق وصور
دخلو جوة بالاستقبال
ورحت لنور اركض مصدومة من الي شفتة
ولا جنت متصورة ان عندنا ابن عم هيج يجنن
بالله بنات عمي شايفتهم كلش حلوات وعلاقتنا بيهم قوية كان من يجي عمي لبغداد يجيهم النا
وهنة درة مال الله وجميلات
بس ابد ولا مرة شايفين اولاده
اتذكر من جنا صغار كلش جان يجيبهم كلهم
بس وين بذاك الوكت محد يذكر
دخلت على نور شايلة ابني
وكوة اخذ النفس من السرعة
-لج نور گومي عندي الج خبر الابشدة
نور شمرت كتابها -شنو كولي
-لج عمو قاسم وابنة هنا عندنا
اجو وجابو حسن من بيت عيالي
نور وبخوف
-عزززة بعيني
اكلج هذولي بس لا راح يفتحون موضوع خطوبتي
والله ما اسكتلهم اذا فتح موضوع زواجي من ابنة التحفة
سهى- لا ابشرج اذا. الولد شاف هاي جهرتج
صدگي هو راح من يمة يخرب الخطبة
نور-ليش عيني هو يطول يخطب وحدة مثلي
اوووف اني حلوة وميت الف واحد يتمناني
سهى - خفي علينا يانجالينا جولي
تعاي شوفي الي شفتة وعودك بعدين احجي
لج ابن عمج يموووت الا بشدة
والله اشوفة اصلاً انظلم بيج من خطبوج الة خطية المكرود اتورط
نور بفضول - سهاوتي حبيبتي
بالله خليني اشوفة صار عندي فضول
سهى بصفنة تفكير
-بالله شو تعاي خلي نشوف بلكي نكدر نشوفة من فتحة الباب مالت الاستقبال
رحنا وشفت عمي دخل للحمام
دخلنا للمطبخ
وكعدنا نحضر الغدة
واخذت الماي وديتة للاستقبال سلمت عليه
وهو سلم علية وهو مدنك ولا رفع راسه
ابد
عبالك اني الولد وهو البنية بس صدقة لربة
شلون مهيوب ورزن
ابتسمت وبگلبي احجي والله اذا تشوفة انويرة
احتمال يغمى عليها
عجيب هذا من الجنوب
اشو هذا عيونة ملونة وشعرة مايل للشگار
حطيت المي عالميز وطلعت

رحت دخلت للمطبخ وهمست بأذنها
-روحي شوفيه تركت باب الاستقبال شوية مفتوح
حتى تگدرين تشوفيه بسرعة قبل لا يطلع عمو قاسم من الحمام
نور -هاا لعد لزميلي الطريق خاف واحد يجي ويشوفني
اباوع
-اوك بس احط اللبن بكاسات
واجي وراج
راحت نور للاستقبال
خلصت ورحت وراهة
بس جمدت بمكاني من المنظر الي صار گدامي
عزززة العزززاج ينور
كانت نور مدنكة بحذر مثل الحرامي تسرق النظرات من خلال فتحة الباب الصغيرة وتحجي بهمس وهي مدنكة على فتحة الباب وظهرها علية

نور- اكلج سهى وينة الصاك اشو مدا اشوفة
خرب حظي اشو مالة صوت شكل ابن عمنا الحلو خجلان
يبعتلي حمى ابن عمي

بس هي مو هنا المصيبة
المصيبة ان الشخص الي جاي تحجي عنة واكف وراهة
مكتف ايديه ويبتسم على شكلها الغافل
هههههههههه والله منظرها تحفة

:احم احم. الي جاي تدورين عليه واكف وراج

شفتها طفرت من مكانهة من الخرعة
نوروبشهكة تحجي وتأشر على باب الاستقبال
- اة اة اة جنت ادور على عمو قاسم

-اي اي هو عرفت قصدج عمج قاسم الصاك
خطية نور بين المصدومة من الشخص الواكف كدامها
وبين الموقف المحرج الي وقعت بي
اتدخلت لحتى انقذها
سهى-نور وين صرتي مو گلتي راح اسلم على عمو وارجع
نور وكانما نزلت عليها من السما
-اي اي صحيح عمو قاسم سلام اني اريد
هههههههههه خرب حظي صار عندها تضارب
بالكلمات معرفت شتحجي بس
خطية ركضت من گدامة ومانشوف الا غبارها

رحت وراهة
للمطبخ واشوف البنية تتنفس بسرعة وحاطة ايدهة
على گلبها وتهفي بيدها على وجها الاحمر
سهى بخباثة
-وربي موقف الا بشدة اتمنيت كون مصورة منظرج شلون تحجين بي وهو وراج هههههههههههه
نور حاصرتها البجية
-سكتي والله جمد الدم بعروگي من الاحراج
خرب بس عودك هو شنو غير يمووووت
اووووف
انتبهت على شكلها شلون سرحت بنظرات عيونها
((((((((((((()))))))))))))

مبقى شي على الامتحانات وتخلص
والى الان ماكو اي خبر عن ثائر
-............
بالكلية
طلعت من الامتحان
سارة-سهى اريدج بموضوع كلش مهم
خلي نبقى هنا لا نطلع للسايق هسة لان منكدر ناخذ راحتنا بالكلام بالسيارة
سهى بتسائل - سارة شنو الموضوع
سارة-الموضوع بخصوص ثائر
-شبي ثائر

كنت اباوع على معالم وجه سارة
- عساف اتصل علية وگلي
ثائر فاتح اهلة بموضوع زواجه
منج وحاجيلهم عنج كلشي
وجدة وابوه وعمامه رافضين
وگامو يحجون عليه
وكلولة اذا يتزوجج يتبرون منة وبعد ينسى عندة اهل

گلولة اذا يريد يتزوج يخاذولة بنت عمتة
وهو ظال يصيح ومتعارك وياهم
حارك البيت عليهم حرك
ما خلة شي بالبيت مامكسرة من الغضب
ويگلج هو واخوه الجبير متضاربين
وناسي جتفة مصوب
وضاربة عليهة ومن عندها
ثائر واكع عليهم وماخذينة للمسشفى
سهى بصوت واهن ضعيف من الي سمعتة
- وهسة شلون صارت صحتة
طبعاً اني احجي وية سارة
واحس گلبي يتگطع
-هسة هو زين وضعة
بس عساف يگول البارحة متصل عليه
ثائر وكلة راح اطلع من اهلي
واجي لبغداد واتزوجها ما غصبن على الكل
والما عاجبة يضرب راسه بالحايط
-يعني شنو ثائر راح يتبرة من اهلة وناسه
ويتزوجني
-لج سهى هذا ثائر عنيد وراسة يابس فوك ما تتصورين
بس حسب كلام عساف
ثائر يموت على ديرتة وناسة يعني
قرارة بالزواج منج راح يكلفة هواي
والثمن يترك ديرتة واهلة
بس رغم هذا بعدة مصر ان يتزوجج
وهسة هو الباجر راح يجي حتى ياخذ ردج
و يطلبج من اهلج حسب كلام عساف
(((((((((((((())))))))))))

بيومها ظليت للصبح منايمة اتگلب
بالفراش مثل التطلگ
بس افكر بي شنو اسوي حايرة اوافق
لو ارفض
احس كاعد انازع وية الروح
يا نااس اني اتورطت وحبيتة
وگلبي مدينطيني ارفض
احس روحي انانية واريدة ياخذني

هسة شلون شنو الحل
هو طلبني للزواج ومنتظر الرد
شراح اسوي
بس هنة خيارين لا اكثر
اما ان اوفق اتزوجة على عناد اهلة
واهلة يتبرون منة واعرف كلش زين صعبة عليه
يترك اهلة وناسه علمودي
وبوقتها راح اظل اعيش بخوف من
واشوف نظرة الندم بعيونة علمود ترك اهلة وناسه

واظل معلكة على كل حجاية والثانية راح يذكرني
بثمن تضحيتة علمودي
او ارفضة واخليه يكمل حياتة ويرجع لاهلة وناسة
وشي اكيد راح ينسى سهى وطوايف سهى
بس يتزوج ويصير عندة اطفال بعدها
مراح تبقالي اي ذكرى بحياته
اني اعرف ثائر كلش زين
ان هو مثل السمجة اذا يبتعد عن اهلة وديرتة
يموت
ولازم واحد بينا يضحي
اني احب ثائر واموت على تراب رجليه
مثل ما هو راح يضحي باهلة وناسه علمودي
اني راح اضحي بروحي لأجله

واتخذت القرار
.....................
ثائر
وصلت ستوني من السفر
دخلت بالشقة الي مأجريها ببغداد
فتحت الباب وانة ديني گامز وما ظل براسي عقل من الضغوط الي جاي اتعرضلها
مشاكل وية الشيخ مزاحم وابوي واخوي الجبير
اتعاركت وياهم وطلعت من البيت
و براسي شغلة وحدة انة اريد سهى تصير حلالي
(((((((())))))))
سديت الباب وحطيت جنطت السفر بالگاع
وصار بوجهي عدي
اخوي الهارب من العقوبة والله واجة. بوكتة
الا اطلع حركة النار الي كلبي كلها بيك
ثائر بغضب سحب عدي من ياخة قميصة
-ولك عار نجس شلون تسوي
هيج دكة وتدور وجهك
عدي وهو ينفض ايد اخوه
-انة ما سويت شي غلط
ترة من حقي اعيش حياتي
-لك حيوان مو بهيج طريقة
ولطمة على وجهة بقبضة ايدة القاسية
وبعدها توالت عليه الضربات وعدي حتى ما رفع صبع واحد للدفاع عن نفسه
كعد ثائر بتعب على الكرسي يفرك بوجهة وهو يتنفس بغضب
عدي ووجهة صاير خريطة من رفع جف ايدة ومسح حلكة من الدم
-هَـا يالوحش ما بردت نارك شوية حتى افهمك الصار
- شوف ولك ما اريد اسمع منك اي كلمة
ما يشرفني احجي وياك بعد الي سمعتة عنك

نهضت من مكاني وطلعت متوجه الى
بلسم جروحي مثلما سميتها بگلبي سهى

....................
بالكلية اخر يوم
بالامتحانات النهائية

اتذكر سارة اتصلت علية وگالت ثائر اليوم راح يجي للكلية يريد يشوفج ويحجي وياج عرفت اجة علمود
يعرف شنو جوابي
بيومها اتفقت سارة وعساف وحلفتهم ان يكتمون السر

طلعت من الامتحان
لگيت سارة منتظرتني
سارة-سهى ثائر هنا بالكلية مستعدة
سهى وهي تجر نفس -اي يالله امشي
رحنا لعندهم
وشفت ثائر واگف يم عساف منتظرني
حسيت گلبي انخمط وظليت كلي ارجف
اترددت للحضة وخفت لا اغير رأي واخرب كل خططي واضعف امامه واعلن حٍٍِْــًبٌٍـــِٓېٍٓ گدامة واگلة اخذني وياك لتتركني
لكن قويت قلبي ومشيت لعندهم
ورفعت ايدي وسويت نفسي دا اعدل شالي
كنت بيومها طلبت حلقة تمارة زوجة اخوي
حتى البسها واعلن امامه خطوبتي الوهمية من شخص اخر

يتبع