ثمار العار بالحلال الفصل الحادي والعشرون 21 - بقلم نهى

ثمار العار بالحلال ج٢
للكاتبة nuha-d-h

🌷🌷مساء الانوار يا احبتي الاعزاء
اشكر تفهمكم لي وهذا من طيب اصلكم 🌷🌷

)))))(((((())))((((

دخلت للبيت واني النار تشتغل شعل بية
ما اعرف شلون اطفيها
وانا بيدي خليت الحطب
صرت دفان نفسي وعلى جروحي
رشيت الملح صرت عبالك عدو نفسي
فاتحت جدتي حتى بستعجلون بخطبتي
جنت بوكتها اريد احرك گلب
سهوة ردت اشوف اللوعة بعيونها
بس اشو من شفت بعيونها الحزن
ماحسيت بطعم الانتصار ولا شفة غليلي
اي ليش مو هذا الي ردتة اشوفها مكسورة
وتتألم كدامي حتى يشفي جرحي
دورت على عدي حتى اشوف شنو سالفتة وية سهى هو شوكت شايفها وشنو سالفة التهديد الي كالت عليه وياهو دازة عليها
دخلت وكل غضب الدنيا بية
دخلت عليهم شفت اهلي كلهم متجمعين وعدي يحجي وية جدي كلت الله جابك يالعار هين يعدي
تلعب من وراي
شفت ابوي گام يريد يطلع
: لحضة بوية لا تطلع عندي موضوع وياكم
: خير شعندك اليوم اشو عيونك اليوم كلها شر ياستار
اخلص من واحد يجيني الثاني
: ان شاء الله ماكو شر بس ردتكم كلكم هنا
واريد واحد بيكم يفهمني منو الي داز عدي ورة
البنية بالكلية حتى يهددها قبل جم سنة
شفت الصدمة انرسمت على وجه ابوي
وعدي جان كاعد وبالة اصلاً مو يمي
بروده شعل النار بكلبي رحت هديت عليه ولزمتة من ياخت ثوبه
: ولك يالعار شلون تلعب من وراي وتطعني
انطيتة لطمة على وجهة
بس صدمني رده ما شال ايدة حتى يدافع عن نفسه
عدي: هاك اخذ راحتك واضربني
واشفي غليلك مني
انا استاهل كل الي يصير بيا
الله اخذ بحقك انت وذيج المكرودة
وهذا انا اليوم وجاي اموت باليوم الف مرة

استغربت من رده هذا شبي باوعت لوجه اصفر وخاوي
مابي روح
: شمالك يالاغم ان جان الله انتقم منك فهذا كلة من
من اعمالك العوجة
احجي كول منو
من دزاك على البنية هناك وكلك تهددها
حتى ترفضني من اجيها واطلبها للزواج

ابو ثائر :انا الي دزيت اخوك عدي على البنية حتى يكللها تبتعد عن طريقك
شني قابل اخاف منك
ترة الي سويتة كلة علمود مصلحتك
لاتوكع مثلما وكع اخوك الاعوج
لان انتو مقصرتو باخر فترة من كعدتو ببغداد كمتو تخبصون وتلعبون
كلت هاي وحدة من الصايعات
الي طمعانة بحلالنا وجاهنا
ثائر ماجنت متوقع ابوي يسوي وياي هيج شي
:معقولة لهلدرجة توصل بيك تهدد
بنية لاحول وقوة

: شني ترة احنا بعدنا ما نسينا سوايت مرتك
الاولى بيوم هجت من السلف
واخذت الفلوس
فظلت الفلوس عليك
وانت الحمدلله
مثل الاطرش بالزفة
انا لو شايفك فطن جان ما
خطيت هيج خطوة
الجد: اي صحيح كلام ابوك ترة صعبة علينا
نلفي لبيتنا بنت مانعرف اصلها من فصلها وانت حجيت عن ماضيها موش نظيف
ثاير بغضب
جدي هسة لو كلتلك اريدك تخطبلي
وحدة من بنات اخو قاسم
تخطبها الي
: اي اخطبها الك وانا مغمض عيوني
شجاب الطك على النك

:الف رحمة على والديك
وانت كلتها تخطبها وانت مغمض
تصدك بالله اذا كلتلك البنية الي هواها
كلبي وردتها وميت عليها
هي نفسها بنت اخو قاسم
بانت علامات المفاجئة والصدمة على الوجوه الشيخ
وابوه
كلهم انصدمو من الي سمعوه
لكن لا يصلح العطار ما افسده الدهر
.......................................
سهى
منتظرة رحمة الله تنزل علية
واطمأن گلبي من ناصر وعمي دكولي صدر
وكالو محد يكدر ياخذ ابني مني.
انصدمت من عرفت من ناصر ان همة بينهم مشاكل وية عم حسن ابني
وعرفت هواي اشياء عن هذا جاسم
بأن هو من عائلة زينة ومحترمة بس هذا طلع عندهم
ناقص واخوه فراس انقتل من وراه ورة سوالفة
ومشاكلة وية الناس خطية ما يستاهلون
احياناً يطلع بالعائلة شخص عاق
بتصرفاتة بحيث يهدم حياة كل الي حوله ويجرهم للحضيض ويعم عليهم هذا جاسم واحد منهم

وعرفت ان الشيخ مزاحم محرم دخلتة على منطقتهم
لان طلايبة هواي ومأثرة عليهم
لكن اني هذا كلة ميهمني اهم شي عندي
ان ابني ميروح من حضني
حسن : ماما اريد اطلع العب وية الاولاد كلهم ديلعبون
طوبة بالساحة الا اني محبوس هنا
: ماما حبيبي والله اخاف عليك
عذراء : حسوني يا گلب خالتو اسمع كلام
ماما لان هي هواي تحبك والوضع صعب نخليك تطلع
سملى: تعال العب وياي (بلي ستيشن )
سهى: والله ياريت. تاخذينة وتلعبي وياج
بلكي يلتهي
دخلت علينا نور
نور : تعاي رواء تفضلي فوتي جوة محد هنا من الولد
كمنا سلمنا على رواء وكانت مترددة وشكلها
بعدها مستحية مني
رحبت بيها وحسستها بالترحيب
فرحت من شافتني سلمت عليها
وصارت تضحك وتسولف وية البنات وفاجئتنا اني عذراء من كالت
: لو احجيلكم عن عدي شصار بي
من يوم الي اجتي عذراء لبيتنا
عذراء بتلهف بس تحاول متبين مهتمة
: شنو شبي اخوج شصاير بي لتخافين عليه هذا ما يهزة شي
: ههههههه لا حبيبتي شكلج ما تعرفين الي انا عرفتة
عذراء بنفاذ صبر : اي هسة غير تحجي وتفضها
: ولج بيوم الي طلعتي من عندنا دار حجي بين عدي وجدي وجان عدي متفاجيء من شافج
بس الغريب بالامر ان الكلام الي دار بين جدي وعدي جان كلة الغاز
بعدين عرفت
عدي قبل فترة فاتح ابوي وجدي برفضة الزواج من عندج
وكللهم انا شفت بنية هنا قبل فترة وعجبتني
واريد اتزوجها
وبوقتها ابوي وجدي لعبو بي لعب ورفضو
بس جدي الوحيد وافق على كلام عدي
وكلة يجرالك عذراء بعد ما تتزوجها خلاص
وابوي سألة منو البنية
كال البنية الي شفتها تصير بنت اخو قاسم
لطمت سهى ونور
نور : عزة بعينة منين شافنا واحنا ما طالعات بباب البيت
رواء: صبري حبيبة لاتستعجلين على رزقج
جايتج بالحجي
بعدين تبين من صاحبنا طلع جان شايف عذيرة
وهو عبالة وحدة من بنات اخو قاسم لان
بيوم الي شافها صادف وصولكم لبيت عمكم
وهو هيج ربطها لان جان ما شايف عذيرة من عهد جانت بالمتوسطة
هههههههههه شفتي الله شلون خسبك (خربط) احواله
والمصيبة جدي يعرف بهذا كلة وضامها الة
سهى بتعجب : زين جدكم منين عرف بكل هذا
عذراء بمعرفة: ههههه حبيبتي شكلج بعدج ما تعرفين الشيخ مزاحم
ولج هذا ما صار جبير العشيرة لوما فطنتة
رواء: حبيبة جدي بي طبع يحط عين بكل مكان
توصلة كل صغيرة وجبيرة وشنو يصير من وراه
باختصار جاسوس ينقلة الاخبار اول باول
لتستغربين توصل بي
حتى يخلي رقيب على اهل بيتة
نور : اهووووو هاي شنو جدكم داهية
: اكثر من ما تتصورين يملك دهاء ثلعب
رواء: ولجن خلي احجيلكم شسويت باخواني
عذراء بلهفة : شنو شنو
وسهى تسمع بتركيز
رواء : وداعتج خية
الا اربي اخوتي على ايدي هذولي دواهم عندي وانا اعرفلهم
عذراء : ولج موتيني احجي شسويتي
: ههه انا رواء مو ياهو الجان خليتلج عدي ظل يكمز من كلتلة احمد ابن عمكم راح يجي ويكعد عندكم كم يوم واني الفت فلم من يمي
وكتلة ابن عمها جاي وسمعت بي
راح ينهي على عذراء
ولج مو هنا النكتة
شبعي ضحك من دخل جدي علينا وشكلة سمع حجينا
وكمل عليه
وكال اي والله تستاهل عذيرة ابن عمها اولى بيها من الغريب والولد ما قاصر ادب واخلاق وشاب
مملوح وميت الف وحدة تتمناه يصير من نصيبها
طبعاً جدي يحجي وعدي ظل يلوب
ما يعرف شيسوي
ظلينا نضحك عليه من كمز من مكانه مثل الي واكعة جمرة كايدة بحضنه
: والله احرك عشيرت قاسم لسابع جد اذا فكرو
يزوجها لغيري
الشيخ مزاحم : روح توكل يالذيب هذاك هو بيت عمك قاسم تفضل بالله شوفنا شراح تسوي
عدي بتحدي : بس اصبرلي وانا اراويك ذيب مزاحم شيكدر يسوي
...............
نور : يبوووو خطية ولج ليش تسوين هشكل باخوج مو حرام عليج خاف الله يعاقبج
عذراء: لا خلي يولي يستاهل الي يجرالة كلة من ايديه
محد كلة صير مغرور حقج ما شايفة قبل شلون جان شايف نفسة علينا عدالك احنة همج وهو الوحيد بينا
المثقف ما يعرف ان الثقافة مو بالمكان الي نعيش
بي ولا بطريقة اللهجة الي نستخدمها لكن الثقافة
ثقافة النفس وصفة الانسانية بقمة هرم المثقف
بس الظاهر الاخ حاسبها غلط وفاهم المثقف بصورة
خطاء
خير مثال ابوج وابوي
همة خوان ابوج ماخذ شهادة وابوي لا
بس ابوج كان يعاملكم بجور وابوي عاملنا
باحترام منهو الي كبر بينا واخذ الشهادة
وما يوم جبر واحد من خواني يتزوج بالغصب
وحتى انا بسالفة عدي سألني واخذ رأيي
وانا وافقت مو عدالج غصب عني موقفيني
عدي جان حتى يعيب على لهجتنا رغم هو هم ابن هَـاي
الكاع بس شلكة حب يتناسة
لكن هو اكبر غبي اللهجة عمرها ما جانت مقياس لثقافة
الشخص ليش هم بينا المدرس والدكتور والمهندس
وبناتنا بيهم متخرجات صحيح همة محافظين علينا
بس مو معناها ما يحترمونا اكو بينا المتشدد على اهل بيتة وما يحترم رائي المرية لكن مو كل اصابع ايدج سوة
ترة حتى بالمدينة اكو هواي ناس ما يحترمون المرية
القضية مو احنا من الجنوب ومعناهة ما يسون حساب النا لا القضية بكل مكان
وراح اثبتلج عندج جدي الشيخ مزاحم
طبعاً كلها تهابة وكلهم يسولة الف حساب ومحد يكدر يتعداه
بس تدرين جدي كضة عمرة كلة ما يخطي خطوة
اذا مو جدتي عندها علم وحتى مرات يشورها بامور السلف
اي لا تعاينين علية مصدومة هيج
ترة جدي يعجبج ولهذا يومج شكد اتمرضت جدتي ويهدولة نسوان بالدواوين بس ما يوم قلل من قدر جدتي
بالعكس ظل وياهة بالحلوة والمرة
وحتى تعاملة وية بناتة كان يموت عليهن
ومدللهن والدليل كل وحدة مسويلها واحد من هاي البيوت حالها حال الولد
متشوفين ابوي كعد هنا بهذا البيت هذا جان واحد من الشروط لحتى يقبل يزوجة بنتة شرط عليه يترك بغداد يعيش يمهم
سهى : الله يا عذراء بديت احب جدج
نور بخفة دوم: اي عفية ما تكليلة سهى اختي تحبك ويتزوجها ونخلص منها
رواء: خاب طيري حتى ما جدتي تلعب بيج طوبة
ترة مو عدالج مرية جبيرة من يكون السالفة بيها شريجة
تدخل عليها تشوفيها تصير ولا بنت ال٢٠
باللسان ههههه
سهى : ربي يهنيهم ويسعدهم
سمعنا صوت جرس الباب
واجاني حسن يركض
: ماما عمي جاسم بالباب
يمة كلبي كرصني
كمت من مكاني وطلعت شفت
عمتي منتهى
لابسة عبات الراس وتحجي وياه يم الباب
طبعاً محد كان موجود من الولد
طالعين
سمعت عمتي منتهى تكلة ماكو زلمة
بالبيت روح
وبعدين من يجون الزلم تعال على ابنكم واخذة
كال زين صيحلي ام حسن اريد احجي وياها
ظل جسمي كلة يرجف من سمعت صوتة
هو نفسة الي كالت عليه ريم اتعارك وية
بابا الله يرحمة وظل يصيح
جنت لابسة شال وطلعتلة بالباب واجتي امي وياي
وسلم عليها
من شفت شكلة جان جثل وصاحب اكتاف عريضة
والله منطيه شكل جميل
بس هذا كلة مو بالعين ما دامه وصخ وخريج سجون

احياناً نشوف ونصادف هواي اشخاص
يملكون الوجه الجميل والوسامة لكن من تعاشرهم
تنصدم ان همة تافهين هذا الشي ينطبق على جاسم
شفتة اكلني بنظرات عيونة اول مطلعتلة
سلم علية
: شلونج ام حسن مو حلوة منج تخلينا واكفين على الباب
: اسفة اخوية بس ماكو رجال بالبيت وانت تعرف
الاصول مايحتاج اعلمك
: اي صدك هم صحيح كلامج
انا اجيت لحتى اشوف ابن اخوي
وسمعت بيج ما تقبلين ناخذة عدنا
ترة بيت ابوه اولى بي من حياة البهذلة الي عايشها
وانا ما يصرفلي الي سمعتة انتو كل يوم بديرة متهجرين
علمود مطلوبين ثار وانا اخاف على ابن اخوي
ترضيها يصير عليه شي

عزة بعيني هذا يعرف كلشي عن حياتنا
: لا ما ارضاها بس حسن هسة هو بامان هنا وما عليه شي وان شاء الله ماكو فرق يتربة عدنا او عدكم كلها نفس الناس والاهل
كلت احجي وياه باللين بلكي يحن ويقبل يخلي عندي
: لا اكو هواي فرق شنو تردين الناس تاكل وجهنا ويكولون تاركين لحمهم يربى بين الغرب
وانا مثلما تعرفين عندي وية عشيرة الشيخ مزاحم هواي طلايب ومايصير اخليهم يربون ابن اخوي
: لا عفية اني شلي دخل بعشيرة الشيخ مزاحم ترة الله
وكيلك احنا من غير عشيرة
: لا يابوي انتي شلون شلج غرض وانتي كاعدة بنصهم وعمج مناسبهم جا شلون بعد تصير العشرة
طبعا هو يحجي وعيونة منزلت من علية بحيث شككني
اني ملابسة الشال عدل او هدومي مو مستورات
كعدت اعدل بشالي كنت لابسة دشداشة ثلاث ارباع الردن وطالع ربع من ايدي
اباوع عليه حتى من رفعت ايدي اعدل الشال
انرفعت عينه وياها
خرب هذا شكلة مركز وية كل حركة
همس بصوت غير مسموع لامي الواكفة بقربي
: ولج شنو هاي ايد لو كيمر من احتركو
رجعت للخلف من اثر الصدمة
والله مجنت متوقعة راح يطلع من عندة هيج كلام
لان اني ابد ما بدر مني اي تصرف يشجعة على تقليل
الادب وياي لكن شكل الجلب يظل طول عمرة ذيلة اعوج وجاسم اعوج
بس مو هنا المصيبة المصيبة
من كمزنا اثنينا على صوت خشن
هز سكون المكان هز
عززة هذا ثائر شجابة لهنا حظي المصخم
: ولك جااااااسم شجابك هنا ومنو سمحلك
تعتب دارنا وشعندك واكف وية سهوة
جان يحجي وعيونة يردن يطلعن من مكانهم
...
فتح البواب
الباب الرئيسي ودخلت بسيارتي وومريت من يم باب بيت عمي قاسم اجيت اتخبل من لجحت (شفت )
جاسم واكف يم باب
بيت عمي ناصر وزاد جناني من شفت سهى طالعة تحجي وياه وقفت السيارة ونزلت من السيارة بدون وعي ركضت على جاسم
مو هنا القهر اجيت انجلط من سمعتة يغازلها
وهي رافعة ايدها طالعة نصها بنت الاوادم
حرت ما اعرف شسوي
اضمها من عيون النجس لو اكسر اديها الفاهية
رحت عليه بدون مقدمات كبل جريتة من ياخة ثوبه
ونزلت بي ضرب بدون ما اعرف المن جاي وشيسوي هنا وشعندة وية سهى كمت ما اشوف دربي
سمعت صوت عمتي منتهى
: ولك عمة ثائر اوكف ترة هذا حما سهى وجاي ياخذ ابن اخوه
كان كلام عمتي مثل الضربة على وجهي انصدمت
هاي شنو معقولة اكو هيج شي
شجاب جاسم على سهى وشلون الدروب التقت
: واذا عم حسن ليش هو مو يدري احنا محرمين عليه
دخول السلف لا وبعد بكل صلافة جاي لعند بيتنا
منو سمحلك تتجراء
نتر ايدي ودفعني وصرت اتلاوة وياه
كان هو ما قاصر هم قوي البنية ووكعنا سوية بالكاع
وصرنا تمرغل بالتراب ردت ابرد گلبي منة
شلون يتجرء ويحجي وية سهوة هيج
ولك هاي مالتي هاي ملكي
سمعت عياط عمتي واجت الزلم تتراكض انا
بالي مو يمهم كان بالي وعقلي كلة يم هذا
جاسم
حسيت على الولد صارو يفكونا
كوة سحبوني عنة ودفعني ناصر وصار حاجوز
بيني وبين جاسم الي يريد يرجع يهد علية
: ولك ناصر رحمة على والديك عوفني عليه بعدني ما برد كلبي منة
جاسم : ثاير والله احطمك واكسر راسك
ثائر الي صار يدفع بالولد عدي وناصر الي واكفين كدامه
: خايب يالعار تكسر راس منو خايب دتعال
وخمطتة من ورة ناصر وعتيت القميص مالتة واجة بيدي وانشك (تمزق)
ورجعت العركة من جديد وصارت عجاج (ترابة غبار
سمعت صوت جدي وانتبهت على اخو جاسم اجة
وهاي الفاهية بعدها واكفة بالباب وحاطة ايدها على صدرها
ااااااخ الله من احتركت عشيرتك يقاسم على هالبلوة
شفتهم ملتمين (متجمعين )ويحجون وانا رحت اتكأت على سياج بيت قاسم قريب عالباب
ولزمت متني (الزند) حسيت بالالم شكلي اكلت
ضربة قوية عليه
وهمست بصوت مسموع بس لسهى
: ولج يسهوة تدخلين جوة للبيت لا ترة والله
اطلع حركة كلبي كلها بيج وارتكب بيج جريمة
انا الج حسابي وياج بعدين
يالله هسة كبل تفوتين كدامي داخل البيت
لتظلين واكفة بالباب وفاتحة حلكج
والزلم كلها هنا شكلج متونسة عالفرجة
ما سمعت منها اي كلمة وشفتها كبل دخلت وبقت بس امها وعمتي منتهى
ويحجن بصوت ناصي ويهدئن الموقف
بس انا بالي راح وغاب وية الي دخلت وما حنت علية
وسمعتني صوتها
ردتها بس تحجي وياي حتى لو تعاركني ميخالف قابل
بس اريد اسمع صوتها والله حنيت الهة
شلون يارب شوكت تفرجها علي
حسيت على منتصر اخوي انطاني كلينس
: هاك امسح حلكك كلة دم
اعاين على جاسم الي ملابسة مشككة (ممزقة)وكلها تراب
وخشمة ينزف دم وواكف يم اخوه
الجبير سمعتة يحجي وية جدي
الشيخ مزاحم: شني جويسم شلون تتجرء وتتعدة على
حرمة بيتنا شني احنا مو بعينك
جاسم: محشوم شيخنا انا ما سويت شي واعرف الاصول
دكيت الباب وحجيت وية مرت اخوي المرحوم وردت اشوف ابن اخوي
شنو بيها شي لو انا غلطان ؟
: اي بس الاصول تكول تنتظر رجال البيت يجي وتستاذن منة موش تجي وتحجي وية المرة
مايجوز وانا ابوك
: شيخنا انا استأذنت من اخوة المرة ببغداد وهمة كالو عادي اخذ ابن اخوك من بيت عمنا وانا مشتاقلة
وصارلي هواي ما شايفة
: اي صدك اتذكرت تعال كلي انت موش شردت من السجن شلون اجيت علينا
: لا شخينا انا مو هارب انا طلعت افراج
ثائر: خايب ول منين اجاك الافراج وانت سالفتك
عوجة بس كول طلعوك الماعندهم مخافة الله
ماكو غيرهم العصابة همة ورة طلعتك من السجن
جاسم : وهسة انت شتريد ياهو يمك
شمالك محروك كلبك
ترة والله حلوة هاي هسة قابل انا جاي داك بابك
وانت منو يمك تكمز
هد يت عليه مرة ثانية ووقف كدامي منتصر كعدت ادفع بمنتصر اريد بس اوصل لهذا العار وضليت اصيح بصوت عالي
: بالله شو بعد من كدامي خلي اشوف هذا جاي يحجي ويامن
ولك جاسم هاي علي تحجي دصبرلي ولك
ادفع بالولد وهمة يصدوني
سمعت صوت ام سهى تحجي بصوت ضعيف
: يمة صلو على محمد وهدو بالرحمن
انقهرت عليها حسيت بيها مرية مسالمة وتخاف من المشاكل
سمعت صوت عمي قاسم يحجي وية جاسم واخوه
: شوف بوية الولد كضة كل هاي السنين عايش بحضن امة واتربى عندها واتعلم عليها ترة واكفة تجي انت
هسة وتطالب بي يترك امة ويعيش وياك
اتقدم الشيخ مزاحم
: كلام قاسم صحيح وماعليه غبار
شوف بوية
تردون تاخذون ابنكم حتى تشوفونا
وبيقى عندكم كم يوم وترجعونة اهلاً وسهلاً
لا والله ما كو معجبكم الحجي
بوية من هسة اكلكم الباب يوسع جمل
والولد ما تاخدوه من حضن امة
لو نعرف نسويها دم للرجاب
حجة اخو جاسم الجبير
: هذا هو شيخنا انت شتفصل احنا نلبس
قابلين بحكمك ابنا ناخذة نشوفة ونرجعة لأمة
اعذرنا ترة انت تعرف هذا من ريحة الغالي
جاسم : شنو شخينا هذا بياقانون تحكم
ترة الولد مردة لاهل ابوه احنا ما طالبين شي غير حكنا (حقنا)
ثائر بكل حقد : جاسم جنك نسيت هنا احنا القانون
والشيخ مزاحم شنو يحكم انت وعشيرتك كلها تنفذون
جاسم : لا يثائر غلطان اذا هيج الحجي وصارت مثل الغابة والقوي ياخذ الرجيج (الضعيف )
جا بسيطة بات المحيبس
وخلي ابنا عندكم بس لا تتفاجئون.
بالي راح يجيكم
: اي هسة بدة الحجي يحلى
اطلع من الوكر وطلع مخالبك لاتظل تمثل دور الصالح
ما يلوك عليك ثوب الوقار
بين على حقيقتك واجمع عصابتك وحاول على كد ما تكدر
بس صدكني ما راح تطول اظفر من الولد ما دام انا عايش
: وانت شنو دخلك بالسالفة لو تتمرغل بدم المجاتيل
انتبهت على اخوه لزمة
: اوكف يجاسم ترة اتعديت حدودك
التفت على جدي وكمل
نرجو منكم السماح وعذرو اخوي مقهور لان صارلة هواي ما شاف ابن المرحوم وكلبة طاك عليه
واخذوها كلمة مني ابن المرحوم اليوم ناخذة وبعد يومين نرجعة
قاسم : اريد منك وعد وكلمة رجال
: اوعدك ارجعة لحضن امة وعد رجال

اتفقو وانتهت السالفة
واخذو حسن مني
بعد ما كعد عمو قاسم
وناصر يقنعون بية حتى اخلي حسن يروح وية عمامه بس مو بيدي والله خايفة ما اكدر يمكن ياخذونة وما يرجعونة الي بس لا عمو قاسم وعدني يرجعلي ابني
لحضني
ودعت حسن ووصتة يدير بالة على نفسة
ويحذر من عمة جاسم
وصرت ابوس واحضن بي بالباب الرئسي

وكانت غافلة عن العيون الي كانت تراقبها بغيرة
شلون تحضن ابنها امام عينة وتبوس بي
اذا اكول وصلت بية الغيرة عليها حتى من ابنها
راح تكولون هذا يبالغ
بس مو بيدي كانت بعيونها نظرة حنان وخوف على ابنها اتمنيت هاي النظرات كلها الي تصير
ردتها ترفع عينها وتشوفني بس وين هي رايحة بغير عالم وحقها ابنها راح ياخذونة من حضنها مو شوية
بس يا ويلة الي يحاول يحزن سهوة ثاير
انا الة بالمرصاد وراح اظل وراه لحد ما اجيبة منهم
وارجعة لحضنها
دخلنا للبيت
وانتبهت على عدي اخوي دخل ويانة وهاي مو من عوايده يفوت على بيت عمي قاسم
لكن بعد الي سمعتة عنة رغم انا وياه علاقتنا خربت
بس تبقى توصلني اخباره
وعرفت ان هو هاوي عذراء وهو يجهل امرها
وكان جدي على علم بعدي حب عذراء من اول يوم شافه يعاين على عذراء بنظرة عشك
هههههههه اثاري طلع جدي موش هين
طبعاً ابوي لحد هذا يومي ما اعاين عليه ولا احجي وياه صعبة اعاقب ابوي واصير عاق
بس صرت كلش بارد وياه بتعاملي
وتصرفاتي تشهد على ذلك اعاين عليه يحاول يرد
الامور لوضعها السابق بس وين هيهات گلبي بعدة ملجوم من سوايتهم وياي

ام سهى وهي تحجي بلهفة
: يمة سهاوي لفيتي الدولمة ؟
: اي يوم هياتني خلصتها
: اي عفية خلي نخلص بسرعة ترة اخوج احمد على جية يمة سودة علية شكد مشتاقتلة وطاك كلبي عليه
منتهى : يارب يوصل بالسلامة وتاخذي لحضنج وتقر عينج بشوفتة
: امين يارب

اليوم احمد اخوي يوصل على بيت عمو قاسم بعد
شفاء جرحة وطاب قرر يجي لهنا حتى يسلم على امي
وعلينا قبل لا يسافر للخارج لان اخوي امجد كال خلصت اوراق المعاملة مالتة وشغلتة صارت جاهزة
وراح يسافر للخارج هناك يم قتيبة اخوي
وبقيت بس اني وامي وعائلة امجد بعدنا ممخلصة معاملاتنا
ما اعرف شنو شعوري بس اني ما اريد اسافر
صار عندي مو بس ابني حسن اخاف اعوفة لا
صار عندي گلبي هنا انزرع واستقر وصار يعيش
بلهفة هوى المحبوب
سمعنا صوت هورنات السيارات واني ركضت
وكلبي صار طبل يوم يوم احمد وصل احمد وصل
: صلوات على محمد وال محمد
كللوووووش
رحت اركض للباب وفتحت الباب وشفت احمد اخوي
د ينزل من السيارة خطية كوة ينزل وامجد يسندة بيدة
رحت ركض عليه بدون وعي
وهو شافني وابتسم واخذني لحضنه
بس كان هناك بالطرف المقابل من يراقب هذا المنظر بصدمة
ثائر وهو يريد يهد على هذا الي حضن
سهوة منو هذا
لزمة عدي من كتفة : خايب يالوحش دصبر ولا تتهور ترة هذا اخوها الي جان متصوب
ثائر ومي بارد على گلبه
: ادري شنو هالعائلة شكد تحب الاحضان
شكلي راح انجلط لحتى ابعد الناس عن سهوة
انتبهنا على ناصر طلع وكعد يسلم عليه واخذة بالاحضان
عدي
طبعاً انا اعاين وكلبي صار نار
: ولك يالوحش مو انت الي لازم يخاف منة
لا ولك انا المفروض اخاف لان سمعت بي جاي ينهي على عذراء ويتزوجها
انتبهت على روحي اخذتني رجلي لعندهم بدون شعور
ولزمني ثائر من زندي
: ههه خايب عدي وين مولي لا تفضح نفسك عيب ترة
الولد جاي خطار بدارنا ومو من الاصول تشردة
: خوية عوفني والله مراح اسوي شي بس اعاين عليه
كلشي ما اسويلة بس اكسر اسنونة واعمي عينة
: هههه لا مكايل شي الحمدلله عبالي راح تتعارك وياه
زين طلع بس سلام
عدي
دخلت لبيت عمي قاسم
وانا عيوني على هذا ابن عمهم الي اسمة احمد
كوة لازم نفسي وثائر يهدي بية
كعدنا بالاستقبال وشفت احمد كام ودخل جوة لداخل البيت بووووية ما اكدر بعد
والله ما حسيت على نفسي من كمت وراه
بس فجاءة حسيت على ايد لزمتني وانتبهت
شفت ثائر
: خايب شمالك دكعد لا تفضحنا
: ولك شكعد ما جاي تشوف شلون فات عالبيت جوة بدون استأذان وين كاعدين والبنات جوة
: اكعد ولك هسة جدي على جية هو وعمامي لتخليهم يشوفون نظرة عيونك المفضوحة
عدة الوكت وصبو الاكل وانا
عيوني تدور على طيفها اتمنى الجحها واشوفها يارب ما تحن علية حتى الي احبها تصير الية
بس وين هيهات هاي عذراء وراسها يابس
باوعت على ناصر بعدة ما يعبرني شكلة بعدة زعلان علية
وما يريد يحجي وياي رغم صرت احاول اتقربله
واتودد الهم بس هو وين كلش حدي وياي وجاف بتعاملة

هي مو هنا المشكلة لا
المشكلة بالخبر الي سمعتة من رواء اختي
كالت سمعت ابن عم عذراء راح ينهي عليها ويتزوجها
طبعا لو يموت ما راح اخلي يلمسها
بس متت من القهر من سمعت بعذراء موافقة عليه
وقهري زاد واحتركت حرك
من دزيت رواء عليها
وخبرتها بحبي الها ورفضتة
وما قبلت حتى تحجي وياي
بس والله تحلم اخليها تاخذه الا على جثتي

ولحكايتي بقية

يتبع