ثمار العار بالحلال الفصل العشرون 20 - بقلم نهى

ثمار العار بالحلال ج٢
للكاتبة nuha-d-h

🌷🌷🌷مسااااااااااء الانوار عليكم يا احبتي 🌷🌷🌷
ملاحظة قبل لا نبدي بالبارت
((اعزائي القراء
بعضكم يطلب مني اخلص القصة
بسرعة لان راح تنتهي العطلة
زين هي قصة وبيها احداث وسرد مواقف
يعني شنو تقترحون اوقف تنزيل القصة
وانتظر كل خميس وجمعة حتى يكون عندكم عطلة ووقت لقرائتها
لو اشربت احداث القصة شلون ماجان لحتى انهيها
وترتاحون
حبايب اني حالي حالكم عندي مسؤليات والتزامات عائلية وجاي ابذل مابوسعي لاجلكم حتى انزللكم كل يوم بارت يرضي اذواقكم وتستمتعون وياي
بقراءة القصة
كل الي اتمناه منكم تتفهمون لظروفي
ولكم جزيل الشكر يا اجمل واعز قراء على قلبي
وان شاء الله ما راح ابخل عليكم بتنزيل البارتات
((🌷🌷🌷
(((((((((((())))))))))

علي : خايب عدي اوكف عوج واحجي عدل
اشو جنك كمت تخربط ما تعرف تحشم
انت تعرف كلش زين احنا خاطبين الك عذراء
وين جنت كل هاي السنين يالله هسة حجيت شني نزل عليك الوحي
: لا بس انا هسة يالله فكرت اتزوج
ابوه: ومنهي هاي الي فكرت تتزوجها
لايكون وحدة من الغواني مالتك امهات الولاية
: لا بوية الي اريدها انتو تعرفونها تصير بنت اخو قاسم رجل عمتي
ابو عدي : الله يصخم وجهك يعدي
على هالسواية ولك والله سالفتك غمة مثلك
كضيت طول عمرك اعوج وتمشي كلة بالمگلوب
يعني هسة انت جاي تريدني احجي وية
عمك قاسم واكلة ما نريد بنتك الي موقفين قسمتها صارلنا سنين وانطينا بنت اخوك لان حضرة جناب عدي انعجب بيها
وين كاعدين
عدي بعناد وراس يابس
: والله انا هذا العندي زواج من عذراء بنت عمتي
ما اتزوج واعلى ما بخيلكم اركبوه
هو جدي حجزها الي ورطني بعذراء
هو خلي يبتلي بيها
نهض علي من مكانة يريد يهد على عدي
لزمة الشيخ مزاحم من ايده
: اصبر يابعد جدك خله يحجي لوحده
هذا دواه عندي
الشيخ مزاحم ياعين على عدي بنظرات كلها مكر
: هذا هو يالذيب الك التريدة زواج من بنت قاسم
ماكو بس هَـا
خلي ببالك ما اروح اخطبلك بنت اخوه لوتموت
انت لوحدك روح اخطبها
ابوعدي : لا يابوي شني هو بكيفة
يتزوج عذراء ماغبصن عليه وعالخلفة
هي لعبة كل يوم جاي استاذ عدي
بمصيبة والله اكسرة واكعدة بالبيت ولا يتزوج غير عذراء
: كلشي بالجبر الا الزواج ما بي اكراه خله براحتة
شكله يطرب عالغريب

.................................

احياناً تمر على الشخص مواقف
يحس عبالك اتوقف بيه الزمن
اي اني هاي الحالة صارت وياي من سمعت كلام
ثائر
حسيت كلشي اتوقف حولي
من الصدمة
كانت اثر كلمات ثائر علية مثل وقع الصاعقة عالراس
اجيت امووت من حجة وية جدتة
لااااا يالله لاااا ليش ثائر ليش
عاقبني بس مو هشكل
هذا موت بطيء
لا مستحيل يأذيني
معقولة ديجذب علية حتى يحرك گلبي
ويسوي بية مثل ما سويت بي
لا بس الجدة ظلت تهلي وتصلي
: يايمة من ساعة المباركة. اشوفك عريس
وربعك يزفونك
جانت كل كلمة تطلع من الجدة
احس بيها تگطع بشرايين گلبي
ظليت احوم مثل البزون الي سادين على ذيلها الباب
فرت روحي ما اعرف شسوي
حسيت وجهي يطلع من عندة حرارة
اتمنيت الهروب من هذا المكان
اريد اختفي من الوجود
والله توجع الم طعنة الحبيب
صعبة الواحد يعاني من الالم
والمشكلة الالم داخلي ميبين
ولا احد يكدر يشوفة
صبو الغدة وخلص واني ما افتهمت منة
اي شي وكل ساعة
عمة منتهى تنبهني لحتى امد ايدي واكل
بس شاكل واني
احس بالاكل صار طعمة
بحلكي مثل العلقم مر
عبالك طابوك يدخل بمعدتي
الله يسامحك ثائر
ادري بيك تحبني وتدري بيا احبك
ورغم هذا كلة عاندت الگلب وكابرت
ودست على كلبك وكلبي بكل قسوة
بس علمود تشوفني اتمرمر
حرام عليك
بانت على وجهي علامات البؤس والقهر
وامي ونور حسو علية
نور بهمس: شنو شبيج اشو شكلج ما عجبني
شكو سامعة شي
: لا ما بية شي ليظل بالج
بس شكلي راح اوگع مريضة احس معدتي گامت تگلب
امي: لعد يالله خلي نترخص منهم
ونرجع للبيت حتى اني احس راسي يريد يطك
من ورة الهوسة
لج عيني الله يساعدهم هاي شلون يتحملون
هيج ازعاج
رحت حتى اصيح عذراء
علمود تكول لناصر يرجعنا للبيت
وصلت على المطبخ
حسيت على ايد قوية سحبتني
ودخلتني لمخزن المطبخ
التفتت شفتة ثائر
اتمنيت كون عندي قوة اطلع حركت
الي بگلبي كلها بي
سحبت ايدي منة بنترة
: اترك ايدي اياني وياك تتجرء وتلمسني
منو انت حتى تسمح لنفسك تتصرف هيج وياي
: هَـا يسهوة الظاهر جاي تعانين
مو تنسين ترة انتي معزومة
: اشكرك كلك ذوق ما قصرت
ان شاء الله اجي بمهرك واطش جكليت بعد
شفتة كور ايدة بقبضة دفعني على الحايط
وضرب الحايط الي بصف راسي
: سهوة عيونج فاضحتج
وتحجي عكس ما يلفضة السانج
دفعتة من صدرة
: وهسة انت شتريد مني
جاي تريد تشوفني شلون
اعاني وية خبر زواجك
لا ثائر راجع حساباتك
مو عبالك بهذا موقفك راح تكدر تكسرني بالعكس
الضربة الي ما تموتك تقويك
واني قويت وانت الخسرت
وان شاء الله الايام تثبت منو بينا الغلطان
ردت اطلع سحبني
: اوكفي ماخلصت كلامي وياج
ابتسمت بستهزاء
: مراح تكدر بعد تخوفني هذا كان زمان
من كنت اسويلك الف حساب
لان بوقتها كنت مالك الگلب والروح
واسوي حساب لزعلك
لزمني من زندي قوي
: لج ماغصبن عليج وعلى عشيرتج تبقين تسويلي
الف حساب
لان راح ابقى وراج وراج مثل ظلج
ما راح اخليج تتهينين بحياتج مو ثائر الي
تلعب عليه وحدة وتتعداه وتطلع سالمة
سمعنا صوت خلفنا التفتت بخوف
شفتها رواء
رواء: ثائر ابتعد عن سهوة
ترة انت هواي مصختها وياهة بتصرفك
والله اذا بقيت على هاي سوالفك اشتيكي لجدي عليك واخبرة بسوايتك وخطيتها بركبتك

من اجتي رواء حسيت
عبالك الله بعثلي حبل النجاة
رحت وتركتهم لوحدهم
دورت على عذراء ولكيتها كاعدة يم البنات تسولف

راحت وصاحت لناصر وكال جهزو حالكم
حتى امي خل ترجع وياكم لا تبقى هنا
عذراء : شنو ليش ترجع انت تعرف بأمي
تتأخر دائماً هنا ببيت جدي
: كليلها ابوي يريدها بشغلة مهمة
: هَـا خوش
والله بوكتها جنت كوة لازمة روحي
ما اعرف بس موقف ثائر وياي هزني
وحطمني الى قطع متناثرة
يعني الى متى اظل اني الجانب الخسران
يعني شوكت اصير مثل البنات احب وانحب
بدون ما احس باشواك ولوعة
ادري اني شنو شفت من حياتي
اشو كل ما اكول هانت
اصحى على ضربة فوك الراس
تخليني تايهة وحايرة وبنص الدرب محتارة
المن اروح وين اتجه وشنو اختار
لكن هالمرة لاااااا راح اكون انانية
راح انتفض مستحيل ارضى ان اكون اني الطرف
الخسران
وصلنا للبيت صحت لحسن
حتى احضرله ملابس ويدخل يسبح
نزلت شفتة داخل للحمام
سمعت صوت ناصر يصيح بغضب
وانتبهت على نور واكفة قرب باب الصالة وتتسمع
للكلام رحت اقتربت منها بتسائل
اشرتلي على حلكها حتى اسكت تريد تسمع
همستلي بصوت ناصي

: بس لحظة خلي اسمع وافهمج شنو صاير
سمعت صوت عمي يحجي وية ناصر وصوت عذراء
جنها جانت تبجي كلشي مفتهمت
سمعت صوت حسن
: ماما وينج انطيني المنشفة
رحت عليه وديت المنشفة وكعدت البسة
ملابسة
: صاير اسمر من ورة الشمس بعد متطلع تلعب برة بالظهر تسمعني ؟
: اي ماما صار ترة مو بس اني العب كلهم الجهال
يطلعون يلعبون بالساحة الي ورة بيت عمو قاسم
: ميخالف ماما حبيبي ميصير
اسمع الكلام لابعدين توكع مريض بضربة شمس
واحتار بيك
جنت احجي ودخلت نور علينا بالغرفة
نور : سكتي متت قهر
: شكو شصاير
: لج عدي خطيب عذراء
حاجي وية جدة
ما يريد يتزوج عذراء
ويكول شايف بنية وعاجبتة ويريد يتزوجها
ضربت على صدري بصدمة
: عزة بعينة وعذراء شسوت
: لج هو ماكسر خاطري الاعذراء
كانت تسمع كلام ناصر المقهور
من تصرف عدي بتجاه اختة
ورفضة الها كان موقف جداً جارح
الله يساعدها
كمت من مكاني
: خلي اروح اشوفها هسة هي وين
: ما ادري عفتهم بعدهم كاعدين يحجون
رحت نزلت جوة وانتبهت على عذراء
طلعت من الاستقبال ووجها ما يتفسر
رحت وراها حتى اصبرها لان اني
اكثر وحدة تحس بلوعة عذراء
احنا الثنين دنشرب من نفس الكاس
: يمعودة عذراء لتضوجين ترة عدي
ما يستاهل تقهرين نفسج علمودة
: عذراء وهي تكمل طريقها وتدخل لغرفتها
و ابتسمت باستهزاء
: لا انا ما احس بالقهر جج
انا جاي احس بالموت
اي انا هسة حالي من حال الميت احس
بروحي مسلوبة الروح

شفتها تركتني
وفتحت الكنتور وطلعت منة
عباية ولبستها
: شنو عذراء وين رايحة
بانت على وجها النية
وبراسها شغلة تريد تسويها
: انا رايحة احط النقط على الحروف واحل السالفة
لان الظاهر ابوي يستحي يرد جدي
وجدي محتم على عدي يتزوجني
ماكو يتبرة من عندة اذا ما يتزوجني
وناصر رافض
هذا الحجي لان يشوف باصرار جدي
يقلل من مقداري
ويهين كرامتي المهدورة شنو
يفرضني على عدي الا يتزوجني
ترة الزواج مو بالكوة
واني كلشي خسرت
على الاقل اروح الحك انقذ كرامتي والباقي من ماي وجهي
يسهوة الا الذلة ما راح اكدر اتعايش وياهة
والله اكتل (اقتل )روحي واموت ولا انذل

: يعني هسة انتي بكل عقلج راح تطلعين
وتواجهين جدج لوحدج
: اي شكو بيها تراج ما تعرفين عذراء بنت عمج
انا كلشي ولا كرامتي
والله لومو جدي عسى ما يدفنوني واني حية
الا اروح واواجهم و شيريد يصير خلي يصير
قابل تنگلب الدنيا
سهى برتباك
هاي شلون اعوفها تروح لوحدها
والله مردت گلبي
خاف تتصرف بتهور وتروح بالرجلين
عزة وناصر وعمي هنا والله يموتوها
: انتظريني لحظة اجي وياج
: لا ما يحتاج خلج انتي هنا
عوفيني اروح لوحدي اواجه الموت
: عذراء ما اعوفج وياج للموت
رحت ركض على كنتورها واخذت منها عباية ولبستها
على اكتافي شلون ماجان
شفتها فتحت الباب وطلعت ركضت وراها
واني البس الشال على راسي بالطريق
يالله جيب العواقب سليمة يارب
شفتها فتحت باب البيت الرئيسي
وكان الوقت مغرب ظلمة
احيانا من تشوف بلوة الناس تهون عليك بلوتك
يمكن اني
اخذت استحقاقي بالحب لكن خطية عذراء
كلشي مشافت
كلش صعبة بعد طول هاي السنين والصبر الي صبرتة تالي تشوف حبها ينهدم كدام عينها
حتى مالحكت تتهنا بي
: لج اوكفي على كيفج لتمشين سريع
طبعاً اني احجي وانفاسي متقطعة
ما ادري من الخوف مدري من السرعة مدري
من الارتباك اشو كلها التمت علينا
وصلنا ودفعت باب بيت جدها لان كان
مردود بدون قفل
شفتها دخلت للمطبخ وشفت رواء وعمتها سناء
هناك
رواء بتعجب : خير عذور عسى ماشر
وجهج مايتفسر شنو صاير شي
: لا مصاير شي بس كولي
جدي وين
سناء : شني عذيرة شرجعج علينا
انتبهت على عذراء غلست على خالتها ودخلت جوة على المكان الي اشرت عليه رواء
اني جنت بس اباوع بعيوني ومحرجة
لابية اعوفها تروح لوحدها ولا بية اكمل طريقي وادخل وياهة اخاف اشوف ثائر واني حلفت بعد ما اشوفة ولا يشوفني
بس الظاهر محد يكدر يتحكم بالقدر
شفتها دخلت على جدها كان كاعد يم بيبيتهم
وانتبهت على ابوعدي كاعد يمهم
واجتي رواء وسناء ورانا

الشيخ مزاحم بغضب : ولج عذير شجابج لهنا لوحدج
وين ابوج واخوج عنج
شني هلج يدرون بيج طارة
الدرب وجايتنا لوحدج تالي الليل ؟

عزززة بعينج يعذراء والله رحتي بالرجلين
يمة هذا جدهم والله يخوف اني من يمي يبست بدمي
عذراء: جابتني كرامتي المهدورة يجدي
ترضاهة انهان ويقل مقداري
: لا ما عاش من يقلل مقدارج يبنت قاسم
: جا اجيت وعندي يمك رجى
: شنهو كولي
: شيخنا ليش تجبر عدي بية حتى يرضى يتزوجني
تراني لا بايرة ولاني عانس
اذا هو ما يريدني انا هم ما اريدة
والله وحق الحق لو تكطعوني وصل ما اقبل اتزوجة
ابو عدي : ولج عذير اشو جنج كبرتي
وصرتي ما تحشمين
الجد : عوفها يفاضل تراها تملك علينا الحق
بسوايت ابنك
ابو عدي: بوية هاي حرمة وما لها حجاية بالموضوع
عدي يتزوجها ماغصبن عليه وعليها
احنا من شوكت ناخذ رأي ولدنا لو بتنا
: جا انت عدالك من تحجي هيج وتجبرهم يتزوجون راح تسوي خير بيهم لا يابوي موهيج الحجي
التفت على عذراء
: تعاي يابعد جدج انا كسرتك وعدي خذلني
برفضة الزواج منج
كولي بوية انتي شتامرين انا حاضر
انا شيخ وان شاء الله اكون عادل واكدر اخذلج بحقج
يمة احس بماي بارد نزل على كلبي بكلام جدهم
الله يرضى عليه جبر بخاطرها
عذراء وهي تلزم صدرها من ناحية گلبها
احس بيها يعصرها من الالم
: شوف يجدي اني من فتحت عيوني عالدنيا ووعيت عليها واني اعرف عدي الي واني لعدي
وبيوم بدة كلبي ينبض ما نبض الا لاجله
لكن بيوم الي يوصل الموضوع لحد كرامتي
لاااا عاد لهنا وكافي
العن ابو الحب الي يذل صاحبه يجدي
اني اجيتك وادري بيك تحكم بالعدل
انا ما اريد شي غير تحلني وتحررني من هذا الزواج
لان ابوي واخوي يستحون منك
وما يكدرون يرفضولك طلب ابوس ايدك اعتقني لوجه الله
مالي قسمة ونصيب وية عدي خله يتزوج الي يريدها كلبه واني
هو ماله ذنب ان جان كلبه ما يهواني
ترة الحب والزواج موبالغصب

والله اسمع كلام عذراء وكلبي يتكطع عليها من القهر
اصعب شعور يمر عالواحد
هو شعور الحب من طرف واحد
يكون هواي بي غصة
صعبة تشوف حبك ينزف لغيرك
وكل احلامك بلحظة وحدة تصير رماد
: هذا هو يابعد جدج ما يجرالج الا طيب
انا راح ادز على ابوج واكله ماكو بالطيب نصيب
واطلب السموحة منة
عاد لهنا وعداه العيب ابوج كفة ووفى وماطلعت منة الشينة
العيب بأبنا وعسى الله يرزقج بولد الحلال الي يعرف قدرج وطيب اصلج
شفت عذراء سحبتني من ايدي ورادت تطلع
وانصدمنا بعدي واكف خلفنا شكلة سمع كلام عذراء
انتبهت عليه
بانت على وجهة علامة الصدمة والجزع
هذا شبي جنة شايفلة فلم رعب شكو
انتبهت عليه يباوع لعذراء مصدوم ووجهة مخطوف لونة
بس قبل لانطلع
وكفت كباله
: الف مبروك يعدي عساك متهني
وشوف حياتك
تراني ما ميتة عليك والي خلقك
خلق غيرك اسأل الله يعوضني
بواحد يعزني ويغليني
تراك ما مجبور تتزوجني غصب عنك
واني هسة حليتك من هذا الحمل
اني عندي عتب واحد يمك
ليش هالكد اتأخرت يالله حجيت
ليش كسرت سنين عمري واني بنية
ومن انت حبيت يالله اتكرمت علينا
واعترضت بس تدري شنو
اريد كون البية بيك يصير

كانت عذراء تحجي وتعصر بيدي قوي
حسيت على رجفة جسمها
سحبتني وياها وطلعت
بس الغريب بالامر عدي
شبي ماحجة ولا كلمة بس ظل فاتح عيونة على وسعهن وكأنه مامصدك الي ديشوفة كدامة
والله دخت وانسطرت
وعقلي راح يوكف شنو ديصيربينا
.......................
كلشي جنت اتوقع الا هاي المصيبة ما جنت متوقها
حتى بأحلامي يعني
لو بعد ميت سنة ما راح انسى هاي الصدمة ولا هذا الموقف الي حطيت نفسي بي
جان اصعب موقف
من دخلت على بيتنا وسمعت صوت بنية تحجي بحركة وية جدي اقتربت وسمعت اسمي بالحديث
دخلت شفتها منطتني ظهرها
وعرفت هاي عذراء جاي تحجي وية جدي
والكل جان موجود ويسمع لحجيها
كعدت اسمع كلامها
جانت تحجي وياه بكل حركة
كسرت خاطري من عرفت بيها تحبني
بس ياناس الحب مو بالكوة
وفرحت من سمعت طلبها من جدوي
ان يعتقها من هذا الزواج
لكن انصدمت صدمة عمري من التفتت ورادت تطلع
لاااااااا يالله لااااااا
شنو لحظة شجاي يصير
معقولة الي جاي اشوفة كدامي
لا مستحيل لاتكولون هاي هي نفسها عذراء
الي تعلك كلبي بهواها
والله لو احجي سالفتي للمخبل البشارع مراح يصدكني
ادري ليش انا مشايفها ليش يالله
صحيح جنت كاضيها دياحة وسفر
وماكلفت حالي اشوفها
اصلا جنت اتعمد ما اوصل لبيتهم ولا اجيب طاريها
خاف يتذكرون ويزوجوني وجنت اتهرب منها
وكل هاي سنين جنت معلگها
والله يمكن هاي حوبتها طلعت بية
يمكن هاي لعنة من ربي لان عذبتها وياي
وعذبت اهلي وشلعت كلبهم وكل يوم جايبلهم
مصيبة بكد راسي يالله
معقولة اني فرطت بحبي وبعدتها عني بدون ما ادري
ااااااخ الله
عظيت ايدي من القهر وانتبهت
على جدي الي جان يعاين علية بشماتة
ما ادري ليش احس جدي ورة
بكلشي جاي يصير وياي ومتعمد يخليني اعمى عن شوفت عذراء ويشوفني اتلوع
ادري هو ما يخفى عليه شي
اي لان هو ما صار شيخ ولا وصل لهاي مكانتة الا لاجل فطنته ووعيه
لكن توصل بيه المواصيل يخليني اتلوع ويشوفني
احجي واعترض وهو داري هذا الي
ما كدر عقلي يشيلها
الشيخ مزاحم بشماتة
: هَـا يعدي شمالك وجهك انكلب لونه
جنك شايف ملك الموت
عدي بقهر : ها يجدي جنك تعرف
شجاي يصير بحالي
اشو جني اشوف الشماتة بعيونك
: حل تستاهل الي يجرالك
احصد هذا ماجنتة ايدك
جا شعدالك افوتها الك
واخليك تسرح وتمرح وتلعب بذيلك
تراك هواي مستهان بية
تراني الشيخ مزاحم
لا عدالك افوتها الك بدون ما اعلمك درس
هاك يالله استلم
روح شوف منهو الي راح ينطيك مرة بعد
هالمرة انت لوحدك ومحد راح يوكف وياك
عدي
ظليت بس اعاين عليه
يالله شكد شايف مكر بحياتي مثل مكر جدي ما شفت
معقولة هيج يسوي بية
عدي بروح خاوية
: تصدك بالله اذا اكلك درسك جان كلش صعب
وشكلك نجحت من خليتني اتعلك بعذراء كبال عينك
اي انا هويت عذراء والفضل يرجع الك
بس ليش ماحجيت ليش ما كلت وين تريد توصل
: بعدة الدرس ما خلص وياك وبعدك ما تعلمت شي
روح عاني وجاهد لوحدك وحس شوية بلوعتنا
مو عدالك كلشي تريدة يجيك بسهولة

جدي يحجي واني النار بية كايدة احس روحي كامت تكمز من القهر
والله عقاب جدي مو هين وياي هسة شسوي
وين انطي وجهي
الشيخ مزاحم : هَـا واكلك اياها من هسة
انا مالي غرض اذا اجوها خطابة وقبلو اهلها مو تجي لعندي تتوسل
: شوف جدي كلشي انت سويتة بيدك صار ونجح
بس قسماً بذات الله وحق الحق
حجاية ورد غطاها خلي يكون بعلومك ومعلوم الجميع
عذراء الي ما تصير لغيري
وراح اراويك حجي الرجال شلون يصير
رواء
عمتي سناء ابوي وجدتي الكل ظل حاير من الكلام
الي دار بين عدي وجدي الشيخ مزاحم
كان كلة الغاز شنو جاي يصير شنو السالفة
زين ادري عدي مو جان يصيح ويستريح ما يريد عذراء زين شو غير كلامه بسرعة
بس الظاهر اكو لغز بينة وبين جدي وشكل جدي جان ناصبلة كمين وحب يعلمه الدرس يبوووووو والله راح انجن
من ورة اخوتي ادري شجاهم واحدهم جنة
عاصفة ومطبق مقولة
علية وعلى اعدائي
يحطم كلشي يوكف بطريقة
.....................
دخلت على عذراء بغرفتها
لان صارلها يومين حابسة روحها بغرفتها وكل الي بالبيت عرف بيها رايحة لبيت جدها
واخوها ناصر بوكتها لعب بيها طوبة
وظل يرزل بيها
شلون تتجراء وتطلع من البيت من دون علمهم
بس شكلة راضي على موقفها من عدي
بس ما حب يبين الهة

شفتها كاعد لوحدها بغرفتها
ولازمة صورة لناصر وعدي وجاي تحرك بيها
جرت حسرة : تدرين يسهوة شكد صعبة علية من اشوف حٍٍِْــًبٌٍـــِٓېٍٓ ينهدم بلحظة ويصير حطام
تدرين اني كبرت واني اداريه مثل الام الي تدراي بطفلها
سهى : زين انتي ليش رفضتي تسمعين رواء من اجتي
وكالت عدي يريد يحجي وياج ضروري
: يعني شنو تتوقعين راح يحجي
مثلاً شي اكيد حاي يحس بالذنب
من الي صار وشي اكيد ابوه ضاغط عليه
يالله جاي يريد يحجي وياي
: اي بس من كلام رواء عن عدي افتهمت
غير شي هي گالت
صار شي بين جدي وعدي
وهو هسة متندم وحالة انگلب بيوم الي شافج
تحجين وية جدة
: انا بعد ما يهمني عدي كسرني
والي انكسر بعد ما يتصلح
: يعني شلون تبقين هيج تحركين بروحج
وتعذبين حالج
: لج سهى مو بيدي ما امدر والله جاي اتألم
اخس نار بصدر
سهى وية حالها
حالج مثل حالي يعذراء
والله احس بنارج
..........................................
ام سهى : ماما سهاوي اتصل اخوج امجد
ويكول عم حسن اتصل عليه يريد يجي ياخذة
ابن اخوه لان عمة الي جان بالسجن طلع
وناوي يرجعة يعيش عندة
وامجد وصفلهم بيت عمكم قاسم لان همة هنا قريبين علينا وراح يجي ياخذة
: عزة بعيني لج يوم شلون بية
والله اموت روحي اذا اخذو ابني مني
لا عفية ونوب منو يريد ياخذة
عمة الي جان بالسجن
: لج ماما سهاوي لاتزيدين كلبي ضيم فوك الضيم العندي شبيدنا عليه

: لا لايمكن مستحيل اخلي ابني يتربى بيد واحد
خريج سجون والله ارفع عليهم قضية
ابني حسن مو صغير وشي اكيد راح تصير الوصاية لصالحي
:وهاي انتي كلتيها بلسانج خريج سجون ومجرم يعني شتتوقعين راح يعوفج بحالج
لج عيني سهى ستري علية
ما بية حيل مشاكل كافي الي صار وية اخوج
احمد حتى جرحة بعدة ما شفى
مو بعيد يكعد يهددنا بواحد من اخوتج
ظليت احوم واتكلب مثل السمجة المتزوهرة
لا عفية كلشي ولا ابني والله اتخبل
وين انطي وجهي
اجتي سلمى
: ابوي يريدج كال صيحي سهى
: ما تعرفين شنو راد مني
: ولا والله بس شكل الموضوع يخص
ابنج حسن
نزلت اركض عزة بس لا اجة عمة عليه يريد ياخذة
شفت عمو قاسم كاعد ويمة ناصر
قاسم: تعاي يابعد عمج عندي موضوع وياج
: كول عمو اسمعك
: عمي اخوج امجد اتصل علية وكلي عمام ابنج
يردون ياخذونا يعيش عندهم
: اي صحيح عفية عمو اني بركبتك
لتخليهم ياخذون ابني مني والله اموت
ناصر نهض بفززعة : عفو عليج يسهى
تخافين واحنا موجودين والله
مادامني اشم الهوى مستحيل اخلي
الوصخ جاسم يمد ايدة على ابنج
والله لو اعرف اسويها دم للرجاب

يتبع