رواية ☆ ذنـــــبٌ بـــلا ذنـــــب ☆ الفصل الثامن عشر 18 - بقلم Hend_AlBoor

-شنوو السالفه شجابج هنا

تنسحب بين الطلاب تركض ،  يقفل خط و يركض وراها يدفع بالطلاب يصيح مجد - فهد وين
تطلع من البناية تمشي سريع جسمها يرجف يدگ جهازه تشوفه جنة ماترد تتلفت وراها تشوفه جاي ركض عليها ،  تبدي تركض خفيف يصيح - اوگفي ،  مو احاجيج اوگفي ،  يا بنية

يوصل يمها يجرها من ايدها،  تحاول سحب ايدها منه
بانفعال - عوف ايدي انت بنص جامعة

يباوع حوله الطلاب صافنين عليهم يتركها - انتي جبرتيني گتلج اوگفي

- و ليش اوگف اعرفك تعرفني

- اي اعرفج و تعرفيني

- شتريد انت

- شجابج هنا انتي منو

- خير ان شاء الله اعتقد اني بملك حكومي مو بيتكم

بانفعال - منو انتي فهميني

تسكت ترتبك و يحمر وجهها خجل ترد - نفسها البنية الي لزمتها بالشارع

فهد - اسف ماقصد بس انصدمت من شفتج

- ليش مو من حقي اتواجد بهذا المكان

- لا ، لا دتفهميني غلط 

تتركه و تمشي تمسح دموعها يروح وراها - وين تداومين

- ابتعد عني

- جاوبي شبيج خايفة ماسوي شي

تلتفت عليه بانفعال - و من شنو اخاف تحجي عادي ميهم ممسوية شي عيب

- انتي ليش تضيفين من عندج كلام ، شوكت حجيت كل هذا

- تروح لو هسه اصيح و اخلي امن الكلية يسحبوك

تتركه و تروح يوگف ينتظرها تبتعد و يكمل وراها على كيف يشوفها تدخل قسم الانگليزي ، يبتسم

دخلوا الطلاب قبل المحاضرة و منهم مجد گعد على يميني ارتبكت ،  بدت محاضرة استاذ ماهر ، طول المحاضرة ما خليت عيوني تجي بعيونه صفنت على السبورة لمحت مجد داير علية جمدت حسيت العرق ينزل من وجهي
تيهت المحاضرة ماسمع و لا اشوف مادامه ديباوع ماتحمل شخص يباوع علية اتضايقت معقولة تذكرني

استاذ ماهر - مجد

- نعم

- خلي بالك ويانة

- ان شاء الله استاذ

احساس يگولي اعرف هاي الانسانة اللحظة هاي حسيت عايشها قبل معقولة خلصت المحاضرة بقيت گاعد بستولي اتصلت على فهد ميرد طب للقاعة - هاي وينك راحت عليك المحاضرة

- طلعتلي شغلة

اخذت كتبي و طلعت ماتحمل القاعة بوجوده احس عيونه تراقبني اتصلت على سينا
- الو وينج

- اسفة گلبي مگدرت اجي

- ليش شصار

- جنة سالفة طويلة

- احجي اسمعج

- ما تنفع اتصال ، اكولج الولد الي حجيتيلي گلتي شاف وجهي من جنا نبيع مي

- شبي

- شنو شكله ، شسمه  ، بقاعتج هو؟

- ليش سينا شصاير

- احجي

- هيج طويل حنطاوي و عيونه خضر

- ها

- قلقتيني سينا

-  اطمني ماكو شي من اشوفج احجيلج

قفلت خط و رجعت للقاعة طبيت جان ادعم مجد گلنا سوا العفو
طبيت گعدت شغلت بالي سينا شصاير وياها

فهد - شبيك انتبه لو مكيف تدعم بالبنات

- اني لو مو وراك نطلع و نطلع و تركض

- اشمرها براسي

رامي - طلاب نزلوا اسماء كروبات الورشات بلوحة اعلانات العمادة  عود شوفوها ، كروبك و رقم المختبر احفظوهن

سري بالمطبخ يدخل اوس يگعد - خالة

- ها عيوني

- جنة بيا كلية

باستغراب - ليش

- لا اقصد شتدرس

- طب

- حلو ،  زين شعجب ماعدكم بيت ،  ابوها وينه

- ابوها متوفي الله يرحمه و جنا گاعدين اجار بس العازة يا يمة

- هم صح

رجعت الظهر من الكلية كلها نايمة خليت جنطتي و كتبي بالغرفة و رحت للمطبخ

- الله يساعدج يمة

- هلا يمة

- عوفي من ايدج هسة ابدل و اجي اغسلهن

- لا امي بدلي و تعالي اتغدي و تروحين تقرين

- تمام
بستها و رحت للغرفة دامشي بالممر طلعلي گدامي اوس فزيت
- شبيج

-  ممكن طريق

- مو ممكن دكتورة جنة طلعتي طالبة والله عمي احسن مني

- سيد اوس تعبانة و اريد اوصل لغرفتي

تقرب مني و همس - اني هم تعبان و اريد ارتاح

دفعته عني - دير بالك تتقرب مني زين

- اتقرب و اوصل و اخذ الاريده افتهمتي

عفته و مشيت سحبني من ايدي و يحجي باعصاب - هذا غرورج مو يمي بيعي بالكلية بس هنا خدامة عندي لو نسيتي نفسج

بانفعال - حل ايدي لا اعيط و الم كل الي بالييت عليك
حلني عفته و رحت لغرفتي اختنگت  بالكلية مشاكل هنا مشاكل وين انهزم من الناس 

ثاني يوم گعدت بدلت و طلعت بدون ريوگ دخلت للقاعه داگعد تذكرت كروب المختبر نسيت اشوفهن البارحة خليت جنطتي و كتبي و رحت وگفت يم اللوحة
- الكروب الثالث بيان ،  اني ،  فهد ،  مجد

صفنت الصدف دتجمعنا لو حظي الزفت درت داروح وراية واگف طير عيونه ليفوگ رحت للقاعة فارغة گعدت افكر بالمصيبة اوس
- اگول لامي لو لا ،  لا لا اكيد تقرر نترك البيت و وين نروح؟ نرجع للشوارع

دخل استاذ ماهر سلم رديتله استغربت شيسوي جاي مو وقت محاضرة و ماكو طلاب وگف گبالي
- گاعدة وحدج

- هنا مكاني استاذ وين اروح

- تعالي لغرفتي زوريني شعجب گاطعة انتي الطالبة الوحيدة الي ما تراجعني

- داكتفي بالمحاضرة انت كلشي دتوضحه

- و اني مداكتفي بالمحاضرة ، عيونج ادمان

گعد بالاستول الي گدامي و داير وجهه علية راسا وگفت باستغراب - نعم

- ليش خفتي 

- و ليش اخاف

گام وگف گبالي و مبتسم - فكرتي بموضوعنا  لو لا راح تخلص السنة

- استاذ فكرت و رديتلك الجواب بوقتها

- لا لا ماقبل بهيج رد فكري زين ادللج و

مجد - صباح الخير

دخل مجد صار وراه باوعلي بنظرة استحقار كرهت نفسي لان اي ولد بمكانه يشوف هيج وضع يشك باخلاقي

- صباح النور انت هم مغبش اليوم

باستهزاء - و كل يوم استاذ

- اي عفية بيك يلة اترخص  ،  فكري بالكلام زين جنة

انصدمت من جرأته ما فكر بسمعتي عقدت حواجبي ،  راح، اباوع على مجد مبتسم باوع علية و رفع حاجبه ،  وجهه يحجي  دخل فهد

- ها اليوم ما منتظرني برا
يوصل يمهم - خوما قاطعت شي

- لا مو انت الي قاطعت اني

يباوع علية و يحجي لزمت اعصابي الصوج بهذاك النذل سلم علية فهد رديتله گال
- شفتي گروبات الورش

- شفت

- شدو حيلكم نريد عزيمة الطفلة صديقة البروف

ابتسمت - ان شاء الله

بكل ريست مجد يتصرف تصرفات استفزازية مثله ماصدگ لزم لزمة ناقصته اني فوگ كل همي
خلصت محاضرات و رجعت للبيت ساعدت امي  كملت و گعدت اقرا ، صار المغرب سمعت صياح اوس

اوس سكران يترنح بالصالون و يصيح جنة ،  جنة و امه تتوسل بي و تجرجر بي

ام اوس - امشي بغرفتك فضحتنا ،  نجيبه ،  نجيبه

- عوفيني 

يركضن سري و نجيبه للصالون
تصرخ - شكو جمدتن ساعدني اصعده لغرفته

نجيبه - بعيوني

يعيط - و  خرن  وينـ ها جنة لج حب وينج

يركض لغرفتها تركض وراه سري و تصيح - يمة بنتي
يصرخ - وينـ ج حسي بيـ ة حني اريدج هسة هـ سة اريد ج زين ،  انت ي خدا متي جار يتي تعالي

طب للغرفة لزگت بالزاوية من الخوف و هو بالموت يوگف على طوله امي و امه لازماته امه تصيح على نجيبه سبحنه من الغرفة و امي تلطم على خدها
ام اوس - سري سدي الباب ، اقفليها

قفلت الباب و گامت تلم بكتبي و غراضي بعلاگة حياكة مطرزه اني ارجف - يمة شدتسوين

- لا بعد ماتبقين هنا هذا نگس ما ابقيج هنا

- وين اروح ماعوفج  ماروح لاي مكان وحدي

اجتي يمي لزمتني من وجهي و منهارة ايدها ترجف و تحجي
- يمةة ماريد تتاذين ماريد الصار بية ينعاد بيج تفتهمين شنو ماريد

- ما ينعاد عيوني اهدي
ركضت تلم بهدومي و اني وراها وراها اهدأ بيها مفاد جرتني من ايدي و طلعتني تركض بية امه نزلت شافتنا
- اني اودي بنتي يم اقاربي
- اسفة سري مادري بيا وجه اباوعلج فشلني حسبي الله

- حشاج عيوني حشاج

- وديها لان ابني ميجوز منها بعد خلاها براسه

هي حجت هيج امي تحولت طيارة تركضني بالطريق ببجامتي العريضة همزين لابسة تيشيرت طويل عليها و النعال ابو الاصبع
- وين رايحين يمة غير افتهم وين دتوديني

منهارة - مخاوفي كلها صارت كلهاا هذا كله جنت متوقعته جنة خصوصا من انسان يسكر  و ميخاف ربه  حجيت لميعاد مخاوفي لان ماتحملت گالت اذا صار شي جيبيها

ودتني للبيت الي تشتغل بي خالتي ميعاد اخذتني سينا جوا و امي بقت تحجي و ترجف لخالتي ،  طببتني شينا للغرفة

-  تعالي شصاير و ليش متحجيلي

- اني مداستوعب الديصير سينا

- يعني صدك الكلام سكران و هجم عليج

- بس ما طخني

- عزا بعيني المهم سكران شمنتظرته يسجد بلة لو وحدج بالبيت جان شخلصج من ايده

- البيت متروس خدم شلون ابقى وحدي

- فرضا

-  الله ستر علية المهم امي ماريدها تبقى وحدها ماگدر اعوفها

- عدها حق ما اتأمن بعد

ما گدرت انام بالليل و بالي يم امي اول مرة انام بعيده عنها نمتلي ساعتين وجه الفجر و گعدت مابية اروح للكلية و لا الي واهس لگيت امي داگتلي داتصل عليها هي اتصلت
- الو ماما شلونج ليش هيج تخليني بمكان و انتي بمكان

- اهدأي يمة اني مرتاحة مادام انتي بامان بعيده عنه

- و لشوكت هيج نضل

- لما يحلها ربج ،  گومي تريگي و روحي للدوام

- مابية والله واهسي خربان

- لخاطري يمة لا تخلين شي يأثر على دراستج

- على امرج

گمت غسلت وجهي و بدلت و طلعت وية سينا

سينا - بنهاية الدوام مريلي

- ان شاء الله

طبيت للبناية طلاب ماكو خليت كتبي و جنطتي على الاستول اخذت جهازي و طلعت اريد اشرب جاي راسي راح ينفجر وصلت للبواية اتذكرت - يوو محفظتي
رجعت وصلت قريب من القاعة جان مجد واگف دگ جهازي امي
- الو ماما

- يا هلا بهالصوت

من سمعت صوته مادري شصار بية بطئت خطواتي اريد افتهم

- اوس

- عيون اوس روحه

بانفعال - امي وين و ليش جهازها عندك 

- اذا تريديها بخير تعالي اخذيها و اذا عاندتي تحلمين بعد بيها 

- مستند للحايط و رافع رجلي عليه دانتظر فهد رفعت راسي على صوت جنة تتصل وصلت قريب مني منفعله باوعت علية و وجهها مكهرب عيونها مدمعة ،  رجعت ركض قراصتها وگعت من راسها و شعرها نزل

استعدلت و وگفت ، شعرها ذهب نفس هذاك ..

- مستحيل