رواية ☆ ذنـــــبٌ بـــلا ذنـــــب ☆ الفصل السابع عشر 17 - بقلم Hend_AlBoor

- و شنو شلون اوصل هي اصلا خدامة عندي و ملكي

گعدت الفجر امي ماكو و لا ترتاح امي گبل للمطبخ رحت عليها

صباح الخير ماما

- صباح النور

- يعني ليش مترتاحين شوي هم يگعدون متاخرين

- يمة اني راحتي هنا مو الحمدلله قبل وين و هسة وين

- الحمدلله

- اتريگي بين ما يگعدون يمة

دخل اوس صبح علينا و گعد

- راسي راح ينفجر فدوة استكان جاي

- سلامتك خالة ثواني و يمك

- لا خالة مو انتي خلي البنية تسويلي

باستغراب - ليش يمة

- شنو ليش اني اريدها هي تسويلي

- لا يمة البنية مو خدامة

- هي مو بنتج

- اي

- اي ماكو فرق مادام بنت خدامة

- خالة بنتي مو خدامة ، اني هسة اسوي

- ماما خلاص

سحبت قوري الغلاية من ايد امي و مليته مي ،  عرفت هذا الانسان يدور مشاكل و اذا انطردنا وين نروح
بقى گاعد يوزع ابتسامات و يباوع من فوگ ليجوة ، اباوع على امي وجهها صار دم خليته على الكهرباء دقايق و خدر صبيت و خيلته گدامه گالي  - مي  ، انطيته گلاص مي دخلت امه راحت باسته و صبحت عليه  امي همستلي - روحي للغرفة
انسحبت للغرفة ، مرت الايام دخلنا عطلة نصف السنة يوم عن يوم اوس يزيد بمضايقتي من غير يجي كل ليلة سكران امي حبستني بالغرفة من الخوف جابتلي عصير و گعدت منفعله
- شبيج ماما

- راح انفجر مداگدر ارتاح من رجع هالولد لليوم

- شعلينا بي

- دتشوفين وضعه ميخاف الله اخلاق سز هيج ولد وية بنية مثلج بفد مكان مخوفني

- لاتخافين ميگدر يسوي شي و هياتني گاعدة بالغرفة يمج

- اي من فدوة اروحلج لا تطلعين

-  صار بس لا تقلقين

بيت مجد

ام رونق - رورو ماما وينج يلة عاد 

- كملت نازلة

ابو مجد - هذني انتن النسوان دائما تتأخرن

- ميخالف اتحملنا عمري

- رجع قبل اسبوع ابوية و زوجته هم مستقرين بالخارج علمود شغله بس بين فترة و فترة يجون مرته گالت اگعدوا ليورا
- اني اجي بسيارتي

ابو مجد - لا ابني ما يحتاج تعال

صعدت يم رونق الطريق كله امها تباوع علينا بالمراية و تبتسم  ..

تهمس لزوجها - عمري شوفهم عبالك عصافير

يبتسم - اي لايگين لبعض

تبتسم رونق و تخجل

رحنا لمزارع شاسعه الهوا غير بيها نزلت امشي جتي وياية رونق گالت - خضارة فد شي

- اي

- شوف ماما و عمو منسجمين

- الله يديمهم

- مجد

- ها

- هم حبيت بحياتك

- شجاب هالسؤال ابالج

- هيج سوالف

- لا

- يعني حتى  من دخلت كلية

- شتفرق الكلية

- بنات و كذا

- هم لا

- و ماكو وحدة انعجبت

- ما اعتقد

- يعني ما يباوعن عليك

- والله يا رونق ما منتبه يباوعن او لا

دگ جهازي استأذنت و انسحبت - ها فهد والله همزين تذكرتنا

يضحك - على بالي مجودي شلون انساك

- لا لا بس حجي اظاهر الشمال نساك حتى  نفسك

- شنو هاي شتعرف صاحبك

- ذهب فهودي

- شلونها

- ها حنيت

- حيل

ليش ما بقيت و حاولت اكثر

-  كبريائي مجد  ،  بس هاي النهاية يمكن حنيت شوي فكرت اي بس بعد ما ترهم حتى  اذا هي رادت

- ايابة شصاير بيناتكم و ماتحجي

- گتلك بگلبها واحد ثاني

- الله يعينك

اوس - نجيبة ، نحيبة

تجي ركض يمه - بلي سيد اوس

اوس - غرفتي مگلوبة عاليها سافلها

باستغراب - رتبناها سيد اوس

- داكولج مگلوبة شنو ما تصدكين

- لا العفو ، تدلل بدون ماشوف هسه انظفها

- لا انتي خلي جنة تنظفها

- بس جنة مو ضمن الخدم سيد اوس

- و يعني

- يعني ما تخضع لاوامر الخدمة  هاي اوامر السيدة

- اني هنا السيد و لا تناقشيني نجيبة

- سيد اوس فدوة لا تخليني بمشكلة بلغ السيدة لان هي بلغتني انو ما انطي الاوامر بس للخدم و بعدين مسؤولة التنظيف موجودة

يصرخ - انتي شنو ماتفتهمين داگول جنة مفهوم

- على امرك
تروح للمطبخ
- ام جنة خلي بنتج تنظف غرفة السيد الصغير

- بس بنتي مو خدامة

- والله گلت له بس اتعصب ما سمعتي صياحة فدوة بس خلصينا من هالسالفه مابينا حيله

بانفعال - ماخلي بنتي تنظف و خصوصا غرفة هذا العاق و ام عبد موجودة

دخلت للمطبخ على حس امي

- يمة ميخالف بس يكفينا شره

- جنة ارجعي

- اعرف شنو يدور ببالج لا تخافين علية يمة هسه انظفها و انزل على السريع

صعدت لغرفته و اني خايفة اكثر من امي و خصوصا من شفت الغرفة نظيفة بس شامر هدومة بكل مكان گمت الم بيهن على السريع اصفط و اخلي بالجرارات ،  حسيت بيد تلعب بشعري گمزت من مكاني

بعصبية - شبيك

يضحك - انتي شبيج خفتي

- دانظفها ليش تدخل

- هاي غرفتي و بكيفي شوكت ما ادخل

خليت هدومه بالجرار - النظام الخدم من ينظفون السيد ما يتواجد بالمكان

- هذا النظام مو انتي الخدامة تحجي للسيد اني اخلي نظام و انتي تنفذي

- تمام سيد اوس كملت اخذ راحتك بغرفتك

تقرب مني و يحجي بهدوء - دون رسميات جنة بس اوس تكفي منج

- العفو بس انت السيد و اني خدامة

- حسي بية عاد

خلى ايده ع الكنتور ديحصرني بين ايدينه  سحبت روحي 
- اكو حدود ياليت لو تلتزم بيها سيد اوس

عفته و نزلت ركض

- اني اعلمج و نشوف تالي هالعناد

تلگتني امي يم الدرج گالتلي بخوف جنة

- عيوني شبيج خايفة

- خوما سوا شي ، شحجى وياج ، خوما لزمج بنتي

- و بعدين وياج ماما ، ليش تقلقين مو زين عليج اني خايفه عليج

بانفعال : ميهم اني ميهم گوليلي خوما ضايقج جنة

- لا بس سولف وياي على وضعه من جان بالخارج و من كملت اترخصته و طلعت اطمني

سرّي : والله گلبي ممرتاح امشي تعشي كدامي يلة
بدا دوام النصف الثاني گمت احس بالحرية بالجامعة رحت اول يوم من وقت قليل طلاب بالجامعة دخلت للقاعة فارغة خليت كتبي و جنطتي على الاستول و دگيت على سينا

مجد - دمشي نخلي كتبنا بالقاعة و نروح للنادي

- انتظرك هنا اخذ كتبي وياك

رحت للقاعة جنة واگفة بالممر بين الاستولات ظهرها على الباب بقيت واگف انتظرها تفسح مجال

- الو سيناا وينج ادگ عليج ماكو

- مادري حب جان صامت

- من الصباحيات صامت شعندج

- هو اني غير امي تلعب بالجهاز تحير شتسوي بالاعدادات

- شوكت تجين مو گلتي امرلج

- اي اليوم امرلج حبي

نمدت ايد من جانبي و شمر كتب قززني التفتت وراية

مجد - العفو

جان كلش قريب مني سكت و صفن بعيوني  ارتبكت نزلت عيوني و درت على ستولي ردته بس يروح حتى اخذ النفس براحة ،  طلع اخذت نفس عميق

طلعت من القاعة دايخ اول مرة اشوفها بهذا الجمال ، او يمكن مجنت منتبه قبل ، رحنا للنادي اتريگنا و رجعنا للبناية ازدحام ماكو محط رجل دگ جهازه وگفنا صفح

بانفعال - صفاء اخذ انمار وياك معليك بابو  وصله بطريقك ماشي

صافن على فهد و عيونها ببالي عقلي مو براسي ،  احس مار بهاي اللحظة عيونها مو غريبات احسها معرفة و من زمان ، يحجي بالموبايل و طگلي اصبعه گالي شبيك اشرتله مابية

- مو يخلص دوامي متاخر خوما ينتظر وحده بالشارع انت ودي و جيبه

سينا بنص الازدحام تدردم - ادري الشعب كله طب اسنان ،  العفو اخوية ،  العفو ممكن

توگف صفح تنتظر الزحمة تخف - انمردنا يربي
تدفعها بنية يتخلخل توازنها تستند بيدها على ظهر فهد تعتذر منها البنية ، يدور عليها فهد و الجهاز باذنه يعقد حواجبه باستغراب ،  تباوع عليه دتعتذر منه تنصدم

فهد - شنو السالفة شجابج هنا؟