#ذنب طاهر الفصل الرابع عشر 14 - بقلم سمو العراق

#ذنب طاهر...بقلمي«سموو العراق»😘

البارت14....

لأنك كسرت قلبي
لأنه أصبح من السهل عليك جرحي
سأرحل لأنه لم يعد لي مكاناً في عالمك
أرايت ما أوصلتني إليه
سأتركك تعيش في أوهامك وخيالاتك
سأتركك علك تجد الراحه في بعدي
لقد سئمت اللوم والعتاب والفراق
سئمت الحيره والقلق والخوف
سئمت العذاب والـــ آآآآآآآآآآه
لم اعد احتمل تلك الدموع التي لاتفارق عيناي
لم اعد احتمل شعورك بكل هذا الكم من العذاب

جلال بصرااخ وعصبيه/...ليش مكلتي من البدايه ليش خليتني اخذه الاهلي يالله حجيتي مصطفئ انسي مااكدر ارجعه مااكدر اطلع كدام اهلي جذاب

هزت راسها بعدم تصديق ودموعها غرقت وجهها الصغير وهمست/...بس اني زوجتك

همس الها بهدوء ونزل راسه المستواها/..طلكتج

فتحت عيونها مصدوومه منه/..جذاب مطلكتني جذاب ماسمعتك رميت عليه يمين الطلاك

جلال بجمود/...عاادي غيابي مو اله تسمعين..

هزت راسها بعدم تصديق وعيونها بعيونه وبلعت ريقها بصعوبه/... طط طلكتني

سكتت...

شافت سكوته يدل على صدقه انهارت بعصبيه وهي تضرب بصدرة وتصررخ/...شنوو واذا طلكتني وطلكتهم اصلا اني مااريدك اريييد مصطفئ جيب مصطفئ والله ترجع مصطفئ وغصبا عليك اريد ابني

لزم اديها بعصبيه /...لج مو انتي الكلتي اريد اخويه ومااريد ابني

ضلت ترجف وهي مصدوومه من كلامه القاسي شلون جرحها وهو يذكرها بتخليها عن ابنها...
حاولت تتنفس لكن حست الاوكسجين قل وتنفسها ضاق فتحت فمها وهي تتنفس بصعووبه واديها خدرت وايدها انعوجت صررخت مرعوبه من حالته هذي ثاني مرة تصير بيها هيج كل ماتنقهر يصير خدر بكل جسمها وتحس بتجلط وكعت كدام رجليه وهي فاتحه عيونها وتبجي واصابعه تعوجت..

انصدم من حالتها رفعها من الارض وشالها كعدها علئ القنفه وهي ترجف لزم ايدها وهو يدفي بيها ويفرك بيها يرجع الدم الها ويمسح دموعها...وام علاء تخبلت عليها وضلت تبجي...

جلال بعصبيه...ام علاء بسرعه جيبي مي...

ركضت جابت مي بسرعه ونطته اله...اخذه منها وحاول يشربها لكن هي رفضت متريد تشرب من ايده اخذ شويه مي وغسل وجهه وهو يهديها

جلال وهو حاضنها/...كاافي اهدي اهدي..

ورود بشهقات/...ماا اهدئ اله ترجع مصطفئ اهئ.

جلال حضنها بحنان/...اوك ميصير خاطرج اله طيب

ابتسمت بتعب وهي بحظنه/..صدك..

جلال بحيرة/...اي...

بعدت خجلانه منه عدلت حجابها بعد هو صار طليقها لايمكن تنزع حجابها كدامه ولا يصير موقف محرج وياه. ابتعدت عنه لكن هو سحبها ورجعها الوضعها..

همس الها/...ارجعي انتي تعبانه...

ابتعدت زعلانه وهي تدفعه لكن هو ثبتها..ورود بعصبيه/...عووفني حرام عليك انت زوجي السابق

ابتسم عليها وهمس الها/...زوجج السابق كولي طليقي ليكون ناويه تزوجين واصير اني السابق..

ورود بحده /...اي اتزوج عندك مانع وبعدين والله والله اذا مرجتعتلي مصطفئ اسووي فلووك

جلال لزمها من فكها بعصبيه/...لا تهددين ترة والله والله اسفرج غصبا عنج ولا اهتم الدمعه من دموعج

ورود بخوف وهبطه/...انت ترجع مصطفئ لو لا

جلال بتنهيده/....اوووف

ورود ببكاء/...هاااا تجذب عليه مترجعه.

جلال بصدق/...شوفي ورود مال مصطفئ يرجع من سابع المستحيلات

بجت بصوت عالي وهي تتوسله/...لا لا جلال فدوة اروحلك اريد مصطفئ اصيرلك خدامه بس رجعه لاتضحك عليه مااكدر افاركه والله

جلال بجمود/...خليني الكه حل واجيبه الج...

باست ايده بتوسل وهو سحبها بسرعه/...الله يخليك جلال لا تغدر بيه بس خلي يرجع مصطفئ...

جلال/...ان شاء اللة...
عافها وطلع ضلت تبجي لما حست يضحك عليها ويجاريها اجت ام علاء كعدت يمها وحظنتها...

ورود ببكاء/...ام علاء اخاف ميرجعه...

ام علاء/...اوووف يا ورود قصتج قصه..

راحت الغرفتها نامت على فراشها وهي تحظن ثوب ابنها وتبجي دعت ربها يرجع الها ابنها ولا تتيتم تحس صدوك صارت يتيمه من بعد مصطفئ وشاب الراس ابنها الغالي ضناها طالع من كلبها انحرمت من بدون ذنب وكل اذنوبها طاهرة نامت موجوعه مقهورة وثوب ابنها وريحته الاثيرة علئ وجهها....
***********************************
كانت عبير كاعده علئ السرير وهي لابسه تراك برموده اسوود واطرافه احمر وبالوسط بزونه بالون الاحمر وحاطه حمرة حمرة فاقعه وشعرها لامته بعشوائيه كانت ماده رجليها وحاطه مصطفئ عليهن وهي تلعب بي وتهز برجليه...

عبير بدلع/...صووفايتي حياااتي ياعمري اموواح شنوو هل شفايف الحلوووة امووع اني..

الطفل جان ينظر الها ببراءه وهو يرمش بعيونه ومايبتسم جااامد بس يبرطم بشفايفه وكأنه يريد يبجي...

ديانا كاعده يمها علئ السرير وهي فرحانه بالطفل وبتساؤل/...اكووولج باجي اشوو ميشبه اي واحد بينه ولا حتئ يشبه باجي رموش واطفالها

عبير بتركيز بوجه مصطفئ/...لا بس بي شويه شبه من جلال...

ديانا/...بس شفايفه عبالك شفايف بنات يجنن

عبير /...لان بعده طفل هيج شفايفه حلووة.

هو يباوع عليهن ويرمش بعيونه ويبرطم...

ديانا بحب/...اوووي فديت العيون اليكبسن يجنن بس احسه دا يريد يبجي؟؟

عبير /...يمكن جووعان ؟؟

ضل يبجي بصوت عالي...«اوووا اوووا هيج صوت الاطفال موو😂»

كامت ديانا تركض ملهووفه طلعت مميته غسلتها وعقمتها بسرعه حطت اله رقمين مي مقطر ورقم واحد حليب نوفيلاك الطبي وخبطتها وانطتها العبير عبير شالته وحطته بحظنها وحطت الممه بحلكه وضل يرضع بهدوء وهو مايعرف شنو الجاي يصير..
************************************
طلعت من غرفتها ملهووفه وتبجي...لاكتها ام علاء

لزمتها وكعدتها/...شبيج ورود؟؟؟

ورود ببكاء وهي تحط ايدها على صدرها/..ام علاء صدري يوجعني ويدر حليب وين مصطفئ يجي يرضع والله صدري مورم وموتني...

ام علاء حضنتها/...يااا سوده عليه حتئ مصخنه هاي لان الحليب مطل

ورود بنحيب/...هسه شيكول مصطفئ امي ماتت ومترضعني...كون ميته ولا مسويه هيج

ام علاء باستها ومسحت شعرها/...كولي يالله عمرج طوويل حبيبتي

ورود ببكاء/..ابني بعيد عليه هسه منوو يهتم بي اكيد عبير يكبر ويكولها ماما واني منكورة هناا اريده ام علاء اريده...

ام علاء/...الله كريم الله يرجعه الحظنج...

ورود/...امييييين والله اصير خدامه ابوس الرجلين بس كوون يرجع بس اشوفه واحظنه واشمه بس هو ابوو طلكني مايريدني اكيد مصطفئ حيتشتت بيني وبينه..

ام علاء/...ميخالف حتئ لو يجيبه الج بالسنه حسنه لا ترفضين انتي تحتوينه بحنانج ويضل يحبج وبلكي ينكشف السر ويرجعلج ديري بالج ترفضين وتخسرينه مفهووم ورود؟؟

ورود بقبول وحيرة/...اي مفهوم مفهوم بس خلي يوعدني يجيبه الي قابله بكل شئ....راح احتويه ومن يكبر ويفهم اكله اني امك بدون محد يعرف حتئ يضل يحبني...

ابتسمت عليها/...هوو انتي منوو ميحبج حتئ ابنج يحبج...

ورود بعبرة وبكاء/...اني مااحب روحي احس نفسي حقيييرة

ام علاء حضنتها وهي تمسح علئ ضهرها وشعرها وتبوس بيها وتهديها.....
************************************

عند حسين جان بالجيش لازم واجب باليل بمنطقه تل اعفر المكان مضلم ويخووف وجماعته نايمين بكرفانات والهمر قريبه عليهم الساعه ب12يخلص واجبه ويجي غيرة يلزم واجب...جان هو واصدقائه والوياه نفس الواجب مترقبين اي حدث طارئ ومحظرين اسلحتهم....بعدها دكت الساعه 12. وخلص واجبه واجه وقت استراحته دخل للكرفان غسل وبدل ولزموا واجب وجبه جديده فرش فراش ونام قبل لا ينام دخل للفيس شاف ديانا منزله منشوور استغرب وقراه...

«هلاووو صديقاتي الحلوات الجكومات اليوم وصل ولي العهد خطيبي المستقبلي ابو خدود ورديه وشفايف حمر صووفي خطيبي الحلووو باركولي😘😘.. بس اشوف عدد مباركاتكم وفرحتكم ويايه انزل صورته😍 احبكم قلبوشاتي....»

حسين ضااج ضحك بااستهزاء....اهاااا نخطبت دنوو اي طبعا يلكفونها لكف حلوة ام كفشه..لازم بعد مااراسلها صارت علئ ذمه شخص ثاني الله يسعدها

نام علئ فراشه وهو يحس بضيق وماكدر اله يراسل ويغثها...كتب الها...

«مبروووك منج المال ومنه العيال وروح ابوويه كوولش فورحتلج...»

عاف الموبايل وغطا وجه وجاي ينام وصلت رساله منها..كاتبه«الله لايبارك بيك شنو منج المال ومنه العيال قابل هوو بنيه؟؟»

قرة رسالتها وضحك كتب الها..« علئ كيفج ليش زعلتي ترة اني مغلطان واكيد ختيبج بي انوثه اكثر من هيفاء وهبي اذا خدودة ورديه وحلكه احمر اكيد من جماعه ماما غطيني وستايلي »

ديانا/...هههههه مضحك 😒😒

حسين/...منوو كلج اضحكي بس الله عليج شنوو اسمه معقوله صوفي يعني مصطفئ بس اني متاكد اسمه سرموودي وجاي اتخايل شكله ضعيف وشواربه مكرطفه ومااااايع

ديانا/...عابتلك تروح فدوة الصوفي ابو خدود ورديه مو مثلك الاملح وبعدين منين دا تعرف الفيس مالتي

حسين/...الاملح وابن الملحه تااج وعلم احسن من المايع الضال بس ياكل وينام ابن الملحه لو ماهو جان سحلوكم سحل الملح صار املح من الساتر والتعب

ديانا/...ليش انت شنو دا تشتغل؟؟

حسين بقهر منها/..عسكري بتل اعفر ولازم واجب يالمايعه خطيبت المايع...

ديانا/..اني كوولش احتروم العسكريين لان عموو عسكري....يالله احترمتك ههههه

حسين/...ضحكتي بدون سنون ان شاء اللة ماعايز الاحترامج...

ديانا بعصبيه/...عابتلك😡😡

حسين رد عليها لكن هي مجاوبت ضل يضحك عليها وقرر بعد ميتصل،بيها ويراسلها خلاص هي مخطوبه بس صار عنده فضول يشوف شكل خطيبها صدوك مثل مااتخيله؟؟....
""""""""""""""""""""""""""""""""""""""""""
جان كاعد هو وابن اخووو بالاستقبال ويشربون جاي

مراد بمرح/...حلوو صوفي يجنن شكله بريئ

جلال ببتسامه/ّ..اي يشبه امه هم شكلها بريئ.

مراد بااستغراب/..منيلها خشمها شكبرة لو مابيضه جنه عبده.

جلال برفض/...لا حلوة تجنن وانت وين شايفها؟؟

مراد/...شنوو وين شايفها غير عمتي رموش هي.

جلال استوعب/...هههههه لك ليش تحجي على رموش بالعكس حلووة

مراد بضحكه/...ههههه كل من وذوقه.

جلال تذكر ورود وقضيتها وتذكر المشتمل او الملحق التابع البيت ابو مراد وصارله سنين متروك قرر ياجرة ويكعد ام علاء ورود بيها...

جلال بهدوء/...مراد المشتمل الموجود ببيتكم ليش ماتجرة وتكسب منه مبلغ زين بدل ما متروك صارله سنين حاول تستثمرة

مراد/...منوو ياجرة هو صاير ببدايه الحديقه يعني مو منفصل العالم تريده مفصول عن بيتنه..

جلال/...اكوو مرة وبنت اختها مهجرين وتريد مشتمل وهي منتسبه بالجيش وياي ووصتني اذا تريد اجرة الهم همه ماعدهم عائله عائلتهم صغيرة ومراح يدمرون المشتمل...والمبلغ التطلبه يوافقون عليه

مراد بقبول/...عادي جيبهم خليهم يااجروا اذا وافقوا خلي يكعدون بي والمبلغ مو مهم

دخلت ديانا شايله مصطفئ حاطته بعش مالت اطفال وممكمط لابس تشيرت ابيض ومطرز باازرك وبجامه بيضه واطرافها مطرزة باازرك...

ديانا قربته من جلال وتحجي بصوت طفولي/.. بابا حبيبي اليوم مشفنااك دا نريدك مشتاقين

جلال اخذه منها وهو يضحك/...هههههه ياروح بابا ولا مشغوول ان شاء اللة ايامي كوله الك

ضل يبوس بيه ويشمه ويلعب بي وولد اخوو يضحكون بمصطفئ العاقد النونه ومايضحك....
************************************
كعد الصبح من النوم راح غسل وتريك وراح يصير واجبه فتح موبايله قبل لا يصير الواجب دخل علئ فيس ديانا يريد يشوف خطيبها....شافها ناشرة صورتها بس جسمها وحاطه مصطفئ بحظنها وجان شكله يجنن خدوده حمر وابيض ومدبدب وخدوده ورديه وهو يباوع علئ الكاميرا ببراءه وكاتبه ...

«هذا خطيبي صوفي ابو خدود ورديه ولي العهد الجديد ابن عموو جلال حبيبي نهئ عليه اول مااجه للدنيا شنوو رئيكم بي......»

والكل معلق...اوي فديت ...ربي يحفظه ...احلئ ولي عهد ...اووف دنوو شتخلفون بلابل...

حسين ابتسم...خرب يومج واني عبالي صدك انخطبت طلع ابن جلال الله والله فرحتله يستاهل ابو مصطفئ... الحمدلله منخطبت.هههه صار عندي حماس خلي اقفل الموبايل وراح الزم واجب احسن من دنووو وسوالفها...
***********************************
كانت كاعده مقابيله بعد ما عاركته ليش مجاب مصطفئ وصارت الهم ملحمه كعدت هدتهم ام علاء

جلال بتهديد/...شوفي ورود الكلام الراح احجي تقبلين بي زين علئ زين متقبلين قسما بذات الله اسفرج...

ورود بنحيب وهي تمسح دموعها/...شنوو؟:

جلال/..راح اكعدج انتي وام علاء عند بيت اخوي مفهووم؟؟

ورود بعبرة/...يعني شنوو اشتغل خدامه؟؟

جلال بغضب/...خدامه شنوو؟؟ لا هو مشتمل تابع للبيت اريدج تقوين علاقتج ويه ديانا وساعدينهم حتئ من نجي تشوفين مصطفئ وحتئ تكدرين تجين البيتي هم تشوفي وتاخذينه يمج من نجيهم
وهماتين اني راح اتفق وياهم كل شهر اخذه البيت رموش وبدل مااخذه الرموش اجيبه الج وخلي 3ايام اسبوع اقل اكثر بكيفج...

ورود ببكاء/..والله ماريحتني ياجلال ماكوو ام ترضئ بهذا الحجي حرمتني من ابني مامبري الذمه اليوم الدين والله جنت احبك بس هسه كرهتك حييل

جلال رجف كلبه من كلمه احبك/...احاول قدر الامكان مااضلمج كتلج راح يكون مصطفئ بيني وبينج والله كريم...

ورود بعبرة/...وهسه مصطفئ شلونه مشتاق الي،لو لا هم يبجي عليه لو بس اني ابجي عليه...

جلال بحزن على حالها وتنهيده/ّ..الحمدلله زين وباجر حظروا نفسكم اخذكم البيت اخوووي

نهايه البارت .....يتبع.....

متابعه لحسابي فديتكم 😘