رواية ذنوب لاتغفر الفصل التاسع 9 - بقلم Rozaya1122

#البارت الثامن
#ذنوب لاتغفر
#للكاتبه《روزاية》

اول ما اتصلت جاوب ..
.. كال الووووو
.. شلونك ثابت؟؟
.. هلا بتقوى شلونج؟
.. الحمدلله
.. ضلينه ساكتين اثنينه..
.. اليوم شعجب اتصلتي؟؟
.. شفتك ماكو وكل هاي الفتره ما سألت عليه ولاعبالك خطيبتك حتى بيت عمي يسألوني وينه؟؟
.. منو الغلطان اني لو انتي؟؟
.. فوك ما ضربتني راشدي وهنتني فوكاهه اني الغلطانه؟؟
.. شوفي تقوى الي يغلط عندي يتحاسب واضربج اي واكسر  راسج هم..
ديري بالج تغلطين اني كدامج اي مشكله اي شي تريدي اخذي رأي بي ..
مورجل كرسي عند جنابج حته تصرفين بكيفج وفوك كل هذا مامخليه برنامج يعتب عليج والاكثر ضايفه ولد..
وتسأليني ليش ضربتني
لا ما اجي ابوس راسج...

كام يصلي جنه رشاشه ما انطاني مجال افتح حلكي بحرف ...
اريد احجي ويسكتني...

.. بعد ماكمل كلامه ..
.. كتله ها كملت؟؟
.. احجي الي عندج؟؟
.. ماعندي شي
.. حجيت وي عمج على موعد العرس بلكي يتقدم بس الظاهر عمج عربانه ويدفعون بي..

.. ضوجني من حجه على عمي
كتله انت شبيك شو حتى عمي ماخلص منك؟
.. العفو العفو ست تقوى
.. ثابت شجاك وياي؟ فوك ضيمي وقهري ونعيمه مخليتني خدامه الهه وانت هيج تسوي بيه؟
.. الصبر ياربي الصبر..
ولج اني شسويت بيج عصبت وحاسبتج
غالقه تليفونج وماسألتي ولا اعتذرتي وترجعين عليه..
.. خانتني دموعي وخنكتني العبره
كمت ابجي اسمع يتنهد...
كال كافي لاتبجين مسحي دموعج يله ..
وباجر اخابر عمج حته نلتقي..

ما حجيت شي بسرعه سديت التليفون وكمت ابجي ..
هو الي يحب هيجي؟؟ لا يسمعني كلمه حلوه لاشي بس رزايل وكتل..

ثاني يوم كعدت لكيت نعيمه كالبه خلقتهه جنهه بومه ..
صبحت عليهه ماردت..
كلت بكلبي عساج لاتصبحين واخلص منج ..

كمت اشتغل وهي تنطي اوامر
نظفي هاي .. شيلي هاي.. لاتخلين هاي..

حسيت مرارتي راح اطك منهه..
ورا شوي اجه عمي كال صبيلنه غدا ...
كالتله البنات بالمدرسه خلي يجن!!
.. عندي فاتحه ولازم اروح من وقت ..
وانتي تقوى اليوم ثابت خابرني ويريد يشوفج..
وحاولي تحصلين فلوس من عنده ترى هالايام واكع من السطح!

صخونه تلفك وتلف نعيمه يريد فلوس ابو شوارب...
يكول واكع من السطح!! وكعت عليك طابوكات النجف ومايلكولك اثر ..
بله شحجس ويا هذا ؟؟

صبيتلهم غدا وعفتهم يزقنبون وصعدت سبحت وحضرت نفسي...
باوعت على تليفوني لكيت ثابت متصل!!
رجعت خابرته..
كال تحضري جاييج...
لبست تنوره بينصل سوده وقميص وردي ولفيت الشال ماخليت مكياج بس كحل..

اول مانزلت انتظر ثابت جوا..
صاحت بيه نعيمه"
وين موليه بهذا لبسج حاصره جسمج
من هذا وكعتي رجال طول بعرض!!
ماحاجيتهه عفتهه تحجي وطلعت بالحديقه..

حلال علينا حرام عليكم...
شو ماتحاسبين بناتج كل وحده راسهه عماره من القراصه..
وغير اللبس والمكياج بس حضي حجاج ...

سمعت الهورن مال سيارته بسرعه طلعت وصعدت بالصدر...
سلمت علي رد السلام بهدوء..

تحركت السياره ...
.. كال شلونج؟
.. زينه
.. بعدج زعلانه عليه؟
.. مو ادكول ما الج حق تزعلين؟؟
.. اي ماالج حق!!
.. هاهي لعد مراح ازعل..
.. سكت واني سكتت
اخذله شويه وكال وين تحبين انروح؟؟
.. بكيفك
.. لادكولين بكيفك
.. والله ما اعرف وين اروح وما اندل هواي انت بكيفك..
يسوق وميل جسمه عليه ويباوعلي بنظرات
كلبي جنه ورقه بسرعه يتأثر..
كمت ابعد نظري عنه...

.. راح اخذج لمكان بس لاتخافين بس نشوفه ونطلع
.. وووين؟؟
.. راح نوصل وتعرفين...
حاولت اعرف وماقبل دقايق ووكف السياره اباب بيت مبين بناء حديث..
..كال انزلي
.. ماااا
.. ولج تقوى انزلي شوفي البيت ونطلع ثقي بيه..
.. نزلت بس جنت ارجف خاف  يكتلني..
.. فتح الباب الخارجي ودخلنه حديقه بسيطه مبينه بيهه زرع جديد..
الكاشي علي تراب ..
فتح باب المطبخ ودخلنه ...
فارغ ماكو شي بالبيت ماعدا ميز طعام و4 كراسي..
ودرج ومواعين بلاستيك واغلفه مال براكيتات وكارتونات فارغه...
التفتت علي ..
.. ثابت هذا بيت منو؟؟
.. بيتنه...
.. وشوكت بنيته؟؟ شو ما ادري ولا فاطمه كالت
.. محد يدري اني ماناوي اكعد وي اخوتي
اجيب امي وفاطمه ونكعد وحدنه...

احس بفراحه بداخلي وكمت افتر بالغرف وحده وحده ..
كلش حلو التصميم بس اثاث ماكو...
نسيت نفسي ومن فرحتي ركضت علي حضنته حسيت بأيدي حوطتني وضمني لصدره حيل...
بعد راسي عني وباسني من كصتي..
كلش فرحانه جنت ..
اتمنيت هاي الدقايق ماتخلص لأن اعرف مايدوملي الفرح..

جرني من ايدي وكعدنه على الكراسي ويتغزل بيه ويسولف وكلساع يبوسني من خدي ..
واني ذايبه بي وبحنيته...

طلعنه من البيت واني احس نفسي اسعد وحده..
بالطريق مرينه على المطعم ... واشترالي شكم قطعه ملابس...
خفت انزل ونفتر بعد
لانتأخر وشيخلصني من نعيمه..
جابلي عشا سفري...
رجعنه للبيت وهو طول الطريق لازم ايدي ويبوس بيهه...
بس كل هذا واحسه مو من كل كلبه
لو اكول خاف يضحك عليه؟؟

نزلت من يمه وطبيت جوا تلكتني نعيمه...
ترزل وتغلط ليش متأخره وبناتهه يسكتن بيهه ويغمزلي عود لاتحجين...
اني هم سكتت صعدت لغرفتي بدلت وكعدت ..
اجني غاده وغسق يعتذرن بمكان امهن ..
كتلهن عادي متعوده...
ضلينه نسولف ونتشاقه وحجيتلهن على طلعتنه...
وتعشن وياي ...وشوفتهن شنو اشترالي...

صارت الساعه ب11 تقريبا مددت بفراشي وكمت العب العاب بالتليفون...
كام يدك بأيدي شفته ثابت...
جاووبته...
اجاني صوته هادئء حيل...
.. هاحبيبتي..
.. هلو حبيبي
.. شدتسوين..
.. سولفتله من رجعنه شسويت لحد هسه..
ضلينه نحجي ونتغزل..
واني رايحه بعالم ثاني طايره بعالم ثابت ..

نمت على صوته واني مرتاحه اتمنى نتزوج باقرب وقت حتى اخلص من نعيمه وسوالفهه...

ثاني يوم كعدت بكامل نشاطي..
تنظيف وغسل وطبخ فرحانه حيل..

وكلساع نتخابر اني وثابت...
مرت على خطوبتنه 3 اشهر...
وعمي بعده رافض اتزوج ما اعرف شنو غايته وشكد حجز ويا يكول اني من الاول اتفقت وياكم ..
ماتزوج هسه لان بعدهه زغيره..

هسه انت بليتني زغيره وزغيره
شعليك انت اكو احد شاكيلك اني زغيره ..
بس هاي سوالف نعيمه تريد ادك شغل فوك راسي..

بيوم منهن اجت فاطمه كالت مسوين ثواب لا ابويه وبمناسبه ترقيه اخويه عامر ..
وابتهال يمنه جابت ولد ...
وتعالي ويانه كلت لثابت استأذن من عمج...
واني هم كلت لنعيمه بلاول ماقبلت بس لان عمج كايل لثابت خلي تروح...
واتحضري وتأنقي لان كرايبنه هواي وكلهه تريد تشوفج..

هلا هلا فد فرحت حتى اروح اتفيك عليهم
خطيبه ثابت وعدهم كرايب هوااايه..
طلعت فاطمه واني شلتهه ركضه للغرفه...
كمت اطلع بالملابس واذب ما اعرف شلبس؟؟
خلي اروح اسبح وتجي غاده تنسقلي ...
رحت سبحت ومشطت شعري...
اجت غاده بدت تحضرلي...
واسمع نعيمه واحد وضاربهه على راسهه اتخبلت ...

طلعت الملابس كلهه وماعجبني كلهن قديمات
تقنع بيه غاده اختار منهن واني متخبله
كلهن قديمات من جان الاعدام كرص...

ضليت حايره شلبس بعدين تذكرت الي اشترالهن الي اخر مره..
نفنوف بصلي وعلى ارداناته كيبور..
لبسته وخلتلي غاده مكياج خفيف طلعت شكل ثاني وكلساع انطي بوسه لنفسي...
دا البس بالشال واتصل ثابت حجيت ويا كال اجي اخذج؟؟لوبعد..

كتله اي تعال كملت...
لبست الشال على السريع واخذت جنطتي ونزلت اطك بالكعب احسه يطك براس نعيمه وهي تخزر بيه...
اندك الباب وطلعت لكيته واكفلي لابس دشداشه بيجي..
ابتسمتله ...
اكلني اكل بنظراته حته خجلت ..
امشي ويتغزل بيه ويدندن باغنيه..

شحلو طولك من تمشي وانا راك ...

كتله استحي ادخل وحدي كال فاطمه تتلكاج..
طبينه سوه ويسولف وياي ويتشاقه ..
تلكتني فاطمه ومرت علي ام مريم..
سلمت عليهم ورحت وياهن للصاله شكد نسوان..
كمت اسلم عليهم وحده وحده وفاطمه كالتلهم هاي خطيبه ثابت وهن يصلن على النبي...

واني عود اتيكيت وابوس بهدوء واحرك بس شفايفي وارمش بعيوني...
كعدت يم خالتي ام ثابت وهن يباوعلي..
شكم وحده شفتهن ماعاجبهن الوضع ويباوعن صفح ويحجن بيناتهن...
اجتني مريم زوجه عامر اخذتني وياهه للمطبخ ما سويت شي بس يشتغلن ويسولفن واني كاعده اباوعلهن...

دخل  ثابت مدري شيدور اشو كلهن سكتن ولا وحده فتحت حلكهه وعم الهدوء ..
تفاجأت حيل شنو هذا الهدوء وليش هلكد يخافن من عنده ..
ضلن ساكتات مع العلم جانن يحجين بسوالف عاديه ...
مدري وين راح ورا شوي طلع ...
عادي رجعن يسولفن ويضحكن ...
لاحضتهن اكثر من مره من يشوفنه يسكتن ومن يطلع عادي...
زين شنو السبب ومعقوله هلكد يخوف اني اشوفه عادي!!

قبل مايصير وقت العشا كملن شغل وكعدنه بالصاله
كل مجموعه ملتهيه تسولف...
اني كاعده يم بنات علي وبنات عمهم...

اكو وحده كلساع تفوت وتفر بحلكهه وبس تباوعلي صفح جنهه بعير سكران..

اني ما اهتميتلهه...
اخر شي كامت تسمعني حجي عود انس مامثقفه ومادارسه...
بوقتهه حيل ضجت ...
وفاطمه انتبهت عليه حاولت تغير الجو واني ضليت ضايجه..

اول ماصبو العشا صاحتني عمه ثابت يكلولهه ام عصام رحت كعدت يمهه ...
بدت الناس تاكل واني كلش خجلانه احس الكل يباوعلي...
اريد وحده  تكوم حتى اكوم  وراهه ...
اذا هن مجاعه افريقيا كل وحده لفتهه شكبرهه ياكلن ويحجن ...

هاي العائله تموت على الاكل والعزايم...
شفت وحده كامت واني كمت وراهه ...
ردت اروح للمغسله اغسل شفت ثابت يم السنك اشرلي تعالي...
غسلت ورحت يمه واكف يريد ياخذ الجاي...
..كالي تعشيتي؟؟
.. اي الحمدلله
.. عوافي.
..الله يعافيك وانت تعشيت؟
.. اني ما اكل بالليل الا شي خفيف...
.. بعدنه نسولف اجه البعير السكران...
شافتنه وطلعت..
.. كتله منو هاي؟؟
.. هاي بنت اخت مرت ابوي ام علي..
.. بس تباوعلي صفح وتسمعني حجي...
.. شسمعتج؟؟
.. تحجي على الثقافه والدراسه وكلما تفوت تفر بحلكهه..
.. خليهه تغار منج.. لاتهتمين ترى كرايبي خير من الله ..
.. ابتسمتله كتله خلي اروح وصلني لانعيمه تتخبل عليه ...
... لا اني كلت لعمج بالليل اجيبهه تضل وي فاطمه ولادكليلي نعيمه ترى ابتلي بيج وبنعيمه..
.. وووي ثابت شجاك عصبي محد يكدر يحاجيك؟؟
.. كلما حجيتي وكلتي نعيمه والله ترى اخذج من الصبح ولانعيمه  ولاغيرهه ..
... اي يله بعد ما احجي بس صوتك لحد يسمعنه..
.. اجت فاطمه كالهه ديربالج على تقوى والله اذا عكارب هيام سمعنهه حجايه!!

.. لا لتخاف بس على كيفك شدعوه هلكد عصبي راح تهلك نفسك..

ماحجه شي خله وطلع ضليت صافنه هذا شجا؟
كتلهه فاطمه ثابت شبي اشو كلكم تخافون منه ومن يجي تسكتون وعلى اقل شي يصير عصبي...

.. لاحبيبه هو طبعه هيج وهو مايحب واحد يحجي على الناس وتدرين بسوالف النسوان كلهه نميمه ..

مادخل كلامهه براسي اكو سر بالموضوع بس الكل متحفظ ومحد يحجي..
كامن يغسلن مواعين وهوسه وصوت ضحك وسوالف ...
وبدت كرايبهم تروح واني بالي يم نعيمه اليوم شيخلصني منهه وهذا ثابت مايتحاجه!!

هاي البومه كرايبهم راحت وارتاحيت منهه شوي وصاحتني فاطمه كالت تعالي اشوفج غرفه ثابت...
صعدت وياهه نفس المكان الي رزلني بي بفاتحه ابو واني صافنه بوجهه...
طبيت لغرفته غرفه هادئه حيل وكامله عبالك مال متزوجين...
الوانهه غامقه وفرشه ستن وبارده...
عطور مخلي على الميز وساعه فضيه نازعهه وسويج سياره...
التفت فاطمه ماكو عافتني وطلعت ..
فتحت الكنتور شفت ملابسه معلكه وكلهه مرتبه مبين من النوع الصعب ونظامي..
اكو صوره على الميز ماله ابو ...
اكو لوحه كولش حلوه فوك راسه
ولد وبنيه كاعدين على مرجوحه والبنيه شبه عريانه
حتى لوحاتك منحرفه مثلك..
شكد يحب الانحراف هذا؟؟
واني بعدني افتر بالغرفه واستكشف...
حسيت على سدة الباب...

التفت شفته واكف ومرتجي على الباب ويباوعلي...
ردت اطلع منعني كال وين وين؟؟
وجرني من ايدي....

#يتبع